੪. ਸੋਣਦਣ੍ਡਸੁਤ੍ਤਵਣ੍ਣਨਾ

੩੦੦. ਏਵਂ ਅਮ੍ਬਟ੍ਠਸੁਤ੍ਤਂ ਸਂਵਣ੍ਣੇਤ੍ਵਾ ਇਦਾਨਿ ਸੋਣਦਣ੍ਡਸੁਤ੍ਤਂ ਸਂਵਣ੍ਣੇਨ੍ਤੋ ਯਥਾਨੁਪੁਬ੍ਬਂ ਸਂਵਣ੍ਣਨੋਕਾਸਸ੍ਸ ਪਤ੍ਤਭਾਵਂ ਵਿਭਾਵੇਤੁਂ, ਅਮ੍ਬਟ੍ਠਸੁਤ੍ਤਸ੍ਸਾਨਨ੍ਤਰਂ ਸਙ੍ਗੀਤਸ੍ਸ ਸੁਤ੍ਤਸ੍ਸ ਸੋਣਦਣ੍ਡਸੁਤ੍ਤਭਾਵਂ ਵਾ ਪਕਾਸੇਤੁਂ ‘‘ਏਵਂ ਮੇ ਸੁਤਂ…ਪੇ… ਅਙ੍ਗੇਸੂਤਿ ਸੋਣਦਣ੍ਡਸੁਤ੍ਤ’’ਨ੍ਤਿ ਆਹ. ਸੁਨ੍ਦਰਭਾਵੇਨ ਸਾਤਿਸਯਾਨਿ ਅਙ੍ਗਾਨਿ ਏਤੇਸਮਤ੍ਥੀਤਿ ਅਙ੍ਗਾ. ਤਦ੍ਧਿਤਪਚ੍ਚਯਸ੍ਸ ਅਤਿਸਯਵਿਸਿਟ੍ਠੇ ਅਤ੍ਥਿਤਾਅਤ੍ਥੇ ਪਵਤ੍ਤਿਤੋ, ਪਧਾਨਤੋ ਰਾਜਕੁਮਾਰਾ, ਰੁਲ਼੍ਹਿਵਸੇਨ ਪਨ ਜਨਪਦੋਤਿ ਵੁਤ੍ਤਂ ‘‘ਅਙ੍ਗਾ ਨਾਮਾ’’ਤਿਆਦਿ. ਇਧਾਪਿ ਅਧਿਪ੍ਪੇਤਾ, ਨ ਅਮ੍ਬਟ੍ਠਸੁਤ੍ਤੇ ਏਵ. ‘‘ਤਦਾ ਕਿਰਾ’’ਤਿਆਦਿ ਤਸ੍ਸਾ ਚਾਰਿਕਾਯ ਕਾਰਣਵਚਨਂ. ਆਗਮਨੇ ਆਦੀਨਵਂ ਦਸ੍ਸੇਤ੍ਵਾ ਪਟਿਕ੍ਖਿਪਨਵਸੇਨ ਆਗਨ੍ਤੁਂ ਨ ਦਸ੍ਸਨ੍ਤਿ, ਨਾਨੁਜਾਨਿਸ੍ਸਨ੍ਤੀਤਿ ਅਧਿਪ੍ਪਾਯੋ.

ਨੀਲਾਸੋਕਕਣਿਕਾਰਕੋਵਿਲ਼ਾਰਕੁਨ੍ਦਰਾਜਰੁਕ੍ਖਾਦਿਸਮ੍ਮਿਸ੍ਸਤਾਯ ਤਂ ਚਮ੍ਪਕਵਨਂ ਨੀਲਾਦਿਪਞ੍ਚਵਣ੍ਣਕੁਸੁਮਪਟਿਮਣ੍ਡਿਤਂ, ਨ ਚਮ੍ਪਕਰੁਕ੍ਖਾਨਞ੍ਞੇਵ ਨੀਲਾਦਿਪਞ੍ਚਵਣ੍ਣਕੁਸੁਮਤਾਯਾਤਿ ਵਦਨ੍ਤਿ, ਤਥਾਰੂਪਾਯ ਪਨ ਧਾਤੁਯਾ ਚਮ੍ਪਕਰੁਕ੍ਖਾਵ ਨੀਲਾਦਿਪਞ੍ਚਵਣ੍ਣਮ੍ਪਿ ਕੁਸੁਮਂ ਪੁਪ੍ਫਨ੍ਤਿ. ਇਦਾਨਿਪਿ ਹਿ ਕਤ੍ਥਚਿ ਦੇਸੇ ਦਿਸ੍ਸਨ੍ਤਿ, ਏਵਞ੍ਚ ਯਥਾਰੁਤਮ੍ਪਿ ਅਟ੍ਠਕਥਾਵਚਨਂ ਉਪਪਨ੍ਨਂ ਹੋਤਿ. ਕੁਸੁਮਗਨ੍ਧਸੁਗਨ੍ਧੇਤਿ ਵੁਤ੍ਤਨਯੇਨ ਸਮ੍ਮਿਸ੍ਸਕਾਨਂ, ਸੁਦ੍ਧਚਮ੍ਪਕਾਨਂ ਵਾ ਕੁਸੁਮਾਨਂ ਗਨ੍ਧੇਹਿ ਸੁਗਨ੍ਧੇ. ਏਵਂ ਪਨ ਵਦਨ੍ਤੋ ਨ ਮਾਪਨਕਾਲੇਯੇਵ ਤਸ੍ਮਿਂ ਨਗਰੇ ਚਮ੍ਪਕਰੁਕ੍ਖਾ ਉਸ੍ਸਨ੍ਨਾ, ਅਥ ਖੋ ਅਪਰਭਾਗੇਪੀਤਿ ਦਸ੍ਸੇਤਿ. ਮਾਪਨਕਾਲੇ ਹਿ ਚਮ੍ਪਕਰੁਕ੍ਖਾਨਮੁਸ੍ਸਨ੍ਨਤਾਯ ਤਂ ਨਗਰਂ ‘‘ਚਮ੍ਪਾ’’ਤਿ ਨਾਮਂ ਲਭਿ. ਇਸ੍ਸਰਤ੍ਤਾਤਿ ਅਧਿਪਤਿਭਾਵਤੋ. ਸੇਨਾ ਏਤਸ੍ਸ ਅਤ੍ਥੀਤਿ ਸੇਨਿਕੋ, ਸ੍ਵੇਵ ਸੇਨਿਯੋ. ਬਹੁਭਾਵਵਿਸਿਟ੍ਠਾ ਚੇਤ੍ਥ ਅਤ੍ਥਿਤਾ ਤਦ੍ਧਿਤਪਚ੍ਚਯੇਨ ਜੋਤਿਤਾਤਿ ਵੁਤ੍ਤਂ ‘‘ਮਹਤਿਯਾ ਸੇਨਾਯ ਸਮਨ੍ਨਾਗਤਤ੍ਤਾ’’ਤਿ. ਸਾਰਸੁਵਣ੍ਣਸਦਿਸਤਾਯਾਤਿ ਉਤ੍ਤਮਜਾਤਿਸੁਵਣ੍ਣਸਦਿਸਤਾਯ. ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤਟ੍ਠਕਥਾਯਂ ਪਨ ਏਵਂ ਵੁਤ੍ਤਂ ‘‘ਸੇਨਿਯੋ’’ਤਿ ਤਸ੍ਸ ਨਾਮਂ, ਬਿਮ੍ਬੀਤਿ ਅਤ੍ਤਭਾਵਸ੍ਸ ਨਾਮਂ ਵੁਚ੍ਚਤਿ, ਸੋ ਤਸ੍ਸ ਸਾਰਭੂਤੋ ਦਸ੍ਸਨੀਯੋ ਪਾਸਾਦਿਕੋ ਅਤ੍ਤਭਾਵਸਮਿਦ੍ਧਿਯਾ ਬਿਮ੍ਬਿਸਾਰੋਤਿ ਵੁਚ੍ਚਤੀ’’ਤਿ (ਮ. ਨਿ. ਅਟ੍ਠ. ੧.੧੮੦).

੩੦੧-੨. ਸਂਹਤਾਤਿ ਸਨ੍ਨਿਪਤਨਵਸੇਨ ਸਙ੍ਘਟਿਤਾ, ਸਨ੍ਨਿਪਤਿਤਾਤਿ ਵੁਤ੍ਤਂ ਹੋਤਿ. ਏਕੇਕਿਸ੍ਸਾਯ ਦਿਸਾਯਾਤਿ ਏਕੇਕਾਯ ਪਦੇਸਭੂਤਾਯ ਦਿਸਾਯ. ਪਾਲ਼ਿਯਂ ਬ੍ਰਾਹ੍ਮਣਗਹਪਤਿਕਾਨਮਧਿਪ੍ਪੇਤਤ੍ਤਾ ‘‘ਸਙ੍ਘਿਨੋ’’ਤਿ ਵਤ੍ਤਬ੍ਬੇ ‘‘ਸਙ੍ਘੀ’’ਤਿ ਪੁਥੁਤ੍ਤੇ ਏਕਵਚਨਂ ਵੁਤ੍ਤਨ੍ਤਿ ਦਸ੍ਸੇਤਿ ‘‘ਏਤੇਸ’’ਨ੍ਤਿ ਇਮਿਨਾ. ਏਵਂ ਆਚਰਿਯੇਨ (ਦੀ. ਨਿ. ਟੀ. ੧.੩੦੧, ੩੦੨) ਵੁਤ੍ਤਂ, ਸਙ੍ਘੀਤਿ ਪਨ ਦੀਘਵਸੇਨ ਬਹੁਵਚਨਮ੍ਪਿ ਦਿਸ੍ਸਤਿ. ਅਗਣਾਤਿ ਅਸਮੂਹਭੂਤਾ ਅਗਣਬਨ੍ਧਾ, ‘‘ਅਗਣਨਾ’’ਤਿਪਿ ਪਾਠੋ, ਅਯਮੇਵਤ੍ਥੋ, ਸਙ੍ਖ੍ਯਾਤ੍ਥਸ੍ਸ ਅਯੁਤ੍ਤਤ੍ਤਾ. ਨ ਹਿ ਤੇਸਂ ਸਙ੍ਖ੍ਯਾ ਅਤ੍ਥੀਤਿ. ਇਦਂ ਵੁਤ੍ਤਂ ਹੋਤਿ – ਪੁਬ੍ਬੇ ਅਨ੍ਤੋਨਗਰੇ ਅਗਣਾਪਿ ਪਚ੍ਛਾ ਬਹਿਨਗਰੇ ਗਣਂ ਭੂਤਾ ਪਤ੍ਤਾਤਿ ਗਣੀਭੂਤਾਤਿ. ਅਭੂਤਤਬ੍ਭਾਵੇ ਹਿ ਕਰਾਸਭੂਯੋਗੇ ਅ-ਕਾਰਸ੍ਸ ਈ-ਕਾਰਾਦੇਸੋ, ਈਪਚ੍ਚਯੋ ਵਾ. ਰਾਜਰਾਜਞ੍ਞਾਦੀਨਂ ਦਣ੍ਡਧਰੋ ਪੁਰਿਸੋਵ ਤਤੋ ਤਤੋ ਖਤ੍ਤਿਯਾਨਂ ਤਾਯਨਤੋ ਰਕ੍ਖਣਤੋ ਖਤ੍ਤਾ ਨਿਰੁਤ੍ਤਿਨਯੇਨ. ਸੋ ਹਿ ਯਤ੍ਥ ਤੇਹਿ ਪੇਸਿਤੋ, ਤਤ੍ਥ ਤੇਸਂ ਦੋਸਂ ਪਰਿਹਰਨ੍ਤੋ ਯੁਤ੍ਤਪਤ੍ਤਵਸੇਨ ਪੁਚ੍ਛਿਤਮਤ੍ਥਂ ਕਥੇਤਿ. ਤੇਨਾਹ ‘‘ਪੁਚ੍ਛਿਤਪਞ੍ਹੇ ਬ੍ਯਾਕਰਣਸਮਤ੍ਥੋ’’ਤਿ. ਕੁਲਾਪਦੇਸਾਦਿਨਾ ਮਹਤੀ ਮਤ੍ਤਾ ਪਮਾਣਮੇਤਸ੍ਸਾਤਿ ਮਹਾਮਤ੍ਤੋ.

ਸੋਣਦਣ੍ਡਗੁਣਕਥਾਵਣ੍ਣਨਾ

੩੦੩. ਏਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਾਨਿ ਰਜ੍ਜਾਨਿ ਨਾਮ, ਵਿਸਿਟ੍ਠਾਨਿ ਰਜ੍ਜਾਨਿ ਵਿਰਜ੍ਜਾਨਿ, ਤਾਨੇਵ ਵੇਰਜ੍ਜਾਨਿ, ਨਾਨਾਵਿਧਾਨਿ ਵੇਰਜ੍ਜਾਨਿ ਤਥਾ, ਤੇਸੁ ਜਾਤਾਤਿਆਦਿਨਾ ਤਿਧਾ ਤਦ੍ਧਿਤਨਿਬ੍ਬਚਨਂ. ਵਿਚਿਤ੍ਰਾ ਹਿ ਤਦ੍ਧਿਤਵੁਤ੍ਤੀਤਿ. ਯਞ੍ਞਾਨੁਭਵਨਤ੍ਥਨ੍ਤਿ ਯਸ੍ਸ ਕਸ੍ਸਚਿ ਯਞ੍ਞਸ੍ਸ ਅਨੁਭਵਨਤ੍ਥਂ. ਤੇਤਿ ਨਾਨਾਵੇਰਜ੍ਜਕਾ ਬ੍ਰਾਹ੍ਮਣਾ. ਤਸ੍ਸਾਤਿ ਸੋਣਦਣ੍ਡਬ੍ਰਾਹ੍ਮਣਸ੍ਸ. ਉਤ੍ਤਮਬ੍ਰਾਹ੍ਮਣੋਤਿ ਅਭਿਜਨਸਮ੍ਪਤ੍ਤਿਯਾ, ਵਿਤ੍ਤਸਮ੍ਪਤ੍ਤਿਯਾ, ਵਿਜ੍ਜਾਸਮ੍ਪਤ੍ਤਿਯਾ ਚ ਉਗ੍ਗਤਤਰੋ, ਉਲ਼ਾਰੋ ਵਾ ਬ੍ਰਾਹ੍ਮਣੋ. ਆਵਟ੍ਟਨੀਮਾਯਾ ਵੁਤ੍ਤਾਵ. ਲਾਭਮਚ੍ਛੇਰੇਨ ਨਿਪ੍ਪੀਲ਼ਿਤਤਾਯ ਅਸਨ੍ਨਿਪਾਤੋ ਭਵਿਸ੍ਸਤਿ.

ਅਙ੍ਗੇਤਿ ਗਮੇਤਿ ਅਤ੍ਤਨੋ ਫਲਂ ਞਾਪੇਤਿ, ਸਯਂ ਵਾ ਅਙ੍ਗੀਯਤਿ ਗਮੀਯਤਿ ਞਾਯਤੀਤਿ ਅਙ੍ਗਂ, ਹੇਤੁ. ਤੇਨਾਹ ‘‘ਕਾਰਣੇਨਾ’’ਤਿ. ਲੋਕਧਮ੍ਮਤਾਨੁਸ੍ਸਰਣੇਨ ਅਪਰਾਨਿਪਿ ਕਾਰਣਾਨਿ ਆਹਂਸੂਤਿ ਦਸ੍ਸੇਨ੍ਤੋ ‘‘ਏਵ’’ਨ੍ਤਿਆਦਿਮਾਹ.

ਦ੍ਵੀਹਿ ਪਕ੍ਖੇਹੀਤਿ ਮਾਤੁਪਕ੍ਖੇਨ, ਪਿਤੁਪਕ੍ਖੇਨ ਚਾਤਿ ਦ੍ਵੀਹਿ ਞਾਤਿਪਕ੍ਖੇਹਿ. ‘‘ਉਭਤੋ ਸੁਜਾਤੋ’’ਤਿ ਹਿ ਏਤ੍ਥਕੇਯੇਵ ਵੁਤ੍ਤੇ ਯੇਹਿ ਕੇਹਿਚਿ ਦ੍ਵੀਹਿ ਭਾਗੇਹਿ ਸੁਜਾਤਤ੍ਤਂ ਵਿਜਾਨੇਯ੍ਯ, ਸੁਜਾਤਸਦ੍ਦੋ ਚ ‘‘ਸੁਜਾਤੋ ਚਾਰੁਦਸ੍ਸਨੋ’’ਤਿਆਦੀਸੁ (ਮ. ਨਿ. ੨.੩੯੯) ਆਰੋਹਸਮ੍ਪਤ੍ਤਿਪਰਿਯਾਯੋਪਿ ਹੋਤੀਤਿ ਜਾਤਿਵਸੇਨੇਵ ਸੁਜਾਤਤ੍ਤਂ ਵਿਭਾਵੇਤੁਂ ‘‘ਮਾਤਿਤੋ ਚ ਪਿਤਿਤੋ ਚਾ’’ਤਿ ਵੁਤ੍ਤਂ. ਤੇਨਾਹ ‘‘ਭੋਤੋ ਮਾਤਾ ਬ੍ਰਾਹ੍ਮਣੀ’’ਤਿਆਦਿ. ਏਵਨ੍ਤਿ ਵੁਤ੍ਤਪ੍ਪਕਾਰੇਨ, ਮਾਤੁਪਕ੍ਖਤੋ ਚ ਪਿਤੁਪਕ੍ਖਤੋ ਚ ਪਚ੍ਚੇਕਂ ਤਿਵਿਧੇਨ ਞਾਤਿਪਰਿਵਟ੍ਟੇਨਾਤਿ ਵੁਤ੍ਤਂ ਹੋਤਿ. ‘‘ਸਂਸੁਦ੍ਧਗਹਣਿਕੋ’’ਤਿ ਇਮਿਨਾਪਿ ‘‘ਮਾਤਿਤੋ ਚ ਪਿਤਿਤੋ ਚਾ’’ਤਿ ਵੁਤ੍ਤਮੇਵਤ੍ਥਂ ਸਮਤ੍ਥੇਤੀਤਿ ਆਹ ‘‘ਸਂਸੁਦ੍ਧਾ ਤੇ ਮਾਤੁਗਹਣੀ’’ਤਿ, ਸਂਸੁਦ੍ਧਾਵ ਅਨਞ੍ਞਪੁਰਿਸਸਾਧਾਰਣਾਤਿ ਅਤ੍ਥੋ. ਅਨੋਰਸਪੁਤ੍ਤਵਸੇਨਾਪਿ ਹਿ ਲੋਕੇ ਮਾਤਾਪਿਤੁਸਮਞ੍ਞਾ ਦਿਸ੍ਸਤਿ, ਇਧ ਪਨਸ੍ਸ ਓਰਸਪੁਤ੍ਤਵਸੇਨੇਵ ਇਚ੍ਛਿਤਾਤਿ ਦਸ੍ਸੇਤੁਂ ‘‘ਸਂਸੁਦ੍ਧਗਹਣਿਕੋ’’ਤਿ ਵੁਤ੍ਤਂ. ਗਬ੍ਭਂ ਗਣ੍ਹਾਤਿ ਧਾਰੇਤੀਤਿ ਗਹਣੀ, ਤਤਿਯਾਵਟ੍ਟਸਙ੍ਖਾਤੋ ਗਬ੍ਭਾਸਯਸਞ੍ਞਿਤੋ ਮਾਤੁਕੁਚ੍ਛਿਪਦੇਸੋ ਸਮਵੇਪਾਕਿਨਿਯਾਤਿ ਸਮਵਿਪਾਚਨਿਯਾ. ਏਤ੍ਥਾਤਿ ਮਹਾਸੁਦਸ੍ਸਨਸੁਤ੍ਤੇ. ਯਥਾਭੁਤ੍ਤਮਾਹਾਰਂ ਵਿਪਾਚਨਵਸੇਨ ਗਣ੍ਹਾਤਿ ਨ ਛਡ੍ਡੇਤੀਤਿ ਗਹਣੀ, ਕਮ੍ਮਜਤੇਜੋਧਾਤੁ, ਯਾ ‘‘ਉਦਰਗ੍ਗੀ’’ਤਿ ਲੋਕੇ ਪਞ੍ਞਾਯਤਿ.

