੧੩. ਕੁਲਦੂਸਕਸਿਕ੍ਖਾਪਦਂ

੪੩੧. [ਇਦਂ ਵਤ੍ਥੁ ਚੂਲ਼ਵ. ੨੧] ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਸ੍ਸਜਿਪੁਨਬ੍ਬਸੁਕਾ ਨਾਮ [ਨਾਮ ਭਿਕ੍ਖੂ (ਕ.)] ਕੀਟਾਗਿਰਿਸ੍ਮਿਂ ਆਵਾਸਿਕਾ ਹੋਨ੍ਤਿ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ [ਚੂਲ਼ਵ. ੨੯੩] ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ, ਓਚਿਨਨ੍ਤਿਪਿ ਓਚਿਨਾਪੇਨ੍ਤਿਪਿ, ਗਨ੍ਥੇਨ੍ਤਿਪਿ ਗਨ੍ਥਾਪੇਨ੍ਤਿਪਿ, ਏਕਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਮਞ੍ਜਰਿਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਿਧੂਤਿਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਟਂਸਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਆਵੇਲ਼ਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਰਚ੍ਛਦਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਨਂ ਕੁਲਧੀਤਾਨਂ ਕੁਲਕੁਮਾਰੀਨਂ ਕੁਲਸੁਣ੍ਹਾਨਂ ਕੁਲਦਾਸੀਨਂ ਏਕਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਮਞ੍ਜਰਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਿਧੂਤਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਟਂਸਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਆਵੇਲ਼ਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਰਚ੍ਛਦਂ ਹਰਨ੍ਤਿਪਿ ਹਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਸਦ੍ਧਿਂ ਏਕਭਾਜਨੇਪਿ ਭੁਞ੍ਜਨ੍ਤਿ, ਏਕਥਾਲਕੇਪਿ ਪਿਵਨ੍ਤਿ, ਏਕਾਸਨੇਪਿ ਨਿਸੀਦਨ੍ਤਿ, ਏਕਮਞ੍ਚੇਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟੇਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਵਿਕਾਲੇਪਿ ਭੁਞ੍ਜਨ੍ਤਿ, ਮਜ੍ਜਮ੍ਪਿ ਪਿਵਨ੍ਤਿ, ਮਾਲਾਗਨ੍ਧਵਿਲੇਪਨਮ੍ਪਿ ਧਾਰੇਨ੍ਤਿ, ਨਚ੍ਚਨ੍ਤਿਪਿ ਗਾਯਨ੍ਤਿਪਿ ਵਾਦੇਨ੍ਤਿਪਿ ਲਾਸੇਨ੍ਤਿਪਿ, ਨਚ੍ਚਨ੍ਤਿਯਾਪਿ ਨਚ੍ਚਨ੍ਤਿ, ਨਚ੍ਚਨ੍ਤਿਯਾਪਿ ਗਾਯਨ੍ਤਿ, ਨਚ੍ਚਨ੍ਤਿਯਾਪਿ ਵਾਦੇਨ੍ਤਿ, ਨਚ੍ਚਨ੍ਤਿਯਾਪਿ ਲਾਸੇਨ੍ਤਿ, ਗਾਯਨ੍ਤਿਯਾਪਿ ਨਚ੍ਚਨ੍ਤਿ, ਗਾਯਨ੍ਤਿਯਾਪਿ ਗਾਯਨ੍ਤਿ, ਗਾਯਨ੍ਤਿਯਾਪਿ ਵਾਦੇਨ੍ਤਿ, ਗਾਯਨ੍ਤਿਯਾਪਿ ਲਾਸੇਨ੍ਤਿ, ਵਾਦੇਨ੍ਤਿਯਾਪਿ ਨਚ੍ਚਨ੍ਤਿ, ਵਾਦੇਨ੍ਤਿਯਾਪਿ ਗਾਯਨ੍ਤਿ, ਵਾਦੇਨ੍ਤਿਯਾਪਿ ਵਾਦੇਨ੍ਤਿ, ਵਾਦੇਨ੍ਤਿਯਾਪਿ ਲਾਸੇਨ੍ਤਿ, ਲਾਸੇਨ੍ਤਿਯਾਪਿ ਨਚ੍ਚਨ੍ਤਿ, ਲਾਸੇਨ੍ਤਿਯਾਪਿ ਗਾਯਨ੍ਤਿ, ਲਾਸੇਨ੍ਤਿਯਾਪਿ ਵਾਦੇਨ੍ਤਿ, ਲਾਸੇਨ੍ਤਿਯਾਪਿ ਲਾਸੇਨ੍ਤਿ. ਅਟ੍ਠਪਦੇਪਿ ਕੀਲ਼ਨ੍ਤਿ, ਦਸਪਦੇਪਿ ਕੀਲ਼ਨ੍ਤਿ, ਆਕਾਸੇਪਿ ਕੀਲ਼ਨ੍ਤਿ, ਪਰਿਹਾਰਪਥੇਪਿ ਕੀਲ਼ਨ੍ਤਿ, ਸਨ੍ਤਿਕਾਯਪਿ ਕੀਲ਼ਨ੍ਤਿ, ਖਲਿਕਾਯਪਿ ਕੀਲ਼ਨ੍ਤਿ, ਘਟਿਕਾਯਪਿ ਕੀਲ਼ਨ੍ਤਿ, ਸਲਾਕਹਤ੍ਥੇਨਪਿ ਕੀਲ਼ਨ੍ਤਿ, ਅਕ੍ਖੇਨਪਿ ਕੀਲ਼ਨ੍ਤਿ, ਪਙ੍ਗਚੀਰੇਨਪਿ ਕੀਲ਼ਨ੍ਤਿ, ਵਙ੍ਕਕੇਨਪਿ ਕੀਲ਼ਨ੍ਤਿ, ਮੋਕ੍ਖਚਿਕਾਯਪਿ ਕੀਲ਼ਨ੍ਤਿ, ਚਿਙ੍ਗੁਲਕੇਨਪਿ ਕੀਲ਼ਨ੍ਤਿ, ਪਤ੍ਤਾਲ਼੍ਹਕੇਨਪਿ ਕੀਲ਼ਨ੍ਤਿ, ਰਥਕੇਨਪਿ ਕੀਲ਼ਨ੍ਤਿ, ਧਨੁਕੇਨਪਿ ਕੀਲ਼ਨ੍ਤਿ, ਅਕ੍ਖਰਿਕਾਯਪਿ ਕੀਲ਼ਨ੍ਤਿ, ਮਨੇਸਿਕਾਯਪਿ ਕੀਲ਼ਨ੍ਤਿ, ਯਥਾਵਜ੍ਜੇਨਪਿ ਕੀਲ਼ਨ੍ਤਿ. ਹਤ੍ਥਿਸ੍ਮਿਮ੍ਪਿ ਸਿਕ੍ਖਨ੍ਤਿ, ਅਸ੍ਸਸ੍ਮਿਮ੍ਪਿ ਸਿਕ੍ਖਨ੍ਤਿ, ਰਥਸ੍ਮਿਮ੍ਪਿ ਸਿਕ੍ਖਨ੍ਤਿ, ਧਨੁਸ੍ਮਿਮ੍ਪਿ ਸਿਕ੍ਖਨ੍ਤਿ, ਥਰੁਸ੍ਮਿਮ੍ਪਿ ਸਿਕ੍ਖਨ੍ਤਿ, ਹਤ੍ਥਿਸ੍ਸਪਿ ਪੁਰਤੋ ਧਾਵਨ੍ਤਿ, ਅਸ੍ਸਸ੍ਸਪਿ ਪੁਰਤੋ ਧਾਵਨ੍ਤਿ, ਰਥਸ੍ਸਪਿ ਪੁਰਤੋ [ਪੁਰਤੋ ਧਾਵਨ੍ਤਿ (ਸ੍ਯਾ.)] ਧਾਵਨ੍ਤਿਪਿ ਆਧਾਵਨ੍ਤਿਪਿ, ਉਸ੍ਸੇਲ਼ੇਨ੍ਤਿਪਿ, ਅਪ੍ਫੋਟੇਨ੍ਤਿਪਿ, ਨਿਬ੍ਬੁਜ੍ਝਨ੍ਤਿਪਿ, ਮੁਟ੍ਠੀਹਿਪਿ ਯੁਜ੍ਝਨ੍ਤਿ, ਰਙ੍ਗਮਜ੍ਝੇਪਿ ਸਙ੍ਘਾਟਿਂ ਪਤ੍ਥਰਿਤ੍ਵਾ ਨਚ੍ਚਕਿਂ [ਨਚ੍ਚਨ੍ਤਿਂ (ਸੀ. ਸ੍ਯਾ.)] ਏਵਂ ਵਦਨ੍ਤਿ – ਇਧ, ਭਗਿਨਿ, ਨਚ੍ਚਸ੍ਸੂਤਿ, ਨਲਾਟਿਕਮ੍ਪਿ ਦੇਨ੍ਤਿ, ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ.

