੧੪. ਅਨ੍ਤੇਵਾਸਿਕਵਤ੍ਤਕਥਾ

੩੮੧. ਤੇਨ ਖੋ ਪਨ ਸਮਯੇਨ ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਆਚਰਿਯਾ ਅਨ੍ਤੇਵਾਸਿਕੇਸੁ ਨ ਸਮ੍ਮਾ ਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੮੨. ‘‘ਤੇਨ ਹਿ, ਭਿਕ੍ਖਵੇ, ਆਚਰਿਯਾਨਂ ਅਨ੍ਤੇਵਾਸਿਕੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਸਮ੍ਮਾ ਵਤ੍ਤਿਤਬ੍ਬਂ. [ਮਹਾਵ. ੭੯] ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਆਚਰਿਯੇਨ, ਭਿਕ੍ਖਵੇ, ਅਨ੍ਤੇਵਾਸਿਕੋ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਆਚਰਿਯਸ੍ਸ ਪਤ੍ਤੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਤ੍ਤੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਤ੍ਤੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਤ੍ਤੋ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਚੀਵਰਂ ਹੋਤਿ, ਅਨ੍ਤੇਵਾਸਿਕਸ੍ਸ ਚੀਵਰਂ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਚੀਵਰਂ ਦਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਉਪ੍ਪਜ੍ਜਿਯੇਥਾਤਿ. ਸਚੇ ਆਚਰਿਯਸ੍ਸ ਪਰਿਕ੍ਖਾਰੋ ਹੋਤਿ, ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਨ ਹੋਤਿ, ਆਚਰਿਯੇਨ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਪਰਿਕ੍ਖਾਰੋ ਉਪ੍ਪਜ੍ਜਿਯੇਥਾਤਿ.

‘‘ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਕਾਲਸ੍ਸੇਵ ਉਟ੍ਠਾਯ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ ਦਾਤਬ੍ਬੋ.

‘‘ਏਤ੍ਤਾਵਤਾ ਨਿਵਤ੍ਤਿਸ੍ਸਤੀਤਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ. ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਅਨ੍ਤੇਵਾਸਿਕੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ…ਪੇ… ਚੀਵਰਂ ਨਿਕ੍ਖਿਪਨ੍ਤੇਨ…ਪੇ… ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਅਨ੍ਤੇਵਾਸਿਕਮ੍ਹਿ ਉਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਅਨ੍ਤੇਵਾਸਿਕੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ [ਆਦਾਯ ਅਨ੍ਤੇਵਾਸਿਕਸ੍ਸ ਪਿਟ੍ਠਿਤੋ ਪਿਟ੍ਠਿਤੋ (ਕ.)] ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਅਨ੍ਤੇਵਾਸਿਕਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਅਨ੍ਤੇਵਾਸਿਕਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਨ੍ਤੇਵਾਸਿਕੋ ਪਾਨੀਯੇਨ ਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ…ਪੇ… ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਅਨ੍ਤੇਵਾਸਿਕਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਆਚਰਿਯੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਆਚਰਿਯੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਅਨ੍ਤੇਵਾਸਿਕੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ, ਪਰਿਵਾਸਾਰਹੋ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਮਾਨਤ੍ਤਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਅਨ੍ਤੇਵਾਸਿਕੋ ਅਬ੍ਭਾਨਾਰਹੋ ਹੋਤਿ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਅਨ੍ਤੇਵਾਸਿਕਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ, ਸਙ੍ਘੇਨ ਕਮ੍ਮਂ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਆਚਰਿਯੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਧੋਵੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਕਰੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਪਚੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਤਬ੍ਬਂ ਹੋਤਿ, ਆਚਰਿਯੇਨ ਆਚਿਕ੍ਖਿਤਬ੍ਬਂ – ਏਵਂ ਰਜੇਯ੍ਯਾਸੀਤਿ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਅਨ੍ਤੇਵਾਸਿਕਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਇਦਂ ਖੋ, ਭਿਕ੍ਖਵੇ, ਆਚਰਿਯਾਨਂ ਅਨ੍ਤੇਵਾਸਿਕੇਸੁ ਵਤ੍ਤਂ ਯਥਾ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.

