੯. ਜਨ੍ਤਾਘਰਵਤ੍ਤਕਥਾ

੩੭੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਨ੍ਤਿ. ਭਿਕ੍ਖੂ [ਥੇਰਾ ਚ ਭਿਕ੍ਖੂ (ਸ੍ਯਾ. ਕਂ.)] ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਿਸ੍ਸਨ੍ਤਿ! ਭਿਕ੍ਖੂ ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਨ੍ਤਿ; ਭਿਕ੍ਖੂ ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਜਨ੍ਤਾਘਰੇ ਥੇਰੇਨ ਭਿਕ੍ਖੁਨਾ ਨਿਵਾਰਿਯਮਾਨੇਨ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ, ਭਿਕ੍ਖਵੇ, ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਿਤਬ੍ਬਂ. ਯੋ ਨਿਸੀਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

੩੭੨. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਜਨ੍ਤਾਘਰਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਜਨ੍ਤਾਘਰੇ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਪਠਮਂ ਜਨ੍ਤਾਘਰਂ ਗਚ੍ਛਤਿ, ਸਚੇ ਛਾਰਿਕਾ ਉਸ੍ਸਨ੍ਨਾ ਹੋਤਿ, ਛਾਰਿਕਾ ਛਡ੍ਡੇਤਬ੍ਬਾ. ਸਚੇ ਜਨ੍ਤਾਘਰਂ ਉਕ੍ਲਾਪਂ ਹੋਤਿ, ਜਨ੍ਤਾਘਰਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਭਣ੍ਡਂ ਉਕ੍ਲਾਪਂ ਹੋਤਿ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਜਨ੍ਤਾਘਰਸਾਲਾ ਉਕ੍ਲਾਪਾ ਹੋਤਿ, ਜਨ੍ਤਾਘਰਸਾਲਾ ਸਮ੍ਮਜ੍ਜਿਤਬ੍ਬਾ.

‘‘ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਉਦਕਦੋਣਿਕਾਯ ਉਦਕਂ ਆਸਿਞ੍ਚਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰੇ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ. ਸਚੇ ਉਸ੍ਸਹਤਿ, ਉਦਕੇਪਿ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ. ਨ ਥੇਰਾਨਂ ਭਿਕ੍ਖੂਨਂ ਪੁਰਤੋਪਿ ਨਹਾਯਿਤਬ੍ਬਂ, ਨ ਉਪਰਿਤੋਪਿ ਨਹਾਯਿਤਬ੍ਬਂ. ਨਹਾਤੇਨ ਉਤ੍ਤਰਨ੍ਤੇਨ ਓਤਰਨ੍ਤਾਨਂ ਮਗ੍ਗੋ ਦਾਤਬ੍ਬੋ. ਯੋ ਪਚ੍ਛਾ ਜਨ੍ਤਾਘਰਾ ਨਿਕ੍ਖਮਤਿ, ਸਚੇ ਜਨ੍ਤਾਘਰਂ ਚਿਕ੍ਖਲ੍ਲਂ ਹੋਤਿ, ਧੋਵਿਤਬ੍ਬਂ. ਮਤ੍ਤਿਕਾਦੋਣਿਕਂ ਧੋਵਿਤ੍ਵਾ ਜਨ੍ਤਾਘਰਪੀਠਂ ਪਟਿਸਾਮੇਤ੍ਵਾ ਅਗ੍ਗਿਂ ਵਿਜ੍ਝਾਪੇਤ੍ਵਾ ਦ੍ਵਾਰਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਜਨ੍ਤਾਘਰਵਤ੍ਤਂ ਯਥਾ ਭਿਕ੍ਖੂਹਿ ਜਨ੍ਤਾਘਰੇ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.