੫. ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ

੪੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਛਨ੍ਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਛਨ੍ਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਿਸ੍ਸਤਿ ਆਪਤ੍ਤਿਂ ਪਸ੍ਸਿਤੁ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਨ੍ਨੋ ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁ’’ਨ੍ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ…ਪੇ… ਕਥਞ੍ਹਿ ਨਾਮ ਸੋ, ਭਿਕ੍ਖਵੇ, ਮੋਘਪੁਰਿਸੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਿਸ੍ਸਤਿ ਆਪਤ੍ਤਿਂ ਪਸ੍ਸਿਤੁਂ? ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੋਤੁ – ਅਸਮ੍ਭੋਗਂ ਸਙ੍ਘੇਨ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ – ਪਠਮਂ ਛਨ੍ਨੋ ਭਿਕ੍ਖੁ ਚੋਦੇਤਬ੍ਬੋ, ਚੋਦੇਤ੍ਵਾ ਸਾਰੇਤਬ੍ਬੋ, ਸਾਰੇਤ੍ਵਾ ਆਪਤ੍ਤਿਂ ਆਰੋਪੇਤਬ੍ਬੋ, ਆਪਤ੍ਤਿਂ ਆਰੋਪੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੪੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਅਸਮ੍ਭੋਗਂ ਸਙ੍ਘੇਨ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੋਤਿ – ਅਸਮ੍ਭੋਗਂ ਸਙ੍ਘੇਨ. ਯਸ੍ਸਾਯਸ੍ਮਤੋ ਖਮਤਿ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਕਰਣਂ – ਅਸਮ੍ਭੋਗਂ ਸਙ੍ਘੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੋਤਿ – ਅਸਮ੍ਭੋਗਂ ਸਙ੍ਘੇਨ. ਯਸ੍ਸਾਯਸ੍ਮਤੋ ਖਮਤਿ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਕਰਣਂ – ਅਸਮ੍ਭੋਗਂ ਸਙ੍ਘੇਨ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤਂ ਸਙ੍ਘੇਨ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ – ਅਸਮ੍ਭੋਗਂ ਸਙ੍ਘੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

‘‘ਆਵਾਸਪਰਮ੍ਪਰਞ੍ਚ, ਭਿਕ੍ਖਵੇ, ਸਂਸਥ – ‘ਛਨ੍ਨੋ ਭਿਕ੍ਖੁ ਸਙ੍ਘੇਨ ਆਪਤ੍ਤਿਯਾ [ਛਨ੍ਨੋ ਭਿਕ੍ਖੁ ਆਪਤ੍ਤਿਯਾ (ਸੀ. ਕ.)] ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੋ – ਅਸਮ੍ਭੋਗਂ ਸਙ੍ਘੇਨਾ’ਤਿ.

ਅਧਮ੍ਮਕਮ੍ਮਦ੍ਵਾਦਸਕਂ

੪੮. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਸਮ੍ਮੁਖਾ ਕਤਂ ਹੋਤਿ, ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਪ੍ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ. ਅਨਾਪਤ੍ਤਿਯਾ ਕਤਂ ਹੋਤਿ, ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ…ਪੇ… ਅਸਮ੍ਮੁਖਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਪੁਚ੍ਛਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਪ੍ਪਟਿਞ੍ਞਾਯ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਨਾਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਚੋਦੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਅਸਾਰੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਂ ਅਨਾਰੋਪੇਤ੍ਵਾ ਕਤਂ ਹੋਤਿ, ਅਧਮ੍ਮੇਨ ਕਤਂ ਹੋਤਿ, ਵਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ, ਅਵਿਨਯਕਮ੍ਮਞ੍ਚ, ਦੁਵੂਪਸਨ੍ਤਞ੍ਚ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ ਅਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਧਮ੍ਮਕਮ੍ਮਦ੍ਵਾਦਸਕਂ