ਵਤ੍ਤਕ੍ਖਨ੍ਧਕੋ ਅਟ੍ਠਮੋ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਏਕੂਨਵੀਸਤਿ, ਵਤ੍ਤਾ ਚੁਦ੍ਦਸ.

ਤਸ੍ਸੁਦ੍ਦਾਨਂ –

ਸਉਪਾਹਨਾ ਛਤ੍ਤਾ ਚ, ਓਗੁਣ੍ਠਿ ਸੀਸਂ ਪਾਨੀਯਂ;

ਨਾਭਿਵਾਦੇ ਨ ਪੁਚ੍ਛਨ੍ਤਿ, ਅਹਿ ਉਜ੍ਝਨ੍ਤਿ ਪੇਸਲਾ.

ਓਮੁਞ੍ਚਿ ਛਤ੍ਤਂ ਖਨ੍ਧੇ ਚ, ਅਤਰਞ੍ਚ ਪਟਿਕ੍ਕਮਂ;

ਪਤ੍ਤਚੀਵਰਂ ਨਿਕ੍ਖਿਪਾ, ਪਤਿਰੂਪਞ੍ਚ ਪੁਚ੍ਛਿਤਾ.

ਆਸਿਞ੍ਚੇਯ੍ਯ ਧੋਵਿਤੇਨ, ਸੁਕ੍ਖੇਨਲ੍ਲੇਨੁਪਾਹਨਾ;

ਵੁਡ੍ਢੋ ਨਵਕੋ ਪੁਚ੍ਛੇਯ੍ਯ, ਅਜ੍ਝਾਵੁਟ੍ਠਞ੍ਚ ਗੋਚਰਾ.

ਸੇਕ੍ਖਾ ਵਚ੍ਚਾ ਪਾਨੀ ਪਰਿ, ਕਤ੍ਤਰਂ ਕਤਿਕਂ ਤਤੋ;

ਕਾਲਂ ਮੁਹੁਤ੍ਤਂ ਉਕ੍ਲਾਪੋ, ਭੂਮਤ੍ਥਰਣਂ ਨੀਹਰੇ.

ਪਟਿਪਾਦੋ ਭਿਸਿਬਿਬ੍ਬੋ, ਮਞ੍ਚਪੀਠਞ੍ਚ ਮਲ੍ਲਕਂ;

ਅਪਸ੍ਸੇਨੁਲ੍ਲੋਕਕਣ੍ਣਾ, ਗੇਰੁਕਾ ਕਾਲ਼ ਅਕਤਾ.

ਸਙ੍ਕਾਰਞ੍ਚ ਭੂਮਤ੍ਥਰਣਂ, ਪਟਿਪਾਦਕਂ ਮਞ੍ਚਪੀਠਂ;

ਭਿਸਿ ਨਿਸੀਦਨਮ੍ਪਿ, ਮਲ੍ਲਕਂ ਅਪਸ੍ਸੇਨ ਚ.

ਪਤ੍ਤਚੀਵਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ;

ਪੁਰਤ੍ਥਿਮਾ ਪਚ੍ਛਿਮਾ ਚ, ਉਤ੍ਤਰਾ ਅਥ ਦਕ੍ਖਿਣਾ.

ਸੀਤੁਣ੍ਹੇ ਚ ਦਿਵਾਰਤ੍ਤਿਂ, ਪਰਿਵੇਣਞ੍ਚ ਕੋਟ੍ਠਕੋ;

ਉਪਟ੍ਠਾਨਗ੍ਗਿ ਸਾਲਾ ਚ, ਵਤ੍ਤਂ ਵਚ੍ਚਕੁਟੀਸੁ ਚ.

ਪਾਨੀ ਪਰਿਭੋਜਨਿਯਾ, ਕੁਮ੍ਭਿ ਆਚਮਨੇਸੁ ਚ;

ਅਨੋਪਮੇਨ ਪਞ੍ਞਤ੍ਤਂ, ਵਤ੍ਤਂ ਆਗਨ੍ਤੁਕੇਹਿਮੇ [ਵੇ (ਕ. ਏਵਮੁਪਰਿਪਿ)].

ਨੇਵਾਸਨਂ ਨ ਉਦਕਂ, ਨ ਪਚ੍ਚੁ ਨ ਚ ਪਾਨਿਯਂ;

ਨਾਭਿਵਾਦੇ ਨਪਞ੍ਞਪੇ, ਉਜ੍ਝਾਯਨ੍ਤਿ ਚ ਪੇਸਲਾ.

ਵੁਡ੍ਢਾਸਨਞ੍ਚ ਉਦਕਂ, ਪਚ੍ਚੁਗ੍ਗਨ੍ਤ੍ਵਾ ਚ ਪਾਨਿਯਂ;

ਉਪਾਹਨੇ ਏਕਮਨ੍ਤਂ, ਅਭਿਵਾਦੇ ਚ ਪਞ੍ਞਪੇ.

ਵੁਤ੍ਥਂ ਗੋਚਰਸੇਕ੍ਖੋ ਚ, ਠਾਨਂ ਪਾਨਿਯਭੋਜਨਂ;

ਕਤ੍ਤਰਂ ਕਤਿਕਂ ਕਾਲਂ, ਨਵਕਸ੍ਸ ਨਿਸਿਨ੍ਨਕੇ.

ਅਭਿਵਾਦਯੇ ਆਚਿਕ੍ਖੇ, ਯਥਾ ਹੇਟ੍ਠਾ ਤਥਾ ਨਯੇ;

ਨਿਦ੍ਦਿਟ੍ਠਂ ਸਤ੍ਥਵਾਹੇਨ ਵਤ੍ਤਂ ਆਵਾਸਿਕੇਹਿਮੇ.

ਗਮਿਕਾ ਦਾਰੁਮਤ੍ਤਿ ਚ, ਵਿਵਰਿਤ੍ਵਾ ਨ ਪੁਚ੍ਛਿਯ;

ਨਸ੍ਸਨ੍ਤਿ ਚ ਅਗੁਤ੍ਤਞ੍ਚ, ਉਜ੍ਝਾਯਨ੍ਤਿ ਚ ਪੇਸਲਾ.

ਪਟਿਸਾਮੇਤ੍ਵਾ ਥਕੇਤ੍ਵਾ, ਆਪੁਚ੍ਛਿਤ੍ਵਾਵ ਪਕ੍ਕਮੇ;

ਭਿਕ੍ਖੁ ਵਾ ਸਾਮਣੇਰੋ ਵਾ, ਆਰਾਮਿਕੋ ਉਪਾਸਕੋ.

ਪਾਸਾਣਕੇਸੁ ਚ ਪੁਞ੍ਜਂ, ਪਟਿਸਾਮੇ ਥਕੇਯ੍ਯ ਚ;

ਸਚੇ ਉਸ੍ਸਹਤਿ ਉਸ੍ਸੁਕ੍ਕਂ, ਅਨੋਵਸ੍ਸੇ ਤਥੇਵ ਚ.

ਸਬ੍ਬੋ ਓਵਸ੍ਸਤਿ ਗਾਮਂ, ਅਜ੍ਝੋਕਾਸੇ ਤਥੇਵ ਚ;

ਅਪ੍ਪੇਵਙ੍ਗਾਨਿ ਸੇਸੇਯ੍ਯੁਂ, ਵਤ੍ਤਂ ਗਮਿਕਭਿਕ੍ਖੁਨਾ.

ਨਾਨੁਮੋਦਨ੍ਤਿ ਥੇਰੇਨ, ਓਹਾਯ ਚਤੁਪਞ੍ਚਹਿ;

ਵਚ੍ਚਿਤੋ ਮੁਚ੍ਛਿਤੋ ਆਸਿ, ਵਤ੍ਤਾਨੁਮੋਦਨੇਸੁਮੇ.

ਛਬ੍ਬਗ੍ਗਿਯਾ ਦੁਨ੍ਨਿਵਤ੍ਥਾ, ਅਥੋਪਿ ਚ ਦੁਪ੍ਪਾਰੁਤਾ;

ਅਨਾਕਪ੍ਪਾ ਚ ਵੋਕ੍ਕਮ੍ਮ, ਥੇਰੇ ਅਨੁਪਖਜ੍ਜਨੇ.

ਨਵੇ ਭਿਕ੍ਖੂ ਚ ਸਙ੍ਘਾਟਿ, ਉਜ੍ਝਾਯਨ੍ਤਿ ਚ ਪੇਸਲਾ;

ਤਿਮਣ੍ਡਲਂ ਨਿਵਾਸੇਤ੍ਵਾ, ਕਾਯਸਗੁਣਗਣ੍ਠਿਕਾ.

ਨ ਵੋਕ੍ਕਮ੍ਮ ਪਟਿਚ੍ਛਨ੍ਨਂ, ਸੁਸਂਵੁਤੋਕ੍ਖਿਤ੍ਤਚਕ੍ਖੁ;

ਉਕ੍ਖਿਤ੍ਤੋਜ੍ਜਗ੍ਘਿਕਾਸਦ੍ਦੋ, ਤਯੋ ਚੇਵ ਪਚਾਲਨਾ.

ਖਮ੍ਭੋਗੁਣ੍ਠਿਉਕ੍ਕੁਟਿਕਾ, ਪਟਿਚ੍ਛਨ੍ਨਂ ਸੁਸਂਵੁਤੋ;

ਓਕ੍ਖਿਤ੍ਤੁਕ੍ਖਿਤ੍ਤਉਜ੍ਜਗ੍ਘਿ, ਅਪ੍ਪਸਦ੍ਦੋ ਤਯੋ ਚਲਾ.

ਖਮ੍ਭੋਗੁਣ੍ਠਿਪਲ੍ਲਤ੍ਥਿ ਚ, ਅਨੁਪਖਜ੍ਜ ਨਾਸਨੇ;

ਓਤ੍ਥਰਿਤ੍ਵਾਨ ਉਦਕੇ, ਨੀਚਂ ਕਤ੍ਵਾਨ ਸਿਞ੍ਚਿਯਾ.

ਪਟਿ ਸਾਮਨ੍ਤਾ ਸਙ੍ਘਾਟਿ, ਓਦਨੇ ਚ ਪਟਿਗ੍ਗਹੇ;

ਸੂਪਂ ਉਤ੍ਤਰਿਭਙ੍ਗੇਨ, ਸਬ੍ਬੇਸਂ ਸਮਤਿਤ੍ਥਿ ਚ.

ਸਕ੍ਕਚ੍ਚਂ ਪਤ੍ਤਸਞ੍ਞੀ ਚ, ਸਪਦਾਨਞ੍ਚ ਸੂਪਕਂ;

ਨ ਥੂਪਤੋ ਪਟਿਚ੍ਛਾਦੇ, ਵਿਞ੍ਞਤ੍ਤੁਜ੍ਝਾਨਸਞ੍ਞਿਨਾ.

ਮਹਨ੍ਤਮਣ੍ਡਲਦ੍ਵਾਰਂ, ਸਬ੍ਬਹਤ੍ਥੋ ਨ ਬ੍ਯਾਹਰੇ;

ਉਕ੍ਖੇਪੋ ਛੇਦਨਾਗਣ੍ਡ, ਧੁਨਂ ਸਿਤ੍ਥਾਵਕਾਰਕਂ.

ਜਿਵ੍ਹਾਨਿਚ੍ਛਾਰਕਞ੍ਚੇਵ, ਚਪੁਚਪੁ ਸੁਰੁਸੁਰੁ;

ਹਤ੍ਥਪਤ੍ਤੋਟ੍ਠਨਿਲ੍ਲੇਹਂ, ਸਾਮਿਸੇਨ ਪਟਿਗ੍ਗਹੇ.

ਯਾਵ ਨ ਸਬ੍ਬੇ ਉਦਕੇ, ਨੀਚਂ ਕਤ੍ਵਾਨ ਸਿਞ੍ਚਿਯਂ;

ਪਟਿ ਸਾਮਨ੍ਤਾ ਸਙ੍ਘਾਟਿ, ਨੀਚਂ ਕਤ੍ਵਾ ਛਮਾਯ ਚ.

ਸਸਿਤ੍ਥਕਂ ਨਿਵਤ੍ਤਨ੍ਤੇ, ਸੁਪ੍ਪਟਿਚ੍ਛਨ੍ਨਮੁਕ੍ਕੁਟਿ;

ਧਮ੍ਮਰਾਜੇਨ ਪਞ੍ਞਤ੍ਤਂ, ਇਦਂ ਭਤ੍ਤਗ੍ਗਵਤ੍ਤਨਂ.

ਦੁਨ੍ਨਿਵਤ੍ਥਾ ਅਨਾਕਪ੍ਪਾ, ਅਸਲ੍ਲੇਕ੍ਖੇਤ੍ਵਾ ਚ ਸਹਸਾ;

ਦੂਰੇ ਅਚ੍ਚ ਚਿਰਂ ਲਹੁਂ, ਤਥੇਵ ਪਿਣ੍ਡਚਾਰਿਕੋ.

ਪਟਿਚ੍ਛਨ੍ਨੋਵ ਗਚ੍ਛੇਯ੍ਯ, ਸੁਂਸਵੁਤੋਕ੍ਖਿਤ੍ਤਚਕ੍ਖੁ;

ਉਕ੍ਖਿਤ੍ਤੋਜ੍ਜਗ੍ਘਿਕਾਸਦ੍ਦੋ, ਤਯੋ ਚੇਵ ਪਚਾਲਨਾ.

ਖਮ੍ਭੋਗੁਣ੍ਠਿਉਕ੍ਕੁਟਿਕਾ, ਸਲ੍ਲਕ੍ਖੇਤ੍ਵਾ ਚ ਸਹਸਾ;

ਦੂਰੇ ਅਚ੍ਚ ਚਿਰਂ ਲਹੁਂ, ਆਸਨਕਂ ਕਟਚ੍ਛੁਕਾ.

ਭਾਜਨਂ ਵਾ ਠਪੇਤਿ ਚ, ਉਚ੍ਚਾਰੇਤ੍ਵਾ ਪਣਾਮੇਤ੍ਵਾ;

ਪਟਿਗ੍ਗਹੇ ਨ ਉਲ੍ਲੋਕੇ, ਸੂਪੇਸੁਪਿ ਤਥੇਵ ਤਂ.

ਭਿਕ੍ਖੁ ਸਙ੍ਘਾਟਿਯਾ ਛਾਦੇ, ਪਟਿਚ੍ਛਨ੍ਨੇਵ ਗਚ੍ਛਿਯਂ;

ਸਂਵੁਤੋਕ੍ਖਿਤ੍ਤਚਕ੍ਖੁ ਚ, ਉਕ੍ਖਿਤ੍ਤੋਜ੍ਜਗ੍ਘਿਕਾਯ ਚ;

ਅਪ੍ਪਸਦ੍ਦੋ ਤਯੋ ਚਾਲਾ, ਖਮ੍ਭੋਗੁਣ੍ਠਿਕਉਕ੍ਕੁਟਿ.

ਪਠਮਾਸਨਵਕ੍ਕਾਰ, ਪਾਨਿਯਂ ਪਰਿਭੋਜਨੀ;

ਪਚ੍ਛਾਕਙ੍ਖਤਿ ਭੁਞ੍ਜੇਯ੍ਯ, ਓਪਿਲਾਪੇਯ੍ਯ ਉਦ੍ਧਰੇ.

ਪਟਿਸਾਮੇਯ੍ਯ ਸਮ੍ਮਜ੍ਜੇ, ਰਿਤ੍ਤਂ ਤੁਚ੍ਛਂ ਉਪਟ੍ਠਪੇ;

ਹਤ੍ਥਵਿਕਾਰੇ ਭਿਨ੍ਦੇਯ੍ਯ, ਵਤ੍ਤਿਦਂ ਪਿਣ੍ਡਚਾਰਿਕੇ.

ਪਾਨੀ ਪਰਿ ਅਗ੍ਗਿਰਣਿ, ਨਕ੍ਖਤ੍ਤਦਿਸਚੋਰਾ ਚ;

ਸਬ੍ਬਂ ਨਤ੍ਥੀਤਿ ਕੋਟ੍ਟੇਤ੍ਵਾ, ਪਤ੍ਤਂਸੇ ਚੀਵਰਂ ਤਤੋ.

ਇਦਾਨਿ ਅਂਸੇ ਲਗ੍ਗੇਤ੍ਵਾ, ਤਿਮਣ੍ਡਲਂ ਪਰਿਮਣ੍ਡਲਂ;

ਯਥਾ ਪਿਣ੍ਡਚਾਰਿਵਤ੍ਤਂ, ਨਯੇ ਆਰਞ੍ਞਕੇਸੁਪਿ.

ਪਤ੍ਤਂਸੇ ਚੀਵਰਂ ਸੀਸੇ, ਆਰੋਹਿਤ੍ਵਾ ਚ ਪਾਨਿਯਂ;

ਪਰਿਭੋਜਨਿਯਂ ਅਗ੍ਗਿ, ਅਰਣੀ ਚਾਪਿ ਕਤ੍ਤਰਂ.

ਨਕ੍ਖਤ੍ਤਂ ਸਪ੍ਪਦੇਸਂ ਵਾ, ਦਿਸਾਪਿ ਕੁਸਲੋ ਭਵੇ;

ਸਤ੍ਤੁਤ੍ਤਮੇਨ ਪਞ੍ਞਤ੍ਤਂ, ਵਤ੍ਤਂ ਆਰਞ੍ਞਕੇਸੁਮੇ.

ਅਜ੍ਝੋਕਾਸੇ ਓਕਿਰਿਂਸੁ, ਉਜ੍ਝਾਯਨ੍ਤਿ ਚ ਪੇਸਲਾ;

ਸਚੇ ਵਿਹਾਰੋ ਉਕ੍ਲਾਪੋ, ਪਠਮਂ ਪਤ੍ਤਚੀਵਰਂ.

ਭਿਸਿਬਿਬ੍ਬੋਹਨਂ ਮਞ੍ਚਂ, ਪੀਠਞ੍ਚ ਖੇਲ਼ਮਲ੍ਲਕਂ;

ਅਪਸ੍ਸੇਨੁਲ੍ਲੋਕਕਣ੍ਣਾ, ਗੇਰੁਕਾ ਕਾਲ਼ ਅਕਤਾ.

ਸਙ੍ਕਾਰਂ ਭਿਕ੍ਖੁਸਾਮਨ੍ਤਾ, ਸੇਨਾਵਿਹਾਰਪਾਨਿਯਂ;

ਪਰਿਭੋਜਨਸਾਮਨ੍ਤਾ, ਪਟਿਵਾਤੇ ਚ ਅਙ੍ਗਣੇ.

ਅਧੋਵਾਤੇ ਅਤ੍ਥਰਣਂ, ਪਟਿਪਾਦਕਮਞ੍ਚੋ ਚ;

ਪੀਠਂ ਭਿਸਿ ਨਿਸੀਦਨਂ, ਮਲ੍ਲਕਂ ਅਪਸ੍ਸੇਨ ਚ.

ਪਤ੍ਤਚੀਵਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ;

ਪੁਰਤ੍ਥਿਮਾ ਚ ਪਚ੍ਛਿਮਾ, ਉਤ੍ਤਰਾ ਅਥ ਦਕ੍ਖਿਣਾ.

ਸੀਤੁਣ੍ਹੇ ਚ ਦਿਵਾ ਰਤ੍ਤਿਂ, ਪਰਿਵੇਣਞ੍ਚ ਕੋਟ੍ਠਕੋ;

ਉਪਟ੍ਠਾਨਗ੍ਗਿਸਾਲਾ ਚ, ਵਚ੍ਚਕੁਟੀ ਚ ਪਾਨਿਯਂ.

