੩. ਤਤਿਯਪਾਰਾਜਿਕਂ
੧੬੨. [ਇਦਂ ਵਤ੍ਥੁ ਸਂ. ਨਿ. ੫.੯੮੫] ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਭਗਵਾ ਭਿਕ੍ਖੂਨਂ ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤਿ, ਅਸੁਭਾਯ ਵਣ੍ਣਂ ਭਾਸਤਿ, ਅਸੁਭਭਾਵਨਾਯ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਅਸੁਭਸਮਾਪਤ੍ਤਿਯਾ ਵਣ੍ਣਂ ਭਾਸਤਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਚ੍ਛਾਮਹਂ, ਭਿਕ੍ਖਵੇ, ਅਦ੍ਧਮਾਸਂ ਪਟਿਸਲ੍ਲੀਯਿਤੁਂ. ਨਮ੍ਹਿ ਕੇਨਚਿ ਉਪਸਙ੍ਕਮਿਤਬ੍ਬੋ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨਾ’’ਤਿ. ‘‘ਏਵਂ, ਭਨ੍ਤੇ’’ਤਿ, ਖੋ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਨਾਸ੍ਸੁਧ ਕੋਚਿ ਭਗਵਨ੍ਤਂ ਉਪਸਙ੍ਕਮਤਿ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ. ਭਿਕ੍ਖੂ – ‘‘ਭਗਵਾ ਖੋ ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤਿ, ਅਸੁਭਾਯ ਵਣ੍ਣਂ ਭਾਸਤਿ, ਅਸੁਭਭਾਵਨਾਯ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਅਸੁਭਸਮਾਪਤ੍ਤਿਯਾ ਵਣ੍ਣਂ ਭਾਸਤੀ’’ਤਿ (ਤੇ) [( ) (?) ਏਵਮੁਪਰਿਪਿ ਈਦਿਸੇਸੁ ਠਾਨੇਸੁ] ਅਨੇਕਾਕਾਰਵੋਕਾਰਂ ਅਸੁਭਭਾਵਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ. ਤੇ ਸਕੇਨ ਕਾਯੇਨ ਅਟ੍ਟੀਯਨ੍ਤਿ ਹਰਾਯਨ੍ਤਿ ਜਿਗੁਚ੍ਛਨ੍ਤਿ. ਸੇਯ੍ਯਥਾਪਿ ਨਾਮ ਇਤ੍ਥੀ ਵਾ ਪੁਰਿਸੋ ਵਾ ਦਹਰੋ ਯੁਵਾ ਮਣ੍ਡਨਕਜਾਤਿਕੋ ਸੀਸਂਨ੍ਹਾਤੋ ਅਹਿਕੁਣਪੇਨ ਵਾ ਕੁਕ੍ਕੁਰਕੁਣਪੇਨ ਵਾ ਮਨੁਸ੍ਸਕੁਣਪੇਨ ਵਾ ਕਣ੍ਠੇ ਆਸਤ੍ਤੇਨ ਅਟ੍ਟੀਯੇਯ੍ਯ ਹਰਾਯੇਯ੍ਯ ਜਿਗੁਚ੍ਛੇਯ੍ਯ, ਏਵਮੇਵ ਤੇ ਭਿਕ੍ਖੂ ਸਕੇਨ ਕਾਯੇਨ ਅਟ੍ਟੀਯਨ੍ਤਾ ਹਰਾਯਨ੍ਤਾ ਜਿਗੁਚ੍ਛਨ੍ਤਾ ਅਤ੍ਤਨਾਪਿ ਅਤ੍ਤਾਨਂ ਜੀਵਿਤਾ ਵੋਰੋਪੇਨ੍ਤਿ, ਅਞ੍ਞਮਞ੍ਞਮ੍ਪਿ ਜੀਵਿਤਾ ਵੋਰੋਪੇਨ੍ਤਿ, ਮਿਗਲਣ੍ਡਿਕਮ੍ਪਿ ਸਮਣਕੁਤ੍ਤਕਂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਸਾਧੁ ਨੋ, ਆਵੁਸੋ, ਜੀਵਿਤਾ ਵੋਰੋਪੇਹਿ. ਇਦਂ ਤੇ ਪਤ੍ਤਚੀਵਰਂ ਭਵਿਸ੍ਸਤੀ’’ਤਿ. ਅਥ ਖੋ ਮਿਗਲਣ੍ਡਿਕੋ ਸਮਣਕੁਤ੍ਤਕੋ ਪਤ੍ਤਚੀਵਰੇਹਿ ਭਟੋ ਸਮ੍ਬਹੁਲੇ ਭਿਕ੍ਖੂ ਜੀਵਿਤਾ ਵੋਰੋਪੇਤ੍ਵਾ ਲੋਹਿਤਕਂ [ਲੋਹਿਤਗਤਂ (ਕ.)] ਅਸਿਂ ਆਦਾਯ ਯੇਨ ਵਗ੍ਗਮੁਦਾ ਨਦੀ ਤੇਨੁਪਸਙ੍ਕਮਿ.
੧੬੩. ਅਥ ਖੋ ਮਿਗਲਣ੍ਡਿਕਸ੍ਸ ਸਮਣਕੁਤ੍ਤਕਸ੍ਸ ਲੋਹਿਤਕਂ ਤਂ ਅਸਿਂ ਧੋਵਨ੍ਤਸ੍ਸ ਅਹੁਦੇਵ ਕੁਕ੍ਕੁਚ੍ਚਂ ਅਹੁ ਵਿਪ੍ਪਟਿਸਾਰੋ – ‘‘ਅਲਾਭਾ ਵਤ ਮੇ, ਨ ਵਤ ਮੇ ਲਾਭਾ; ਦੁਲ੍ਲਦ੍ਧਂ ਵਤ ਮੇ, ਨ ਵਤ ਮੇ ਸੁਲਦ੍ਧਂ. ਬਹੁਂ ਵਤ ਮਯਾ ਅਪੁਞ੍ਞਂ ਪਸੁਤਂ, ਯੋਹਂ ਭਿਕ੍ਖੂ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਜੀਵਿਤਾ ਵੋਰੋਪੇਸਿ’’ਨ੍ਤਿ. ਅਥ ਖੋ ਅਞ੍ਞਤਰਾ ਮਾਰਕਾਯਿਕਾ ਦੇਵਤਾ ਅਭਿਜ੍ਜਮਾਨੇ ਉਦਕੇ ਆਗਨ੍ਤ੍ਵਾ ਮਿਗਲਣ੍ਡਿਕਂ ਸਮਣਕੁਤ੍ਤਕਂ ਏਤਦਵੋਚ – ‘‘ਸਾਧੁ ਸਾਧੁ ਸਪ੍ਪੁਰਿਸ, ਲਾਭਾ ਤੇ ਸਪ੍ਪੁਰਿਸ, ਸੁਲਦ੍ਧਂ ਤੇ ਸਪ੍ਪੁਰਿਸ. ਬਹੁਂ ਤਯਾ ਸਪ੍ਪੁਰਿਸ ਪੁਞ੍ਞਂ ਪਸੁਤਂ, ਯਂ ਤ੍ਵਂ ਅਤਿਣ੍ਣੇ ਤਾਰੇਸੀ’’ਤਿ. ਅਥ ਖੋ ਮਿਗਲਣ੍ਡਿਕੋ ਸਮਣਕੁਤ੍ਤਕੋ – ‘‘ਲਾਭਾ ਕਿਰ ਮੇ, ਸੁਲਦ੍ਧਂ ਕਿਰ ਮੇ, ਬਹੁਂ ਕਿਰ ਮਯਾ ਪੁਞ੍ਞਂ ਪਸੁਤਂ, ਅਤਿਣ੍ਣੋ ਕਿਰਾਹਂ ਤਾਰੇਮੀ’’ਤਿ ਤਿਣ੍ਹਂ ਅਸਿਂ ਆਦਾਯ ਵਿਹਾਰੇਨ ਵਿਹਾਰਂ ਪਰਿਵੇਣੇਨ ਪਰਿਵੇਣਂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਕੋ ਅਤਿਣ੍ਣੋ, ਕਂ ਤਾਰੇਮੀ’’ਤਿ? ਤਤ੍ਥ ਯੇ ਤੇ ਭਿਕ੍ਖੂ ਅਵੀਤਰਾਗਾ ਤੇਸਂ ਤਸ੍ਮਿਂ ਸਮਯੇ ਹੋਤਿਯੇਵ ਭਯਂ ਹੋਤਿ ਛਮ੍ਭਿਤਤ੍ਤਂ ਹੋਤਿ ਲੋਮਹਂਸੋ. ਯੇ ਪਨ ਤੇ ਭਿਕ੍ਖੂ ਵੀਤਰਾਗਾ ਤੇਸਂ ਤਸ੍ਮਿਂ ਸਮਯੇ ਨ ਹੋਤਿ ਭਯਂ ਨ ਹੋਤਿ ਛਮ੍ਭਿਤਤ੍ਤਂ ਨ ਹੋਤਿ ਲੋਮਹਂਸੋ. ਅਥ ਖੋ ਮਿਗਲਣ੍ਡਿਕੋ ਸਮਣਕੁਤ੍ਤਕੋ ਏਕਮ੍ਪਿ ਭਿਕ੍ਖੁਂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਦ੍ਵੇਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਤਯੋਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਚਤ੍ਤਾਰੋਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਪਞ੍ਚਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਦਸਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਵੀਸਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਤਿਂਸਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਚਤ੍ਤਾਲੀਸਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਪਞ੍ਞਾਸਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ, ਸਟ੍ਠਿਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ.
