੧. ਕਮ੍ਮਕ੍ਖਨ੍ਧਕਂ

੧. ਤਜ੍ਜਨੀਯਕਮ੍ਮਂ

੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ [ਅਲਮਤ੍ਥਤਰਾ ਚ (ਸ੍ਯਾ. ਕ.)]. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤੀ’’ਤਿ.

੨. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਮੋਘਪੁਰਿਸਾਨਂ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਅਤ੍ਤਨਾ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ? ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ. ਅਥ ਖ੍ਵੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ.

ਅਥ ਖੋ ਭਗਵਾ ਤੇ [ਪਣ੍ਡੁਕਲੋਹਿਤਕੇ (ਸ੍ਯਾ.)] ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ ਦੁਪ੍ਪੋਸਤਾਯ ਮਹਿਚ੍ਛਤਾਯ ਅਸਨ੍ਤੁਟ੍ਠਿਤਾਯ [ਅਸਨ੍ਤੁਟ੍ਠਤਾਯ (ਸ੍ਯਾ.), ਅਸਨ੍ਤੁਟ੍ਠਿਯਾ (ਸੀ.)] ਸਙ੍ਗਣਿਕਾਯ ਕੋਸਜ੍ਜਸ੍ਸ ਅਵਣ੍ਣਂ ਭਾਸਿਤ੍ਵਾ ਅਨੇਕਪਰਿਯਾਯੇਨ ਸੁਭਰਤਾਯ ਸੁਪੋਸਤਾਯ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ [ਵਿਰਿਯਾਰਮ੍ਭਸ੍ਸ (ਸੀ.), ਵੀਰਿਯਾਰਬ੍ਭਸ੍ਸ (ਕ.)] ਵਣ੍ਣਂ ਭਾਸਿਤ੍ਵਾ ਭਿਕ੍ਖੂਨਂ ਤਦਨੁਚ੍ਛਵਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਕਰੋਤੁ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ. ਪਠਮਂ ਪਣ੍ਡੁਕਲੋਹਿਤਕਾ ਭਿਕ੍ਖੂ ਚੋਦੇਤਬ੍ਬਾ, ਚੋਦੇਤ੍ਵਾ ਸਾਰੇਤਬ੍ਬਾ, ਸਾਰੇਤ੍ਵਾ ਆਪਤ੍ਤਿਂ [ਆਪਤ੍ਤਿ (ਸੀ. ਸ੍ਯਾ.)] ਆਰੋਪੇਤਬ੍ਬਾ, ਆਪਤ੍ਤਿਂ ਆਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਕਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਕਰਣਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਕਰਣਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ…ਪੇ… ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘ਮਾ ਖੋ ਤੁਮ੍ਹੇ, ਆਯਸ੍ਮਨ੍ਤੋ, ਏਸੋ ਅਜੇਸਿ. ਬਲਵਾਬਲਵਂ ਪਟਿਮਨ੍ਤੇਥ. ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ. ਮਾ ਚਸ੍ਸ ਭਾਯਿਤ੍ਥ. ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’ਤਿ. ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਕਰਣਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਧਮ੍ਮਕਮ੍ਮਦ੍ਵਾਦਸਕਂ

੪. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ [ਅਧਮ੍ਮਕਮ੍ਮਞ੍ਚੇਵ (ਸ੍ਯਾ.)] ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਪ੍ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਚੋਦੇਤ੍ਵਾ ਕਤਂ ਹੋਤਿ, ਅਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਪ੍ਪਟਿਞ੍ਞਾਯ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਚੋਦੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਾਰੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

ਅਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਧਮ੍ਮਕਮ੍ਮਦ੍ਵਾਦਸਕਂ

੫. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਮ੍ਮੁਖਾ ਕਤਂ ਹੋਤਿ, ਪਟਿਪੁਚ੍ਛਾ ਕਤਂ ਹੋਤਿ, ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਯਾ ਕਤਂ ਹੋਤਿ, ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਚੋਦੇਤ੍ਵਾ ਕਤਂ ਹੋਤਿ, ਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਮ੍ਮੁਖਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਪਟਿਪੁਚ੍ਛਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਪਟਿਞ੍ਞਾਯ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਚੋਦੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਾਰੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

ਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਆਕਙ੍ਖਮਾਨਛਕ੍ਕਂ

੬. [ਪਰਿ. ੩੨੩] ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

‘‘ਤਿਣ੍ਣਂ, ਭਿਕ੍ਖਵੇ, ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਏਕੋ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਏਕੋ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਏਕੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਏਕੋ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਏਕੋ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਏਕੋ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ. ਏਕੋ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਏਕੋ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਏਕੋ ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਤਜ੍ਜਨੀਯਕਮ੍ਮਂ ਕਰੇਯ੍ਯ.

ਆਕਙ੍ਖਮਾਨਛਕ੍ਕਂ ਨਿਟ੍ਠਿਤਂ.

ਅਟ੍ਠਾਰਸਵਤ੍ਤਂ

੭. ‘‘ਤਜ੍ਜਨੀਯਕਮ੍ਮਕਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ [ਸਮ੍ਮਤਿ (ਸ੍ਯਾ.)] ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ. ਯਾਯ ਆਪਤ੍ਤਿਯਾ ਸਙ੍ਘੇਨ ਤਜ੍ਜਨੀਯਕਮ੍ਮਂ ਕਤਂ ਹੋਤਿ ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ; ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ [ਨ ਭਿਕ੍ਖੂ ਭਿਕ੍ਖੂਹਿ (ਸ੍ਯਾ.)] ਸਮ੍ਪਯੋਜੇਤਬ੍ਬ’’ਨ੍ਤਿ.

ਤਜ੍ਜਨੀਯਕਮ੍ਮੇ ਅਟ੍ਠਾਰਸਵਤ੍ਤਂ ਨਿਟ੍ਠਿਤਂ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੮. ਅਥ ਖੋ ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਅਕਾਸਿ. ਤੇ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਨ੍ਤਿ, ਲੋਮਂ ਪਾਤੇਨ੍ਤਿ, ਨੇਤ੍ਥਾਰਂ ਵਤ੍ਤਨ੍ਤਿ, ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਮਯਂ, ਆਵੁਸੋ, ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਾਮ, ਲੋਮਂ ਪਾਤੇਮ, ਨੇਤ੍ਥਾਰਂ ਵਤ੍ਤਾਮ, ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ…. ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ, ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

[ਪਰਿ. ੪੨੦] ‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਤਜ੍ਜਨੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਗਰਹਤਿ, ਕਮ੍ਮਿਕੇ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਪਵਾਰਣਂ ਠਪੇਤਿ, ਸਵਚਨੀਯਂ ਕਰੋਤਿ, ਅਨੁਵਾਦਂ ਪਟ੍ਠਪੇਤਿ, ਓਕਾਸਂ ਕਾਰੇਤਿ, ਚੋਦੇਤਿ, ਸਾਰੇਤਿ, ਭਿਕ੍ਖੂਹਿ ਸਮ੍ਪਯੋਜੇਤਿ [ਭਿਕ੍ਖੂ ਭਿਕ੍ਖੂਹਿ ਸਮ੍ਪਯੋਜੇਤਿ (ਸ੍ਯਾ.)] – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੯. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਉਪਸਮ੍ਪਾਦੇਤਿ, ਨ ਨਿਸ੍ਸਯਂ ਦੇਤਿ, ਨ ਸਾਮਣੇਰਂ ਉਪਟ੍ਠਾਪੇਤਿ, ਨ ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਨ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਤਜ੍ਜਨੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਨ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਨ ਗਰਹਤਿ, ਕਮ੍ਮਿਕੇ ਨ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਨ ਪਵਾਰਣਂ ਠਪੇਤਿ, ਨ ਸਵਚਨੀਯਂ ਕਰੋਤਿ, ਨ ਅਨੁਵਾਦਂ ਪਟ੍ਠਪੇਤਿ, ਨ ਓਕਾਸਂ ਕਾਰੇਤਿ, ਨ ਚੋਦੇਤਿ, ਨ ਸਾਰੇਤਿ, ਨ ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

੧੦. ‘‘ਏਵਞ੍ਚ ਪਨ, ਭਿਕ੍ਖਵੇ, ਪਟਿਪ੍ਪਸ੍ਸਮ੍ਭੇਤਬ੍ਬਂ. ਤੇਹਿ, ਭਿਕ੍ਖਵੇ, ਪਣ੍ਡੁਕਲੋਹਿਤਕੇਹਿ ਭਿਕ੍ਖੂਹਿ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਮਯਂ, ਭਨ੍ਤੇ, ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਾਮ, ਲੋਮਂ ਪਾਤੇਮ, ਨੇਤ੍ਥਾਰਂ ਵਤ੍ਤਾਮ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਾਮਾ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਨ੍ਤਿ, ਲੋਮਂ ਪਾਤੇਨ੍ਤਿ, ਨੇਤ੍ਥਾਰਂ ਵਤ੍ਤਨ੍ਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਨ੍ਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਨ੍ਤਿ, ਲੋਮਂ ਪਾਤੇਨ੍ਤਿ, ਨੇਤ੍ਥਾਰਂ ਵਤ੍ਤਨ੍ਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਨ੍ਤਿ, ਲੋਮਂ ਪਾਤੇਨ੍ਤਿ, ਨੇਤ੍ਥਾਰਂ ਵਤ੍ਤਨ੍ਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਪਣ੍ਡੁਕਲੋਹਿਤਕਾ ਭਿਕ੍ਖੂ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਨ੍ਤਿ, ਲੋਮਂ ਪਾਤੇਨ੍ਤਿ, ਨੇਤ੍ਥਾਰਂ ਵਤ੍ਤਨ੍ਤਿ, ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਨ੍ਤਿ. ਸਙ੍ਘੋ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਪਟਿਪ੍ਪਸ੍ਸਦ੍ਧਂ ਸਙ੍ਘੇਨ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ. ਖਮਤਿ ਸਙ੍ਘਸ੍ਸ,

ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤਜ੍ਜਨੀਯਕਮ੍ਮਂ ਨਿਟ੍ਠਿਤਂ ਪਠਮਂ.

੨. ਨਿਯਸ੍ਸਕਮ੍ਮਂ

੧੧. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸੇਯ੍ਯਸਕੋ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ [ਪਕਤਤ੍ਤਾ (ਸੀ. ਸ੍ਯਾ.)] ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਸੇਯ੍ਯਸਕੋ ਬਾਲੋ ਭਵਿਸ੍ਸਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਿਸ੍ਸਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਸੇਯ੍ਯਸਕੋ ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤਸ੍ਸ ਮੋਘਪੁਰਿਸਸ੍ਸ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਸੋ, ਭਿਕ੍ਖਵੇ, ਮੋਘਪੁਰਿਸੋ ਬਾਲੋ ਭਵਿਸ੍ਸਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਿਸ੍ਸਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ [ਨਿਯਸਕਮ੍ਮਂ (ਕ.)] ਕਰੋਤੁ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ. ਪਠਮਂ ਸੇਯ੍ਯਸਕੋ ਭਿਕ੍ਖੁ ਚੋਦੇਤਬ੍ਬੋ, ਚੋਦੇਤ੍ਵਾ ਸਾਰੇਤਬ੍ਬੋ, ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤਬ੍ਬੋ [ਆਪਤ੍ਤਿ ਆਰੋਪੇਤਬ੍ਬਾ (ਸੀ. ਸ੍ਯਾ.)], ਆਪਤ੍ਤਿਂ ਆਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੧੨. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਕਰੇਯ੍ਯ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ. ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਕਰੋਤਿ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਯਸ੍ਸਾਯਸ੍ਮਤੋ ਖਮਤਿ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਸ੍ਸ ਕਮ੍ਮਸ੍ਸ ਕਰਣਂ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਬਾਲੋ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ; ਅਪਿਸ੍ਸੁ ਭਿਕ੍ਖੂ ਪਕਤਾ ਪਰਿਵਾਸਂ ਦੇਨ੍ਤਾ ਮੂਲਾਯ ਪਟਿਕਸ੍ਸਨ੍ਤਾ ਮਾਨਤ੍ਤਂ ਦੇਨ੍ਤਾ ਅਬ੍ਭੇਨ੍ਤਾ. ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਕਰੋਤਿ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਯਸ੍ਸਾਯਸ੍ਮਤੋ ਖਮਤਿ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਸ੍ਸ ਕਮ੍ਮਸ੍ਸ ਕਰਣਂ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਧਮ੍ਮਕਮ੍ਮਦ੍ਵਾਦਸਕਂ

੧੩. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਪ੍ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਚੋਦੇਤ੍ਵਾ ਕਤਂ ਹੋਤਿ, ਅਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਸਮ੍ਮੁਖਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਪ੍ਪਟਿਞ੍ਞਾਯ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਨਾਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਸਾਰੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

ਅਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਧਮ੍ਮਕਮ੍ਮਦ੍ਵਾਦਸਕਂ

੧੪. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਮ੍ਮੁਖਾ ਕਤਂ ਹੋਤਿ, ਪਟਿਪੁਚ੍ਛਾ ਕਤਂ ਹੋਤਿ, ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਯਾ ਕਤਂ ਹੋਤਿ, ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਚੋਦੇਤ੍ਵਾ ਕਤਂ ਹੋਤਿ, ਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਸਮ੍ਮੁਖਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਪਟਿਪੁਚ੍ਛਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਪਟਿਞ੍ਞਾਯ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਚੋਦੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ…ਪੇ… ਸਾਰੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ…ਪੇ….

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਨਿਯਸ੍ਸਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

ਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਆਕਙ੍ਖਮਾਨਛਕ੍ਕਂ

੧੫. [ਪਰਿ. ੩੨੩] ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

‘‘ਤਿਣ੍ਣਂ, ਭਿਕ੍ਖਵੇ, ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਏਕੋ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਏਕੋ ਬਾਲੋ ਹੋਤਿ, ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਏਕੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਏਕੋ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਏਕੋ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਏਕੋ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ. ਏਕੋ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਏਕੋ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਏਕੋ ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਨਿਯਸ੍ਸਕਮ੍ਮਂ ਕਰੇਯ੍ਯ.

ਆਕਙ੍ਖਮਾਨਛਕ੍ਕਂ ਨਿਟ੍ਠਿਤਂ.

ਅਟ੍ਠਾਰਸਵਤ੍ਤਂ

੧੬. ‘‘ਨਿਯਸ੍ਸਕਮ੍ਮਕਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ. ਯਾਯ ਆਪਤ੍ਤਿਯਾ ਸਙ੍ਘੇਨ ਨਿਯਸ੍ਸਕਮ੍ਮਂ ਕਤਂ ਹੋਤਿ ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ; ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰਾਪੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ.

