੬. ਪਿਣ੍ਡਚਾਰਿਕਵਤ੍ਤਕਥਾ

੩੬੫. ਤੇਨ ਖੋ ਪਨ ਸਮਯੇਨ ਪਿਣ੍ਡਚਾਰਿਕਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਵੇਸਨਂ ਪਵਿਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਕ੍ਖਮਨ੍ਤਿ, ਅਤਿਸਹਸਾਪਿ ਪਵਿਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਨ੍ਤਿ, ਅਤਿਦੂਰੇਪਿ ਤਿਟ੍ਠਨ੍ਤਿ, ਅਚ੍ਚਾਸਨ੍ਨੇਪਿ ਤਿਟ੍ਠਨ੍ਤਿ, ਅਤਿਚਿਰਮ੍ਪਿ ਤਿਟ੍ਠਨ੍ਤਿ, ਅਤਿਲਹੁਮ੍ਪਿ ਨਿਵਤ੍ਤਨ੍ਤਿ. ਅਞ੍ਞਤਰੋਪਿ ਪਿਣ੍ਡਚਾਰਿਕੋ ਭਿਕ੍ਖੁ ਅਸਲ੍ਲਕ੍ਖੇਤ੍ਵਾ ਨਿਵੇਸਨਂ ਪਾਵਿਸਿ. ਸੋ ਚ ਦ੍ਵਾਰਂ ਮਞ੍ਞਮਾਨੋ ਅਞ੍ਞਤਰਂ ਓਵਰਕਂ ਪਾਵਿਸਿ. ਤਸ੍ਮਿਮ੍ਪਿ ਓਵਰਕੇ ਇਤ੍ਥੀ ਨਗ੍ਗਾ ਉਤ੍ਤਾਨਾ ਨਿਪਨ੍ਨਾ ਹੋਤਿ. ਅਦ੍ਦਸਾ ਖੋ ਸੋ ਭਿਕ੍ਖੁ ਤਂ ਇਤ੍ਥਿਂ ਨਗ੍ਗਂ ਉਤ੍ਤਾਨਂ ਨਿਪਨ੍ਨਂ. ਦਿਸ੍ਵਾਨ – ‘‘ਨਯਿਦਂ ਦ੍ਵਾਰਂ, ਓਵਰਕਂ ਇਦ’’ਨ੍ਤਿ ਤਮ੍ਹਾ ਓਵਰਕਾ ਨਿਕ੍ਖਮਿ. ਅਦ੍ਦਸਾ ਖੋ ਤਸ੍ਸਾ ਇਤ੍ਥਿਯਾ ਸਾਮਿਕੋ ਤਂ ਇਤ੍ਥਿਂ ਨਗ੍ਗਂ ਉਤ੍ਤਾਨਂ ਨਿਪਨ੍ਨਂ. ਦਿਸ੍ਵਾਨ – ‘‘ਇਮਿਨਾ ਮੇ ਭਿਕ੍ਖੁਨਾ ਪਜਾਪਤੀ ਦੂਸਿਤਾ’’ਤਿ ਤਂ ਭਿਕ੍ਖੁਂ ਗਹੇਤ੍ਵਾ ਆਕੋਟੇਸਿ. ਅਥ ਖੋ ਸਾ ਇਤ੍ਥੀ ਤੇਨ ਸਦ੍ਦੇਨ ਪਟਿਬੁਜ੍ਝਿਤ੍ਵਾ ਤਂ ਪੁਰਿਸਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਅਯ੍ਯ, ਇਮਂ ਭਿਕ੍ਖੁਂ ਆਕੋਟੇਸੀ’’ਤਿ? ‘‘ਇਮਿਨਾਸਿ ਤ੍ਵਂ ਭਿਕ੍ਖੁਨਾ ਦੂਸਿਤਾ’’ਤਿ? ‘‘ਨਾਹਂ, ਅਯ੍ਯ, ਇਮਿਨਾ ਭਿਕ੍ਖੁਨਾ ਦੂਸਿਤਾ; ਅਕਾਰਕੋ ਸੋ ਭਿਕ੍ਖੂ’’ਤਿ ਤਂ ਭਿਕ੍ਖੁਂ ਮੁਞ੍ਚਾਪੇਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਪਿਣ੍ਡਚਾਰਿਕਾ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਵੇਸਨਂ ਪਵਿਸਿਸ੍ਸਨ੍ਤਿ, ਅਸਲ੍ਲਕ੍ਖੇਤ੍ਵਾਪਿ ਨਿਕ੍ਖਮਿਸ੍ਸਨ੍ਤਿ, ਅਤਿਸਹਸਾਪਿ ਪਵਿਸਿਸ੍ਸਨ੍ਤਿ, ਅਤਿਸਹਸਾਪਿ ਨਿਕ੍ਖਮਿਸ੍ਸਨ੍ਤਿ, ਅਤਿਦੂਰੇਪਿ ਤਿਟ੍ਠਿਸ੍ਸਨ੍ਤਿ, ਅਚ੍ਚਾਸਨ੍ਨੇਪਿ ਤਿਟ੍ਠਿਸ੍ਸਨ੍ਤਿ, ਅਤਿਚਿਰਮ੍ਪਿ ਤਿਟ੍ਠਿਸ੍ਸਨ੍ਤਿ, ਅਤਿਲਹੁਮ੍ਪਿ ਨਿਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੬. ‘‘ਤੇਨ ਹਿ, ਭਿਕ੍ਖਵੇ, ਪਿਣ੍ਡਚਾਰਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਾਪੇਸ੍ਸਾਮਿ ਯਥਾ ਪਿਣ੍ਡਚਾਰਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਪਿਣ੍ਡਚਾਰਿਕੇਨ, ਭਿਕ੍ਖਵੇ, ਭਿਕ੍ਖੁਨਾ – ‘ਇਦਾਨਿ ਗਾਮਂ ਪਵਿਸਿਸ੍ਸਾਮੀ’ਤਿ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ.

