੧੦. ਭਿਕ੍ਖੁਨਿਕ੍ਖਨ੍ਧਕਂ

੧. ਪਠਮਭਾਣਵਾਰੋ

ਮਹਾਪਜਾਪਤਿਗੋਤਮੀਵਤ੍ਥੁ

੪੦੨. [ਅ. ਨਿ. ੮.੫੧ ਇਦਂ ਵਤ੍ਥੁ ਆਗਤਂ] ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਅਥ ਖੋ ਮਹਾਪਜਾਪਤਿ [ਮਹਾਪਜਾਪਤੀ (ਸੀ. ਸ੍ਯਾ.)] ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਲਭੇਯ੍ਯ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ‘‘ਅਲਂ, ਗੋਤਮਿ, ਮਾ ਤੇ ਰੁਚ੍ਚਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਮਹਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਲਭੇਯ੍ਯ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ‘‘ਅਲਂ, ਗੋਤਮਿ, ਮਾ ਤੇ ਰੁਚ੍ਚਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾ’’ਤਿ. ਅਥ ਖੋ ਮਹਾਪਜਾਪਤਿ ਗੋਤਮੀ – ਨ ਭਗਵਾ ਅਨੁਜਾਨਾਤਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਨ੍ਤਿ – ਦੁਕ੍ਖੀ ਦੁਮ੍ਮਨਾ ਅਸ੍ਸੁਮੁਖੀ ਰੁਦਮਾਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਭਗਵਾ ਕਪਿਲਵਤ੍ਥੁਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਵੇਸਾਲੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਵੇਸਾਲੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਅਥ ਖੋ ਮਹਾਪਜਾਪਤਿ ਗੋਤਮੀ ਕੇਸੇ ਛੇਦਾਪੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਸਮ੍ਬਹੁਲਾਹਿ ਸਾਕਿਯਾਨੀਹਿ ਸਦ੍ਧਿਂ ਯੇਨ ਵੇਸਾਲੀ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਵੇਸਾਲੀ ਮਹਾਵਨਂ ਕੂਟਾਗਾਰਸਾਲਾ ਤੇਨੁਪਸਙ੍ਕਮਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਸੂਨੇਹਿ ਪਾਦੇਹਿ ਰਜੋਕਿਣ੍ਣੇਨ ਗਤ੍ਤੇਨ ਦੁਕ੍ਖੀ ਦੁਮ੍ਮਨਾ ਅਸ੍ਸੁਮੁਖੀ ਰੁਦਮਾਨਾ ਬਹਿਦ੍ਵਾਰਕੋਟ੍ਠਕੇ ਅਟ੍ਠਾਸਿ. ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ ਮਹਾਪਜਾਪਤਿਂ ਗੋਤਮਿਂ ਸੂਨੇਹਿ ਪਾਦੇਹਿ ਰਜੋਕਿਣ੍ਣੇਨ ਗਤ੍ਤੇਨ ਦੁਕ੍ਖਿਂ ਦੁਮ੍ਮਨਂ ਅਸ੍ਸੁਮੁਖਿਂ ਰੁਦਮਾਨਂ ਬਹਿਦ੍ਵਾਰਕੋਟ੍ਠਕੇ ਠਿਤਂ. ਦਿਸ੍ਵਾਨ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਗੋਤਮਿ, ਸੂਨੇਹਿ ਪਾਦੇਹਿ ਰਜੋਕਿਣ੍ਣੇਨ ਗਤ੍ਤੇਨ ਦੁਕ੍ਖੀ ਦੁਮ੍ਮਨਾ ਅਸ੍ਸੁਮੁਖੀ ਰੁਦਮਾਨਾ ਬਹਿਦ੍ਵਾਰਕੋਟ੍ਠਕੇ ਠਿਤਾ’’ਤਿ? ‘‘ਤਥਾ ਹਿ ਪਨ, ਭਨ੍ਤੇ ਆਨਨ੍ਦ, ਨ ਭਗਵਾ ਅਨੁਜਾਨਾਤਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਗੋਤਮਿ, ਮੁਹੁਤ੍ਤਂ ਇਧੇਵ ਤਾਵ ਹੋਹਿ, ਯਾਵਾਹਂ ਭਗਵਨ੍ਤਂ ਯਾਚਾਮਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਏਸਾ, ਭਨ੍ਤੇ, ਮਹਾਪਜਾਪਤਿ ਗੋਤਮੀ ਸੂਨੇਹਿ ਪਾਦੇਹਿ ਰਜੋਕਿਣ੍ਣੇਨ ਗਤ੍ਤੇਨ ਦੁਕ੍ਖੀ ਦੁਮ੍ਮਨਾ ਅਸ੍ਸੁਮੁਖੀ ਰੁਦਮਾਨਾ ਬਹਿਦ੍ਵਾਰਕੋਟ੍ਠਕੇ ਠਿਤਾ – ਨ ਭਗਵਾ ਅਨੁਜਾਨਾਤਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਨ੍ਤਿ. ਸਾਧੁ, ਭਨ੍ਤੇ, ਲਭੇਯ੍ਯ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ‘‘ਅਲਂ, ਆਨਨ੍ਦ, ਮਾ ਤੇ ਰੁਚ੍ਚਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਲਭੇਯ੍ਯ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ‘‘ਅਲਂ, ਆਨਨ੍ਦ, ਮਾ ਤੇ ਰੁਚ੍ਚਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾ’’ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ [ਅ. ਨਿ. ੮.੫੧ ‘‘ਅਥ ਖੋ ਆਯਸ੍ਮਤੋ ਆਨਨ੍ਦਸ੍ਸ ਏਤਦਹੋਸੀ’’ਤਿ ਆਗਤਂ] – ‘‘ਨ ਭਗਵਾ ਅਨੁਜਾਨਾਤਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਂ; ਯਂਨੂਨਾਹਂ ਅਞ੍ਞੇਨਪਿ ਪਰਿਯਾਯੇਨ ਭਗਵਨ੍ਤਂ ਯਾਚੇਯ੍ਯਂ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਭਬ੍ਬੋ ਨੁ ਖੋ, ਭਨ੍ਤੇ, ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤ੍ਵਾ ਸੋਤਾਪਤ੍ਤਿਫਲਂ ਵਾ ਸਕਦਾਗਾਮਿਫਲਂ [ਸਕਿਦਾਗਾਮਿਫਲਂ (ਸ੍ਯਾ.)] ਵਾ ਅਨਾਗਾਮਿਫਲਂ ਵਾ ਅਰਹਤ੍ਤਫਲਂ ਵਾ ਸਚ੍ਛਿਕਾਤੁ’’ਨ੍ਤਿ? ‘‘ਭਬ੍ਬੋ, ਆਨਨ੍ਦ, ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤ੍ਵਾ ਸੋਤਾਪਤ੍ਤਿਫਲਮ੍ਪਿ ਸਕਦਾਗਾਮਿਫਲਮ੍ਪਿ ਅਨਾਗਾਮਿਫਲਮ੍ਪਿ ਅਰਹਤ੍ਤਫਲਮ੍ਪਿ ਸਚ੍ਛਿਕਾਤੁ’’ਨ੍ਤਿ. ‘‘ਸਚੇ, ਭਨ੍ਤੇ, ਭਬ੍ਬੋ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤ੍ਵਾ ਸੋਤਾਪਤ੍ਤਿਫਲਮ੍ਪਿ ਸਕਦਾਗਾਮਿਫਲਮ੍ਪਿ ਅਨਾਗਾਮਿਫਲਮ੍ਪਿ ਅਰਹਤ੍ਤਫਲਮ੍ਪਿ ਸਚ੍ਛਿਕਾਤੁਂ; ਬਹੂਪਕਾਰਾ, ਭਨ੍ਤੇ, ਮਹਾਪਜਾਪਤਿ ਗੋਤਮੀ ਭਗਵਤੋ ਮਾਤੁਚ੍ਛਾ ਆਪਾਦਿਕਾ, ਪੋਸਿਕਾ, ਖੀਰਸ੍ਸ ਦਾਯਿਕਾ, ਭਗਵਨ੍ਤਂ ਜਨੇਤ੍ਤਿਯਾ ਕਾਲਙ੍ਕਤਾਯ ਥਞ੍ਞਂ ਪਾਯੇਸਿ; ਸਾਧੁ, ਭਨ੍ਤੇ, ਲਭੇਯ੍ਯ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜ’’ਨ੍ਤਿ.

ਅਟ੍ਠਗਰੁਧਮ੍ਮਾ

੪੦੩. ‘‘ਸਚੇ, ਆਨਨ੍ਦ, ਮਹਾਪਜਾਪਤੀ ਗੋਤਮੀ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਤਿ, ਸਾਵਸ੍ਸਾ. ਹੋਤੁ ਉਪਸਮ੍ਪਦਾ.

[ਪਾਚਿ. ੧੪੯] ‘‘ਵਸ੍ਸਸਤੂਪਸਮ੍ਪਨ੍ਨਾਯ ਭਿਕ੍ਖੁਨਿਯਾ ਤਦਹੁਪਸਮ੍ਪਨ੍ਨਸ੍ਸ ਭਿਕ੍ਖੁਨੋ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬਂ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ [ਗਰੁਂਕਤ੍ਵਾ (ਕ.)] ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਨ ਭਿਕ੍ਖੁਨਿਯਾ ਅਭਿਕ੍ਖੁਕੇ ਆਵਾਸੇ ਵਸ੍ਸਂ ਵਸਿਤਬ੍ਬਂ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਅਨ੍ਵਦ੍ਧਮਾਸਂ ਭਿਕ੍ਖੁਨਿਯਾ ਭਿਕ੍ਖੁਸਙ੍ਘਤੋ ਦ੍ਵੇ ਧਮ੍ਮਾ ਪਚ੍ਚਾਸੀਸਿਤਬ੍ਬਾ – ਉਪੋਸਥਪੁਚ੍ਛਕਞ੍ਚ, ਓਵਾਦੂਪਸਙ੍ਕਮਨਞ੍ਚ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਵਸ੍ਸਂਵੁਟ੍ਠਾਯ ਭਿਕ੍ਖੁਨਿਯਾ ਉਭਤੋਸਙ੍ਘੇ ਤੀਹਿ ਠਾਨੇਹਿ ਪਵਾਰੇਤਬ੍ਬਂ – ਦਿਟ੍ਠੇਨ ਵਾ, ਸੁਤੇਨ ਵਾ, ਪਰਿਸਙ੍ਕਾਯ ਵਾ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਗਰੁਧਮ੍ਮਂ ਅਜ੍ਝਾਪਨ੍ਨਾਯ ਭਿਕ੍ਖੁਨਿਯਾ ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬਂ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਸਿਕ੍ਖਿਤਸਿਕ੍ਖਾਯ ਸਿਕ੍ਖਮਾਨਾਯ ਉਭਤੋਸਙ੍ਘੇ ਉਪਸਮ੍ਪਦਾ ਪਰਿਯੇਸਿਤਬ੍ਬਾ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਨ ਭਿਕ੍ਖੁਨਿਯਾ ਕੇਨਚਿ ਪਰਿਯਾਯੇਨ ਭਿਕ੍ਖੁ ਅਕ੍ਕੋਸਿਤਬ੍ਬੋ ਪਰਿਭਾਸਿਤਬ੍ਬੋ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਅਜ੍ਜਤਗ੍ਗੇ ਓਵਟੋ ਭਿਕ੍ਖੁਨੀਨਂ ਭਿਕ੍ਖੂਸੁ ਵਚਨਪਥੋ, ਅਨੋਵਟੋ ਭਿਕ੍ਖੂਨਂ ਭਿਕ੍ਖੁਨੀਸੁ ਵਚਨਪਥੋ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਸਚੇ, ਆਨਨ੍ਦ, ਮਹਾਪਜਾਪਤਿ ਗੋਤਮੀ ਇਮੇ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਤਿ, ਸਾਵਸ੍ਸਾ ਹੋਤੁ ਉਪਸਮ੍ਪਦਾ’’ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਸਨ੍ਤਿਕੇ ਅਟ੍ਠ ਗਰੁਧਮ੍ਮੇ ਉਗ੍ਗਹੇਤ੍ਵਾ ਯੇਨ ਮਹਾਪਜਾਪਤਿ ਗੋਤਮੀ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚ – ‘‘ਸਚੇ ਖੋ ਤ੍ਵਂ, ਗੋਤਮਿ, ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹੇਯ੍ਯਾਸਿ, ਸਾਵ ਤੇ ਭਵਿਸ੍ਸਤਿ ਉਪਸਮ੍ਪਦਾ.

‘‘ਵਸ੍ਸਸਤੂਪਸਮ੍ਪਨ੍ਨਾਯ ਭਿਕ੍ਖੁਨਿਯਾ ਤਦਹੁਪਸਮ੍ਪਨ੍ਨਸ੍ਸ ਭਿਕ੍ਖੁਨੋ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬਂ. ਅਯਮ੍ਪਿ ਧਮ੍ਮੋ ਸਕ੍ਕਤ੍ਵਾ ਗਰੁਕਤ੍ਵਾ ਮਾਨੇਤ੍ਵਾ ਪੂਜੇਤ੍ਵਾ ਯਾਵਜੀਵਂ ਅਨਤਿਕ੍ਕਮਨੀਯੋ.

‘‘ਸਚੇ ਖੋ ਤ੍ਵਂ, ਗੋਤਮਿ, ਇਮੇ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹੇਯ੍ਯਾਸਿ, ਸਾਵ ਤੇ ਭਵਿਸ੍ਸਤਿ ਉਪਸਮ੍ਪਦਾ’’ਤਿ.

‘‘ਸੇਯ੍ਯਥਾਪਿ, ਭਨ੍ਤੇ ਆਨਨ੍ਦ, ਇਤ੍ਥੀ ਵਾ ਪੁਰਿਸੋ ਵਾ ਦਹਰੋ, ਯੁਵਾ, ਮਣ੍ਡਨਕਜਾਤਿਕੋ ਸੀਸਂਨਹਾਤੋ ਉਪ੍ਪਲਮਾਲਂ ਵਾ ਵਸ੍ਸਿਕਮਾਲਂ ਵਾ ਅਤਿਮੁਤ੍ਤਕਮਾਲਂ [ਅਧਿਮਤ੍ਤਕਮਾਲਂ (ਸ੍ਯਾ.)] ਵਾ ਲਭਿਤ੍ਵਾ ਉਭੋਹਿ ਹਤ੍ਥੇਹਿ ਪਟਿਗ੍ਗਹੇਤ੍ਵਾ ਉਤ੍ਤਮਙ੍ਗੇ ਸਿਰਸ੍ਮਿਂ ਪਤਿਟ੍ਠਾਪੇਯ੍ਯ; ਏਵਮੇਵ ਖੋ ਅਹਂ, ਭਨ੍ਤੇ, ਆਨਨ੍ਦ ਇਮੇ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਮਿ ਯਾਵਜੀਵਂ ਅਨਤਿਕ੍ਕਮਨੀਯੇ’’ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਹਿਤਾ, ਭਨ੍ਤੇ, ਮਹਾਪਜਾਪਤਿਯਾ ਗੋਤਮਿਯਾ ਅਟ੍ਠ ਗਰੁਧਮ੍ਮਾ, ਉਪਸਮ੍ਪਨ੍ਨਾ ਭਗਵਤੋ ਮਾਤੁਚ੍ਛਾ’’ਤਿ.

‘‘ਸਚੇ, ਆਨਨ੍ਦ, ਨਾਲਭਿਸ੍ਸ ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਂ, ਚਿਰਟ੍ਠਿਤਿਕਂ, ਆਨਨ੍ਦ, ਬ੍ਰਹ੍ਮਚਰਿਯਂ ਅਭਵਿਸ੍ਸ, ਵਸ੍ਸਸਹਸ੍ਸਂ ਸਦ੍ਧਮ੍ਮੋ ਤਿਟ੍ਠੇਯ੍ਯ. ਯਤੋ ਚ ਖੋ, ਆਨਨ੍ਦ, ਮਾਤੁਗਾਮੋ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ, ਨ ਦਾਨਿ, ਆਨਨ੍ਦ, ਬ੍ਰਹ੍ਮਚਰਿਯਂ ਚਿਰਟ੍ਠਿਤਿਕਂ ਭਵਿਸ੍ਸਤਿ. ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤਿ.

‘‘ਸੇਯ੍ਯਥਾਪਿ, ਆਨਨ੍ਦ, ਯਾਨਿ ਕਾਨਿਚਿ ਕੁਲਾਨਿ ਬਹੁਤ੍ਥਿਕਾਨਿ [ਬਹੁਇਤ੍ਥਿਕਾਨਿ (ਸੀ. ਸ੍ਯਾ.)] ਅਪ੍ਪਪੁਰਿਸਕਾਨਿ, ਤਾਨਿ ਸੁਪ੍ਪਧਂਸਿਯਾਨਿ ਹੋਨ੍ਤਿ ਚੋਰੇਹਿ ਕੁਮ੍ਭਥੇਨਕੇਹਿ; ਏਵਮੇਵ ਖੋ, ਆਨਨ੍ਦ, ਯਸ੍ਮਿਂ ਧਮ੍ਮਵਿਨਯੇ ਲਭਤਿ ਮਾਤੁਗਾਮੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਂ, ਨ ਤਂ ਬ੍ਰਹ੍ਮਚਰਿਯਂ ਚਿਰਟ੍ਠਿਤਿਕਂ ਹੋਤਿ.

‘‘ਸੇਯ੍ਯਥਾਪਿ, ਆਨਨ੍ਦ, ਸਮ੍ਪਨ੍ਨੇ ਸਾਲਿਕ੍ਖੇਤ੍ਤੇ ਸੇਤਟ੍ਟਿਕਾ ਨਾਮ ਰੋਗਜਾਤਿ ਨਿਪਤਤਿ, ਏਵਂ ਤਂ ਸਾਲਿਕ੍ਖੇਤ੍ਤਂ ਨ ਚਿਰਟ੍ਠਿਤਿਕਂ ਹੋਤਿ; ਏਵਮੇਵ ਖੋ, ਆਨਨ੍ਦ, ਯਸ੍ਮਿਂ ਧਮ੍ਮਵਿਨਯੇ ਲਭਤਿ ਮਾਤੁਗਾਮੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਂ, ਨ ਤਂ ਬ੍ਰਹ੍ਮਚਰਿਯਂ ਚਿਰਟ੍ਠਿਤਿਕਂ ਹੋਤਿ.

‘‘ਸੇਯ੍ਯਥਾਪਿ, ਆਨਨ੍ਦ, ਸਮ੍ਪਨ੍ਨੇ ਉਚ੍ਛੁਕ੍ਖੇਤ੍ਤੇ ਮਞ੍ਜਿਟ੍ਠਿਕਾ [ਮਞ੍ਜੇਟ੍ਠਿਕਾ (ਸੀ. ਸ੍ਯਾ.)] ਨਾਮ ਰੋਗਜਾਤਿ ਨਿਪਤਤਿ, ਏਵਂ ਤਂ ਉਚ੍ਛੁਕ੍ਖੇਤ੍ਤਂ ਨ ਚਿਰਟ੍ਠਿਤਿਕਂ ਹੋਤਿ; ਏਵਮੇਵ ਖੋ, ਆਨਨ੍ਦ, ਯਸ੍ਮਿਂ ਧਮ੍ਮਵਿਨਯੇ ਲਭਤਿ ਮਾਤੁਗਾਮੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਂ, ਨ ਤਂ ਬ੍ਰਹ੍ਮਚਰਿਯਂ ਚਿਰਟ੍ਠਿਤਿਕਂ ਹੋਤਿ.

‘‘ਸੇਯ੍ਯਥਾਪਿ, ਆਨਨ੍ਦ, ਪੁਰਿਸੋ ਮਹਤੋ ਤਲ਼ਾਕਸ੍ਸ ਪਟਿਕਚ੍ਚੇਵ ਆਲ਼ਿਂ ਬਨ੍ਧੇਯ੍ਯ ਯਾਵਦੇਵ ਉਦਕਸ੍ਸ ਅਨਤਿਕ੍ਕਮਨਾਯ; ਏਵਮੇਵ ਖੋ, ਆਨਨ੍ਦ, ਮਯਾ ਪਟਿਕਚ੍ਚੇਵ ਭਿਕ੍ਖੁਨੀਨਂ ਅਟ੍ਠ ਗਰੁਧਮ੍ਮਾ ਪਞ੍ਞਤ੍ਤਾ ਯਾਵਜੀਵਂ ਅਨਤਿਕ੍ਕਮਨੀਯਾ’’ਤਿ.

ਭਿਕ੍ਖੁਨੀਨਂ ਅਟ੍ਠ ਗਰੁਧਮ੍ਮਾ ਨਿਟ੍ਠਿਤਾ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਂ

੪੦੪. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤੀ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਕਥਾਹਂ, ਭਨ੍ਤੇ, ਇਮਾਸੁ ਸਾਕਿਯਾਨੀਸੁ ਪਟਿਪਜ੍ਜਾਮੀ’’ਤਿ? ਅਥ ਖੋ ਭਗਵਾ ਮਹਾਪਜਾਪਤਿਂ ਗੋਤਮਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨਿਯੋ ਉਪਸਮ੍ਪਾਦੇਤੁ’’ਨ੍ਤਿ.

ਅਥ ਖੋ ਤਾ ਭਿਕ੍ਖੁਨਿਯੋ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚੁਂ – ‘‘ਅਯ੍ਯਾ ਅਨੁਪਸਮ੍ਪਨ੍ਨਾ, ਮਯਞ੍ਚਮ੍ਹਾ ਉਪਸਮ੍ਪਨ੍ਨਾ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ ਭਿਕ੍ਖੂਹਿ ਭਿਕ੍ਖੁਨਿਯੋ ਉਪਸਮ੍ਪਾਦੇਤਬ੍ਬਾ’’ਤਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਇਮਾ ਮਂ, ਭਨ੍ਤੇ ਆਨਨ੍ਦ, ਭਿਕ੍ਖੁਨਿਯੋ ਏਵਮਾਹਂਸੁ – ‘ਅਯ੍ਯਾ ਅਨੁਪਸਮ੍ਪਨ੍ਨਾ, ਮਯਞ੍ਚਮ੍ਹਾ ਉਪਸਮ੍ਪਨ੍ਨਾ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ ਭਿਕ੍ਖੂਹਿ ਭਿਕ੍ਖੁਨਿਯੋ ਉਪਸਮ੍ਪਾਦੇਤਬ੍ਬਾ’’’ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਮਹਾਪਜਾਪਤਿ, ਭਨ੍ਤੇ, ਗੋਤਮੀ ਏਵਮਾਹ – ‘ਇਮਾ ਮਂ, ਭਨ੍ਤੇ ਆਨਨ੍ਦ, ਭਿਕ੍ਖੁਨਿਯੋ ਏਵਮਾਹਂਸੁ – ਅਯ੍ਯਾ ਅਨੁਪਸਮ੍ਪਨ੍ਨਾ, ਮਯਞ੍ਚਮ੍ਹਾ ਉਪਸਮ੍ਪਨ੍ਨਾ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ ਭਿਕ੍ਖੂਹਿ ਭਿਕ੍ਖੁਨਿਯੋ ਉਪਸਮ੍ਪਾਦੇਤਬ੍ਬਾ’’’ਤਿ.

‘‘ਯਦਗ੍ਗੇਨ, ਆਨਨ੍ਦ, ਮਹਾਪਜਾਪਤਿਯਾ ਗੋਤਮਿਯਾ ਅਟ੍ਠ ਗਰੁਧਮ੍ਮਾ ਪਟਿਗ੍ਗਹਿਤਾ, ਤਦੇਵ ਸਾ [ਤਦੇਵਸ੍ਸਾ (ਕ.)] ਉਪਸਮ੍ਪਨ੍ਨਾ’’ਤਿ.

੪੦੫. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਏਕਾਹਂ, ਭਨ੍ਤੇ ਆਨਨ੍ਦ, ਭਗਵਨ੍ਤਂ ਵਰਂ ਯਾਚਾਮਿ. ਸਾਧੁ, ਭਨ੍ਤੇ, ਭਗਵਾ ਅਨੁਜਾਨੇਯ੍ਯ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮ’’ਨ੍ਤਿ.

ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਮਹਾਪਜਾਪਤਿ, ਭਨ੍ਤੇ, ਗੋਤਮੀ ਏਵਮਾਹ – ‘ਏਕਾਹਂ, ਭਨ੍ਤੇ ਆਨਨ੍ਦ, ਭਗਵਨ੍ਤਂ ਵਰਂ ਯਾਚਾਮਿ. ਸਾਧੁ, ਭਨ੍ਤੇ, ਭਗਵਾ ਅਨੁਜਾਨੇਯ੍ਯ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮ’’’ਨ੍ਤਿ.

‘‘ਅਟ੍ਠਾਨਮੇਤਂ, ਆਨਨ੍ਦ, ਅਨਵਕਾਸੋ, ਯਂ ਤਥਾਗਤੋ ਅਨੁਜਾਨੇਯ੍ਯ ਮਾਤੁਗਾਮਸ੍ਸ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ. ਇਮੇਹਿ ਨਾਮ, ਆਨਨ੍ਦ, ਅਞ੍ਞਤਿਤ੍ਥਿਯਾ ਦੁਰਕ੍ਖਾਤਧਮ੍ਮਾ ਮਾਤੁਗਾਮਸ੍ਸ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਨ ਕਰਿਸ੍ਸਨ੍ਤਿ; ਕਿਮਙ੍ਗਂ ਪਨ ਤਥਾਗਤੋ ਅਨੁਜਾਨਿਸ੍ਸਤਿ ਮਾਤੁਗਾਮਸ੍ਸ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮ’’ਨ੍ਤਿ?

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਮਾਤੁਗਾਮਸ੍ਸ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬਂ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਯਾਨਿ ਤਾਨਿ, ਭਨ੍ਤੇ, ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ ਭਿਕ੍ਖੂਹਿ ਸਾਧਾਰਣਾਨਿ, ਕਥਂ ਮਯਂ, ਭਨ੍ਤੇ, ਤੇਸੁ ਸਿਕ੍ਖਾਪਦੇਸੁ ਪਟਿਪਜ੍ਜਾਮਾ’’ਤਿ? ‘‘ਯਾਨਿ ਤਾਨਿ, ਗੋਤਮਿ, ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ ਭਿਕ੍ਖੂਹਿ ਸਾਧਾਰਣਾਨਿ, ਯਥਾ ਭਿਕ੍ਖੂ ਸਿਕ੍ਖਨ੍ਤਿ ਤਥਾ ਤੇਸੁ ਸਿਕ੍ਖਾਪਦੇਸੁ ਸਿਕ੍ਖਥਾ’’ਤਿ. ‘‘ਯਾਨਿ ਪਨ ਤਾਨਿ, ਭਨ੍ਤੇ, ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ ਭਿਕ੍ਖੂਹਿ ਅਸਾਧਾਰਣਾਨਿ, ਕਥਂ ਮਯਂ, ਭਨ੍ਤੇ, ਤੇਸੁ ਸਿਕ੍ਖਾਪਦੇਸੁ ਪਟਿਪਜ੍ਜਾਮਾ’’ਤਿ? ‘‘ਯਾਨਿ ਤਾਨਿ, ਗੋਤਮਿ, ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ ਭਿਕ੍ਖੂਹਿ ਅਸਾਧਾਰਣਾਨਿ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਿਕ੍ਖਥਾ’’ਤਿ.

੪੦੬. [ਅ. ਨਿ. ੮.੫੩] ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਸਾਧੁ ਮੇ, ਭਨ੍ਤੇ, ਭਗਵਾ ਸਂਖਿਤ੍ਤੇਨ ਧਮ੍ਮਂ ਦੇਸੇਤੁ, ਯਮਹਂ ਭਗਵਤੋ ਧਮ੍ਮਂ ਸੁਤ੍ਵਾ ਏਕਾ ਵੂਪਕਟ੍ਠਾ ਅਪ੍ਪਮਤ੍ਤਾ ਆਤਾਪਿਨੀ ਪਹਿਤਤ੍ਤਾ ਵਿਹਰੇਯ੍ਯ’’ਨ੍ਤਿ. ‘‘ਯੇ ਖੋ ਤ੍ਵਂ, ਗੋਤਮਿ, ਧਮ੍ਮੇ ਜਾਨੇਯ੍ਯਾਸਿ – ਇਮੇ ਧਮ੍ਮਾ ਸਰਾਗਾਯ ਸਂਵਤ੍ਤਨ੍ਤਿ ਨੋ ਵਿਰਾਗਾਯ, ਸਞ੍ਞੋਗਾਯ ਸਂਵਤ੍ਤਨ੍ਤਿ ਨੋ ਵਿਸਞ੍ਞੋਗਾਯ, ਆਚਯਾਯ ਸਂਵਤ੍ਤਨ੍ਤਿ ਨੋ ਅਪਚਯਾਯ, ਮਹਿਚ੍ਛਤਾਯ ਸਂਵਤ੍ਤਨ੍ਤਿ ਨੋ ਅਪ੍ਪਿਚ੍ਛਤਾਯ, ਅਸਨ੍ਤੁਟ੍ਠਿਯਾ ਸਂਵਤ੍ਤਨ੍ਤਿ ਨੋ ਸਨ੍ਤੁਟ੍ਠਿਯਾ, ਸਙ੍ਗਣਿਕਾਯ ਸਂਵਤ੍ਤਨ੍ਤਿ ਨੋ ਪਵਿਵੇਕਾਯ, ਕੋਸਜ੍ਜਾਯ ਸਂਵਤ੍ਤਨ੍ਤਿ ਨੋ ਵੀਰਿਯਾਰਮ੍ਭਾਯ, ਦੁਬ੍ਭਰਤਾਯ ਸਂਵਤ੍ਤਨ੍ਤਿ ਨੋ ਸੁਭਰਤਾਯ; ਏਕਂਸੇਨ, ਗੋਤਮਿ, ਧਾਰੇਯ੍ਯਾਸਿ – ਨੇਸੋ ਧਮ੍ਮੋ, ਨੇਸੋ ਵਿਨਯੋ, ਨੇਤਂ ਸਤ੍ਥੁਸਾਸਨਨ੍ਤਿ. ਯੇ ਚ ਖੋ ਤ੍ਵਂ, ਗੋਤਮਿ, ਧਮ੍ਮੇ ਜਾਨੇਯ੍ਯਾਸਿ – ਇਮੇ ਧਮ੍ਮਾ ਵਿਰਾਗਾਯ ਸਂਵਤ੍ਤਨ੍ਤਿ ਨੋ ਸਰਾਗਾਯ, ਵਿਸਞ੍ਞੋਗਾਯ ਸਂਵਤ੍ਤਨ੍ਤਿ ਨੋ ਸਞ੍ਞੋਗਾਯ, ਅਪਚਯਾਯ ਸਂਵਤ੍ਤਨ੍ਤਿ ਨੋ ਆਚਯਾਯ, ਅਪ੍ਪਿਚ੍ਛਤਾਯ ਸਂਵਤ੍ਤਨ੍ਤਿ ਨੋ ਮਹਿਚ੍ਛਤਾਯ, ਸਨ੍ਤੁਟ੍ਠਿਯਾ ਸਂਵਤ੍ਤਨ੍ਤਿ ਨੋ ਅਸਨ੍ਤੁਟ੍ਠਿਯਾ, ਪਵਿਵੇਕਾਯ ਸਂਵਤ੍ਤਨ੍ਤਿ ਨੋ ਸਙ੍ਗਣਿਕਾਯ, ਵੀਰਿਯਾਰਮ੍ਭਾਯ ਸਂਵਤ੍ਤਨ੍ਤਿ ਨੋ ਕੋਸਜ੍ਜਾਯ, ਸੁਭਰਤਾਯ ਸਂਵਤ੍ਤਨ੍ਤਿ ਨੋ ਦੁਬ੍ਭਰਤਾਯ; ਏਕਂਸੇਨ, ਗੋਤਮਿ, ਧਾਰੇਯ੍ਯਾਸਿ – ਏਸੋ ਧਮ੍ਮੋ, ਏਸੋ ਵਿਨਯੋ, ਏਤਂ ਸਤ੍ਥੁਸਾਸਨ’’ਨ੍ਤਿ.

੪੦੭. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਨ ਉਦ੍ਦਿਸੀਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍ਵਾ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਇਦਾਨਿ ਇਮੇ ਇਮਾਹਿ ਸਦ੍ਧਿਂ ਅਭਿਰਮਿਸ੍ਸਨ੍ਤੀ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ. ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਹਿ ਭਿਕ੍ਖੁਨੀਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ. ਭਿਕ੍ਖੁਨਿਯੋ ਨ ਜਾਨਨ੍ਤਿ – ‘‘ਏਵਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਚਿਕ੍ਖਿਤੁਂ – ‘ਏਵਂ ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਥਾ’’’ਤਿ.

੪੦੮. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਆਪਤ੍ਤਿਂ ਨ ਪਟਿਕਰੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਆਪਤ੍ਤਿ ਨ ਪਟਿਕਾਤਬ੍ਬਾ. ਯਾ ਨ ਪਟਿਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ਭਿਕ੍ਖੁਨਿਯੋ ਨ ਜਾਨਨ੍ਤਿ – ‘‘ਏਵਂ ਆਪਤ੍ਤਿ ਪਟਿਕਾਤਬ੍ਬਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਚਿਕ੍ਖਿਤੁਂ – ‘ਏਵਂ ਆਪਤ੍ਤਿਂ ਪਟਿਕਰੇਯ੍ਯਾਥਾ’’’ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਭਿਕ੍ਖੁਨੀਨਂ ਆਪਤ੍ਤਿ ਪਟਿਗ੍ਗਹੇਤਬ੍ਬਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਪਤ੍ਤਿਂ ਪਟਿਗ੍ਗਹੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਰਥਿਕਾਯਪਿ ਬ੍ਯੂਹੇਪਿ ਸਿਙ੍ਘਾਟਕੇਪਿ ਭਿਕ੍ਖੁਂ ਪਸ੍ਸਿਤ੍ਵਾ ਪਤ੍ਤਂ ਭੂਮਿਯਂ ਨਿਕ੍ਖਿਪਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਆਪਤ੍ਤਿਂ ਪਟਿਕਰੋਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਰਤ੍ਤਿਂ ਵਿਮਾਨੇਤ੍ਵਾ ਇਦਾਨਿ ਖਮਾਪੇਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਯੋ ਪਟਿਗ੍ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਹਿ ਭਿਕ੍ਖੁਨੀਨਂ ਆਪਤ੍ਤਿਂ ਪਟਿਗ੍ਗਹੇਤੁ’’ਨ੍ਤਿ. ਭਿਕ੍ਖੁਨਿਯੋ ਨ ਜਾਨਨ੍ਤਿ – ‘‘ਏਵਂ ਆਪਤ੍ਤਿ ਪਟਿਗ੍ਗਹੇਤਬ੍ਬਾ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਚਿਕ੍ਖਿਤੁਂ – ‘ਏਵਂ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯਾਥਾ’’’ਤਿ.

੪੦੯. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਕਮ੍ਮਂ ਨ ਕਰਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਨਂ ਕਮ੍ਮਂ ਕਾਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਭਿਕ੍ਖੁਨੀਨਂ ਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਕਮ੍ਮਂ ਕਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਕਤਕਮ੍ਮਾ ਭਿਕ੍ਖੁਨਿਯੋ ਰਥਿਕਾਯਪਿ ਬ੍ਯੂਹੇਪਿ ਸਿਙ੍ਘਾਟਕੇਪਿ ਭਿਕ੍ਖੁਂ ਪਸ੍ਸਿਤ੍ਵਾ ਪਤ੍ਤਂ ਭੂਮਿਯਂ ਨਿਕ੍ਖਿਪਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਖਮਾਪੇਨ੍ਤਿ ‘ਏਵਂ ਨੂਨ ਕਾਤਬ੍ਬ’ਨ੍ਤਿ ਮਞ੍ਞਮਾਨਾ. ਮਨੁਸ੍ਸਾ ਤਥੇਵ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਰਤ੍ਤਿਂ ਵਿਮਾਨੇਤ੍ਵਾ ਇਦਾਨਿ ਖਮਾਪੇਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਕਮ੍ਮਂ ਕਾਤਬ੍ਬਂ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਹਿ ਭਿਕ੍ਖੁਨੀਨਂ ਕਮ੍ਮਂ ਕਾਤੁ’’ਨ੍ਤਿ. ਭਿਕ੍ਖੁਨਿਯੋ ਨ ਜਾਨਨ੍ਤਿ – ‘‘ਏਵਂ ਕਮ੍ਮਂ ਕਾਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਚਿਕ੍ਖਿਤੁਂ – ‘ਏਵਂ ਕਮ੍ਮਂ ਕਰੇਯ੍ਯਾਥਾ’’’ਤਿ.

੪੧੦. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ. ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਅਧਿਕਰਣਂ ਵੂਪਸਮੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੀਨਂ ਅਧਿਕਰਣਂ ਵੂਪਸਮੇਨ੍ਤਿ. ਤਸ੍ਮਿਂ ਖੋ ਪਨ ਅਧਿਕਰਣੇ ਵਿਨਿਚ੍ਛਿਯਮਾਨੇ ਦਿਸ੍ਸਨ੍ਤਿ ਭਿਕ੍ਖੁਨਿਯੋ ਕਮ੍ਮਪ੍ਪਤ੍ਤਾਯੋਪਿ ਆਪਤ੍ਤਿਗਾਮਿਨਿਯੋਪਿ. ਭਿਕ੍ਖੁਨਿਯੋ ਏਵਮਾਹਂਸੁ – ‘‘ਸਾਧੁ, ਭਨ੍ਤੇ, ਅਯ੍ਯਾਵ ਭਿਕ੍ਖੁਨੀਨਂ ਕਮ੍ਮਂ ਕਰੋਨ੍ਤੁ, ਅਯ੍ਯਾਵ ਭਿਕ੍ਖੁਨੀਨਂ ਆਪਤ੍ਤਿਂ ਪਟਿਗ੍ਗਣ੍ਹਨ੍ਤੁ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ ਭਿਕ੍ਖੂਹਿ ਭਿਕ੍ਖੁਨੀਨਂ ਅਧਿਕਰਣਂ ਵੂਪਸਮੇਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਕਮ੍ਮਂ ਆਰੋਪੇਤ੍ਵਾ ਭਿਕ੍ਖੁਨੀਨਂ ਨਿਯ੍ਯਾਦੇਤੁਂ – ਭਿਕ੍ਖੁਨੀਹਿ ਭਿਕ੍ਖੁਨੀਨਂ ਕਮ੍ਮਂ ਕਾਤੁਂ, ਭਿਕ੍ਖੂਹਿ ਭਿਕ੍ਖੁਨੀਨਂ ਆਪਤ੍ਤਿਂ ਆਰੋਪੇਤ੍ਵਾ ਭਿਕ੍ਖੁਨੀਨਂ ਨਿਯ੍ਯਾਦੇਤੁਂ, ਭਿਕ੍ਖੁਨੀਹਿ ਭਿਕ੍ਖੁਨੀਨਂ ਆਪਤ੍ਤਿਂ ਪਟਿਗ੍ਗਹੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਉਪ੍ਪਲਵਣ੍ਣਾਯ ਭਿਕ੍ਖੁਨਿਯਾ ਅਨ੍ਤੇਵਾਸਿਨੀ ਭਿਕ੍ਖੁਨੀ ਸਤ੍ਤ ਵਸ੍ਸਾਨਿ ਭਗਵਨ੍ਤਂ ਅਨੁਬਨ੍ਧਾ ਹੋਤਿ ਵਿਨਯਂ ਪਰਿਯਾਪੁਣਨ੍ਤੀ. ਤਸ੍ਸਾ ਮੁਟ੍ਠਸ੍ਸਤਿਨਿਯਾ ਗਹਿਤੋ ਗਹਿਤੋ ਮੁਸ੍ਸਤਿ. ਅਸ੍ਸੋਸਿ ਖੋ ਸਾ ਭਿਕ੍ਖੁਨੀ – ‘‘ਭਗਵਾ ਕਿਰ ਸਾਵਤ੍ਥਿਂ ਗਨ੍ਤੁਕਾਮੋ’’ਤਿ. ਅਥ ਖੋ ਤਸ੍ਸਾ ਭਿਕ੍ਖੁਨਿਯਾ ਏਤਦਹੋਸਿ – ‘‘ਅਹਂ ਖੋ ਸਤ੍ਤ ਵਸ੍ਸਾਨਿ ਭਗਵਨ੍ਤਂ ਅਨੁਬਨ੍ਧਿਂ ਵਿਨਯਂ ਪਰਿਯਾਪੁਣਨ੍ਤੀ. ਤਸ੍ਸਾ ਮੇ ਮੁਟ੍ਠਸ੍ਸਤਿਨਿਯਾ ਗਹਿਤੋ ਗਹਿਤੋ ਮੁਸ੍ਸਤਿ. ਦੁਕ੍ਕਰਂ ਖੋ ਪਨ ਮਾਤੁਗਾਮੇਨ ਯਾਵਜੀਵਂ ਸਤ੍ਥਾਰਂ ਅਨੁਬਨ੍ਧਿਤੁਂ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਹਿ ਭਿਕ੍ਖੁਨੀਨਂ ਵਿਨਯਂ ਵਾਚੇਤੁ’’ਨ੍ਤਿ.

ਪਠਮਭਾਣਵਾਰੋ ਨਿਟ੍ਠਿਤੋ.

੨. ਦੁਤਿਯਭਾਣਵਾਰੋ

੪੧੧. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ – ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਾ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਿਤਬ੍ਬਾ. ਯੋ ਓਸਿਞ੍ਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਵਨ੍ਦਿਯੋ ਸੋ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕਾਯਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ …ਪੇ… ਊਰੁਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਭਿਕ੍ਖੁਨਿਯੋ ਓਭਾਸੇਨ੍ਤਿ, ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ – ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਾ ਕਾਯੋ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬੋ, ਨ ਊਰੁ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬੋ, ਨ ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬਂ, ਨ ਭਿਕ੍ਖੁਨਿਯੋ ਓਭਾਸਿਤਬ੍ਬਾ, ਨ ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਤਬ੍ਬਂ. ਯੋ ਸਮ੍ਪਯੋਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਵਨ੍ਦਿਯੋ ਸੋ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ – ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁ ਕਦ੍ਦਮੋਦਕੇਨ ਓਸਿਞ੍ਚਿਤਬ੍ਬੋ. ਯਾ ਓਸਿਞ੍ਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸਾ ਭਿਕ੍ਖੁਨਿਯਾ ਦਣ੍ਡਕਮ੍ਮਂ ਕਾਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ ਭਿਕ੍ਖਵੇ, ਆਵਰਣਂ ਕਾਤੁ’’ਨ੍ਤਿ. ਆਵਰਣੇ ਕਤੇ ਨ ਆਦਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਓਵਾਦਂ ਠਪੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਕਾਯਂ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਥਨਂ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਊਰੁਂ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਭਿਕ੍ਖੂ ਓਭਾਸੇਨ੍ਤਿ, ਭਿਕ੍ਖੂਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ – ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਕਾਯੋ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਤਬ੍ਬੋ…ਪੇ… ਨ ਥਨੋ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਤਬ੍ਬੋ, ਨ ਊਰੁ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਤਬ੍ਬੋ, ਨ ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੂਨਂ ਦਸ੍ਸੇਤਬ੍ਬਂ, ਨ ਭਿਕ੍ਖੂ ਓਭਾਸਿਤਬ੍ਬਾ, ਨ ਭਿਕ੍ਖੂਹਿ ਸਦ੍ਧਿਂ ਸਮ੍ਪਯੋਜੇਤਬ੍ਬਂ. ਯਾ ਸਮ੍ਪਯੋਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸਾ ਭਿਕ੍ਖੁਨਿਯਾ ਦਣ੍ਡਕਮ੍ਮਂ ਕਾਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਵਰਣਂ ਕਾਤੁ’’ਨ੍ਤਿ. ਆਵਰਣੇ ਕਤੇ ਨ ਆਦਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਓਵਾਦਂ ਠਪੇਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਪ੍ਪਤਿ ਨੁ ਖੋ ਓਵਾਦਟ੍ਠਪਿਤਾਯ [ਓਵਾਦਣ੍ਠਪਿਤਾਯ (ਸ੍ਯਾ.), ਓਵਾਦਂਠਪਿਤਾਯ (ਕ.)] ਭਿਕ੍ਖੁਨਿਯਾ ਸਦ੍ਧਿਂ ਉਪੋਸਥਂ ਕਾਤੁਂ, ਨ ਨੁ ਖੋ ਕਪ੍ਪਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦਟ੍ਠਪਿਤਾਯ ਭਿਕ੍ਖੁਨਿਯਾ ਸਦ੍ਧਿਂ ਉਪੋਸਥੋ ਕਾਤਬ੍ਬੋ, ਯਾਵ ਨ ਤਂ ਅਧਿਕਰਣਂ ਵੂਪਸਨ੍ਤਂ ਹੋਤੀ’’ਤਿ.

੪੧੨. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਓਵਾਦਂ ਠਪੇਤ੍ਵਾ ਚਾਰਿਕਂ ਪਕ੍ਕਾਮਿ. ਭਿਕ੍ਖੁਨਿਯੋ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਦਾਯੀ ਓਵਾਦਂ ਠਪੇਤ੍ਵਾ ਚਾਰਿਕਂ ਪਕ੍ਕਮਿਸ੍ਸਤੀ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦਂ ਠਪੇਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ. ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ [ਤੇਨ ਖੋ ਪਨ ਸਮਯੇਨ ਭਿਕ੍ਖੂ (ਸ੍ਯਾ. ਕਂ.)] ਬਾਲਾ ਅਬ੍ਯਤ੍ਤਾ ਓਵਾਦਂ ਠਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਓਵਾਦੋ ਠਪੇਤਬ੍ਬੋ. ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਵਤ੍ਥੁਸ੍ਮਿਂ ਅਕਾਰਣੇ ਓਵਾਦਂ ਠਪੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਵਤ੍ਥੁਸ੍ਮਿਂ ਅਕਾਰਣੇ ਓਵਾਦੋ ਠਪੇਤਬ੍ਬੋ. ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓਵਾਦਂ ਠਪੇਤ੍ਵਾ ਵਿਨਿਚ੍ਛਯਂ ਨ ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦਂ ਠਪੇਤ੍ਵਾ ਵਿਨਿਚ੍ਛਯੋ ਨ ਦਾਤਬ੍ਬੋ. ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੧੩. [ਪਾਚਿ. ੧੦੫੪] ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਓਵਾਦਂ ਨ ਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਓਵਾਦੋ ਨ ਗਨ੍ਤਬ੍ਬੋ. ਯਾ ਨ ਗਚ੍ਛੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਸਬ੍ਬੋ ਭਿਕ੍ਖੁਨਿਸਙ੍ਘੋ ਓਵਾਦਂ ਗਚ੍ਛਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਇਦਾਨਿ ਇਮੇ ਇਮਾਹਿ ਸਦ੍ਧਿਂ ਅਭਿਰਮਿਸ੍ਸਨ੍ਤੀ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਸਬ੍ਬੇਨ ਭਿਕ੍ਖੁਨਿਸਙ੍ਘੇਨ ਓਵਾਦੋ ਗਨ੍ਤਬ੍ਬੋ. ਗਚ੍ਛੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਚਤੂਹਿ ਪਞ੍ਚਹਿ ਭਿਕ੍ਖੁਨੀਹਿ ਓਵਾਦਂ ਗਨ੍ਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਚਤਸ੍ਸੋ ਪਞ੍ਚ ਭਿਕ੍ਖੁਨਿਯੋ ਓਵਾਦਂ ਗਚ੍ਛਨ੍ਤਿ. ਮਨੁਸ੍ਸਾ ਤਥੇਵ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਇਦਾਨਿ ਇਮੇ ਇਮਾਹਿ ਸਦ੍ਧਿਂ ਅਭਿਰਮਿਸ੍ਸਨ੍ਤੀ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਚਤੂਹਿ ਪਞ੍ਚਹਿ ਭਿਕ੍ਖੁਨੀਹਿ ਓਵਾਦੋ ਗਨ੍ਤਬ੍ਬੋ. ਗਚ੍ਛੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਤਿਸ੍ਸੋ ਭਿਕ੍ਖੁਨਿਯੋ [ਭਿਕ੍ਖੁਨੀਹਿ (ਕ.)] ਓਵਾਦਂ ਗਨ੍ਤੁਂ. ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਭਿਕ੍ਖੁਨਿਸਙ੍ਘੋ, ਅਯ੍ਯ, ਭਿਕ੍ਖੁਸਙ੍ਘਸ੍ਸ ਪਾਦੇ ਵਨ੍ਦਤਿ, ਓਵਾਦੂਪਸਙ੍ਕਮਨਞ੍ਚ ਯਾਚਤਿ; ਲਭਤੁ ਕਿਰ, ਅਯ੍ਯ, ਭਿਕ੍ਖੁਨਿਸਙ੍ਘੋ ਓਵਾਦੂਪਸਙ੍ਕਮਨ’ਨ੍ਤਿ. ਤੇਨ ਭਿਕ੍ਖੁਨਾ ਪਾਤਿਮੋਕ੍ਖੁਦ੍ਦੇਸਕੋ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯੋ – ‘ਭਿਕ੍ਖੁਨੀਸਙ੍ਘੋ, ਭਨ੍ਤੇ, ਭਿਕ੍ਖੁਸਙ੍ਘਸ੍ਸ ਪਾਦੇ ਵਨ੍ਦਤਿ, ਓਵਾਦੂਪਸਙ੍ਕਮਨਞ੍ਚ ਯਾਚਤਿ; ਲਭਤੁ ਕਿਰ, ਭਨ੍ਤੇ, ਭਿਕ੍ਖੁਨਿਸਙ੍ਘੋ ਓਵਾਦੂਪਸਙ੍ਕਮਨ’ਨ੍ਤਿ. ਪਾਤਿਮੋਕ੍ਖੁਦ੍ਦੇਸਕੇਨ ਵਤ੍ਤਬ੍ਬੋ – ‘ਅਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ’ਤਿ? ਸਚੇ ਹੋਤਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਪਾਤਿਮੋਕ੍ਖੁਦ੍ਦੇਸਕੇਨ ਵਤ੍ਤਬ੍ਬੋ – ‘ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਤਂ ਭਿਕ੍ਖੁਨਿਸਙ੍ਘੋ ਉਪਸਙ੍ਕਮਤੂ’ਤਿ. ਸਚੇ ਨ ਹੋਤਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਪਾਤਿਮੋਕ੍ਖੁਦ੍ਦੇਸਕੇਨ ਵਤ੍ਤਬ੍ਬੋ – ‘ਕੋ ਆਯਸ੍ਮਾ ਉਸ੍ਸਹਤਿ ਭਿਕ੍ਖੁਨਿਯੋ ਓਵਦਿਤੁ’ਨ੍ਤਿ? ਸਚੇ ਕੋਚਿ ਉਸ੍ਸਹਤਿ ਭਿਕ੍ਖੁਨਿਯੋ ਓਵਦਿਤੁਂ, ਸੋ ਚ ਹੋਤਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ, ਸਮ੍ਮਨ੍ਨਿਤ੍ਵਾ ਵਤ੍ਤਬ੍ਬੋ – ‘ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਤਂ ਭਿਕ੍ਖੁਨਿਸਙ੍ਘੋ ਉਪਸਙ੍ਕਮਤੂ’ਤਿ. ਸਚੇ ਨ ਕੋਚਿ ਉਸ੍ਸਹਤਿ ਭਿਕ੍ਖੁਨਿਯੋ ਓਵਦਿਤੁਂ, ਪਾਤਿਮੋਕ੍ਖੁਦ੍ਦੇਸਕੇਨ ਵਤ੍ਤਬ੍ਬੋ – ‘ਨਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਤੋ, ਪਾਸਾਦਿਕੇਨ ਭਿਕ੍ਖੁਨਿਸਙ੍ਘੋ ਸਮ੍ਪਾਦੇਤੂ’’ਤਿ.

੪੧੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓਵਾਦਂ ਨ ਗਣ੍ਹਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦੋ ਨ ਗਹੇਤਬ੍ਬੋ. ਯੋ ਨ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਬਾਲੋ ਹੋਤਿ. ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘‘ਓਵਾਦਂ, ਅਯ੍ਯ, ਗਣ੍ਹਾਹੀ’’ਤਿ. ‘‘ਅਹਞ੍ਹਿ, ਭਗਿਨੀ, ਬਾਲੋ; ਕਥਾਹਂ ਓਵਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓਵਾਦਂ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ – ਭਿਕ੍ਖੂਹਿ ਭਿਕ੍ਖੁਨੀਨਂ ਓਵਾਦੋ ਗਹੇਤਬ੍ਬੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਬਾਲਂ, ਅਵਸੇਸੇਹਿ ਓਵਾਦਂ ਗਹੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘‘ਓਵਾਦਂ, ਅਯ੍ਯ ਗਣ੍ਹਾਹੀ’’ਤਿ. ‘‘ਅਹਞ੍ਹਿ, ਭਗਿਨੀ, ਗਿਲਾਨੋ; ਕਥਾਹਂ ਓਵਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓਵਾਦਂ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ – ਠਪੇਤ੍ਵਾ ਬਾਲਂ, ਅਵਸੇਸੇਹਿ ਓਵਾਦੋ ਗਹੇਤਬ੍ਬੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਬਾਲਂ, ਠਪੇਤ੍ਵਾ ਗਿਲਾਨਂ, ਅਵਸੇਸੇਹਿ ਓਵਾਦਂ ਗਹੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਮਿਕੋ ਹੋਤਿ. ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘‘ਓਵਾਦਂ, ਅਯ੍ਯ, ਗਣ੍ਹਾਹੀ’’ਤਿ. ‘‘ਅਹਞ੍ਹਿ, ਭਗਿਨੀ, ਗਮਿਕੋ; ਕਥਾਹਂ ਓਵਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓਵਾਦਂ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ – ਠਪੇਤ੍ਵਾ ਬਾਲਂ, ਠਪੇਤ੍ਵਾ ਗਿਲਾਨਂ, ਅਵਸੇਸੇਹਿ ਓਵਾਦੋ ਗਹੇਤਬ੍ਬੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਬਾਲਂ, ਠਪੇਤ੍ਵਾ ਗਿਲਾਨਂ, ਠਪੇਤ੍ਵਾ ਗਮਿਕਂ, ਅਵਸੇਸੇਹਿ ਓਵਾਦਂ ਗਹੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਰਞ੍ਞੇ ਵਿਹਰਤਿ. ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘‘ਓਵਾਦਂ, ਅਯ੍ਯ, ਗਣ੍ਹਾਹੀ’’ਤਿ. ‘‘ਅਹਞ੍ਹਿ, ਭਗਿਨੀ, ਅਰਞ੍ਞੇ ਵਿਹਰਾਮਿ; ਕਥਾਹਂ ਓਵਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓਵਾਦਂ; ਏਵਞ੍ਹਿ ਭਗਵਤਾ ਪਞ੍ਞਤ੍ਤਂ – ਠਪੇਤ੍ਵਾ ਬਾਲਂ, ਠਪੇਤ੍ਵਾ ਗਿਲਾਨਂ, ਠਪੇਤ੍ਵਾ ਗਮਿਕਂ, ਅਵਸੇਸੇਹਿ ਓਵਾਦੋ ਗਹੇਤਬ੍ਬੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਰਞ੍ਞਿਕੇਨ ਭਿਕ੍ਖੁਨਾ ਓਵਾਦਂ ਗਹੇਤੁਂ, ਸਙ੍ਕੇਤਞ੍ਚ ਕਾਤੁਂ – ਅਤ੍ਰ ਪਤਿਹਰਿਸ੍ਸਾਮੀ’’ਤਿ.