੪੩੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕਾਸੀਸੁ ਵਸ੍ਸਂਵੁਟ੍ਠੋ ਸਾਵਤ੍ਥਿਂ ਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ, ਯੇਨ ਕੀਟਾਗਿਰਿ ਤਦਵਸਰਿ. ਅਥ ਖੋ ਸੋ ਭਿਕ੍ਖੁ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੀਟਾਗਿਰਿਂ ਪਿਣ੍ਡਾਯ ਪਾਵਿਸਿ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ. ਮਨੁਸ੍ਸਾ ਤਂ ਭਿਕ੍ਖੁਂ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਕ੍ਵਾਯਂ ਅਬਲਬਲੋ ਵਿਯ ਮਨ੍ਦਮਨ੍ਦੋ ਵਿਯ ਭਾਕੁਟਿਕਭਾਕੁਟਿਕੋ ਵਿਯ? ਕੋ ਇਮਸ੍ਸ ਉਪਗਤਸ੍ਸ ਪਿਣ੍ਡਕਂ ਦਸ੍ਸਤਿ? ਅਮ੍ਹਾਕਂ ਪਨ ਅਯ੍ਯਾ ਅਸ੍ਸਜਿਪੁਨਬ੍ਬਸੁਕਾ ਸਣ੍ਹਾ ਸਖਿਲਾ ਸੁਖਸਮ੍ਭਾਸਾ ਮਿਹਿਤਪੁਬ੍ਬਙ੍ਗਮਾ ਏਹਿਸ੍ਵਾਗਤਵਾਦਿਨੋ ਅਬ੍ਭਾਕੁਟਿਕਾ ਉਤ੍ਤਾਨਮੁਖਾ ਪੁਬ੍ਬਭਾਸਿਨੋ. ਤੇਸਂ ਖੋ ਨਾਮ ਪਿਣ੍ਡੋ ਦਾਤਬ੍ਬੋ’’ਤਿ.

ਅਦ੍ਦਸਾ ਖੋ ਅਞ੍ਞਤਰੋ ਉਪਾਸਕੋ ਤਂ ਭਿਕ੍ਖੁਂ ਕੀਟਾਗਿਰਿਸ੍ਮਿਂ ਪਿਣ੍ਡਾਯ ਚਰਨ੍ਤਂ. ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਅਭਿਵਾਦੇਤ੍ਵਾ ਏਤਦਵੋਚ – ‘‘ਅਪਿ, ਭਨ੍ਤੇ, ਪਿਣ੍ਡੋ ਲਬ੍ਭਤੀ’’ਤਿ? ‘‘ਨ ਖੋ, ਆਵੁਸੋ, ਪਿਣ੍ਡੋ ਲਬ੍ਭਤੀ’’ਤਿ. ‘‘ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾ’’ਤਿ. ਅਥ ਖੋ ਸੋ ਉਪਾਸਕੋ ਤਂ ਭਿਕ੍ਖੁਂ ਘਰਂ ਨੇਤ੍ਵਾ ਭੋਜੇਤ੍ਵਾ ਏਤਦਵੋਚ – ‘‘ਕਹਂ, ਭਨ੍ਤੇ, ਅਯ੍ਯੋ ਗਮਿਸ੍ਸਤੀ’’ਤਿ? ‘‘ਸਾਵਤ੍ਥਿਂ ਖੋ ਅਹਂ, ਆਵੁਸੋ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਤੇਨ ਹਿ, ਭਨ੍ਤੇ, ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ, ਏਵਞ੍ਚ ਵਦੇਹਿ – ‘ਦੁਟ੍ਠੋ, ਭਨ੍ਤੇ, ਕੀਟਾਗਿਰਿਸ੍ਮਿਂ ਆਵਾਸੋ. ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ…ਪੇ… ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ. ਯੇਪਿ ਤੇ, ਭਨ੍ਤੇ, ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ. ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ, ਨਿਵਸਨ੍ਤਿ ਪਾਪਭਿਕ੍ਖੂ. ਸਾਧੁ, ਭਨ੍ਤੇ, ਭਗਵਾ ਕੀਟਾਗਿਰਿਂ ਭਿਕ੍ਖੂ ਪਹਿਣੇਯ੍ਯ ਯਥਾਯਂ ਕੀਟਾਗਿਰਿਸ੍ਮਿਂ ਆਵਾਸੋ ਸਣ੍ਠਹੇਯ੍ਯਾ’’’ਤਿ.