੪੯. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ. ਸਮ੍ਮੁਖਾ ਕਤਂ ਹੋਤਿ, ਪਟਿਪੁਚ੍ਛਾ ਕਤਂ ਹੋਤਿ, ਪਟਿਞ੍ਞਾਯ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ…ਪੇ…. ਆਪਤ੍ਤਿਯਾ ਕਤਂ ਹੋਤਿ, ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ…ਪੇ… ਚੋਦੇਤ੍ਵਾ ਕਤਂ ਹੋਤਿ, ਸਾਰੇਤ੍ਵਾ ਕਤਂ ਹੋਤਿ, ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ…ਪੇ… ਸਮ੍ਮੁਖਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਪਟਿਪੁਚ੍ਛਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਪਟਿਞ੍ਞਾਯ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਅਦੇਸਿਤਾਯ ਆਪਤ੍ਤਿਯਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਚੋਦੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਸਾਰੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ…ਪੇ… ਆਪਤ੍ਤਿਂ ਆਰੋਪੇਤ੍ਵਾ ਕਤਂ ਹੋਤਿ, ਧਮ੍ਮੇਨ ਕਤਂ ਹੋਤਿ, ਸਮਗ੍ਗੇਨ ਕਤਂ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਂ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਧਮ੍ਮਕਮ੍ਮਞ੍ਚ ਹੋਤਿ, ਵਿਨਯਕਮ੍ਮਞ੍ਚ, ਸੁਵੂਪਸਨ੍ਤਞ੍ਚ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ ਧਮ੍ਮਕਮ੍ਮਦ੍ਵਾਦਸਕਂ ਨਿਟ੍ਠਿਤਂ.

ਆਕਙ੍ਖਮਾਨਛਕ੍ਕਂ

੫੦. [ਪਰਿ. ੩੨੩] ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਹਿਪਿ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਹਿ ਖੋ, ਭਿਕ੍ਖਵੇ, ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

‘‘ਤਿਣ੍ਣਂ, ਭਿਕ੍ਖਵੇ, ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਏਕੋ ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ; ਏਕੋ ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ; ਏਕੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਏਕੋ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਏਕੋ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਏਕੋ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

‘‘ਅਪਰੇਸਮ੍ਪਿ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ. ਏਕੋ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਏਕੋ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਏਕੋ ਸਙ੍ਘਸ੍ਸ ਅਵਣ੍ਣਂ ਭਾਸਤਿ – ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਭਿਕ੍ਖੂਨਂ, ਆਕਙ੍ਖਮਾਨੋ ਸਙ੍ਘੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ

ਆਕਙ੍ਖਮਾਨਛਕ੍ਕਂ ਨਿਟ੍ਠਿਤਂ.

ਤੇਚਤ੍ਤਾਲੀਸਵਤ੍ਤਂ

੫੧. ‘‘ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਤੇਨ, ਭਿਕ੍ਖਵੇ, ਭਿਕ੍ਖੁਨਾ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ. ਯਾਯ ਆਪਤ੍ਤਿਯਾ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਤਂ ਹੋਤਿ ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ ਵਾ ਤਾਦਿਸਿਕਾ, ਤਤੋ ਵਾ ਪਾਪਿਟ੍ਠਤਰਾ; ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ, ਪਚ੍ਚੁਟ੍ਠਾਨਂ, ਅਞ੍ਜਲਿਕਮ੍ਮਂ, ਸਾਮੀਚਿਕਮ੍ਮਂ, ਆਸਨਾਭਿਹਾਰੋ, ਸੇਯ੍ਯਾਭਿਹਾਰੋ, ਪਾਦੋਦਕਂ, ਪਾਦਪੀਠਂ ਪਾਦਕਥਲਿਕਂ, ਪਤ੍ਤਚੀਵਰਪ੍ਪਟਿਗ੍ਗਹਣਂ, ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਤਬ੍ਬਂ. ਨ ਪਕਤਤ੍ਤੋ ਭਿਕ੍ਖੁ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਦਿਟ੍ਠਿਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਆਜੀਵਵਿਪਤ੍ਤਿਯਾ ਅਨੁਦ੍ਧਂਸੇਤਬ੍ਬੋ, ਨ ਭਿਕ੍ਖੁ ਭਿਕ੍ਖੂਹਿ ਭੇਦੇਤਬ੍ਬੋ [ਨ ਭਿਕ੍ਖੂ ਭਿਕ੍ਖੂਹਿ ਭੇਦੇਤਬ੍ਬਾ (ਸ੍ਯਾ.)], ਨ ਗਿਹਿਦ੍ਧਜੋ ਧਾਰੇਤਬ੍ਬੋ, ਨ ਤਿਤ੍ਥਿਯਦ੍ਧਜੋ ਧਾਰੇਤਬ੍ਬੋ, ਨ ਤਿਤ੍ਥਿਯਾ ਸੇਵਿਤਬ੍ਬਾ; ਭਿਕ੍ਖੂ ਸੇਵਿਤਬ੍ਬਾ, ਭਿਕ੍ਖੁਸਿਕ੍ਖਾਯ ਸਿਕ੍ਖਿਤਬ੍ਬਂ [ਭਿਕ੍ਖੁਸਿਕ੍ਖਾ ਸਿਕ੍ਖਿਤਬ੍ਬਾ (ਸ੍ਯਾ.)]. ਨ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬਂ, ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਵੁਟ੍ਠਾਤਬ੍ਬਂ, ਨ ਪਕਤਤ੍ਤੋ ਭਿਕ੍ਖੁ ਆਸਾਦੇਤਬ੍ਬੋ ਅਨ੍ਤੋ ਵਾ ਬਹਿ ਵਾ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪਵਾਰਣਾ ਠਪੇਤਬ੍ਬਾ, ਨ ਸਵਚਨੀਯਂ ਕਾਤਬ੍ਬਂ, ਨ ਅਨੁਵਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ

ਤੇਚਤ੍ਤਾਲੀਸਵਤ੍ਤਂ ਨਿਟ੍ਠਿਤਂ.

੫੨. ਅਥ ਖੋ ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਅਕਾਸਿ – ਅਸਮ੍ਭੋਗਂ ਸਙ੍ਘੇਨ. ਸੋ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਤਮ੍ਹਾ ਆਵਾਸਾ ਅਞ੍ਞਂ ਆਵਾਸਂ ਅਗਮਾਸਿ. ਤਤ੍ਥ ਭਿਕ੍ਖੂ ਨੇਵ ਅਭਿਵਾਦੇਸੁਂ, ਨ ਪਚ੍ਚੁਟ੍ਠੇਸੁਂ, ਨ ਅਞ੍ਜਲਿਕਮ੍ਮਂ ਨ ਸਾਮੀਚਿਕਮ੍ਮਂ ਅਕਂਸੁ, ਨ ਸਕ੍ਕਰਿਂਸੁ, ਨ ਗਰੁ ਕਰਿਂਸੁ [ਨ ਗਰੁਕਰਿਂਸੁ (ਕ.)], ਨ ਮਾਨੇਸੁਂ, ਨ ਪੂਜੇਸੁਂ. ਸੋ ਭਿਕ੍ਖੂਹਿ ਅਸਕ੍ਕਰਿਯਮਾਨੋ ਅਗਰੁਕਰਿਯਮਾਨੋ ਅਮਾਨਿਯਮਾਨੋ ਅਪੂਜਿਯਮਾਨੋ ਅਸਕ੍ਕਾਰਪਕਤੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਅਗਮਾਸਿ. ਤਤ੍ਥਪਿ ਭਿਕ੍ਖੂ ਨੇਵ ਅਭਿਵਾਦੇਸੁਂ, ਨ ਪਚ੍ਚੁਟ੍ਠੇਸੁਂ, ਨ ਅਞ੍ਜਲਿਕਮ੍ਮਂ ਨ ਸਾਮੀਚਿਕਮ੍ਮਂ ਅਕਂਸੁ, ਨ ਸਕ੍ਕਰਿਂਸੁ, ਨ ਗਰੁਂ ਕਰਿਂਸੁ, ਨ ਮਾਨੇਸੁਂ, ਨ ਪੂਜੇਸੁਂ. ਸੋ ਭਿਕ੍ਖੂਹਿ ਅਸਕ੍ਕਰਿਯਮਾਨੋ ਅਗਰੁਕਰਿਯਮਾਨੋ ਅਮਾਨਿਯਮਾਨੋ ਅਪੂਜਿਯਮਾਨੋ ਅਸਕ੍ਕਾਰਪਕਤੋ ਤਮ੍ਹਾਪਿ ਆਵਾਸਾ ਅਞ੍ਞਂ ਆਵਾਸਂ ਅਗਮਾਸਿ. ਤਤ੍ਥਪਿ ਭਿਕ੍ਖੂ ਨੇਵ ਅਭਿਵਾਦੇਸੁਂ, ਨ ਪਚ੍ਚੁਟ੍ਠੇਸੁਂ, ਨ ਅਞ੍ਜਲਿਕਮ੍ਮਂ ਨ ਸਾਮੀਚਿਕਮ੍ਮਂ ਅਕਂਸੁ, ਨ ਸਕ੍ਕਰਿਂਸੁ, ਨ ਗਰੁਂ ਕਰਿਂਸੁ, ਨ ਮਾਨੇਸੁਂ, ਨ ਪੂਜੇਸੁਂ. ਸੋ ਭਿਕ੍ਖੂਹਿ ਅਸਕ੍ਕਰਿਯਮਾਨੋ ਅਗਰੁਕਰਿਯਮਾਨੋ ਅਮਾਨਿਯਮਾਨੋ ਅਪੂਜਿਯਮਾਨੋ ਅਸਕ੍ਕਾਰਪਕਤੋ ਪੁਨਦੇਵ ਕੋਸਮ੍ਬਿਂ ਪਚ੍ਚਾਗਞ੍ਛਿ. ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਅਹਂ, ਆਵੁਸੋ, ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ…. ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁ.

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬ-ਤੇਚਤ੍ਤਾਲੀਸਕਂ

੫੩. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ, ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

[ਪਰਿ. ੪੨੦] ‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਗਰਹਤਿ, ਕਮ੍ਮਿਕੇ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ, ਪਚ੍ਚੁਟ੍ਠਾਨਂ, ਅਞ੍ਜਲਿਕਮ੍ਮਂ, ਸਾਮੀਚਿਕਮ੍ਮਂ, ਆਸਨਾਭਿਹਾਰਂ ਸਾਦਿਯਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਸੇਯ੍ਯਾਭਿਹਾਰਂ, ਪਾਦੋਦਕਂ ਪਾਦਪੀਠਂ, ਪਾਦਕਥਲਿਕਂ, ਪਤ੍ਤਚੀਵਰਪ੍ਪਟਿਗ੍ਗਹਣਂ, ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਯਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਂ ਭਿਕ੍ਖੁਂ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਦਿਟ੍ਠਿਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਆਜੀਵਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਭਿਕ੍ਖੁਂ [ਭਿਕ੍ਖੂ (ਸੀ. ਸ੍ਯਾ.)] ਭਿਕ੍ਖੂਹਿ ਭੇਦੇਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਗਿਹਿਦ੍ਧਜਂ ਧਾਰੇਤਿ, ਤਿਤ੍ਥਿਯਦ੍ਧਜਂ ਧਾਰੇਤਿ, ਤਿਤ੍ਥਿਯੇ ਸੇਵਤਿ; ਭਿਕ੍ਖੂ ਨ ਸੇਵਤਿ, ਭਿਕ੍ਖੁਸਿਕ੍ਖਾਯ ਨ ਸਿਕ੍ਖਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਸਤਿ, ਏਕਚ੍ਛਨ੍ਨੇ ਅਨਾਵਾਸੇ ਵਸਤਿ, ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਸਤਿ; ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਨ ਵੁਟ੍ਠਾਤਿ; ਪਕਤਤ੍ਤਂ ਭਿਕ੍ਖੁਂ ਆਸਾਦੇਤਿ ਅਨ੍ਤੋ ਵਾ ਬਹਿ ਵਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ. ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਪਵਾਰਣਂ ਠਪੇਤਿ, ਸਵਚਨੀਯਂ ਕਰੋਤਿ, ਅਨੁਵਾਦਂ ਪਟ੍ਠਪੇਤਿ, ਓਕਾਸਂ ਕਾਰੇਤਿ, ਚੋਦੇਤਿ, ਸਾਰੇਤਿ, ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ

ਨਪ੍ਪਟਿਪ੍ਪਸ੍ਸਮ੍ਭੇਤਬ੍ਬ-ਤੇਚਤ੍ਤਾਲੀਸਕਂ ਨਿਟ੍ਠਿਤਂ.

