੨. ਵਿਲੇਖਨਸਿਕ੍ਖਾਪਦਂ

੪੩੮. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. [ਇਦਂ ਵਤ੍ਥੁ ਚੂਲ਼ਵ. ੩੨੦] ਤੇਨ ਖੋ ਪਨ ਸਮਯੇਨ ਭਗਵਾ ਭਿਕ੍ਖੂਨਂ ਅਨੇਕਪਰਿਯਾਯੇਨ ਵਿਨਯਕਥਂ ਕਥੇਤਿ, ਵਿਨਯਸ੍ਸ ਵਣ੍ਣਂ ਭਾਸਤਿ, ਵਿਨਯਪਰਿਯਤ੍ਤਿਯਾ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਆਯਸ੍ਮਤੋ ਉਪਾਲਿਸ੍ਸ ਵਣ੍ਣਂ ਭਾਸਤਿ. ਭਿਕ੍ਖੂਨਂ ਏਤਦਹੋਸਿ [ਭਿਕ੍ਖੂ ਭਗਵਾ (ਸ੍ਯਾ. ਕ.)] – ‘‘ਭਗਵਾ ਖੋ ਅਨੇਕਪਰਿਯਾਯੇਨ ਵਿਨਯਕਥਂ ਕਥੇਤਿ, ਵਿਨਯਸ੍ਸ ਵਣ੍ਣਂ ਭਾਸਤਿ, ਵਿਨਯਪਰਿਯਤ੍ਤਿਯਾ ਵਣ੍ਣਂ ਭਾਸਤਿ, ਆਦਿਸ੍ਸ ਆਦਿਸ੍ਸ ਆਯਸ੍ਮਤੋ ਉਪਾਲਿਸ੍ਸ ਵਣ੍ਣਂ ਭਾਸਤਿ. ਹਨ੍ਦ ਮਯਂ, ਆਵੁਸੋ, ਆਯਸ੍ਮਤੋ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਪਰਿਯਾਪੁਣਾਮਾ’’ਤਿ, ਤੇ ਚ ਬਹੂ ਭਿਕ੍ਖੂ ਥੇਰਾ ਚ ਨਵਾ ਚ ਮਜ੍ਝਿਮਾ ਚ ਆਯਸ੍ਮਤੋ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਪਰਿਯਾਪੁਣਨ੍ਤਿ.

ਅਥ ਖੋ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਏਤਰਹਿ ਖੋ, ਆਵੁਸੋ, ਬਹੂ ਭਿਕ੍ਖੂ ਥੇਰਾ ਚ ਨਵਾ ਚ ਮਜ੍ਝਿਮਾ ਚ ਆਯਸ੍ਮਤੋ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਪਰਿਯਾਪੁਣਨ੍ਤਿ. ਸਚੇ ਇਮੇ ਵਿਨਯੇ ਪਕਤਞ੍ਞੁਨੋ ਭਵਿਸ੍ਸਨ੍ਤਿ ਅਮ੍ਹੇ ਯੇਨਿਚ੍ਛਕਂ ਯਦਿਚ੍ਛਕਂ ਯਾਵਦਿਚ੍ਛਕਂ ਆਕਡ੍ਢਿਸ੍ਸਨ੍ਤਿ ਪਰਿਕਡ੍ਢਿਸ੍ਸਨ੍ਤਿ. ਹਨ੍ਦ ਮਯਂ, ਆਵੁਸੋ, ਵਿਨਯਂ ਵਿਵਣ੍ਣੇਮਾ’’ਤਿ. ਅਥ ਖੋ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਕਿਂ ਪਨਿਮੇਹਿ ਖੁਦ੍ਦਾਨੁਖੁਦ੍ਦਕੇਹਿ ਸਿਕ੍ਖਾਪਦੇਹਿ ਉਦ੍ਦਿਟ੍ਠੇਹਿ, ਯਾਵਦੇਵ ਕੁਕ੍ਕੁਚ੍ਚਾਯ ਵਿਹੇਸਾਯ ਵਿਲੇਖਾਯ ਸਂਵਤ੍ਤਨ੍ਤੀ’’ਤਿ! ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਵਿਨਯਂ ਵਿਵਣ੍ਣੇਸ੍ਸਨ੍ਤੀਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਵਿਨਯਂ ਵਿਵਣ੍ਣੇਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਵਿਨਯਂ ਵਿਵਣ੍ਣੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੪੩੯. ‘‘ਯੋ ਪਨ ਭਿਕ੍ਖੁ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਏਵਂ ਵਦੇਯ੍ਯ – ‘ਕਿਂ ਪਨਿਮੇਹਿ ਖੁਦ੍ਦਾਨੁਖੁਦ੍ਦਕੇਹਿ ਸਿਕ੍ਖਾਪਦੇਹਿ ਉਦ੍ਦਿਟ੍ਠੇਹਿ, ਯਾਵਦੇਵ ਕੁਕ੍ਕੁਚ੍ਚਾਯ ਵਿਹੇਸਾਯ ਵਿਲੇਖਾਯ ਸਂਵਤ੍ਤਨ੍ਤੀ’ਤਿ, ਸਿਕ੍ਖਾਪਦਵਿਵਣ੍ਣਕੇ ਪਾਚਿਤ੍ਤਿਯ’’ਨ੍ਤਿ.