ਪਿਤੁਪਿਤਾਤਿ ਪਿਤੁਨੋ ਪਿਤਾ. ਪਿਤਾਮਹੋਤਿ ਆਮਹ-ਪਚ੍ਚਯੇਨ ਤਦ੍ਧਿਤਸਿਦ੍ਧਿ. ‘‘ਚਤੁਯੁਗ’’ਨ੍ਤਿਆਦੀਸੁ ਵਿਯ ਤਂ ਤਦਤ੍ਥੇ ਯੁਜ੍ਜਿਤਬ੍ਬਤੋ ਕਾਲਵਿਸੇਸੋ ਯੁਗਂ ਨਾਮ. ਏਤਂ ਯੁਗਸਦ੍ਦੇਨ ਆਯੁਪ੍ਪਮਾਣਵਚਨਂ ਅਭਿਲਾਪਮਤ੍ਤਂ ਲੋਕਵੋਹਾਰਵਚਨਮਤ੍ਤਮੇਵ, ਅਧਿਪ੍ਪੇਤਤ੍ਥਤੋ ਪਨ ਪਿਤਾਮਹੋਯੇਵ ਪਿਤਾਮਹਯੁਗਸਦ੍ਦੇਨ ਵੁਤ੍ਤੋ ਤਸ੍ਸੇਵ ਪਧਾਨਭਾਵੇਨ ਅਧਿਪ੍ਪੇਤਤ੍ਤਾਤਿ ਅਧਿਪ੍ਪਾਯੋ. ਤਤੋ ਉਦ੍ਧਨ੍ਤਿ ਪਿਤਾਮਹਤੋ ਉਪਰਿ. ਤੇਨਾਹ ‘‘ਪੁਬ੍ਬਪੁਰਿਸਾ’’ਤਿ, ਤਦਵਸੇਸਾ ਪੁਬ੍ਬਕਾ ਛ ਪੁਰਿਸਾਤਿ ਅਤ੍ਥੋ. ਪੁਰਿਸਗ੍ਗਹਣਞ੍ਚੇਤ੍ਥ ਉਕ੍ਕਟ੍ਠਨਿਦ੍ਦੇਸੇਨ ਕਤਨ੍ਤਿ ਦਟ੍ਠਬ੍ਬਂ. ਏਵਞ੍ਹਿ ‘‘ਮਾਤਿਤੋ’’ਤਿ ਪਾਲ਼ਿਵਚਨਂ ਸਮਤ੍ਥਿਤਂ ਹੋਤਿ.

ਤਤ੍ਰਾਯਮਟ੍ਠਕਥਾਮੁਤ੍ਤਕਨਯੋ – ਮਾਤਾ ਚ ਪਿਤਾ ਚ ਪਿਤਰੋ, ਪਿਤੂਨਂ ਪਿਤਰੋ ਪਿਤਾਮਹਾ, ਤੇਸਂ ਯੁਗੋ ਦ੍ਵਨ੍ਦੋ ਪਿਤਾਮਹਯੁਗੋ, ਤਸ੍ਮਾ, ਯਾਵ ਸਤ੍ਤਮਾ ਪਿਤਾਮਹਯੁਗਾ ਪਿਤਾਮਹਦ੍ਵਨ੍ਦਾਤਿ ਅਤ੍ਥੋ ਵੇਦਿਤਬ੍ਬੋ, ਏਵਞ੍ਚ ਪਿਤਾਮਹਗ੍ਗਹਣੇਨੇਵ ਮਾਤਾਮਹੋਪਿ ਗਹਿਤੋ. ਯੁਗਸਦ੍ਦੋ ਚੇਤ੍ਥ ਏਕਸੇਸੋ ‘‘ਯੁਗੋ ਚ ਯੁਗੋ ਚ ਯੁਗੋ’’ਤਿ, ਅਤੋ ਤਤ੍ਥ ਤਤ੍ਥ ਞਾਤਿਪਰਿਵਟ੍ਟੇ ਪਿਤਾਮਹਦ੍ਵਨ੍ਦਂ ਗਹਿਤਂ ਹੋਤੀਤਿ.

‘‘ਯਾਵ ਸਤ੍ਤਮਾ ਪਿਤਾਮਹਯੁਗਾ’’ਤਿ ਇਦਂ ਕਾਕਾਪੇਕ੍ਖਨਮਿਵ ਉਭਯਤ੍ਥ ਸਮ੍ਬਨ੍ਧਗਤਨ੍ਤਿ ਆਹ ‘‘ਏਵ’’ਨ੍ਤਿਆਦਿ. ਯਾਵ ਸਤ੍ਤਮੋ ਪੁਰਿਸੋ, ਤਾਵ ਅਕ੍ਖਿਤ੍ਤੋ ਅਨੁਪਕੁਟ੍ਠੋ ਜਾਤਿਵਾਦੇਨਾਤਿ ਸਮ੍ਬਨ੍ਧੋ. ਅਕ੍ਖਿਤ੍ਤੋਤਿ ਅਪ੍ਪਤ੍ਤਖੇਪੋ. ਅਨਵਕ੍ਖਿਤ੍ਤੋਤਿ ਸਦ੍ਧਥਾਲਿਪਾਕਾਦੀਸੁ ਨ ਛਡ੍ਡਿਤੋ. ਨ ਉਪਕੁਟ੍ਠੋਤਿ ਨ ਉਪਕ੍ਕੋਸਿਤੋ. ‘‘ਜਾਤਿਵਾਦੇਨਾ’’ਤਿ ਇਦਂ ਹੇਤੁਮ੍ਹਿ ਕਰਣਵਚਨਨ੍ਤਿ ਦਸ੍ਸੇਤੁਂ ‘‘ਕੇਨ ਕਾਰਣੇਨਾ’’ਤਿਆਦਿ ਵੁਤ੍ਤਂ. ਇਤਿਪੀਤਿ ਇਮਿਨਾਪਿ ਕਾਰਣੇਨ. ਏਤ੍ਥ ਚ ‘‘ਉਭਤੋ…ਪੇ… ਯੁਗਾ’’ਤਿ ਏਤੇਨ ਬ੍ਰਾਹ੍ਮਣਸ੍ਸ ਯੋਨਿਦੋਸਾਭਾਵੋ ਦਸ੍ਸਿਤੋ ਸਂਸੁਦ੍ਧਗਹਣਿਕਭਾਵਕਿਤ੍ਤਨਤੋ, ‘‘ਅਕ੍ਖਿਤ੍ਤੋ’’ਤਿ ਏਤੇਨ ਕਿਰਿਯਾਪਰਾਧਾਭਾਵੋ. ਕਿਰਿਯਾਪਰਾਧੇਨ ਹਿ ਸਤ੍ਤਾ ਖੇਪਂ ਪਾਪੁਣਨ੍ਤਿ. ‘‘ਅਨੁਪਕੁਟ੍ਠੋ’’ਤਿ ਏਤੇਨ ਅਯੁਤ੍ਤਸਂਸਗ੍ਗਾਭਾਵੋ. ਅਯੁਤ੍ਤਸਂਸਗ੍ਗਞ੍ਹਿ ਪਟਿਚ੍ਚ ਸਤ੍ਤਾ ਅਕ੍ਕੋਸਂ ਲਭਨ੍ਤੀਤਿ.

ਇਸ੍ਸਰੋਤਿ ਆਧਿਪਤੇਯ੍ਯਸਂਵਤ੍ਤਨਿਯਕਮ੍ਮਬਲੇਨ ਈਸਨਸੀਲੋ, ਸਾ ਪਨਸ੍ਸ ਇਸ੍ਸਰਤਾ ਵਿਭਵਸਮ੍ਪਤ੍ਤਿਪਚ੍ਚਯਾ ਪਾਕਟਾ ਜਾਤਾ, ਤਸ੍ਮਾ ਅਡ੍ਢਭਾਵਪਰਿਯਾਯੇਨ ਦਸ੍ਸੇਨ੍ਤੋ ‘‘ਅਡ੍ਢੋਤਿ ਇਸ੍ਸਰੋ’’ਤਿ ਆਹ. ਮਹਨ੍ਤਂ ਧਨਮਸ੍ਸ ਭੂਮਿਗਤਂ, ਵੇਹਾਸਗਤਞ੍ਚਾਤਿ ਮਹਦ੍ਧਨੋ. ਤਸ੍ਸਾਤਿ ਤਸ੍ਸ ਤਸ੍ਸ ਗੁਣਸ੍ਸ, ਅਯਮੇਵ ਚ ਪਾਠੋ ਅਧੁਨਾ ਦਿਸ੍ਸਤਿ. ਅਗੁਣਂਯੇਵ ਦਸ੍ਸੇਮਾਤਿ ਅਨ੍ਵਯਤੋ ਤਸ੍ਸ ਗੁਣਂ ਵਤ੍ਵਾ ਬ੍ਯਤਿਰੇਕਤੋ ਭਗਵਤੋ ਅਨੁਪਸਙ੍ਕਮਨਕਾਰਣਂ ਅਗੁਣਮੇਵ ਦਸ੍ਸੇਮ.

ਅਧਿਕਰੂਪੋਤਿ ਵਿਸਿਟ੍ਠਰੂਪੋ ਉਤ੍ਤਮਸਰੀਰੋ. ਦਸ੍ਸਨਂ ਅਰਹਤੀਤਿ ਦਸ੍ਸਨੀਯੋਤਿ ਆਹ ‘‘ਦਸ੍ਸਨਯੋਗ੍ਗੋ’’ਤਿ. ਪਸਾਦਂ ਆਵਹਤੀਤਿ ਪਾਸਾਦਿਕੋ. ਤੇਨਾਹ ‘‘ਪਸਾਦਜਨਨਤੋ’’ਤਿ. ਪੋਕ੍ਖਰਸਦ੍ਦੋ ਇਧ ਸੁਨ੍ਦਰਤ੍ਥੇ, ਸਰੀਰਤ੍ਥੇ ਚ ਨਿਰੁਲ਼੍ਹੋ. ਵਣ੍ਣਸ੍ਸਾਤਿ ਵਣ੍ਣਧਾਤੁਯਾ. ਪਕਾਸਨਿਯੇਨ ਪਰਿਸੁਦ੍ਧਨਿਮਿਤ੍ਤੇਨ ਵਣ੍ਣਸਦ੍ਦਸ੍ਸ ਵਣ੍ਣਧਾਤੁਯਂ ਪਵਤ੍ਤਨਤੋ ਤਨ੍ਨਿਮਿਤ੍ਤਮੇਵ ਵਣ੍ਣਤਾ, ਸਾ ਚ ਵਣ੍ਣਨਿਸ੍ਸਿਤਾਤਿ ਅਭੇਦਵਸੇਨ ਵੁਤ੍ਤਂ ‘‘ਉਤ੍ਤਮੇਨ ਪਰਿਸੁਦ੍ਧੇਨ ਵਣ੍ਣੇਨਾ’’ਤਿ. ਸਰੀਰਂ ਪਨ ਸਨ੍ਨਿਵੇਸਵਿਸਿਟ੍ਠਂ ਕਰਚਰਣਗੀਵਾਸੀਸਾਦਿਸਮੁਦਾਯਂ, ਤਞ੍ਚ ਅਵਯਵਭੂਤੇਨ ਸਣ੍ਠਾਨਨਿਮਿਤ੍ਤੇਨ ਗਯ੍ਹਤਿ, ਤਸ੍ਮਾ ਤਨ੍ਨਿਮਿਤ੍ਤਮੇਵ ਪੋਕ੍ਖਰਤਾਤਿ ਵੁਤ੍ਤਂ ‘‘ਸਰੀਰਸਣ੍ਠਾਨਸਮ੍ਪਤ੍ਤਿਯਾ’’ਤਿ, ਉਤ੍ਤਮਾਯ ਸਰੀਰਸਣ੍ਠਾਨਸਮ੍ਪਤ੍ਤਿਯਾਤਿਪਿ ਯੋਜੇਤਬ੍ਬਂ. ਅਤ੍ਥਵਸਾ ਹਿ ਲਿਙ੍ਗਵਿਭਤ੍ਤਿਵਿਪਰਿਣਾਮੋ. ਸਬ੍ਬੇਸੁ ਵਣ੍ਣੇਸੁ ਸੁਵਣ੍ਣਵਣ੍ਣੋਵ ਉਤ੍ਤਮੋਤਿ ਆਹ ‘‘ਪਰਿਸੁਦ੍ਧਵਣ੍ਣੇਸੁਪਿ ਸੇਟ੍ਠੇਨ ਸੁਵਣ੍ਣਵਣ੍ਣੇਨ ਸਮਨ੍ਨਾਗਤੋ’’ਤਿ. ਤਥਾ ਹਿ ਬੁਦ੍ਧਾ, ਚਕ੍ਕਵਤ੍ਤਿਨੋ ਚ ਸੁਵਣ੍ਣਵਣ੍ਣਾਵ ਹੋਨ੍ਤਿ. ਯਸ੍ਮਾ ਪਨ ਵਚ੍ਛਸਸਦ੍ਦੋ ਸਰੀਰਾਭੇ ਪਵਤ੍ਤਤਿ, ਤਸ੍ਮਾ ਬ੍ਰਹ੍ਮਵਚ੍ਛਸੀਤਿ ਉਤ੍ਤਮਸਰੀਰਾਭੋ, ਸੁਵਣ੍ਣਾਭੋ ਇਚ੍ਚੇਵ ਅਤ੍ਥੋ. ਇਮਮੇਵ ਹਿ ਅਤ੍ਥਂ ਸਨ੍ਧਾਯ ‘‘ਮਹਾਬ੍ਰਹ੍ਮੁਨੋ ਸਰੀਰਸਦਿਸੇਨੇਵ ਸਰੀਰੇਨ ਸਮਨ੍ਨਾਗਤੋ’’ਤਿ ਵੁਤ੍ਤਂ, ਨ ਬ੍ਰਹ੍ਮੁਜੁਗਤ੍ਤਤਂ. ਓਕਾਸੋਤਿ ਸਬ੍ਬਙ੍ਗਪਚ੍ਚਙ੍ਗਟ੍ਠਾਨਂ. ਆਰੋਹਪਰਿਣਾਹਸਮ੍ਪਤ੍ਤਿਯਾ, ਅਵਯਵਪਾਰਿਪੂਰਿਯਾ ਚ ਦਸ੍ਸਨਸ੍ਸ ਓਕਾਸੋ ਨ ਖੁਦ੍ਦਕੋਤਿ ਅਤ੍ਥੋ. ਤੇਨਾਹ ‘‘ਸਬ੍ਬਾਨੇਵਾ’’ਤਿਆਦਿ.

ਸੀਲਨ੍ਤਿ ਯਮਨਿਯਮਲਕ੍ਖਣਂ ਸੀਲਂ, ਤਂ ਪਨਸ੍ਸ ਰਤ੍ਤਞ੍ਞੁਤਾਯ ਵੁਦ੍ਧਂ ਵਦ੍ਧਿਤਨ੍ਤਿ ਵਿਸੇਸਤੋ ‘‘ਵੁਦ੍ਧਸੀਲੀ’’ਤਿ ਵੁਤ੍ਤਂ. ਵੁਦ੍ਧਸੀਲੇਨਾਤਿ ਸਬ੍ਬਦਾ ਸਮ੍ਮਾਯੋਗਤੋ ਵੁਦ੍ਧੇਨ ਧੁਵਸੀਲੇਨ. ਏਵਞ੍ਚ ਕਤ੍ਵਾ ਪਦਤ੍ਤਯਮ੍ਪੇਤਂ ਅਧਿਪ੍ਪੇਤਤ੍ਥਤੋ ਵਿਸਿਟ੍ਠਂ ਹੋਤਿ, ਸਦ੍ਦਤ੍ਥਮਤ੍ਤਂ ਪਨ ਸਨ੍ਧਾਯ ‘‘ਇਦਂ ਵੁਦ੍ਧਸੀਲੀਪਦਸ੍ਸੇਵ ਵੇਵਚਨ’’ਨ੍ਤਿ ਵੁਤ੍ਤਂ. ਪਞ੍ਚਸੀਲਤੋ ਪਰਂ ਤਤ੍ਥ ਸੀਲਸ੍ਸ ਅਭਾਵਤੋ, ਤੇਸਮਜਾਨਨਤੋ ਚ ‘‘ਪਞ੍ਚਸੀਲਮਤ੍ਤਮੇਵਾ’’ਤਿ ਆਹ.

