੧੦. ਵਚ੍ਚਕੁਟਿਵਤ੍ਤਕਥਾ

੩੭੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਬ੍ਰਾਹ੍ਮਣਜਾਤਿਕੋ ਵਚ੍ਚਂ ਕਤ੍ਵਾ ਨ ਇਚ੍ਛਤਿ ਆਚਮੇਤੁਂ – ਕੋ ਇਮਂ ਵਸਲਂ ਦੁਗ੍ਗਨ੍ਧਂ ਆਮਸਿਸ੍ਸਤੀਤਿ [ਆਚਮਿਸ੍ਸਤੀਤਿ (ਕ.)]. ਤਸ੍ਸ ਵਚ੍ਚਮਗ੍ਗੇ ਕਿਮਿ ਸਣ੍ਠਾਤਿ. ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਵਚ੍ਚਂ ਕਤ੍ਵਾ ਨ ਆਚਮੇਸੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਵਚ੍ਚਂ ਕਤ੍ਵਾ ਨ ਆਚਮੇਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਵਚ੍ਚਂ ਕਤ੍ਵਾ ਨ ਆਚਮੇਸੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਵਚ੍ਚਂ ਕਤ੍ਵਾ ਸਤਿ ਉਦਕੇ ਨਾਚਮੇਤਬ੍ਬਂ. ਯੋ ਨਾਚਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਵਚ੍ਚਕੁਟਿਯਾ ਯਥਾਵੁਡ੍ਢਂ ਵਚ੍ਚਂ ਕਰੋਨ੍ਤਿ. ਨਵਕਾ ਭਿਕ੍ਖੂ ਪਠਮਤਰਂ ਆਗਨ੍ਤ੍ਵਾ ਵਚ੍ਚਿਤਾ ਆਗਮੇਨ੍ਤਿ. ਤੇ ਵਚ੍ਚਂ ਸਨ੍ਧਾਰੇਨ੍ਤਾ ਮੁਚ੍ਛਿਤਾ ਪਪਤਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ‘‘ਨ, ਭਿਕ੍ਖਵੇ, ਵਚ੍ਚਕੁਟਿਯਾ ਯਥਾਵੁਡ੍ਢਂ ਵਚ੍ਚੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਗਤਪਟਿਪਾਟਿਯਾ ਵਚ੍ਚਂ ਕਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਸਹਸਾਪਿ ਵਚ੍ਚਕੁਟਿਂ ਪਵਿਸਨ੍ਤਿ, ਉਬ੍ਭਜਿਤ੍ਵਾਪਿ [ਉਬ੍ਭੁਜ੍ਜਿਤ੍ਵਾਪਿ (ਸੀ.), ਉਬ੍ਭੁਜਿਤ੍ਵਾ (ਸ੍ਯਾ.)] ਪਵਿਸਨ੍ਤਿ, ਨਿਤ੍ਥੁਨਨ੍ਤਾਪਿ ਵਚ੍ਚਂ ਕਰੋਨ੍ਤਿ, ਦਨ੍ਤਕਟ੍ਠਂ ਖਾਦਨ੍ਤਾਪਿ ਵਚ੍ਚਂ ਕਰੋਨ੍ਤਿ, ਬਹਿਦ੍ਧਾਪਿ ਵਚ੍ਚਦੋਣਿਕਾਯ ਵਚ੍ਚਂ ਕਰੋਨ੍ਤਿ, ਬਹਿਦ੍ਧਾਪਿ ਪਸ੍ਸਾਵਦੋਣਿਕਾਯ ਪਸ੍ਸਾਵਂ ਕਰੋਨ੍ਤਿ, ਪਸ੍ਸਾਵਦੋਣਿਕਾਯਪਿ ਖੇਲ਼ਂ ਕਰੋਨ੍ਤਿ, ਫਰੁਸੇਨਪਿ ਕਟ੍ਠੇਨ ਅਵਲੇਖਨ੍ਤਿ, ਅਵਲੇਖਨਕਟ੍ਠਮ੍ਪਿ ਵਚ੍ਚਕੂਪਮ੍ਹਿ ਪਾਤੇਨ੍ਤਿ, ਅਤਿਸਹਸਾਪਿ ਨਿਕ੍ਖਮਨ੍ਤਿ, ਉਬ੍ਭਜਿਤ੍ਵਾਪਿ ਨਿਕ੍ਖਮਨ੍ਤਿ, ਚਪੁਚਪੁਕਾਰਕਮ੍ਪਿ ਆਚਮੇਨ੍ਤਿ, ਆਚਮਨਸਰਾਵਕੇਪਿ ਉਦਕਂ ਸੇਸੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਸਹਸਾਪਿ ਵਚ੍ਚਕੁਟਿਂ ਪਵਿਸਿਸ੍ਸਨ੍ਤਿ, ਉਬ੍ਭਜਿਤ੍ਵਾਪਿ ਪਵਿਸਿਸ੍ਸਨ੍ਤਿ, ਨਿਤ੍ਥੁਨਨ੍ਤਾਪਿ ਵਚ੍ਚਂ ਕਰਿਸ੍ਸਨ੍ਤਿ, ਦਨ੍ਤਕਟ੍ਠਂ ਖਾਦਨ੍ਤਾਪਿ ਵਚ੍ਚਂ ਕਰਿਸ੍ਸਨ੍ਤਿ, ਬਹਿਦ੍ਧਾਪਿ ਵਚ੍ਚਦੋਣਿਕਾਯ ਵਚ੍ਚਂ ਕਰਿਸ੍ਸਨ੍ਤਿ, ਬਹਿਦ੍ਧਾਪਿ ਪਸ੍ਸਾਵਦੋਣਿਕਾਯ ਪਸ੍ਸਾਵਂ ਕਰਿਸ੍ਸਨ੍ਤਿ, ਪਸ੍ਸਾਵਦੋਣਿਕਾਯਪਿ ਖੇਲ਼ਂ ਕਰਿਸ੍ਸਨ੍ਤਿ, ਫਰੁਸੇਨਪਿ ਕਟ੍ਠੇਨ ਅਵਲੇਖਿਸ੍ਸਨ੍ਤਿ, ਅਵਲੇਖਨਕਟ੍ਠਮ੍ਪਿ ਵਚ੍ਚਕੂਪਮ੍ਹਿ ਪਾਤੇਸ੍ਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਿਸ੍ਸਨ੍ਤਿ, ਉਬ੍ਭਜਿਤ੍ਵਾਪਿ ਨਿਕ੍ਖਮਿਸ੍ਸਨ੍ਤਿ, ਚਪੁਚਪੁਕਾਰਕਮ੍ਪਿ ਆਚਮੇਸ੍ਸਨ੍ਤਿ, ਆਚਮਨਸਰਾਵਕੇਪਿ ਉਦਕਂ ਸੇਸੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੭੪. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਵਚ੍ਚਕੁਟਿਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਵਚ੍ਚਕੁਟਿਯਾ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਵਚ੍ਚਕੁਟਿਂ ਗਚ੍ਛਤਿ ਤੇਨ ਬਹਿ ਠਿਤੇਨ [ਬਹਿ ਠਿਤੇਨ (ਸੀ. ਕ.)] ਉਕ੍ਕਾਸਿਤਬ੍ਬਂ. ਅਨ੍ਤੋ ਨਿਸਿਨ੍ਨੇਨਪਿ ਉਕ੍ਕਾਸਿਤਬ੍ਬਂ. ਚੀਵਰਵਂਸੇ ਵਾ ਚੀਵਰਰਜ੍ਜੁਯਾ ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਸਾਧੁਕਂ ਅਤਰਮਾਨੇਨ ਵਚ੍ਚਕੁਟੀ ਪਵਿਸਿਤਬ੍ਬਾ. ਨਾਤਿਸਹਸਾ ਪਵਿਸਿਤਬ੍ਬਾ. ਨ ਉਬ੍ਭਜਿਤ੍ਵਾ ਪਵਿਸਿਤਬ੍ਬਾ. ਵਚ੍ਚਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ. ਨ ਨਿਤ੍ਥੁਨਨ੍ਤੇਨ ਵਚ੍ਚੋ ਕਾਤਬ੍ਬੋ. ਨ ਦਨ੍ਤਕਟ੍ਠਂ ਖਾਦਨ੍ਤੇਨ ਵਚ੍ਚੋ ਕਾਤਬ੍ਬੋ. ਨ ਬਹਿਦ੍ਧਾ ਵਚ੍ਚਦੋਣਿਕਾਯ ਵਚ੍ਚੋ ਕਾਤਬ੍ਬੋ. ਨ ਬਹਿਦ੍ਧਾ ਪਸ੍ਸਾਵਦੋਣਿਕਾਯ ਪਸ੍ਸਾਵੋ ਕਾਤਬ੍ਬੋ. ਨ ਪਸ੍ਸਾਵਦੋਣਿਕਾਯ ਖੇਲ਼ੋ ਕਾਤਬ੍ਬੋ. ਨ ਫਰੁਸੇਨ ਕਟ੍ਠੇਨ ਅਵਲੇਖਿਤਬ੍ਬਂ. ਨ ਅਵਲੇਖਨਕਟ੍ਠਂ ਵਚ੍ਚਕੂਪਮ੍ਹਿ ਪਾਤੇਤਬ੍ਬਂ. ਵਚ੍ਚਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨ ਉਬ੍ਭਜਿਤ੍ਵਾ ਨਿਕ੍ਖਮਿਤਬ੍ਬਂ. ਆਚਮਨਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ. ਨ ਚਪੁਚਪੁਕਾਰਕਂ ਆਚਮੇਤਬ੍ਬਂ. ਨ ਆਚਮਨਸਰਾਵਕੇ ਉਦਕਂ ਸੇਸੇਤਬ੍ਬਂ. ਆਚਮਨਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ.

‘‘ਸਚੇ ਵਚ੍ਚਕੁਟਿ ਉਹਤਾ [ਊਹਤਾ (ਸੀ. ਸ੍ਯਾ.)] ਹੋਤਿ, ਧੋਵਿਤਬ੍ਬਾ. ਸਚੇ ਅਵਲੇਖਨਪਿਧਰੋ ਪੂਰੋ ਹੋਤਿ, ਅਵਲੇਖਨਕਟ੍ਠਂ ਛਡ੍ਡੇਤਬ੍ਬਂ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਰਿਭਣ੍ਡਂ ਉਕ੍ਲਾਪਂ ਹੋਤਿ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਵਚ੍ਚਕੁਟਿਵਤ੍ਤਂ ਯਥਾ ਭਿਕ੍ਖੂਹਿ ਵਚ੍ਚਕੁਟਿਯਾ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.