੧੦. ਦਸਮਸਙ੍ਘਾਦਿਸੇਸਸਿਕ੍ਖਾਪਦਂ

੭੨੭. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਥੁਲ੍ਲਨਨ੍ਦਾ ਭਿਕ੍ਖੁਨੀਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਦੇਤਿ – ‘‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ [ਤੁਮ੍ਹੇਯੇਵ (ਸ੍ਯਾ.)] ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ [ਵੇਭਸ੍ਸਾ (ਸੀ. ਸ੍ਯਾ.)] ਦੁਬ੍ਬਲ੍ਯਾ ਏਵਮਾਹ – ‘ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’’’ਤਿ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਕਥਞ੍ਹਿ ਨਾਮ ਅਯ੍ਯਾ ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਕ੍ਖਤਿ – ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ…ਪੇ… ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਦੇਤਿ – ਸਂਸਟ੍ਠਾਵ ਅਯ੍ਯੇ ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ ਦੁਬ੍ਬਲ੍ਯਾ ਏਵਮਾਹ – ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ, ਭਿਕ੍ਖਵੇ, ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਕ੍ਖਤਿ – ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ…ਪੇ… ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ ਭਿਕ੍ਖਵੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

੭੨੮. ‘‘ਯਾ ਪਨ ਭਿਕ੍ਖੁਨੀ ਏਵਂ ਵਦੇਯ੍ਯ – ‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ ਦੁਬ੍ਬਲ੍ਯਾ ਏਵਮਾਹ – ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’ਤਿ. ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਏਵਮਸ੍ਸ ਵਚਨੀਯਾ – ‘ਮਾ, ਅਯ੍ਯੇ, ਏਵਂ ਅਵਚ – ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ ਦੁਬ੍ਬਲ੍ਯਾ ਏਵਮਾਹ – ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’ਤਿ. ਏਵਞ੍ਚ ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਵੁਚ੍ਚਮਾਨਾ ਤਥੇਵ ਪਗ੍ਗਣ੍ਹੇਯ੍ਯ, ਸਾ ਭਿਕ੍ਖੁਨੀ ਭਿਕ੍ਖੁਨੀਹਿ ਯਾਵਤਤਿਯਂ ਸਮਨੁਭਾਸਿਤਬ੍ਬਾ ਤਸ੍ਸ ਪਟਿਨਿਸ੍ਸਗ੍ਗਾਯ. ਯਾਵਤਤਿਯਞ੍ਚੇ ਸਮਨੁਭਾਸੀਯਮਾਨਾ ਤਂ ਪਟਿਨਿਸ੍ਸਜ੍ਜੇਯ੍ਯ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜੇਯ੍ਯ, ਅਯਮ੍ਪਿ ਭਿਕ੍ਖੁਨੀ ਯਾਵਤਤਿਯਕਂ ਧਮ੍ਮਂ ਆਪਨ੍ਨਾ ਨਿਸ੍ਸਾਰਣੀਯਂ ਸਙ੍ਘਾਦਿਸੇਸ’’ਨ੍ਤਿ.

੭੨੯. ਯਾ ਪਨਾਤਿ ਯਾ ਯਾਦਿਸਾ…ਪੇ… ਭਿਕ੍ਖੁਨੀਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ.

ਏਵਂ ਵਦੇਯ੍ਯਾਤਿ – ‘‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ’’.

ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯਾਤਿ ਅਵਞ੍ਞਾਯ.

ਪਰਿਭਵੇਨਾਤਿ ਪਾਰਿਭਬ੍ਯਤਾ.

ਅਕ੍ਖਨ੍ਤਿਯਾਤਿ ਕੋਪੇਨ.

ਵੇਭਸ੍ਸਿਯਾਤਿ ਵਿਭਸ੍ਸੀਕਤਾ [ਵਿਭਸ੍ਸਿਕਤਾਯ (ਸੀ.)].

ਦੁਬ੍ਬਲ੍ਯਾਤਿ ਅਪਕ੍ਖਤਾ.

ਏਵਮਾਹ – ‘‘ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਚਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’’ਤਿ.

ਸਾ ਭਿਕ੍ਖੁਨੀਤਿ ਯਾ ਸਾ ਏਵਂਵਾਦਿਨੀ ਭਿਕ੍ਖੁਨੀ.

ਭਿਕ੍ਖੁਨੀਹੀਤਿ ਅਞ੍ਞਾਹਿ ਭਿਕ੍ਖੁਨੀਹਿ.