ਆਚਮਨਕੁਮ੍ਭਿ ਵੁਡ੍ਢੇ ਚ, ਉਦ੍ਦੇਸਪੁਚ੍ਛਨਾ ਸਜ੍ਝਾ;

ਧਮ੍ਮੋ ਪਦੀਪਂ ਵਿਜ੍ਝਾਪੇ, ਨ ਵਿਵਰੇ ਨਪਿ ਥਕੇ.

ਯੇਨ ਵੁਡ੍ਢੋ ਪਰਿਵਤ੍ਤਿ, ਕਣ੍ਣੇਨਪਿ ਨ ਘਟ੍ਟਯੇ;

ਪਞ੍ਞਪੇਸਿ ਮਹਾਵੀਰੋ, ਵਤ੍ਤਂ ਸੇਨਾਸਨੇਸੁ ਤਂ.

ਨਿਵਾਰਿਯਮਾਨਾ ਦ੍ਵਾਰਂ, ਮੁਚ੍ਛਿਤੁਜ੍ਝਨ੍ਤਿ ਪੇਸਲਾ;

ਛਾਰਿਕਂ ਛਡ੍ਡਯੇ ਜਨ੍ਤਾ, ਪਰਿਭਣ੍ਡਂ ਤਥੇਵ ਚ.

ਪਰਿਵੇਣਂ ਕੋਟ੍ਠਕੋ ਸਾਲਾ, ਚੁਣ੍ਣਮਤ੍ਤਿਕਦੋਣਿਕਾ;

ਮੁਖਂ ਪੁਰਤੋ ਨ ਥੇਰੇ, ਨ ਨਵੇ ਉਸ੍ਸਹਤਿ ਸਚੇ.

ਪੁਰਤੋ ਉਪਰਿਮਗ੍ਗੋ, ਚਿਕ੍ਖਲ੍ਲਂ ਮਤ੍ਤਿ ਪੀਠਕਂ;

ਵਿਜ੍ਝਾਪੇਤ੍ਵਾ ਥਕੇਤ੍ਵਾ ਚ, ਵਤ੍ਤਂ ਜਨ੍ਤਾਘਰੇਸੁਮੇ.

ਨਾਚਮੇਤਿ ਯਥਾਵੁਡ੍ਢਂ, ਪਟਿਪਾਟਿ ਚ ਸਹਸਾ;

ਉਬ੍ਭਜਿ ਨਿਤ੍ਥੁਨੋ ਕਟ੍ਠਂ, ਵਚ੍ਚਂ ਪਸ੍ਸਾਵ ਖੇਲ਼ਕਂ.

ਫਰੁਸਾ ਕੂਪ ਸਹਸਾ, ਉਬ੍ਭਜਿ ਚਪੁ ਸੇਸੇਨ;

ਬਹਿ ਅਨ੍ਤੋ ਚ ਉਕ੍ਕਾਸੇ, ਰਜ੍ਜੁ ਅਤਰਮਾਨਞ੍ਚ.

ਸਹਸਾ ਉਬ੍ਭਜਿ ਠਿਤੇ, ਨਿਤ੍ਥੁਨੇ ਕਟ੍ਠ ਵਚ੍ਚਞ੍ਚ;

ਪਸ੍ਸਾਵ ਖੇਲ਼ ਫਰੁਸਾ, ਕੂਪਞ੍ਚ ਵਚ੍ਚਪਾਦੁਕੇ.

ਨਾਤਿਸਹਸਾ ਉਬ੍ਭਜਿ, ਪਾਦੁਕਾਯ ਚਪੁਚਪੁ;

ਨ ਸੇਸਯੇ ਪਟਿਚ੍ਛਾਦੇ, ਉਹਤਪਿਧਰੇਨ ਚ.

ਵਚ੍ਚਕੁਟੀ ਪਰਿਭਣ੍ਡਂ, ਪਰਿਵੇਣਞ੍ਚ ਕੋਟ੍ਠਕੋ;

ਆਚਮਨੇ ਚ ਉਦਕਂ, ਵਤ੍ਤਂ ਵਚ੍ਚਕੁਟੀਸੁਮੇ.

