੩. ਤਤਿਯਭਾਣਵਾਰੋ

੪੨੩. ਤੇਨ ਖੋ ਪਨ ਸਮਯੇਨ ਉਪਸਮ੍ਪਨ੍ਨਾਯੋ ਦਿਸ੍ਸਨ੍ਤਿ – ਅਨਿਮਿਤ੍ਤਾਪਿ, ਨਿਮਿਤ੍ਤਮਤ੍ਤਾਪਿ, ਅਲੋਹਿਤਾਪਿ, ਧੁਵਲੋਹਿਤਾਪਿ, ਧੁਵਚੋਲ਼ਾਪਿ, ਪਗ੍ਘਰਨ੍ਤੀਪਿ, ਸਿਖਰਿਣੀਪਿ, ਇਤ੍ਥਿਪਣ੍ਡਕਾਪਿ, ਵੇਪੁਰਿਸਿਕਾਪਿ, ਸਮ੍ਭਿਨ੍ਨਾਪਿ, ਉਭਤੋਬ੍ਯਞ੍ਜਨਾਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਨ੍ਤਿਯਾ ਚਤੁਵੀਸਤਿ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪੁਚ੍ਛਿਤਬ੍ਬਾ – ‘ਨਸਿ ਅਨਿਮਿਤ੍ਤਾ, ਨਸਿ ਨਿਮਿਤ੍ਤਮਤ੍ਤਾ, ਨਸਿ ਅਲੋਹਿਤਾ, ਨਸਿ ਧੁਵਲੋਹਿਤਾ, ਨਸਿ ਧੁਵਚੋਲ਼ਾ, ਨਸਿ ਪਗ੍ਘਰਨ੍ਤੀ, ਨਸਿ ਸਿਖਰਣੀ [ਸਿਖਰਿਣੀ (ਸੀ. ਸ੍ਯਾ.)], ਨਸਿ ਇਤ੍ਥਿਪਣ੍ਡਕਾ, ਨਸਿ ਵੇਪੁਰਿਸਿਕਾ, ਨਸਿ ਸਮ੍ਭਿਨ੍ਨਾ, ਨਸਿ ਉਭਤੋਬ੍ਯਞ੍ਜਨਾ? ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸਾਸਿ, ਇਤ੍ਥੀਸਿ, ਭੁਜਿਸ੍ਸਾਸਿ, ਅਣਣਾਸਿ, ਨਸਿ ਰਾਜਭਟੀ? ਅਨੁਞ੍ਞਾਤਾਸਿ ਮਾਤਾਪਿਤੂਹਿ, ਸਾਮਿਕੇਨ? ਪਰਿਪੁਣ੍ਣਵੀਸਤਿਵਸ੍ਸਾਸਿ, ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ, ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀ’’ਤਿ?

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੀਨਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਤੋਉਪਸਮ੍ਪਨ੍ਨਾਯ ਭਿਕ੍ਖੁਨਿਸਙ੍ਘੇ ਵਿਸੁਦ੍ਧਾਯ ਭਿਕ੍ਖੁਸਙ੍ਘੇ ਉਪਸਮ੍ਪਾਦੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਨਨੁਸਿਟ੍ਠਾ ਉਪਸਮ੍ਪਦਾਪੇਕ੍ਖਾਯੋ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਅਨੁਸਾਸਿਤ੍ਵਾ ਪਚ੍ਛਾ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁ’’ਨ੍ਤਿ.

ਤਤ੍ਥੇਵ ਸਙ੍ਘਮਜ੍ਝੇ ਅਨੁਸਾਸਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਤਥੇਵ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਮਨ੍ਤਂ ਅਨੁਸਾਸਿਤ੍ਵਾ ਸਙ੍ਘਮਜ੍ਝੇ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਅਨੁਸਾਸਿਤਬ੍ਬਾ.

੪੨੪. ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬਾ. ਉਪਜ੍ਝਂ ਗਾਹਾਪੇਤ੍ਵਾ ਪਤ੍ਤਚੀਵਰਂ ਆਚਿਕ੍ਖਿਤਬ੍ਬਂ – ‘ਅਯਂ ਤੇ ਪਤ੍ਤੋ, ਅਯਂ ਸਙ੍ਘਾਟਿ, ਅਯਂ ਉਤ੍ਤਰਾਸਙ੍ਗੋ, ਅਯਂ ਅਨ੍ਤਰਵਾਸਕੋ, ਇਦਂ ਸਂਕਚ੍ਚਿਕਂ [ਸਙ੍ਕਚ੍ਛਿਕਂ (ਸ੍ਯਾ.)], ਅਯਂ ਉਦਕਸਾਟਿਕਾ; ਗਚ੍ਛ ਅਮੁਮ੍ਹਿ ਓਕਾਸੇ ਤਿਟ੍ਠਾਹੀ’’ਤਿ.

ਬਾਲਾ ਅਬ੍ਯਤ੍ਤਾ ਅਨੁਸਾਸਨ੍ਤਿ. ਦੁਰਨੁਸਿਟ੍ਠਾ ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਬਾਲਾਯ ਅਬ੍ਯਤ੍ਤਾਯ ਅਨੁਸਾਸਿਤਬ੍ਬਾ. ਯਾ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਅਨੁਸਾਸਿਤੁ’’ਨ੍ਤਿ.

ਅਸਮ੍ਮਤਾ ਅਨੁਸਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਸਮ੍ਮਤਾਯ ਅਨੁਸਾਸਿਤਬ੍ਬਾ. ਯਾ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮਤਾਯ ਅਨੁਸਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ – ਅਤ੍ਤਨਾ ਵਾ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ, ਪਰਾਯ ਵਾ ਪਰਾ ਸਮ੍ਮਨ੍ਨਿਤਬ੍ਬਾ.

‘‘ਕਥਞ੍ਚ ਅਤ੍ਤਨਾਵ [ਅਤ੍ਤਨਾ ਵਾ (ਕ.)] ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ? ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’ਨ੍ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ.

‘‘ਕਥਞ੍ਚ ਪਰਾਯ [ਪਰਾਯ ਵਾ (ਕ.)] ਪਰਾ ਸਮ੍ਮਨ੍ਨਿਤਬ੍ਬਾ? ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’ਤਿ. ਏਵਂ ਪਰਾਯ ਪਰਾ ਸਮ੍ਮਨ੍ਨਿਤਬ੍ਬਾ.