‘‘ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’ਤਿ. ਨਾਤਿਸਹਸਾ ਪਵਿਸਿਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨਾਤਿਦੂਰੇ ਠਾਤਬ੍ਬਂ. ਨਾਚ੍ਚਾਸਨ੍ਨੇ ਠਾਤਬ੍ਬਂ. ਨਾਤਿਚਿਰਂ ਠਾਤਬ੍ਬਂ. ਨਾਤਿਲਹੁਂ ਨਿਵਤ੍ਤਿਤਬ੍ਬਂ. ਠਿਤਕੇਨ ਸਲ੍ਲਕ੍ਖੇਤਬ੍ਬਂ – ‘ਭਿਕ੍ਖਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਮ੍ਮਂ ਵਾ ਨਿਕ੍ਖਿਪਤਿ, ਆਸਨਾ ਵਾ ਵੁਟ੍ਠਾਤਿ, ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ [ਠਾਪੇਤਿ (ਕ.)] ਵਾ – ਦਾਤੁਕਾਮਸ੍ਸਾਤਿ [ਦਾਤੁਕਾਮਿਯਾਤਿ (ਸ੍ਯਾ.), ਦਾਤੁਕਾਮਾ ਵਿਯਾਤਿ (ਸੀ.)] ਠਾਤਬ੍ਬਂ. ਭਿਕ੍ਖਾਯ ਦਿਯ੍ਯਮਾਨਾਯ ਵਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍ਵਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ. ਨ ਚ ਭਿਕ੍ਖਾਦਾਯਿਕਾਯ ਮੁਖਂ ਉਲ੍ਲੋਕੇਤਬ੍ਬਂ [ਓਲੋਕੇਤਬ੍ਬਂ (ਸ੍ਯਾ.)]. ਸਲ੍ਲਕ੍ਖੇਤਬ੍ਬਂ – ‘ਸੂਪਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍ਵਾ ਸਾਧੁਕਂ ਅਤਰਮਾਨੇਨ ਨਿਵਤ੍ਤਿਤਬ੍ਬਂ.

‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਸੁਸਂਵੁਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਓਕ੍ਖਿਤ੍ਤਚਕ੍ਖੁਨਾ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਖਿਤ੍ਤਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਅਪ੍ਪਸਦ੍ਦੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਕਾਯਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਬਾਹੁਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਤੇਨ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਉਪਟ੍ਠਾਪੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ, ਭੁਞ੍ਜਿਤਬ੍ਬਂ. ਨੋ ਚੇ ਆਕਙ੍ਖਤਿ, ਅਪ੍ਪਹਰਿਤੇ ਵਾ ਛਡ੍ਡੇਤਬ੍ਬਂ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਬ੍ਬਂ. ਤੇਨ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਪਟਿਸਾਮੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਬ੍ਬਂ, ਭਤ੍ਤਗ੍ਗਂ ਸਮ੍ਮਜ੍ਜਿਤਬ੍ਬਂ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਤੇਨ ਉਪਟ੍ਠਾਪੇਤਬ੍ਬਂ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਤਬ੍ਬਂ, ਨ ਚ ਤਪ੍ਪਚ੍ਚਯਾ ਵਾਚਾ ਭਿਨ੍ਦਿਤਬ੍ਬਾ. ਇਦਂ ਖੋ, ਭਿਕ੍ਖਵੇ, ਪਿਣ੍ਡਚਾਰਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਪਿਣ੍ਡਚਾਰਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.