੪੪੦. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇਤਿ ਉਦ੍ਦਿਸਨ੍ਤੇ ਵਾ ਉਦ੍ਦਿਸਾਪੇਨ੍ਤੇ ਵਾ ਸਜ੍ਝਾਯਂ ਵਾ ਕਰੋਨ੍ਤੇ.

ਏਵਂ ਵਦੇਯ੍ਯਾਤਿ – ‘‘ਕਿਂ ਪਨਿਮੇਹਿ ਖੁਦ੍ਦਾਨੁਖੁਦ੍ਦਕੇਹਿ ਸਿਕ੍ਖਾਪਦੇਹਿ ਉਦ੍ਦਿਟ੍ਠੇਹਿ, ਯਾਵਦੇਵ ਕੁਕ੍ਕੁਚ੍ਚਾਯ ਵਿਹੇਸਾਯ ਵਿਲੇਖਾਯ ਸਂਵਤ੍ਤਨ੍ਤੀਤਿ. ‘‘ਯੇ ਇਮਂ ਪਰਿਯਾਪੁਣਨ੍ਤਿ ਤੇਸਂ ਕੁਕ੍ਕੁਚ੍ਚਂ ਹੋਤਿ, ਵਿਹੇਸਾ ਹੋਤਿ, ਵਿਲੇਖਾ ਹੋਤਿ, ਯੇ ਇਮਂ ਨ ਪਰਿਯਾਪੁਣਨ੍ਤਿ ਤੇਸਂ ਕੁਕ੍ਕੁਚ੍ਚਂ ਨ ਹੋਤਿ ਵਿਹੇਸਾ ਨ ਹੋਤਿ ਵਿਲੇਖਾ ਨ ਹੋਤਿ. ਅਨੁਦ੍ਦਿਟ੍ਠਂ ਇਦਂ ਵਰਂ, ਅਨੁਗ੍ਗਹਿਤਂ ਇਦਂ ਵਰਂ, ਅਪਰਿਯਾਪੁਟਂ ਇਦਂ ਵਰਂ, ਅਧਾਰਿਤਂ ਇਦਂ ਵਰਂ, ਵਿਨਯੋ ਵਾ ਅਨ੍ਤਰਧਾਯਤੁ, ਇਮੇ ਵਾ ਭਿਕ੍ਖੂ ਅਪਕਤਞ੍ਞੁਨੋ ਹੋਨ੍ਤੂ’’ਤਿ ਉਪਸਮ੍ਪਨ੍ਨਸ੍ਸ ਵਿਨਯਂ ਵਿਵਣ੍ਣੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੪੪੧. ਉਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞੀ ਵਿਨਯਂ ਵਿਵਣ੍ਣੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨੇ ਵੇਮਤਿਕੋ ਵਿਨਯਂ ਵਿਵਣ੍ਣੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞੀ ਵਿਨਯਂ ਵਿਵਣ੍ਣੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਞ੍ਞਂ ਧਮ੍ਮਂ ਵਿਵਣ੍ਣੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਸ੍ਸ ਵਿਨਯਂ ਵਾ ਅਞ੍ਞਂ ਵਾ ਧਮ੍ਮਂ ਵਿਵਣ੍ਣੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

੪੪੨. ਅਨਾਪਤ੍ਤਿ ਨ ਵਿਵਣ੍ਣੇਤੁਕਾਮੋ, ‘‘ਇਙ੍ਘ ਤ੍ਵਂ ਸੁਤ੍ਤਨ੍ਤੇ ਵਾ ਗਾਥਾਯੋ ਵਾ ਅਭਿਧਮ੍ਮਂ ਵਾ ਪਰਿਯਾਪੁਣਸ੍ਸੁ, ਪਚ੍ਛਾ ਵਿਨਯਂ ਪਰਿਯਾਪੁਣਿਸ੍ਸਸੀ’’ਤਿ ਭਣਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਵਿਲੇਖਨਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ.