੧੨. ਲੋਹਿਚ੍ਚਸੁਤ੍ਤਵਣ੍ਣਨਾ

ਲੋਹਿਚ੍ਚਬ੍ਰਾਹ੍ਮਣਵਤ੍ਥੁਵਣ੍ਣਨਾ

੫੦੧. ਏਵਂ ਕੇਵਟ੍ਟਸੁਤ੍ਤਂ ਸਂਵਣ੍ਣੇਤ੍ਵਾ ਇਦਾਨਿ ਲੋਹਿਚ੍ਚਸੁਤ੍ਤਂ ਸਂਵਣ੍ਣੇਨ੍ਤੋ ਯਥਾਨੁਪੁਬ੍ਬਂ ਸਂਵਣ੍ਣਨੋਕਾਸਸ੍ਸ ਪਤ੍ਤਭਾਵਂ ਵਿਭਾਵੇਤੁਂ, ਕੇਵਟ੍ਟਸੁਤ੍ਤਸ੍ਸਾਨਨ੍ਤਰਂ ਸਙ੍ਗੀਤਸ੍ਸ ਸੁਤ੍ਤਸ੍ਸ ਲੋਹਿਚ੍ਚਸੁਤ੍ਤਭਾਵਂ ਵਾ ਪਕਾਸੇਤੁਂ ‘‘ਏਵਂ ਮੇ ਸੁਤਂ…ਪੇ… ਕੋਸਲੇਸੂਤਿ ਲੋਹਿਚ੍ਚਸੁਤ੍ਤ’’ਨ੍ਤਿ ਆਹ. ਸਾਲਵਤਿਕਾਤਿ ਕਾਰਣਮਨ੍ਤਰੇਨ ਇਤ੍ਥਿਲਿਙ੍ਗਵਸੇਨ ਤਸ੍ਸ ਗਾਮਸ੍ਸ ਨਾਮਂ. ਗਾਮਣਿਕਾਭਾਵੇਨਾਤਿ ਕੇਚਿ. ਵਤਿਯਾਤਿ ਕਣ੍ਟਕਸਾਖਾਦਿਵਤਿਯਾ. ਲੋਹਿਤੋ ਨਾਮ ਤਸ੍ਸ ਕੁਲੇ ਪੁਬ੍ਬਪੁਰਿਸੋ, ਤਬ੍ਬਂਸਵਸੇਨ ਲੋਹਿਤਸ੍ਸ ਅਪਚ੍ਚਂ ਲੋਹਿਚ੍ਚੋਤਿ ਬ੍ਰਾਹ੍ਮਣਸ੍ਸ ਗੋਤ੍ਤਤੋ ਆਗਤਨਾਮਂ.

