ਸਾਸਨਪਟ੍ਠਾਨਵਿਭਾਵਨਾ

੮੯. ‘‘ਤਤ੍ਥ ਕਤਮਂ ਨਯਸਮੁਟ੍ਠਾਨ’’ਨ੍ਤਿਆਦਿਨਾ ਆਚਰਿਯੇਨ ਸਬ੍ਬਥਾ ਨਯਸਮੁਟ੍ਠਾਨਂ ਠਪਿਤਂ, ਅਮ੍ਹੇਹਿ ਚ ਞਾਤਂ, ‘‘ਸੋਲ਼ਸਹਾਰਪਞ੍ਚਨਯਅਟ੍ਠਾਰਸਮੂਲਪਦੇਸੁ ਅਟ੍ਠਾਰਸ ਮੂਲਪਦਾ ਕਥਂ ਵਿਭਤ੍ਤਾ, ਕੁਹਿਂ ਅਮ੍ਹੇਹਿ ਦਟ੍ਠਬ੍ਬਾ’’ਤਿ ਵਤ੍ਤਬ੍ਬਭਾਵਤੋ ‘‘ਤਤ੍ਥ ਅਟ੍ਠਾਰਸ ਮੂਲਪਦਾ ਕੁਹਿਂ ਦਟ੍ਠਬ੍ਬਾ’’ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਸੋਲ਼ਸਹਾਰਪਞ੍ਚਨਯਅਟ੍ਠਾਰਸਮੂਲਪਦੇਸੁ ਅਟ੍ਠਾਰਸ ਮੂਲਪਦਾ ਕੇਨ ਪਦੇਨ ਆਚਰਿਯੇਨ ਵਿਭਤ੍ਤਾ, ਕੁਹਿਂ ਅਮ੍ਹੇਹਿ ਵਿਤ੍ਥਾਰਤੋ ਦਟ੍ਠਬ੍ਬਾਤਿ ਪੁਚ੍ਛਤਿ. ਅਟ੍ਠਾਰਸ ਮੂਲਪਦਾ ਸਾਸਨਪਟ੍ਠਾਨੇ ਮਯਾ ਵਿਭਤ੍ਤਾ, ਤੁਮ੍ਹੇਹਿ ਚ ਵਿਤ੍ਥਾਰਤੋ ਸਾਸਨਪਟ੍ਠਾਨੇ ਦਟ੍ਠਬ੍ਬਾਤਿ ਵਿਸ੍ਸਜ੍ਜੇਤਿ. ਵਿਭਤ੍ਤਾਯੇਵ ਹਿ ਅਟ੍ਠਾਰਸ ਮੂਲਪਦਾ ਦਟ੍ਠਬ੍ਬਾ ਭਵਨ੍ਤਿ. ਅਟ੍ਠਕਥਾਯਂ (ਨੇਤ੍ਤਿ. ਅਟ੍ਠ. ੮੯) ਪਨ –

‘‘ਏਵਂ ਸਬ੍ਬਥਾ ਨਯਸਮੁਟ੍ਠਾਨਂ ਵਿਭਜਿਤ੍ਵਾ ਇਦਾਨਿ ਸਾਸਨਪਟ੍ਠਾਨਂ ਵਿਭਜਨ੍ਤੋ ਯਸ੍ਮਾ ਸਙ੍ਗਹਵਾਰਾਦੀਸੁ ਮੂਲਪਦੇਹੇਵ ਪਟ੍ਠਾਨਂ ਸਙ੍ਗਹੇਤ੍ਵਾ ਸਰੂਪਤੋ ਨ ਦਸ੍ਸਿਤਂ, ਤਸ੍ਮਾ ਯਥਾ ਮੂਲਪਦੇਹਿ ਪਟ੍ਠਾਨਂ ਨਿਦ੍ਧਾਰੇਤਬ੍ਬਂ, ਏਵਂ ਪਟ੍ਠਾਨਤੋਪਿ ਮੂਲਪਦਾਨਿ ਨਿਦ੍ਧਾਰੇਤਬ੍ਬਾਨੀਤਿ ਦਸ੍ਸਨਤ੍ਥਂ ‘ਅਟ੍ਠਾਰਸ ਮੂਲਪਦਾ ਕੁਹਿਂ ਦਟ੍ਠਬ੍ਬਾ? ਸਾਸਨਪਟ੍ਠਾਨੇ’ਤਿ ਆਹਾ’’ਤਿ –

ਵੁਤ੍ਤਂ. ਸਾਸਨਪਟ੍ਠਾਨੇ ਅਟ੍ਠਾਰਸ ਮੂਲਪਦਾ ਦਟ੍ਠਬ੍ਬਾਤਿ ਆਚਰਿਯੇਨ ਵੁਤ੍ਤਾ, ‘‘ਕਤਮਂ ਤਂ ਸਾਸਨਪਟ੍ਠਾਨ’’ਨ੍ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮਂ ਸਾਸਨਪਟ੍ਠਾਨ’’ਨ੍ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਅਟ੍ਠਾਰਸਮੂਲਪਦਸਾਸਨਪਟ੍ਠਾਨੇਸੁ ਕਤਮਂ ਤਂ ਸਾਸਨਪਟ੍ਠਾਨਨ੍ਤਿ ਇਦਾਨਿ ਮਯਾ ਨਿਦ੍ਧਾਰਿਯਮਾਨਂ ਭਗਵਤਾ ਦੇਸਿਤਂ ਸਂਕਿਲੇਸਭਾਗਿਯਾਦਿਸੁਤ੍ਤਂ ਸਾਸਨਪਟ੍ਠਾਨਂ ਨਾਮਾਤਿ ਵਿਸ੍ਸਜ੍ਜੇਤਿ. ਸਾਸਨਨ੍ਤਿ ਪਰਿਯਤ੍ਤਿਸਾਸਨਂ. ਪਟ੍ਠਾਨਨ੍ਤਿ ਤਸ੍ਸ ਪਰਿਯਤ੍ਤਿਸਾਸਨਸ੍ਸ ਸਂਕਿਲੇਸਭਾਗਿਯਤਾਦੀਹਿ ਪਕਾਰੇਹਿ ਠਾਨਂ ਪਵਤ੍ਤਨਂ ਪਟ੍ਠਾਨਂ, ਤਂਦੀਪਨਸੁਤ੍ਤਂ ਪਨ ਇਧ ਪਟ੍ਠਾਨਂ ਨਾਮ. ਤੇਨ ਵੁਤ੍ਤਂ – ‘‘ਸਂਕਿਲੇਸਭਾਗਿਯਂ ਸੁਤ੍ਤ’’ਨ੍ਤਿਆਦਿ. ਅਥ ਵਾ ਸਾਸਨਨ੍ਤਿ ਅਧਿਸੀਲਅਧਿਚਿਤ੍ਤਅਧਿਪਞ੍ਞਾਸਿਕ੍ਖਤ੍ਤਯਂ ਸਾਸਨਂ ਨਾਮ, ਤਂ ਸਿਕ੍ਖਤ੍ਤਯਂ ਪਤਿਟ੍ਠਹਤਿ ਏਤੇਨ ਸਂਕਿਲੇਸਾਦਿਨਾਤਿ ਪਟ੍ਠਾਨਂ, ਸਿਕ੍ਖਤ੍ਤਯਸ੍ਸ ਸਾਸਨਸ੍ਸ ਪਟ੍ਠਾਨਨ੍ਤਿ ਸਾਸਨਪਟ੍ਠਾਨਂ. ਤਦਾਧਾਰਭੂਤਂ ਸੁਤ੍ਤਮ੍ਪਿ ਠਾਨ੍ਯੂਪਚਾਰਤੋ ਸਾਸਨਪਟ੍ਠਾਨਂ ਨਾਮ. ਤਂ ਸਾਸਨਪਟ੍ਠਾਨਸੁਤ੍ਤਂ ਸਰੂਪਤੋ ਦਸ੍ਸੇਤੁਂ –

‘‘ਸਂਕਿਲੇਸਭਾਗਿਯਂ ਸੁਤ੍ਤਂ, ਵਾਸਨਾਭਾਗਿਯਂ ਸੁਤ੍ਤਂ, ਨਿਬ੍ਬੇਧਭਾਗਿਯਂ ਸੁਤ੍ਤਂ, ਅਸੇਕ੍ਖਭਾਗਿਯਂ ਸੁਤ੍ਤਂ, ਸਂਕਿਲੇਸਭਾਗਿਯਞ੍ਚ ਵਾਸਨਾਭਾਗਿਯਞ੍ਚ ਸੁਤ੍ਤਂ, ਸਂਕਿਲੇਸਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚ ਸੁਤ੍ਤਂ, ਸਂਕਿਲੇਸਭਾਗਿਯਞ੍ਚ ਅਸੇਕ੍ਖਭਾਗਿਯਞ੍ਚ ਸੁਤ੍ਤਂ, ਸਂਕਿਲੇਸਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚ ਅਸੇਕ੍ਖਭਾਗਿਯਞ੍ਚ ਸੁਤ੍ਤਂ, ਸਂਕਿਲੇਸਭਾਗਿਯਞ੍ਚ ਵਾਸਨਾਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚ ਸੁਤ੍ਤਂ, ਵਾਸਨਾਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚ ਸੁਤ੍ਤਂ, ਤਣ੍ਹਾਸਂਕਿਲੇਸਭਾਗਿਯਂ ਸੁਤ੍ਤਂ, ਦਿਟ੍ਠਿਸਂਕਿਲੇਸਭਾਗਿਯਂ ਸੁਤ੍ਤਂ, ਦੁਚ੍ਚਰਿਤਸਂਕਿਲੇਸਭਾਗਿਯਂ ਸੁਤ੍ਤਂ, ਤਣ੍ਹਾਵੋਦਾਨਭਾਗਿਯਂ ਸੁਤ੍ਤਂ, ਦਿਟ੍ਠਿਵੋਦਾਨਭਾਗਿਯਂ ਸੁਤ੍ਤਂ, ਦੁਚ੍ਚਰਿਤਵੋਦਾਨਭਾਗਿਯਂ ਸੁਤ੍ਤ’’ਨ੍ਤਿ –

ਵੁਤ੍ਤਂ. ‘‘ਤੇਸੁ ਸੁਤ੍ਤੇਸੁ ਯੇ ਸਂਕਿਲੇਸਾਦਯੋ ਭਗਵਤਾ ਵੁਤ੍ਤਾ, ਤੇਸੁ ਸਂਕਿਲੇਸਾਦੀਸੁ ਸਂਕਿਲੇਸੋ ਕਿਤ੍ਤਕੋ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਸਂਕਿਲੇਸੋ ਤਿਵਿਧੋ ਤਣ੍ਹਾਸਂਕਿਲੇਸੋ ਦਿਟ੍ਠਿਸਂਕਿਲੇਸੋ ਦੁਚ੍ਚਰਿਤਸਂਕਿਲੇਸੋ’’ਤਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਸੁਤ੍ਤਨ੍ਤੇਸੁ ਸਂਕਿਲੇਸਾਦੀਸੁ ਧਮ੍ਮੇਸੁ. ‘‘ਤਿਵਿਧੇ ਤਸ੍ਮਿਂ ਸਂਕਿਲੇਸੇ ਤਣ੍ਹਾਸਂਕਿਲੇਸੋ ਕਤਮੇਨ ਕੁਸਲੇਨ ਵਿਸੁਜ੍ਝਤੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਤਣ੍ਹਾਸਂਕਿਲੇਸੋ ਸਮਥੇਨ ਵਿਸੁਜ੍ਝਤੀ’’ਤਿ ਵੁਤ੍ਤਂ. ਤਤ੍ਥਾਤਿ ਤਸ੍ਮਿਂ ਤਿਵਿਧੇ ਤਣ੍ਹਾਸਂਕਿਲੇਸਾਦਿਕੇ. ‘‘ਸੋ ਸਮਥੋ ਖਨ੍ਧੇਸੁ ਕਤਮੋ ਖਨ੍ਧੋ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਸੋ ਸਮਥੋ ਸਮਾਧਿਕ੍ਖਨ੍ਧੋ’’ਤਿ ਵੁਤ੍ਤਂ. ‘‘ਦਿਟ੍ਠਿਸਂਕਿਲੇਸੋ ਕੇਨ ਵਿਸੁਜ੍ਝਤੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਦਿਟ੍ਠਿਸਂਕਿਲੇਸੋ ਵਿਪਸ੍ਸਨਾਯ ਵਿਸੁਜ੍ਝਤੀ’’ਤਿ ਵੁਤ੍ਤਂ. ‘‘ਸਾ ਵਿਪਸ੍ਸਨਾ ਕਤਮੋ ਖਨ੍ਧੋ’’ਤਿ ਵਤ੍ਤਬ੍ਬਤ੍ਤਾ ‘‘ਸਾ ਵਿਪਸ੍ਸਨਾ ਪਞ੍ਞਾਕ੍ਖਨ੍ਧੋ’’ਤਿ ਵੁਤ੍ਤਂ. ‘‘ਦੁਚ੍ਚਰਿਤਸਂਕਿਲੇਸੋ ਕੇਨ ਵਿਸੁਜ੍ਝਤੀ’’ਤਿ ਵਤ੍ਤਬ੍ਬਤ੍ਤਾ ‘‘ਦੁਚ੍ਚਰਿਤਸਂਕਿਲੇਸੋ ਸੁਚਰਿਤੇਨ ਵਿਸੁਜ੍ਝਤੀ’’ਤਿ ਵੁਤ੍ਤਂ. ‘‘ਤਂ ਸੁਚਰਿਤਂ ਕਤਮੋ ਖਨ੍ਧੋ’’ਤਿ ਵਤ੍ਤਬ੍ਬਤ੍ਤਾ ‘‘ਤਂ ਸੁਚਰਿਤਂ ਸੀਲਕ੍ਖਨ੍ਧੋ’’ਤਿ ਵੁਤ੍ਤਂ. ‘‘ਤਸ੍ਮਿਂ ਸੀਲੇ ਠਿਤਸ੍ਸ ਪੁਗ੍ਗਲਸ੍ਸ ਕਿਂ ਭਵਤੀ’’ਤਿ ਵਤ੍ਤਬ੍ਬਤ੍ਤਾ ‘‘ਤਸ੍ਸ ਸੀਲੇ ਪਤਿਟ੍ਠਿਤਸ੍ਸਾ’’ਤਿਆਦਿ ਵੁਤ੍ਤਂ. ਸੀਲੇ ਸੁਚਰਿਤਸਙ੍ਖਾਤੇ ਸੀਲਕ੍ਖਨ੍ਧੇ ਪਤਿਟ੍ਠਿਤਸ੍ਸ ਤਸ੍ਸ ਸੀਲਵਨ੍ਤਸ੍ਸ ਪੁਗ੍ਗਲਸ੍ਸ ਭਵੇਸੁ ਕਾਮਭਵਰੂਪਾਰੂਪਭਵੇਸੁ ਆਸਤ੍ਤਿ ਭਵਪਤ੍ਥਨਾ ਯਦਿ ਉਪ੍ਪਜ੍ਜਤਿ, ਏਵਂਸਾਯਨ੍ਤਿ ਏਵਂ ਅਸ੍ਸ ਅਯਨ੍ਤਿ ਪਦਚ੍ਛੇਦੋ. ਏਵਂ ਸਤਿ ਅਸ੍ਸ ਸੀਲੇ ਪਤਿਟ੍ਠਿਤਸ੍ਸ ਅਯਂ ਆਸਤ੍ਤਿ ਭਵਪਤ੍ਥਨਾ ਸਮਥਵਿਪਸ੍ਸਨਾਭਾਵਨਾਮਯਪੁਞ੍ਞਕਿਰਿਯਵਤ੍ਥੁ ਚ ਭਵਤਿ, ਚ-ਸਦ੍ਦੇਨ ਦਾਨਮਯਸੀਲਮਯਪੁਞ੍ਞਕਿਰਿਯਵਤ੍ਥੁ ਚ ਭਵਤੀਤਿ ਅਤ੍ਥੋ ਸਙ੍ਗਹਿਤੋ. ਤਤ੍ਰਾਤਿ ਤੇਸੁ ਕਾਮਭਵਰੂਪਾਰੂਪਭਵੇਸੁ ਉਪਪਤ੍ਤਿਯਾ ਸਂਵਤ੍ਤਤੀਤਿ.

