੧੨. ਪਰਿਣਾਮਨਸਿਕ੍ਖਾਪਦਂ

੪੮੯. [ਇਦਂ ਵਤ੍ਥੁ ਪਾਰਾ. ੬੫੭] ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਸ੍ਸ ਪੂਗਸ੍ਸ ਸਙ੍ਘਸ੍ਸ ਸਚੀਵਰਭਤ੍ਤਂ ਪਟਿਯਤ੍ਤਂ ਹੋਤਿ – ‘‘ਭੋਜੇਤ੍ਵਾ ਚੀਵਰੇਨ ਅਚ੍ਛਾਦੇਸ੍ਸਾਮਾ’’ਤਿ. ਅਥ ਖੋ ਛਬ੍ਬਗ੍ਗਿਯਾ ਭਿਕ੍ਖੂ ਯੇਨ ਸੋ ਪੂਗੋ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਤਂ ਪੂਗਂ ਏਤਦਵੋਚੁਂ – ‘‘ਦੇਥਾਵੁਸੋ, ਇਮਾਨਿ ਚੀਵਰਾਨਿ ਇਮੇਸਂ ਭਿਕ੍ਖੂਨ’’ਨ੍ਤਿ. ‘‘ਨ ਮਯਂ, ਭਨ੍ਤੇ, ਦਸ੍ਸਾਮ. ਅਮ੍ਹਾਕਂ ਸਙ੍ਘਸ੍ਸ ਅਨੁਵਸ੍ਸਂ ਸਚੀਵਰਭਿਕ੍ਖਾ ਪਞ੍ਞਤ੍ਤਾ’’ਤਿ. ‘‘ਬਹੂ, ਆਵੁਸੋ, ਸਙ੍ਘਸ੍ਸ ਦਾਯਕਾ, ਬਹੂ ਸਙ੍ਘਸ੍ਸ ਭਤ੍ਤਾ [ਭਦ੍ਦਾ (ਕ.)]. ਇਮੇ ਤੁਮ੍ਹੇ ਨਿਸ੍ਸਾਯ ਤੁਮ੍ਹੇ ਸਮ੍ਪਸ੍ਸਨ੍ਤਾ ਇਧ ਵਿਹਰਨ੍ਤਿ. ਤੁਮ੍ਹੇ ਚੇ ਇਮੇਸਂ ਨ ਦਸ੍ਸਥ, ਅਥ ਕੋ ਚਰਹਿ ਇਮੇਸਂ ਦਸ੍ਸਤਿ? ਦੇਥਾਵੁਸੋ, ਇਮਾਨਿ ਚੀਵਰਾਨਿ ਇਮੇਸਂ ਭਿਕ੍ਖੂਨ’’ਨ੍ਤਿ. ਅਥ ਖੋ ਸੋ ਪੂਗੋ ਛਬ੍ਬਗ੍ਗਿਯੇਹਿ ਭਿਕ੍ਖੂਹਿ ਨਿਪ੍ਪੀਲ਼ਿਯਮਾਨੋ ਯਥਾਪਟਿਯਤ੍ਤਂ ਚੀਵਰਂ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਦਤ੍ਵਾ ਸਙ੍ਘਂ ਭਤ੍ਤੇਨ ਪਰਿਵਿਸਿ. ਯੇ ਤੇ ਭਿਕ੍ਖੂ ਜਾਨਨ੍ਤਿ ਸਙ੍ਘਸ੍ਸ ਸਚੀਵਰਭਤ੍ਤਂ ਪਟਿਯਤ੍ਤਂ ‘‘ਨ ਚ ਜਾਨਨ੍ਤਿ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਦਿਨ੍ਨ’’ਨ੍ਤਿ ਤੇ ਏਵਮਾਹਂਸੁ – ‘‘ਓਣੋਜੇਥਾਵੁਸੋ, ਸਙ੍ਘਸ੍ਸ ਚੀਵਰ’’ਨ੍ਤਿ. ‘‘ਨਤ੍ਥਿ, ਭਨ੍ਤੇ. ਯਥਾਪਟਿਯਤ੍ਤਂ ਚੀਵਰਂ ਅਯ੍ਯਾ ਛਬ੍ਬਗ੍ਗਿਯਾ ਅਯ੍ਯਾਨਂ ਛਬ੍ਬਗ੍ਗਿਯਾਨਂ ਪਰਿਣਾਮੇਸੁ’’ਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੪੯੦. ‘‘ਯੋ ਪਨ ਭਿਕ੍ਖੁ ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੪੯੧. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ, ਅਞ੍ਞੇ ਵਾ ਤਸ੍ਸ ਆਰੋਚੇਨ੍ਤਿ, ਸੋ ਵਾ ਆਰੋਚੇਤਿ.

