੧. ਪਠਮਸਿਕ੍ਖਾਪਦਂ

੧੦੬੭. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਗਬ੍ਭਿਨਿਂ ਵੁਟ੍ਠਾਪੇਨ੍ਤਿ. ਸਾ ਪਿਣ੍ਡਾਯ ਚਰਤਿ. ਮਨੁਸ੍ਸਾ ਏਵਮਾਹਂਸੁ – ‘‘ਦੇਥਾਯ੍ਯਾਯ ਭਿਕ੍ਖਂ, ਗਰੁਭਾਰਾ [ਗਰੁਗਬ੍ਭਾ (ਸ੍ਯਾ.)] ਅਯ੍ਯਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਗਬ੍ਭਿਨਿਂ ਵੁਟ੍ਠਾਪੇਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੁਨਿਯੋ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਗਬ੍ਭਿਨਿਂ ਵੁਟ੍ਠਾਪੇਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨਿਯੋ ਗਬ੍ਭਿਨਿਂ ਵੁਟ੍ਠਾਪੇਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨਿਯੋ ਗਬ੍ਭਿਨਿਂ ਵੁਟ੍ਠਾਪੇਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੧੦੬੮. ‘‘ਯਾ ਪਨ ਭਿਕ੍ਖੁਨੀ ਗਬ੍ਭਿਨਿਂ ਵੁਟ੍ਠਾਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੧੦੬੯. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਗਬ੍ਭਿਨੀ ਨਾਮ ਆਪਨ੍ਨਸਤ੍ਤਾ ਵੁਚ੍ਚਤਿ. ਵੁਟ੍ਠਾਪੇਯ੍ਯਾਤਿ ਉਪਸਮ੍ਪਾਦੇਯ੍ਯ.

‘‘ਵੁਟ੍ਠਾਪੇਸ੍ਸਾਮੀ’’ਤਿ ਗਣਂ ਵਾ ਆਚਰਿਨਿਂ ਵਾ ਪਤ੍ਤਂ ਵਾ ਚੀਵਰਂ ਵਾ ਪਰਿਯੇਸਤਿ, ਸੀਮਂ ਵਾ ਸਮ੍ਮਨ੍ਨਤਿ, ਆਪਤ੍ਤਿ ਦੁਕ੍ਕਟਸ੍ਸ. ਞਤ੍ਤਿਯਾ ਦੁਕ੍ਕਟਂ. ਦ੍ਵੀਹਿ ਕਮ੍ਮਵਾਚਾਹਿ ਦੁਕ੍ਕਟਾ. ਕਮ੍ਮਵਾਚਾਪਰਿਯੋਸਾਨੇ ਉਪਜ੍ਝਾਯਾਯ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਗਣਸ੍ਸ ਚ ਆਚਰਿਨਿਯਾ ਚ ਆਪਤ੍ਤਿ ਦੁਕ੍ਕਟਸ੍ਸ.

੧੦੭੦. ਗਬ੍ਭਿਨਿਯਾ ਗਬ੍ਭਿਨਿਸਞ੍ਞਾ ਵੁਟ੍ਠਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਗਬ੍ਭਿਨਿਯਾ ਵੇਮਤਿਕਾ ਵੁਟ੍ਠਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਗਬ੍ਭਿਨਿਯਾ ਅਗਬ੍ਭਿਨਿਸਞ੍ਞਾ ਵੁਟ੍ਠਾਪੇਤਿ, ਅਨਾਪਤ੍ਤਿ. ਅਗਬ੍ਭਿਨਿਯਾ ਗਬ੍ਭਿਨਿਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਗਬ੍ਭਿਨਿਯਾ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਗਬ੍ਭਿਨਿਯਾ ਅਗਬ੍ਭਿਨਿਸਞ੍ਞਾ, ਅਨਾਪਤ੍ਤਿ.

੧੦੭੧. ਅਨਾਪਤ੍ਤਿ ਗਬ੍ਭਿਨਿਂ ਅਗਬ੍ਭਿਨਿਸਞ੍ਞਾ ਵੁਟ੍ਠਾਪੇਤਿ, ਅਗਬ੍ਭਿਨਿਂ ਅਗਬ੍ਭਿਨਿਸਞ੍ਞਾ ਵੁਟ੍ਠਾਪੇਤਿ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਪਠਮਸਿਕ੍ਖਾਪਦਂ ਨਿਟ੍ਠਿਤਂ.