‘‘ਸਂਕਿਲੇਸਾਦਯੋ ਯੇਹਿ ਸੁਤ੍ਤੇਹਿ ਦਸ੍ਸਿਤਾ, ਤਾਨਿ ਸੁਤ੍ਤਾਨਿ ਕਿਤ੍ਤਕਾਨੀ’’ਤਿ ਵਤ੍ਤਬ੍ਬਤ੍ਤਾ ‘‘ਇਮਾਨਿ ਚਤ੍ਤਾਰਿ ਸੁਤ੍ਤਾਨੀ’’ਤਿਆਦਿ ਵੁਤ੍ਤਂ. ਅਸਾਧਾਰਣਾਨਿ ਸਂਕਿਲੇਸਭਾਗਿਯਸੁਤ੍ਤਵਾਸਨਾਭਾਗਿਯਸੁਤ੍ਤਨਿਬ੍ਬੇਧਭਾਗਿਯਸੁਤ੍ਤਅਸੇਕ੍ਖਭਾਗਿਯਸੁਤ੍ਤਾਨਿ ਚਤ੍ਤਾਰਿ ਸੁਤ੍ਤਾਨਿ ਭਵਨ੍ਤਿ, ਸਾਧਾਰਣਾਨਿ ਸਂਕਿਲੇਸਭਾਗਿਯਵਾਸਨਾਭਾਗਿਯਸੁਤ੍ਤ, ਸਂਕਿਲੇਸਭਾਗਿਯਨਿਬ੍ਬੇਧਭਾਗਿਯਸੁਤ੍ਤ, ਸਂਕਿਲੇਸਭਾਗਿਯਅਸੇਕ੍ਖਭਾਗਿਯਸੁਤ੍ਤ, ਵਾਸਨਾਭਾਗਿਯਨਿਬ੍ਬੇਧਭਾਗਿਯਸੁਤ੍ਤਾਨਿ ਕਤਾਨਿ ਮਿਸ੍ਸਿਤਾਨਿ ਚਤ੍ਤਾਰਿ ਭਵਨ੍ਤਿ. ਇਤਿ ਅਟ੍ਠ ਸੁਤ੍ਤਾਨਿ ਭਵਨ੍ਤਿ. ਤਾਨਿਯੇਵ ਵੁਤ੍ਤਪ੍ਪਕਾਰਾਨਿ ਅਟ੍ਠ ਸੁਤ੍ਤਾਨਿ ਭਵਨ੍ਤਿ. ਸਾਧਾਰਣਾਨਿ ਵਾਸਨਾਭਾਗਿਯਅਸੇਕ੍ਖਭਾਗਿਯਸੁਤ੍ਤਨਿਬ੍ਬੇਧਭਾਗਿਯਅਸੇਕ੍ਖਭਾਗਿਯਸੁਤ੍ਤ- ਸਂਕਿਲੇਸਭਾਗਿਯਵਾਸਨਾਭਾਗਿਯਨਿਬ੍ਬੇਧਭਾਗਿਯਸੁਤ੍ਤਸਂਕਿਲੇਸ- ਭਾਗਿਯਵਾਸਨਾਭਾਗਿਯਅਸੇਕ੍ਖਭਾਗਿਯਸੁਤ੍ਤ- ਸਂਕਿਲੇਸਭਾਗਿਯਨਿਬ੍ਬੇਧਭਾਗਿਯਅਸੇਕ੍ਖਭਾਗਿਯਸੁਤ੍ਤ- ਵਾਸਨਾਭਾਗਿਯਨਿਬ੍ਬੇਧਭਾਗਿਯਅਸੇਕ੍ਖਭਾਗਿਯਸੁਤ੍ਤ- ਸਂਕਿਲੇਸਭਾਗਿਯਵਾਸਨਾਭਾਗਿਯਨਿਬ੍ਬੇਧਭਾਗਿਯਅਸੇਕ੍ਖਭਾਗਿਯਸੁਤ੍ਤ- ਨੇਵਸਂਕਿਲੇਸਭਾਗਿਯਨਵਾਸਨਾ- ਭਾਗਿਯਨਨਿਬ੍ਬੇਧਭਾਗਿਯਨਅਸੇਕ੍ਖਭਾਗਿਯਸੁਤ੍ਤਾਨਿ ਕਤਾਨਿ ਮਿਸ੍ਸਿਤਾਨਿ ਅਟ੍ਠ ਸੁਤ੍ਤਾਨਿ ਭਵਨ੍ਤੀਤਿ ਸੋਲ਼ਸ ਸੁਤ੍ਤਾਨਿ ਭਵਨ੍ਤਿ. ਤੇਸੁ ਸੋਲ਼ਸਸੁਤ੍ਤੇਸੁ ਚਤ੍ਤਾਰਿ ਏਕਕਾਨਿ ਸੁਤ੍ਤਾਨਿ ਚ ਚਤ੍ਤਾਰਿ ਦੁਕਾਨਿ ਸੁਤ੍ਤਾਨਿ ਚ ਦ੍ਵੇ ਤਿਕਾਨਿ ਚ ਪਾਲ਼ਿਯਂ ਆਗਤਾਨਿ, ਦ੍ਵੇ ਦੁਕਾਨਿ ਸੁਤ੍ਤਾਨਿ ਚ ਦ੍ਵੇ ਤਿਕਾਨਿ ਚ ਦ੍ਵੇ ਚਤੁਕ੍ਕਾਨਿ ਸੁਤ੍ਤਾਨਿ ਚ ਅਟ੍ਠਕਥਾਯਂ (ਨੇਤ੍ਤਿ. ਅਟ੍ਠ. ੮੯) ਆਗਤਾਨਿ.

‘‘ਯਦਿ ਪਟ੍ਠਾਨਨਯੇਨ ਵੁਤ੍ਤਪ੍ਪਕਾਰਾਨਿ ਸੋਲ਼ਸ ਸੁਤ੍ਤਾਨਿਯੇਵ ਵਿਭਤ੍ਤਾਨਿ, ਏਵਂ ਸਤਿ ਸੁਤ੍ਤਗੇਯ੍ਯਾਦਿਨਵਵਿਧਂ ਸਕਲਂ ਪਰਿਯਤ੍ਤਿਸਾਸਨਂ ਪਟ੍ਠਾਨਨਯੇਨ ਅਵਿਭਤ੍ਤਂ ਭਵੇਯ੍ਯਾ’’ਤਿ ਵਤ੍ਤਬ੍ਬਤ੍ਤਾ ‘‘ਇਮੇਹਿ ਸੋਲ਼ਸਹਿ ਸੁਤ੍ਤੇਹੀ’’ਤਿਆਦਿ ਵੁਤ੍ਤਂ. ਪਟ੍ਠਾਨਨਯੇਨ ਵਿਭਤ੍ਤੇਹਿ ਸੋਲ਼ਸਹਿ ਇਮੇਹਿ ਸੁਤ੍ਤੇਹਿ ਨਵਵਿਧਂ ਸਕਲਂ ਪਰਿਯਤ੍ਤਿਸੁਤ੍ਤਂ ਪਟ੍ਠਾਨਨਯੇਨ ਵਿਭਤ੍ਤਂਯੇਵ ਹੁਤ੍ਵਾ ਭਿਨ੍ਨਂ ਭਵਤਿ. ਸਂਕਿਲੇਸਭਾਗਿਯਾਦਿਪਭੇਦਾਯ ਗਾਥਾਯ ਗਾਥਾ ਅਨੁਮਿਨਿਤਬ੍ਬਾ, ਸਂਕਿਲੇਸਭਾਗਿਯਾਦਿਪਭੇਦੇਨ ਵੇਯ੍ਯਾਕਰਣੇਨ ਵੇਯ੍ਯਾਕਰਣਂ ਅਨੁਮਿਨਿਤਬ੍ਬਂ. ਸਂਕਿਲੇਸਭਾਗਿਯਾਦਿਪਭੇਦੇਨ ਸੁਤ੍ਤੇਨ ਸੁਤ੍ਤਂ ਅਨੁਮਿਨਿਤਬ੍ਬਂ ਭਵਤਿਯੇਵਾਤਿ.

੯੦. ‘‘ਤੇਸੁ ਸੋਲ਼ਸਸੁ ਸਂਕਿਲੇਸਭਾਗਿਯਾਦੀਸੁ ਸੁਤ੍ਤੇਸੁ ਕਤਮਂ ਸਂਕਿਲੇਸਭਾਗਿਯਂ ਸੁਤ੍ਤ’’ਨ੍ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮਂ ਸਂਕਿਲੇਸਭਾਗਿਯਂ ਸੁਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਸੋਲ਼ਸਸੁ ਸਂਕਿਲੇਸਭਾਗਿਯਾਦੀਸੁ ਸੁਤ੍ਤੇਸੁ ਕਤਮਂ ਸੁਤ੍ਤਂ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮਾਤਿ ਪੁਚ੍ਛਤਿ.

‘‘ਕਾਮਨ੍ਧਾ ਜਾਲਸਞ੍ਛਨ੍ਨਾ, ਤਣ੍ਹਾਛਦਨਛਾਦਿਤਾ;

ਪਮਤ੍ਤਬਨ੍ਧਨਾਬਦ੍ਧਾ, ਮਚ੍ਛਾਵ ਕੁਮਿਨਾਮੁਖੇ;

ਜਰਾਮਰਣਮਨ੍ਵੇਨ੍ਤਿ, ਵਚ੍ਛੋ ਖੀਰਪਕੋਵ ਮਾਤਰ’’ਨ੍ਤਿ. –

ਇਦਂ ਸੁਤ੍ਤਂ ਸਂਕਿਲੇਸਭਾਗੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੇ ਸਤ੍ਤਾ ਕਾਮਨ੍ਧਾ ਕਾਮੇਨ ਅਨ੍ਧਾ ਜਾਲਸਞ੍ਛਨ੍ਨਾ ਤਣ੍ਹਾਛਦਨੇਨ ਛਾਦਿਤਾ, ਪਮਤ੍ਤਬਨ੍ਧਨਾਯ ਬਦ੍ਧਾ ਬਨ੍ਧਿਤਬ੍ਬਾ, ਤੇ ਸਤ੍ਤੇ ਜਰਾਮਰਣਂ ਅਨ੍ਵੇਤਿ, ਯਥਾ ਤਂ ਕੁਮਿਨਾਮੁਖੇ ਯੇ ਮਚ੍ਛਾ ਗਹਿਤਾ, ਤੇ ਮਚ੍ਛੇ ਜਰਾਮਰਣਂ ਅਨ੍ਵੇਤਿ ਇਵ, ਏਵਂ ਤੇ ਸਤ੍ਤੇ ਜਰਾਮਰਣਂ ਅਨ੍ਵੇਤਿ. ਖੀਰਪਕੋ ਵਚ੍ਛੋ ਮਾਤਰਂ ਅਨ੍ਵੇਤਿ ਇਵ, ਏਵਂ ਤੇ ਸਤ੍ਤੇ ਜਰਾਮਰਣਂ ਅਨ੍ਵੇਤੀਤਿ ਯੋਜਨਾ ਕਾਤਬ੍ਬਾ. ਅਥ ਵਾ ਖੀਰਪਕੋ ਵਚ੍ਛੋ ਮਾਤਰਂ ਅਨ੍ਵੇਤਿ ਇਵ, ਕੁਮਿਨਾਮੁਖੇ ਗਹਿਤਾ ਮਚ੍ਛਾ ਜਰਾਮਰਣਂ ਅਨ੍ਵੇਨ੍ਤਿ ਇਵ ਚ, ਏਵਂ ਯੇ ਸਤ੍ਤਾ ਕਾਮਨ੍ਧਾ ਪਮਤ੍ਤਬਨ੍ਧਨਾਯ ਬਨ੍ਧਿਤਬ੍ਬਾ, ਤੇ ਸਤ੍ਤਾ ਜਰਾਮਰਣਂ ਅਨ੍ਵੇਨ੍ਤੀਤਿ ਯੋਜਨਾ.

‘‘ਇਦਂ ਸੁਤ੍ਤਂਯੇਵਾ’’ਤਿ ਵਤ੍ਤਬ੍ਬਤ੍ਤਾ –

‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਅਗਤਿਗਮਨਾਨਿ. ਕਤਮਾਨਿ ਚਤ੍ਤਾਰਿ? ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ, ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਅਗਤਿਗਮਨਾਨਿ. ਇਦਮਵੋਚ ਭਗਵਾ, ਇਦਂ ਵਤ੍ਵਾਨ ਸੁਗਤੋ, ਅਥਾਪਰਂ ਏਤਦਵੋਚ ਸਤ੍ਥਾ –

‘‘ਛਨ੍ਦਾ ਦੋਸਾ ਭਯਾ ਮੋਹਾ, ਯੋ ਧਮ੍ਮਂ ਅਤਿਵਤ੍ਤਤਿ;

ਨਿਹੀਯਤਿ ਤਸ੍ਸ ਯਸੋ, ਕਾਲ਼ਪਕ੍ਖੇਵ ਚਨ੍ਦਿਮਾ’’ਤਿ. –

ਇਦਂ ਸਂਕਿਲੇਸਭਾਗਿਯਂ ਸੁਤ੍ਤਨ੍ਤਿ –

ਵੁਤ੍ਤਂ. ਛਨ੍ਦਾ ਛਨ੍ਦਹੇਤੁਨਾ ਦੋਸਾ ਦੋਸਹੇਤੁਨਾ ਭਯਾ ਭਯਹੇਤੁਨਾ ਮੋਹਾ ਮੋਹਹੇਤੁਨਾ ਯੋ ਰਾਜਾਦਿਕੋ ਯੋ ਵਿਨਯਧਰਾਦਿਕੋ ਵਾ ਧਮ੍ਮਂ ਸਪ੍ਪੁਰਿਸਧਮ੍ਮਂ ਅਤਿਵਤ੍ਤਤਿ ਅਤਿਕ੍ਕਮਿਤ੍ਵਾ ਵਤ੍ਤਤਿ, ਤਸ੍ਸ ਰਾਜਾਦਿਨੋ ਵਾ ਤਸ੍ਸ ਵਿਨਯਧਰਾਦਿਨੋ ਵਾ ਯਸੋ ਕਿਤ੍ਤਿ ਚ ਪਰਿਵਾਰੋ ਚ ਭੋਗੋ ਚ ਨਿਹੀਯਤਿ. ਚਨ੍ਦਿਮਾ ਕਾਲ਼ਪਕ੍ਖੇ ਪਭਾਯ ਨਿਹੀਯਤਿ ਇਵ, ਏਵਂ ਨਿਹੀਯਤੀਤਿ ਯੋਜਨਾ.

‘‘ਏਤ੍ਤਕਂਯੇਵਾ’’ਤਿ ਵਤ੍ਤਬ੍ਬਤ੍ਤਾ ‘‘ਮਨੋਪੁਬ੍ਬਙ੍ਗਮਾ ਧਮ੍ਮਾ…ਪੇ… ਚਕ੍ਕਂਵ ਵਹਤੋ ਪਦਨ੍ਤਿ ਇਦਂ ਸਂਕਿਲੇਸਭਾਗਿਯਂ ਸੁਤ੍ਤ’’ਨ੍ਤਿ ਵੁਤ੍ਤਂ. ਅਤ੍ਥੋ ਪਾਕਟੋ. ਅਟ੍ਠਕਥਾਯਮ੍ਪਿ ਵਿਭਤ੍ਤੋ.

‘‘ਮਿਦ੍ਧੀ ਯਦਾ ਹੋਤਿ ਮਹਗ੍ਘਸੋ ਚ, ਨਿਦ੍ਦਾਯਿਤਾ ਸਮ੍ਪਰਿਵਤ੍ਤਸਾਯੀ;

ਮਹਾਵਰਾਹੋਵ ਨਿਵਾਪਪੁਟ੍ਠੋ, ਪੁਨਪ੍ਪੁਨਂ ਗਬ੍ਭਮੁਪੇਤਿ ਮਨ੍ਦੋ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗੇ ਵਿਸਯੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਨਿਵਾਪਪੁਟ੍ਠੋ ਮਹਾਵਰਾਹੋ ਗਾਮਸੂਕਰੋ ਨਿਦ੍ਦਾਯਿਤਾ ਸੁਪਨਸੀਲੋ ਸਮ੍ਪਰਿਵਤ੍ਤਸਾਯੀ ਹੋਤਿ ਇਵ, ਏਵਂ ਯੋ ਮਨ੍ਦੋ ਸਤ੍ਤੋ ਯਦਾ ਮਹਗ੍ਘਸੋ ਹੋਤਿ, ਸੋ ਮਨ੍ਦੋ ਸਤ੍ਤੋ ਮਿਦ੍ਧੀ ਥਿਨਮਿਦ੍ਧਾਭਿਭੂਤੋ ਹੁਤ੍ਵਾ ਨਿਦ੍ਦਾਯਿਤਾ ਮੁਦੁਫਸ੍ਸਸਯਨੇ ਮੁਦੁਹਤ੍ਥੇਹਿ ਪਰਾਮਸਿਤੋ ਸਮ੍ਪਰਿਵਤ੍ਤਸਾਯੀ ਪੁਨਪ੍ਪੁਨਂ ਗਬ੍ਭਂ ਉਪੇਤੀਤਿ ਯੋਜਨਾ.

‘‘ਅਯਸਾਵ ਮਲਂ ਸਮੁਟ੍ਠਿਤਂ, ਤਤੁਟ੍ਠਾਯ ਤਮੇਵ ਖਾਦਤਿ;

ਏਵਂ ਅਤਿਧੋਨਚਾਰਿਨਂ, ਸਾਨਿ ਕਮ੍ਮਾਨਿ ਨਯਨ੍ਤਿ ਦੁਗ੍ਗਤਿ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਅਯਸਾ ਅਯਤੋ ਸਮੁਟ੍ਠਿਤਂ ਜਾਤਮਲਂ ਤਤੁਟ੍ਠਾਯ ਤਤੋ ਅਯਤੋ ਉਟ੍ਠਹਿਤ੍ਵਾ ਤਮੇਵ ਅਯਂ ਖਾਦਤਿ ਇਵ, ਏਵਂ ਅਤਿਧੋਨਚਾਰਿਨਂ ਅਤਿਕ੍ਕਮਿਤ੍ਵਾ ਧੋਨਚਾਰਿਪੁਗ੍ਗਲਂ ਸਾਨਿ ਸਯਂ ਕਤਾਨਿ ਅਕੁਸਲਕਮ੍ਮਾਨਿ ਦੁਗ੍ਗਤਿਂ ਨਯਨ੍ਤੀਤਿ ਯੋਜਨਾ.

‘‘ਚੋਰੋ ਯਥਾ ਸਨ੍ਧਿਮੁਖੇ ਗਹੀਤੋ, ਸਕਮ੍ਮੁਨਾ ਹਞ੍ਞਤਿ ਬਜ੍ਝਤੇ ਚ;

ਏਵਂ ਅਯਂ ਪੇਚ੍ਚ ਪਜਾ ਪਰਤ੍ਥ, ਸਕਮ੍ਮੁਨਾ ਹਞ੍ਞਤਿ ਬਜ੍ਝਤੇ ਚਾ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਸਨ੍ਧਿਮੁਖੇ ਰਾਜਪੁਰਿਸਾਦੀਹਿ ਗਹਿਤੋ ਚੋਰੋ ਸਕਮ੍ਮੁਨਾ ਅਤ੍ਤਨਾ ਕਤੇਨ ਚੋਰਕਮ੍ਮੇਨ ਹਞ੍ਞਤਿ ਚ ਬਜ੍ਝਤੇ ਚ ਯਥਾ, ਏਵਂ ਅਯਂ ਪਾਪਕਾਰਿਨੀ ਪਜਾ ਪਰਤ੍ਥ ਪਰਲੋਕੇ ਪੇਚ੍ਚ ਸਕਮ੍ਮੁਨਾ ਸਯਂ ਕਤੇਨ ਅਕੁਸਲਕਮ੍ਮੁਨਾ ਸਤ੍ਥਾਦੀਹਿ ਹਞ੍ਞਤਿ ਚ ਅਦ੍ਦੁਬਨ੍ਧਨਾਦੀਹਿ ਬਜ੍ਝਤੇ ਚਾਤਿ ਯੋਜਨਾ.

‘‘ਸੁਖਕਾਮਾਨਿ ਭੂਤਾਨਿ, ਯੋ ਦਣ੍ਡੇਨ ਵਿਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਨ ਲਭਤੇ ਸੁਖ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਅਤ੍ਤਨੋ ਸੁਖਂ ਏਸਾਨੋ ਏਸਮਾਨੋ ਯੋ ਸਤ੍ਤੋ ਅਞ੍ਞਾਨਿ ਸੁਖਕਾਮਾਨਿ ਭੂਤਾਨਿ ਦਣ੍ਡੇਨ ਵਿਹਿਂਸਤਿ, ਸੋ ਹਿਂਸਕੋ ਸਤ੍ਤੋ ਪਰਲੋਕੇ ਪੇਚ੍ਚ ਸੁਖਂ ਨ ਲਭਤੀਤਿ ਯੋਜਨਾ.

‘‘ਗੁਨ੍ਨਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ, ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਕ੍ਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਨਦਿਂ ਤਰਮਾਨਾਨਂ ਗੁਨ੍ਨਂ ਪੁਙ੍ਗਵੋ ਜਿਮ੍ਹਂ ਚੇ ਗਚ੍ਛਤਿ, ਏਵਂ ਨੇਤ੍ਤੇ ਜਿਮ੍ਹਂ ਗਤੇ ਸਤਿ ਸਬ੍ਬਾ ਤਾ ਗਾਵਿਯੋ ਜਿਮ੍ਹਂ ਗਚ੍ਛਨ੍ਤਿ ਯਥਾ, ਏਵਮੇਵ ਮਨੁਸ੍ਸੇਸੁ ਯੋ ਰਾਜਾ ਸੇਟ੍ਠਸਮ੍ਮਤੋ, ਸੋ ਰਾਜਾ ਅਧਮ੍ਮਂ ਚਰਤਿ, ਏਵਂ ਰਞ੍ਞੇ ਅਧਮ੍ਮਂ ਚਰਨ੍ਤੇ ਸਤਿ ਇਤਰਾ ਪਜਾ ਪਗੇਵ ਪਠਮਮੇਵ ਅਧਮ੍ਮਂ ਚਰਤਿ. ਰਾਜਾ ਅਧਮ੍ਮਿਕੋ ਚੇ ਹੋਤਿ, ਏਵਂ ਰਞ੍ਞੇ ਅਧਮ੍ਮਿਕੇ ਸਤਿ ਸਬ੍ਬਂ ਰਟ੍ਠਂ ਦੁਕ੍ਖਂ ਸੇਤੀਤਿ ਯੋਜਨਾ.

‘‘ਸੁਕਿਚ੍ਛਰੂਪਾ ਵਤਿਮੇ ਮਨੁਸ੍ਸਾ, ਕਰੋਨ੍ਤਿ ਪਾਪਂ ਉਪਧੀਸੁ ਰਤ੍ਤਾ;

ਗਚ੍ਛਨ੍ਤਿ ਤੇ ਬਹੁਜਨਸਨ੍ਨਿਵਾਸਂ, ਨਿਰਯਂ ਅਵੀਚਿਂ ਕਟੁਕਂ ਭਯਾਨਕ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੇ ਮਨੁਸ੍ਸਾ ਉਪਧੀਸੁ ਕਾਮਗੁਣੂਪਧੀਸੁ ਰਤ੍ਤਾ ਰਾਗਾਭਿਭੂਤਾ ਹੁਤ੍ਵਾ ਪਾਪਂ ਅਕੁਸਲਕਮ੍ਮਂ ਕਰੋਨ੍ਤਿ, ਇਮੇ ਪਾਪਕਮ੍ਮਕਰਾ ਮਨੁਸ੍ਸਾ ਸੁਕਿਚ੍ਛਰੂਪਾ ਵਤ ਸੁਟ੍ਠੁ ਕਿਚ੍ਛਾਪਨ੍ਨਰੂਪਾ ਵਤ ਭਵਨ੍ਤਿ, ਤੇ ਪਾਪਕਮ੍ਮਕਰਾ ਮਨੁਸ੍ਸਾ ਕਟੁਕਂ ਭਯਾਨਕਂ ਬਹੁਜਨਸਨ੍ਨਿਵਾਸਂ ਨਿਰਯਂ ਅਵੀਚਿਂ ਗਚ੍ਛਨ੍ਤੀਤਿ ਯੋਜਨਾ.

‘‘ਫਲਂ ਵੇ ਕਦਲਿਂ ਹਨ੍ਤਿ, ਫਲਂ ਵੇਲ਼ੁਂ ਫਲਂ ਨਲ਼ਂ;

ਸਕ੍ਕਾਰੋ ਕਾਪੁਰਿਸਂ ਹਨ੍ਤਿ, ਗਬ੍ਭੋ ਅਸ੍ਸਤਰਿਂ ਯਥਾ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਫਲਂ ਕਦਲਿਯਾ ਫਲਂ ਕਦਲਿਂ ਵੇ ਏਕਨ੍ਤੇਨ ਹਨ੍ਤਿ ਯਥਾ, ਫਲਂ ਵੇਲ਼ੁਂ ਵੇ ਏਕਨ੍ਤੇਨ ਹਨ੍ਤਿ ਯਥਾ, ਫਲਂ ਨਲ਼ਂ ਵੇ ਏਕਨ੍ਤੇਨ ਹਨ੍ਤਿ ਯਥਾ, ਗਬ੍ਭੋ ਅਸ੍ਸਤਰਿਂ ਮਾਤਰਂ ਵੇ ਏਕਨ੍ਤੇਨ ਹਨ੍ਤਿ ਯਥਾ, ਏਵਂ ਸਕ੍ਕਾਰੋ ਕਾਪੁਰਿਸਂ ਵੇ ਏਕਨ੍ਤੇਨ ਹਨ੍ਤੀਤਿ ਯੋਜਨਾ.

‘‘ਕੋਧਮਕ੍ਖਗਰੁ ਭਿਕ੍ਖੁ, ਲਾਭਸਕ੍ਕਾਰਗਾਰਵੋ;

ਸੁਖੇਤ੍ਤੇ ਪੂਤਿਬੀਜਂਵ, ਸਦ੍ਧਮ੍ਮੇ ਨ ਵਿਰੂਹਤੀ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਸੁਖੇਤ੍ਤੇ ਸੁਨ੍ਦਰੇ ਖੇਤ੍ਤੇਪਿ ਖਿਤ੍ਤਂ ਪੂਤਿਬੀਜਂ ਨ ਰੁਹਤਿ ਇਵ, ਏਵਂ ਯੋ ਭਿਕ੍ਖੁ ਲਾਭਸਕ੍ਕਾਰਗਾਰਵੋ ਕੋਧਂ ਕੁਜ੍ਝਨਲਕ੍ਖਣਂ ਕੋਧਂ, ਮਕ੍ਖਂ ਪਰਗੁਣਸੀਲਮਕ੍ਖਨਲਕ੍ਖਣਂ ਮਕ੍ਖਞ੍ਚ ਗਰੁਂ ਕਤ੍ਵਾ ਚਰਤਿ, ਸੋ ਚਰਨ੍ਤੋ ਭਿਕ੍ਖੁ ਸਦ੍ਧਮ੍ਮਸ੍ਮਿਂ ਨ ਰੁਹਤੀਤਿ ਯੋਜਨਾ.

੯੧. ‘‘ਇਧਾਹਂ, ਭਿਕ੍ਖਵੇ, ਏਕਚ੍ਚਂ ਪੁਗ੍ਗਲਂ ਪਦੁਟ੍ਠਚਿਤ੍ਤਂ ਏਵਂ ਚੇਤਸਾ ਚੇਤੋ ਪਰਿਚ੍ਚ ਪਜਾਨਾਮਿ…ਪੇ… ਇਤਿ ਮੇ ਸੁਤ’’ਨ੍ਤਿ ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਭਿਕ੍ਖਵੇ ਇਧ ਸਾਸਨੇ, ਲੋਕੇ ਵਾ ਅਹਂ ਏਕਚ੍ਚਂ ਪੁਗ੍ਗਲਂ ਪਦੁਟ੍ਠਚਿਤ੍ਤਂ ਮਮ ਚੇਤਸਾ ਤਸ੍ਸ ਚੇਤੋ ਚਿਤ੍ਤਂ ਪਰਿਚ੍ਚ ਪਰਿਚ੍ਛਿਨ੍ਦਿਤ੍ਵਾ ਬੁਦ੍ਧਚਕ੍ਖੁਨਾ ਏਵਂ ਪਜਾਨਾਮਿ. ‘‘ਕਥਂ ਪਜਾਨਾਮੀ’’ਤਿ ਚੇ ਪੁਚ੍ਛੇਯ੍ਯ, ਯਞ੍ਚ ਪਟਿਪਦਂ ਪਟਿਪਨ੍ਨੋ, ਯਞ੍ਚ ਮਗ੍ਗਂ ਸਮਾਰੁਲ਼੍ਹੋ ਅਯਂ ਪੁਗ੍ਗਲੋ ਯਥਾ ਯਾਯ ਦੁਪ੍ਪਟਿਪਦਾਯ ਯੇਨ ਦੁਮ੍ਮਗ੍ਗੇਨ ਇਰਿਯਤਿ ਪਵਤ੍ਤਤਿ, ਤਾਯ ਦੁਪ੍ਪਟਿਪਦਾਯ ਤੇਨ ਦੁਮ੍ਮਗ੍ਗੇਨ ਇਮਮ੍ਹਿ ਇਮਸ੍ਮਿਂ ਸਮਯੇ ਦੁਪ੍ਪਟਿਪਜ੍ਜਨਕਾਲੇ ਅਯਂ ਦੁਪ੍ਪਟਿਪਨ੍ਨਂ ਪਟਿਪਨ੍ਨੋ ਦੁਮ੍ਮਗ੍ਗਸਮਾਰੁਲ਼੍ਹੋ ਪੁਗ੍ਗਲੋ ਚੇ ਕਾਲਂ ਕਰੇਯ੍ਯ, ਏਵਂ ਸਤਿ ਆਭਤਂ ਵਤ੍ਥੁ ਨਿਕ੍ਖਿਤ੍ਤਂ ਯਥਾ, ਏਵਂ ਨਿਰਯੇ ਨਿਕ੍ਖਿਤ੍ਤੋ. ਤਂ ਕਿਸ੍ਸ ਹੇਤੁ? ਭਿਕ੍ਖਵੇ ਅਸ੍ਸ ਪੁਗ੍ਗਲਸ੍ਸ ਚਿਤ੍ਤਂ ਪਦੁਟ੍ਠਂ ਪਦੋਸਿਤਂ ਹਿ ਯਸ੍ਮਾ ਹੋਤਿ, ਤਸ੍ਮਾ ਨਿਕ੍ਖਿਤ੍ਤੋ. ਏਵਂ ਇਧ ਸਾਸਨੇ, ਲੋਕੇ ਵਾ ਚੇਤੋਪਦੋਸਹੇਤੁ ਚ ਪਨ ਏਕਚ੍ਚੇ ਸਤ੍ਤਾ ਪੁਗ੍ਗਲਾ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਉਪਪਜ੍ਜਨ੍ਤੀਤਿ ਪਜਾਨਾਮੀਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥ ਤਸ੍ਮਿਂ ਸੁਤ੍ਤੇ ਏਤਂ ‘‘ਪਦੁਟ੍ਠਚਿਤ੍ਤਂ ਞਤ੍ਵਾਨ…ਪੇ… ਨਿਰਯਂ ਸੋ ਉਪਪਜ੍ਜਤੀ’’ਤਿ ਗਾਥਾਵਚਨਂ ਇਤਿ ਏਵਂ ਵੁਚ੍ਚਤਿ.

ਸਤ੍ਥਾ ਇਧ ਸਾਸਨੇ, ਲੋਕੇ ਵਾ ਪਦੁਟ੍ਠਚਿਤ੍ਤਂ ਏਕਚ੍ਚਂ ਪੁਗ੍ਗਲਂ ਞਤ੍ਵਾਨ ਭਿਕ੍ਖੂਨਂ ਸਨ੍ਤਿਕੇ ਏਤਮਤ੍ਥਂ ਬ੍ਯਾਕਾਸਿ. ਇਮਮ੍ਹਿ ਇਮਸ੍ਮਿਂ ਸਮਯੇ ਅਯਂ ਪੁਗ੍ਗਲੋ ਚੇ ਕਾਲਂ ਕਯਿਰਾਥ, ਏਵਂ ਸਤਿ ਪਦੁਟ੍ਠਚਿਤ੍ਤਸਮਙ੍ਗੀ ਹਿ ਨਿਰਯਸ੍ਮਿਂ ਉਪਪਜ੍ਜੇਯ੍ਯ, ਪੁਗ੍ਗਲਸ੍ਸ ਚਿਤ੍ਤਂ ਪਦੂਸਿਤਂ ਹਿ ਯਸ੍ਮਾ ਹੋਤਿ, ਤਸ੍ਮਾ ਉਪਪਜ੍ਜੇਯ੍ਯ, ਚੇਤੋਪਦੋਸਹੇਤੁ ਸਤ੍ਤਾ ਦੁਗ੍ਗਤਿਂ ਗਚ੍ਛਨ੍ਤਿ ਆਭਤਂ ਵਤ੍ਥੁਂ ਨਿਕ੍ਖਿਪੇਯ੍ਯ ਯਥਾ, ਏਵਮੇਵਂ ਤਥਾਵਿਧੋ ਦੁਪ੍ਪਞ੍ਞੋ ਸੋ ਪਦੋਸਚਿਤ੍ਤੋ ਪੁਗ੍ਗਲੋ ਕਾਯਸ੍ਸ ਭੇਦਾ ਪਰਂ ਮਰਣਾ ਨਿਰਯਂ ਉਪਪਜ੍ਜਤੀਤਿ ਅਯਮ੍ਪਿ ਅਤ੍ਥੋ ਭਗਵਤਾ ਵੁਤ੍ਤੋ, ਇਤਿ ਮੇ ਮਯਾ ਸੁਤਨ੍ਤਿ ਯੋਜਨਾ.

‘‘ਸਚੇ ਭਾਯਥ ਦੁਕ੍ਖਸ੍ਸ, ਸਚੇ ਵੋ ਦੁਕ੍ਖਮਪ੍ਪਿਯਂ;

ਮਾਕਤ੍ਥ ਪਾਪਕਂ ਕਮ੍ਮਂ, ਆਵਿ ਵਾ ਯਦਿ ਵਾ ਰਹੋ.

‘‘ਸਚੇ ਚ ਪਾਪਕਂ ਕਮ੍ਮਂ, ਕਰਿਸ੍ਸਥ ਕਰੋਥ ਵਾ;

ਨ ਵੋ ਦੁਕ੍ਖਾ ਪਮੁਤ੍ਯਤ੍ਥਿ, ਉਪੇਚ੍ਚਪਿ ਪਲਾਯਤ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਸਪ੍ਪੁਰਿਸਾ ਤੁਮ੍ਹੇ ਦੁਕ੍ਖਸ੍ਸ ਜਾਤਿਦੁਕ੍ਖਜਰਾਦੁਕ੍ਖਬ੍ਯਾਧਿਦੁਕ੍ਖਮਰਣਦੁਕ੍ਖਅਪਾਯਦੁਕ੍ਖ- ਅਤੀਤਵਟ੍ਟਮੂਲਕਦੁਕ੍ਖਅਨਾਗਤਵਟ੍ਟਮੂਲਕਦੁਕ੍ਖਪਚ੍ਚੁਪ੍ਪਨ੍ਨਾਹਾਰਮੂਲਕਦੁਕ੍ਖਾਤਿ ਅਟ੍ਠਵਿਧਸ੍ਸ ਦੁਕ੍ਖਸ੍ਸ ਸਚੇ ਭਾਯਥ, ਵੋ ਤੁਮ੍ਹੇਹਿ ਦੁਕ੍ਖਂ ਤਥਾ ਅਟ੍ਠਵਿਧਂ ਦੁਕ੍ਖਂ ਸਚੇ ਅਪ੍ਪਿਯਂ, ਏਵਂ ਸਤਿ ਆਵਿ ਵਾ ਯਦਿ ਰਹੋ ਵਾ ਪਾਪਕਂ ਕਮ੍ਮਂ ਮਾਕਤ੍ਥ ਮਾ ਅਕਤ੍ਥ. ਸਪ੍ਪੁਰਿਸਾ ਤੁਮ੍ਹੇ ਆਵਿ ਵਾ ਯਦਿ ਰਹੋ ਵਾ ਪਾਪਕਂ ਕਮ੍ਮਂ ਸਚੇ ਕਰਿਸ੍ਸਥ ਵਾ ਸਚੇ ਕਰੋਥ ਵਾ, ਏਵਂ ਸਤਿ ਉਪੇਚ੍ਚਪਿ ਸਞ੍ਚਿਚ੍ਚਾਪਿ ਪਲਾਯਤਂ ਪਲਾਯਨ੍ਤਾਨਂ ਵੋ ਤੁਮ੍ਹਾਕਂ ਦੁਕ੍ਖਾ ਅਟ੍ਠਵਿਧਾ ਦੁਕ੍ਖਤੋ ਪਮੁਤ੍ਤਿ ਮੁਚ੍ਚਨਂ ਨਤ੍ਥੇਵਾਤਿ ਯੋਜਨਾ.

‘‘ਅਧਮ੍ਮੇਨ ਧਨਂ ਲਦ੍ਧਾ, ਮੁਸਾਵਾਦੇਨ ਚੂਭਯਂ;

ਮਮੇਤਿ ਬਾਲਾ ਮਞ੍ਞਨ੍ਤਿ, ਤਂ ਕਥਂ ਨੁ ਭਵਿਸ੍ਸਤਿ.

‘‘ਅਨ੍ਤਰਾਯਾ ਸੁ ਭਵਿਸ੍ਸਨ੍ਤਿ, ਸਮ੍ਭਤਸ੍ਸ ਵਿਨਸ੍ਸਤਿ;

ਮਤਾ ਸਗ੍ਗਂ ਨ ਗਚ੍ਛਨ੍ਤਿ, ਨਨੁ ਏਤ੍ਤਾਵਤਾ ਹਤਾ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੇ ਬਾਲਾ ਅਧਮ੍ਮੇਨ ਚ ਮੁਸਾਵਾਦੇਨ ਚ ਧਨਂ ਸਵਿਞ੍ਞਾਣਾਵਿਞ੍ਞਾਣਂ ਸਬ੍ਬਂ ਲਭਿਤਬ੍ਬਂ ਧਨਂ ਲਦ੍ਧਾ ਉਭਯਂ ਧਨਂ ‘‘ਮਮ ਧਨ’’ਨ੍ਤਿ ਮਞ੍ਞਨ੍ਤਿ, ਤੇਸਂ ਬਾਲਾਨਂ ਤਂ ਉਭਯਂ ਧਨਂ ਕਥਂ ਕੇਨ ਨੁ ਪਕਾਰੇਨ ਭਵਿਸ੍ਸਤਿ, ਅਧਮ੍ਮੇਨ ਸਮ੍ਭਤਤ੍ਤਾ ਚਿਰਟ੍ਠਿਤਿਕਂ ਨ ਹੋਤਿ. ਅਨ੍ਤਰਾਯਾ ਰਾਜਨ੍ਤਰਾਯਾਦਯੋ ਅਨ੍ਤਰਾਯਾ ਤੇਸਂ ਬਾਲਾਨਂ ਭਵਿਸ੍ਸਨ੍ਤਿ. ਯੇਨ ਅਧਮ੍ਮਵੋਹਾਰਾਦਿਕੇਨ ਯਂ ਧਨਂ ਸਮ੍ਭਤਂ, ਅਸ੍ਸ ਅਧਮ੍ਮਵੋਹਾਰਾਦਿਕਸ੍ਸ ਤਂ ਸਮ੍ਭਤਂ ਧਨਂ ਵਿਨਸ੍ਸਤਿ. ਮਤਾ ਮਰਨ੍ਤਾ ਤੇ ਬਾਲਾ ਸਗ੍ਗਂ ਸੁਗਤਿਂ ਨ ਗਚ੍ਛਨ੍ਤਿ. ਸੁਗਤਿ ਹਿ ਸੋਭਨੇਹਿ ਭੋਗੇਹਿ ਅਗ੍ਗੋਤਿ ‘‘ਸਗ੍ਗੋ’’ਤਿ ਅਧਿਪ੍ਪੇਤਾ. ਏਤ੍ਤਾਵਤਾ ਏਤ੍ਤਕੇਨ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾਨਂ ਅਤ੍ਤਹਿਤਾਨਂ ਹਾਯਨੇਨ ਤੇ ਬਾਲਾ ਹਤਾ ਵਿਨਟ੍ਠਾ ਭਵਨ੍ਤਿ ਨਨੂਤਿ ਯੋਜਨਾ.

‘‘ਕਥਂ ਖਣਤਿ ਅਤ੍ਤਾਨਂ, ਕਥਂ ਮਿਤ੍ਤੇਹਿ ਜੀਰਤਿ;

ਕਥਂ ਵਿਵਟ੍ਟਤੇ ਧਮ੍ਮਾ, ਕਥਂ ਸਗ੍ਗਂ ਨ ਗਚ੍ਛਤਿ’’.

‘‘ਲੋਭਾ ਖਣਤਿ ਅਤ੍ਤਾਨਂ, ਲੁਦ੍ਧੋ ਮਿਤ੍ਤੇਹਿ ਜੀਰਤਿ;

ਲੋਭਾ ਵਿਵਟ੍ਟਤੇ ਧਮ੍ਮਾ, ਲੋਭਾ ਸਗ੍ਗਂ ਨ ਗਚ੍ਛਤੀ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੋਜਨਤ੍ਥੋ ਪਾਕਟੋ.

‘‘ਚਰਨ੍ਤਿ ਬਾਲਾ ਦੁਮ੍ਮੇਧਾ, ਅਮਿਤ੍ਤੇਨੇਵ ਅਤ੍ਤਨਾ;

ਕਰੋਨ੍ਤਾ ਪਾਪਕਂ ਕਮ੍ਮਂ, ਯਂ ਹੋਤਿ ਕਟੁਕਪ੍ਫਲਂ.

‘‘ਨ ਤਂ ਕਮ੍ਮਂ ਕਤਂ ਸਾਧੁ, ਯਂ ਕਤ੍ਵਾ ਅਨੁਤਪ੍ਪਤਿ;

ਯਸ੍ਸ ਅਸ੍ਸੁਮੁਖੋ ਰੋਦਂ, ਵਿਪਾਕਂ ਪਟਿਸੇਵਤੀ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਦੁਮ੍ਮੇਧਾ ਨਿਪ੍ਪਞ੍ਞਾ ਬਾਲਾ ਅਮਿਤ੍ਤੇਨ ਪਾਪਕਂ ਕਮ੍ਮਂ ਕਤਂ ਇਵ, ਏਵਂ ਅਤ੍ਤਨਾ ਕਟੁਕਪ੍ਫਲਂ ਯਂ ਕਮ੍ਮਂ ਕਤਂ ਹੋਤਿ, ਤਂ ਪਾਪਕਂ ਕਤਂ ਕਮ੍ਮਂ ਕਰੋਨ੍ਤਾ ਚਰਨ੍ਤਿ. ਯਂ ਕਮ੍ਮਂ ਕਤ੍ਵਾ ਕਰੋਨ੍ਤੋ ਪਚ੍ਛਾ ਅਨੁਤਪ੍ਪਤਿ, ਤਂ ਕਤਂ ਕਮ੍ਮਂ ਨ ਸਾਧੁ. ਯਸ੍ਸ ਕਮ੍ਮਸ੍ਸ ਵਿਪਾਕਂ ਰੋਦਂ ਰੁਦਨ੍ਤੋ ਅਸ੍ਸੁਮੁਖੋ ਪਟਿਸੇਵਤਿ, ਤਂ ਕਤਂ ਕਮ੍ਮਂ ਨ ਸਾਧੂਤਿ ਯੋਜਨਾ.

‘‘ਦੁਕ੍ਕਰਂ ਦੁਤ੍ਤਿਤਿਕ੍ਖਞ੍ਚ…ਪੇ… ਅਵੀਤਰਾਗੋ’’ਤਿ ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਸੁਤ੍ਤਤ੍ਥੋ ਅਟ੍ਠਕਥਾਯਂ ਵਿਤ੍ਥਾਰਤੋ ਵੁਤ੍ਤੋ.

‘‘ਅਪ੍ਪਮੇਯ੍ਯਂ ਪਮਿਨਨ੍ਤੋ, ਕੋਧ ਵਿਦ੍ਵਾ ਵਿਕਪ੍ਪਯੇ;

ਅਪ੍ਪਮੇਯ੍ਯਂ ਪਮਾਯਿਨਂ, ਨਿਵੁਤਂ ਤਂ ਮਞ੍ਞੇ ਅਕਿਸ੍ਸਵ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਇਧ ਸਾਸਨੇ ਅਪ੍ਪਮੇਯ੍ਯਂ ਅਪ੍ਪਮੇਯ੍ਯਗੁਣਂ ਖੀਣਾਸਵਂ ਪੁਗ੍ਗਲਂ ‘‘ਅਯਂ ਖੀਣਾਸਵੋ ਪੁਗ੍ਗਲੋ ਏਤ੍ਤਕਸੀਲੋ ਏਤ੍ਤਕਸਮਾਧਿ ਏਤ੍ਤਕਪਞ੍ਞੋ’’ਤਿ ਪਮਿਨਨ੍ਤੋ ਕੋ ਪੁਥੁਜ੍ਜਨੋ ਵਿਕਪ੍ਪਯੇ. ਅਪ੍ਪਮੇਯ੍ਯਂ ਖੀਣਾਸਵਪੁਗ੍ਗਲਂ ਪਮਾਯਿਨਂ ਪਮਾਯਨ੍ਤਂ ਤਂ ਪੁਥੁਜ੍ਜਨਂ ਅਯਂ ਨਿਵੁਤਂ ਅਵਕੁਜ੍ਜਪਞ੍ਞਂ ਅਕਿਸ੍ਸਵਂ ਅਪਞ੍ਞਨ੍ਤਿ ਮਞ੍ਞੇ ਮਞ੍ਞਾਮੀਤਿ ਯੋਜਨਾ.

‘‘ਪੁਰਿਸਸ੍ਸ ਹਿ ਜਾਤਸ੍ਸ, ਕੁਠਾਰੀ ਜਾਯਤੇ ਮੁਖੇ;

ਯਾਯ ਛਿਨ੍ਦਤਿ ਅਤ੍ਤਾਨਂ, ਬਾਲੋ ਦੁਬ੍ਭਾਸਿਤਂ ਭਣਂ.

‘‘ਨ ਹਿ ਸਤ੍ਥਂ ਸੁਨਿਸਿਤਂ, ਵਿਸਂ ਹਲਾਹਲਂ ਇਵ;

ਏਵਂ ਵਿਰਦ੍ਧਂ ਪਾਤੇਤਿ, ਵਾਚਾ ਦੁਬ੍ਭਾਸਿਤਾ ਯਥਾ’’ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਦੁਬ੍ਭਾਸਿਤਂ ਅਰਿਯੂਪਵਾਦਸਙ੍ਖਾਤਂ ਫਰੁਸਵਾਚਂ ਭਣਂ ਭਣਨ੍ਤੋ ਬਾਲੋ ਦੁਟ੍ਠੋ ਪੁਰਿਸੋ ਯਾਯ ਕੁਠਾਰੀਸਦਿਸਿਯਾ ਦੁਬ੍ਭਾਸਿਤਵਾਚਾਯ ਅਤ੍ਤਾਨਂ ਛਿਨ੍ਦਤਿ, ਸਾ ਕੁਠਾਰੀਸਦਿਸੀ ਦੁਬ੍ਭਾਸਿਤਵਾਚਾ ਜਾਤਸ੍ਸ ਪੁਰਿਸਸ੍ਸ ਮੁਖੇ ਜਾਯਤੇ ਜਾਯਤਿ, ਸਾ ਦੁਬ੍ਭਾਸਿਤਵਾਚਾ ਮੁਖੇ ਜਾਯਤਿ ਇਵ, ਏਵਂ ਸੁਨਿਸਿਤਂ ਸਤ੍ਥਂ ਮੁਖੇ ਨ ਜਾਯਤਿ, ਯਥਾ ਹਲਾਹਲਂ ਵਿਸਂ ਮੁਖੇ ਨ ਜਾਯਤਿ, ਦੁਬ੍ਭਾਸਿਤਾ ਵਾਚਾ ਅਪਾਯੇਸੁ ਵਿਰਦ੍ਧਂ ਪੁਗ੍ਗਲਂ ਪਾਤੇਤਿ ਯਥਾ, ਏਵਂ ਸੁਨਿਸਿਤਂ ਸਤ੍ਥਂ ਅਪਾਯੇਸੁ ਨ ਪਾਤੇਤਿ, ਹਲਾਹਲਂ ਵਿਸਂ ਅਪਾਯੇਸੁ ਨ ਪਾਤੇਤੀਤਿ ਯੋਜਨਾ.

੯੨. ‘‘ਯੋ ਨਿਨ੍ਦਿਯਂ ਪਸਂਸਤਿ, ਤਂ ਵਾ ਨਿਨ੍ਦਤਿ ਯੋ ਪਸਂਸਿਯੋ;

ਵਿਚਿਨਾਤਿ ਮੁਖੇਨ ਸੋ ਕਲਿਂ, ਕਲਿਨਾ ਤੇਨ ਸੁਖਂ ਨ ਵਿਨ੍ਦਤਿ.

‘‘ਅਪ੍ਪਮਤ੍ਤੋ ਅਯਂ ਕਲਿ, ਯੋ ਅਕ੍ਖੇਸੁ ਧਨਪਰਾਜਯੋ;

ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾ, ਅਯਮੇਵ ਮਹਨ੍ਤਤਰੋ ਕਲਿ;

ਯੋ ਸੁਗਤੇਸੁ ਮਨਂ ਪਦੋਸਯੇ.

‘‘ਸਤਂ ਸਹਸ੍ਸਾਨਂ ਨਿਰਬ੍ਬੁਦਾਨਂ, ਛਤ੍ਤਿਂਸਤੀ ਪਞ੍ਚ ਚ ਅਬ੍ਬੁਦਾਨਿ;

ਯਮਰਿਯਗਰਹੀ ਨਿਰਯਂ ਉਪੇਤਿ, ਵਾਚਂ ਮਨਞ੍ਚ ਪਣਿਧਾਯ ਪਾਪਕ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੋ ਪੁਗ੍ਗਲੋ ਨਿਨ੍ਦਿਯਂ ਦੁਚ੍ਚਰਂ ਦੁਸ੍ਸੀਲਂ ਪੁਗ੍ਗਲਂ ਪਸਂਸਤਿ, ਸੋ ਪਸਂਸਕੋ ਪੁਗ੍ਗਲੋ ਮੁਖੇਨ ਕਲਿਂ ਵਿਚਿਨਾਤਿ ਉਪਚਿਨਾਤਿ, ਤੇਨ ਕਲਿਨਾ ਸੁਖਂ ਨ ਵਿਨ੍ਦਤਿ. ਯੋ ਸੁਚਾਰੀ ਸੀਲਵਾ ਪੁਗ੍ਗਲੋ ਪਸਂਸਿਯੋ ਹੋਤਿ, ਤਂ ਵਾ ਸੁਚਾਰਿਂ ਵਾ ਸੀਲਵਨ੍ਤਂ ਪੁਗ੍ਗਲਂ ਯੋ ਪੁਗ੍ਗਲੋ ਨਿਨ੍ਦਤਿ, ਸੋ ਨਿਨ੍ਦਨ੍ਤੋ ਪੁਗ੍ਗਲੋ ਮੁਖੇਨ ਕਲਿਂ ਵਿਚਿਨਾਤਿ ਉਪਚਿਨਾਤਿ, ਤੇਨ ਕਲਿਨਾ ਸੁਖਂ ਨ ਵਿਨ੍ਦਤਿ.

ਅਤ੍ਤਨਾ ਸਹਾਪਿ ਸਬ੍ਬਸ੍ਸ ਧਨਸ੍ਸ ਵਸੇਨਪਿ ਅਕ੍ਖੇਸੁ ਯੋ ਧਨਪਰਾਜਯੋ ਭਵਤਿ, ਅਯਂ ਕਲਿ ਅਯਂ ਧਨਪਰਾਜਯੋ ਅਪ੍ਪਮਤ੍ਤੋ ਹੋਤਿ. ਯੋ ਪੁਗ੍ਗਲੋ ਸੁਗਤੇਸੁ ਮਨਂ ਪਦੋਸਯੇ, ਤਸ੍ਸ ਪੁਗ੍ਗਲਸ੍ਸ ਯੋ ਕਲਿ ਭਵਤਿ, ਅਯਮੇਵ ਕਲਿ ਮਹਨ੍ਤਤਰੋ ਹੋਤਿ.

ਕਸ੍ਮਾ? ਵਾਚਞ੍ਚ ਮਨਞ੍ਚ ਪਣਿਧਾਯ ਅਰਿਯਗਰਹੀ ਪੁਗ੍ਗਲੋ ਯਂ ਕਾਲਂ ਪਾਪਕਂ ਨਿਰਯਂ ਉਪੇਤਿ, ਸੋ ਕਾਲੋ ‘‘ਸਤਂ ਸਹਸ੍ਸਾਨਂ ਨਿਰਬ੍ਬੁਦਾਨਞ੍ਚ ਛਤ੍ਤਿਂਸ ਨਿਰਬ੍ਬੁਦਾਨਿ ਚ ਪਞ੍ਚ ਅਬ੍ਬੁਦਾਨਿ ਚ ਯਸ੍ਮਿਂ ਕਾਲੇ ਗਣੀਯਨ੍ਤੀ’’ਤਿ ਤੇਨ ਕਾਲੇਨ ਸਮੋ ਹੋਤਿ, ਤਸ੍ਮਾ ਮਹਨ੍ਤਤਰੋ ਹੋਤੀਤਿ ਯੋਜਨਾ.

‘‘ਯੋ ਲੋਭਗੁਣੇ ਅਨੁਯੁਤ੍ਤੋ…ਪੇ…

ਗਚ੍ਛਸਿ ਖੋ ਪਪਤਂ ਚਿਰਰਤ੍ਤ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਸਂਕਿਲੇਸਭਾਗਿਯਂ ਸੁਤ੍ਤਂ ਨਾਮ. ਯੋ ਪੁਗ੍ਗਲੋ ਲੋਭਗੁਣੇ ਅਨੁਯੁਤ੍ਤੋ ਅਨੁ ਪੁਨਪ੍ਪੁਨਂ ਯੁਤ੍ਤੋ ਹੋਤਿ, ਸੋ ਪੁਗ੍ਗਲੋ ਅਞ੍ਞੇ ਪੁਗ੍ਗਲੇ ਵਚਸਾ ਪਰਿਭਾਸਤਿ, ਅਸ੍ਸਦ੍ਧੋ ਕਦਰਿਯੋ ਅਵਦਞ੍ਞੂ ਬੁਦ੍ਧਾਨਂ ਓਵਾਦਞ੍ਞੂ ਨ ਹੋਤਿ, ਮਚ੍ਛਰੀ ਪੇਸੁਣਿਯਂ ਪੇਸੁਣਿਯਸ੍ਮਿਂ ਅਨੁਯੁਤ੍ਤੋ ਹੋਤਿ.

ਮੁਖਦੁਗ੍ਗ ਮੁਖਵਿਸਮ ਵਿਭੂਤ ਵਿਗਤਭੂਤ ਅਨਰਿਯ ਭੂਨਹੁ ਬੁਦ੍ਧਿਵਿਨਾਸਕ ਪਾਪਕ ਦੁਕ੍ਕਟਕਾਰਿ ਪੁਰਿਸਨ੍ਤ ਪੁਰਿਸਲਾਮਕ ਕਲਿ ਅਲਕ੍ਖਿ ਅਵਜਾਤਪੁਤ੍ਤ ਤ੍ਵਂ ਨੇਰਯਿਕੋ ਅਸਿ. ਇਧ ਇਦਾਨਿ ਬਹੁਭਾਣੀ ਮਾ ਹੋਹਿ.

ਅਹਿਤਾਯ ਰਜਂ ਅਤ੍ਤਨਿ ਮਾ ਆਕਿਰਸਿ ਮਾ ਪਕ੍ਖਿਪਸਿ. ਕਿਬ੍ਬਿਸਕਾਰਿ ਤ੍ਵਂ ਸਨ੍ਤੇ ਖੀਣਾਸਵੇ ਪੁਗ੍ਗਲੇ ਗਰਹਸਿ, ਬਹੂਨਿ ਦੁਚ੍ਚਰਿਤਾਨਿ ਕਮ੍ਮਾਨਿ ਚਰਸਿ, ਚਰਿਤ੍ਵਾ ਤ੍ਵਂ ਚਿਰਰਤ੍ਤਂ ਰਚਨਵਿਰਹਿਤਂ ਪਪਤਂ ਨਰਕਂ ਨਿਰਯਂ ਗਚ੍ਛਸਿ ਖੋ ਏਕਂਸੇਨਾਤਿ ਯੋਜਨਾ.

ਨਾਨਾਵਿਧਂ ਸਂਕਿਲੇਸਭਾਗਿਯਂ ਸੁਤ੍ਤਂ ਆਚਰਿਯੇਨ ਨਿਦ੍ਧਾਰਿਤਂ, ਅਮ੍ਹੇਹਿ ਚ ਞਾਤਂ, ‘‘ਕਤਮਂ ਵਾਸਨਾਭਾਗਿਯਂ ਸੁਤ੍ਤ’’ਨ੍ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮਂ ਵਾਸਨਾਭਾਗਿਯਂ ਸੁਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥਾਤਿ ਤੇਸੁ ਸੋਲ਼ਸਸੁ ਸਂਕਿਲੇਸਭਾਗਿਯਾਦੀਸੁ ਸੁਤ੍ਤੇਸੁ ਕਤਮਂ ਸੁਤ੍ਤਂ ਵਾਸਨਾਭਾਗਿਯਂ ਸੁਤ੍ਤਂ ਨਾਮਾਤਿ ਪੁਚ੍ਛਤਿ. ‘‘ਮਨੋਪੁਬ੍ਬਙ੍ਗਮਾ ਧਮ੍ਮਾ…ਪੇ… ਛਾਯਾਵ ਅਨਪਾਯਿਨੀ’’ਤਿ ਇਦਂ ਵਾਸਨਾਭਾਗੇ ਪੁਞ੍ਞਭਾਗੇ ਵਿਸਯੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਅਤ੍ਥੋ ਪਾਕਟੋ.

੯੩. ‘‘ਮਹਾਨਾਮੋ ਸਕ੍ਕੋ ਭਗਵਨ੍ਤਂ ਏਤਦਵੋਚ…ਪੇ… ਅਪਾਪਿਕਾ ਕਾਲਙ੍ਕਿਰਿਯਾ’’ਤਿ ਇਦਂ ਸੁਤ੍ਤਮ੍ਪਿ ਵਾਸਨਾਭਾਗੇ ਪੁਞ੍ਞਭਾਗੇ ਵਿਸਯੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਅਤ੍ਥੋ ਪਾਕਟੋ.

‘‘ਸੁਖਕਾਮਾਨਿ ਭੂਤਾਨਿ, ਯੋ ਦਣ੍ਡੇਨ ਨ ਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਲਭਤੇ ਸੁਖ’’ਨ੍ਤਿ. –

ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਅਤ੍ਥੋ ਪਾਕਟੋ.

‘‘ਗੁਨ੍ਨਂ ਚੇ ਤਰਮਾਨਾਨਂ…ਪੇ… ਰਾਜਾ ਚੇ ਹੋਤਿ ਧਮ੍ਮਿਕੋ’’ਤਿ ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਅਤ੍ਥੋ ਪਾਕਟੋ.

੯੪. ‘‘ਭਗਵਾ ਸਾਵਤ੍ਥਿਯਂ ਵਿਹਰਤਿ…ਪੇ… ਏਵਂ ਪਜਾਨਾਤੀ’’ਤਿ ਇਦਂ ਸੁਤ੍ਤਮ੍ਪਿ ਵਾਸਨਾ…ਪੇ… ਸੁਤ੍ਤਂ ਨਾਮ. ਅਤ੍ਥੋ ਪਾਕਟੋ.

‘‘ਕਸ੍ਮਾ ਭਗਵਾ ਜਨਪਦਚਾਰਿਕਂ ਚਰਤੀ’’ਤਿ ਪੁਚ੍ਛੇਯ੍ਯ, ਸਤ੍ਤਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਜਨਪਦਚਾਰਿਕਂ ਚਰਨ੍ਤਿ. ਕਤਮੇਹਿ ਸਤ੍ਤਹਿ? ਦੇਸਨ੍ਤਰਗਤਾਨਂ ਵੇਨੇਯ੍ਯਾਨਂ ਵਿਨਯਨਤ੍ਥਂ, ਤਤ੍ਰ ਠਿਤਾਨਂ ਉਸ੍ਸੁਕ੍ਕਸਮੁਪ੍ਪਾਦਨਤ੍ਥਂ, ਸਾਵਕਾਨਂ ਏਕਸ੍ਮਿਂ ਠਾਨੇ ਨਿਬਦ੍ਧਵਾਸਨਿਵਾਰਣਤ੍ਥਂ, ਅਤ੍ਤਨੋ ਚ ਤਤ੍ਥ ਨਿਬਦ੍ਧਵਾਸੇ ਅਨਾਸਙ੍ਗਦਸ੍ਸਨਤ੍ਥਂ, ਸਮ੍ਬੁਦ੍ਧਵਸਿਤਟ੍ਠਾਨਤਾਯ ਦੇਸਾਨਂ ਚੇਤਿਯਭਾਵਸਮ੍ਪਾਦਨਤ੍ਥਂ, ਬਹੂਨਂ ਸਤ੍ਤਾਨਂ ਦਸ੍ਸਨੂਪਸਙ੍ਕਮਨਾਦੀਹਿ ਪੁਞ੍ਞੋਘਪ੍ਪਸਵਨਤ੍ਥਂ, ਅਵੁਟ੍ਠਿਆਦਿਉਪਦ੍ਦਵੂਪਸਮਨਤ੍ਥਞ੍ਚਾਤਿ ਇਮੇਹਿ ਸਤ੍ਤਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਜਨਪਦਚਾਰਿਕਂ ਚਰਨ੍ਤੀਤਿ ਜਨਪਦਚਰਣਕਾਰਣਂ ਵੇਦਿਤਬ੍ਬਂ.

‘‘ਏਕਪੁਪ੍ਫਂ ਚਜਿਤ੍ਵਾਨ, ਸਹਸ੍ਸਂ ਕਪ੍ਪਕੋਟਿਯੋ;

ਦੇਵੇ ਚੇਵ ਮਨੁਸ੍ਸੇ ਚ, ਸੇਸੇਨ ਪਰਿਨਿਬ੍ਬੁਤੋ’’ਤਿ. –

ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਸਹਸ੍ਸਂ ਕਪ੍ਪਕੋਟਿਯੋਤਿ ਸਹਸ੍ਸਂ ਅਤ੍ਤਭਾਵਤੋ ਕੋਟਿਯੋ.

‘‘ਅਸ੍ਸਤ੍ਥੇ ਹਰਿਤੋਭਾਸੇ, ਸਂਵਿਰੂਲ਼੍ਹਮ੍ਹਿ ਪਾਦਪੇ;

ਏਕਂ ਬੁਦ੍ਧਗਤਂ ਸਞ੍ਞਂ, ਅਲਭਿਂਹਂ ਪਤਿਸ੍ਸਤੋ.

‘‘ਅਜ੍ਜ ਤਿਂਸਂ ਤਤੋ ਕਪ੍ਪਾ, ਨਾਭਿਜਾਨਾਮਿ ਦੁਗ੍ਗਤਿਂ;

ਤਿਸ੍ਸੋ ਵਿਜ੍ਜਾ ਸਚ੍ਛਿਕਤਾ, ਤਸ੍ਸਾ ਸਞ੍ਞਾਯ ਵਾਸਨਾ’’ਤਿ. –

ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਹਰਿਤੋਭਾਸੇਤਿ ਹਰਿਤਓਭਾਸੇ. ਅਲਭਿਂਹਨ੍ਤਿ ਅਹਂ ਅਲਭਿਂ.

‘‘ਪਿਣ੍ਡਾਯ ਕੋਸਲਂ ਪੁਰਂ…ਪੇ… ਵਿਪਾਕੋ ਹੋਤਿ ਅਚਿਨ੍ਤਿਯੋ’’ਤਿ ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਅਗ੍ਗਪੁਗ੍ਗਲੋ ਅਨੁਕਮ੍ਪਕੋ ਤਣ੍ਹਾਨਿਘਾਤਕੋ ਮੁਨਿ ਸਮ੍ਬੁਦ੍ਧੋ ਪੁਰੇਭਤ੍ਤਂ ਪਿਣ੍ਡਾਯ ਪਿਣ੍ਡਂ ਪਟਿਗ੍ਗਣ੍ਹਿਤੁਂ ਕੋਸਲਂ ਪੁਰਂ ਪਾਵਿਸਿ.

ਯਸ੍ਸ ਪੁਰਿਸਸ੍ਸ ਹਤ੍ਥੇ ਸਬ੍ਬਪੁਪ੍ਫੇਹਿ ਅਲਙ੍ਕਤੋ ਵਟਂਸਕੋ ਪੁਪ੍ਫਵਟਂਸਕੋਵ ਅਤ੍ਥਿ, ਸੋ ਅਯਂ ਪੁਰਿਸੋ ਰਾਜਮਗ੍ਗੇਨ ਕੋਸਲਪੁਰਂ ਪਵਿਸਨ੍ਤਂ ਭਿਕ੍ਖੁਸਙ੍ਘਪੁਰਕ੍ਖਤਂ ਦੇਵਮਾਨੁਸਪੂਜਿਤਂ ਸਮ੍ਬੁਦ੍ਧਂ ਅਦ੍ਦਸ, ਦਿਸ੍ਵਾ ਹਟ੍ਠੋ ਚਿਤ੍ਤਂ ਪਸਾਦੇਸਿ; ਪਸਾਦੇਤ੍ਵਾ ਸਮ੍ਬੁਦ੍ਧਂ ਉਪਸਙ੍ਕਮਿ.

ਉਪਸਙ੍ਕਮਿਤ੍ਵਾ ਸੋ ਅਯਂ ਪਸਨ੍ਨੋ ਹੁਤ੍ਵਾ ਸੁਰਭਿਂ ਵਣ੍ਣਵਨ੍ਤਂ ਮਨੋਰਮਂ ਤਂ ਵਟਂਸਕਂ ਸਮ੍ਬੁਦ੍ਧਸ੍ਸ ਸੇਹਿ ਪਾਣੀਭਿ ਉਪਨਾਮੇਸਿ.

ਤਤੋ ਬੁਦ੍ਧਸ੍ਸ ਲਪਨਨ੍ਤਰਾ ਲਪਨਸ੍ਸ ਵਦਨਸ੍ਸ ਅਨ੍ਤਰਾ ਅਗ੍ਗਿਸਿਖਾ ਵਣ੍ਣਾ ਸਹਸ੍ਸਰਂਸਿ ਓਕ੍ਕਾ ਪਭਾ ਨਿਕ੍ਖਮਿ, ਅਬ੍ਭਾ ਵਿਜ੍ਜੁ ਨਿਕ੍ਖਮਤਿ ਇਵ, ਏਵਂ ਆਨਨਾ ਸਹਸ੍ਸਰਂਸਿ ਨਿਕ੍ਖਮਿਤ੍ਵਾ ਆਦਿਚ੍ਚਬਨ੍ਧੁਨੋ ਸੀਸੇ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਰਿਤ੍ਵਾਨ ਪਰਿਵਟ੍ਟੇਤ੍ਵਾ ਮੁਦ੍ਧਨਿ ਅਨ੍ਤਰਧਾਯਥ.

ਆਨਨ੍ਦੋ ਅਚ੍ਛਰਿਯਂ ਅਬ੍ਭੁਤਂ ਲੋਮਹਂਸਨਂ ਇਦਂ ਪਾਟਿਹਾਰਿਯਂ ਦਿਸ੍ਵਾ ਚੀਵਰਂ ਏਕਂਸਂ ਕਰਿਤ੍ਵਾ ਏਤਂ ਅਬ੍ਰਵਿ – ‘‘ਮਹਾਮੁਨਿ, ਸਿਤਕਮ੍ਮਸ੍ਸ ਹੇਤੁ ਕੋ? ਤਂ ਹੇਤੁਂ ਬ੍ਯਾਕਰੋਹਿ, ਧਮ੍ਮਾਲੋਕੋ ਭਵਿਸ੍ਸਤੀ’’ਤਿ.

ਯਸ੍ਸ ਭਗਵਤੋ ਸਬ੍ਬਧਮ੍ਮੇਸੁ ਞਾਣਂ ਸਦਾ ਪਵਤ੍ਤਤਿ, ਕਙ੍ਖਾਵਿਤਰਣੋ ਮੁਨਿ ਸੋ ਭਗਵਾ ਕਙ੍ਖਿਂ ਵੇਮਤਿਕਂ ਆਨਨ੍ਦਂ ਥੇਰਂ ਏਤਂ ਅਬ੍ਰਵਿ. ਆਨਨ੍ਦ, ਯੋ ਸੋਪੁਰਿਸੋ ਮਯਿ ਚਿਤ੍ਤਂ ਪਸਾਦਯਿ, ਸੋ ਪੁਰਿਸੋ ਚਤੁਰਾਸੀਤਿਕਪ੍ਪਾਨਿ ਦੁਗ੍ਗਤਿਂ ਨ ਗਮਿਸ੍ਸਤਿ, ਦੇਵੇਸੁ ਦੇਵਸੋਭਗ੍ਗਂ ਦਿਬ੍ਬਂ ਰਜ੍ਜਂ ਪਸਾਸਿਤ੍ਵਾ ਮਨੁਜੇਸੁ ਰਟ੍ਠੇ ਸਕਲਰਟ੍ਠੇ ਮਨੁਜਿਨ੍ਦੋ ਰਾਜਾ ਭਵਿਸ੍ਸਤਿ. ਸੋ ਪੁਰਿਸੋ ਚਰਿਮਂ ਪਬ੍ਬਜਿਤ੍ਵਾ, ਧਮ੍ਮਤਂ ਸਚ੍ਛਿਕਤ੍ਵਾ ਚ ਧੁਤਰਾਗੋ ਵਟਂਸਕੋ ਨਾਮ ਪਚ੍ਚੇਕਬੁਦ੍ਧੋ ਭਵਿਸ੍ਸਤਿ.

ਤਥਾਗਤੇ ਵਾ ਸਮ੍ਮਾਸਮ੍ਬੁਦ੍ਧੇ ਵਾ ਪਚ੍ਚੇਕਸਮ੍ਬੁਦ੍ਧੇ ਵਾ ਤਸ੍ਸ ਤਥਾਗਤਸ੍ਸ ਸਾਵਕੇ ਵਾ ਚਿਤ੍ਤੇ ਪਸਨ੍ਨਮ੍ਹਿ ਦਕ੍ਖਿਣਾ ਅਪ੍ਪਕਾ ਨਾਮ ਨਤ੍ਥਿ.

ਬੁਦ੍ਧਾ ਏਵਂ ਏਤ੍ਤਕਾਤਿ ਅਚਿਨ੍ਤਿਯਾ ਭਵਨ੍ਤਿ. ਬੁਦ੍ਧਧਮ੍ਮਾ ਬੁਦ੍ਧਗੁਣਾ ਏਵਂ ਏਤ੍ਤਕਾਤਿ ਅਚਿਨ੍ਤਿਯਾ ਭਵਨ੍ਤਿ, ਅਚਿਨ੍ਤਿਯੇ ਪਸਨ੍ਨਾਨਂ ਵਿਪਾਕੋ ਪੁਞ੍ਞਵਿਪਾਕੋ ਏਵਂ ਏਤ੍ਤਕੋਤਿ ਅਚਿਨ੍ਤਿਯੋ ਹੋਤੀਤਿ ਏਤਂ ਅਬ੍ਰਵੀਤਿ ਯੋਜਨਾ.

੯੬. ‘‘ਇਧਾਹਂ, ਭਿਕ੍ਖਵੇ, ਏਕਚ੍ਚਂ ਪੁਗ੍ਗਲਂ…ਪੇ… ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ ਇਤਿ ਮੇ ਸੁਤ’’ਨ੍ਤਿ ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਭਿਕ੍ਖਵੇ, ਇਧ ਇਮਸ੍ਮਿਂ ਸਾਸਨੇ ਅਹਂ ਏਕਚ੍ਚਂ ਪੁਗ੍ਗਲਂ ਏਵਂ ਮਮ ਚੇਤਸਾ ਏਕਚ੍ਚਸ੍ਸ ਪੁਗ੍ਗਲਸ੍ਸ ਚੇਤੋ ਚਿਤ੍ਤਂ ਪਰਿਚ੍ਚ ਬੁਦ੍ਧਚਕ੍ਖੁਨਾ ਏਵਂ ਪਜਾਨਾਮਿ, ਯਥਾ ਯੇਨ ਪਕਾਰੇਨ ਅਯਂ ਪੁਗ੍ਗਲੋ ਯਞ੍ਚ ਦਾਨਾਦਿਪਟਿਪਦਂ ਪਟਿਪਨ੍ਨੋ, ਯਞ੍ਚ ਦਸ੍ਸਨਾਦਿਮਗ੍ਗਂ ਸਮਾਰੁਲ਼੍ਹੋ ਹੁਤ੍ਵਾ ਤਂ ਪਟਿਪਦਂ, ਮਗ੍ਗਞ੍ਚ ਇਰਿਯਤਿ ਪਵਤ੍ਤੇਤਿ, ਇਮਮ੍ਹਿ ਇਮਸ੍ਮਿਞ੍ਚ ਸਮਯੇ ਅਯਂ ਪੁਗ੍ਗਲੋ ਚੇ ਕਾਲਂ ਕਰੇਯ੍ਯ, ਏਵਂ ਸਤਿ ਆਭਤਂ ਵਤ੍ਥੁਂ ਨਿਕ੍ਖਿਪਤਿ ਯਥਾ, ਏਵਂ ਤਾਯ ਪਟਿਪਦਾਯ ਤੇਨ ਮਗ੍ਗੇਨ ਸਗ੍ਗੇ ਅਤ੍ਤਨਿਕ੍ਖਿਤ੍ਤੋ ਭਵੇ. ਤਂ ਕਿਸ੍ਸ ਹੇਤੁ? ਭਿਕ੍ਖਵੇ, ਅਸ੍ਸ ਪੁਗ੍ਗਲਸ੍ਸ ਚਿਤ੍ਤਂ ਹਿ ਯਸ੍ਮਾ ਪਸਨ੍ਨਂ ਪਸਾਦਿਤਂ, ਤਸ੍ਮਾ ਨਿਕ੍ਖਿਤ੍ਤੋ ਭਵੇ. ਇਧ ਸਾਸਨੇ, ਲੋਕੇ ਵਾ ਏਕਚ੍ਚੇ ਸਤ੍ਤਾ ਪੁਗ੍ਗਲਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਚੇਤੋਪਸਾਦਹੇਤੁ ਖੋ ਪਨ ਉਪਪਜ੍ਜਨ੍ਤੀਤਿ ਏਵਂ ਅਹਂ ਪਜਾਨਾਮੀਤਿ ਭਗਵਾ ਏਤਮਤ੍ਥਂ ਅਵੋਚ. ਤਤ੍ਥ ਤਸ੍ਮਿਂ ਅਤ੍ਥੇ ਸਙ੍ਗਹਵਸੇਨ ਪਵਤ੍ਤਂ ਏਤਂ ‘‘ਪਸਨ੍ਨਚਿਤ੍ਤਂ ਞਤ੍ਵਾਨ…ਪੇ… ਸਗ੍ਗਂ ਸੋ ਉਪਪਜ੍ਜਤੀ’’ਤਿ ਗਾਥਾਵਚਨਂ ਵੁਚ੍ਚਤਿ. ਅਯਮ੍ਪਿ ਅਤ੍ਥੋ ਭਗਵਤਾ ਵੁਤ੍ਤੋ, ਇਤਿ ਮੇ ਮਯਾ ਸੁਤਨ੍ਤਿ ਯੋਜਨਾ.

‘‘ਸੁਵਣ੍ਣਚ੍ਛਦਨਂ ਨਾਵਂ…ਪੇ… ਏਤਾਦਿਸਂ ਕਤਪੁਞ੍ਞਾ ਲਭਿ’’ਨ੍ਤਿ ਇਦਂ ਸੁਤ੍ਤਮ੍ਪਿ ਵਾਸਨਾਭਾਗਿਯਂ ਸੁਤ੍ਤਂ ਨਾਮ. ਨਾਰਿ ਦੇਵਧੀਤਾ ਸੁਵਣ੍ਣਚ੍ਛਦਨਂ ਸੁਵਣ੍ਣਾਲਙ੍ਕਾਰੇਹਿ ਛਾਦਿਤਂ ਨਾਵਂ ਆਰੁਯ੍ਹ ਤਿਟ੍ਠਸਿ, ਪੋਕ੍ਖਰਣਿਂ ਦੇਵਪੋਕ੍ਖਰਣਿਂ ਓਗਾਹਸਿ, ਪਦੁਮਂ ਪਾਣਿਨਾ ਛਿਨ੍ਦਸਿ.

ਦੇਵਤੇ ਕੇਨ ਕਮ੍ਮੇਨ ਤੇ ਤਵ ਤਾਦਿਸੋ ਵਣ੍ਣੋ ਤਾਦਿਸੋ ਆਨੁਭਾਵੋ ਤਾਦਿਸੀ ਜੁਤਿ ਭਵਤਿ, ਦੇਵਤੇ ਤੇ ਤਵ ਯੇ ਕੇਚਿ ਭੋਗਾ ਮਨਸਾ ਇਚ੍ਛਿਤਾ ਭਵਨ੍ਤਿ, ਤੇ ਭੋਗਾ ਚ ਕੇਨ ਕਮ੍ਮੇਨ ਉਪ੍ਪਜ੍ਜਨ੍ਤਿ. ਦੇਵਤੇ ਮੇ ਪੁਚ੍ਛਿਤਾ ਤ੍ਵਂ ਸਂਸ ਸਂਸਾਹਿ ਇਦਂ ਸਬ੍ਬਂ ਕਿਸ੍ਸ ਕਮ੍ਮਸ੍ਸ ਚ ਫਲਨ੍ਤਿ ਸਕ੍ਕੋ ਪੁਚ੍ਛਤਿ.

ਦੇਵਰਾਜੇਨ ਪੁਚ੍ਛਿਤਾ ਸਾ ਦੇਵਧੀਤਾ ਅਤ੍ਤਮਨਾ ਹੁਤ੍ਵਾ ਪਞ੍ਹਂ ਪੁਟ੍ਠਾ ਸਕ੍ਕਸ੍ਸ ਬ੍ਯਾਕਾਸਿ. ਦੇਵਰਾਜਾ ਅਦ੍ਧਾਨਂ ਦੀਘਮਗ੍ਗਂ ਪਟਿਪਨ੍ਨਾ ਅਹਂ ਯਸਸ੍ਸਿਨੋ ਕਸ੍ਸਪਸ੍ਸ ਭਗਵਤੋ ਮਨੋਰਮਂ ਥੂਪਂ ਅਦ੍ਦਸ੍ਸਂ, ਦਿਸ੍ਵਾ ਤਤ੍ਥ ਥੂਪੇ ਚਿਤ੍ਤਂ ਪਸਾਦੇਸਿਂ. ਪਸਨ੍ਨਾਹਂ ਸੇਹਿ ਪਾਣੀਹਿ ਪਦੁਮਪੁਪ੍ਫੇਹਿ ਪੂਜੇਸਿਂ. ਤਸ੍ਸੇਵ ਕਮ੍ਮਸ੍ਸ ਇਦਂ ਸਬ੍ਬਂ ਫਲਂ ਵਿਪਾਕੋ ਭਵੇ. ਕਤਪੁਞ੍ਞਾਹਂ ਏਤਾਦਿਸਂ ਫਲਂ ਅਲਭਿਨ੍ਤਿ ਸਕ੍ਕਸ੍ਸ ਬ੍ਯਾਕਾਸਿ. ਇਤਿ ਮੇ ਸੁਤਨ੍ਤਿ ਮਹਾਮੋਗ੍ਗਲ੍ਲਾਨੋ ਵਦਤੀਤਿ ਯੋਜਨਾ.

