੫. ਪਞ੍ਚਮਸਿਕ੍ਖਾਪਦਂ

੮੫੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਅਞ੍ਞਤਰਸ੍ਸ ਕੁਲਸ੍ਸ ਕੁਲੂਪਿਕਾ ਹੋਤਿ ਨਿਚ੍ਚਭਤ੍ਤਿਕਾ. ਅਥ ਖੋ ਸਾ ਭਿਕ੍ਖੁਨੀ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਂ ਕੁਲਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਾਮਿ. ਤਸ੍ਸ ਕੁਲਸ੍ਸ ਦਾਸੀ ਘਰਂ ਸਮ੍ਮਜ੍ਜਨ੍ਤੀ ਤਂ ਆਸਨਂ ਭਾਜਨਨ੍ਤਰਿਕਾਯ ਪਕ੍ਖਿਪਿ. ਮਨੁਸ੍ਸਾ ਤਂ ਆਸਨਂ ਅਪਸ੍ਸਨ੍ਤਾ ਤਂ ਭਿਕ੍ਖੁਨਿਂ ਏਤਦਵੋਚੁਂ – ‘‘ਕਹਂ ਤਂ, ਅਯ੍ਯੇ, ਆਸਨ’’ਨ੍ਤਿ? ‘‘ਨਾਹਂ ਤਂ, ਆਵੁਸੋ, ਆਸਨਂ ਪਸ੍ਸਾਮੀ’’ਤਿ. ‘‘ਦੇਥਾਯ੍ਯੇ, ਤਂ ਆਸਨ’’ਨ੍ਤਿ ਪਰਿਭਾਸਿਤ੍ਵਾ ਨਿਚ੍ਚਭਤ੍ਤਂ ਪਚ੍ਛਿਨ੍ਦਿਂਸੁ. ਅਥ ਖੋ ਤੇ ਮਨੁਸ੍ਸਾ ਘਰਂ ਸੋਧੇਨ੍ਤਾ ਤਂ ਆਸਨਂ ਭਾਜਨਨ੍ਤਰਿਕਾਯ ਪਸ੍ਸਿਤ੍ਵਾ ਤਂ ਭਿਕ੍ਖੁਨਿਂ ਖਮਾਪੇਤ੍ਵਾ ਨਿਚ੍ਚਭਤ੍ਤਂ ਪਟ੍ਠਪੇਸੁਂ. ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਮਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਮਤੀਤਿ [ਪਕ੍ਕਮੀਤਿ (ਕ.)]? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਮਿਸ੍ਸਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੮੫੫. ‘‘ਯਾ ਪਨ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ ਆਸਨੇ ਨਿਸੀਦਿਤ੍ਵਾ ਸਾਮਿਕੇ ਅਨਾਪੁਚ੍ਛਾ ਪਕ੍ਕਮੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੮੫੬. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਪੁਰੇਭਤ੍ਤਂ ਨਾਮ ਅਰੁਣੁਗ੍ਗਮਨਂ ਉਪਾਦਾਯ ਯਾਵ ਮਜ੍ਝਨ੍ਹਿਕਾ.

ਕੁਲਂ ਨਾਮ ਚਤ੍ਤਾਰਿ ਕੁਲਾਨਿ – ਖਤ੍ਤਿਯਕੁਲਂ, ਬ੍ਰਾਹ੍ਮਣਕੁਲਂ, ਵੇਸ੍ਸਕੁਲਂ, ਸੁਦ੍ਦਕੁਲਂ. ਉਪਸਙ੍ਕਮਿਤ੍ਵਾਤਿ ਤਤ੍ਥ ਗਨ੍ਤ੍ਵਾ.

ਆਸਨਂ ਨਾਮ ਪਲ੍ਲਙ੍ਕਸ੍ਸ ਓਕਾਸੋ ਵੁਚ੍ਚਤਿ. ਨਿਸੀਦਿਤ੍ਵਾਤਿ ਤਸ੍ਮਿਂ ਨਿਸੀਦਿਤ੍ਵਾ.

ਸਾਮਿਕੇ ਅਨਾਪੁਚ੍ਛਾ ਪਕ੍ਕਮੇਯ੍ਯਾਤਿ ਯੋ ਤਸ੍ਮਿਂ ਕੁਲੇ ਮਨੁਸ੍ਸੋ ਵਿਞ੍ਞੂ ਤਂ ਅਨਾਪੁਚ੍ਛਾ ਅਨੋਵਸ੍ਸਕਂ ਅਤਿਕ੍ਕਾਮੇਨ੍ਤਿਯਾ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਜ੍ਝੋਕਾਸੇ ਉਪਚਾਰਂ ਅਤਿਕ੍ਕਾਮੇਨ੍ਤਿਯਾ ਆਪਤ੍ਤਿ ਪਾਚਿਤ੍ਤਿਯਸ੍ਸ.

੮੫੭. ਅਨਾਪੁਚ੍ਛਿਤੇ ਅਨਾਪੁਚ੍ਛਿਤਸਞ੍ਞਾ ਪਕ੍ਕਮਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਨਾਪੁਚ੍ਛਿਤੇ ਵੇਮਤਿਕਾ ਪਕ੍ਕਮਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਨਾਪੁਚ੍ਛਿਤੇ ਆਪੁਚ੍ਛਿਤਸਞ੍ਞਾ ਪਕ੍ਕਮਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਪਲ੍ਲਙ੍ਕਸ੍ਸ ਅਨੋਕਾਸੇ ਆਪਤ੍ਤਿ ਦੁਕ੍ਕਟਸ੍ਸ. ਆਪੁਚ੍ਛਿਤੇ ਅਨਾਪੁਚ੍ਛਿਤਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਆਪੁਚ੍ਛਿਤੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਆਪੁਚ੍ਛਿਤੇ ਆਪੁਚ੍ਛਿਤਸਞ੍ਞਾ, ਅਨਾਪਤ੍ਤਿ.

੮੫੮. ਅਨਾਪਤ੍ਤਿ ਆਪੁਚ੍ਛਾ ਗਚ੍ਛਤਿ, ਅਸਂਹਾਰਿਮੇ, ਗਿਲਾਨਾਯ, ਆਪਦਾਸੁ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਪਞ੍ਚਮਸਿਕ੍ਖਾਪਦਂ ਨਿਟ੍ਠਿਤਂ.