ਵਾਚਾਯ ਪਰਿਮਣ੍ਡਲਪਦਬ੍ਯਞ੍ਜਨਤਾ ਏਵ ਸੁਨ੍ਦਰਭਾਵੋਤਿ ਵੁਤ੍ਤਂ ‘‘ਸੁਨ੍ਦਰਾ ਪਰਿਮਣ੍ਡਲਪਦਬ੍ਯਞ੍ਜਨਾ’’ਤਿ. ਠਾਨਕਰਣਸਮ੍ਪਤ੍ਤਿਯਾ, ਸਿਕ੍ਖਾਸਮ੍ਪਤ੍ਤਿਯਾ ਚ ਕਸ੍ਸਚਿਪਿ ਅਨੂਨਤਾਯ ਪਰਿਮਣ੍ਡਲਪਦਾਨਿ ਬ੍ਯਞ੍ਜਨਾਨਿ ਅਕ੍ਖਰਾਨਿ ਏਤਿਸ੍ਸਾਤਿ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਕ੍ਖਰਮੇਵ ਹਿ ਤਂਤਦਤ੍ਥਵਾਚਕਭਾਵੇਨ ਪਰਿਚ੍ਛਿਨ੍ਨਂ ਪਦਂ. ਅਥ ਵਾ ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਕਤ੍ਤਾ ਬ੍ਯਞ੍ਜਨਂ, ਸਿਥਿਲਧਨਿਤਾਦਿਅਕ੍ਖਰਪਾਰਿਪੂਰਿਯਾ ਚ ਪਦਬ੍ਯਞ੍ਜਨਸ੍ਸ ਪਰਿਮਣ੍ਡਲਤਾ, ਪਰਿਮਣ੍ਡਲਂ ਪਦਬ੍ਯਞ੍ਜਨਮੇਤਿਸ੍ਸਾਤਿ ਤਥਾ. ਅਪਿਚ ਪਜ੍ਜਤਿ ਅਤ੍ਥੋ ਏਤੇਨਾਤਿ ਪਦਂ, ਨਾਮਾਦਿ, ਯਥਾਧਿਪ੍ਪੇਤਮਤ੍ਥਂ ਬ੍ਯਞ੍ਜੇਤੀਤਿ ਬ੍ਯਞ੍ਜਨਂ, ਵਾਕ੍ਯਂ, ਤੇਸਂ ਪਰਿਪੁਣ੍ਣਤਾਯ ਪਰਿਮਣ੍ਡਲਪਦਬ੍ਯਞ੍ਜਨਾ. ਅਤ੍ਥਵਿਞ੍ਞਾਪਨੇ ਸਾਧਨਤਾਯ ਵਾਚਾਵ ਕਰਣਂ ਵਾਕ੍ਕਰਣਨ੍ਤਿ ਤੁਲ੍ਯਾਧਿਕਰਣਤਂ ਦਸ੍ਸੇਤੁਂ ‘‘ਉਦਾਹਰਣਘੋਸੋ’’ਤਿ ਵੁਤ੍ਤਂ, ਵਚੀਭੇਦਸਦ੍ਦੋਤਿ ਅਤ੍ਥੋ. ਤਸ੍ਸ ਬ੍ਰਾਹ੍ਮਣਸ੍ਸ, ਤੇਨ ਵਾ ਭਾਸਿਤਬ੍ਬਸ੍ਸ ਅਤ੍ਥਸ੍ਸ ਗੁਣਪਰਿਪੁਣ੍ਣਭਾਵੇਨ ਪੂਰੇ ਗੁਣੇਹਿ ਪਰਿਪੁਣ੍ਣਭਾਵੇ ਭਵਾਤਿ ਪੋਰੀ. ਪੁਨ ਪੁਰੇਤਿ ਰਾਜਧਾਨੀਮਹਾਨਗਰੇ. ਭਵਤ੍ਤਾਤਿ ਸਂਵਡ੍ਢਤ੍ਤਾ. ਸੁਖੁਮਾਲਤ੍ਤਨੇਨਾਤਿ ਸੁਖੁਮਾਲਭਾਵੇਨ, ਇਮਿਨਾ ਤਸ੍ਸਾ ਵਾਚਾਯ ਮੁਦੁਸਣ੍ਹਤ੍ਤਮਾਹ. ਅਪਲਿਬੁਦ੍ਧਾਯਾਤਿ ਪਿਤ੍ਤਸੇਮ੍ਹਾਦੀਹਿ ਅਪਰਿਯੋਨਦ੍ਧਾਯ, ਹੇਤੁਗਬ੍ਭਪਦਮੇਤਂ. ਤਤੋ ਏਵ ਹਿ ਯਥਾਵੁਤ੍ਤਦੋਸਾਭਾਵੋਤਿ. ਡਂਸੇਤ੍ਵਾ ਵਿਯ ਏਕਦੇਸਕਥਨਂ ਸਨ੍ਦਿਟ੍ਠਂ, ਸਣਿਕਂ ਚਿਰਾਯਿਤ੍ਵਾ ਕਥਨਂ ਵਿਲਮ੍ਬਿਤਂ, ‘‘ਸਨ੍ਨਿਦ੍ਧਵਿਲਮ੍ਬਿਤਾਦੀ’’ਤਿਪਿ ਪਾਠੋ. ਸਦ੍ਦੇਨ ਅਜਨਕਂ ਵਚਿਨਂ, ਮਮ੍ਮਕਸਙ੍ਖਾਤਂ ਵਾ ਏਕਕ੍ਖਰਮੇਵ ਦ੍ਵਤ੍ਤਿਕ੍ਖਤ੍ਤੁਮੁਚ੍ਚਾਰਣਂ ਸਨ੍ਨਿਦ੍ਧਂ. ਆਦਿਸਦ੍ਦੇਨ ਦੁਕ੍ਖਲਿਤਾਨੁਕਡ੍ਢਿਤਾਦੀਨਿ ਸਙ੍ਗਣ੍ਹਾਤਿ. ਏਲ਼ਾਗਲ਼ੇਨਾਤਿ ਏਲ਼ਾਪਗ੍ਘਰਣੇਨ. ‘‘ਏਲ਼ਾ ਗਲ਼ਨ੍ਤੀ’’ਤਿ ਵੁਤ੍ਤਸ੍ਸੇਵ ਦ੍ਵਿਧਾ ਅਤ੍ਥਂ ਦਸ੍ਸੇਤੁਂ ‘‘ਲਾਲਾ ਵਾ ਪਗ੍ਘਰਨ੍ਤੀ’’ਤਿਆਦਿ ਵੁਤ੍ਤਂ. ‘‘ਪਸ੍ਸੇ’ਲ਼ਮੂਗਂ ਉਰਗਂ ਦੁਜਿਵ੍ਹ’’ਨ੍ਤਿਆਦੀਸੁ (ਜਾ. ੧.੭.੪੯) ਵਿਯ ਹਿ ਏਲ਼ਾਸਦ੍ਦੋ ਲਾਲਾਯ, ਖੇਲ਼ੇ ਚ ਪਵਤ੍ਤਤਿ. ਖੇਲ਼ਫੁਸਿਤਾਨੀਤਿ ਖੇਲ਼ਬਿਨ੍ਦੂਨਿ.

ਤਤ੍ਰਾਯਮਟ੍ਠਕਥਾਮੁਤ੍ਤਕਨਯੋ – ਏਲਨ੍ਤਿ ਦੋਸੋ ਵੁਚ੍ਚਤਿ ‘‘ਯਾ ਸਾ ਵਾਚਾ ਨੇਲਾ ਕਣ੍ਣਸੁਖਾ’’ਤਿਆਦੀਸੁ (ਦੀ. ਨਿ. ੧.੮, ੧੯੪) ਵਿਯ. ਦੁਪ੍ਪਞ੍ਞਾ ਚ ਸਦੋਸਮੇਵ ਕਥਂ ਕਥੇਨ੍ਤਾ ਏਲਂ ਪਗ੍ਘਰਾਪੇਨ੍ਤਿ, ਤਸ੍ਮਾ ਤੇਸਂ ਵਾਚਾ ਏਲਗਲ਼ਾ ਨਾਮ ਹੋਤਿ, ਤਬ੍ਬਿਪਰੀਤਾਯਾਤਿ ਅਤ੍ਥੋ. ‘‘ਆਦਿਮਜ੍ਝਪਰਿਯੋਸਾਨਂ ਪਾਕਟਂ ਕਤ੍ਵਾ’’ਤਿ ਇਮਿਨਾ ਤਸ੍ਸਾ ਵਾਚਾਯ ਅਤ੍ਥਪਾਰਿਪੂਰਿਂ ਵਦਤਿ. ਵਿਞ੍ਞਾਪਨਸਦ੍ਦੇਨ ਏਤਸ੍ਸ ਸਮ੍ਬਨ੍ਧੋ.

ਜਰਾਜਿਣ੍ਣਤਾਯ ਜਿਣ੍ਣੋਤਿ ਖਣ੍ਡਿਚ੍ਚਪਾਲਿਚ੍ਚਾਦਿਭਾਵਮਾਪਾਦਿਤੋ. ਵੁਦ੍ਧਿਮਰਿਯਾਦਪ੍ਪਤ੍ਤੋਤਿ ਵੁਦ੍ਧਿਯਾ ਪਰਿਚ੍ਛੇਦਂ ਪਰਿਯਨ੍ਤਂ ਪਤ੍ਤੋ. ਜਾਤਿਮਹਲ੍ਲਕਤਾਯਾਤਿ ਉਪਪਤ੍ਤਿਯਾ ਮਹਲ੍ਲਕਭਾਵੇਨ. ਤੇਨਾਹ ‘‘ਚਿਰਕਾਲਪ੍ਪਸੁਤੋ’’ਤਿ. ਅਦ੍ਧਸਦ੍ਦੋ ਅਦ੍ਧਾਨਪਰਿਯਾਯੋ ਦੀਘਕਾਲਵਾਚਕੋ. ਕਿਤ੍ਤਕੋ ਪਨ ਸੋਤਿ ਆਹ ‘‘ਦ੍ਵੇ ਤਯੋ ਰਾਜਪਰਿਵਟ੍ਟੇ’’ਤਿ, ਦ੍ਵਿਨ੍ਨਂ ਤਿਣ੍ਣਂ ਰਾਜੂਨਂ ਰਜ੍ਜਪਸਾਸਨਪਟਿਪਾਟਿਯੋਤਿ ਅਤ੍ਥੋ. ‘‘ਅਦ੍ਧਗਤੋ’’ਤਿ ਵਤ੍ਵਾਪਿ ਕਤਂ ਵਯੋਗਹਣਂ ਓਸਾਨਵਯਾਪੇਕ੍ਖਨ੍ਤਿ ਵੁਤ੍ਤਂ ‘‘ਪਚ੍ਛਿਮਵਯਂ ਸਮ੍ਪਤ੍ਤੋ’’ਤਿ. ਪਚ੍ਛਿਮੋ ਤਤਿਯਭਾਗੋਤਿ ਵਸ੍ਸਸਤਸ੍ਸ ਤਿਧਾ ਕਤੇਸੁ ਭਾਗੇਸੁ ਤਤਿਯੋ ਓਸਾਨਭਾਗੋ. ਪਚ੍ਚੇਕਂ ਤੇਤ੍ਤਿਂਸਵਸ੍ਸਤੋ ਚ ਅਧਿਕਮਾਸਪਕ੍ਖਾਦਿਪਿ ਵਿਭਜੀਯਤਿ, ਤਸ੍ਮਾ ਸਤ੍ਤਸਟ੍ਠਿਮੇ ਵਸ੍ਸੇ ਯਥਾਰਹਂ ਲਬ੍ਭਮਾਨਮਾਸਪਕ੍ਖਦਿਵਸਤੋ ਪਟ੍ਠਾਯ ਪਚ੍ਛਿਮਵਯੋ ਵੇਦਿਤਬ੍ਬੋ. ਆਚਰਿਯਸਾਰਿਪੁਤ੍ਤਤ੍ਥੇਰੇਨਪਿ ਹਿ ਇਮਮੇਵਤ੍ਥਂ ਸਨ੍ਧਾਯ ‘‘ਸਤ੍ਤਸਟ੍ਠਿਵਸ੍ਸਤੋ ਪਟ੍ਠਾਯ ਪਚ੍ਛਿਮਵਯੋ ਕੋਟ੍ਠਾਸੋ’’ਤਿ (ਸਾਰਤ੍ਥ. ਟੀ. ੧.ਵੇਰਞ੍ਜਕਣ੍ਡਵਣ੍ਣਨਾ) ਵੁਤ੍ਤਂ. ਇਤਰਥਾ ਹਿ ‘‘ਪਚ੍ਛਿਮਵਯੋ ਨਾਮ ਵਸ੍ਸਸਤਸ੍ਸ ਪਚ੍ਛਿਮੋ ਤਤਿਯਭਾਗੋ’’ਤਿ ਅਟ੍ਠਕਥਾਵਚਨੇਨ ਵਿਰੋਧੋ ਭਵੇਯ੍ਯਾਤਿ.

ਏਵਂ ਕੇਵਲਜਾਤਿਵਸੇਨ ਪਠਮਵਿਕਪ੍ਪਂ ਵਤ੍ਵਾ ਗੁਣਮਿਸ੍ਸਕਵਸੇਨਪਿ ਦੁਤਿਯਵਿਕਪ੍ਪਂ ਵਦਨ੍ਤੇਨ ‘‘ਅਪਿਚਾ’’ਤਿਆਦਿ ਆਰਦ੍ਧਂ. ਤਤ੍ਥ ਨਾਯਂ ਜਿਣ੍ਣਤਾ ਵਯੋਮਤ੍ਤੇਨ, ਅਥ ਖੋ ਕੁਲਪਰਿਵਟ੍ਟੇਨ ਪੁਰਾਣਤਾਤਿ ਆਹ ‘‘ਜਿਣ੍ਣੋਤਿ ਪੋਰਾਣੋ’’ਤਿਆਦਿ. ਚਿਰਕਾਲਪ੍ਪਵਤ੍ਤਕੁਲਨ੍ਵਯੋਤਿ ਚਿਰਕਾਲਂ ਪਵਤ੍ਤਕੁਲਪਰਿਵਟ੍ਟੋ, ਤੇਨਾਸ੍ਸ ਕੁਲਵਸੇਨ ਉਦਿਤੋਦਿਤਭਾਵਮਾਹ. ‘‘ਵਯੋਅਨੁਪ੍ਪਤ੍ਤੋ’’ਤਿ ਇਮਿਨਾ ਜਾਤਿਵੁਦ੍ਧਿਯਾ ਵਕ੍ਖਮਾਨਤ੍ਤਾ, ਗੁਣਵੁਦ੍ਧਿਯਾ ਚ ਤਤੋ ਸਾਤਿਸਯਤ੍ਤਾ ‘‘ਵੁਦ੍ਧੋਤਿ ਸੀਲਾਚਾਰਾਦਿਗੁਣਵੁਦ੍ਧਿਯਾ ਯੁਤ੍ਤੋ’’ਤਿ ਵੁਤ੍ਤਂ. ਵਕ੍ਖਮਾਨਂ ਪਤਿ ਪਾਰਿਸੇਸਗ੍ਗਹਣਞ੍ਹੇਤਂ. ਤਥਾ ਜਾਤਿਮਹਲ੍ਲਕਤਾਯਪਿ ਤੇਨੇਵ ਪਦੇਨ ਵਕ੍ਖਮਾਨਤ੍ਤਾ, ਵਿਭਵਮਹਤ੍ਤਤਾਯ ਚ ਅਨਵਸੇਸਿਤਤ੍ਤਾ ‘‘ਮਹਲ੍ਲਕੋਤਿ ਵਿਭਵਮਹਨ੍ਤਤਾਯ ਸਮਨ੍ਨਾਗਤੋ’’ਤਿ ਆਹ. ਮਗ੍ਗਪਟਿਪਨ੍ਨੋਤਿ ਬ੍ਰਾਹ੍ਮਣਾਨਂ ਯੁਤ੍ਤਪਟਿਪਤ੍ਤਿਵੀਥਿਂ ਅਵੋਕ੍ਕਮ੍ਮ ਚਰਣਵਸੇਨ ਉਪਗਤੋਤਿ ਅਤ੍ਥਂ ਦਸ੍ਸੇਤਿ ‘‘ਬ੍ਰਾਹ੍ਮਣਾਨ’’ਨ੍ਤਿਆਦਿਨਾ. ਜਾਤਿਵੁਦ੍ਧਭਾਵਮਨੁਪ੍ਪਤ੍ਤੋ, ਤਮ੍ਪਿ ਅਨ੍ਤਿਮਵਯਂ ਪਚ੍ਛਿਮਵਯਮੇਵ ਅਨੁਪ੍ਪਤ੍ਤੋਤਿ ਸਾਧਿਪ੍ਪਾਯਯੋਜਨਾ. ਇਮਿਨਾ ਹਿ ਪਚ੍ਛਿਮਵਯਵਸੇਨ ਜਾਤਿਵੁਦ੍ਧਭਾਵਂ ਦਸ੍ਸੇਤੀਤਿ.

ਬੁਦ੍ਧਗੁਣਕਥਾਵਣ੍ਣਨਾ

੩੦੪. ਤਾਦਿਸੇਹਿ ਮਹਾਨੁਭਾਵੇਹਿ ਸਦ੍ਧਿਂ ਯੁਗਗ੍ਗਾਹਵਸੇਨ ਠਪਨਮ੍ਪਿ ਨ ਮਾਦਿਸਾਨਂ ਪਣ੍ਡਿਤਜਾਤੀਨਮਨੁਚ੍ਛਵਿਕਂ, ਕੁਤੋ ਪਨ ਉਕ੍ਕਂਸਵਸੇਨ ਠਪਨਨ੍ਤਿ ਇਦਂ ਬ੍ਰਾਹ੍ਮਣਸ੍ਸ ਨ ਯੁਤ੍ਤਰੂਪਨ੍ਤਿ ਦਸ੍ਸੇਨ੍ਤੋ ‘‘ਨ ਖੋ ਪਨ ਮੇਤ’’ਨ੍ਤਿਆਦਿਮਾਹ. ਤਤ੍ਥ ਯੇਪਿ ਗੁਣਾ ਅਤ੍ਤਨੋ ਗੁਣੇਹਿ ਸਦਿਸਾ, ਤੇਪਿ ਗੁਣੇ ਉਤ੍ਤਰਿਤਰੇਯੇਵ ਮਞ੍ਞਮਾਨੋ ਪਕਾਸੇਤੀਤਿ ਸਮ੍ਬਨ੍ਧੋ. ਸਦਿਸਾਤਿ ਚ ਏਕਦੇਸੇਨ ਸਦਿਸਾ. ਨ ਹਿ ਬੁਦ੍ਧਾਨਂ ਗੁਣੇਹਿ ਸਬ੍ਬਥਾ ਸਦਿਸਾ ਕੇਚਿਪਿ ਗੁਣਾ ਅਞ੍ਞੇਸੁ ਲਬ੍ਭਨ੍ਤਿ. ‘‘ਕੋ ਚਾਹ’’ਨ੍ਤਿਆਦਿ ਉਤ੍ਤਰਿਤਰਾਕਾਰਦਸ੍ਸਨਂ. ਅਹਞ੍ਚ ਕੀਦਿਸੋ ਨਾਮ ਹੁਤ੍ਵਾ ਸਦਿਸੋ ਭਵਿਸ੍ਸਾਮਿ, ਸਮਣਸ੍ਸ…ਪੇ… ਗੁਣਾ ਚ ਕੀਦਿਸਾ ਨਾਮ ਹੁਤ੍ਵਾ ਸਦਿਸਾ ਭਵਿਸ੍ਸਨ੍ਤੀਤਿ ਸਾਧਿਪ੍ਪਾਯਯੋਜਨਾ. ਕੇਚਿ ਨਵਂ ਪਾਠਂ ਕਰੋਨ੍ਤਿ, ਅਯਮੇਵ ਮੂਲਪਾਠੋ ਯਥਾ ਤਂ ਅਮ੍ਬਟ੍ਠਸੁਤ੍ਤੇ ‘‘ਕੋ ਚਾਹਂ ਭੋ ਗੋਤਮ ਸਾਚਰਿਯਕੋ, ਕਾ ਚ ਅਨੁਤ੍ਤਰਾ ਵਿਜ੍ਜਾਚਰਣਸਮ੍ਪਦਾ’’ਤਿ. ਇਤਰੇਤਿ ਅਤ੍ਤਨੋ ਗੁਣੇਹਿ ਅਸਦਿਸੇ ਗੁਣੇ, ‘‘ਪਕਾਸੇਤੀ’’ਤਿ ਇਮਿਨਾਵ ਸਮ੍ਬਨ੍ਧੋ. ਏਕਨ੍ਤੇਨੇਵਾਤਿ ਸਦਿਸਗੁਣਾਨਂ ਵਿਯ ਪਸਙ੍ਗਾਭਾਵੇਨ.