੫੦੨. ‘‘ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤੀ’’ਤਿ ਪਰਾਨੁਕਮ੍ਪਾ ਵਿਰਹਿਤਤ੍ਤਾ ਲਾਮਕਂ. ਨ ਤੁ ਉਚ੍ਛੇਦਸਸ੍ਸਤਾਨਂ ਅਞ੍ਞਤਰਸ੍ਸਾਤਿ ਆਹ ‘‘ਨ ਪਨਾ’’ਤਿਆਦਿ. ਦਿਟ੍ਠਿਗਤਨ੍ਤਿ ਹਿ ਲਦ੍ਧਿਮਤ੍ਤਂ ਅਧਿਪ੍ਪੇਤਂ, ਅਞ੍ਞਥਾ ਉਚ੍ਛੇਦਸਸ੍ਸਤਗ੍ਗਾਹਵਿਨਿਮੁਤ੍ਤੋ ਕੋਚਿ ਦਿਟ੍ਠਿਗ੍ਗਾਹੋ ਨਾਮ ਨਤ੍ਥੀਤਿ ਤੇਸਮਞ੍ਞਤਰਂ ਸਿਯਾ. ‘‘ਉਪ੍ਪਨ੍ਨਂ ਹੋਤੀ’’ਤਿ ਇਦਂ ਮਨਸਿ, ਵਚਸਿ ਚ ਉਪ੍ਪਨ੍ਨਤਾਸਾਧਾਰਣਵਚਨਨ੍ਤਿ ਦਸ੍ਸੇਤਿ ‘‘ਨ ਕੇਵਲਞ੍ਚਾ’’ਤਿਆਦਿਨਾ. ਸੋ ਕਿਰ…ਪੇ… ਭਾਸਤਿਯੇਵਾਤਿ ਚ ਤਸ੍ਸਾ ਲਦ੍ਧਿਯਾ ਲੋਕੇ ਪਾਕਟਭਾਵਂ ਵਦਤਿ. ਯਸ੍ਮਾ ਪਨ ਅਤ੍ਤਤੋ ਅਞ੍ਞੋ ਪਰੋ ਹੋਤਿ, ਤਸ੍ਮਾ ਯਥਾ ਅਨੁਸਾਸਕਤੋ ਅਨੁਸਾਸਿਤਬ੍ਬੋ ਪਰੋ, ਏਵਂ ਅਨੁਸਾਸਿਤਬ੍ਬਤੋਪਿ ਅਨੁਸਾਸਕੋਤਿ ਦਸ੍ਸੇਤੁਂ ‘‘ਪਰੋ’’ਤਿਆਦਿ ਵੁਤ੍ਤਂ. ਕਿਂ-ਸਦ੍ਦਾਪੇਕ੍ਖਾਯ ਚੇਤ੍ਥ ‘‘ਕਰਿਸ੍ਸਤੀ’’ਤਿ ਅਨਾਗਤਕਾਲਵਚਨਂ, ਅਨਾਗਤੇਪਿ ਵਾ ਤੇਨ ਤਸ੍ਸ ਕਾਤਬ੍ਬਂ ਨਤ੍ਥੀਤਿ ਦਸ੍ਸਨਤ੍ਥਂ. ਕੁਸਲਂ ਧਮ੍ਮਨ੍ਤਿ ਅਨਵਜ੍ਜਧਮ੍ਮਂ ਨਿਕ੍ਕਿਲੇਸਧਮ੍ਮਂ, ਵਿਮੋਕ੍ਖਧਮ੍ਮਨ੍ਤਿ ਅਤ੍ਥੋ. ‘‘ਪਰੇਸਂ ਧਮ੍ਮਂ ਕਥੇਸ੍ਸਾਮੀ’’ਤਿ ਤੇਹਿ ਅਤ੍ਤਾਨਂ ਪਰਿਵਾਰਾਪੇਤ੍ਵਾ ਵਿਚਰਣਂ ਕਿਮਤ੍ਥਿਯਂ, ਆਸਯਵੁਦ੍ਧਸ੍ਸਪਿ ਅਨੁਰੋਧੇਨ ਵਿਨਾ ਤਂ ਨ ਹੋਤਿ, ਤਸ੍ਮਾ ਅਤ੍ਤਨਾ…ਪੇ… ਵਿਹਾਤਬ੍ਬਨ੍ਤਿ ਵਦਤਿ. ਤੇਨਾਹ ‘‘ਏਵਂਸਮ੍ਪਦਮਿਦਂ ਪਾਪਕਂ ਲੋਭਧਮ੍ਮਂ ਵਦਾਮੀ’’ਤਿ.

੫੦੪. ‘‘ਇਤ੍ਥਿਲਿਙ੍ਗਵਸੇਨਾ’’ਤਿ ਇਮਿਨਾ ਪੁਲ੍ਲਿਙ੍ਗਿਕਸ੍ਸਪਿ ਅਤ੍ਥਸ੍ਸ ਇਤ੍ਥਿਲਿਙ੍ਗਸਮਞ੍ਞਾਤਿ ਦਸ੍ਸੇਤਿ. ਸੋਤਿ ਲੋਹਿਚ੍ਚਬ੍ਰਾਹ੍ਮਣੋ. ਭਾਰੋਤਿ ਭਗਵਤੋ ਪਰਿਸਬਾਹੁਲ੍ਲਤ੍ਤਾ, ਅਤ੍ਤਨੋ ਚ ਬਹੁਕਿਚ੍ਚਕਰਣੀਯਤ੍ਤਾ ਗਰੁ ਦੁਕ੍ਕਰਂ.

੫੦੮. ਕਥਾਫਾਸੁਕਤ੍ਥਨ੍ਤਿ ਕਥਾਸੁਖਤ੍ਥਂ, ਸੁਖੇਨ ਕਥਂ ਕਥੇਤੁਞ੍ਚੇਵ ਸੋਤੁਞ੍ਚਾਤਿ ਅਤ੍ਥੋ. ਅਯਂ ਉਪਾਸਕੋਤਿ ਰੋਸਿਕਨ੍ਹਾਪਿਤਂ ਆਹ. ਅਪ੍ਪੇਵ ਨਾਮ ਸਿਯਾਤਿ ਏਤ੍ਥ ਪੀਤਿਵਸੇਨ ਆਮੇਡਿਤਂ ਦਟ੍ਠਬ੍ਬਂ. ਤਥਾ ਹਿ ਤਂ ‘‘ਬੁਦ੍ਧਗਜ੍ਜਿਤ’’ਨ੍ਤਿ ਵੁਚ੍ਚਤਿ. ਭਗਵਾ ਹਿ ਈਦਿਸੇਸੁ ਠਾਨੇਸੁ ਵਿਸੇਸਤੋ ਪੀਤਿਸੋਮਨਸ੍ਸਜਾਤੋ ਹੋਤਿ, ਤਸ੍ਮਾ ਪੀਤਿਵਸੇਨ ਪਠਮਂ ਗਜ੍ਜਤਿ, ਦੁਤਿਯਮ੍ਪਿ ਅਨੁਗਜ੍ਜਤਿ. ਕਿਂ ਵਿਸੇਸਂ ਗਜ੍ਜਨਮਨੁਗਜ੍ਜਨਨ੍ਤਿ ਵੁਤ੍ਤਂ ‘‘ਅਯ’’ਨ੍ਤਿਆਦਿ. ਆਦੋ ਭਾਸਨਂ ਅਲ੍ਲਾਪੋ, ਸਞ੍ਞੋਗੇ ਪਰੇ ਰਸ੍ਸੋ. ਤਦੁਤ੍ਤਰਿ ਸਹ ਭਾਸਨਂ ਸਲ੍ਲਾਪੋ.

ਲੋਹਿਚ੍ਚਬ੍ਰਾਹ੍ਮਣਾਨੁਯੋਗਵਣ੍ਣਨਾ

੫੦੯. ਸਮੁਦਯਸਞ੍ਜਾਤੀਤਿ ਆਯੁਪ੍ਪਾਦੋਤਿ ਆਹ ‘‘ਭੋਗੁਪ੍ਪਾਦੋ’’ਤਿ. ਤਤੋਤਿ ਸਾਲਵਤਿਕਾਯ. ਲਾਭਨ੍ਤਰਾਯਕਰੋਤਿ ਧਨਧਞ੍ਞਲਾਭਸ੍ਸ ਅਨ੍ਤਰਾਯਕਰੋ. ਅਨੁਪੁਬ੍ਬੋ ਕਪਿ-ਸਦ੍ਦੋ ਆਕਙ੍ਖਨਤ੍ਥੋਤਿ ਦਸ੍ਸੇਤਿ ‘‘ਇਚ੍ਛਤੀ’’ਤਿ ਇਮਿਨਾ. ਅਯਂ ਅਟ੍ਠਕਥਾਤੋ ਅਪਰੋ ਨਯੋ – ਸਾਤਿਸਯੇਨ ਹਿਤੇਨ ਅਨੁਕਮ੍ਪਕੋ ਅਨੁਗ੍ਗਣ੍ਹਨਕੋ ਹਿਤਾਨੁਕਮ੍ਪੀਤਿ. ਸਮ੍ਪਜ੍ਜਤੀਤਿ ਆਸੇਵਨਲਾਭੇਨ ਨਿਪ੍ਪਜ੍ਜਤਿ, ਬਲਵਤੀ ਹੋਤਿ ਅਵਗ੍ਗਹਾਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਨਿਯਤਾ ਹੋਤੀ’’ਤਿ.

੫੧੦-੫੧੧. ਦੁਤਿਯਂ ਉਪਪਤ੍ਤਿਨ੍ਤਿ ‘‘ਨਨੁ ਰਾਜਾ ਪਸੇਨਦਿਕੋਸਲੋ’’ਤਿਆਦਿਨਾ ਵੁਤ੍ਤਂ ਦੁਤਿਯਂ ਉਪਪਤ੍ਤਿਂ ਠਾਨਂ ਯੁਤ੍ਤਿਂ. ਕਾਰਣਞ੍ਹਿ ਭਗਵਾ ਉਪਮਾਮੁਖੇਨ ਦਸ੍ਸੇਤਿ, ਇਮਾਯ ਚ ਉਪਪਤ੍ਤਿਯਾ ਤੁਮ੍ਹੇ ਚੇਵ ਅਞ੍ਞੇ ਚਾਤਿ ਲੋਹਿਚ੍ਚਮ੍ਪਿ ਅਨ੍ਤੋਕਤ੍ਵਾ ਸਂਵੇਜਨਂ ਕਤਂ ਹੋਤਿ. ਯੇ ਚ ਇਮੇ ਕੁਲਪੁਤ੍ਤਾ ਦਿਬ੍ਬਾ ਗਬ੍ਭਾ ਪਰਿਪਾਚੇਨ੍ਤੀਤਿ ਯੋਜਨਾ. ਉਪਨਿਸ੍ਸਯਸਮ੍ਪਤ੍ਤਿਯਾ, ਞਾਣਪਰਿਪਾਕਸ੍ਸ ਵਾ ਅਭਾਵੇਨ ਅਸਕ੍ਕੋਨ੍ਤਾ. ਕਮ੍ਮਪਦੇਨ ਅਤੁਲ੍ਯਾਧਿਕਰਣਤ੍ਤਾ ਪਰਿਪਾਚੇਨ੍ਤਿ ਕਿਰਿਯਾਯ ਵਿਭਤ੍ਤਿਵਿਪਲ੍ਲਾਸੇਨ ਉਪਯੋਗਤ੍ਥੇ ਪਚ੍ਚਤ੍ਤਵਚਨਂ. ਯੇ ਪਨ ‘‘ਪਰਿਪਚ੍ਚਨ੍ਤੀ’’ਤਿ ਕਮ੍ਮਰੂਪੇਨ ਪਠਨ੍ਤਿ, ਤੇਸਂ ਮਤੇ ਵਿਭਤ੍ਤਿਵਿਪਲ੍ਲਾਸੇਨ ਪਯੋਜਨਂ ਨਤ੍ਥਿ ਕਮ੍ਮਕਤ੍ਤੁਭਾਵਤੋ, ਅਤ੍ਥੋ ਪਨਸ੍ਸ ਦੁਤਿਯਵਿਕਪ੍ਪੇ ਵੁਤ੍ਤਨਯੇਨ ਦਾਨਾਦਿਪੁਞ੍ਞਵਿਸੇਸੋ ਵੇਦਿਤਬ੍ਬੋ. ਅਹਿਤਾਨੁਕਮ੍ਪਾਦਿਤਾ ਚ ਤਸ੍ਸ ਤਂਸਮਙ੍ਗੀਸਤ੍ਤਵਸੇਨ ਹੋਤਿ. ਦਿਵਿ ਭਵਾਤਿ ਦਿਬ੍ਬਾ. ਗਬ੍ਭੇਨ੍ਤਿ ਪਰਿਪਚ੍ਚਨਵਸੇਨ ਅਤ੍ਤਨਿ ਪਬਨ੍ਧੇਨ੍ਤੀਤਿ ਗਬ੍ਭਾ, ਦੇਵਲੋਕਾ. ‘‘ਛਨ੍ਨਂ ਦੇਵਲੋਕਾਨ’’ਨ੍ਤਿ ਨਿਦਸ੍ਸਨਵਚਨਮੇਤਂ. ਬ੍ਰਹ੍ਮਲੋਕਸ੍ਸਾਪਿ ਹਿ ਦਿਬ੍ਬਗਬ੍ਭਭਾਵੋ ਲਬ੍ਭਤੇਵ ਦਿਬ੍ਬਵਿਹਾਰਹੇਤੁਕਤ੍ਤਾ. ਏਵਞ੍ਚ ਕਤ੍ਵਾ ‘‘ਭਾਵਨਂ ਭਾਵਯਮਾਨਾ’’ਤਿ ਇਦਮ੍ਪਿ ਵਚਨਂ ਸਮਤ੍ਥਿਤਂ ਹੋਤਿ. ‘‘ਦੇਵਲੋਕਗਾਮਿਨਿਂ ਪਟਿਪਦਂ ਪੂਰਯਮਾਨਾ’’ਤਿ ਵਤ੍ਵਾ ਤਂ ਪਟਿਪਦਂ ਸਰੂਪਤੋ ਦਸ੍ਸੇਤੁਂ ‘‘ਦਾਨਂ ਦਦਮਾਨਾ’’ਤਿਆਦਿ ਵੁਤ੍ਤਂ. ਭਵਨ੍ਤਿ ਏਤ੍ਥ ਯਥਾਰੁਚਿ ਸੁਖਸਮਪ੍ਪਿਤਾਤਿ ਭਵਾ, ਵਿਮਾਨਾਨਿ. ਦੇਵਭਾਵਾਵਹਤ੍ਤਾ ਦਿਬ੍ਬਾ. ਵੁਤ੍ਤਨਯੇਨੇਵ ਗਬ੍ਭਾ.ਦਾਨਾਦਯੋ ਦੇਵਲੋਕਸਂਵਤ੍ਤਨਿਕ ਪੁਞ੍ਞਵਿਸੇਸਾ. ਦਿਬ੍ਬਾ ਭਵਾਤਿ ਇਧ ਦੇਵਲੋਕਪਰਿਯਾਪਨ੍ਨਾ ਉਪਪਤ੍ਤਿਭਵਾ ਅਧਿਪ੍ਪੇਤਾ. ਤਦਾਵਹੋ ਹਿ ਕਮ੍ਮਭਵੋ ਪੁਬ੍ਬੇ ਗਹਿਤੋਤਿ ਆਹ ‘‘ਦੇਵਲੋਕੇ ਵਿਪਾਕਕ੍ਖਨ੍ਧਾ’’ਤਿ.

ਤਯੋਚੋਦਨਾਰਹਵਣ੍ਣਨਾ

੫੧੩. ਅਨਿਯਾਮਿਤੇਨੇਵਾਤਿ ਅਨਿਯਮਿਤੇਨੇਵ, ‘‘ਤ੍ਵਂ ਏਵਂ ਦਿਟ੍ਠਿਕੋ, ਏਵਂ ਸਤ੍ਤਾਨਂ ਅਨਤ੍ਥਸ੍ਸ ਕਾਰਕੋ’’ਤਿ ਏਵਂ ਅਨੁਦ੍ਦੇਸਿਕੇਨੇਵ. ਸਬ੍ਬਲੋਕਪਤ੍ਥਟਾਯ ਲਦ੍ਧਿਯਾ ਸਮੁਪ੍ਪਜ੍ਜਨਤੋ ਯਾਵ ਭਵਗ੍ਗਾ ਉਗ੍ਗਤਂ. ਮਾਨਨ੍ਤਿ ‘‘ਅਹਮੇਤਂ ਜਾਨਾਮਿ, ਅਹਮੇਤਂ ਪਸ੍ਸਾਮੀ’’ਤਿ ਏਵਂ ਪਵਤ੍ਤਂ ਪਣ੍ਡਿਤਮਾਨਂ. ਭਿਨ੍ਦਿਤ੍ਵਾਤਿ ਵਿਧਮੇਤ੍ਵਾ, ਜਹਾਪੇਤ੍ਵਾਤਿ ਅਤ੍ਥੋ. ਤਯੋ ਸਤ੍ਥਾਰੇਤਿ ਅਸਮ੍ਪਾਦਿਤਅਤ੍ਤਹਿਤੋ ਅਨੋਵਾਦਕਰਸਾਵਕੋ ਚ ਅਸਮ੍ਪਾਦਿਤਅਤ੍ਤਹਿਤੋ ਓਵਾਦਕਰਸਾਵਕੋ ਚ ਸਮ੍ਪਾਦਿਤਅਤ੍ਤਹਿਤੋ ਅਨੋਵਾਦਕਰਸਾਵਕੋ ਚੇਤਿ ਇਮੇ ਤਯੋ ਸਤ੍ਥਾਰੇ. ਚਤੁਤ੍ਥੋ ਪਨ ਸਮ੍ਮਾਸਮ੍ਬੁਦ੍ਧੋ ਨ ਚੋਦਨਾਰਹੋ, ਤਸ੍ਮਾ ‘‘ਤਂ ਤੇਨ ਪੁਚ੍ਛਿਤੋ ਏਵ ਕਥੇਸ੍ਸਾਮੀ’’ਤਿ ਚੋਦਨਾਰਹੇਵ ਤਯੋ ਸਤ੍ਥਾਰੇ ਪਠਮਂ ਦਸ੍ਸੇਤਿ, ਪਚ੍ਛਾ ਚਤੁਤ੍ਥਂ ਸਤ੍ਥਾਰਂ. ਕਾਮਞ੍ਚੇਤ੍ਥ ਚਤੁਤ੍ਥੋ ਸਤ੍ਥਾ ਏਕੋ ਅਦੁਤਿਯੋ ਅਨਞ੍ਞਸਾਧਾਰਣੋ, ਤਥਾਪਿ ਸੋ ਯੇਸਂ ਉਤ੍ਤਰਿਮਨੁਸ੍ਸਧਮ੍ਮਾਨਂ ਵਸੇਨ ‘‘ਧਮ੍ਮਮਯੋ ਕਾਯੋ’’ਤਿ ਵੁਚ੍ਚਤਿ, ਤੇਸਂ ਸਮੁਦਾਯਭੂਤੋਪਿ ਤੇ ਗੁਣਾਵਯਵੇ ਸਤ੍ਥੁਟ੍ਠਾਨਿਯੇ ਕਤ੍ਵਾ ਦਸ੍ਸੇਨ੍ਤੋ ਭਗਵਾ ‘‘ਅਯਮ੍ਪਿ ਖੋ ਲੋਹਿਚ੍ਚ ਸਤ੍ਥਾ’’ਤਿ ਅਭਾਸਿ.

