੮. ਚੀਵਰਕ੍ਖਨ੍ਧਕੋ
੨੦੨. ਜੀਵਕਵਤ੍ਥੁ
੩੨੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਵੇਸਾਲੀ ਇਦ੍ਧਾ ਚੇਵ ਹੋਤਿ ਫਿਤਾ [ਫੀਤਾ (ਬਹੂਸੁ)] ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ ਸਤ੍ਤ ਚ ਪਾਸਾਦਸਤਾਨਿ ਸਤ੍ਤ ਚ ਪਾਸਾਦਾ; ਸਤ੍ਤ ਚ ਕੂਟਾਗਾਰਸਹਸ੍ਸਾਨਿ ਸਤ੍ਤ ਚ ਕੂਟਾਗਾਰਸਤਾਨਿ ਸਤ੍ਤ ਚ ਕੂਟਾਗਾਰਾਨਿ; ਸਤ੍ਤ ਚ ਆਰਾਮਸਹਸ੍ਸਾਨਿ ਸਤ੍ਤ ਚ ਆਰਾਮਸਤਾਨਿ ਸਤ੍ਤ ਚ ਆਰਾਮਾ; ਸਤ੍ਤ ਚ ਪੋਕ੍ਖਰਣੀਸਹਸ੍ਸਾਨਿ ਸਤ੍ਤ ਚ ਪੋਕ੍ਖਰਣੀਸਤਾਨਿ ਸਤ੍ਤ ਚ ਪੋਕ੍ਖਰਣਿਯੋ; ਅਮ੍ਬਪਾਲੀ ਚ ਗਣਿਕਾ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ, ਪਦਕ੍ਖਿਣਾ [ਪਦਕ੍ਖਾ (ਸ੍ਯਾ.)] ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਾ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਞ੍ਞਾਸਾਯ ਚ ਰਤ੍ਤਿਂ ਗਚ੍ਛਤਿ; ਤਾਯ ਚ ਵੇਸਾਲੀ ਭਿਯ੍ਯੋਸੋਮਤ੍ਤਾਯ ਉਪਸੋਭਤਿ. ਅਥ ਖੋ ਰਾਜਗਹਕੋ ਨੇਗਮੋ ਵੇਸਾਲਿਂ ਅਗਮਾਸਿ ਕੇਨਚਿਦੇਵ ਕਰਣੀਯੇਨ. ਅਦ੍ਦਸਾ ਖੋ ਰਾਜਗਹਕੋ ਨੇਗਮੋ ਵੇਸਾਲਿਂ ਇਦ੍ਧਞ੍ਚੇਵ ਫਿਤਞ੍ਚ ਬਹੁਜਨਞ੍ਚ ਆਕਿਣ੍ਣਮਨੁਸ੍ਸਞ੍ਚ ਸੁਭਿਕ੍ਖਞ੍ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ ਸਤ੍ਤ ਚ ਪਾਸਾਦਸਤਾਨਿ ਸਤ੍ਤ ਚ ਪਾਸਾਦੇ; ਸਤ੍ਤ ਚ ਕੂਟਾਗਾਰਸਹਸ੍ਸਾਨਿ ਸਤ੍ਤ ਚ ਕੂਟਾਗਾਰਸਤਾਨਿ ਸਤ੍ਤ ਚ ਕੂਟਾਗਾਰਾਨਿ; ਸਤ੍ਤ ਚ ਆਰਾਮਸਹਸ੍ਸਾਨਿ ਸਤ੍ਤ ਚ ਆਰਾਮਸਤਾਨਿ ਸਤ੍ਤ ਚ ਆਰਾਮੇ; ਸਤ੍ਤ ਚ ਪੋਕ੍ਖਰਣੀਸਹਸ੍ਸਾਨਿ ਸਤ੍ਤ ਚ ਪੋਕ੍ਖਰਣੀਸਤਾਨਿ ਸਤ੍ਤ ਚ ਪੋਕ੍ਖਰਣਿਯੋ; ਅਮ੍ਬਪਾਲਿਞ੍ਚ ਗਣਿਕਂ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਂ, ਪਦਕ੍ਖਿਣਂ [ਪਦਕ੍ਖਂ (ਸ੍ਯਾ.)] ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਂ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਞ੍ਞਾਸਾਯ ਚ ਰਤ੍ਤਿਂ ਗਚ੍ਛਨ੍ਤਿਂ, ਤਾਯ ਚ ਵੇਸਾਲਿਂ ਭਿਯ੍ਯੋਸੋਮਤ੍ਤਾਯ ਉਪਸੋਭਨ੍ਤਿਂ.
੩੨੭. ਅਥ ਖੋ ਰਾਜਗਹਕੋ ਨੇਗਮੋ ਵੇਸਾਲਿਯਂ ਤਂ ਕਰਣੀਯਂ ਤੀਰੇਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਵੇਸਾਲੀ, ਦੇਵ, ਇਦ੍ਧਾ ਚੇਵ ਫਿਤਾ ਚ ਬਹੁਜਨਾ ਚ ਆਕਿਣ੍ਣਮਨੁਸ੍ਸਾ ਚ ਸੁਭਿਕ੍ਖਾ ਚ; ਸਤ੍ਤ ਚ ਪਾਸਾਦਸਹਸ੍ਸਾਨਿ…ਪੇ… ਤਾਯ ਚ ਵੇਸਾਲੀ ਭਿਯ੍ਯੋਸੋਮਤ੍ਤਾਯ ਉਪਸੋਭਤਿ. ਸਾਧੁ, ਦੇਵ, ਮਯਮ੍ਪਿ ਗਣਿਕਂ ਵੁਟ੍ਠਾਪੇਸ੍ਸਾਮਾ’’ਤਿ [ਵੁਟ੍ਠਾਪੇਯ੍ਯਾਮ (ਕ.)]. ‘‘ਤੇਨ ਹਿ, ਭਣੇ, ਤਾਦਿਸਿਂ ਕੁਮਾਰਿਂ ਜਾਨਾਥ ਯਂ ਤੁਮ੍ਹੇ ਗਣਿਕਂ ਵੁਟ੍ਠਾਪੇਯ੍ਯਾਥਾ’’ਤਿ. ਤੇਨ ਖੋ ਪਨ ਸਮਯੇਨ ਰਾਜਗਹੇ ਸਾਲਵਤੀ ਨਾਮ ਕੁਮਾਰੀ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ. ਅਥ ਖੋ ਰਾਜਗਹਕੋ ਨੇਗਮੋ ਸਾਲਵਤਿਂ ਕੁਮਾਰਿਂ ਗਣਿਕਂ ਵੁਟ੍ਠਾਪੇਸਿ. ਅਥ ਖੋ ਸਾਲਵਤੀ ਗਣਿਕਾ ਨਚਿਰਸ੍ਸੇਵ ਪਦਕ੍ਖਿਣਾ ਅਹੋਸਿ ਨਚ੍ਚੇ ਚ ਗੀਤੇ ਚ ਵਾਦਿਤੇ ਚ, ਅਭਿਸਟਾ ਅਤ੍ਥਿਕਾਨਂ ਅਤ੍ਥਿਕਾਨਂ ਮਨੁਸ੍ਸਾਨਂ ਪਟਿਸਤੇਨ ਚ ਰਤ੍ਤਿਂ ਗਚ੍ਛਤਿ. ਅਥ ਖੋ ਸਾਲਵਤੀ ਗਣਿਕਾ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਅਥ ਖੋ ਸਾਲਵਤਿਯਾ ਗਣਿਕਾਯ ਏਤਦਹੋਸਿ – ‘‘ਇਤ੍ਥੀ ਖੋ ਗਬ੍ਭਿਨੀ ਪੁਰਿਸਾਨਂ ਅਮਨਾਪਾ. ਸਚੇ ਮਂ ਕੋਚਿ ਜਾਨਿਸ੍ਸਤਿ ਸਾਲਵਤੀ ਗਣਿਕਾ ਗਬ੍ਭਿਨੀਤਿ, ਸਬ੍ਬੋ ਮੇ ਸਕ੍ਕਾਰੋ ਭਞ੍ਜਿਸ੍ਸਤਿ [ਪਰਿਹਾਯਿਸ੍ਸਤਿ (ਸੀ. ਸ੍ਯਾ.)]. ਯਂਨੂਨਾਹਂ ਗਿਲਾਨਂ ਪਟਿਵੇਦੇਯ੍ਯ’’ਨ੍ਤਿ. ਅਥ ਖੋ ਸਾਲਵਤੀ ਗਣਿਕਾ ਦੋਵਾਰਿਕਂ ਆਣਾਪੇਸਿ – ‘‘ਮਾ, ਭਣੇ ਦੋਵਾਰਿਕ, ਕੋਚਿ ਪੁਰਿਸੋ ਪਾਵਿਸਿ. ਯੋ ਚ ਮਂ ਪੁਚ੍ਛਤਿ, ‘ਗਿਲਾਨਾ’ਤਿ ਪਟਿਵੇਦੇਹੀ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸੋ ਦੋਵਾਰਿਕੋ ਸਾਲਵਤਿਯਾ ਗਣਿਕਾਯ ਪਚ੍ਚਸ੍ਸੋਸਿ. ਅਥ ਖੋ ਸਾਲਵਤੀ ਗਣਿਕਾ ਤਸ੍ਸ ਗਬ੍ਭਸ੍ਸ ਪਰਿਪਾਕਮਨ੍ਵਾਯ ਪੁਤ੍ਤਂ ਵਿਜਾਯਿ. ਅਥ ਖੋ ਸਾਲਵਤੀ ਗਣਿਕਾ ਦਾਸਿਂ ਆਣਾਪੇਸਿ – ‘‘ਹਨ੍ਦ, ਜੇ, ਇਮਂ ਦਾਰਕਂ ਕਤ੍ਤਰਸੁਪ੍ਪੇ ਪਕ੍ਖਿਪਿਤ੍ਵਾ ਨੀਹਰਿਤ੍ਵਾ ਸਙ੍ਕਾਰਕੂਟੇ ਛਡ੍ਡੇਹੀ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸਾ ਦਾਸੀ ਸਾਲਵਤਿਯਾ ਗਣਿਕਾਯ ਪਟਿਸ੍ਸੁਤ੍ਵਾ ਤਂ ਦਾਰਕਂ ਕਤ੍ਤਰਸੁਪ੍ਪੇ ਪਕ੍ਖਿਪਿਤ੍ਵਾ ਨੀਹਰਿਤ੍ਵਾ ਸਙ੍ਕਾਰਕੂਟੇ ਛਡ੍ਡੇਸਿ.
੩੨੮. ਤੇਨ ਖੋ ਪਨ ਸਮਯੇਨ ਅਭਯੋ ਨਾਮ ਰਾਜਕੁਮਾਰੋ ਕਾਲਸ੍ਸੇਵ ਰਾਜੁਪਟ੍ਠਾਨਂ ਗਚ੍ਛਨ੍ਤੋ ਅਦ੍ਦਸ ਤਂ ਦਾਰਕਂ ਕਾਕੇਹਿ ਸਮ੍ਪਰਿਕਿਣ੍ਣਂ, ਦਿਸ੍ਵਾਨ ਮਨੁਸ੍ਸੇ ਪੁਚ੍ਛਿ – ‘‘ਕਿਂ ਏਤਂ, ਭਣੇ, ਕਾਕੇਹਿ ਸਮ੍ਪਰਿਕਿਣ੍ਣ’’ਨ੍ਤਿ? ‘‘ਦਾਰਕੋ, ਦੇਵਾ’’ਤਿ. ‘‘ਜੀਵਤਿ, ਭਣੇ’’ਤਿ? ‘‘ਜੀਵਤਿ, ਦੇਵਾ’’ਤਿ. ‘‘ਤੇਨ ਹਿ, ਭਣੇ, ਤਂ ਦਾਰਕਂ ਅਮ੍ਹਾਕਂ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਦੇਥ ਪੋਸੇਤੁ’’ਨ੍ਤਿ. ‘‘ਏਵਂ, ਦੇਵਾ’’ਤਿ ਖੋ ਤੇ ਮਨੁਸ੍ਸਾ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਤਂ ਦਾਰਕਂ ਅਭਯਸ੍ਸ ਰਾਜਕੁਮਾਰਸ੍ਸ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਅਦਂਸੁ – ‘‘ਪੋਸੇਥਾ’’ਤਿ. ਤਸ੍ਸ ਜੀਵਤੀਤਿ ‘ਜੀਵਕੋ’ਤਿ ਨਾਮਂ ਅਕਂਸੁ. ਕੁਮਾਰੇਨ ਪੋਸਾਪਿਤੋਤਿ ‘ਕੋਮਾਰਭਚ੍ਚੋ’ਤਿ ਨਾਮਂ ਅਕਂਸੁ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਨਚਿਰਸ੍ਸੇਵ ਵਿਞ੍ਞੁਤਂ ਪਾਪੁਣਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਅਭਯੋ ਰਾਜਕੁਮਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਕਾ ਮੇ, ਦੇਵ, ਮਾਤਾ, ਕੋ ਪਿਤਾ’’ਤਿ? ‘‘ਅਹਮ੍ਪਿ ਖੋ ਤੇ, ਭਣੇ ਜੀਵਕ, ਮਾਤਰਂ ਨ ਜਾਨਾਮਿ; ਅਪਿ ਚਾਹਂ ਤੇ ਪਿਤਾ; ਮਯਾਸਿ [ਮਯਾਪਿ (ਕ.)] ਪੋਸਾਪਿਤੋ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਾਨਿ ਖੋ ਰਾਜਕੁਲਾਨਿ ਨ ਸੁਕਰਾਨਿ ਅਸਿਪ੍ਪੇਨ ਉਪਜੀਵਿਤੁਂ. ਯਂਨੂਨਾਹਂ ਸਿਪ੍ਪਂ ਸਿਕ੍ਖੇਯ੍ਯ’’ਨ੍ਤਿ.
੩੨੯. ਤੇਨ ਖੋ ਪਨ ਸਮਯੇਨ ਤਕ੍ਕਸਿਲਾਯਂ [ਤਕ੍ਕਸੀਲਾਯਂ (ਕ.)] ਦਿਸਾਪਾਮੋਕ੍ਖੋ ਵੇਜ੍ਜੋ ਪਟਿਵਸਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਂ ਰਾਜਕੁਮਾਰਂ ਅਨਾਪੁਚ੍ਛਾ ਯੇਨ ਤਕ੍ਕਸਿਲਾ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਤਕ੍ਕਸਿਲਾ, ਯੇਨ ਵੇਜ੍ਜੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਇਚ੍ਛਾਮਹਂ, ਆਚਰਿਯ, ਸਿਪ੍ਪਂ ਸਿਕ੍ਖਿਤੁ’’ਨ੍ਤਿ. ‘‘ਤੇਨ ਹਿ, ਭਣੇ ਜੀਵਕ, ਸਿਕ੍ਖਸ੍ਸੂ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਬਹੁਞ੍ਚ ਗਣ੍ਹਾਤਿ ਲਹੁਞ੍ਚ ਗਣ੍ਹਾਤਿ ਸੁਟ੍ਠੁ ਚ ਉਪਧਾਰੇਤਿ, ਗਹਿਤਞ੍ਚਸ੍ਸ ਨ ਸਮ੍ਮੁਸ੍ਸਤਿ [ਨ ਪਮੁਸ੍ਸਤਿ (ਸੀ. ਸ੍ਯਾ.)]. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਤ੍ਤਨ੍ਨਂ ਵਸ੍ਸਾਨਂ ਅਚ੍ਚਯੇਨ ਏਤਦਹੋਸਿ – ‘‘ਅਹਂ, ਖੋ ਬਹੁਞ੍ਚ ਗਣ੍ਹਾਮਿ ਲਹੁਞ੍ਚ ਗਣ੍ਹਾਮਿ ਸੁਟ੍ਠੁ ਚ ਉਪਧਾਰੇਮਿ, ਗਹਿਤਞ੍ਚ ਮੇ ਨ ਸਮ੍ਮੁਸ੍ਸਤਿ, ਸਤ੍ਤ ਚ ਮੇ ਵਸ੍ਸਾਨਿ ਅਧੀਯਨ੍ਤਸ੍ਸ, ਨਯਿਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਤਿ. ਕਦਾ ਇਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਿਸ੍ਸਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੋ ਵੇਜ੍ਜੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਅਹਂ ਖੋ, ਆਚਰਿਯ, ਬਹੁਞ੍ਚ ਗਣ੍ਹਾਮਿ ਲਹੁਞ੍ਚ ਗਣ੍ਹਾਮਿ ਸੁਟ੍ਠੁ ਚ ਉਪਧਾਰੇਮਿ, ਗਹਿਤਞ੍ਚ ਮੇ ਨ ਸਮ੍ਮੁਸ੍ਸਤਿ, ਸਤ੍ਤ ਚ ਮੇ ਵਸ੍ਸਾਨਿ ਅਧੀਯਨ੍ਤਸ੍ਸ, ਨਯਿਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਤਿ. ਕਦਾ ਇਮਸ੍ਸ ਸਿਪ੍ਪਸ੍ਸ ਅਨ੍ਤੋ ਪਞ੍ਞਾਯਿਸ੍ਸਤੀ’’ਤਿ? ‘‘ਤੇਨ ਹਿ, ਭਣੇ ਜੀਵਕ, ਖਣਿਤ੍ਤਿਂ ਆਦਾਯ ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ ਆਹਿਣ੍ਡਿਤ੍ਵਾ ਯਂ ਕਿਞ੍ਚਿ ਅਭੇਸਜ੍ਜਂ ਪਸ੍ਸੇਯ੍ਯਾਸਿ ਤਂ ਆਹਰਾ’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਤਸ੍ਸ ਵੇਜ੍ਜਸ੍ਸ ਪਟਿਸ੍ਸੁਤ੍ਵਾ ਖਣਿਤ੍ਤਿਂ ਆਦਾਯ ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ ਆਹਿਣ੍ਡਨ੍ਤੋ ਨ ਕਿਞ੍ਚਿ ਅਭੇਸਜ੍ਜਂ ਅਦ੍ਦਸ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੋ ਵੇਜ੍ਜੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵੇਜ੍ਜਂ ਏਤਦਵੋਚ – ‘‘ਆਹਿਣ੍ਡਨ੍ਤੋਮ੍ਹਿ, ਆਚਰਿਯ, ਤਕ੍ਕਸਿਲਾਯ ਸਮਨ੍ਤਾ ਯੋਜਨਂ, ਨ ਕਿਞ੍ਚਿ [ਆਹਿਣ੍ਟਨ੍ਤੋ ਨ ਕਿਞ੍ਚਿ (ਕ.)] ਅਭੇਸਜ੍ਜਂ ਅਦ੍ਦਸ’’ਨ੍ਤਿ. ‘‘ਸੁਸਿਕ੍ਖਿਤੋਸਿ, ਭਣੇ ਜੀਵਕ. ਅਲਂ ਤੇ ਏਤ੍ਤਕਂ ਜੀਵਿਕਾਯਾ’’ਤਿ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਰਿਤ੍ਤਂ ਪਾਥੇਯ੍ਯਂ ਪਾਦਾਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪਰਿਤ੍ਤਂ ਪਾਥੇਯ੍ਯਂ ਆਦਾਯ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਤਂ ਪਰਿਤ੍ਤਂ ਪਾਥੇਯ੍ਯਂ ਅਨ੍ਤਰਾਮਗ੍ਗੇ ਸਾਕੇਤੇ ਪਰਿਕ੍ਖਯਂ ਅਗਮਾਸਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮੇ ਖੋ ਮਗ੍ਗਾ ਕਨ੍ਤਾਰਾ ਅਪ੍ਪੋਦਕਾ ਅਪ੍ਪਭਕ੍ਖਾ, ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ. ਯਂਨੂਨਾਹਂ ਪਾਥੇਯ੍ਯਂ ਪਰਿਯੇਸੇਯ੍ਯ’’ਨ੍ਤਿ.