੧੬੪. ਅਥ ਖੋ ਭਗਵਾ ਤਸ੍ਸ ਅਦ੍ਧਮਾਸਸ੍ਸ ਅਚ੍ਚਯੇਨ ਪਟਿਸਲ੍ਲਾਨਾ ਵੁਟ੍ਠਿਤੋ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ, ਆਨਨ੍ਦ, ਤਨੁਭੂਤੋ ਵਿਯ ਭਿਕ੍ਖੁਸਙ੍ਘੋ’’ਤਿ? ‘‘ਤਥਾ ਹਿ ਪਨ, ਭਨ੍ਤੇ, ਭਗਵਾ ਭਿਕ੍ਖੂਨਂ ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤਿ, ਅਸੁਭਾਯ ਵਣ੍ਣਂ ਭਾਸਤਿ, ਅਸੁਭਭਾਵਨਾਯ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਅਸੁਭਸਮਾਪਤ੍ਤਿਯਾ ਵਣ੍ਣਂ ਭਾਸਤਿ. ਤੇ ਚ, ਭਨ੍ਤੇ, ਭਿਕ੍ਖੂ – ‘ਭਗਵਾ ਖੋ ਅਨੇਕਪਰਿਯਾਯੇਨ ਅਸੁਭਕਥਂ ਕਥੇਤਿ, ਅਸੁਭਾਯ ਵਣ੍ਣਂ ਭਾਸਤਿ, ਅਸੁਭਭਾਵਨਾਯ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਅਸੁਭਸਮਾਪਤ੍ਤਿਯਾ ਵਣ੍ਣਂ ਭਾਸਤੀ’ਤਿ, ਤੇ ਅਨੇਕਾਕਾਰਵੋਕਾਰਂ ਅਸੁਭਭਾਵਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ. ਤੇ ਸਕੇਨ ਕਾਯੇਨ ਅਟ੍ਟੀਯਨ੍ਤਿ ਹਰਾਯਨ੍ਤਿ ਜਿਗੁਚ੍ਛਨ੍ਤਿ. ਸੇਯ੍ਯਥਾਪਿ ਨਾਮ ਇਤ੍ਥੀ ਵਾ ਪੁਰਿਸੋ ਵਾ ਦਹਰੋ ਯੁਵਾ ਮਣ੍ਡਨਕਜਾਤਿਕੋ ਸੀਸਂਨ੍ਹਾਤੋ ਅਹਿਕੁਣਪੇਨ ਵਾ ਕੁਕ੍ਕੁਰਕੁਣਪੇਨ ਵਾ ਮਨੁਸ੍ਸਕੁਣਪੇਨ ਵਾ ਕਣ੍ਠੇ ਆਸਤ੍ਤੇਨ ਅਟ੍ਟੀਯੇਯ੍ਯ ਹਰਾਯੇਯ੍ਯ ਜਿਗੁਚ੍ਛੇਯ੍ਯ, ਏਵਮੇਵ ਤੇ ਭਿਕ੍ਖੂ ਸਕੇਨ ਕਾਯੇਨ ਅਟ੍ਟੀਯਨ੍ਤਾ ਹਰਾਯਨ੍ਤਾ ਜਿਗੁਚ੍ਛਨ੍ਤਾ ਅਤ੍ਤਨਾਪਿ ਅਤ੍ਤਾਨਂ ਜੀਵਿਤਾ ਵੋਰੋਪੇਨ੍ਤਿ, ਅਞ੍ਞਮਞ੍ਞਮ੍ਪਿ ਜੀਵਿਤਾ ਵੋਰੋਪੇਨ੍ਤਿ, ਮਿਗਲਣ੍ਡਿਕਮ੍ਪਿ ਸਮਣਕੁਤ੍ਤਕਂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਸਾਧੁ ਨੋ, ਆਵੁਸੋ, ਜੀਵਿਤਾ ਵੋਰੋਪੇਹਿ. ਇਦਂ ਤੇ ਪਤ੍ਤਚੀਵਰਂ ਭਵਿਸ੍ਸਤੀ’ਤਿ. ਅਥ ਖੋ, ਭਨ੍ਤੇ, ਮਿਗਲਣ੍ਡਿਕੋ ਸਮਣਕੁਤ੍ਤਕੋ ਪਤ੍ਤਚੀਵਰੇਹਿ ਭਟੋ ਏਕਮ੍ਪਿ ਭਿਕ੍ਖੁਂ ਏਕਾਹੇਨ ਜੀਵਿਤਾ ਵੋਰੋਪੇਸਿ…ਪੇ… ਸਟ੍ਠਿਮ੍ਪਿ ਭਿਕ੍ਖੂ ਏਕਾਹੇਨ ਜੀਵਿਤਾ ਵੋਰੋਪੇਸਿ. ਸਾਧੁ, ਭਨ੍ਤੇ, ਭਗਵਾ ਅਞ੍ਞਂ ਪਰਿਯਾਯਂ ਆਚਿਕ੍ਖਤੁ ਯਥਾਯਂ ਭਿਕ੍ਖੁਸਙ੍ਘੋ ਅਞ੍ਞਾਯ ਸਣ੍ਠਹੇਯ੍ਯਾ’’ਤਿ. ‘‘ਤੇਨਹਾਨਨ੍ਦ, ਯਾਵਤਿਕਾ ਭਿਕ੍ਖੂ ਵੇਸਾਲਿਂ ਉਪਨਿਸ੍ਸਾਯ ਵਿਹਰਨ੍ਤਿ ਤੇ ਸਬ੍ਬੇ ਉਪਟ੍ਠਾਨਸਾਲਾਯਂ ਸਨ੍ਨਿਪਾਤੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ, ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਯਾਵਤਿਕਾ ਭਿਕ੍ਖੂ ਵੇਸਾਲਿਂ ਉਪਨਿਸ੍ਸਾਯ ਵਿਹਰਨ੍ਤਿ ਤੇ ਸਬ੍ਬੇ ਉਪਟ੍ਠਾਨਸਾਲਾਯਂ ਸਨ੍ਨਿਪਾਤੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਸਨ੍ਨਿਪਤਿਤੋ, ਭਨ੍ਤੇ ਭਿਕ੍ਖੁਸਙ੍ਘੋ; ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ.
੧੬੫. ਅਥ ਖੋ ਭਗਵਾ ਯੇਨ ਉਪਟ੍ਠਾਨਸਾਲਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਯਮ੍ਪਿ ਖੋ, ਭਿਕ੍ਖਵੇ, ਆਨਾਪਾਨਸ੍ਸਤਿਸਮਾਧਿ ਭਾਵਿਤੋ ਬਹੁਲੀਕਤੋ ਸਨ੍ਤੋ ਚੇਵ ਪਣੀਤੋ ਚ ਅਸੇਚਨਕੋ ਚ ਸੁਖੋ ਚ ਵਿਹਾਰੋ ਉਪ੍ਪਨ੍ਨੁਪ੍ਪਨ੍ਨੇ ਚ ਪਾਪਕੇ ਅਕੁਸਲੇ ਧਮ੍ਮੇ ਠਾਨਸੋ ਅਨ੍ਤਰਧਾਪੇਤਿ ਵੂਪਸਮੇਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਉਹਤਂ [ਊਹਤਂ (ਕ.)] ਰਜੋਜਲ੍ਲਂ ਤਮੇਨਂ ਮਹਾ ਅਕਾਲਮੇਘੋ ਠਾਨਸੋ ਅਨ੍ਤਰਧਾਪੇਤਿ ਵੂਪਸਮੇਤਿ, ਏਵਮੇਵ ਖੋ, ਭਿਕ੍ਖਵੇ, ਆਨਾਪਾਨਸ੍ਸਤਿਸਮਾਧਿ ਭਾਵਿਤੋ ਬਹੁਲੀਕਤੋ ਸਨ੍ਤੋ ਚੇਵ ਪਣੀਤੋ ਚ ਅਸੇਚਨਕੋ ਚ ਸੁਖੋ ਚ ਵਿਹਾਰੋ ਉਪ੍ਪਨ੍ਨੁਪ੍ਪਨ੍ਨੇ ਚ ਪਾਪਕੇ ਅਕੁਸਲੇ ਧਮ੍ਮੇ ਠਾਨਸੋ ਅਨ੍ਤਰਧਾਪੇਤਿ ਵੂਪਸਮੇਤਿ. ਕਥਂ ਭਾਵਿਤੋ ਚ, ਭਿਕ੍ਖਵੇ, ਆਨਾਪਾਨਸ੍ਸਤਿਸਮਾਧਿ ਕਥਂ ਬਹੁਲੀਕਤੋ ਸਨ੍ਤੋ ਚੇਵ ਪਣੀਤੋ ਚ ਅਸੇਚਨਕੋ ਚ ਸੁਖੋ ਚ ਵਿਹਾਰੋ ਉਪ੍ਪਨ੍ਨੁਪ੍ਪਨ੍ਨੇ ਚ ਪਾਪਕੇ ਅਕੁਸਲੇ ਧਮ੍ਮੇ ਠਾਨਸੋ ਅਨ੍ਤਰਧਾਪੇਤਿ ਵੂਪਸਮੇਤਿ? ਇਧ, ਭਿਕ੍ਖਵੇ, ਭਿਕ੍ਖੁ ਅਰਞ੍ਞਗਤੋ ਵਾ ਰੁਕ੍ਖਮੂਲਗਤੋ ਵਾ ਸੁਞ੍ਞਾਗਾਰਗਤੋ ਵਾ ਨਿਸੀਦਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਸੋ ਸਤੋਵ ਅਸ੍ਸਸਤਿ ਸਤੋ ਪਸ੍ਸਸਤਿ. ਦੀਘਂ ਵਾ ਅਸ੍ਸਸਨ੍ਤੋ ਦੀਘਂ ਅਸ੍ਸਸਾਮੀਤਿ ਪਜਾਨਾਤਿ, ਦੀਘਂ ਵਾ ਪਸ੍ਸਸਨ੍ਤੋ ਦੀਘਂ ਪਸ੍ਸਸਾਮੀਤਿ ਪਜਾਨਾਤਿ. ਰਸ੍ਸਂ ਵਾ ਅਸ੍ਸਸਨ੍ਤੋ ਰਸ੍ਸਂ ਅਸ੍ਸਸਾਮੀਤਿ ਪਜਾਨਾਤਿ, ਰਸ੍ਸਂ ਵਾ ਪਸ੍ਸਸਨ੍ਤੋ ਰਸ੍ਸਂ ਪਸ੍ਸਸਾਮੀਤਿ ਪਜਾਨਾਤਿ. ਸਬ੍ਬਕਾਯਪ੍ਪਟਿਸਂਵੇਦੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਸਬ੍ਬਕਾਯਪ੍ਪਟਿਸਂਵੇਦੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪਸ੍ਸਮ੍ਭਯਂ ਕਾਯਸਙ੍ਖਾਰਂ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪਸ੍ਸਮ੍ਭਯਂ ਕਾਯਸਙ੍ਖਾਰਂ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪੀਤਿਪ੍ਪਟਿਸਂਵੇਦੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪੀਤਿਪ੍ਪਟਿਸਂਵੇਦੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਸੁਖਪ੍ਪਟਿਸਂਵੇਦੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਸੁਖਪ੍ਪਟਿਸਂਵੇਦੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਚਿਤ੍ਤਸਙ੍ਖਾਰਪ੍ਪਟਿਸਂਵੇਦੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਚਿਤ੍ਤਸਙ੍ਖਾਰਪ੍ਪਟਿਸਂਵੇਦੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪਸ੍ਸਮ੍ਭਯਂ ਚਿਤ੍ਤਸਙ੍ਖਾਰਂ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪਸ੍ਸਮ੍ਭਯਂ ਚਿਤ੍ਤਸਙ੍ਖਾਰਂ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਚਿਤ੍ਤਪ੍ਪਟਿਸਂਵੇਦੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਚਿਤ੍ਤਪ੍ਪਟਿਸਂਵੇਦੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਅਭਿਪ੍ਪਮੋਦਯਂ ਚਿਤ੍ਤਂ…ਪੇ… ਸਮਾਦਹਂ ਚਿਤ੍ਤਂ…ਪੇ… ਵਿਮੋਚਯਂ ਚਿਤ੍ਤਂ…ਪੇ… ਅਨਿਚ੍ਚਾਨੁਪਸ੍ਸੀ…ਪੇ… ਵਿਰਾਗਾਨੁਪਸ੍ਸੀ…ਪੇ… ਨਿਰੋਧਾਨੁਪਸ੍ਸੀ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਪਟਿਨਿਸ੍ਸਗ੍ਗਾਨੁਪਸ੍ਸੀ ਪਸ੍ਸਸਿਸ੍ਸਾਮੀਤਿ ਸਿਕ੍ਖਤਿ. ਏਵਂ ਭਾਵਿਤੋ ਖੋ, ਭਿਕ੍ਖਵੇ, ਆਨਾਪਾਨਸ੍ਸਤਿਸਮਾਧਿ ਏਵਂ ਬਹੁਲੀਕਤੋ ਸਨ੍ਤੋ ਚੇਵ ਪਣੀਤੋ ਚ ਅਸੇਚਨਕੋ ਚ ਸੁਖੋ ਚ ਵਿਹਾਰੋ ਉਪ੍ਪਨ੍ਨੁਪ੍ਪਨ੍ਨੇ ਚ ਪਾਪਕੇ ਅਕੁਸਲੇ ਧਮ੍ਮੇ ਠਾਨਸੋ ਅਨ੍ਤਰਧਾਪੇਤਿ ਵੂਪਸਮੇਤੀ’’ਤਿ.
੧੬੬. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਅਤ੍ਤਨਾਪਿ ਅਤ੍ਤਾਨਂ ਜੀਵਿਤਾ ਵੋਰੋਪੇਨ੍ਤਿ, ਅਞ੍ਞਮਞ੍ਞਮ੍ਪਿ ਜੀਵਿਤਾ ਵੋਰੋਪੇਨ੍ਤਿ ਮਿਗਲਣ੍ਡਿਕਮ੍ਪਿ ਸਮਣਕੁਤ੍ਤਕਂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਸਾਧੁ ਨੋ, ਆਵੁਸੋ, ਜੀਵਿਤਾ ਵੋਰੋਪੇਹਿ, ਇਦਂ ਤੇ ਪਤ੍ਤਚੀਵਰਂ ਭਵਿਸ੍ਸਤੀ’’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਭਿਕ੍ਖੂਨਂ ਅਨਨੁਲੋਮਿਕਂ ਅਪ੍ਪਟਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਭਿਕ੍ਖੂ ਅਤ੍ਤਨਾਪਿ ਅਤ੍ਤਾਨਂ ਜੀਵਿਤਾ ਵੋਰੋਪੇਸ੍ਸਨ੍ਤਿ, ਅਞ੍ਞਮਞ੍ਞਮ੍ਪਿ ਜੀਵਿਤਾ ਵੋਰੋਪੇਸ੍ਸਨ੍ਤਿ, ਮਿਗਲਣ੍ਡਿਕਮ੍ਪਿ ਸਮਣਕੁਤ੍ਤਕਂ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਨ੍ਤਿ – ‘ਸਾਧੁ ਨੋ, ਆਵੁਸੋ, ਜੀਵਿਤਾ ਵੋਰੋਪੇਹਿ, ਇਦਂ ਤੇ ਪਤ੍ਤਚੀਵਰਂ ਭਵਿਸ੍ਸਤੀ’ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੧੬੭. ‘‘ਯੋ ਪਨ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਯ੍ਯ ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯ, ਅਯਮ੍ਪਿ ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ.
ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.
੧੬੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਉਪਾਸਕੋ ਗਿਲਾਨੋ ਹੋਤਿ. ਤਸ੍ਸ ਪਜਾਪਤਿ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ. ਛਬ੍ਬਗ੍ਗਿਯਾ ਭਿਕ੍ਖੂ ਤਸ੍ਸਾ ਇਤ੍ਥਿਯਾ ਪਟਿਬਦ੍ਧਚਿਤ੍ਤਾ ਹੋਨ੍ਤਿ. ਅਥ ਖੋ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਸਚੇ ਖੋ ਸੋ, ਆਵੁਸੋ, ਉਪਾਸਕੋ ਜੀਵਿਸ੍ਸਤਿ ਨ ਮਯਂ ਤਂ ਇਤ੍ਥਿਂ ਲਭਿਸ੍ਸਾਮ. ਹਨ੍ਦ ਮਯਂ, ਆਵੁਸੋ, ਤਸ੍ਸ ਉਪਾਸਕਸ੍ਸ ਮਰਣਵਣ੍ਣਂ ਸਂਵਣ੍ਣੇਮਾ’’ਤਿ. ਅਥ ਖੋ ਛਬ੍ਬਗ੍ਗਿਯਾ ਭਿਕ੍ਖੂ ਯੇਨ ਸੋ ਉਪਾਸਕੋ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਤਂ ਉਪਾਸਕਂ ਏਤਦਵੋਚੁਂ – ‘‘ਤ੍ਵਂ ਖੋਸਿ, ਉਪਾਸਕ, ਕਤਕਲ੍ਯਾਣੋ ਕਤਕੁਸਲੋ ਕਤਭੀਰੁਤ੍ਤਾਣੋ ਅਕਤਪਾਪੋ ਅਕਤਲੁਦ੍ਦੋ ਅਕਤਕਿਬ੍ਬਿਸੋ. ਕਤਂ ਤਯਾ ਕਲ੍ਯਾਣਂ, ਅਕਤਂ ਤਯਾ ਪਾਪਂ. ਕਿਂ ਤੁਯ੍ਹਿਮਿਨਾ ਪਾਪਕੇਨ ਦੁਜ੍ਜੀਵਿਤੇਨ! ਮਤਂ ਤੇ ਜੀਵਿਤਾ ਸੇਯ੍ਯੋ. ਇਤੋ ਤ੍ਵਂ ਕਾਲਙ੍ਕਤੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਸਿ. ਤਤ੍ਥ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗੀਭੂਤੋ ਪਰਿਚਾਰੇਸ੍ਸਸੀ’’ਤਿ.
੧੬੯. ਅਥ ਖੋ ਸੋ ਉਪਾਸਕੋ – ‘‘ਸਚ੍ਚਂ ਖੋ ਅਯ੍ਯਾ ਆਹਂਸੁ. ਅਹਞ੍ਹਿ ਕਤਕਲ੍ਯਾਣੋ ਕਤਕੁਸਲੋ ਕਤਭੀਰੁਤ੍ਤਾਣੋ ਅਕਤਪਾਪੋ ਅਕਤਲੁਦ੍ਦੋ ਅਕਤਕਿਬ੍ਬਿਸੋ. ਕਤਂ ਮਯਾ ਕਲ੍ਯਾਣਂ, ਅਕਤਂ ਮਯਾ ਪਾਪਂ. ਕਿਂ ਮਯ੍ਹਿਮਿਨਾ ਪਾਪਕੇਨ ਦੁਜ੍ਜੀਵਿਤੇਨ! ਮਤਂ ਮੇ ਜੀਵਿਤਾ ਸੇਯ੍ਯੋ. ਇਤੋ ਅਹਂ ਕਾਲਙ੍ਕਤੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਾਮਿ. ਤਤ੍ਥ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗੀਭੂਤੋ ਪਰਿਚਾਰੇਸ੍ਸਾਮੀ’’ਤਿ, ਸੋ ਅਸਪ੍ਪਾਯਾਨਿ ਚੇਵ ਭੋਜਨਾਨਿ ਭੁਞ੍ਜਿ ਅਸਪ੍ਪਾਯਾਨਿ ਚ ਖਾਦਨੀਯਾਨਿ ਖਾਦਿ ਅਸਪ੍ਪਾਯਾਨਿ ਚ ਸਾਯਨੀਯਾਨਿ ਸਾਯਿ ਅਸਪ੍ਪਾਯਾਨਿ ਚ ਪਾਨਾਨਿ ਪਿਵਿ. ਤਸ੍ਸ ਅਸਪ੍ਪਾਯਾਨਿ ਚੇਵ ਭੋਜਨਾਨਿ ਭੁਞ੍ਜਤੋ ਅਸਪ੍ਪਾਯਾਨਿ ਚ ਖਾਦਨੀਯਾਨਿ ਖਾਦਤੋ ਅਸਪ੍ਪਾਯਾਨਿ ਚ ਸਾਯਨੀਯਾਨਿ ਸਾਯਤੋ ਅਸਪ੍ਪਾਯਾਨਿ ਚ ਪਾਨਾਨਿ ਪਿਵਤੋ ਖਰੋ ਆਬਾਧੋ ਉਪ੍ਪਜ੍ਜਿ. ਸੋ ਤੇਨੇਵ ਆਬਾਧੇਨ ਕਾਲਮਕਾਸਿ. ਤਸ੍ਸ ਪਜਾਪਤਿ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ. ਇਮੇ ਹਿ ਨਾਮ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ! ਨਤ੍ਥਿ ਇਮੇਸਂ ਸਾਮਞ੍ਞਂ ਨਤ੍ਥਿ ਇਮੇਸਂ ਬ੍ਰਹ੍ਮਞ੍ਞਂ, ਨਟ੍ਠਂ ਇਮੇਸਂ ਸਾਮਞ੍ਞਂ ਨਟ੍ਠਂ ਇਮੇਸਂ ਬ੍ਰਹ੍ਮਞ੍ਞਂ, ਕੁਤੋ ਇਮੇਸਂ ਸਾਮਞ੍ਞਂ ਕੁਤੋ ਇਮੇਸਂ ਬ੍ਰਹ੍ਮਞ੍ਞਂ, ਅਪਗਤਾ ਇਮੇ ਸਾਮਞ੍ਞਾ ਅਪਗਤਾ ਇਮੇ ਬ੍ਰਹ੍ਮਞ੍ਞਾ. ਇਮੇ ਮੇ ਸਾਮਿਕਸ੍ਸ ਮਰਣਵਣ੍ਣਂ ਸਂਵਣ੍ਣੇਸੁਂ. ਇਮੇਹਿ ਮੇ ਸਾਮਿਕੋ ਮਾਰਿਤੋ’’ਤਿ. ਅਞ੍ਞੇਪਿ ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ. ਇਮੇ ਹਿ ਨਾਮ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ! ਨਤ੍ਥਿ ਇਮੇਸਂ ਸਾਮਞ੍ਞਂ ਨਤ੍ਥਿ ਇਮੇਸਂ ਬ੍ਰਹ੍ਮਞ੍ਞਂ, ਨਟ੍ਠਂ ਇਮੇਸਂ ਸਾਮਞ੍ਞਂ ਨਟ੍ਠਂ ਇਮੇਸਂ ਬ੍ਰਹ੍ਮਞ੍ਞਂ, ਕੁਤੋ ਇਮੇਸਂ ਸਾਮਞ੍ਞਂ ਕੁਤੋ ਇਮੇਸਂ ਬ੍ਰਹ੍ਮਞ੍ਞਂ, ਅਪਗਤਾ ਇਮੇ ਸਾਮਞ੍ਞਾ ਅਪਗਤਾ ਇਮੇ ਬ੍ਰਹ੍ਮਞ੍ਞਾ. ਇਮੇ ਉਪਾਸਕਸ੍ਸ ਮਰਣਵਣ੍ਣਂ ਸਂਵਣ੍ਣੇਸੁਂ. ਇਮੇਹਿ ਉਪਾਸਕੋ ਮਾਰਿਤੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਉਪਾਸਕਸ੍ਸ ਮਰਣਵਣ੍ਣਂ ਸਂਵਣ੍ਣਿਸ੍ਸਨ੍ਤੀ’’ਤਿ!
੧੭੦. ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਉਪਾਸਕਸ੍ਸ ਮਰਣਵਣ੍ਣਂ ਸਂਵਣ੍ਣੇਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸਾ, ਅਨਨੁਲੋਮਿਕਂ ਅਪ੍ਪਟਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਉਪਾਸਕਸ੍ਸ ਮਰਣਵਣ੍ਣਂ ਸਂਵਣ੍ਣਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੧੭੧. ‘‘ਯੋ ਪਨ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਯ੍ਯ ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯ ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯ ਮਰਣਾਯ ਵਾ ਸਮਾਦਪੇਯ੍ਯ – ‘ਅਮ੍ਭੋ ਪੁਰਿਸ, ਕਿਂ ਤੁਯ੍ਹਿਮਿਨਾ ਪਾਪਕੇਨ ਦੁਜ੍ਜੀਵਿਤੇਨ, ਮਤਂ ਤੇ ਜੀਵਿਤਾ ਸੇਯ੍ਯੋ’ਤਿ, ਇਤਿ ਚਿਤ੍ਤਮਨੋ ਚਿਤ੍ਤਸਙ੍ਕਪ੍ਪੋ ਅਨੇਕਪਰਿਯਾਯੇਨ ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯ, ਮਰਣਾਯ ਵਾ ਸਮਾਦਪੇਯ੍ਯ, ਅਯਮ੍ਪਿ ਪਾਰਾਜਿਕੋ ਹੋਤਿ ਅਸਂਵਾਸੋ’’ਤਿ.
੧੭੨. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.
ਸਞ੍ਚਿਚ੍ਚਾਤਿ ਜਾਨਨ੍ਤੋ ਸਞ੍ਜਾਨਨ੍ਤੋ ਚੇਚ੍ਚ ਅਭਿਵਿਤਰਿਤ੍ਵਾ ਵੀਤਿਕ੍ਕਮੋ.
ਮਨੁਸ੍ਸਵਿਗ੍ਗਹੋ ਨਾਮ ਯਂ ਮਾਤੁਕੁਚ੍ਛਿਸ੍ਮਿਂ ਪਠਮਂ ਚਿਤ੍ਤਂ ਉਪ੍ਪਨ੍ਨਂ ਪਠਮਂ ਵਿਞ੍ਞਾਣਂ ਪਾਤੁਭੂਤਂ, ਯਾਵ ਮਰਣਕਾਲਾ ਏਤ੍ਥਨ੍ਤਰੇ ਏਸੋ ਮਨੁਸ੍ਸਵਿਗ੍ਗਹੋ ਨਾਮ.
ਜੀਵਿਤਾ ਵੋਰੋਪੇਯ੍ਯਾਤਿ ਜੀਵਿਤਿਨ੍ਦ੍ਰਿਯਂ ਉਪਚ੍ਛਿਨ੍ਦਤਿ ਉਪਰੋਧੇਤਿ ਸਨ੍ਤਤਿਂ ਵਿਕੋਪੇਤਿ.
ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯਾਤਿ ਅਸਿਂ ਵਾ ਸਤ੍ਤਿਂ ਵਾ ਭੇਣ੍ਡਿਂ ਵਾ [ਭੇਨ੍ਦਿਂ ਵਾ (ਕ.)] ਲਗੁਲ਼ਂ ਵਾ [ਸੂਲਂਵਾ ਲਗੁਲ਼ਂਵਾ (ਸ੍ਯਾ.)] ਪਾਸਾਣਂ ਵਾ ਸਤ੍ਥਂ ਵਾ ਵਿਸਂ ਵਾ ਰਜ੍ਜੁਂ ਵਾ.
ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯਾਤਿ ਜੀਵਿਤੇ ਆਦੀਨਵਂ ਦਸ੍ਸੇਤਿ, ਮਰਣੇ ਵਣ੍ਣਂ ਭਣਤਿ.
ਮਰਣਾਯ ਵਾ ਸਮਾਦਪੇਯ੍ਯਾਤਿ ਸਤ੍ਥਂ ਵਾ ਆਹਰ, ਵਿਸਂ ਵਾ ਖਾਦ, ਰਜ੍ਜੁਯਾ ਵਾ ਉਬ੍ਬਨ੍ਧਿਤ੍ਵਾ ਕਾਲਙ੍ਕਰੋਹੀਤਿ.
ਅਮ੍ਭੋ ਪੁਰਿਸਾਤਿ ਆਲਪਨਾਧਿਵਚਨਮੇਤਂ.
ਕਿਂ ਤੁਯ੍ਹਿਮਿਨਾ ਪਾਪਕੇਨ ਦੁਜ੍ਜੀਵਿਤੇਨਾਤਿ ਪਾਪਕਂ ਨਾਮ ਜੀਵਿਤਂ ਅਡ੍ਢਾਨਂ ਜੀਵਿਤਂ ਉਪਾਦਾਯ ਦਲਿਦ੍ਦਾਨਂ ਜੀਵਿਤਂ ਪਾਪਕਂ ਲਾਮਕਂ, ਸਧਨਾਨਂ ਜੀਵਿਤਂ ਉਪਾਦਾਯ ਅਧਨਾਨਂ ਜੀਵਿਤਂ ਪਾਪਕਂ, ਦੇਵਾਨਂ ਜੀਵਿਤਂ ਉਪਾਦਾਯ ਮਨੁਸ੍ਸਾਨਂ ਜੀਵਿਤਂ ਪਾਪਕਂ.
ਦੁਜ੍ਜੀਵਿਤਂ ਨਾਮ ਹਤ੍ਥਚ੍ਛਿਨ੍ਨਸ੍ਸ ਪਾਦਚ੍ਛਿਨ੍ਨਸ੍ਸ ਹਤ੍ਥਪਾਦਚ੍ਛਿਨ੍ਨਸ੍ਸ ਕਣ੍ਣਚ੍ਛਿਨ੍ਨਸ੍ਸ ਨਾਸਚ੍ਛਿਨ੍ਨਸ੍ਸ ਕਣ੍ਣਨਾਸਚ੍ਛਿਨ੍ਨਸ੍ਸ, ਇਮਿਨਾ ਚ ਪਾਪਕੇਨ ਇਮਿਨਾ ਚ ਦੁਜ੍ਜੀਵਿਤੇਨ ਮਤਂ ਤੇ ਜੀਵਿਤਾ ਸੇਯ੍ਯੋਤਿ.
ਇਤਿ ਚਿਤ੍ਤਮਨੋਤਿ ਯਂ ਚਿਤ੍ਤਂ ਤਂ ਮਨੋ, ਯਂ ਮਨੋ ਤਂ ਚਿਤ੍ਤਂ.
ਚਿਤ੍ਤਸਙ੍ਕਪ੍ਪੋਤਿ ਮਰਣਸਞ੍ਞੀ ਮਰਣਚੇਤਨੋ ਮਰਣਾਧਿਪ੍ਪਾਯੋ.
ਅਨੇਕਪਰਿਯਾਯੇਨਾਤਿ ਉਚ੍ਚਾਵਚੇਹਿ ਆਕਾਰੇਹਿ.
ਮਰਣਵਣ੍ਣਂ ਵਾ ਸਂਵਣ੍ਣੇਯ੍ਯਾਤਿ ਜੀਵਿਤੇ ਆਦੀਨਵਂ ਦਸ੍ਸੇਤਿ, ਮਰਣੇ ਵਣ੍ਣਂ ਭਣਤਿ – ‘‘ਇਤੋ ਤ੍ਵਂ ਕਾਲਙ੍ਕਤੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਸਿ, ਤਤ੍ਥ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗੀਭੂਤੋ ਪਰਿਚਾਰੇਸ੍ਸਸੀ’’ਤਿ.
ਮਰਣਾਯ ਵਾ ਸਮਾਦਪੇਯ੍ਯਾਤਿ ਸਤ੍ਥਂ ਵਾ ਆਹਰ, ਵਿਸਂ ਵਾ ਖਾਦ, ਰਜ੍ਜੁਯਾ ਵਾ ਉਬ੍ਬਨ੍ਧਿਤ੍ਵਾ ਕਾਲਙ੍ਕਰੋਹਿ, ਸੋਬ੍ਭੇ ਵਾ ਨਰਕੇ ਵਾ ਪਪਾਤੇ ਵਾ ਪਪਤਾਤਿ.
ਅਯਮ੍ਪੀਤਿ ਪੁਰਿਮੇ ਉਪਾਦਾਯ ਵੁਚ੍ਚਤਿ.
ਪਾਰਾਜਿਕੋ ਹੋਤੀਤਿ ਸੇਯ੍ਯਥਾਪਿ ਨਾਮ ਪੁਥੁਸਿਲਾ ਦ੍ਵਿਧਾ ਭਿਨ੍ਨਾ [ਦ੍ਵੇਧਾ ਭਿਨ੍ਨਾ (ਸ੍ਯਾ.)] ਅਪ੍ਪਟਿਸਨ੍ਧਿਕਾ ਹੋਤਿ, ਏਵਮੇਵ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤੇਨ ਵੁਚ੍ਚਤਿ – ‘ਪਾਰਾਜਿਕੋ ਹੋਤੀ’ਤਿ.
ਅਸਂਵਾਸੋਤਿ ਸਂਵਾਸੋ ਨਾਮ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ – ਏਸੋ ਸਂਵਾਸੋ ਨਾਮ. ਸੋ ਤੇਨ ਸਦ੍ਧਿਂ ਨਤ੍ਥਿ, ਤੇਨ ਵੁਚ੍ਚਤਿ ਅਸਂਵਾਸੋਤਿ.
੧੭੩. ਸਾਮਂ, ਅਧਿਟ੍ਠਾਯ, ਦੂਤੇਨ, ਦੂਤਪਰਂਪਰਾਯ, ਵਿਸਕ੍ਕਿਯੇਨ ਦੂਤੇਨ, ਗਤਪਚ੍ਚਾਗਤੇਨ ਦੂਤੇਨ, ਅਰਹੋ ਰਹੋਸਞ੍ਞੀ, ਰਹੋ ਅਰਹੋਸਞ੍ਞੀ, ਅਰਹੋ ਅਰਹੋਸਞ੍ਞੀ, ਰਹੋ ਰਹੋਸਞ੍ਞੀ ਕਾਯੇਨ ਸਂਵਣ੍ਣੇਤਿ, ਵਾਚਾਯ ਸਂਵਣ੍ਣੇਤਿ, ਕਾਯੇਨ ਵਾਚਾਯ ਸਂਵਣ੍ਣੇਤਿ, ਦੂਤੇਨ ਸਂਵਣ੍ਣੇਤਿ, ਲੇਖਾਯ ਸਂਵਣ੍ਣੇਤਿ, ਓਪਾਤਂ ਅਪਸ੍ਸੇਨਂ, ਉਪਨਿਕ੍ਖਿਪਨਂ, ਭੇਸਜ੍ਜਂ, ਰੂਪੂਪਹਾਰੋ, ਸਦ੍ਦੂਪਹਾਰੋ, ਗਨ੍ਧੂਪਹਾਰੋ, ਰਸੂਪਹਾਰੋ, ਫੋਟ੍ਠਬ੍ਬੂਪਹਾਰੋ, ਧਮ੍ਮੂਪਹਾਰੋ, ਆਚਿਕ੍ਖਨਾ, ਅਨੁਸਾਸਨੀ, ਸਙ੍ਕੇਤਕਮ੍ਮਂ, ਨਿਮਿਤ੍ਤਕਮ੍ਮਨ੍ਤਿ.
੧੭੪. ਸਾਮਨ੍ਤਿ ਸਯਂ ਹਨਤਿ ਕਾਯੇਨ ਵਾ ਕਾਯਪਟਿਬਦ੍ਧੇਨ ਵਾ ਨਿਸ੍ਸਗ੍ਗਿਯੇਨ ਵਾ.
ਅਧਿਟ੍ਠਾਯਾਤਿ ਅਧਿਟ੍ਠਹਿਤ੍ਵਾ ਆਣਾਪੇਤਿ – ‘‘ਏਵਂ ਵਿਜ੍ਝ, ਏਵਂ ਪਹਰ, ਏਵਂ ਘਾਤੇਹੀ’’ਤਿ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਮਞ੍ਞਮਾਨੋ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਮਞ੍ਞਮਾਨੋ ਅਞ੍ਞਂ ਜੀਵਿਤਾ ਵੋਰੋਪੇਤ੍ਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਵਧਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਮਞ੍ਞਮਾਨੋ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਮਞ੍ਞਮਾਨੋ ਅਞ੍ਞਂ ਜੀਵਿਤਾ ਵੋਰੋਪੇਤਿ; ਮੂਲਟ੍ਠਸ੍ਸ ਅਨਾਪਤ੍ਤਿ, ਵਧਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਸ੍ਸ ਪਾਵਦ – ‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਪਾਵਦਤੁ – ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਤੂ’’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਇਤਰਸ੍ਸ ਆਰੋਚੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਵਧਕੋ ਪਟਿਗ੍ਗਣ੍ਹਾਤਿ, ਮੂਲਟ੍ਠਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਸੋ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਸ੍ਸ ਪਾਵਦ – ‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਪਾਵਦਤੁ – ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਤੂ’’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਅਞ੍ਞਂ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਵਧਕੋ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਜੀਵਿਤਾ ਵੋਰੋਪੇਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ; ਆਣਾਪਕਸ੍ਸ ਚ ਵਧਕਸ੍ਸ ਚ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਗਨ੍ਤ੍ਵਾ ਪੁਨ ਪਚ੍ਚਾਗਚ੍ਛਤਿ – ‘‘ਨਾਹਂ ਸਕ੍ਕੋਮਿ ਤਂ ਜੀਵਿਤਾ ਵੋਰੋਪੇਤੁ’’ਨ੍ਤਿ. ਸੋ ਪੁਨ ਆਣਾਪੇਤਿ – ‘‘ਯਦਾ ਸਕ੍ਕੋਸਿ ਤਦਾ ਤਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਨ ਸਾਵੇਤਿ – ‘‘ਮਾ ਘਾਤੇਹੀ’’ਤਿ. ਸੋ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਸਾਵੇਤਿ – ‘‘ਮਾ ਘਾਤੇਹੀ’’ਤਿ. ਸੋ – ‘‘ਆਣਤ੍ਤੋ ਅਹਂ ਤਯਾ’’ਤਿ ਤਂ ਜੀਵਿਤਾ ਵੋਰੋਪੇਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ. ਵਧਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਭਿਕ੍ਖੁ ਭਿਕ੍ਖੁਂ ਆਣਾਪੇਤਿ – ‘‘ਇਤ੍ਥਨ੍ਨਾਮਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੋ ਆਣਾਪੇਤ੍ਵਾ ਵਿਪ੍ਪਟਿਸਾਰੀ ਸਾਵੇਤਿ – ‘‘ਮਾ ਘਾਤੇਹੀ’’ਤਿ. ਸੋ ਸਾਧੂਤਿ ਓਰਮਤਿ, ਉਭਿਨ੍ਨਂ ਅਨਾਪਤ੍ਤਿ.