ਨਿਯਸ੍ਸਕਮ੍ਮੇ ਅਟ੍ਠਾਰਸਵਤ੍ਤਂ ਨਿਟ੍ਠਿਤਂ.

੧੭. ਅਥ ਖੋ ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਅਕਾਸਿ – ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ. ਸੋ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਕਲ੍ਯਾਣਮਿਤ੍ਤੇ ਸੇਵਮਾਨੋ ਭਜਮਾਨੋ ਪਯਿਰੁਪਾਸਮਾਨੋ ਉਦ੍ਦਿਸਾਪੇਨ੍ਤੋ ਪਰਿਪੁਚ੍ਛਨ੍ਤੋ ਬਹੁਸ੍ਸੁਤੋ ਹੋਤਿ, ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਅਹਂ, ਆਵੁਸੋ, ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ…. ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੧੮. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ, ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

[ਪਰਿ. ੪੨੦] ‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਨਿਯਸ੍ਸਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਗਰਹਤਿ, ਕਮ੍ਮਿਕੇ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਪਵਾਰਣਂ ਠਪੇਤਿ, ਸਵਚਨੀਯਂ ਕਰੋਤਿ, ਅਨੁਵਾਦਂ ਪਟ੍ਠਪੇਤਿ, ਓਕਾਸਂ ਕਾਰੇਤਿ, ਚੋਦੇਤਿ, ਸਾਰੇਤਿ, ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ

੧੯. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਉਪਸਮ੍ਪਾਦੇਤਿ, ਨ ਨਿਸ੍ਸਯਂ ਦੇਤਿ, ਨ ਸਾਮਣੇਰਂ ਉਪਟ੍ਠਾਪੇਤਿ, ਨ ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਨ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਨਿਯਸ੍ਸਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਨ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਨ ਗਰਹਤਿ, ਕਮ੍ਮਿਕੇ ਨ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਨ ਪਵਾਰਣਂ ਠਪੇਤਿ, ਨ ਸਵਚਨੀਯਂ ਕਰੋਤਿ, ਨ ਅਨੁਵਾਦਂ ਪਟ੍ਠਪੇਤਿ, ਨ ਓਕਾਸਂ ਕਾਰੇਤਿ, ਨ ਚੋਦੇਤਿ, ਨ ਸਾਰੇਤਿ, ਨ ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਪਟਿਪ੍ਪਸ੍ਸਮ੍ਭੇਤਬ੍ਬਅਟ੍ਠਾਰਸਕਂ ਨਿਟ੍ਠਿਤਂ.

੨੦. ‘‘ਏਵਞ੍ਚ ਪਨ, ਭਿਕ੍ਖਵੇ, ਪਟਿਪ੍ਪਸ੍ਸਮ੍ਭੇਤਬ੍ਬਂ. ਤੇਨ, ਭਿਕ੍ਖਵੇ, ਸੇਯ੍ਯਸਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਸੇਯ੍ਯਸਕੋ ਭਿਕ੍ਖੁ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਪਟਿਪ੍ਪਸ੍ਸਦ੍ਧਂ ਸਙ੍ਘੇਨ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਨਿਯਸ੍ਸਕਮ੍ਮਂ ਨਿਟ੍ਠਿਤਂ ਦੁਤਿਯਂ.