ਜੀਵਕਵਤ੍ਥੁ ਨਿਟ੍ਠਿਤਂ.
੨੦੩. ਸੇਟ੍ਠਿਭਰਿਯਾਵਤ੍ਥੁ
੩੩੦. ਤੇਨ ਖੋ ਪਨ ਸਮਯੇਨ ਸਾਕੇਤੇ ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕੋ ਸੀਸਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸਾਕੇਤਂ ਪਵਿਸਿਤ੍ਵਾ ਮਨੁਸ੍ਸੇ ਪੁਚ੍ਛਿ – ‘‘ਕੋ, ਭਣੇ, ਗਿਲਾਨੋ, ਕਂ ਤਿਕਿਚ੍ਛਾਮੀ’’ਤਿ? ‘‘ਏਤਿਸ੍ਸਾ, ਆਚਰਿਯ, ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕੋ ਸੀਸਾਬਾਧੋ; ਗਚ੍ਛ, ਆਚਰਿਯ, ਸੇਟ੍ਠਿਭਰਿਯਂ ਤਿਕਿਚ੍ਛਾਹੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੇਟ੍ਠਿਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਦੋਵਾਰਿਕਂ ਆਣਾਪੇਸਿ – ‘‘ਗਚ੍ਛ, ਭਣੇ ਦੋਵਾਰਿਕ, ਸੇਟ੍ਠਿਭਰਿਯਾਯ ਪਾਵਦ – ‘ਵੇਜ੍ਜੋ, ਅਯ੍ਯੇ, ਆਗਤੋ, ਸੋ ਤਂ ਦਟ੍ਠੁਕਾਮੋ’’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਸੋ ਦੋਵਾਰਿਕੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਵੇਜ੍ਜੋ, ਅਯ੍ਯੇ, ਆਗਤੋ; ਸੋ ਤਂ ਦਟ੍ਠੁਕਾਮੋ’’ਤਿ. ‘‘ਕੀਦਿਸੋ, ਭਣੇ ਦੋਵਾਰਿਕ, ਵੇਜ੍ਜੋ’’ਤਿ? ‘‘ਦਹਰਕੋ, ਅਯ੍ਯੇ’’ਤਿ. ‘‘ਅਲਂ, ਭਣੇ ਦੋਵਾਰਿਕ, ਕਿਂ ਮੇ ਦਹਰਕੋ ਵੇਜ੍ਜੋ ਕਰਿਸ੍ਸਤਿ? ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੂ’’ਤਿ. ਅਥ ਖੋ ਸੋ ਦੋਵਾਰਿਕੋ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸੇਟ੍ਠਿਭਰਿਯਾ, ਆਚਰਿਯ, ਏਵਮਾਹ – ‘ਅਲਂ, ਭਣੇ ਦੋਵਾਰਿਕ, ਕਿਂ ਮੇ ਦਹਰਕੋ ਵੇਜ੍ਜੋ ਕਰਿਸ੍ਸਤਿ? ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੂ’’’ਤਿ. ‘‘ਗਚ੍ਛ, ਭਣੇ ਦੋਵਾਰਿਕ, ਸੇਟ੍ਠਿਭਰਿਯਾਯ ਪਾਵਦ – ‘ਵੇਜ੍ਜੋ, ਅਯ੍ਯੇ, ਏਵਮਾਹ – ਮਾ ਕਿਰ, ਅਯ੍ਯੇ, ਪੁਰੇ ਕਿਞ੍ਚਿ ਅਦਾਸਿ. ਯਦਾ ਅਰੋਗਾ ਅਹੋਸਿ ਤਦਾ ਯਂ ਇਚ੍ਛੇਯ੍ਯਾਸਿ ਤਂ ਦਜ੍ਜੇਯ੍ਯਾਸੀ’’’ਤਿ. ‘‘ਏਵਂ, ਆਚਰਿਯਾ’’ਤਿ ਖੋ ਸੋ ਦੋਵਾਰਿਕੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਵੇਜ੍ਜੋ, ਅਯ੍ਯੇ, ਏਵਮਾਹ – ‘ਮਾ ਕਿਰ, ਅਯ੍ਯੇ, ਪੁਰੇ ਕਿਞ੍ਚਿ ਅਦਾਸਿ. ਯਦਾ ਅਰੋਗਾ ਅਹੋਸਿ ਤਦਾ ਯਂ ਇਚ੍ਛੇਯ੍ਯਾਸਿ ਤਂ ਦਜ੍ਜੇਯ੍ਯਾਸੀ’’’ਤਿ. ‘‘ਤੇਨ ਹਿ, ਭਣੇ ਦੋਵਾਰਿਕ, ਵੇਜ੍ਜੋ ਆਗਚ੍ਛਤੂ’’ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸੋ ਦੋਵਾਰਿਕੋ ਸੇਟ੍ਠਿਭਰਿਯਾਯ ਪਟਿਸ੍ਸੁਤ੍ਵਾ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸੇਟ੍ਠਿਭਰਿਯਾ ਤਂ, ਆਚਰਿਯ, ਪਕ੍ਕੋਸਤੀ’’ਤਿ.
ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਸੇਟ੍ਠਿਭਰਿਯਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੇਟ੍ਠਿਭਰਿਯਾਯ ਵਿਕਾਰਂ ਸਲ੍ਲਕ੍ਖੇਤ੍ਵਾ ਸੇਟ੍ਠਿਭਰਿਯਂ ਏਤਦਵੋਚ – ‘‘ਪਸਤੇਨ, ਅਯ੍ਯੇ, ਸਪ੍ਪਿਨਾ ਅਤ੍ਥੋ’’ਤਿ. ਅਥ ਖੋ ਸੇਟ੍ਠਿਭਰਿਯਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਸਤਂ ਸਪ੍ਪਿਂ ਦਾਪੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪਸਤਂ ਸਪ੍ਪਿਂ ਨਾਨਾਭੇਸਜ੍ਜੇਹਿ ਨਿਪ੍ਪਚਿਤ੍ਵਾ ਸੇਟ੍ਠਿਭਰਿਯਂ ਮਞ੍ਚਕੇ ਉਤ੍ਤਾਨਂ ਨਿਪਾਤੇਤ੍ਵਾ [ਨਿਪਜ੍ਜਾਪੇਤ੍ਵਾ (ਸੀ. ਸ੍ਯਾ.)] ਨਤ੍ਥੁਤੋ ਅਦਾਸਿ. ਅਥ ਖੋ ਤਂ ਸਪ੍ਪਿਂ ਨਤ੍ਥੁਤੋ ਦਿਨ੍ਨਂ ਮੁਖਤੋ ਉਗ੍ਗਞ੍ਛਿ. ਅਥ ਖੋ ਸੇਟ੍ਠਿਭਰਿਯਾ ਪਟਿਗ੍ਗਹੇ ਨਿਟ੍ਠੁਭਿਤ੍ਵਾ ਦਾਸਿਂ ਆਣਾਪੇਸਿ – ‘‘ਹਨ੍ਦ, ਜੇ, ਇਮਂ ਸਪ੍ਪਿਂ ਪਿਚੁਨਾ ਗਣ੍ਹਾਹੀ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਅਚ੍ਛਰਿਯਂ [ਅਚ੍ਛਰਿਯਂ ਵਤ ਭੋ (ਸ੍ਯਾ.)] ਯਾਵ ਲੂਖਾਯਂ ਘਰਣੀ, ਯਤ੍ਰ ਹਿ ਨਾਮ ਇਮਂ ਛਡ੍ਡਨੀਯਧਮ੍ਮਂ ਸਪ੍ਪਿਂ ਪਿਚੁਨਾ ਗਾਹਾਪੇਸ੍ਸਤਿ. ਬਹੁਕਾਨਿ ਚ ਮੇ ਮਹਗ੍ਘਾਨਿ [ਮਹਗ੍ਘਾਨਿ ਮਹਗ੍ਘਾਨਿ (ਸੀ. ਸ੍ਯਾ.)] ਭੇਸਜ੍ਜਾਨਿ ਉਪਗਤਾਨਿ. ਕਿਮ੍ਪਿ ਮਾਯਂ ਕਿਞ੍ਚਿ [ਕਞ੍ਚਿ (ਸ੍ਯਾ.)] ਦੇਯ੍ਯਧਮ੍ਮਂ ਦਸ੍ਸਤੀ’’ਤਿ. ਅਥ ਖੋ ਸੇਟ੍ਠਿਭਰਿਯਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਆਚਰਿਯ, ਵਿਮਨੋਸੀ’’ਤਿ? ਇਧ ਮੇ ਏਤਦਹੋਸਿ – ‘‘ਅਚ੍ਛਰਿਯਂ ਯਾਵ ਲੂਖਾਯਂ ਧਰਣੀ, ਯਤ੍ਰ ਹਿ ਨਾਮ ਇਮਂ ਛਡ੍ਡਨੀਯਧਮ੍ਮਂ ਸਪ੍ਪਿਂ ਪਿਚੁਨਾ ਗਾਹਾਪੇਸ੍ਸਤਿ. ਬਹੁਕਾਨਿ ਚ ਮੇ ਮਹਗ੍ਘਾਨਿ ਸਜ੍ਜਾਨਿ ਉਪਗਤਾਨਿ. ਕਿਮ੍ਪਿ ਮਾਯਂ ਕਿਞ੍ਚਿ ਦੇਯ੍ਯਧਮ੍ਮਂ ਦਸ੍ਸਤੀ’’ਤਿ. ‘‘ਮਯਂ ਖੋ, ਆਚਰਿਯ, ਆਗਾਰਿਕਾ ਨਾਮ ਉਪਜਾਨਾਮੇਤਸ੍ਸ ਸਂਯਮਸ੍ਸ. ਵਰਮੇਤਂ ਸਪ੍ਪਿ ਦਾਸਾਨਂ ਵਾ ਕਮ੍ਮਕਰਾਨਂ ਵਾ ਪਾਦਬ੍ਭਞ੍ਜਨਂ ਵਾ ਪਦੀਪਕਰਣੇ ਵਾ ਆਸਿਤ੍ਤਂ. ਮਾ ਖੋ ਤ੍ਵਂ, ਆਚਰਿਯ, ਵਿਮਨੋ ਅਹੋਸਿ. ਨ ਤੇ ਦੇਯ੍ਯਧਮ੍ਮੋ ਹਾਯਿਸ੍ਸਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸੇਟ੍ਠਿਭਰਿਯਾਯ ਸਤ੍ਤਵਸ੍ਸਿਕਂ ਸੀਸਾਬਾਧਂ ਏਕੇਨੇਵ ਨਤ੍ਥੁਕਮ੍ਮੇਨ ਅਪਕਡ੍ਢਿ. ਅਥ ਖੋ ਸੇਟ੍ਠਿਭਰਿਯਾ ਅਰੋਗਾ ਸਮਾਨਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਪੁਤ੍ਤੋ – ਮਾਤਾ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਸੁਣਿਸਾ – ਸਸ੍ਸੁ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ. ਸੇਟ੍ਠਿ ਗਹਪਤਿ – ਭਰਿਯਾ ਮੇ ਅਰੋਗਾ ਠਿਤਾਤਿ ਚਤ੍ਤਾਰਿ ਸਹਸ੍ਸਾਨਿ ਪਾਦਾਸਿ ਦਾਸਞ੍ਚ ਦਾਸਿਞ੍ਚ ਅਸ੍ਸਰਥਞ੍ਚ.
ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਾਨਿ ਸੋਲ਼ਸਸਹਸ੍ਸਾਨਿ ਆਦਾਯ ਦਾਸਞ੍ਚ ਦਾਸਿਞ੍ਚ ਅਸ੍ਸਰਥਞ੍ਚ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਰਾਜਗਹਂ ਯੇਨ ਅਭਯੋ ਰਾਜਕੁਮਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਇਦਂ ਮੇ, ਦੇਵ, ਪਠਮਕਮ੍ਮਂ ਸੋਲ਼ਸਸਹਸ੍ਸਾਨਿ ਦਾਸੋ ਚ ਦਾਸੀ ਚ ਅਸ੍ਸਰਥੋ ਚ. ਪਟਿਗ੍ਗਣ੍ਹਾਤੁ ਮੇ ਦੇਵੋ ਪੋਸਾਵਨਿਕ’’ਨ੍ਤਿ. ‘‘ਅਲਂ, ਭਣੇ ਜੀਵਕ; ਤੁਯ੍ਹਮੇਵ ਹੋਤੁ. ਅਮ੍ਹਾਕਞ੍ਞੇਵ ਅਨ੍ਤੇਪੁਰੇ ਨਿਵੇਸਨਂ ਮਾਪੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਅਭਯਸ੍ਸ ਰਾਜਕੁਮਾਰਸ੍ਸ ਅਨ੍ਤੇਪੁਰੇ ਨਿਵੇਸਨਂ ਮਾਪੇਸਿ.
ਸੇਟ੍ਠਿਭਰਿਯਾਵਤ੍ਥੁ ਨਿਟ੍ਠਿਤਂ.
੨੦੪. ਬਿਮ੍ਬਿਸਾਰਰਾਜਵਤ੍ਥੁ
੩੩੧. ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਭਗਨ੍ਦਲਾਬਾਧੋ ਹੋਤਿ. ਸਾਟਕਾ ਲੋਹਿਤੇਨ ਮਕ੍ਖਿਯਨ੍ਤਿ. ਦੇਵਿਯੋ ਦਿਸ੍ਵਾ ਉਪ੍ਪਣ੍ਡੇਨ੍ਤਿ – ‘‘ਉਤੁਨੀ ਦਾਨਿ ਦੇਵੋ, ਪੁਪ੍ਫਂ ਦੇਵਸ੍ਸ ਉਪ੍ਪਨ੍ਨਂ, ਨ ਚਿਰਂ [ਨਚਿਰਸ੍ਸੇਵ (ਸ੍ਯਾ.)] ਦੇਵੋ ਵਿਜਾਯਿਸ੍ਸਤੀ’’ਤਿ. ਤੇਨ ਰਾਜਾ ਮਙ੍ਕੁ ਹੋਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਭਯਂ ਰਾਜਕੁਮਾਰਂ ਏਤਦਵੋਚ – ‘‘ਮਯ੍ਹਂ ਖੋ, ਭਣੇ ਅਭਯ, ਤਾਦਿਸੋ ਆਬਾਧੋ, ਸਾਟਕਾ ਲੋਹਿਤੇਨ ਮਕ੍ਖਿਯਨ੍ਤਿ, ਦੇਵਿਯੋ ਮਂ ਦਿਸ੍ਵਾ ਉਪ੍ਪਣ੍ਡੇਨ੍ਤਿ – ‘ਉਤੁਨੀ ਦਾਨਿ ਦੇਵੋ, ਪੁਪ੍ਫਂ ਦੇਵਸ੍ਸ ਉਪ੍ਪਨ੍ਨਂ, ਨ ਚਿਰਂ ਦੇਵੋ ਵਿਜਾਯਿਸ੍ਸਤੀ’ਤਿ. ਇਙ੍ਘ, ਭਣੇ ਅਭਯ, ਤਾਦਿਸਂ ਵੇਜ੍ਜਂ ਜਾਨਾਹਿ ਯੋ ਮਂ ਤਿਕਿਚ੍ਛੇਯ੍ਯਾ’’ਤਿ. ‘‘ਅਯਂ, ਦੇਵ, ਅਮ੍ਹਾਕਂ ਜੀਵਕੋ ਵੇਜ੍ਜੋ ਤਰੁਣੋ ਭਦ੍ਰਕੋ. ਸੋ ਦੇਵਂ ਤਿਕਿਚ੍ਛਿਸ੍ਸਤੀ’’ਤਿ. ‘‘ਤੇਨ ਹਿ, ਭਣੇ ਅਭਯ, ਜੀਵਕਂ ਵੇਜ੍ਜਂ ਆਣਾਪੇਹਿ; ਸੋ ਮਂ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਅਭਯੋ ਰਾਜਕੁਮਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਰਾਜਾਨਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਅਭਯਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਨਖੇਨ ਭੇਸਜ੍ਜਂ ਆਦਾਯ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਆਬਾਧਂ ਤੇ, ਦੇਵ, ਪਸ੍ਸਾਮਾ’’ਤਿ [ਪਸ੍ਸਾਮੀਤਿ (ਸ੍ਯਾ.)]. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਭਗਨ੍ਦਲਾਬਾਧਂ ਏਕੇਨੇਵ ਆਲੇਪੇਨ ਅਪਕਡ੍ਢਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਰੋਗੋ ਸਮਾਨੋ ਪਞ੍ਚ ਇਤ੍ਥਿਸਤਾਨਿ ਸਬ੍ਬਾਲਙ੍ਕਾਰਂ ਭੂਸਾਪੇਤ੍ਵਾ ਓਮੁਞ੍ਚਾਪੇਤ੍ਵਾ ਪੁਞ੍ਜਂ ਕਾਰਾਪੇਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਏਤਂ, ਭਣੇ ਜੀਵਕ, ਪਞ੍ਚਨ੍ਨਂ ਇਤ੍ਥਿਸਤਾਨਂ ਸਬ੍ਬਾਲਙ੍ਕਾਰਂ ਤੁਯ੍ਹਂ ਹੋਤੂ’’ਤਿ. ‘‘ਅਲਂ, ਦੇਵ, ਅਧਿਕਾਰਂ ਮੇ ਦੇਵੋ ਸਰਤੂ’’ਤਿ. ‘‘ਤੇਨ ਹਿ, ਭਣੇ ਜੀਵਕ, ਮਂ ਉਪਟ੍ਠਹ, ਇਤ੍ਥਾਗਾਰਞ੍ਚ, ਬੁਦ੍ਧਪ੍ਪਮੁਖਞ੍ਚ ਭਿਕ੍ਖੁਸਙ੍ਘ’’ਨ੍ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸਿ.
ਬਿਮ੍ਬਿਸਾਰਰਾਜਵਤ੍ਥੁ ਨਿਟ੍ਠਿਤਂ.
