੪. ਪਟਿਸਾਰਣੀਯਕਮ੍ਮਂ

੩੩. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸੁਧਮ੍ਮੋ ਮਚ੍ਛਿਕਾਸਣ੍ਡੇ ਚਿਤ੍ਤਸ੍ਸ ਗਹਪਤਿਨੋ ਆਵਾਸਿਕੋ ਹੋਤਿ, ਨਵਕਮ੍ਮਿਕੋ ਧੁਵਭਤ੍ਤਿਕੋ. ਯਦਾ ਚਿਤ੍ਤੋ ਗਹਪਤਿ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਨਿਮਨ੍ਤੇਤੁਕਾਮੋ ਹੋਤਿ ਤਦਾ ਨ ਆਯਸ੍ਮਨ੍ਤਂ ਸੁਧਮ੍ਮਂ ਅਨਪਲੋਕੇਤ੍ਵਾ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਨਿਮਨ੍ਤੇਤਿ.

ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਥੇਰਾ ਭਿਕ੍ਖੂ, ਆਯਸ੍ਮਾ ਚ ਸਾਰਿਪੁਤ੍ਤੋ, ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ, ਆਯਸ੍ਮਾ ਚ ਮਹਾਕਚ੍ਚਾਨੋ, ਆਯਸ੍ਮਾ ਚ ਮਹਾਕੋਟ੍ਠਿਕੋ, ਆਯਸ੍ਮਾ ਚ ਮਹਾਕਪ੍ਪਿਨੋ, ਆਯਸ੍ਮਾ ਚ ਮਹਾਚੁਨ੍ਦੋ, ਆਯਸ੍ਮਾ ਚ ਅਨੁਰੁਦ੍ਧੋ, ਆਯਸ੍ਮਾ ਚ ਰੇਵਤੋ, ਆਯਸ੍ਮਾ ਚ ਉਪਾਲਿ, ਆਯਸ੍ਮਾ ਚ ਆਨਨ੍ਦੋ, ਆਯਸ੍ਮਾ ਚ ਰਾਹੁਲੋ, ਕਾਸੀਸੁ ਚਾਰਿਕਂ ਚਰਮਾਨਾ ਯੇਨ ਮਚ੍ਛਿਕਾਸਣ੍ਡੋ ਤਦਵਸਰੁਂ.

ਅਸ੍ਸੋਸਿ ਖੋ ਚਿਤ੍ਤੋ ਗਹਪਤਿ ਥੇਰਾ ਕਿਰ ਭਿਕ੍ਖੂ ਮਚ੍ਛਿਕਾਸਣ੍ਡਂ ਅਨੁਪ੍ਪਤ੍ਤਾਤਿ. ਅਥ ਖੋ ਚਿਤ੍ਤੋ ਗਹਪਤਿ ਯੇਨ ਥੇਰਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਥੇਰੇ ਭਿਕ੍ਖੂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਚਿਤ੍ਤਂ ਗਹਪਤਿਂ ਆਯਸ੍ਮਾ ਸਾਰਿਪੁਤ੍ਤੋ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ.

ਅਥ ਖੋ ਚਿਤ੍ਤੋ ਗਹਪਤਿ ਆਯਸ੍ਮਤਾ ਸਾਰਿਪੁਤ੍ਤੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਥੇਰੇ ਭਿਕ੍ਖੂ ਏਤਦਵੋਚ – ‘‘ਅਧਿਵਾਸੇਨ੍ਤੁ ਮੇ, ਭਨ੍ਤੇ, ਥੇਰਾ ਸ੍ਵਾਤਨਾਯ ਆਗਨ੍ਤੁਕਭਤ੍ਤ’’ਨ੍ਤਿ. ਅਧਿਵਾਸੇਸੁਂ ਖੋ ਥੇਰਾ ਭਿਕ੍ਖੂ [ਅਧਿਵਾਸੇਸੁਂ ਖੋ ਤੇ ਥੇਰਾ ਭਿਕ੍ਖੂ (ਸ੍ਯਾ.)] ਤੁਣ੍ਹੀਭਾਵੇਨ.

ਅਥ ਖੋ ਚਿਤ੍ਤੋ ਗਹਪਤਿ ਥੇਰਾਨਂ ਭਿਕ੍ਖੂਨਂ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਥੇਰੇ ਭਿਕ੍ਖੂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਯੇਨਾਯਸ੍ਮਾ ਸੁਧਮ੍ਮੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸੁਧਮ੍ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਚਿਤ੍ਤੋ ਗਹਪਤਿ ਆਯਸ੍ਮਨ੍ਤਂ ਸੁਧਮ੍ਮਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਅਯ੍ਯੋ ਸੁਧਮ੍ਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਥੇਰੇਹੀ’’ਤਿ. ਅਥ ਖੋ ਆਯਸ੍ਮਾ ਸੁਧਮ੍ਮੋ ‘ਪੁਬ੍ਬੇ ਖ੍ਵਾਯਂ ਚਿਤ੍ਤੋ ਗਹਪਤਿ ਯਦਾ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਨਿਮਨ੍ਤੇਤੁਕਾਮੋ ਨ ਮਂ ਅਨਪਲੋਕੇਤ੍ਵਾ ਸਙ੍ਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਨਿਮਨ੍ਤੇਤਿ; ਸੋਦਾਨਿ ਮਂ ਅਨਪਲੋਕੇਤ੍ਵਾ ਥੇਰੇ ਭਿਕ੍ਖੂ ਨਿਮਨ੍ਤੇਸਿ; ਦੁਟ੍ਠੋਦਾਨਾਯਂ ਚਿਤ੍ਤੋ ਗਹਪਤਿ ਅਨਪੇਕ੍ਖੋ ਵਿਰਤ੍ਤਰੂਪੋ ਮਯੀ’ਤਿ ਚਿਤ੍ਤਂ ਗਹਪਤਿਂ ਏਤਦਵੋਚ – ‘‘ਅਲਂ, ਗਹਪਤਿ, ਨਾਧਿਵਾਸੇਮੀ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਚਿਤ੍ਤੋ ਗਹਪਤਿ ਆਯਸ੍ਮਨ੍ਤਂ ਸੁਧਮ੍ਮਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਅਯ੍ਯੋ ਸੁਧਮ੍ਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਥੇਰੇਹੀ’’ਤਿ. ‘‘ਅਲਂ, ਗਹਪਤਿ, ਨਾਧਿਵਾਸੇਮੀ’’ਤਿ. ਅਥ ਖੋ ਚਿਤ੍ਤੋ ਗਹਪਤਿ ‘ਕਿਂ ਮੇ ਕਰਿਸ੍ਸਤਿ ਅਯ੍ਯੋ ਸੁਧਮ੍ਮੋ ਅਧਿਵਾਸੇਨ੍ਤੋ ਵਾ ਅਨਧਿਵਾਸੇਨ੍ਤੋ ਵਾ’ਤਿ ਆਯਸ੍ਮਨ੍ਤਂ ਸੁਧਮ੍ਮਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

੩੪. ਅਥ ਖੋ ਚਿਤ੍ਤੋ ਗਹਪਤਿ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਥੇਰਾਨਂ ਭਿਕ੍ਖੂਨਂ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਸਿ. ਅਥ ਖੋ ਆਯਸ੍ਮਾ ਸੁਧਮ੍ਮੋ ‘ਯਂਨੂਨਾਹਂ ਚਿਤ੍ਤਸ੍ਸ ਗਹਪਤਿਨੋ ਥੇਰਾਨਂ ਭਿਕ੍ਖੂਨਂ ਪਟਿਯਤ੍ਤਂ ਪਸ੍ਸੇਯ੍ਯ’ਨ੍ਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਚਿਤ੍ਤਸ੍ਸ ਗਹਪਤਿਨੋ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਚਿਤ੍ਤੋ ਗਹਪਤਿ ਯੇਨਾਯਸ੍ਮਾ ਸੁਧਮ੍ਮੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸੁਧਮ੍ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਚਿਤ੍ਤਂ ਗਹਪਤਿਂ ਆਯਸ੍ਮਾ ਸੁਧਮ੍ਮੋ ਏਤਦਵੋਚ – ‘‘ਪਹੂਤਂ ਖੋ ਤੇ ਇਦਂ, ਗਹਪਤਿ, ਖਾਦਨੀਯਂ ਭੋਜਨੀਯਂ ਪਟਿਯਤ੍ਤਂ; ਏਕਾ ਚ ਖੋ ਇਧ ਨਤ੍ਥਿ ਯਦਿਦਂ ਤਿਲਸਙ੍ਗੁਲ਼ਿਕਾ’’ਤਿ. ‘‘ਬਹੁਮ੍ਹਿ ਵਤ, ਭਨ੍ਤੇ, ਰਤਨੇ ਬੁਦ੍ਧਵਚਨੇ [ਭਨ੍ਤੇ ਬੁਦ੍ਧਵਚਨੇ (ਸ੍ਯਾ.)] ਵਿਜ੍ਜਮਾਨੇ ਅਯ੍ਯੇਨ ਸੁਧਮ੍ਮੇਨ ਯਦੇਵ ਕਿਞ੍ਚਿ ਭਾਸਿਤਂ ਯਦਿਦਂ ਤਿਲਸਙ੍ਗੁਲ਼ਿਕਾਤਿ. ਭੂਤਪੁਬ੍ਬਂ, ਭਨ੍ਤੇ, ਦਕ੍ਖਿਣਾਪਥਕਾ ਵਾਣਿਜਾ ਪੁਰਤ੍ਥਿਮਂ ਜਨਪਦਂ ਅਗਮਂਸੁ ਵਾਣਿਜ੍ਜਾਯ. ਤੇ ਤਤੋ ਕੁਕ੍ਕੁਟਿਂ ਆਨੇਸੁਂ. ਅਥ ਖੋ ਸਾ, ਭਨ੍ਤੇ, ਕੁਕ੍ਕੁਟੀ ਕਾਕੇਨ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਸਾ ਪੋਤਕਂ ਜਨੇਸਿ. ਯਦਾ ਖੋ ਸੋ, ਭਨ੍ਤੇ, ਕੁਕ੍ਕੁਟਪੋਤਕੋ ਕਾਕਵਸ੍ਸਂ ਵਸ੍ਸਿਤੁਕਾਮੋ ਹੋਤਿ, ਕਾਕਕੁਕ੍ਕੁਟੀਤਿ ਵਸ੍ਸਤਿ; ਯਦਾ ਕੁਕ੍ਕੁਟਿਵਸ੍ਸਂ ਵਸ੍ਸਿਤੁਕਾਮੋ ਹੋਤਿ, ਕੁਕ੍ਕੁਟਿਕਾਕਾਤਿ ਵਸ੍ਸਤਿ. ਏਵਮੇਵ ਖੋ, ਭਨ੍ਤੇ, ਬਹੁਮ੍ਹਿ ਰਤਨੇ ਬੁਦ੍ਧਵਚਨੇ ਵਿਜ੍ਜਮਾਨੇ ਅਯ੍ਯੇਨ ਸੁਧਮ੍ਮੇਨ ਯਦੇਵ ਕਿਞ੍ਚਿ ਭਾਸਿਤਂ ਯਦਿਦਂ ਤਿਲਸਂਗੁਲ਼ਿਕਾ’’ਤਿ. ‘‘ਅਕ੍ਕੋਸਸਿ ਮਂ ਤ੍ਵਂ, ਗਹਪਤਿ, ਪਰਿਭਾਸਸਿ ਮਂ ਤ੍ਵਂ, ਗਹਪਤਿ. ਏਸੋ ਤੇ, ਗਹਪਤਿ, ਆਵਾਸੋ, ਪਕ੍ਕਮਿਸ੍ਸਾਮੀ’’ਤਿ. ‘‘ਨਾਹਂ, ਭਨ੍ਤੇ, ਅਯ੍ਯਂ ਸੁਧਮ੍ਮਂ ਅਕ੍ਕੋਸਾਮਿ, ਪਰਿਭਾਸਾਮਿ [ਨ ਪਰਿਭਾਸਾਮਿ (ਸੀ. ਸ੍ਯਾ.)]. ਵਸਤੁ, ਭਨ੍ਤੇ, ਅਯ੍ਯੋ ਸੁਧਮ੍ਮੋ ਮਚ੍ਛਿਕਾਸਣ੍ਡੇ. ਰਮਣੀਯਂ ਅਮ੍ਬਾਟਕਵਨਂ. ਅਹਂ ਅਯ੍ਯਸ੍ਸ ਸੁਧਮ੍ਮਸ੍ਸ ਉਸ੍ਸੁਕ੍ਕਂ ਕਰਿਸ੍ਸਾਮਿ, ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਆਯਸ੍ਮਾ ਸੁਧਮ੍ਮੋ ਚਿਤ੍ਤਂ ਗਹਪਤਿਂ ਏਤਦਵੋਚ – ‘‘ਅਕ੍ਕੋਸਸਿ ਮਂ ਤ੍ਵਂ, ਗਹਪਤਿ, ਪਰਿਭਾਸਸਿ ਮਂ ਤ੍ਵਂ, ਗਹਪਤਿ. ਏਸੋ ਤੇ, ਗਹਪਤਿ, ਆਵਾਸੋ, ਪਕ੍ਕਮਿਸ੍ਸਾਮੀ’’ਤਿ. ‘‘ਕਹਂ, ਭਨ੍ਤੇ, ਅਯ੍ਯੋ ਸੁਧਮ੍ਮੋ ਗਮਿਸ੍ਸਤੀ’’ਤਿ? ‘‘ਸਾਵਤ੍ਥਿਂ ਖੋ ਅਹਂ, ਗਹਪਤਿ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਤੇਨ ਹਿ, ਭਨ੍ਤੇ, ਯਞ੍ਚ ਅਤ੍ਤਨਾ ਭਣਿਤਂ, ਯਞ੍ਚ ਮਯਾ ਭਣਿਤਂ ਤਂ ਸਬ੍ਬਂ ਭਗਵਤੋ ਆਰੋਚੇਹਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਅਯ੍ਯੋ ਸੁਧਮ੍ਮੋ ਪੁਨਦੇਵ ਮਚ੍ਛਿਕਾਸਣ੍ਡਂ ਪਚ੍ਚਾਗਚ੍ਛੇਯ੍ਯਾ’’ਤਿ.

੩੫. ਅਥ ਖੋ ਆਯਸ੍ਮਾ ਸੁਧਮ੍ਮੋ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸੁਧਮ੍ਮੋ ਯਞ੍ਚ ਅਤ੍ਤਨਾ ਭਣਿਤਂ ਯਞ੍ਚ ਚਿਤ੍ਤੇਨ ਗਹਪਤਿਨਾ ਭਣਿਤਂ ਤਂ ਸਬ੍ਬਂ ਭਗਵਤੋ ਆਰੋਚੇਸਿ.

ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਚਿਤ੍ਤਂ ਗਹਪਤਿਂ ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਸ੍ਸਸਿ, ਹੀਨੇਨ ਵਮ੍ਭੇਸ੍ਸਸਿ? ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਰੋਤੁ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ – ਪਠਮਂ ਸੁਧਮ੍ਮੋ ਭਿਕ੍ਖੁ ਚੋਦੇਤਬ੍ਬੋ, ਚੋਦੇਤ੍ਵਾ ਸਾਰੇਤਬ੍ਬੋ, ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤਬ੍ਬੋ, ਆਪਤ੍ਤਿਂ ਆਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩੬. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਚਿਤ੍ਤਂ ਗਹਪਤਿਂ ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਤਿ, ਹੀਨੇਨ ਵਮ੍ਭੇਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਰੇਯ੍ਯ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਚਿਤ੍ਤਂ ਗਹਪਤਿਂ ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਤਿ, ਹੀਨੇਨ ਵਮ੍ਭੇਤਿ. ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਰੋਤਿ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ. ਯਸ੍ਸਾਯਸ੍ਮਤੋ ਖਮਤਿ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਕਰਣਂ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਚਿਤ੍ਤਂ ਗਹਪਤਿਂ ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਤਿ, ਹੀਨੇਨ ਵਮ੍ਭੇਤਿ. ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਰੋਤਿ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ. ਯਸ੍ਸਾਯਸ੍ਮਤੋ ਖਮਤਿ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਕਰਣਂ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ – ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਧਮ੍ਮਕਮ੍ਮਦ੍ਵਾਦਸਕਂ

੩੭. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਪ੍ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ…ਪੇ… ਅਸਮ੍ਮੁਖਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਞ੍ਞਾਯ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਨਾਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਸਾਰੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

ਪਟਿਸਾਰਣੀਯਕਮ੍ਮੇ ਅਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਧਮ੍ਮਕਮ੍ਮਦ੍ਵਾਦਸਕਂ

੩੮. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਮ੍ਮੁਖਾ ਕਤਂ ਹੋਤਿ, ਪਟਿਪੁਚ੍ਛਾ ਕਤਂ ਹੋਤਿ, ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਯਾ ਕਤਂ ਹੋਤਿ, ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ…ਪੇ… ਚੋਦੇਤ੍ਵਾ ਕਤਂ ਹੋਤਿ, ਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ…ਪੇ… ਸਮ੍ਮੁਖਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਪਟਿਪੁਚ੍ਛਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਪਟਿਞ੍ਞਾਯ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਚੋਦੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਸਾਰੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਟਿਸਾਰਣੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

ਪਟਿਸਾਰਣੀਯਕਮ੍ਮੇ ਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਆਕਙ੍ਖਮਾਨਚਤੁਕ੍ਕਂ

੩੯. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ. ਗਿਹੀਨਂ ਅਲਾਭਾਯ ਪਰਿਸਕ੍ਕਤਿ, ਗਿਹੀਨਂ ਅਨਤ੍ਥਾਯ ਪਰਿਸਕ੍ਕਤਿ, ਗਿਹੀਨਂ ਅਨਾਵਾਸਾਯ [ਅਵਾਸਾਯ (ਸੀ.)] ਪਰਿਸਕ੍ਕਤਿ, ਗਿਹੀ ਅਕ੍ਕੋਸਤਿ ਪਰਿਭਾਸਤਿ, ਗਿਹੀ ਗਿਹੀਹਿ ਭੇਦੇਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ. ਗਿਹੀਨਂ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਗਿਹੀਨਂ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਗਿਹੀਨਂ ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਗਿਹੀ ਹੀਨੇਨ ਖੁਂਸੇਤਿ ਹੀਨੇਨ ਵਮ੍ਭੇਤਿ, ਗਿਹੀਨਂ ਧਮ੍ਮਿਕਂ ਪਟਿਸ੍ਸਵਂ ਨ ਸਚ੍ਚਾਪੇਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ.