੩. ਪਬ੍ਬਾਜਨੀਯਕਮ੍ਮਂ

੨੧. [ਇਦਂ ਵਤ੍ਥੁ ਪਾਰਾ. ੪੩੧ ਆਦਯੋ] ਤੇਨ ਖੋ ਪਨ ਸਮਯੇਨ ਅਸ੍ਸਜਿਪੁਨਬ੍ਬਸੁਕਾ ਨਾਮ [ਨਾਮ ਭਿਕ੍ਖੂ (ਕ.)] ਕੀਟਾਗਿਰਿਸ੍ਮਿਂ ਆਵਾਸਿਕਾ ਹੋਨ੍ਤਿ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ [ਚੂਲ਼ਵ. ੨੯੨ ਆਦਯੋ] ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ, ਓਚਿਨਨ੍ਤਿਪਿ ਓਚਿਨਾਪੇਨ੍ਤਿਪਿ, ਗਨ੍ਥੇਨ੍ਤਿਪਿ ਗਨ੍ਥਾਪੇਨ੍ਤਿਪਿ, ਏਕਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਮਞ੍ਜਰਿਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਿਧੂਤਿਕਂ [ਵਿਧੁਤਿਕਂ (ਸ੍ਯਾ.)] ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਟਂਸਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਆਵੇਲ਼ਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਰਚ੍ਛਦਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਨਂ ਕੁਲਧੀਤਾਨਂ ਕੁਲਕੁਮਾਰੀਨਂ ਕੁਲਸੁਣ੍ਹਾਨਂ ਕੁਲਦਾਸੀਨਂ ਏਕਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਮਞ੍ਜਰਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਿਧੂਤਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਟਂਸਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਆਵੇਲ਼ਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਰਚ੍ਛਦਂ ਹਰਨ੍ਤਿਪਿ ਹਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਸਦ੍ਧਿਂ ਏਕਭਾਜਨੇਪਿ ਭੁਞ੍ਜਨ੍ਤਿ, ਏਕਥਾਲਕੇਪਿ ਪਿਵਨ੍ਤਿ, ਏਕਾਸਨੇਪਿ ਨਿਸੀਦਨ੍ਤਿ, ਏਕਮਞ੍ਚੇਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟੇਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਵਿਕਾਲੇਪਿ ਭੁਞ੍ਜਨ੍ਤਿ, ਮਜ੍ਜਮ੍ਪਿ ਪਿਵਨ੍ਤਿ, ਮਾਲਾਗਨ੍ਧਵਿਲੇਪਨਮ੍ਪਿ ਧਾਰੇਨ੍ਤਿ, ਨਚ੍ਚਨ੍ਤਿਪਿ, ਗਾਯਨ੍ਤਿਪਿ, ਵਾਦੇਨ੍ਤਿਪਿ, ਲਾਸੇਨ੍ਤਿਪਿ; ਨਚ੍ਚਨ੍ਤਿਯਾਪਿ ਨਚ੍ਚਨ੍ਤਿ, ਨਚ੍ਚਨ੍ਤਿਯਾਪਿ ਗਾਯਨ੍ਤਿ, ਨਚ੍ਚਨ੍ਤਿਯਾਪਿ ਵਾਦੇਨ੍ਤਿ, ਨਚ੍ਚਨ੍ਤਿਯਾਪਿ ਲਾਸੇਨ੍ਤਿ; ਗਾਯਨ੍ਤਿਯਾਪਿ ਨਚ੍ਚਨ੍ਤਿ, ਗਾਯਨ੍ਤਿਯਾਪਿ ਗਾਯਨ੍ਤਿ, ਗਾਯਨ੍ਤਿਯਾਪਿ ਵਾਦੇਨ੍ਤਿ, ਗਾਯਨ੍ਤਿਯਾਪਿ ਲਾਸੇਨ੍ਤਿ; ਵਾਦੇਨ੍ਤਿਯਾਪਿ ਨਚ੍ਚਨ੍ਤਿ, ਵਾਦੇਨ੍ਤਿਯਾਪਿ ਗਾਯਨ੍ਤਿ, ਵਾਦੇਨ੍ਤਿਯਾਪਿ ਵਾਦੇਨ੍ਤਿ, ਵਾਦੇਨ੍ਤਿਯਾਪਿ ਲਾਸੇਨ੍ਤਿ; ਲਾਸੇਨ੍ਤਿਯਾਪਿ ਨਚ੍ਚਨ੍ਤਿ, ਲਾਸੇਨ੍ਤਿਯਾਪਿ ਗਾਯਨ੍ਤਿ, ਲਾਸੇਨ੍ਤਿਯਾਪਿ ਵਾਦੇਨ੍ਤਿ, ਲਾਸੇਨ੍ਤਿਯਾਪਿ ਲਾਸੇਨ੍ਤਿ; ਅਟ੍ਠਪਦੇਪਿ ਕੀਲ਼ਨ੍ਤਿ, ਦਸਪਦੇਪਿ ਕੀਲ਼ਨ੍ਤਿ, ਆਕਾਸੇਪਿ ਕੀਲ਼ਨ੍ਤਿ, ਪਰਿਹਾਰਪਥੇਪਿ ਕੀਲ਼ਨ੍ਤਿ, ਸਨ੍ਤਿਕਾਯਪਿ ਕੀਲ਼ਨ੍ਤਿ, ਖਲਿਕਾਯਪਿ ਕੀਲ਼ਨ੍ਤਿ, ਘਟਿਕਾਯਪਿ ਕੀਲ਼ਨ੍ਤਿ, ਸਲਾਕਹਤ੍ਥੇਨਪਿ ਕੀਲ਼ਨ੍ਤਿ, ਅਕ੍ਖੇਨਪਿ ਕੀਲ਼ਨ੍ਤਿ, ਪਙ੍ਗਚੀਰੇਨਪਿ ਕੀਲ਼ਨ੍ਤਿ, ਵਙ੍ਕਕੇਨਪਿ ਕੀਲ਼ਨ੍ਤਿ, ਮੋਕ੍ਖਚਿਕਾਯਪਿ ਕੀਲ਼ਨ੍ਤਿ, ਚਿਙ੍ਗੁਲਕੇਨਪਿ ਕੀਲ਼ਨ੍ਤਿ, ਪਤ੍ਤਾਲ਼੍ਹਕੇਨਪਿ ਕੀਲ਼ਨ੍ਤਿ, ਰਥਕੇਨਪਿ ਕੀਲ਼ਨ੍ਤਿ, ਧਨੁਕੇਨਪਿ ਕੀਲ਼ਨ੍ਤਿ, ਅਕ੍ਖਰਿਕਾਯਪਿ ਕੀਲ਼ਨ੍ਤਿ, ਮਨੇਸਿਕਾਯਪਿ ਕੀਲ਼ਨ੍ਤਿ, ਯਥਾਵਜ੍ਜੇਨਪਿ ਕੀਲ਼ਨ੍ਤਿ; ਹਤ੍ਥਿਸ੍ਮਿਮ੍ਪਿ ਸਿਕ੍ਖਨ੍ਤਿ, ਅਸ੍ਸਸ੍ਮਿਮ੍ਪਿ ਸਿਕ੍ਖਨ੍ਤਿ, ਰਥਸ੍ਮਿਮ੍ਪਿ ਸਿਕ੍ਖਨ੍ਤਿ, ਧਨੁਸ੍ਮਿਮ੍ਪਿ ਸਿਕ੍ਖਨ੍ਤਿ, ਥਰੁਸ੍ਮਿਮ੍ਪਿ ਸਿਕ੍ਖਨ੍ਤਿ; ਹਤ੍ਥਿਸ੍ਸਪਿ ਪੁਰਤੋ ਧਾਵਨ੍ਤਿ, ਅਸ੍ਸਸ੍ਸਪਿ ਪੁਰਤੋ ਧਾਵਨ੍ਤਿ, ਰਥਸ੍ਸਪਿ ਪੁਰਤੋ [ਪੁਰਤੋ ਧਾਵਨ੍ਤਿ (ਸ੍ਯਾ.)] ਧਾਵਨ੍ਤਿਪਿ ਆਧਾਵਨ੍ਤਿਪਿ; ਉਸ੍ਸੇਲ਼ੇਨ੍ਤਿਪਿ, ਅਪ੍ਫੋਟੇਨ੍ਤਿਪਿ, ਨਿਬ੍ਬੁਜ੍ਝਨ੍ਤਿਪਿ, ਮੁਟ੍ਠੀਹਿਪਿ ਯੁਜ੍ਝਨ੍ਤਿ; ਰਙ੍ਗਮਜ੍ਝੇਪਿ ਸਙ੍ਘਾਟਿਂ ਪਤ੍ਥਰਿਤ੍ਵਾ ਨਚ੍ਚਕਿਂ [ਨਚ੍ਚਨ੍ਤਿਂ (ਸੀ. ਸ੍ਯਾ.)] ਏਵਂ ਵਦਨ੍ਤਿ – ‘‘ਇਧ, ਭਗਿਨਿ, ਨਚ੍ਚਸ੍ਸੂ’’ਤਿ; ਨਲਾਟਿਕਮ੍ਪਿ ਦੇਨ੍ਤਿ; ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ.

੨੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਕਾਸੀਸੁ ਵਸ੍ਸਂਵੁਟ੍ਠੋ [ਵਸ੍ਸਂਵੁਤ੍ਥੋ (ਸੀ. ਸ੍ਯਾ.)] ਸਾਵਤ੍ਥਿਂ ਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ ਯੇਨ ਕੀਟਾਗਿਰਿ ਤਦਵਸਰਿ. ਅਥ ਖੋ ਸੋ ਭਿਕ੍ਖੁ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੀਟਾਗਿਰਿਂ ਪਿਣ੍ਡਾਯ ਪਾਵਿਸਿ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ [ਸਮ੍ਮਿਞ੍ਜਿਤੇਨ (ਸੀ. ਸ੍ਯਾ. ਕਂ.)] ਪਸਾਰਿਤੇਨ, ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ. ਮਨੁਸ੍ਸਾ ਤਂ ਭਿਕ੍ਖੁਂ ਪਸ੍ਸਿਤ੍ਵਾ ਏਵਮਾਹਂਸੁ – ‘‘ਕ੍ਵਾਯਂ ਅਬਲਬਲੋ ਵਿਯ ਮਨ੍ਦਮਨ੍ਦੋ ਵਿਯ ਭਾਕੁਟਿਕਭਾਕੁਟਿਕੋ ਵਿਯ? ਕੋ ਇਮਸ੍ਸ ਉਪਗਤਸ੍ਸ ਪਿਣ੍ਡਕਮ੍ਪਿ ਦਸ੍ਸਤਿ? ਅਮ੍ਹਾਕਂ ਪਨ ਅਯ੍ਯਾ ਅਸ੍ਸਜਿਪੁਨਬ੍ਬਸੁਕਾ ਸਣ੍ਹਾ ਸਖਿਲਾ ਸੁਖਸਮ੍ਭਾਸਾ ਮਿਹਿਤਪੁਬ੍ਬਙ੍ਗਮਾ ਏਹਿਸ੍ਵਾਗਤਵਾਦਿਨੋ ਅਬ੍ਭਾਕੁਟਿਕਾ ਉਤ੍ਤਾਨਮੁਖਾ ਪੁਬ੍ਬਭਾਸਿਨੋ. ਤੇਸਂ ਖੋ ਨਾਮ ਪਿਣ੍ਡੋ ਦਾਤਬ੍ਬੋ’’ਤਿ.