੨੦੫. ਰਾਜਗਹਸੇਟ੍ਠਿਵਤ੍ਥੁ
੩੩੨. ਤੇਨ ਖੋ ਪਨ ਸਮਯੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਸਤ੍ਤਵਸ੍ਸਿਕੋ ਸੀਸਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ ਹੋਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘‘ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’’ਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘‘ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’’ਤਿ. ਅਥ ਖੋ ਰਾਜਗਹਕਸ੍ਸ ਨੇਗਮਸ੍ਸ ਏਤਦਹੋਸਿ – ‘‘ਅਯਂ ਖੋ ਸੇਟ੍ਠਿ ਗਹਪਤਿ ਬਹੂਪਕਾਰੋ ਰਞ੍ਞੋ ਚੇਵ ਨੇਗਮਸ੍ਸ ਚ. ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’ਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ‘ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀ’ਤਿ. ਅਯਞ੍ਚ ਰਞ੍ਞੋ ਜੀਵਕੋ ਵੇਜ੍ਜੋ ਤਰੁਣੋ ਭਦ੍ਰਕੋ. ਯਂਨੂਨ ਮਯਂ ਰਾਜਾਨਂ ਜੀਵਕਂ ਵੇਜ੍ਜਂ ਯਾਚੇਯ੍ਯਾਮ ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਰਾਜਗਹਕੋ ਨੇਗਮੋ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਅਯਂ, ਦੇਵ, ਸੇਟ੍ਠਿ ਗਹਪਤਿ ਬਹੂਪਕਾਰੋ ਦੇਵਸ੍ਸ ਚੇਵ ਨੇਗਮਸ੍ਸ ਚ; ਅਪਿ ਚ, ਵੇਜ੍ਜੇਹਿ ਪਚ੍ਚਕ੍ਖਾਤੋ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ. ਏਕਚ੍ਚੇ ਵੇਜ੍ਜਾ ਏਵਮਾਹਂਸੁ – ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ. ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਿਤੁ’’ਨ੍ਤਿ.
ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਸੇਟ੍ਠਿਂ ਗਹਪਤਿਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਯੇਨ ਸੇਟ੍ਠਿ ਗਹਪਤਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੇਟ੍ਠਿਸ੍ਸ ਗਹਪਤਿਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਸਚੇ ਤ੍ਵਂ, ਗਹਪਤਿ, ਅਰੋਗੋ ਭਵੇਯ੍ਯਾਸਿ [ਸਚਾਹਂ ਤਂ ਗਹਪਤਿ ਅਰੋਗਾਪੇਯ੍ਯਂ (ਸੀ.), ਸਚਾਹਂ ਤਂ ਗਹਪਤਿ ਅਰੋਗਂ ਕਰੇਯ੍ਯਂ (ਸ੍ਯਾ.)] ਕਿਂ ਮੇ ਅਸ੍ਸ ਦੇਯ੍ਯਧਮ੍ਮੋ’’ਤਿ? ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ’’ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਸਕ੍ਖਿਸ੍ਸਸਿ ਪਨ ਤ੍ਵਂ, ਗਹਪਤਿ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਕ੍ਕੋਮਹਂ, ਆਚਰਿਯ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ.
ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਸੇਟ੍ਠਿਂ ਗਹਪਤਿਂ ਮਞ੍ਚਕੇ ਨਿਪਾਤੇਤ੍ਵਾ [ਨਿਪਜ੍ਜਾਪੇਤ੍ਵਾ (ਸੀ. ਸ੍ਯਾ.)] ਮਞ੍ਚਕੇ [ਮਞ੍ਚਕੇਨ (ਸੀ.)] ਸਮ੍ਬਨ੍ਧਿਤ੍ਵਾ ਸੀਸਚ੍ਛਵਿਂ ਉਪ੍ਪਾਟੇਤ੍ਵਾ [ਫਾਲੇਤ੍ਵਾ (ਸੀ.)] ਸਿਬ੍ਬਿਨਿਂ ਵਿਨਾਮੇਤ੍ਵਾ ਦ੍ਵੇ ਪਾਣਕੇ ਨੀਹਰਿਤ੍ਵਾ ਮਹਾਜਨਸ੍ਸ ਦਸ੍ਸੇਸਿ – ‘‘ਪਸ੍ਸਥਯ੍ਯੇ [ਪਸ੍ਸੇਸ੍ਯਾਥ (ਸੀ.), ਪਸ੍ਸਥ (ਸ੍ਯਾ.), ਪਸ੍ਸਥਯ੍ਯੋ (ਕ.)], ਇਮੇ ਦ੍ਵੇ ਪਾਣਕੇ, ਏਕਂ ਖੁਦ੍ਦਕਂ ਏਕਂ ਮਹਲ੍ਲਕਂ. ਯੇ ਤੇ ਆਚਰਿਯਾ ਏਵਮਾਹਂਸੁ – ਪਞ੍ਚਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ – ਤੇਹਾਯਂ ਮਹਲ੍ਲਕੋ ਪਾਣਕੋ ਦਿਟ੍ਠੋ. ਪਞ੍ਚਮਂ ਦਿਵਸਂ ਸੇਟ੍ਠਿਸ੍ਸ ਗਹਪਤਿਸ੍ਸ ਮਤ੍ਥਲੁਙ੍ਗਂ ਪਰਿਯਾਦਿਯਿਸ੍ਸਤਿ. ਮਤ੍ਥਲੁਙ੍ਗਸ੍ਸ ਪਰਿਯਾਦਾਨਾ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤਿ. ਸੁਦਿਟ੍ਠੋ ਤੇਹਿ ਆਚਰਿਯੇਹਿ. ਯੇ ਤੇ ਆਚਰਿਯਾ ਏਵਮਾਹਂਸੁ – ਸਤ੍ਤਮਂ ਦਿਵਸਂ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤੀਤਿ – ਤੇਹਾਯਂ ਖੁਦ੍ਦਕੋ ਪਾਣਕੋ ਦਿਟ੍ਠੋ. ਸਤ੍ਤਮਂ ਦਿਵਸਂ ਸੇਟ੍ਠਿਸ੍ਸ ਗਹਪਤਿਸ੍ਸ ਮਤ੍ਥਲੁਙ੍ਗਂ ਪਰਿਯਾਦਿਯਿਸ੍ਸਤਿ. ਮਤ੍ਥਲੁਙ੍ਗਸ੍ਸ ਪਰਿਯਾਦਾਨਾ ਸੇਟ੍ਠਿ ਗਹਪਤਿ ਕਾਲਂ ਕਰਿਸ੍ਸਤਿ. ਸੁਦਿਟ੍ਠੋ ਤੇਹਿ ਆਚਰਿਯੇਹੀ’’ਤਿ. ਸਿਬ੍ਬਿਨਿਂ ਸਮ੍ਪਟਿਪਾਟੇਤ੍ਵਾ ਸੀਸਚ੍ਛਵਿਂ ਸਿਬ੍ਬਿਤ੍ਵਾ ਆਲੇਪਂ ਅਦਾਸਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ ਸਕ੍ਕੋਮਿ ਏਕੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਗਹਪਤਿ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਾਹੀ’’ਤਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ, ਆਚਰਿਯ, ਸਕ੍ਕੋਮਿ ਦੁਤਿਯੇਨ ਪਸ੍ਸੇਨ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਗਹਪਤਿ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਾਹੀ’’ਤਿ. ਅਥ ਖੋ ਸੇਟ੍ਠਿ ਗਹਪਤਿ ਸਤ੍ਤਾਹਸ੍ਸ ਅਚ੍ਚਯੇਨ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਨਾਹਂ, ਆਚਰਿਯ, ਸਕ੍ਕੋਮਿ ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਨਨੁ ਮੇ ਤ੍ਵਂ, ਗਹਪਤਿ, ਪਟਿਸ੍ਸੁਣਿ – ਸਕ੍ਕੋਮਹਂ, ਆਚਰਿਯ, ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ? ‘‘ਸਚ੍ਚਾਹਂ, ਆਚਰਿਯ, ਪਟਿਸ੍ਸੁਣਿਂ, ਅਪਾਹਂ ਮਰਿਸ੍ਸਾਮਿ, ਨਾਹਂ ਸਕ੍ਕੋਮਿ ਉਤ੍ਤਾਨੋ ਸਤ੍ਤਮਾਸੇ ਨਿਪਜ੍ਜਿਤੁ’’ਨ੍ਤਿ. ‘‘ਅਹਂ ਚੇ ਤਂ, ਗਹਪਤਿ, ਨ ਵਦੇਯ੍ਯਂ, ਏਤ੍ਤਕਮ੍ਪਿ ਤ੍ਵਂ ਨ ਨਿਪਜ੍ਜੇਯ੍ਯਾਸਿ, ਅਪਿ ਚ ਪਟਿਕਚ੍ਚੇਵ ਮਯਾ ਞਾਤੋ – ਤੀਹਿ ਸਤ੍ਤਾਹੇਹਿ ਸੇਟ੍ਠਿ ਗਹਪਤਿ ਅਰੋਗੋ ਭਵਿਸ੍ਸਤੀਤਿ. ਉਟ੍ਠੇਹਿ, ਗਹਪਤਿ, ਅਰੋਗੋਸਿ. ਜਾਨਾਸਿ ਕਿਂ ਮੇ ਦੇਯ੍ਯਧਮ੍ਮੋ’’ਤਿ? ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ’’ਤਿ. ‘‘ਅਲਂ, ਗਹਪਤਿ, ਮਾ ਮੇ ਤ੍ਵਂ ਸਬ੍ਬਂ ਸਾਪਤੇਯ੍ਯਂ ਅਦਾਸਿ, ਮਾ ਚ ਮੇ ਦਾਸੋ. ਰਞ੍ਞੋ ਸਤਸਹਸ੍ਸਂ ਦੇਹਿ, ਮਯ੍ਹਂ ਸਤਸਹਸ੍ਸ’’ਨ੍ਤਿ. ਅਥ ਖੋ ਸੇਟ੍ਠਿ ਗਹਪਤਿ ਅਰੋਗੋ ਸਮਾਨੋ ਰਞ੍ਞੋ ਸਤਸਹਸ੍ਸਂ ਅਦਾਸਿ, ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਤਸਹਸ੍ਸਂ.
ਰਾਜਗਹਸੇਟ੍ਠਿਵਤ੍ਥੁ ਨਿਟ੍ਠਿਤਂ.
੨੦੬. ਸੇਟ੍ਠਿਪੁਤ੍ਤਵਤ੍ਥੁ
੩੩੩. ਤੇਨ ਖੋ ਪਨ ਸਮਯੇਨ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਪੁਤ੍ਤਸ੍ਸ ਮੋਕ੍ਖਚਿਕਾਯ ਕੀਲ਼ਨ੍ਤਸ੍ਸ ਅਨ੍ਤਗਣ੍ਠਾਬਾਧੋ ਹੋਤਿ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਹੋਤਿ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਅਥ ਖੋ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਸ੍ਸ ਏਤਦਹੋਸਿ – ‘‘ਮਯ੍ਹਂ ਖੋ ਪੁਤ੍ਤਸ੍ਸ ਤਾਦਿਸੋ ਆਬਾਧੋ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਯਂਨੂਨਾਹਂ ਰਾਜਗਹਂ ਗਨ੍ਤ੍ਵਾ ਰਾਜਾਨਂ ਜੀਵਕਂ ਵੇਜ੍ਜਂ ਯਾਚੇਯ੍ਯਂ ਪੁਤ੍ਤਂ ਮੇ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿ ਰਾਜਗਹਂ ਗਨ੍ਤ੍ਵਾ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਮਯ੍ਹਂ ਖੋ, ਦੇਵ, ਪੁਤ੍ਤਸ੍ਸ ਤਾਦਿਸੋ ਆਬਾਧੋ, ਯੇਨ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ. ਸੋ ਤੇਨ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ ਪੁਤ੍ਤਂ ਮੇ ਤਿਕਿਚ੍ਛਿਤੁ’’ਨ੍ਤਿ.
ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ, ਬਾਰਾਣਸਿਂ ਗਨ੍ਤ੍ਵਾ ਬਾਰਾਣਸੇਯ੍ਯਕਂ ਸੇਟ੍ਠਿਪੁਤ੍ਤਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਯੇਨ ਬਾਰਾਣਸੇਯ੍ਯਕੋ ਸੇਟ੍ਠਿਪੁਤ੍ਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬਾਰਾਣਸੇਯ੍ਯਕਸ੍ਸ ਸੇਟ੍ਠਿਪੁਤ੍ਤਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਜਨਂ ਉਸ੍ਸਾਰੇਤ੍ਵਾ ਤਿਰੋਕਰਣਿਯਂ ਪਰਿਕ੍ਖਿਪਿਤ੍ਵਾ ਥਮ੍ਭੇ ਉਬ੍ਬਨ੍ਧਿਤ੍ਵਾ [ਉਪਨਿਬਨ੍ਧਿਤ੍ਵਾ (ਸੀ. ਸ੍ਯਾ.)] ਭਰਿਯਂ ਪੁਰਤੋ ਠਪੇਤ੍ਵਾ ਉਦਰਚ੍ਛਵਿਂ ਉਪ੍ਪਾਟੇਤ੍ਵਾ ਅਨ੍ਤਗਣ੍ਠਿਂ ਨੀਹਰਿਤ੍ਵਾ ਭਰਿਯਾਯ ਦਸ੍ਸੇਸਿ – ‘‘ਪਸ੍ਸ ਤੇ ਸਾਮਿਕਸ੍ਸ ਆਬਾਧਂ, ਇਮਿਨਾ ਯਾਗੁਪਿ ਪੀਤਾ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਉਚ੍ਚਾਰੋਪਿ ਪਸ੍ਸਾਵੋਪਿ ਨ ਪਗੁਣੋ; ਇਮਿਨਾਯਂ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ. ਅਨ੍ਤਗਣ੍ਠਿਂ ਵਿਨਿਵੇਠੇਤ੍ਵਾ ਅਨ੍ਤਾਨਿ ਪਟਿਪਵੇਸੇਤ੍ਵਾ ਉਦਰਚ੍ਛਵਿਂ ਸਿਬ੍ਬਿਤ੍ਵਾ ਆਲੇਪਂ ਅਦਾਸਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿਪੁਤ੍ਤੋ ਨਚਿਰਸ੍ਸੇਵ ਅਰੋਗੋ ਅਹੋਸਿ. ਅਥ ਖੋ ਬਾਰਾਣਸੇਯ੍ਯਕੋ ਸੇਟ੍ਠਿ ‘ਪੁਤ੍ਤੋ ਮੇ ਅਰੋਗੋ ਠਿਤੋ’ਤਿ [ਅਰੋਗਾਪਿਤੋਤਿ (ਸੀ.)] ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸੋਲ਼ਸਸਹਸ੍ਸਾਨਿ ਪਾਦਾਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਾਨਿ ਸੋਲ਼ਸਸਹਸ੍ਸਾਨਿ ਆਦਾਯ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ.
ਸੇਟ੍ਠਿਪੁਤ੍ਤਵਤ੍ਥੁ ਨਿਟ੍ਠਿਤਂ.
੨੦੭. ਪਜ੍ਜੋਤਰਾਜਵਤ੍ਥੁ
੩੩੪. ਤੇਨ ਖੋ ਪਨ ਸਮਯੇਨ ਰਞ੍ਞੋ [ਉਜ੍ਜੇਨਿਯਂ ਰਞ੍ਞੋ (ਸ੍ਯਾ.)] ਪਜ੍ਜੋਤਸ੍ਸ ਪਣ੍ਡੁਰੋਗਾਬਾਧੋ ਹੋਤਿ. ਬਹੂ ਮਹਨ੍ਤਾ ਮਹਨ੍ਤਾ ਦਿਸਾਪਾਮੋਕ੍ਖਾ ਵੇਜ੍ਜਾ ਆਗਨ੍ਤ੍ਵਾ ਨਾਸਕ੍ਖਿਂਸੁ ਅਰੋਗਂ ਕਾਤੁਂ. ਬਹੁਂ ਹਿਰਞ੍ਞਂ ਆਦਾਯ ਅਗਮਂਸੁ. ਅਥ ਖੋ ਰਾਜਾ ਪਜ੍ਜੋਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਮਯ੍ਹਂ ਖੋ ਤਾਦਿਸੋ ਆਬਾਧੋ, ਸਾਧੁ ਦੇਵੋ ਜੀਵਕਂ ਵੇਜ੍ਜਂ ਆਣਾਪੇਤੁ, ਸੋ ਮਂ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਜੀਵਕਂ ਕੋਮਾਰਭਚ੍ਚਂ ਆਣਾਪੇਸਿ – ‘‘ਗਚ੍ਛ, ਭਣੇ ਜੀਵਕ; ਉਜ੍ਜੇਨਿਂ ਗਨ੍ਤ੍ਵਾ ਰਾਜਾਨਂ ਪਜ੍ਜੋਤਂ ਤਿਕਿਚ੍ਛਾਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਉਜ੍ਜੇਨਿਂ ਗਨ੍ਤ੍ਵਾ ਯੇਨ ਰਾਜਾ ਪਜ੍ਜੋਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਪਜ੍ਜੋਤਸ੍ਸ ਵਿਕਾਰਂ ਸਲ੍ਲਕ੍ਖੇਤ੍ਵਾ ਰਾਜਾਨਂ ਪਜ੍ਜੋਤਂ ਏਤਦਵੋਚ – ‘‘ਸਪ੍ਪਿਂ ਦੇਹਿ [ਇਦਂ ਪਦਦ੍ਵਯਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ], ਸਪ੍ਪਿਂ ਦੇਵ, ਨਿਪ੍ਪਚਿਸ੍ਸਾਮਿ. ਤਂ ਦੇਵੋ ਪਿਵਿਸ੍ਸਤੀ’’ਤਿ. ‘‘ਅਲਂ, ਭਣੇ ਜੀਵਕ, ਯਂ ਤੇ ਸਕ੍ਕਾ ਵਿਨਾ ਸਪ੍ਪਿਨਾ ਅਰੋਗਂ ਕਾਤੁਂ ਤਂ ਕਰੋਹਿ. ਜੇਗੁਚ੍ਛਂ ਮੇ ਸਪ੍ਪਿ, ਪਟਿਕੂਲ’’ਨ੍ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਸ੍ਸ ਖੋ ਰਞ੍ਞੋ ਤਾਦਿਸੋ ਆਬਾਧੋ, ਨ ਸਕ੍ਕਾ ਵਿਨਾ ਸਪ੍ਪਿਨਾ ਅਰੋਗਂ ਕਾਤੁਂ. ਯਂਨੂਨਾਹਂ ਸਪ੍ਪਿਂ ਨਿਪ੍ਪਚੇਯ੍ਯਂ ਕਸਾਵਵਣ੍ਣਂ ਕਸਾਵਗਨ੍ਧਂ ਕਸਾਵਰਸ’’ਨ੍ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਨਾਨਾਭੇਸਜ੍ਜੇਹਿ ਸਪ੍ਪਿਂ ਨਿਪ੍ਪਚਿ ਕਸਾਵਵਣ੍ਣਂ ਕਸਾਵਗਨ੍ਧਂ ਕਸਾਵਰਸਂ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਮਸ੍ਸ ਖੋ ਰਞ੍ਞੋ ਸਪ੍ਪਿ ਪੀਤਂ ਪਰਿਣਾਮੇਨ੍ਤਂ ਉਦ੍ਦੇਕਂ ਦਸ੍ਸਤਿ. ਚਣ੍ਡੋਯਂ ਰਾਜਾ ਘਾਤਾਪੇਯ੍ਯਾਪਿ ਮਂ. ਯਂਨੂਨਾਹਂ ਪਟਿਕਚ੍ਚੇਵ ਆਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਰਾਜਾ ਪਜ੍ਜੋਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਾਨਂ ਪਜ੍ਜੋਤਂ ਏਤਦਵੋਚ – ‘‘ਮਯਂ ਖੋ, ਦੇਵ, ਵੇਜ੍ਜਾ ਨਾਮ ਤਾਦਿਸੇਨ ਮੁਹੁਤ੍ਤੇਨ ਮੂਲਾਨਿ ਉਦ੍ਧਰਾਮ ਭੇਸਜ੍ਜਾਨਿ ਸਂਹਰਾਮ. ਸਾਧੁ ਦੇਵੋ ਵਾਹਨਾਗਾਰੇਸੁ ਚ ਦ੍ਵਾਰੇਸੁ ਚ ਆਣਾਪੇਤੁ – ਯੇਨ ਵਾਹਨੇਨ ਜੀਵਕੋ ਇਚ੍ਛਤਿ ਤੇਨ ਵਾਹਨੇਨ ਗਚ੍ਛਤੁ, ਯੇਨ ਦ੍ਵਾਰੇਨ ਇਚ੍ਛਤਿ ਤੇਨ ਦ੍ਵਾਰੇਨ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਪਵਿਸਤੂ’’ਤਿ. ਅਥ ਖੋ ਰਾਜਾ ਪਜ੍ਜੋਤੋ ਵਾਹਨਾਗਾਰੇਸੁ ਚ ਦ੍ਵਾਰੇਸੁ ਚ ਆਣਾਪੇਸਿ – ‘‘ਯੇਨ ਵਾਹਨੇਨ ਜੀਵਕੋ ਇਚ੍ਛਤਿ ਤੇਨ ਵਾਹਨੇਨ ਗਚ੍ਛਤੁ, ਯੇਨ ਦ੍ਵਾਰੇਨ ਇਚ੍ਛਤਿ ਤੇਨ ਦ੍ਵਾਰੇਨ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਗਚ੍ਛਤੁ, ਯਂ ਕਾਲਂ ਇਚ੍ਛਤਿ ਤਂ ਕਾਲਂ ਪਵਿਸਤੂ’’ਤਿ.
ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਭਦ੍ਦਵਤਿਕਾ ਨਾਮ ਹਤ੍ਥਿਨਿਕਾ ਪਞ੍ਞਾਸਯੋਜਨਿਕਾ ਹੋਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਞ੍ਞੋ ਪਜ੍ਜੋਤਸ੍ਸ ਸਪ੍ਪਿਂ [ਤਂ ਸਪ੍ਪਿਂ (ਸ੍ਯਾ.)] ਉਪਨਾਮੇਸਿ – ‘‘ਕਸਾਵਂ ਦੇਵੋ ਪਿਵਤੂ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਰਾਜਾਨਂ ਪਜ੍ਜੋਤਂ ਸਪ੍ਪਿਂ ਪਾਯੇਤ੍ਵਾ ਹਤ੍ਥਿਸਾਲਂ ਗਨ੍ਤ੍ਵਾ ਭਦ੍ਦਵਤਿਕਾਯ ਹਤ੍ਥਿਨਿਕਾਯ ਨਗਰਮ੍ਹਾ ਨਿਪ੍ਪਤਿ.
ਅਥ ਖੋ ਰਞ੍ਞੋ ਪਜ੍ਜੋਤਸ੍ਸ ਤਂ ਸਪ੍ਪਿ ਪੀਤਂ ਪਰਿਣਾਮੇਨ੍ਤਂ ਉਦ੍ਦੇਕਂ ਅਦਾਸਿ. ਅਥ ਖੋ ਰਾਜਾ ਪਜ੍ਜੋਤੋ ਮਨੁਸ੍ਸੇ ਏਤਦਵੋਚ – ‘‘ਦੁਟ੍ਠੇਨ, ਭਣੇ, ਜੀਵਕੇਨ ਸਪ੍ਪਿਂ ਪਾਯਿਤੋਮ੍ਹਿ. ਤੇਨ ਹਿ, ਭਣੇ, ਜੀਵਕਂ ਵੇਜ੍ਜਂ ਵਿਚਿਨਥਾ’’ਤਿ. ‘‘ਭਦ੍ਦਵਤਿਕਾਯ, ਦੇਵ, ਹਤ੍ਥਿਨਿਕਾਯ ਨਗਰਮ੍ਹਾ ਨਿਪ੍ਪਤਿਤੋ’’ਤਿ. ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਕਾਕੋ ਨਾਮ ਦਾਸੋ ਸਟ੍ਠਿਯੋਜਨਿਕੋ ਹੋਤਿ, ਅਮਨੁਸ੍ਸੇਨ ਪਟਿਚ੍ਚ ਜਾਤੋ. ਅਥ ਖੋ ਰਾਜਾ ਪਜ੍ਜੋਤੋ ਕਾਕਂ ਦਾਸਂ ਆਣਾਪੇਸਿ – ‘‘ਗਚ੍ਛ, ਭਣੇ ਕਾਕ, ਜੀਵਕਂ ਵੇਜ੍ਜਂ ਨਿਵਤ੍ਤੇਹਿ – ਰਾਜਾ ਤਂ, ਆਚਰਿਯ, ਨਿਵਤ੍ਤਾਪੇਤੀਤਿ. ਏਤੇ ਖੋ, ਭਣੇ ਕਾਕ, ਵੇਜ੍ਜਾ ਨਾਮ ਬਹੁਮਾਯਾ. ਮਾ ਚਸ੍ਸ ਕਿਞ੍ਚਿ ਪਟਿਗ੍ਗਹੇਸੀ’’ਤਿ.
ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਅਨ੍ਤਰਾਮਗ੍ਗੇ ਕੋਸਮ੍ਬਿਯਂ ਸਮ੍ਭਾਵੇਸਿ
ਪਾਤਰਾਸਂ ਕਰੋਨ੍ਤਂ. ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਰਾਜਾ ਤਂ, ਆਚਰਿਯ, ਨਿਵਤ੍ਤਾਪੇਤੀ’’ਤਿ. ‘‘ਆਗਮੇਹਿ, ਭਣੇ ਕਾਕ, ਯਾਵ ਭੁਞ੍ਜਾਮ [ਭੁਞ੍ਜਾਮਿ (ਸੀ. ਸ੍ਯਾ.)]. ਹਨ੍ਦ, ਭਣੇ ਕਾਕ, ਭੁਞ੍ਜਸ੍ਸੂ’’ਤਿ. ‘‘ਅਲਂ, ਆਚਰਿਯ, ਰਞ੍ਞਾਮ੍ਹਿ ਆਣਤ੍ਤੋ – ਏਤੇ ਖੋ, ਭਣੇ ਕਾਕ, ਵੇਜ੍ਜਾ ਨਾਮ ਬਹੁਮਾਯਾ, ਮਾ ਚਸ੍ਸ ਕਿਞ੍ਚਿ ਪਟਿਗ੍ਗਹੇਸੀ’’ਤਿ. ਤੇਨ ਖੋ ਪਨ ਸਮਯੇਨ ਜੀਵਕੋ ਕੋਮਾਰਭਚ੍ਚੋ ਨਖੇਨ ਭੇਸਜ੍ਜਂ ਓਲੁਮ੍ਪੇਤ੍ਵਾ ਆਮਲਕਞ੍ਚ ਖਾਦਤਿ ਪਾਨੀਯਞ੍ਚ ਪਿਵਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਕਾਕਂ ਦਾਸਂ ਏਤਦਵੋਚ – ‘‘ਹਨ੍ਦ, ਭਣੇ ਕਾਕ, ਆਮਲਕਞ੍ਚ ਖਾਦ ਪਾਨੀਯਞ੍ਚ ਪਿਵਸ੍ਸੂ’’ਤਿ. ਅਥ ਖੋ ਕਾਕੋ ਦਾਸੋ – ਅਯਂ ਖੋ ਵੇਜ੍ਜੋ ਆਮਲਕਞ੍ਚ ਖਾਦਤਿ ਪਾਨੀਯਞ੍ਚ ਪਿਵਤਿ, ਨ ਅਰਹਤਿ ਕਿਞ੍ਚਿ ਪਾਪਕਂ ਹੋਤੁਨ੍ਤਿ – ਉਪਡ੍ਢਾਮਲਕਞ੍ਚ ਖਾਦਿ ਪਾਨੀਯਞ੍ਚ ਅਪਾਯਿ. ਤਸ੍ਸ ਤਂ ਉਪਡ੍ਢਾਮਲਕਂ ਖਾਦਿਤਂ ਤਤ੍ਥੇਵ ਨਿਚ੍ਛਾਰੇਸਿ. ਅਥ ਖੋ ਕਾਕੋ ਦਾਸੋ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਅਤ੍ਥਿ ਮੇ, ਆਚਰਿਯ, ਜੀਵਿਤ’’ਨ੍ਤਿ? ‘‘ਮਾ, ਭਣੇ ਕਾਕ, ਭਾਯਿ, ਤ੍ਵਂ ਚੇਵ ਅਰੋਗੋ ਭਵਿਸ੍ਸਸਿ ਰਾਜਾ ਚ. ਚਣ੍ਡੋ ਸੋ ਰਾਜਾ ਘਾਤਾਪੇਯ੍ਯਾਪਿ ਮਂ, ਤੇਨਾਹਂ ਨ ਨਿਵਤ੍ਤਾਮੀ’’ਤਿ ਭਦ੍ਦਵਤਿਕਂ ਹਤ੍ਥਿਨਿਕਂ ਕਾਕਸ੍ਸ ਨਿਯ੍ਯਾਦੇਤ੍ਵਾ ਯੇਨ ਰਾਜਗਹਂ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸਿ. ‘‘ਸੁਟ੍ਠੁ, ਭਣੇ ਜੀਵਕ, ਅਕਾਸਿ ਯਮ੍ਪਿ ਨ ਨਿਵਤ੍ਤੋ, ਚਣ੍ਡੋ ਸੋ ਰਾਜਾ ਘਾਤਾਪੇਯ੍ਯਾਪਿ ਤ’’ਨ੍ਤਿ. ਅਥ ਖੋ ਰਾਜਾ ਪਜ੍ਜੋਤੋ ਅਰੋਗੋ ਸਮਾਨੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਤੁ ਜੀਵਕੋ, ਵਰਂ ਦਸ੍ਸਾਮੀ’’ਤਿ. ‘‘ਅਲਂ, ਅਯ੍ਯੋ [ਦੇਵ (ਸ੍ਯਾ.)], ਅਧਿਕਾਰਂ ਮੇ ਦੇਵੋ ਸਰਤੂ’’ਤਿ.
ਪਜ੍ਜੋਤਰਾਜਵਤ੍ਥੁ ਨਿਟ੍ਠਿਤਂ.
੨੦੮. ਸਿਵੇਯ੍ਯਕਦੁਸ੍ਸਯੁਗਕਥਾ
੩੩੫. ਤੇਨ ਖੋ ਪਨ ਸਮਯੇਨ ਰਞ੍ਞੋ ਪਜ੍ਜੋਤਸ੍ਸ ਸਿਵੇਯ੍ਯਕਂ ਦੁਸ੍ਸਯੁਗਂ ਉਪ੍ਪਨ੍ਨਂ ਹੋਤਿ – ਬਹੂਨਂ [ਬਹੁਨ੍ਨਂ (ਸੀ. ਸ੍ਯਾ.)] ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਅਥ ਖੋ ਰਾਜਾ ਪਜ੍ਜੋਤੋ ਤਂ ਸਿਵੇਯ੍ਯਕਂ ਦੁਸ੍ਸਯੁਗਂ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਪਾਹੇਸਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਇਦਂ ਖੋ ਮੇ ਸਿਵੇਯ੍ਯਕਂ ਦੁਸ੍ਸਯੁਗਂ ਰਞ੍ਞਾ ਪਜ੍ਜੋਤੇਨ ਪਹਿਤਂ – ਬਹੂਨਂ ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਨਯਿਦਂ ਅਞ੍ਞੋ ਕੋਚਿ ਪਚ੍ਚਾਰਹਤਿ ਅਞ੍ਞਤ੍ਰ ਤੇਨ ਭਗਵਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ, ਰਞ੍ਞਾ ਵਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨਾ’’ਤਿ.
ਸਿਵੇਯ੍ਯਕਦੁਸ੍ਸਯੁਗਕਥਾ ਨਿਟ੍ਠਿਤਾ.
੨੦੯. ਸਮਤ੍ਤਿਂਸਵਿਰੇਚਨਕਥਾ
੩੩੬. ਤੇਨ ਖੋ ਪਨ ਸਮਯੇਨ ਭਗਵਤੋ ਕਾਯੋ ਦੋਸਾਭਿਸਨ੍ਨੋ ਹੋਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਦੋਸਾਭਿਸਨ੍ਨੋ ਖੋ, ਆਨਨ੍ਦ, ਤਥਾਗਤਸ੍ਸ ਕਾਯੋ. ਇਚ੍ਛਤਿ ਤਥਾਗਤੋ ਵਿਰੇਚਨਂ ਪਾਤੁ’’ਨ੍ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਦੋਸਾਭਿਸਨ੍ਨੋ ਖੋ, ਆਵੁਸੋ ਜੀਵਕ, ਤਥਾਗਤਸ੍ਸ ਕਾਯੋ. ਇਚ੍ਛਤਿ ਤਥਾਗਤੋ ਵਿਰੇਚਨਂ ਪਾਤੁ’’ਨ੍ਤਿ. ‘‘ਤੇਨ ਹਿ, ਭਨ੍ਤੇ ਆਨਨ੍ਦ, ਭਗਵਤੋ ਕਾਯਂ ਕਤਿਪਾਹਂ ਸਿਨੇਹੇਥਾ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਕਾਯਂ ਕਤਿਪਾਹਂ ਸਿਨੇਹੇਤ੍ਵਾ ਯੇਨ ਜੀਵਕੋ ਕੋਮਾਰਭਚ੍ਚੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਜੀਵਕਂ ਕੋਮਾਰਭਚ੍ਚਂ ਏਤਦਵੋਚ – ‘‘ਸਿਨਿਦ੍ਧੋ ਖੋ, ਆਵੁਸੋ ਜੀਵਕ, ਤਥਾਗਤਸ੍ਸ ਕਾਯੋ. ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਦਹੋਸਿ – ‘‘ਨ ਖੋ ਮੇਤਂ ਪਤਿਰੂਪਂ ਯੋਹਂ ਭਗਵਤੋ ਓਲ਼ਾਰਿਕਂ ਵਿਰੇਚਨਂ ਦਦੇਯ੍ਯ’’ਨ੍ਤਿ. ਤੀਣਿ ਉਪ੍ਪਲਹਤ੍ਥਾਨਿ ਨਾਨਾਭੇਸਜ੍ਜੇਹਿ ਪਰਿਭਾਵੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਏਕਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਪਠਮਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਦੁਤਿਯਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਦੁਤਿਯਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਤਤਿਯਂ ਉਪ੍ਪਲਹਤ੍ਥਂ ਭਗਵਤੋ ਉਪਨਾਮੇਸਿ – ‘‘ਇਮਂ, ਭਨ੍ਤੇ, ਭਗਵਾ ਤਤਿਯਂ ਉਪ੍ਪਲਹਤ੍ਥਂ ਉਪਸਿਙ੍ਘਤੁ. ਇਦਂ ਭਗਵਨ੍ਤਂ ਦਸਕ੍ਖਤ੍ਤੁਂ ਵਿਰੇਚੇਸ੍ਸਤੀ’’ਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤ੍ਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤ੍ਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’’ਤਿ.
ਅਥ ਖੋ ਭਗਵਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਇਧਾਨਨ੍ਦ, ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’ਤਿ. ਤੇਨ ਹਾਨਨ੍ਦ, ਉਣ੍ਹੋਦਕਂ ਪਟਿਯਾਦੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਉਣ੍ਹੋਦਕਂ ਪਟਿਯਾਦੇਸਿ.
ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਵਿਰਿਤ੍ਤੋ, ਭਨ੍ਤੇ, ਭਗਵਾ’’ਤਿ? ‘‘ਵਿਰਿਤ੍ਤੋਮ੍ਹਿ, ਜੀਵਕਾ’’ਤਿ. ਇਧ ਮਯ੍ਹਂ, ਭਨ੍ਤੇ, ਬਹਿ ਦ੍ਵਾਰਕੋਟ੍ਠਕਾ ਨਿਕ੍ਖਨ੍ਤਸ੍ਸ ਏਤਦਹੋਸਿ – ‘‘ਮਯਾ ਖੋ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਦਿਨ੍ਨਂ. ਦੋਸਾਭਿਸਨ੍ਨੋ ਤਥਾਗਤਸ੍ਸ ਕਾਯੋ. ਨ ਭਗਵਨ੍ਤਂ ਸਮਤ੍ਤਿਂਸਕ੍ਖਤ੍ਤੁਂ ਵਿਰੇਚੇਸ੍ਸਤਿ, ਏਕੂਨਤ੍ਤਿਂਸਕ੍ਖਤ੍ਤੁਂ ਭਗਵਨ੍ਤਂ ਵਿਰੇਚੇਸ੍ਸਤਿ. ਅਪਿ ਚ, ਭਗਵਾ ਵਿਰਿਤ੍ਤੋ ਨਹਾਯਿਸ੍ਸਤਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸ੍ਸਤਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਭਵਿਸ੍ਸਤੀ’’ਤਿ. ਨਹਾਯਤੁ, ਭਨ੍ਤੇ, ਭਗਵਾ, ਨਹਾਯਤੁ ਸੁਗਤੋਤਿ. ਅਥ ਖੋ ਭਗਵਾ ਉਣ੍ਹੋਦਕਂ ਨਹਾਯਿ. ਨਹਾਤਂ ਭਗਵਨ੍ਤਂ ਸਕਿਂ ਵਿਰੇਚੇਸਿ. ਏਵਂ ਭਗਵਤੋ ਸਮਤ੍ਤਿਂਸਾਯ ਵਿਰੇਚਨਂ ਅਹੋਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਯਾਵ, ਭਨ੍ਤੇ, ਭਗਵਤੋ ਕਾਯੋ ਪਕਤਤ੍ਤੋ ਹੋਤਿ, ਅਲਂ [ਅਹਂ ਤਾਵ ਯੂਸਪਿਣ੍ਟਪਾਤੇਨਾਤਿ (ਸੀ.), ਅਲਂ ਯੂਸਪਿਣ੍ਟਕੇਨਾਤਿ (ਸ੍ਯਾ.)] ਯੂਸਪਿਣ੍ਡਪਾਤੇਨਾ’’ਤਿ.
ਸਮਤ੍ਤਿਂਸਵਿਰੇਚਨਕਥਾ ਨਿਟ੍ਠਿਤਾ.