ਅਞ੍ਞਾਤਿ ਯ-ਕਾਰਲੋਪਨਿਦ੍ਦੇਸੋ ‘‘ਸਯਂ ਅਭਿਞ੍ਞਾ’’ਤਿਆਦੀਸੁ (ਦੀ. ਨਿ. ੧.੨੮, ੩੭; ਮ. ਨਿ. ੧.੧੫੪, ੪੪੪) ਵਿਯ, ਤਦਤ੍ਥੇ ਚੇਤਂ ਸਮ੍ਪਦਾਨਵਚਨਨ੍ਤਿ ਦਸ੍ਸੇਤਿ ‘‘ਅਞ੍ਞਾਯਾ’’ਤਿਆਦਿਨਾ. ਸਾਵਕਤ੍ਤਂ ਪਟਿਜਾਨਿਤ੍ਵਾ ਠਿਤਤ੍ਤਾ ਏਕਦੇਸੇਨਸ੍ਸ ਸਾਸਨਂ ਕਰੋਨ੍ਤੀਤਿ ਆਹ ‘‘ਨਿਰਨ੍ਤਰਂ ਤਸ੍ਸ ਸਾਸਨਂ ਅਕਤ੍ਵਾ’’ਤਿ. ਉਕ੍ਕਮਿਤ੍ਵਾ ਉਕ੍ਕਮਿਤ੍ਵਾਤਿ ਕਦਾਚਿ ਤਥਾ ਕਰਣਂ, ਕਦਾਚਿ ਤਥਾ ਅਕਰਣਞ੍ਚ ਸਨ੍ਧਾਯ ਵਿਚ੍ਛਾਵਚਨਂ, ਯਦਿਚ੍ਛਿਤਂ ਕਰੋਨ੍ਤੀਤਿ ਅਧਿਪ੍ਪਾਯੋ. ਪਟਿਕ੍ਕਮਨ੍ਤਿਯਾਤਿ ਅਨਭਿਰਤਿਯਾ ਅਗਾਰਵੇਨ ਅਪਗਚ੍ਛਨ੍ਤਿਯਾ. ਤੇਨ ਵੁਤ੍ਤਂ ‘‘ਅਨਿਚ੍ਛਨ੍ਤਿਯਾ’’ਤਿਆਦਿ. ਏਕਾਯਾਤਿ ਅਦੁਤਿਯਾਯ ਇਤ੍ਥਿਯਾ, ਸਮ੍ਪਯੋਗਨ੍ਤਿ ਮੇਥੁਨਧਮ੍ਮਸਮਾਯੋਗਂ. ਏਕੋ ਇਚ੍ਛੇਯ੍ਯਾਤਿ ਅਦੁਤਿਯੋ ਪੁਰਿਸੋ ਸਮ੍ਪਯੋਗਂ ਇਚ੍ਛੇਯ੍ਯਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਓਸਕ੍ਕਨਾਦਿਮੁਖੇਨ ਇਤ੍ਥਿਪੁਰਿਸਸਮ੍ਬਨ੍ਧਨਿਦਸ੍ਸਨਂ ਗੇਹਸ੍ਸਿਤਾਗੇਹਸ੍ਸਿਤਅਪੇਕ੍ਖਵਸੇਨ ਤਸ੍ਸ ਸਤ੍ਥੁਨੋ ਸਾਵਕੇਸੁ ਪਟਿਪਤ੍ਤਿਦਸ੍ਸਨਤ੍ਥਂ. ਅਤਿਵਿਰਤ੍ਤਭਾਵਤੋ ਦਟ੍ਠੁਮ੍ਪਿ ਅਨਿਚ੍ਛਮਾਨਂ ਪਰਮ੍ਮੁਖਿਂ ਠਿਤਂ ਇਤ੍ਥਿਂ. ਲੋਭੇਨਾਤਿ ਪਰਿਵਾਰਂ ਨਿਸ੍ਸਾਯ ਉਪ੍ਪਜ੍ਜਨਕਲਾਭਸਕ੍ਕਾਰਲੋਭੇਨ. ਈਦਿਸੋਤਿ ਏਵਂਸਭਾਵੋ ਸਤ੍ਥਾ. ਯੇਨਾਤਿ ਲੋਭਧਮ੍ਮੇਨ. ਤਤ੍ਥ ਸਮ੍ਪਾਦੇਹੀਤਿ ਤਸ੍ਮਿਂ ਪਟਿਪਤ੍ਤਿਧਮ੍ਮੇ ਪਤਿਟ੍ਠਿਤਂ ਕਤ੍ਵਾ ਸਮ੍ਪਾਦੇਹਿ. ਕਾਯਵਙ੍ਕਾਦਿਵਿਗਮੇਨ ਉਜੁਂ ਕਰੋਹਿ.

੫੧੪. ਸਸ੍ਸਰੂਪਕਾਨਿ ਤਿਣਾਨੀਤਿ ਸਸ੍ਸਸਦਿਸਾਨਿ ਨੀਵਾਰਾਦਿਤਿਣਾਨਿ.

੫੧੫. ਏਵਂ ਚੋਦਨਂ ਅਰਹਤੀਤਿ ਵੁਤ੍ਤਨਯੇਨ ਸਾਵਕੇਸੁ ਅਪ੍ਪੋਸ੍ਸੁਕ੍ਕਭਾਵਾਪਾਦਨੇ ਨਿਯੋਜਨਵਸੇਨ ਚੋਦਨਂ ਅਰਹਤਿ, ਨ ਪਠਮੋ ਵਿਯ ‘‘ਏਵਰੂਪੋ ਤਵ ਲੋਭਧਮ੍ਮੋ’’ਤਿਆਦਿਨਾ, ਨ ਚ ਦੁਤਿਯੋ ਵਿਯ ‘‘ਅਤ੍ਤਾਨਮੇਵ ਤਾਵ ਤਤ੍ਥ ਸਮ੍ਪਾਦੇਹੀ’’ਤਿਆਦਿਨਾ. ਕਸ੍ਮਾ? ਸਮ੍ਪਾਦਿਤਅਤ੍ਤਹਿਤਤਾਯ ਤਤਿਯਸ੍ਸ.