‘‘ਪਞ੍ਚਨ੍ਨਂ, ਭਿਕ੍ਖਵੇ, ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ. ਏਕੋ ਗਿਹੀਨਂ ਅਲਾਭਾਯ ਪਰਿਸਕ੍ਕਤਿ, ਏਕੋ ਗਿਹੀਨਂ ਅਨਤ੍ਥਾਯ ਪਰਿਸਕ੍ਕਤਿ, ਏਕੋ ਗਿਹੀਨਂ ਅਨਾਵਾਸਾਯ ਪਰਿਸਕ੍ਕਤਿ, ਏਕੋ ਗਿਹੀ ਅਕ੍ਕੋਸਤਿ ਪਰਿਭਾਸਤਿ, ਏਕੋ ਗਿਹੀ ਗਿਹੀਹਿ ਭੇਦੇਤਿ – ਇਮੇਸਂ ਖੋ, ਭਿਕ੍ਖਵੇ, ਪਞ੍ਚਨ੍ਨਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਪਞ੍ਚਨ੍ਨਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ. ਏਕੋ ਗਿਹੀਨਂ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਏਕੋ ਗਿਹੀਨਂ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਏਕੋ ਗਿਹੀਨਂ ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਏਕੋ ਗਿਹੀ ਹੀਨੇਨ ਖੁਂਸੇਤਿ ਹੀਨੇਨ ਵਮ੍ਭੇਤਿ, ਏਕੋ ਗਿਹੀਨਂ ਧਮ੍ਮਿਕਂ ਪਟਿਸ੍ਸਵਂ ਨ ਸਚ੍ਚਾਪੇਤਿ – ਇਮੇਸਂ ਖੋ, ਭਿਕ੍ਖਵੇ, ਪਞ੍ਚਨ੍ਨਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਪਟਿਸਾਰਣੀਯਕਮ੍ਮਂ ਕਰੇਯ੍ਯ.

ਆਕਙ੍ਖਮਾਨਚਤੁਕ੍ਕਂ ਨਿਟ੍ਠਿਤਂ.

ਅਟ੍ਠਾਰਸਵਤ੍ਤਂ

੪੦. ‘‘ਪਟਿਸਾਰਣੀਯਕਮ੍ਮਕਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ. ਯਾਯ ਆਪਤ੍ਤਿਯਾ ਸਙ੍ਘੇਨ ਪਟਿਸਾਰਣੀਯਕਮ੍ਮਂ ਕਤਂ ਹੋਤਿ ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ; ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ.

ਪਟਿਸਾਰਣੀਯਕਮ੍ਮੇ ਅਟ੍ਠਾਰਸਵਤ੍ਤਂ ਨਿਟ੍ਠਿਤਂ.