ਉਪਾਹਨਾ ਦਨ੍ਤਕਟ੍ਠਂ, ਮੁਖੋਦਕਞ੍ਚ ਆਸਨਂ;

ਯਾਗੁ ਉਦਕਂ ਧੋਵਿਤ੍ਵਾ, ਉਦ੍ਧਾਰੁਕ੍ਲਾਪ ਗਾਮ ਚ.

ਨਿਵਾਸਨਾ ਕਾਯਬਨ੍ਧਾ, ਸਗੁਣਂ ਪਤ੍ਤਸੋਦਕਂ;

ਪਚ੍ਛਾ ਤਿਮਣ੍ਡਲੋ ਚੇਵ, ਪਰਿਮਣ੍ਡਲ ਬਨ੍ਧਨਂ.

ਸਗੁਣਂ ਧੋਵਿਤ੍ਵਾ ਪਚ੍ਛਾ, ਨਾਤਿਦੂਰੇ ਪਟਿਗ੍ਗਹੇ;

ਭਣਮਾਨਸ੍ਸ ਆਪਤ੍ਤਿ, ਪਠਮਾਗਨ੍ਤ੍ਵਾਨ ਆਸਨਂ.

ਉਦਕਂ ਪੀਠਕਥਲਿ, ਪਚ੍ਚੁਗ੍ਗਨ੍ਤ੍ਵਾ ਨਿਵਾਸਨਂ;

ਓਤਾਪੇ ਨਿਦਹਿ ਭਙ੍ਗੋ, ਓਭੋਗੇ ਭੁਞ੍ਜਿਤੁ ਨਮੇ.

ਪਾਨੀਯਂ ਉਦਕਂ ਨੀਚਂ, ਮੁਹੁਤ੍ਤਂ ਨ ਚ ਨਿਦਹੇ;

ਪਤ੍ਤਚੀਵਰਂ ਭੂਮਿ ਚ, ਪਾਰਨ੍ਤਂ ਓਰਤੋ ਭੋਗਂ.

ਉਦ੍ਧਰੇ ਪਟਿਸਾਮੇ ਚ, ਉਕ੍ਲਾਪੋ ਚ ਨਹਾਯਿਤੁਂ;

ਸੀਤਂ ਉਣ੍ਹਂ ਜਨ੍ਤਾਘਰਂ, ਚੁਣ੍ਣਂ ਮਤ੍ਤਿਕ ਪਿਟ੍ਠਿਤੋ.

ਪੀਠਞ੍ਚ ਚੀਵਰਂ ਚੁਣ੍ਣਂ, ਮਤ੍ਤਿਕੁਸ੍ਸਹਤਿ ਮੁਖਂ;

ਪੁਰਤੋ ਥੇਰੇ ਨਵੇ ਚ, ਪਰਿਕਮ੍ਮਞ੍ਚ ਨਿਕ੍ਖਮੇ.

ਪੁਰਤੋ ਉਦਕੇ ਨ੍ਹਾਤੇ, ਨਿਵਾਸੇਤ੍ਵਾ ਉਪਜ੍ਝਾਯਂ;

ਨਿਵਾਸਨਞ੍ਚ ਸਙ੍ਘਾਟਿ, ਪੀਠਕਂ ਆਸਨੇਨ ਚ.

ਪਾਦੋ ਪੀਠਂ ਕਥਲਿਞ੍ਚ, ਪਾਨੀਯੁਦ੍ਦੇਸਪੁਚ੍ਛਨਾ;

ਉਕ੍ਲਾਪਂ ਸੁਸੋਧੇਯ੍ਯ, ਪਠਮਂ ਪਤ੍ਤਚੀਵਰਂ.

ਨਿਸੀਦਨਪਚ੍ਚਤ੍ਥਰਣਂ, ਭਿਸਿ ਬਿਬ੍ਬੋਹਨਾਨਿ ਚ;

ਮਞ੍ਚੋ ਪੀਠਂ ਪਟਿਪਾਦਂ, ਮਲ੍ਲਕਂ ਅਪਸ੍ਸੇਨ ਚ.