ਆਰਾਮਪਰਿਕ੍ਖੇਪਅਨੁਜਾਨਨਂ

੩੦੩. ਤੇਨ ਖੋ ਪਨ ਸਮਯੇਨ ਆਰਾਮੋ ਅਪਰਿਕ੍ਖਿਤ੍ਤੋ ਹੋਤਿ. ਅਜਕਾਪਿ ਪਸੁਕਾਪਿ ਉਪਰੋਪੇ ਵਿਹੇਠੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਿਪਿਤੁਂ ਤਯੋ ਵਾਟੇ – ਵੇਲ਼ੁਵਾਟਂ, ਕਣ੍ਡਕਵਾਟਂ [ਵਟੇ ਵੇਲ਼ੁਵਟਂ ਕਣ੍ਡਕਵਟਂ (ਸ੍ਯਾ.)], ਪਰਿਖ’’ਨ੍ਤਿ. ਕੋਟ੍ਠਕੋ ਨ ਹੋਤਿ. ਤਥੇਵ ਅਜਕਾਪਿ ਪਸੁਕਾਪਿ ਉਪਰੋਪੇ ਵਿਹੇਠੇਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕੋਟ੍ਠਕਂ ਅਪੇਸਿਂ ਯਮਕਕਵਾਟਂ ਤੋਰਣਂ ਪਲਿਘ’’ਨ੍ਤਿ. ਕੋਟ੍ਠਕੇ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ – ਸੇਤਵਣ੍ਣਂ ਕਾਲ਼ਵਣ੍ਣਂ ਗੇਰੁਕਪਰਿਕਮ੍ਮਂ ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕ’’ਨ੍ਤਿ. ਆਰਾਮੋ ਚਿਕ੍ਖਲ੍ਲੋ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮਰੁਮ੍ਬਂ ਉਪਕਿਰਿਤੁ’’ਨ੍ਤਿ. ਨ ਪਰਿਯਾਪੁਣਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਪਦਰਸਿਲਂ ਨਿਕ੍ਖਿਪਿਤੁ’’ਨ੍ਤਿ. ਉਦਕਂ ਸਨ੍ਤਿਟ੍ਠਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਨਿਦ੍ਧਮਨ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸਙ੍ਘਸ੍ਸ ਅਤ੍ਥਾਯ ਸੁਧਾਮਤ੍ਤਿਕਾਲੇਪਨਂ ਪਾਸਾਦਂ ਕਾਰੇਤੁਕਾਮੋ ਹੋਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਭਗਵਤਾ ਛਦਨਂ ਅਨੁਞ੍ਞਾਤਂ, ਕਿਂ ਅਨਨੁਞ੍ਞਾਤ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਛਦਨਾਨਿ – ਇਟ੍ਠਕਾਛਦਨਂ, ਸਿਲਾਛਦਨਂ, ਸੁਧਾਛਦਨਂ, ਤਿਣਚ੍ਛਦਨਂ, ਪਣ੍ਣਚ੍ਛਦਨ’’ਨ੍ਤਿ.

ਪਠਮਭਾਣਵਾਰੋ ਨਿਟ੍ਠਿਤੋ.