ਏਵਂ ਨਿਯਾਮੇਨ੍ਤੋ ਸੋਣਦਣ੍ਡੋ ਇਦਂ ਅਤ੍ਥਜਾਤਂ ਦੀਪੇਤਿ. ਯਥਾ ਹੀਤਿ ਏਤ੍ਥ ਹਿ-ਸਦ੍ਦੋ ਕਾਰਣੇ. ਤੇਨਾਹ ‘‘ਤਸ੍ਮਾ ਮਯਮੇਵ ਅਰਹਾਮਾ’’ਤਿ. ਗੋਪਦਕਨ੍ਤਿ ਗਾਵਿਯਾ ਖੁਰਟ੍ਠਾਨੇ ਠਿਤਉਦਕਂ. ਗੁਣੇਤਿ ਸਦਿਸਗੁਣੇਪਿ, ਪਗੇਵ ਅਸਦਿਸਗੁਣੇ.

ਸਟ੍ਠਿਕੁਲਸਤਸਹਸ੍ਸਨ੍ਤਿ ਸਟ੍ਠਿਸਹਸ੍ਸਾਧਿਕਂ ਕੁਲਸਤਸਹਸ੍ਸਂ. ਧਮ੍ਮਪਦਟ੍ਠਕਥਾਦੀਸੁ (ਧ. ਪ. ਅਟ੍ਠ. ੧੬) ਪਨ ਕਤ੍ਥਚਿ ਭਗਵਤੋ ਅਸੀਤਿਕੁਲਸਹਸ੍ਸਤਾਵਚਨਂ ਏਕੇਕਪਕ੍ਖਮੇਵ ਸਨ੍ਧਾਯਾਤਿ ਵੇਦਿਤਬ੍ਬਂ.

ਸੁਧਾਮਟ੍ਠਪੋਕ੍ਖਰਣਿਯੋਤਿ ਸੁਧਾਯ ਪਰਿਕਮ੍ਮਕਤਾ ਪੋਕ੍ਖਰਣਿਯੋ. ਸਤ੍ਤਰਤਨਾਨਨ੍ਤਿ ਸਤ੍ਤਹਿ ਰਤਨੇਹਿ. ਪੂਰਯੋਗੇ ਹਿ ਕਰਣਤ੍ਥੇ ਬਹੁਲਂ ਛਟ੍ਠੀਵਚਨਂ. ਪਾਸਾਦਨਿਯੂਹਾਦਯੋਤਿ ਉਪਰਿਪਾਸਾਦੇ ਠਿਤਤੁਲਾਸੀਸਾਦਯੋ. ‘‘ਸਤ੍ਤਰਤਨਾਨ’’ਨ੍ਤਿ ਅਧਿਕਾਰੋ, ਅਭੇਦੇਪਿ ਭੇਦਵੋਹਾਰੋ ਏਸ. ਕੁਲਪਰਿਯਾਯੇਨਾਤਿ ਸੁਦ੍ਧੋਦਨਮਹਾਰਾਜਸ੍ਸ ਅਸਮ੍ਭਿਨ੍ਨਖਤ੍ਤਿਯਕੁਲਾਨੁਕ੍ਕਮੇਨ. ਤੇਸੁਪੀਤਿ ਚਤੂਸੁ ਨਿਧੀਸੁਪਿ. ਗਹਿਤਂ ਗਹਿਤਂ ਠਾਨਂ ਪੂਰਤਿਯੇਵ ਧਨੇਨ ਪਾਕਤਿਕਮੇਵ ਹੋਤਿ, ਨ ਊਨਂ.

ਭਦ੍ਦਕੇਨਾਤਿ ਸੁਨ੍ਦਰੇਨ. ਪਚ੍ਛਿਮਵਯੇ ਵੁਤ੍ਤਨਯੇਨ ਪਠਮਵਯੋ ਵੇਦਿਤਬ੍ਬੋ. ਮਾਤਾਪਿਤੂਨਂ ਅਨਿਚ੍ਛਾਯ ਪਬ੍ਬਜ੍ਜਾਵ ਅਨਾਦਰੋ ਤੇਨ ਯੁਤ੍ਤੇ ਅਤ੍ਥੇ ਸਾਮਿਵਚਨਨ੍ਤਿ ਵੁਤ੍ਤਂ ਹੋਤਿ. ਏਤੇਸਨ੍ਤਿ ਮਾਤਾਪਿਤੂਨਂ. ਕਨ੍ਦਿਤ੍ਵਾਤਿ ‘‘ਕਹਂ ਪਿਯਪੁਤ੍ਤਕਾ’’ਤਿਆਦਿਨਾ ਪਰਿਦੇਵਿਤ੍ਵਾ.

ਅਪਰਿਮਾਣੋਯੇਵਾਤਿ ‘‘ਏਤ੍ਤਕੋ ਏਸੋ’’ਤਿ ਕੇਨਚਿ ਪਰਿਚ੍ਛਿਨ੍ਦਿਤੁਮਸਕ੍ਕੁਣੇਯ੍ਯਤਾਯ ਅਪਰਿਚ੍ਛਿਨ੍ਨੋਯੇਵ. ਦ੍ਵੇ ਵੇਲ਼ੂ ਅਧੋਕਟਿਮਤ੍ਤਕਮੇਵ ਹੋਨ੍ਤੀਤਿ ਆਹ ‘‘ਦ੍ਵਿਨ੍ਨਂ ਵੇਲ਼ੂਨਂ ਉਪਰਿ ਕਟਿਮਤ੍ਤਮੇਵਾ’’ਤਿ. ਪਾਰਮਿਤਾਨੁਭਾਵੇਨ ਬ੍ਰਾਹ੍ਮਣਸ੍ਸ ਏਵ ਪਞ੍ਞਾਯਤਿ, ਭਗਵਾ ਪਨ ਤਦਾ ਪਕਤਿਪ੍ਪਮਾਣੋਵਾਤਿ ਦਸ੍ਸੇਤੁਂ ‘‘ਪਞ੍ਞਾਯਮਾਨੋ’’ਤਿ ਵੁਤ੍ਤਮਿਵ ਦਿਸ੍ਸਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ‘‘ਨ ਹੀ’’ਤਿਆਦਿਨਾ ਪਾਰਮਿਤਾਬਲੇਨੇਵ ਏਵਂ ਅਪਰਿਮਾਣਤਾ, ਨ ਇਦ੍ਧਿਬਲੇਨਾਤਿ ਦਸ੍ਸੇਤੀ’’ਤਿ ਵਦਨ੍ਤਿ. ਅਤੁਲੋਤਿ ਅਸਦਿਸੋ. ‘‘ਧਮ੍ਮਪਦੇ ਗਾਥਮਾਹਾ’’ਤਿ ਕਤ੍ਥਚਿ ਪਾਠੋ ਅਯੁਤ੍ਤੋਵ. ਨ ਹਿ ਧਮ੍ਮਪਦੇ ਅਯਂ ਗਾਥਾ ਦਿਸ੍ਸਤਿ. ਸੁਧਾਪਿਣ੍ਡਿਯਤ੍ਥੇਰਾਪਦਾਨਾਦੀਸੁ (ਅਪ. ੧.੧੦.ਸੁਧਾਪਿਣ੍ਡਿਯਤ੍ਥੇਰਾਪਦਾਨ) ਪਨਾਯਂ ਗਾਥਾ ਆਗਤਾ, ਸਾ ਚ ਖੋ ਅਞ੍ਞਵਤ੍ਥੁਸ੍ਮਿਂ ਏਵ, ਨ ਇਮਸ੍ਮਿਂ ਵਤ੍ਥੁਮ੍ਹਿ, ਤਸ੍ਮਾ ਪਾਲ਼ਿਵਸੇਨ ਸਙ੍ਗੀਤਿਮਨਾਰੁਲ਼੍ਹਾ ਪਕਿਣ੍ਣਕਦੇਸਨਾਯੇਵਾਯਂ ਗਾਥਾਤਿ ਦਟ੍ਠਬ੍ਬਂ.

ਤਤ੍ਥ ਤੇ ਤਾਦਿਸੇਤਿ ਪਰਿਯਾਯਵਚਨਮੇਤਂ ‘‘ਅਪ੍ਪਂ ਵਸ੍ਸਸਤਂ ਆਯੁ, ਇਦਾਨੇਤਰਹਿ ਵਿਜ੍ਜਤੀ’’ਤਿਆਦੀਸੁ (ਬੁ. ਵਂ. ੨੭.੨੧) ਵਿਯ, ‘‘ਏਤਾਦਿਸੇ’’ਤਿਪਿ ਪਠਨ੍ਤਿ, ਤਦਸੁਨ੍ਦਰਂ ਅਪਦਾਨਾਦੀਸੁ ਤਥਾ ਅਦਿਸ੍ਸਨਤੋ. ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੇ ਕੁਤੋਚਿਪਿ ਅਭਯੇ ਤੇ ਤਾਦਿਸੇ ਪੂਜਯਤੋ ਏਤ੍ਥ ਇਦਂ ਪੁਞ੍ਞਂ ਕੇਨਚਿ ਮਹਾਨੁਭਾਵੇਨ ਅਪਿ ਸਙ੍ਖਾਤੁਂ ਨ ਸਕ੍ਕਾਤਿ ਅਤ੍ਥੋ.

ਬਾਹਨ੍ਤਰਨ੍ਤਿ ਦ੍ਵਿਨ੍ਨਂ ਬਾਹੂਨਮਨ੍ਤਰਂ. ਦ੍ਵਾਦਸ ਯੋਜਨਸਤਾਨੀਤਿ ਦ੍ਵਾਦਸਾਧਿਕਾਨਿ ਯੋਜਨਸਤਾਨਿ. ਬਹਲਨ੍ਤਰੇਨਾਤਿ ਸਮਨ੍ਤਾ ਸਰੀਰਪਰਿਣਾਹਪ੍ਪਮਾਣੇਨ. ਪੁਥੁਲਤੋਤਿ ਵਿਤ੍ਥਾਰਤੋ. ਅਙ੍ਗੁਲਿਪਬ੍ਬਾਨੀਤਿ ਏਕੇਕਾਨਿ ਅਙ੍ਗੁਲਿਪਬ੍ਬਾਨਿ. ਭਮੁਕਨ੍ਤਰਨ੍ਤਿ ਦ੍ਵਿਨ੍ਨਂ ਭਮੁਕਾਨਮਨ੍ਤਰਂ. ਮੁਖਂ ਵਿਤ੍ਥਾਰਤੋ ਦ੍ਵਿਯੋਜਨਸਤਂ ਪਰਿਮਣ੍ਡਲਤੋ ਵਿਸੁਂ ਵੁਤ੍ਤਤ੍ਤਾ. ‘‘ਏਦਿਸੋ ਭਗਵਾ’’ਤਿ ਯਾ ਪਰੇਹਿ ਵੁਤ੍ਤਾ ਕਥਾ, ਤਸ੍ਸਾ ਅਨੁਰੂਪਨ੍ਤਿ ਯਥਾਕਥਂ, ਇਮਿਨਾ ਅਞ੍ਞੇਹਿ ਵੁਤ੍ਤਂ ਭਗਵਤੋ ਵਣ੍ਣਕਥਂ ਸੁਤ੍ਵਾ ਓਲੋਕੇਤੁਕਾਮਤਾਯ ਆਗਤੋਤਿ ਦਸ੍ਸੇਤਿ, ਯਥਾਕਥਨ੍ਤਿ ਵਾ ਕੀਦਿਸਂ. ‘‘ਯਥਾਕਥਂ ਪਨ ਤੁਮ੍ਹੇ ਭਿਕ੍ਖਵੇ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥਾ’’ਤਿਆਦੀਸੁ (ਪਾਰਾ. ੧੯੪) ਵਿਯ ਹਿ ਪੁਚ੍ਛਾਯਂ ਏਸ ਨਿਪਾਤਸਮੁਦਾਯੋ, ਏਕੋ ਵਾ ਨਿਪਾਤੋ.

ਗਨ੍ਧਕੁਟਿਪਰਿਵੇਣੇਤਿ ਗਨ੍ਧਕੁਟਿਯਾ ਪਰਿਵੇਣੇ, ਗਨ੍ਧਕੁਟਿਤੋ ਬਹਿ ਪਰਿਵੇਣਬ੍ਭਨ੍ਤਰੇਤਿ ਅਤ੍ਥੋ. ਤਤ੍ਥਾਤਿ ਮਞ੍ਚਕੇ. ‘‘ਸੀਹਸੇਯ੍ਯਂ ਕਪ੍ਪੇਸੀ’’ਤਿ ਯਥਾ ਰਾਹੁ ਅਸੁਰਿਨ੍ਦੋ ਆਯਾਮਤੋ, ਵਿਤ੍ਥਾਰਤੋ, ਉਬ੍ਬੇਧਤੋ ਚ ਭਗਵਤੋ ਰੂਪਕਾਯਸ੍ਸ ਪਰਿਚ੍ਛੇਦਂ ਗਹੇਤੁਂ ਨ ਸਕ੍ਕੋਤਿ, ਤਥਾ ਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੋਨ੍ਤੋ ਸੀਹਸੇਯ੍ਯਂ ਕਪ੍ਪੇਸੀ’’ਤਿ (ਦੀ. ਨਿ. ਟੀ. ੧.੩੦੪) ਏਵਂ ਆਚਰਿਯੇਨ ਵੁਤ੍ਤਂ, ‘‘ਤਦੇਤਂ ‘ਨ ਮਯਾ ਅਸੁਰਿਨ੍ਦ ਅਧੋਮੁਖੇਨ ਪਾਰਮਿਯੋ ਪੂਰਿਤਾ, ਉਦ੍ਧਗ੍ਗਮੇਵ ਕਤ੍ਵਾ ਦਾਨਂ ਦਿਨ੍ਨ’’ਨ੍ਤਿ ਅਟ੍ਠਕਥਾਵਚਨੇਨ ਅਚ੍ਚਨ੍ਤਮੇਵ ਵਿਰੁਦ੍ਧਂ ਹੋਤਿ. ਏਤਞ੍ਹਿ ਗਨ੍ਧਕੁਟਿਦ੍ਵਾਰਵਿਵਰਣਾਦੀਸੁ ਵਿਯ ਪਾਰਮਿਤਾਨੁਭਾਵਸਿਦ੍ਧਿਦਸ੍ਸਨਂ, ਅਞ੍ਞਥਾ ਤਦੇਵ ਵਚਨਂ ਵਤ੍ਤਬ੍ਬਂ ਭਵੇਯ੍ਯਾ’’ਤਿ ਵਦਨ੍ਤਿ, ਵੀਮਂਸਿਤ੍ਵਾ ਸਮ੍ਪਟਿਚ੍ਛਿਤਬ੍ਬਂ. ਅਧੋਮੁਖੇਨਾਤਿ ਓਸਕ੍ਕਿਤਵੀਰਿਯਤਂ ਸਨ੍ਧਾਯ ਵੁਤ੍ਤਂ, ਉਦ੍ਧਗ੍ਗਮੇਵਾਤਿ ਅਨੋਸਕ੍ਕਿਤਵੀਰਿਯਤਂ, ਉਬ੍ਭਕੋਟਿਕਂ ਕਤ੍ਵਾਤਿ ਅਤ੍ਥੋ. ਤਦਾ ਰਾਹੁ ਉਪਾਸਕਭਾਵਂ ਪਟਿਵੇਦੇਸੀਤਿ ਆਹ ‘‘ਤਂ ਦਿਵਸ’’ਨ੍ਤਿਆਦਿ.

ਕਿਲੇਸੇਹਿ ਆਰਕਤ੍ਤਾ ਅਰਿਯਂ ਨਿਰੁਤ੍ਤਿਨਯੇਨ, ਅਤੋਯੇਵ ਉਤ੍ਤਮਤਾ ਪਰਿਸੁਦ੍ਧਤਾਤਿ ਵੁਤ੍ਤਂ ‘‘ਉਤ੍ਤਮਂ ਪਰਿਸੁਦ੍ਧ’’ਨ੍ਤਿ. ਅਨਵਜ੍ਜਟ੍ਠੇਨ ਕੁਸਲਂ, ਨ ਸੁਖਵਿਪਾਕਟ੍ਠੇਨ ਤਸ੍ਸ ਅਰਹਤਮਸਮ੍ਭਵਤੋ. ਕੁਸਲਸੀਲੇਨਾਤਿ ਅਨਵਜ੍ਜੇਨੇਵ ਵਿਦ੍ਧਸ੍ਤਸਵਾਸਨਕਿਲੇਸੇਨ ਸੀਲੇਨ. ਏਵਞ੍ਚ ਕਤ੍ਵਾ ਪਦਚਤੁਕ੍ਕਮ੍ਪੇਤਂ ਅਧਿਪ੍ਪੇਤਤ੍ਥਤੋ ਵਿਸਿਟ੍ਠਂ ਹੋਤਿ, ਸਦ੍ਦਤ੍ਥਮਤ੍ਤਂ ਪਨ ਸਨ੍ਧਾਯ ‘‘ਇਦਮਸ੍ਸ ਵੇਵਚਨ’’ਨ੍ਤਿ ਵੁਤ੍ਤਂ.