‘‘ਤਾਯ ਸਮ੍ਮਤਾਯ ਭਿਕ੍ਖੁਨਿਯਾ ਉਪਸਮ੍ਪਦਾਪੇਕ੍ਖਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯਾ – ‘ਸੁਣਸਿ ਇਤ੍ਥਨ੍ਨਾਮੇ. ਅਯਂ ਤੇ ਸਚ੍ਚਕਾਲੋ, ਭੂਤਕਾਲੋ. ਯਂ ਜਾਤਂ ਤਂ ਸਙ੍ਘਮਜ੍ਝੇ ਪੁਚ੍ਛਨ੍ਤੇ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀਤਿ ਵਤ੍ਤਬ੍ਬਂ. ਮਾ ਖੋ ਵਿਤ੍ਥਾਯਿ [ਵਿਤ੍ਥਾਸਿ (ਕ.)], ਮਾ ਖੋ ਮਙ੍ਕੁ ਅਹੋਸਿ. ਏਵਂ ਤਂ ਪੁਚ੍ਛਿਸ੍ਸਨ੍ਤਿ – ਨਸਿ ਅਨਿਮਿਤ੍ਤਾ, ਨਸਿ ਨਿਮਿਤ੍ਤਮਤ੍ਤਾ, ਨਸਿ ਅਲੋਹਿਤਾ, ਨਸਿ ਧੁਵਲੋਹਿਤਾ, ਨਸਿ ਧੁਵਚੋਲ਼ਾ, ਨਸਿ ਪਗ੍ਘਰਨ੍ਤੀ, ਨਸਿ ਸਿਖਰਿਣੀ, ਨਸਿ ਇਤ੍ਥਿਪਣ੍ਡਕਾ, ਨਸਿ ਵੇਪੁਰਿਸਿਕਾ, ਨਸਿ ਸਮ੍ਭਿਨ੍ਨਾ, ਨਸਿ ਉਭਤੋਬ੍ਯਞ੍ਜਨਾ? ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸਾਸਿ, ਇਤ੍ਥੀਸਿ, ਭੁਜਿਸ੍ਸਾਸਿ, ਅਣਣਾਸਿ, ਨਸਿ ਰਾਜਭਟੀ? ਅਨੁਞ੍ਞਾਤਾਸਿ ਮਾਤਾਪਿਤੂਹਿ, ਸਾਮਿਕੇਨ? ਪਰਿਪੁਣ੍ਣਵੀਸਤਿਵਸ੍ਸਾਸਿ, ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ, ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀ’ਤਿ?

‘‘ਏਕਤੋ ਆਗਚ੍ਛਨ੍ਤਿ. ਨ ਏਕਤੋ ਆਗਨ੍ਤਬ੍ਬਂ. ਅਨੁਸਾਸਿਕਾਯ ਪਠਮਤਰਂ ਆਗਨ੍ਤ੍ਵਾ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਅਨੁਸਿਟ੍ਠਾ ਸਾ ਮਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਾ ਆਗਚ੍ਛੇਯ੍ਯਾ’ਤਿ. ‘ਆਗਚ੍ਛਾਹੀ’ਤਿ ਵਤ੍ਤਬ੍ਬਾ.

‘‘ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੁਨੀਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਉਪਸਮ੍ਪਦਂ ਯਾਚਾਪੇਤਬ੍ਬਾ – ‘ਸਙ੍ਘਂ, ਅਯ੍ਯੇ, ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਦੁਤਿਯਮ੍ਪਿ, ਅਯ੍ਯੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਤਤਿਯਮ੍ਪਿ, ਅਯ੍ਯੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯਨ੍ਤਿ.

‘‘ਸੁਣਸਿ ਇਤ੍ਥਨ੍ਨਾਮੇ. ਅਯਂ ਤੇ ਸਚ੍ਚਕਾਲੋ, ਭੂਤਕਾਲੋ. ਯਂ ਜਾਤਂ ਤਂ ਪੁਚ੍ਛਾਮਿ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀਤਿ ਵਤ੍ਤਬ੍ਬਂ. ਨਸਿ ਅਨਿਮਿਤ੍ਤਾ…ਪੇ… ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀਤਿ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

੪੨੫. ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਉਪਸਮ੍ਪਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਵਦੇਵ ਤਂ ਆਦਾਯ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਉਪਸਮ੍ਪਦਂ ਯਾਚਾਪੇਤਬ੍ਬਾ – ‘ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ; ਸਙ੍ਘਂ, ਅਯ੍ਯਾ, ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਦੁਤਿਯਮ੍ਪਿ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਤਤਿਯਮ੍ਪਿ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ, ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਉਪਸਮ੍ਪਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਵਦੇਵ ਛਾਯਾ ਮੇਤਬ੍ਬਾ, ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ, ਸਙ੍ਗੀਤਿ ਆਚਿਕ੍ਖਿਤਬ੍ਬਾ, ਭਿਕ੍ਖੁਨਿਯੋ ਵਤ੍ਤਬ੍ਬਾ – ਇਮਿਸ੍ਸਾ ਤਯੋ ਚ ਨਿਸ੍ਸਯੇ, ਅਟ੍ਠ ਚ ਅਕਰਣੀਯਾਨਿ ਆਚਿਕ੍ਖੇਯ੍ਯਾਥਾ’’ਤਿ.

੪੨੬. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਤ੍ਤਗ੍ਗੇ ਆਸਨਂ ਸਂਕਸਾਯਨ੍ਤਿਯੋ ਕਾਲਂ ਵੀਤਿਨਾਮੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ – ਭਗਵਤਾ ਅਨੁਞ੍ਞਾਤਂ ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕਨ੍ਤਿ – ਸਬ੍ਬਤ੍ਥ ਅਟ੍ਠੇਵ ਭਿਕ੍ਖੁਨਿਯੋ ਯਥਾਵੁਡ੍ਢਂ ਪਟਿਬਾਹਨ੍ਤਿ, ਅਵਸੇਸਾਯੋ ਯਥਾਗਤਿਕਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਗ੍ਗੇ ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕਂ; ਅਞ੍ਞਤ੍ਥ ਸਬ੍ਬਤ੍ਥ ਯਥਾਵੁਡ੍ਢਂ [ਅਞ੍ਞਤ੍ਥ ਯਥਾਵੁਡ੍ਢਂ (ਸ੍ਯਾ.)] ਨ ਪਟਿਬਾਹਿਤਬ੍ਬਂ. ਯਾ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੨੭. [ਪਾਚਿ. ੧੦੫੦ ਆਦਯੋ] ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਨ ਪਵਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਨ ਪਵਾਰੇਤਬ੍ਬਂ. ਯਾ ਨ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਤ੍ਤਨਾ ਪਵਾਰੇਤ੍ਵਾ ਭਿਕ੍ਖੁਸਙ੍ਘਂ ਨ ਪਵਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਤ੍ਤਨਾ ਪਵਾਰੇਤ੍ਵਾ ਭਿਕ੍ਖੁਸਙ੍ਘੋ ਨ ਪਵਾਰੇਤਬ੍ਬੋ. ਯਾ ਨ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਿਕ੍ਖੂਹਿ ਸਦ੍ਧਿਂ ਏਕਤੋ ਪਵਾਰੇਨ੍ਤਿਯੋ ਕੋਲਾਹਲਂ ਅਕਂਸੁ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੂਹਿ ਸਦ੍ਧਿਂ ਏਕਤੋ ਪਵਾਰੇਤਬ੍ਬਂ. ਯਾ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪੁਰੇਭਤ੍ਤਂ ਪਵਾਰੇਨ੍ਤਿਯੋ ਕਾਲਂ ਵੀਤਿਨਾਮੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਛਾਭਤ੍ਤਂ [ਭਿਕ੍ਖਵੇ ਭਿਕ੍ਖੁਨਿਯਾ ਪਚ੍ਛਾਭਤ੍ਤਂ (ਸ੍ਯਾ. ਕਂ.)] ਪਵਾਰੇਤੁ’’ਨ੍ਤਿ. ਪਚ੍ਛਾਭਤ੍ਤਂ ਪਵਾਰੇਨ੍ਤਿਯੋ ਵਿਕਾਲੇ [ਵਿਕਾਲਂ (ਕ.)] ਅਹੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਜ੍ਜਤਨਾ ਭਿਕ੍ਖੁਨਿਸਙ੍ਘਂ [ਅਜ੍ਜਤਨਾ (ਸੀ.), ਅਜ੍ਜਤਨਾਯ (ਕ.)] ਪਵਾਰੇਤ੍ਵਾ ਅਪਰਜ੍ਜੁ ਭਿਕ੍ਖੁਸਙ੍ਘਂ ਪਵਾਰੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਸਬ੍ਬੋ ਭਿਕ੍ਖੁਨਿਸਙ੍ਘੋ ਪਵਾਰੇਨ੍ਤੋ ਕੋਲਾਹਲਂ ਅਕਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਂ ਭਿਕ੍ਖੁਨਿਂ ਬ੍ਯਤ੍ਤਂ ਪਟਿਬਲਂ ਸਮ੍ਮਨ੍ਨਿਤੁਂ – ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾ, ਯਾਚਿਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨੇਯ੍ਯ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨਤਿ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਸਮ੍ਮੁਤਿ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਸਮ੍ਮਤਾ ਸਙ੍ਘੇਨ ਇਤ੍ਥਨ੍ਨਾਮਾ ਭਿਕ੍ਖੁਨੀ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਯ ਸਮ੍ਮਤਾਯ ਭਿਕ੍ਖੁਨਿਯਾ ਭਿਕ੍ਖੁਨਿਸਙ੍ਘਂ ਆਦਾਯ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਭਿਕ੍ਖੁਨੀਸਙ੍ਘੋ, ਅਯ੍ਯਾ, ਭਿਕ੍ਖੁਸਙ੍ਘਂ ਪਵਾਰੇਤਿ – ਦਿਟ੍ਠੇਨ ਵਾ, ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ [ਵਦਤੁ ਮਂ (ਕ.)], ਅਯ੍ਯਾ, ਭਿਕ੍ਖੁਸਙ੍ਘੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤਿ. ਦੁਤਿਯਮ੍ਪਿ, ਅਯ੍ਯਾ…ਪੇ… ਤਤਿਯਮ੍ਪਿ, ਅਯ੍ਯਾ, ਭਿਕ੍ਖੁਨਿਸਙ੍ਘੋ ਭਿਕ੍ਖੁਸਙ੍ਘਂ ਪਵਾਰੇਤਿ – ਦਿਟ੍ਠੇਨ ਵਾ, ਸੁਤੇਨ ਵਾ, ਪਰਿਸਙ੍ਕਾਯ ਵਾ. ਵਦਤੁ, ਅਯ੍ਯਾ, ਭਿਕ੍ਖੁਸਙ੍ਘੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ.

੪੨੮. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਿਕ੍ਖੂਨਂ ਉਪੋਸਥਂ ਠਪੇਨ੍ਤਿ, ਪਵਾਰਣਂ ਠਪੇਨ੍ਤਿ, ਸਵਚਨੀਯਂ ਕਰੋਨ੍ਤਿ, ਅਨੁਵਾਦਂ ਪਟ੍ਠਪੇਨ੍ਤਿ, ਓਕਾਸਂ ਕਾਰੇਨ੍ਤਿ, ਚੋਦੇਨ੍ਤਿ, ਸਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਉਪੋਸਥੋ ਠਪੇਤਬ੍ਬੋ; ਠਪਿਤੋਪਿ ਅਟ੍ਠਪਿਤੋ; ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਪਵਾਰਣਾ ਠਪੇਤਬ੍ਬਾ; ਠਪਿਤਾਪਿ ਅਟ੍ਠਪਿਤਾ; ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਸਵਚਨੀਯਂ ਕਾਤਬ੍ਬਂ; ਕਤਮ੍ਪਿ ਅਕਤਂ; ਕਰੋਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਅਨੁਵਾਦੋ ਪਟ੍ਠਪੇਤਬ੍ਬੋ; ਪਟ੍ਠਪਿਤੋਪਿ ਅਪ੍ਪਟ੍ਠਪਿਤੋ; ਪਟ੍ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਓਕਾਸੋ ਕਾਰੇਤਬ੍ਬੋ; ਕਾਰਿਤੋਪਿ ਅਕਾਰਿਤੋ; ਕਾਰੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਚੋਦੇਤਬ੍ਬੋ; ਚੋਦਿਤੋਪਿ ਅਚੋਦਿਤੋ; ਚੋਦੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਸਾਰੇਤਬ੍ਬੋ; ਸਾਰਿਤੋਪਿ ਅਸਾਰਿਤੋ; ਸਾਰੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੀਨਂ ਉਪੋਸਥਂ ਠਪੇਨ੍ਤਿ, ਪਵਾਰਣਂ ਠਪੇਨ੍ਤਿ, ਸਵਚਨੀਯਂ ਕਰੋਨ੍ਤਿ, ਅਨੁਵਾਦਂ ਪਟ੍ਠਪੇਨ੍ਤਿ, ਓਕਾਸਂ ਕਾਰੇਨ੍ਤਿ, ਚੋਦੇਨ੍ਤਿ, ਸਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ ਭਿਕ੍ਖੁਨਾ ਭਿਕ੍ਖੁਨਿਯਾ ਉਪੋਸਥਂ ਠਪੇਤੁਂ; ਠਪਿਤੋਪਿ ਸੁਟ੍ਠਪਿਤੋ; ਠਪੇਨ੍ਤਸ੍ਸ ਅਨਾਪਤ੍ਤਿ. ਪਵਾਰਣਂ ਠਪੇਤੁਂ; ਠਪਿਤਾਪਿ ਸੁਟ੍ਠਪਿਤਾ; ਠਪੇਨ੍ਤਸ੍ਸ ਅਨਾਪਤ੍ਤਿ. ਸਵਚਨੀਯਂ ਕਾਤੁਂ; ਕਤਮ੍ਪਿ ਸੁਕਤਂ; ਕਰੋਨ੍ਤਸ੍ਸ ਅਨਾਪਤ੍ਤਿ. ਅਨੁਵਾਦਂ ਪਟ੍ਠਪੇਤੁਂ; ਪਟ੍ਠਪਿਤੋਪਿ ਸੁਪ੍ਪਟ੍ਠਪਿਤੋ; ਪਟ੍ਠਪੇਨ੍ਤਸ੍ਸ ਅਨਾਪਤ੍ਤਿ. ਓਕਾਸਂ ਕਾਰੇਤੁਂ; ਕਾਰਿਤੋਪਿ ਸੁਕਾਰਿਤੋ; ਕਾਰੇਨ੍ਤਸ੍ਸ ਅਨਾਪਤ੍ਤਿ. ਚੋਦੇਤੁਂ; ਚੋਦਿਤਾਪਿ ਸੁਚੋਦਿਤਾ; ਚੋਦੇਨ੍ਤਸ੍ਸ ਅਨਾਪਤ੍ਤਿ. ਸਾਰੇਤੁਂ; ਸਾਰਿਤਾਪਿ ਸੁਸਾਰਿਤਾ; ਸਾਰੇਨ੍ਤਸ੍ਸ ਅਨਾਪਤ੍ਤੀ’’ਤਿ.