੪੧੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓਵਾਦਂ ਗਹੇਤ੍ਵਾ ਨ ਆਰੋਚੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦੋ ਨ ਆਰੋਚੇਤਬ੍ਬੋ. ਯੋ ਨ ਆਰੋਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓਵਾਦਂ ਗਹੇਤ੍ਵਾ ਨ ਪਚ੍ਚਾਹਰਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਓਵਾਦੋ ਨ ਪਚ੍ਚਾਹਰਿਤਬ੍ਬੋ. ਯੋ ਨ ਪਚ੍ਚਾਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਸਙ੍ਕੇਤਂ ਨ ਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਸਙ੍ਕੇਤਂ ਨ ਗਨ੍ਤਬ੍ਬਂ. ਯਾ ਨ ਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੧੬. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਦੀਘਾਨਿ ਕਾਯਬਨ੍ਧਨਾਨਿ ਧਾਰੇਨ੍ਤਿ, ਤੇਹੇਵ ਫਾਸੁਕਾ ਨਾਮੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਦੀਘਂ ਕਾਯਬਨ੍ਧਨਂ ਧਾਰੇਤਬ੍ਬਂ. ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨਿਯਾ ਏਕਪਰਿਯਾਕਤਂ [ਏਕਪਰਿਯਾਯਕਤਂ (ਸ੍ਯਾ.)] ਕਾਯਬਨ੍ਧਨਂ, ਨ ਚ ਤੇਨ ਫਾਸੁਕਾ ਨਾਮੇਤਬ੍ਬਾ. ਯਾ ਨਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਵਿਲੀਵੇਨ [ਵਿਲਿਵੇਨ (ਕ.)] ਪਟ੍ਟੇਨ ਫਾਸੁਕਾ ਨਾਮੇਨ੍ਤਿ…ਪੇ… ਚਮ੍ਮਪਟ੍ਟੇਨ ਫਾਸੁਕਾ ਨਾਮੇਨ੍ਤਿ. ਦੁਸ੍ਸਪਟ੍ਟੇਨ ਫਾਸੁਕਾ ਨਾਮੇਨ੍ਤਿ. ਦੁਸ੍ਸਵੇਣਿਯਾ ਫਾਸੁਕਾ ਨਾਮੇਨ੍ਤਿ. ਦੁਸ੍ਸਵਟ੍ਟਿਯਾ ਫਾਸੁਕਾ ਨਾਮੇਨ੍ਤਿ. ਚੋਲ਼ਪਟ੍ਟੇਨ ਫਾਸੁਕਾ ਨਾਮੇਨ੍ਤਿ. ਚੋਲ਼ਵੇਣਿਯਾ ਫਾਸੁਕਾ ਨਾਮੇਨ੍ਤਿ. ਚੋਲ਼ਵਟ੍ਟਿਯਾ ਫਾਸੁਕਾ ਨਾਮੇਨ੍ਤਿ. ਸੁਤ੍ਤਵੇਣਿਯਾ ਫਾਸੁਕਾ ਨਾਮੇਨ੍ਤਿ. ਸੁਤ੍ਤਵਟ੍ਟਿਯਾ ਫਾਸੁਕਾ ਨਾਮੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਵਿਲੀਵੇਨ ਪਟ੍ਟੇਨ ਫਾਸੁਕਾ ਨਾਮੇਤਬ੍ਬਾ…ਪੇ… ਨ ਸੁਤ੍ਤਵਟ੍ਟਿਯਾ ਫਾਸੁਕਾ ਨਾਮੇਤਬ੍ਬਾ. ਯਾ ਨਾਮੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਟ੍ਠਿਲ੍ਲੇਨ ਜਘਨਂ ਘਂਸਾਪੇਨ੍ਤਿ…ਪੇ… ਗੋਹਨੁਕੇਨ ਜਘਨਂ ਕੋਟ੍ਟਾਪੇਨ੍ਤਿ, ਹਤ੍ਥਂ ਕੋਟ੍ਟਾਪੇਨ੍ਤਿ, ਹਤ੍ਥਕੋਚ੍ਛਂ ਕੋਟ੍ਟਾਪੇਨ੍ਤਿ, ਪਾਦਂ ਕੋਟ੍ਟਾਪੇਨ੍ਤਿ, ਪਾਦਕੋਚ੍ਛਂ ਕੋਟ੍ਟਾਪੇਨ੍ਤਿ, ਊਰੁਂ ਕੋਟ੍ਟਾਪੇਨ੍ਤਿ, ਮੁਖਂ ਕੋਟ੍ਟਾਪੇਨ੍ਤਿ, ਦਨ੍ਤਮਂਸਂ ਕੋਟ੍ਟਾਪੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਟ੍ਠਿਲ੍ਲੇਨ ਜਘਨਂ ਘਂਸਾਪੇਤਬ੍ਬਂ…ਪੇ… ਨ ਦਨ੍ਤਮਂਸਂ ਕੋਟ੍ਟਾਪੇਤਬ੍ਬਂ. ਯਾ ਕੋਟ੍ਟਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੧੭. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਮੁਖਂ ਆਲਿਮ੍ਪਨ੍ਤਿ…ਪੇ… ਮੁਖਂ ਉਮ੍ਮਦ੍ਦੇਨ੍ਤਿ, ਮੁਖਂ ਚੁਣ੍ਣੇਨ੍ਤਿ, ਮਨੋਸਿਲਿਕਾਯ ਮੁਖਂ ਲਞ੍ਛੇਨ੍ਤਿ, ਅਙ੍ਗਰਾਗਂ ਕਰੋਨ੍ਤਿ, ਮੁਖਰਾਗਂ ਕਰੋਨ੍ਤਿ, ਅਙ੍ਗਰਾਗਮੁਖਰਾਗਂ ਕਰੋਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਮੁਖਂ ਆਲਿਮ੍ਪਿਤਬ੍ਬਂ…ਪੇ… ਨ ਮੁਖਂ ਉਮ੍ਮਦ੍ਦਿਤਬ੍ਬਂ, ਨ ਮੁਖਂ ਚੁਣ੍ਣੇਤਬ੍ਬਂ, ਨ ਮਨੋਸਿਲਿਕਾਯ ਮੁਖਂ ਲਞ੍ਛਿਤਬ੍ਬਂ, ਨ ਅਙ੍ਗਰਾਗੋ ਕਾਤਬ੍ਬੋ, ਨ ਮੁਖਰਾਗੋ ਕਾਤਬ੍ਬੋ, ਨ ਅਙ੍ਗਰਾਗਮੁਖਰਾਗੋ ਕਾਤਬ੍ਬੋ. ਯਾ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅਵਙ੍ਗਂ [ਅਪਾਙ੍ਗਂ (?)] ਕਰੋਨ੍ਤਿ…ਪੇ… ਵਿਸੇਸਕਂ ਕਰੋਨ੍ਤਿ, ਓਲੋਕਨਕੇਨ ਓਲੋਕੇਨ੍ਤਿ, ਸਾਲੋਕੇ ਤਿਟ੍ਠਨ੍ਤਿ; ਨਚ੍ਚਂ [ਸਨਚ੍ਚਂ (ਸੀ. ਸ੍ਯਾ.), ਸਮਜ੍ਜਂ (ਕ.)] ਕਾਰਾਪੇਨ੍ਤਿ, ਵੇਸਿਂ ਵੁਟ੍ਠਾਪੇਨ੍ਤਿ, ਪਾਨਾਗਾਰਂ ਠਪੇਨ੍ਤਿ, ਸੂਨਂ ਠਪੇਨ੍ਤਿ, ਆਪਣਂ ਪਸਾਰੇਨ੍ਤਿ, ਵਡ੍ਢਿਂ ਪਯੋਜੇਨ੍ਤਿ, ਵਣਿਜ੍ਜਂ ਪਯੋਜੇਨ੍ਤਿ, ਦਾਸਂ ਉਪਟ੍ਠਾਪੇਨ੍ਤਿ, ਦਾਸਿਂ ਉਪਟ੍ਠਾਪੇਨ੍ਤਿ, ਕਮ੍ਮਕਾਰਂ ਉਪਟ੍ਠਾਪੇਨ੍ਤਿ, ਕਮ੍ਮਕਾਰਿਂ ਉਪਟ੍ਠਾਪੇਨ੍ਤਿ, ਤਿਰਚ੍ਛਾਨਗਤਂ ਉਪਟ੍ਠਾਪੇਨ੍ਤਿ, ਹਰੀਤਕਪਕ੍ਕਿਕਂ [ਹਰੀਤਕਪਣ੍ਣਿਕਂ (ਕ.)] ਪਕਿਣਨ੍ਤਿ, ਨਮਤਕਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਵਙ੍ਗਂ ਕਾਤਬ੍ਬਂ…ਪੇ… ਨ ਵਿਸੇਸਕਂ ਕਾਤਬ੍ਬਂ, ਨ ਓਲੋਕਨਕੇਨ ਓਲੋਕੇਤਬ੍ਬਂ, ਨ ਸਾਲੋਕੇ ਠਾਤਬ੍ਬਂ, ਨ ਨਚ੍ਚਂ ਕਾਰਾਪੇਤਬ੍ਬਂ, ਨ ਵੇਸੀ ਵੁਟ੍ਠਾਪੇਤਬ੍ਬਾ, ਨ ਪਾਨਾਗਾਰਂ ਠਪੇਤਬ੍ਬਂ, ਨ ਸੂਨਾ ਠਪੇਤਬ੍ਬਾ, ਨ ਆਪਣੋ ਪਸਾਰੇਤਬ੍ਬੋ, ਨ ਵਡ੍ਢਿ ਪਯੋਜੇਤਬ੍ਬਾ, ਨ ਵਣਿਜ੍ਜਾ ਪਯੋਜੇਤਬ੍ਬਾ, ਨ ਦਾਸੋ ਉਪਟ੍ਠਾਪੇਤਬ੍ਬੋ, ਨ ਦਾਸੀ ਉਪਟ੍ਠਾਪੇਤਬ੍ਬਾ, ਨ ਕਮ੍ਮਕਾਰੋ ਉਪਟ੍ਠਾਪੇਤਬ੍ਬੋ, ਨ ਕਮ੍ਮਕਾਰੀ ਉਪਟ੍ਠਾਪੇਤਬ੍ਬਾ, ਨ ਤਿਰਚ੍ਛਾਨਗਤੋ ਉਪਟ੍ਠਾਪੇਤਬ੍ਬੋ, ਨ ਹਰੀਤਕਪਕ੍ਕਿਕਂ ਪਕਿਣਿਤਬ੍ਬਂ, ਨ ਨਮਤਕਂ ਧਾਰੇਤਬ੍ਬਂ. ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੧੮. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਨ੍ਤਿ…ਪੇ… ਸਬ੍ਬਪੀਤਕਾਨਿ ਚੀਵਰਾਨਿ ਧਾਰੇਨ੍ਤਿ, ਸਬ੍ਬਲੋਹਿਤਕਾਨਿ ਚੀਵਰਾਨਿ ਧਾਰੇਨ੍ਤਿ, ਸਬ੍ਬਮਞ੍ਜਿਟ੍ਠਿਕਾਨਿ ਚੀਵਰਾਨਿ ਧਾਰੇਨ੍ਤਿ, ਸਬ੍ਬਕਣ੍ਹਾਨਿ ਚੀਵਰਾਨਿ ਧਾਰੇਨ੍ਤਿ, ਸਬ੍ਬਮਹਾਰਙ੍ਗਰਤ੍ਤਾਨਿ ਚੀਵਰਾਨਿ ਧਾਰੇਨ੍ਤਿ, ਸਬ੍ਬਮਹਾਨਾਮਰਤ੍ਤਾਨਿ ਚੀਵਰਾਨਿ ਧਾਰੇਨ੍ਤਿ, ਅਚ੍ਛਿਨ੍ਨਦਸਾਨਿ ਚੀਵਰਾਨਿ ਧਾਰੇਨ੍ਤਿ, ਦੀਘਦਸਾਨਿ ਚੀਵਰਾਨਿ ਧਾਰੇਨ੍ਤਿ, ਪੁਪ੍ਫਦਸਾਨਿ ਚੀਵਰਾਨਿ ਧਾਰੇਨ੍ਤਿ, ਫਲਦਸਾਨਿ ਚੀਵਰਾਨਿ ਧਾਰੇਨ੍ਤਿ, ਕਞ੍ਚੁਕਂ ਧਾਰੇਨ੍ਤਿ, ਤਿਰੀਟਕਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਸਬ੍ਬਨੀਲਕਾਨਿ ਚੀਵਰਾਨਿ ਧਾਰੇਤਬ੍ਬਾਨਿ…ਪੇ… ਨ ਤਿਰੀਟਕਂ ਧਾਰੇਤਬ੍ਬਂ. ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੧੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਕਾਲਂ ਕਰੋਨ੍ਤੀ ਏਵਮਾਹ – ‘‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’’ਤਿ. ਤਤ੍ਥ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਵਿਵਦਨ੍ਤਿ – ‘‘ਅਮ੍ਹਾਕਂ ਹੋਤਿ, ਅਮ੍ਹਾਕਂ ਹੋਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਭਿਕ੍ਖੁਨੀ ਚੇ, ਭਿਕ੍ਖਵੇ, ਕਾਲਂ ਕਰੋਨ੍ਤੀ ਏਵਂ ਵਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਸਙ੍ਘੋ, ਭਿਕ੍ਖੁਨਿਸਙ੍ਘਸ੍ਸੇਵੇਤਂ. ਸਿਕ੍ਖਮਾਨਾ ਚੇ, ਭਿਕ੍ਖਵੇ…ਪੇ… ਸਾਮਣੇਰੀ ਚੇ, ਭਿਕ੍ਖਵੇ, ਕਾਲਂ ਕਰੋਨ੍ਤੀ ਏਵਂ ਵਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਸਙ੍ਘੋ, ਭਿਕ੍ਖੁਨਿਸਙ੍ਘਸ੍ਸੇਵੇਤਂ. ਭਿਕ੍ਖੁ ਚੇ, ਭਿਕ੍ਖਵੇ, ਕਾਲਂ ਕਰੋਨ੍ਤੋ ਏਵਂ ਵਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਨਿਸਙ੍ਘੋ, ਭਿਕ੍ਖੁਸਙ੍ਘਸ੍ਸੇਵੇਤਂ. ਸਾਮਣੇਰੋ ਚੇ, ਭਿਕ੍ਖਵੇ…ਪੇ… ਉਪਾਸਕੋ ਚੇ, ਭਿਕ੍ਖਵੇ…ਪੇ… ਉਪਾਸਿਕਾ ਚੇ, ਭਿਕ੍ਖਵੇ…ਪੇ… ਅਞ੍ਞੋ ਚੇ, ਭਿਕ੍ਖਵੇ, ਕੋਚਿ ਕਾਲਂ ਕਰੋਨ੍ਤੋ ਏਵਂ ਵਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਨਿਸਙ੍ਘੋ, ਭਿਕ੍ਖੁਸਙ੍ਘਸ੍ਸੇਵੇਤ’’ਨ੍ਤਿ.

੪੨੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਪੁਰਾਣਮਲ੍ਲੀ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ. ਸਾ ਰਥਿਕਾਯ ਦੁਬ੍ਬਲਕਂ ਭਿਕ੍ਖੁਂ ਪਸ੍ਸਿਤ੍ਵਾ ਅਂਸਕੂਟੇਨ ਪਹਾਰਂ ਦਤ੍ਵਾ ਪਾਤੇਸਿ [ਪਵਟ੍ਟੇਸਿ (ਸੀ.)]. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ, ਭਿਕ੍ਖੁਨੀ, ਭਿਕ੍ਖੁਸ੍ਸ ਪਹਾਰਂ ਦਸ੍ਸਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਪਹਾਰੋ ਦਾਤਬ੍ਬੋ. ਯਾ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍ਵਾ ਦੂਰਤੋਵ ਓਕ੍ਕਮਿਤ੍ਵਾ ਮਗ੍ਗਂ ਦਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਪਵੁਤ੍ਥਪਤਿਕਾ ਜਾਰੇਨ ਗਬ੍ਭਿਨੀ ਹੋਤਿ. ਸਾ ਗਬ੍ਭਂ ਪਾਤੇਤ੍ਵਾ ਕੁਲੂਪਿਕਂ ਭਿਕ੍ਖੁਨਿਂ ਏਤਦਵੋਚ – ‘‘ਹਨ੍ਦਯ੍ਯੇ, ਇਮਂ ਗਬ੍ਭਂ ਪਤ੍ਤੇਨ ਨੀਹਰਾ’’ਤਿ. ਅਥ ਖੋ ਸਾ ਭਿਕ੍ਖੁਨੀ ਤਂ ਗਬ੍ਭਂ ਪਤ੍ਤੇ ਪਕ੍ਖਿਪਿਤ੍ਵਾ ਸਙ੍ਘਾਟਿਯਾ ਪਟਿਚ੍ਛਾਦੇਤ੍ਵਾ ਅਗਮਾਸਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਪਿਣ੍ਡਚਾਰਿਕੇਨ ਭਿਕ੍ਖੁਨਾ ਸਮਾਦਾਨਂ ਕਤਂ ਹੋਤਿ – ‘ਯਾਹਂ ਪਠਮਂ ਭਿਕ੍ਖਂ ਲਭਿਸ੍ਸਾਮਿ, ਨ ਤਂ ਅਦਤ੍ਵਾ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਪਰਿਭੁਞ੍ਜਿਸ੍ਸਾਮੀ’ਤਿ. ਅਥ ਖੋ ਸੋ ਭਿਕ੍ਖੁ ਤਂ ਭਿਕ੍ਖੁਨਿਂ ਪਸ੍ਸਿਤ੍ਵਾ ਏਤਦਵੋਚ – ‘‘ਹਨ੍ਦ, ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ. ‘‘ਅਲਂ ਅਯ੍ਯਾ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਸੋ ਭਿਕ੍ਖੁ ਤਂ ਭਿਕ੍ਖੁਨਿਂ ਏਤਦਵੋਚ – ‘‘ਹਨ੍ਦ, ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ. ‘‘ਅਲਂ ਅਯ੍ਯਾ’’ਤਿ. ‘‘ਮਯਾ ਖੋ, ਭਗਿਨਿ, ਸਮਾਦਾਨਂ ਕਤਂ – ‘ਯਾਹਂ ਪਠਮਂ ਭਿਕ੍ਖਂ ਲਭਿਸ੍ਸਾਮਿ, ਨ ਤਂ ਅਦਤ੍ਵਾ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਪਰਿਭੁਞ੍ਜਿਸ੍ਸਾਮੀ’ਤਿ. ਹਨ੍ਦ, ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ. ਅਥ ਖੋ ਸਾ ਭਿਕ੍ਖੁਨੀ ਤੇਨ ਭਿਕ੍ਖੁਨਾ ਨਿਪ੍ਪੀਲ਼ਿਯਮਾਨਾ ਨੀਹਰਿਤ੍ਵਾ ਪਤ੍ਤਂ ਦਸ੍ਸੇਸਿ – ‘‘ਪਸ੍ਸ, ਅਯ੍ਯ, ਪਤ੍ਤੇ ਗਬ੍ਭਂ; ਮਾ ਚ ਕਸ੍ਸਚਿ ਆਰੋਚੇਸੀ’’ਤਿ. ਅਥ ਖੋ ਸੋ ਭਿਕ੍ਖੁ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪਤ੍ਤੇਨ ਗਬ੍ਭਂ ਨੀਹਰਿਸ੍ਸਤੀ’’ਤਿ! ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪਤ੍ਤੇਨ ਗਬ੍ਭਂ ਨੀਹਰਿਸ੍ਸਤੀ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਪਤ੍ਤੇਨ ਗਬ੍ਭੋ ਨੀਹਰਿਤਬ੍ਬੋ. ਯਾ ਨੀਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍ਵਾ ਨੀਹਰਿਤ੍ਵਾ ਪਤ੍ਤਂ ਦਸ੍ਸੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਪਸ੍ਸਿਤ੍ਵਾ ਪਰਿਵਤ੍ਤੇਤ੍ਵਾ ਪਤ੍ਤਮੂਲਂ ਦਸ੍ਸੇਨ੍ਤਿ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਪਸ੍ਸਿਤ੍ਵਾ ਪਰਿਵਤ੍ਤੇਤ੍ਵਾ ਪਤ੍ਤਮੂਲਂ ਦਸ੍ਸੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍ਵਾ ਪਰਿਵਤ੍ਤੇਤ੍ਵਾ ਪਤ੍ਤਮੂਲਂ ਦਸ੍ਸੇਤਬ੍ਬਂ. ਯਾ ਦਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍ਵਾ ਉਕ੍ਕੁਜ੍ਜਿਤ੍ਵਾ ਪਤ੍ਤਂ ਦਸ੍ਸੇਤੁਂ. ਯਞ੍ਚ ਪਤ੍ਤੇ ਆਮਿਸਂ ਹੋਤਿ, ਤੇਨ ਚ ਭਿਕ੍ਖੁ ਨਿਮਨ੍ਤੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਂ ਰਥਿਕਾਯ ਪੁਰਿਸਬ੍ਯਞ੍ਜਨਂ ਛਡ੍ਡਿਤਂ ਹੋਤਿ. ਤਂ ਭਿਕ੍ਖੁਨਿਯੋ ਸਕ੍ਕਚ੍ਚਂ ਉਪਨਿਜ੍ਝਾਯਿਂਸੁ. ਮਨੁਸ੍ਸਾ ਉਕ੍ਕੁਟ੍ਠਿਂ ਅਕਂਸੁ. ਤਾ ਭਿਕ੍ਖੁਨਿਯੋ ਮਙ੍ਕੂ ਅਹੇਸੁਂ. ਅਥ ਖੋ ਤਾ ਭਿਕ੍ਖੁਨਿਯੋ ਉਪਸ੍ਸਯਂ ਗਨ੍ਤ੍ਵਾ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸੁਂ. ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਪੁਰਿਸਬ੍ਯਞ੍ਜਨਂ ਉਪਨਿਜ੍ਝਾਯਿਸ੍ਸਨ੍ਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਪੁਰਿਸਬ੍ਯਞ੍ਜਨਂ ਉਪਨਿਜ੍ਝਾਯਿਤਬ੍ਬਂ. ਯਾ ਉਪਨਿਜ੍ਝਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੨੧. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂਨਂ ਆਮਿਸਂ ਦੇਨ੍ਤਿ. ਭਿਕ੍ਖੂ ਭਿਕ੍ਖੁਨੀਨਂ ਦੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਸ੍ਸਨ੍ਤਿ! ਮਯਮ੍ਪਿ ਨ ਜਾਨਾਮ ਦਾਨਂ ਦਾਤੁ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਾਤਬ੍ਬਂ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਆਮਿਸਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਸ੍ਸ ਦਾਤੁ’’ਨ੍ਤਿ. ਬਾਲ਼੍ਹਤਰਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਗ੍ਗਲਿਕਮ੍ਪਿ ਦਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਸਨ੍ਨਿਧਿਕਤਂ ਆਮਿਸਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂਨਂ ਸਨ੍ਨਿਧਿਂ ਭਿਕ੍ਖੁਨੀਹਿ [ਭਿਕ੍ਖੁਨੀਹਿ ਭਿਕ੍ਖੂਹਿ (ਸੀ.)] ਪਟਿਗ੍ਗਾਹਾਪੇਤ੍ਵਾ [ਪਟਿਗ੍ਗਹਾਪੇਤ੍ਵਾ (ਕ.)] ਪਰਿਭੁਞ੍ਜਿਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੁਨੀਨਂ ਆਮਿਸਂ ਦੇਨ੍ਤਿ. ਭਿਕ੍ਖੁਨਿਯੋ ਭਿਕ੍ਖੂਨਂ ਦੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਸ੍ਸਨ੍ਤਿ! ਮਯਮ੍ਪਿ ਨ ਜਾਨਾਮ ਦਾਨਂ ਦਾਤੁ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਾਤਬ੍ਬਂ. ਯਾ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਆਮਿਸਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਸ੍ਸ ਦਾਤੁ’’ਨ੍ਤਿ. ਬਾਲ਼੍ਹਤਰਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਗ੍ਗਲਿਕਮ੍ਪਿ ਦਾਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਸਨ੍ਨਿਧਿਕਤਂ ਆਮਿਸਂ ਉਸ੍ਸਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਨਂ ਸਨ੍ਨਿਧਿਂ ਭਿਕ੍ਖੂਹਿ ਭਿਕ੍ਖੁਨੀਹਿ [ਭਿਕ੍ਖੂਹਿ ਭਿਕ੍ਖੁਨੀਹਿ (ਸੀ.)] ਪਟਿਗ੍ਗਾਹਾਪੇਤ੍ਵਾ ਪਰਿਭੁਞ੍ਜਿਤੁ’’ਨ੍ਤਿ.

੪੨੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਸੇਨਾਸਨਂ ਉਸ੍ਸਨ੍ਨਂ ਹੋਤਿ, ਭਿਕ੍ਖੁਨੀਨਂ [ਭਿਕ੍ਖੁਨੀਨਂ ਸੇਨਾਸਨਂ (ਸ੍ਯਾ. ਕਂ.)] ਨ ਹੋਤਿ. ਭਿਕ੍ਖੁਨਿਯੋ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸੁਂ – ‘ਸਾਧੁ, ਭਨ੍ਤੇ, ਅਯ੍ਯਾ ਅਮ੍ਹਾਕਂ ਸੇਨਾਸਨਂ ਦੇਨ੍ਤੁ ਤਾਵਕਾਲਿਕ’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੁਨੀਨਂ ਸੇਨਾਸਨਂ ਦਾਤੁਂ ਤਾਵਕਾਲਿਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਉਤੁਨਿਯੋ ਭਿਕ੍ਖੁਨਿਯੋ ਓਨਦ੍ਧਮਞ੍ਚਂ ਓਨਦ੍ਧਪੀਠਂ ਅਭਿਨਿਸੀਦਨ੍ਤਿਪਿ ਅਭਿਨਿਪਜ੍ਜਨ੍ਤਿਪਿ. ਸੇਨਾਸਨਂ ਲੋਹਿਤੇਨ ਮਕ੍ਖਿਯ੍ਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਓਨਦ੍ਧਮਞ੍ਚਂ ਓਨਦ੍ਧਪੀਠਂ ਅਭਿਨਿਸੀਦਿਤਬ੍ਬਂ ਅਭਿਨਿਪਜ੍ਜਿਤਬ੍ਬਂ. ਯਾ ਅਭਿਨਿਸੀਦੇਯ੍ਯ ਵਾ ਅਭਿਨਿਪਜ੍ਜੇਯ੍ਯ ਵਾ ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਵਸਥਚੀਵਰ’’ਨ੍ਤਿ. ਆਵਸਥਚੀਵਰਂ ਲੋਹਿਤੇਨ ਮਕ੍ਖਿਯ੍ਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਣਿਚੋਲ਼ਕ’’ਨ੍ਤਿ. ਚੋਲ਼ਕਂ ਨਿਪਤਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸੁਤ੍ਤਕੇਨ ਬਨ੍ਧਿਤ੍ਵਾ ਊਰੁਯਾ ਬਨ੍ਧਿਤੁ’’ਨ੍ਤਿ. ਸੁਤ੍ਤਂ ਛਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਂਵੇਲ੍ਲਿਯਂ, ਕਟਿਸੁਤ੍ਤਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਸਬ੍ਬਕਾਲਂ ਕਟਿਸੁਤ੍ਤਕਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਸਬ੍ਬਕਾਲਂ ਕਟਿਸੁਤ੍ਤਕਂ ਧਾਰੇਤਬ੍ਬਂ. ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਉਤੁਨਿਯਾ ਕਟਿਸੁਤ੍ਤਕ’’ਨ੍ਤਿ.

ਦੁਤਿਯਭਾਣਵਾਰੋ ਨਿਟ੍ਠਿਤੋ.

੩. ਤਤਿਯਭਾਣਵਾਰੋ

੪੨੩. ਤੇਨ ਖੋ ਪਨ ਸਮਯੇਨ ਉਪਸਮ੍ਪਨ੍ਨਾਯੋ ਦਿਸ੍ਸਨ੍ਤਿ – ਅਨਿਮਿਤ੍ਤਾਪਿ, ਨਿਮਿਤ੍ਤਮਤ੍ਤਾਪਿ, ਅਲੋਹਿਤਾਪਿ, ਧੁਵਲੋਹਿਤਾਪਿ, ਧੁਵਚੋਲ਼ਾਪਿ, ਪਗ੍ਘਰਨ੍ਤੀਪਿ, ਸਿਖਰਿਣੀਪਿ, ਇਤ੍ਥਿਪਣ੍ਡਕਾਪਿ, ਵੇਪੁਰਿਸਿਕਾਪਿ, ਸਮ੍ਭਿਨ੍ਨਾਪਿ, ਉਭਤੋਬ੍ਯਞ੍ਜਨਾਪਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਨ੍ਤਿਯਾ ਚਤੁਵੀਸਤਿ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਪੁਚ੍ਛਿਤਬ੍ਬਾ – ‘ਨਸਿ ਅਨਿਮਿਤ੍ਤਾ, ਨਸਿ ਨਿਮਿਤ੍ਤਮਤ੍ਤਾ, ਨਸਿ ਅਲੋਹਿਤਾ, ਨਸਿ ਧੁਵਲੋਹਿਤਾ, ਨਸਿ ਧੁਵਚੋਲ਼ਾ, ਨਸਿ ਪਗ੍ਘਰਨ੍ਤੀ, ਨਸਿ ਸਿਖਰਣੀ [ਸਿਖਰਿਣੀ (ਸੀ. ਸ੍ਯਾ.)], ਨਸਿ ਇਤ੍ਥਿਪਣ੍ਡਕਾ, ਨਸਿ ਵੇਪੁਰਿਸਿਕਾ, ਨਸਿ ਸਮ੍ਭਿਨ੍ਨਾ, ਨਸਿ ਉਭਤੋਬ੍ਯਞ੍ਜਨਾ? ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸਾਸਿ, ਇਤ੍ਥੀਸਿ, ਭੁਜਿਸ੍ਸਾਸਿ, ਅਣਣਾਸਿ, ਨਸਿ ਰਾਜਭਟੀ? ਅਨੁਞ੍ਞਾਤਾਸਿ ਮਾਤਾਪਿਤੂਹਿ, ਸਾਮਿਕੇਨ? ਪਰਿਪੁਣ੍ਣਵੀਸਤਿਵਸ੍ਸਾਸਿ, ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ, ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀ’’ਤਿ?

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੀਨਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਤੋਉਪਸਮ੍ਪਨ੍ਨਾਯ ਭਿਕ੍ਖੁਨਿਸਙ੍ਘੇ ਵਿਸੁਦ੍ਧਾਯ ਭਿਕ੍ਖੁਸਙ੍ਘੇ ਉਪਸਮ੍ਪਾਦੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਨਨੁਸਿਟ੍ਠਾ ਉਪਸਮ੍ਪਦਾਪੇਕ੍ਖਾਯੋ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਅਨੁਸਾਸਿਤ੍ਵਾ ਪਚ੍ਛਾ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁ’’ਨ੍ਤਿ.

ਤਤ੍ਥੇਵ ਸਙ੍ਘਮਜ੍ਝੇ ਅਨੁਸਾਸਨ੍ਤਿ. ਉਪਸਮ੍ਪਦਾਪੇਕ੍ਖਾਯੋ ਤਥੇਵ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਮਨ੍ਤਂ ਅਨੁਸਾਸਿਤ੍ਵਾ ਸਙ੍ਘਮਜ੍ਝੇ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਅਨੁਸਾਸਿਤਬ੍ਬਾ.

੪੨੪. ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬਾ. ਉਪਜ੍ਝਂ ਗਾਹਾਪੇਤ੍ਵਾ ਪਤ੍ਤਚੀਵਰਂ ਆਚਿਕ੍ਖਿਤਬ੍ਬਂ – ‘ਅਯਂ ਤੇ ਪਤ੍ਤੋ, ਅਯਂ ਸਙ੍ਘਾਟਿ, ਅਯਂ ਉਤ੍ਤਰਾਸਙ੍ਗੋ, ਅਯਂ ਅਨ੍ਤਰਵਾਸਕੋ, ਇਦਂ ਸਂਕਚ੍ਚਿਕਂ [ਸਙ੍ਕਚ੍ਛਿਕਂ (ਸ੍ਯਾ.)], ਅਯਂ ਉਦਕਸਾਟਿਕਾ; ਗਚ੍ਛ ਅਮੁਮ੍ਹਿ ਓਕਾਸੇ ਤਿਟ੍ਠਾਹੀ’’ਤਿ.

ਬਾਲਾ ਅਬ੍ਯਤ੍ਤਾ ਅਨੁਸਾਸਨ੍ਤਿ. ਦੁਰਨੁਸਿਟ੍ਠਾ ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਨ੍ਤਿ, ਮਙ੍ਕੂ ਹੋਨ੍ਤਿ, ਨ ਸਕ੍ਕੋਨ੍ਤਿ ਵਿਸ੍ਸਜ੍ਜੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਬਾਲਾਯ ਅਬ੍ਯਤ੍ਤਾਯ ਅਨੁਸਾਸਿਤਬ੍ਬਾ. ਯਾ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਅਨੁਸਾਸਿਤੁ’’ਨ੍ਤਿ.

ਅਸਮ੍ਮਤਾ ਅਨੁਸਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਸਮ੍ਮਤਾਯ ਅਨੁਸਾਸਿਤਬ੍ਬਾ. ਯਾ ਅਨੁਸਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਮ੍ਮਤਾਯ ਅਨੁਸਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ – ਅਤ੍ਤਨਾ ਵਾ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ, ਪਰਾਯ ਵਾ ਪਰਾ ਸਮ੍ਮਨ੍ਨਿਤਬ੍ਬਾ.

‘‘ਕਥਞ੍ਚ ਅਤ੍ਤਨਾਵ [ਅਤ੍ਤਨਾ ਵਾ (ਕ.)] ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ? ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’ਨ੍ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਂ.

‘‘ਕਥਞ੍ਚ ਪਰਾਯ [ਪਰਾਯ ਵਾ (ਕ.)] ਪਰਾ ਸਮ੍ਮਨ੍ਨਿਤਬ੍ਬਾ? ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’ਤਿ. ਏਵਂ ਪਰਾਯ ਪਰਾ ਸਮ੍ਮਨ੍ਨਿਤਬ੍ਬਾ.

‘‘ਤਾਯ ਸਮ੍ਮਤਾਯ ਭਿਕ੍ਖੁਨਿਯਾ ਉਪਸਮ੍ਪਦਾਪੇਕ੍ਖਂ ਉਪਸਙ੍ਕਮਿਤ੍ਵਾ ਏਵਮਸ੍ਸ ਵਚਨੀਯਾ – ‘ਸੁਣਸਿ ਇਤ੍ਥਨ੍ਨਾਮੇ. ਅਯਂ ਤੇ ਸਚ੍ਚਕਾਲੋ, ਭੂਤਕਾਲੋ. ਯਂ ਜਾਤਂ ਤਂ ਸਙ੍ਘਮਜ੍ਝੇ ਪੁਚ੍ਛਨ੍ਤੇ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀਤਿ ਵਤ੍ਤਬ੍ਬਂ. ਮਾ ਖੋ ਵਿਤ੍ਥਾਯਿ [ਵਿਤ੍ਥਾਸਿ (ਕ.)], ਮਾ ਖੋ ਮਙ੍ਕੁ ਅਹੋਸਿ. ਏਵਂ ਤਂ ਪੁਚ੍ਛਿਸ੍ਸਨ੍ਤਿ – ਨਸਿ ਅਨਿਮਿਤ੍ਤਾ, ਨਸਿ ਨਿਮਿਤ੍ਤਮਤ੍ਤਾ, ਨਸਿ ਅਲੋਹਿਤਾ, ਨਸਿ ਧੁਵਲੋਹਿਤਾ, ਨਸਿ ਧੁਵਚੋਲ਼ਾ, ਨਸਿ ਪਗ੍ਘਰਨ੍ਤੀ, ਨਸਿ ਸਿਖਰਿਣੀ, ਨਸਿ ਇਤ੍ਥਿਪਣ੍ਡਕਾ, ਨਸਿ ਵੇਪੁਰਿਸਿਕਾ, ਨਸਿ ਸਮ੍ਭਿਨ੍ਨਾ, ਨਸਿ ਉਭਤੋਬ੍ਯਞ੍ਜਨਾ? ਸਨ੍ਤਿ ਤੇ ਏਵਰੂਪਾ ਆਬਾਧਾ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ? ਮਨੁਸ੍ਸਾਸਿ, ਇਤ੍ਥੀਸਿ, ਭੁਜਿਸ੍ਸਾਸਿ, ਅਣਣਾਸਿ, ਨਸਿ ਰਾਜਭਟੀ? ਅਨੁਞ੍ਞਾਤਾਸਿ ਮਾਤਾਪਿਤੂਹਿ, ਸਾਮਿਕੇਨ? ਪਰਿਪੁਣ੍ਣਵੀਸਤਿਵਸ੍ਸਾਸਿ, ਪਰਿਪੁਣ੍ਣਂ ਤੇ ਪਤ੍ਤਚੀਵਰਂ, ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀ’ਤਿ?

‘‘ਏਕਤੋ ਆਗਚ੍ਛਨ੍ਤਿ. ਨ ਏਕਤੋ ਆਗਨ੍ਤਬ੍ਬਂ. ਅਨੁਸਾਸਿਕਾਯ ਪਠਮਤਰਂ ਆਗਨ੍ਤ੍ਵਾ ਸਙ੍ਘੋ ਞਾਪੇਤਬ੍ਬੋ – ‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਅਨੁਸਿਟ੍ਠਾ ਸਾ ਮਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਾ ਆਗਚ੍ਛੇਯ੍ਯਾ’ਤਿ. ‘ਆਗਚ੍ਛਾਹੀ’ਤਿ ਵਤ੍ਤਬ੍ਬਾ.

‘‘ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੁਨੀਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਉਪਸਮ੍ਪਦਂ ਯਾਚਾਪੇਤਬ੍ਬਾ – ‘ਸਙ੍ਘਂ, ਅਯ੍ਯੇ, ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਦੁਤਿਯਮ੍ਪਿ, ਅਯ੍ਯੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਤਤਿਯਮ੍ਪਿ, ਅਯ੍ਯੇ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯਨ੍ਤਿ.

‘‘ਸੁਣਸਿ ਇਤ੍ਥਨ੍ਨਾਮੇ. ਅਯਂ ਤੇ ਸਚ੍ਚਕਾਲੋ, ਭੂਤਕਾਲੋ. ਯਂ ਜਾਤਂ ਤਂ ਪੁਚ੍ਛਾਮਿ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਂ, ਅਸਨ੍ਤਂ ਨਤ੍ਥੀਤਿ ਵਤ੍ਤਬ੍ਬਂ. ਨਸਿ ਅਨਿਮਿਤ੍ਤਾ…ਪੇ… ਕਿਨ੍ਨਾਮਾਸਿ, ਕਾਨਾਮਾ ਤੇ ਪਵਤ੍ਤਿਨੀਤਿ. ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

੪੨੫. ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਪਰਿਸੁਦ੍ਧਾ ਅਨ੍ਤਰਾਯਿਕੇਹਿ ਧਮ੍ਮੇਹਿ, ਪਰਿਪੁਣ੍ਣਸ੍ਸਾ ਪਤ੍ਤਚੀਵਰਂ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਉਪਸਮ੍ਪਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਪਵਤ੍ਤਿਨਿਯਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਵਦੇਵ ਤਂ ਆਦਾਯ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਉਪਸਮ੍ਪਦਂ ਯਾਚਾਪੇਤਬ੍ਬਾ – ‘ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ; ਸਙ੍ਘਂ, ਅਯ੍ਯਾ, ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਦੁਤਿਯਮ੍ਪਿ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਅਹਂ, ਅਯ੍ਯਾ, ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਤਤਿਯਮ੍ਪਿ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਾਮਿ. ਉਲ੍ਲੁਮ੍ਪਤੁ ਮਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ, ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਉਪਸਮ੍ਪਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਵਦੇਵ ਛਾਯਾ ਮੇਤਬ੍ਬਾ, ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ, ਸਙ੍ਗੀਤਿ ਆਚਿਕ੍ਖਿਤਬ੍ਬਾ, ਭਿਕ੍ਖੁਨਿਯੋ ਵਤ੍ਤਬ੍ਬਾ – ਇਮਿਸ੍ਸਾ ਤਯੋ ਚ ਨਿਸ੍ਸਯੇ, ਅਟ੍ਠ ਚ ਅਕਰਣੀਯਾਨਿ ਆਚਿਕ੍ਖੇਯ੍ਯਾਥਾ’’ਤਿ.

੪੨੬. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਤ੍ਤਗ੍ਗੇ ਆਸਨਂ ਸਂਕਸਾਯਨ੍ਤਿਯੋ ਕਾਲਂ ਵੀਤਿਨਾਮੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ – ਭਗਵਤਾ ਅਨੁਞ੍ਞਾਤਂ ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕਨ੍ਤਿ – ਸਬ੍ਬਤ੍ਥ ਅਟ੍ਠੇਵ ਭਿਕ੍ਖੁਨਿਯੋ ਯਥਾਵੁਡ੍ਢਂ ਪਟਿਬਾਹਨ੍ਤਿ, ਅਵਸੇਸਾਯੋ ਯਥਾਗਤਿਕਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਗ੍ਗੇ ਅਟ੍ਠਨ੍ਨਂ ਭਿਕ੍ਖੁਨੀਨਂ ਯਥਾਵੁਡ੍ਢਂ, ਅਵਸੇਸਾਨਂ ਯਥਾਗਤਿਕਂ; ਅਞ੍ਞਤ੍ਥ ਸਬ੍ਬਤ੍ਥ ਯਥਾਵੁਡ੍ਢਂ [ਅਞ੍ਞਤ੍ਥ ਯਥਾਵੁਡ੍ਢਂ (ਸ੍ਯਾ.)] ਨ ਪਟਿਬਾਹਿਤਬ੍ਬਂ. ਯਾ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੪੨੭. [ਪਾਚਿ. ੧੦੫੦ ਆਦਯੋ] ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਨ ਪਵਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਨ ਪਵਾਰੇਤਬ੍ਬਂ. ਯਾ ਨ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਤ੍ਤਨਾ ਪਵਾਰੇਤ੍ਵਾ ਭਿਕ੍ਖੁਸਙ੍ਘਂ ਨ ਪਵਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਤ੍ਤਨਾ ਪਵਾਰੇਤ੍ਵਾ ਭਿਕ੍ਖੁਸਙ੍ਘੋ ਨ ਪਵਾਰੇਤਬ੍ਬੋ. ਯਾ ਨ ਪਵਾਰੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਿਕ੍ਖੂਹਿ ਸਦ੍ਧਿਂ ਏਕਤੋ ਪਵਾਰੇਨ੍ਤਿਯੋ ਕੋਲਾਹਲਂ ਅਕਂਸੁ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੂਹਿ ਸਦ੍ਧਿਂ ਏਕਤੋ ਪਵਾਰੇਤਬ੍ਬਂ. ਯਾ ਪਵਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਪੁਰੇਭਤ੍ਤਂ ਪਵਾਰੇਨ੍ਤਿਯੋ ਕਾਲਂ ਵੀਤਿਨਾਮੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਛਾਭਤ੍ਤਂ [ਭਿਕ੍ਖਵੇ ਭਿਕ੍ਖੁਨਿਯਾ ਪਚ੍ਛਾਭਤ੍ਤਂ (ਸ੍ਯਾ. ਕਂ.)] ਪਵਾਰੇਤੁ’’ਨ੍ਤਿ. ਪਚ੍ਛਾਭਤ੍ਤਂ ਪਵਾਰੇਨ੍ਤਿਯੋ ਵਿਕਾਲੇ [ਵਿਕਾਲਂ (ਕ.)] ਅਹੇਸੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਜ੍ਜਤਨਾ ਭਿਕ੍ਖੁਨਿਸਙ੍ਘਂ [ਅਜ੍ਜਤਨਾ (ਸੀ.), ਅਜ੍ਜਤਨਾਯ (ਕ.)] ਪਵਾਰੇਤ੍ਵਾ ਅਪਰਜ੍ਜੁ ਭਿਕ੍ਖੁਸਙ੍ਘਂ ਪਵਾਰੇਤੁ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਸਬ੍ਬੋ ਭਿਕ੍ਖੁਨਿਸਙ੍ਘੋ ਪਵਾਰੇਨ੍ਤੋ ਕੋਲਾਹਲਂ ਅਕਾਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਂ ਭਿਕ੍ਖੁਨਿਂ ਬ੍ਯਤ੍ਤਂ ਪਟਿਬਲਂ ਸਮ੍ਮਨ੍ਨਿਤੁਂ – ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਪਠਮਂ ਭਿਕ੍ਖੁਨੀ ਯਾਚਿਤਬ੍ਬਾ, ਯਾਚਿਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨੇਯ੍ਯ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਨਿਂ ਸਮ੍ਮਨ੍ਨਤਿ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਯਸ੍ਸਾ ਅਯ੍ਯਾਯ ਖਮਤਿ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਸਮ੍ਮੁਤਿ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ, ਸਾ ਤੁਣ੍ਹਸ੍ਸ; ਯਸ੍ਸਾ ਨਕ੍ਖਮਤਿ, ਸਾ ਭਾਸੇਯ੍ਯ.

