੧੨. ਦੁਬ੍ਬਚਸਿਕ੍ਖਾਪਦਂ

੪੨੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਛਨ੍ਨੋ ਅਨਾਚਰਂ ਆਚਰਤਿ. ਭਿਕ੍ਖੂ ਏਵਮਾਹਂਸੁ – ‘‘ਮਾਵੁਸੋ, ਛਨ੍ਨ, ਏਵਰੂਪਂ ਅਕਾਸਿ. ਨੇਤਂ ਕਪ੍ਪਤੀ’’ਤਿ. ਸੋ ਏਵਂ ਵਦੇਤਿ – ‘‘ਕਿਂ ਨੁ ਖੋ ਨਾਮ ਤੁਮ੍ਹੇ, ਆਵੁਸੋ, ਮਂ ਵਤ੍ਤਬ੍ਬਂ ਮਞ੍ਞਥ? ਅਹਂ ਖੋ ਨਾਮ ਤੁਮ੍ਹੇ ਵਦੇਯ੍ਯਂ. ਅਮ੍ਹਾਕਂ ਬੁਦ੍ਧੋ ਅਮ੍ਹਾਕਂ ਧਮ੍ਮੋ ਅਮ੍ਹਾਕਂ ਅਯ੍ਯਪੁਤ੍ਤੇਨ ਧਮ੍ਮੋ ਅਭਿਸਮਿਤੋ. ਸੇਯ੍ਯਥਾਪਿ ਨਾਮ ਮਹਾਵਾਤੋ ਵਾਯਨ੍ਤੋ ਤਿਣਕਟ੍ਠਪਣ੍ਣਸਟਂ [ਤਿਣਕਟ੍ਠਪਣ੍ਣਕਸਟਂ (ਕ.)] ਏਕਤੋ ਉਸ੍ਸਾਰੇਯ੍ਯ, ਸੇਯ੍ਯਥਾ ਵਾ ਪਨ ਨਦੀ ਪਬ੍ਬਤੇਯ੍ਯਾ ਸਙ੍ਖਸੇਵਾਲਪਣਕਂ ਏਕਤੋ ਉਸ੍ਸਾਰੇਯ੍ਯ, ਏਵਮੇਵ ਤੁਮ੍ਹੇ ਨਾਨਾਨਾਮਾ ਨਾਨਾਗੋਤ੍ਤਾ ਨਾਨਾਜਚ੍ਚਾ ਨਾਨਾਕੁਲਾ ਪਬ੍ਬਜਿਤਾ ਏਕਤੋ ਉਸ੍ਸਰਿਤਾ. ਕਿਂ ਨੁ ਖੋ ਨਾਮ ਤੁਮ੍ਹੇ, ਆਵੁਸੋ, ਮਂ ਵਤ੍ਤਬ੍ਬਂ ਮਞ੍ਞਥ? ਅਹਂ ਖੋ ਨਾਮ ਤੁਮ੍ਹੇ ਵਦੇਯ੍ਯਂ! ਅਮ੍ਹਾਕਂ ਬੁਦ੍ਧੋ ਅਮ੍ਹਾਕਂ ਧਮ੍ਮੋ ਅਮ੍ਹਾਕਂ ਅਯ੍ਯਪੁਤ੍ਤੇਨ ਧਮ੍ਮੋ ਅਭਿਸਮਿਤੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਛਨ੍ਨੋ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਛਨ੍ਨਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਛਨ੍ਨ, ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਸੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੪੨੫. ‘‘ਭਿਕ੍ਖੁ ਪਨੇਵ ਦੁਬ੍ਬਚਜਾਤਿਕੋ ਹੋਤਿ ਉਦ੍ਦੇਸਪਰਿਯਾਪਨ੍ਨੇਸੁ ਸਿਕ੍ਖਾਪਦੇਸੁ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਤਿ – ‘ਮਾ ਮਂ ਆਯਸ੍ਮਨ੍ਤੋ ਕਿਞ੍ਚਿ ਅਵਚੁਤ੍ਥ ਕਲ੍ਯਾਣਂ ਵਾ ਪਾਪਕਂ ਵਾ, ਅਹਂਪਾਯਸ੍ਮਨ੍ਤੇ ਨ ਕਿਞ੍ਚਿ ਵਕ੍ਖਾਮਿ ਕਲ੍ਯਾਣਂ ਵਾ ਪਾਪਕਂ ਵਾ, ਵਿਰਮਥਾਯਸ੍ਮਨ੍ਤੋ ਮਮ ਵਚਨਾਯਾ’ਤਿ, ਸੋ ਭਿਕ੍ਖੁ ਭਿਕ੍ਖੂਹਿ ਏਵਮਸ੍ਸ ਵਚਨੀਯੋ – ‘ਮਾਯਸ੍ਮਾ ਅਤ੍ਤਾਨਂ ਅਵਚਨੀਯਂ ਅਕਾਸਿ, ਵਚਨੀਯਮੇਵਾਯਸ੍ਮਾ ਅਤ੍ਤਾਨਂ ਕਰੋਤੁ, ਆਯਸ੍ਮਾਪਿ ਭਿਕ੍ਖੂ ਵਦੇਤੁ ਸਹਧਮ੍ਮੇਨ, ਭਿਕ੍ਖੂਪਿ ਆਯਸ੍ਮਨ੍ਤਂ ਵਕ੍ਖਨ੍ਤਿ ਸਹਧਮ੍ਮੇਨ. ਏਵਂ ਸਂਵਦ੍ਧਾ ਹਿ ਤਸ੍ਸ ਭਗਵਤੋ ਪਰਿਸਾ ਯਦਿਦਂ ਅਞ੍ਞਮਞ੍ਞਵਚਨੇਨ ਅਞ੍ਞਮਞ੍ਞਵੁਟ੍ਠਾਪਨੇਨਾਤਿ. ਏਵਞ੍ਚ ਸੋ ਭਿਕ੍ਖੁਂ ਭਿਕ੍ਖੂਹਿ ਵੁਚ੍ਚਮਾਨੋ ਤਥੇਵ ਪਗ੍ਗਣ੍ਹੇਯ੍ਯ, ਸੋ ਭਿਕ੍ਖੁ ਭਿਕ੍ਖੂਹਿ ਯਾਵਤਤਿਯਂ ਸਮਨੁਭਾਸਿਤਬ੍ਬੋ ਤਸ੍ਸ ਪਟਿਨਿਸ੍ਸਗ੍ਗਾਯ. ਯਾਵਤਤਿਯਞ੍ਚੇ ਸਮਨੁਭਾਸੀਯਮਾਨੋ ਤਂ ਪਟਿਨਿਸ੍ਸਜ੍ਜੇਯ੍ਯ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜੇਯ੍ਯ, ਸਙ੍ਘਾਦਿਸੇਸੋ’’ਤਿ.

੪੨੬. ਭਿਕ੍ਖੂ ਪਨੇਵ ਦੁਬ੍ਬਚਜਾਤਿਕੋ ਹੋਤੀਤਿ ਦੁਬ੍ਬਚੋ ਹੋਤਿ ਦੋਵਚਸ੍ਸਕਰਣੇਹਿ ਧਮ੍ਮੇਹਿ ਸਮਨ੍ਨਾਗਤੋ ਅਕ੍ਖਮੋ ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਂ.

ਉਦ੍ਦੇਸਪਰਿਯਾਪਨ੍ਨੇਸੁ ਸਿਕ੍ਖਾਪਦੇਸੂਤਿ ਪਾਤਿਮੋਕ੍ਖਪਰਿਯਾਪਨ੍ਨੇਸੁ ਸਿਕ੍ਖਾਪਦੇਸੁ.

ਭਿਕ੍ਖੂਹੀਤਿ ਅਞ੍ਞੇਹਿ ਭਿਕ੍ਖੂਹਿ.

ਸਹਧਮ੍ਮਿਕਂ ਨਾਮ ਯਂ ਭਗਵਤਾ ਪਞ੍ਞਤ੍ਤਂ ਸਿਕ੍ਖਾਪਦਂ, ਏਤਂ ਸਹਧਮ੍ਮਿਕਂ ਨਾਮ.

ਤੇਨ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਤਿ – ‘‘ਮਾ ਮਂ ਆਯਸ੍ਮਨ੍ਤੋ ਕਿਞ੍ਚਿ ਅਵਚੁਤ੍ਥ ਕਲ੍ਯਾਣਂ ਵਾ ਪਾਪਕਂ ਵਾ, ਅਹਂਪਾਯਸ੍ਮਨ੍ਤੇ ਨ ਕਿਞ੍ਚਿ ਵਕ੍ਖਾਮਿ ਕਲ੍ਯਾਣਂ ਵਾ ਪਾਪਕਂ ਵਾ. ਵਿਰਮਥਾਯਸ੍ਮਨ੍ਤੋ ਮਮ ਵਚਨਾਯਾ’’ਤਿ.

ਸੋ ਭਿਕ੍ਖੂਤਿ ਯੋ ਸੋ ਦੁਬ੍ਬਚਜਾਤਿਕੋ ਭਿਕ੍ਖੁ.

ਭਿਕ੍ਖੂਹੀਤਿ ਅਞ੍ਞੇਹਿ ਭਿਕ੍ਖੂਹਿ. ਯੇ ਪਸ੍ਸਨ੍ਤਿ ਯੇ ਸੁਣਨ੍ਤਿ ਤੇਹਿ ਵਤ੍ਤਬ੍ਬੋ – ‘‘ਮਾਯਸ੍ਮਾ ਅਤ੍ਤਾਨਂ ਅਵਚਨੀਯਂ ਅਕਾਸਿ. ਵਚਨੀਯਮੇਵ ਆਯਸ੍ਮਾ ਅਤ੍ਤਾਨਂ ਕਰੋਤੁ. ਆਯਸ੍ਮਾਪਿ ਭਿਕ੍ਖੂ ਵਦੇਤੁ ਸਹਧਮ੍ਮੇਨ, ਭਿਕ੍ਖੂਪਿ ਆਯਸ੍ਮਨ੍ਤਂ ਵਕ੍ਖਨ੍ਤਿ ਸਹਧਮ੍ਮੇਨ. ਏਵਂ ਸਂਵਦ੍ਧਾ ਹਿ ਤਸ੍ਸ ਭਗਵਤੋ ਪਰਿਸਾ ਯਦਿਦਂ ਅਞ੍ਞਮਞ੍ਞਵਚਨੇਨ ਅਞ੍ਞਮਞ੍ਞਵੁਟ੍ਠਾਪਨੇਨਾ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬੋ. ਤਤਿਯਮ੍ਪਿ ਵਤ੍ਤਬ੍ਬੋ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਭਿਕ੍ਖੁ ਸਙ੍ਘਮਜ੍ਝਮ੍ਪਿ ਆਕਡ੍ਢਿਤ੍ਵਾ ਵਤ੍ਤਬ੍ਬੋ – ‘‘ਮਾਯਸ੍ਮਾ ਅਤ੍ਤਾਨਂ ਅਵਚਨੀਯਂ ਅਕਾਸਿ…ਪੇ… ਅਞ੍ਞਮਞ੍ਞਵੁਟ੍ਠਾਪਨੇਨਾ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬੋ. ਤਤਿਯਮ੍ਪਿ ਵਤ੍ਤਬ੍ਬੋ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਭਿਕ੍ਖੁ ਸਮਨੁਭਾਸਿਤਬ੍ਬੋ. ਏਵਞ੍ਚ ਪਨ, ਭਿਕ੍ਖਵੇ, ਸਮਨੁਭਾਸਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੪੨੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਤਿ. ਸੋ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸਮਨੁਭਾਸੇਯ੍ਯ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਤਿ. ਸੋ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸਮਨੁਭਾਸਤਿ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਮਨੁਭਾਸਨਾ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਕਰੋਤਿ. ਸੋ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸਮਨੁਭਾਸਤਿ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਮਨੁਭਾਸਨਾ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮਨੁਭਟ੍ਠੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੪੨੮. ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ, ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤਸ੍ਸ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤਿ.

ਸਙ੍ਘਾਦਿਸੇਸੋਤਿ…ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੪੨੯. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਧਮ੍ਮਕਮ੍ਮੇ ਵੇਮਤਿਕੋ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞੀ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

ਅਧਮ੍ਮਕਮ੍ਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ.

ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

੪੩੦. ਅਨਾਪਤ੍ਤਿ ਅਸਮਨੁਭਾਸਨ੍ਤਸ੍ਸ, ਪਟਿਨਿਸ੍ਸਜ੍ਜਨ੍ਤਸ੍ਸ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਦੁਬ੍ਬਚਸਿਕ੍ਖਾਪਦਂ ਨਿਟ੍ਠਿਤਂ ਦ੍ਵਾਦਸਮਂ.