੪੨੯. [ਪਾਚਿ. ੧੧੮੪] ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਯਾਨੇਨ ਯਾਯਨ੍ਤਿ – ਇਤ੍ਥਿਯੁਤ੍ਤੇਨਪਿ ਪੁਰਿਸਨ੍ਤਰੇਨ, ਪੁਰਿਸਯੁਤ੍ਤੇਨਪਿ ਇਤ੍ਥਨ੍ਤਰੇਨ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ‘‘ਸੇਯ੍ਯਥਾਪਿ ਗਙ੍ਗਾਮਹਿਯਾਯਾ’’ਤਿ [ਗਙ੍ਗਾਮਹਿਯਾਤਿ (ਸੀ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਯਾਨੇਨ ਯਾਯਿਤਬ੍ਬਂ. ਯਾ ਯਾਯੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਗਿਲਾਨਾ ਹੋਤਿ, ਨ ਸਕ੍ਕੋਤਿ ਪਦਸਾ ਗਨ੍ਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਾਯ ਯਾਨ’’ਨ੍ਤਿ. ਅਥ ਖੋ ਭਿਕ੍ਖੁਨੀਨਂ ਏਤਦਹੋਸਿ – ‘‘ਇਤ੍ਥਿਯੁਤ੍ਤਂ ਨੁ ਖੋ, ਪੁਰਿਸਯੁਤ੍ਤਂ ਨੁ ਖੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਇਤ੍ਥਿਯੁਤ੍ਤਂ ਪੁਰਿਸਯੁਤ੍ਤਂ ਹਤ੍ਥਵਟ੍ਟਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਿਸ੍ਸਾ ਭਿਕ੍ਖੁਨਿਯਾ ਯਾਨੁਗ੍ਘਾਤੇਨ ਬਾਲ਼੍ਹਤਰਂ ਅਫਾਸੁ ਅਹੋਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਿਵਿਕਂ ਪਾਟਙ੍ਕਿ’’ਨ੍ਤਿ.

੪੩੦. ਤੇਨ ਖੋ ਪਨ ਸਮਯੇਨ ਅਡ੍ਢਕਾਸੀ ਗਣਿਕਾ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ. ਸਾ ਚ ਸਾਵਤ੍ਥਿਂ ਗਨ੍ਤੁਕਾਮਾ ਹੋਤਿ – ‘ਭਗਵਤੋ ਸਨ੍ਤਿਕੇ ਉਪਸਮ੍ਪਜ੍ਜਿਸ੍ਸਾਮੀ’ਤਿ. ਅਸ੍ਸੋਸੁਂ ਖੋ ਧੁਤ੍ਤਾ – ‘ਅਡ੍ਢਕਾਸੀ ਕਿਰ ਗਣਿਕਾ ਸਾਵਤ੍ਥਿਂ ਗਨ੍ਤੁਕਾਮਾ’ਤਿ. ਤੇ ਮਗ੍ਗੇ ਪਰਿਯੁਟ੍ਠਿਂਸੁ. ਅਸ੍ਸੋਸਿ ਖੋ ਅਡ੍ਢਕਾਸੀ ਗਣਿਕਾ – ‘ਧੁਤ੍ਤਾ ਕਿਰ ਮਗ੍ਗੇ ਪਰਿਯੁਟ੍ਠਿਤਾ’ਤਿ. ਭਗਵਤੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਉਪਸਮ੍ਪਜ੍ਜਿਤੁਕਾਮਾ; ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦੂਤੇਨਪਿ ਉਪਸਮ੍ਪਾਦੇਤੁ’’ਨ੍ਤਿ.

ਭਿਕ੍ਖੁਦੂਤੇਨ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਦੂਤੇਨ ਉਪਸਮ੍ਪਾਦੇਤਬ੍ਬਾ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ਸਿਕ੍ਖਮਾਨਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਸਾਮਣੇਰਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਸਾਮਣੇਰਿਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਬਾਲਾਯ ਅਬ੍ਯਤ੍ਤਾਯ ਦੂਤੇਨ ਉਪਸਮ੍ਪਾਦੇਨ੍ਤਿ. ‘‘ਨ, ਭਿਕ੍ਖਵੇ, ਬਾਲਾਯ ਅਬ੍ਯਤ੍ਤਾਯ ਦੂਤੇਨ ਉਪਸਮ੍ਪਾਦੇਤਬ੍ਬਾ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਦੂਤੇਨ ਉਪਸਮ੍ਪਾਦੇਤੁਨ੍ਤਿ.

‘‘ਤਾਯ ਦੂਤਾਯ ਭਿਕ੍ਖੁਨਿਯਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਦੁਤਿਯਮ੍ਪਿ, ਅਯ੍ਯਾ, ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਤਤਿਯਮ੍ਪਿ, ਅਯ੍ਯਾ, ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਾਵਦੇਵ ਛਾਯਾ ਮੇਤਬ੍ਬਾ, ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ, ਸਙ੍ਗੀਤਿ ਆਚਿਕ੍ਖਿਤਬ੍ਬਾ, ਭਿਕ੍ਖੁਨਿਯੋ ਵਤ੍ਤਬ੍ਬਾ – ਤਸ੍ਸਾ ਤਯੋ ਚ ਨਿਸ੍ਸਯੇ, ਅਟ੍ਠ ਚ ਅਕਰਣੀਯਾਨਿ ਆਚਿਕ੍ਖੇਯ੍ਯਾਥਾ’’ਤਿ.

੪੩੧. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਰਞ੍ਞੇ ਵਿਹਰਨ੍ਤਿ. ਧੁਤ੍ਤਾ ਦੂਸੇਨ੍ਤਿ. ਭਗਵਤੋ ਏਤਮਤ੍ਥਂ, ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਰਞ੍ਞੇ ਵਤ੍ਥਬ੍ਬਂ. ਯਾ ਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਉਪਾਸਕੇਨ ਭਿਕ੍ਖੁਨਿਸਙ੍ਘਸ੍ਸ ਉਦ੍ਦੋਸਿਤੋ ਦਿਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦ੍ਦੋਸਿਤ’’ਨ੍ਤਿ. ਉਦ੍ਦੋਸਿਤੋ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਸ੍ਸਯ’’ਨ੍ਤਿ. ਉਪਸ੍ਸਯੋ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਨਵਕਮ੍ਮ’’ਨ੍ਤਿ. ਨਵਕਮ੍ਮਂ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਗ੍ਗਲਿਕਮ੍ਪਿ ਕਾਤੁ’’ਨ੍ਤਿ.

੪੩੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਸਨ੍ਨਿਸਿਨ੍ਨਗਬ੍ਭਾ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ. ਤਸ੍ਸਾ ਪਬ੍ਬਜਿਤਾਯ ਗਬ੍ਭੋ ਵੁਟ੍ਠਾਤਿ. ਅਥ ਖੋ ਤਸ੍ਸਾ ਭਿਕ੍ਖੁਨਿਯਾ ਏਤਦਹੋਸਿ – ‘‘ਕਥਂ ਨੁ ਖੋ ਮਯਾ ਇਮਸ੍ਮਿਂ ਦਾਰਕੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੋਸੇਤੁਂ, ਯਾਵ ਸੋ ਦਾਰਕੋ ਵਿਞ੍ਞੁਤਂ ਪਾਪੁਣਾਤੀ’’ਤਿ.

ਅਥ ਖੋ ਤਸ੍ਸਾ ਭਿਕ੍ਖੁਨਿਯਾ ਏਤਦਹੋਸਿ – ‘‘ਮਯਾ ਚ ਨ ਲਬ੍ਭਾ ਏਕਿਕਾਯ ਵਤ੍ਥੁਂ, ਅਞ੍ਞਾਯ ਚ ਭਿਕ੍ਖੁਨਿਯਾ ਨ ਲਬ੍ਭਾ ਦਾਰਕੇਨ ਸਹ ਵਤ੍ਥੁਂ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਂ ਭਿਕ੍ਖੁਨਿਂ ਸਮ੍ਮਨ੍ਨਿਤ੍ਵਾ ਤਸ੍ਸਾ ਭਿਕ੍ਖੁਨਿਯਾ ਦੁਤਿਯਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾ, ਯਾਚਿਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨੇਯ੍ਯ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਦੁਤਿਯਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਦੁਤਿਯਂ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਸਮ੍ਮੁਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਦੁਤਿਯਾਯ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਸਮ੍ਮਤਾ ਸਙ੍ਘੇਨ ਇਤ੍ਥਨ੍ਨਾਮਾ ਭਿਕ੍ਖੁਨੀ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਦੁਤਿਯਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਥ ਖੋ ਤਸ੍ਸਾ ਦੁਤਿਯਿਕਾਯ ਭਿਕ੍ਖੁਨਿਯਾ ਏਤਦਹੋਸਿ – ‘‘ਕਥਂ ਨੁ ਖੋ ਮਯਾ ਇਮਸ੍ਮਿਂ ਦਾਰਕੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਸਾਗਾਰਂ ਯਥਾ ਅਞ੍ਞਸ੍ਮਿਂ ਪੁਰਿਸੇ ਪਟਿਪਜ੍ਜਨ੍ਤਿ [ਪਟਿਪਜ੍ਜਤਿ (ਸ੍ਯਾ.)] ਏਵਂ ਤਸ੍ਮਿਂ ਦਾਰਕੇ ਪਟਿਪਜ੍ਜਿਤੁ’’ਨ੍ਤਿ.

੪੩੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਗਰੁਧਮ੍ਮਂ ਅਜ੍ਝਾਪਨ੍ਨਾ ਹੋਤਿ ਮਾਨਤ੍ਤਚਾਰਿਨੀ. ਅਥ ਖੋ ਤਸ੍ਸਾ ਭਿਕ੍ਖੁਨਿਯਾ ਏਤਦਹੋਸਿ – ‘‘ਮਯਾ ਚ ਨ ਲਬ੍ਭਾ ਏਕਿਕਾਯ ਵਤ੍ਥੁਂ, ਅਞ੍ਞਾਯ ਚ ਭਿਕ੍ਖੁਨਿਯਾ ਨ ਲਬ੍ਭਾ ਸਹ ਮਯਾ ਵਤ੍ਥੁਂ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਂ ਭਿਕ੍ਖੁਨਿਂ ਸਮ੍ਮਨ੍ਨਿਤ੍ਵਾ ਤਸ੍ਸਾ ਭਿਕ੍ਖੁਨਿਯਾ ਦੁਤਿਯਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾ, ਯਾਚਿਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

੪੩੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਸਿਕ੍ਖਂ ਪਚ੍ਚਕ੍ਖਾਯ ਵਿਬ੍ਭਮਿ. ਸਾ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੁਨਿਯੋ ਉਪਸਮ੍ਪਦਂ ਯਾਚਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਸਿਕ੍ਖਾਪਚ੍ਚਕ੍ਖਾਨਂ; ਯਦੇਵ ਸਾ ਵਿਬ੍ਭਨ੍ਤਾ ਤਦੇਵ ਸਾ ਅਭਿਕ੍ਖੁਨੀ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਸਕਾਵਾਸਾ ਤਿਤ੍ਥਾਯਤਨਂ ਸਙ੍ਕਮਿ. ਸਾ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੁਨਿਯੋ ਉਪਸਮ੍ਪਦਂ ਯਾਚਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਯਾ ਸਾ, ਭਿਕ੍ਖਵੇ, ਭਿਕ੍ਖੁਨੀ ਸਕਾਵਾਸਾ ਤਿਤ੍ਥਾਯਤਨਂ ਸਙ੍ਕਨ੍ਤਾ, ਸਾ ਆਗਤਾ ਨ ਉਪਸਮ੍ਪਾਦੇਤਬ੍ਬਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪੁਰਿਸੇਹਿ ਅਭਿਵਾਦਨਂ, ਕੇਸਚ੍ਛੇਦਨਂ, ਨਖਚ੍ਛੇਦਨਂ, ਵਣਪ੍ਪਟਿਕਮ੍ਮਂ, ਕੁਕ੍ਕੁਚ੍ਚਾਯਨ੍ਤਾ ਨ ਸਾਦਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਦਿਤੁ’’ਨ੍ਤਿ [ਸਾਦਿਯਿਤੁਂ (ਕ.)].

੪੩੫. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪਲ੍ਲਙ੍ਕੇਨ ਨਿਸੀਦਨ੍ਤਿ ਪਣ੍ਹੀਸਮ੍ਫਸ੍ਸਂ ਸਾਦਿਯਨ੍ਤੀ [ਸਾਦਿਯਨ੍ਤਾ (ਕ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਪਲ੍ਲਙ੍ਕੇਨ ਨਿਸੀਦਿਤਬ੍ਬਂ. ਯਾ ਨਿਸੀਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਗਿਲਾਨਾ ਹੋਤਿ. ਤਸ੍ਸਾ ਵਿਨਾ ਪਲ੍ਲਙ੍ਕੇਨ ਨ ਫਾਸੁ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨਿਯਾ ਅਡ੍ਢਪਲ੍ਲਙ੍ਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਵਚ੍ਚਕੁਟਿਯਾ ਵਚ੍ਚਂ ਕਰੋਨ੍ਤਿ. ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਤਤ੍ਥੇਵ ਗਬ੍ਭਂ ਪਾਤੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਵਚ੍ਚਕੁਟਿਯਾ ਵਚ੍ਚੋ ਕਾਤਬ੍ਬੋ. ਯਾ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਹੇਟ੍ਠਾ ਵਿਵਟੇ ਉਪਰਿਪਟਿਚ੍ਛਨ੍ਨੇ ਵਚ੍ਚਂ ਕਾਤੁ’’ਨ੍ਤਿ.

੪੩੬. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਚੁਣ੍ਣੇਨ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਚੁਣ੍ਣੇਨ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਕੁਕ੍ਕੁਸਂ ਮਤ੍ਤਿਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਵਾਸਿਤਕਾਯ ਮਤ੍ਤਿਕਾਯ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਵਾਸਿਤਕਾਯ ਮਤ੍ਤਿਕਾਯ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਪਕਤਿਮਤ੍ਤਿਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਜਨ੍ਤਾਘਰੇ ਨਹਾਯਨ੍ਤਿਯੋ ਕੋਲਾਹਲਂ ਅਕਂਸੁ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਜਨ੍ਤਾਘਰੇ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪਟਿਸੋਤੇ ਨਹਾਯਨ੍ਤਿ ਧਾਰਾਸਮ੍ਫਸ੍ਸਂ ਸਾਦਿਯਨ੍ਤੀ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਪਟਿਸੋਤੇ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਤਿਤ੍ਥੇ ਨਹਾਯਨ੍ਤਿ. ਧੁਤ੍ਤਾ ਦੂਸੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਤਿਤ੍ਥੇ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪੁਰਿਸਤਿਤ੍ਥੇ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਪੁਰਿਸਤਿਤ੍ਥੇ ਨਹਾਯਿਤਬ੍ਬਂ. ਯਾ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਮਹਿਲਾਤਿਤ੍ਥੇ ਨਹਾਯਿਤੁ’’ਨ੍ਤਿ.

ਤਤਿਯਭਾਣਵਾਰੋ ਨਿਟ੍ਠਿਤੋ.

ਭਿਕ੍ਖੁਨਿਕ੍ਖਨ੍ਧਕੋ ਦਸਮੋ.

ਇਮਸ੍ਮਿਂ ਖਨ੍ਧਕੇ ਵਤ੍ਥੂ ਏਕਸਤਂ.

ਤਸ੍ਸੁਦ੍ਦਾਨਂ –

ਪਬ੍ਬਜ੍ਜਂ ਗੋਤਮੀ ਯਾਚਿ, ਨਾਨੁਞ੍ਞਾਸਿ ਤਥਾਗਤੋ;

ਕਪਿਲਵਤ੍ਥੁ ਵੇਸਾਲਿਂ, ਅਗਮਾਸਿ ਵਿਨਾਯਕੋ.

ਰਜੋਕਿਣ੍ਣੇਨ ਕੋਟ੍ਠਕੇ, ਆਨਨ੍ਦਸ੍ਸ ਪਵੇਦਯਿ;

ਭਬ੍ਬੋਤਿ ਨਯਤੋ ਯਾਚਿ, ਮਾਤਾਤਿ ਪੋਸਿਕਾਤਿ ਚ.

ਵਸ੍ਸਸਤਂ ਤਦਹੁ ਚ, ਅਭਿਕ੍ਖੁਪਚ੍ਚਾਸੀਸਨਾ;

ਪਵਾਰਣਾ ਗਰੁਧਮ੍ਮਾ, ਦ੍ਵੇ ਵਸ੍ਸਾ ਅਨਕ੍ਕੋਸਨਾ.

ਓਵਟੋ ਚ ਅਟ੍ਠ ਧਮ੍ਮਾ, ਯਾਵਜੀਵਾਨੁਵਤ੍ਤਨਾ;

ਗਰੁਧਮ੍ਮਪਟਿਗ੍ਗਾਹੋ ਸਾਵਸ੍ਸਾ ਉਪਸਮ੍ਪਦਾ.

ਵਸ੍ਸਸਹਸ੍ਸਂ ਪਞ੍ਚੇਵ, ਕੁਮ੍ਭਥੇਨਕਸੇਤਟ੍ਟਿ;

ਮਞ੍ਜਿਟ੍ਠਿਕਉਪਮਾਹਿ, ਏਵਂ ਸਦ੍ਧਮ੍ਮਹਿਂਸਨਾ.

ਆਲ਼ਿਂ ਬਨ੍ਧੇਯ੍ਯ ਪਾਏਵ, ਪੁਨ ਸਦ੍ਧਮ੍ਮਸਣ੍ਠਿਤਿ;

ਉਪਸਮ੍ਪਾਦੇਤੁਂ ਅਯ੍ਯਾ, ਯਥਾਵੁਡ੍ਢਾਭਿਵਾਦਨਾ.

ਨ ਕਰਿਸ੍ਸਨ੍ਤਿ ਕਿਮੇਵ, ਸਾਧਾਰਣਾਸਾਧਾਰਣਂ;

ਓਵਾਦਂ ਪਾਤਿਮੋਕ੍ਖਞ੍ਚ, ਕੇਨ ਨੁ ਖੋ ਉਪਸ੍ਸਯਂ.

ਨ ਜਾਨਨ੍ਤਿ ਚ ਆਚਿਕ੍ਖਿ, ਨ ਕਰੋਨ੍ਤਿ ਚ ਭਿਕ੍ਖੁਹਿ;

ਪਟਿਗ੍ਗਹੇਤੁਂ ਭਿਕ੍ਖੂਹਿ, ਭਿਕ੍ਖੁਨੀਹਿ ਪਟਿਗ੍ਗਹੋ.

ਆਚਿਕ੍ਖਿ ਕਮ੍ਮਂ ਭਿਕ੍ਖੂਹਿ, ਉਜ੍ਝਾਯਨ੍ਤਿ ਭਿਕ੍ਖੁਨੀਹਿ ਵਾ;

ਆਚਿਕ੍ਖਿਤੁਂ ਭਣ੍ਡਨਞ੍ਚ, ਰੋਪੇਤ੍ਵਾ ਉਪ੍ਪਲਾਯ ਚ.

ਸਾਵਤ੍ਥਿਯਾ ਕਦ੍ਦਮੋਦ, ਅਵਨ੍ਦਿ ਕਾਯ ਊਰੁ ਚ;

ਅਙ੍ਗਜਾਤਞ੍ਚ ਓਭਾਸਂ, ਸਮ੍ਪਯੋਜੇਨ੍ਤਿ ਵਗ੍ਗਿਕਾ.

ਅਵਨ੍ਦਿਯੋ ਦਣ੍ਡਕਮ੍ਮਂ, ਭਿਕ੍ਖੁਨਿਯੋ ਤਥਾ ਪੁਨ;

ਆਵਰਣਞ੍ਚ ਓਵਾਦਂ, ਕਪ੍ਪਤਿ ਨੁ ਖੋ ਪਕ੍ਕਮਿ.

ਬਾਲਾ ਵਤ੍ਥੁਵਿਨਿਚ੍ਛਯਾ, ਓਵਾਦਂ ਸਙ੍ਘੋ ਪਞ੍ਚਹਿ;

ਦੁਵੇ ਤਿਸ੍ਸੋ ਨ ਗਣ੍ਹਨ੍ਤਿ, ਬਾਲਾ ਗਿਲਾਨਗਮਿਕਂ.

ਆਰਞ੍ਞਿਕੋ ਨਾਰੋਚੇਨ੍ਤਿ, ਨ ਪਚ੍ਚਾਗਚ੍ਛਨ੍ਤਿ ਚ;

ਦੀਘਂ ਵਿਲੀਵਚਮ੍ਮਞ੍ਚ, ਦੁਸ੍ਸਾ ਚ ਵੇਣਿਵਟ੍ਟਿ ਚ;

ਚੋਲ਼ਵੇਣਿ ਚ ਵਟ੍ਟਿ ਚ, ਸੁਤ੍ਤਵੇਣਿ ਚ ਵਟ੍ਟਿਕਾ.

ਅਟ੍ਠਿਲ੍ਲਂ ਗੋਹਨੁਕੇਨ, ਹਤ੍ਥਕੋਚ੍ਛਂ ਪਾਦਂ ਤਥਾ;

ਊਰੁਂ ਮੁਖਂ ਦਨ੍ਤਮਂਸਂ, ਆਲਿਮ੍ਪੋਮਦ੍ਦਚੁਣ੍ਣਨਾ.

ਲਞ੍ਛੇਨ੍ਤਿ ਅਙ੍ਗਰਾਗਞ੍ਚ, ਮੁਖਰਾਗਂ ਤਥਾ ਦੁਵੇ;

ਅਵਙ੍ਗਂ ਵਿਸੇਸੋਲੋਕੋ, ਸਾਲੋਕੇਨ ਨਚ੍ਚੇਨ ਚ [ਸਾਲੋਕੇ ਸਨਚ੍ਚੇਨ ਚ (ਸੀ.), ਸਾਲੋਕੇਨ ਸਨਚ੍ਚਨਂ (ਸ੍ਯਾ.)].

ਵੇਸੀ ਪਾਨਾਗਾਰਂ ਸੂਨਂ, ਆਪਣਂ ਵਡ੍ਢਿ ਵਣਿਜ੍ਜਾ;

ਦਾਸਂ ਦਾਸਿਂ ਕਮ੍ਮਕਰਂ, ਕਮ੍ਮਕਾਰਿਂ ਉਪਟ੍ਠਯ੍ਯੁਂ.

ਤਿਰਚ੍ਛਾਨਹਰੀਤਕਿ, ਸਨ੍ਧਾਰਯਨ੍ਤਿ ਨਮਤਕਂ;

ਨੀਲਂ ਪੀਤਂ ਲੋਹਿਤਕਂ, ਮਞ੍ਜਿਟ੍ਠਕਣ੍ਹਚੀਵਰਾ.

ਮਹਾਰਙ੍ਗਮਹਾਨਾਮਅਚ੍ਛਿਨ੍ਨਾ ਦੀਘਮੇਵ ਚ;

ਪੁਪ੍ਫਫਲਕਞ੍ਚੁਕਞ੍ਚ, ਤਿਰੀਟਕਞ੍ਚ ਧਾਰਯੁਂ.

ਭਿਕ੍ਖੁਨੀ ਸਿਕ੍ਖਮਾਨਾਯ, ਸਾਮਣੇਰਾਯ ਅਚ੍ਚਯੇ;

ਨਿਯ੍ਯਾਦਿਤੇ ਪਰਿਕ੍ਖਾਰੇ, ਭਿਕ੍ਖੁਨਿਯੋਵ ਇਸ੍ਸਰਾ.

ਭਿਕ੍ਖੁਸ੍ਸ ਸਾਮਣੇਰਸ੍ਸ, ਉਪਾਸਕਸ੍ਸੁਪਾਸਿਕਾ;

ਅਞ੍ਞੇਸਞ੍ਚ ਪਰਿਕ੍ਖਾਰੇ, ਨਿਯ੍ਯਾਤੇ ਭਿਕ੍ਖੁਇਸ੍ਸਰਾ.

