੨. ਰਤਨਸਿਕ੍ਖਾਪਦਂ

੫੦੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਚਿਰਵਤਿਯਾ ਨਦਿਯਾ ਨਹਾਯਤਿ. ਅਞ੍ਞਤਰੋਪਿ ਬ੍ਰਾਹ੍ਮਣੋ ਪਞ੍ਚਸਤਾਨਂ ਥਵਿਕਂ ਥਲੇ ਨਿਕ੍ਖਿਪਿਤ੍ਵਾ ਅਚਿਰਵਤਿਯਾ ਨਦਿਯਾ ਨਹਾਯਨ੍ਤੋ ਵਿਸ੍ਸਰਿਤ੍ਵਾ ਅਗਮਾਸਿ. ਅਥ ਖੋ ਸੋ ਭਿਕ੍ਖੁ – ‘‘ਤਸ੍ਸਾਯਂ ਬ੍ਰਾਹ੍ਮਣਸ੍ਸ ਥਵਿਕਾ, ਮਾ ਇਧ ਨਸ੍ਸੀ’’ਤਿ ਅਗ੍ਗਹੇਸਿ. ਅਥ ਖੋ ਸੋ ਬ੍ਰਾਹ੍ਮਣੋ ਸਰਿਤ੍ਵਾ ਤੁਰਿਤੋ ਆਧਾਵਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਅਪਿ ਮੇ, ਭੋ, ਥਵਿਕਂ ਪਸ੍ਸੇਯ੍ਯਾਸੀ’’ਤਿ? ‘‘ਹਨ੍ਦ, ਬ੍ਰਾਹ੍ਮਣਾ’’ਤਿ ਅਦਾਸਿ. ਅਥ ਖੋ ਤਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਕੇਨ ਨੁ ਖੋ ਅਹਂ ਉਪਾਯੇਨ ਇਮਸ੍ਸ ਭਿਕ੍ਖੁਨੋ ਪੁਣ੍ਣਪਤ੍ਤਂ ਨ ਦਦੇਯ੍ਯ’’ਨ੍ਤਿ! ‘‘ਨ ਮੇ, ਭੋ, ਪਞ੍ਚਸਤਾਨਿ, ਸਹਸ੍ਸਂ ਮੇ’’ਤਿ ਪਲਿਬੁਨ੍ਧੇਤ੍ਵਾ ਮੁਞ੍ਚਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਰਤਨਂ ਉਗ੍ਗਹੇਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਰਤਨਂ ਉਗ੍ਗਹੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਰਤਨਂ ਉਗ੍ਗਹੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਰਤਨਂ ਵਾ ਰਤਨਸਮ੍ਮਤਂ ਵਾ ਉਗ੍ਗਣ੍ਹੇਯ੍ਯ ਵਾ ਉਗ੍ਗਣ੍ਹਾਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੫੦੩. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਾ ਉਸ੍ਸਵੋ ਹੋਤਿ. ਮਨੁਸ੍ਸਾ ਅਲਙ੍ਕਤਪ੍ਪਟਿਯਤ੍ਤਾ ਉਯ੍ਯਾਨਂ ਗਚ੍ਛਨ੍ਤਿ. ਵਿਸਾਖਾਪਿ ਮਿਗਾਰਮਾਤਾ ਅਲਙ੍ਕਤਪ੍ਪਟਿਯਤ੍ਤਾ ‘‘ਉਯ੍ਯਾਨਂ ਗਮਿਸ੍ਸਾਮੀ’’ਤਿ ਗਾਮਤੋ ਨਿਕ੍ਖਮਿਤ੍ਵਾ – ‘‘ਕ੍ਯਾਹਂ ਕਰਿਸ੍ਸਾਮਿ ਉਯ੍ਯਾਨਂ ਗਨ੍ਤ੍ਵਾ, ਯਂਨੂਨਾਹਂ ਭਗਵਨ੍ਤਂ ਪਯਿਰੁਪਾਸੇਯ੍ਯ’’ਨ੍ਤਿ ਆਭਰਣਂ ਓਮੁਞ੍ਚਿਤ੍ਵਾ ਉਤ੍ਤਰਾਸਙ੍ਗੇਨ ਭਣ੍ਡਿਕਂ ਬਨ੍ਧਿਤ੍ਵਾ ਦਾਸਿਯਾ ਅਦਾਸਿ – ‘‘ਹਨ੍ਦ, ਜੇ, ਇਮਂ ਭਣ੍ਡਿਕਂ ਗਣ੍ਹਾਹੀ’’ਤਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਵਿਸਾਖਂ ਮਿਗਾਰਮਾਤਰਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਸਾ ਦਾਸੀ ਤਂ ਭਣ੍ਡਿਕਂ ਵਿਸ੍ਸਰਿਤ੍ਵਾ ਅਗਮਾਸਿ. ਭਿਕ੍ਖੂ ਪਸ੍ਸਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਤੇਨ ਹਿ, ਭਿਕ੍ਖਵੇ, ਉਗ੍ਗਹੇਤ੍ਵਾ ਨਿਕ੍ਖਿਪਥਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਰਤਨਂ ਵਾ ਰਤਨਸਮ੍ਮਤਂ ਵਾ ਅਜ੍ਝਾਰਾਮੇ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਨਿਕ੍ਖਿਪਿਤੁਂ – ‘‘ਯਸ੍ਸ ਭਵਿਸ੍ਸਤਿ ਸੋ ਹਰਿਸ੍ਸਤੀ’’ਤਿ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਰਤਨਂ ਵਾ ਰਤਨਸਮ੍ਮਤਂ ਵਾ, ਅਞ੍ਞਤ੍ਰ ਅਜ੍ਝਾਰਾਮਾ, ਉਗ੍ਗਣ੍ਹੇਯ੍ਯ ਵਾ ਉਗ੍ਗਣ੍ਹਾਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੫੦੪. ਤੇਨ ਖੋ ਪਨ ਸਮਯੇਨ ਕਾਸੀਸੁ ਜਨਪਦੇ ਅਨਾਥਪਿਣ੍ਡਿਕਸ੍ਸ ਗਹਪਤਿਸ੍ਸ ਕਮ੍ਮਨ੍ਤਗਾਮੋ ਹੋਤਿ. ਤੇਨ ਚ ਗਹਪਤਿਨਾ ਅਨ੍ਤੇਵਾਸੀ ਆਣਤ੍ਤੋ ਹੋਤਿ – ‘‘ਸਚੇ ਭਦਨ੍ਤਾ ਆਗਚ੍ਛਨ੍ਤਿ ਭਤ੍ਤਂ ਕਰੇਯ੍ਯਾਸੀ’’ਤਿ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਜਨਪਦੇ ਚਾਰਿਕਂ ਚਰਮਾਨਾ ਯੇਨ ਅਨਾਥਪਿਣ੍ਡਿਕਸ੍ਸ ਗਹਪਤਿਸ੍ਸ ਕਮ੍ਮਨ੍ਤਗਾਮੋ ਤੇਨੁਪਸਙ੍ਕਮਿਂਸੁ. ਅਦ੍ਦਸਾ ਖੋ ਸੋ ਪੁਰਿਸੋ ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ. ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤੇ ਭਿਕ੍ਖੂ ਅਭਿਵਾਦੇਤ੍ਵਾ ਏਤਦਵੋਚ – ‘‘ਅਧਿਵਾਸੇਨ੍ਤੁ, ਭਨ੍ਤੇ, ਅਯ੍ਯਾ ਸ੍ਵਾਤਨਾਯ ਗਹਪਤਿਨੋ ਭਤ੍ਤ’’ਨ੍ਤਿ. ਅਧਿਵਾਸੇਸੁਂ ਖੋ ਤੇ ਭਿਕ੍ਖੂ ਤੁਣ੍ਹੀਭਾਵੇਨ. ਅਥ ਖੋ ਸੋ ਪੁਰਿਸੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਕਾਲਂ ਆਰੋਚਾਪੇਤ੍ਵਾ ਅਙ੍ਗੁਲਿਮੁਦ੍ਦਿਕਂ ਓਮੁਞ੍ਚਿਤ੍ਵਾ ਤੇ ਭਿਕ੍ਖੂ ਭਤ੍ਤੇਨ ਪਰਿਵਿਸਿਤ੍ਵਾ – ‘‘ਅਯ੍ਯਾ ਭੁਞ੍ਜਿਤ੍ਵਾ ਗਚ੍ਛਨ੍ਤੁ, ਅਹਮ੍ਪਿ ਕਮ੍ਮਨ੍ਤਂ ਗਮਿਸ੍ਸਾਮੀ’’ਤਿ ਅਙ੍ਗੁਲਿਮੁਦ੍ਦਿਕਂ ਵਿਸ੍ਸਰਿਤ੍ਵਾ ਅਗਮਾਸਿ. ਭਿਕ੍ਖੂ ਪਸ੍ਸਿਤ੍ਵਾ – ‘‘ਸਚੇ ਮਯਂ ਗਮਿਸ੍ਸਾਮ ਨਸ੍ਸਿਸ੍ਸਤਾਯਂ ਅਙ੍ਗੁਲਿਮੁਦ੍ਦਿਕਾ’’ਤਿ ਤਤ੍ਥੇਵ ਅਚ੍ਛਿਂਸੁ. ਅਥ ਖੋ ਸੋ ਪੁਰਿਸੋ ਕਮ੍ਮਨ੍ਤਾ ਆਗਚ੍ਛਨ੍ਤੋ ਤੇ ਭਿਕ੍ਖੂ ਪਸ੍ਸਿਤ੍ਵਾ ਏਤਦਵੋਚ – ‘‘ਕਿਸ੍ਸ, ਭਨ੍ਤੇ, ਅਯ੍ਯਾ ਇਧੇਵ ਅਚ੍ਛਨ੍ਤੀ’’ਤਿ? ਅਥ ਖੋ ਤੇ ਭਿਕ੍ਖੂ ਤਸ੍ਸ ਪੁਰਿਸਸ੍ਸ ਏਤਮਤ੍ਥਂ ਆਰੋਚੇਤ੍ਵਾ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਰਤਨਂ ਵਾ ਰਤਨਸਮ੍ਮਤਂ ਵਾ ਅਜ੍ਝਾਰਾਮੇ ਵਾ ਅਜ੍ਝਾਵਸਥੇ ਵਾ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਨਿਕ੍ਖਿਪਿਤੁਂ – ਯਸ੍ਸ ਭਵਿਸ੍ਸਤਿ ਸੋ ਹਰਿਸ੍ਸਤੀ’’ਤਿ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੫੦੫. ‘‘ਯੋ ਪਨ ਭਿਕ੍ਖੁ ਰਤਨਂ ਵਾ ਰਤਨਸਮ੍ਮਤਂ ਵਾ, ਅਞ੍ਞਤ੍ਰ ਅਜ੍ਝਾਰਾਮਾ ਵਾ ਅਜ੍ਝਾਵਸਥਾ ਵਾ, ਉਗ੍ਗਣ੍ਹੇਯ੍ਯ ਵਾ ਉਗ੍ਗਣ੍ਹਾਪੇਯ੍ਯ ਵਾ, ਪਾਚਿਤ੍ਤਿਯਂ. ਰਤਨਂ ਵਾ ਪਨ ਭਿਕ੍ਖੁਨਾ ਰਤਨਸਮ੍ਮਤਂ ਵਾ ਅਜ੍ਝਾਰਾਮੇ ਵਾ ਅਜ੍ਝਾਵਸਥੇ ਵਾ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਨਿਕ੍ਖਿਪਿਤਬ੍ਬਂ – ‘ਯਸ੍ਸ ਭਵਿਸ੍ਸਤਿ ਸੋ ਹਰਿਸ੍ਸਤੀ’ਤਿ. ਅਯਂ ਤਤ੍ਥ ਸਾਮੀਚੀ’’ਤਿ.