ਏਵਮਾਵੁਸੋਤਿ ਖੋ ਸੋ ਭਿਕ੍ਖੁ ਤਸ੍ਸ ਉਪਾਸਕਸ੍ਸ ਪਟਿਸ੍ਸੁਤ੍ਵਾ ਯੇਨ ਸਾਵਤ੍ਥਿ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ ਕਚ੍ਚਿ ਯਾਪਨੀਯਂ, ਕਚ੍ਚਿਸਿ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ, ਕੁਤੋ ਚ ਤ੍ਵਂ ਭਿਕ੍ਖੁ ਆਗਚ੍ਛਸੀ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ. ਅਪ੍ਪਕਿਲਮਥੇਨ ਚਾਹਂ, ਭਨ੍ਤੇ, ਅਦ੍ਧਾਨਂ ਆਗਤੋ. ਇਧਾਹਂ, ਭਨ੍ਤੇ, ਕਾਸੀਸੁ ਵਸ੍ਸਂਵੁਟ੍ਠੋ ਸਾਵਤ੍ਥਿਂ ਆਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ ਯੇਨ ਕੀਟਾਗਿਰਿ ਤਦਵਸਰਿਂ. ਅਥ ਖ੍ਵਾਹਂ, ਭਨ੍ਤੇ, ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੀਟਾਗਿਰਿਂ ਪਿਣ੍ਡਾਯ ਪਾਵਿਸਿਂ. ਅਦ੍ਦਸਾ ਖੋ ਮਂ, ਭਨ੍ਤੇ, ਅਞ੍ਞਤਰੋ ਉਪਾਸਕੋ ਕੀਟਾਗਿਰਿਸ੍ਮਿਂ ਪਿਣ੍ਡਾਯ ਚਰਨ੍ਤਂ. ਦਿਸ੍ਵਾਨ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਤਦਵੋਚ – ‘ਅਪਿ, ਭਨ੍ਤੇ, ਪਿਣ੍ਡੋ ਲਬ੍ਭਤੀ’ਤਿ? ‘ਨ ਖੋ, ਆਵੁਸੋ, ਪਿਣ੍ਡੋ ਲਬ੍ਭਤੀ’ਤਿ. ‘ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾ’ਤਿ. ਅਥ ਖੋ, ਭਨ੍ਤੇ, ਸੋ ਉਪਾਸਕੋ ਮਂ ਘਰਂ ਨੇਤ੍ਵਾ ਭੋਜੇਤ੍ਵਾ ਏਤਦਵੋਚ – ‘ਕਹਂ, ਭਨ੍ਤੇ, ਅਯ੍ਯੋ ਗਮਿਸ੍ਸਸੀ’ਤਿ? ‘ਸਾਵਤ੍ਥਿਂ ਖੋ ਅਹਂ, ਆਵੁਸੋ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’ਤਿ. ਤੇਨ ਹਿ, ਭਨ੍ਤੇ, ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ, ਏਵਞ੍ਚ ਵਦੇਹਿ – ‘ਦੁਟ੍ਠੋ, ਭਨ੍ਤੇ, ਕੀਟਾਗਿਰਿਸ੍ਮਿਂ ਆਵਾਸੋ, ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ…ਪੇ… ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ. ਯੇਪਿ ਤੇ, ਭਨ੍ਤੇ, ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ, ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ, ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ ਨਿਵਸਨ੍ਤਿ ਪਾਪਭਿਕ੍ਖੂ. ਸਾਧੁ, ਭਨ੍ਤੇ, ਭਗਵਾ ਕੀਟਾਗਿਰਿਂ ਭਿਕ੍ਖੂ ਪਹਿਣੇਯ੍ਯ ਯਥਾਯਂ ਕੀਟਾਗਿਰਿਸ੍ਮਿਂ ਆਵਾਸੋ ਸਣ੍ਠਹੇਯ੍ਯਾ’ਤਿ. ਤਤੋ ਅਹਂ, ਭਗਵਾ, ਆਗਚ੍ਛਾਮੀ’’ਤਿ.