੪੧. ਅਥ ਖੋ ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਅਕਾਸਿ – ‘‘ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋ’’ਤਿ. ਸੋ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਮਚ੍ਛਿਕਾਸਣ੍ਡਂ ਗਨ੍ਤ੍ਵਾ ਮਙ੍ਕੁਭੂਤੋ ਨਾਸਕ੍ਖਿ ਚਿਤ੍ਤਂ ਗਹਪਤਿਂ ਖਮਾਪੇਤੁਂ. ਪੁਨਦੇਵ ਸਾਵਤ੍ਥਿਂ ਪਚ੍ਚਾਗਞ੍ਛਿ. ਭਿਕ੍ਖੂ ਏਵਮਾਹਂਸੁ – ‘‘ਖਮਾਪਿਤੋ ਤਯਾ, ਆਵੁਸੋ ਸੁਧਮ੍ਮ, ਚਿਤ੍ਤੋ ਗਹਪਤੀ’’ਤਿ? ‘‘ਇਧਾਹਂ, ਆਵੁਸੋ, ਮਚ੍ਛਿਕਾਸਣ੍ਡਂ ਗਨ੍ਤ੍ਵਾ ਮਙ੍ਕੁਭੂਤੋ ਨਾਸਕ੍ਖਿਂ ਚਿਤ੍ਤਂ ਗਹਪਤਿਂ ਖਮਾਪੇਤੁ’’ਨ੍ਤਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ…. ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਅਨੁਦੂਤਂ ਦੇਤੁ – ਚਿਤ੍ਤਂ ਗਹਪਤਿਂ ਖਮਾਪੇਤੁਂ. ਏਵਞ੍ਚ ਪਨ ਭਿਕ੍ਖਵੇ ਦਾਤਬ੍ਬੋ – ਪਠਮਂ ਭਿਕ੍ਖੁ ਯਾਚਿਤਬ੍ਬੋ, ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸੁਧਮ੍ਮਸ੍ਸ ਭਿਕ੍ਖੁਨੋ ਅਨੁਦੂਤਂ ਦਦੇਯ੍ਯ ਚਿਤ੍ਤਂ ਗਹਪਤਿਂ ਖਮਾਪੇਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਸੁਧਮ੍ਮਸ੍ਸ ਭਿਕ੍ਖੁਨੋ ਅਨੁਦੂਤਂ ਦੇਤਿ ਚਿਤ੍ਤਂ ਗਹਪਤਿਂ ਖਮਾਪੇਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸੁਧਮ੍ਮਸ੍ਸ ਭਿਕ੍ਖੁਨੋ ਅਨੁਦੂਤਸ੍ਸ ਦਾਨਂ ਚਿਤ੍ਤਂ ਗਹਪਤਿਂ ਖਮਾਪੇਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਸੁਧਮ੍ਮਸ੍ਸ ਭਿਕ੍ਖੁਨੋ ਅਨੁਦੂਤੋ ਚਿਤ੍ਤਂ ਗਹਪਤਿਂ ਖਮਾਪੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੪੨. ‘‘ਤੇਨ, ਭਿਕ੍ਖਵੇ, ਸੁਧਮ੍ਮੇਨ ਭਿਕ੍ਖੁਨਾ ਅਨੁਦੂਤੇਨ ਭਿਕ੍ਖੁਨਾ ਸਦ੍ਧਿਂ ਮਚ੍ਛਿਕਾਸਣ੍ਡਂ ਗਨ੍ਤ੍ਵਾ ਚਿਤ੍ਤੋ ਗਹਪਤਿ ਖਮਾਪੇਤਬ੍ਬੋ – ‘ਖਮ, ਗਹਪਤਿ, ਪਸਾਦੇਮਿ ਤ’ਨ੍ਤਿ. ਏਵਞ੍ਚੇ ਵੁਚ੍ਚਮਾਨੋ ਖਮਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਖਮਤਿ, ਅਨੁਦੂਤੇਨ ਭਿਕ੍ਖੁਨਾ ਵਤ੍ਤਬ੍ਬੋ – ‘ਖਮ, ਗਹਪਤਿ, ਇਮਸ੍ਸ ਭਿਕ੍ਖੁਨੋ, ਪਸਾਦੇਤਿ ਤ’ਨ੍ਤਿ. ਏਵਞ੍ਚੇ ਵੁਚ੍ਚਮਾਨੋ ਖਮਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਖਮਤਿ, ਅਨੁਦੂਤੇਨ ਭਿਕ੍ਖੁਨਾ ਵਤ੍ਤਬ੍ਬੋ – ‘ਖਮ, ਗਹਪਤਿ, ਇਮਸ੍ਸ ਭਿਕ੍ਖੁਨੋ, ਅਹਂ ਤਂ ਪਸਾਦੇਮੀ’ਤਿ. ਏਵਞ੍ਚੇ ਵੁਚ੍ਚਮਾਨੋ ਖਮਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਖਮਤਿ, ਅਨੁਦੂਤੇਨ ਭਿਕ੍ਖੁਨਾ ਵਤ੍ਤਬ੍ਬੋ – ‘ਖਮ, ਗਹਪਤਿ, ਇਮਸ੍ਸ ਭਿਕ੍ਖੁਨੋ, ਸਙ੍ਘਸ੍ਸ ਵਚਨੇਨਾ’ਤਿ. ਏਵਞ੍ਚੇ ਵੁਚ੍ਚਮਾਨੋ ਖਮਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਖਮਤਿ, ਅਨੁਦੂਤੇਨ ਭਿਕ੍ਖੁਨਾ ਸੁਧਮ੍ਮੋ ਭਿਕ੍ਖੁ [ਸੁਧਮ੍ਮਂ ਭਿਕ੍ਖੁਂ… ਸਾ ਆਪਤ੍ਤਿ ਦੇਸਾਪੇਤਬ੍ਬਾਤਿ (ਸੀ. ਸ੍ਯਾ.)] ਚਿਤ੍ਤਸ੍ਸ ਗਹਪਤਿਨੋ ਦਸ੍ਸਨੂਪਚਾਰਂ ਅਵਿਜਹਾਪੇਤ੍ਵਾ ਸਵਨੂਪਚਾਰਂ ਅਵਿਜਹਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਤਂ ਆਪਤ੍ਤਿਂ ਦੇਸਾਪੇਤਬ੍ਬੋ’’ਤਿ [ਸੁਧਮ੍ਮਂ ਭਿਕ੍ਖੁਂ… ਸਾ ਆਪਤ੍ਤਿ ਦੇਸਾਪੇਤਬ੍ਬਾਤਿ (ਸੀ. ਸ੍ਯਾ.)].