੧੭੫. ਅਰਹੋ ਰਹੋਸਞ੍ਞੀ ਉਲ੍ਲਪਤਿ – ‘‘ਅਹੋ ਇਤ੍ਥਨ੍ਨਾਮੋ ਹਤੋ ਅਸ੍ਸਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਰਹੋ ਅਰਹੋਸਞ੍ਞੀ ਉਲ੍ਲਪਤਿ – ‘‘ਅਹੋ ਇਤ੍ਥਨ੍ਨਾਮੋ ਹਤੋ ਅਸ੍ਸਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਰਹੋ ਅਰਹੋਸਞ੍ਞੀ ਉਲ੍ਲਪਤਿ – ‘‘ਅਹੋ ਇਤ੍ਥਨ੍ਨਾਮੋ ਹਤੋ ਅਸ੍ਸਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਰਹੋ ਰਹੋਸਞ੍ਞੀ ਉਲ੍ਲਪਤਿ – ‘‘ਅਹੋ ਇਤ੍ਥਨ੍ਨਾਮੋ ਹਤੋ ਅਸ੍ਸਾ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ.
ਕਾਯੇਨ ਸਂਵਣ੍ਣੇਤਿ ਨਾਮ ਕਾਯੇਨ ਵਿਕਾਰਂ ਕਰੋਤਿ – ‘‘ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਾਯ ਸਂਵਣ੍ਣਨਾਯ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਵਾਚਾਯ ਸਂਵਣ੍ਣੇਤਿ ਨਾਮ ਵਾਚਾਯ ਭਣਤਿ – ‘‘ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਾਯ ਸਂਵਣ੍ਣਨਾਯ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਕਾਯੇਨ ਵਾਚਾਯ ਸਂਵਣ੍ਣੇਤਿ ਨਾਮ ਕਾਯੇਨ ਚ ਵਿਕਾਰਂ ਕਰੋਤਿ, ਵਾਚਾਯ ਚ ਭਣਤਿ – ‘‘ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਾਯ ਸਂਵਣ੍ਣਨਾਯ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਦੂਤੇਨ ਸਂਵਣ੍ਣੇਤਿ ਨਾਮ ਦੂਤਸ੍ਸ ਸਾਸਨਂ ਆਰੋਚੇਤਿ – ‘‘ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦੂਤਸ੍ਸ ਸਾਸਨਂ ਸੁਤ੍ਵਾ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੭੬. ਲੇਖਾਯ ਸਂਵਣ੍ਣੇਤਿ ਨਾਮ ਲੇਖਂ ਛਿਨ੍ਦਤਿ – ‘‘ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਅਕ੍ਖਰਕ੍ਖਰਾਯ ਆਪਤ੍ਤਿ ਦੁਕ੍ਕਟਸ੍ਸ. ਲੇਖਂ ਪਸ੍ਸਿਤ੍ਵਾ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਓਪਾਤਂ ਨਾਮ ਮਨੁਸ੍ਸਂ ਉਦ੍ਦਿਸ੍ਸ ਓਪਾਤਂ ਖਨਤਿ – ‘‘ਪਪਤਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਪਤਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਅਨੋਦਿਸ੍ਸ ਓਪਾਤਂ ਖਨਤਿ – ‘‘ਯੋ ਕੋਚਿ ਪਪਤਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮਨੁਸ੍ਸੋ ਤਸ੍ਮਿਂ ਪਪਤਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਪਤਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਯਕ੍ਖੋ ਵਾ ਪੇਤੋ ਵਾ ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹੋ ਵਾ ਤਸ੍ਮਿਂ ਪਪਤਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਪਤਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਿਰਚ੍ਛਾਨਗਤੋ ਤਸ੍ਮਿਂ ਪਪਤਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਪਤਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਮਰਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.
੧੭੭. ਅਪਸ੍ਸੇਨਂ ਨਾਮ ਅਪਸ੍ਸੇਨੇ ਸਤ੍ਥਂ ਵਾ ਠਪੇਤਿ ਵਿਸੇਨ ਵਾ ਮਕ੍ਖੇਤਿ ਦੁਬ੍ਬਲਂ ਵਾ ਕਰੋਤਿ ਸੋਬ੍ਭੇ ਵਾ ਨਰਕੇ ਵਾ ਪਪਾਤੇ ਵਾ ਠਪੇਤਿ – ‘‘ਪਪਤਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਤ੍ਥੇਨ ਵਾ ਵਿਸੇਨ ਵਾ ਪਪਤਿਤੇਨ ਵਾ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਉਪਨਿਕ੍ਖਿਪਨਂ ਨਾਮ ਅਸਿਂ ਵਾ ਸਤ੍ਤਿਂ ਵਾ ਭੇਣ੍ਡਿਂ ਵਾ ਲਗੁਲ਼ਂ ਵਾ ਪਾਸਾਣਂ ਵਾ ਸਤ੍ਥਂ ਵਾ ਵਿਸਂ ਵਾ ਰਜ੍ਜੁਂ ਵਾ ਉਪਨਿਕ੍ਖਿਪਤਿ – ‘‘ਇਮਿਨਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ‘‘ਤੇਨ ਮਰਿਸ੍ਸਾਮੀ’’ਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਭੇਸਜ੍ਜਂ ਨਾਮ ਸਪ੍ਪਿਂ ਵਾ ਨਵਨੀਤਂ ਵਾ ਤੇਲਂ ਵਾ ਮਧੁਂ ਵਾ ਫਾਣਿਤਂ ਵਾ ਦੇਤਿ – ‘‘ਇਮਂ ਸਾਯਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸਾਯਿਤੇ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੭੮. ਰੂਪੂਪਹਾਰੋ ਨਾਮ ਅਮਨਾਪਿਕਂ ਰੂਪਂ ਉਪਸਂਹਰਤਿ ਭਯਾਨਕਂ ਭੇਰਵਂ – ‘‘ਇਮਂ ਪਸ੍ਸਿਤ੍ਵਾ ਉਤ੍ਤਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਪਸ੍ਸਿਤ੍ਵਾ ਉਤ੍ਤਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਨਾਪਿਕਂ ਰੂਪਂ ਉਪਸਂਹਰਤਿ [ਉਪਸਂਹਰਤਿ ਪੇਮਨੀਯਂ ਹਦਯਙ੍ਗਮਂ (ਸ੍ਯਾ.)] – ‘‘ਇਮਂ ਪਸ੍ਸਿਤ੍ਵਾ ਅਲਾਭਕੇਨ ਸੁਸ੍ਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਪਸ੍ਸਿਤ੍ਵਾ ਅਲਾਭਕੇਨ ਸੁਸ੍ਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਸਦ੍ਦੂਪਹਾਰੋ ਨਾਮ ਅਮਨਾਪਿਕਂ ਸਦ੍ਦਂ ਉਪਸਂਹਰਤਿ ਭਯਾਨਕਂ ਭੇਰਵਂ – ‘‘ਇਮਂ ਸੁਤ੍ਵਾ ਉਤ੍ਤਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸੁਤ੍ਵਾ ਉਤ੍ਤਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਨਾਪਿਕਂ ਸਦ੍ਦਂ ਉਪਸਂਹਰਤਿ ਪੇਮਨੀਯਂ ਹਦਯਙ੍ਗਮਂ – ‘‘ਇਮਂ ਸੁਤ੍ਵਾ ਅਲਾਭਕੇਨ ਸੁਸ੍ਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸੁਤ੍ਵਾ ਅਲਾਭਕੇਨ ਸੁਸ੍ਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਗਨ੍ਧੂਪਹਾਰੋ ਨਾਮ ਅਮਨਾਪਿਕਂ ਗਨ੍ਧਂ ਉਪਸਂਹਰਤਿ ਜੇਗੁਚ੍ਛਂ ਪਾਟਿਕੁਲ੍ਯਂ [ਪਟਿਕੂਲਂ (?)] – ‘‘ਇਮਂ ਘਾਯਿਤ੍ਵਾ ਜੇਗੁਚ੍ਛਤਾ ਪਾਟਿਕੁਲ੍ਯਤਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਘਾਯਿਤੇ ਜੇਗੁਚ੍ਛਤਾ ਪਾਟਿਕੁਲ੍ਯਤਾ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਨਾਪਿਕਂ ਗਨ੍ਧਂ ਉਪਸਂਹਰਤਿ – ‘‘ਇਮਂ ਘਾਯਿਤ੍ਵਾ ਅਲਾਭਕੇਨ ਸੁਸ੍ਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਘਾਯਿਤ੍ਵਾ ਅਲਾਭਕੇਨ ਸੁਸ੍ਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਰਸੂਪਹਾਰੋ ਨਾਮ ਅਮਨਾਪਿਕਂ ਰਸਂ ਉਪਸਂਹਰਤਿ ਜੇਗੁਚ੍ਛਂ ਪਾਟਿਕੁਲ੍ਯਂ [ਪਟਿਕੂਲਂ (?)] – ‘‘ਇਮਂ ਸਾਯਿਤ੍ਵਾ ਜੇਗੁਚ੍ਛਤਾ ਪਾਟਿਕੁਲ੍ਯਤਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸਾਯਿਤੇ ਜੇਗੁਚ੍ਛਤਾ ਪਾਟਿਕੁਲ੍ਯਤਾ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਨਾਪਿਕਂ ਰਸਂ ਉਪਸਂਹਰਤਿ – ‘‘ਇਮਂ ਸਾਯਿਤ੍ਵਾ ਅਲਾਭਕੇਨ ਸੁਸ੍ਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸਾਯਿਤ੍ਵਾ ਅਲਾਭਕੇਨ ਸੁਸ੍ਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਫੋਟ੍ਠਬ੍ਬੂਪਹਾਰੋ ਨਾਮ ਅਮਨਾਪਿਕਂ ਫੋਟ੍ਠਬ੍ਬਂ ਉਪਸਂਹਰਤਿ ਦੁਕ੍ਖਸਮ੍ਫਸ੍ਸਂ ਖਰਸਮ੍ਫਸ੍ਸਂ – ‘‘ਇਮਿਨਾ ਫੁਟ੍ਠੋ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਫੁਟ੍ਠਸ੍ਸ ਦੁਕ੍ਖਾ ਵੇਦਨਾ ਉਪ੍ਪਜ੍ਜਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਮਨਾਪਿਕਂ ਫੋਟ੍ਠਬ੍ਬਂ ਉਪਸਂਹਰਤਿ ਸੁਖਸਮ੍ਫਸ੍ਸਂ ਮੁਦੁਸਮ੍ਫਸ੍ਸਂ – ‘‘ਇਮਿਨਾ ਫੁਟ੍ਠੋ ਅਲਾਭਕੇਨ ਸੁਸ੍ਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਫੁਟ੍ਠੋ ਅਲਾਭਕੇਨ ਸੁਸ੍ਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਧਮ੍ਮੂਪਹਾਰੋ ਨਾਮ ਨੇਰਯਿਕਸ੍ਸ ਨਿਰਯਕਥਂ ਕਥੇਤਿ – ‘‘ਇਮਂ ਸੁਤ੍ਵਾ ਉਤ੍ਤਸਿਤ੍ਵਾ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸੁਤ੍ਵਾ ਉਤ੍ਤਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ. ਕਲ੍ਯਾਣਕਮ੍ਮਸ੍ਸ ਸਗ੍ਗਕਥਂ ਕਥੇਤਿ – ‘‘ਇਮਂ ਸੁਤ੍ਵਾ ਅਧਿਮੁਤ੍ਤੋ ਮਰਿਸ੍ਸਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਂ ਸੁਤ੍ਵਾ ਅਧਿਮੁਤ੍ਤੋ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
੧੭੯. ਆਚਿਕ੍ਖਨਾ ਨਾਮ ਪੁਟ੍ਠੋ ਭਣਤਿ – ‘‘ਏਵਂ ਮਰਸ੍ਸੁ. ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਾਯ ਆਚਿਕ੍ਖਨਾਯ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਅਨੁਸਾਸਨੀ ਨਾਮ ਅਪੁਟ੍ਠੋ ਭਣਤਿ – ‘‘ਏਵਂ ਮਰਸ੍ਸੁ. ਯੋ ਏਵਂ ਮਰਤਿ ਸੋ ਧਨਂ ਵਾ ਲਭਤਿ ਯਸਂ ਵਾ ਲਭਤਿ ਸਗ੍ਗਂ ਵਾ ਗਚ੍ਛਤੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਾਯ ਅਨੁਸਾਸਨਿਯਾ ਮਰਿਸ੍ਸਾਮੀਤਿ ਦੁਕ੍ਖਂ ਵੇਦਨਂ ਉਪ੍ਪਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਮਰਤਿ, ਆਪਤ੍ਤਿ ਪਾਰਾਜਿਕਸ੍ਸ.