ਯਾ ਪਸ੍ਸਨ੍ਤਿ ਯਾ ਸੁਣਨ੍ਤਿ ਤਾਹਿ ਵਤ੍ਤਬ੍ਬਾ – ‘‘ਮਾਯ੍ਯੇ, ਏਵਂ ਅਵਚ – ‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ…ਪੇ… ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬਾ. ਤਤਿਯਮ੍ਪਿ ਵਤ੍ਤਬ੍ਬਾ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੁਤ੍ਵਾ ਨ ਵਦਨ੍ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾ ਭਿਕ੍ਖੁਨੀ ਸਙ੍ਘਮਜ੍ਝਮ੍ਪਿ ਆਕਡ੍ਢਿਤ੍ਵਾ ਵਤ੍ਤਬ੍ਬਾ – ‘‘ਮਾਯ੍ਯੇ, ਏਵਂ ਅਵਚ – ‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ…ਪੇ… ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’’’ਤਿ. ਦੁਤਿਯਮ੍ਪਿ ਵਤ੍ਤਬ੍ਬਾ. ਤਤਿਯਮ੍ਪਿ ਵਤ੍ਤਬ੍ਬਾ. ਸਚੇ ਪਟਿਨਿਸ੍ਸਜ੍ਜਤਿ, ਇਚ੍ਚੇਤਂ ਕੁਸਲਂ; ਨੋ ਚੇ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਾ ਭਿਕ੍ਖੁਨੀ ਸਮਨੁਭਾਸਿਤਬ੍ਬਾ. ਏਵਞ੍ਚ ਪਨ, ਭਿਕ੍ਖਵੇ, ਸਮਨੁਭਾਸਿਤਬ੍ਬਾ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

੭੩੦. ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਦੇਤਿ – ‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ ਦੁਬ੍ਬਲ੍ਯਾ ਏਵਮਾਹ – ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’ਤਿ. ਸਾ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮਨੁਭਾਸੇਯ੍ਯ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਸਙ੍ਘੇਨ ਸਮਨੁਭਟ੍ਠਾ ਭਿਕ੍ਖੁਨਿਯੋ ਏਵਂ ਵਦੇਤਿ – ‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥ. ਸਨ੍ਤਿ ਸਙ੍ਘੇ ਅਞ੍ਞਾਪਿ ਭਿਕ੍ਖੁਨਿਯੋ ਏਵਾਚਾਰਾ ਏਵਂਸਦ੍ਦਾ ਏਵਂਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਤਾ ਸਙ੍ਘੋ ਨ ਕਿਞ੍ਚਿ ਆਹ. ਤੁਮ੍ਹਞ੍ਞੇਵ ਸਙ੍ਘੋ ਉਞ੍ਞਾਯ ਪਰਿਭਵੇਨ ਅਕ੍ਖਨ੍ਤਿਯਾ ਵੇਭਸ੍ਸਿਯਾ ਦੁਬ੍ਬਲ੍ਯਾ ਏਵਮਾਹ – ਭਗਿਨਿਯੋ ਖੋ ਸਂਸਟ੍ਠਾ ਵਿਹਰਨ੍ਤਿ ਪਾਪਾਚਾਰਾ ਪਾਪਸਦ੍ਦਾ ਪਾਪਸਿਲੋਕਾ, ਭਿਕ੍ਖੁਨਿਸਙ੍ਘਸ੍ਸ ਵਿਹੇਸਿਕਾ, ਅਞ੍ਞਮਞ੍ਞਿਸ੍ਸਾ ਵਜ੍ਜਪ੍ਪਟਿਚ੍ਛਾਦਿਕਾ. ਵਿਵਿਚ੍ਚਥਾਯ੍ਯੇ. ਵਿਵੇਕਞ੍ਞੇਵ ਭਗਿਨੀਨਂ ਸਙ੍ਘੋ ਵਣ੍ਣੇਤੀ’ਤਿ. ਸਾ ਤਂ ਵਤ੍ਥੁਂ ਨ ਪਟਿਨਿਸ੍ਸਜ੍ਜਤਿ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮਨੁਭਾਸਤਿ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਸਮਨੁਭਾਸਨਾ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ….

‘‘ਸਮਨੁਭਟ੍ਠਾ ਸਙ੍ਘੇਨ ਇਤ੍ਥਨ੍ਨਾਮਾ ਭਿਕ੍ਖੁਨੀ ਤਸ੍ਸ ਵਤ੍ਥੁਸ੍ਸ ਪਟਿਨਿਸ੍ਸਗ੍ਗਾਯ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ, ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤਿਯਾ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ ਪਟਿਪ੍ਪਸ੍ਸਮ੍ਭਨ੍ਤਿ.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ ਵੁਚ੍ਚਤਿ.

ਯਾਵਤਤਿਯਕਨ੍ਤਿ ਯਾਵਤਤਿਯਂ ਸਮਨੁਭਾਸਨਾਯ ਆਪਜ੍ਜਤਿ, ਨ ਸਹਵਤ੍ਥੁਜ੍ਝਾਚਾਰਾ.

