੪. ਪਦਟ੍ਠਾਨਹਾਰਸਮ੍ਪਾਤਵਿਭਾਵਨਾ

੬੬. ਯੇਨ ਯੇਨ ਯੁਤ੍ਤਿਹਾਰਸਮ੍ਪਾਤੇਨ ਸੁਤ੍ਤਪ੍ਪਦੇਸਤ੍ਥਾਨਂ ਯੁਤ੍ਤਿਭਾਵੋ ਆਚਰਿਯੇਨ ਵਿਭਾਵਿਤੋ, ਅਮ੍ਹੇਹਿ ਚ ਞਾਤੋ, ਸੋ ਯੁਤ੍ਤਿਹਾਰਸਮ੍ਪਾਤੋ ਪਰਿਪੁਣ੍ਣੋ, ‘‘ਕਤਮੋ ਪਦਟ੍ਠਾਨਹਾਰਸਮ੍ਪਾਤੋ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਤ੍ਥ ਕਤਮੋ ਪਦਟ੍ਠਾਨੋ ਹਾਰਸਮ੍ਪਾਤੋ’’ਤਿ ਪੁਚ੍ਛਤਿ.

ਪੁਚ੍ਛਿਤ੍ਵਾ ਯਸ੍ਮਿਂ ਸੁਤ੍ਤਪ੍ਪਦੇਸੇ ਵੁਤ੍ਤਾਨਿ ਪਦਟ੍ਠਾਨਾਨਿ ਨੀਹਰਿਤਾਨਿ, ਤਂ ਸੁਤ੍ਤਪ੍ਪਦੇਸਂ ਨੀਹਰਿਤੁਂ ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ, ਸਮ੍ਮਾਸਙ੍ਕਪ੍ਪਗੋਚਰੋਤਿ ਗਾਥਾ’’ਤਿ ਵੁਤ੍ਤਾ. ਗਾਥਾਤ੍ਥੋ ਵੁਤ੍ਤੋਵ. ‘‘ਕਤਮੇ ਗਾਥਾਤ੍ਥਾ ਕਤਮੇਸਂ ਧਮ੍ਮਾਨਂ ਪਦਟ੍ਠਾਨਾਨੀ’’ਤਿ ਪੁਚ੍ਛਿਤਬ੍ਬਤ੍ਤਾ ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿਆਦਿ ਵੁਤ੍ਤਂ. ‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸਾ’’ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਾ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ ਤਿਣ੍ਣਂ ਸੁਚਰਿਤਾਨਂ ਪਦਟ੍ਠਾਨਂ ਨਾਮ ਸੁਚਰਿਤਪਾਰਿਪੂਰਿਯਾ ਆਸਨ੍ਨਕਾਰਣਤ੍ਤਾ. ‘‘ਸਮ੍ਮਾਸਙ੍ਕਪ੍ਪਗੋਚਰੋ’’ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਾ ਨੇਕ੍ਖਮ੍ਮਸਙ੍ਕਪ੍ਪਾਦਯੋ ਸਮ੍ਮਾਸਙ੍ਕਪ੍ਪਾ ਸਮਥਸ੍ਸ ਪਦਟ੍ਠਾਨਂ ਨਾਮ ਕਾਮਚ੍ਛਨ੍ਦਆਦਿਨੀਵਰਣਵਿਕ੍ਖਮ੍ਭਨਸ੍ਸ ਆਸਨ੍ਨਕਾਰਣਤ੍ਤਾ. ‘‘ਸਮ੍ਮਾਦਿਟ੍ਠਿਪੁਰੇਕ੍ਖਾਰੋ’’ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਾ ਕਮ੍ਮਸ੍ਸਕਤਾਸਮ੍ਮਾਦਿਟ੍ਠਿ ਚ ਸਪ੍ਪਚ੍ਚਯਨਾਮਰੂਪਦਸ੍ਸਨਸਮ੍ਮਾਦਿਟ੍ਠਿ ਚ ਵਿਪਸ੍ਸਨਾਯ ਪਦਟ੍ਠਾਨਂ ਨਾਮ ਅਨਿਚ੍ਚਾਨੁਪਸ੍ਸਨਾਦੀਨਂ ਵਿਸੇਸਕਾਰਣਤ੍ਤਾ. ‘‘ਞਤ੍ਵਾਨ ਉਦਯਬ੍ਬਯ’’ਨ੍ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਾ ਉਦਯਬ੍ਬਯਾਨੁਪਸ੍ਸਨਾਪਞ੍ਞਾ ਦਸ੍ਸਨਭੂਮਿਯਾ ਪਦਟ੍ਠਾਨਂ ਨਾਮ ਪਠਮਮਗ੍ਗਾਧਿਗਮਸ੍ਸ ਆਸਨ੍ਨਕਾਰਣਤ੍ਤਾ. ‘‘ਥਿਨਮਿਦ੍ਧਾਭਿਭੂ ਭਿਕ੍ਖੂ’’ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਂ ਥਿਨਮਿਦ੍ਧਾਭਿਭਵਨਂ ਵੀਰਿਯਸ੍ਸ ਪਦਟ੍ਠਾਨਂ ਨਾਮ ਆਸਨ੍ਨਕਾਰਣਤ੍ਤਾ. ‘‘ਸਬ੍ਬਾ ਦੁਗ੍ਗਤਿਯੋ ਜਹੇ’’ਤਿ ਸੁਤ੍ਤਪ੍ਪਦੇਸਸ੍ਸ ਅਤ੍ਥਭੂਤਾ ਪਹਾਤਬ੍ਬਜਹਨਭਾਵਨਾਯ ਅਰਿਯਮਗ੍ਗਭਾਵਨਾਯ ਪਦਟ੍ਠਾਨਂ ਨਾਮ ਪਹਾਤਬ੍ਬਪ੍ਪਹਾਨੇਨ ਅਰਿਯਮਗ੍ਗਭਾਵਨਾਪਾਰਿਪੂਰਿਸਮ੍ਭਵਤੋ.