੫੦੬. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਰਤਨਂ ਨਾਮ ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲਂ ਰਜਤਂ ਜਾਤਰੂਪਂ ਲੋਹਿਤਙ੍ਕੋ [ਲੋਹਿਤਕੋ (?)] ਮਸਾਰਗਲ੍ਲਂ.

ਰਤਨਸਮ੍ਮਤਂ ਨਾਮ ਯਂ ਮਨੁਸ੍ਸਾਨਂ ਉਪਭੋਗਪਰਿਭੋਗਂ, ਏਤਂ ਰਤਨਸਮ੍ਮਤਂ ਨਾਮ.

ਅਞ੍ਞਤ੍ਰ ਅਜ੍ਝਾਰਾਮਾ ਵਾ ਅਜ੍ਝਾਵਸਥਾ ਵਾਤਿ ਠਪੇਤ੍ਵਾ ਅਜ੍ਝਾਰਾਮਂ ਅਜ੍ਝਾਵਸਥਂ.

ਅਜ੍ਝਾਰਾਮੋ ਨਾਮ ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਅਨ੍ਤੋ ਆਰਾਮੋ, ਅਪਰਿਕ੍ਖਿਤ੍ਤਸ੍ਸ ਉਪਚਾਰੋ.

ਅਜ੍ਝਾਵਸਥੋ ਨਾਮ ਪਰਿਕ੍ਖਿਤ੍ਤਸ੍ਸ ਆਵਸਥਸ੍ਸ ਅਨ੍ਤੋ ਆਵਸਥੋ, ਅਪਰਿਕ੍ਖਿਤ੍ਤਸ੍ਸ ਉਪਚਾਰੋ.

ਉਗ੍ਗਣ੍ਹੇਯ੍ਯਾਤਿ ਸਯਂ ਗਣ੍ਹਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਉਗ੍ਗਣ੍ਹਾਪੇਯ੍ਯਾਤਿ ਅਞ੍ਞਂ ਗਾਹਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਰਤਨਂ ਵਾ ਪਨ ਭਿਕ੍ਖੁਨਾ ਰਤਨਸਮ੍ਮਤਂ ਵਾ ਅਜ੍ਝਾਰਾਮੇ ਵਾ ਅਜ੍ਝਾਵਸਥੇ ਵਾ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਨਿਕ੍ਖਿਪਿਤਬ੍ਬਨ੍ਤਿ ਰੂਪੇਨ ਵਾ ਨਿਮਿਤ੍ਤੇਨ ਵਾ ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤ੍ਵਾ ਆਚਿਕ੍ਖਿਤਬ੍ਬਂ – ‘‘ਯਸ੍ਸ ਭਣ੍ਡਂ ਨਟ੍ਠਂ ਸੋ ਆਗਚ੍ਛਤੂ’’ਤਿ. ਸਚੇ ਤਤ੍ਥ ਆਗਚ੍ਛਤਿ ਸੋ ਵਤ੍ਤਬ੍ਬੋ – ‘‘ਆਵੁਸੋ, ਕੀਦਿਸਂ ਤੇ ਭਣ੍ਡ’’ਨ੍ਤਿ? ਸਚੇ ਰੂਪੇਨ ਵਾ ਨਿਮਿਤ੍ਤੇਨ ਵਾ ਸਮ੍ਪਾਦੇਤਿ ਦਾਤਬ੍ਬਂ, ਨੋ ਚੇ ਸਮ੍ਪਾਦੇਤਿ ‘‘ਵਿਚਿਨਾਹਿ ਆਵੁਸੋ’’ਤਿ ਵਤ੍ਤਬ੍ਬੋ. ਤਮ੍ਹਾ ਆਵਾਸਾ ਪਕ੍ਕਮਨ੍ਤੇਨ ਯੇ ਤਤ੍ਥ ਹੋਨ੍ਤਿ ਭਿਕ੍ਖੂ ਪਤਿਰੂਪਾ, ਤੇਸਂ ਹਤ੍ਥੇ ਨਿਕ੍ਖਿਪਿਤ੍ਵਾ ਪਕ੍ਕਮਿਤਬ੍ਬਂ. ਨੋ ਚੇ ਹੋਨ੍ਤਿ ਭਿਕ੍ਖੂ ਪਤਿਰੂਪਾ, ਯੇ ਤਤ੍ਥ ਹੋਨ੍ਤਿ ਗਹਪਤਿਕਾ ਪਤਿਰੂਪਾ, ਤੇਸਂ ਹਤ੍ਥੇ ਨਿਕ੍ਖਿਪਿਤ੍ਵਾ ਪਕ੍ਕਮਿਤਬ੍ਬਂ.

ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ.

੫੦੭. ਅਨਾਪਤ੍ਤਿ ਰਤਨਂ ਵਾ ਰਤਨਸਮ੍ਮਤਂ ਵਾ ਅਜ੍ਝਾਰਾਮੇ ਵਾ ਅਜ੍ਝਾਵਸਥੇ ਵਾ ਉਗ੍ਗਹੇਤ੍ਵਾ ਵਾ ਉਗ੍ਗਹਾਪੇਤ੍ਵਾ ਵਾ ਨਿਕ੍ਖਿਪਤਿ – ‘‘ਯਸ੍ਸ ਭਵਿਸ੍ਸਤਿ ਸੋ ਹਰਿਸ੍ਸਤੀ’’ਤਿ, ਰਤਨਸਮ੍ਮਤਂ ਵਿਸ੍ਸਾਸਂ ਗਣ੍ਹਾਤਿ, ਤਾਵਕਾਲਿਕਂ ਗਣ੍ਹਾਤਿ, ਪਂਸੁਕੂਲਸਞ੍ਞਿਸ੍ਸ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਰਤਨਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ.