੮. ਵਤ੍ਤਕ੍ਖਨ੍ਧਕਂ

੧. ਆਗਨ੍ਤੁਕਵਤ੍ਤਕਥਾ

੩੫੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਗਨ੍ਤੁਕਾ ਭਿਕ੍ਖੂ ਸਉਪਾਹਨਾਪਿ ਆਰਾਮਂ ਪਵਿਸਨ੍ਤਿ, ਛਤ੍ਤਪਗ੍ਗਹਿਤਾਪਿ ਆਰਾਮਂ ਪਵਿਸਨ੍ਤਿ, ਓਗੁਣ੍ਠਿਤਾਪਿ ਆਰਾਮਂ ਪਵਿਸਨ੍ਤਿ, ਸੀਸੇਪਿ ਚੀਵਰਂ ਕਰਿਤ੍ਵਾ ਆਰਾਮਂ ਪਵਿਸਨ੍ਤਿ, ਪਾਨੀਯੇਨਪਿ ਪਾਦੇ ਧੋਵਨ੍ਤਿ, ਵੁਡ੍ਢਤਰੇਪਿ ਆਵਾਸਿਕੇ ਭਿਕ੍ਖੂ ਨ ਅਭਿਵਾਦੇਨ੍ਤਿ, ਨਪਿ ਸੇਨਾਸਨਂ ਪੁਚ੍ਛਨ੍ਤਿ. ਅਞ੍ਞਤਰੋਪਿ ਆਗਨ੍ਤੁਕੋ ਭਿਕ੍ਖੁ ਅਨਜ੍ਝਾਵੁਟ੍ਠਂ ਵਿਹਾਰਂ ਘਟਿਕਂ ਉਗ੍ਘਾਟੇਤ੍ਵਾ ਕਵਾਟਂ ਪਣਾਮੇਤ੍ਵਾ ਸਹਸਾ ਪਾਵਿਸਿ. ਤਸ੍ਸ ਉਪਰਿਪਿਟ੍ਠਿਤੋ [ਉਪਰਿਪਿਟ੍ਠਤੋ (?)] ਅਹਿ ਖਨ੍ਧੇ ਪਪਤਿ. ਸੋ ਭੀਤੋ ਵਿਸ੍ਸਰਮਕਾਸਿ. ਭਿਕ੍ਖੂ ਉਪਧਾਵਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਕਿਸ੍ਸ ਤ੍ਵਂ, ਆਵੁਸੋ, ਵਿਸ੍ਸਰਮਕਾਸੀ’’ਤਿ? ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਗਨ੍ਤੁਕਾ ਭਿਕ੍ਖੂ ਸਉਪਾਹਨਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਛਤ੍ਤਪਗ੍ਗਹਿਤਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਓਗੁਣ੍ਠਿਤਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਸੀਸੇਪਿ ਚੀਵਰਂ ਕਰਿਤ੍ਵਾ ਆਰਾਮਂ ਪਵਿਸਿਸ੍ਸਨ੍ਤਿ, ਪਾਨੀਯੇਨਪਿ ਪਾਦੇ ਧੋਵਿਸ੍ਸਨ੍ਤਿ, ਵੁਡ੍ਢਤਰੇਪਿ ਆਵਾਸਿਕੇ ਭਿਕ੍ਖੂ ਨ ਅਭਿਵਾਦੇਸ੍ਸਨ੍ਤਿ, ਨਪਿ ਸੇਨਾਸਨਂ ਪੁਚ੍ਛਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ‘‘ਆਗਨ੍ਤੁਕਾ ਭਿਕ੍ਖੂ ਸਉਪਾਹਨਾਪਿ ਆਰਾਮਂ ਪਵਿਸਨ੍ਤਿ, ਛਤ੍ਤਪਗ੍ਗਹਿਤਾਪਿ ਆਰਾਮਂ ਪਵਿਸਨ੍ਤਿ, ਓਗੁਣ੍ਠਿਤਾਪਿ ਆਰਾਮਂ ਪਵਿਸਨ੍ਤਿ, ਸੀਸੇਪਿ ਚੀਵਰਂ ਕਰਿਤ੍ਵਾ ਆਰਾਮਂ ਪਵਿਸਨ੍ਤਿ, ਪਾਨੀਯੇਨਿਪਿ ਪਾਦੇ ਧੋਵਨ੍ਤਿ, ਵੁਡ੍ਢਤਰੇਪਿ ਆਵਾਸਿਕੇ ਭਿਕ੍ਖੂ ਨ ਅਭਿਵਾਦੇਨ੍ਤਿ, ਨਪਿ ਸੇਨਾਸਨਂ ਪੁਚ੍ਛਨ੍ਤੀਤਿ. ਸਚ੍ਚਂ ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਭਿਕ੍ਖਵੇ ਆਗਨ੍ਤੁਕਾ ਭਿਕ੍ਖੂ ਸਉਪਾਹਨਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਛਤ੍ਤਪਗ੍ਗਹਿਤਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਓਗੁਣ੍ਠਿਤਾਪਿ ਆਰਾਮਂ ਪਵਿਸਿਸ੍ਸਨ੍ਤਿ, ਸੀਸੇਪਿ ਚੀਵਰਂ ਕਰਿਤ੍ਵਾ ਆਰਾਮਂ ਪਵਿਸਿਸ੍ਸਨ੍ਤਿ, ਪਾਨੀਯੇਨਪਿ ਪਾਦੇ ਧੋਵਿਸ੍ਸਨ੍ਤਿ, ਵੁਡ੍ਢਤਰੇਪਿ ਆਵਾਸਿਕੇ ਭਿਕ੍ਖੂ ਨ ਅਭਿਵਾਦੇਸ੍ਸਨ੍ਤਿ, ਨਪਿ ਸੇਨਾਸਨਂ ਪੁਚ੍ਛਿਸ੍ਸਨ੍ਤਿ, ਨੇਤਂ ਭਿਕ੍ਖਵੇ ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੫੭. ‘‘ਤੇਨ ਹਿ, ਭਿਕ੍ਖਵੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਗਨ੍ਤੁਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਆਗਨ੍ਤੁਕੇਨ, ਭਿਕ੍ਖਵੇ, ਭਿਕ੍ਖੁਨਾ ‘ਇਦਾਨਿ ਆਰਾਮਂ ਪਵਿਸਿਸ੍ਸਾਮੀ’ਤਿ ਉਪਾਹਨਾ ਓਮੁਞ੍ਚਿਤ੍ਵਾ ਨੀਚਂ ਕਤ੍ਵਾ ਪਪ੍ਫੋਟੇਤ੍ਵਾ ਗਹੇਤ੍ਵਾ ਛਤ੍ਤਂ ਅਪਨਾਮੇਤ੍ਵਾ ਸੀਸਂ ਵਿਵਰਿਤ੍ਵਾ ਸੀਸੇ ਚੀਵਰਂ [ਵਿਵਰਿਤ੍ਵਾ ਚੀਵਰਂ (ਕ.)] ਖਨ੍ਧੇ ਕਤ੍ਵਾ ਸਾਧੁਕਂ ਅਤਰਮਾਨੇਨ ਆਰਾਮੋ ਪਵਿਸਿਤਬ੍ਬੋ. ਆਰਾਮਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਕਤ੍ਥ ਆਵਾਸਿਕਾ ਭਿਕ੍ਖੂ ਪਟਿਕ੍ਕਮਨ੍ਤੀ’ਤਿ? ਯਤ੍ਥ ਆਵਾਸਿਕਾ ਭਿਕ੍ਖੂ ਪਟਿਕ੍ਕਮਨ੍ਤਿ – ਉਪਟ੍ਠਾਨਸਾਲਾਯ ਵਾ ਮਣ੍ਡਪੇ ਵਾ ਰੁਕ੍ਖਮੂਲੇ ਵਾ – ਤਤ੍ਥ ਗਨ੍ਤ੍ਵਾ ਏਕਮਨ੍ਤਂ ਪਤ੍ਤੋ ਨਿਕ੍ਖਿਪਿਤਬ੍ਬੋ; ਏਕਮਨ੍ਤਂ ਚੀਵਰਂ ਨਿਕ੍ਖਿਪਿਤਬ੍ਬਂ; ਪਤਿਰੂਪਂ ਆਸਨਂ ਗਹੇਤ੍ਵਾ ਨਿਸੀਦਿਤਬ੍ਬਂ; ਪਾਨੀਯਂ ਪੁਚ੍ਛਿਤਬ੍ਬਂ, ਪਰਿਭੋਜਨੀਯਂ ਪੁਚ੍ਛਿਤਬ੍ਬਂ – ‘ਕਤਮਂ ਪਾਨੀਯਂ, ਕਤਮਂ ਪਰਿਭੋਜਨੀਯ’ਨ੍ਤਿ? ਸਚੇ ਪਾਨੀਯੇਨ ਅਤ੍ਥੋ ਹੋਤਿ, ਪਾਨੀਯਂ ਗਹੇਤ੍ਵਾ ਪਾਤਬ੍ਬਂ. ਸਚੇ ਪਰਿਭੋਜਨੀਯੇਨ ਅਤ੍ਥੋ ਹੋਤਿ, ਪਰਿਭੋਜਨੀਯਂ ਗਹੇਤ੍ਵਾ ਪਾਦਾ ਧੋਵਿਤਬ੍ਬਾ. ਪਾਦੇ ਧੋਵਨ੍ਤੇਨ ਏਕੇਨ ਹਤ੍ਥੇਨ ਉਦਕਂ ਆਸਿਞ੍ਚਿਤਬ੍ਬਂ, ਏਕੇਨ ਹਤ੍ਥੇਨ ਪਾਦਾ ਧੋਵਿਤਬ੍ਬਾ. ਤੇਨੇਵ ਉਦਕਂ ਆਸਿਞ੍ਚਿਤਬ੍ਬਂ [ਯੇਨ ਹਤ੍ਥੇਨ ਉਦਕਂ ਆਸਿਞ੍ਚਿਤਬ੍ਬਂ (ਸ੍ਯਾ.)] ਨ ਤੇਨੇਵ ਹਤ੍ਥੇਨ ਪਾਦਾ ਧੋਵਿਤਬ੍ਬਾ. ਉਪਾਹਨਪੁਞ੍ਛਨਚੋਲ਼ਕਂ ਪੁਚ੍ਛਿਤ੍ਵਾ ਉਪਾਹਨਾ ਪੁਞ੍ਛਿਤਬ੍ਬਾ. ਉਪਾਹਨਾ ਪੁਞ੍ਛਨ੍ਤੇਨ ਪਠਮਂ ਸੁਕ੍ਖੇਨ ਚੋਲ਼ਕੇਨ ਪੁਞ੍ਛਿਤਬ੍ਬਾ, ਪਚ੍ਛਾ ਅਲ੍ਲੇਨ. ਉਪਾਹਨਾਪੁਞ੍ਛਨਚੋਲ਼ਕਂ ਧੋਵਿਤ੍ਵਾ [ਪੀਲ਼ੇਤ੍ਵਾ (ਸ੍ਯਾ.)] ਏਕਮਨ੍ਤਂ ਵਿਸ੍ਸਜ੍ਜੇਤਬ੍ਬਂ.

‘‘ਸਚੇ ਆਵਾਸਿਕੋ ਭਿਕ੍ਖੁ ਵੁਡ੍ਢੋ ਹੋਤਿ, ਅਭਿਵਾਦੇਤਬ੍ਬੋ. ਸਚੇ ਨਵਕੋ ਹੋਤਿ, ਅਭਿਵਾਦਾਪੇਤਬ੍ਬੋ. ਸੇਨਾਸਨਂ ਪੁਚ੍ਛਿਤਬ੍ਬਂ – ‘ਕਤਮਂ ਮੇ ਸੇਨਾਸਨਂ ਪਾਪੁਣਾਤੀ’ਤਿ? ਅਜ੍ਝਾਵੁਟ੍ਠਂ ਵਾ ਅਨਜ੍ਝਾਵੁਟ੍ਠਂ ਵਾ ਪੁਚ੍ਛਿਤਬ੍ਬਂ, ਗੋਚਰੋ ਪੁਚ੍ਛਿਤਬ੍ਬੋ, ਅਗੋਚਰੋ ਪੁਚ੍ਛਿਤਬ੍ਬੋ, ਸੇਕ੍ਖਸਮ੍ਮਤਾਨਿ [ਸੇਖਸਮ੍ਮਤਾਨਿ (ਕ.)] ਕੁਲਾਨਿ ਪੁਚ੍ਛਿਤਬ੍ਬਾਨਿ, ਵਚ੍ਚਟ੍ਠਾਨਂ ਪੁਚ੍ਛਿਤਬ੍ਬਂ, ਪਸ੍ਸਾਵਟ੍ਠਾਨਂ ਪੁਚ੍ਛਿਤਬ੍ਬਂ, ਪਾਨੀਯਂ ਪੁਚ੍ਛਿਤਬ੍ਬਂ, ਪਰਿਭੋਜਨੀਯਂ ਪੁਚ੍ਛਿਤਬ੍ਬਂ, ਕਤ੍ਤਰਦਣ੍ਡੋ ਪੁਚ੍ਛਿਤਬ੍ਬੋ, ਸਙ੍ਘਸ੍ਸ ਕਤਿਕਸਣ੍ਠਾਨਂ ਪੁਚ੍ਛਿਤਬ੍ਬਂ – ‘ਕਂ ਕਾਲਂ ਪਵਿਸਿਤਬ੍ਬਂ, ਕਂ ਕਾਲਂ ਨਿਕ੍ਖਮਿਤਬ੍ਬ’ਨ੍ਤਿ? ਸਚੇ ਵਿਹਾਰੋ ਅਨਜ੍ਝਾਵੁਟ੍ਠੋ ਹੋਤਿ, ਕਵਾਟਂ ਆਕੋਟੇਤ੍ਵਾ ਮੁਹੁਤ੍ਤਂ ਆਗਮੇਤ੍ਵਾ ਘਟਿਕਂ ਉਗ੍ਘਾਟੇਤ੍ਵਾ ਕਵਾਟਂ ਪਣਾਮੇਤ੍ਵਾ ਬਹਿ ਠਿਤੇਨ ਨਿਲ੍ਲੋਕੇਤਬ੍ਬੋ.

‘‘ਸਚੇ ਵਿਹਾਰੋ ਉਕ੍ਲਾਪੋ ਹੋਤਿ, ਮਞ੍ਚੇ ਵਾ ਮਞ੍ਚੋ ਆਰੋਪਿਤੋ ਹੋਤਿ, ਪੀਠੇ ਵਾ ਪੀਠਂ ਆਰੋਪਿਤਂ ਹੋਤਿ, ਸੇਨਾਸਨਂ ਉਪਰਿ ਪੁਞ੍ਜੀਕਤਂ [ਪੁਞ੍ਜਕਿਤਂ (ਕ.)] ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. [ਮਹਾਵ. ੬੬-੬੭ (ਥੋਕਂ ਵਿਸਦਿਸਂ)] ਵਿਹਾਰਂ ਸੋਧੇਨ੍ਤੇਨ ਪਠਮਂ ਭੂਮਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ [ਊਹਞ੍ਞੀਤਿ (ਸੀ. ਸ੍ਯਾ.)]. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ [ਯਥਾਪਞ੍ਞਤ੍ਤਂ (ਸੀ. ਸ੍ਯਾ.), ਯਥਾਭਾਗਂ (ਕ.)] ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ [ਯਥਾਭਾਗਂ (ਸ੍ਯਾ. ਕ.)] ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਠਾਨੇ [ਯਥਾਭਾਗਂ (ਸ੍ਯਾ. ਕ.)] ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਠਾਨੇ [ਯਥਾਭਾਗਂ (ਸ੍ਯਾ. ਕ.)] ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਭਾਗਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਭਾਗਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਭਾਗਂ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਭਾਗਂ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਆਗਨ੍ਤੁਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੨. ਆਵਾਸਿਕਵਤ੍ਤਕਥਾ

੩੫੮. ਤੇਨ ਖੋ ਪਨ ਸਮਯੇਨ ਆਵਾਸਿਕਾ ਭਿਕ੍ਖੂ ਆਗਨ੍ਤੁਕੇ ਭਿਕ੍ਖੂ ਦਿਸ੍ਵਾ ਨੇਵ ਆਸਨਂ ਪਞ੍ਞਪੇਨ੍ਤਿ, ਨ ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਨ੍ਤਿ, ਨ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਣ੍ਹਨ੍ਤਿ, ਨ ਪਾਨੀਯੇਨ ਪੁਚ੍ਛਨ੍ਤਿ [ਨ ਪਾਨੀਯੇਨ ਪੁਚ੍ਛਨ੍ਤਿ, ਨ ਪਰਿਭੋਜਨੀਯੇਨ ਪੁਚ੍ਛਨ੍ਤਿ (ਸ੍ਯਾ. ਕਂ.)], ਨ ਵੁਡ੍ਢਤਰੇਪਿ ਆਗਨ੍ਤੁਕੇ ਭਿਕ੍ਖੂ ਅਭਿਵਾਦੇਨ੍ਤਿ, ਨ ਸੇਨਾਸਨਂ ਪਞ੍ਞਪੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਵਾਸਿਕਾ ਭਿਕ੍ਖੂ ਆਗਨ੍ਤੁਕੇ ਭਿਕ੍ਖੂ ਦਿਸ੍ਵਾ ਨੇਵ ਆਸਨਂ ਪਞ੍ਞਪੇਸ੍ਸਨ੍ਤਿ, ਨ ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਸ੍ਸਨ੍ਤਿ, ਨ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹਿਸ੍ਸਨ੍ਤਿ, ਨ ਪਾਨੀਯੇਨ ਪੁਚ੍ਛਿਸ੍ਸਨ੍ਤਿ, ਵੁਡ੍ਢਤਰੇਪਿ ਆਗਨ੍ਤੁਕੇ ਭਿਕ੍ਖੂ ਨ ਅਭਿਵਾਦੇਸ੍ਸਨ੍ਤਿ, ਨ ਸੇਨਾਸਨਂ ਪਞ੍ਞਪੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰਂ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੫੯. ‘‘ਤੇਨ ਹਿ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਵਾਸਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਆਵਾਸਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਆਗਨ੍ਤੁਕਂ ਭਿਕ੍ਖੁਂ ਵੁਡ੍ਢਤਰਂ ਦਿਸ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਾਨੀਯੇਨ ਪੁਚ੍ਛਿਤਬ੍ਬੋ [ਪਾਨੀਯੇਨ ਪੁਚ੍ਛਿਤਬ੍ਬੋ, ਪਰਿਭੋਜਨੀਯੇਨ ਪੁਚ੍ਛਿਤਬ੍ਬੋ (ਸ੍ਯਾ.)]. ਸਚੇ ਉਸ੍ਸਹਤਿ, ਉਪਾਹਨਾ ਪੁਞ੍ਛਿਤਬ੍ਬਾ. ਉਪਾਹਨਾ ਪੁਞ੍ਛਨ੍ਤੇਨ ਪਠਮਂ ਸੁਕ੍ਖੇਨ ਚੋਲ਼ਕੇਨ ਪੁਞ੍ਛਿਤਬ੍ਬਾ, ਪਚ੍ਛਾ ਅਲ੍ਲੇਨ. ਉਪਾਹਨਾਪੁਞ੍ਛਨਚੋਲ਼ਕਂ ਧੋਵਿਤ੍ਵਾ [ਧੋਵਿਤ੍ਵਾ ਪੀਲ਼ੇਤ੍ਵਾ (ਸ੍ਯਾ.)] ਏਕਮਨ੍ਤਂ ਵਿਸ੍ਸਜ੍ਜੇਤਬ੍ਬਂ.

‘‘ਆਗਨ੍ਤੁਕੋ ਭਿਕ੍ਖੁ ਵੁਡ੍ਢਤਰੋ ਅਭਿਵਾਦੇਤਬ੍ਬੋ. ਸੇਨਾਸਨਂ ਪਞ੍ਞਪੇਤਬ੍ਬਂ – ‘ਏਤਂ ਤੇ ਸੇਨਾਸਨਂ ਪਾਪੁਣਾਤੀ’ਤਿ. ਅਜ੍ਝਾਵੁਟ੍ਠਂ ਵਾ ਅਨਜ੍ਝਾਵੁਟ੍ਠਂ ਵਾ ਆਚਿਕ੍ਖਿਤਬ੍ਬਂ. ਗੋਚਰੋ ਆਚਿਕ੍ਖਿਤਬ੍ਬੋ. ਅਗੋਚਰੋ ਆਚਿਕ੍ਖਿਤਬ੍ਬੋ. ਸੇਕ੍ਖਸਮ੍ਮਤਾਨਿ ਕੁਲਾਨਿ ਆਚਿਕ੍ਖਿਤਬ੍ਬਾਨਿ. ਵਚ੍ਚਟ੍ਠਾਨਂ ਆਚਿਕ੍ਖਿਤਬ੍ਬਂ. ਪਸ੍ਸਾਵਟ੍ਠਾਨਂ ਆਚਿਕ੍ਖਿਤਬ੍ਬਂ. ਪਾਨੀਯਂ ਆਚਿਕ੍ਖਿਤਬ੍ਬਂ. ਪਰਿਭੋਜਨੀਯਂ ਆਚਿਕ੍ਖਿਤਬ੍ਬਂ. ਕਤ੍ਤਰਦਣ੍ਡੋ ਆਚਿਕ੍ਖਿਤਬ੍ਬੋ. ਸਙ੍ਘਸ੍ਸ ਕਤਿਕਸਣ੍ਠਾਨਂ ਆਚਿਕ੍ਖਿਤਬ੍ਬਂ – ‘ਇਮਂ ਕਾਲਂ ਪਵਿਸਿਤਬ੍ਬਂ, ਇਮਂ ਕਾਲਂ ਨਿਕ੍ਖਮਿਤਬ੍ਬ’ਨ੍ਤਿ.

‘‘ਸਚੇ ਨਵਕੋ ਹੋਤਿ, ਨਿਸਿਨ੍ਨਕੇਨੇਵ ਆਚਿਕ੍ਖਿਤਬ੍ਬਂ – ‘ਅਤ੍ਰ ਪਤ੍ਤਂ ਨਿਕ੍ਖਿਪਾਹਿ, ਅਤ੍ਰ ਚੀਵਰਂ ਨਿਕ੍ਖਿਪਾਹਿ, ਇਦਂ ਆਸਨਂ ਨਿਸੀਦਾਹੀ’ਤਿ. ਪਾਨੀਯਂ ਆਚਿਕ੍ਖਿਤਬ੍ਬਂ. ਪਰਿਭੋਜਨੀਯਂ ਆਚਿਕ੍ਖਿਤਬ੍ਬਂ. ਉਪਾਹਨਾਪੁਞ੍ਛਨਚੋਲ਼ਕਂ ਆਚਿਕ੍ਖਿਤਬ੍ਬਂ. ਆਗਨ੍ਤੁਕੋ ਭਿਕ੍ਖੁ ਨਵਕੋ ਅਭਿਵਾਦਾਪੇਤਬ੍ਬੋ. ਸੇਨਾਸਨਂ ਆਚਿਕ੍ਖਿਤਬ੍ਬਂ – ‘ਏਤਂ ਤੇ ਸੇਨਾਸਨਂ ਪਾਪੁਣਾਤੀ’ਤਿ. ਅਜ੍ਝਾਵੁਟ੍ਠਂ ਵਾ ਅਨਜ੍ਝਾਵੁਟ੍ਠਂ ਵਾ ਆਚਿਕ੍ਖਿਤਬ੍ਬਂ. ਗੋਚਰੋ ਆਚਿਕ੍ਖਿਤਬ੍ਬੋ. ਅਗੋਚਰੋ ਆਚਿਕ੍ਖਿਤਬ੍ਬੋ. ਸੇਕ੍ਖਸਮ੍ਮਤਾਨਿ ਕੁਲਾਨਿ ਆਚਿਕ੍ਖਿਤਬ੍ਬਾਨਿ. ਵਚ੍ਚਟ੍ਠਾਨਂ ਆਚਿਕ੍ਖਿਤਬ੍ਬਂ. ਪਸ੍ਸਾਵਟ੍ਠਾਨਂ ਆਚਿਕ੍ਖਿਤਬ੍ਬਂ. ਪਾਨੀਯਂ ਆਚਿਕ੍ਖਿਤਬ੍ਬਂ. ਪਰਿਭੋਜਨੀਯਂ ਆਚਿਕ੍ਖਿਤਬ੍ਬਂ. ਕਤ੍ਤਰਦਣ੍ਡੋ ਆਚਿਕ੍ਖਿਤਬ੍ਬੋ. ਸਙ੍ਘਸ੍ਸ ਕਤਿਕਸਣ੍ਠਾਨਂ ਆਚਿਕ੍ਖਿਤਬ੍ਬਂ – ‘ਇਮਂ ਕਾਲਂ ਪਵਿਸਿਤਬ੍ਬਂ, ਇਮਂ ਕਾਲਂ ਨਿਕ੍ਖਮਿਤਬ੍ਬ’ਨ੍ਤਿ. ਇਦਂ ਖੋ, ਭਿਕ੍ਖਵੇ, ਆਵਾਸਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਆਵਾਸਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੩. ਗਮਿਕਵਤ੍ਤਕਥਾ

੩੬੦. ਤੇਨ ਖੋ ਪਨ ਸਮਯੇਨ ਗਮਿਕਾ ਭਿਕ੍ਖੂ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਅਪ੍ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਵਿਵਰਿਤ੍ਵਾ ਸੇਨਾਸਨਂ ਅਨਾਪੁਚ੍ਛਾ ਪਕ੍ਕਮਨ੍ਤਿ. ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਨਸ੍ਸਤਿ. ਸੇਨਾਸਨਂ ਅਗੁਤ੍ਤਂ ਹੋਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਗਮਿਕਾ ਭਿਕ੍ਖੂ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਅਪ੍ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਵਿਵਰਿਤ੍ਵਾ ਸੇਨਾਸਨਂ ਅਨਾਪੁਚ੍ਛਾ ਪਕ੍ਕਮਿਸ੍ਸਨ੍ਤਿ! ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਨਸ੍ਸਤਿ. ਸੇਨਾਸਨਂ ਅਗੁਤ੍ਤਂ ਹੋਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੧. ‘‘ਤੇਨ ਹਿ, ਭਿਕ੍ਖਵੇ, ਗਮਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਗਮਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਗਮਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਸੇਨਾਸਨਂ ਆਪੁਚ੍ਛਾ ਪਕ੍ਕਮਿਤਬ੍ਬਂ [ਆਪੁਚ੍ਛਿਤਬ੍ਬਂ (ਸ੍ਯਾ.)]. ਸਚੇ ਭਿਕ੍ਖੁ ਨ ਹੋਤਿ, ਸਾਮਣੇਰੋ ਆਪੁਚ੍ਛਿਤਬ੍ਬੋ. ਸਚੇ ਸਾਮਣੇਰੋ ਨ ਹੋਤਿ, ਆਰਾਮਿਕੋ ਆਪੁਚ੍ਛਿਤਬ੍ਬੋ. ਸਚੇ ਆਰਾਮਿਕੋ ਨ ਹੋਤਿ, ਉਪਾਸਕੋ ਆਪੁਚ੍ਛਿਤਬ੍ਬੋ. ਸਚੇ ਨ ਹੋਤਿ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਉਪਾਸਕੋ ਵਾ, ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਛਾਦੇਤਬ੍ਬੋ, ਉਸ੍ਸੁਕਂ ਵਾ ਕਾਤਬ੍ਬਂ – ‘ਕਿਨ੍ਤਿ ਨੁ ਖੋ ਵਿਹਾਰੋ ਛਾਦਿਯੇਥਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਯੋ ਦੇਸੋ ਅਨੋਵਸ੍ਸਕੋ ਹੋਤਿ, ਤਤ੍ਥ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਸਬ੍ਬੋ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਸੇਨਾਸਨਂ ਗਾਮਂ ਅਤਿਹਰਿਤਬ੍ਬਂ, ਉਸ੍ਸੁਕਂ ਵਾ ਕਾਤਬ੍ਬਂ – ‘ਕਿਨ੍ਤਿ ਨੁ ਖੋ ਸੇਨਾਸਨਂ ਗਾਮਂ ਅਤਿਹਰਿਯੇਥਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਅਜ੍ਝੋਕਾਸੇ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਪਕ੍ਕਮਿਤਬ੍ਬਂ – ਅਪ੍ਪੇਵ ਨਾਮ ਅਙ੍ਗਾਨਿਪਿ ਸੇਸੇਯ੍ਯੁਨ੍ਤਿ. ਇਦਂ ਖੋ, ਭਿਕ੍ਖਵੇ, ਗਮਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਗਮਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੪. ਅਨੁਮੋਦਨਵਤ੍ਤਕਥਾ

੩੬੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਤ੍ਤਗ੍ਗੇ ਨ ਅਨੁਮੋਦਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਭਤ੍ਤਗ੍ਗੇ ਨ ਅਨੁਮੋਦਿਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਗ੍ਗੇ ਅਨੁਮੋਦਿਤੁ’’ਨ੍ਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਭਤ੍ਤਗ੍ਗੇ ਅਨੁਮੋਦਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਭਤ੍ਤਗ੍ਗੇ ਅਨੁਮੋਦਿਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੂਗਸ੍ਸ ਸਙ੍ਘਭਤ੍ਤਂ ਹੋਤਿ. ਆਯਸ੍ਮਾ ਸਾਰਿਪੁਤ੍ਤੋ ਸਙ੍ਘਤ੍ਥੇਰੋ ਹੋਤਿ. ਭਿਕ੍ਖੂ – ‘ਭਗਵਤਾ ਅਨੁਞ੍ਞਾਤਂ ਥੇਰੇਨ ਭਿਕ੍ਖੁਨਾ ਭਤ੍ਤਗ੍ਗੇ ਅਨੁਮੋਦਿਤੁ’ਨ੍ਤਿ – ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਕਕਂ ਓਹਾਯ ਪਕ੍ਕਮਿਂਸੁ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਤੇ ਮਨੁਸ੍ਸੇ ਪਟਿਸਮ੍ਮੋਦਿਤ੍ਵਾ ਪਚ੍ਛਾ ਏਕਕੋ ਅਗਮਾਸਿ. ਅਦ੍ਦਸਾ ਖੋ ਭਗਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਦੂਰਤੋਵ ਏਕਕਂ ਆਗਚ੍ਛਨ੍ਤਂ. ਦਿਸ੍ਵਾਨ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਕਚ੍ਚਿ, ਸਾਰਿਪੁਤ੍ਤ, ਭਤ੍ਤਂ ਇਦ੍ਧਂ ਅਹੋਸੀ’’ਤਿ? ‘‘ਇਦ੍ਧਂ ਖੋ, ਭਨ੍ਤੇ, ਭਤ੍ਤਂ ਅਹੋਸਿ; ਅਪਿਚ ਮਂ ਭਿਕ੍ਖੂ ਏਕਕਂ ਓਹਾਯ ਪਕ੍ਕਨ੍ਤਾ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਗ੍ਗੇ ਚਤੂਹਿ ਪਞ੍ਚਹਿ ਥੇਰਾਨੁਥੇਰੇਹਿ ਭਿਕ੍ਖੂਹਿ ਆਗਮੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਥੇਰੋ ਭਤ੍ਤਗ੍ਗੇ ਵਚ੍ਚਿਤੋ ਆਗਮੇਸਿ. ਸੋ ਵਚ੍ਚਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਮੁਚ੍ਛਿਤੋ ਪਪਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਕਰਣੀਯੇ ਆਨਨ੍ਤਰਿਕਂ ਭਿਕ੍ਖੁਂ ਆਪੁਚ੍ਛਿਤ੍ਵਾ ਗਨ੍ਤੁ’’ਨ੍ਤਿ.

੫. ਭਤ੍ਤਗ੍ਗਵਤ੍ਤਕਥਾ

੩੬੩. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਭਤ੍ਤਗ੍ਗਂ ਗਚ੍ਛਨ੍ਤਿ, ਵੋਕ੍ਕਮ੍ਮਪਿ ਥੇਰਾਨਂ ਭਿਕ੍ਖੂਨਂ ਪੁਰਤੋ ਪੁਰਤੋ ਗਚ੍ਛਨ੍ਤਿ, ਥੇਰੇਪਿ ਭਿਕ੍ਖੂ ਅਨੁਪਖਜ੍ਜ ਨਿਸੀਦਨ੍ਤਿ, ਨਵੇਪਿ ਭਿਕ੍ਖੂ ਆਸਨੇਨ ਪਟਿਬਾਹਨ੍ਤਿ, ਸਙ੍ਘਾਟਿਮ੍ਪਿ ਓਤ੍ਥਰਿਤ੍ਵਾ ਅਨ੍ਤਰਘਰੇ ਨਿਸੀਦਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਭਤ੍ਤਗ੍ਗਂ ਗਚ੍ਛਿਸ੍ਸਨ੍ਤਿ, ਵੋਕ੍ਕਮ੍ਮਪਿ ਥੇਰਾਨਂ ਭਿਕ੍ਖੂਨਂ ਪੁਰਤੋ ਪੁਰਤੋ ਗਚ੍ਛਿਸ੍ਸਨ੍ਤਿ, ਥੇਰੇਪਿ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਸ੍ਸਨ੍ਤਿ, ਨਵੇਪਿ ਭਿਕ੍ਖੂ ਆਸਨੇਨਪਿ ਪਟਿਬਾਹਿਸ੍ਸਨ੍ਤਿ, ਸਙ੍ਘਾਟਿਮ੍ਪਿ ਓਤ੍ਥਰਿਤ੍ਵਾ ਅਨ੍ਤਰਘਰੇ ਨਿਸੀਦਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਭਤ੍ਤਗ੍ਗਂ ਗਚ੍ਛਨ੍ਤਿ, ਵੋਕ੍ਕਮ੍ਮਪਿ ਥੇਰਾਨਂ ਭਿਕ੍ਖੂਨਂ ਪੁਰਤੋ ਪੁਰਤੋ ਗਚ੍ਛਨ੍ਤਿ, ਥੇਰੇਪਿ ਭਿਕ੍ਖੂ ਅਨੁਪਖਜ੍ਜ ਨਿਸੀਦਨ੍ਤਿ, ਨਵੇਪਿ ਭਿਕ੍ਖੂ ਆਸਨੇਨ ਪਟਿਬਾਹਨ੍ਤਿ, ਸਙ੍ਘਾਟਿਮ੍ਪਿ ਓਤ੍ਥਰਿਤ੍ਵਾ ਅਨ੍ਤਰਘਰੇ ਨਿਸੀਦਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੪. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਭਤ੍ਤਗ੍ਗਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਭਤ੍ਤਗ੍ਗੇ ਸਮ੍ਮਾ ਵਤ੍ਤਿਤਬ੍ਬਂ. ਸਚੇ ਆਰਾਮੇ ਕਾਲੋ ਆਰੋਚਿਤੋ ਹੋਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ.

‘‘ਨ ਵੋਕ੍ਕਮ੍ਮ ਥੇਰਾਨਂ ਭਿਕ੍ਖੂਨਂ ਪੁਰਤੋ ਪੁਰਤੋ ਗਨ੍ਤਬ੍ਬਂ. ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਸੁਸਂਵੁਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਓਕ੍ਖਿਤ੍ਤਚਕ੍ਖੁਨਾ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਖਿਤ੍ਤਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਅਪ੍ਪਸਦ੍ਦੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਕਾਯਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਬਾਹੁਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ.

‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਸੁਸਂਵੁਤੇਨ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਓਕ੍ਖਿਤ੍ਤਚਕ੍ਖੁਨਾ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਉਕ੍ਖਿਤ੍ਤਕਾਯ ਅਨ੍ਤਰਘਰੇ ਨਿਸੀਦਿਤਬ੍ਬਂ ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਨਿਸੀਦਿਤਬ੍ਬਂ, ਅਪ੍ਪਸਦ੍ਦੇਨ ਅਨ੍ਤਰਘਰੇ ਨਿਸੀਦਿਤਬ੍ਬ. ਨ ਕਾਯਪ੍ਪਚਾਲਕਂ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਬਾਹੁਪ੍ਪਚਾਲਕਂ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਖਮ੍ਭਕਤੇਨ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਪਲ੍ਲਤ੍ਥਿਕਾਯ ਅਨ੍ਤਰਘਰੇ ਨਿਸੀਦਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਨ ਸਙ੍ਘਾਟਿਂ ਓਤ੍ਥਰਿਤ੍ਵਾ ਅਨ੍ਤਰਘਰੇ ਨਿਸੀਦਿਤਬ੍ਬਂ.

‘‘ਉਦਕੇ ਦਿਯ੍ਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਉਦਕਂ ਪਟਿਗ੍ਗਹੇਤਬ੍ਬਂ. ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਪਤ੍ਤੋ ਧੋਵਿਤਬ੍ਬੋ. ਸਚੇ ਉਦਕਪ੍ਪਟਿਗ੍ਗਾਹਕੋ ਹੋਤਿ, ਨੀਚਂ ਕਤ੍ਵਾ ਉਦਕਪ੍ਪਟਿਗ੍ਗਹੇ ਉਦਕਂ ਆਸਿਞ੍ਚਿਤਬ੍ਬਂ – ਮਾ ਉਦਕਪ੍ਪਟਿਗ੍ਗਾਹਕੋ ਉਦਕੇਨ ਓਸਿਞ੍ਚਿ [ਓਸਿਞ੍ਚਿਯ੍ਯੀ (ਕ.)], ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ [ਓਸਿਞ੍ਚਿਯ੍ਯਿਂਸੁ (ਕ.)], ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀਤਿ. ਸਚੇ ਉਦਕਪ੍ਪਟਿਗ੍ਗਾਹਕੋ ਨ ਹੋਤਿ, ਨੀਚਂ ਕਤ੍ਵਾ ਛਮਾਯ ਉਦਕਂ ਆਸਿਞ੍ਚਿਤਬ੍ਬਂ – ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀਤਿ.

‘‘ਓਦਨੇ ਦਿਯ੍ਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਓਦਨੋ ਪਟਿਗ੍ਗਹੇਤਬ੍ਬੋ, ਸੂਪਸ੍ਸ ਓਕਾਸੋ ਕਾਤਬ੍ਬੋ. ਸਚੇ ਹੋਤਿ ਸਪ੍ਪਿ ਵਾ ਤੇਲਂ ਵਾ ਉਤ੍ਤਰਿਭਙ੍ਗਂ ਵਾ, ਥੇਰੇਨ ਵਤ੍ਤਬ੍ਬੋ – ‘ਸਬ੍ਬੇਸਂ ਸਮਕਂ ਸਮ੍ਪਾਦੇਹੀ’ਤਿ. ਸਕ੍ਕਚ੍ਚਂ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ. ਪਤ੍ਤਸਞ੍ਞਿਨਾ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ. ਸਮਸੂਪਕੋ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ. ਸਮਤਿਤ੍ਤਿਕੋ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ.

‘‘ਨ ਤਾਵ ਥੇਰੇਨ ਭੁਞ੍ਜਿਤਬ੍ਬਂ ਯਾਵ ਨ ਸਬ੍ਬੇਸਂ ਓਦਨੋ ਸਮ੍ਪਤ੍ਤੋ ਹੋਤਿ. ਸਕ੍ਕਚ੍ਚਂ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ. ਪਤ੍ਤਸਞ੍ਞਿਨਾ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ. ਸਪਦਾਨਂ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ. ਸਮਸੂਪਕੋ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ. ਨ ਥੂਪਕਤੋ ਓਮਦ੍ਦਿਤ੍ਵਾ ਪਿਣ੍ਡਿਪਾਤੋ ਭੁਞ੍ਜਿਤਬ੍ਬੋ. ਨ ਸੂਪਂ ਵਾ ਬ੍ਯਞ੍ਜਨਂ ਵਾ ਓਦਨੇਨ ਪਟਿਚ੍ਛਾਦੇਤਬ੍ਬਂ ਭਿਯ੍ਯੋਕਮ੍ਯਤਂ ਉਪਾਦਾਯ. ਨ ਸੂਪਂ ਵਾ ਓਦਨਂ ਵਾ ਅਗਿਲਾਨੇਨ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਿਤਬ੍ਬਂ. ਨ ਉਜ੍ਝਾਨਸਞ੍ਞਿਨਾ ਪਰੇਸਂ ਪਤ੍ਤੋ ਓਲੋਕੇਤਬ੍ਬੋ. ਨਾਤਿਮਹਨ੍ਤੋ ਕਬਲ਼ੋ ਕਾਤਬ੍ਬੋ. ਪਰਿਮਣ੍ਡਲੋ ਆਲੋਪੋ ਕਾਤਬ੍ਬੋ. ਨ ਅਨਾਹਟੇ ਕਬਲ਼ੇ ਮੁਖਦ੍ਵਾਰਂ ਵਿਵਰਿਤਬ੍ਬਂ. ਨ ਭੁਞ੍ਜਮਾਨੇਨ ਸਬ੍ਬੋ ਹਤ੍ਥੋ ਮੁਖੇ ਪਕ੍ਖਿਪਿਤਬ੍ਬੋ. ਨ ਸਕਬਲ਼ੇਨ ਮੁਖੇਨ ਬ੍ਯਾਹਰਿਤਬ੍ਬਂ. ਨ ਪਿਣ੍ਡੁਕ੍ਖੇਪਕਂ ਭੁਞ੍ਜਿਤਬ੍ਬਂ. ਨ ਕਬਲ਼ਾਵਚ੍ਛੇਦਕਂ ਭੁਞ੍ਜਿਤਬ੍ਬਂ. ਨ ਅਵਗਣ੍ਡਕਾਰਕਂ ਭੁਞ੍ਜਿਤਬ੍ਬਂ. ਨ ਹਤ੍ਥਨਿਦ੍ਧੁਨਕਂ ਭੁਞ੍ਜਿਤਬ੍ਬਂ. ਨ ਸਿਤ੍ਥਾਵਕਾਰਕਂ ਭੁਞ੍ਜਿਤਬ੍ਬਂ. ਨ ਜਿਵ੍ਹਾਨਿਚ੍ਛਾਰਕਂ ਭੁਞ੍ਜਿਤਬ੍ਬਂ. ਨ ਚਪੁਚਪੁਕਾਰਕਂ ਭੁਞ੍ਜਿਤਬ੍ਬਂ. ਨ ਸੁਰੁਸੁਰੁਕਾਰਕਂ ਭੁਞ੍ਜਿਤਬ੍ਬਂ. ਨ ਹਤ੍ਥਨਿਲ੍ਲੇਹਕਂ ਭੁਞ੍ਜਿਤਬ੍ਬਂ. ਨ ਪਤ੍ਤਨਿਲ੍ਲੇਹਕਂ ਭੁਞ੍ਜਿਤਬ੍ਬਂ. ਨ ਓਟ੍ਠਨਿਲ੍ਲੇਹਕਂ ਭੁਞ੍ਜਿਤਬ੍ਬਂ.

‘‘ਨ ਸਾਮਿਸੇਨ ਹਤ੍ਥੇਨ ਪਾਨੀਯਥਾਲਕੋ ਪਟਿਗ੍ਗਹੇਤਬ੍ਬੋ. ਨ ਤਾਵ ਥੇਰੇਨ ਉਦਕਂ ਪਟਿਗ੍ਗਹੇਤਬ੍ਬਂ ਯਾਵ ਨ ਸਬ੍ਬੇਵ ਭੁਤ੍ਤਾਵਿਨੋ ਹੋਨ੍ਤਿ. ਉਦਕੇ ਦਿਯ੍ਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਉਦਕਂ ਪਟਿਗ੍ਗਹੇਤਬ੍ਬਂ. ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਪਤ੍ਤੋ ਧੋਵਿਤਬ੍ਬੋ. ਸਚੇ ਉਦਕਪ੍ਪਟਿਗ੍ਗਾਹਕੋ ਹੋਤਿ, ਨੀਚਂ ਕਤ੍ਵਾ ਉਦਕਪ੍ਪਟਿਗ੍ਗਹੇ ਉਦਕਂ ਆਸਿਞ੍ਚਿਤਬ੍ਬਂ – ਮਾ ਉਦਕਪ੍ਪਟਿਗ੍ਗਾਹਕੋ ਉਦਕੇਨ ਓਸਿਞ੍ਚਿ, ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀਤਿ. ਸਚੇ ਉਦਕਪ੍ਪਟਿਗ੍ਗਾਹਕੋ ਨ ਹੋਤਿ, ਨੀਚਂ ਕਤ੍ਵਾ ਛਮਾਯ ਉਦਕਂ ਆਸਿਞ੍ਚਿਤਬ੍ਬਂ – ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀਤਿ. ਨ ਸਸਿਤ੍ਥਕਂ ਪਤ੍ਤਧੋਵਨਂ ਅਨ੍ਤਰਘਰੇ ਛਡ੍ਡੇਤਬ੍ਬਂ.

‘‘ਨਿਵਤ੍ਤਨ੍ਤੇਨ ਨਵਕੇਹਿ ਭਿਕ੍ਖੂਹਿ ਪਠਮਤਰਂ ਨਿਵਤ੍ਤਿਤਬ੍ਬਂ. ਪਚ੍ਛਾ ਥੇਰੇਹਿ ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਸੁਸਂਵੁਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਓਕ੍ਖਿਤ੍ਤਚਕ੍ਖੁਨਾ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਖਿਤ੍ਤਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਅਪ੍ਪਸਦ੍ਦੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਕਾਯਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਬਾਹੁਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਭਤ੍ਤਗ੍ਗਵਤ੍ਤਂ ਯਥਾ ਭਿਕ੍ਖੂਹਿ ਭਤ੍ਤਗ੍ਗੇ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

ਪਠਮਭਾਣਵਾਰੋ ਨਿਟ੍ਠਿਤੋ.

੬. ਪਿਣ੍ਡਚਾਰਿਕਵਤ੍ਤਕਥਾ

੩੬੫. ਤੇਨ ਖੋ ਪਨ ਸਮਯੇਨ ਪਿਣ੍ਡਚਾਰਿਕਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਵੇਸਨਂ ਪਵਿਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਕ੍ਖਮਨ੍ਤਿ, ਅਤਿਸਹਸਾਪਿ ਪਵਿਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਨ੍ਤਿ, ਅਤਿਦੂਰੇਪਿ ਤਿਟ੍ਠਨ੍ਤਿ, ਅਚ੍ਚਾਸਨ੍ਨੇਪਿ ਤਿਟ੍ਠਨ੍ਤਿ, ਅਤਿਚਿਰਮ੍ਪਿ ਤਿਟ੍ਠਨ੍ਤਿ, ਅਤਿਲਹੁਮ੍ਪਿ ਨਿਵਤ੍ਤਨ੍ਤਿ. ਅਞ੍ਞਤਰੋਪਿ ਪਿਣ੍ਡਚਾਰਿਕੋ ਭਿਕ੍ਖੁ ਅਸਲ੍ਲਕ੍ਖੇਤ੍ਵਾ ਨਿਵੇਸਨਂ ਪਾਵਿਸਿ. ਸੋ ਚ ਦ੍ਵਾਰਂ ਮਞ੍ਞਮਾਨੋ ਅਞ੍ਞਤਰਂ ਓਵਰਕਂ ਪਾਵਿਸਿ. ਤਸ੍ਮਿਮ੍ਪਿ ਓਵਰਕੇ ਇਤ੍ਥੀ ਨਗ੍ਗਾ ਉਤ੍ਤਾਨਾ ਨਿਪਨ੍ਨਾ ਹੋਤਿ. ਅਦ੍ਦਸਾ ਖੋ ਸੋ ਭਿਕ੍ਖੁ ਤਂ ਇਤ੍ਥਿਂ ਨਗ੍ਗਂ ਉਤ੍ਤਾਨਂ ਨਿਪਨ੍ਨਂ. ਦਿਸ੍ਵਾਨ – ‘‘ਨਯਿਦਂ ਦ੍ਵਾਰਂ, ਓਵਰਕਂ ਇਦ’’ਨ੍ਤਿ ਤਮ੍ਹਾ ਓਵਰਕਾ ਨਿਕ੍ਖਮਿ. ਅਦ੍ਦਸਾ ਖੋ ਤਸ੍ਸਾ ਇਤ੍ਥਿਯਾ ਸਾਮਿਕੋ ਤਂ ਇਤ੍ਥਿਂ ਨਗ੍ਗਂ ਉਤ੍ਤਾਨਂ ਨਿਪਨ੍ਨਂ. ਦਿਸ੍ਵਾਨ – ‘‘ਇਮਿਨਾ ਮੇ ਭਿਕ੍ਖੁਨਾ ਪਜਾਪਤੀ ਦੂਸਿਤਾ’’ਤਿ ਤਂ ਭਿਕ੍ਖੁਂ ਗਹੇਤ੍ਵਾ ਆਕੋਟੇਸਿ. ਅਥ ਖੋ ਸਾ ਇਤ੍ਥੀ ਤੇਨ ਸਦ੍ਦੇਨ ਪਟਿਬੁਜ੍ਝਿਤ੍ਵਾ ਤਂ ਪੁਰਿਸਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਅਯ੍ਯ, ਇਮਂ ਭਿਕ੍ਖੁਂ ਆਕੋਟੇਸੀ’’ਤਿ? ‘‘ਇਮਿਨਾਸਿ ਤ੍ਵਂ ਭਿਕ੍ਖੁਨਾ ਦੂਸਿਤਾ’’ਤਿ? ‘‘ਨਾਹਂ, ਅਯ੍ਯ, ਇਮਿਨਾ ਭਿਕ੍ਖੁਨਾ ਦੂਸਿਤਾ; ਅਕਾਰਕੋ ਸੋ ਭਿਕ੍ਖੂ’’ਤਿ ਤਂ ਭਿਕ੍ਖੁਂ ਮੁਞ੍ਚਾਪੇਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਪਿਣ੍ਡਚਾਰਿਕਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਵੇਸਨਂ ਪਵਿਸਿਸ੍ਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਕ੍ਖਮਿਸ੍ਸਨ੍ਤਿ, ਅਤਿਸਹਸਾਪਿ ਪਵਿਸਿਸ੍ਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਿਸ੍ਸਨ੍ਤਿ, ਅਤਿਦੂਰੇਪਿ ਤਿਟ੍ਠਿਸ੍ਸਨ੍ਤਿ, ਅਚ੍ਚਾਸਨ੍ਨੇਪਿ ਤਿਟ੍ਠਿਸ੍ਸਨ੍ਤਿ, ਅਤਿਚਿਰਮ੍ਪਿ ਤਿਟ੍ਠਿਸ੍ਸਨ੍ਤਿ, ਅਤਿਲਹੁਮ੍ਪਿ ਨਿਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੬. ‘‘ਤੇਨ ਹਿ, ਭਿਕ੍ਖਵੇ, ਪਿਣ੍ਡਚਾਰਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਾਪੇਸ੍ਸਾਮਿ ਯਥਾ ਪਿਣ੍ਡਚਾਰਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਪਿਣ੍ਡਚਾਰਿਕੇਨ, ਭਿਕ੍ਖਵੇ, ਭਿਕ੍ਖੁਨਾ – ‘ਇਦਾਨਿ ਗਾਮਂ ਪਵਿਸਿਸ੍ਸਾਮੀ’ਤਿ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ.

‘‘ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’ਤਿ. ਨਾਤਿਸਹਸਾ ਪਵਿਸਿਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨਾਤਿਦੂਰੇ ਠਾਤਬ੍ਬਂ. ਨਾਚ੍ਚਾਸਨ੍ਨੇ ਠਾਤਬ੍ਬਂ. ਨਾਤਿਚਿਰਂ ਠਾਤਬ੍ਬਂ. ਨਾਤਿਲਹੁਂ ਨਿਵਤ੍ਤਿਤਬ੍ਬਂ. ਠਿਤਕੇਨ ਸਲ੍ਲਕ੍ਖੇਤਬ੍ਬਂ – ‘ਭਿਕ੍ਖਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਮ੍ਮਂ ਵਾ ਨਿਕ੍ਖਿਪਤਿ, ਆਸਨਾ ਵਾ ਵੁਟ੍ਠਾਤਿ, ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ [ਠਾਪੇਤਿ (ਕ.)] ਵਾ – ਦਾਤੁਕਾਮਸ੍ਸਾਤਿ [ਦਾਤੁਕਾਮਿਯਾਤਿ (ਸ੍ਯਾ.), ਦਾਤੁਕਾਮਾ ਵਿਯਾਤਿ (ਸੀ.)] ਠਾਤਬ੍ਬਂ. ਭਿਕ੍ਖਾਯ ਦਿਯ੍ਯਮਾਨਾਯ ਵਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍ਵਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ. ਨ ਚ ਭਿਕ੍ਖਾਦਾਯਿਕਾਯ ਮੁਖਂ ਉਲ੍ਲੋਕੇਤਬ੍ਬਂ [ਓਲੋਕੇਤਬ੍ਬਂ (ਸ੍ਯਾ.)]. ਸਲ੍ਲਕ੍ਖੇਤਬ੍ਬਂ – ‘ਸੂਪਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍ਵਾ ਸਾਧੁਕਂ ਅਤਰਮਾਨੇਨ ਨਿਵਤ੍ਤਿਤਬ੍ਬਂ.

‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਸੁਸਂਵੁਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਓਕ੍ਖਿਤ੍ਤਚਕ੍ਖੁਨਾ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਖਿਤ੍ਤਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਅਪ੍ਪਸਦ੍ਦੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਕਾਯਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਬਾਹੁਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਤੇਨ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਉਪਟ੍ਠਾਪੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ, ਭੁਞ੍ਜਿਤਬ੍ਬਂ. ਨੋ ਚੇ ਆਕਙ੍ਖਤਿ, ਅਪ੍ਪਹਰਿਤੇ ਵਾ ਛਡ੍ਡੇਤਬ੍ਬਂ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਬ੍ਬਂ. ਤੇਨ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਪਟਿਸਾਮੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਬ੍ਬਂ, ਭਤ੍ਤਗ੍ਗਂ ਸਮ੍ਮਜ੍ਜਿਤਬ੍ਬਂ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਤੇਨ ਉਪਟ੍ਠਾਪੇਤਬ੍ਬਂ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਤਬ੍ਬਂ, ਨ ਚ ਤਪ੍ਪਚ੍ਚਯਾ ਵਾਚਾ ਭਿਨ੍ਦਿਤਬ੍ਬਾ. ਇਦਂ ਖੋ, ਭਿਕ੍ਖਵੇ, ਪਿਣ੍ਡਚਾਰਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਪਿਣ੍ਡਚਾਰਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੭. ਆਰਞ੍ਞਿਕਵਤ੍ਤਕਥਾ

੩੬੭. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਰਞ੍ਞੇ ਵਿਹਰਨ੍ਤਿ. ਤੇ ਨੇਵ ਪਾਨੀਯਂ ਉਪਟ੍ਠਾਪੇਨ੍ਤਿ, ਨ ਪਰਿਭੋਜਨੀਯਂ ਉਪਟ੍ਠਾਪੇਨ੍ਤਿ, ਨ ਅਗ੍ਗਿਂ ਉਪਟ੍ਠਾਪੇਨ੍ਤਿ, ਨ ਅਰਣਿਸਹਿਤਂ ਉਪਟ੍ਠਾਪੇਨ੍ਤਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ. ਚੋਰਾ ਤਤ੍ਥ ਗਨ੍ਤ੍ਵਾ ਤੇ ਭਿਕ੍ਖੂ ਏਤਦਵੋਚੁਂ – ‘‘ਅਤ੍ਥਿ, ਭਨ੍ਤੇ, ਪਾਨੀਯ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਪਰਿਭੋਜਨੀਯ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਅਗ੍ਗੀ’’ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਅਰਣਿਸਹਿਤ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ( ) [(ਅਤ੍ਥਿ ਭਨ੍ਤੇ ਨਕ੍ਖਤ੍ਤਪਦਾਨੀਤਿ, ਨ ਜਾਨਾਮ ਆਵੁਸੋਤਿ, ਅਤ੍ਥਿ ਭਨ੍ਤੇ ਦਿਸਾਭਾਗਨ੍ਤਿ, ਨ ਜਾਨਾਮ ਆਵੁਸੋਤਿ.) ਸੀ. ਵਿਮਤਿਟੀਕਾਯ ਪਨ ਸਮੇਤਿ] ‘‘ਕੇਨਜ੍ਜ, ਭਨ੍ਤੇ, ਯੁਤ੍ਤ’’ਨ੍ਤਿ? ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ‘‘ਕਤਮਾਯਂ, ਭਨ੍ਤੇ, ਦਿਸਾ’’ਤਿ? ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਅਥ ਖੋ ਤੇ ਚੋਰਾ – ‘ਨੇਵਿਮੇਸਂ ਪਾਨੀਯਂ ਅਤ੍ਥਿ, ਨ ਪਰਿਭੋਜਨੀਯਂ ਅਤ੍ਥਿ, ਨ ਅਗ੍ਗਿ ਅਤ੍ਥਿ, ਨ ਅਰਣਿਸਹਿਤਂ ਅਤ੍ਥਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ; ਚੋਰਾ ਇਮੇ, ਨਯਿਮੇ ਭਿਕ੍ਖੂ’ਤਿ – ਆਕੋਟੇਤ੍ਵਾ ਪਕ੍ਕਮਿਂਸੁ. ਅਥ ਖੋ ਤੇ ਭਿਕ੍ਖੂ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੮. ‘‘ਤੇਨ ਹਿ, ਭਿਕ੍ਖਵੇ, ਆਰਞ੍ਞਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਆਰਞ੍ਞਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਕਾਲਸ੍ਸੇਵ ਉਟ੍ਠਾਯ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਚੀਵਰਂ ਖਨ੍ਧੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਸੇਨਾਸਨਾ ਓਤਰਿਤਬ੍ਬਂ – ਇਦਾਨਿ ਗਾਮਂ ਪਵਿਸਿਸ੍ਸਾਮੀਤਿ. ਉਪਾਹਨਾ ਓਮੁਞ੍ਚਿਤ੍ਵਾ ਨੀਚਂ ਕਤ੍ਵਾ ਪਪ੍ਫੋਟੇਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ. ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ… ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ.

‘‘ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’ਤਿ. ਨਾਤਿਸਹਸਾ ਪਵਿਸਿਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨਾਤਿਦੂਰੇ ਠਾਤਬ੍ਬਂ. ਨਾਚ੍ਚਾਸਨ੍ਨੇ ਠਾਤਬ੍ਬਂ. ਨਾਤਿਚਿਰਂ ਠਾਤਬ੍ਬਂ. ਨਾਤਿਲਹੁਂ ਨਿਵਤ੍ਤਿਤਬ੍ਬਂ. ਠਿਤਕੇਨ ਸਲ੍ਲਕ੍ਖੇਤਬ੍ਬਂ – ‘ਭਿਕ੍ਖਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਮ੍ਮਂ ਵਾ ਨਿਕ੍ਖਿਪਤਿ, ਆਸਨਾ ਵਾ ਵੁਟ੍ਠਾਤਿ, ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਯ੍ਯਮਾਨਾਯ ਵਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍ਵਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ. ਨ ਚ ਭਿਕ੍ਖਾਦਾਯਿਕਾਯ ਮੁਖਂ ਉਲ੍ਲੋਕੇਤਬ੍ਬਂ. ਸਲ੍ਲਕ੍ਖੇਤਬ੍ਬਂ – ‘ਸੂਪਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਟਚ੍ਛੁ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍ਵਾ ਸਾਧੁਕਂ ਅਤਰਮਾਨੇਨ ਨਿਵਤ੍ਤਿਤਬ੍ਬਂ.

‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ… ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਗਾਮਤੋ ਨਿਕ੍ਖਮਿਤ੍ਵਾ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਚੀਵਰਂ ਸਙ੍ਘਰਿਤ੍ਵਾ ਸੀਸੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਗਨ੍ਤਬ੍ਬਂ.