ਅਥ ਖੋ ਆਯਸ੍ਮਾ ਸੁਧਮ੍ਮੋ ਅਨੁਦੂਤੇਨ ਭਿਕ੍ਖੁਨਾ ਸਦ੍ਧਿਂ ਮਚ੍ਛਿਕਾਸਣ੍ਡਂ ਗਨ੍ਤ੍ਵਾ ਚਿਤ੍ਤਂ ਗਹਪਤਿਂ ਖਮਾਪੇਸਿ. ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਅਹਂ, ਆਵੁਸੋ, ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੪੩. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ, ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

[ਪਰਿ. ੪੨੦] ‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਪਟਿਸਾਰਣੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਗਰਹਤਿ, ਕਮ੍ਮਿਕੇ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਪਵਾਰਣਂ ਠਪੇਤਿ, ਸਵਚਨੀਯਂ ਕਰੋਤਿ, ਅਨੁਵਾਦਂ ਪਟ੍ਠਪੇਤਿ, ਓਕਾਸਂ ਕਾਰੇਤਿ, ਚੋਦੇਤਿ, ਸਾਰੇਤਿ, ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ’’.

ਪਟਿਸਾਰਣੀਯਕਮ੍ਮੇ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੪੪. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਉਪਸਮ੍ਪਾਦੇਤਿ, ਨ ਨਿਸ੍ਸਯਂ ਦੇਤਿ, ਨ ਸਾਮਣੇਰਂ ਉਪਟ੍ਠਾਪੇਤਿ, ਨ ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਨ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਪਟਿਸਾਰਣੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਨ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਨ ਗਰਹਤਿ, ਕਮ੍ਮਿਕੇ ਨ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਨ ਪਵਾਰਣਂ ਠਪੇਤਿ, ਨ ਸਵਚਨੀਯਂ ਕਰੋਤਿ, ਨ ਅਨੁਵਾਦਂ ਪਟ੍ਠਪੇਤਿ, ਨ ਓਕਾਸਂ ਕਾਰੇਤਿ, ਨ ਚੋਦੇਤਿ, ਨ ਸਾਰੇਤਿ, ਨ ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਪਟਿਸਾਰਣੀਯਕਮ੍ਮੇ ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

੪੫. ‘‘ਏਵਞ੍ਚ ਪਨ, ਭਿਕ੍ਖਵੇ, ਪਟਿਪ੍ਪਸ੍ਸਮ੍ਭੇਤਬ੍ਬਂ. ਤੇਨ [ਤੇਨ ਹਿ (ਸ੍ਯਾ. ਕ.)], ਭਿਕ੍ਖਵੇ, ਸੁਧਮ੍ਮੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੁਧਮ੍ਮੋ ਭਿਕ੍ਖੁ ਸਙ੍ਘੇਨ ਪਟਿਸਾਰਣੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਪਟਿਪ੍ਪਸ੍ਸਦ੍ਧਂ ਸਙ੍ਘੇਨ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਪਟਿਸਾਰਣੀਯਕਮ੍ਮਂ ਨਿਟ੍ਠਿਤਂ ਚਤੁਤ੍ਥਂ.