ਕਤ੍ਥਚਿ ਚਤੁਰਾਸੀਤਿਪਾਣਸਹਸ੍ਸਾਨਿ, ਕਤ੍ਥਚਿ ਅਪਰਿਮਾਣਾਪਿ ਦੇਵਮਨੁਸ੍ਸਾਤਿ ਅਤ੍ਥਂ ਸਨ੍ਧਾਯ ‘‘ਭਗਵਤੋ ਏਕੇਕਾਯ ਧਮ੍ਮਦੇਸਨਾਯਾ’’ਤਿਆਦਿਮਾਹ. ਮਹਾਸਮਯਸੁਤ੍ਤ (ਦੀ. ਨਿ. ੨.੩੩੧ ਆਦਯੋ) ਮਙ੍ਗਲਸੁਤ੍ਤ- (ਖੁ. ਪਾ. ੫.੧ ਆਦਯੋ; ਸੁ. ਨਿ. ੨੬੧ ਆਦਯੋ) ਦੇਸਨਾਦੀਸੁ ਹਿ ਚਤੁਵੀਸਤਿਯਾ ਠਾਨੇਸੁ ਅਸਙ੍ਖ੍ਯੇਯ੍ਯਾ ਅਪਰਿਮੇਯ੍ਯਾ ਦੇਵਮਨੁਸ੍ਸਾ ਮਗ੍ਗਫਲਾਮਤਂ ਪਿਵਿਂਸੁ. ਕੋਟਿਸਤਸਹਸ੍ਸਾਦਿਪਰਿਮਾਣੇਨਪਿ ਬਹੂ ਏਵ, ਨਿਦਸ੍ਸਨਵਸੇਨ ਪਨੇਵਂ ਵੁਤ੍ਤਂ. ਤਸ੍ਮਾ ਅਨੁਤ੍ਤਰਸਿਕ੍ਖਾਪਕਭਾਵੇਨ ਭਗਵਾ ਬਹੂਨਂ ਆਚਰਿਯੋ, ਤੇਸਂ ਆਚਰਿਯਭੂਤਾਨਂ ਸਾਵਕਾਨਮਾਚਰਿਯਭਾਵੇਨ ਸਾਵਕਵੇਨੇਯ੍ਯਾਨਂ ਪਾਚਰਿਯੋ. ਭਗਵਤਾ ਹਿ ਦਿਨ੍ਨਨਯੇ ਠਤ੍ਵਾ ਸਾਵਕਾ ਵੇਨੇਯ੍ਯਂ ਵਿਨੇਨ੍ਤਿ, ਤਸ੍ਮਾ ਭਗਵਾਵ ਤੇਸਂ ਪਧਾਨੋ ਆਚਰਿਯੋਤਿ.

ਵਦਨ੍ਤਸ੍ਸਾਧਿਪ੍ਪੇਤੋਵ ਅਤ੍ਥੋ ਪਮਾਣਂ, ਨ ਲਕ੍ਖਣਹਾਰਾਦਿਵਿਸਯੋਤਿ ਆਹ ‘‘ਬ੍ਰਾਹ੍ਮਣੋ ਪਨਾ’’ਤਿਆਦਿ. ‘‘ਇਮਸ੍ਸ ਵਾ ਪੂਤਿਕਾਯਸ੍ਸਾ’’ਤਿ ਪਾਠਾਵਸਾਨੇ ਪੇਯ੍ਯਾਲਂ ਕਤ੍ਵਾ ‘‘ਕੇਲਨਾ ਪਟਿਕੇਲਨਾ’’ਤਿ ਵੁਤ੍ਤਂ. ਅਯਞ੍ਹਿ ਖੁਦ੍ਦਕਵਤ੍ਥੁਵਿਭਙ੍ਗਪਾਲ਼ਿ (ਵਿਭ. ੮੫੪) ‘‘ਬਾਹਿਰਾਨਂ ਵਾ ਪਰਿਕ੍ਖਾਰਾਨਂ ਮਣ੍ਡਨਾ’’ਤਿਆਦਿ ਪੇਯ੍ਯਾਲਵਸੇਨ ਗਯ੍ਹਤਿ. ਤਤ੍ਥ ਇਮਸ੍ਸ ਵਾ ਪੂਤਿਕਾਯਸ੍ਸਾਤਿ ਇਮਸ੍ਸ ਵਾ ਮਨੁਸ੍ਸਸਰੀਰਸ੍ਸ. ਯਥਾ ਹਿ ਤਦਹੁਜਾਤੋਪਿ ਸਿਙ੍ਗਾਲੋ ‘‘ਜਰਸਿਙ੍ਗਾਲੋ’’ ਤ੍ਵੇਵ, ਊਰੁਪ੍ਪਮਾਣਾਪਿ ਚ ਗਲੋਚਿਲਤਾ ‘‘ਪੂਤਿਲਤਾ’’ ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ, ਏਵਂ ਸੁਵਣ੍ਣਵਣ੍ਣੋਪਿ ਮਨੁਸ੍ਸਸਰੀਰੋ ‘‘ਪੂਤਿਕਾਯੋ’’ ਤ੍ਵੇਵ, ਤਸ੍ਸ ਮਣ੍ਡਨਾਤਿ ਅਤ੍ਥੋ. ਕੇਲਨਾਤਿ ਕੀਲ਼ਨਾ. ‘‘ਕੇਲਾਯਨਾ’’ਤਿਪਿ ਪਠਨ੍ਤਿ. ਪਟਿਕੇਲਨਾਤਿ ਪਟਿਕੀਲ਼ਨਾ. ਚਪਲਸ੍ਸ ਭਾਵੋ ਚਾਪਲ੍ਯਂ, ਚਾਪਲ੍ਲਂ ਵਾ, ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਵਸ੍ਸਸਤਿਕੋਪਿ ਸਮਾਨੋ ਤਦਹੁਜਾਤਦਾਰਕੋ ਵਿਯ ਹੋਤਿ, ਤਸ੍ਸੇਦਮਧਿਵਚਨਨ੍ਤਿ ਵੇਦਿਤਬ੍ਬਂ.

ਅਪਾਪੇ ਪੁਰੇ ਕਰੋਤਿ, ਨ ਵਾ ਪਾਪਂ ਪੁਰੇ ਕਰੋਤੀਤਿ ਅਪਾਪਪੁਰੇਕ੍ਖਾਰੋਤਿ ਯੁਤ੍ਤਾਯੁਤ੍ਤਸਮਾਸੇਨ ਦੁਵਿਧਮਤ੍ਥਂ ਦਸ੍ਸੇਤੁਂ ‘‘ਅਪਾਪੇ ਨਵਲੋਕੁਤ੍ਤਰਧਮ੍ਮੇ’’ਤਿਆਦਿ ਵੁਤ੍ਤਂ. ਅਪਾਪੇਤਿ ਚ ਪਾਪਪਟਿਪਕ੍ਖੇ, ਪਾਪਵਿਰਹਿਤੇ ਵਾ. ਬ੍ਰਹ੍ਮਨਿ ਸੇਟ੍ਠੇ ਭਗਵਤਿ ਭਵਾ ਤਸ੍ਸ ਧਮ੍ਮਦੇਸਨਾਵਸੇਨ ਅਰਿਯਾਯ ਜਾਤਿਯਾ ਜਾਤਤ੍ਤਾ, ਬ੍ਰਹ੍ਮੁਨੋ ਵਾ ਭਗਵਤੋ ਅਪਚ੍ਚਂ ਗਰੁਕਰਣਾਦਿਨਾ, ਯਥਾਨੁਸਿਟ੍ਠਂ ਪਟਿਪਤ੍ਤਿਯਾ ਚ, ਬ੍ਰਹ੍ਮਂ ਵਾ ਸੇਟ੍ਠਂ ਅਰਿਯਮਗ੍ਗਂ ਜਾਨਾਤੀਤਿ ਬ੍ਰਹ੍ਮਞ੍ਞਾ, ਅਰਿਯਸਾਵਕਸਙ੍ਖਾਤਾ ਪਜਾ. ਤੇਨਾਹ ‘‘ਸਾਰਿਪੁਤ੍ਤਮੋਗ੍ਗਲ੍ਲਾਨਾ’’ਤਿਆਦਿ. ਬ੍ਰਾਹ੍ਮਣਪਜਾਯਾਤਿ ਬਹਿਤਪਾਪਪਜਾਯ. ‘‘ਅਪਾਪਪੁਰੇਕ੍ਖਾਰੋ’’ਤਿ ਏਤ੍ਥ ‘‘ਪੁਰੇਕ੍ਖਾਰੋ’’ਤਿ ਪਦਮਧਿਕਾਰੋਤਿ ਦਸ੍ਸੇਤਿ ‘‘ਏਤਿਸ੍ਸਾਯ ਚ ਪਜਾਯ ਪੁਰੇਕ੍ਖਾਰੋ’’ਤਿ ਇਮਿਨਾ. ਚ-ਸਦ੍ਦੋ ਸਮੁਚ੍ਚਯਤ੍ਥੋ ‘‘ਨ ਕੇਵਲਂ ਅਪਾਪਪੁਰੇਕ੍ਖਾਰੋ ਏਵ, ਅਥ ਖੋ ਬ੍ਰਹ੍ਮਞ੍ਞਾਯ ਚ ਪਜਾਯ ਸਮ੍ਬਨ੍ਧਭੂਤਾਯ ਪੁਰੇਕ੍ਖਾਰੋ’’ਤਿ. ‘‘ਅਯਞ੍ਹੀ’’ਤਿਆਦਿ ਅਧਿਪ੍ਪਾਯਮਤ੍ਤਦਸ੍ਸਨਂ. ‘‘ਅਪਾਪਪੁਰੇਕ੍ਖਾਰੋ’’ਤਿ ਇਦਂ ‘‘ਬ੍ਰਹ੍ਮਞ੍ਞਾਯ ਪਜਾਯਾ’’ਤਿ ਇਮਿਨਾਵ ਸਮ੍ਬਨ੍ਧਿਤਬ੍ਬਂ, ਨ ਚ ਪਚ੍ਚੇਕਮਤ੍ਥਦੀਪਕਂ, ਪਕਤਿਬ੍ਰਾਹ੍ਮਣਜਾਤਿਵਸੇਨਪਿ ਚੇਤਸ੍ਸ ਅਤ੍ਥੋ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਅਯੁਤ੍ਤਸਮਾਸੋ ਚਾਯਂ. ਪਾਪਨ੍ਤਿ ਪਾਪਕਮ੍ਮਂ, ਅਹਿਤਂ ਦੁਕ੍ਖਨ੍ਤਿ ਅਤ੍ਥੋ. ਤਸ੍ਸ ਸਮ੍ਬਨ੍ਧਿਪੇਕ੍ਖਤ੍ਤਾ ਕਸ੍ਸਾ ਅਪਾਪਪੁਰੇਕ੍ਖਾਰੋਤਿ ਪੁਚ੍ਛਾਯ ਏਵਮਾਹਾਤਿ ਦਸ੍ਸੇਤੁਂ ‘‘ਕਸ੍ਸਾ’’ਤਿਆਦਿ ਵੁਤ੍ਤਂ. ‘‘ਅਤ੍ਤਨਾ’’ਤਿਆਦਿ ਤਦਤ੍ਥਵਿਵਰਣਂ. ਬ੍ਰਾਹ੍ਮਣਪਜਾਯਾਤਿ ਬ੍ਰਾਹ੍ਮਣਜਾਤਿਪਜਾਯ.

ਰਞ੍ਜਨ੍ਤਿ ਅਟ੍ਟਂ ਭਜਨ੍ਤਿ ਰਾਜਾਨੋ ਏਤੇਨਾਤਿ ਰਟ੍ਠਂ, ਏਕਸ੍ਸ ਰਞ੍ਞੋ ਰਜ੍ਜਭੂਤਕਾਸਿਕੋਸਲਾਦਿਮਹਾਜਨਪਦਾ. ਜਨਾ ਪਜ੍ਜਨ੍ਤਿ ਸੁਖਜੀਵਿਕਂ ਪਾਪੁਣਨ੍ਤਿ ਏਤ੍ਥਾਤਿ ਜਨਪਦੋ, ਏਕਸ੍ਸ ਰਞ੍ਞੋ ਰਜ੍ਜੇ ਏਕੇਕਕੋਟ੍ਠਾਸਭੂਤਾ ਉਤ੍ਤਰਪਥਦਕ੍ਖਿਣਪਥਾਦਿਖੁਦ੍ਦਕਜਨਪਦਾ. ਤਤ੍ਥਾਤਿ ਤਥਾ ਆਗਤੇਸੁ. ਪੁਚ੍ਛਾਯਾਤਿ ਅਤ੍ਤਨਾ ਅਭਿਸਙ੍ਖਤਾਯ ਪੁਚ੍ਛਾਯ. ਵਿਸ੍ਸਜ੍ਜਨਾਸਮ੍ਪਟਿਚ੍ਛਨੇਤਿ ਵਿਸ੍ਸਜ੍ਜਨਾਯ ਅਤ੍ਤਨੋ ਞਾਣੇਨ ਸਮ੍ਪਟਿਗ੍ਗਹਣੇ. ਕੇਸਞ੍ਚਿ ਉਪਨਿਸ੍ਸਯਸਮ੍ਪਤ੍ਤਿਂ, ਞਾਣਪਰਿਪਾਕਂ, ਚਿਤ੍ਤਾਚਾਰਞ੍ਚ ਞਤ੍ਵਾ ਭਗਵਾਵ ਪੁਚ੍ਛਾਯ ਉਸ੍ਸਾਹਂ ਜਨੇਤ੍ਵਾ ਵਿਸ੍ਸਜ੍ਜੇਤੀਤਿ ਅਧਿਪ੍ਪਾਯੋ.

‘‘ਤਤ੍ਥ ਕਤਮਂ ਸਾਖਲ੍ਯ’’ਨ੍ਤਿਆਦਿ ਨਿਕ੍ਖੇਪਕਣ੍ਡਪਾਲ਼ਿ (ਧ. ਸ. ੧੩੫੦). ਅਦ੍ਧਾਨਦਰਥਨ੍ਤਿ ਦੀਘਮਗ੍ਗਾਗਮਨਪਰਿਸ੍ਸਮਂ. ਅਸ੍ਸਾਤਿ ਭਗਵਤੋ, ਮੁਖਪਦੁਮਨ੍ਤਿ ਸਮ੍ਬਨ੍ਧੋ. ਬਾਲਾਤਪਸਮ੍ਫਸ੍ਸਨੇਨੇਵਾਤਿ ਅਭਿਨਵੁਗ੍ਗਤਸੂਰਿਯਰਂਸਿਸਮ੍ਫਸ੍ਸਨੇਨ ਇਵ. ਤਥਾ ਹਿ ਸੂਰਿਯੋ ‘‘ਪਦ੍ਮਬਨ੍ਧੂ’’ਤਿ ਲੋਕੇ ਪਾਕਟੋ, ਚਨ੍ਦੋ ਪਨ ‘‘ਕੁਮੁਦਬਨ੍ਧੂ’’ਤਿ. ਪੁਣ੍ਣਚਨ੍ਦਸ੍ਸ ਸਿਰਿਯਾ ਸਮਾਨਾ ਸਿਰੀ ਏਤਸ੍ਸਾਤਿ ਪੁਣ੍ਣਚਨ੍ਦਸਸ੍ਸਿਰਿਕਂ. ਕਥਂ ਨਿਕ੍ਕੁਜ੍ਜਿਤਸਦਿਸਤਾਤਿ ਆਹ ‘‘ਸਮ੍ਪਤ੍ਤਾਯਾ’’ਤਿਆਦਿ. ਏਤ੍ਥ ਪਨ ‘‘ਏਹਿ ਸ੍ਵਾਗਤਵਾਦੀ’’ਤਿ ਇਮਿਨਾ ਸੁਖਸਮ੍ਭਾਸਪੁਬ੍ਬਕਂ ਪਿਯਵਾਦਿਤਂ ਦਸ੍ਸੇਤਿ, ‘‘ਸਖਿਲੋ’’ਤਿ ਇਮਿਨਾ ਸਣ੍ਹਵਾਚਤਂ, ‘‘ਸਮ੍ਮੋਦਕੋ’’ਤਿ ਇਮਿਨਾ ਪਟਿਸਨ੍ਧਾਰਕੁਸਲਤਂ, ‘‘ਅਬ੍ਭਾਕੁਟਿਕੋ’’ਤਿ ਇਮਿਨਾ ਸਬ੍ਬਤ੍ਥੇਵ ਵਿਪ੍ਪਸਨ੍ਨਮੁਖਤਂ, ‘‘ਉਤ੍ਤਾਨਮੁਖੋ’’ਤਿ ਇਮਿਨਾ ਸੁਖਸਲ੍ਲਾਪਤਂ, ‘‘ਪੁਬ੍ਬਭਾਸੀ’’ਤਿ ਇਮਿਨਾ ਧਮ੍ਮਾਨੁਗ੍ਗਹਸ੍ਸ ਓਕਾਸਕਰਣੇਨ ਹਿਤਜ੍ਝਾਸਯਤਂ ਦਸ੍ਸੇਤੀਤਿ ਵੇਦਿਤਬ੍ਬਂ.

ਯਤ੍ਥ ਕਿਰਾਤਿ ਏਤ੍ਥ ਕਿਰ-ਸਦ੍ਦੋ ਅਰੁਚਿਸੂਚਨੇ –

‘‘ਖਣਵਤ੍ਥੁਪਰਿਤ੍ਤਤ੍ਤਾ, ਆਪਾਥਂ ਨ ਵਜਨ੍ਤਿ ਯੇ;

ਤੇ ਧਮ੍ਮਾਰਮ੍ਮਣਾ ਨਾਮ, ਯੇ’ਸਂ ਰੂਪਾਦਯੋ ਕਿਰਾ’’ਤਿ. –

ਆਦੀਸੁ (ਅਭਿਧਮ੍ਮਾਵਤਾਰ-ਅਟ੍ਠਕਥਾਯਂ ਆਰਮ੍ਮਣਵਿਭਾਗੇ ਛਟ੍ਠਅਨੁਚ੍ਛੇਦੇ – ੭੭) ਵਿਯ, ਤੇਨ ਭਗਵਤਾ ਅਧਿਵੁਤ੍ਥਪਦੇਸੇ ਨ ਦੇਵਤਾਨੁਭਾਵੇਨ ਮਨੁਸ੍ਸਾਨਂ ਅਨੁਪਦ੍ਦਵਤਾ, ਅਥ ਖੋ ਬੁਦ੍ਧਾਨੁਭਾਵੇਨਾਤਿ ਦਸ੍ਸੇਤਿ. ਬੁਦ੍ਧਾਨੁਭਾਵੇਨੇਵ ਹਿ ਤਾ ਆਰਕ੍ਖਂ ਗਣ੍ਹਨ੍ਤਿ. ਪਂਸੁਪਿਸਾਚਕਾਦਯੋਤਿ ਪਂਸੁਨਿਸ੍ਸਿਤਪਿਸਾਚਕਾਦਯੋ. ਆਦਿਸਦ੍ਦੇਨ ਭੂਤਰਕ੍ਖਸਾਦੀਨਂ ਗਹਣਂ. ਇਦਾਨਿ ਬੁਦ੍ਧਾਨੁਭਾਵਮੇਵ ਪਾਕਟਂ ਕਤ੍ਵਾ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ.