੨੧੦. ਵਰਯਾਚਨਾਕਥਾ
੩੩੭. ਅਥ ਖੋ ਭਗਵਤੋ ਕਾਯੋ ਨਚਿਰਸ੍ਸੇਵ ਪਕਤਤ੍ਤੋ ਅਹੋਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਸਿਵੇਯ੍ਯਕਂ ਦੁਸ੍ਸਯੁਗਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਏਕਾਹਂ, ਭਨ੍ਤੇ, ਭਗਵਨ੍ਤਂ ਵਰਂ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਜੀਵਕ, ਤਥਾਗਤਾ’’ਤਿ. ‘‘ਯਞ੍ਚ, ਭਨ੍ਤੇ, ਕਪ੍ਪਤਿ ਯਞ੍ਚ ਅਨਵਜ੍ਜ’’ਨ੍ਤਿ. ‘‘ਵਦੇਹਿ, ਜੀਵਕਾ’’ਤਿ. ‘‘ਭਗਵਾ, ਭਨ੍ਤੇ, ਪਂਸੁਕੂਲਿਕੋ, ਭਿਕ੍ਖੁਸਙ੍ਘੋ ਚ. ਇਦਂ ਮੇ, ਭਨ੍ਤੇ, ਸਿਵੇਯ੍ਯਕਂ ਦੁਸ੍ਸਯੁਗਂ ਰਞ੍ਞਾ ਪਜ੍ਜੋਤੇਨ ਪਹਿਤਂ – ਬਹੂਨਂ ਦੁਸ੍ਸਾਨਂ ਬਹੂਨਂ ਦੁਸ੍ਸਯੁਗਾਨਂ ਬਹੂਨਂ ਦੁਸ੍ਸਯੁਗਸਤਾਨਂ ਬਹੂਨਂ ਦੁਸ੍ਸਯੁਗਸਹਸ੍ਸਾਨਂ ਬਹੂਨਂ ਦੁਸ੍ਸਯੁਗਸਤਸਹਸ੍ਸਾਨਂ ਅਗ੍ਗਞ੍ਚ ਸੇਟ੍ਠਞ੍ਚ ਮੋਕ੍ਖਞ੍ਚ ਉਤ੍ਤਮਞ੍ਚ ਪਵਰਞ੍ਚ. ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਸਿਵੇਯ੍ਯਕਂ ਦੁਸ੍ਸਯੁਗਂ; ਭਿਕ੍ਖੁਸਙ੍ਘਸ੍ਸ ਚ ਗਹਪਤਿਚੀਵਰਂ ਅਨੁਜਾਨਾਤੂ’’ਤਿ. ਪਟਿਗ੍ਗਹੇਸਿ ਭਗਵਾ ਸਿਵੇਯ੍ਯਕਂ ਦੁਸ੍ਸਯੁਗਂ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਗਹਪਤਿਚੀਵਰਂ. ਯੋ ਇਚ੍ਛਤਿ, ਪਂਸੁਕੂਲਿਕੋ ਹੋਤੁ. ਯੋ ਇਚ੍ਛਤਿ, ਗਹਪਤਿਚੀਵਰਂ ਸਾਦਿਯਤੁ. ਇਤਰੀਤਰੇਨਪਾਹਂ [ਪਹਂ (ਸੀ.), ਚਾਹਂ (ਸ੍ਯਾ.)], ਭਿਕ੍ਖਵੇ, ਸਨ੍ਤੁਟ੍ਠਿਂ ਵਣ੍ਣੇਮੀ’’ਤਿ.
ਅਸ੍ਸੋਸੁਂ ਖੋ ਰਾਜਗਹੇ ਮਨੁਸ੍ਸਾ – ‘‘ਭਗਵਤਾ ਕਿਰ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਤੇ ਚ ਮਨੁਸ੍ਸਾ ਹਟ੍ਠਾ ਅਹੇਸੁਂ ਉਦਗ੍ਗਾ ‘‘ਇਦਾਨਿ ਖੋ ਮਯਂ ਦਾਨਾਨਿ ਦਸ੍ਸਾਮ ਪੁਞ੍ਞਾਨਿ ਕਰਿਸ੍ਸਾਮ, ਯਤੋ ਭਗਵਤਾ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਏਕਾਹੇਨੇਵ ਰਾਜਗਹੇ ਬਹੂਨਿ ਚੀਵਰਸਹਸ੍ਸਾਨਿ ਉਪ੍ਪਜ੍ਜਿਂਸੁ.
ਅਸ੍ਸੋਸੁਂ ਖੋ ਜਾਨਪਦਾ ਮਨੁਸ੍ਸਾ – ‘‘ਭਗਵਤਾ ਕਿਰ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਤੇ ਚ ਮਨੁਸ੍ਸਾ ਹਟ੍ਠਾ ਅਹੇਸੁਂ ਉਦਗ੍ਗਾ – ‘‘ਇਦਾਨਿ ਖੋ ਮਯਂ ਦਾਨਾਨਿ ਦਸ੍ਸਾਮ ਪੁਞ੍ਞਾਨਿ ਕਰਿਸ੍ਸਾਮ, ਯਤੋ ਭਗਵਤਾ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਞ੍ਞਾਤ’’ਨ੍ਤਿ. ਜਨਪਦੇਪਿ ਏਕਾਹੇਨੇਵ ਬਹੂਨਿ ਚੀਵਰਸਹਸ੍ਸਾਨਿ ਉਪ੍ਪਜ੍ਜਿਂਸੁ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਪਾਵਾਰੋ ਉਪ੍ਪਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਵਾਰਨ੍ਤਿ.
ਕੋਸੇਯ੍ਯਪਾਵਾਰੋ ਉਪ੍ਪਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਸੇਯ੍ਯਪਾਵਾਰਨ੍ਤਿ.
ਕੋਜਵਂ ਉਪ੍ਪਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਜਵਨ੍ਤਿ.
ਵਰਯਾਚਨਾਕਥਾ ਨਿਟ੍ਠਿਤਾ.
ਪਠਮਭਾਣਵਾਰੋ ਨਿਟ੍ਠਿਤੋ.
੨੧੧. ਕਮ੍ਬਲਾਨੁਜਾਨਨਾਦਿਕਥਾ
੩੩੮. ਤੇਨ ਖੋ ਪਨ ਸਮਯੇਨ ਕਾਸਿਰਾਜਾ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਡ੍ਢਕਾਸਿਕਂ ਕਮ੍ਬਲਂ ਪਾਹੇਸਿ ਉਪਡ੍ਢਕਾਸਿਨਂ ਖਮਮਾਨਂ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਅਡ੍ਢਕਾਸਿਕਂ ਕਮ੍ਬਲਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਅਯਂ ਮੇ, ਭਨ੍ਤੇ, ਅਡ੍ਢਕਾਸਿਕੋ ਕਮ੍ਬਲੋ ਕਾਸਿਰਞ੍ਞਾ ਪਹਿਤੋ ਉਪਡ੍ਢਕਾਸਿਨਂ ਖਮਮਾਨੋ. ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਕਮ੍ਬਲਂ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਕਮ੍ਬਲਂ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ…ਪੇ… ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਕਮ੍ਬਲ’’ਨ੍ਤਿ.
੩੩੯. ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਉਚ੍ਚਾਵਚਾਨਿ ਚੀਵਰਾਨਿ ਉਪ੍ਪਨ੍ਨਾਨਿ ਹੋਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਭਗਵਤਾ ਚੀਵਰਂ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਛ ਚੀਵਰਾਨਿ – ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗਨ੍ਤਿ.
੩੪੦. ਤੇਨ ਖੋ ਪਨ ਸਮਯੇਨ ਯੇ ਤੇ ਭਿਕ੍ਖੂ ਗਹਪਤਿਚੀਵਰਂ ਸਾਦਿਯਨ੍ਤਿ ਤੇ ਕੁਕ੍ਕੁਚ੍ਚਾਯਨ੍ਤਾ ਪਂਸੁਕੂਲਂ ਨ ਸਾਦਿਯਨ੍ਤਿ – ਏਕਂਯੇਵ ਭਗਵਤਾ ਚੀਵਰਂ ਅਨੁਞ੍ਞਾਤਂ, ਨ ਦ੍ਵੇਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਗਹਪਤਿਚੀਵਰਂ ਸਾਦਿਯਨ੍ਤੇਨ ਪਂਸੁਕੂਲਮ੍ਪਿ ਸਾਦਿਯਿਤੁਂ; ਤਦੁਭਯੇਨਪਾਹਂ, ਭਿਕ੍ਖਵੇ, ਸਨ੍ਤੁਟ੍ਠਿਂ ਵਣ੍ਣੇਮੀਤਿ.
ਕਮ੍ਬਲਾਨੁਜਾਨਨਾਦਿਕਥਾ ਨਿਟ੍ਠਿਤਾ.
੨੧੨. ਪਂਸੁਕੂਲਪਰਿਯੇਸਨਕਥਾ
੩੪੧. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਨਾਗਮੇਸੁਂ. ਯੇ ਤੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਨਾਗਮੇਸੁਂ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨਾਗਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਨਾਗਮੇਨ੍ਤਾਨਂ ਨਾਕਾਮਾ ਭਾਗਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਆਗਮੇਸੁਂ. ਯੇ ਤੇ ਭਿਕ੍ਖੂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਆਗਮੇਸੁਂ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਓਕ੍ਕਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਗਮੇਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕਚ੍ਚੇ ਭਿਕ੍ਖੂ ਪਠਮਂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ, ਏਕਚ੍ਚੇ ਭਿਕ੍ਖੂ ਪਚ੍ਛਾ ਓਕ੍ਕਮਿਂਸੁ. ਯੇ ਤੇ ਭਿਕ੍ਖੂ ਪਠਮਂ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ ਤੇ ਪਂਸੁਕੂਲਾਨਿ ਲਭਿਂਸੁ. ਯੇ ਤੇ ਭਿਕ੍ਖੂ ਪਚ੍ਛਾ ਓਕ੍ਕਮਿਂਸੁ ਤੇ ਨ ਲਭਿਂਸੁ. ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਪਚ੍ਛਾ ਓਕ੍ਕਮਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਛਾ ਓਕ੍ਕਨ੍ਤਾਨਂ ਨਾਕਾਮਾ ਭਾਗਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਸਦਿਸਾ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ. ਏਕਚ੍ਚੇ ਭਿਕ੍ਖੂ ਪਂਸੁਕੂਲਾਨਿ ਲਭਿਂਸੁ, ਏਕਚ੍ਚੇ ਭਿਕ੍ਖੂ ਨ ਲਭਿਂਸੁ. ਯੇ ਤੇ ਭਿਕ੍ਖੂ ਨ ਲਭਿਂਸੁ, ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਲਭਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਦਿਸਾਨਂ ਓਕ੍ਕਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਤੇ ਕਤਿਕਂ ਕਤ੍ਵਾ ਸੁਸਾਨਂ ਓਕ੍ਕਮਿਂਸੁ ਪਂਸੁਕੂਲਾਯ. ਏਕਚ੍ਚੇ ਭਿਕ੍ਖੂ ਪਂਸੁਕੂਲਾਨਿ ਲਭਿਂਸੁ, ਏਕਚ੍ਚੇ ਭਿਕ੍ਖੂ ਨ ਲਭਿਂਸੁ. ਯੇ ਤੇ ਭਿਕ੍ਖੂ ਨ ਲਭਿਂਸੁ ਤੇ ਏਵਮਾਹਂਸੁ – ‘‘ਅਮ੍ਹਾਕਮ੍ਪਿ, ਆਵੁਸੋ, ਭਾਗਂ ਦੇਥਾ’’ਤਿ. ਤੇ ਏਵਮਾਹਂਸੁ – ‘‘ਨ ਮਯਂ, ਆਵੁਸੋ, ਤੁਮ੍ਹਾਕਂ ਭਾਗਂ ਦਸ੍ਸਾਮ. ਕਿਸ੍ਸ ਤੁਮ੍ਹੇ ਨ ਲਭਿਤ੍ਥਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਤਿਕਂ ਕਤ੍ਵਾ ਓਕ੍ਕਨ੍ਤਾਨਂ ਅਕਾਮਾ ਭਾਗਂ ਦਾਤੁਨ੍ਤਿ.
ਪਂਸੁਕੂਲਪਰਿਯੇਸਨਕਥਾ ਨਿਟ੍ਠਿਤਾ.
੨੧੩. ਚੀਵਰਪਟਿਗ੍ਗਾਹਕਸਮ੍ਮੁਤਿਕਥਾ
੩੪੨. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਚੀਵਰਂ ਆਦਾਯ ਆਰਾਮਂ ਆਗਚ੍ਛਨ੍ਤਿ. ਤੇ ਪਟਿਗ੍ਗਾਹਕਂ ਅਲਭਮਾਨਾ ਪਟਿਹਰਨ੍ਤਿ. ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗਹਿਤਾਗਹਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਪਟਿਗ੍ਗਾਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਪਟਿਗ੍ਗਾਹਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਤੇਨ ਖੋ ਪਨ ਸਮਯੇਨ ਚੀਵਰਪਟਿਗ੍ਗਾਹਕਾ ਭਿਕ੍ਖੂ ਚੀਵਰਂ ਪਟਿਗ੍ਗਹੇਤ੍ਵਾ ਤਤ੍ਥੇਵ ਉਜ੍ਝਿਤ੍ਵਾ ਪਕ੍ਕਮਨ੍ਤਿ. ਚੀਵਰਂ ਨਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਨਿਹਿਤਾਨਿਹਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਨਿਦਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਨਿਦਹਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਚੀਵਰਪਟਿਗ੍ਗਾਹਕਸਮ੍ਮੁਤਿਕਥਾ ਨਿਟ੍ਠਿਤਾ.
੨੧੪. ਭਣ੍ਡਾਗਾਰਸਮ੍ਮੁਤਿਆਦਿਕਥਾ
੩੪੩. ਤੇਨ ਖੋ ਪਨ ਸਮਯੇਨ ਚੀਵਰਨਿਦਹਕੋ ਭਿਕ੍ਖੁ ਮਣ੍ਡਪੇਪਿ ਰੁਕ੍ਖਮੂਲੇਪਿ ਨਿਬ੍ਬਕੋਸੇਪਿ ਚੀਵਰਂ ਨਿਦਹਤਿ, ਉਨ੍ਦੂਰੇਹਿਪਿ ਉਪਚਿਕਾਹਿਪਿ ਖਜ੍ਜਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਣ੍ਡਾਗਾਰਂ ਸਮ੍ਮਨ੍ਨਿਤੁਂ, ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਭਣ੍ਡਾਗਾਰਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਭਣ੍ਡਾਗਾਰਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਵਿਹਾਰਸ੍ਸ ਭਣ੍ਡਾਗਾਰਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਵਿਹਾਰੋ ਭਣ੍ਡਾਗਾਰਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਭਣ੍ਡਾਗਾਰੇ ਚੀਵਰਂ ਅਗੁਤ੍ਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗੁਤ੍ਤਾਗੁਤ੍ਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਭਣ੍ਡਾਗਾਰਿਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਭਣ੍ਡਾਗਾਰਿਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਣ੍ਡਾਗਾਰਿਕਂ ਵੁਟ੍ਠਾਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਭਣ੍ਡਾਗਾਰਿਕੋ ਵੁਟ੍ਠਾਪੇਤਬ੍ਬੋ. ਯੋ ਵੁਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਭਣ੍ਡਾਗਾਰੇ ਚੀਵਰਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘੋ ਚੀਵਰਂ ਭਾਜੇਨ੍ਤੋ ਕੋਲਾਹਲਂ ਅਕਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨਿਤੁਂ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਭਾਜਿਤਾਭਾਜਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ; ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਭਾਜਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਭਾਜਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਚੀਵਰਂ ਭਾਜੇਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਉਚ੍ਚਿਨਿਤ੍ਵਾ ਤੁਲਯਿਤ੍ਵਾ ਵਣ੍ਣਾਵਣ੍ਣਂ ਕਤ੍ਵਾ ਭਿਕ੍ਖੂ ਗਣੇਤ੍ਵਾ ਵਗ੍ਗਂ ਬਨ੍ਧਿਤ੍ਵਾ ਚੀਵਰਪਟਿਵੀਸਂ ਠਪੇਤੁਨ੍ਤਿ.
ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਸਾਮਣੇਰਾਨਂ ਚੀਵਰਪਟਿਵੀਸੋ ਦਾਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਉਪਡ੍ਢਪਟਿਵੀਸਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਕੇਨ ਭਾਗੇਨ ਉਤ੍ਤਰਿਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਤ੍ਤਰਨ੍ਤਸ੍ਸ ਸਕਂ ਭਾਗਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਤਿਰੇਕਭਾਗੇਨ ਉਤ੍ਤਰਿਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਨੁਕ੍ਖੇਪੇ ਦਿਨ੍ਨੇ ਅਤਿਰੇਕਭਾਗਂ ਦਾਤੁਨ੍ਤਿ.
ਅਥ ਖੋ ਚੀਵਰਭਾਜਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਚੀਵਰਪਟਿਵੀਸੋ ਦਾਤਬ੍ਬੋ, ਆਗਤਪਟਿਪਾਟਿਯਾ [ਆਗਤਾਗਤਪਟਿਪਾਟਿਯਾ (ਕ.)] ਨੁ ਖੋ ਉਦਾਹੁ ਯਥਾਵੁਡ੍ਢ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਕਲਕੇ ਤੋਸੇਤ੍ਵਾ ਕੁਸਪਾਤਂ ਕਾਤੁਨ੍ਤਿ.
ਭਣ੍ਡਾਗਾਰਸਮ੍ਮੁਤਿਆਦਿਕਥਾ ਨਿਟ੍ਠਿਤਾ.
੨੧੫. ਚੀਵਰਰਜਨਕਥਾ
੩੪੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਕਣੇਨਪਿ ਪਣ੍ਡੁਮਤ੍ਤਿਕਾਯਪਿ ਚੀਵਰਂ ਰਜਨ੍ਤਿ. ਚੀਵਰਂ ਦੁਬ੍ਬਣ੍ਣਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਛ ਰਜਨਾਨਿ – ਮੂਲਰਜਨਂ, ਖਨ੍ਧਰਜਨਂ, ਤਚਰਜਨਂ, ਪਤ੍ਤਰਜਨਂ, ਪੁਪ੍ਫਰਜਨਂ, ਫਲਰਜਨਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸੀਤੁਦਕਾਯ [ਸੀਤੁਨ੍ਦਿਕਾਯ (ਸੀ.), ਸੀਤੂਦਕਾਯ (ਸ੍ਯਾ.)] ਚੀਵਰਂ ਰਜਨ੍ਤਿ. ਚੀਵਰਂ ਦੁਗ੍ਗਨ੍ਧਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਂ ਪਚਿਤੁਂ ਚੁਲ੍ਲਂ ਰਜਨਕੁਮ੍ਭਿਨ੍ਤਿ. ਰਜਨਂ ਉਤ੍ਤਰਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਤ੍ਤਰਾਲ਼ੁਮ੍ਪਂ [ਉਤ੍ਤਰਾਲ਼ੁਪਂ (ਯੋਜਨਾ), ਉਤ੍ਤਰਾਲ਼ੁਪਂ (ਸ੍ਯਾ.)] ਬਨ੍ਧਿਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨ ਜਾਨਨ੍ਤਿ ਰਜਨਂ ਪਕ੍ਕਂ ਵਾ ਅਪਕ੍ਕਂ ਵਾ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਦਕੇ ਵਾ ਨਖਪਿਟ੍ਠਿਕਾਯ ਵਾ ਥੇਵਕਂ ਦਾਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਰਜਨਂ ਓਰੋਪੇਨ੍ਤਾ ਕੁਮ੍ਭਿਂ ਆਵਿਞ੍ਛਨ੍ਤਿ [ਆਵਿਞ੍ਜਨ੍ਤਿ (ਸੀ.), ਆਵਟ੍ਟਨ੍ਤਿ (ਸ੍ਯਾ.)]. ਕੁਮ੍ਭੀ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨੁਲ਼ੁਙ੍ਕਂ [ਰਜਨਾਲ਼ੁਙ੍ਕਂ (ਯੋਜਨਾ)] ਦਣ੍ਡਕਥਾਲਕਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਰਜਨਭਾਜਨਂ ਨ ਸਂਵਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਕੋਲਮ੍ਬਂ ਰਜਨਘਟਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਾਤਿਯਾਪਿ ਪਤ੍ਤੇਪਿ ਚੀਵਰਂ ਓਮਦ੍ਦਨ੍ਤਿ. ਚੀਵਰਂ ਪਰਿਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਰਜਨਦੋਣਿਕਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਮਾਯ ਚੀਵਰਂ ਪਤ੍ਥਰਨ੍ਤਿ. ਚੀਵਰਂ ਪਂਸੁਕਿਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਿਣਸਨ੍ਥਾਰਕਨ੍ਤਿ.
ਤਿਣਸਨ੍ਥਾਰਕੋ ਉਪਚਿਕਾਹਿ ਖਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਵਂਸਂ ਚੀਵਰਰਜ੍ਜੁਨ੍ਤਿ.
ਮਜ੍ਝੇਨ ਲਗ੍ਗੇਨ੍ਤਿ. ਰਜਨਂ ਉਭਤੋ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣੇ ਬਨ੍ਧਿਤੁਨ੍ਤਿ.
ਕਣ੍ਣੋ ਜੀਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕਨ੍ਤਿ.
ਰਜਨਂ ਏਕਤੋ ਗਲਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜੇਤੁਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਚੀਵਰਂ ਪਤ੍ਥਿਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਦਕੇ ਓਸਾਰੇਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਚੀਵਰਂ ਫਰੁਸਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਾਣਿਨਾ ਆਕੋਟੇਤੁਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਚ੍ਛਿਨ੍ਨਕਾਨਿ ਚੀਵਰਾਨਿ ਧਾਰੇਨ੍ਤਿ ਦਨ੍ਤਕਾਸਾਵਾਨਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਨਾਮ [ਸੇਯ੍ਯਥਾਪਿ (?)] ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਚ੍ਛਿਨ੍ਨਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.
ਚੀਵਰਰਜਨਕਥਾ ਨਿਟ੍ਠਿਤਾ.
੨੧੬. ਛਿਨ੍ਨਕਚੀਵਰਾਨੁਜਾਨਨਾ
੩੪੫. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਦਕ੍ਖਿਣਾਗਿਰਿ ਤੇਨ ਚਾਰਿਕਂ ਪਕ੍ਕਾਮਿ. ਅਦ੍ਦਸਾ ਖੋ ਭਗਵਾ ਮਗਧਖੇਤ੍ਤਂ ਅਚ੍ਛਿਬਦ੍ਧਂ [ਅਚ੍ਚਿਬਦ੍ਧਂ (ਸੀ. ਸ੍ਯਾ.), ਅਚ੍ਛਿਬਨ੍ਧਂ (ਕ.)] ਪਾਲ਼ਿਬਦ੍ਧਂ ਮਰਿਯਾਦਬਦ੍ਧਂ ਸਿਙ੍ਘਾਟਕਬਦ੍ਧਂ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਆਨਨ੍ਦ, ਮਗਧਖੇਤ੍ਤਂ ਅਚ੍ਛਿਬਦ੍ਧਂ ਪਾਲ਼ਿਬਦ੍ਧਂ ਮਰਿਯਾਦਬਦ੍ਧਂ ਸਿਙ੍ਘਾਟਕਬਦ੍ਧ’’ਨ੍ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਉਸ੍ਸਹਸਿ ਤ੍ਵਂ, ਆਨਨ੍ਦ, ਭਿਕ੍ਖੂਨਂ ਏਵਰੂਪਾਨਿ ਚੀਵਰਾਨਿ ਸਂਵਿਦਹਿਤੁ’’ਨ੍ਤਿ? ‘‘ਉਸ੍ਸਹਾਮਿ, ਭਗਵਾ’’ਤਿ. ਅਥ ਖੋ ਭਗਵਾ ਦਕ੍ਖਿਣਾਗਿਰਿਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਸਮ੍ਬਹੁਲਾਨਂ ਭਿਕ੍ਖੂਨਂ ਚੀਵਰਾਨਿ ਸਂਵਿਦਹਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਪਸ੍ਸਤੁ ਮੇ [ਪਸ੍ਸਥ ਤੁਮ੍ਹੇ (ਕ.)], ਭਨ੍ਤੇ, ਭਗਵਾ ਚੀਵਰਾਨਿ ਸਂਵਿਦਹਿਤਾਨੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਣ੍ਡਿਤੋ, ਭਿਕ੍ਖਵੇ, ਆਨਨ੍ਦੋ; ਮਹਾਪਞ੍ਞੋ, ਭਿਕ੍ਖਵੇ, ਆਨਨ੍ਦੋ; ਯਤ੍ਰ ਹਿ ਨਾਮ ਮਯਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਿਸ੍ਸਤਿ, ਕੁਸਿਮ੍ਪਿ ਨਾਮ ਕਰਿਸ੍ਸਤਿ, ਅਡ੍ਢਕੁਸਿਮ੍ਪਿ ਨਾਮ ਕਰਿਸ੍ਸਤਿ, ਮਣ੍ਡਲਮ੍ਪਿ ਨਾਮ ਕਰਿਸ੍ਸਤਿ, ਅਡ੍ਢਮਣ੍ਡਲਮ੍ਪਿ ਨਾਮ ਕਰਿਸ੍ਸਤਿ, ਵਿਵਟ੍ਟਮ੍ਪਿ ਨਾਮ ਕਰਿਸ੍ਸਤਿ, ਅਨੁਵਿਵਟ੍ਟਮ੍ਪਿ ਨਾਮ ਕਰਿਸ੍ਸਤਿ, ਗੀਵੇਯ੍ਯਕਮ੍ਪਿ ਨਾਮ ਕਰਿਸ੍ਸਤਿ, ਜਙ੍ਘੇਯ੍ਯਕਮ੍ਪਿ ਨਾਮ ਕਰਿਸ੍ਸਤਿ, ਬਾਹਨ੍ਤਮ੍ਪਿ ਨਾਮ ਕਰਿਸ੍ਸਤਿ, ਛਿਨ੍ਨਕਂ ਭਵਿਸ੍ਸਤਿ, ਸਤ੍ਥਲੂਖਂ ਸਮਣਸਾਰੁਪ੍ਪਂ ਪਚ੍ਚਤ੍ਥਿਕਾਨਞ੍ਚ ਅਨਭਿਚ੍ਛਿਤਂ. ਅਨੁਜਾਨਾਮਿ, ਭਿਕ੍ਖਵੇ, ਛਿਨ੍ਨਕਂ ਸਙ੍ਘਾਟਿਂ ਛਿਨ੍ਨਕਂ ਉਤ੍ਤਰਾਸਙ੍ਗਂ ਛਿਨ੍ਨਕਂ ਅਨ੍ਤਰਵਾਸਕ’’ਨ੍ਤਿ.
ਛਿਨ੍ਨਕਚੀਵਰਾਨੁਜਾਨਨਾ ਨਿਟ੍ਠਿਤਾ.
੨੧੭. ਤਿਚੀਵਰਾਨੁਜਾਨਨਾ
੩੪੬. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਵੇਸਾਲੀ ਤੇਨ ਚਾਰਿਕਂ ਪਕ੍ਕਾਮਿ. ਅਦ੍ਦਸ ਖੋ ਭਗਵਾ ਅਨ੍ਤਰਾ ਚ ਰਾਜਗਹਂ ਅਨ੍ਤਰਾ ਚ ਵੇਸਾਲਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਸਮ੍ਬਹੁਲੇ ਭਿਕ੍ਖੂ ਚੀਵਰੇਹਿ ਉਬ੍ਭਣ੍ਡਿਤੇ [ਉਬ੍ਭਣ੍ਡੀਕਤੇ (ਸ੍ਯਾ.)] ਸੀਸੇਪਿ ਚੀਵਰਭਿਸਿਂ ਕਰਿਤ੍ਵਾ ਖਨ੍ਧੇਪਿ ਚੀਵਰਭਿਸਿਂ ਕਰਿਤ੍ਵਾ ਕਟਿਯਾਪਿ ਚੀਵਰਭਿਸਿਂ ਕਰਿਤ੍ਵਾ ਆਗਚ੍ਛਨ੍ਤੇ, ਦਿਸ੍ਵਾਨ ਭਗਵਤੋ ਏਤਦਹੋਸਿ – ‘‘ਅਤਿਲਹੁਂ ਖੋ ਇਮੇ ਮੋਘਪੁਰਿਸਾ ਚੀਵਰੇ ਬਾਹੁਲ੍ਲਾਯ ਆਵਤ੍ਤਾ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਵੇਸਾਲੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਵੇਸਾਲਿਯਂ ਵਿਹਰਤਿ ਗੋਤਮਕੇ ਚੇਤਿਯੇ. ਤੇਨ ਖੋ ਪਨ ਸਮਯੇਨ ਭਗਵਾ ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਰਤ੍ਤਿਂ ਅਜ੍ਝੋਕਾਸੇ ਏਕਚੀਵਰੋ ਨਿਸੀਦਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਠਮੇ ਯਾਮੇ ਸੀਤਂ ਭਗਵਨ੍ਤਂ ਅਹੋਸਿ. ਦੁਤਿਯਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਮਜ੍ਝਿਮੇ ਯਾਮੇ ਸੀਤਂ ਭਗਵਨ੍ਤਂ ਅਹੋਸਿ. ਤਤਿਯਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਚ੍ਛਿਮੇ ਯਾਮੇ ਉਦ੍ਧਸ੍ਤੇ ਅਰੁਣੇ ਨਨ੍ਦਿਮੁਖਿਯਾ ਰਤ੍ਤਿਯਾ ਸੀਤਂ ਭਗਵਨ੍ਤਂ ਅਹੋਸਿ. ਚਤੁਤ੍ਥਂ ਭਗਵਾ ਚੀਵਰਂ ਪਾਰੁਪਿ. ਨ ਭਗਵਨ੍ਤਂ ਸੀਤਂ ਅਹੋਸਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯੇਪਿ ਖੋ ਤੇ ਕੁਲਪੁਤ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਸੀਤਾਲੁਕਾ ਸੀਤਭੀਰੁਕਾ ਤੇਪਿ ਸਕ੍ਕੋਨ੍ਤਿ ਤਿਚੀਵਰੇਨ ਯਾਪੇਤੁਂ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯਂ, ਤਿਚੀਵਰਂ ਅਨੁਜਾਨੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧਾਹਂ, ਭਿਕ੍ਖਵੇ, ਅਨ੍ਤਰਾ ਚ ਰਾਜਗਹਂ ਅਨ੍ਤਰਾ ਚ ਵੇਸਾਲਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਅਦ੍ਦਸਂ ਸਮ੍ਬਹੁਲੇ ਭਿਕ੍ਖੂ ਚੀਵਰੇਹਿ ਉਬ੍ਭਣ੍ਡਿਤੇ ਸੀਸੇਪਿ ਚੀਵਰਭਿਸਿਂ ਕਰਿਤ੍ਵਾ ਖਨ੍ਧੇਪਿ ਚੀਵਰਭਿਸਿਂ ਕਰਿਤ੍ਵਾ ਕਟਿਯਾਪਿ ਚੀਵਰਭਿਸਿਂ ਕਰਿਤ੍ਵਾ ਆਗਚ੍ਛਨ੍ਤੇ, ਦਿਸ੍ਵਾਨ ਮੇ ਏਤਦਹੋਸਿ – ‘ਅਤਿਲਹੁਂ ਖੋ ਇਮੇ ਮੋਘਪੁਰਿਸਾ ਚੀਵਰੇ ਬਾਹੁਲ੍ਲਾਯ ਆਵਤ੍ਤਾ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯ’ਨ੍ਤਿ. ਇਧਾਹਂ, ਭਿਕ੍ਖਵੇ, ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਰਤ੍ਤਿਂ ਅਜ੍ਝੋਕਾਸੇ ਏਕਚੀਵਰੋ ਨਿਸੀਦਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਠਮੇ ਯਾਮੇ ਸੀਤਂ ਮਂ ਅਹੋਸਿ. ਦੁਤਿਯਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਮਜ੍ਝਿਮੇ ਯਾਮੇ ਸੀਤਂ ਮਂ ਅਹੋਸਿ. ਤਤਿਯਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਨਿਕ੍ਖਨ੍ਤੇ ਪਚ੍ਛਿਮੇ ਯਾਮੇ ਉਦ੍ਧਸ੍ਤੇ ਅਰੁਣੇ ਨਨ੍ਦਿਮੁਖਿਯਾ ਰਤ੍ਤਿਯਾ ਸੀਤਂ ਮਂ ਅਹੋਸਿ. ਚਤੁਤ੍ਥਾਹਂ ਚੀਵਰਂ ਪਾਰੁਪਿਂ. ਨ ਮਂ ਸੀਤਂ ਅਹੋਸਿ. ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘‘ਯੇਪਿ ਖੋ ਤੇ ਕੁਲਪੁਤ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਸੀਤਾਲੁਕਾ ਸੀਤਭੀਰੁਕਾ ਤੇਪਿ ਸਕ੍ਕੋਨ੍ਤਿ ਤਿਚੀਵਰੇਨ ਯਾਪੇਤੁਂ. ਯਂਨੂਨਾਹਂ ਭਿਕ੍ਖੂਨਂ ਚੀਵਰੇ ਸੀਮਂ ਬਨ੍ਧੇਯ੍ਯਂ, ਮਰਿਯਾਦਂ ਠਪੇਯ੍ਯਂ, ਤਿਚੀਵਰਂ ਅਨੁਜਾਨੇਯ੍ਯ’ਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ – ਦਿਗੁਣਂ ਸਙ੍ਘਾਟਿਂ, ਏਕਚ੍ਚਿਯਂ ਉਤ੍ਤਰਾਸਙ੍ਗਂ, ਏਕਚ੍ਚਿਯਂ ਅਨ੍ਤਰਵਾਸਕ’’ਨ੍ਤਿ.
ਤਿਚੀਵਰਾਨੁਜਾਨਨਾ ਨਿਟ੍ਠਿਤਾ.
੨੧੮. ਅਤਿਰੇਕਚੀਵਰਕਥਾ
੩੪੭. [ਪਾਰਾ. ੪੬੧] ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਗਵਤਾ ਤਿਚੀਵਰਂ ਅਨੁਞ੍ਞਾਤਨ੍ਤਿ ਅਞ੍ਞੇਨੇਵ ਤਿਚੀਵਰੇਨ ਗਾਮਂ ਪਵਿਸਨ੍ਤਿ, ਅਞ੍ਞੇਨ ਤਿਚੀਵਰੇਨ ਆਰਾਮੇ ਅਚ੍ਛਨ੍ਤਿ, ਅਞ੍ਞੇਨ ਤਿਚੀਵਰੇਨ ਨਹਾਨਂ ਓਤਰਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਰੇਕਚੀਵਰਂ ਧਾਰੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਤਿਰੇਕਚੀਵਰਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.
[ਪਾਰਾ. ੪੬੧] ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਅਤਿਰੇਕਚੀਵਰਂ ਉਪ੍ਪਨ੍ਨਂ ਹੋਤਿ. ਆਯਸ੍ਮਾ ਚ ਆਨਨ੍ਦੋ ਤਂ ਚੀਵਰਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ ਹੋਤਿ. ਆਯਸ੍ਮਾ ਚ ਸਾਰਿਪੁਤ੍ਤੋ ਸਾਕੇਤੇ ਵਿਹਰਤਿ. ਅਥ ਖੋ ਆਯਸ੍ਮਤੋ ਆਨਨ੍ਦਸ੍ਸ ਏਤਦਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ ‘ਨ ਅਤਿਰੇਕਚੀਵਰਂ ਧਾਰੇਤਬ੍ਬ’ਨ੍ਤਿ. ਇਦਞ੍ਚ ਮੇ ਅਤਿਰੇਕਚੀਵਰਂ ਉਪ੍ਪਨ੍ਨਂ. ਅਹਞ੍ਚਿਮਂ ਚੀਵਰਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋ. ਆਯਸ੍ਮਾ ਚ ਸਾਰਿਪੁਤ੍ਤੋ ਸਾਕੇਤੇ ਵਿਹਰਤਿ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਕੀਵਚਿਰਂ ਪਨਾਨਨ੍ਦ, ਸਾਰਿਪੁਤ੍ਤੋ ਆਗਚ੍ਛਿਸ੍ਸਤੀ’’ਤਿ? ‘‘ਨਵਮਂ ਵਾ, ਭਗਵਾ, ਦਿਵਸਂ, ਦਸਮਂ ਵਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਅਤਿਰੇਕਚੀਵਰਂ ਉਪ੍ਪਨ੍ਨਂ ਹੋਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਥਂ ਨੁ ਖੋ ਅਮ੍ਹੇਹਿ ਅਤਿਰੇਕਚੀਵਰੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਅਤਿਰੇਕਚੀਵਰਂ ਵਿਕਪ੍ਪੇਤੁਨ੍ਤਿ.
