੨੨੨. ਸਙ੍ਘਿਕਚੀਵਰੁਪ੍ਪਾਦਕਥਾ

੩੬੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਏਕੋ ਵਸ੍ਸਂ ਵਸਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਅਹਞ੍ਚਮ੍ਹਿ ਏਕਕੋ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਯਂਨੂਨਾਹਂ ਇਮਾਨਿ ਸਙ੍ਘਿਕਾਨਿ ਚੀਵਰਾਨਿ ਸਾਵਤ੍ਥਿਂ ਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਤਾਨਿ ਚੀਵਰਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੁਯ੍ਹੇਵ, ਭਿਕ੍ਖੁ, ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਏਕੋ ਵਸ੍ਸਂ ਵਸਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਤੁਕਾਲਂ ਏਕੋ ਵਸਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਅਹਞ੍ਚਮ੍ਹਿ ਏਕਕੋ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਅਦਂਸੁ. ਯਂਨੂਨਾਹਂ ਇਮਾਨਿ ਸਙ੍ਘਿਕਾਨਿ ਚੀਵਰਾਨਿ ਸਾਵਤ੍ਥਿਂ ਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਤਾਨਿ ਚੀਵਰਾਨਿ ਆਦਾਯ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਂ. ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਉਤੁਕਾਲਂ ਏਕੋ ਵਸਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤੇਨ ਭਿਕ੍ਖੁਨਾ ਤਾਨਿ ਚੀਵਰਾਨਿ ਅਧਿਟ੍ਠਾਤੁਂ – ‘‘ਮਯ੍ਹਿਮਾਨਿ ਚੀਵਰਾਨੀ’’ਤਿ. ਤਸ੍ਸ ਚੇ, ਭਿਕ੍ਖਵੇ, ਭਿਕ੍ਖੁਨੋ ਤਂ ਚੀਵਰਂ ਅਨਧਿਟ੍ਠਿਤੇ ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਸਮਕੋ ਦਾਤਬ੍ਬੋ ਭਾਗੋ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਤਂ ਚੀਵਰਂ ਭਾਜਿਯਮਾਨੇ, ਅਪਾਤਿਤੇ ਕੁਸੇ, ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਸਮਕੋ ਦਾਤਬ੍ਬੋ ਭਾਗੋ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਤਂ ਚੀਵਰਂ ਭਾਜਿਯਮਾਨੇ, ਪਾਤਿਤੇ ਕੁਸੇ, ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਨਾਕਾਮਾ ਦਾਤਬ੍ਬੋ ਭਾਗੋਤਿ.

ਤੇਨ ਖੋ ਪਨ ਸਮਯੇਨ ਦ੍ਵੇ ਭਾਤਿਕਾ ਥੇਰਾ, ਆਯਸ੍ਮਾ ਚ ਇਸਿਦਾਸੋ ਆਯਸ੍ਮਾ ਚ ਇਸਿਭਟੋ, ਸਾਵਤ੍ਥਿਯਂ ਵਸ੍ਸਂਵੁਟ੍ਠਾ ਅਞ੍ਞਤਰਂ ਗਾਮਕਾਵਾਸਂ ਅਗਮਂਸੁ. ਮਨੁਸ੍ਸਾ ਚਿਰਸ੍ਸਾਪਿ ਥੇਰਾ ਆਗਤਾਤਿ ਸਚੀਵਰਾਨਿ ਭਤ੍ਤਾਨਿ ਅਦਂਸੁ. ਆਵਾਸਿਕਾ ਭਿਕ੍ਖੂ ਥੇਰੇ ਪੁਚ੍ਛਿਂਸੁ – ‘‘ਇਮਾਨਿ, ਭਨ੍ਤੇ, ਸਙ੍ਘਿਕਾਨਿ ਚੀਵਰਾਨਿ ਥੇਰੇ ਆਗਮ੍ਮ ਉਪ੍ਪਨ੍ਨਾਨਿ, ਸਾਦਿਯਿਸ੍ਸਨ੍ਤਿ ਥੇਰਾ ਭਾਗ’’ਨ੍ਤਿ. ਥੇਰਾ ਏਵਮਾਹਂਸੁ – ‘‘ਯਥਾ ਖੋ ਮਯਂ, ਆਵੁਸੋ, ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮ, ਤੁਮ੍ਹਾਕਂਯੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ.

ਤੇਨ ਖੋ ਪਨ ਸਮਯੇਨ ਤਯੋ ਭਿਕ੍ਖੂ ਰਾਜਗਹੇ ਵਸ੍ਸਂ ਵਸਨ੍ਤਿ. ਤਤ੍ਥ ਮਨੁਸ੍ਸਾ ਸਙ੍ਘਸ੍ਸ

ਦੇਮਾਤਿ ਚੀਵਰਾਨਿ ਦੇਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਚਤੁਵਗ੍ਗੋ ਪਚ੍ਛਿਮੋ ਸਙ੍ਘੋ’ਤਿ. ਮਯਞ੍ਚਮ੍ਹਾ ਤਯੋ ਜਨਾ. ਇਮੇ ਚ ਮਨੁਸ੍ਸਾ ਸਙ੍ਘਸ੍ਸ ਦੇਮਾਤਿ ਚੀਵਰਾਨਿ ਦੇਨ੍ਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਥੇਰਾ, ਆਯਸ੍ਮਾ ਚ ਨਿਲਵਾਸੀ ਆਯਸ੍ਮਾ ਚ ਸਾਣਵਾਸੀ ਆਯਸ੍ਮਾ ਚ ਗੋਤਕੋ ਆਯਸ੍ਮਾ ਚ ਭਗੁ ਆਯਸ੍ਮਾ ਚ ਫਲ਼ਿਕਸਨ੍ਤਾਨੋ, ਪਾਟਲਿਪੁਤ੍ਤੇ ਵਿਹਰਨ੍ਤਿ ਕੁਕ੍ਕੁਟਾਰਾਮੇ. ਅਥ ਖੋ ਤੇ ਭਿਕ੍ਖੂ ਪਾਟਲਿਪੁਤ੍ਤਂ ਗਨ੍ਤ੍ਵਾ ਥੇਰੇ ਪੁਚ੍ਛਿਂਸੁ. ਥੇਰਾ ਏਵਮਾਹਂਸੁ – ‘‘ਯਥਾ ਖੋ ਮਯਂ ਆਵੁਸੋ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮ, ਤੁਮ੍ਹਾਕਂਯੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾਯਾ’’ਤਿ.

ਸਙ੍ਘਿਕਚੀਵਰੁਪ੍ਪਾਦਕਥਾ ਨਿਟ੍ਠਿਤਾ.