ਅਨੁਸਾਸਿਤਬ੍ਬੋ ਸਙ੍ਘੋ ਨਾਮ ਸਬ੍ਬੋਪਿ ਵੇਨੇਯ੍ਯਜਨਸਮੂਹੋ. ਸਯਂ ਉਪ੍ਪਾਦਿਤੋ ਸਙ੍ਘੋ ਨਾਮ ਨਿਬ੍ਬਤ੍ਤਿਤਅਰਿਯਪੁਗ੍ਗਲਸਮੂਹੋ. ‘‘ਤਾਦਿਸੋ’’ਤਿ ਇਮਿਨਾ ‘‘ਸਯਂ ਵਾ ਉਪ੍ਪਾਦਿਤੋ’’ਤਿ ਵੁਤ੍ਤਵਿਕਪ੍ਪੋ ਏਵ ਪਚ੍ਚਾਮਟ੍ਠੋ ਅਨਨ੍ਤਰਸ੍ਸ ਵਿਧਿ ਪਟਿਸੇਧੋਵਾਤਿ ਕਤ੍ਵਾ, ਤਸ੍ਮਾ ‘‘ਪੁਰਿਮਪਦਸ੍ਸੇਵ ਵਾ’’ਤਿ ਵਿਕਪ੍ਪਨ੍ਤਰਗਹਣਨ੍ਤਿ ਆਚਰਿਯੇਨ (ਦੀ. ਨਿ. ਟੀ. ੧.੩੦੪) ਵੁਤ੍ਤਂ. ਤਤ੍ਰਾਯਮਧਿਪ੍ਪਾਯੋ – ਕਾਮਂ ‘‘ਗਣੀ’’ਤਿ ਇਦਂ ‘‘ਸਙ੍ਘੀ’’ਤਿ ਪਦਸ੍ਸੇਵ ਵੇਵਚਨਂ, ਅਤ੍ਥਮਤ੍ਤਂ ਪਨ ਦਸ੍ਸੇਤੁਂ ਯਥਾਵੁਤ੍ਤਵਿਕਪ੍ਪਦ੍ਵਯੇ ਦੁਤਿਯਵਿਕਪ੍ਪਮੇਵ ਪਚ੍ਚਾਮਸਿਤ੍ਵਾ ‘‘ਤਾਦਿਸੋਵਸ੍ਸ ਗਣੋ ਅਤ੍ਥੀ’’ਤਿ ਵੁਤ੍ਤਤ੍ਤਾ ਅਵਸਿਟ੍ਠਸ੍ਸਪਿ ਪਠਮਵਿਕਪ੍ਪਸ੍ਸ ਸਙ੍ਗਹਣਤ੍ਥਂ ‘‘ਪੁਰਿਮਪਦਸ੍ਸੇਵ ਵਾ ਵੇਵਚਨਮੇਤ’’ਨ੍ਤਿ ਵੁਤ੍ਤਨ੍ਤਿ. ਏਵਮ੍ਪਿ ਵਦਨ੍ਤਿ – ਧਮ੍ਮਸੇਨਾਪਤਿਤ੍ਥੇਰਾਦੀਨਂ ਪਚ੍ਚੇਕਗਣੀਨਂ ਗਣਂ, ਸੁਤ੍ਤਨ੍ਤਿਕਾਦਿਗਣਂ ਵਾ ਸਨ੍ਧਾਯ ‘‘ਤਾਦਿਸੋ’’ਤਿਆਦਿ ਵੁਤ੍ਤਂ. ਤਤ੍ਥਾਪਿ ਹਿ ਸਬ੍ਬੋਵ ਭਿਕ੍ਖੁਗਣੋ ਅਨੁਸਾਸਿਤਬ੍ਬੋ ਨਾਮ, ਨਿਬ੍ਬਤ੍ਤਿਤਅਰਿਯਗਣੋ ਪਨ ਸਯਂ ਉਪ੍ਪਾਦਿਤੋ ਨਾਮ, ਤਸ੍ਮਾ ‘‘ਤਾਦਿਸੋ’’ਤਿ ਇਮਿਨਾ ਵਿਕਪ੍ਪਦ੍ਵਯਸ੍ਸਾਪਿ ਪਚ੍ਚਾਮਸਨਂ ਉਪਪਨ੍ਨਂ ਹੋਤਿ. ਏਵਂ ਪਦਦ੍ਵਯਸ੍ਸ ਵਿਸੇਸਤ੍ਥਤਂ ਦਸ੍ਸੇਤ੍ਵਾ ਸਬ੍ਬਥਾ ਸਮਾਨਤ੍ਥਤਂ ਦਸ੍ਸੇਤੁਂ ‘‘ਪੁਰਿਮਪਦਸ੍ਸੇਵਾ’’ਤਿਆਦਿ ਵੁਤ੍ਤਨ੍ਤਿ. ਪੂਰਣਮਕ੍ਖਲਿਆਦੀਨਂ ਬਹੂਨਂ ਤਿਤ੍ਥਕਰਾਨਂ, ਨਿਦ੍ਧਾਰਣੇ ਚੇਤਂ ਸਾਮਿਵਚਨਂ. ਅਚੇਲਕਾਦਿਮਤ੍ਤਕੇਨਪਿ ਕਾਰਣੇਨਾਤਿ ਨਿਚ੍ਚੋਲ਼ਤਾਦਿਮਤ੍ਤਕੇਨਪਿ ਅਪ੍ਪਿਚ੍ਛਸਨ੍ਤੁਟ੍ਠਤਾਦਿਸਮਾਰੋਪਨਲਕ੍ਖਣੇਨ ਕਾਰਣੇਨ.

ਨਵਕਾਤਿ ਅਭਿਨਵਾ. ਪਾਹੁਨਕਾਤਿ ਪਹੇਣਕਂ ਪਟਿਗ੍ਗਣ੍ਹਿਤੁਮਨੁਚ੍ਛਵਿਕਾ, ਏਤੇਨ ਦੁਵਿਧੇਸੁ ਆਗਨ੍ਤੁਕੇਸੁ ਪੁਰੇਤਰਮਾਗਤਵਸੇਨ ਇਧ ਅਤਿਥਿਨੋ, ਨ ਭੋਜਨਵੇਲਾਯਮਾਗਤਵਸੇਨ ਅਬ੍ਭਾਗਤਾਤਿ ਦਸ੍ਸੇਤਿ. ਪਰਿਯਾਪੁਣਾਮੀਤਿ ਪਰਿਚ੍ਛਿਨ੍ਦਿਤੁਂ ਜਾਨਾਮਿ, ਧਾਤ੍ਵਤ੍ਥਮਤ੍ਤਂ ਪਨ ਦਸ੍ਸੇਤੁਂ ‘‘ਜਾਨਾਮੀ’’ਤਿ ਵੁਤ੍ਤਂ.

ਕਪ੍ਪਮ੍ਪੀਤਿ ਆਯੁਕਪ੍ਪਮ੍ਪਿ, ਭਣੇਯ੍ਯ ਚੇਤਿ ਸਮ੍ਬਨ੍ਧੋ. ਚਿਰਂ ਚਿਰਕਾਲੇ ਕਪ੍ਪੋ ਖੀਯੇਥ, ਦੀਘਮਨ੍ਤਰੇ ਦੀਘਕਾਲਨ੍ਤਰੇਪਿ ਤਥਾਗਤਸ੍ਸ ਵਣ੍ਣੋ ਨ ਖੀਯੇਥਾਤਿ ਯੋਜਨਾ. ‘‘ਚਿਰ’’ਨ੍ਤਿ ਚੇਤ੍ਥ ਵਤ੍ਤਬ੍ਬੇਪਿ ਛਨ੍ਦਹਾਨਿਭਯਾ ਰਸ੍ਸਤ੍ਥਂ ਨਿਗ੍ਗਹਿਤਲੋਪੋ, ਅਤਿਦੀਘਕਾਲਂ ਵਾ ਸਨ੍ਧਾਯ ‘‘ਚਿਰਦੀਘਮਨ੍ਤਰੇ’’ਤਿ ਵੁਤ੍ਤਂ, ਉਭਯਤ੍ਥ ਸਮ੍ਬਨ੍ਧਿਤਬ੍ਬਮੇਤਂ, ਕਿਰਿਯਾਰਹਾਦਿਯੋਗੇ ਵਿਯ ਚ ਅਨ੍ਤਰਯੋਗੇ ਅਧਿਕਕ੍ਖਰਪਾਦੋ ਅਨੁਪਵਜ੍ਜੋ, ਅਯਞ੍ਚ ਗਾਥਾ ਅਭੂਤਪਰਿਕਪ੍ਪਨਾਵਸੇਨ ਅਟ੍ਠਕਥਾਸੁ (ਦੀ. ਨਿ. ਅਟ੍ਠ. ੧.੩੦੪; ੩.੧੪੧; ਮ. ਨਿ. ਅਟ੍ਠ. ੨.੪੨੫; ਉਦਾ. ਅਟ੍ਠ. ੫੩; ਬੁ. ਵਂ. ਅਟ੍ਠ. ੪.੪; ਚਰਿਯਾ. ਅਟ੍ਠ. ਨਿਦਾਨਕਥਾ, ਪਕਿਣ੍ਣਕਕਥਾ; ਅਪ. ਅਟ੍ਠ. ੨.੭.੨੦) ਵੁਤ੍ਤਾ ਤਥਾ ਭਾਸਮਾਨਸ੍ਸ ਅਭਾਵਤੋ.

੩੦੫. ਨਨ੍ਤਿ ਆਚਰਿਯਂ. ਅਲਂ-ਸਦ੍ਦੋ ਇਧ ਅਰਹਤ੍ਥੋ ‘‘ਅਲਮੇਵ ਨਿਬ੍ਬਿਨ੍ਦਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੨੭੨; ਸਂ. ਨਿ. ੨.੧੩੪, ੧੪੩) ਵਿਯਾਤਿ ਆਹ ‘‘ਯੁਤ੍ਤਮੇਵਾ’’ਤਿ. ਪੁਟੇਨ ਨੇਤ੍ਵਾ ਅਸਿਤਬ੍ਬਤੋ ਪਰਿਭੁਞ੍ਜਿਤਬ੍ਬਤੋ ਪੁਟੋਸਂ ਵੁਚ੍ਚਤਿ ਪਾਥੇਯ੍ਯਂ. ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ ਦਸ੍ਸੇਤਿ ‘‘ਤਂ ਗਹੇਤ੍ਵਾ’’ਤਿ ਇਮਿਨਾ. ਪਾਲ਼ਿਯਂ ਪੁਟਂਸੇਨਪਿ ਕੁਲਪੁਤ੍ਤੇਨਾਤਿ ਸਮ੍ਬਨ੍ਧਂ ਦਸ੍ਸੇਤੁਂ ‘‘ਤੇਨ ਪੁਟਂਸੇਨਾ’’ਤਿ ਵੁਤ੍ਤਂ. ‘‘ਅਂਸੇਨਾ’’ਤਿਆਦਿ ਅਧਿਪ੍ਪਾਯਮਤ੍ਤਦਸ੍ਸਨਂ, ਵਹਨ੍ਤੇਨ ਕੁਲਪੁਤ੍ਤੇਨ ਉਪਸਙ੍ਕਮਿਤੁਂ ਅਲਮੇਵਾਤਿ ਅਤ੍ਥੋ.

ਸੋਣਦਣ੍ਡਪਰਿਵਿਤਕ੍ਕਵਣ੍ਣਨਾ

੩੦੬-੭. ਨ ਇਧ ਤਿਰੋ-ਸਦ੍ਦੋ ‘‘ਤਿਰੋਕੁਡ੍ਡੇ ਵਾ ਤਿਰੋਪਾਕਾਰੇ ਵਾ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ’’ਤਿਆਦੀਸੁ (ਪਾਚਿ. ੮੨੫) ਵਿਯ ਬਹਿਅਤ੍ਥੋਤਿ ਆਹ ‘‘ਅਨ੍ਤੋਵਨਸਣ੍ਡੇ ਗਤਸ੍ਸਾ’’ਤਿ. ਤਤ੍ਥ ਵਿਹਾਰੋਪਿ ਵਨਸਣ੍ਡਪਰਿਯਾਪਨ੍ਨੋਤਿ ਦਸ੍ਸੇਤਿ ‘‘ਵਿਹਾਰਬ੍ਭਨ੍ਤਰਂ ਪਵਿਟ੍ਠਸ੍ਸਾ’’ਤਿ ਇਮਿਨਾ. ਏਤੇ ਅਞ੍ਜਲਿਂ ਪਣਾਮੇਤ੍ਵਾ ਨਿਸਿਨ੍ਨਾ ਮਿਚ੍ਛਾਦਿਟ੍ਠਿਵਸੇਨ ਉਭਤੋਪਕ੍ਖਿਕਾ, ‘‘ਇਤਰੇ ਪਨ ਸਮ੍ਮਾਦਿਟ੍ਠਿਵਸੇਨ ਏਕਤੋਪਕ੍ਖਿਕਾ’’ਤਿ ਅਤ੍ਥਤੋ ਆਪਨ੍ਨੋ ਹੋਤਿ. ਦਲਿਦ੍ਦਤ੍ਤਾ, ਞਾਤਿਪਾਰਿਜੁਞ੍ਞਾਦਿਨਾ ਜਿਣ੍ਣਤ੍ਤਾ ਚ ਨਾਮਗੋਤ੍ਤਵਸੇਨ ਅਪਾਕਟਾ ਹੁਤ੍ਵਾ ਪਾਕਟਾ ਭਵਿਤੁਕਾਮਾ ਏਵਮਕਂਸੂਤਿ ਅਧਿਪ੍ਪਾਯੋ. ਕੇਰਾਟਿਕਾਤਿ ਸਠਾ. ਤਤ੍ਥਾਤਿ ਦ੍ਵੀਸੁ ਜਨੇਸੁ. ਤਤੋਤਿ ਵਿਸ੍ਸਾਸਤੋ, ਦਾਨਤੋ ਵਾ.

ਬ੍ਰਾਹ੍ਮਣਪਞ੍ਞਤ੍ਤਿਵਣ੍ਣਨਾ

੩੦੯. ਅਨੋਨਤਕਾਯਵਸੇਨ ਥਦ੍ਧਗਤ੍ਤੋ, ਨ ਮਾਨਵਸੇਨ. ਤੇਨ ਪਾਲ਼ਿਯਂ ਵਕ੍ਖਤਿ ‘‘ਅਬ੍ਭੁਨ੍ਨਾਮੇਤ੍ਵਾ’’ਤਿ. ਚੇਤੋਵਿਤਕ੍ਕਂ ਸਨ੍ਧਾਯ ਚਿਤ੍ਤਸੀਸੇਨ ‘‘ਚਿਤ੍ਤਂ ਅਞ੍ਞਾਸੀ’’ਤਿ ਵੁਤ੍ਤਂ. ਵਿਘਾਤਨ੍ਤਿ ਚਿਤ੍ਤਦੁਕ੍ਖਂ.