੩੪੮. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਅਨ੍ਤਰਵਾਸਕੋ ਛਿਦ੍ਦੋ ਹੋਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਤਿਚੀਵਰਂ ਅਨੁਞ੍ਞਾਤਂ – ਦਿਗੁਣਾ ਸਙ੍ਘਾਟਿ, ਏਕਚ੍ਚਿਯੋ ਉਤ੍ਤਰਾਸਙ੍ਗੋ, ਏਕਚ੍ਚਿਯੋ ਅਨ੍ਤਰਵਾਸਕੋ. ਅਯਞ੍ਚ ਮੇ ਅਨ੍ਤਰਵਾਸਕੋ ਛਿਦ੍ਦੋ. ਯਂਨੂਨਾਹਂ ਅਗ੍ਗਲ਼ਂ ਅਚ੍ਛੁਪੇਯ੍ਯਂ, ਸਮਨ੍ਤਤੋ ਦੁਪਟ੍ਟਂ ਭਵਿਸ੍ਸਤਿ, ਮਜ੍ਝੇ ਏਕਚ੍ਚਿਯ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ ਅਗ੍ਗਲ਼ਂ ਅਚ੍ਛੁਪੇਸਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤਂ ਭਿਕ੍ਖੁਂ ਅਗ੍ਗਲ਼ਂ ਅਚ੍ਛੁਪੇਨ੍ਤਂ [ਅਚ੍ਛੁਪਨ੍ਤਂ (ਕ.)], ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਿਂ ਤ੍ਵਂ, ਭਿਕ੍ਖੁ, ਕਰੋਸੀ’’ਤਿ? ‘‘ਅਗ੍ਗਲ਼ਂ, ਭਗਵਾ, ਅਚ੍ਛੁਪੇਮੀ’’ਤਿ. ‘‘ਸਾਧੁ ਸਾਧੁ, ਭਿਕ੍ਖੁ; ਸਾਧੁ ਖੋ ਤ੍ਵਂ, ਭਿਕ੍ਖੁ, ਅਗ੍ਗਲ਼ਂ ਅਚ੍ਛੁਪੇਸੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਅਹਤਾਨਂ ਦੁਸ੍ਸਾਨਂ ਅਹਤਕਪ੍ਪਾਨਂ ਦਿਗੁਣਂ ਸਙ੍ਘਾਟਿਂ, ਏਕਚ੍ਚਿਯਂ ਉਤ੍ਤਰਾਸਙ੍ਗਂ, ਏਕਚ੍ਚਿਯਂ ਅਨ੍ਤਰਵਾਸਕਂ; ਉਤੁਦ੍ਧਟਾਨਂ ਦੁਸ੍ਸਾਨਂ ਚਤੁਗ੍ਗੁਣਂ ਸਙ੍ਘਾਟਿਂ, ਦਿਗੁਣਂ ਉਤ੍ਤਰਾਸਙ੍ਗਂ, ਦਿਗੁਣਂ ਅਨ੍ਤਰਵਾਸਕਂ; ਪਂਸੁਕੂਲੇ ਯਾਵਦਤ੍ਥਂ; ਪਾਪਣਿਕੇ ਉਸ੍ਸਾਹੋ ਕਰਣੀਯੋ. ਅਨੁਜਾਨਾਮਿ, ਭਿਕ੍ਖਵੇ, ਅਗ੍ਗਲ਼ਂ ਤੁਨ੍ਨਂ ਓਵਟ੍ਟਿਕਂ ਕਣ੍ਡੁਸਕਂ ਦਲ਼੍ਹੀਕਮ੍ਮ’’ਨ੍ਤਿ.
ਅਤਿਰੇਕਚੀਵਰਕਥਾ ਨਿਟ੍ਠਿਤਾ.
੨੧੯. ਵਿਸਾਖਾਵਤ੍ਥੁ
੩੪੯. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਵਿਸਾਖਂ ਮਿਗਾਰਮਾਤਰਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ, ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ, ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.
ਤੇਨ ਖੋ ਪਨ ਸਮਯੇਨ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਚਾਤੁਦ੍ਦੀਪਿਕੋ ਮਹਾਮੇਘੋ ਪਾਵਸ੍ਸਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਯਥਾ, ਭਿਕ੍ਖਵੇ, ਜੇਤਵਨੇ ਵਸ੍ਸਤਿ ਏਵਂ ਚਤੂਸੁ ਦੀਪੇਸੁ ਵਸ੍ਸਤਿ. ਓਵਸ੍ਸਾਪੇਥ, ਭਿਕ੍ਖਵੇ, ਕਾਯਂ. ਅਯਂ ਪਚ੍ਛਿਮਕੋ ਚਾਤੁਦ੍ਦੀਪਿਕੋ ਮਹਾਮੇਘੋ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਨਿਕ੍ਖਿਤ੍ਤਚੀਵਰਾ ਕਾਯਂ ਓਵਸ੍ਸਾਪੇਨ੍ਤਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ‘‘ਏਵਂ, ਅਯ੍ਯੇ’’ਤਿ ਖੋ ਸਾ ਦਾਸੀ ਵਿਸਾਖਾਯ ਮਿਗਾਰਮਾਤੁਯਾ ਪਟਿਸ੍ਸੁਣਿਤ੍ਵਾ ਆਰਾਮਂ ਗਨ੍ਤ੍ਵਾ ਅਦ੍ਦਸ ਭਿਕ੍ਖੂ ਨਿਕ੍ਖਿਤ੍ਤਚੀਵਰੇ ਕਾਯਂ ਓਵਸ੍ਸਾਪੇਨ੍ਤੇ, ਦਿਸ੍ਵਾਨ ‘ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’ਤਿ ਯੇਨ ਵਿਸਾਖਾ ਮਿਗਾਰਮਾਤਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਵਿਸਾਖਂ ਮਿਗਾਰਮਾਤਰਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ. ਅਥ ਖੋ ਵਿਸਾਖਾਯ ਮਿਗਾਰਮਾਤੁਯਾ ਪਣ੍ਡਿਤਾਯ ਵਿਯਤ੍ਤਾਯ ਮੇਧਾਵਿਨਿਯਾ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਅਯ੍ਯਾ ਨਿਕ੍ਖਿਤ੍ਤਚੀਵਰਾ ਕਾਯਂ ਓਵਸ੍ਸਾਪੇਨ੍ਤਿ. ਸਾਯਂ ਬਾਲਾ ਮਞ੍ਞਿਤ੍ਥ – ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ, ਪੁਨ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਗਤ੍ਤਾਨਿ ਸੀਤਿਂ ਕਰਿਤ੍ਵਾ [ਸੀਤੀਕਰਿਤ੍ਵਾ (ਸ੍ਯਾ.)] ਕਲ੍ਲਕਾਯਾ ਚੀਵਰਾਨਿ ਗਹੇਤ੍ਵਾ ਯਥਾਵਿਹਾਰਂ ਪਵਿਸਿਂਸੁ. ਅਥ ਖੋ ਸਾ ਦਾਸੀ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਅਪਸ੍ਸਨ੍ਤੀ ‘ਨਤ੍ਥਿ ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’ਤਿ ਯੇਨ ਵਿਸਾਖਾ ਮਿਗਾਰਮਾਤਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਵਿਸਾਖਂ ਮਿਗਾਰਮਾਤਰਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’’ਤਿ. ਅਥ ਖੋ ਵਿਸਾਖਾਯ ਮਿਗਾਰਮਾਤੁਯਾ ਪਣ੍ਡਿਤਾਯ ਵਿਯਤ੍ਤਾਯ ਮੇਧਾਵਿਨਿਯਾ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਅਯ੍ਯਾ ਗਤ੍ਤਾਨਿ ਸੀਤਿਂ ਕਰਿਤ੍ਵਾ ਕਲ੍ਲਕਾਯਾ ਚੀਵਰਾਨਿ ਗਹੇਤ੍ਵਾ ਯਥਾਵਿਹਾਰਂ ਪਵਿਟ੍ਠਾ. ਸਾਯਂ ਬਾਲਾ ਮਞ੍ਞਿਤ੍ਥ – ਨਤ੍ਥਿ ਆਰਾਮੇ ਭਿਕ੍ਖੂ, ਸੁਞ੍ਞੋ ਆਰਾਮੋ’’ਤਿ, ਪੁਨ ਦਾਸਿਂ ਆਣਾਪੇਸਿ – ‘‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ.
੩੫੦. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਸਨ੍ਦਹਥ [ਸਨ੍ਨਹਥ (ਸੀ. ਸ੍ਯਾ.)], ਭਿਕ੍ਖਵੇ, ਪਤ੍ਤਚੀਵਰਂ; ਕਾਲੋ ਭਤ੍ਤਸ੍ਸਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮ੍ਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ, ਏਵਮੇਵ – ਜੇਤਵਨੇ ਅਨ੍ਤਰਹਿਤੋ ਵਿਸਾਖਾਯ ਮਿਗਾਰਮਾਤੁਯਾ ਕੋਟ੍ਠਕੇ ਪਾਤੁਰਹੋਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਵਿਸਾਖਾ ਮਿਗਾਰਮਾਤਾ – ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਤਥਾਗਤਸ੍ਸ ਮਹਿਦ੍ਧਿਕਤਾ ਮਹਾਨੁਭਾਵਤਾ, ਯਤ੍ਰ ਹਿ ਨਾਮ ਜਣ੍ਣੁਕਮਤ੍ਤੇਸੁਪਿ ਓਘੇਸੁ ਪਵਤ੍ਤਮਾਨੇਸੁ, ਕਟਿਮਤ੍ਤੇਸੁਪਿ ਓਘੇਸੁ ਪਵਤ੍ਤਮਾਨੇਸੁ, ਨ ਹਿ ਨਾਮ ਏਕਭਿਕ੍ਖੁਸ੍ਸਪਿ [ਪਵਤ੍ਤਮਾਨੇਸੁ ਨ ਏਕਭਿਕ੍ਖੁਸ੍ਸਪਿ (?)] ਪਾਦਾ ਵਾ ਚੀਵਰਾਨਿ ਵਾ ਅਲ੍ਲਾਨਿ ਭਵਿਸ੍ਸਨ੍ਤੀ’’ਤਿ – ਹਟ੍ਠਾ ਉਦਗ੍ਗਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਅਟ੍ਠਾਹਂ, ਭਨ੍ਤੇ, ਭਗਵਨ੍ਤਂ ਵਰਾਨਿ ਯਾਚਾਮੀ’’ਤਿ. ‘‘ਅਤਿਕ੍ਕਨ੍ਤਵਰਾ ਖੋ, ਵਿਸਾਖੇ, ਤਥਾਗਤਾ’’ਤਿ. ‘‘ਯਾਨਿ ਚ, ਭਨ੍ਤੇ, ਕਪ੍ਪਿਯਾਨਿ ਯਾਨਿ ਚ ਅਨਵਜ੍ਜਾਨੀ’’ਤਿ. ‘‘ਵਦੇਹਿ, ਵਿਸਾਖੇ’’ਤਿ. ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਸ੍ਸ ਯਾਵਜੀਵਂ ਵਸ੍ਸਿਕਸਾਟਿਕਂ ਦਾਤੁਂ, ਆਗਨ੍ਤੁਕਭਤ੍ਤਂ ਦਾਤੁਂ, ਗਮਿਕਭਤ੍ਤਂ ਦਾਤੁਂ, ਗਿਲਾਨਭਤ੍ਤਂ ਦਾਤੁਂ, ਗਿਲਾਨੁਪਟ੍ਠਾਕਭਤ੍ਤਂ ਦਾਤੁਂ, ਗਿਲਾਨਭੇਸਜ੍ਜਂ ਦਾਤੁਂ, ਧੁਵਯਾਗੁਂ ਦਾਤੁਂ, ਭਿਕ੍ਖੁਨਿਸਙ੍ਘਸ੍ਸ ਉਦਕਸਾਟਿਕਂ ਦਾਤੁ’’ਨ੍ਤਿ. ‘‘ਕਿਂ ਪਨ ਤ੍ਵਂ, ਵਿਸਾਖੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ?
‘‘ਇਧਾਹਂ, ਭਨ੍ਤੇ, ਦਾਸਿਂ ਆਣਾਪੇਸਿਂ – ‘ਗਚ੍ਛ, ਜੇ. ਆਰਾਮਂ ਗਨ੍ਤ੍ਵਾ ਕਾਲਂ ਆਰੋਚੇਹਿ – ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’’ਨ੍ਤਿ. ਅਥ ਖੋ ਸਾ, ਭਨ੍ਤੇ, ਦਾਸੀ ਆਰਾਮਂ ਗਨ੍ਤ੍ਵਾ ਅਦ੍ਦਸ ਭਿਕ੍ਖੂ ਨਿਕ੍ਖਿਤ੍ਤਚੀਵਰੇ ਕਾਯਂ ਓਵਸ੍ਸਾਪੇਨ੍ਤੇ, ਦਿਸ੍ਵਾਨ ‘‘ਨਤ੍ਥਿ ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਏਤਦਵੋਚ – ‘‘ਨਤ੍ਥਯ੍ਯੇ, ਆਰਾਮੇ ਭਿਕ੍ਖੂ, ਆਜੀਵਕਾ ਕਾਯਂ ਓਵਸ੍ਸਾਪੇਨ੍ਤੀ’’ਤਿ. ਅਸੁਚਿ, ਭਨ੍ਤੇ, ਨਗ੍ਗਿਯਂ ਜੇਗੁਚ੍ਛਂ ਪਟਿਕੂਲਂ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਵਸ੍ਸਿਕਸਾਟਿਕਂ ਦਾਤੁਂ.
‘‘ਪੁਨ ਚਪਰਂ, ਭਨ੍ਤੇ, ਆਗਨ੍ਤੁਕੋ ਭਿਕ੍ਖੁ ਨ ਵੀਥਿਕੁਸਲੋ ਨ ਗੋਚਰਕੁਸਲੋ ਕਿਲਨ੍ਤੋ ਪਿਣ੍ਡਾਯ ਚਰਤਿ. ਸੋ ਮੇ ਆਗਨ੍ਤੁਕਭਤ੍ਤਂ ਭੁਞ੍ਜਿਤ੍ਵਾ ਵੀਥਿਕੁਸਲੋ ਗੋਚਰਕੁਸਲੋ ਅਕਿਲਨ੍ਤੋ ਪਿਣ੍ਡਾਯ ਚਰਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਆਗਨ੍ਤੁਕਭਤ੍ਤਂ ਦਾਤੁਂ.
‘‘ਪੁਨ ਚਪਰਂ, ਭਨ੍ਤੇ, ਗਮਿਕੋ ਭਿਕ੍ਖੁ ਅਤ੍ਤਨੋ ਭਤ੍ਤਂ ਪਰਿਯੇਸਮਾਨੋ ਸਤ੍ਥਾ ਵਾ ਵਿਹਾਯਿਸ੍ਸਤਿ, ਯਤ੍ਥ ਵਾ ਵਾਸਂ ਗਨ੍ਤੁਕਾਮੋ ਭਵਿਸ੍ਸਤਿ ਤਤ੍ਥ ਵਿਕਾਲੇ ਉਪਗਚ੍ਛਿਸ੍ਸਤਿ, ਕਿਲਨ੍ਤੋ ਅਦ੍ਧਾਨਂ ਗਮਿਸ੍ਸਤਿ. ਸੋ ਮੇ ਗਮਿਕਭਤ੍ਤਂ ਭੁਞ੍ਜਿਤ੍ਵਾ ਸਤ੍ਥਾ ਨ ਵਿਹਾਯਿਸ੍ਸਤਿ, ਯਤ੍ਥ ਵਾਸਂ ਗਨ੍ਤੁਕਾਮੋ ਭਵਿਸ੍ਸਤਿ ਤਤ੍ਥ ਕਾਲੇ ਉਪਗਚ੍ਛਿਸ੍ਸਤਿ, ਅਕਿਲਨ੍ਤੋ ਅਦ੍ਧਾਨਂ ਗਮਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਮਿਕਭਤ੍ਤਂ ਦਾਤੁਂ.
‘‘ਪੁਨ ਚਪਰਂ, ਭਨ੍ਤੇ, ਗਿਲਾਨਸ੍ਸ ਭਿਕ੍ਖੁਨੋ ਸਪ੍ਪਾਯਾਨਿ ਭੋਜਨਾਨਿ ਅਲਭਨ੍ਤਸ੍ਸ ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਵਾ ਭਵਿਸ੍ਸਤਿ. ਤਸ੍ਸ ਮੇ ਗਿਲਾਨਭਤ੍ਤਂ ਭੁਤ੍ਤਸ੍ਸ ਆਬਾਧੋ ਨ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਨ ਭਵਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨਭਤ੍ਤਂ ਦਾਤੁਂ. ‘‘ਪੁਨ ਚਪਰਂ, ਭਨ੍ਤੇ, ਗਿਲਾਨੁਪਟ੍ਠਾਕੋ ਭਿਕ੍ਖੁ ਅਤ੍ਤਨੋ ਭਤ੍ਤਂ ਪਰਿਯੇਸਮਾਨੋ ਗਿਲਾਨਸ੍ਸ ਉਸ੍ਸੂਰੇ ਭਤ੍ਤਂ ਨੀਹਰਿਸ੍ਸਤਿ, ਭਤ੍ਤਚ੍ਛੇਦਂ ਕਰਿਸ੍ਸਤਿ. ਸੋ ਮੇ ਗਿਲਾਨੁਪਟ੍ਠਾਕਭਤ੍ਤਂ ਭੁਞ੍ਜਿਤ੍ਵਾ ਗਿਲਾਨਸ੍ਸ ਕਾਲੇਨ ਭਤ੍ਤਂ ਨੀਹਰਿਸ੍ਸਤਿ, ਭਤ੍ਤਚ੍ਛੇਦਂ ਨ ਕਰਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨੁਪਟ੍ਠਾਕਭਤ੍ਤਂ ਦਾਤੁਂ.
‘‘ਪੁਨ ਚਪਰਂ, ਭਨ੍ਤੇ, ਗਿਲਾਨਸ੍ਸ ਭਿਕ੍ਖੁਨੋ ਸਪ੍ਪਾਯਾਨਿ ਭੇਸਜ੍ਜਾਨਿ ਅਲਭਨ੍ਤਸ੍ਸ ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਵਾ ਭਵਿਸ੍ਸਤਿ. ਤਸ੍ਸ ਮੇ ਗਿਲਾਨਭੇਸਜ੍ਜਂ ਪਰਿਭੁਤ੍ਤਸ੍ਸ ਆਬਾਧੋ ਨ ਅਭਿਵਡ੍ਢਿਸ੍ਸਤਿ, ਕਾਲਂਕਿਰਿਯਾ ਨ ਭਵਿਸ੍ਸਤਿ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਗਿਲਾਨਭੇਸਜ੍ਜਂ ਦਾਤੁਂ.
‘‘ਪੁਨ ਚਪਰਂ, ਭਨ੍ਤੇ, ਭਗਵਤਾ ਅਨ੍ਧਕਵਿਨ੍ਦੇ ਦਸਾਨਿਸਂਸੇ ਸਮ੍ਪਸ੍ਸਮਾਨੇਨ ਯਾਗੁ ਅਨੁਞ੍ਞਾਤਾ. ਤ੍ਯਾਹਂ, ਭਨ੍ਤੇ, ਆਨਿਸਂਸੇ ਸਮ੍ਪਸ੍ਸਮਾਨਾ ਇਚ੍ਛਾਮਿ ਸਙ੍ਘਸ੍ਸ ਯਾਵਜੀਵਂ ਧੁਵਯਾਗੁਂ ਦਾਤੁਂ.