ਸਙ੍ਕੇਤਕਮ੍ਮਂ ਨਾਮ ਸਙ੍ਕੇਤਂ ਕਰੋਤਿ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਰਤ੍ਤਿਂ ਵਾ ਦਿਵਾ ਵਾ – ‘‘ਤੇਨ ਸਙ੍ਕੇਤੇਨ ਤਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਸਙ੍ਕੇਤੇਨ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ. ਤਂ ਸਙ੍ਕੇਤਂ ਪੁਰੇ ਵਾ ਪਚ੍ਛਾ ਵਾ ਤਂ ਜੀਵਿਤਾ ਵੋਰੋਪੇਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ, ਵਧਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਨਿਮਿਤ੍ਤਕਮ੍ਮਂ ਨਾਮ ਨਿਮਿਤ੍ਤਂ ਕਰੋਤਿ – ‘‘ਅਕ੍ਖਿਂ ਵਾ ਨਿਖਣਿਸ੍ਸਾਮਿ ਭਮੁਕਂ ਵਾ ਉਕ੍ਖਿਪਿਸ੍ਸਾਮਿ ਸੀਸਂ ਵਾ ਉਕ੍ਖਿਪਿਸ੍ਸਾਮਿ, ਤੇਨ ਨਿਮਿਤ੍ਤੇਨ ਤਂ ਜੀਵਿਤਾ ਵੋਰੋਪੇਹੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤੇਨ ਨਿਮਿਤ੍ਤੇਨ ਤਂ ਜੀਵਿਤਾ ਵੋਰੋਪੇਤਿ, ਆਪਤ੍ਤਿ ਉਭਿਨ੍ਨਂ ਪਾਰਾਜਿਕਸ੍ਸ. ਤਂ ਨਿਮਿਤ੍ਤਂ ਪੁਰੇ ਵਾ ਪਚ੍ਛਾ ਵਾ ਤਂ ਜੀਵਿਤਾ ਵੋਰੋਪੇਤਿ, ਮੂਲਟ੍ਠਸ੍ਸ ਅਨਾਪਤ੍ਤਿ, ਵਧਕਸ੍ਸ ਆਪਤ੍ਤਿ ਪਾਰਾਜਿਕਸ੍ਸ.
ਅਨਾਪਤ੍ਤਿ ਅਸਞ੍ਚਿਚ੍ਚ ਅਜਾਨਨ੍ਤਸ੍ਸ ਨਮਰਣਾਧਿਪ੍ਪਾਯਸ੍ਸ ਉਮ੍ਮਤ੍ਤਕਸ੍ਸ [ਉਮ੍ਮਤ੍ਤਕਸ੍ਸ ਖਿਤ੍ਤਚਿਤ੍ਤਸ੍ਸ ਵੇਦਨਾਟ੍ਟਸ੍ਸ (ਸ੍ਯਾ.)] ਆਦਿਕਮ੍ਮਿਕਸ੍ਸਾਤਿ.
ਮਨੁਸ੍ਸਵਿਗ੍ਗਹਪਾਰਾਜਿਕਮ੍ਹਿ ਪਠਮਭਾਣਵਾਰੋ ਨਿਟ੍ਠਿਤੋ.
ਵਿਨੀਤਵਤ੍ਥੁਉਦ੍ਦਾਨਗਾਥਾ
ਸਂਵਣ੍ਣਨਾ ਨਿਸੀਦਨ੍ਤੋ, ਮੁਸਲੋਦੁਕ੍ਖਲੇਨ ਚ;
ਵੁਡ੍ਢਪਬ੍ਬਜਿਤਾਭਿਸਨ੍ਨੋ, ਅਗ੍ਗਵੀਮਂਸਨਾਵਿਸਂ.
ਤਯੋ ਚ ਵਤ੍ਥੁਕਮ੍ਮੇਹਿ, ਇਟ੍ਠਕਾਹਿਪਰੇ ਤਯੋ;
ਵਾਸੀ ਗੋਪਾਨਸੀ ਚੇਵ, ਅਟ੍ਟਕੋਤਰਣਂ ਪਤਿ.
ਸੇਦਂ ਨਤ੍ਥੁਞ੍ਚ ਸਮ੍ਬਾਹੋ, ਨ੍ਹਾਪਨਬ੍ਭਞ੍ਜਨੇਨ ਚ;
ਉਟ੍ਠਾਪੇਨ੍ਤੋ ਨਿਪਾਤੇਨ੍ਤੋ, ਅਨ੍ਨਪਾਨੇਨ ਮਾਰਣਂ.
ਜਾਰਗਬ੍ਭੋ ਸਪਤ੍ਤੀ ਚ, ਮਾਤਾ ਪੁਤ੍ਤਂ ਉਭੋ ਵਧਿ;
ਉਭੋ ਨ ਮਿਯ੍ਯਰੇ ਮਦ੍ਦਾ, ਤਾਪਂ ਵਞ੍ਝਾ ਵਿਜਾਯਿਨੀ.
ਪਤੋਦਂ ਨਿਗ੍ਗਹੇ ਯਕ੍ਖੋ, ਵਾਲ਼ਯਕ੍ਖਞ੍ਚ ਪਾਹਿਣਿ;
ਤਂ ਮਞ੍ਞਮਾਨੋ ਪਹਰਿ, ਸਗ੍ਗਞ੍ਚ ਨਿਰਯਂ ਭਣੇ.
ਆਲ਼ਵਿਯਾ ਤਯੋ ਰੁਕ੍ਖਾ, ਦਾਯੇਹਿ ਅਪਰੇ ਤਯੋ;
ਮਾ ਕਿਲਮੇਸਿ ਨ ਤੁਯ੍ਹਂ, ਤਕ੍ਕਂ ਸੋਵੀਰਕੇਨ ਚਾਤਿ.
ਵਿਨੀਤਵਤ੍ਥੁ
੧੮੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੂ ਕਾਰੁਞ੍ਞੇਨ ਮਰਣਵਣ੍ਣਂ ਸਂਵਣ੍ਣੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਕਚ੍ਚਿ ਨੁ ਖੋ ਮਯਂ ਪਾਰਾਜਿਕਂ ਆਪਤ੍ਤਿਂ ਆਪਨ੍ਨਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਆਪਤ੍ਤਿਂ ਤੁਮ੍ਹੇ, ਭਿਕ੍ਖਵੇ, ਆਪਨ੍ਨਾ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਪੀਠਕੇ ਪਿਲੋਤਿਕਾਯ ਪਟਿਚ੍ਛਨ੍ਨਂ ਦਾਰਕਂ ਨਿਸੀਦਨ੍ਤੋ ਓਤ੍ਥਰਿਤ੍ਵਾ ਮਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਕਚ੍ਚਿ ਨੁ ਖੋ ਅਹਂ ਪਾਰਾਜਿਕਂ ਆਪਤ੍ਤਿਂ ਆਪਨ੍ਨੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਅਪ੍ਪਟਿਵੇਕ੍ਖਿਤ੍ਵਾ ਆਸਨੇ ਨਿਸੀਦਿਤਬ੍ਬਂ; ਯੋ ਨਿਸੀਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਭਤ੍ਤਗ੍ਗੇ ਅਨ੍ਤਰਘਰੇ ਆਸਨਂ ਪਞ੍ਞਪੇਨ੍ਤੋ ਮੁਸਲੇ ਉਸ੍ਸਿਤੇ ਏਕਂ ਮੁਸਲਂ ਅਗ੍ਗਹੇਸਿ. ਦੁਤਿਯੋ ਮੁਸਲੋ ਪਰਿਪਤਿਤ੍ਵਾ ਅਞ੍ਞਤਰਸ੍ਸ ਦਾਰਕਸ੍ਸ ਮਤ੍ਥਕੇ ਅਵਤ੍ਥਾਸਿ. ਸੋ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਅਸਞ੍ਚਿਚ੍ਚ ਅਹਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਭਤ੍ਤਗ੍ਗੇ ਅਨ੍ਤਰਘਰੇ ਆਸਨਂ ਪਞ੍ਞਪੇਨ੍ਤੋ ਉਦੁਕ੍ਖਲਭਣ੍ਡਿਕਂ ਅਕ੍ਕਮਿਤ੍ਵਾ ਪਵਟ੍ਟੇਸਿ. ਅਞ੍ਞਤਰਂ ਦਾਰਕਂ ਓਤ੍ਥਰਿਤ੍ਵਾ ਮਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਪਿਤਾਪੁਤ੍ਤਾ ਭਿਕ੍ਖੂਸੁ ਪਬ੍ਬਜਿਤਾ ਹੋਨ੍ਤਿ. ਕਾਲੇ ਆਰੋਚਿਤੇ ਪੁਤ੍ਤੋ ਪਿਤਰਂ ਏਤਦਵੋਚ – ‘‘ਗਚ੍ਛ, ਭਨ੍ਤੇ, ਸਙ੍ਘੋ ਤਂ ਪਤਿਮਾਨੇਤੀ’’ਤਿ ਪਿਟ੍ਠਿਯਂ ਗਹੇਤ੍ਵਾ ਪਣਾਮੇਸਿ. ਸੋ ਪਪਤਿਤ੍ਵਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਨਾਹਂ, ਭਗਵਾ, ਮਰਣਾਧਿਪ੍ਪਾਯੋ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਪਿਤਾਪੁਤ੍ਤਾ ਭਿਕ੍ਖੂਸੁ ਪਬ੍ਬਜਿਤਾ ਹੋਨ੍ਤਿ. ਕਾਲੇ ਆਰੋਚਿਤੇ ਪੁਤ੍ਤੋ ਪਿਤਰਂ ਏਤਦਵੋਚ – ‘‘ਗਚ੍ਛ, ਭਨ੍ਤੇ, ਸਙ੍ਘੋ ਤਂ ਪਤਿਮਾਨੇਤੀ’’ਤਿ ਮਰਣਾਧਿਪ੍ਪਾਯੋ ਪਿਟ੍ਠਿਯਂ ਗਹੇਤ੍ਵਾ ਪਣਾਮੇਸਿ. ਸੋ ਪਪਤਿਤ੍ਵਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਪਿਤਾਪੁਤ੍ਤਾ ਭਿਕ੍ਖੂਸੁ ਪਬ੍ਬਜਿਤਾ ਹੋਨ੍ਤਿ. ਕਾਲੇ ਆਰੋਚਿਤੇ ਪੁਤ੍ਤੋ ਪਿਤਰਂ ਏਤਦਵੋਚ – ‘‘ਗਚ੍ਛ, ਭਨ੍ਤੇ, ਸਙ੍ਘੋ ਤਂ ਪਤਿਮਾਨੇਤੀ’’ਤਿ ਮਰਣਾਧਿਪ੍ਪਾਯੋ ਪਿਟ੍ਠਿਯਂ ਗਹੇਤ੍ਵਾ ਪਣਾਮੇਸਿ. ਸੋ ਪਪਤਿਤ੍ਵਾ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਭੁਞ੍ਜਨ੍ਤਸ੍ਸ ਮਂਸਂ ਕਣ੍ਠੇ ਵਿਲਗ੍ਗਂ ਹੋਤਿ. ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਗੀਵਾਯਂ ਪਹਾਰਂ ਅਦਾਸਿ. ਸਲੋਹਿਤਂ ਮਂਸਂ ਪਤਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਭੁਞ੍ਜਨ੍ਤਸ੍ਸ ਮਂਸਂ ਕਣ੍ਠੇ ਵਿਲਗ੍ਗਂ ਹੋਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਤਸ੍ਸ ਭਿਕ੍ਖੁਨੋ ਗੀਵਾਯਂ ਪਹਾਰਂ ਅਦਾਸਿ. ਸਲੋਹਿਤਂ ਮਂਸਂ ਪਤਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਭੁਞ੍ਜਨ੍ਤਸ੍ਸ ਮਂਸਂ ਕਣ੍ਠੇ ਵਿਲਗ੍ਗਂ ਹੋਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਤਸ੍ਸ ਭਿਕ੍ਖੁਨੋ ਗੀਵਾਯਂ ਪਹਾਰਂ ਅਦਾਸਿ. ਸਲੋਹਿਤਂ ਮਂਸਂ ਪਤਿ. ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਵਿਸਗਤਂ ਪਿਣ੍ਡਪਾਤਂ ਲਭਿਤ੍ਵਾ ਪਟਿਕ੍ਕਮਨਂ ਹਰਿਤ੍ਵਾ ਭਿਕ੍ਖੂਨਂ ਅਗ੍ਗਕਾਰਿਕਂ ਅਦਾਸਿ. ਤੇ ਭਿਕ੍ਖੂ ਕਾਲਮਕਂਸੁ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਨਾਹਂ, ਭਗਵਾ, ਜਾਨਾਮੀ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਅਜਾਨਨ੍ਤਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵੀਮਂਸਾਧਿਪ੍ਪਾਯੋ ਅਞ੍ਞਤਰਸ੍ਸ ਭਿਕ੍ਖੁਨੋ ਵਿਸਂ ਅਦਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਵੀਮਂਸਾਧਿਪ੍ਪਾਯੋ ਅਹਂ, ਭਗਵਾ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੨. ਤੇਨ ਖੋ ਪਨ ਸਮਯੇਨ ਆਲ਼ਵਕਾ [ਆਲ਼ਵਿਕਾ (ਸ੍ਯਾ.)] ਭਿਕ੍ਖੂ ਵਿਹਾਰਵਤ੍ਥੁਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਸਿਲਂ ਉਚ੍ਚਾਰੇਸਿ. ਉਪਰਿਮੇਨ ਭਿਕ੍ਖੁਨਾ ਦੁਗ੍ਗਹਿਤਾ ਸਿਲਾ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਅਵਤ੍ਥਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਵਿਹਾਰਵਤ੍ਥੁਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਸਿਲਂ ਉਚ੍ਚਾਰੇਸਿ. ਉਪਰਿਮੋ ਭਿਕ੍ਖੁ ਮਰਣਾਧਿਪ੍ਪਾਯੋ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਸਿਲਂ ਮੁਞ੍ਚਿ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਵਿਹਾਰਸ੍ਸ ਕੁਟ੍ਟਂ ਉਟ੍ਠਾਪੇਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਇਟ੍ਠਕਂ ਉਚ੍ਚਾਰੇਸਿ. ਉਪਰਿਮੇਨ ਭਿਕ੍ਖੁਨਾ ਦੁਗ੍ਗਹਿਤਾ ਇਟ੍ਠਕਾ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਅਵਤ੍ਥਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਵਿਹਾਰਸ੍ਸ ਕੁਟ੍ਟਂ ਉਟ੍ਠਾਪੇਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਇਟ੍ਠਕਂ ਉਚ੍ਚਾਰੇਸਿ. ਉਪਰਿਮੋ ਭਿਕ੍ਖੁ ਮਰਣਾਧਿਪ੍ਪਾਯੋ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਇਟ੍ਠਕਂ ਮੁਞ੍ਚਿ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੩. ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਵਾਸਿਂ ਉਚ੍ਚਾਰੇਸਿ. ਉਪਰਿਮੇਨ ਭਿਕ੍ਖੁਨਾ ਦੁਗ੍ਗਹਿਤਾ ਵਾਸੀ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਅਵਤ੍ਥਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਵਾਸਿਂ ਉਚ੍ਚਾਰੇਸਿ. ਉਪਰਿਮੋ ਭਿਕ੍ਖੁ ਮਰਣਾਧਿਪ੍ਪਾਯੋ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਵਾਸਿਂ ਮੁਞ੍ਚਿ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਗੋਪਾਨਸਿਂ ਉਚ੍ਚਾਰੇਸਿ. ਉਪਰਿਮੇਨ ਭਿਕ੍ਖੁਨਾ ਦੁਗ੍ਗਹਿਤਾ ਗੋਪਾਨਸੀ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਅਵਤ੍ਥਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਅਸਞ੍ਚਿਚ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਿ. ਅਞ੍ਞਤਰੋ ਭਿਕ੍ਖੁ ਹੇਟ੍ਠਾ ਹੁਤ੍ਵਾ ਗੋਪਾਨਸਿਂ ਉਚ੍ਚਾਰੇਸਿ. ਉਪਰਿਮੋ ਭਿਕ੍ਖੁ ਮਰਣਾਧਿਪ੍ਪਾਯੋ ਹੇਟ੍ਠਿਮਸ੍ਸ ਭਿਕ੍ਖੁਨੋ ਮਤ੍ਥਕੇ ਗੋਪਾਨਸਿਂ ਮੁਞ੍ਚਿ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਾ ਅਟ੍ਟਕਂ ਬਨ੍ਧਨ੍ਤਿ. ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਅਤ੍ਰਟ੍ਠਿਤੋ ਬਨ੍ਧਾਹੀ’’ਤਿ. ਸੋ ਤਤ੍ਰਟ੍ਠਿਤੋ ਬਨ੍ਧਨ੍ਤੋ ਪਰਿਪਤਿਤ੍ਵਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਕਿਂਚਿਤ੍ਤੋ ਤ੍ਵਂ, ਭਿਕ੍ਖੂ’’ਤਿ? ‘‘ਨਾਹਂ, ਭਗਵਾ, ਮਰਣਾਧਿਪ੍ਪਾਯੋ’’ਤਿ. ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਾ ਅਟ੍ਟਕਂ ਬਨ੍ਧਨ੍ਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਅਤ੍ਰਟ੍ਠਿਤੋ ਬਨ੍ਧਾਹੀ’’ਤਿ. ਸੋ ਤਤ੍ਰਟ੍ਠਿਤੋ ਬਨ੍ਧਨ੍ਤੋ ਪਰਿਪਤਿਤ੍ਵਾ ਕਾਲਮਕਾਸਿ…ਪੇ… ਪਰਿਪਤਿਤ੍ਵਾ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਿਹਾਰਂ ਛਾਦੇਤ੍ਵਾ ਓਤਰਤਿ. ਅਞ੍ਞਤਰੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਇਤੋ ਓਤਰਾਹੀ’’ਤਿ. ਸੋ ਤੇਨ ਓਤਰਨ੍ਤੋ ਪਰਿਪਤਿਤ੍ਵਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਵਿਹਾਰਂ ਛਾਦੇਤ੍ਵਾ ਓਤਰਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਤਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਇਤੋ ਓਤਰਾਹੀ’’ਤਿ. ਸੋ ਤੇਨ ਓਤਰਨ੍ਤੋ ਪਰਿਪਤਿਤ੍ਵਾ ਕਾਲਮਕਾਸਿ…ਪੇ… ਪਰਿਪਤਿਤ੍ਵਾ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਨਭਿਰਤਿਯਾ ਪੀਲ਼ਿਤੋ ਗਿਜ੍ਝਕੂਟਂ ਪਬ੍ਬਤਂ ਅਭਿਰੁਹਿਤ੍ਵਾ ਪਪਾਤੇ ਪਪਤਨ੍ਤੋ ਅਞ੍ਞਤਰਂ ਵਿਲੀਵਕਾਰਂ ਓਤ੍ਥਰਿਤ੍ਵਾ ਮਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ. ਯੋ ਪਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਗਿਜ੍ਝਕੂਟਂ ਪਬ੍ਬਤਂ ਅਭਿਰੁਹਿਤ੍ਵਾ ਦਵਾਯ ਸਿਲਂ ਪਵਿਜ੍ਝਿਂਸੁ. ਸਾ ਅਞ੍ਞਤਰਂ ਗੋਪਾਲਕਂ ਓਤ੍ਥਰਿਤ੍ਵਾ ਮਾਰੇਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ …ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ. ਨ ਚ, ਭਿਕ੍ਖਵੇ, ਦਵਾਯ ਸਿਲਾ ਪਵਿਜ੍ਝਿਤਬ੍ਬਾ. ਯੋ ਪਵਿਜ੍ਝੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੧੮੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਸੇਦੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਸੇਦੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ.…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਸੀਸਾਭਿਤਾਪੋ ਹੋਤਿ. ਤਸ੍ਸ ਭਿਕ੍ਖੂ ਨਤ੍ਥੁਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਸੀਸਾਭਿਤਾਪੋ ਹੋਤਿ. ਤਸ੍ਸ ਭਿਕ੍ਖੂ ਮਰਣਾਧਿਪ੍ਪਾਯਾ ਨਤ੍ਥੁਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਸਮ੍ਬਾਹੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਸਮ੍ਬਾਹੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੁ ਨ੍ਹਾਪੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਨ੍ਹਾਪੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਤੇਲੇਨ ਅਬ੍ਭਞ੍ਜਿਂਸੁ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਤੇਲੇਨ ਅਬ੍ਭਞ੍ਜਿਂਸੁ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਉਟ੍ਠਾਪੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਉਟ੍ਠਾਪੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਨਿਪਾਤੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੂ ਮਰਣਾਧਿਪ੍ਪਾਯਾ ਨਿਪਾਤੇਸੁਂ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੂ ਅਨ੍ਨਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੂ ਮਰਣਾਧਿਪ੍ਪਾਯਾ ਅਨ੍ਨਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੁ ਪਾਨਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੂ ਮਰਣਾਧਿਪ੍ਪਾਯਾ ਪਾਨਂ ਅਦਂਸੁ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੬. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਪਵੁਤ੍ਥਪਤਿਕਾ ਜਾਰੇਨ ਗਬ੍ਭਿਨੀ ਹੋਤਿ. ਸਾ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਇਙ੍ਘਾਯ੍ਯ ਗਬ੍ਭਪਾਤਨਂ ਜਾਨਾਹੀ’’ਤਿ. ‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਗਬ੍ਭਪਾਤਨਂ ਅਦਾਸਿ. ਦਾਰਕੋ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੁਰਿਸਸ੍ਸ ਦ੍ਵੇ ਪਜਾਪਤਿਯੋ ਹੋਨ੍ਤਿ – ਏਕਾ ਵਞ੍ਝਾ, ਏਕਾ ਵਿਜਾਯਿਨੀ. ਵਞ੍ਝਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਸਚੇ ਸਾ, ਭਨ੍ਤੇ, ਵਿਜਾਯਿਸ੍ਸਤਿ ਸਬ੍ਬਸ੍ਸ ਕੁਟੁਮ੍ਬਸ੍ਸ ਇਸ੍ਸਰਾ ਭਵਿਸ੍ਸਤਿ. ਇਙ੍ਘਾਯ੍ਯ, ਤਸ੍ਸਾ ਗਬ੍ਭਪਾਤਨਂ ਜਾਨਾਹੀ’’ਤਿ.‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਗਬ੍ਭਪਾਤਨਂ ਅਦਾਸਿ. ਦਾਰਕੋ ਕਾਲਮਕਾਸਿ, ਮਾਤਾ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੁਰਿਸਸ੍ਸ ਦ੍ਵੇ ਪਜਾਪਤਿਯੋ ਹੋਨ੍ਤਿ – ਏਕਾ ਵਞ੍ਝਾ, ਏਕਾ ਵਿਜਾਯਿਨੀ. ਵਞ੍ਝਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਸਚੇ ਸਾ, ਭਨ੍ਤੇ, ਵਿਜਾਯਿਸ੍ਸਤਿ ਸਬ੍ਬਸ੍ਸ ਕੁਟੁਮ੍ਬਸ੍ਸ ਇਸ੍ਸਰਾ ਭਵਿਸ੍ਸਤਿ. ਇਙ੍ਘਾਯ੍ਯ, ਤਸ੍ਸਾ ਗਬ੍ਭਪਾਤਨਂ ਜਾਨਾਹੀ’’ਤਿ. ‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਗਬ੍ਭਪਾਤਨਂ ਅਦਾਸਿ. ਮਾਤਾ ਕਾਲਮਕਾਸਿ, ਦਾਰਕੋ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੁਰਿਸਸ੍ਸ ਦ੍ਵੇ ਪਜਾਪਤਿਯੋ ਹੋਨ੍ਤਿ – ਏਕਾ ਵਞ੍ਝਾ, ਏਕਾ ਵਿਜਾਯਿਨੀ. ਵਞ੍ਝਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਸਚੇ ਸਾ, ਭਨ੍ਤੇ, ਵਿਜਾਯਿਸ੍ਸਤਿ ਸਬ੍ਬਸ੍ਸ ਕੁਟੁਮ੍ਬਸ੍ਸ ਇਸ੍ਸਰਾ ਭਵਿਸ੍ਸਤਿ. ਇਙ੍ਘਾਯ੍ਯ, ਤਸ੍ਸਾ ਗਬ੍ਭਪਾਤਨਂ ਜਾਨਾਹੀ’’ਤਿ. ‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਗਬ੍ਭਪਾਤਨਂ ਅਦਾਸਿ. ਉਭੋ ਕਾਲਮਕਂਸੁ…ਪੇ… ਉਭੋ ਨ ਕਾਲਮਕਂਸੁ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੭. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਗਬ੍ਭਿਨੀ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਇਙ੍ਘਾਯ੍ਯ, ਗਬ੍ਭਪਾਤਨਂ ਜਾਨਾਹੀ’’ਤਿ. ‘‘ਤੇਨ ਹਿ, ਭਗਿਨਿ, ਮਦ੍ਦਸ੍ਸੂ’’ਤਿ. ਸਾ ਮਦ੍ਦਾਪੇਤ੍ਵਾ ਗਬ੍ਭਂ ਪਾਤੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਗਬ੍ਭਿਨੀ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਇਙ੍ਘਾਯ੍ਯ, ਗਬ੍ਭਪਾਤਨਂ ਜਾਨਾਹੀ’’ਤਿ. ‘‘ਤੇਨ ਹਿ, ਭਗਿਨਿ, ਤਾਪੇਹੀ’’ਤਿ. ਸਾ ਤਾਪੇਤ੍ਵਾ ਗਬ੍ਭਂ ਪਾਤੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਵਞ੍ਝਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਇਙ੍ਘਾਯ੍ਯ, ਭੇਸਜ੍ਜਂ ਜਾਨਾਹਿ ਯੇਨਾਹਂ ਵਿਜਾਯੇਯ੍ਯ’’ਨ੍ਤਿ. ‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਭੇਸਜ੍ਜਂ ਅਦਾਸਿ. ਸਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਵਿਜਾਯਿਨੀ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਇਙ੍ਘਾਯ੍ਯ, ਭੇਸਜ੍ਜਂ ਜਾਨਾਹਿ ਯੇਨਾਹਂ ਨ ਵਿਜਾਯੇਯ੍ਯ’’ਨ੍ਤਿ. ‘‘ਸੁਟ੍ਠੁ, ਭਗਿਨੀ’’ਤਿ ਤਸ੍ਸਾ ਭੇਸਜ੍ਜਂ ਅਦਾਸਿ. ਸਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਤ੍ਤਰਸਵਗ੍ਗਿਯਂ ਭਿਕ੍ਖੁਂ ਅਙ੍ਗੁਲਿਪਤੋਦਕੇਨ ਹਾਸੇਸੁਂ. ਸੋ ਭਿਕ੍ਖੁ ਉਤ੍ਤਨ੍ਤੋ ਅਨਸ੍ਸਾਸਕੋ ਕਾਲਮਕਾਸਿ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸਾ’’ਤਿ [ਪਾਰਾਜਿਕਸ੍ਸ, ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ (ਸ੍ਯਾ.)].
ਤੇਨ ਖੋ ਪਨ ਸਮਯੇਨ ਸਤ੍ਤਰਸਵਗ੍ਗਿਯਾ ਭਿਕ੍ਖੂ ਛਬ੍ਬਗ੍ਗਿਯਂ ਭਿਕ੍ਖੁਂ ਕਮ੍ਮਂ ਕਰਿਸ੍ਸਾਮਾਤਿ ਓਤ੍ਥਰਿਤ੍ਵਾ ਮਾਰੇਸੁਂ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਪਾਰਾਜਿਕਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭੂਤਵੇਜ੍ਜਕੋ ਭਿਕ੍ਖੁ ਯਕ੍ਖਂ ਜੀਵਿਤਾ ਵੋਰੋਪੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਵਾਲ਼ਯਕ੍ਖਵਿਹਾਰਂ ਪਾਹੇਸਿ. ਤਂ ਯਕ੍ਖਾ ਜੀਵਿਤਾ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਅਞ੍ਞਤਰਂ ਭਿਕ੍ਖੁਂ ਵਾਲ਼ਯਕ੍ਖਵਿਹਾਰਂ ਪਾਹੇਸਿ. ਤਂ ਯਕ੍ਖਾ ਜੀਵਿਤਾ ਵੋਰੋਪੇਸੁਂ…ਪੇ… ਤਂ ਯਕ੍ਖਾ ਜੀਵਿਤਾ ਨ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਵਾਲ਼ਕਨ੍ਤਾਰਂ ਪਾਹੇਸਿ. ਤਂ ਵਾਲ਼ਾ ਜੀਵਿਤਾ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਅਞ੍ਞਤਰਂ ਭਿਕ੍ਖੁਂ ਵਾਲ਼ਕਨ੍ਤਾਰਂ ਪਾਹੇਸਿ. ਤਂ ਵਾਲ਼ਾ ਜੀਵਿਤਾ ਵੋਰੋਪੇਸੁਂ…ਪੇ… ਤਂ ਵਾਲ਼ਾ ਜੀਵਿਤਾ ਨ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਚੋਰਕਨ੍ਤਾਰਂ ਪਾਹੇਸਿ. ਤਂ ਚੋਰਾ ਜੀਵਿਤਾ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਅਞ੍ਞਤਰਂ ਭਿਕ੍ਖੁਂ ਚੋਰਕਨ੍ਤਾਰਂ ਪਾਹੇਸਿ. ਤਂ ਚੋਰਾ ਜੀਵਿਤਾ ਵੋਰੋਪੇਸੁਂ…ਪੇ… ਤਂ ਚੋਰਾ ਜੀਵਿਤਾ ਨ ਵੋਰੋਪੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਤਂ ਮਞ੍ਞਮਾਨੋ ਤਂ ਜੀਵਿਤਾ ਵੋਰੋਪੇਸਿ…ਪੇ… ਤਂ ਮਞ੍ਞਮਾਨੋ ਅਞ੍ਞਂ ਜੀਵਿਤਾ ਵੋਰੋਪੇਸਿ…ਪੇ… ਅਞ੍ਞਂ ਮਞ੍ਞਮਾਨੋ ਤਂ ਜੀਵਿਤਾ ਵੋਰੋਪੇਸਿ…ਪੇ… ਅਞ੍ਞਂ ਮਞ੍ਞਮਾਨੋ ਅਞ੍ਞਂ ਜੀਵਿਤਾ ਵੋਰੋਪੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਪਾਰਾਜਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਮਨੁਸ੍ਸੇਨ ਗਹਿਤੋ ਹੋਤਿ. ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਪਹਾਰਂ ਅਦਾਸਿ. ਸੋ ਭਿਕ੍ਖੁ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਮਨੁਸ੍ਸੇਨ ਗਹਿਤੋ ਹੋਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਤਸ੍ਸ ਭਿਕ੍ਖੁਨੋ ਪਹਾਰਂ ਅਦਾਸਿ. ਸੋ ਭਿਕ੍ਖੁ ਕਾਲਮਕਾਸਿ…ਪੇ… ਸੋ ਭਿਕ੍ਖੁ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕਲ੍ਯਾਣਕਮ੍ਮਸ੍ਸ ਸਗ੍ਗਕਥਂ ਕਥੇਸਿ. ਸੋ ਅਧਿਮੁਤ੍ਤੋ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਕਲ੍ਯਾਣਕਮ੍ਮਸ੍ਸ ਸਗ੍ਗਕਥਂ ਕਥੇਸਿ. ਸੋ ਅਧਿਮੁਤ੍ਤੋ ਕਾਲਮਕਾਸਿ…ਪੇ… ਸੋ ਅਧਿਮੁਤ੍ਤੋ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਨੇਰਯਿਕਸ੍ਸ ਨਿਰਯਕਥਂ ਕਥੇਸਿ. ਸੋ ਉਤ੍ਤਸਿਤ੍ਵਾ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਨੇਰਯਿਕਸ੍ਸ ਨਿਰਯਕਥਂ ਕਥੇਸਿ. ਸੋ ਉਤ੍ਤਸਿਤ੍ਵਾ ਕਾਲਮਕਾਸਿ…ਪੇ… ਸੋ ਉਤ੍ਤਸਿਤ੍ਵਾ ਨ ਕਾਲਮਕਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੮੯. ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਾ ਰੁਕ੍ਖਂ ਛਿਨ੍ਦਨ੍ਤਿ. ਅਞ੍ਞਤਰੋ ਭਿਕ੍ਖੁ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਅਤ੍ਰਟ੍ਠਿਤੋ ਛਿਨ੍ਦਾਹੀ’’ਤਿ. ਤਂ ਤਤ੍ਰਟ੍ਠਿਤਂ ਛਿਨ੍ਦਨ੍ਤਂ ਰੁਕ੍ਖੋ ਓਤ੍ਥਰਿਤ੍ਵਾ ਮਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਨਮਰਣਾਧਿਪ੍ਪਾਯਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਾ ਰੁਕ੍ਖਂ ਛਿਨ੍ਦਨ੍ਤਿ. ਅਞ੍ਞਤਰੋ ਭਿਕ੍ਖੁ ਮਰਣਾਧਿਪ੍ਪਾਯੋ ਅਞ੍ਞਤਰਂ ਭਿਕ੍ਖੁਂ ਏਤਦਵੋਚ – ‘‘ਆਵੁਸੋ, ਅਤ੍ਰਟ੍ਠਿਤੋ ਛਿਨ੍ਦਾਹੀ’’ਤਿ. ਤਂ ਤਤ੍ਰਟ੍ਠਿਤਂ ਛਿਨ੍ਦਨ੍ਤਂ ਰੁਕ੍ਖੋ ਓਤ੍ਥਰਿਤ੍ਵਾ ਮਾਰੇਸਿ…ਪੇ… ਰੁਕ੍ਖੋ ਓਤ੍ਥਰਿਤ੍ਵਾ ਨ ਮਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਪਾਰਾਜਿਕਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੧੯੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਦਾਯਂ ਆਲਿਮ੍ਪੇਸੁਂ [ਆਲ਼ਿਮ੍ਪੇਸੁਂ (ਸ੍ਯਾ. ਕ.)]; ਮਨੁਸ੍ਸਾ ਦਡ੍ਢਾ ਕਾਲਮਕਂਸੁ. ਤੇਸਂ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖਵੇ, ਨਮਰਣਾਧਿਪ੍ਪਾਯਸ੍ਸਾ’’ਤਿ.