ਪਟਿਪ੍ਪਸ੍ਸਮ੍ਭੇਤਬ੍ਬ-ਤੇਚਤ੍ਤਾਲੀਸਕਂ

੫੪. ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਉਪਸਮ੍ਪਾਦੇਤਿ, ਨ ਨਿਸ੍ਸਯਂ ਦੇਤਿ, ਨ ਸਾਮਣੇਰਂ ਉਪਟ੍ਠਾਪੇਤਿ, ਨ ਭਿਕ੍ਖੁਨੋਵਾਦਕਸਮ੍ਮੁਤਿਂ ਸਾਦਿਯਤਿ, ਸਮ੍ਮਤੋਪਿ ਭਿਕ੍ਖੁਨਿਯੋ ਨ ਓਵਦਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਯਾਯ ਆਪਤ੍ਤਿਯਾ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਨ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ; ਕਮ੍ਮਂ ਨ ਗਰਹਤਿ, ਕਮ੍ਮਿਕੇ ਨ ਗਰਹਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਅਭਿਵਾਦਨਂ, ਪਚ੍ਚੁਟ੍ਠਾਨਂ, ਅਞ੍ਜਲਿਕਮ੍ਮਂ, ਸਾਮੀਚਿਕਮ੍ਮਂ, ਆਸਨਾਭਿਹਾਰਂ ਸਾਦਿਯਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਸੇਯ੍ਯਾਭਿਹਾਰਂ, ਪਾਦੋਦਕਂ ਪਾਦਪੀਠਂ, ਪਾਦਕਥਲਿਕਂ, ਪਤ੍ਤਚੀਵਰਪ੍ਪਟਿਗ੍ਗਹਣਂ, ਨਹਾਨੇ ਪਿਟ੍ਠਿਪਰਿਕਮ੍ਮਂ ਸਾਦਿਯਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤਂ ਭਿਕ੍ਖੁਂ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਨ ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਨ ਦਿਟ੍ਠਿਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਨ ਆਜੀਵਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਨ ਭਿਕ੍ਖੁਂ ਭਿਕ੍ਖੂਹਿ ਭੇਦੇਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਗਿਹਿਦ੍ਧਜਂ ਧਾਰੇਤਿ, ਨ ਤਿਤ੍ਥਿਯਦ੍ਧਜਂ ਧਾਰੇਤਿ, ਨ ਤਿਤ੍ਥਿਯੇ ਸੇਵਤਿ, ਭਿਕ੍ਖੂ ਸੇਵਤਿ, ਭਿਕ੍ਖੁਸਿਕ੍ਖਾਯ ਸਿਕ੍ਖਤਿ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਪਰੇਹਿਪਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਸਤਿ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਸਤਿ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਸਤਿ, ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਵੁਟ੍ਠਾਤਿ, ਨ ਪਕਤਤ੍ਤਂ ਭਿਕ੍ਖੁਂ ਆਸਾਦੇਤਿ ਅਨ੍ਤੋ ਵਾ ਬਹਿ ਵਾ – ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ. ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥਂ ਠਪੇਤਿ, ਨ ਪਵਾਰਣਂ ਠਪੇਤਿ, ਨ ਸਵਚਨੀਯਂ ਕਰੋਤਿ, ਨ ਅਨੁਵਾਦਂ ਪਟ੍ਠਪੇਤਿ, ਨ ਓਕਾਸਂ ਕਾਰੇਤਿ, ਨ ਚੋਦੇਤਿ, ਨ ਸਾਰੇਤਿ, ਨ ਭਿਕ੍ਖੂਹਿ ਸਮ੍ਪਯੋਜੇਤਿ – ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਬ੍ਬਂ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇ

ਪਟਿਪ੍ਪਸ੍ਸਮ੍ਭੇਤਬ੍ਬਤੇਚਤ੍ਤਾਲੀਸਕਂ ਨਿਟ੍ਠਿਤਂ.

੫੫. ‘‘ਏਵਞ੍ਚ ਪਨ, ਭਿਕ੍ਖਵੇ, ਪਟਿਪ੍ਪਸ੍ਸਮ੍ਭੇਤਬ੍ਬਂ. ਤੇਨ, ਭਿਕ੍ਖਵੇ, ਛਨ੍ਨੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ – ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਛਨ੍ਨੋ ਭਿਕ੍ਖੁ ਸਙ੍ਘੇਨ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਂ ਯਾਚਤਿ. ਸਙ੍ਘੋ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭੇਤਿ. ਯਸ੍ਸਾਯਸ੍ਮਤੋ ਖਮਤਿ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਪਟਿਪ੍ਪਸ੍ਸਦ੍ਧਂ ਸਙ੍ਘੇਨ ਛਨ੍ਨਸ੍ਸ ਭਿਕ੍ਖੁਨੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖੇਪਨੀਯਕਮ੍ਮਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਨਿਟ੍ਠਿਤਂ ਪਞ੍ਚਮਂ.