੨. ਦੁਤਿਯਪਾਰਾਜਿਕਂ
੮੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਗਿਜ੍ਝਕੂਟੇ ਪਬ੍ਬਤੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਇਸਿਗਿਲਿਪਸ੍ਸੇ ਤਿਣਕੁਟਿਯੋ ਕਰਿਤ੍ਵਾ ਵਸ੍ਸਂ ਉਪਗਚ੍ਛਿਂਸੁ. ਆਯਸ੍ਮਾਪਿ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਿਣਕੁਟਿਕਂ ਕਰਿਤ੍ਵਾ ਵਸ੍ਸਂ ਉਪਗਚ੍ਛਿ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ ਤੇਮਾਸਚ੍ਚਯੇਨ ਤਿਣਕੁਟਿਯੋ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਪਟਿਸਾਮੇਤ੍ਵਾ ਜਨਪਦਚਾਰਿਕਂ ਪਕ੍ਕਮਿਂਸੁ. ਆਯਸ੍ਮਾ ਪਨ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਤ੍ਥੇਵ ਵਸ੍ਸਂ ਵਸਿ, ਤਤ੍ਥ ਹੇਮਨ੍ਤਂ, ਤਤ੍ਥ ਗਿਮ੍ਹਂ. ਅਥ ਖੋ ਆਯਸ੍ਮਤੋ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ. ਦੁਤਿਯਮ੍ਪਿ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਿਣਞ੍ਚ ਕਟ੍ਠਞ੍ਚ ਸਂਕਡ੍ਢਿਤ੍ਵਾ ਤਿਣਕੁਟਿਕਂ ਅਕਾਸਿ. ਦੁਤਿਯਮ੍ਪਿ ਖੋ ਆਯਸ੍ਮਤੋ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ. ਤਤਿਯਮ੍ਪਿ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਿਣਞ੍ਚ ਕਟ੍ਠਞ੍ਚ ਸਂਕਡ੍ਢਿਤ੍ਵਾ ਤਿਣਕੁਟਿਕਂ ਅਕਾਸਿ. ਤਤਿਯਮ੍ਪਿ ਖੋ ਆਯਸ੍ਮਤੋ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ.
ਅਥ ਖੋ ਆਯਸ੍ਮਤੋ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਏਤਦਹੋਸਿ – ‘‘ਯਾਵਤਤਿਯਕਂ ਖੋ ਮੇ ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ. ਅਹਂ ਖੋ ਪਨ ਸੁਸਿਕ੍ਖਿਤੋ ਅਨਵਯੋ ਸਕੇ ਆਚਰਿਯਕੇ ਕੁਮ੍ਭਕਾਰਕਮ੍ਮੇ ਪਰਿਯੋਦਾਤਸਿਪ੍ਪੋ. ਯਂਨੂਨਾਹਂ ਸਾਮਂ ਚਿਕ੍ਖਲ੍ਲਂ ਮਦ੍ਦਿਤ੍ਵਾ ਸਬ੍ਬਮਤ੍ਤਿਕਾਮਯਂ ਕੁਟਿਕਂ ਕਰੇਯ੍ਯ’’ਨ੍ਤਿ! ਅਥ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਸਾਮਂ ਚਿਕ੍ਖਲ੍ਲਂ ਮਦ੍ਦਿਤ੍ਵਾ ਸਬ੍ਬਮਤ੍ਤਿਕਾਮਯਂ ਕੁਟਿਕਂ ਕਰਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਗੋਮਯਞ੍ਚ ਸਂਕਡ੍ਢਿਤ੍ਵਾ ਤਂ ਕੁਟਿਕਂ ਪਚਿ. ਸਾ ਅਹੋਸਿ ਕੁਟਿਕਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਲੋਹਿਤਿਕਾ [ਲੋਹਿਤਕਾ (ਸ੍ਯਾ.)], ਸੇਯ੍ਯਥਾਪਿ ਇਨ੍ਦਗੋਪਕੋ. ਸੇਯ੍ਯਥਾਪਿ ਨਾਮ ਕਿਙ੍ਕਣਿਕਸਦ੍ਦੋ [ਕਿਙ੍ਕਿਣਿਕਸਦ੍ਦੋ (ਸੀ. ਸ੍ਯਾ.)] ਏਵਮੇਵਂ ਤਸ੍ਸਾ ਕੁਟਿਕਾਯ ਸਦ੍ਦੋ ਅਹੋਸਿ.
੮੫. ਅਥ ਖੋ ਭਗਵਾ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤੋ ਅਦ੍ਦਸ ਤਂ ਕੁਟਿਕਂ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਲੋਹਿਤਿਕਂ. ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਕਿਂ ਏਤਂ, ਭਿਕ੍ਖਵੇ, ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਲੋਹਿਤਿਕਂ, ਸੇਯ੍ਯਥਾਪਿ ਇਨ੍ਦਗੋਪਕੋ’’ਤਿ? ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਸੋ, ਭਿਕ੍ਖਵੇ, ਮੋਘਪੁਰਿਸੋ ਸਬ੍ਬਮਤ੍ਤਿਕਾਮਯਂ ਕੁਟਿਕਂ ਕਰਿਸ੍ਸਤਿ! ਨ ਹਿ ਨਾਮ, ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ ਪਾਣੇਸੁ ਅਨੁਦ੍ਦਯਾ ਅਨੁਕਮ੍ਪਾ ਅਵਿਹੇਸਾ ਭਵਿਸ੍ਸਤਿ! ਗਚ੍ਛਥੇਤਂ, ਭਿਕ੍ਖਵੇ, ਕੁਟਿਕਂ ਭਿਨ੍ਦਥ. ਮਾ ਪਚ੍ਛਿਮਾ ਜਨਤਾ ਪਾਣੇਸੁ ਪਾਤਬ੍ਯਤਂ ਆਪਜ੍ਜਿ. ਨ ਚ, ਭਿਕ੍ਖਵੇ, ਸਬ੍ਬਮਤ੍ਤਿਕਾਮਯਾ ਕੁਟਿਕਾ ਕਾਤਬ੍ਬਾ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ‘‘ਏਵਂ, ਭਨ੍ਤੇ’’ਤਿ, ਖੋ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਯੇਨ ਸਾ ਕੁਟਿਕਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਤਂ ਕੁਟਿਕਂ ਭਿਨ੍ਦਿਂਸੁ. ਅਥ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤੇ ਭਿਕ੍ਖੂ ਏਤਦਵੋਚ – ‘‘ਕਿਸ੍ਸ ਮੇ ਤੁਮ੍ਹੇ, ਆਵੁਸੋ, ਕੁਟਿਕਂ ਭਿਨ੍ਦਥਾ’’ਤਿ? ‘‘ਭਗਵਾ, ਆਵੁਸੋ, ਭੇਦਾਪੇਤੀ’’ਤਿ. ‘‘ਭਿਨ੍ਦਥਾਵੁਸੋ, ਸਚੇ ਧਮ੍ਮਸ੍ਸਾਮੀ ਭੇਦਾਪੇਤੀ’’ਤਿ.
੮੬. ਅਥ ਖੋ ਆਯਸ੍ਮਤੋ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਏਤਦਹੋਸਿ – ‘‘ਯਾਵਤਤਿਯਕਂ ਖੋ ਮੇ ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ. ਯਾਪਿ ਮਯਾ ਸਬ੍ਬਮਤ੍ਤਿਕਾਮਯਾ ਕੁਟਿਕਾ ਕਤਾ ਸਾਪਿ ਭਗਵਤਾ ਭੇਦਾਪਿਤਾ. ਅਤ੍ਥਿ ਚ ਮੇ ਦਾਰੁਗਹੇ ਗਣਕੋ ਸਨ੍ਦਿਟ੍ਠੋ. ਯਂਨੂਨਾਹਂ ਦਾਰੁਗਹੇ ਗਣਕਂ ਦਾਰੂਨਿ ਯਾਚਿਤ੍ਵਾ ਦਾਰੁਕੁਟਿਕਂ ਕਰੇਯ੍ਯ’’ਨ੍ਤਿ. ਅਥ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਯੇਨ ਦਾਰੁਗਹੇ ਗਣਕੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਦਾਰੁਗਹੇ ਗਣਕਂ ਏਤਦਵੋਚ – ‘‘ਯਾਵਤਤਿਯਕਂ ਖੋ ਮੇ, ਆਵੁਸੋ, ਗਾਮਂ ਪਿਣ੍ਡਾਯ ਪਵਿਟ੍ਠਸ੍ਸ ਤਿਣਹਾਰਿਯੋ ਕਟ੍ਠਹਾਰਿਯੋ ਤਿਣਕੁਟਿਕਂ ਭਿਨ੍ਦਿਤ੍ਵਾ ਤਿਣਞ੍ਚ ਕਟ੍ਠਞ੍ਚ ਆਦਾਯ ਅਗਮਂਸੁ. ਯਾਪਿ ਮਯਾ ਸਬ੍ਬਮਤ੍ਤਿਕਾਮਯਾ ਕੁਟਿਕਾ ਕਤਾ ਸਾਪਿ ਭਗਵਤਾ ਭੇਦਾਪਿਤਾ. ਦੇਹਿ ਮੇ, ਆਵੁਸੋ, ਦਾਰੂਨਿ. ਇਚ੍ਛਾਮਿ ਦਾਰੁਕੁਟਿਕਂ [ਦਾਰੁਕੁਡ੍ਡਿਕਂ ਕੁਟਿਕਂ (ਸੀ.)] ਕਾਤੁ’’ਨ੍ਤਿ. ‘‘ਨਤ੍ਥਿ, ਭਨ੍ਤੇ, ਤਾਦਿਸਾਨਿ ਦਾਰੂਨਿ ਯਾਨਾਹਂ ਅਯ੍ਯਸ੍ਸ ਦਦੇਯ੍ਯਂ. ਅਤ੍ਥਿ, ਭਨ੍ਤੇ, ਦੇਵਗਹਦਾਰੂਨਿ ਨਗਰਪਟਿਸਙ੍ਖਾਰਿਕਾਨਿ ਆਪਦਤ੍ਥਾਯ ਨਿਕ੍ਖਿਤ੍ਤਾਨਿ. ਸਚੇ ਤਾਨਿ ਦਾਰੂਨਿ ਰਾਜਾ ਦਾਪੇਤਿ ਹਰਾਪੇਥ, ਭਨ੍ਤੇ’’ਤਿ. ‘‘ਦਿਨ੍ਨਾਨਿ, ਆਵੁਸੋ, ਰਞ੍ਞਾ’’ਤਿ. ਅਥ ਖੋ ਦਾਰੁਗਹੇ ਗਣਕਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ [ਸਮ੍ਮਚਾਰਿਨੋ (ਕ.)] ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਰਾਜਾਪਿਮੇਸਂ ਅਭਿਪ੍ਪਸਨ੍ਨੋ. ਨਾਰਹਤਿ ਅਦਿਨ੍ਨਂ ਦਿਨ੍ਨਨ੍ਤਿ ਵਤ੍ਤੁ’’ਨ੍ਤਿ. ਅਥ ਖੋ ਦਾਰੁਗਹੇ ਗਣਕੋ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਏਤਦਵੋਚ – ‘‘ਹਰਾਪੇਥ, ਭਨ੍ਤੇ’’ਤਿ. ਅਥ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤਾਨਿ ਦਾਰੂਨਿ ਖਣ੍ਡਾਖਣ੍ਡਿਕਂ ਛੇਦਾਪੇਤ੍ਵਾ ਸਕਟੇਹਿ ਨਿਬ੍ਬਾਹਾਪੇਤ੍ਵਾ ਦਾਰੁਕੁਟਿਕਂ ਅਕਾਸਿ.
੮੭. ਅਥ ਖੋ ਵਸ੍ਸਕਾਰੋ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋ ਰਾਜਗਹੇ ਕਮ੍ਮਨ੍ਤੇ ਅਨੁਸਞ੍ਞਾਯਮਾਨੋ ਯੇਨ ਦਾਰੁਗਹੇ ਗਣਕੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਦਾਰੁਗਹੇ ਗਣਕਂ ਏਤਦਵੋਚ – ‘‘ਯਾਨਿ ਤਾਨਿ, ਭਣੇ, ਦੇਵਗਹਦਾਰੂਨਿ ਨਗਰਪਟਿਸਙ੍ਖਾਰਿਕਾਨਿ ਆਪਦਤ੍ਥਾਯ ਨਿਕ੍ਖਿਤ੍ਤਾਨਿ ਕਹਂ ਤਾਨਿ ਦਾਰੂਨੀ’’ਤਿ? ‘‘ਤਾਨਿ, ਸਾਮਿ, ਦਾਰੂਨਿ ਦੇਵੇਨ ਅਯ੍ਯਸ੍ਸ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਦਿਨ੍ਨਾਨੀ’’ਤਿ. ਅਥ ਖੋ ਵਸ੍ਸਕਾਰੋ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋ ਅਨਤ੍ਤਮਨੋ ਅਹੋਸਿ – ‘‘ਕਥਞ੍ਹਿ ਨਾਮ ਦੇਵੋ ਦੇਵਗਹਦਾਰੂਨਿ ਨਗਰਪਟਿਸਙ੍ਖਾਰਿਕਾਨਿ ਆਪਦਤ੍ਥਾਯ ਨਿਕ੍ਖਿਤ੍ਤਾਨਿ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਦਸ੍ਸਤੀ’’ਤਿ! ਅਥ ਖੋ ਵਸ੍ਸਕਾਰੋ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਸਚ੍ਚਂ ਕਿਰ, ਦੇਵੇਨ [ਸਚ੍ਚਂ ਕਿਰ ਦੇਵ ਦੇਵੇਨ (ਸੀ.)] ਦੇਵਗਹਦਾਰੂਨਿ ਨਗਰਪਟਿਸਙ੍ਖਾਰਿਕਾਨਿ ਆਪਦਤ੍ਥਾਯ ਨਿਕ੍ਖਿਤ੍ਤਾਨਿ ਧਨਿਯਸ੍ਸ ਕੁਮ੍ਭਕਾਰਪੁਤ੍ਤਸ੍ਸ ਦਿਨ੍ਨਾਨੀ’’ਤਿ? ‘‘ਕੋ ਏਵਮਾਹਾ’’ਤਿ? ‘‘ਦਾਰੁਗਹੇ ਗਣਕੋ, ਦੇਵਾ’’ਤਿ. ‘‘ਤੇਨ ਹਿ, ਬ੍ਰਾਹ੍ਮਣ, ਦਾਰੁਗਹੇ ਗਣਕਂ ਆਣਾਪੇਹੀ’’ਤਿ. ਅਥ ਖੋ ਵਸ੍ਸਕਾਰੋ ਬ੍ਰਾਹ੍ਮਣੋ ਮਗਧਮਹਾਮਤ੍ਤੋ ਦਾਰੁਗਹੇ ਗਣਕਂ ਬਨ੍ਧਂ [ਬਦ੍ਧਂ (ਸੀ.)] ਆਣਾਪੇਸਿ. ਅਦ੍ਦਸ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਦਾਰੁਗਹੇ ਗਣਕਂ ਬਨ੍ਧਂ ਨਿਯ੍ਯਮਾਨਂ. ਦਿਸ੍ਵਾਨ ਦਾਰੁਗਹੇ ਗਣਕਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਆਵੁਸੋ, ਬਨ੍ਧੋ ਨਿਯ੍ਯਾਸੀ’’ਤਿ? ‘‘ਤੇਸਂ, ਭਨ੍ਤੇ, ਦਾਰੂਨਂ ਕਿਚ੍ਚਾ’’ਤਿ. ‘‘ਗਚ੍ਛਾਵੁਸੋ, ਅਹਮ੍ਪਿ ਆਗਚ੍ਛਾਮੀ’’ਤਿ. ‘‘ਏਯ੍ਯਾਸਿ, ਭਨ੍ਤੇ, ਪੁਰਾਹਂ ਹਞ੍ਞਾਮੀ’’ਤਿ.
੮੮. ਅਥ ਖੋ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਏਤਦਵੋਚ – ‘‘ਸਚ੍ਚਂ ਕਿਰ ਮਯਾ, ਭਨ੍ਤੇ, ਦੇਵਗਹਦਾਰੂਨਿ ਨਗਰਪਟਿਸਙ੍ਖਾਰਿਕਾਨਿ ਆਪਦਤ੍ਥਾਯ ਨਿਕ੍ਖਿਤ੍ਤਾਨਿ ਅਯ੍ਯਸ੍ਸ ਦਿਨ੍ਨਾਨੀ’’ਤਿ? ‘‘ਏਵਂ, ਮਹਾਰਾਜਾ’’ਤਿ. ‘‘ਮਯਂ ਖੋ, ਭਨ੍ਤੇ, ਰਾਜਾਨੋ ਨਾਮ ਬਹੁਕਿਚ੍ਚਾ ਬਹੁਕਰਣੀਯਾ, ਦਤ੍ਵਾਪਿ ਨ ਸਰੇਯ੍ਯਾਮ; ਇਙ੍ਘ, ਭਨ੍ਤੇ, ਸਰਾਪੇਹੀ’’ਤਿ. ‘‘ਸਰਸਿ ਤ੍ਵਂ, ਮਹਾਰਾਜ, ਪਠਮਾਭਿਸਿਤ੍ਤੋ ਏਵਰੂਪਿਂ ਵਾਚਂ ਭਾਸਿਤਾ – ‘‘ਦਿਨ੍ਨਞ੍ਞੇਵ ਸਮਣਬ੍ਰਾਹ੍ਮਣਾਨਂ ਤਿਣਕਟ੍ਠੋਦਕਂ ਪਰਿਭੁਞ੍ਜਨ੍ਤੂ’’ਤਿ. ‘‘ਸਰਾਮਹਂ, ਭਨ੍ਤੇ. ਸਨ੍ਤਿ, ਭਨ੍ਤੇ, ਸਮਣਬ੍ਰਾਹ੍ਮਣਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ. ਤੇਸਂ ਅਪ੍ਪਮਤ੍ਤਕੇਪਿ ਕੁਕ੍ਕੁਚ੍ਚਂ ਉਪ੍ਪਜ੍ਜਤਿ. ਤੇਸਂ ਮਯਾ ਸਨ੍ਧਾਯ ਭਾਸਿਤਂ, ਤਞ੍ਚ ਖੋ ਅਰਞ੍ਞੇ ਅਪਰਿਗ੍ਗਹਿਤਂ. ਸੋ ਤ੍ਵਂ, ਭਨ੍ਤੇ, ਤੇਨ ਲੇਸੇਨ ਦਾਰੂਨਿ ਅਦਿਨ੍ਨਂ ਹਰਿਤੁਂ ਮਞ੍ਞਸਿ! ਕਥਞ੍ਹਿ ਨਾਮ ਮਾਦਿਸੋ ਸਮਣਂ ਵਾ ਬ੍ਰਾਹ੍ਮਣਂ ਵਾ ਵਿਜਿਤੇ ਵਸਨ੍ਤਂ ਹਨੇਯ੍ਯ ਵਾ ਬਨ੍ਧੇਯ੍ਯ ਵਾ ਪਬ੍ਬਾਜੇਯ੍ਯ ਵਾ! ਗਚ੍ਛ, ਭਨ੍ਤੇ, ਲੋਮੇਨ ਤ੍ਵਂ ਮੁਤ੍ਤੋਸਿ. ਮਾਸ੍ਸੁ ਪੁਨਪਿ ਏਵਰੂਪਂ ਅਕਾਸੀ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ. ਇਮੇ ਹਿ ਨਾਮ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਾਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ! ਨਤ੍ਥਿ ਇਮੇਸਂ ਸਾਮਞ੍ਞਂ, ਨਤ੍ਥਿ ਇਮੇਸਂ ਬ੍ਰਹ੍ਮਞ੍ਞਂ. ਨਟ੍ਠਂ ਇਮੇਸਂ ਸਾਮਞ੍ਞਂ, ਨਟ੍ਠਂ ਇਮੇਸਂ ਬ੍ਰਹ੍ਮਞ੍ਞਂ. ਕੁਤੋ ਇਮੇਸਂ ਸਾਮਞ੍ਞਂ, ਕੁਤੋ ਇਮੇਸਂ ਬ੍ਰਹ੍ਮਞ੍ਞਂ! ਅਪਗਤਾ ਇਮੇ ਸਾਮਞ੍ਞਾ, ਅਪਗਤਾ ਇਮੇ ਬ੍ਰਹ੍ਮਞ੍ਞਾ. ਰਾਜਾਨਮ੍ਪਿ ਇਮੇ ਵਞ੍ਚੇਨ੍ਤਿ, ਕਿਂ ਪਨਞ੍ਞੇ ਮਨੁਸ੍ਸੇ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਧਨਿਯੋ ਕੁਮ੍ਭਕਾਰਪੁਤ੍ਤੋ ਰਞ੍ਞੋ ਦਾਰੂਨਿ ਅਦਿਨ੍ਨਂ ਆਦਿਯਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਧਨਿਯ, ਰਞ੍ਞੋ ਦਾਰੂਨਿ ਅਦਿਨ੍ਨਂ ਆਦਿਯੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਰਞ੍ਞੋ ਦਾਰੂਨਿ ਅਦਿਨ੍ਨਂ ਆਦਿਯਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ; ਅਥਖ੍ਵੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਾਣਵੋਹਾਰਿਕੋ ਮਹਾਮਤ੍ਤੋ ਭਿਕ੍ਖੂਸੁ ਪਬ੍ਬਜਿਤੋ ਭਗਵਤੋ ਅਵਿਦੂਰੇ ਨਿਸਿਨ੍ਨੋ ਹੋਤਿ. ਅਥ ਖੋ ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਿਤ੍ਤਕੇਨ ਖੋ ਭਿਕ੍ਖੁ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਚੋਰਂ ਗਹੇਤ੍ਵਾ ਹਨਤਿ ਵਾ ਬਨ੍ਧਤਿ ਵਾ ਪਬ੍ਬਾਜੇਤਿ ਵਾ’’ਤਿ? ‘‘ਪਾਦੇਨ ਵਾ, ਭਗਵਾ, ਪਾਦਾਰਹੇਨ ਵਾ’’ਤਿ [ਪਾਦਾਰਹੇਨਵਾ ਅਤਿਰੇਕਪਾਦੇਨਵਾਤਿ (ਸ੍ਯਾ.)]. ਤੇਨ ਖੋ ਪਨ ਸਮਯੇਨ ਰਾਜਗਹੇ ਪਞ੍ਚਮਾਸਕੋ ਪਾਦੋ ਹੋਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਧਨਿਯਂ ਕੁਮ੍ਭਕਾਰਪੁਤ੍ਤਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੮੯. ‘‘ਯੋ ਪਨ ਭਿਕ੍ਖੁ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯੇਯ੍ਯ, ਯਥਾਰੂਪੇ ਅਦਿਨ੍ਨਾਦਾਨੇ ਰਾਜਾਨੋ ਚੋਰਂ ਗਹੇਤ੍ਵਾ ਹਨੇਯ੍ਯੁਂ ਵਾ ਬਨ੍ਧੇਯ੍ਯੁਂ ਵਾ ਪਬ੍ਬਾਜੇਯ੍ਯੁਂ ਵਾ – ‘ਚੋਰੋਸਿ ਬਾਲੋਸਿ ਮੂਲ਼੍ਹੋਸਿ ਥੇਨੋਸੀ’ਤਿ, ਤਥਾਰੂਪਂ ਭਿਕ੍ਖੁ ਅਦਿਨ੍ਨਂ ਆਦਿਯਮਾਨੋ ਅਯਮ੍ਪਿ ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ.
ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.
੯੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਰਜਕਤ੍ਥਰਣਂ ਗਨ੍ਤ੍ਵਾ ਰਜਕਭਣ੍ਡਿਕਂ ਅਵਹਰਿਤ੍ਵਾ ਆਰਾਮਂ ਹਰਿਤ੍ਵਾ ਭਾਜੇਸੁਂ. ਭਿਕ੍ਖੂ ਏਵਮਾਹਂਸੁ – ‘‘ਮਹਾਪੁਞ੍ਞਤ੍ਥ ਤੁਮ੍ਹੇ, ਆਵੁਸੋ. ਬਹੁਂ ਤੁਮ੍ਹਾਕਂ ਚੀਵਰਂ ਉਪ੍ਪਨ੍ਨ’’ਨ੍ਤਿ. ‘‘ਕੁਤੋ ਆਵੁਸੋ, ਅਮ੍ਹਾਕਂ ਪੁਞ੍ਞਂ, ਇਦਾਨਿ ਮਯਂ ਰਜਕਤ੍ਥਰਣਂ ਗਨ੍ਤ੍ਵਾ ਰਜਕਭਣ੍ਡਿਕਂ ਅਵਹਰਿਮ੍ਹਾ’’ਤਿ. ‘‘ਨਨੁ, ਆਵੁਸੋ, ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ. ਕਿਸ੍ਸ ਤੁਮ੍ਹੇ, ਆਵੁਸੋ, ਰਜਕਭਣ੍ਡਿਕਂ ਅਵਹਰਿਤ੍ਥਾ’’ਤਿ? ‘‘ਸਚ੍ਚਂ, ਆਵੁਸੋ, ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ. ਤਞ੍ਚ ਖੋ ਗਾਮੇ, ਨੋ ਅਰਞ੍ਞੇ’’ਤਿ. ‘‘ਨਨੁ, ਆਵੁਸੋ, ਤਥੇਵੇਤਂ ਹੋਤਿ. ਅਨਨੁਚ੍ਛਵਿਕਂ, ਆਵੁਸੋ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੁਮ੍ਹੇ, ਆਵੁਸੋ, ਰਜਕਭਣ੍ਡਿਕਂ ਅਵਹਰਿਸ੍ਸਥ! ਨੇਤਂ, ਆਵੁਸੋ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ; ਅਥਖ੍ਵੇਤਂ, ਆਵੁਸੋ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ. ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਛਬ੍ਬਗ੍ਗਿਯੇ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਰਜਕਤ੍ਥਰਣਂ ਗਨ੍ਤ੍ਵਾ ਰਜਕਭਣ੍ਡਿਕਂ ਅਵਹਰਿਤ੍ਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸਾ, ਅਨਨੁਲੋਮਿਕਂ ਅਪ੍ਪਟਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਰਜਕਭਣ੍ਡਿਕਂ ਅਵਹਰਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ; ਅਥ ਖ੍ਵੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ. ਅਥ ਖੋ ਭਗਵਾ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ…ਪੇ… ਵੀਰਿਯਾਰਮ੍ਭਸ੍ਸ ਵਣ੍ਣਂ ਭਾਸਿਤ੍ਵਾ ਭਿਕ੍ਖੂਨਂ ਤਦਨੁਚ੍ਛਵਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ…ਪੇ… ‘‘ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੯੧. ‘‘ਯੋ ਪਨ ਭਿਕ੍ਖੁ ਗਾਮਾ ਵਾ ਅਰਞ੍ਞਾ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯੇਯ੍ਯ, ਯਥਾਰੂਪੇ ਅਦਿਨ੍ਨਾਦਾਨੇ ਰਾਜਾਨੋ ਚੋਰਂ ਗਹੇਤ੍ਵਾ ਹਨੇਯ੍ਯੁਂ ਵਾ ਬਨ੍ਧੇਯ੍ਯੁਂ ਵਾ ਪਬ੍ਬਾਜੇਯ੍ਯੁਂ ਵਾ – ‘ਚੋਰੋਸਿ ਬਾਲੋਸਿ ਮੂਲ਼੍ਹੋਸਿ ਥੇਨੋਸੀ’ਤਿ, ਤਥਾਰੂਪਂ ਭਿਕ੍ਖੁ ਅਦਿਨ੍ਨਂ ਆਦਿਯਮਾਨੋ ਅਯਮ੍ਪਿ ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ.
