੩. ਤਤਿਯਸਿਕ੍ਖਾਪਦਂ

੮੦੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੁਨਿਯੋ ਅਨਭਿਰਤਿਯਾ ਪੀਲ਼ਿਤਾ ਓਵਰਕਂ ਪਵਿਸਿਤ੍ਵਾ ਤਲਘਾਤਕਂ ਕਰੋਨ੍ਤਿ. ਭਿਕ੍ਖੁਨਿਯੋ ਤੇਨ ਸਦ੍ਦੇਨ ਉਪਧਾਵਿਤ੍ਵਾ ਤਾ ਭਿਕ੍ਖੁਨਿਯੋ ਏਤਦਵੋਚੁਂ – ‘‘ਕਿਸ੍ਸ ਤੁਮ੍ਹੇ, ਅਯ੍ਯੇ, ਪੁਰਿਸੇਨ ਸਦ੍ਧਿਂ ਸਮ੍ਪਦੁਸ੍ਸਥਾ’’ਤਿ? ‘‘ਨ ਮਯਂ, ਅਯ੍ਯੇ, ਪੁਰਿਸੇਨ ਸਦ੍ਧਿਂ ਸਮ੍ਪਦੁਸ੍ਸਾਮਾ’’ਤਿ. ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸੁਂ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਤਲਘਾਤਕਂ ਕਰਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੁਨਿਯੋ ਤਲਘਾਤਕਂ ਕਰੋਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਭਿਕ੍ਖੁਨਿਯੋ ਤਲਘਾਤਕਂ ਕਰਿਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੮੦੩. ‘‘ਤਲਘਾਤਕੇ ਪਾਚਿਤ੍ਤਿਯ’’ਨ੍ਤਿ.

੮੦੪. ਤਲਘਾਤਕਂ ਨਾਮ ਸਮ੍ਫਸ੍ਸਂ ਸਾਦਿਯਨ੍ਤੀ ਅਨ੍ਤਮਸੋ ਉਪ੍ਪਲਪਤ੍ਤੇਨਪਿ ਮੁਤ੍ਤਕਰਣੇ ਪਹਾਰਂ ਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੮੦੫. ਅਨਾਪਤ੍ਤਿ ਆਬਾਧਪਚ੍ਚਯਾ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਤਤਿਯਸਿਕ੍ਖਾਪਦਂ ਨਿਟ੍ਠਿਤਂ.