ਅਦ੍ਦਸਾ ਖੋ ਅਞ੍ਞਤਰੋ ਉਪਾਸਕੋ ਤਂ ਭਿਕ੍ਖੁਂ ਕੀਟਾਗਿਰਿਸ੍ਮਿਂ ਪਿਣ੍ਡਾਯ ਚਰਨ੍ਤਂ; ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਅਭਿਵਾਦੇਤ੍ਵਾ ਏਤਦਵੋਚ – ‘‘ਅਪਿ, ਭਨ੍ਤੇ, ਪਿਣ੍ਡੋ ਲਬ੍ਭਤੀ’’ਤਿ? ‘‘ਨ ਖੋ, ਆਵੁਸੋ, ਪਿਣ੍ਡੋ ਲਬ੍ਭਤੀ’’ਤਿ. ‘‘ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾ’’ਤਿ. ਅਥ ਖੋ ਸੋ ਉਪਾਸਕੋ ਤਂ ਭਿਕ੍ਖੁਂ ਘਰਂ ਨੇਤ੍ਵਾ ਭੋਜੇਤ੍ਵਾ ਏਤਦਵੋਚ – ‘‘ਕਹਂ, ਭਨ੍ਤੇ, ਅਯ੍ਯੋ ਗਮਿਸ੍ਸਤੀ’’ਤਿ? ‘‘ਸਾਵਤ੍ਥਿਂ ਖੋ ਅਹਂ, ਆਵੁਸੋ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’’ਤਿ. ‘‘ਤੇਨ ਹਿ, ਭਨ੍ਤੇ, ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ, ਏਵਞ੍ਚ ਵਦੇਹਿ – ‘ਦੁਟ੍ਠੋ, ਭਨ੍ਤੇ, ਕੀਟਾਗਿਰਿਸ੍ਮਿਂ ਆਵਾਸੋ. ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ, ਸਿਞ੍ਚਨ੍ਤਿਪਿ ਸਿਞ੍ਚਾਪੇਨ੍ਤਿਪਿ, ਓਚਿਨਨ੍ਤਿਪਿ, ਓਚਿਨਾਪੇਨ੍ਤਿਪਿ, ਗਨ੍ਥੇਨ੍ਤਿਪਿ ਗਨ੍ਥਾਪੇਨ੍ਤਿਪਿ, ਏਕਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਮਞ੍ਜਰਿਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਿਧੂਤਿਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਵਟਂਸਕਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਆਵੇਲ਼ਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ, ਉਰਚ੍ਛਦਂ ਕਰੋਨ੍ਤਿਪਿ ਕਾਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਨਂ ਕੁਲਧੀਤਾਨਂ ਕੁਲਕੁਮਾਰੀਨਂ ਕੁਲਸੁਣ੍ਹਾਨਂ ਕੁਲਦਾਸੀਨਂ ਏਕਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਮਞ੍ਜਰਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਿਧੂਤਿਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਵਟਂਸਕਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਆਵੇਲ਼ਂ ਹਰਨ੍ਤਿਪਿ ਹਰਾਪੇਨ੍ਤਿਪਿ, ਉਰਚ੍ਛਦਂ ਹਰਨ੍ਤਿਪਿ ਹਰਾਪੇਨ੍ਤਿਪਿ. ਤੇ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਸਦ੍ਧਿਂ ਏਕਭਾਜਨੇਪਿ ਭੁਞ੍ਜਨ੍ਤਿ, ਏਕਥਾਲਕੇਪਿ ਪਿਵਨ੍ਤਿ, ਏਕਾਸਨੇਪਿ ਨਿਸੀਦਨ੍ਤਿ, ਏਕਮਞ੍ਚੇਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟੇਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਵਿਕਾਲੇਪਿ ਭੁਞ੍ਜਨ੍ਤਿ, ਮਜ੍ਜਮ੍ਪਿ ਪਿਵਨ੍ਤਿ, ਮਾਲਾਗਨ੍ਧਵਿਲੇਪਨਮ੍ਪਿ ਧਾਰੇਨ੍ਤਿ, ਨਚ੍ਚਨ੍ਤਿਪਿ, ਗਾਯਨ੍ਤਿਪਿ, ਵਾਦੇਨ੍ਤਿਪਿ, ਲਾਸੇਨ੍ਤਿਪਿ; ਨਚ੍ਚਨ੍ਤਿਯਾਪਿ ਨਚ੍ਚਨ੍ਤਿ, ਨਚ੍ਚਨ੍ਤਿਯਾਪਿ ਗਾਯਨ੍ਤਿ, ਨਚ੍ਚਨ੍ਤਿਯਾਪਿ ਵਾਦੇਨ੍ਤਿ, ਨਚ੍ਚਨ੍ਤਿਯਾਪਿ ਲਾਸੇਨ੍ਤਿ…ਪੇ… (ਚਕ੍ਕਂ ਕਾਤਬ੍ਬਂ). ਲਾਸੇਨ੍ਤਿਯਾਪਿ ਨਚ੍ਚਨ੍ਤਿ, ਲਾਸੇਨ੍ਤਿਯਾਪਿ ਗਾਯਨ੍ਤਿ, ਲਾਸੇਨ੍ਤਿਯਾਪਿ ਵਾਦੇਨ੍ਤਿ, ਲਾਸੇਨ੍ਤਿਯਾਪਿ ਲਾਸੇਨ੍ਤਿ; ਅਟ੍ਠਪਦੇਪਿ ਕੀਲ਼ਨ੍ਤਿ, ਦਸਪਦੇਪਿ ਕੀਲ਼ਨ੍ਤਿ, ਆਕਾਸੇਪਿ ਕੀਲ਼ਨ੍ਤਿ, ਪਰਿਹਾਰਪਥੇਪਿ ਕੀਲ਼ਨ੍ਤਿ, ਸਨ੍ਤਿਕਾਯਪਿ ਕੀਲ਼ਨ੍ਤਿ, ਖਲਿਕਾਯਪਿ ਕੀਲ਼ਨ੍ਤਿ, ਘਟਿਕਾਯਪਿ ਕੀਲ਼ਨ੍ਤਿ, ਸਲਾਕਹਤ੍ਥੇਨਪਿ ਕੀਲ਼ਨ੍ਤਿ, ਅਕ੍ਖੇਨਪਿ ਕੀਲ਼ਨ੍ਤਿ, ਪਙ੍ਗਚੀਰੇਨਪਿ ਕੀਲ਼ਨ੍ਤਿ, ਵਙ੍ਕਕੇਨਪਿ ਕੀਲ਼ਨ੍ਤਿ, ਮੋਕ੍ਖਚਿਕਾਯਪਿ ਕੀਲ਼ਨ੍ਤਿ, ਚਿਙ੍ਗੁਲਕੇਨਪਿ ਕੀਲ਼ਨ੍ਤਿ, ਪਤ੍ਤਾਲ਼੍ਹਕੇਨਪਿ ਕੀਲ਼ਨ੍ਤਿ, ਰਥਕੇਨਪਿ ਕੀਲ਼ਨ੍ਤਿ, ਧਨੁਕੇਨਪਿ ਕੀਲ਼ਨ੍ਤਿ, ਅਕ੍ਖਰਿਕਾਯਪਿ ਕੀਲ਼ਨ੍ਤਿ, ਮਨੇਸਿਕਾਯਪਿ ਕੀਲ਼ਨ੍ਤਿ, ਯਥਾਵਜ੍ਜੇਨਪਿ ਕੀਲ਼ਨ੍ਤਿ; ਹਤ੍ਥਿਸ੍ਮਿਮ੍ਪਿ ਸਿਕ੍ਖਨ੍ਤਿ, ਅਸ੍ਸਸ੍ਮਿਮ੍ਪਿ ਸਿਕ੍ਖਨ੍ਤਿ, ਰਥਸ੍ਮਿਮ੍ਪਿ ਸਿਕ੍ਖਨ੍ਤਿ, ਧਨੁਸ੍ਮਿਮ੍ਪਿ ਸਿਕ੍ਖਨ੍ਤਿ, ਥਰੁਸ੍ਮਿਮ੍ਪਿ ਸਿਕ੍ਖਨ੍ਤਿ; ਹਤ੍ਥਿਸ੍ਸਪਿ ਪੁਰਤੋ ਧਾਵਨ੍ਤਿ, ਅਸ੍ਸਸ੍ਸਪਿ ਪੁਰਤੋ ਧਾਵਨ੍ਤਿ, ਰਥਸ੍ਸਪਿ ਪੁਰਤੋ ਧਾਵਨ੍ਤਿਪਿ ਆਧਾਵਨ੍ਤਿਪਿ; ਉਸ੍ਸੇਲ਼ੇਨ੍ਤਿਪਿ, ਅਪ੍ਫੋਟੇਨ੍ਤਿਪਿ, ਨਿਬ੍ਬੁਜ੍ਝਨ੍ਤਿਪਿ, ਮੁਟ੍ਠੀਹਿਪਿ ਯੁਜ੍ਝਨ੍ਤਿ; ਰਙ੍ਗਮਜ੍ਝੇਪਿ ਸਙ੍ਘਾਟਿਂ ਪਤ੍ਥਰਿਤ੍ਵਾ ਨਚ੍ਚਕਿਂ ਏਵਂ ਵਦਨ੍ਤਿ – ‘ਇਧ, ਭਗਿਨਿ, ਨਚ੍ਚਸ੍ਸੂ’ਤਿ; ਨਲਾਟਿਕਮ੍ਪਿ ਦੇਨ੍ਤਿ; ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ. ਯੇਪਿ ਤੇ, ਭਨ੍ਤੇ, ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ. ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ, ਨਿਵਸਨ੍ਤਿ ਪਾਪਭਿਕ੍ਖੂ. ਸਾਧੁ, ਭਨ੍ਤੇ, ਭਗਵਾ ਕੀਟਾਗਿਰਿਂ ਭਿਕ੍ਖੂ ਪਹਿਣੇਯ੍ਯ, ਯਥਾਯਂ ਕੀਟਾਗਿਰਿਸ੍ਮਿਂ ਆਵਾਸੋ ਸਣ੍ਠਹੇਯ੍ਯਾ’’ਤਿ.

‘‘ਏਵਮਾਵੁਸੋ’’ਤਿ ਖੋ ਸੋ ਭਿਕ੍ਖੁ ਤਸ੍ਸ ਉਪਾਸਕਸ੍ਸ ਪਟਿਸ੍ਸੁਣਿਤ੍ਵਾ ਉਟ੍ਠਾਯਾਸਨਾ ਯੇਨ ਸਾਵਤ੍ਥਿ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿਸਿ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ, ਕੁਤੋ ਚ ਤ੍ਵਂ ਭਿਕ੍ਖੁ ਆਗਚ੍ਛਸੀ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ ਭਗਵਾ; ਅਪ੍ਪਕਿਲਮਥੇਨ ਚ ਅਹਂ, ਭਨ੍ਤੇ, ਅਦ੍ਧਾਨਂ ਆਗਤੋ. ਇਧਾਹਂ, ਭਨ੍ਤੇ, ਕਾਸੀਸੁ ਵਸ੍ਸਂਵੁਟ੍ਠੋ ਸਾਵਤ੍ਥਿਂ ਆਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ ਯੇਨ ਕੀਟਾਗਿਰਿ ਤਦਵਸਰਿਂ. ਅਥ ਖ੍ਵਾਹਂ, ਭਨ੍ਤੇ, ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੀਟਾਗਿਰਿਂ ਪਿਣ੍ਡਾਯ ਪਾਵਿਸਿਂ. ਅਦ੍ਦਸਾ ਖੋ ਮਂ, ਭਨ੍ਤੇ, ਅਞ੍ਞਤਰੋ ਉਪਾਸਕੋ ਕੀਟਾਗਿਰਿਸ੍ਮਿਂ ਪਿਣ੍ਡਾਯ ਚਰਨ੍ਤਂ; ਦਿਸ੍ਵਾਨ ਯੇਨਾਹਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਤਦਵੋਚ – ‘ਅਪਿ, ਭਨ੍ਤੇ, ਪਿਣ੍ਡੋ ਲਬ੍ਭਤੀ’ਤਿ. ‘ਨ ਖੋ, ਆਵੁਸੋ, ਪਿਣ੍ਡੋ ਲਬ੍ਭਤੀ’ਤਿ. ‘ਏਹਿ, ਭਨ੍ਤੇ, ਘਰਂ ਗਮਿਸ੍ਸਾਮਾ’ਤਿ. ਅਥ ਖੋ, ਭਨ੍ਤੇ, ਸੋ ਉਪਾਸਕੋ ਮਂ ਘਰਂ ਨੇਤ੍ਵਾ ਭੋਜੇਤ੍ਵਾ ਏਤਦਵੋਚ – ‘ਕਹਂ, ਭਨ੍ਤੇ, ਅਯ੍ਯੋ ਗਮਿਸ੍ਸਤੀ’ਤਿ? ‘ਸਾਵਤ੍ਥਿਂ ਖੋ ਅਹਂ, ਆਵੁਸੋ, ਗਮਿਸ੍ਸਾਮਿ ਭਗਵਨ੍ਤਂ ਦਸ੍ਸਨਾਯਾ’ਤਿ. ‘ਤੇਨ ਹਿ, ਭਨ੍ਤੇ, ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ, ਏਵਞ੍ਚ ਵਦੇਹਿ – ਦੁਟ੍ਠੋ, ਭਨ੍ਤੇ, ਕੀਟਾਗਿਰਿਸ੍ਮਿਂ ਆਵਾਸੋ. ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ. ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ ਰੋਪਾਪੇਨ੍ਤਿਪਿ…ਪੇ… ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ. ਯੇਪਿ ਤੇ, ਭਨ੍ਤੇ, ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ. ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ, ਨਿਵਸਨ੍ਤਿ ਪਾਪਭਿਕ੍ਖੂ. ਸਾਧੁ, ਭਨ੍ਤੇ, ਭਗਵਾ ਕੀਟਾਗਿਰਿਂ ਭਿਕ੍ਖੂ ਪਹਿਣੇਯ੍ਯ, ਯਥਾਯਂ ਕੀਟਾਗਿਰਿਸ੍ਮਿਂ ਆਵਾਸੋ ਸਣ੍ਠਹੇਯ੍ਯਾ’ਤਿ. ਤਤੋ ਅਹਂ ਭਗਵਾ ਆਗਚ੍ਛਾਮੀ’’ਤਿ.

