੮. ਅਟ੍ਠਮਸਿਕ੍ਖਾਪਦਂ

੮੨੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਬ੍ਰਾਹ੍ਮਣੋ ਨਿਬ੍ਬਿਟ੍ਠਰਾਜਭਟੋ ‘‘ਤਞ੍ਞੇਵ ਭਟਪਥਂ ਯਾਚਿਸ੍ਸਾਮੀ’’ਤਿ ਸੀਸਂ ਨਹਾਯਿਤ੍ਵਾ ਭਿਕ੍ਖੁਨੁਪਸ੍ਸਯਂ ਨਿਸ੍ਸਾਯ ਰਾਜਕੁਲਂ ਗਚ੍ਛਤਿ. ਅਞ੍ਞਤਰਾ ਭਿਕ੍ਖੁਨੀ ਕਟਾਹੇ ਵਚ੍ਚਂ ਕਤ੍ਵਾ ਤਿਰੋਕੁਟ੍ਟੇ ਛਡ੍ਡੇਨ੍ਤੀ ਤਸ੍ਸ ਬ੍ਰਾਹ੍ਮਣਸ੍ਸ ਮਤ੍ਥਕੇ ਆਸੁਮ੍ਭਿ. ਅਥ ਖੋ ਸੋ ਬ੍ਰਾਹ੍ਮਣੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਸ੍ਸਮਣਿਯੋ ਇਮਾ ਮੁਣ੍ਡਾ ਬਨ੍ਧਕਿਨਿਯੋ. ਕਥਞ੍ਹਿ ਨਾਮ ਗੂਥਕਟਾਹਂ ਮਤ੍ਥਕੇ ਆਸੁਮ੍ਭਿਸ੍ਸਨ੍ਤਿ! ਇਮਾਸਂ ਉਪਸ੍ਸਯਂ ਝਾਪੇਸ੍ਸਾਮੀ’’ਤਿ! ਉਮ੍ਮੁਕਂ ਗਹੇਤ੍ਵਾ ਉਪਸ੍ਸਯਂ ਪਵਿਸਤਿ. ਅਞ੍ਞਤਰੋ ਉਪਾਸਕੋ ਉਪਸ੍ਸਯਾ ਨਿਕ੍ਖਮਨ੍ਤੋ ਅਦ੍ਦਸ ਤਂ ਬ੍ਰਾਹ੍ਮਣਂ ਉਮ੍ਮੁਕਂ ਗਹੇਤ੍ਵਾ ਉਪਸ੍ਸਯਂ ਪਵਿਸਨ੍ਤਂ. ਦਿਸ੍ਵਾਨ ਤਂ ਬ੍ਰਾਹ੍ਮਣਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਭੋ, ਉਮ੍ਮੁਕਂ ਗਹੇਤ੍ਵਾ ਉਪਸ੍ਸਯਂ ਪਵਿਸਸੀ’’ਤਿ? ‘‘ਇਮਾ ਮਂ, ਭੋ, ਮੁਣ੍ਡਾ ਬਨ੍ਧਕਿਨਿਯੋ ਗੂਥਕਟਾਹਂ ਮਤ੍ਥਕੇ ਆਸੁਮ੍ਭਿਂਸੁ. ਇਮਾਸਂ ਉਪਸ੍ਸਯਂ ਝਾਪੇਸ੍ਸਾਮੀ’’ਤਿ. ‘‘ਗਚ੍ਛ, ਭੋ ਬ੍ਰਾਹ੍ਮਣ, ਮਙ੍ਗਲਂ ਏਤਂ. ਸਹਸ੍ਸਂ ਲਚ੍ਛਸਿ ਤਞ੍ਚ ਭਟਪਥ’’ਨ੍ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਸੀਸਂ ਨਹਾਯਿਤ੍ਵਾ ਰਾਜਕੁਲਂ ਗਨ੍ਤ੍ਵਾ ਸਹਸ੍ਸਂ ਅਲਤ੍ਥ ਤਞ੍ਚ ਭਟਪਥਂ. ਅਥ ਖੋ ਸੋ ਉਪਾਸਕੋ ਉਪਸ੍ਸਯਂ ਪਵਿਸਿਤ੍ਵਾ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਤ੍ਵਾ ਪਰਿਭਾਸਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡੇਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨਿਯੋ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡੇਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨਿਯੋ ਉਚ੍ਚਾਰਂ ਤਿਰੋਕੁਟ੍ਟੇ ਛਡ੍ਡੇਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੮੨੫. ‘‘ਯਾ ਪਨ ਭਿਕ੍ਖੁਨੀ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਸਙ੍ਕਾਰਂ ਵਾ ਵਿਘਾਸਂ ਵਾ ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

੮੨੬. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਉਚ੍ਚਾਰੋ ਨਾਮ ਗੂਥੋ ਵੁਚ੍ਚਤਿ. ਪਸ੍ਸਾਵੋ ਨਾਮ ਮੁਤ੍ਤਂ ਵੁਚ੍ਚਤਿ.

ਸਙ੍ਕਾਰਂ ਨਾਮ ਕਚਵਰਂ ਵੁਚ੍ਚਤਿ.

ਵਿਘਾਸਂ ਨਾਮ ਚਲਕਾਨਿ ਵਾ ਅਟ੍ਠਿਕਾਨਿ ਵਾ ਉਚ੍ਛਿਟ੍ਠੋਦਕਂ ਵਾ.

ਕੁਟ੍ਟੋ ਨਾਮ ਤਯੋ ਕੁਟ੍ਟਾ – ਇਟ੍ਠਕਾਕੁਟ੍ਟੋ, ਸਿਲਾਕੁਟ੍ਟੋ, ਦਾਰੁਕੁਟ੍ਟੋ.

ਪਾਕਾਰੋ ਨਾਮ ਤਯੋ ਪਾਕਾਰਾ – ਇਟ੍ਠਕਾਪਾਕਾਰੋ, ਸਿਲਾਪਾਕਾਰੋ, ਦਾਰੁਪਾਕਾਰੋ.

ਤਿਰੋਕੁਟ੍ਟੇਤਿ ਕੁਟ੍ਟਸ੍ਸ ਪਰਤੋ. ਤਿਰੋਪਾਕਾਰੇਤਿ ਪਾਕਾਰਸ੍ਸ ਪਰਤੋ.

ਛਡ੍ਡੇਯ੍ਯਾਤਿ ਸਯਂ ਛਡ੍ਡੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਛਡ੍ਡਾਪੇਯ੍ਯਾਤਿ ਅਞ੍ਞਂ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਕਿਂ ਆਣਤ੍ਤਾ ਬਹੁਕਮ੍ਪਿ ਛਡ੍ਡੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੮੨੭. ਅਨਾਪਤ੍ਤਿ ਓਲੋਕੇਤ੍ਵਾ ਛਡ੍ਡੇਤਿ, ਅਵਲ਼ਞ੍ਜੇ ਛਡ੍ਡੇਤਿ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਅਟ੍ਠਮਸਿਕ੍ਖਾਪਦਂ ਨਿਟ੍ਠਿਤਂ.