ਨਚੋਦਨਾਰਹਸਤ੍ਥੁਵਣ੍ਣਨਾ

੫੧੬. ਨ ਚੋਦਨਾਰਹੋਤਿ ਏਤ੍ਥ ਯਸ੍ਮਾ ਚੋਦਨਾਰਹਤਾ ਨਾਮ ਸਤ੍ਥੁਵਿਪ੍ਪਟਿਪਤ੍ਤਿਯਾ ਵਾ ਸਾਵਕਵਿਪ੍ਪਟਿਪਤ੍ਤਿਯਾ ਵਾ ਉਭਯਵਿਪ੍ਪਟਿਪਤ੍ਤਿਯਾ ਵਾ ਹੋਤਿ, ਤਯਿਦਂ ਸਬ੍ਬਮ੍ਪਿ ਇਮਸ੍ਮਿਂ ਸਤ੍ਥਰਿ ਨਤ੍ਥਿ, ਤਸ੍ਮਾ ਨ ਚੋਦਨਾਰਹੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਅਯਞ੍ਹੀ’’ਤਿਆਦਿ ਵੁਤ੍ਤਂ. ਅਸ੍ਸਵਾਤਿ ਪਟਿਸ੍ਸਵਾ.

੫੧੭. ਮਯਾ ਗਹਿਤਾਯ ਦਿਟ੍ਠਿਯਾਤਿ ਸਬ੍ਬਸੋ ਅਨਵਜ੍ਜੇ ਅਨੁਪਵਜ੍ਜੇ ਸਮ੍ਮਾਪਟਿਪਨ੍ਨੇ, ਪਰੇਸਞ੍ਚ ਸਮ੍ਮਦੇਵ ਸਮ੍ਮਾਪਟਿਪਤ੍ਤਿਂ ਦਸ੍ਸੇਨ੍ਤੇ ਸਤ੍ਥਰਿ ਅਭੂਤਦੋਸਾਰੋਪਨਵਸੇਨ ਮਿਚ੍ਛਾਗਹਿਤਾਯ ਨਿਰਯਗਾਮਿਨਿਯਾ ਪਾਪਦਿਟ੍ਠਿਯਾ. ਨਰਕਪਪਾਤਨ੍ਤਿ ਨਰਕਸਙ੍ਖਾਤਂ ਮਹਾਪਪਾਤਂ. ਪਪਤਨ੍ਤਿ ਏਤ੍ਥਾਤਿ ਹਿ ਪਪਾਤੋ. ਧਮ੍ਮਦੇਸਨਾਹਤ੍ਥੇਨਾਤਿ ਧਮ੍ਮਦੇਸਨਾਸਙ੍ਖਾਤੇਨ ਹਤ੍ਥੇਨ. ਸਗ੍ਗਮਗ੍ਗਥਲੇਤਿ ਸਗ੍ਗਗਾਮਿਮਗ੍ਗਭੂਤੇ ਪੁਞ੍ਞਧਮ੍ਮਥਲੇ, ਚਾਤੁਮਹਾਰਾਜਿਕਾਦਿਸਗ੍ਗਸੋਤਾਪਤ੍ਤਿਆਦਿਮਗ੍ਗਸਙ੍ਖਾਤੇ ਵਾ ਥਲੇ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਪਰਮਸੁਖੁਮਗਮ੍ਭੀਰਦੁਰਨੁਬੋਧਤ੍ਥਪਰਿਦੀਪਨਾਯ ਸੁਵਿਮਲਵਿਪੁਲਪਞ੍ਞਾਵੇਯ੍ਯਤ੍ਤਿਯਜਨਨਾਯ ਸਾਧੁਵਿਲਾਸਿਨਿਯਾ ਨਾਮ ਲੀਨਤ੍ਥਪਕਾਸਨਿਯਾ ਲੋਹਿਚ੍ਚਸੁਤ੍ਤਵਣ੍ਣਨਾਯ ਲੀਨਤ੍ਥਪਕਾਸਨਾ.

ਲੋਹਿਚ੍ਚਸੁਤ੍ਤਵਣ੍ਣਨਾ ਨਿਟ੍ਠਿਤਾ.