੯੨. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.
ਗਾਮੋ ਨਾਮ ਏਕਕੁਟਿਕੋਪਿ ਗਾਮੋ, ਦ੍ਵਿਕੁਟਿਕੋਪਿ ਗਾਮੋ, ਤਿਕੁਟਿਕੋਪਿ ਗਾਮੋ, ਚਤੁਕੁਟਿਕੋਪਿ ਗਾਮੋ, ਸਮਨੁਸ੍ਸੋਪਿ ਗਾਮੋ, ਅਮਨੁਸ੍ਸੋਪਿ ਗਾਮੋ, ਪਰਿਕ੍ਖਿਤ੍ਤੋਪਿ ਗਾਮੋ, ਅਪਰਿਕ੍ਖਿਤ੍ਤੋਪਿ ਗਾਮੋ, ਗੋਨਿਸਾਦਿਨਿਵਿਟ੍ਠੋਪਿ ਗਾਮੋ, ਯੋਪਿ ਸਤ੍ਥੋ ਅਤਿਰੇਕਚਤੁਮਾਸਨਿਵਿਟ੍ਠੋ ਸੋਪਿ ਵੁਚ੍ਚਤਿ ਗਾਮੋ.
ਗਾਮੂਪਚਾਰੋ ਨਾਮ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਇਨ੍ਦਖੀਲੇ [ਇਨ੍ਦਖਿਲੇ (ਕ.)] ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ, ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਘਰੂਪਚਾਰੇ ਠਿਤਸ੍ਸ ਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ.
ਅਰਞ੍ਞਂ ਨਾਮ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ ਅਵਸੇਸਂ ਅਰਞ੍ਞਂ ਨਾਮ.
ਅਦਿਨ੍ਨਂ ਨਾਮਂ ਯਂ ਅਦਿਨ੍ਨਂ ਅਨਿਸ੍ਸਟ੍ਠਂ ਅਪਰਿਚ੍ਚਤ੍ਤਂ ਰਕ੍ਖਿਤਂ ਗੋਪਿਤਂ ਮਮਾਯਿਤਂ ਪਰਪਰਿਗ੍ਗਹਿਤਂ. ਏਤਂ ਅਦਿਨ੍ਨਂ ਨਾਮ.
ਥੇਯ੍ਯਸਙ੍ਖਾਤਨ੍ਤਿ ਥੇਯ੍ਯਚਿਤ੍ਤੋ ਅਵਹਰਣਚਿਤ੍ਤੋ.
ਆਦਿਯੇਯ੍ਯਾਤਿ ਆਦਿਯੇਯ੍ਯ ਹਰੇਯ੍ਯ ਅਵਹਰੇਯ੍ਯ ਇਰਿਯਾਪਥਂ ਵਿਕੋਪੇਯ੍ਯ ਠਾਨਾ ਚਾਵੇਯ੍ਯ ਸਙ੍ਕੇਤਂ ਵੀਤਿਨਾਮੇਯ੍ਯ.
ਯਥਾਰੂਪਂ ਨਾਮ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ.
ਰਾਜਾਨੋ ਨਾਮ ਪਥਬ੍ਯਾਰਾਜਾ ਪਦੇਸਰਾਜਾ ਮਣ੍ਡਲਿਕਾ ਅਨ੍ਤਰਭੋਗਿਕਾ ਅਕ੍ਖਦਸ੍ਸਾ ਮਹਾਮਤ੍ਤਾ, ਯੇ ਵਾ ਪਨ ਛੇਜ੍ਜਭੇਜ੍ਜਂ ਕਰੋਨ੍ਤਾ ਅਨੁਸਾਸਨ੍ਤਿ. ਏਤੇ ਰਾਜਾਨੋ ਨਾਮ.
ਚੋਰੋ ਨਾਮ ਯੋ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਤਿ. ਏਸੋ ਚੋਰੋ ਨਾਮ.
ਹਨੇਯ੍ਯੁਂ ਵਾਤਿ ਹਤ੍ਥੇਨ ਵਾ ਪਾਦੇਨ ਵਾ ਕਸਾਯ ਵਾ ਵੇਤ੍ਤੇਨ ਵਾ ਅਡ੍ਢਦਣ੍ਡਕੇਨ ਵਾ ਛੇਜ੍ਜਾਯ ਵਾ ਹਨੇਯ੍ਯੁਂ.
ਬਨ੍ਧੇਯ੍ਯੁਂ ਵਾਤਿ ਰਜ੍ਜੁਬਨ੍ਧਨੇਨ ਵਾ ਅਨ੍ਦੁਬਨ੍ਧਨੇਨ ਵਾ ਸਙ੍ਖਲਿਕਬਨ੍ਧਨੇਨ ਵਾ ਘਰਬਨ੍ਧਨੇਨ ਵਾ ਨਗਰਬਨ੍ਧਨੇਨ ਵਾ ਗਾਮਬਨ੍ਧਨੇਨ ਵਾ ਨਿਗਮਬਨ੍ਧਨੇਨ ਵਾ ਬਨ੍ਧੇਯ੍ਯੁਂ, ਪੁਰਿਸਗੁਤ੍ਤਿਂ ਵਾ ਕਰੇਯ੍ਯੁਂ.
ਪਬ੍ਬਾਜੇਯ੍ਯੁਂ ਵਾਤਿ ਗਾਮਾ ਵਾ ਨਿਗਮਾ ਵਾ ਨਗਰਾ ਵਾ ਜਨਪਦਾ ਵਾ ਜਨਪਦਪਦੇਸਾ ਵਾ ਪਬ੍ਬਾਜੇਯ੍ਯੁਂ.
ਚੋਰੋਸਿ ਬਾਲੋਸਿ ਮੂਲ਼੍ਹੋਸਿ ਥੇਨੋਸੀਤਿ ਪਰਿਭਾਸੋ ਏਸੋ.
ਤਥਾਰੂਪਂ ਨਾਮ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ.
ਆਦਿਯਮਾਨੋਤਿ ਆਦਿਯਮਾਨੋ ਹਰਮਾਨੋ ਅਵਹਰਮਾਨੋ ਇਰਿਯਾਪਥਂ ਵਿਕੋਪਯਮਾਨੋ ਠਾਨਾ ਚਾਵਯਮਾਨੋ ਸਙ੍ਕੇਤਂ ਵੀਤਿਨਾਮਯਮਾਨੋ.
ਅਯਮ੍ਪੀਤਿ ਪੁਰਿਮਂ ਉਪਾਦਾਯ ਵੁਚ੍ਚਤਿ.
ਪਾਰਾਜਿਕੋ ਹੋਤੀਤਿ ਸੇਯ੍ਯਥਾਪਿ ਨਾਮ ਪਣ੍ਡੁਪਲਾਸੋ ਬਨ੍ਧਨਾ ਪਵੁਤ੍ਤੋ [ਹਰਿਤਤ੍ਤਾਯ (ਸੀ. ਸ੍ਯਾ.)] ਅਭਬ੍ਬੋ ਹਰਿਤਤ੍ਥਾਯ [ਹਰਿਤਤ੍ਤਾਯ (ਸੀ. ਸ੍ਯਾ.)], ਏਵਮੇਵ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤੇਨ ਵੁਚ੍ਚਤਿ – ‘ਪਾਰਾਜਿਕੋ ਹੋਤੀ’ਤਿ.
ਅਸਂਵਾਸੋਤਿ ਸਂਵਾਸੋ ਨਾਮ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ. ਏਸੋ ਸਂਵਾਸੋ ਨਾਮ. ਸੋ ਤੇਨ ਸਦ੍ਧਿਂ ਨਤ੍ਥਿ. ਤੇਨ ਵੁਚ੍ਚਤਿ – ‘ਅਸਂਵਾਸੋ’ਤਿ.
੯੩. ਭੂਮਟ੍ਠਂ ਥਲਟ੍ਠਂ ਆਕਾਸਟ੍ਠਂ ਵੇਹਾਸਟ੍ਠਂ ਉਦਕਟ੍ਠਂ ਨਾਵਟ੍ਠਂ ਯਾਨਟ੍ਠਂ ਭਾਰਟ੍ਠਂ ਆਰਾਮਟ੍ਠਂ ਵਿਹਾਰਟ੍ਠਂ ਖੇਤ੍ਤਟ੍ਠਂ ਵਤ੍ਥੁਟ੍ਠਂ ਗਾਮਟ੍ਠਂ ਅਰਞ੍ਞਟ੍ਠਂ ਉਦਕਂ ਦਨ੍ਤਪੋਣਂ [ਦਨ੍ਤਪੋਨਂ (ਸੀ. ਕ.)] ਵਨਪ੍ਪਤਿ ਹਰਣਕਂ ਉਪਨਿਧਿ ਸੁਙ੍ਕਘਾਤਂ ਪਾਣੋ ਅਪਦਂ ਦ੍ਵਿਪਦਂ ਚਤੁਪ੍ਪਦਂ ਬਹੁਪ੍ਪਦਂ ਓਚਰਕੋ ਓਣਿਰਕ੍ਖੋ ਸਂਵਿਦਾਵਹਾਰੋ ਸਙ੍ਕੇਤਕਮ੍ਮਂ ਨਿਮਿਤ੍ਤਕਮ੍ਮਨ੍ਤਿ.
੯੪. ਭੂਮਟ੍ਠਂ ਨਾਮ ਭਣ੍ਡਂ ਭੂਮਿਯਂ ਨਿਕ੍ਖਿਤ੍ਤਂ ਹੋਤਿ ਨਿਖਾਤਂ ਪਟਿਚ੍ਛਨ੍ਨਂ. ਭੂਮਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਕੁਦਾਲਂ ਵਾ ਪਿਟਕਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਥ ਜਾਤਕਂ ਕਟ੍ਠਂ ਵਾ ਲਤਂ ਵਾ ਛਿਨ੍ਦਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਤ੍ਥ ਪਂਸੁਂ ਖਣਤਿ ਵਾ ਬ੍ਯੂਹਤਿ [ਵਿਯੂਹਤਿ (ਸ੍ਯਾ.)] ਵਾ ਉਦ੍ਧਰਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਕੁਮ੍ਭਿਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਤ੍ਤਨੋ ਭਾਜਨਂ ਪਵੇਸੇਤ੍ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਅਤ੍ਤਨੋ ਭਾਜਨਗਤਂ ਵਾ ਕਰੋਤਿ ਮੁਟ੍ਠਿਂ ਵਾ ਛਿਨ੍ਦਤਿ, ਆਪਤ੍ਤਿ ਪਾਰਾਜਿਕਸ੍ਸ. ਸੁਤ੍ਤਾਰੁਲ਼੍ਹਂ ਭਣ੍ਡਂ ਪਾਮਙ੍ਗਂ ਵਾ ਕਣ੍ਠਸੁਤ੍ਤਕਂ ਵਾ ਕਟਿਸੁਤ੍ਤਕਂ ਵਾ ਸਾਟਕਂ ਵਾ ਵੇਠਨਂ ਵਾ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕੋਟਿਯਂ ਗਹੇਤ੍ਵਾ ਉਚ੍ਚਾਰੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਘਂਸਨ੍ਤੋ ਨੀਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਕੁਮ੍ਭਿਮੁਖਾ ਮੋਚੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਸਪ੍ਪਿਂ ਵਾ ਤੇਲਂ ਵਾ ਮਧੁਂ ਵਾ ਫਾਣਿਤਂ ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਏਕੇਨ ਪਯੋਗੇਨ ਪਿਵਤਿ, ਆਪਤ੍ਤਿ ਪਾਰਾਜਿਕਸ੍ਸ. ਤਤ੍ਥੇਵ ਭਿਨ੍ਦਤਿ ਵਾ ਛਡ੍ਡੇਤਿ ਵਾ ਝਾਪੇਤਿ ਵਾ ਅਪਰਿਭੋਗਂ ਵਾ ਕਰੋਤਿ, ਆਪਤ੍ਤਿ ਦੁਕ੍ਕਟਸ੍ਸ.
