੭. ਆਰਞ੍ਞਿਕਵਤ੍ਤਕਥਾ

੩੬੭. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਰਞ੍ਞੇ ਵਿਹਰਨ੍ਤਿ. ਤੇ ਨੇਵ ਪਾਨੀਯਂ ਉਪਟ੍ਠਾਪੇਨ੍ਤਿ, ਨ ਪਰਿਭੋਜਨੀਯਂ ਉਪਟ੍ਠਾਪੇਨ੍ਤਿ, ਨ ਅਗ੍ਗਿਂ ਉਪਟ੍ਠਾਪੇਨ੍ਤਿ, ਨ ਅਰਣਿਸਹਿਤਂ ਉਪਟ੍ਠਾਪੇਨ੍ਤਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ. ਚੋਰਾ ਤਤ੍ਥ ਗਨ੍ਤ੍ਵਾ ਤੇ ਭਿਕ੍ਖੂ ਏਤਦਵੋਚੁਂ – ‘‘ਅਤ੍ਥਿ, ਭਨ੍ਤੇ, ਪਾਨੀਯ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਪਰਿਭੋਜਨੀਯ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਅਗ੍ਗੀ’’ਤਿ? ‘‘ਨਤ੍ਥਾਵੁਸੋ’’ਤਿ. ‘‘ਅਤ੍ਥਿ, ਭਨ੍ਤੇ, ਅਰਣਿਸਹਿਤ’’ਨ੍ਤਿ? ‘‘ਨਤ੍ਥਾਵੁਸੋ’’ਤਿ. ( ) [(ਅਤ੍ਥਿ ਭਨ੍ਤੇ ਨਕ੍ਖਤ੍ਤਪਦਾਨੀਤਿ, ਨ ਜਾਨਾਮ ਆਵੁਸੋਤਿ, ਅਤ੍ਥਿ ਭਨ੍ਤੇ ਦਿਸਾਭਾਗਨ੍ਤਿ, ਨ ਜਾਨਾਮ ਆਵੁਸੋਤਿ.) ਸੀ. ਵਿਮਤਿਟੀਕਾਯ ਪਨ ਸਮੇਤਿ] ‘‘ਕੇਨਜ੍ਜ, ਭਨ੍ਤੇ, ਯੁਤ੍ਤ’’ਨ੍ਤਿ? ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ‘‘ਕਤਮਾਯਂ, ਭਨ੍ਤੇ, ਦਿਸਾ’’ਤਿ? ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਅਥ ਖੋ ਤੇ ਚੋਰਾ – ‘ਨੇਵਿਮੇਸਂ ਪਾਨੀਯਂ ਅਤ੍ਥਿ, ਨ ਪਰਿਭੋਜਨੀਯਂ ਅਤ੍ਥਿ, ਨ ਅਗ੍ਗਿ ਅਤ੍ਥਿ, ਨ ਅਰਣਿਸਹਿਤਂ ਅਤ੍ਥਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ; ਚੋਰਾ ਇਮੇ, ਨਯਿਮੇ ਭਿਕ੍ਖੂ’ਤਿ – ਆਕੋਟੇਤ੍ਵਾ ਪਕ੍ਕਮਿਂਸੁ. ਅਥ ਖੋ ਤੇ ਭਿਕ੍ਖੂ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੮. ‘‘ਤੇਨ ਹਿ, ਭਿਕ੍ਖਵੇ, ਆਰਞ੍ਞਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਆਰਞ੍ਞਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਕਾਲਸ੍ਸੇਵ ਉਟ੍ਠਾਯ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਚੀਵਰਂ ਖਨ੍ਧੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਸੇਨਾਸਨਾ ਓਤਰਿਤਬ੍ਬਂ – ਇਦਾਨਿ ਗਾਮਂ ਪਵਿਸਿਸ੍ਸਾਮੀਤਿ. ਉਪਾਹਨਾ ਓਮੁਞ੍ਚਿਤ੍ਵਾ ਨੀਚਂ ਕਤ੍ਵਾ ਪਪ੍ਫੋਟੇਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ. ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ… ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ. ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ.

‘‘ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’ਤਿ. ਨਾਤਿਸਹਸਾ ਪਵਿਸਿਤਬ੍ਬਂ. ਨਾਤਿਸਹਸਾ ਨਿਕ੍ਖਮਿਤਬ੍ਬਂ. ਨਾਤਿਦੂਰੇ ਠਾਤਬ੍ਬਂ. ਨਾਚ੍ਚਾਸਨ੍ਨੇ ਠਾਤਬ੍ਬਂ. ਨਾਤਿਚਿਰਂ ਠਾਤਬ੍ਬਂ. ਨਾਤਿਲਹੁਂ ਨਿਵਤ੍ਤਿਤਬ੍ਬਂ. ਠਿਤਕੇਨ ਸਲ੍ਲਕ੍ਖੇਤਬ੍ਬਂ – ‘ਭਿਕ੍ਖਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਮ੍ਮਂ ਵਾ ਨਿਕ੍ਖਿਪਤਿ, ਆਸਨਾ ਵਾ ਵੁਟ੍ਠਾਤਿ, ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਯ੍ਯਮਾਨਾਯ ਵਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍ਵਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ. ਨ ਚ ਭਿਕ੍ਖਾਦਾਯਿਕਾਯ ਮੁਖਂ ਉਲ੍ਲੋਕੇਤਬ੍ਬਂ. ਸਲ੍ਲਕ੍ਖੇਤਬ੍ਬਂ – ‘ਸੂਪਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’ਤਿ. ਸਚੇ ਕਟਚ੍ਛੁ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ. ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍ਵਾ ਸਾਧੁਕਂ ਅਤਰਮਾਨੇਨ ਨਿਵਤ੍ਤਿਤਬ੍ਬਂ.

‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ… ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ. ਗਾਮਤੋ ਨਿਕ੍ਖਮਿਤ੍ਵਾ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਆਲਗ੍ਗੇਤ੍ਵਾ ਚੀਵਰਂ ਸਙ੍ਘਰਿਤ੍ਵਾ ਸੀਸੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਗਨ੍ਤਬ੍ਬਂ.

‘‘ਆਰਞ੍ਞਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਾਨੀਯਂ ਉਪਟ੍ਠਾਪੇਤਬ੍ਬਂ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ, ਅਗ੍ਗਿ ਉਪਟ੍ਠਾਪੇਤਬ੍ਬੋ, ਅਰਣਿਸਹਿਤਂ ਉਪਟ੍ਠਾਪੇਤਬ੍ਬਂ, ਕਤ੍ਤਰਦਣ੍ਡੋ ਉਪਟ੍ਠਾਪੇਤਬ੍ਬੋ, ਨਕ੍ਖਤ੍ਤਪਦਾਨਿ ਉਗ੍ਗਹੇਤਬ੍ਬਾਨਿ – ਸਕਲਾਨਿ ਵਾ ਏਕਦੇਸਾਨਿ ਵਾ, ਦਿਸਾਕੁਸਲੇਨ ਭਵਿਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਆਰਞ੍ਞਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.