‘‘ਯਥਾਨਿਦ੍ਧਾਰਿਤਸੁਤ੍ਤਾਨਿਯੇਵ ਵਾਸਨਾਭਾਗਿਯਸੁਤ੍ਤਾਨਿ ਪਰਿਪੁਣ੍ਣਾਨੀ’’ਤਿ ਵਤ੍ਤਬ੍ਬਤ੍ਤਾ ‘‘ਦਾਨਕਥਾ ਸੀਲਕਥਾ ਸਗ੍ਗਕਥਾ ਪੁਞ੍ਞਕਥਾ ਪੁਞ੍ਞਵਿਪਾਕਕਥਾਤਿ ਇਦਂ ਵਾਸਨਾਭਾਗਿਯ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਯਾਯ ਦੇਸਨਾਯ ਦਾਨਞ੍ਚ ਦਾਨਫਲਞ੍ਚ ਦਸ੍ਸਿਤਂ, ਸਾ ਦੇਸਨਾ ਦਾਨਕਥਾ ਨਾਮ. ਯਾਯ ਦੇਸਨਾਯ ਸੀਲਞ੍ਚ ਸੀਲਫਲਞ੍ਚ ਦਸ੍ਸਿਤਂ, ਸਾ ਦੇਸਨਾ ਸੀਲਕਥਾ ਨਾਮ. ਯਾਯ ਦੇਸਨਾਯ ਸਗ੍ਗਾ ਚ ਸਗ੍ਗੇਸੁ ਨਿਬ੍ਬਤ੍ਤਾਪਕਞ੍ਚ ਕਮ੍ਮਂ ਦਸ੍ਸਿਤਂ, ਸਾ ਸਗ੍ਗਕਥਾ ਨਾਮ. ਯਾਯ ਦੇਸਨਾਯ ਦਾਨਸੀਲਭਾਵਨਾਦਿਵਸੇਨ ਦਸਵਿਧਂ ਪੁਞ੍ਞਕਮ੍ਮਂ ਦਸ੍ਸਿਤਂ, ਸਾ ਪੁਞ੍ਞਕਥਾ ਨਾਮ. ਯਾਯ ਦੇਸਨਾਯ ਤਾਦਿਸਸ੍ਸ ਪੁਞ੍ਞਕਮ੍ਮਸ੍ਸ ਵਿਵਿਧੋ ਅਯਂ ਵਿਪਾਕੋ ਇਮਸ੍ਸ ਪੁਞ੍ਞਸ੍ਸ ਵਿਪਾਕੋਤਿ ਨਿਯਮੇਤ੍ਵਾ ਦਸ੍ਸਿਤੋ, ਸਾ ਪੁਞ੍ਞਵਿਪਾਕਕਥਾ ਨਾਮ.

ਦਸਬਲਧਰਾਨਂ ਸਮ੍ਮਾਸਮ੍ਬੁਦ੍ਧਾਨਂ ਉਦ੍ਦਿਸ੍ਸਕਤੇਸੁ ਸਰੀਰਧਾਤੁਂ ਅਬ੍ਭਨ੍ਤਰੇ ਠਪੇਤ੍ਵਾ ਪਂਸੂਹਿ ਕਤੇਸੁ ਥੂਪੇਸੁ ਯੇ ਨਰਾ ਪਸਨ੍ਨਾ, ਤੇ ਨਰਾ ਤਤ੍ਥ ਥੂਪੇ ਕਾਰਂ ਪੁਞ੍ਞਂ ਕਤ੍ਵਾ ਸਗ੍ਗੇਸੁ ਉਪ੍ਪਜ੍ਜਿਤ੍ਵਾ ਪਮੋਦਨ੍ਤੀਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

੯੭. ਦੇਵਪੁਤ੍ਤਸਰੀਰਵਣ੍ਣਾ ਦੇਵਪੁਤ੍ਤਸਰੀਰਸਦਿਸਵਣ੍ਣਾ ਸੁਭਗਸਣ੍ਠਿਤਿ ਸੋਭਗ੍ਗਯੁਤ੍ਤਸਣ੍ਠਾਨਾ ਸਬ੍ਬੇ ਜਨਾ ਉਦਕੇਨ ਪਂਸੁਂ ਤੇਮੇਤ੍ਵਾ ਥੂਪਂ ਵਡ੍ਢੇਥ, ਸੋ ਅਯਂ ਥੂਪੋ ਕਸ੍ਸ ਪੁਗ੍ਗਲਸ੍ਸ ਥੂਪੋਤਿ ਪੁਚ੍ਛਤਿ.

ਸੁਗਤ੍ਤੇ ਸੁਨ੍ਦਰਗਤ੍ਤੇ ਦੇਵਤੇ ਤਸ੍ਮਿਂ ਥੂਪੇ ਪਸਨ੍ਨਾ ਇਮੇ ਦੇਵਮਨੁਜਾ ਕਾਰਂ ਪੁਞ੍ਞਂ ਕਰੋਨ੍ਤਾ ਹੁਤ੍ਵਾ ਜਰਾਮਰਣਤੋ ਪਮੁਚ੍ਚਰੇ. ਸੋ ਅਯਂ ਥੂਪੋ ਮਹੇਸਿਨੋ ਦਸਬਲਧਮ੍ਮਧਾਰਿਨੋ ਸੁਗਤਸ੍ਸ ਥੂਪੋਤਿ ਵੇਦਿਤਬ੍ਬੋਤਿ ਆਹਾਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

ਯਾਹਂ ਯਾ ਅਹਂ ਮਹੇਸਿਨੋ ਥੂਪਂ ਚਤ੍ਤਾਰਿ ਉਪ੍ਪਲਾਨਿ ਚ ਮਾਲਞ੍ਚ ਅਭਿਰੋਪਯਿਂ, ਤੇਨ ਮਯਾ ਕਤਂ ਤਂ ਪੁਞ੍ਞਂ ਉਲ਼ਾਰਂ ਵਤ ਆਸਿ ਅਹੋਸਿ. ਤਤੋ ਕਪ੍ਪਤੋ ਅਜ੍ਜ ਕਪ੍ਪਾ ਤਿਂਸਂ ਧਰਨ੍ਤਿ ਸਤ੍ਥੁਨੋ ਥੂਪਂ ਪੂਜੇਤ੍ਵਾ ਤਤ੍ਤਕਾਨਿ ਦੁਗ੍ਗਤਿਂ ਨ ਜਾਨਾਮਿ, ਵਿਨਿਪਾਤਂ ਨ ਗਚ੍ਛਾਮੀਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

ਅਹਂ ਬਾਤ੍ਤਿਂਸਲਕ੍ਖਣਧਰਸ੍ਸ ਬਾਤ੍ਤਿਂਸਲਕ੍ਖਣਧਰੇਨ ਸਮ੍ਪਨ੍ਨਸ੍ਸ ਵਿਜਿਤਵਿਜਯਸ੍ਸ ਲੋਕਨਾਥਸ੍ਸ ਥੂਪਂ ਅਪੂਜੇਸਿਂ, ਪੂਜੇਤ੍ਵਾ ਸਤਸਹਸ੍ਸਂ ਕਪ੍ਪੇ ਆਯੁਕਪ੍ਪੇ ਪਮੁਦਿਤੋ ਆਸਿਂ. ਮਯਾ ਯਂ ਪੁਞ੍ਞਂ ਪਸੁਤਂ, ਤੇਨ ਪੁਞ੍ਞੇਨ ਵਿਨਿਪਾਤਂ ਅਨਾਗਨ੍ਤੁਨ ਅਨਾਗਨ੍ਤ੍ਵਾ ਦੇਵਸੋਭਗ੍ਗਂ ਸਮ੍ਪਤ੍ਤਿਂ ਚ ਦੇਵਰਜ੍ਜਾਨਿ ਚ ਤਾਨਿ ਅਕਾਰਿਂ. ਅਥ ਵਾ ਦੇਵਸੋਭਗ੍ਗਞ੍ਚ ਮਯਾ ਕਾਰਿਤਂ, ਰਜ੍ਜਾਨਿ ਚ ਮਯਾ ਕਾਰਿਤਾਨਿ.

ਅਦਨ੍ਤਦਮਕਸ੍ਸ ਸਾਸਨੇ ਯਂ ਚਕ੍ਖੁ ਪਞ੍ਞਾਚਕ੍ਖੁ ਪਣਿਹਿਤਂ, ਤਥਾ ਚਿਤ੍ਤਂ ਯਂ ਵਿਮੁਤ੍ਤਚਿਤ੍ਤਂ ਪਣਿਹਿਤਂ, ਤਂ ਸਬ੍ਬਂ ਪਞ੍ਞਾਚਕ੍ਖੁ ਵਿਮੁਤ੍ਤਚਿਤ੍ਤਂ ਮੇ ਮਯਾ ਲਦ੍ਧਂ, ਅਹਂ ਵਿਧੁਤਲਤਾਸਙ੍ਖਾਤਤਣ੍ਹਾ ਹੁਤ੍ਵਾ ਵਿਮੁਤ੍ਤਚਿਤ੍ਤਾ ਫਲਵਿਮੁਤ੍ਤਚਿਤ੍ਤਸਮ੍ਪਨ੍ਨਾ ਅਮ੍ਹੀਤਿ ਅਵੋਚਾਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

੯੮. ਵਿਮੁਤ੍ਤਚਿਤ੍ਤੇ ਫਲਵਿਮੁਤ੍ਤਚਿਤ੍ਤਸਮ੍ਪਨ੍ਨੇ ਅਖਿਲੇ ਪਞ੍ਚਚੇਤੋਖੀਲਰਹਿਤੇ ਅਨਾਸਵੇ ਅਰਣਵਿਹਾਰਿਮ੍ਹਿ ਅਰਣਵਿਹਾਰਸੀਲੇ ਅਸਙ੍ਗਮਾਨਸੇ ਅਲਗ੍ਗਮਾਨਸੇ ਪਚ੍ਚੇਕਬੁਦ੍ਧਸ੍ਮਿਂ ਸਾਮਾਕਪਤ੍ਥੋਦਨਮਤ੍ਤਮੇਵ ਦਕ੍ਖਿਣਂ ਅਦਾਸਿਂ.

ਤਸ੍ਮਿਂ ਪਚ੍ਚੇਕਬੁਦ੍ਧੇ ਉਤ੍ਤਮਂ ਧਮ੍ਮਂ ਪਚ੍ਚੇਕਬੋਧਿਧਮ੍ਮਂ ਓਕਪ੍ਪਯਿਂ ‘‘ਸੋ ਉਤ੍ਤਮੋ ਧਮ੍ਮੋ ਅਤ੍ਥੀ’’ਤਿ ਸਦ੍ਦਹਿਂ. ਏਵਂ ਅਰਿਯਵਿਹਾਰੇਨ ਵਿਹਾਰੀਹਿ ਪਚ੍ਚੇਕਬੁਦ੍ਧੇਹਿ ਮੇ ਮਮ ਸਙ੍ਗਮੋ ਕਤੋ ਸਿਯਾ ਭਵੇ, ਕੁਦਾਸੁਪਿ ਚ ਅਹਂ ਅਪੇਕ੍ਖਵਾ ਮਾ ਭਵੇਯ੍ਯਨ੍ਤਿ ਮਾਨਸਂ ਤਸ੍ਮਿਞ੍ਚ ਧਮ੍ਮੇ ਪਣਿਧੇਸਿਂ ‘‘ਇਮਿਨਾ ਪਚ੍ਚੇਕਬੁਦ੍ਧੇਨ ਲਦ੍ਧਧਮ੍ਮਂ ਅਹਮ੍ਪਿ ਸਚ੍ਛਿਕਰੇਯ੍ਯ’’ਨ੍ਤਿ ਚਿਤ੍ਤਂ ਪਣਿਦਹਿਂ.

ਤਸ੍ਸੇਵ ਪਚ੍ਚੇਕਬੁਦ੍ਧੇ ਕਤਸ੍ਸੇਵ ਕਮ੍ਮਸ੍ਸ ਵਿਪਾਕਤੋ ਅਹਂ ਦੀਘਾਯੁਕੇਸੁ ਅਮਮੇਸੁ ‘‘ਮਮ ਪਰਿਗ੍ਗਹੋ’’ਤਿ ਪਰਿਗ੍ਗਹਾਭਾਵੇਨ ਅਪਰਿਗ੍ਗਹੇਸੁ ਵਿਸੇਸਗਾਮੀਸੁ ਅਹੀਨਗਾਮੀਸੁ ਕੁਰੂਸੁ ਉਤ੍ਤਰਕੁਰੂਸੁ ਪਾਣੀਸੁ ਸਤ੍ਤੇਸੁ ਸਹਸ੍ਸਕ੍ਖਤ੍ਤੁਂ ਉਪਪਜ੍ਜਥ ਉਪਪਜ੍ਜਿਂ.

ਤਸ੍ਸੇਵ ਕਮ੍ਮਸ੍ਸ ਵਿਪਾਕਤੋ ਵਿਚਿਤ੍ਰਮਾਲਾਭਰਣਾਨੁਲੇਪੀਸੁ ਯਸਸ੍ਸੀਸੁ ਪਰਿਵਾਰਵਨ੍ਤੇਸੁ ਤਿਦਸੋ ਦੇਵੋ ਅਹਂ ਵਿਸਿਟ੍ਠਕਾਯੂਪਗਤੋ ਹੁਤ੍ਵਾ ਸਹਸ੍ਸਕ੍ਖਤ੍ਤੁਂ ਉਪਪਜ੍ਜਥ.

ਤਸ੍ਸੇਵ ਕਮ੍ਮਸ੍ਸ ਵਿਪਾਕਤੋ ਅਹਂ ਵਿਮੁਤ੍ਤਚਿਤ੍ਤੋ ਅਖੀਲੋ ਅਨਾਸਵੋ ਹੁਤ੍ਵਾ ਹਿਤਾਹਿਤਾਸੀਹਿ ਕੁਸਲਾਕੁਸਲਵੀਤਿਵਤ੍ਤੇਹਿ ਅਨ੍ਤਿਮਦੇਹਧਾਰਿਭਿ ਇਮੇਹਿ ਪਚ੍ਚੇਕਬੁਦ੍ਧੇਹਿ, ਬੁਦ੍ਧਸਾਵਕੇਹਿ ਵਾ ਮੇ ਮਮ ਸਮਾਗਮੋ ਆਸਿ.

‘‘ਸੀਲਵਤੋ ਯਂ ਇਚ੍ਛਿਤਂ, ਤਂ ਸਮਿਜ੍ਝਤੇ’’ਤਿ ਇਮਂ ਵਚਨਂ ਤਥਾਗਤੋ ਜਿਨੋ ਪਚ੍ਚਕ੍ਖਂ ਕਤ੍ਵਾ ਅਵਚ ਖੋ, ਯਥਾ ਯਥਾ ਯੇਨ ਯੇਨ ਪਕਾਰੇਨ ਮੇ ਮਨਸਾ ਵਿਚਿਨ੍ਤਿਤਂ, ਤਥਾ ਤਥਾ ਤੇਨ ਤੇਨ ਪਕਾਰੇਨ ਸਮਿਦ੍ਧਂ ਭਵਤਿ. ਅਯਂ ਭਵੋ ਅਨ੍ਤਿਮੋ ਭਵੋਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

ਏਕਤਿਂਸਮ੍ਹਿ ਕਪ੍ਪਮ੍ਹਿ ਜਿਨੋ ਅਨੇਜੋ ਅਨਨ੍ਤਦਸ੍ਸੀ ‘‘ਸਿਖੀ’’ਤਿ ਇਤਿਨਾਮਕੋ ਉਪ੍ਪਜ੍ਜਿ. ਤਸ੍ਸਾਪਿ ਭਗਵਤੋ ਰਾਜਾ ਭਾਤਾ ਸਿਖਿਦ੍ਧੇ ਚ ਸਿਖੀ ਇਤਿਨਾਮਕੇ ਬੁਦ੍ਧੇ ਚ ਤਸ੍ਸ ਭਗਵਤੋ ਧਮ੍ਮੇ ਚ ਅਭਿਪ੍ਪਸਨ੍ਨੋ ਲੋਕਵਿਨਾਯਕਮ੍ਹਿ ਪਰਿਨਿਬ੍ਬੁਤੇ ਸਤਿ ਦੇਵਾਤਿਦੇਵਸ੍ਸ ਨਰੁਤ੍ਤਮਸ੍ਸ ਮਹੇਸਿਨੋ ਵਿਪੁਲਂ ਮਹਨ੍ਤਂ ਸਮਨ੍ਤਤੋ ਗਾਵੁਤਿਕਂ ਥੂਪਂ ਅਕਾਸਿਂ.

ਤਸ੍ਮਿਂ ਥੂਪੇ ਬਲਿਂ ਪੂਜਾਬਲਿਂ ਅਭਿਹਾਰੀ ਮਨੁਸ੍ਸੋ ਜਾਤਿਸੁਮਨਂ ਪਗ੍ਗਯ੍ਹ ਪਹਟ੍ਠੋ ਪੂਜੇਸਿ. ਅਸ੍ਸ ਮਨੁਸ੍ਸਸ੍ਸ ਏਕਂ ਪੁਪ੍ਫਂ ਵਾਤੇਨ ਪਹਰਿਤਂ ਹੁਤ੍ਵਾ ਪਤਿਤਂ. ਅਹਂ ਤਂ ਪਤਿਤਂ ਏਕਂ ਪੁਪ੍ਫਂ ਗਹੇਤ੍ਵਾ ਤਸ੍ਸੇਵ ਪੁਪ੍ਫਸਾਮਿਕਸ੍ਸ ਅਦਾਸਿਂ.