‘‘ਏਤ੍ਤਕੋਵ ਪਦਟ੍ਠਾਨਹਾਰਸਮ੍ਪਾਤੋ ਪਰਿਪੁਣ੍ਣੋ’’ਤਿ ਵਤ੍ਤਬ੍ਬਤ੍ਤਾ ‘‘ਨਿਯੁਤ੍ਤੋ ਪਦਟ੍ਠਾਨੋ ਹਾਰਸਮ੍ਪਾਤੋ’’ਤਿ ਵੁਤ੍ਤਂ. ਯੇਨ ਯੇਨ ਸਂਵਣ੍ਣਨਾਵਿਸੇਸਭੂਤੇਨ ਪਦਟ੍ਠਾਨਹਾਰਸਮ੍ਪਾਤਭੂਤੇਨ ਸੁਤ੍ਤਪ੍ਪਦੇਸਤ੍ਥਾਨਿ ਪਦਟ੍ਠਾਨਾਨਿ ਨੀਹਰਿਤਾਨਿ, ਸੋ ਸੋ ਸਂਵਣ੍ਣਨਾਵਿਸੇਸਭੂਤੋ ਪਦਟ੍ਠਾਨਹਾਰਸਮ੍ਪਾਤੋ ਨਿਯੁਤ੍ਤੋ ਯਥਾਰਹਂ ਨਿਦ੍ਧਾਰੇਤ੍ਵਾ ਯੁਜ੍ਜਿਤਬ੍ਬੋਤਿ ਅਤ੍ਥੋ ਗਹੇਤਬ੍ਬੋਤਿ.

ਇਤਿ ਪਦਟ੍ਠਾਨਹਾਰਸਮ੍ਪਾਤੇ ਸਤ੍ਤਿਬਲਾਨੁਰੂਪਾ ਰਚਿਤਾ

ਵਿਭਾਵਨਾ ਨਿਟ੍ਠਿਤਾ.

ਪਣ੍ਡਿਤੇਹਿ ਪਨ…ਪੇ… ਗਹੇਤਬ੍ਬੋਤਿ.