੯੫. ਥਲਟ੍ਠਂ ਨਾਮ ਭਣ੍ਡਂ ਥਲੇ ਨਿਕ੍ਖਿਤ੍ਤਂ ਹੋਤਿ. ਥਲਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੯੬. ਆਕਾਸਟ੍ਠਂ ਨਾਮ ਭਣ੍ਡਂ ਆਕਾਸਗਤਂ ਹੋਤਿ. ਮੋਰੋ ਵਾ ਕਪਿਞ੍ਜਰੋ ਵਾ ਤਿਤ੍ਤਿਰੋ ਵਾ ਵਟ੍ਟਕੋ ਵਾ, ਸਾਟਕਂ ਵਾ ਵੇਠਨਂ ਵਾ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਛਿਜ੍ਜਮਾਨਂ ਪਤਤਿ. ਆਕਾਸਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਗਮਨਂ ਉਪਚ੍ਛਿਨ੍ਦਤਿ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੯੭. ਵੇਹਾਸਟ੍ਠਂ ਨਾਮ ਭਣ੍ਡਂ ਵੇਹਾਸਗਤਂ ਹੋਤਿ. ਮਞ੍ਚੇ ਵਾ ਪੀਠੇ ਵਾ ਚੀਵਰਵਂਸੇ ਵਾ ਚੀਵਰਰਜ੍ਜੁਯਾ ਵਾ ਭਿਤ੍ਤਿਖਿਲੇ ਵਾ ਨਾਗਦਨ੍ਤੇ ਵਾ ਰੁਕ੍ਖੇ ਵਾ ਲਗ੍ਗਿਤਂ ਹੋਤਿ, ਅਨ੍ਤਮਸੋ ਪਤ੍ਤਾਧਾਰਕੇਪਿ. ਵੇਹਾਸਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੯੮. ਉਦਕਟ੍ਠਂ ਨਾਮ ਭਣ੍ਡਂ ਉਦਕੇ ਨਿਕ੍ਖਿਤ੍ਤਂ ਹੋਤਿ. ਉਦਕਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਨਿਮੁਜ੍ਜਤਿ ਵਾ ਉਮ੍ਮੁਜ੍ਜਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਤਤ੍ਥ ਜਾਤਕਂ ਉਪ੍ਪਲਂ ਵਾ ਪਦੁਮਂ ਵਾ ਪੁਣ੍ਡਰੀਕਂ ਵਾ ਭਿਸਂ ਵਾ ਮਚ੍ਛਂ ਵਾ ਕਚ੍ਛਪਂ ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੯੯. ਨਾਵਾ ਨਾਮ ਯਾਯ ਤਰਤਿ. ਨਾਵਟ੍ਠਂ ਨਾਮ ਭਣ੍ਡਂ ਨਾਵਾਯ ਨਿਕ੍ਖਿਤ੍ਤਂ ਹੋਤਿ. ‘‘ਨਾਵਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀ’’ਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਨਾਵਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਬਨ੍ਧਨਂ ਮੋਚੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਬਨ੍ਧਨਂ ਮੋਚੇਤ੍ਵਾ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੦੦. ਯਾਨਂ ਨਾਮ ਵਯ੍ਹਂ ਰਥੋ ਸਕਟਂ ਸਨ੍ਦਮਾਨਿਕਾ. ਯਾਨਟ੍ਠਂ ਨਾਮ ਭਣ੍ਡਂ ਯਾਨੇ ਨਿਕ੍ਖਿਤ੍ਤਂ ਹੋਤਿ. ਯਾਨਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਯਾਨਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੦੧. ਭਾਰੋ ਨਾਮ ਸੀਸਭਾਰੋ ਖਨ੍ਧਭਾਰੋ ਕਟਿਭਾਰੋ ਓਲਮ੍ਬਕੋ. ਸੀਸੇ ਭਾਰਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਖਨ੍ਧਂ ਓਰੋਪੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਖਨ੍ਧੇ ਭਾਰਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਕਟਿਂ ਓਰੋਪੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਕਟਿਯਾ ਭਾਰਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਹਤ੍ਥੇਨ ਗਣ੍ਹਾਤਿ, ਆਪਤ੍ਤਿ ਪਾਰਾਜਿਕਸ੍ਸ. ਹਤ੍ਥੇ ਭਾਰਂ ਥੇਯ੍ਯਚਿਤ੍ਤੋ ਭੂਮਿਯਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਥੇਯ੍ਯਚਿਤ੍ਤੋ ਭੂਮਿਤੋ ਗਣ੍ਹਾਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੦੨. ਆਰਾਮੋ ਨਾਮ ਪੁਪ੍ਫਾਰਾਮੋ ਫਲਾਰਾਮੋ. ਆਰਾਮਟ੍ਠਂ ਨਾਮ ਭਣ੍ਡਂ ਆਰਾਮੇ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਆਰਾਮਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਤਤ੍ਥ ਜਾਤਕਂ ਮੂਲਂ ਵਾ ਤਚਂ ਵਾ ਪਤ੍ਤਂ ਵਾ ਪੁਪ੍ਫਂ ਵਾ ਫਲਂ ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਆਰਾਮਂ ਅਭਿਯੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ਨ ਮਯ੍ਹਂ ਭਵਿਸ੍ਸਤੀਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਸਾਮਿਕਂ ਪਰਾਜੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਪਰਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.
੧੦੩. ਵਿਹਾਰਟ੍ਠਂ ਨਾਮ ਭਣ੍ਡਂ ਵਿਹਾਰੇ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ, ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਵਿਹਾਰਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਵਿਹਾਰਂ ਅਭਿਯੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ਨ ਮਯ੍ਹਂ ਭਵਿਸ੍ਸਤੀਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਸਾਮਿਕਂ ਪਰਾਜੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਪਰਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.
੧੦੪. ਖੇਤ੍ਤਂ ਨਾਮ ਯਤ੍ਥ ਪੁਬ੍ਬਣ੍ਣਂ ਵਾ ਅਪਰਣ੍ਣਂ ਵਾ ਜਾਯਤਿ. ਖੇਤ੍ਤਟ੍ਠਂ ਨਾਮ ਭਣ੍ਡਂ ਖੇਤ੍ਤੇ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ, ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਖੇਤ੍ਤਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ, ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਤਤ੍ਥ ਜਾਤਕਂ ਪੁਬ੍ਬਣ੍ਣਂ ਵਾ ਅਪਰਣ੍ਣਂ ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਖੇਤ੍ਤਂ ਅਭਿਯੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ਨ ਮਯ੍ਹਂ ਭਵਿਸ੍ਸਤੀਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਸਾਮਿਕਂ ਪਰਾਜੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਪਰਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਖਿਲਂ ਵਾ ਰਜ੍ਜੁਂ ਵਾ ਵਤਿਂ ਵਾ ਮਰਿਯਾਦਂ ਵਾ ਸਙ੍ਕਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਕਂ ਪਯੋਗਂ ਅਨਾਗਤੇ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਸ੍ਮਿਂ ਪਯੋਗੇ ਆਗਤੇ, ਆਪਤ੍ਤਿ ਪਾਰਾਜਿਕਸ੍ਸ.
੧੦੫. ਵਤ੍ਥੁ ਨਾਮ ਆਰਾਮਵਤ੍ਥੁ ਵਿਹਾਰਵਤ੍ਥੁ. ਵਤ੍ਥੁਟ੍ਠਂ ਨਾਮ ਭਣ੍ਡਂ ਵਤ੍ਥੁਸ੍ਮਿਂ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ, ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਵਤ੍ਥੁਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਵਤ੍ਥੁਂ ਅਭਿਯੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ਨ ਮਯ੍ਹਂ ਭਵਿਸ੍ਸਤੀਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਸਾਮਿਕਂ ਪਰਾਜੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਪਰਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਖੀਲਂ ਵਾ ਰਜ੍ਜੁਂ ਵਾ ਵਤਿਂ ਵਾ ਪਾਕਾਰਂ ਵਾ ਸਙ੍ਕਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਕਂ ਪਯੋਗਂ ਅਨਾਗਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਸ੍ਮਿਂ ਪਯੋਗੇ ਆਗਤੇ ਆਪਤ੍ਤਿ ਪਾਰਾਜਿਕਸ੍ਸ.
੧੦੬. ਗਾਮਟ੍ਠਂ ਨਾਮ ਭਣ੍ਡਂ ਗਾਮੇ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ, ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਗਾਮਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੦੭. ਅਰਞ੍ਞਂ ਨਾਮ ਯਂ ਮਨੁਸ੍ਸਾਨਂ ਪਰਿਗ੍ਗਹਿਤਂ ਹੋਤਿ, ਤਂ ਅਰਞ੍ਞਂ. ਅਰਞ੍ਞਟ੍ਠਂ ਨਾਮ ਭਣ੍ਡਂ ਅਰਞ੍ਞੇ ਚਤੂਹਿ ਠਾਨੇਹਿ ਨਿਕ੍ਖਿਤ੍ਤਂ ਹੋਤਿ – ਭੂਮਟ੍ਠਂ, ਥਲਟ੍ਠਂ, ਆਕਾਸਟ੍ਠਂ, ਵੇਹਾਸਟ੍ਠਂ. ਅਰਞ੍ਞਟ੍ਠਂ ਭਣ੍ਡਂ ਅਵਹਰਿਸ੍ਸਾਮੀਤਿ ਥੇਯ੍ਯਚਿਤ੍ਤੋ ਦੁਤਿਯਂ ਵਾ ਪਰਿਯੇਸਤਿ ਗਚ੍ਛਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਤਤ੍ਥ ਜਾਤਕਂ ਕਟ੍ਠਂ ਵਾ ਲਤਂ ਵਾ ਤਿਣਂ ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੦੮. ਉਦਕਂ ਨਾਮ ਭਾਜਨਗਤਂ ਵਾ ਹੋਤਿ ਪੋਕ੍ਖਰਣਿਯਾ ਵਾ ਤਲ਼ਾਕੇ ਵਾ. ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਤ੍ਤਨੋ ਭਾਜਨਂ ਪਵੇਸੇਤ੍ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਉਦਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਅਤ੍ਤਨੋ ਭਾਜਨਗਤਂ ਕਰੋਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਰਿਯਾਦਂ ਭਿਨ੍ਦਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮਰਿਯਾਦਂ ਭਿਨ੍ਦਿਤ੍ਵਾ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਉਦਕਂ ਨਿਕ੍ਖਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਤਿਰੇਕਮਾਸਕਂ ਵਾ ਊਨਪਞ੍ਚਮਾਸਕਂ ਵਾ ਅਗ੍ਘਨਕਂ ਉਦਕਂ ਨਿਕ੍ਖਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਾਸਕਂ ਵਾ ਊਨਮਾਸਕਂ ਵਾ ਅਗ੍ਘਨਕਂ ਉਦਕਂ ਨਿਕ੍ਖਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੦੯. ਦਨ੍ਤਪੋਣਂ ਨਾਮ ਛਿਨ੍ਨਂ ਵਾ ਅਚ੍ਛਿਨ੍ਨਂ ਵਾ. ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੦. ਵਨਪ੍ਪਤਿ ਨਾਮ ਯੋ ਮਨੁਸ੍ਸਾਨਂ ਪਰਿਗ੍ਗਹਿਤੋ ਹੋਤਿ ਰੁਕ੍ਖੋ ਪਰਿਭੋਗੋ. ਥੇਯ੍ਯਚਿਤ੍ਤੋ ਛਿਨ੍ਦਤਿ, ਪਹਾਰੇ ਪਹਾਰੇ ਆਪਤ੍ਤਿ ਦੁਕ੍ਕਟਸ੍ਸ. ਏਕਂ ਪਹਾਰਂ ਅਨਾਗਤੇ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਸ੍ਮਿਂ ਪਹਾਰੇ ਆਗਤੇ, ਆਪਤ੍ਤਿ ਪਾਰਾਜਿਕਸ੍ਸ.