ਸੋ ਮਨੁਸ੍ਸੋ ਪੁਪ੍ਫਸਾਮਿਕੋ ਅਭਿਪ੍ਪਸਨ੍ਨਚਿਤ੍ਤੋ ਹੁਤ੍ਵਾ ਮਂ ‘‘ਤ੍ਵਮੇਵ ਏਤਂ ਏਕਂ ਪੁਪ੍ਫਂ ਪੂਜਾ’’ਤਿ ਅਦਾਸਿ. ਦਦਾਸੀਤਿ ਏਤ੍ਥ ਦ-ਕਾਰੋ ਆਗਮੋ. ਅਹਂ ਤਂ ਏਕਂ ਪੁਪ੍ਫਂ ਗਹੇਤ੍ਵਾ ਬੁਦ੍ਧਂ ਬੁਦ੍ਧਗੁਣਂ ਪੁਨਪ੍ਪੁਨਂ ਅਨੁਸ੍ਸਰਨ੍ਤੋ ਯਸ੍ਮਿਂ ਕਪ੍ਪੇ ਅਭਿਰੋਪਯਿਂ, ਤਤੋ ਕਪ੍ਪਤੋ ਅਜ੍ਜ ਕਪ੍ਪਾ ਤਿਂਸਂ ਅਹੇਸੁਂ. ਤੇਸੁ ਕਪ੍ਪੇਸੁ ਦੁਗ੍ਗਤਿਂ ਨਾਭਿਜਾਨਾਮਿ, ਵਿਨਿਪਾਤਞ੍ਚ ਨ ਗਚ੍ਛਾਮਿ, ਇਦਂ ਫਲਂ ਥੂਪਪੂਜਾਯ ਫਲਨ੍ਤਿ ਅਵੋਚਾਤਿ ਯੋਜਨਾ. ਇਦਂ ਸੁਤ੍ਤਂ ਵਾ…ਪੇ… ਸੁਤ੍ਤਂ.

ਬ੍ਰਹ੍ਮਦਤ੍ਤਸ੍ਸ ਬ੍ਰਹ੍ਮਦਤ੍ਤਨਾਮਕਸ੍ਸ ਰਾਜਿਨੋ ਕਪਿਲਂ ਨਾਮ ਨਗਰਂ ਸੁਵਿਭਤ੍ਤਂ ਭਾਗਤੋ ਸੁਟ੍ਠੁ ਵਿਭਤ੍ਤਂ, ਮਹਾਪਥਂ ਮਹਾਪਥਸਮ੍ਪਨ੍ਨਂ ਆਕਿਣ੍ਣਂ, ਨਾਨਾਜਾਤਿਕੇਹਿ ਮਨੁਸ੍ਸੇਹਿ ਪਰਿਪੁਣ੍ਣਂ, ਇਦ੍ਧਂ ਫੀਤਞ੍ਚ ਆਸਿ.

ਪਞ੍ਚਾਲਾਨਂ ਤਤ੍ਥ ਪੁਰੁਤ੍ਤਮੇ ਅਹਂ ਕੁਮ੍ਮਾਸਂ ਵਿਕ੍ਕਿਣਿਂ, ਸੋ ਅਹਂ ਯਸਸ੍ਸਿਨਂ ਉਪਰਿਟ੍ਠਂ ਉਪਸਮੀਪੇ ਠਿਤਂ ਅਰਿਟ੍ਠਂ ਨਾਮ ਸਮ੍ਬੁਦ੍ਧਂ ਪਚ੍ਚੇਕਬੁਦ੍ਧਂ ਅਦ੍ਦਸਿਂ, ਦਿਸ੍ਵਾ ਹਟ੍ਠੋ ਚਿਤ੍ਤਂ ਪਸਾਦੇਤ੍ਵਾ ਨਰੁਤ੍ਤਮਂ ਅਰਿਟ੍ਠਂ ਮੇ ਗੇਹਸ੍ਮਿਂ ਯਂ ਧੁਵਭਤ੍ਤਂ ਵਿਜ੍ਜਥ ਵਿਜ੍ਜਿ, ਤੇਨ ਧੁਵਭਤ੍ਤੇਨ ਨਿਮਨ੍ਤੇਸਿਂ.

ਯਤੋ ਚ ਯਸ੍ਮਿਂ ਕਾਲੇ ਚ ਕਤ੍ਤਿਕੋ ਯਸ੍ਸਂ ਪਨ੍ਨਰਸੀਪੁਣ੍ਣੋ, ਸਾ ਪੁਣ੍ਣਮਾਸੀ ਪਨ੍ਨਰਸੀ ਉਪਟ੍ਠਿਤਾ, ਤਤੋ ਚ ਤਸ੍ਮਿਂ ਕਾਲੇ ਚ ਅਹਂ ਨਵਂ ਦੁਸ੍ਸਯੁਗਂ ਗਯ੍ਹ ਅਰਿਟ੍ਠਸ੍ਸ ਅਰਿਟ੍ਠਨਾਮਕਸ੍ਸ ਪਚ੍ਚੇਕਬੁਦ੍ਧਸ੍ਸ ਉਪਨਾਮੇਸਿਂ.

ਨਰੁਤ੍ਤਮੋ ਅਨੁਕਮ੍ਪਕੋ ਕਾਰੁਣਿਕੋ ਤਣ੍ਹਾਨਿਘਾਤਕੋ ਮੁਨਿ ਪਚ੍ਚੇਕਬੁਦ੍ਧੋ ਪਸਨ੍ਨਚਿਤ੍ਤਂ ਮਂ ਞਤ੍ਵਾਨ ਪਟਿਗ੍ਗਣ੍ਹਿ.

ਅਹਂ ਕਲ੍ਯਾਣਂ ਬੁਦ੍ਧਵਣ੍ਣਿਤਂ ਕਮ੍ਮਂ ਕਰਿਤ੍ਵਾਨ ਦੇਵੇ ਚ ਮਨੁਸ੍ਸੇ ਚ ਸਨ੍ਧਾਵਿਤ੍ਵਾ ਤਤੋ ਚੁਤੋ ਬਾਰਾਣਸਿਯਂ ਨਗਰੇ ਅਡ੍ਢੇ ਕੁਲਸ੍ਮਿਂ ਸੇਟ੍ਠਿਸ੍ਸ ਏਕਪੁਤ੍ਤਕੋ ਉਪ੍ਪਜ੍ਜਿਂ, ਪਾਣੇਹਿ ਚ ਪਿਯਤਰੋ ਆਸਿਂ.

ਤਤੋ ਚ ਤਸ੍ਮਿਂ ਕਾਲੇ ਵਿਞ੍ਞੁਤਂ ਪਤ੍ਤੋ ਹੁਤ੍ਵਾ ਦੇਵਪੁਤ੍ਤੇਨ ਚੋਦਿਤੋ ਅਹਂ ਪਾਸਾਦਾ ਓਰੁਹਿਤ੍ਵਾਨ ਸਮ੍ਬੁਦ੍ਧਂ ਭਗਵਨ੍ਤਂ ਗੋਤਮਂ ਉਪਸਙ੍ਕਮਿਂ.

ਸੋ ਸਮ੍ਬੁਦ੍ਧੋ ਭਗਵਾ ਗੋਤਮੋ ਅਨੁਕਮ੍ਪਾਯ ਮੇ ਧਮ੍ਮਂ ਅਦੇਸੇਸਿ. ਦੁਕ੍ਖਂ ਦੁਕ੍ਖਸਚ੍ਚਞ੍ਚ ਦੁਕ੍ਖਸਮੁਪ੍ਪਾਦਂ ਸਮੁਦਯਸਚ੍ਚਞ੍ਚ ਦੁਕ੍ਖਸ੍ਸ ਅਤਿਕ੍ਕਮਂ ਨਿਰੋਧਸਚ੍ਚਞ੍ਚ ਅਰਿਯਂ ਅਟ੍ਠਙ੍ਗਿਕਂ ਦੁਕ੍ਖੂਪਸਮਗਾਮਿਨਂ ਮਗ੍ਗਂ ਮਗ੍ਗਸਚ੍ਚਞ੍ਚ ਇਤਿ ਚਤ੍ਤਾਰਿ ਸਚ੍ਚਾਨਿ ਦੇਸਿਤਾਨਿ, ਤਦੁਪ੍ਪਾਦਕਂ ਧਮ੍ਮਂ ਮੁਨਿ ਭਗਵਾ ਗੋਤਮੋ ਅਦੇਸਯਿ.

ਅਹਂ ਤਸ੍ਸ ਭਗਵਤੋ ਗੋਤਮਸ੍ਸ ਵਚਨਂ ਸੁਤ੍ਵਾ ਸਾਸਨੇ ਰਤੋ ਹੁਤ੍ਵਾ ਵਿਹਰਿਂ, ਅਹਂ ਰਤ੍ਤਿਨ੍ਦਿਵਂ ਅਤਨ੍ਦਿਤੋ ਹੁਤ੍ਵਾ ਸਮਥਂ ਪਟਿਵਿਜ੍ਝਿਂ.

ਅਜ੍ਝਤ੍ਤਞ੍ਚ ਯੇ ਆਸਵਾ, ਬਹਿਦ੍ਧਾ ਚ ਯੇ ਆਸਵਾ ਮਗ੍ਗੇਨ ਸਮੁਚ੍ਛਿਨ੍ਨਾ ਆਸੁਂ, ਸਬ੍ਬੇ ਤੇ ਆਸਵਾ ਮੇ ਮਮ ਵਿਜ੍ਜਿਂਸੁ, ਪੁਨ ਨ ਚ ਉਪ੍ਪਜ੍ਜਰੇ.

ਦੁਕ੍ਖਂ ‘‘ਪਰਿਯਨ੍ਤਕਤਂ ਯਸ੍ਸ ਦੁਕ੍ਖਸ੍ਸਾ’’ਤਿ ਪਰਿਯਨ੍ਤਕਤਂ ਆਸਿ, ਅਯਂ ਸਮੁਸ੍ਸਯੋ ਜਾਤਿਮਰਣਸਂਸਾਰੋ ਚਰਿਮੋ ਅਨ੍ਤਿਮੋ ਆਸਿ, ਇਦਾਨਿ ਇਮਸ੍ਸ ਅਤ੍ਤਭਾਵਸ੍ਸ ਅਨਨ੍ਤਰਂ ਪੁਨਬ੍ਭਵੋ ਮਮ ਨਤ੍ਥੀਤਿ ਅਵੋਚਾਤਿ ਯੋਜਨਾ. ਯਂ ਨਾਨਾਵਿਧਂ ਵਾਸਨਾਭਾਗਿਯਂ ਸੁਤ੍ਤਂ ਉਦਾਹਰਣਵਸੇਨ ਨਿਦ੍ਧਾਰਿਤਂ, ਇਦਂ ਨਾਨਾਵਿਧਂ ਸੁਤ੍ਤਂ ਵਾਸਨਾਭਾਗੇ ਪੁਞ੍ਞਕੋਟ੍ਠਾਸੇ ਵਿਸਯੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਵਾਸਨਾਭਾਗਿਯਂ ਸੁਤ੍ਤਂ ਨਾਮ.

ਨਾਨਾਵਿਧਂ ਵਾਸਨਾਭਾਗਿਯਂ ਸੁਤ੍ਤਂ ਆਚਰਿਯੇਨ ਨਿਦ੍ਧਾਰਿਤਂ, ਅਮ੍ਹੇਹਿ ਚ ਞਾਤਂ, ‘‘ਕਤਮਂ ਨਿਬ੍ਬੇਧਭਾਗਿਯਂ ਸੁਤ੍ਤ’’ਨ੍ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮਂ ਨਿਬ੍ਬੇਧਭਾਗਿਯਂ ਸੁਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਤੇਸੁ ਸੋਲ਼ਸਸੁ ਸਂਕਿਲੇਸਭਾਗਿਯਾਦੀਸੁ ਸੁਤ੍ਤੇਸੁ ਕਤਮਂ ਸੁਤ੍ਤਂ ਨਿਬ੍ਬੇਧਭਾਗਿਯਂ ਸੁਤ੍ਤਂ ਨਾਮਾਤਿ ਪੁਚ੍ਛਤਿ.

ਉਦ੍ਧਂ ਬ੍ਰਹ੍ਮਲੋਕੇ ਅਧੋ ਕਾਮਾਵਚਰੇ ਭਵੇ ਸਬ੍ਬਧਿ ਸਬ੍ਬੇਸੁ ਭਵੇਸੁ ਵਿਪ੍ਪਮੁਤ੍ਤੋ ਅਰਹਾ ‘‘ਅਯਂ ਨਾਮ ਧਮ੍ਮੋ ਅਹਂ ਅਸ੍ਮੀ’’ਤਿ ਅਨਾਨੁਪਸ੍ਸੀ, ਏਵਂ ਵਿਮੁਤ੍ਤੋ ਅਰਹਾ ਅਤਿਣ੍ਣਪੁਬ੍ਬਂ ਓਘਂ ਅਪੁਨਬ੍ਭਵਾਯ ਉਦਤਾਰਿ ਉਤ੍ਤਿਣ੍ਣੋਤਿ ਯੋਜਨਾ. ਇਦਂ ਸੁਤ੍ਤਂ ਨਿਬ੍ਬੇਧਭਾਗੇ ਸੇਕ੍ਖਧਮ੍ਮੇ ਵਿਸਯੇ ਵਾਚਕਞਾਪਕਭਾਵੇਨ ਪਵਤ੍ਤਨਤੋ ਨਿਬ੍ਬੇਧਭਾਗਿਯਂ ਸੁਤ੍ਤਂ ਨਾਮ.

‘‘ਏਤ੍ਤਕਮੇਵਾ’’ਤਿ ਵਤ੍ਤਬ੍ਬਤ੍ਤਾ ‘‘ਸੀਲਵਤੋ’’ਤਿਆਦਿ ਵੁਤ੍ਤਂ. ਆਨਨ੍ਦ, ਸੀਲਵਤੋ ਪੁਗ੍ਗਲਸ੍ਸ ‘‘ਕਿਨ੍ਤਿ ਮੇ ਮਮ ਅਵਿਪ੍ਪਟਿਸਾਰੋ ਜਾਯੇਯ੍ਯ ਪਵਤ੍ਤੇਯ੍ਯਾ’’ਤਿ ਚੇਤਨਾ ਨ ਕਰਣੀਯਾ ਨ ਕਾਤਬ੍ਬਾ. ਆਨਨ੍ਦ, ਸੀਲਵਤੋ ਅਵਿਪ੍ਪਟਿਸਾਰੋ ਯਂ ਜਾਯੇਯ੍ਯ ਪਵਤ੍ਤੇਯ੍ਯ, ਏਸਾ ਅਵਿਪ੍ਪਟਿਸਾਰਸ੍ਸ ਜਾਯਨਾ ਪਵਤ੍ਤਨਾ ਧਮ੍ਮਤਾ ਭਵਤਿ. ਆਨਨ੍ਦ, ਅਵਿਪ੍ਪਟਿਸਾਰਿਨਾ ਪੁਗ੍ਗਲੇਨ ‘‘ਕਿਨ੍ਤਿ ਮੇ ਮਮ ਪਾਮੋਜ੍ਜਂ ਜਾਯੇਯ੍ਯ ਪਵਤ੍ਤੇਯ੍ਯਾ’’ਤਿ ਚੇਤਨਾ ਨ ਕਰਣੀਯਾ, ਆਨਨ੍ਦ, ਅਵਿਪ੍ਪਟਿਸਾਰਿਨੋ ਪੁਗ੍ਗਲਸ੍ਸ ਪਾਮੋਜ੍ਜਂ ਯਂ ਜਾਯੇਯ੍ਯ ਪਵਤ੍ਤੇਯ੍ਯ, ਏਸਾ ਪਾਮੋਜ੍ਜਸ੍ਸ ਜਾਯਨਾ ਪਵਤ੍ਤਨਾ ਧਮ੍ਮਤਾ. ਸੇਸੇਸੁਪਿ ਇਮਸ੍ਸ ਯੋਜਨਾਨਯਾਨੁਸਾਰੇਨ ਯੋਜਨਾਨਯੋ ਗਹੇਤਬ੍ਬੋ. ਇਦਂ ਸੁਤ੍ਤਮ੍ਪਿ ਨਿਬ੍ਬੇਧਭਾਗਿਯਂ ਸੁਤ੍ਤਂ ਨਾਮ.