੨੨੧. ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ

੩੫੮. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਯਾਨਿ ਤਾਨਿ ਭਗਵਤਾ ਅਨੁਞ੍ਞਾਤਾਨਿ ਤਿਚੀਵਰਨ੍ਤਿ ਵਾ ਵਸ੍ਸਿਕਸਾਟਿਕਾਤਿ ਵਾ ਨਿਸੀਦਨਨ੍ਤਿ ਵਾ ਪਚ੍ਚਤ੍ਥਰਣਨ੍ਤਿ ਵਾ ਕਣ੍ਡੁਪ੍ਪਟਿਚ੍ਛਾਦੀਤਿ ਵਾ ਮੁਖਪੁਞ੍ਛਨਚੋਲ਼ਨ੍ਤਿ ਵਾ ਪਰਿਕ੍ਖਾਰਚੋਲ਼ਨ੍ਤਿ ਵਾ, ਸਬ੍ਬਾਨਿ ਤਾਨਿ ਅਧਿਟ੍ਠਾਤਬ੍ਬਾਨਿ ਨੁ ਖੋ, ਉਦਾਹੁ, ਵਿਕਪ੍ਪੇਤਬ੍ਬਾਨੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁਂ; ਨਿਸੀਦਨਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਚ੍ਚਤ੍ਥਰਣਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਕਣ੍ਡੁਪ੍ਪਟਿਚ੍ਛਾਦਿਂ ਯਾਵਆਬਾਧਾ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁਂ; ਮੁਖਪੁਞ੍ਛਨਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ; ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਤ੍ਤਕਂ ਪਚ੍ਛਿਮਂ ਨੁ ਖੋ ਚੀਵਰਂ ਵਿਕਪ੍ਪੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਂ ਚੀਵਰਂ ਵਿਕਪ੍ਪੇਤੁਨ੍ਤਿ.

੩੫੯. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਂਸੁਕੂਲਕਤੋ ਗਰੁਕੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸੁਤ੍ਤਲੂਖਂ ਕਾਤੁਨ੍ਤਿ. ਵਿਕਣ੍ਣੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਕਣ੍ਣਂ ਉਦ੍ਧਰਿਤੁਨ੍ਤਿ. ਸੁਤ੍ਤਾ ਓਕਿਰਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨੁਵਾਤਂ ਪਰਿਭਣ੍ਡਂ ਆਰੋਪੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਸਙ੍ਘਾਟਿਯਾ ਪਤ੍ਤਾ ਲੁਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਪਦਕਂ ਕਾਤੁਨ੍ਤਿ.

੩੬੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਤਿਚੀਵਰੇ ਕਯਿਰਮਾਨੇ ਸਬ੍ਬਂ ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਛਿਨ੍ਨਕਾਨਿ ਏਕਂ ਅਚ੍ਛਿਨ੍ਨਕਨ੍ਤਿ.

ਦ੍ਵੇ ਛਿਨ੍ਨਕਾਨਿ ਏਕਂ ਅਚ੍ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਅਚ੍ਛਿਨ੍ਨਕਾਨਿ ਏਕਂ ਛਿਨ੍ਨਕਨ੍ਤਿ.

ਦ੍ਵੇ ਅਚ੍ਛਿਨ੍ਨਕਾਨਿ ਏਕਂ ਛਿਨ੍ਨਕਂ ਨਪ੍ਪਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨ੍ਵਾਧਿਕਮ੍ਪਿ ਆਰੋਪੇਤੁਂ, ਨ ਚ, ਭਿਕ੍ਖਵੇ, ਸਬ੍ਬਂ ਅਚ੍ਛਿਨ੍ਨਕਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੩੬੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਬਹੁਂ ਚੀਵਰਂ ਉਪ੍ਪਨ੍ਨਂ ਹੋਤਿ. ਸੋ ਚ ਤਂ ਚੀਵਰਂ ਮਾਤਾਪਿਤੂਨਂ ਦਾਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਮਾਤਾਪਿਤਰੋਤਿ [ਮਾਤਾਪਿਤੂਨਂ ਖੋ (ਸੀ.)] ਖੋ, ਭਿਕ੍ਖਵੇ, ਦਦਮਾਨੇ [ਵਦਮਾਨੋ (ਕ.), ਵਦਮਾਨੇ (?)] ਕਿਂ ਵਦੇਯ੍ਯਾਮ? ਅਨੁਜਾਨਾਮਿ, ਭਿਕ੍ਖਵੇ, ਮਾਤਾਪਿਤੂਨਂ ਦਾਤੁਂ. ਨ ਚ, ਭਿਕ੍ਖਵੇ, ਸਦ੍ਧਾਦੇਯ੍ਯਂ ਵਿਨਿਪਾਤੇਤਬ੍ਬਂ. ਯੋ ਵਿਨਿਪਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

੩੬੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਨ੍ਧਵਨੇ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿ. ਚੋਰਾ ਤਂ ਚੀਵਰਂ ਅਵਹਰਿਂਸੁ. ਸੋ ਭਿਕ੍ਖੁ ਦੁਚ੍ਚੋਲ਼ੋ ਹੋਤਿ ਲੂਖਚੀਵਰੋ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤ੍ਵਂ, ਆਵੁਸੋ, ਦੁਚ੍ਚੋਲ਼ੋ ਲੂਖਚੀਵਰੋਸੀ’’ਤਿ? ‘‘ਇਧਾਹਂ [ਸੋ ਅਹਂ (ਕਤ੍ਥਚਿ)], ਆਵੁਸੋ, ਅਨ੍ਧਵਨੇ ਚੀਵਰਂ ਨਿਕ੍ਖਿਪਿਤ੍ਵਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿਂ. ਚੋਰਾ ਤਂ ਚੀਵਰਂ ਅਵਹਰਿਂਸੁ. ਤੇਨਾਹਂ ਦੁਚ੍ਚੋਲ਼ੋ ਲੂਖਚੀਵਰੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ. ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਆਨਨ੍ਦੋ ਅਸ੍ਸਤਿਯਾ ਸਨ੍ਤਰੁਤ੍ਤਰੇਨ ਗਾਮਂ ਪਿਣ੍ਡਾਯ ਪਾਵਿਸਿ. ਭਿਕ੍ਖੂ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚੁਂ – ‘‘ਨਨੁ, ਆਵੁਸੋ ਆਨਨ੍ਦ, ਭਗਵਤਾ ਪਞ੍ਞਤ੍ਤਂ – ‘ਨ ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ’ਤਿ? ਕਿਸ੍ਸ ਤ੍ਵਂ, ਆਵੁਸੋ ਆਨਨ੍ਦ, ਸਨ੍ਤਰੁਤ੍ਤਰੇਨ ਗਾਮਂ ਪਵਿਟ੍ਠੋ’’ਤਿ? ‘‘ਸਚ੍ਚਂ, ਆਵੁਸੋ, ਭਗਵਤਾ ਪਞ੍ਞਤ੍ਤਂ – ‘ਨ ਸਨ੍ਤਰੁਤ੍ਤਰੇਨ ਗਾਮੋ ਪਵਿਸਿਤਬ੍ਬੋ’ਤਿ. ਅਪਿ ਚਾਹਂ ਅਸ੍ਸਤਿਯਾ ਪਵਿਟ੍ਠੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਸਙ੍ਘਾਟਿਯਾ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਵਸ੍ਸਿਕਸਙ੍ਕੇਤਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਅਤ੍ਥਤਕਥਿਨਂ ਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਸਙ੍ਘਾਟਿਯਾ ਨਿਕ੍ਖੇਪਾਯ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਉਤ੍ਤਰਾਸਙ੍ਗਸ੍ਸ ਨਿਕ੍ਖੇਪਾਯ…ਪੇ… ਅਨ੍ਤਰਵਾਸਕਸ੍ਸ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਵਸ੍ਸਿਕਸਙ੍ਕੇਤਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਅਤ੍ਥਤਕਥਿਨਂ ਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਉਤ੍ਤਰਾਸਙ੍ਗਸ੍ਸ ਅਨ੍ਤਰਵਾਸਕਸ੍ਸ ਨਿਕ੍ਖੇਪਾਯ.

ਪਞ੍ਚਿਮੇ, ਭਿਕ੍ਖਵੇ, ਪਚ੍ਚਯਾ ਵਸ੍ਸਿਕਸਾਟਿਕਾਯ ਨਿਕ੍ਖੇਪਾਯ – ਗਿਲਾਨੋ ਵਾ ਹੋਤਿ, ਨਿਸ੍ਸੀਮਂ ਗਨ੍ਤੁਂ ਵਾ ਹੋਤਿ, ਨਦੀਪਾਰਂ ਗਨ੍ਤੁਂ ਵਾ ਹੋਤਿ, ਅਗ੍ਗਲ਼ਗੁਤ੍ਤਿਵਿਹਾਰੋ ਵਾ ਹੋਤਿ, ਵਸ੍ਸਿਕਸਾਟਿਕਾ ਅਕਤਾ ਵਾ ਹੋਤਿ ਵਿਪ੍ਪਕਤਾ ਵਾ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਪਚ੍ਚਯਾ ਵਸ੍ਸਿਕਸਾਟਿਕਾਯ ਨਿਕ੍ਖੇਪਾਯਾਤਿ.

ਪਚ੍ਛਿਮਵਿਕਪ੍ਪਨੁਪਗਚੀਵਰਾਦਿਕਥਾ ਨਿਟ੍ਠਿਤਾ.