੧੧੧. ਹਰਣਕਂ ਨਾਮ ਅਞ੍ਞਸ੍ਸ ਹਰਣਕਂ ਭਣ੍ਡਂ. ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਸਹਭਣ੍ਡਹਾਰਕਂ ਪਦਸਾ ਨੇਸ੍ਸਾਮੀਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਪਤਿਤਂ ਭਣ੍ਡਂ ਗਹੇਸ੍ਸਾਮੀਤਿ ਪਾਤਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਤਿਤਂ ਭਣ੍ਡਂ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੨. ਉਪਨਿਧਿ ਨਾਮ ਉਪਨਿਕ੍ਖਿਤ੍ਤਂ ਭਣ੍ਡਂ. ਦੇਹਿ ਮੇ ਭਣ੍ਡਨ੍ਤਿ ਵੁਚ੍ਚਮਾਨੋ ਨਾਹਂ ਗਣ੍ਹਾਮੀਤਿ ਭਣਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾਮਿਕਸ੍ਸ ਵਿਮਤਿਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸਾਮਿਕੋ ਨ ਮਯ੍ਹਂ ਦਸ੍ਸਤੀਤਿ ਧੁਰਂ ਨਿਕ੍ਖਿਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਸਾਮਿਕਂ ਪਰਾਜੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਧਮ੍ਮਂ ਚਰਨ੍ਤੋ ਪਰਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.
੧੧੩. ਸੁਙ੍ਕਘਾਤਂ ਨਾਮ ਰਞ੍ਞਾ ਠਪਿਤਂ ਹੋਤਿ ਪਬ੍ਬਤਖਣ੍ਡੇ ਵਾ ਨਦੀਤਿਤ੍ਥੇ ਵਾ ਗਾਮਦ੍ਵਾਰੇ ਵਾ – ‘ਅਤ੍ਰ ਪਵਿਟ੍ਠਸ੍ਸ ਸੁਙ੍ਕਂ ਗਣ੍ਹਨ੍ਤੂ’ਤਿ. ਤਤ੍ਰ ਪਵਿਸਿਤ੍ਵਾ ਰਾਜਗ੍ਗਂ [ਰਾਜਗ੍ਘਂ (ਸੀ. ਸ੍ਯਾ.)] ਭਣ੍ਡਂ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਪਠਮਂ ਪਾਦਂ ਸੁਙ੍ਕਘਾਤਂ ਅਤਿਕ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਨ੍ਤੋਸੁਙ੍ਕਘਾਤੇ ਠਿਤੋ ਬਹਿਸੁਙ੍ਕਘਾਤਂ ਪਾਤੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਸੁਙ੍ਕਂ ਪਰਿਹਰਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੧੪. ਪਾਣੋ ਨਾਮ ਮਨੁਸ੍ਸਪਾਣੋ ਵੁਚ੍ਚਤਿ. ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਪਦਸਾ ਨੇਸ੍ਸਾਮੀਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਅਪਦਂ ਨਾਮ ਅਹਿ ਮਚ੍ਛਾ. ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੫. ਦ੍ਵਿਪਦਂ ਨਾਮ ਮਨੁਸ੍ਸਾ, ਪਕ੍ਖਜਾਤਾ. ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਪਦਸਾ ਨੇਸ੍ਸਾਮੀਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੬. ਚਤੁਪ੍ਪਦਂ ਨਾਮ – ਹਤ੍ਥੀ ਅਸ੍ਸਾ ਓਟ੍ਠਾ ਗੋਣਾ ਗਦ੍ਰਭਾ ਪਸੁਕਾ. ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਪਦਸਾ ਨੇਸ੍ਸਾਮੀਤਿ ਪਠਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਦੁਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਤਿਯਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਚਤੁਤ੍ਥਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੭. ਬਹੁਪ੍ਪਦਂ ਨਾਮ – ਵਿਚ੍ਛਿਕਾ ਸਤਪਦੀ ਉਚ੍ਚਾਲਿਙ੍ਗਪਾਣਕਾ. ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ. ਪਦਸਾ ਨੇਸ੍ਸਾਮੀਤਿ ਸਙ੍ਕਾਮੇਤਿ, ਪਦੇ ਪਦੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਪਚ੍ਛਿਮਂ ਪਾਦਂ ਸਙ੍ਕਾਮੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੧੮. ਓਚਰਕੋ ਨਾਮ ਭਣ੍ਡਂ ਓਚਰਿਤ੍ਵਾ ਆਚਿਕ੍ਖਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਓਣਿਰਕ੍ਖੋ ਨਾਮ ਆਹਟਂ ਭਣ੍ਡਂ ਗੋਪੇਨ੍ਤੋ ਪਞ੍ਚਮਾਸਕਂ ਵਾ ਅਤਿਰੇਕਪਞ੍ਚਮਾਸਕਂ ਵਾ ਅਗ੍ਘਨਕਂ ਥੇਯ੍ਯਚਿਤ੍ਤੋ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਸਂਵਿਦਾਵਹਾਰੋ ਨਾਮ ਸਮ੍ਬਹੁਲਾ ਸਂਵਿਦਹਿਤ੍ਵਾ ਏਕੋ ਭਣ੍ਡਂ ਅਵਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸ.
੧੧੯. ਸਙ੍ਕੇਤਕਮ੍ਮਂ ਨਾਮ ਸਙ੍ਕੇਤਂ ਕਰੋਤਿ – ‘‘ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਰਤ੍ਤਿਂ ਵਾ ਦਿਵਾ ਵਾ ਤੇਨ ਸਙ੍ਕੇਤੇਨ ਤਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਸਙ੍ਕੇਤੇਨ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ. ਤਂ ਸਙ੍ਕੇਤਂ ਪੁਰੇ ਵਾ ਪਚ੍ਛਾ ਵਾ ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਅਵਹਾਰਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
੧੨੦. ਨਿਮਿਤ੍ਤਕਮ੍ਮਂ ਨਾਮ ਨਿਮਿਤ੍ਤਂ ਕਰੋਤਿ. ਅਕ੍ਖਿਂ ਵਾ ਨਿਖਣਿਸ੍ਸਾਮਿ ਭਮੁਕਂ ਵਾ ਉਕ੍ਖਿਪਿਸ੍ਸਾਮਿ ਸੀਸਂ ਵਾ ਉਕ੍ਖਿਪਿਸ੍ਸਾਮਿ, ਤੇਨ ਨਿਮਿਤ੍ਤੇਨ ਤਂ ਭਣ੍ਡਂ ਅਵਹਰਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਨਿਮਿਤ੍ਤੇਨ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ. ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਅਵਹਾਰਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
੧੨੧. ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਮਞ੍ਞਮਾਨੋ ਤਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਮਞ੍ਞਮਾਨੋ ਅਞ੍ਞਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਅਵਹਾਰਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਮਞ੍ਞਮਾਨੋ ਤਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਮਞ੍ਞਮਾਨੋ ਅਞ੍ਞਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਅਵਹਾਰਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਸ੍ਸ ਪਾਵਦ – ‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਪਾਵਦਤੁ – ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਤੂ’’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਇਤਰਸ੍ਸ ਆਰੋਚੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਵਹਾਰਕੋ ਪਟਿਗ੍ਗਣ੍ਹਾਤਿ, ਮੂਲਟ੍ਠਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸੋ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਸ੍ਸ ਪਾਵਦ – ‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਪਾਵਦਤੁ – ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਤੂ’’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਵਹਾਰਕੋ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਆਣਾਪਕਸ੍ਸ ਚ ਅਵਹਾਰਕਸ੍ਸ ਚ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਗਨ੍ਤ੍ਵਾ ਪੁਨ ਪਚ੍ਚਾਗਚ੍ਛਤਿ – ‘‘ਨਾਹਂ ਸਕ੍ਕੋਮਿ ਤਂ ਭਣ੍ਡਂ ਅਵਹਰਿਤੁ’’ਨ੍ਤਿ. ਸੋ ਪੁਨ ਆਣਾਪੇਤਿ – ‘‘ਯਦਾ ਸਕ੍ਕੋਸਿ ਤਦਾ ਤਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਨ ਸਾਵੇਤਿ – ‘‘ਮਾ ਅਵਹਰੀ’’ਤਿ. ਸੋ ਤਂ ਭਣ੍ਡਂ ਅਵਹਰਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਸਾਵੇਤਿ – ‘‘ਮਾ ਅਵਹਰੀ’’ਤਿ. ਸੋ ‘‘ਆਣਤ੍ਤੋ ਅਹਂ ਤਯਾ’’ਤਿ, ਤਂ ਭਣ੍ਡਂ ਅਵਹਰਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਅਵਹਾਰਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਸਾਵੇਤਿ – ‘‘ਮਾ ਅਵਹਰੀ’’ਤਿ. ਸੋ ‘‘ਸਾਧੂ’’ਤਿ [ਸੁਟ੍ਠੂਤਿ (ਕ.)]? ਓਰਮਤਿ, ਉਭਿਨ੍ਨਂ ਅਨਾਪਤ੍ਤਿ.
੧੨੨. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ – ਪਰਪਰਿਗ੍ਗਹਿਤਞ੍ਚ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ, ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੨੩. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ – ਪਰਪਰਿਗ੍ਗਹਿਤਞ੍ਚ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ, ਅਤਿਰੇਕਮਾਸਕੋ ਵਾ ਊਨਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.
੧੨੪. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਪਰਪਰਿਗ੍ਗਹਿਤਞ੍ਚ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ, ਮਾਸਕੋ ਵਾ ਊਨਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੨੫. ਛਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ. ਨ ਚ ਸਕਸਞ੍ਞੀ, ਨ ਚ ਵਿਸ੍ਸਾਸਗ੍ਗਾਹੀ, ਨ ਚ ਤਾਵਕਾਲਿਕਂ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ, ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ. ਫਨ੍ਦਾਪੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੨੬. ਛਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਨ ਚ ਸਕਸਞ੍ਞੀ, ਨ ਚ ਵਿਸ੍ਸਾਸਗ੍ਗਾਹੀ, ਨ ਚ ਤਾਵਕਾਲਿਕਂ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ ਅਤਿਰੇਕਮਾਸਕੋ ਵਾ ਊਨਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.
੧੨੭. ਛਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਨ ਚ ਸਕਸਞ੍ਞੀ, ਨ ਚ ਵਿਸ੍ਸਾਸਗ੍ਗਾਹੀ, ਨ ਚ ਤਾਵਕਾਲਿਕਂ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ, ਮਾਸਕੋ ਵਾ ਊਨਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੨੮. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਨ ਚ ਪਰਪਰਿਗ੍ਗਹਿਤਂ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਗਰੁਕੋ ਚ ਹੋਤਿ ਪਰਿਕ੍ਖਾਰੋ, ਪਞ੍ਚਮਾਸਕੋ ਵਾ ਅਤਿਰੇਕਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੨੯. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਨ ਚ ਪਰਪਰਿਗ੍ਗਹਿਤਂ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ, ਅਤਿਰੇਕਮਾਸਕੋ ਵਾ ਊਨਪਞ੍ਚਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੩੦. ਪਞ੍ਚਹਿ ਆਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਨ ਚ ਪਰਪਰਿਗ੍ਗਹਿਤਂ ਹੋਤਿ, ਪਰਪਰਿਗ੍ਗਹਿਤਸਞ੍ਞੀ ਚ, ਲਹੁਕੋ ਚ ਹੋਤਿ ਪਰਿਕ੍ਖਾਰੋ, ਮਾਸਕੋ ਵਾ ਊਨਮਾਸਕੋ ਵਾ, ਥੇਯ੍ਯਚਿਤ੍ਤਞ੍ਚ ਪਚ੍ਚੁਪਟ੍ਠਿਤਂ ਹੋਤਿ. ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਫਨ੍ਦਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਠਾਨਾ ਚਾਵੇਤਿ, ਆਪਤ੍ਤਿ ਦੁਕ੍ਕਟਸ੍ਸ.
੧੩੧. ਅਨਾਪਤ੍ਤਿ ਸਸਞ੍ਞਿਸ੍ਸ, ਵਿਸ੍ਸਾਸਗ੍ਗਾਹੇ, ਤਾਵਕਾਲਿਕੇ, ਪੇਤਪਰਿਗ੍ਗਹੇ, ਤਿਰਚ੍ਛਾਨਗਤਪਰਿਗ੍ਗਹੇ, ਪਂਸੁਕੂਲਸਞ੍ਞਿਸ੍ਸ, ਉਮ੍ਮਤ੍ਤਕਸ੍ਸ, (ਖਿਤ੍ਤਚਿਤ੍ਤਸ੍ਸ ਵੇਦਨਾਟ੍ਟਸ੍ਸ) [(ਖਿਤ੍ਤਚਿਤ੍ਤਸ੍ਸ ਵੇਦਨਾਟ੍ਟਸ੍ਸ) ਕਤ੍ਥਚਿ ਨਤ੍ਥਿ] ਆਦਿਕਮ੍ਮਿਕਸ੍ਸਾਤਿ.
ਅਦਿਨ੍ਨਾਦਾਨਮ੍ਹਿ ਪਠਮਭਾਣਵਾਰੋ ਨਿਟ੍ਠਿਤੋ.