‘‘ਇਧ, ਭਨ੍ਤੇ, ਭਿਕ੍ਖੁਨਿਯੋ ਅਚਿਰਵਤਿਯਾ ਨਦਿਯਾ ਵੇਸਿਯਾਹਿ ਸਦ੍ਧਿਂ ਨਗ੍ਗਾ ਏਕਤਿਤ੍ਥੇ ਨਹਾਯਨ੍ਤਿ. ਤਾ, ਭਨ੍ਤੇ, ਵੇਸਿਯਾ ਭਿਕ੍ਖੁਨਿਯੋ ਉਪ੍ਪਣ੍ਡੇਸੁਂ – ‘ਕਿਂ ਨੁ ਖੋ ਨਾਮ ਤੁਮ੍ਹਾਕਂ, ਅਯ੍ਯੇ, ਦਹਰਾਨਂ [ਦਹਰਾਨਂ ਦਹਰਾਨਂ (ਸੀ.)] ਬ੍ਰਹ੍ਮਚਰਿਯਂ ਚਿਣ੍ਣੇਨ, ਨਨੁ ਨਾਮ ਕਾਮਾ ਪਰਿਭੁਞ੍ਜਿਤਬ੍ਬਾ; ਯਦਾ ਜਿਣ੍ਣਾ ਭਵਿਸ੍ਸਥ ਤਦਾ ਬ੍ਰਹ੍ਮਚਰਿਯਂ ਚਰਿਸ੍ਸਥ. ਏਵਂ ਤੁਮ੍ਹਾਕਂ ਉਭੋ ਅਤ੍ਥਾ ਪਰਿਗ੍ਗਹਿਤਾ ਭਵਿਸ੍ਸਨ੍ਤੀ’ਤਿ. ਤਾ, ਭਨ੍ਤੇ, ਭਿਕ੍ਖੁਨਿਯੋ ਵੇਸਿਯਾਹਿ ਉਪ੍ਪਣ੍ਡਿਯਮਾਨਾ ਮਙ੍ਕੂ ਅਹੇਸੁਂ. ਅਸੁਚਿ, ਭਨ੍ਤੇ, ਮਾਤੁਗਾਮਸ੍ਸ ਨਗ੍ਗਿਯਂ ਜੇਗੁਚ੍ਛਂ ਪਟਿਕੂਲਂ. ਇਮਾਹਂ, ਭਨ੍ਤੇ, ਅਤ੍ਥਵਸਂ ਸਮ੍ਪਸ੍ਸਮਾਨਾ ਇਚ੍ਛਾਮਿ ਭਿਕ੍ਖੁਨਿਸਙ੍ਘਸ੍ਸ ਯਾਵਜੀਵਂ ਉਦਕਸਾਟਿਕਂ ਦਾਤੁ’’ਨ੍ਤਿ.
੩੫੧. ‘‘ਕਿਂ ਪਨ ਤ੍ਵਂ, ਵਿਸਾਖੇ, ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸੀ’’ਤਿ? ‘‘ਇਧ, ਭਨ੍ਤੇ, ਦਿਸਾਸੁ ਵਸ੍ਸਂਵੁਟ੍ਠਾ ਭਿਕ੍ਖੂ ਸਾਵਤ੍ਥਿਂ ਆਗਚ੍ਛਿਸ੍ਸਨ੍ਤਿ ਭਗਵਨ੍ਤਂ ਦਸ੍ਸਨਾਯ. ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਨ੍ਤਿ – ‘ਇਤ੍ਥਨ੍ਨਾਮੋ, ਭਨ੍ਤੇ, ਭਿਕ੍ਖੁ ਕਾਲਙ੍ਕਤੋ, ਤਸ੍ਸ ਕਾ ਗਤਿ ਕੋ ਅਭਿਸਮ੍ਪਰਾਯੋ’ਤਿ? ਤਂ ਭਗਵਾ ਬ੍ਯਾਕਰਿਸ੍ਸਤਿ ਸੋਤਾਪਤ੍ਤਿਫਲੇ ਵਾ ਸਕਦਾਗਾਮਿਫਲੇ ਵਾ ਅਨਾਗਾਮਿਫਲੇ ਵਾ ਅਰਹਤ੍ਤੇ ਵਾ. ਤ੍ਯਾਹਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮਿ – ‘ਆਗਤਪੁਬ੍ਬਾ ਨੁ ਖੋ, ਭਨ੍ਤੇ, ਤੇਨ ਅਯ੍ਯੇਨ ਸਾਵਤ੍ਥੀ’ਤਿ? ਸਚੇ ਮੇ ਵਕ੍ਖਨ੍ਤਿ – ‘ਆਗਤਪੁਬ੍ਬਾ ਤੇਨ ਭਿਕ੍ਖੁਨਾ ਸਾਵਤ੍ਥੀ’ਤਿ ਨਿਟ੍ਠਮੇਤ੍ਥ ਗਚ੍ਛਿਸ੍ਸਾਮਿ – ਨਿਸ੍ਸਂਸਯਂ ਮੇ ਪਰਿਭੁਤ੍ਤਂ ਤੇਨ ਅਯ੍ਯੇਨ ਵਸ੍ਸਿਕਸਾਟਿਕਾ ਵਾ ਆਗਨ੍ਤੁਕਭਤ੍ਤਂ ਵਾ ਗਮਿਕਭਤ੍ਤਂ ਵਾ ਗਿਲਾਨਭਤ੍ਤਂ ਵਾ ਗਿਲਾਨੁਪਟ੍ਠਾਕਭਤ੍ਤਂ ਵਾ ਗਿਲਾਨਭੇਸਜ੍ਜਂ ਵਾ ਧੁਵਯਾਗੁ ਵਾਤਿ. ਤਸ੍ਸਾ ਮੇ ਤਦਨੁਸ੍ਸਰਨ੍ਤਿਯਾ ਪਾਮੁਜ੍ਜਂ ਜਾਯਿਸ੍ਸਤਿ, ਪਮੁਦਿਤਾਯ ਪੀਤਿ ਜਾਯਿਸ੍ਸਤਿ, ਪੀਤਿਮਨਾਯ ਕਾਯੋ ਪਸ੍ਸਮ੍ਭਿਸ੍ਸਤਿ, ਪਸ੍ਸਦ੍ਧਕਾਯਾ ਸੁਖਂ ਵੇਦਿਯਿਸ੍ਸਾਮਿ, ਸੁਖਿਨਿਯਾ ਚਿਤ੍ਤਂ ਸਮਾਧਿਯਿਸ੍ਸਤਿ. ਸਾ ਮੇ ਭਵਿਸ੍ਸਤਿ ਇਨ੍ਦ੍ਰਿਯਭਾਵਨਾ ਬਲਭਾਵਨਾ ਬੋਜ੍ਝਙ੍ਗਭਾਵਨਾ. ਇਮਾਹਂ, ਭਨ੍ਤੇ, ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਾਮੀ’’ਤਿ. ‘‘ਸਾਧੁ ਸਾਧੁ, ਵਿਸਾਖੇ; ਸਾਧੁ ਖੋ ਤ੍ਵਂ, ਵਿਸਾਖੇ, ਇਮਂ ਆਨਿਸਂਸਂ ਸਮ੍ਪਸ੍ਸਮਾਨਾ ਤਥਾਗਤਂ ਅਟ੍ਠ ਵਰਾਨਿ ਯਾਚਸਿ. ਅਨੁਜਾਨਾਮਿ ਤੇ, ਵਿਸਾਖੇ, ਅਟ੍ਠ ਵਰਾਨੀ’’ਤਿ. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਇਮਾਹਿ ਗਾਥਾਹਿ ਅਨੁਮੋਦਿ –
‘‘ਯਾ ਅਨ੍ਨਪਾਨਂ ਦਦਤਿਪ੍ਪਮੋਦਿਤਾ;
ਸੀਲੂਪਪਨ੍ਨਾ ਸੁਗਤਸ੍ਸ ਸਾਵਿਕਾ;
ਦਦਾਤਿ ਦਾਨਂ ਅਭਿਭੁਯ੍ਯ ਮਚ੍ਛਰਂ;
ਸੋਵਗ੍ਗਿਕਂ ਸੋਕਨੁਦਂ ਸੁਖਾਵਹਂ.
‘‘ਦਿਬ੍ਬਂ ਸਾ ਲਭਤੇ ਆਯੁਂ [ਦਿਬ੍ਬਂ ਬਲਂ ਸਾ ਲਭਤੇ ਚ ਆਯੁਂ (ਸੀ. ਸ੍ਯਾ.)];
ਆਗਮ੍ਮ ਮਗ੍ਗਂ ਵਿਰਜਂ ਅਨਙ੍ਗਣਂ;
ਸਾ ਪੁਞ੍ਞਕਾਮਾ ਸੁਖਿਨੀ ਅਨਾਮਯਾ;
ਸਗ੍ਗਮ੍ਹਿ ਕਾਯਮ੍ਹਿ ਚਿਰਂ ਪਮੋਦਤੀ’’ਤਿ.
੩੫੨. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਇਮਾਹਿ ਗਾਥਾਹਿ ਅਨੁਮੋਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਿਕਸਾਟਿਕਂ, ਆਗਨ੍ਤੁਕਭਤ੍ਤਂ, ਗਮਿਕਭਤ੍ਤਂ, ਗਿਲਾਨਭਤ੍ਤਂ, ਗਿਲਾਨੁਪਟ੍ਠਾਕਭਤ੍ਤਂ, ਗਿਲਾਨਭੇਸਜ੍ਜਂ, ਧੁਵਯਾਗੁਂ, ਭਿਕ੍ਖੁਨਿਸਙ੍ਘਸ੍ਸ ਉਦਕਸਾਟਿਕ’’ਨ੍ਤਿ.
ਵਿਸਾਖਾਵਤ੍ਥੁ ਨਿਟ੍ਠਿਤਂ.
ਵਿਸਾਖਾਭਾਣਵਾਰੋ ਨਿਟ੍ਠਿਤੋ.
੨੨੦. ਨਿਸੀਦਨਾਦਿਅਨੁਜਾਨਨਾ
੩੫੩. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ, ਸੇਨਾਸਨਂ ਅਸੁਚਿਨਾ ਮਕ੍ਖਿਯਤਿ. ਅਥ ਖੋ ਭਗਵਾ ਆਯਸ੍ਮਤਾ ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਅਦ੍ਦਸ ਸੇਨਾਸਨਂ ਅਸੁਚਿਨਾ ਮਕ੍ਖਿਤਂ, ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਏਤਂ, ਆਨਨ੍ਦ, ਸੇਨਾਸਨਂ ਮਕ੍ਖਿਤ’’ਨ੍ਤਿ? ‘‘ਏਤਰਹਿ, ਭਨ੍ਤੇ, ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ; ਤਯਿਦਂ, ਭਗਵਾ, ਸੇਨਾਸਨਂ ਅਸੁਚਿਨਾ ਮਕ੍ਖਿਤ’’ਨ੍ਤਿ. ‘‘ਏਵਮੇਤਂ, ਆਨਨ੍ਦ, ਏਵਮੇਤਂ, ਆਨਨ੍ਦ. ਮੁਚ੍ਚਤਿ ਹਿ, ਆਨਨ੍ਦ, ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ. ਯੇ ਤੇ, ਆਨਨ੍ਦ, ਭਿਕ੍ਖੂ ਉਪਟ੍ਠਿਤਸ੍ਸਤੀ ਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ, ਤੇਸਂ ਅਸੁਚਿ ਨ ਮੁਚ੍ਚਤਿ. ਯੇਪਿ ਤੇ, ਆਨਨ੍ਦ, ਪੁਥੁਜ੍ਜਨਾ ਕਾਮੇਸੁ ਵੀਤਰਾਗਾ, ਤੇਸਮ੍ਪਿ ਅਸੁਚਿ ਨ ਮੁਚ੍ਚਤਿ. ਅਟ੍ਠਾਨਮੇਤਂ, ਆਨਨ੍ਦ, ਅਨਵਕਾਸੋ ਯਂ ਅਰਹਤੋ ਅਸੁਚਿ ਮੁਚ੍ਚੇਯ੍ਯਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਧਾਹਂ, ਭਿਕ੍ਖਵੇ, ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਅਦ੍ਦਸਂ ਸੇਨਾਸਨਂ ਅਸੁਚਿਨਾ ਮਕ੍ਖਿਤਂ, ਦਿਸ੍ਵਾਨ ਆਨਨ੍ਦਂ ਆਮਨ੍ਤੇਸਿਂ ‘ਕਿਂ ਏਤਂ, ਆਨਨ੍ਦ, ਸੇਨਾਸਨਂ ਮਕ੍ਖਿਤ’ਨ੍ਤਿ? ‘ਏਤਰਹਿ, ਭਨ੍ਤੇ, ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਮੁਟ੍ਠਸ੍ਸਤੀ ਅਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ. ਤੇਸਂ ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ ਮੁਚ੍ਚਤਿ; ਤਯਿਦਂ, ਭਗਵਾ, ਸੇਨਾਸਨਂ ਅਸੁਚਿਨਾ ਮਕ੍ਖਿਤ’ਨ੍ਤਿ. ‘ਏਵਮੇਤਂ, ਆਨਨ੍ਦ, ਏਵਮੇਤਂ, ਆਨਨ੍ਦ, ਮੁਚ੍ਚਤਿ ਹਿ, ਆਨਨ੍ਦ, ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਨਿਦ੍ਦਂ ਓਕ੍ਕਮਨ੍ਤਾਨਂ ਸੁਪਿਨਨ੍ਤੇਨ ਅਸੁਚਿ. ਯੇ ਤੇ, ਆਨਨ੍ਦ, ਭਿਕ੍ਖੂ ਉਪਟ੍ਠਿਤਸ੍ਸਤੀ ਸਮ੍ਪਜਾਨਾ ਨਿਦ੍ਦਂ ਓਕ੍ਕਮਨ੍ਤਿ, ਤੇਸਂ ਅਸੁਚਿ ਨ ਮੁਚ੍ਚਤਿ. ਯੇਪਿ ਤੇ, ਆਨਨ੍ਦ, ਪੁਥੁਜ੍ਜਨਾ ਕਾਮੇਸੁ ਵੀਤਰਾਗਾ ਤੇਸਮ੍ਪਿ ਅਸੁਚਿ ਨ ਮੁਚ੍ਚਤਿ. ਅਟ੍ਠਾਨਮੇਤਂ, ਆਨਨ੍ਦ, ਅਨਵਕਾਸੋ ਯਂ ਅਰਹਤੋ ਅਸੁਚਿ ਮੁਚ੍ਚੇਯ੍ਯਾ’’’ਤਿ.
‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ – ਦੁਕ੍ਖਂ ਸੁਪਤਿ, ਦੁਕ੍ਖਂ ਪਟਿਬੁਜ੍ਝਤਿ, ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਨ ਰਕ੍ਖਨ੍ਤਿ, ਅਸੁਚਿ ਮੁਚ੍ਚਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ.
‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ – ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਰਕ੍ਖਨ੍ਤਿ, ਅਸੁਚਿ ਨ ਮੁਚ੍ਚਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ.
‘‘ਅਨੁਜਾਨਾਮਿ, ਭਿਕ੍ਖਵੇ, ਕਾਯਗੁਤ੍ਤਿਯਾ ਚੀਵਰਗੁਤ੍ਤਿਯਾ ਸੇਨਾਸਨਗੁਤ੍ਤਿਯਾ ਨਿਸੀਦਨ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਤਿਖੁਦ੍ਦਕਂ ਨਿਸੀਦਨਂ ਨ ਸਬ੍ਬਂ ਸੇਨਾਸਨਂ ਸਂਗੋਪੇਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਾਵਮਹਨ੍ਤਂ ਪਚ੍ਚਤ੍ਥਰਣਂ ਆਕਙ੍ਖਤਿ ਤਾਵਮਹਨ੍ਤਂ ਪਚ੍ਚਤ੍ਥਰਣਂ ਕਾਤੁਨ੍ਤਿ.
੩੫੪. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਆਨਨ੍ਦਸ੍ਸ ਉਪਜ੍ਝਾਯਸ੍ਸ ਆਯਸ੍ਮਤੋ ਬੇਲਟ੍ਠਸੀਸਸ੍ਸ ਥੁਲ੍ਲਕਚ੍ਛਾਬਾਧੋ ਹੋਤਿ. ਤਸ੍ਸ ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ. ਤਾਨਿ ਭਿਕ੍ਖੂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤਿ. ਅਦ੍ਦਸਾ ਖੋ ਭਗਵਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤੇ ਭਿਕ੍ਖੂ ਤਾਨਿ ਚੀਵਰਾਨਿ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਨ੍ਤੇ, ਦਿਸ੍ਵਾਨ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਙ੍ਕਮਿਤ੍ਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਿਂ ਇਮਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਇਮਸ੍ਸ, ਭਨ੍ਤੇ, ਆਯਸ੍ਮਤੋ ਥੁਲ੍ਲਕਚ੍ਛਾਬਾਧੋ. ਲਸਿਕਾਯ ਚੀਵਰਾਨਿ ਕਾਯੇ ਲਗ੍ਗਨ੍ਤਿ. ਤਾਨਿ ਮਯਂ ਉਦਕੇਨ ਤੇਮੇਤ੍ਵਾ ਤੇਮੇਤ੍ਵਾ ਅਪਕਡ੍ਢਾਮਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯਸ੍ਸ ਕਣ੍ਡੁ ਵਾ ਪਿਲ਼ਕਾ ਵਾ ਅਸ੍ਸਾਵੋ ਵਾ ਥੁਲ੍ਲਕਚ੍ਛੁ ਵਾ ਆਬਾਧੋ ਕਣ੍ਡੁਪ੍ਪਟਿਚ੍ਛਾਦਿ’’ਨ੍ਤਿ.
੩੫੫. ਅਥ ਖੋ ਵਿਸਾਖਾ ਮਿਗਾਰਮਾਤਾ ਮੁਖਪੁਞ੍ਛਨਚੋਲ਼ਂ [ਮੁਖਪੁਞ੍ਜਨਚੋਲ਼ਂ (ਕ.)] ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਮੁਖਪੁਞ੍ਛਨਚੋਲ਼ਂ, ਯਂ ਮਮਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਮੁਖਪੁਞ੍ਛਨਚੋਲ਼ਂ. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਮੁਖਪੁਞ੍ਛਨਚੋਲ਼ਕ’’ਨ੍ਤਿ [ਮੁਖਪੁਞ੍ਛਨਚੋਲਨ੍ਤਿ (ਸ੍ਯਾ.)].
੩੫੬. ਤੇਨ ਖੋ ਪਨ ਸਮਯੇਨ ਰੋਜੋ ਮਲ੍ਲੋ ਆਯਸ੍ਮਤੋ ਆਨਨ੍ਦਸ੍ਸ ਸਹਾਯੋ ਹੋਤਿ. ਰੋਜਸ੍ਸ ਮਲ੍ਲਸ੍ਸ ਖੋਮਪਿਲੋਤਿਕਾ ਆਯਸ੍ਮਤੋ ਆਨਨ੍ਦਸ੍ਸ ਹਤ੍ਥੇ ਨਿਕ੍ਖਿਤ੍ਤਾ ਹੋਤਿ. ਆਯਸ੍ਮਤੋ ਚ ਆਨਨ੍ਦਸ੍ਸ ਖੋਮਪਿਲੋਤਿਕਾਯ ਅਤ੍ਥੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਵਿਸ੍ਸਾਸਂ ਗਹੇਤੁਂ – ਸਨ੍ਦਿਟ੍ਠੋ ਚ ਹੋਤਿ, ਸਮ੍ਭਤ੍ਤੋ ਚ, ਆਲਪਿਤੋ ਚ, ਜੀਵਤਿ ਚ, ਜਾਨਾਤਿ ਚ, ਗਹਿਤੇ ਮੇ ਅਤ੍ਤਮਨੋ ਭਵਿਸ੍ਸਤੀਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਵਿਸ੍ਸਾਸਂ ਗਹੇਤੁਨ੍ਤਿ.