ਮਲ੍ਲੀ ਗਬ੍ਭਂ ਪਤ੍ਤਮੂਲਂ, ਬ੍ਯਞ੍ਜਨਂ ਆਮਿਸੇਨ ਚ;

ਉਸ੍ਸਨ੍ਨਞ੍ਚ ਬਾਲ਼੍ਹਤਰਂ, ਸਨ੍ਨਿਧਿਕਤਮਾਮਿਸਂ.

ਭਿਕ੍ਖੂਨਂ ਯਾਦਿਸਂ ਭੋਟ੍ਠਂ [ਹੇਟ੍ਠਾ (ਸੀ.), ਹੇਟ੍ਠਂ (ਸ੍ਯਾ.), ਭੁਤ੍ਤਿ (ਕ.)], ਭਿਕ੍ਖੁਨੀਨਂ ਤਥਾ ਕਰੇ;

ਸੇਨਾਸਨਂ ਉਤੁਨਿਯੋ, ਮਕ੍ਖੀਯਤਿ ਪਟਾਣਿ ਚ.

ਛਿਜ੍ਜਨ੍ਤਿ ਸਬ੍ਬਕਾਲਞ੍ਚ, ਅਨਿਮਿਤ੍ਤਾਪਿ ਦਿਸ੍ਸਰੇ;

ਨਿਮਿਤ੍ਤਾ ਲੋਹਿਤਾ ਚੇਵ, ਤਥੇਵ ਧੁਵਲੋਹਿਤਾ.

ਧੁਵਚੋਲ਼ਪਗ੍ਘਰਨ੍ਤੀ, ਸਿਖਰਣਿਤ੍ਥਿਪਣ੍ਡਕਾ;

ਵੇਪੁਰਿਸੀ ਚ ਸਮ੍ਭਿਨ੍ਨਾ, ਉਭਤੋਬ੍ਯਞ੍ਜਨਾਪਿ ਚ.

ਅਨਿਮਿਤ੍ਤਾਦਿਤੋ ਕਤ੍ਵਾ, ਯਾਵ ਉਭਤੋਬ੍ਯਞ੍ਜਨਾ;

ਏਤਂ ਪੇਯ੍ਯਾਲਤੋ ਹੇਟ੍ਠਾ, ਕੁਟ੍ਠਂ ਗਣ੍ਡੋ ਕਿਲਾਸੋ ਚ.

ਸੋਸਾਪਮਾਰੋ ਮਾਨੁਸੀ, ਇਤ੍ਥੀਸਿ ਭੁਜਿਸ੍ਸਾਸਿ ਚ;

ਅਣਣਾ ਨ ਰਾਜਭਟੀ, ਅਨੁਞ੍ਞਾਤਾ ਚ ਵੀਸਤਿ.

ਪਰਿਪੁਣ੍ਣਾ ਚ ਕਿਨ੍ਨਾਮਾ, ਕਾਨਾਮਾ ਤੇ ਪਵਤ੍ਤਿਨੀ;

ਚਤੁਵੀਸਨ੍ਤਰਾਯਾਨਂ, ਪੁਚ੍ਛਿਤ੍ਵਾ ਉਪਸਮ੍ਪਦਾ.

ਵਿਤ੍ਥਾਯਨ੍ਤਿ ਅਨਨੁਸਿਟ੍ਠਾ, ਸਙ੍ਘਮਜ੍ਝੇ ਤਥੇਵ ਚ;

ਉਪਜ੍ਝਾਗਾਹ ਸਙ੍ਘਾਟਿ, ਉਤ੍ਤਰਨ੍ਤਰਵਾਸਕੋ.

ਸਙ੍ਕਚ੍ਚੁਦਕਸਾਟਿ ਚ, ਆਚਿਕ੍ਖਿਤ੍ਵਾਨ ਪੇਸਯੇ;

ਬਾਲਾ ਅਸਮ੍ਮਤੇਕਤੋ, ਯਾਚੇ ਪੁਚ੍ਛਨ੍ਤਰਾਯਿਕਾ.

ਏਕਤੋਉਪਸਮ੍ਪਨ੍ਨਾ, ਭਿਕ੍ਖੁਸਙ੍ਘੇ ਤਥਾ ਪੁਨ;

ਛਾਯਾ ਉਤੁ ਦਿਵਸਾ ਚ, ਸਙ੍ਗੀਤਿ ਤਯੋ ਨਿਸ੍ਸਯੇ.

ਅਟ੍ਠ ਅਕਰਣੀਯਾਨਿ, ਕਾਲਂ ਸਬ੍ਬਤ੍ਥ ਅਟ੍ਠੇਵ;

ਨ ਪਵਾਰੇਨ੍ਤਿ ਭਿਕ੍ਖੁਨੀ, ਭਿਕ੍ਖੁਸਙ੍ਘਂ ਤਥੇਵ ਚ.

ਕੋਲਾਹਲਂ ਪੁਰੇਭਤ੍ਤਂ, ਵਿਕਾਲੇ ਚ ਕੋਲਾਹਲਂ;

ਉਪੋਸਥਂ ਪਵਾਰਣਂ, ਸਵਚਨੀਯਾਨੁਵਾਦਨਂ.

ਓਕਾਸਂ ਚੋਦੇ ਸਾਰੇਨ੍ਤਿ, ਪਟਿਕ੍ਖਿਤ੍ਤਂ ਮਹੇਸਿਨਾ;

ਤਥੇਵ ਭਿਕ੍ਖੁ ਭਿਕ੍ਖੁਨੀ, ਅਨੁਞ੍ਞਾਤਂ ਮਹੇਸਿਨਾ.

ਯਾਨਂ ਗਿਲਾਨਯੁਤ੍ਤਞ੍ਚ, ਯਾਨੁਗ੍ਘਾਤਡ੍ਢਕਾਸਿਕਾ;

ਭਿਕ੍ਖੁ ਸਿਕ੍ਖਾ ਸਾਮਣੇਰ, ਸਾਮਣੇਰੀ ਚ ਬਾਲਾਯ.

ਅਰਞ੍ਞੇ ਉਪਾਸਕੇਨ, ਉਦ੍ਦੋਸਿਤੋ ਉਪਸ੍ਸਯਂ;

ਨ ਸਮ੍ਮਤਿ ਨਵਕਮ੍ਮਂ, ਨਿਸਿਨ੍ਨਗਬ੍ਭਏਕਿਕਾ.

ਸਾਗਾਰਞ੍ਚ ਗਰੁਧਮ੍ਮਂ, ਪਚ੍ਚਕ੍ਖਾਯ ਚ ਸਙ੍ਕਮਿ;

ਅਭਿਵਾਦਨਕੇਸਾ ਚ, ਨਖਾ ਚ ਵਣਕਮ੍ਮਨਾ.