ਵਿਨੀਤਵਤ੍ਥੁਉਦ੍ਦਾਨਗਾਥਾ
ਰਜਕੇਹਿ ਪਞ੍ਚ ਅਕ੍ਖਾਤਾ, ਚਤੁਰੋ ਅਤ੍ਥਰਣੇਹਿ ਚ;
ਅਨ੍ਧਕਾਰੇਨ ਵੇ ਪਞ੍ਚ, ਪਞ੍ਚ ਹਾਰਣਕੇਨ ਚ.
ਨਿਰੁਤ੍ਤਿਯਾ ਪਞ੍ਚ ਅਕ੍ਖਾਤਾ, ਵਾਤੇਹਿ ਅਪਰੇ ਦੁਵੇ;
ਅਸਮ੍ਭਿਨ੍ਨੇ ਕੁਸਾਪਾਤੋ, ਜਨ੍ਤਗ੍ਗੇਨ [ਜਨ੍ਤਾਘਰੇਨ (ਸ੍ਯਾ.)] ਸਹਾ ਦਸ.
ਵਿਘਾਸੇਹਿ ਪਞ੍ਚ ਅਕ੍ਖਾਤਾ, ਪਞ੍ਚ ਚੇਵ ਅਮੂਲਕਾ;
ਦੁਬ੍ਭਿਕ੍ਖੇ ਕੁਰਮਂਸਞ੍ਚ [ਕੂਰਮਂਸਞ੍ਚ (ਸ੍ਯਾ.)], ਪੂਵਸਕ੍ਖਲਿਮੋਦਕਾ.
ਛਪਰਿਕ੍ਖਾਰਥਵਿਕਾ, ਭਿਸਿਵਂਸਾ ਨ ਨਿਕ੍ਖਮੇ;
ਖਾਦਨੀਯਞ੍ਚ ਵਿਸ੍ਸਾਸਂ, ਸਸਞ੍ਞਾਯਪਰੇ ਦੁਵੇ.
ਸਤ੍ਤ ਨਾਵਹਰਾਮਾਤਿ, ਸਤ੍ਤ ਚੇਵ ਅਵਾਹਰੁਂ;
ਸਙ੍ਘਸ੍ਸ ਅਵਹਰੁਂ ਸਤ੍ਤ, ਪੁਪ੍ਫੇਹਿ ਅਪਰੇ ਦੁਵੇ.
ਤਯੋ ਚ ਵੁਤ੍ਤਵਾਦਿਨੋ, ਮਣਿ ਤੀਣਿ ਅਤਿਕ੍ਕਮੇ;
ਸੂਕਰਾ ਚ ਮਿਗਾ ਮਚ੍ਛਾ, ਯਾਨਞ੍ਚਾਪਿ ਪਵਤ੍ਤਯਿ.
ਦੁਵੇ ਪੇਸੀ ਦੁਵੇ ਦਾਰੂ, ਪਂਸੁਕੂਲਂ ਦੁਵੇ ਦਕਾ;
ਅਨੁਪੁਬ੍ਬਵਿਧਾਨੇਨ, ਤਦਞ੍ਞੋ ਨ ਪਰਿਪੂਰਯਿ.
ਸਾਵਤ੍ਥਿਯਾ ਚਤੁਰੋ ਮੁਟ੍ਠੀ, ਦ੍ਵੇ ਵਿਘਾਸਾ ਦੁਵੇ ਤਿਣਾ;
ਸਙ੍ਘਸ੍ਸ ਭਾਜਯੁਂ ਸਤ੍ਤ, ਸਤ੍ਤ ਚੇਵ ਅਸ੍ਸਾਮਿਕਾ.
ਦਾਰੁਦਕਾ ਮਤ੍ਤਿਕਾ ਦ੍ਵੇ ਤਿਣਾਨਿ;
ਸਙ੍ਘਸ੍ਸ ਸਤ੍ਤ ਅਵਹਾਸਿ ਸੇਯ੍ਯਂ;
ਸਸ੍ਸਾਮਿਕਂ ਨ ਚਾਪਿ ਨੀਹਰੇਯ੍ਯ;
ਹਰੇਯ੍ਯ ਸਸ੍ਸਾਮਿਕਂ ਤਾਵਕਾਲਿਕਂ.
ਚਮ੍ਪਾ ਰਾਜਗਹੇ ਚੇਵ, ਵੇਸਾਲਿਯਾ ਚ ਅਜ੍ਜੁਕੋ;
ਬਾਰਾਣਸੀ ਚ ਕੋਸਮ੍ਬੀ, ਸਾਗਲਾ ਦਲ਼੍ਹਿਕੇਨ ਚਾਤਿ.
ਵਿਨੀਤਵਤ੍ਥੁ
੧੩੨. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਰਜਕਤ੍ਥਰਣਂ ਗਨ੍ਤ੍ਵਾ ਰਜਕਭਣ੍ਡਿਕਂ ਅਵਹਰਿਂਸੁ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ. ਕਚ੍ਚਿ ਨੁ ਖੋ ਮਯਂ ਪਾਰਾਜਿਕਂ ਆਪਤ੍ਤਿਂ ਆਪਨ੍ਨਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਆਪਤ੍ਤਿਂ ਤੁਮ੍ਹੇ, ਭਿਕ੍ਖਵੇ, ਆਪਨ੍ਨਾ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਰਜਕਤ੍ਥਰਣਂ ਗਨ੍ਤ੍ਵਾ ਮਹਗ੍ਘਂ ਦੁਸ੍ਸਂ ਪਸ੍ਸਿਤ੍ਵਾ ਥੇਯ੍ਯਚਿਤ੍ਤਂ ਉਪ੍ਪਾਦੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਕਚ੍ਚਿ ਨੁ ਖੋ ਅਹਂ ਪਾਰਾਜਿਕਂ ਆਪਤ੍ਤਿਂ ਆਪਨ੍ਨੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਅਨਾਪਤ੍ਤਿ, ਭਿਕ੍ਖੁ, ਚਿਤ੍ਤੁਪ੍ਪਾਦੇ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਰਜਕਤ੍ਥਰਣਂ ਗਨ੍ਤ੍ਵਾ ਮਹਗ੍ਘਂ ਦੁਸ੍ਸਂ ਪਸ੍ਸਿਤ੍ਵਾ ਥੇਯ੍ਯਚਿਤ੍ਤੋ ਆਮਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਰਜਕਤ੍ਥਰਣਂ ਗਨ੍ਤ੍ਵਾ ਮਹਗ੍ਘਂ ਦੁਸ੍ਸਂ ਪਸ੍ਸਿਤ੍ਵਾ ਥੇਯ੍ਯਚਿਤ੍ਤੋ ਫਨ੍ਦਾਪੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਰਜਕਤ੍ਥਰਣਂ ਗਨ੍ਤ੍ਵਾ ਮਹਗ੍ਘਂ ਦੁਸ੍ਸਂ ਪਸ੍ਸਿਤ੍ਵਾ ਥੇਯ੍ਯਚਿਤ੍ਤੋ ਠਾਨਾ ਚਾਵੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੩੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਮਹਗ੍ਘਂ ਉਤ੍ਤਰਤ੍ਥਰਣਂ ਪਸ੍ਸਿਤ੍ਵਾ ਥੇਯ੍ਯਚਿਤ੍ਤਂ ਉਪ੍ਪਾਦੇਸਿ…ਪੇ… ਥੇਯ੍ਯਚਿਤ੍ਤੋ ਆਮਸਿ…ਪੇ… ਥੇਯ੍ਯਚਿਤ੍ਤੋ ਫਨ੍ਦਾਪੇਸਿ…ਪੇ… ਥੇਯ੍ਯਚਿਤ੍ਤੋ ਠਾਨਾ ਚਾਵੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੩੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦਿਵਾ ਭਣ੍ਡਂ ਪਸ੍ਸਿਤ੍ਵਾ ਨਿਮਿਤ੍ਤਂ ਅਕਾਸਿ – ‘ਰਤ੍ਤਿਂ ਅਵਹਰਿਸ੍ਸਾਮੀ’ਤਿ. ਸੋ ਤਂ ਮਞ੍ਞਮਾਨੋ ਤਂ ਅਵਹਰਿ…ਪੇ… ਤਂ ਮਞ੍ਞਮਾਨੋ ਅਞ੍ਞਂ ਅਵਹਰਿ…ਪੇ… ਅਞ੍ਞਂ ਮਞ੍ਞਮਾਨੋ ਤਂ ਅਵਹਰਿ…ਪੇ… ਅਞ੍ਞਂ ਮਞ੍ਞਮਾਨੋ ਅਞ੍ਞਂ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦਿਵਾ ਭਣ੍ਡਂ ਪਸ੍ਸਿਤ੍ਵਾ ਨਿਮਿਤ੍ਤਂ ਅਕਾਸਿ – ‘‘ਰਤ੍ਤਿਂ ਅਵਹਰਿਸ੍ਸਾਮੀ’’ਤਿ. ਸੋ ਤਂ ਮਞ੍ਞਮਾਨੋ ਅਤ੍ਤਨੋ ਭਣ੍ਡਂ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਞ੍ਞਸ੍ਸ ਭਣ੍ਡਂ ਹਰਨ੍ਤੋ ਸੀਸੇ ਭਾਰਂ ਥੇਯ੍ਯਚਿਤ੍ਤੋ ਆਮਸਿ…ਪੇ… ਥੇਯ੍ਯਚਿਤ੍ਤੋ ਫਨ੍ਦਾਪੇਸਿ…ਪੇ… ਥੇਯ੍ਯਚਿਤ੍ਤੋ ਖਨ੍ਧਂ ਓਰੋਪੇਸਿ…ਪੇ… ਖਨ੍ਧੇ ਭਾਰਂ ਥੇਯ੍ਯਚਿਤ੍ਤੋ ਆਮਸਿ…ਪੇ… ਥੇਯ੍ਯਚਿਤ੍ਤੋ ਫਨ੍ਦਾਪੇਸਿ…ਪੇ… ਥੇਯ੍ਯਚਿਤ੍ਤੋ ਕਟਿਂ ਓਰੋਪੇਸਿ…ਪੇ… ਕਟਿਯਾ ਭਾਰਂ ਥੇਯ੍ਯਚਿਤ੍ਤੋ ਆਮਸਿ…ਪੇ… ਥੇਯ੍ਯਚਿਤ੍ਤੋ ਫਨ੍ਦਾਪੇਸਿ…ਪੇ… ਥੇਯ੍ਯਚਿਤ੍ਤੋ ਹਤ੍ਥੇਨ ਅਗ੍ਗਹੇਸਿ…ਪੇ… ਹਤ੍ਥੇ ਭਾਰਂ ਥੇਯ੍ਯਚਿਤ੍ਤੋ ਭੂਮਿਯਂ ਨਿਕ੍ਖਿਪਿ…ਪੇ… ਥੇਯ੍ਯਚਿਤ੍ਤੋ ਭੂਮਿਤੋ ਅਗ੍ਗਹੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੩੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਜ੍ਝੋਕਾਸੇ ਚੀਵਰਂ ਪਤ੍ਥਰਿਤ੍ਵਾ ਵਿਹਾਰਂ ਪਾਵਿਸਿ. ਅਞ੍ਞਤਰੋ ਭਿਕ੍ਖੁ – ‘ਮਾਯਿਦਂ ਚੀਵਰਂ ਨਸ੍ਸੀ’ਤਿ, ਪਟਿਸਾਮੇਸਿ. ਸੋ ਨਿਕ੍ਖਮਿਤ੍ਵਾ ਤਂ ਭਿਕ੍ਖੁਂ ਪੁਚ੍ਛਿ – ‘‘ਆਵੁਸੋ, ਮਯ੍ਹਂ ਚੀਵਰਂ ਕੇਨ ਅਵਹਟ’’ਨ੍ਤਿ? ਸੋ ਏਵਮਾਹ – ‘‘ਮਯਾ ਅਵਹਟ’’ਨ੍ਤਿ. ‘‘ਸੋ ਤਂ ਆਦਿਯਿ, ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ…. ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਨਿਰੁਤ੍ਤਿਪਥੋ ਅਹਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਨਿਰੁਤ੍ਤਿਪਥੇ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪੀਠੇ ਚੀਵਰਂ ਨਿਕ੍ਖਿਪਿਤ੍ਵਾ. ਪੀਠੇ ਨਿਸੀਦਨਂ ਨਿਕ੍ਖਿਪਿਤ੍ਵਾ… ਹੇਟ੍ਠਾਪੀਠੇ ਪਤ੍ਤਂ ਨਿਕ੍ਖਿਪਿਤ੍ਵਾ ਵਿਹਾਰਂ ਪਾਵਿਸਿ. ਅਞ੍ਞਤਰੋ ਭਿਕ੍ਖੁ – ‘‘ਮਾਯਂ ਪਤ੍ਤੋ ਨਸ੍ਸੀ’’ਤਿ ਪਟਿਸਾਮੇਸਿ. ਸੋ ਨਿਕ੍ਖਮਿਤ੍ਵਾ ਤਂ ਭਿਕ੍ਖੁਂ ਪੁਚ੍ਛਿ – ‘‘ਆਵੁਸੋ, ਮਯ੍ਹਂ ਪਤ੍ਤੋ ਕੇਨ ਅਵਹਟੋ’’ਤਿ? ਸੋ ਏਵਮਾਹ – ‘‘ਮਯਾ ਅਵਹਟੋ’’ਤਿ. ‘‘ਸੋ ਤਂ ਆਦਿਯਿ, ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਿਰੁਤ੍ਤਿਪਥੇ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਵਤਿਯਾ ਚੀਵਰਂ ਪਤ੍ਥਰਿਤ੍ਵਾ ਵਿਹਾਰਂ ਪਾਵਿਸਿ. ਅਞ੍ਞਤਰਾ ਭਿਕ੍ਖੁਨੀ – ‘ਮਾਯਿਦਂ ਚੀਵਰਂ ਨਸ੍ਸੀ’ਤਿ ਪਟਿਸਾਮੇਸਿ. ਸਾ ਨਿਕ੍ਖਮਿਤ੍ਵਾ ਤਂ ਭਿਕ੍ਖੁਨਿਂ ਪੁਚ੍ਛਿ – ‘‘ਅਯ੍ਯੇ, ਮਯ੍ਹਂ ਚੀਵਰਂ ਕੇਨ ਅਵਹਟ’’ਨ੍ਤਿ? ਸਾ ਏਵਮਾਹ – ‘‘ਮਯਾ ਅਵਹਟ’’ਨ੍ਤਿ. ‘‘ਸਾ ਤਂ ਆਦਿਯਿ, ਅਸ੍ਸਮਣੀਸਿ ਤ੍ਵ’’ਨ੍ਤਿ. ਤਸ੍ਸਾ ਕੁਕ੍ਕੁਚ੍ਚਂ ਅਹੋਸਿ. ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਿਰੁਤ੍ਤਿਪਥੇ’’ਤਿ.