ਨਿਸ੍ਸਾਰਣੀਯਨ੍ਤਿ ਸਙ੍ਘਮ੍ਹਾ ਨਿਸ੍ਸਾਰੀਯਤਿ.

ਸਙ੍ਘਾਦਿਸੇਸੋਤਿ ਸਙ੍ਘੋਵ ਤਸ੍ਸਾ ਆਪਤ੍ਤਿਯਾ ਮਾਨਤ੍ਤਂ ਦੇਤਿ, ਮੂਲਾਯ ਪਟਿਕਸ੍ਸਤਿ, ਅਬ੍ਭੇਤਿ, ਨ ਸਮ੍ਬਹੁਲਾ ਨ ਏਕਾ ਭਿਕ੍ਖੁਨੀ. ਤੇਨ ਵੁਚ੍ਚਤਿ ‘‘ਸਙ੍ਘਾਦਿਸੇਸੋ’’ਤਿ. ਤਸ੍ਸੇਵ ਆਪਤ੍ਤਿਨਿਕਾਯਸ੍ਸ ਨਾਮਕਮ੍ਮਂ ਅਧਿਵਚਨਂ, ਤੇਨਪਿ ਵੁਚ੍ਚਤਿ ‘‘ਸਙ੍ਘਾਦਿਸੇਸੋ’’ਤਿ.

੭੩੧. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਧਮ੍ਮਕਮ੍ਮੇ ਵੇਮਤਿਕਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਅਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਵੇਮਤਿਕਾ, ਆਪਤ੍ਤਿ ਦੁਕ੍ਕਟਸ੍ਸ. ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਾ, ਆਪਤ੍ਤਿ ਦੁਕ੍ਕਟਸ੍ਸ.

੭੩੨. ਅਨਾਪਤ੍ਤਿ ਅਸਮਨੁਭਾਸਨ੍ਤਿਯਾ, ਪਟਿਨਿਸ੍ਸਜ੍ਜਨ੍ਤਿਯਾ, ਉਮ੍ਮਤ੍ਤਿਕਾਯ, ਆਦਿਕਮ੍ਮਿਕਾਯਾਤਿ.

ਦਸਮਸਙ੍ਘਾਦਿਸੇਸਸਿਕ੍ਖਾਪਦਂ ਨਿਟ੍ਠਿਤਂ.

ਉਦ੍ਦਿਟ੍ਠਾ ਖੋ, ਅਯ੍ਯਾਯੋ, ਸਤ੍ਤਰਸ ਸਙ੍ਘਾਦਿਸੇਸਾ ਧਮ੍ਮਾ – ਨਵ ਪਠਮਾਪਤ੍ਤਿਕਾ, ਅਟ੍ਠ ਯਾਵਤਤਿਯਕਾ. ਯੇਸਂ ਭਿਕ੍ਖੁਨੀ ਅਞ੍ਞਤਰਂ ਵਾ ਅਞ੍ਞਤਰਂ ਵਾ ਆਪਜ੍ਜਤਿ, ਤਾਯ ਭਿਕ੍ਖੁਨਿਯਾ ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬਂ. ਚਿਣ੍ਣਮਾਨਤ੍ਤਾ ਭਿਕ੍ਖੁਨੀ ਯਤ੍ਥ ਸਿਯਾ ਵੀਸਤਿਗਣੋ ਭਿਕ੍ਖੁਨਿਸਙ੍ਘੋ ਤਤ੍ਥ (ਸਾ ਭਿਕ੍ਖੁਨੀ) [( ) (ਕਤ੍ਥਪਿ ਨਤ੍ਥਿ)] ਅਬ੍ਭੇਤਬ੍ਬਾ. ਏਕਾਯਪਿ ਚੇ ਊਨੋ ਵੀਸਤਿਗਣੋ ਭਿਕ੍ਖੁਨਿਸਙ੍ਘੋ ਤਂ ਭਿਕ੍ਖੁਨਿਂ ਅਬ੍ਭੇਯ੍ਯ. ਸਾ ਚ ਭਿਕ੍ਖੁਨੀ ਅਨਬ੍ਭਿਤਾ, ਤਾ ਚ ਭਿਕ੍ਖੁਨਿਯੋ ਗਾਰਯ੍ਹਾ, ਅਯਂ ਤਤ੍ਥ ਸਾਮੀਚਿ.

ਤਤ੍ਥਾਯ੍ਯਾਯੋ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਦੁਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਤਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਪਰਿਸੁਦ੍ਧੇਤ੍ਥਾਯ੍ਯਾਯੋ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

ਸਤ੍ਤਰਸਕਂ ਨਿਟ੍ਠਿਤਂ.

ਭਿਕ੍ਖੁਨਿਵਿਭਙ੍ਗੇ ਸਙ੍ਘਾਦਿਸੇਸਕਣ੍ਡਂ ਨਿਟ੍ਠਿਤਂ.