੯. ਨਵਮਸਿਕ੍ਖਾਪਦਂ

੮੭੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਤ੍ਤਨੋ ਭਣ੍ਡਕਂ ਅਪਸ੍ਸਨ੍ਤਿਯੋ ਚਣ੍ਡਕਾਲ਼ਿਂ ਭਿਕ੍ਖੁਨਿਂ ਏਤਦਵੋਚੁਂ – ‘‘ਅਪਾਯ੍ਯੇ, ਅਮ੍ਹਾਕਂ, ਭਣ੍ਡਕਂ ਪਸ੍ਸੇਯ੍ਯਾਸੀ’’ਤਿ? ਚਣ੍ਡਕਾਲ਼ੀ ਭਿਕ੍ਖੁਨੀ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਹਮੇਵ ਨੂਨ ਚੋਰੀ, ਅਹਮੇਵ ਨੂਨ ਅਲਜ੍ਜਿਨੀ, ਯਾ ਅਯ੍ਯਾਯੋ ਅਤ੍ਤਨੋ ਭਣ੍ਡਕਂ ਅਪਸ੍ਸਨ੍ਤਿਯੋ ਤਾ ਮਂ ਏਵਮਾਹਂਸੁ – ‘ਅਪਾਯ੍ਯੇ, ਅਮ੍ਹਾਕਂ ਭਣ੍ਡਕਂ ਪਸ੍ਸੇਯ੍ਯਾਸੀ’ਤਿ? ਸਚਾਹਂ, ਅਯ੍ਯੇ, ਤੁਮ੍ਹਾਕਂ ਭਣ੍ਡਕਂ ਗਣ੍ਹਾਮਿ, ਅਸ੍ਸਮਣੀ ਹੋਮਿ, ਬ੍ਰਹ੍ਮਚਰਿਯਾ ਚਵਾਮਿ, ਨਿਰਯਂ ਉਪਪਜ੍ਜਾਮਿ; ਯਾ ਪਨ ਮਂ ਅਭੂਤੇਨ ਏਵਮਾਹ ਸਾਪਿ ਅਸ੍ਸਮਣੀ ਹੋਤੁ, ਬ੍ਰਹ੍ਮਚਰਿਯਾ ਚਵਤੁ, ਨਿਰਯਂ ਉਪਪਜ੍ਜਤੂ’’ਤਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਚਣ੍ਡਕਾਲ਼ੀ ਅਤ੍ਤਾਨਮ੍ਪਿ ਪਰਮ੍ਪਿ ਨਿਰਯੇਨਪਿ ਬ੍ਰਹ੍ਮਚਰਿਯੇਨਪਿ ਅਭਿਸਪਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਚਣ੍ਡਕਾਲ਼ੀ ਭਿਕ੍ਖੁਨੀ ਅਤ੍ਤਾਨਮ੍ਪਿ ਪਰਮ੍ਪਿ ਨਿਰਯੇਨਪਿ ਬ੍ਰਹ੍ਮਚਰਿਯੇਨਪਿ ਅਭਿਸਪਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਚਣ੍ਡਕਾਲ਼ੀ ਭਿਕ੍ਖੁਨੀ ਅਤ੍ਤਾਨਮ੍ਪਿ ਪਰਮ੍ਪਿ ਨਿਰਯੇਨਪਿ ਬ੍ਰਹ੍ਮਚਰਿਯੇਨਪਿ ਅਭਿਸਪਿਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੮੭੫. ‘‘ਯਾ ਪਨ ਭਿਕ੍ਖੁਨੀ ਅਤ੍ਤਾਨਂ ਵਾ ਪਰਂ ਵਾ ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪੇਯ੍ਯ, ਪਾਚਿਤ੍ਤਿਯ੍ਯ’’ਨ੍ਤਿ.

੮੭੬. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਅਤ੍ਤਾਨਨ੍ਤਿ ਪਚ੍ਚਤ੍ਤਂ. ਪਰਨ੍ਤਿ ਉਪਸਮ੍ਪਨ੍ਨਂ. ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੮੭੭. ਉਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨਾਯ ਵੇਮਤਿਕਾ ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨਾਯ ਅਨੁਪਸਮ੍ਪਨ੍ਨਸਞ੍ਞਾ ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਤਿਰਚ੍ਛਾਨਯੋਨਿਯਾ ਵਾ ਪੇਤ੍ਤਿਵਿਸਯੇਨ ਵਾ ਮਨੁਸ੍ਸਦੋਭਗ੍ਗੇਨ ਵਾ ਅਭਿਸਪਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਂ ਅਭਿਸਪਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਾਯ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਾਯ ਅਨੁਪਸਮ੍ਪਨ੍ਨਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ.

੮੭੮. ਅਨਾਪਤ੍ਤਿ ਅਤ੍ਥਪੁਰੇਕ੍ਖਾਰਾਯ, ਧਮ੍ਮਪੁਰੇਕ੍ਖਾਰਾਯ, ਅਨੁਸਾਸਨਿਪੁਰੇਕ੍ਖਾਰਾਯ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਨਵਮਸਿਕ੍ਖਾਪਦਂ ਨਿਟ੍ਠਿਤਂ.