੧੩੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਾਤਮਣ੍ਡਲਿਕਾਯ ਉਕ੍ਖਿਤ੍ਤਂ ਸਾਟਕਂ ਪਸ੍ਸਿਤ੍ਵਾ ਸਾਮਿਕਾਨਂ ਦਸ੍ਸਾਮੀਤਿ, ਅਗ੍ਗਹੇਸਿ. ਸਾਮਿਕਾ ਤਂ ਭਿਕ੍ਖੁਂ ਚੋਦੇਸੁਂ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ ਭਿਕ੍ਖੂ’’ਤਿ? ‘‘ਅਥੇਯ੍ਯਚਿਤ੍ਤੋ ਅਹਂ, ਭਗਵਾ’’ਤਿ. ਅਨਾਪਤ੍ਤਿ, ਭਿਕ੍ਖੁ, ਅਥੇਯ੍ਯਚਿਤ੍ਤਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਾਤਮਣ੍ਡਲਿਕਾਯ ਉਕ੍ਖਿਤ੍ਤਂ ਵੇਠਨਂ ਪਸ੍ਸਿਤ੍ਵਾ ‘ਪੁਰੇ ਸਾਮਿਕਾ ਪਸ੍ਸਨ੍ਤੀ’ਤਿ ਥੇਯ੍ਯਚਿਤ੍ਤੋ ਅਗ੍ਗਹੇਸਿ. ਸਾਮਿਕਾ ਤਂ ਭਿਕ੍ਖੁਂ ਚੋਦੇਸੁਂ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੩੭. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸੁਸਾਨਂ ਗਨ੍ਤ੍ਵਾ ਅਭਿਨ੍ਨੇ ਸਰੀਰੇ ਪਂਸੁਕੂਲਂ ਅਗ੍ਗਹੇਸਿ. ਤਸ੍ਮਿਞ੍ਚ ਸਰੀਰੇ ਪੇਤੋ ਅਧਿਵਤ੍ਥੋ ਹੋਤਿ. ਅਥ ਖੋ ਸੋ ਪੇਤੋ ਤਂ ਭਿਕ੍ਖੁਂ ਏਤਦਵੋਚ – ‘‘ਮਾ, ਭਨ੍ਤੇ, ਮਯ੍ਹਂ ਸਾਟਕਂ ਅਗ੍ਗਹੇਸੀ’’ਤਿ. ਸੋ ਭਿਕ੍ਖੁ ਅਨਾਦਿਯਨ੍ਤੋ ਅਗਮਾਸਿ. ਅਥ ਖੋ ਤਂ ਸਰੀਰਂ ਉਟ੍ਠਹਿਤ੍ਵਾ ਤਸ੍ਸ ਭਿਕ੍ਖੁਨੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਅਥ ਖੋ ਸੋ ਭਿਕ੍ਖੁ ਵਿਹਾਰਂ ਪਵਿਸਿਤ੍ਵਾ ਦ੍ਵਾਰਂ ਥਕੇਸਿ. ਅਥ ਖੋ ਤਂ ਸਰੀਰਂ ਤਤ੍ਥੇਵ ਪਰਿਪਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਅਭਿਨ੍ਨੇ ਸਰੀਰੇ ਪਂਸੁਕੂਲਂ ਗਹੇਤਬ੍ਬਂ. ਸੋ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੧੩੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਚੀਵਰੇ ਭਾਜੀਯਮਾਨੇ ਥੇਯ੍ਯਚਿਤ੍ਤੋ ਕੁਸਂ ਸਙ੍ਕਾਮੇਤ੍ਵਾ ਚੀਵਰਂ ਅਗ੍ਗਹੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੩੯. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਆਨਨ੍ਦੋ ਜਨ੍ਤਾਘਰੇ ਅਞ੍ਞਤਰਸ੍ਸ ਭਿਕ੍ਖੁਨੋ ਅਨ੍ਤਰਵਾਸਕਂ ਅਤ੍ਤਨੋ ਮਞ੍ਞਮਾਨੋ ਨਿਵਾਸੇਸਿ. ਅਥ ਖੋ ਸੋ ਭਿਕ੍ਖੁ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਕਿਸ੍ਸ ਮੇ ਤ੍ਵਂ, ਆਵੁਸੋ ਆਨਨ੍ਦ, ਅਨ੍ਤਰਵਾਸਕਂ ਨਿਵਾਸੇਸੀ’’ਤਿ? ‘‘ਸਕਸਞ੍ਞੀ ਅਹਂ, ਆਵੁਸੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨਾਪਤ੍ਤਿ, ਭਿਕ੍ਖਵੇ, ਸਕਸਞ੍ਞਿਸ੍ਸਾ’’ਤਿ.
੧੪੦. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤਾ ਸੀਹਵਿਘਾਸਂ ਪਸ੍ਸਿਤ੍ਵਾ ਪਚਾਪੇਤ੍ਵਾ ਪਰਿਭੁਞ੍ਜਿਂਸੁ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਸੀਹਵਿਘਾਸੇ’’ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤਾ ਬ੍ਯਗ੍ਘਵਿਘਾਸਂ ਪਸ੍ਸਿਤ੍ਵਾ… ਦੀਪਿਵਿਘਾਸਂ ਪਸ੍ਸਿਤ੍ਵਾ… ਤਰਚ੍ਛਵਿਘਾਸਂ ਪਸ੍ਸਿਤ੍ਵਾ… ਕੋਕਵਿਘਾਸਂ ਪਸ੍ਸਿਤ੍ਵਾ ਪਚਾਪੇਤ੍ਵਾ ਪਰਿਭੁਞ੍ਜਿਂਸੁ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਤਿਰਚ੍ਛਾਨਗਤਪਰਿਗ੍ਗਹੇ’’ਤਿ.
੧੪੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਓਦਨੇ ਭਾਜੀਯਮਾਨੇ – ‘ਅਪਰਸ੍ਸ ਭਾਗਂ ਦੇਹੀ’ਤਿ ਅਮੂਲਕਂ ਅਗ੍ਗਹੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਖਾਦਨੀਯੇ ਭਾਜਿਯਮਾਨੇ… ਸਙ੍ਘਸ੍ਸ ਪੂਵੇ ਭਾਜਿਯਮਾਨੇ… ਸਙ੍ਘਸ੍ਸ ਉਚ੍ਛੁਮ੍ਹਿ ਭਾਜਿਯਮਾਨੇ… ਸਙ੍ਘਸ੍ਸ ਤਿਮ੍ਬਰੂਸਕੇ ਭਾਜਿਯਮਾਨੇ – ‘ਅਪਰਸ੍ਸ ਭਾਗਂ ਦੇਹੀ’ਤਿ ਅਮੂਲਕਂ ਅਗ੍ਗਹੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ…. ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਸ੍ਸਾ’’ਤਿ.
੧੪੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦੁਬ੍ਭਿਕ੍ਖੇ ਓਦਨੀਯਘਰਂ ਪਵਿਸਿਤ੍ਵਾ ਪਤ੍ਤਪੂਰਂ ਓਦਨਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦੁਬ੍ਭਿਕ੍ਖੇ ਸੂਨਘਰਂ [ਸੂਨਾਘਰਂ (ਸੀ. ਸ੍ਯਾ)] ਪਵਿਸਿਤ੍ਵਾ ਪਤ੍ਤਪੂਰਂ ਮਂਸਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦੁਬ੍ਭਿਕ੍ਖੇ ਪੂਵਘਰਂ ਪਵਿਸਿਤ੍ਵਾ ਪਤ੍ਤਪੂਰਂ ਪੂਵਂ ਥੇਯ੍ਯਚਿਤ੍ਤੋ ਅਵਹਰਿ…ਪੇ… ਪਤ੍ਤਪੂਰਾ ਸਕ੍ਖਲਿਯੋ ਥੇਯ੍ਯਚਿਤ੍ਤੋ ਅਵਹਰਿ…ਪੇ… ਪਤ੍ਤਪੂਰੇ ਮੋਦਕੇ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੪੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦਿਵਾ ਪਰਿਕ੍ਖਾਰਂ ਪਸ੍ਸਿਤ੍ਵਾ ਨਿਮਿਤ੍ਤਂ ਅਕਾਸਿ – ‘‘ਰਤ੍ਤਿਂ ਅਵਹਰਿਸ੍ਸਾਮੀ’’ਤਿ. ਸੋ ਤਂ ਮਞ੍ਞਮਾਨੋ ਤਂ ਅਵਹਰਿ…ਪੇ… ਤਂ ਮਞ੍ਞਮਾਨੋ ਅਞ੍ਞਂ ਅਵਹਰਿ…ਪੇ… ਅਞ੍ਞਂ ਮਞ੍ਞਮਾਨੋ ਤਂ ਅਵਹਰਿ…ਪੇ… ਅਞ੍ਞਂ ਮਞ੍ਞਮਾਨੋ ਅਞ੍ਞਂ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦਿਵਾ ਪਰਿਕ੍ਖਾਰਂ ਪਸ੍ਸਿਤ੍ਵਾ ਨਿਮਿਤ੍ਤਂ ਅਕਾਸਿ – ‘‘ਰਤ੍ਤਿਂ ਅਵਹਰਿਸ੍ਸਾਮੀ’’ਤਿ. ਸੋ ਤਂ ਮਞ੍ਞਮਾਨੋ ਅਤ੍ਤਨੋ ਪਰਿਕ੍ਖਾਰਂ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੧੪੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪੀਠੇ ਥਵਿਕਂ ਪਸ੍ਸਿਤ੍ਵਾ – ‘‘ਇਤੋ ਗਣ੍ਹਨ੍ਤੋ ਪਾਰਾਜਿਕੋ ਭਵਿਸ੍ਸਾਮੀ’’ਤਿ ਸਹ ਪੀਠਕੇਨ ਸਙ੍ਕਾਮੇਤ੍ਵਾ ਅਗ੍ਗਹੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਭਿਸਿਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੪੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਚੀਵਰਵਂਸੇ ਚੀਵਰਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਿਹਾਰੇ ਚੀਵਰਂ ਅਵਹਰਿਤ੍ਵਾ – ‘‘ਇਤੋ ਨਿਕ੍ਖਮਨ੍ਤੋ ਪਾਰਾਜਿਕੋ ਭਵਿਸ੍ਸਾਮੀ’’ਤਿ ਵਿਹਾਰਾ ਨ ਨਿਕ੍ਖਮਿ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨਿਕ੍ਖਮਿ [ਨਿਕ੍ਖਮੇਯ੍ਯ (ਸੀ. ਸ੍ਯਾ.)] ਵਾ ਸੋ, ਭਿਕ੍ਖਵੇ, ਮੋਘਪੁਰਿਸੋ ਨ ਵਾ ਨਿਕ੍ਖਮਿ [ਨਿਕ੍ਖਮੇਯ੍ਯ (ਸੀ. ਸ੍ਯਾ.)], ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ.