੨੩. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਅਸ੍ਸਜਿਪੁਨਬ੍ਬਸੁਕਾ ਨਾਮ ਕੀਟਾਗਿਰਿਸ੍ਮਿਂ ਆਵਾਸਿਕਾ ਅਲਜ੍ਜਿਨੋ ਪਾਪਭਿਕ੍ਖੂ? ਤੇ ਏਵਰੂਪਂ ਅਨਾਚਾਰਂ ਆਚਰਨ੍ਤਿ – ਮਾਲਾਵਚ੍ਛਂ ਰੋਪੇਨ੍ਤਿਪਿ…ਪੇ… ਵਿਵਿਧਮ੍ਪਿ ਅਨਾਚਾਰਂ ਆਚਰਨ੍ਤਿ? ਯੇਪਿ ਤੇ ਮਨੁਸ੍ਸਾ ਪੁਬ੍ਬੇ ਸਦ੍ਧਾ ਅਹੇਸੁਂ ਪਸਨ੍ਨਾ ਤੇਪਿ ਏਤਰਹਿ ਅਸ੍ਸਦ੍ਧਾ ਅਪ੍ਪਸਨ੍ਨਾ? ਯਾਨਿਪਿ ਤਾਨਿ ਸਙ੍ਘਸ੍ਸ ਪੁਬ੍ਬੇ ਦਾਨਪਥਾਨਿ ਤਾਨਿਪਿ ਏਤਰਹਿ ਉਪਚ੍ਛਿਨ੍ਨਾਨਿ? ਰਿਞ੍ਚਨ੍ਤਿ ਪੇਸਲਾ ਭਿਕ੍ਖੂ ਨਿਵਸਨ੍ਤਿ ਪਾਪਭਿਕ੍ਖੂ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਏਵਰੂਪਂ ਅਨਾਚਾਰਂ ਆਚਰਿਸ੍ਸਨ੍ਤਿ – ਮਾਲਾਵਚ੍ਛਂ ਰੋਪੇਸ੍ਸਨ੍ਤਿਪਿ ਰੋਪਾਪੇਸ੍ਸਨ੍ਤਿਪਿ, ਸਿਞ੍ਚਿਸ੍ਸਨ੍ਤਿਪਿ ਸਿਞ੍ਚਾਪੇਸ੍ਸਨ੍ਤਿਪਿ, ਓਚਿਨਿਸ੍ਸਨ੍ਤਿਪਿ ਓਚਿਨਾਪੇਸ੍ਸਨ੍ਤਿਪਿ, ਗਨ੍ਥੇਸ੍ਸਨ੍ਤਿਪਿ ਗਨ੍ਥਾਪੇਸ੍ਸਨ੍ਤਿਪਿ, ਏਕਤੋਵਣ੍ਟਿਕਮਾਲਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਮਞ੍ਜਰਿਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਵਿਧੂਤਿਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਵਟਂਸਕਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਆਵੇਲ਼ਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ, ਉਰਚ੍ਛਦਂ ਕਰਿਸ੍ਸਨ੍ਤਿਪਿ ਕਾਰਾਪੇਸ੍ਸਨ੍ਤਿਪਿ. ਤੇ ਕੁਲਿਤ੍ਥੀਨਂ ਕੁਲਧੀਤਾਨਂ ਕੁਲਕੁਮਾਰੀਨਂ ਕੁਲਸੁਣ੍ਹਾਨਂ ਕੁਲਦਾਸੀਨਂ ਏਕਤੋਵਣ੍ਟਿਕਮਾਲਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਉਭਤੋਵਣ੍ਟਿਕਮਾਲਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਮਞ੍ਜਰਿਕਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਵਿਧੂਤਿਕਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਵਟਂਸਕਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਆਵੇਲ਼ਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ, ਉਰਚ੍ਛਦਂ ਹਰਿਸ੍ਸਨ੍ਤਿਪਿ ਹਰਾਪੇਸ੍ਸਨ੍ਤਿਪਿ. ਤੇ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਸਦ੍ਧਿਂ ਏਕਭਾਜਨੇਪਿ ਭੁਞ੍ਜਿਸ੍ਸਨ੍ਤਿ, ਏਕਥਾਲਕੇਪਿ ਪਿਵਿਸ੍ਸਨ੍ਤਿ, ਏਕਾਸਨੇਪਿ ਨਿਸੀਦਿਸ੍ਸਨ੍ਤਿ, ਏਕਮਞ੍ਚੇਪਿ ਤੁਵਟ੍ਟਿਸ੍ਸਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟਿਸ੍ਸਨ੍ਤਿ, ਵਿਕਾਲੇਪਿ ਭੁਞ੍ਜਿਸ੍ਸਨ੍ਤਿ, ਮਜ੍ਜਮ੍ਪਿ ਪਿਵਿਸ੍ਸਨ੍ਤਿ, ਮਾਲਾਗਨ੍ਧਵਿਲੇਪਨਮ੍ਪਿ ਧਾਰੇਸ੍ਸਨ੍ਤਿ, ਨਚ੍ਚਿਸ੍ਸਨ੍ਤਿਪਿ, ਗਾਯਿਸ੍ਸਨ੍ਤਿਪਿ, ਵਾਦੇਸ੍ਸਨ੍ਤਿਪਿ, ਲਾਸੇਸ੍ਸਨ੍ਤਿਪਿ; ਨਚ੍ਚਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ, ਨਚ੍ਚਨ੍ਤਿਯਾਪਿ ਗਾਯਿਸ੍ਸਨ੍ਤਿ, ਨਚ੍ਚਨ੍ਤਿਯਾਪਿ ਵਾਦੇਸ੍ਸਨ੍ਤਿ, ਨਚ੍ਚਨ੍ਤਿਯਾਪਿ ਲਾਸੇਸ੍ਸਨ੍ਤਿ; ਗਾਯਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ, ਗਾਯਨ੍ਤਿਯਾਪਿ ਗਾਯਿਸ੍ਸਨ੍ਤਿ, ਗਾਯਨ੍ਤਿਯਾਪਿ ਵਾਦੇਸ੍ਸਨ੍ਤਿ, ਗਾਯਨ੍ਤਿਯਾਪਿ ਲਾਸੇਸ੍ਸਨ੍ਤਿ; ਵਾਦੇਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ, ਵਾਦੇਨ੍ਤਿਯਾਪਿ ਗਾਯਿਸ੍ਸਨ੍ਤਿ, ਵਾਦੇਨ੍ਤਿਯਾਪਿ ਵਾਦੇਸ੍ਸਨ੍ਤਿ, ਵਾਦੇਨ੍ਤਿਯਾਪਿ ਲਾਸੇਸ੍ਸਨ੍ਤਿ; ਲਾਸੇਨ੍ਤਿਯਾਪਿ ਨਚ੍ਚਿਸ੍ਸਨ੍ਤਿ, ਲਾਸੇਨ੍ਤਿਯਾਪਿ ਗਾਯਿਸ੍ਸਨ੍ਤਿ, ਲਾਸੇਨ੍ਤਿਯਾਪਿ ਵਾਦੇਸ੍ਸਨ੍ਤਿ; ਲਾਸੇਨ੍ਤਿਯਾਪਿ ਲਾਸੇਸ੍ਸਨ੍ਤਿ; ਅਟ੍ਠਪਦੇਪਿ ਕੀਲ਼ਿਸ੍ਸਨ੍ਤਿ, ਦਸਪਦੇਪਿ ਕੀਲ਼ਿਸ੍ਸਨ੍ਤਿ, ਆਕਾਸੇਪਿ ਕੀਲ਼ਿਸ੍ਸਨ੍ਤਿ, ਪਰਿਹਾਰਪਥੇਪਿ ਕੀਲ਼ਿਸ੍ਸਨ੍ਤਿ, ਸਨ੍ਤਿਕਾਯਪਿ ਕੀਲ਼ਿਸ੍ਸਨ੍ਤਿ, ਖਲਿਕਾਯਪਿ ਕੀਲ਼ਿਸ੍ਸਨ੍ਤਿ, ਘਟਿਕਾਯਪਿ ਕੀਲ਼ਿਸ੍ਸਨ੍ਤਿ, ਸਲਾਕਹਤ੍ਥੇਨਪਿ ਕੀਲ਼ਿਸ੍ਸਨ੍ਤਿ, ਅਕ੍ਖੇਨਪਿ ਕੀਲ਼ਿਸ੍ਸਨ੍ਤਿ, ਪਙ੍ਗਚੀਰੇਨਪਿ ਕੀਲ਼ਿਸ੍ਸਨ੍ਤਿ, ਵਙ੍ਕਕੇਨਪਿ ਕੀਲ਼ਿਸ੍ਸਨ੍ਤਿ ਮੋਕ੍ਖਚਿਕਾਯਪਿ ਕੀਲ਼ਿਸ੍ਸਨ੍ਤਿ, ਚਿਙ੍ਗੁਲਕੇਨਪਿ ਕੀਲ਼ਿਸ੍ਸਨ੍ਤਿ, ਪਤ੍ਤਾਲ਼੍ਹਕੇਨਪਿ ਕੀਲ਼ਿਸ੍ਸਨ੍ਤਿ, ਰਥਕੇਨਪਿ ਕੀਲ਼ਿਸ੍ਸਨ੍ਤਿ, ਧਨੁਕੇਨਪਿ ਕੀਲ਼ਿਸ੍ਸਨ੍ਤਿ, ਅਕ੍ਖਰਿਕਾਯਪਿ ਕੀਲ਼ਿਸ੍ਸਨ੍ਤਿ, ਮਨੇਸਿਕਾਯਪਿ ਕੀਲ਼ਿਸ੍ਸਨ੍ਤਿ, ਯਥਾਵਜ੍ਜੇਨਪਿ ਕੀਲ਼ਿਸ੍ਸਨ੍ਤਿ; ਹਤ੍ਥਿਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਅਸ੍ਸਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਰਥਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਧਨੁਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ, ਥਰੁਸ੍ਮਿਮ੍ਪਿ ਸਿਕ੍ਖਿਸ੍ਸਨ੍ਤਿ; ਹਤ੍ਥਿਸ੍ਸਪਿ ਪੁਰਤੋ ਧਾਵਿਸ੍ਸਨ੍ਤਿ, ਅਸ੍ਸਸ੍ਸਪਿ ਪੁਰਤੋ ਧਾਵਿਸ੍ਸਨ੍ਤਿ, ਰਥਸ੍ਸਪਿ ਪੁਰਤੋ [ਪੁਰਤੋ ਧਾਵਿਸ੍ਸਨ੍ਤਿ (ਸ੍ਯਾ.)] ਧਾਵਿਸ੍ਸਨ੍ਤਿਪਿ ਆਧਾਵਿਸ੍ਸਨ੍ਤਿਪਿ; ਉਸ੍ਸੇਲ਼ੇਸ੍ਸਨ੍ਤਿਪਿ, ਅਪ੍ਫੋਟੇਸ੍ਸਨ੍ਤਿਪਿ, ਨਿਬ੍ਬੁਜ੍ਝਿਸ੍ਸਨ੍ਤਿਪਿ, ਮੁਟ੍ਠੀਹਿਪਿ ਯੁਜ੍ਝਿਸ੍ਸਨ੍ਤਿ; ਰਙ੍ਗਮਜ੍ਝੇਪਿ ਸਙ੍ਘਾਟਿਂ ਪਤ੍ਥਰਿਤ੍ਵਾ ਨਚ੍ਚਕਿਂ ਏਵਂ ਵਕ੍ਖਨ੍ਤਿ [ਵਦਿਸ੍ਸਨ੍ਤਿ (ਕ.)] – ‘ਇਧ, ਭਗਿਨਿ, ਨਚ੍ਚਸ੍ਸੂ’ਤਿ; ਨਲਾਟਿਕਮ੍ਪਿ ਦਸ੍ਸਨ੍ਤਿ; ਵਿਵਿਧਮ੍ਪਿ ਅਨਾਚਾਰਂ ਆਚਰਿਸ੍ਸਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਸਿ – ‘‘ਗਚ੍ਛਥ ਤੁਮ੍ਹੇ, ਸਾਰਿਪੁਤ੍ਤਾ, ਕੀਟਾਗਿਰਿਂ ਗਨ੍ਤ੍ਵਾ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਥ, ਤੁਮ੍ਹਾਕਂ ਏਤੇ ਸਦ੍ਧਿਵਿਹਾਰਿਨੋ’’ਤਿ.