‘‘ਸਮ੍ਮਤਾ ਸਙ੍ਘੇਨ ਇਤ੍ਥਨ੍ਨਾਮਾ ਭਿਕ੍ਖੁਨੀ ਭਿਕ੍ਖੁਨਿਸਙ੍ਘਸ੍ਸ ਅਤ੍ਥਾਯ ਭਿਕ੍ਖੁਸਙ੍ਘਂ ਪਵਾਰੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਤਾਯ ਸਮ੍ਮਤਾਯ ਭਿਕ੍ਖੁਨਿਯਾ ਭਿਕ੍ਖੁਨਿਸਙ੍ਘਂ ਆਦਾਯ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਭਿਕ੍ਖੁਨੀਸਙ੍ਘੋ, ਅਯ੍ਯਾ, ਭਿਕ੍ਖੁਸਙ੍ਘਂ ਪਵਾਰੇਤਿ – ਦਿਟ੍ਠੇਨ ਵਾ, ਸੁਤੇਨ ਵਾ ਪਰਿਸਙ੍ਕਾਯ ਵਾ. ਵਦਤੁ [ਵਦਤੁ ਮਂ (ਕ.)], ਅਯ੍ਯਾ, ਭਿਕ੍ਖੁਸਙ੍ਘੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤਿ. ਦੁਤਿਯਮ੍ਪਿ, ਅਯ੍ਯਾ…ਪੇ… ਤਤਿਯਮ੍ਪਿ, ਅਯ੍ਯਾ, ਭਿਕ੍ਖੁਨਿਸਙ੍ਘੋ ਭਿਕ੍ਖੁਸਙ੍ਘਂ ਪਵਾਰੇਤਿ – ਦਿਟ੍ਠੇਨ ਵਾ, ਸੁਤੇਨ ਵਾ, ਪਰਿਸਙ੍ਕਾਯ ਵਾ. ਵਦਤੁ, ਅਯ੍ਯਾ, ਭਿਕ੍ਖੁਸਙ੍ਘੋ ਭਿਕ੍ਖੁਨਿਸਙ੍ਘਂ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤੀ’’ਤਿ.

੪੨੮. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਭਿਕ੍ਖੂਨਂ ਉਪੋਸਥਂ ਠਪੇਨ੍ਤਿ, ਪਵਾਰਣਂ ਠਪੇਨ੍ਤਿ, ਸਵਚਨੀਯਂ ਕਰੋਨ੍ਤਿ, ਅਨੁਵਾਦਂ ਪਟ੍ਠਪੇਨ੍ਤਿ, ਓਕਾਸਂ ਕਾਰੇਨ੍ਤਿ, ਚੋਦੇਨ੍ਤਿ, ਸਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਉਪੋਸਥੋ ਠਪੇਤਬ੍ਬੋ; ਠਪਿਤੋਪਿ ਅਟ੍ਠਪਿਤੋ; ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਪਵਾਰਣਾ ਠਪੇਤਬ੍ਬਾ; ਠਪਿਤਾਪਿ ਅਟ੍ਠਪਿਤਾ; ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਸਵਚਨੀਯਂ ਕਾਤਬ੍ਬਂ; ਕਤਮ੍ਪਿ ਅਕਤਂ; ਕਰੋਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਅਨੁਵਾਦੋ ਪਟ੍ਠਪੇਤਬ੍ਬੋ; ਪਟ੍ਠਪਿਤੋਪਿ ਅਪ੍ਪਟ੍ਠਪਿਤੋ; ਪਟ੍ਠਪੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਓਕਾਸੋ ਕਾਰੇਤਬ੍ਬੋ; ਕਾਰਿਤੋਪਿ ਅਕਾਰਿਤੋ; ਕਾਰੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਚੋਦੇਤਬ੍ਬੋ; ਚੋਦਿਤੋਪਿ ਅਚੋਦਿਤੋ; ਚੋਦੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸ. ਨ ਸਾਰੇਤਬ੍ਬੋ; ਸਾਰਿਤੋਪਿ ਅਸਾਰਿਤੋ; ਸਾਰੇਨ੍ਤਿਯਾ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਕ੍ਖੁਨੀਨਂ ਉਪੋਸਥਂ ਠਪੇਨ੍ਤਿ, ਪਵਾਰਣਂ ਠਪੇਨ੍ਤਿ, ਸਵਚਨੀਯਂ ਕਰੋਨ੍ਤਿ, ਅਨੁਵਾਦਂ ਪਟ੍ਠਪੇਨ੍ਤਿ, ਓਕਾਸਂ ਕਾਰੇਨ੍ਤਿ, ਚੋਦੇਨ੍ਤਿ, ਸਾਰੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ ਭਿਕ੍ਖੁਨਾ ਭਿਕ੍ਖੁਨਿਯਾ ਉਪੋਸਥਂ ਠਪੇਤੁਂ; ਠਪਿਤੋਪਿ ਸੁਟ੍ਠਪਿਤੋ; ਠਪੇਨ੍ਤਸ੍ਸ ਅਨਾਪਤ੍ਤਿ. ਪਵਾਰਣਂ ਠਪੇਤੁਂ; ਠਪਿਤਾਪਿ ਸੁਟ੍ਠਪਿਤਾ; ਠਪੇਨ੍ਤਸ੍ਸ ਅਨਾਪਤ੍ਤਿ. ਸਵਚਨੀਯਂ ਕਾਤੁਂ; ਕਤਮ੍ਪਿ ਸੁਕਤਂ; ਕਰੋਨ੍ਤਸ੍ਸ ਅਨਾਪਤ੍ਤਿ. ਅਨੁਵਾਦਂ ਪਟ੍ਠਪੇਤੁਂ; ਪਟ੍ਠਪਿਤੋਪਿ ਸੁਪ੍ਪਟ੍ਠਪਿਤੋ; ਪਟ੍ਠਪੇਨ੍ਤਸ੍ਸ ਅਨਾਪਤ੍ਤਿ. ਓਕਾਸਂ ਕਾਰੇਤੁਂ; ਕਾਰਿਤੋਪਿ ਸੁਕਾਰਿਤੋ; ਕਾਰੇਨ੍ਤਸ੍ਸ ਅਨਾਪਤ੍ਤਿ. ਚੋਦੇਤੁਂ; ਚੋਦਿਤਾਪਿ ਸੁਚੋਦਿਤਾ; ਚੋਦੇਨ੍ਤਸ੍ਸ ਅਨਾਪਤ੍ਤਿ. ਸਾਰੇਤੁਂ; ਸਾਰਿਤਾਪਿ ਸੁਸਾਰਿਤਾ; ਸਾਰੇਨ੍ਤਸ੍ਸ ਅਨਾਪਤ੍ਤੀ’’ਤਿ.

੪੨੯. [ਪਾਚਿ. ੧੧੮੪] ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਯਾਨੇਨ ਯਾਯਨ੍ਤਿ – ਇਤ੍ਥਿਯੁਤ੍ਤੇਨਪਿ ਪੁਰਿਸਨ੍ਤਰੇਨ, ਪੁਰਿਸਯੁਤ੍ਤੇਨਪਿ ਇਤ੍ਥਨ੍ਤਰੇਨ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ‘‘ਸੇਯ੍ਯਥਾਪਿ ਗਙ੍ਗਾਮਹਿਯਾਯਾ’’ਤਿ [ਗਙ੍ਗਾਮਹਿਯਾਤਿ (ਸੀ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਯਾਨੇਨ ਯਾਯਿਤਬ੍ਬਂ. ਯਾ ਯਾਯੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਗਿਲਾਨਾ ਹੋਤਿ, ਨ ਸਕ੍ਕੋਤਿ ਪਦਸਾ ਗਨ੍ਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਾਯ ਯਾਨ’’ਨ੍ਤਿ. ਅਥ ਖੋ ਭਿਕ੍ਖੁਨੀਨਂ ਏਤਦਹੋਸਿ – ‘‘ਇਤ੍ਥਿਯੁਤ੍ਤਂ ਨੁ ਖੋ, ਪੁਰਿਸਯੁਤ੍ਤਂ ਨੁ ਖੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਇਤ੍ਥਿਯੁਤ੍ਤਂ ਪੁਰਿਸਯੁਤ੍ਤਂ ਹਤ੍ਥਵਟ੍ਟਕ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਿਸ੍ਸਾ ਭਿਕ੍ਖੁਨਿਯਾ ਯਾਨੁਗ੍ਘਾਤੇਨ ਬਾਲ਼੍ਹਤਰਂ ਅਫਾਸੁ ਅਹੋਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਿਵਿਕਂ ਪਾਟਙ੍ਕਿ’’ਨ੍ਤਿ.

੪੩੦. ਤੇਨ ਖੋ ਪਨ ਸਮਯੇਨ ਅਡ੍ਢਕਾਸੀ ਗਣਿਕਾ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ. ਸਾ ਚ ਸਾਵਤ੍ਥਿਂ ਗਨ੍ਤੁਕਾਮਾ ਹੋਤਿ – ‘ਭਗਵਤੋ ਸਨ੍ਤਿਕੇ ਉਪਸਮ੍ਪਜ੍ਜਿਸ੍ਸਾਮੀ’ਤਿ. ਅਸ੍ਸੋਸੁਂ ਖੋ ਧੁਤ੍ਤਾ – ‘ਅਡ੍ਢਕਾਸੀ ਕਿਰ ਗਣਿਕਾ ਸਾਵਤ੍ਥਿਂ ਗਨ੍ਤੁਕਾਮਾ’ਤਿ. ਤੇ ਮਗ੍ਗੇ ਪਰਿਯੁਟ੍ਠਿਂਸੁ. ਅਸ੍ਸੋਸਿ ਖੋ ਅਡ੍ਢਕਾਸੀ ਗਣਿਕਾ – ‘ਧੁਤ੍ਤਾ ਕਿਰ ਮਗ੍ਗੇ ਪਰਿਯੁਟ੍ਠਿਤਾ’ਤਿ. ਭਗਵਤੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਉਪਸਮ੍ਪਜ੍ਜਿਤੁਕਾਮਾ; ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦੂਤੇਨਪਿ ਉਪਸਮ੍ਪਾਦੇਤੁ’’ਨ੍ਤਿ.

ਭਿਕ੍ਖੁਦੂਤੇਨ ਉਪਸਮ੍ਪਾਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਦੂਤੇਨ ਉਪਸਮ੍ਪਾਦੇਤਬ੍ਬਾ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ. ਸਿਕ੍ਖਮਾਨਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਸਾਮਣੇਰਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਸਾਮਣੇਰਿਦੂਤੇਨ ਉਪਸਮ੍ਪਾਦੇਨ੍ਤਿ…ਪੇ… ਬਾਲਾਯ ਅਬ੍ਯਤ੍ਤਾਯ ਦੂਤੇਨ ਉਪਸਮ੍ਪਾਦੇਨ੍ਤਿ. ‘‘ਨ, ਭਿਕ੍ਖਵੇ, ਬਾਲਾਯ ਅਬ੍ਯਤ੍ਤਾਯ ਦੂਤੇਨ ਉਪਸਮ੍ਪਾਦੇਤਬ੍ਬਾ. ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਦੂਤੇਨ ਉਪਸਮ੍ਪਾਦੇਤੁਨ੍ਤਿ.

‘‘ਤਾਯ ਦੂਤਾਯ ਭਿਕ੍ਖੁਨਿਯਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ, ਅਯ੍ਯਾ, ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਦੁਤਿਯਮ੍ਪਿ, ਅਯ੍ਯਾ, ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ. ਇਤ੍ਥਨ੍ਨਾਮਾ, ਅਯ੍ਯਾ, ਇਤ੍ਥਨ੍ਨਾਮਾਯ ਅਯ੍ਯਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਤਤਿਯਮ੍ਪਿ, ਅਯ੍ਯਾ, ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ. ਉਲ੍ਲੁਮ੍ਪਤੁ ਤਂ, ਅਯ੍ਯਾ, ਸਙ੍ਘੋ ਅਨੁਕਮ੍ਪਂ ਉਪਾਦਾਯਾ’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਤ੍ਥਨ੍ਨਾਮਾ ਇਤ੍ਥਨ੍ਨਾਮਾਯ ਉਪਸਮ੍ਪਦਾਪੇਕ੍ਖਾ. ਏਕਤੋਉਪਸਮ੍ਪਨ੍ਨਾ ਭਿਕ੍ਖੁਨਿਸਙ੍ਘੇ, ਵਿਸੁਦ੍ਧਾ. ਸਾ ਕੇਨਚਿਦੇਵ ਅਨ੍ਤਰਾਯੇਨ ਨ ਆਗਚ੍ਛਤਿ. ਇਤ੍ਥਨ੍ਨਾਮਾ ਸਙ੍ਘਂ ਉਪਸਮ੍ਪਦਂ ਯਾਚਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਸਙ੍ਘੋ ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਾਯ ਉਪਸਮ੍ਪਦਾ ਇਤ੍ਥਨ੍ਨਾਮਾਯ ਪਵਤ੍ਤਿਨਿਯਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਾਵਦੇਵ ਛਾਯਾ ਮੇਤਬ੍ਬਾ, ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ, ਸਙ੍ਗੀਤਿ ਆਚਿਕ੍ਖਿਤਬ੍ਬਾ, ਭਿਕ੍ਖੁਨਿਯੋ ਵਤ੍ਤਬ੍ਬਾ – ਤਸ੍ਸਾ ਤਯੋ ਚ ਨਿਸ੍ਸਯੇ, ਅਟ੍ਠ ਚ ਅਕਰਣੀਯਾਨਿ ਆਚਿਕ੍ਖੇਯ੍ਯਾਥਾ’’ਤਿ.

੪੩੧. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਰਞ੍ਞੇ ਵਿਹਰਨ੍ਤਿ. ਧੁਤ੍ਤਾ ਦੂਸੇਨ੍ਤਿ. ਭਗਵਤੋ ਏਤਮਤ੍ਥਂ, ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਅਰਞ੍ਞੇ ਵਤ੍ਥਬ੍ਬਂ. ਯਾ ਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਉਪਾਸਕੇਨ ਭਿਕ੍ਖੁਨਿਸਙ੍ਘਸ੍ਸ ਉਦ੍ਦੋਸਿਤੋ ਦਿਨ੍ਨੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦ੍ਦੋਸਿਤ’’ਨ੍ਤਿ. ਉਦ੍ਦੋਸਿਤੋ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਸ੍ਸਯ’’ਨ੍ਤਿ. ਉਪਸ੍ਸਯੋ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਨਵਕਮ੍ਮ’’ਨ੍ਤਿ. ਨਵਕਮ੍ਮਂ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਗ੍ਗਲਿਕਮ੍ਪਿ ਕਾਤੁ’’ਨ੍ਤਿ.

੪੩੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਸਨ੍ਨਿਸਿਨ੍ਨਗਬ੍ਭਾ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ. ਤਸ੍ਸਾ ਪਬ੍ਬਜਿਤਾਯ ਗਬ੍ਭੋ ਵੁਟ੍ਠਾਤਿ. ਅਥ ਖੋ ਤਸ੍ਸਾ ਭਿਕ੍ਖੁਨਿਯਾ ਏਤਦਹੋਸਿ – ‘‘ਕਥਂ ਨੁ ਖੋ ਮਯਾ ਇਮਸ੍ਮਿਂ ਦਾਰਕੇ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੋਸੇਤੁਂ, ਯਾਵ ਸੋ ਦਾਰਕੋ ਵਿਞ੍ਞੁਤਂ ਪਾਪੁਣਾਤੀ’’ਤਿ.