੧੪੬. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਸਹਾਯਕਾ ਹੋਨ੍ਤਿ. ਏਕੋ ਭਿਕ੍ਖੁ ਗਾਮਂ ਪਿਣ੍ਡਾਯ ਪਾਵਿਸਿ. ਦੁਤਿਯੋ ਭਿਕ੍ਖੁ ਸਙ੍ਘਸ੍ਸ ਖਾਦਨੀਯੇ ਭਾਜੀਯਮਾਨੇ ਸਹਾਯਕਸ੍ਸ ਭਾਗਂ ਗਹੇਤ੍ਵਾ ਤਸ੍ਸ ਵਿਸ੍ਸਸਨ੍ਤੋ ਪਰਿਭੁਞ੍ਜਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂ ਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਵਿਸ੍ਸਾਸਗ੍ਗਾਹੋ ਅਹਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਵਿਸ੍ਸਾਸਗ੍ਗਾਹੇ’’ਤਿ.
੧੪੭. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਚੀਵਰਕਮ੍ਮਂ ਕਰੋਨ੍ਤਿ. ਸਙ੍ਘਸ੍ਸ ਖਾਦਨੀਯੇ ਭਾਜੀਯਮਾਨੇ ਸਬ੍ਬੇਸਂ ਪਟਿਵਿਸਾ ਆਹਰਿਤ੍ਵਾ ਉਪਨਿਕ੍ਖਿਤ੍ਤਾ ਹੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਸ੍ਸ ਭਿਕ੍ਖੁਨੋ ਪਟਿਵਿਸਂ ਅਤ੍ਤਨੋ ਮਞ੍ਞਮਾਨੋ ਪਰਿਭੁਞ੍ਜਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਸਕਸਞ੍ਞੀ ਅਹਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਸਕਸਞ੍ਞਿਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਚੀਵਰਕਮ੍ਮਂ ਕਰੋਨ੍ਤਿ. ਸਙ੍ਘਸ੍ਸ ਖਾਦਨੀਯੇ ਭਾਜਿਯਮਾਨੇ ਅਞ੍ਞਤਰਸ੍ਸ ਭਿਕ੍ਖੁਨੋ ਪਤ੍ਤੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਟਿਵਿਸੋ ਆਹਰਿਤ੍ਵਾ ਉਪਨਿਕ੍ਖਿਤ੍ਤੋ ਹੋਤਿ. ਪਤ੍ਤਸਾਮਿਕੋ ਭਿਕ੍ਖੁ ਅਤ੍ਤਨੋ ਮਞ੍ਞਮਾਨੋ ਪਰਿਭੁਞ੍ਜਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਕਸਞ੍ਞਿਸ੍ਸਾ’’ਤਿ.
੧੪੮. ਤੇਨ ਖੋ ਪਨ ਸਮਯੇਨ ਅਮ੍ਬਚੋਰਕਾ ਅਮ੍ਬਂ ਪਾਤੇਤ੍ਵਾ ਭਣ੍ਡਿਕਂ ਆਦਾਯ ਅਗਮਂਸੁ. ਸਾਮਿਕਾ ਤੇ ਚੋਰਕੇ ਅਨੁਬਨ੍ਧਿਂਸੁ. ਚੋਰਕਾ ਸਾਮਿਕੇ ਪਸ੍ਸਿਤ੍ਵਾ ਭਣ੍ਡਿਕਂ ਪਾਤੇਤ੍ਵਾ ਪਲਾਯਿਂਸੁ. ਭਿਕ੍ਖੂ ਪਂਸੁਕੂਲਸਞ੍ਞਿਨੋ ਪਟਿਗ੍ਗਹਾਪੇਤ੍ਵਾ ਪਰਿਭੁਞ੍ਜਿਂਸੁ. ਸਾਮਿਕਾ ਤੇ ਭਿਕ੍ਖੂ ਚੋਦੇਸੁਂ – ‘‘ਅਸ੍ਸਮਣਾਤ੍ਥ ਤੁਮ੍ਹੇ’’ਤਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਕਿਂਚਿਤ੍ਤਾ ਤੁਮ੍ਹੇ, ਭਿਕ੍ਖਵੇ’’ਤਿ? ‘‘ਪਂਸੁਕੂਲਸਞ੍ਞਿਨੋ ਮਯਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖਵੇ, ਪਂਸੁਕੂਲਸਞ੍ਞਿਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਜਮ੍ਬੁਚੋਰਕਾ… ਲਬੁਜਚੋਰਕਾ… ਪਨਸਚੋਰਕਾ… ਤਾਲਪਕ੍ਕਚੋਰਕਾ… ਉਚ੍ਛੁਚੋਰਕਾ… ਤਿਮ੍ਬਰੂਸਕਚੋਰਕਾ ਤਿਮ੍ਬਰੂਸਕੇ ਉਚ੍ਚਿਨਿਤ੍ਵਾ ਭਣ੍ਡਿਕਂ ਆਦਾਯ ਅਗਮਂਸੁ. ਸਾਮਿਕਾ ਤੇ ਚੋਰਕੇ ਅਨੁਬਨ੍ਧਿਂਸੁ. ਚੋਰਕਾ ਸਾਮਿਕੇ ਪਸ੍ਸਿਤ੍ਵਾ ਭਣ੍ਡਿਕਂ ਪਾਤੇਤ੍ਵਾ ਪਲਾਯਿਂਸੁ. ਭਿਕ੍ਖੂ ਪਂਸੁਕੂਲਸਞ੍ਞਿਨੋ ਪਟਿਗ੍ਗਹਾਪੇਤ੍ਵਾ ਪਰਿਭੁਞ੍ਜਿਂਸੁ. ਸਾਮਿਕਾ ਤੇ ਭਿਕ੍ਖੂ ਚੋਦੇਸੁਂ – ‘‘ਅਸ੍ਸਮਣਾਤ੍ਥ ਤੁਮ੍ਹੇ’’ਤਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਂਸੁਕੂਲਸਞ੍ਞਿਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਮ੍ਬਚੋਰਕਾ ਅਮ੍ਬਂ ਪਾਤੇਤ੍ਵਾ ਭਣ੍ਡਿਕਂ ਆਦਾਯ ਅਗਮਂਸੁ. ਸਾਮਿਕਾ ਤੇ ਚੋਰਕੇ ਅਨੁਬਨ੍ਧਿਂਸੁ. ਚੋਰਕਾ ਸਾਮਿਕੇ ਪਸ੍ਸਿਤ੍ਵਾ ਭਣ੍ਡਿਕਂ ਪਾਤੇਤ੍ਵਾ ਪਲਾਯਿਂਸੁ. ਭਿਕ੍ਖੂ – ‘ਪੁਰੇ ਸਾਮਿਕਾ ਪਸ੍ਸਨ੍ਤੀ’ਤਿ, ਥੇਯ੍ਯਚਿਤ੍ਤਾ ਪਰਿਭੁਞ੍ਜਿਂਸੁ. ਸਾਮਿਕਾ ਤੇ ਭਿਕ੍ਖੂ ਚੋਦੇਸੁਂ – ‘‘ਅਸ੍ਸਮਣਾਤ੍ਥ ਤੁਮ੍ਹੇ’’ਤਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤੁਮ੍ਹੇ, ਭਿਕ੍ਖਵੇ, ਆਪਨ੍ਨਾ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਜਮ੍ਬੁਚੋਰਕਾ… ਲਬੁਜਚੋਰਕਾ… ਪਨਸਚੋਰਕਾ… ਤਾਲਪਕ੍ਕਚੋਰਕਾ… ਉਚ੍ਛੁਚੋਰਕਾ… ਤਿਮ੍ਬਰੂਸਕਚੋਰਕਾ ਤਿਮ੍ਬਰੂਸਕੇ ਉਚ੍ਚਿਨਿਤ੍ਵਾ ਭਣ੍ਡਿਕਂ ਆਦਾਯ ਅਗਮਂਸੁ. ਸਾਮਿਕਾ ਤੇ ਚੋਰਕੇ ਅਨੁਬਨ੍ਧਿਂਸੁ. ਚੋਰਕਾ ਸਾਮਿਕੇ ਪਸ੍ਸਿਤ੍ਵਾ ਭਣ੍ਡਿਕਂ ਪਾਤੇਤ੍ਵਾ ਪਲਾਯਿਂਸੁ. ਭਿਕ੍ਖੂ – ‘ਪੁਰੇ ਸਾਮਿਕਾ ਪਸ੍ਸਨ੍ਤੀ’ਤਿ, ਥੇਯ੍ਯਚਿਤ੍ਤਾ ਪਰਿਭੁਞ੍ਜਿਂਸੁ. ਸਾਮਿਕਾ ਤੇ ਭਿਕ੍ਖੂ ਚੋਦੇਸੁਂ – ‘‘ਅਸ੍ਸਮਣਾਤ੍ਥ ਤੁਮ੍ਹੇ’’ਤਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤੁਮ੍ਹੇ, ਭਿਕ੍ਖਵੇ, ਆਪਨ੍ਨਾ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਅਮ੍ਬਂ ਥੇਯ੍ਯਚਿਤ੍ਤੋ ਅਵਹਰਿ… ਸਙ੍ਘਸ੍ਸ ਜਮ੍ਬੁਂ… ਸਙ੍ਘਸ੍ਸ ਲਬੁਜਂ… ਸਙ੍ਘਸ੍ਸ ਪਨਸਂ… ਸਙ੍ਘਸ੍ਸ ਤਾਲਪਕ੍ਕਂ… ਸਙ੍ਘਸ੍ਸ ਉਚ੍ਛੁਂ… ਸਙ੍ਘਸ੍ਸ ਤਿਮ੍ਬਰੂਸਕਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੪੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪੁਪ੍ਫਾਰਾਮਂ ਗਨ੍ਤ੍ਵਾ ਓਚਿਤਂ ਪੁਪ੍ਫਂ ਪਞ੍ਚਮਾਸਗ੍ਘਨਕਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪੁਪ੍ਫਾਰਾਮਂ ਗਨ੍ਤ੍ਵਾ ਪੁਪ੍ਫਂ ਓਚਿਨਿਤ੍ਵਾ ਪਞ੍ਚਮਾਸਗ੍ਘਨਕਂ ਥੇਯ੍ਯਚਿਤ੍ਤੋ ਅਵਹਰਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ ਆਪਨ੍ਨੋ ਪਾਰਾਜਿਕ’’ਨ੍ਤਿ.
੧੫੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਾਮਕਂ ਗਚ੍ਛਨ੍ਤੋ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਤੁਯ੍ਹਂ ਉਪਟ੍ਠਾਕਕੁਲਂ ਵੁਤ੍ਤੋ ਵਜ੍ਜੇਮੀ’’ਤਿ. ਸੋ ਗਨ੍ਤ੍ਵਾ ਏਕਂ ਸਾਟਕਂ ਆਹਰਾਪੇਤ੍ਵਾ ਅਤ੍ਤਨਾ ਪਰਿਭੁਞ੍ਜਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਵੁਤ੍ਤੋ ਵਜ੍ਜੇਮੀਤਿ ਵਤ੍ਤਬ੍ਬੋ. ਯੋ ਵਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਾਮਕਂ ਗਚ੍ਛਤਿ. ਅਞ੍ਞਤਰੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਮਯ੍ਹਂ ਉਪਟ੍ਠਾਕਕੁਲਂ ਵੁਤ੍ਤੋ ਵਜ੍ਜੇਹੀ’’ਤਿ. ਸੋ ਗਨ੍ਤ੍ਵਾ ਯੁਗਸਾਟਕਂ ਆਹਰਾਪੇਤ੍ਵਾ ਏਕਂ ਅਤ੍ਤਨਾ ਪਰਿਭੁਞ੍ਜਿ, ਏਕਂ ਤਸ੍ਸ ਭਿਕ੍ਖੁਨੋ ਅਦਾਸਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਵੁਤ੍ਤੋ ਵਜ੍ਜੇਹੀਤਿ ਵਤ੍ਤਬ੍ਬੋ. ਯੋ ਵਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਾਮਕਂ ਗਚ੍ਛਨ੍ਤੋ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਤੁਯ੍ਹਂ ਉਪਟ੍ਠਾਕਕੁਲਂ ਵੁਤ੍ਤੋ ਵਜ੍ਜੇਮੀ’’ਤਿ. ਸੋਪਿ ਏਵਮਾਹ – ‘‘ਵੁਤ੍ਤੋ ਵਜ੍ਜੇਹੀ’’ਤਿ. ਸੋ ਗਨ੍ਤ੍ਵਾ ਆਲ਼੍ਹਕਂ ਸਪ੍ਪਿਂ ਤੁਲਂ ਗੁਲ਼ਂ ਦੋਣਂ ਤਣ੍ਡੁਲਂ ਆਹਰਾਪੇਤ੍ਵਾ ਅਤ੍ਤਨਾ ਪਰਿਭੁਞ੍ਜਿ. ਸੋ ਜਾਨਿਤ੍ਵਾ ਤਂ ਚੋਦੇਸਿ – ‘‘ਅਸ੍ਸਮਣੋਸਿ ਤ੍ਵ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਵੁਤ੍ਤੋ ਵਜ੍ਜੇਮੀਤਿ ਵਤ੍ਤਬ੍ਬੋ, ਨ ਚ ਵੁਤ੍ਤੋ ਵਜ੍ਜੇਹੀਤਿ ਵਤ੍ਤਬ੍ਬੋ. ਯੋ ਵਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.