੩. ਤਤਿਯਸਿਕ੍ਖਾਪਦਂ

੮੪੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਭਦ੍ਦਾਯ ਕਾਪਿਲਾਨਿਯਾ ਅਨ੍ਤੇਵਾਸਿਨਿਯਾ ਭਿਕ੍ਖੁਨਿਯਾ ਞਾਤਕੋ ਪੁਰਿਸੋ ਗਾਮਕਾ ਸਾਵਤ੍ਥਿਂ ਅਗਮਾਸਿ ਕੇਨਚਿਦੇਵ ਕਰਣੀਯੇਨ. ਅਥ ਖੋ ਸਾ ਭਿਕ੍ਖੁਨੀ – ‘‘ਭਗਵਤਾ ਪਟਿਕ੍ਖਿਤ੍ਤਂ ਪਟਿਚ੍ਛਨ੍ਨੇ ਓਕਾਸੇ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਸਨ੍ਤਿਟ੍ਠਿਤੁਂ ਸਲ੍ਲਪਿਤੁ’’ਨ੍ਤਿ ਤੇਨੇਵ ਪੁਰਿਸੇਨ ਸਦ੍ਧਿਂ ਅਜ੍ਝੋਕਾਸੇ ਏਕੇਨੇਕਾ ਸਨ੍ਤਿਟ੍ਠਤਿਪਿ ਸਲ੍ਲਪਤਿਪਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਸਨ੍ਤਿਟ੍ਠਿਸ੍ਸਤਿਪਿ ਸਲ੍ਲਪਿਸ੍ਸਤਿਪੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨੀ ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਸਨ੍ਤਿਟ੍ਠਤਿਪਿ ਸਲ੍ਲਪਤਿਪੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨੀ ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਸਨ੍ਤਿਟ੍ਠਿਸ੍ਸਤਿਪਿ ਸਲ੍ਲਪਿਸ੍ਸਤਿਪਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੮੪੭. ‘‘ਯਾ ਪਨ ਭਿਕ੍ਖੁਨੀ ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿਂ ਏਕੇਨੇਕਾ ਸਨ੍ਤਿਟ੍ਠੇਯ੍ਯ ਵਾ ਸਲ੍ਲਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

੮੪੮. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਅਜ੍ਝੋਕਾਸੋ ਨਾਮ ਅਪ੍ਪਟਿਚ੍ਛਨ੍ਨੋ ਹੋਤਿ ਕੁਟ੍ਟੇਨ ਵਾ ਕਵਾਟੇਨ ਵਾ ਕਿਲਞ੍ਜੇਨ ਵਾ ਸਾਣਿਪਾਕਾਰੇਨ ਵਾ ਰੁਕ੍ਖੇਨ ਵਾ ਥਮ੍ਭੇਨ ਵਾ ਕੋਤ੍ਥਲ਼ਿਯਾ ਵਾ, ਯੇਨ ਕੇਨਚਿ ਅਪ੍ਪਟਿਚ੍ਛਨ੍ਨੋ ਹੋਤਿ.

ਪੁਰਿਸੋ ਨਾਮ ਮਨੁਸ੍ਸਪੁਰਿਸੋ, ਨ ਯਕ੍ਖੋ ਨ ਪੇਤੋ ਨ ਤਿਰਚ੍ਛਾਨਗਤੋ, ਵਿਞ੍ਞੂ ਪਟਿਬਲੋ ਸਨ੍ਤਿਟ੍ਠਿਤੁਂ ਸਲ੍ਲਪਿਤੁਂ.

ਸਦ੍ਧਿਨ੍ਤਿ ਏਕਤੋ. ਏਕੇਨੇਕਾਤਿ ਪੁਰਿਸੋ ਚੇਵ ਹੋਤਿ ਭਿਕ੍ਖੁਨੀ ਚ.

ਸਨ੍ਤਿਟ੍ਠੇਯ੍ਯ ਵਾਤਿ ਪੁਰਿਸਸ੍ਸ ਹਤ੍ਥਪਾਸੇ ਤਿਟ੍ਠਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਸਲ੍ਲਪੇਯ੍ਯ ਵਾਤਿ ਪੁਰਿਸਸ੍ਸ ਹਤ੍ਥਪਾਸੇ ਠਿਤਾ ਸਲ੍ਲਪਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਹਤ੍ਥਪਾਸਂ ਵਿਜਹਿਤ੍ਵਾ ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਯਕ੍ਖੇਨ ਵਾ ਪੇਤੇਨ ਵਾ ਪਣ੍ਡਕੇਨ ਵਾ ਤਿਰਚ੍ਛਾਗਤਮਨੁਸ੍ਸਵਿਗ੍ਗਹੇਨ ਵਾ ਸਦ੍ਧਿਂ ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ.

੮੪੯. ਅਨਾਪਤ੍ਤਿ ਯੋ ਕੋਚਿ ਵਿਞ੍ਞੂ ਦੁਤਿਯੋ ਹੋਤਿ, ਅਰਹੋਪੇਕ੍ਖਾ, ਅਞ੍ਞਵਿਹਿਤਾ ਸਨ੍ਤਿਟ੍ਠਤਿ ਵਾ ਸਲ੍ਲਪਤਿ ਵਾ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਤਤਿਯਸਿਕ੍ਖਾਪਦਂ ਨਿਟ੍ਠਿਤਂ.