ਸਙ੍ਘਿਕਂ ਨਾਮ ਸਙ੍ਘਸ੍ਸ ਦਿਨ੍ਨਂ ਹੋਤਿ ਪਰਿਚ੍ਚਤ੍ਤਂ.

ਲਾਭੋ ਨਾਮ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾ, ਅਨ੍ਤਮਸੋ ਚੁਣ੍ਣਪਿਣ੍ਡੋਪਿ, ਦਨ੍ਤਕਟ੍ਠਮ੍ਪਿ, ਦਸਿਕਸੁਤ੍ਤਮ੍ਪਿ.

ਪਰਿਣਤਂ ਨਾਮ ‘‘ਦਸ੍ਸਾਮ ਕਰਿਸ੍ਸਾਮਾ’’ਤਿ ਵਾਚਾ ਭਿਨ੍ਨਾ ਹੋਤਿ, ਤਂ ਪੁਗ੍ਗਲਸ੍ਸ ਪਰਿਣਾਮੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੪੯੨. ਪਰਿਣਤੇ ਪਰਿਣਤਸਞ੍ਞੀ ਪੁਗ੍ਗਲਸ੍ਸ ਪਰਿਣਾਮੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਪਰਿਣਤੇ ਵੇਮਤਿਕੋ ਪੁਗ੍ਗਲਸ੍ਸ ਪਰਿਣਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਰਿਣਤੇ ਅਪਰਿਣਤਸਞ੍ਞੀ ਪੁਗ੍ਗਲਸ੍ਸ ਪਰਿਣਾਮੇਤਿ, ਅਨਾਪਤ੍ਤਿ. ਸਙ੍ਘਸ੍ਸ ਪਰਿਣਤਂ ਅਞ੍ਞਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਚੇਤਿਯਸ੍ਸ ਪਰਿਣਤਂ ਅਞ੍ਞਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪੁਗ੍ਗਲਸ੍ਸ ਪਰਿਣਤਂ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਣਤੇ ਪਰਿਣਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਣਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਣਤੇ ਅਪਰਿਣਤਸਞ੍ਞੀ, ਅਨਾਪਤ੍ਤਿ.

੪੯੩. ਅਨਾਪਤ੍ਤਿ – ‘‘ਕਤ੍ਥ ਦੇਮਾ’’ਤਿ ਪੁਚ੍ਛੀਯਮਾਨੋ – ‘‘ਯਤ੍ਥ ਤੁਮ੍ਹਾਕਂ ਦੇਯ੍ਯਧਮ੍ਮੋ ਪਰਿਭੋਗਂ ਵਾ ਲਭੇਯ੍ਯ ਪਟਿਸਙ੍ਖਾਰਂ ਵਾ ਲਭੇਯ੍ਯ ਚਿਰਟ੍ਠਿਤਿਕੋ ਵਾ ਅਸ੍ਸ ਯਤ੍ਥ ਵਾ ਪਨ ਤੁਮ੍ਹਾਕਂ ਚਿਤ੍ਤਂ ਪਸੀਦਤਿ ਤਤ੍ਥ ਦੇਥਾ’’ਤਿ ਭਣਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਪਰਿਣਾਮਨਸਿਕ੍ਖਾਪਦਂ ਨਿਟ੍ਠਿਤਂ ਦ੍ਵਾਦਸਮਂ.

ਸਹਧਮ੍ਮਿਕਵਗ੍ਗੋ ਅਟ੍ਠਮੋ.

ਤਸ੍ਸੁਦ੍ਦਾਨਂ –

ਸਹਧਮ੍ਮ-ਵਿਵਣ੍ਣਞ੍ਚ, ਮੋਹਾਪਨਂ ਪਹਾਰਕਂ;

ਤਲਸਤ੍ਤਿ ਅਮੂਲਞ੍ਚ, ਸਞ੍ਚਿਚ੍ਚ ਚ ਉਪਸ੍ਸੁਤਿ;

ਪਟਿਬਾਹਨਛਨ੍ਦਞ੍ਚ, ਦਬ੍ਬਞ੍ਚ ਪਰਿਣਾਮਨਨ੍ਤਿ.