੪੩੩. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ …ਪੇ… ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ, ਯੇਪਿ ਤੇ, ਭਿਕ੍ਖਵੇ, ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ; ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ; ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ ਨਿਵਸਨ੍ਤਿ ਪਾਪਭਿਕ੍ਖੂ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਏਵਰੂਪਂ ਅਨਾਚਾਰਂ ਆਚਰਿਸ੍ਸਨ੍ਤਿ – ਮਾਲਾਵਚ੍ਛਂ ਰੋਪੇਸ੍ਸਨ੍ਤਿਪਿ ਰੋਪਾਪੇਸ੍ਸਨ੍ਤਿਪਿ, ਸਞ੍ਚਿਸ੍ਸਨ੍ਤਿਪਿ ਸਿਞ੍ਚਾਪੇਸ੍ਸਨ੍ਤਿਪਿ, ਓਚਿਨਿਸ੍ਸਨ੍ਤਿਪਿ ਓਚਿਨਾਪੇਸ੍ਸਨ੍ਤਿਪਿ, ਗਨ੍ਥਿਸ੍ਸਨ੍ਤਿਪਿ ਗਨ੍ਥਾਪੇਸ੍ਸਨ੍ਤਿਪਿ, ਏਕਤੋਵਣ੍ਟਿਕਮਾਲਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਮਞ੍ਜਰਿਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਵਿਧੂਤਿਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਵਟਂਸਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਆਵੇਲ਼ਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਉਰਚ੍ਛਦਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ. ਤੇ ਕੁਲਿਤ੍ਥੀਨਂ ਕੁਲਧੀਤਾਨਂ ਕੁਲਕੁਮਾਰੀਨਂ ਕੁਲਸੁਣ੍ਹਾਨਂ ਕੁਲਦਾਸੀਨਂ ਏਕਤੋਵਣ੍ਟਿਕਮਾਲਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਮਞ੍ਜਰਿਕਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਵਿਧੂਤਿਕਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਵਟਂਸਕਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਆਵੇਲ਼ਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ, ਉਰਚ੍ਛਦਂ ਹਰਿਸ੍ਸਨ੍ਤਿਪਿ ਹਾਰਾਪੇਸ੍ਸਨ੍ਤਿਪਿ. ਤੇ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਸਦ੍ਧਿਂ ਏਕਭਾਜਨੇਪਿ ਭੁਞ੍ਜਿਸ੍ਸਨ੍ਤਿ, ਏਕਥਾਲਕੇਪਿ ਪਿਵਿਸ੍ਸਨ੍ਤਿ, ਏਕਾਸਨੇਪਿ ਨਿਸੀਦਿਸ੍ਸਨ੍ਤਿ, ਏਕਮਞ੍ਚੇਪਿ ਤੁਵਟ੍ਟਿਸ੍ਸਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਵਿਕਾਲੇਪਿ ਭੁਞ੍ਜਿਸ੍ਸਨ੍ਤਿ, ਮਜ੍ਜਮ੍ਪਿ ਪਿਵਿਸ੍ਸਨ੍ਤਿ, ਮਾਲਾਗਨ੍ਧਵਿਲੇਪਨਮ੍ਪਿ ਧਾਰਿਸ੍ਸਨ੍ਤਿ, ਨਚ੍ਚਿਸ੍ਸਨ੍ਤਿਪਿ ਗਾਯਿਸ੍ਸਨ੍ਤਿਪਿ ਵਾਦੇਸ੍ਸਨ੍ਤਿਪਿ ਲਾਸੇਸ੍ਸਨ੍ਤਿਪਿ, ਨਚ੍ਚਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ ਨਚ੍ਚਨ੍ਤਿਯਾਪਿ ਗਾਯਿਸ੍ਸਨ੍ਤਿ ਨਚ੍ਚਨ੍ਤਿਯਾਪਿ ਵਾਦੇਸ੍ਸਨ੍ਤਿ ਨਚ੍ਚਨ੍ਤਿਯਾਪਿ ਲਾਸੇਸ੍ਸਨ੍ਤਿ, ਗਾਯਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ ਗਾਯਨ੍ਤਿਯਾਪਿ ਗਾਯਿਸ੍ਸਨ੍ਤਿ ਗਾਯਨ੍ਤਿਯਾਪਿ ਵਾਦੇਸ੍ਸਨ੍ਤਿ ਗਾਯਨ੍ਤਿਯਾਪਿ ਲਾਸੇਸ੍ਸਨ੍ਤਿ, ਵਾਦੇਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ ਵਾਦੇਨ੍ਤਿਯਾਪਿ ਗਾਯਿਸ੍ਸਨ੍ਤਿ ਵਾਦੇਨ੍ਤਿਯਾਪਿ ਵਾਦੇਸ੍ਸਨ੍ਤਿ ਵਾਦੇਨ੍ਤਿਯਾਪਿ ਲਾਸੇਸ੍ਸਨ੍ਤਿ, ਲਾਸੇਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ ਲਾਸੇਨ੍ਤਿਯਾਪਿ ਗਾਯਿਸ੍ਸਨ੍ਤਿ ਲਾਸੇਨ੍ਤਿਯਾਪਿ ਵਾਦੇਸ੍ਸਨ੍ਤਿ ਲਾਸੇਨ੍ਤਿਯਾਪਿ ਲਾਸੇਸ੍ਸਨ੍ਤਿ, ਅਟ੍ਠਪਦੇਪਿ ਕੀਲ਼ਿਸ੍ਸਨ੍ਤਿ ਦਸਪਦੇਪਿ ਕੀਲ਼ਿਸ੍ਸਨ੍ਤਿ, ਅਕਾਸੇਪਿ ਕੀਲ਼ਿਸ੍ਸਨ੍ਤਿ, ਪਰਿਹਾਰਪਥੇਪਿ ਕੀਲ਼ਿਸ੍ਸਨ੍ਤਿ, ਸਨ੍ਤਿਕਾਯਪਿ ਕੀਲ਼ਿਸ੍ਸਨ੍ਤਿ, ਖਲਿਕਾਯਪਿ ਕੀਲ਼ਿਸ੍ਸਨ੍ਤਿ, ਘਟਿਕਾਯਪਿ ਕੀਲ਼ਿਸ੍ਸਨ੍ਤਿ, ਸਲਾਕਹਤ੍ਥੇਨਪਿ ਕੀਲ਼ਿਸ੍ਸਨ੍ਤਿ, ਅਕ੍ਖੇਨਪਿ ਕੀਲ਼ਿਸ੍ਸਨ੍ਤਿ, ਪਙ੍ਗਚੀਰੇਨਪਿ ਕੀਲ਼ਿਸ੍ਸਨ੍ਤਿ, ਵਙ੍ਕਕੇਨਪਿ ਕੀਲ਼ਿਸ੍ਸਨ੍ਤਿ, ਮੋਕ੍ਖਚਿਕਾਯਪਿ ਕੀਲ਼ਿਸ੍ਸਨ੍ਤਿ, ਚਿਙ੍ਗੁਲਕੇਨਪਿ ਕੀਲ਼ਿਸ੍ਸਨ੍ਤਿ, ਪਤ੍ਤਾਲ਼੍ਹਕੇਨਪਿ ਕੀਲ਼ਿਸ੍ਸਨ੍ਤਿ, ਰਥਕੇਨਪਿ ਕੀਲ਼ਿਸ੍ਸਨ੍ਤਿ, ਧਨੁਕੇਨਪਿ ਕੀਲ਼ਿਸ੍ਸਨ੍ਤਿ, ਅਕ੍ਖਰਿਕਾਯਪਿ ਕੀਲ਼ਿਸ੍ਸਨ੍ਤਿ, ਮਨੇਸਿਕਾਯਪਿ ਕੀਲ਼ਿਸ੍ਸਨ੍ਤਿ, ਯਥਾਵਜ੍ਜੇਨਪਿ ਕੀਲ਼ਿਸ੍ਸਨ੍ਤਿ, ਹਤ੍ਥਿਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਅਸ੍ਸਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਰਥਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਧਨੁਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਥਰੁਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਹਤ੍ਥਿਸ੍ਸਪਿ ਪੁਰਤੋ ਧਾਵਿਸ੍ਸਨ੍ਤਿ, ਅਸ੍ਸਸ੍ਸਪਿ ਪੁਰਤੋ ਧਾਵਿਸ੍ਸਨ੍ਤਿ, ਰਥਸ੍ਸਪਿ ਪੁਰਤੋ [ਪੁਰਤੋ ਧਾਵਿਸ੍ਸਨ੍ਤਿ (ਸ੍ਯਾ.)] ਧਾਵਿਸ੍ਸਨ੍ਤਿਪਿ ਆਧਾਵਿਸ੍ਸਨ੍ਤਿਪਿ, ਉਸ੍ਸੇਲ਼ੇਸ੍ਸਨ੍ਤਿਪਿ, ਅਪ੍ਫੋਟੇਸ੍ਸਨ੍ਤਿਪਿ, ਨਿਬ੍ਬੁਜ੍ਝਿਸ੍ਸਨ੍ਤਿਪਿ, ਮੁਟ੍ਠੀਹਿਪਿ ਯੁਜ੍ਝਿਸ੍ਸਨ੍ਤਿ, ਰਙ੍ਗਮਜ੍ਝੇਪਿ ਸਙ੍ਘਾਟਿਂ ਪਤ੍ਥਰਿਤ੍ਵਾ ਨਚ੍ਚਕਿਂ ਏਵਂ ਵਕ੍ਖਨ੍ਤਿ ‘‘ਇਧ ਭਗਿਨਿ ਨਚ੍ਚਸ੍ਸੂ’’ਤਿ ਨਲਾਟਿਕਮ੍ਪਿ ਦਸ੍ਸਨ੍ਤਿ, ਵਿਵਿਧਮ੍ਪਿ ਅਨਾਚਾਰਂ ਆਚਰਿਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਸਿ – ‘‘ਗਚ੍ਛਥ ਤੁਮ੍ਹੇ, ਸਾਰਿਪੁਤ੍ਤਾ, ਕੀਟਾਗਿਰਿਂ ਗਨ੍ਤ੍ਵਾ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਥ. ਤੁਮ੍ਹਾਕਂ ਏਤੇ ਸਦ੍ਧਿਵਿਹਾਰਿਕਾ’’ਤਿ.

‘‘ਕਥਂ ਮਯਂ, ਭਨ੍ਤੇ, ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਮ? ਚਣ੍ਡਾ ਤੇ ਭਿਕ੍ਖੂ ਫਰੁਸਾ’’ਤਿ. ‘‘ਤੇਨ ਹਿ ਤੁਮ੍ਹੇ, ਸਾਰਿਪੁਤ੍ਤਾ, ਬਹੁਕੇਹਿ ਭਿਕ੍ਖੂਹਿ ਸਦ੍ਧਿਂ ਗਚ੍ਛਥਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਭਗਵਤੋ ਪਚ੍ਚਸ੍ਸੋਸੁਂ. ‘‘ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ. ਪਠਮਂ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਚੋਦੇਤਬ੍ਬਾ. ਚੋਦੇਤ੍ਵਾ ਸਾਰੇਤਬ੍ਬਾ. ਸਾਰੇਤ੍ਵਾ ਆਪਤ੍ਤਿਂ ਰੋਪੇਤਬ੍ਬਾ. ਆਪਤ੍ਤਿਂ ਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੪੩੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਕੁਲਦੂਸਕਾ ਪਾਪਸਮਾਚਾਰਾ. ਇਮੇਸਂ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚ ਇਮੇਹਿ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯ – ‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’ਨ੍ਤਿ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਕੁਲਦੂਸਕਾ ਪਾਪਸਮਾਚਾਰਾ. ਇਮੇਸਂ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚ ਇਮੇਹਿ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਸਙ੍ਘੋ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਤਿ – ‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’ਨ੍ਤਿ. ਯਸ੍ਸਾਯਸ੍ਮਤੋ ਖਮਤਿ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਸ੍ਸ ਕਰਣਂ – ‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’ਨ੍ਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ…ਪੇ… ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ – ‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’ਨ੍ਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੪੩੫. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੋ ਭਿਕ੍ਖੁਸਙ੍ਘੋ ਕੀਟਾਗਿਰਿਂ ਗਨ੍ਤ੍ਵਾ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਅਕਾਸਿ – ‘ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬ’ਨ੍ਤਿ. ਤੇ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾ ਨ ਸਮ੍ਮਾ ਵਤ੍ਤਨ੍ਤਿ, ਨ ਲੋਮਂ ਪਾਤੇਨ੍ਤਿ, ਨ ਨੇਤ੍ਥਾਰਂ ਵਤ੍ਤਨ੍ਤਿ, ਨ ਭਿਕ੍ਖੂ ਖਮਾਪੇਨ੍ਤਿ, ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਨ੍ਤਿ, ਪਕ੍ਕਮਨ੍ਤਿਪਿ, ਵਿਬ੍ਭਮਨ੍ਤਿਪਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾ ਨ ਸਮ੍ਮਾ ਵਤ੍ਤਿਸ੍ਸਨ੍ਤਿ, ਨ ਲੋਮਂ ਪਾਤੇਸ੍ਸਨ੍ਤਿ, ਨ ਨੇਤ੍ਥਾਰਂ ਵਤ੍ਤਿਸ੍ਸਨ੍ਤਿ, ਨ ਭਿਕ੍ਖੂ ਖਮਾਪੇਸ੍ਸਨ੍ਤਿ, ਅਕ੍ਕੋਸਿਸ੍ਸਨ੍ਤਿ ਪਰਿਭਾਸਿਸ੍ਸਨ੍ਤਿ, ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਸ੍ਸਨ੍ਤਿ ਪਕ੍ਕਮਿਸ੍ਸਨ੍ਤਿਪਿ ਵਿਬ੍ਭਮਿਸ੍ਸਨ੍ਤਿਪੀ’’ਤਿ! ਅਥ ਖੋ ਤੇ ਭਿਕ੍ਖੂ ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾ ਨ ਸਮ੍ਮਾ ਵਤ੍ਤਨ੍ਤਿ…ਪੇ… ਵਿਬ੍ਭਮਨ੍ਤਿਪੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੪੩੬. ‘‘ਭਿਕ੍ਖੁ ਪਨੇਵ ਅਞ੍ਞਤਰਂ ਗਾਮਂ ਵਾ ਨਿਗਮਂ ਵਾ ਉਪਨਿਸ੍ਸਾਯ ਵਿਹਰਤਿ ਕੁਲਦੂਸਕੋ ਪਾਪਸਮਾਚਾਰੋ. ਤਸ੍ਸ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ, ਕੁਲਾਨਿ ਚ ਤੇਨ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਸੋ ਭਿਕ੍ਖੁ ਭਿਕ੍ਖੂਹਿ ਏਵਮਸ੍ਸ ਵਚਨੀਯੋ – ‘ਆਯਸ੍ਮਾ ਖੋ ਕੁਲਦੂਸਕੋ ਪਾਪਸਮਾਚਾਰੋ, ਆਯਸ੍ਮਤੋ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ, ਕੁਲਾਨਿ ਚਾਯਸ੍ਮਤਾ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਪਕ੍ਕਮਤਾਯਸ੍ਮਾ ਇਮਮ੍ਹਾ ਆਵਾਸਾ. ਅਲਂ ਤੇ ਇਧ ਵਾਸੇਨਾ’ਤਿ. ਏਵਞ੍ਚ ਸੋ ਭਿਕ੍ਖੁ ਭਿਕ੍ਖੂਹਿ ਵੁਚ੍ਚਮਾਨੋ ਤੇ ਭਿਕ੍ਖੂ ਏਵਂ ਵਦੇਯ੍ਯ – ‘ਛਨ੍ਦਗਾਮਿਨੋ ਚ ਭਿਕ੍ਖੂ ਦੋਸਗਾਮਿਨੋ ਚ ਭਿਕ੍ਖੂ ਮੋਹਗਾਮਿਨੋ ਚ ਭਿਕ੍ਖੂ ਭਯਗਾਮਿਨੋ ਚ ਭਿਕ੍ਖੂ ਤਾਦਿਸਿਕਾਯ ਆਪਤ੍ਤਿਯਾ ਏਕਚ੍ਚਂ ਪਬ੍ਬਾਜੇਨ੍ਤਿ ਏਕਚ੍ਚਂ ਨ ਪਬ੍ਬਾਜੇਨ੍ਤੀ’ਤਿ, ਸੋ ਭਿਕ੍ਖੁ ਭਿਕ੍ਖੂਹਿ ਏਵਮਸ੍ਸ ਵਚਨੀਯੋ – ‘ਮਾਯਸ੍ਮਾ ਏਵਂ ਅਵਚ. ਨ ਚ ਭਿਕ੍ਖੂ ਛਨ੍ਦਗਾਮਿਨੋ. ਨ ਚ ਭਿਕ੍ਖੂ ਦੋਸਗਾਮਿਨੋ. ਨ ਚ ਭਿਕ੍ਖੂ ਮੋਹਗਾਮਿਨੋ. ਨ ਚ ਭਿਕ੍ਖੂ ਭਯਗਾਮਿਨੋ. ਆਯਸ੍ਮਾ ਖੋ ਕੁਲਦੂਸਕੋ ਪਾਪਸਮਾਚਾਰੋ. ਆਯਸ੍ਮਤੋ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚਾਯਸ੍ਮਤਾ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਪਕ੍ਕਮਤਾਯਸ੍ਮਾ ਇਮਮ੍ਹਾ ਆਵਾਸਾ. ਅਲਂ ਤੇ ਇਧ ਵਾਸੇਨਾ’ਤਿ. ਏਵਞ੍ਚ ਸੋ ਭਿਕ੍ਖੁ ਭਿਕ੍ਖੂਹਿ ਵੁਚ੍ਚਮਾਨੋ ਤਥੇਵ ਪਗ੍ਗਣ੍ਹੇਯ੍ਯ, ਸੋ ਭਿਕ੍ਖੁ ਭਿਕ੍ਖੂਹਿ ਯਾਵਤਤਿਯਂ ਸਮਨੁਭਾਸਿਤਬ੍ਬੋ ਤਸ੍ਸ ਪਟਿਨਿਸ੍ਸਗ੍ਗਾਯ. ਯਾਵਤਤਿਯਞ੍ਚੇ ਸਮਨੁਭਾਸੀਯਮਾਨੋ ਤਂ ਪਟਿਨਿਸ੍ਸਜ੍ਜੇਯ੍ਯ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜੇਯ੍ਯ, ਸਙ੍ਘਾਦਿਸੇਸੋ’’ਤਿ.

੪੩੭. ਭਿਕ੍ਖੁ ਪਨੇਵ ਅਞ੍ਞਤਰਂ ਗਾਮਂ ਵਾ ਨਿਗਮਂ ਵਾਤਿ ਗਾਮੋਪਿ ਨਿਗਮੋਪਿ ਨਗਰਮ੍ਪਿ ਗਾਮੋ ਚੇਵ ਨਿਗਮੋ ਚ.

ਉਪਨਿਸ੍ਸਾਯ ਵਿਹਰਤੀਤਿ ਤਤ੍ਥ ਪਟਿਬਦ੍ਧਾ ਹੋਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾ.

ਕੁਲਂ ਨਾਮ ਚਤ੍ਤਾਰਿ ਕੁਲਾਨਿ – ਖਤ੍ਤਿਯਕੁਲਂ, ਬ੍ਰਾਹ੍ਮਣਕੁਲਂ, ਵੇਸ੍ਸਕੁਲਂ, ਸੁਦ੍ਦਕੁਲਂ.

ਕੁਲਦੂਸਕੋਤਿ ਕੁਲਾਨਿ ਦੂਸੇਤਿ ਪੁਪ੍ਫੇਨ ਵਾ ਫਲੇਨ ਵਾ ਚੁਣ੍ਣੇਨ ਵਾ ਮਤ੍ਤਿਕਾਯ ਵਾ ਦਨ੍ਤਕਟ੍ਠੇਨ ਵਾ ਵੇਲ਼ੁਯਾ ਵਾ [ਵੇਲ਼ੁਨਾ ਵਾ (ਸ੍ਯਾ.)] ਵੇਜ੍ਜਿਕਾਯ ਵਾ ਜਙ੍ਘਪੇਸਨਿਕੇਨ ਵਾ.

ਪਾਪਸਮਾਚਾਰੋਤਿ ਮਾਲਾਵਚ੍ਛਂ ਰੋਪੇਤਿਪਿ ਰੋਪਾਪੇਤਿਪਿ, ਸਿਞ੍ਚਤਿਪਿ ਸਿਞ੍ਚਾਪੇਤਿਪਿ, ਓਚਿਨਾਤਿਪਿ ਓਚਿਨਾਪੇਤਿਪਿ, ਗਨ੍ਥੇਤਿਪਿ ਗਨ੍ਥਾਪੇਤਿਪਿ.

ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚਾਤਿ ਯੇ ਸਂਮੁਖਾ ਤੇ ਪਸ੍ਸਨ੍ਤਿ, ਯੇ ਤਿਰੋਕ੍ਖਾ ਤੇ ਸੁਣਨ੍ਤਿ.

ਕੁਲਾਨਿ ਚ ਤੇਨ ਦੁਟ੍ਠਾਨੀਤਿ ਪੁਬ੍ਬੇ ਸਦ੍ਧਾ ਹੁਤ੍ਵਾ ਤਂ ਆਗਮ੍ਮ ਅਸ੍ਸਦ੍ਧਾ ਹੋਨ੍ਤਿ, ਪਸਨ੍ਨਾ ਹੁਤ੍ਵਾ ਅਪ੍ਪਸਨ੍ਨਾ ਹੋਨ੍ਤਿ.

ਸੋ ਭਿਕ੍ਖੂਤਿ ਯੋ ਸੋ ਕੁਲਦੂਸਕੋ ਭਿਕ੍ਖੁ.

ਭਿਕ੍ਖੂਹੀਤਿ ਅਞ੍ਞੇਹਿ ਭਿਕ੍ਖੂਹਿ. ਯੇ ਪਸ੍ਸਨ੍ਤਿ ਯੇ ਸੁਣਨ੍ਤਿ. ਤੇਹਿ ਵਤ੍ਤਬ੍ਬੋ – ‘‘ਆਯਸ੍ਮਾ ਖੋ ਕੁਲਦੂਸਕੋ ਪਾਪਸਮਾਚਾਰੋ. ਆਯਸ੍ਮਤੋ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚਾਯਸ੍ਮਤਾ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਪਕ੍ਕਮਤਾਯਸ੍ਮਾ ਇਮਮ੍ਹਾ ਆਵਾਸਾ. ਅਲਂ ਤੇ ਇਧ ਵਾਸੇਨਾ’’ਤਿ.

ਏਵਞ੍ਚ ਸੋ ਭਿਕ੍ਖੁ ਭਿਕ੍ਖੂਹਿ ਵੁਚ੍ਚਮਾਨੋ ਤੇ ਭਿਕ੍ਖੂ ਏਵਂ ਵਦੇਯ੍ਯ – ‘‘ਛਨ੍ਦਗਾਮਿਨੋ ਚ ਭਿਕ੍ਖੂ, ਦੋਸਗਾਮਿਨੋ ਚ ਭਿਕ੍ਖੂ, ਮੋਹਗਾਮਿਨੋ ਚ ਭਿਕ੍ਖੂ, ਭਯਗਾਮਿਨੋ ਚ ਭਿਕ੍ਖੂ. ਤਾਦਿਸਿਕਾਯ ਆਪਤ੍ਤਿਯਾ ਏਕਚ੍ਚਂ ਪਬ੍ਬਾਜੇਨ੍ਤਿ ਏਕਚ੍ਚਂ ਨ ਪਬ੍ਬਾਜੇਨ੍ਤੀ’’ਤਿ.

ਸੋ ਭਿਕ੍ਖੂਤਿ ਯੋ ਸੋ ਕਮ੍ਮਕਤੋ ਭਿਕ੍ਖੁ.

ਭਿਕ੍ਖੂਹੀਤਿ ਅਞ੍ਞੇਹਿ ਭਿਕ੍ਖੂਹਿ. ਯੇ ਪਸ੍ਸਨ੍ਤਿ ਯੇ ਸੁਣਨ੍ਤਿ ਤੇਹਿ ਵਤ੍ਤਬ੍ਬੋ – ‘‘ਮਾਯਸ੍ਮਾ ਏਵਂ ਅਵਚ. ਨ ਚ ਭਿਕ੍ਖੂ ਛਨ੍ਦਗਾਮਿਨੋ, ਨ ਚ ਭਿਕ੍ਖੂ ਦੋਸਗਾਮਿਨੋ, ਨ ਚ ਭਿਕ੍ਖੂ ਮੋਹਗਾਮਿਨੋ, ਨ ਚ ਭਿਕ੍ਖੂ ਭਯਗਾਮਿਨੋ. ਆਯਸ੍ਮਾ ਖੋ ਕੁਲਦੂਸਕੋ ਪਾਪਸਮਾਚਾਰੋ. ਆਯਸ੍ਮਤੋ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚਾਯਸ੍ਮਤਾ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਪਕ੍ਕਮਤਾਯਸ੍ਮਾ ਇਮਮ੍ਹਾ ਆਵਾਸਾ. ਅਲਂ ਤੇ ਇਧ ਵਾਸੇਨਾ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬੋ. ਤਤਿਯਮ੍ਪਿ ਵਤ੍ਤਬ੍ਬੋ.

ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਭਿਕ੍ਖੁ ਸਙ੍ਘਮਜ੍ਝਮ੍ਪਿ ਆਕਡ੍ਢਿਤ੍ਵਾ ਵਤ੍ਤਬ੍ਬੋ – ‘‘ਮਾਯਸ੍ਮਾ ਏਵਂ ਅਵਚ. ਨ ਚ ਭਿਕ੍ਖੂ ਛਨ੍ਦਗਾਮਿਨੋ, ਨ ਚ ਭਿਕ੍ਖੂ ਦੋਸਗਾਮਿਨੋ, ਨ ਚ ਭਿਕ੍ਖੂ ਮੋਹਗਾਮਿਨੋ, ਨ ਚ ਭਿਕ੍ਖੂ ਭਯਗਾਮਿਨੋ. ਆਯਸ੍ਮਾ ਖੋ ਕੁਲਦੂਸਕੋ ਪਾਪਸਮਾਚਾਰੋ. ਆਯਸ੍ਮਤੋ ਖੋ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚਾਯਸ੍ਮਤਾ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਪਕ੍ਕਮਤਾਯਸ੍ਮਾ ਇਮਮ੍ਹਾ ਆਵਾਸਾ. ਅਲਂ ਤੇ ਇਧ ਵਾਸੇਨਾ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬੋ. ਤਤਿਯਮ੍ਪਿ ਵਤ੍ਤਬ੍ਬੋ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਭਿਕ੍ਖੁ ਸਮਨੁਭਾਸਿਤਬ੍ਬੋ. ਏਵਞ੍ਚ ਪਨ, ਭਿਕ੍ਖਵੇ, ਸਮਨੁਭਾਸਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੪੩੮. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਭਿਕ੍ਖੂ ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਤਿ. ਸੋ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸਮਨੁਭਾਸੇਯ੍ਯ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤੋ ਭਿਕ੍ਖੂ ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਤਿ. ਸੋ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸਮਨੁਭਾਸਤਿ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਮਨੁਭਾਸਨਾ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ….

‘‘ਸਮਨੁਭਟ੍ਠੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੪੩੯. ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ, ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤਸ੍ਸ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤਿ.

ਸਙ੍ਘਾਦਿਸੇਸੋਤਿ ਸਙ੍ਘੋਵ ਤਸ੍ਸਾ ਆਪਤ੍ਤਿਯਾ ਪਰਿਵਾਸਂ ਦੇਤਿ, ਮੂਲਾਯ ਪਟਿਕਸ੍ਸਤਿ, ਮਾਨਤ੍ਤਂ ਦੇਤਿ, ਅਬ੍ਭੇਤਿ; ਨ ਸਮ੍ਬਹੁਲਾ, ਨ ਏਕਪੁਗ੍ਗਲੋ. ਤੇਨ ਵੁਚ੍ਚਤਿ – ‘ਸਙ੍ਘਾਦਿਸੇਸੋ’ਤਿ, ਤਸ੍ਸੇਵ ਆਪਤ੍ਤਿਨਿਕਾਯਸ੍ਸ ਨਾਮਕਮ੍ਮਂ ਅਧਿਵਚਨਂ. ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੪੪੦. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਧਮ੍ਮਕਮ੍ਮੇ ਵੇਮਤਿਕੋ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞੀ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

ਅਧਮ੍ਮਕਮ੍ਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ.

ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

੪੪੧. ਅਨਾਪਤ੍ਤਿ ਅਸਮਨੁਭਾਸਨ੍ਤਸ੍ਸ, ਪਟਿਨਿਸ੍ਸਜ੍ਜਨ੍ਤਸ੍ਸ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਕੁਲਦੂਸਕਸਿਕ੍ਖਾਪਦਂ ਨਿਟ੍ਠਿਤਂ ਤੇਰਸਮਂ.

੪੪੨. ਉਦ੍ਦਿਟ੍ਠਾ ਖੋ, ਆਯਸ੍ਮਨ੍ਤੋ, ਤੇਰਸ ਸਙ੍ਘਾਦਿਸੇਸਾ ਧਮ੍ਮਾ, ਨਵ ਪਠਮਾਪਤ੍ਤਿਕਾ, ਚਤ੍ਤਾਰੋ ਯਾਵਤਤਿਯਕਾ. ਯੇਸਂ ਭਿਕ੍ਖੁ ਅਞ੍ਞਤਰਂ ਵਾ ਅਞ੍ਞਤਰਂ ਵਾ ਆਪਜ੍ਜਿਤ੍ਵਾ ਯਾਵਤੀਹਂ ਜਾਨਂ ਪਟਿਚ੍ਛਾਦੇਤਿ ਤਾਵਤੀਹਂ ਤੇਨ ਭਿਕ੍ਖੁਨਾ ਅਕਾਮਾ ਪਰਿਵਤ੍ਥਬ੍ਬਂ. ਪਰਿਵੁਤ੍ਥਪਰਿਵਾਸੇਨ ਭਿਕ੍ਖੁਨਾ ਉਤ੍ਤਰਿ ਛਾਰਤ੍ਤਂ ਭਿਕ੍ਖੁਮਾਨਤ੍ਤਾਯ ਪਟਿਪਜ੍ਜਿਤਬ੍ਬਂ. ਚਿਣ੍ਣਮਾਨਤ੍ਤੋ ਭਿਕ੍ਖੁ ਯਤ੍ਥ ਸਿਯਾ ਵੀਸਤਿਗਣੋ ਭਿਕ੍ਖੁਸਙ੍ਘੋ ਤਤ੍ਥ ਸੋ ਭਿਕ੍ਖੁ ਅਬ੍ਭੇਤਬ੍ਬੋ. ਏਕੇਨਪਿ ਚੇ ਊਨੋ ਵੀਸਤਿਗਣੋ ਭਿਕ੍ਖੁਸਙ੍ਘੋ ਤਂ ਭਿਕ੍ਖੁਂ ਅਬ੍ਭੇਯ੍ਯ, ਸੋ ਚ ਭਿਕ੍ਖੁ ਅਨਬ੍ਭਿਤੋ, ਤੇ ਚ ਭਿਕ੍ਖੂ ਗਾਰਯ੍ਹਾ, ਅਯਂ ਤਤ੍ਥ ਸਾਮੀਚਿ. ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ – ‘ਕਚ੍ਚਿਤ੍ਥ ਪਰਿਸੁਦ੍ਧਾ’? ਦੁਤਿਯਮ੍ਪਿ ਪੁਚ੍ਛਾਮਿ – ‘ਕਚ੍ਚਿਤ੍ਥ ਪਰਿਸੁਦ੍ਧਾ’? ਤਤਿਯਮ੍ਪਿ ਪੁਚ੍ਛਾਮਿ – ‘ਕਚ੍ਚਿਤ੍ਥ ਪਰਿਸੁਦ੍ਧਾ’? ਪਰਿਸੁਦ੍ਧੇਤ੍ਥਾਯਸ੍ਮਨ੍ਤੋ. ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

ਤੇਰਸਕਂ ਨਿਟ੍ਠਿਤਂ.

ਤਸ੍ਸੁਦ੍ਦਾਨਂ –

ਵਿਸ੍ਸਟ੍ਠਿ ਕਾਯਸਂਸਗ੍ਗਂ, ਦੁਟ੍ਠੁਲ੍ਲਂ ਅਤ੍ਤਕਾਮਞ੍ਚ;

ਸਞ੍ਚਰਿਤ੍ਤਂ ਕੁਟੀ ਚੇਵ, ਵਿਹਾਰੋ ਚ ਅਮੂਲਕਂ.

ਕਿਞ੍ਚਿਲੇਸਞ੍ਚ ਭੇਦੋ ਚ, ਤਸ੍ਸੇਵ ਅਨੁਵਤ੍ਤਕਾ;

ਦੁਬ੍ਬਚਂ ਕੁਲਦੂਸਞ੍ਚ, ਸਙ੍ਘਾਦਿਸੇਸਾ ਤੇਰਸਾਤਿ.

ਸਙ੍ਘਾਦਿਸੇਸਕਣ੍ਡਂ ਨਿਟ੍ਠਿਤਂ.