‘‘ਆਰਞ੍ਞਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਾਨੀਯਂ ਉਪਟ੍ਠਾਪੇਤਬ੍ਬਂ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ, ਅਗ੍ਗਿ ਉਪਟ੍ਠਾਪੇਤਬ੍ਬੋ, ਅਰਣਿਸਹਿਤਂ ਉਪਟ੍ਠਾਪੇਤਬ੍ਬਂ, ਕਤ੍ਤਰਦਣ੍ਡੋ ਉਪਟ੍ਠਾਪੇਤਬ੍ਬੋ, ਨਕ੍ਖਤ੍ਤਪਦਾਨਿ ਉਗ੍ਗਹੇਤਬ੍ਬਾਨਿ – ਸਕਲਾਨਿ ਵਾ ਏਕਦੇਸਾਨਿ ਵਾ, ਦਿਸਾਕੁਸਲੇਨ ਭਵਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਆਰਞ੍ਞਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੮. ਸੇਨਾਸਨਵਤ੍ਤਕਥਾ

੩੬੯. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਜ੍ਝੋਕਾਸੇ ਚੀਵਰਕਮ੍ਮਂ ਕਰੋਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਪਟਿਵਾਤੇ ਅਙ੍ਗਣੇ [ਪਙ੍ਗਣੇ (ਸੀ. ਸ੍ਯਾ.)] ਸੇਨਾਸਨਂ ਪਪ੍ਫੋਟੇਸੁਂ. ਭਿਕ੍ਖੂ ਰਜੇਨ ਓਕਿਰਿਂਸੁ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਪਟਿਵਾਤੇ ਅਙ੍ਗਣੇ ਸੇਨਾਸਨਂ ਪਪ੍ਫੋਟੇਸ੍ਸਨ੍ਤਿ! ਭਿਕ੍ਖੂ ਰਜੇਨ ਓਕਿਰਿਂਸੂ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਪਟਿਵਾਤੇ ਅਙ੍ਗਣੇ ਸੇਨਾਸਨਂ ਪਪ੍ਫੋਟੇਨ੍ਤਿ, ਭਿਕ੍ਖੂ ਰਜੇਨ ਓਕਿਰਿਂਸੂ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੭੦. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਸੇਨਾਸਨਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਸੇਨਾਸਨੇ ਸਮ੍ਮਾ ਵਤ੍ਤਿਤਬ੍ਬਂ. ਯਸ੍ਮਿਂ ਵਿਹਾਰੇ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. [ਮਹਾਵ. ੬੬, ੬੭; ਚੂਲ਼ਵ. ੩੫੭] ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੁਮ੍ਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਰਿਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਨ ਭਿਕ੍ਖੁਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ. ਨ ਵਿਹਾਰਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ. ਨ ਪਾਨੀਯਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ. ਨ ਪਰਿਭੋਜਨੀਯਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ. ਨ ਪਟਿਵਾਤੇ ਅਙ੍ਗਣੇ ਸੇਨਾਸਨਂ ਪਪ੍ਫੋਟੇਤਬ੍ਬਂ. ਅਧੋਵਾਤੇ ਸੇਨਾਸਨਂ ਪਪ੍ਫੋਟੇਤਬ੍ਬਂ.

‘‘ਭੁਮ੍ਮਤ੍ਥਰਣਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਵੁਡ੍ਢੇਨ ਸਦ੍ਧਿਂ ਏਕਵਿਹਾਰੇ ਵਿਹਰਤਿ, ਨ ਵੁਡ੍ਢਂ ਅਨਾਪੁਚ੍ਛਾ ਉਦ੍ਦੇਸੋ ਦਾਤਬ੍ਬੋ, ਨ ਪਰਿਪੁਚ੍ਛਾ ਦਾਤਬ੍ਬਾ, ਨ ਸਜ੍ਝਾਯੋ ਕਾਤਬ੍ਬੋ, ਨ ਧਮ੍ਮੋ ਭਾਸਿਤਬ੍ਬੋ, ਨ ਪਦੀਪੋ ਕਾਤਬ੍ਬੋ, ਨ ਪਦੀਪੋ ਵਿਜ੍ਝਾਪੇਤਬ੍ਬੋ, ਨ ਵਾਤਪਾਨਾ ਵਿਵਰਿਤਬ੍ਬਾ, ਨ ਵਾਤਪਾਨਾ ਥਕੇਤਬ੍ਬਾ. ਸਚੇ ਵੁਡ੍ਢੇਨ ਸਦ੍ਧਿਂ ਏਕਚਙ੍ਕਮੇ ਚਙ੍ਕਮਤਿ, ਯੇਨ ਵੁਡ੍ਢੋ ਤੇਨ ਪਰਿਵਤ੍ਤਿਤਬ੍ਬਂ, ਨ ਚ ਵੁਡ੍ਢੋ ਸਙ੍ਘਾਟਿਕਣ੍ਣੇਨ ਘਟ੍ਟੇਤਬ੍ਬੋ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਸੇਨਾਸਨਵਤ੍ਤਂ ਯਥਾ ਭਿਕ੍ਖੂਹਿ ਸੇਨਾਸਨੇ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੯. ਜਨ੍ਤਾਘਰਵਤ੍ਤਕਥਾ

੩੭੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਨ੍ਤਿ. ਭਿਕ੍ਖੂ [ਥੇਰਾ ਚ ਭਿਕ੍ਖੂ (ਸ੍ਯਾ. ਕਂ.)] ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਿਸ੍ਸਨ੍ਤਿ! ਭਿਕ੍ਖੂ ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਜਨ੍ਤਾਘਰੇ ਥੇਰੇਹਿ ਭਿਕ੍ਖੂਹਿ ਨਿਵਾਰਿਯਮਾਨਾ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਨ੍ਤਿ; ਭਿਕ੍ਖੂ ਉਣ੍ਹਾਭਿਤਤ੍ਤਾ ਦ੍ਵਾਰਂ ਅਲਭਮਾਨਾ ਮੁਚ੍ਛਿਤਾ ਪਪਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਜਨ੍ਤਾਘਰੇ ਥੇਰੇਨ ਭਿਕ੍ਖੁਨਾ ਨਿਵਾਰਿਯਮਾਨੇਨ ਅਨਾਦਰਿਯਂ ਪਟਿਚ੍ਚ ਪਹੂਤਂ ਕਟ੍ਠਂ ਆਰੋਪੇਤ੍ਵਾ ਅਗ੍ਗਿ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ, ਭਿਕ੍ਖਵੇ, ਦ੍ਵਾਰਂ ਥਕੇਤ੍ਵਾ ਦ੍ਵਾਰੇ ਨਿਸੀਦਿਤਬ੍ਬਂ. ਯੋ ਨਿਸੀਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

੩੭੨. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਜਨ੍ਤਾਘਰਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਜਨ੍ਤਾਘਰੇ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਪਠਮਂ ਜਨ੍ਤਾਘਰਂ ਗਚ੍ਛਤਿ, ਸਚੇ ਛਾਰਿਕਾ ਉਸ੍ਸਨ੍ਨਾ ਹੋਤਿ, ਛਾਰਿਕਾ ਛਡ੍ਡੇਤਬ੍ਬਾ. ਸਚੇ ਜਨ੍ਤਾਘਰਂ ਉਕ੍ਲਾਪਂ ਹੋਤਿ, ਜਨ੍ਤਾਘਰਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਭਣ੍ਡਂ ਉਕ੍ਲਾਪਂ ਹੋਤਿ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਜਨ੍ਤਾਘਰਸਾਲਾ ਉਕ੍ਲਾਪਾ ਹੋਤਿ, ਜਨ੍ਤਾਘਰਸਾਲਾ ਸਮ੍ਮਜ੍ਜਿਤਬ੍ਬਾ.

‘‘ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਉਦਕਦੋਣਿਕਾਯ ਉਦਕਂ ਆਸਿਞ੍ਚਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰੇ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ. ਸਚੇ ਉਸ੍ਸਹਤਿ, ਉਦਕੇਪਿ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ. ਨ ਥੇਰਾਨਂ ਭਿਕ੍ਖੂਨਂ ਪੁਰਤੋਪਿ ਨਹਾਯਿਤਬ੍ਬਂ, ਨ ਉਪਰਿਤੋਪਿ ਨਹਾਯਿਤਬ੍ਬਂ. ਨਹਾਤੇਨ ਉਤ੍ਤਰਨ੍ਤੇਨ ਓਤਰਨ੍ਤਾਨਂ ਮਗ੍ਗੋ ਦਾਤਬ੍ਬੋ. ਯੋ ਪਚ੍ਛਾ ਜਨ੍ਤਾਘਰਾ ਨਿਕ੍ਖਮਤਿ, ਸਚੇ ਜਨ੍ਤਾਘਰਂ ਚਿਕ੍ਖਲ੍ਲਂ ਹੋਤਿ, ਧੋਵਿਤਬ੍ਬਂ. ਮਤ੍ਤਿਕਾਦੋਣਿਕਂ ਧੋਵਿਤ੍ਵਾ ਜਨ੍ਤਾਘਰਪੀਠਂ ਪਟਿਸਾਮੇਤ੍ਵਾ ਅਗ੍ਗਿਂ ਵਿਜ੍ਝਾਪੇਤ੍ਵਾ ਦ੍ਵਾਰਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਜਨ੍ਤਾਘਰਵਤ੍ਤਂ ਯਥਾ ਭਿਕ੍ਖੂਹਿ ਜਨ੍ਤਾਘਰੇ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੧੦. ਵਚ੍ਚਕੁਟਿਵਤ੍ਤਕਥਾ