੩੧੧. ਸਕਸਮਯੇਤਿ ਬ੍ਰਾਹ੍ਮਣਲਦ੍ਧਿਯਂ. ਮੀਯਮਾਨੋਤਿ ਮਰਿਯਮਾਨੋ. ਦਿਟ੍ਠਿਸਞ੍ਜਾਨਨੇਨੇਵਾਤਿ ਅਤ੍ਤਨੋ ਲਦ੍ਧਿਸਞ੍ਜਾਨਨੇਨੇਵ. ਸੁਜਨ੍ਤਿ ਹੋਮਦਬ੍ਬਿਂ, ਨਿਬ੍ਬਚਨਂ ਵੁਤ੍ਤਮੇਵ. ਗਣ੍ਹਨ੍ਤੇਸੂਤਿ ਜੁਹਨਤ੍ਥਂ ਗਣ੍ਹਨਕੇਸੁ, ਇਰੁਵਿਜ੍ਜੇਸੂਤਿ ਅਤ੍ਥੋ. ਇਰੁਵੇਦਵਸੇਨ ਹੋਮਕਰਣਤੋ ਹਿ ਯਞ੍ਞਯਜਕਾ ‘‘ਇਰੁਵਿਜ੍ਜਾ’’ਤਿ ਵੁਚ੍ਚਨ੍ਤਿ. ਪਠਮੋ ਵਾਤਿ ਤਤ੍ਥ ਸਨ੍ਨਿਪਤਿਤੇਸੁ ਸੁਜਾਕਿਰਿਯਾਯਂ ਸਬ੍ਬਪਧਾਨੋ ਵਾ. ਦੁਤਿਯੋ ਵਾਤਿ ਤਦਨਨ੍ਤਰਿਕੋ ਵਾ. ‘‘ਸੁਜ’’ਨ੍ਤਿ ਇਦਂ ਕਰਣਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਸੁਜਾਯਾ’’ਤਿ. ਅਗ੍ਗਿਹੁਤ੍ਤਮੁਖਤਾਯ ਯਞ੍ਞਸ੍ਸ ਯਞ੍ਞੇ ਦਿਯ੍ਯਮਾਨਂ ਸੁਜਾਮੁਖੇਨ ਦਿਯ੍ਯਤਿ. ਵੁਤ੍ਤਞ੍ਚ ‘‘ਅਗ੍ਗਿਹੁਤ੍ਤਮੁਖਾ ਯਞ੍ਞਾ, ਸਾਵਿਤ੍ਤੀ ਛਨ੍ਦਸੋ ਮੁਖ’’ਨ੍ਤਿ (ਮ. ਨਿ. ੨.੪੦੦). ਤਸ੍ਮਾ ‘‘ਦਿਯ੍ਯਮਾਨ’’ਨ੍ਤਿ ਅਯਂ ਪਾਠਸੇਸੋ ਵਿਞ੍ਞਾਯਤੀਤਿ ਆਚਰਿਯੇਨ (ਦੀ. ਨਿ. ਟੀ. ੧.੩੧੧) ਵੁਤ੍ਤਂ. ਅਪਿਚ ਸੁਜਾਯ ਦਿਯ੍ਯਮਾਨਂ ਸੁਜਨ੍ਤਿ ਤਦ੍ਧਿਤਵਸੇਨ ਅਤ੍ਥਂ ਦਸ੍ਸੇਤੁਂ ਏਵਮਾਹ. ਪੋਰਾਣਾਤਿ ਅਟ੍ਠਕਥਾਚਰਿਯਾ. ਪੁਰਿਮਵਾਦੇ ਚੇਤ੍ਥ ਦਾਨਵਸੇਨ ਪਠਮੋ ਵਾ ਦੁਤਿਯੋ ਵਾ, ਪਚ੍ਛਿਮਵਾਦੇ ਆਦਾਨਵਸੇਨਾਤਿ ਅਯਮੇਤੇਸਂ ਵਿਸੇਸੋ. ਵਿਸੇਸਤੋਤਿ ਵਿਜ੍ਜਾਚਰਣਵਿਸੇਸਤੋ, ਨ ਬ੍ਰਾਹ੍ਮਣੇਹਿ ਇਚ੍ਛਿਤਵਿਜ੍ਜਾਚਰਣਮਤ੍ਤਤੋ. ਉਤ੍ਤਮਬ੍ਰਾਹ੍ਮਣਸ੍ਸਾਤਿ ਅਨੁਤ੍ਤਰਦਕ੍ਖਿਣੇਯ੍ਯਤਾਯ ਉਕ੍ਕਟ੍ਠਬ੍ਰਾਹ੍ਮਣਸ੍ਸ. ਯਥਾਧਿਪ੍ਪੇਤਸ੍ਸ ਹਿ ਵਿਜ੍ਜਾਚਰਣਵਿਸੇਸਦੀਪਕਸ੍ਸ ‘‘ਕਤਮਂ ਪਨ ਤਂ ਬ੍ਰਾਹ੍ਮਣਸੀਲਂ, ਕਤਮਾ ਸਾ ਪਞ੍ਞਾ’’ਤਿਆਦਿਵਚਨਸ੍ਸ ਓਕਾਸਕਰਣਤ੍ਥਮੇਵ ‘‘ਇਮੇਸਂ ਪਨ ਬ੍ਰਾਹ੍ਮਣ ਪਞ੍ਚਨ੍ਨਂ ਅਙ੍ਗਾਨ’’ਨ੍ਤਿਆਦਿਵਚਨਂ ਭਗਵਾ ਅਵੋਚ, ਤਸ੍ਮਾ ਪਧਾਨਵਚਨਾਨੁਰੂਪਮਨੁਸਨ੍ਧਿਂ ਦਸ੍ਸੇਤੁਂ ‘‘ਭਗਵਾ ਪਨਾ’’ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੩੧੩. ਅਪਵਦਤੀਤਿ ਵਣ੍ਣਾਦੀਨਿ ਅਪਨੇਤ੍ਵਾ ਵਦਤਿ, ਅਤ੍ਥਮਤ੍ਤਂ ਪਨ ਦਸ੍ਸੇਤੁਂ ‘‘ਪਟਿਕ੍ਖਿਪਤੀ’’ਤਿ ਵੁਤ੍ਤਂ. ਇਦਨ੍ਤਿ ‘‘ਮਾ ਭਵਂ ਸੋਣਦਣ੍ਡੋ ਏਵਂ ਅਵਚਾ’’ਤਿਆਦਿਵਚਨਂ. ਬ੍ਰਾਹ੍ਮਣਸਮਯਨ੍ਤਿ ਬ੍ਰਾਹ੍ਮਣਸਿਦ੍ਧਨ੍ਤਂ. ਮਾ ਭਿਨ੍ਦੀਤਿ ਮਾ ਵਿਨਾਸੇਸਿ.

੩੧੬. ਸਮੋਯੇਵ ਹੁਤ੍ਵਾ ਸਮੋਤਿ ਸਮਸਮੋ, ਸਬ੍ਬਥਾ ਸਮੋਤਿ ਅਤ੍ਥੋ. ਪਰਿਯਾਯਦ੍ਵਯਞ੍ਹਿ ਅਤਿਸਯਤ੍ਥਦੀਪਕਂ ਯਥਾ ‘‘ਦੁਕ੍ਖਦੁਕ੍ਖਂ, ਰੂਪਰੂਪ’’ਨ੍ਤਿ. ਏਕਦੇਸਮਤ੍ਤਤੋ ਪਨ ਅਙ੍ਗਕੇਨ ਮਾਣਵੇਨ ਤੇਸਂ ਸਮਭਾਵਤੋ ਤਂ ਨਿਵਤ੍ਤੇਨ੍ਤੋ ‘‘ਠਪੇਤ੍ਵਾ ਏਕਦੇਸਮਤ੍ਤ’’ਨ੍ਤਿਆਦਿਮਾਹ. ਕੁਲਕੋਟਿਪਰਿਦੀਪਨਨ੍ਤਿ ਕੁਲਸ੍ਸ ਆਦਿਪਰਿਦੀਪਨਂ. ਯਸ੍ਮਾ ਅਤ੍ਤਨੋ ਭਗਿਨਿਯਾ…ਪੇ… ਨ ਜਾਨਿਸ੍ਸਤਿ, ਤਸ੍ਮਾ ਨ ਤਸ੍ਸ ਮਾਤਾਪਿਤੁਮਤ੍ਤਂ ਸਨ੍ਧਾਯ ਵਦਤਿ, ਕੁਲਕੋਟਿਪਰਿਦੀਪਨਂ ਪਨ ਸਨ੍ਧਾਯ ਵਦਤੀਤਿ ਅਧਿਪ੍ਪਾਯੋ. ‘‘ਅਤ੍ਥਭਞ੍ਜਨਕ’’ਨ੍ਤਿ ਇਮਿਨਾ ਕਮ੍ਮਪਥਪਤ੍ਤਂ ਵਦਤਿ. ਗੁਣੇਤਿ ਯਥਾਵੁਤ੍ਤੇ ਪਞ੍ਚਸੀਲੇ. ਅਥਾਪਿ ਸਿਯਾਤਿ ਯਦਿਪਿ ਤੁਮ੍ਹਾਕਂ ਏਵਂ ਪਰਿਵਿਤਕ੍ਕੋ ਸਿਯਾ, ਭਿਨ੍ਨਸੀਲਸ੍ਸਾਪਿ ਪੁਨ ਪਕਤਿਸੀਲੇ ਠਿਤਸ੍ਸ ਬ੍ਰਾਹ੍ਮਣਭਾਵਂ ਵਣ੍ਣਾਦਯੋ ਸਾਧੇਨ੍ਤੀਤਿ ਏਵਂ ਸਿਯਾਤਿ ਅਤ੍ਥੋ. ‘‘ਸਾਧੇਤੀ’’ਤਿ ਪਾਠੇ ‘‘ਵਣ੍ਣੋ’’ਤਿ ਕਤ੍ਤਾ ਆਚਰਿਯੇਨ (ਦੀ. ਨਿ. ਟੀ. ੧.੩੧੬) ਅਜ੍ਝਾਹਟੋ, ਨਿਦਸ੍ਸਨਞ੍ਚੇਤਂ. ਮਨ੍ਤਜਾਤੀਸੁਪਿ ਹਿ ਏਸੇਵ ਨਯੋ. ਸੀਲਮੇਵਾਤਿ ਪੁਨ ਪਕਤਿਭੂਤਂ ਸੀਲਮੇਵ ਬ੍ਰਾਹ੍ਮਣਭਾਵਂ ਸਾਧੇਸ੍ਸਤਿ, ਕਸ੍ਮਾਤਿ ਚੇ ‘‘ਤਸ੍ਮਿਂ ਹਿ…ਪੇ… ਵਣ੍ਣਾਦਯੋ’’ਤਿ. ਤਤ੍ਥ ਸਮ੍ਮੋਹਮਤ੍ਤਂ ਵਣ੍ਣਾਦਯੋਤਿ ਵਣ੍ਣਮਨ੍ਤਜਾਤਿਯੋ ਬ੍ਰਾਹ੍ਮਣਭਾਵਸ੍ਸ ਅਙ੍ਗਨ੍ਤਿ ਸਮ੍ਮੋਹਮਤ੍ਤਮੇਤਂ, ਅਸਮਵੇਕ੍ਖਿਤ੍ਵਾ ਕਥਿਤਮਿਦਂ.

ਸੀਲਪਞ੍ਞਾਕਥਾਵਣ੍ਣਨਾ

੩੧੭. ਕਥਿਤੋ ਬ੍ਰਾਹ੍ਮਣੇਨ ਪਞ੍ਹੋਤਿ ‘‘ਸੀਲਵਾ ਚ ਹੋਤੀ’’ਤਿਆਦਿਨਾ ਦ੍ਵਿਨ੍ਨਮੇਵ ਅਙ੍ਗਾਨਂ ਵਸੇਨ ਯਥਾਪੁਚ੍ਛਿਤੋ ਪਞ੍ਹੋ ਯਾਥਾਵਤੋ ਵਿਸ੍ਸਜ੍ਜਿਤੋ. ਏਤ੍ਥਾਤਿ ਯਥਾਵਿਸ੍ਸਜ੍ਜਿਤੇ ਅਤ੍ਥੇ, ਅਙ੍ਗਦ੍ਵਯੇ ਵਾ. ਤਸ੍ਸਾਤਿ ਸੋਣਦਣ੍ਡਸ੍ਸ. ਯਦਿ ਏਕਮਙ੍ਗਂ ਠਪੇਯ੍ਯ, ਅਥ ਪਤਿਟ੍ਠਾਤੁਂ ਨ ਸਕ੍ਕੁਣੇਯ੍ਯ. ਯਦਿ ਪਨ ਨ ਠਪੇਯ੍ਯ, ਅਥ ਸਕ੍ਕੁਣੇਯ੍ਯ, ਕਿਂ ਪਨੇਸ ਤਥਾ ਸਕ੍ਖਿਸ੍ਸਤਿ ਨੁ ਖੋ, ਨੋਤਿ ਵੀਮਂਸਨਤ੍ਥਮੇਵ ਏਵਮਾਹ, ਨ ਤੁ ਏਕਸ੍ਸ ਅਙ੍ਗਸ੍ਸ ਠਪਨੀਯਤ੍ਤਾਤਿ ਵੁਤ੍ਤਂ ਹੋਤਿ. ਤਥਾ ਚਾਹ ‘‘ਏਵਮੇਤਂ ਬ੍ਰਾਹ੍ਮਣਾ’’ਤਿਆਦਿ. ਧੋਵਿਤਤ੍ਤਾਵ ਪਰਿਸੁਜ੍ਝਨਨ੍ਤਿ ਆਹ ‘‘ਸੀਲਪਰਿਸੁਦ੍ਧਾ’’ਤਿ, ਸੀਲਸਮ੍ਪਤ੍ਤਿਯਾ ਸਬ੍ਬਸੋ ਸੁਦ੍ਧਾ ਅਨੁਪਕ੍ਕਿਲਿਟ੍ਠਾਤਿ ਅਤ੍ਥੋ. ਕੁਤੋ ਦੁਸ੍ਸੀਲੇ ਪਞ੍ਞਾ ਅਸਮਾਹਿਤਤ੍ਤਾ ਤਸ੍ਸ. ਕੁਤੋ ਵਾ ਪਞ੍ਞਾਰਹਿਤੇ ਜਲ਼ੇ ਏਲ਼ਮੂਗੇ ਸੀਲਂ ਸੀਲਵਿਭਾਗਸ੍ਸ, ਸੀਲਪਰਿਸੋਧਨੂਪਾਯਸ੍ਸ ਚ ਅਜਾਨਨਤੋ. ਏਲ਼ਾ ਮੁਖੇ ਗਲ਼ਤਿ ਯਸ੍ਸਾਤਿ ਏਲ਼ਮੂਗੋ ਖ-ਕਾਰਸ੍ਸ ਗ-ਕਾਰਂ ਕਤ੍ਵਾ, ਏਲਮੁਖੋ, ਏਲਮੂਕੋ ਵਾ. ਇਤਿ ਬਹੁਧਾ ਪਾਠੋਤਿ ਭਯਭੇਰਵਸੁਤ੍ਤਟ੍ਠਕਥਾਯਂ (ਮ. ਨਿ. ਅਟ੍ਠ. ੧.੪੮) ਵੁਤ੍ਤੋ. ਪਕਟ੍ਠਂ ਉਕ੍ਕਟ੍ਠਂ ਞਾਣਂ ਪਞ੍ਞਾਣਨ੍ਤਿ ਕਤ੍ਵਾ ਪਾਕਤਿਕਂ ਞਾਣਂ ਨਿਵਤ੍ਤੇਤੁਂ ‘‘ਪਞ੍ਞਾਣ’’ਨ੍ਤਿ ਵੁਤ੍ਤਂ. ਵਿਪਸ੍ਸਨਾਦਿਞਾਣਞ੍ਹਿ ਇਧਾਧਿਪ੍ਪੇਤਂ, ਤਦੇਤਂ ਪਕਾਰੇਹਿ ਜਾਨਨਤੋ ਪਞ੍ਞਾਵਾਤਿ ਆਹ ‘‘ਪਞ੍ਞਾਯੇਵਾ’’ਤਿ.

ਚਤੁਪਾਰਿਸੁਦ੍ਧਿਸੀਲੇਨ ਧੋਤਾਤਿ ਸਮਾਧਿਪਦਟ੍ਠਾਨੇਨ ਚਤੁਪਾਰਿਸੁਦ੍ਧਿਸੀਲੇਨ ਸਕਲਸਂਕਿਲੇਸਮਲਵਿਸੁਦ੍ਧਿਯਾ ਧੋਵਿਤਾ ਵਿਸੁਦ੍ਧਾ. ਤੇਨਾਹ ‘‘ਕਥਂ ਪਨਾ’’ਤਿਆਦਿ. ਤਤ੍ਥ ਧੋਵਤੀਤਿ ਸੁਜ੍ਝਤਿ. ਸਟ੍ਠਿਅਸੀਤਿਵਸ੍ਸਾਨੀਤਿ ਸਟ੍ਠਿਵਸ੍ਸਾਨਿ ਵਾ ਅਸੀਤਿਵਸ੍ਸਾਨਿ ਵਾ. ਮਰਣਕਾਲੇਪਿ, ਪਗੇਵ ਅਞ੍ਞਸ੍ਮਿਂ ਕਾਲੇ. ਮਹਾਸਟ੍ਠਿਵਸ੍ਸਤ੍ਥੇਰੋ ਵਿਯਾਤਿ ਸਟ੍ਠਿਵਸ੍ਸਮਹਾਥੇਰੋ ਵਿਯ. ਵੇਦਨਾਪਰਿਗ੍ਗਹਮਤ੍ਤਮ੍ਪੀਤਿ ਏਤ੍ਥ ਵੇਦਨਾਪਰਿਗ੍ਗਹੋ ਨਾਮ ਯਥਾਉਪ੍ਪਨ੍ਨਂ ਵੇਦਨਂ ਸਭਾਵਸਰਸਤੋ ਉਪਧਾਰੇਤ੍ਵਾ ਪੁਨ ਪਦਟ੍ਠਾਨਤੋ ‘‘ਅਯਂ ਵੇਦਨਾ ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ, ਸੋ ਚ ਫਸ੍ਸੋ ਅਨਿਚ੍ਚੋ ਦੁਕ੍ਖੋ ਵਿਪਰਿਣਾਮਧਮ੍ਮੋ’’ਤਿ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਪਵਤ੍ਤਿਤਵਿਪਸ੍ਸਨਾ. ਏਵਂ ਪਸ੍ਸਨ੍ਤੇਨ ਹਿ ਸੁਖੇਨ ਸਕ੍ਕਾ ਸਾ ਵੇਦਨਾ ਅਧਿਵਾਸੇਤੁਂ ‘‘ਵੇਦਨਾ ਏਵ ਵੇਦਯਤੀ’’ਤਿ. ਵੇਦਨਂ ਵਿਕ੍ਖਮ੍ਭੇਤ੍ਵਾਤਿ ਯਥਾਉਪ੍ਪਨ੍ਨਂ ਦੁਕ੍ਖਵੇਦਨਂ ਅਨੁਵਤ੍ਤਿਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਵੀਥਿਪਟਿਪਨ੍ਨਾਯ ਵਿਪਸ੍ਸਨਾਯ ਤਂ ਵਿਨੋਦੇਤ੍ਵਾ. ਸਂਸੁਮਾਰਪਤਿਤੇਨਾਤਿ ਕੁਮ੍ਭੀਲੇਨ ਵਿਯ ਭੂਮਿਯਂ ਉਰੇਨ ਨਿਪਜ੍ਜਮਾਨੇਨ. ‘‘ਨਾਹ’’ਨ੍ਤਿਆਦਿਂ ਤਥਾ ਸੀਲਰਕ੍ਖਣਮੇਵ ਦੁਕ੍ਕਰਨ੍ਤਿ ਕਤ੍ਵਾ ਵਦਤਿ. ਸੀਲੇ ਪਤਿਟ੍ਠਿਤਸ੍ਸ ਹਿ ਅਰਹਤ੍ਤਂ ਹਤ੍ਥਗਤਂਯੇਵ. ਯਥਾਹ ‘‘ਸੀਲੇ ਪਤਿਟ੍ਠਾਯ…ਪੇ… ਵਿਜਟਯੇ ਜਟ’’ਨ੍ਤਿ (ਸਂ. ਨਿ. ੧.੨੩, ੧੯੨; ਪੇਟਕੋ. ੨੨; ਮਿ. ਪ. ੨.੯) ਚਤੂਸੁ ਪੁਗ੍ਗਲੇਸੁ ਉਗ੍ਘਾਟਿਤਞ੍ਞੁਨੋ ਏਵਾਯਂ ਵਿਸਯੋਤਿ ਆਹ ‘‘ਉਗ੍ਘਾਟਿਤਞ੍ਞੁਤਾਯਾ’’ਤਿ. ਪਞ੍ਞਾਯ ਸੀਲਂ ਧੋਵਿਤ੍ਵਾਤਿ ਸੀਲਂ ਆਦਿਮਜ੍ਝਪਰਿਯੋਸਾਨੇਸੁ ਅਖਣ੍ਡਾਦਿਭਾਵਾਪਾਦਨੇਨ ਪਞ੍ਞਾਯ ਸੁਵਿਸੋਧਿਤਂ ਕਤ੍ਵਾ. ਸਨ੍ਤਤਿਮਹਾਮਤ੍ਤਵਤ੍ਥੁ ਧਮ੍ਮਪਦੇ (ਧ. ਪ. ਅਟ੍ਠ. ੨.ਸਨ੍ਤਿਮਹਾਮਤ੍ਤਵਤ੍ਥੁ).