‘‘ਕਥਂ ਮਯਂ, ਭਨ੍ਤੇ, ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਮ, ਚਣ੍ਡਾ ਤੇ ਭਿਕ੍ਖੂ ਫਰੁਸਾ’’ਤਿ? ‘‘ਤੇਨ ਹਿ ਤੁਮ੍ਹੇ, ਸਾਰਿਪੁਤ੍ਤਾ, ਬਹੁਕੇਹਿ ਭਿਕ੍ਖੂਹਿ ਸਦ੍ਧਿਂ ਗਚ੍ਛਥਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਭਗਵਤੋ ਪਚ੍ਚਸ੍ਸੋਸੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ – ਪਠਮਂ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਚੋਦੇਤਬ੍ਬਾ, ਚੋਦੇਤ੍ਵਾ ਸਾਰੇਤਬ੍ਬਾ, ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤਬ੍ਬਾ, ਆਪਤ੍ਤਿਂ ਆਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੨੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਕੁਲਦੂਸਕਾ ਪਾਪਸਮਾਚਾਰਾ. ਇਮੇਸਂ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚ ਇਮੇਹਿ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਕੁਲਦੂਸਕਾ ਪਾਪਸਮਾਚਾਰਾ. ਇਮੇਸਂ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚ ਇਮੇਹਿ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਸਙ੍ਘੋ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਤਿ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ. ਯਸ੍ਸਾਯਸ੍ਮਤੋ ਖਮਤਿ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਕਰਣਂ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮੇ ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਕੁਲਦੂਸਕਾ ਪਾਪਸਮਾਚਾਰਾ. ਇਮੇਸਂ ਪਾਪਕਾ ਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਕੁਲਾਨਿ ਚ ਇਮੇਹਿ ਦੁਟ੍ਠਾਨਿ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਸਙ੍ਘੋ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਤਿ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ. ਯਸ੍ਸਾਯਸ੍ਮਤੋ ਖਮਤਿ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਸ੍ਸ ਕਮ੍ਮਸ੍ਸ ਕਰਣਂ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ – ਨ ਅਸ੍ਸਜਿਪੁਨਬ੍ਬਸੁਕੇਹਿ ਭਿਕ੍ਖੂਹਿ ਕੀਟਾਗਿਰਿਸ੍ਮਿਂ ਵਤ੍ਥਬ੍ਬਨ੍ਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਅਧਮ੍ਮਕਮ੍ਮਦ੍ਵਾਦਸਕਂ

੨੫. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਪਬ੍ਬਾਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਪ੍ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਬ੍ਬਾਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਬ੍ਬਾਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ…ਪੇ… ਅਸਮ੍ਮੁਖਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਞ੍ਞਾਯ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਨਾਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ …ਪੇ… ਅਸਾਰੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ ਪਬ੍ਬਾਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

ਅਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਧਮ੍ਮਕਮ੍ਮਦ੍ਵਾਦਸਕਂ