੩੭੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਬ੍ਰਾਹ੍ਮਣਜਾਤਿਕੋ ਵਚ੍ਚਂ ਕਤ੍ਵਾ ਨ ਇਚ੍ਛਤਿ ਆਚਮੇਤੁਂ – ਕੋ ਇਮਂ ਵਸਲਂ ਦੁਗ੍ਗਨ੍ਧਂ ਆਮਸਿਸ੍ਸਤੀਤਿ [ਆਚਮਿਸ੍ਸਤੀਤਿ (ਕ.)]. ਤਸ੍ਸ ਵਚ੍ਚਮਗ੍ਗੇ ਕਿਮਿ ਸਣ੍ਠਾਤਿ. ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਵਚ੍ਚਂ ਕਤ੍ਵਾ ਨ ਆਚਮੇਸੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਵਚ੍ਚਂ ਕਤ੍ਵਾ ਨ ਆਚਮੇਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਵਚ੍ਚਂ ਕਤ੍ਵਾ ਨ ਆਚਮੇਸੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਵਚ੍ਚਂ ਕਤ੍ਵਾ ਸਤਿ ਉਦਕੇ ਨਾਚਮੇਤਬ੍ਬਂ. ਯੋ ਨਾਚਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਵਚ੍ਚਕੁਟਿਯਾ ਯਥਾਵੁਡ੍ਢਂ ਵਚ੍ਚਂ ਕਰੋਨ੍ਤਿ. ਨਵਕਾ ਭਿਕ੍ਖੂ ਪਠਮਤਰਂ ਆਗਨ੍ਤ੍ਵਾ ਵਚ੍ਚਿਤਾ ਆਗਮੇਨ੍ਤਿ. ਤੇ ਵਚ੍ਚਂ ਸਨ੍ਧਾਰੇਨ੍ਤਾ ਮੁਚ੍ਛਿਤਾ ਪਪਤਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ‘‘ਨ, ਭਿਕ੍ਖਵੇ, ਵਚ੍ਚਕੁਟਿਯਾ ਯਥਾਵੁਡ੍ਢਂ ਵਚ੍ਚੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਗਤਪਟਿਪਾਟਿਯਾ ਵਚ੍ਚਂ ਕਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਸਹਸਾਪਿ ਵਚ੍ਚਕੁਟਿਂ ਪਵਿਸਨ੍ਤਿ, ਉਬ੍ਭਜਿਤ੍ਵਾਪਿ [ਉਬ੍ਭੁਜ੍ਜਿਤ੍ਵਾਪਿ (ਸੀ.), ਉਬ੍ਭੁਜਿਤ੍ਵਾ (ਸ੍ਯਾ.)] ਪਵਿਸਨ੍ਤਿ, ਨਿਤ੍ਥੁਨਨ੍ਤਾਪਿ ਵਚ੍ਚਂ ਕਰੋਨ੍ਤਿ, ਦਨ੍ਤਕਟ੍ਠਂ ਖਾਦਨ੍ਤਾਪਿ ਵਚ੍ਚਂ ਕਰੋਨ੍ਤਿ, ਬਹਿਦ੍ਧਾਪਿ ਵਚ੍ਚਦੋਣਿਕਾਯ ਵਚ੍ਚਂ ਕਰੋਨ੍ਤਿ, ਬਹਿਦ੍ਧਾਪਿ ਪਸ੍ਸਾਵਦੋਣਿਕਾਯ ਪਸ੍ਸਾਵਂ ਕਰੋਨ੍ਤਿ, ਪਸ੍ਸਾਵਦੋਣਿਕਾਯਪਿ ਖੇਲ਼ਂ ਕਰੋਨ੍ਤਿ, ਫਰੁਸੇਨਪਿ ਕਟ੍ਠੇਨ ਅਵਲੇਖਨ੍ਤਿ, ਅਵਲੇਖਨਕਟ੍ਠਮ੍ਪਿ ਵਚ੍ਚਕੂਪਮ੍ਹਿ ਪਾਤੇਨ੍ਤਿ, ਅਤਿਸਹਸਾਪਿ ਨਿਕ੍ਖਮਨ੍ਤਿ, ਉਬ੍ਭਜਿਤ੍ਵਾਪਿ ਨਿਕ੍ਖਮਨ੍ਤਿ, ਚਪੁਚਪੁਕਾਰਕਮ੍ਪਿ ਆਚਮੇਨ੍ਤਿ, ਆਚਮਨਸਰਾਵਕੇਪਿ ਉਦਕਂ ਸੇਸੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਸਹਸਾਪਿ ਵਚ੍ਚਕੁਟਿਂ ਪਵਿਸਿਸ੍ਸਨ੍ਤਿ, ਉਬ੍ਭਜਿਤ੍ਵਾਪਿ ਪਵਿਸਿਸ੍ਸਨ੍ਤਿ, ਨਿਤ੍ਥੁਨਨ੍ਤਾਪਿ ਵਚ੍ਚਂ ਕਰਿਸ੍ਸਨ੍ਤਿ, ਦਨ੍ਤਕਟ੍ਠਂ ਖਾਦਨ੍ਤਾਪਿ ਵਚ੍ਚਂ ਕਰਿਸ੍ਸਨ੍ਤਿ, ਬਹਿਦ੍ਧਾਪਿ ਵਚ੍ਚਦੋਣਿਕਾਯ ਵਚ੍ਚਂ ਕਰਿਸ੍ਸਨ੍ਤਿ, ਬਹਿਦ੍ਧਾਪਿ ਪਸ੍ਸਾਵਦੋਣਿਕਾਯ ਪਸ੍ਸਾਵਂ ਕਰਿਸ੍ਸਨ੍ਤਿ, ਪਸ੍ਸਾਵਦੋਣਿਕਾਯਪਿ ਖੇਲ਼ਂ ਕਰਿਸ੍ਸਨ੍ਤਿ, ਫਰੁਸੇਨਪਿ ਕਟ੍ਠੇਨ ਅਵਲੇਖਿਸ੍ਸਨ੍ਤਿ, ਅਵਲੇਖਨਕਟ੍ਠਮ੍ਪਿ ਵਚ੍ਚਕੂਪਮ੍ਹਿ ਪਾਤੇਸ੍ਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਿਸ੍ਸਨ੍ਤਿ, ਉਬ੍ਭਜਿਤ੍ਵਾਪਿ ਨਿਕ੍ਖਮਿਸ੍ਸਨ੍ਤਿ, ਚਪੁਚਪੁਕਾਰਕਮ੍ਪਿ ਆਚਮੇਸ੍ਸਨ੍ਤਿ, ਆਚਮਨਸਰਾਵਕੇਪਿ ਉਦਕਂ ਸੇਸੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੭੪. ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਵਚ੍ਚਕੁਟਿਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਭਿਕ੍ਖੂਹਿ ਵਚ੍ਚਕੁਟਿਯਾ ਸਮ੍ਮਾ ਵਤ੍ਤਿਤਬ੍ਬਂ. ਯੋ ਵਚ੍ਚਕੁਟਿਂ ਗਚ੍ਛਤਿ ਤੇਨ ਬਹਿ ਠਿਤੇਨ [ਬਹਿ ਠਿਤੇਨ (ਸੀ. ਕ.)] ਉਕ੍ਕਾਸਿਤਬ੍ਬਂ. ਅਨ੍ਤੋ ਨਿਸਿਨ੍ਨੇਨਪਿ ਉਕ੍ਕਾਸਿਤਬ੍ਬਂ. ਚੀਵਰਵਂਸੇ ਵਾ ਚੀਵਰਰਜ੍ਜੁਯਾ ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਸਾਧੁਕਂ ਅਤਰਮਾਨੇਨ ਵਚ੍ਚਕੁਟੀ ਪਵਿਸਿਤਬ੍ਬਾ. ਨਾਤਿਸਹਸਾ ਪਵਿਸਿਤਬ੍ਬਾ. ਨ ਉਬ੍ਭਜਿਤ੍ਵਾ ਪਵਿਸਿਤਬ੍ਬਾ. ਵਚ੍ਚਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ. ਨ ਨਿਤ੍ਥੁਨਨ੍ਤੇਨ ਵਚ੍ਚੋ ਕਾਤਬ੍ਬੋ. ਨ ਦਨ੍ਤਕਟ੍ਠਂ ਖਾਦਨ੍ਤੇਨ ਵਚ੍ਚੋ ਕਾਤਬ੍ਬੋ. ਨ ਬਹਿਦ੍ਧਾ ਵਚ੍ਚਦੋਣਿਕਾਯ ਵਚ੍ਚੋ ਕਾਤਬ੍ਬੋ. ਨ ਬਹਿਦ੍ਧਾ ਪਸ੍ਸਾਵਦੋਣਿਕਾਯ ਪਸ੍ਸਾਵੋ ਕਾਤਬ੍ਬੋ. ਨ ਪਸ੍ਸਾਵਦੋਣਿਕਾਯ ਖੇਲ਼ੋ ਕਾਤਬ੍ਬੋ. ਨ ਫਰੁਸੇਨ ਕਟ੍ਠੇਨ ਅਵਲੇਖਿਤਬ੍ਬਂ. ਨ ਅਵਲੇਖਨਕਟ੍ਠਂ ਵਚ੍ਚਕੂਪਮ੍ਹਿ ਪਾਤੇਤਬ੍ਬਂ. ਵਚ੍ਚਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨ ਉਬ੍ਭਜਿਤ੍ਵਾ ਨਿਕ੍ਖਮਿਤਬ੍ਬਂ. ਆਚਮਨਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ. ਨ ਚਪੁਚਪੁਕਾਰਕਂ ਆਚਮੇਤਬ੍ਬਂ. ਨ ਆਚਮਨਸਰਾਵਕੇ ਉਦਕਂ ਸੇਸੇਤਬ੍ਬਂ. ਆਚਮਨਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ.

‘‘ਸਚੇ ਵਚ੍ਚਕੁਟਿ ਉਹਤਾ [ਊਹਤਾ (ਸੀ. ਸ੍ਯਾ.)] ਹੋਤਿ, ਧੋਵਿਤਬ੍ਬਾ. ਸਚੇ ਅਵਲੇਖਨਪਿਧਰੋ ਪੂਰੋ ਹੋਤਿ, ਅਵਲੇਖਨਕਟ੍ਠਂ ਛਡ੍ਡੇਤਬ੍ਬਂ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਰਿਭਣ੍ਡਂ ਉਕ੍ਲਾਪਂ ਹੋਤਿ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ. ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਭਿਕ੍ਖੂਨਂ ਵਚ੍ਚਕੁਟਿਵਤ੍ਤਂ ਯਥਾ ਭਿਕ੍ਖੂਹਿ ਵਚ੍ਚਕੁਟਿਯਾ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੧੧. ਉਪਜ੍ਝਾਯਵਤ੍ਤਕਥਾ

੩੭੫. ਤੇਨ ਖੋ ਪਨ ਸਮਯੇਨ ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾ ਉਪਜ੍ਝਾਯੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੭੬. ‘‘ਤੇਨ ਹਿ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾਨਂ ਉਪਜ੍ਝਾਯੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਸਦ੍ਧਿਵਿਹਾਰਿਕੇਹਿ ਉਪਜ੍ਝਾਯੇਸੁ ਸਮ੍ਮਾ ਵਤ੍ਤਿਤਬ੍ਬਂ. [ਮਹਾਵ. ੬੬] ਸਦ੍ਧਿਵਿਹਾਰਿਕੇਨ, ਭਿਕ੍ਖਵੇ, ਉਪਜ੍ਝਾਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ [ਸਉਦਕੋ (ਕ.)] ਦਾਤਬ੍ਬੋ. ਸਚੇ ਉਪਜ੍ਝਾਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ. ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ, ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਂ. ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਉਪਜ੍ਝਾਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ.

‘‘ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ. ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਉਪਜ੍ਝਾਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ. ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਉਪਜ੍ਝਾਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਉਪਜ੍ਝਾਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਿਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਰਿਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਉਪਜ੍ਝਾਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਸਦ੍ਧਿਵਿਹਾਰਿਕੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਉਪਜ੍ਝਾਯੋ ਮਾਨਤ੍ਤਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਅਬ੍ਭਾਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਉਪਜ੍ਝਾਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਕਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਰਜਨਾ ਪਚਿਤਬ੍ਬਾ ਹੋਤਿ, ਸਦ੍ਧਿਵਿਹਾਰਿਕੇਨ ਪਚਿਤਬ੍ਬਾ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਰਜਿਤਬ੍ਬਂ [ਰਜੇਤਬ੍ਬਂ (ਸ੍ਯਾ.)] ਹੋਤਿ, ਸਦ੍ਧਿਵਿਹਾਰਿਕੇਨ ਰਜਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ [ਰਜੇਨ੍ਤੇਨ (ਸ੍ਯਾ.)] ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

‘‘ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ, ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਕੇਸਾ ਛੇਦੇਤਬ੍ਬਾ [ਛੇਤ੍ਤਬ੍ਬਾ (ਸੀ.), ਛੇਦਿਤਬ੍ਬਾ (ਕ.)], ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ; ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ; ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ [ਵੇਯ੍ਯਾਵਚ੍ਚਂ (ਕ.)] ਕਾਤਬ੍ਬੋ, ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ; ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ; ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ, ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ; ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ; ਨ ਸੁਸਾਨਂ ਗਨ੍ਤਬ੍ਬਂ; ਨ ਦਿਸਾ ਪਕ੍ਕਮਿਤਬ੍ਬਾ. ਸਚੇ ਉਪਜ੍ਝਾਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਸਦ੍ਧਿਵਿਹਾਰਿਕਾਨਂ ਉਪਜ੍ਝਾਯੇਸੁ ਵਤ੍ਤਂ ਯਥਾ ਸਦ੍ਧਿਵਿਹਾਰਿਕੇਹਿ ਉਪਜ੍ਝਾਯੇਸੁ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੧੨. ਸਦ੍ਧਿਵਿਹਾਰਿਕਵਤ੍ਤਕਥਾ

੩੭੭. ਤੇਨ ਖੋ ਪਨ ਸਮਯੇਨ ਉਪਜ੍ਝਾਯਾ ਸਦ੍ਧਿਵਿਹਾਰਿਕੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਉਪਜ੍ਝਾਯਾ ਸਦ੍ਧਿਵਿਹਾਰਿਕੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਉਪਜ੍ਝਾਯਾ ਸਦ੍ਧਿਵਿਹਾਰਿਕੇਸੁ ਨ ਸਮ੍ਮਾ ਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੭੮. ‘‘ਤੇਨ ਹਿ, ਭਿਕ੍ਖਵੇ, ਉਪਜ੍ਝਾਯਾਨਂ ਸਦ੍ਧਿਵਿਹਾਰਿਕੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਉਪਜ੍ਝਾਯੇਹਿ ਸਦ੍ਧਿਵਿਹਾਰਿਕੇਸੁ ਸਮ੍ਮਾ ਵਤ੍ਤਿਤਬ੍ਬਂ. [ਮਹਾਵ. ੬੭] ਉਪਜ੍ਝਾਯੇਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਉਪਜ੍ਝਾਯੇਨ, ਭਿਕ੍ਖਵੇ, ਸਦ੍ਧਿਵਿਹਾਰਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਉਪਜ੍ਝਾਯਸ੍ਸ ਪਤ੍ਤੋ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਦਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਉਪ੍ਪਜ੍ਜਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਪਰਿਕ੍ਖਾਰੋ ਹੋਤਿ, ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ.

‘‘ਸਚੇ ਸਦ੍ਧਿਵਿਹਾਰਿਕੋ ਗਿਲਾਨੋ ਹੋਤਿ, ਕਾਲਸ੍ਸੇਵ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਸਦ੍ਧਿਵਿਹਾਰਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਸਦ੍ਧਿਵਿਹਾਰਿਕੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ.

‘‘ਏਤ੍ਤਾਵਤਾ ਨਿਵਤ੍ਤਿਸ੍ਸਤੀਤਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ. ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਸਦ੍ਧਿਵਿਹਾਰਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਸਦ੍ਧਿਵਿਹਾਰਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਸਦ੍ਧਿਵਿਹਾਰਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਸਦ੍ਧਿਵਿਹਾਰਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਸਦ੍ਧਿਵਿਹਾਰਿਕੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ [ਆਦਾਯ ਸਦ੍ਧਿਵਿਹਾਰਿਕਸ੍ਸ ਪਿਟ੍ਠਿਤੋ ਪਿਟ੍ਠਿਤੋ (ਕ.)] ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ, ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਸਦ੍ਧਿਵਿਹਾਰਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਸਦ੍ਧਿਵਿਹਾਰਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਸਦ੍ਧਿਵਿਹਾਰਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਸਦ੍ਧਿਵਿਹਾਰਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਸਦ੍ਧਿਵਿਹਾਰਿਕੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ…ਪੇ… ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਸਦ੍ਧਿਵਿਹਾਰਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਉਪਜ੍ਝਾਯੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਉਪਜ੍ਝਾਯੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਉਪਜ੍ਝਾਯੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਸਦ੍ਧਿਵਿਹਾਰਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਮਾਨਤ੍ਤਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਸਦ੍ਧਿਵਿਹਾਰਿਕੋ ਅਬ੍ਭਾਨਾਰਹੋ ਹੋਤਿ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਸਦ੍ਧਿਵਿਹਾਰਿਕਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ, ਉਕ੍ਖੇਪਨੀਯਂ ਵਾ, ਉਪਜ੍ਝਾਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕੋ ਸਮ੍ਮਾ ਵਤ੍ਤੇਯ੍ਯ ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ – ਏਵਂ ਧੋਵੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ – ਏਵਂ ਕਰੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ – ਏਵਂ ਪਚੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਉਪਜ੍ਝਾਯੇਨ ਆਚਿਕ੍ਖਿਤਬ੍ਬਂ – ਏਵਂ ਰਜੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਦ੍ਧਿਵਿਹਾਰਿਕਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ. ਸਚੇ ਸਦ੍ਧਿਵਿਹਾਰਿਕੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਉਪਜ੍ਝਾਯਾਨਂ ਸਦ੍ਧਿਵਿਹਾਰਿਕੇਸੁ ਵਤ੍ਤਂ ਯਥਾ ਉਪਜ੍ਝਾਯੇਹਿ ਸਦ੍ਧਿਵਿਹਾਰਿਕੇਸੁ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

ਦੁਤਿਯਭਾਣਵਾਰੋ ਨਿਟ੍ਠਿਤੋ.

੧੩. ਆਚਰਿਯਵਤ੍ਤਕਥਾ

੩੭੯. ਤੇਨ ਖੋ ਪਨ ਸਮਯੇਨ ਅਨ੍ਤੇਵਾਸਿਕਾ ਆਚਰਿਯੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਨ੍ਤੇਵਾਸਿਕਾ ਆਚਰਿਯੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਅਨ੍ਤੇਵਾਸਿਕਾ ਆਚਰਿਯੇਸੁ ਨ ਸਮ੍ਮਾ ਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੮੦. ‘‘ਤੇਨ ਹਿ, ਭਿਕ੍ਖਵੇ, ਅਨ੍ਤੇਵਾਸਿਕਾਨਂ ਆਚਰਿਯੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਅਨ੍ਤੇਵਾਸਿਕੇਹਿ ਆਚਰਿਯੇਸੁ ਸਮ੍ਮਾ ਵਤ੍ਤਿਤਬ੍ਬਂ. [ਮਹਾਵ. ੭੮] ਅਨ੍ਤੇਵਾਸਿਕੇਨ, ਭਿਕ੍ਖਵੇ, ਆਚਰਿਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਆਚਰਿਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਆਚਰਿਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ. ਸਚੇ ਆਚਰਿਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਆਚਰਿਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ. ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ, ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਂ. ਨ ਆਚਰਿਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਆਚਰਿਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਆਚਰਿਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਆਚਰਿਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਆਚਰਿਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਆਚਰਿਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਆਚਰਿਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਆਚਰਿਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਆਚਰਿਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਆਚਰਿਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਆਚਰਿਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ. ਆਚਰਿਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਿਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਆਚਰਿਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭਿਸਿਬਿਬ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ; ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ; ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ; ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਰਿਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਸਚੇ ਆਚਰਿਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਅਨ੍ਤੇਵਾਸਿਕੇਨ ਵੂਪਕਾਸੇਤਬ੍ਬਾ, ਵੂਪਕਾਸਾਪੇਤਬ੍ਬਾ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਅਨ੍ਤੇਵਾਸਿਕੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਅਨ੍ਤੇਵਾਸਿਕੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਆਚਰਿਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ, ਪਰਿਵਾਸਾਰਹੋ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਆਚਰਿਯੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਆਚਰਿਯੋ ਮਾਨਤ੍ਤਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਆਚਰਿਯੋ ਅਬ੍ਭਾਨਾਰਹੋ ਹੋਤਿ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਆਚਰਿਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਆਚਰਿਯਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਅਨ੍ਤੇਵਾਸਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਆਚਰਿਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਕਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਆਚਰਿਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਪਚਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਅਨ੍ਤੇਵਾਸਿਕੇਨ ਰਜਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਆਚਰਿਯਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

‘‘ਨ ਆਚਰਿਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ, ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਕੇਸਾ ਛੇਦਿਤਬ੍ਬਾ, ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ; ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ; ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ ਕਾਤਬ੍ਬੋ, ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ; ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ; ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ, ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ; ਨ ਆਚਰਿਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ; ਨ ਸੁਸਾਨਂ ਗਨ੍ਤਬ੍ਬਂ; ਨ ਦਿਸਾ ਪਕ੍ਕਮਿਤਬ੍ਬਾ. ਸਚੇ ਆਚਰਿਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਅਨ੍ਤੇਵਾਸਿਕਾਨਂ ਆਚਰਿਯੇਸੁ ਵਤ੍ਤਂ ਯਥਾ ਅਨ੍ਤੇਵਾਸਿਕੇਹਿ ਆਚਰਿਯੇਸੁ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

੧੪. ਅਨ੍ਤੇਵਾਸਿਕਵਤ੍ਤਕਥਾ

੩੮੧. ਤੇਨ ਖੋ ਪਨ ਸਮਯੇਨ ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੮੨. ‘‘ਤੇਨ ਹਿ, ਭਿਕ੍ਖਵੇ, ਆਚਰਿਯਾਨਂ ਅਨ੍ਤੇਵਾਸਿਕੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਸਮ੍ਮਾ ਵਤ੍ਤਿਤਬ੍ਬਂ. [ਮਹਾਵ. ੭੯] ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਆਚਰਿਯਸ੍ਸ ਪਤ੍ਤੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਤ੍ਤੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਹੋਤਿ, ਅਨ੍ਤੇਵਾਸਿਕਸ੍ਸ ਚੀਵਰਂ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਚੀਵਰਂ ਦਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਪਰਿਕ੍ਖਾਰੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ.

‘‘ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਕਾਲਸ੍ਸੇਵ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਅਨ੍ਤੇਵਾਸਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ…ਪੇ… ਚੀਵਰਂ ਨਿਕ੍ਖਿਪਨ੍ਤੇਨ…ਪੇ… ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਉਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ [ਆਦਾਯ ਅਨ੍ਤੇਵਾਸਿਕਸ੍ਸ ਪਿਟ੍ਠਿਤੋ ਪਿਟ੍ਠਿਤੋ (ਕ.)] ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਅਨ੍ਤੇਵਾਸਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ…ਪੇ… ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਆਚਰਿਯੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ, ਪਰਿਵਾਸਾਰਹੋ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮਾਨਤ੍ਤਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਅਬ੍ਭਾਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ, ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਧੋਵੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਕਰੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਪਚੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਰਜੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਆਚਰਿਯਾਨਂ ਅਨ੍ਤੇਵਾਸਿਕੇਸੁ ਵਤ੍ਤਂ ਯਥਾ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

ਵਤ੍ਤਕ੍ਖਨ੍ਧਕੋ ਅਟ੍ਠਮੋ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਏਕੂਨਵੀਸਤਿ, ਵਤ੍ਤਾ ਚੁਦ੍ਦਸ.

ਤਸ੍ਸੁਦ੍ਦਾਨਂ –

ਸਉਪਾਹਨਾ ਛਤ੍ਤਾ ਚ, ਓਗੁਣ੍ਠਿ ਸੀਸਂ ਪਾਨੀਯਂ;

ਨਾਭਿਵਾਦੇ ਨ ਪੁਚ੍ਛਨ੍ਤਿ, ਅਹਿ ਉਜ੍ਝਨ੍ਤਿ ਪੇਸਲਾ.

ਓਮੁਞ੍ਚਿ ਛਤ੍ਤਂ ਖਨ੍ਧੇ ਚ, ਅਤਰਞ੍ਚ ਪਟਿਕ੍ਕਮਂ;

ਪਤ੍ਤਚੀਵਰਂ ਨਿਕ੍ਖਿਪਾ, ਪਤਿਰੂਪਞ੍ਚ ਪੁਚ੍ਛਿਤਾ.

ਆਸਿਞ੍ਚੇਯ੍ਯ ਧੋਵਿਤੇਨ, ਸੁਕ੍ਖੇਨਲ੍ਲੇਨੁਪਾਹਨਾ;

ਵੁਡ੍ਢੋ ਨਵਕੋ ਪੁਚ੍ਛੇਯ੍ਯ, ਅਜ੍ਝਾਵੁਟ੍ਠਞ੍ਚ ਗੋਚਰਾ.

ਸੇਕ੍ਖਾ ਵਚ੍ਚਾ ਪਾਨੀ ਪਰਿ, ਕਤ੍ਤਰਂ ਕਤਿਕਂ ਤਤੋ;

ਕਾਲਂ ਮੁਹੁਤ੍ਤਂ ਉਕ੍ਲਾਪੋ, ਭੂਮਤ੍ਥਰਣਂ ਨੀਹਰੇ.

ਪਟਿਪਾਦੋ ਭਿਸਿਬਿਬ੍ਬੋ, ਮਞ੍ਚਪੀਠਞ੍ਚ ਮਲ੍ਲਕਂ;

ਅਪਸ੍ਸੇਨੁਲ੍ਲੋਕਕਣ੍ਣਾ, ਗੇਰੁਕਾ ਕਾਲ਼ ਅਕਤਾ.

ਸਙ੍ਕਾਰਞ੍ਚ ਭੂਮਤ੍ਥਰਣਂ, ਪਟਿਪਾਦਕਂ ਮਞ੍ਚਪੀਠਂ;

ਭਿਸਿ ਨਿਸੀਦਨਮ੍ਪਿ, ਮਲ੍ਲਕਂ ਅਪਸ੍ਸੇਨ ਚ.

ਪਤ੍ਤਚੀਵਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ;

ਪੁਰਤ੍ਥਿਮਾ ਪਚ੍ਛਿਮਾ ਚ, ਉਤ੍ਤਰਾ ਅਥ ਦਕ੍ਖਿਣਾ.

ਸੀਤੁਣ੍ਹੇ ਚ ਦਿਵਾਰਤ੍ਤਿਂ, ਪਰਿਵੇਣਞ੍ਚ ਕੋਟ੍ਠਕੋ;

ਉਪਟ੍ਠਾਨਗ੍ਗਿ ਸਾਲਾ ਚ, ਵਤ੍ਤਂ ਵਚ੍ਚਕੁਟੀਸੁ ਚ.

ਪਾਨੀ ਪਰਿਭੋਜਨਿਯਾ, ਕੁਮ੍ਭਿ ਆਚਮਨੇਸੁ ਚ;

ਅਨੋਪਮੇਨ ਪਞ੍ਞਤ੍ਤਂ, ਵਤ੍ਤਂ ਆਗਨ੍ਤੁਕੇਹਿਮੇ [ਵੇ (ਕ. ਏਵਮੁਪਰਿਪਿ)].

ਨੇਵਾਸਨਂ ਨ ਉਦਕਂ, ਨ ਪਚ੍ਚੁ ਨ ਚ ਪਾਨਿਯਂ;

ਨਾਭਿਵਾਦੇ ਨਪਞ੍ਞਪੇ, ਉਜ੍ਝਾਯਨ੍ਤਿ ਚ ਪੇਸਲਾ.

ਵੁਡ੍ਢਾਸਨਞ੍ਚ ਉਦਕਂ, ਪਚ੍ਚੁਗ੍ਗਨ੍ਤ੍ਵਾ ਚ ਪਾਨਿਯਂ;

ਉਪਾਹਨੇ ਏਕਮਨ੍ਤਂ, ਅਭਿਵਾਦੇ ਚ ਪਞ੍ਞਪੇ.