੩੧੮. ‘‘ਕਸ੍ਮਾ ਆਹਾ’’ਤਿ ਉਪਰਿਦੇਸਨਾਯ ਕਾਰਣਂ ਪੁਚ੍ਛਤਿ. ਲਜ੍ਜਾ ਨਾਮ ‘‘ਸੀਲਸ੍ਸ ਚ ਜਾਤਿਯਾ ਚ ਗੁਣਦੋਸਪ੍ਪਕਾਸਨੇਨ ਸਮਣੇਨ ਗੋਤਮੇਨ ਪੁਚ੍ਛਿਤਪਞ੍ਹਂ ਵਿਸ੍ਸਜ੍ਜੇਸੀ’’ਤਿ ਪਰਿਸਾਯ ਪਞ੍ਞਾਤਤਾ, ਸਾ ਤਥਾ ਵਿਸ੍ਸਜ੍ਜਿਤੁਮਸਮਤ੍ਥਤਾਯ ਭਿਜ੍ਜਿਸ੍ਸਤੀਤਿ ਅਤ੍ਥੋ, ਪਠਮਂ ਅਲਜ੍ਜਮਾਨੋਪਿ ਇਦਾਨਿ ਲਜ੍ਜਿਸ੍ਸਾਮੀਤਿ ਵੁਤ੍ਤਂ ਹੋਤਿ. ਪਰਮਨ੍ਤਿ ਪਮਾਣਂ. ‘‘ਏਤ੍ਤਕਪਰਮਾ ਮਯ’’ਨ੍ਤਿ ਪਦਾਨਂ ਤੁਲ੍ਯਾਧਿਕਰਣਤਂ ਦਸ੍ਸੇਤੁਂ ‘‘ਤੇ ਮਯ’’ਨ੍ਤਿ ਵੁਤ੍ਤਂ. ਇਦਂ ਵੁਤ੍ਤਂ ਹੋਤਿ – ‘‘ਸੀਲਪਞ੍ਞਾਣ’’ਨ੍ਤਿ ਵਚਨਮੇਵ ਅਮ੍ਹਾਕਂ ਪਰਮਂ, ਤਦਤ੍ਥਭੂਤਾਨਿ ਪਞ੍ਚਸੀਲਾਨਿ, ਵੇਦਤ੍ਤਯਵਿਭਾਵਨਂ ਪਞ੍ਞਞ੍ਚ ਲਕ੍ਖਣਾਦਿਤੋ ਨਿਦ੍ਧਾਰੇਤ੍ਵਾ ਜਾਨਨਂ ਨਤ੍ਥਿ, ਕੇਵਲਂ ਤਤ੍ਥ ਵਚੀਪਰਮਾਵ ਮਯਨ੍ਤਿ. ਅਯਂ ਪਨੇਤ੍ਥ ਅਟ੍ਠਕਥਾਮੁਤ੍ਤਕਨਯੋ – ਏਤ੍ਤਕਪਰਮਾਤਿ ਏਤ੍ਤਕਉਕ੍ਕਂਸਕੋਟਿਕਾ, ਪਠਮਂ ਪਞ੍ਹਾਵਿਸ੍ਸਜ੍ਜਨਾਵ ਅਮ੍ਹਾਕਂ ਉਕ੍ਕਂਸਕੋਟੀਤਿ ਅਤ੍ਥੋ. ਤੇਨਾਹ ‘‘ਮਯਾ ਸਕਸਮਯਵਸੇਨ ਪਞ੍ਹੋ ਵਿਸ੍ਸਜ੍ਜਿਤੋ’’ਤਿ. ਪਰਨ੍ਤਿ ਅਤਿਰੇਕਂ. ਭਾਸਿਤਸ੍ਸਾਤਿ ਵਚਨਸ੍ਸ ਸਦ੍ਦਸ੍ਸ.

ਅਯਂ ਪਨ ਵਿਸੇਸੋਤਿ ਸੀਲਨਿਦ੍ਦੇਸੇ ਨਿਯ੍ਯਾਤਨਮਤ੍ਤਂ ਅਪੇਕ੍ਖਿਤ੍ਵਾ ਵੁਤ੍ਤਂ. ਤੇਨਾਹ ‘‘ਸੀਲਮਿਚ੍ਚੇਵ ਨਿਯ੍ਯਾਤਿਤ’’ਨ੍ਤਿ. ਸਾਮਞ੍ਞਫਲਸੁਤ੍ਤੇ (ਦੀ. ਨਿ. ੧.੧੫੦) ਹਿ ਸੀਲਂ ਨਿਯ੍ਯਾਤੇਤ੍ਵਾਪਿ ਪੁਨ ਸਾਮਞ੍ਞਫਲਮਿਚ੍ਚੇਵ ਨਿਯ੍ਯਾਤਿਤਂ. ਸਬ੍ਬੇਸਮ੍ਪਿ ਮਹਗ੍ਗਤਚਿਤ੍ਤਾਨਂ ਞਾਣਸਮ੍ਪਯੁਤ੍ਤਤ੍ਤਾ, ਝਾਨਾਨਞ੍ਚ ਤਂ ਸਮ੍ਪਯੋਗਤੋ ‘‘ਅਤ੍ਥਤੋ ਪਞ੍ਞਾਸਮ੍ਪਦਾ’’ਤਿ ਵੁਤ੍ਤਂ. ਪਞ੍ਞਾਨਿਦ੍ਦੇਸੇ ਹਿ ਝਾਨਪਞ੍ਞਂ ਅਧਿਟ੍ਠਾਨਂ ਕਤ੍ਵਾ ਪਠਮਂ ਵਿਪਸ੍ਸਨਾਪਞ੍ਞਾ ਨਿਯ੍ਯਾਤਿਤਾ. ਤੇਨਾਹ ‘‘ਵਿਪਸ੍ਸਨਾਪਞ੍ਞਾਯਾ’’ਤਿਆਦਿ.

ਸੋਣਦਣ੍ਡਉਪਾਸਕਤ੍ਤਪਟਿਵੇਦਨਾਕਥਾਵਣ੍ਣਨਾ

੩੨੧. ਦਹਰੋ ਯੁਵਾਤਿ ਏਤ੍ਥ ਦਹਰਵਚਨੇਨ ਪਠਮਯੋਬ੍ਬਨਭਾਵਂ ਦਸ੍ਸੇਤਿ. ਪਠਮਯੋਬ੍ਬਨਕਾਲਗਤੋ ਹਿ ‘‘ਦਹਰੋ’’ਤਿ ਵੁਚ੍ਚਤਿ. ਪੁਤ੍ਤਸ੍ਸ ਪੁਤ੍ਤੋ ਨਤ੍ਤਾ ਨਾਮ. ਨਪ੍ਪਹੋਤੀਤਿ ਨ ਸਮ੍ਪਜ੍ਜਤਿ, ਪੁਤ੍ਤਨਤ੍ਤਪ੍ਪਮਾਣੋਪਿ ਨ ਹੋਤੀਤਿ ਅਤ੍ਥੋ. ‘‘ਆਸਨਾ ਮੇ ਤਂ ਵੁਟ੍ਠਾਨ’’ਨ੍ਤਿ ਏਤਸ੍ਸ ਅਤ੍ਥਾਪਤ੍ਤਿਂ ਦਸ੍ਸੇਤੁਂ ‘‘ਮਮ ਅਗਾਰਵੇਨਾ’’ਤਿਆਦਿ ਵੁਤ੍ਤਂ. ਏਤਨ੍ਤਿ ਅਞ੍ਜਲਿਪਗ੍ਗਹਣਂ. ਅਯਞ੍ਹਿ ਯਥਾ ਤਥਾ ਅਤ੍ਤਨੋ ਮਹਾਜਨਸ੍ਸ ਸਮ੍ਭਾਵਨਂ ਉਪ੍ਪਾਦੇਤ੍ਵਾ ਕੋਹਞ੍ਞੇਨ ਪਰੇ ਵਿਮ੍ਹਾਪੇਤ੍ਵਾ ਲਾਭੁਪ੍ਪਾਦਨਂ ਨਿਜਿਗੀਸਨ੍ਤੋ ਵਿਚਰਤਿ, ਤਸ੍ਮਾਸ੍ਸ ਅਤਿਵਿਯ ਕੁਹਕਭਾਵਂ ਦਸ੍ਸੇਨ੍ਤੋ ‘‘ਇਮਿਨਾ ਕਿਰਾ’’ਤਿਆਦਿਂ ਵਦਤਿ. ਅਗਾਰਵਂ ਨਾਮ ਨਤ੍ਥੀਤਿ ਅਗਾਰਵਵਚਨਂ ਨਾਮ ਨਤ੍ਥਿ, ਨਾਯਂ ਭਗਵਤਿ ਅਗਾਰਵੇਨ ‘‘ਅਹਞ੍ਚੇਵ ਖੋ ਪਨਾ’’ਤਿਆਦਿਮਾਹ, ਅਥ ਖੋ ਅਤ੍ਤਨੋ ਲਾਭਪਰਿਹਾਨਿਭਯੇਨੇਵਾਤਿ ਵੁਤ੍ਤਂ ਹੋਤਿ.

੩੨੨. ਤਙ੍ਖਣਾਨੁਰੂਪਾਯਾਤਿ ਯਾਦਿਸੀ ਤਦਾ ਤਸ੍ਸ ਅਜ੍ਝਾਸਯਪ੍ਪਵਤ੍ਤਿ, ਤਦਨੁਰੂਪਾਯਾਤਿ ਮਜ੍ਝੇਪਦਲੋਪੇਨ ਅਤ੍ਥੋ. ਤਦਾ ਤਸ੍ਸ ਵਿਵਟ੍ਟਸਨ੍ਨਿਸ੍ਸਿਤਸ੍ਸ ਤਾਦਿਸਸ੍ਸ ਞਾਣਪਰਿਪਾਕਸ੍ਸ ਅਭਾਵਤੋ ਕੇਵਲਂ ਅਬ੍ਭੁਦਯਸਨ੍ਨਿਸ੍ਸਿਤੋ ਏਵ ਅਤ੍ਥੋ ਦਸ੍ਸਿਤੋਤਿ ਆਹ ‘‘ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਸਨ੍ਦਸ੍ਸੇਤ੍ਵਾ’’ਤਿ, ਪਚ੍ਚਕ੍ਖਤੋ ਵਿਭਾਵੇਤ੍ਵਾਤਿ ਅਤ੍ਥੋ. ਕੁਸਲੇ ਧਮ੍ਮੇਤਿ ਤੇਭੂਮਕੇ ਕੁਸਲਧਮ੍ਮੇ, ਅਯਮੇਤ੍ਥ ਨਿਪ੍ਪਰਿਯਾਯਤੋ ਅਤ੍ਥੋ. ਪਰਿਯਾਯਤੋ ਪਨ ‘‘ਚਤੁਭੂਮਕੇ’’ਤਿਪਿ ਵਤ੍ਤੁਂ ਵਟ੍ਟਤਿ ਲੋਕੁਤ੍ਤਰਕੁਸਲਸ੍ਸਪਿ ਆਯਤਿਂ ਲਬ੍ਭਮਾਨਤ੍ਤਾ. ਤਥਾ ਹਿ ਵਕ੍ਖਤਿ ‘‘ਆਯਤਿਂ ਨਿਬ੍ਬਾਨਤ੍ਥਾਯ, ਵਾਸਨਾਭਾਗਿਯਾਯ ਵਾ’’ਤਿ. ਤਤ੍ਥਾਤਿ ਕੁਸਲੇ ਧਮ੍ਮੇ ਯਥਾਸਮਾਦਪਿਤੇ. ਨਨ੍ਤਿ ਸੋਣਦਣ੍ਡਬ੍ਰਾਹ੍ਮਣਂ. ਸਮੁਤ੍ਤੇਜੇਤ੍ਵਾਤਿ ਸਮ੍ਮਦੇਵ ਉਪਰੂਪਰਿ ਨਿਸਾਨੇਤ੍ਵਾ ਪੁਞ੍ਞਕਿਰਿਯਾਯ ਤਿਕ੍ਖਵਿਸਦਭਾਵਮਾਪਾਦੇਤ੍ਵਾ. ਤਂ ਪਨ ਅਤ੍ਥਤੋ ਤਤ੍ਥ ਉਸ੍ਸਾਹਜਨਨਮੇਵ ਹੋਤੀਤਿ ਆਹ ‘‘ਸਉਸ੍ਸਾਹਂ ਕਤ੍ਵਾ’’ਤਿ. ਤਾਯ ਚ ਸਉਸ੍ਸਾਹਤਾਯਾਤਿ ਏਵਂ ਪੁਞ੍ਞਕਿਰਿਯਾਯ ਸਉਸ੍ਸਾਹਤਾ ਨਿਯਮਤੋ ਦਿਟ੍ਠਧਮ੍ਮਿਕਾਦਿਅਤ੍ਥਸਮ੍ਪਾਦਨੀਤਿ ਯਥਾਵੁਤ੍ਤਾਯ ਸਉਸ੍ਸਾਹਤਾਯ ਚ ਸਮ੍ਪਹਂਸੇਤ੍ਵਾਤਿ ਸਮ੍ਬਨ੍ਧੋ. ਅਞ੍ਞੇਹਿ ਚ ਵਿਜ੍ਜਮਾਨਗੁਣੇਹੀਤਿ ਏਵਰੂਪਾ ਤੇ ਗੁਣਸਮਙ੍ਗਿਤਾ ਚ ਏਕਨ੍ਤੇਨ ਦਿਟ੍ਠਧਮ੍ਮਿਕਾਦਿਅਤ੍ਥਨਿਪ੍ਫਾਦਨੀਤਿ ਤਸ੍ਮਿਂ ਵਿਜ੍ਜਮਾਨੇਹਿ, ਅਞ੍ਞੇਹਿ ਚ ਗੁਣੇਹਿ ਸਮ੍ਪਹਂਸੇਤ੍ਵਾ ਸਮ੍ਮਦੇਵ ਹਟ੍ਠਤੁਟ੍ਠਭਾਵਮਾਪਾਦੇਤ੍ਵਾਤਿ ਅਤ੍ਥੋ.

ਯਦਿ ਭਗਵਾ ਧਮ੍ਮਰਤਨਵਸ੍ਸਂ ਵਸ੍ਸਿ, ਅਥ ਕਸ੍ਮਾ ਸੋ ਵਿਸੇਸਂ ਨਾਧਿਗਚ੍ਛੀਤਿ ਚੋਦਨਂ ਸੋਧੇਤੁਂ ‘‘ਬ੍ਰਾਹ੍ਮਣੋ ਪਨਾ’’ਤਿਆਦਿ ਵੁਤ੍ਤਂ. ਕੁਹਕਤਾਯਾਤਿ ਵੁਤ੍ਤਨਯੇਨ ਕੋਹਞ੍ਞਕਤ੍ਤਾ, ਇਮਿਨਾ ਪਯੋਗਸਮ੍ਪਤ੍ਤਿਅਭਾਵਂ ਦਸ੍ਸੇਤਿ. ਯਜ੍ਜੇਵਂ ਕਸ੍ਮਾ ਭਗਵਾ ਤਸ੍ਸ ਤਥਾ ਧਮ੍ਮਰਤਨਵਸ੍ਸਂ ਵਸ੍ਸੀਤਿ ਪਟਿਚੋਦਨਮ੍ਪਿ ਸੋਧੇਨ੍ਤੋ ‘‘ਕੇਵਲਮਸ੍ਸਾ’’ਤਿਆਦਿਮਾਹ. ਤਤ੍ਥ ਕੇਵਲਨ੍ਤਿ ਨਿਬ੍ਬੇਧਾਸੇਕ੍ਖਭਾਗਿਯੇਨ ਅਸਮ੍ਮਿਸ੍ਸਂ. ਨਿਬ੍ਬਾਨਤ੍ਥਾਯਾਤਿ ਨਿਬ੍ਬਾਨਾਧਿਗਮਤ੍ਥਾਯ, ਪਰਿਨਿਬ੍ਬਾਨਤ੍ਥਾਯ ਵਾ. ਆਯਤਿਂ ਵਿਸੇਸਾਧਿਗਮਨੂਪਾਯਭੂਤਾ ਪੁਞ੍ਞਕਿਰਿਯਾਸੁ ਪਰਿਚਯਸਙ੍ਖਾਤਾ ਵਾਸਨਾ ਏਵ ਭਾਗੋ, ਤਸ੍ਮਿਂ ਉਪਾਯਭਾਵੇਨ ਪਵਤ੍ਤਾਤਿ ਵਾਸਨਾਭਾਗਿਯਾ. ਨ ਹਿ ਭਗਵਤੋ ਨਿਰਤ੍ਥਕਾ ਚਤੁਪ੍ਪਦਿਕਗਾਥਾਮਤ੍ਤਾਪਿ ਧਮ੍ਮਦੇਸਨਾ ਅਤ੍ਥਿ. ਤੇਨਾਹ ‘‘ਸਬ੍ਬਾ ਪੁਰਿਮਪਚ੍ਛਿਮਕਥਾ’’ਤਿ. ਆਦਿਤੋ ਚੇਤ੍ਥ ਪਭੁਤਿ ਯਾਵ ਬ੍ਰਾਹ੍ਮਣਸ੍ਸ ਵਿਸ੍ਸਜ੍ਜਨਾਪਰਿਯੋਸਾਨਂ, ਤਾਵ ਪੁਰਿਮਕਥਾ, ਭਗਵਤੋ ਪਨ ਸੀਲਪਞ੍ਞਾਵਿਸ੍ਸਜ੍ਜਨਾ ਪਚ੍ਛਿਮਕਥਾ. ਬ੍ਰਾਹ੍ਮਣੇਨ ਵੁਤ੍ਤਾਪਿ ਹਿ ਬੁਦ੍ਧਗੁਣਾਦਿਪਟਿਸਞ੍ਞੁਤ੍ਤਾ ਕਥਾ ਆਯਤਿਂ ਨਿਬ੍ਬਾਨਤ੍ਥਾਯ ਵਾਸਨਾਭਾਗਿਯਾ ਏਵਾਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਪਰਮਸੁਖੁਮਗਮ੍ਭੀਰਦੁਰਨੁਬੋਧਤ੍ਥਪਰਿਦੀਪਨਾਯ ਸੁਵਿਮਲਵਿਪੁਲਪਞ੍ਞਾਵੇਯ੍ਯਤ੍ਤਿਯਜਨਨਾਯ ਸਾਧੁਵਿਲਾਸਿਨਿਯਾ ਨਾਮ ਲੀਨਤ੍ਥਪਕਾਸਨਿਯਾ ਸੋਣਦਣ੍ਡਸੁਤ੍ਤਵਣ੍ਣਨਾਯ ਲੀਨਤ੍ਥਪਕਾਸਨਾ.

ਸੋਣਦਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.