੧੦. ਸੁਭਸੁਤ੍ਤਵਣ੍ਣਨਾ

ਸੁਭਮਾਣਵਕਵਤ੍ਥੁਵਣ੍ਣਨਾ

੪੪੪. ਏਵਂ ਪੋਟ੍ਠਪਾਦਸੁਤ੍ਤਂ ਸਂਵਣ੍ਣੇਤ੍ਵਾ ਇਦਾਨਿ ਸੁਭਸੁਤ੍ਤਂ ਸਂਵਣ੍ਣੇਨ੍ਤੋ ਯਥਾਨੁਪੁਬ੍ਬਂ ਸਂਵਣ੍ਣਨੋਕਾਸਸ੍ਸ ਪਤ੍ਤਭਾਵਂ ਵਿਭਾਵੇਤੁਂ, ਪੋਟ੍ਠਪਾਦਸੁਤ੍ਤਸ੍ਸਾਨਨ੍ਤਰਂ ਸਙ੍ਗੀਤਸ੍ਸ ਸੁਤ੍ਤਸ੍ਸ ਸੁਭਸੁਤ੍ਤਭਾਵਂ ਵਾ ਪਕਾਸੇਤੁਂ ‘‘ਏਵਂ ਮੇ ਸੁਤਂ…ਪੇ… ਸਾਵਤ੍ਥਿਯਨ੍ਤਿ ਸੁਭਸੁਤ੍ਤ’’ਨ੍ਤਿ ਆਹ. ਅਨੁਨਾਸਿਕਲੋਪੇਨ ‘‘ਅਚਿਰ ਪਰਿਨਿਬ੍ਬੁਤੇ’’ਤਿ ਵੁਤ੍ਤਨ੍ਤਿ ਦਸ੍ਸੇਤਿ ‘‘ਅਚਿਰਂ ਪਰਿਨਿਬ੍ਬੁਤੇ’’ਤਿ ਇਮਿਨਾ ਯਥਾ ਪੋਟ੍ਠਪਾਦਸੁਤ੍ਤੇ ‘‘ਅਪ੍ਪਾਟਿਹੀਰਕ ਤਂ ਭਾਸਿਤਂ ਸਮ੍ਪਜ੍ਜਤੀ’’ਤਿ, ਅਚਿਰਂ ਪਰਿਨਿਬ੍ਬੁਤਸ੍ਸ ਅਸ੍ਸਾਤਿ ਵਾ ਅਚਿਰਪਰਿਨਿਬ੍ਬੁਤੋ ਯਥਾ ‘‘ਅਚਿਰਪਕ੍ਕਨ੍ਤੋ, ਮਾਸਜਾਤੋ’’ਤਿ. ਅਤ੍ਥਮਤ੍ਤਂ ਪਨ ਦਸ੍ਸੇਤੁਂ ਏਵਂ ਵੁਤ੍ਤਂ. ਅਚਿਰਪਰਿਨਿਬ੍ਬੁਤੇਤਿ ਚ ਸਤ੍ਥੁ ਪਰਿਨਿਬ੍ਬੁਤਭਾਵਸ੍ਸ ਚਿਰਕਾਲਤਾਪਟਿਕ੍ਖੇਪੇਨ ਆਸਨ੍ਨਤਾਮਤ੍ਤਂ ਦਸ੍ਸਿਤਂ, ਕਾਲਪਰਿਚ੍ਛੇਦੋ ਪਨ ਨ ਦਸ੍ਸਿਤੋਤਿ ਤਂ ਦਸ੍ਸੇਨ੍ਤੋ ‘‘ਪਰਿਨਿਬ੍ਬਾਨਤੋ’’ਤਿਆਦਿਮਾਹ. ਵਿਸਾਖਪੁਣ੍ਣਮਿਤੋ ਉਦ੍ਧਂ ਯਾਵ ਜੇਟ੍ਠਪੁਣ੍ਣਮੀ, ਤਾਵ ਕਾਲਂ ਸਨ੍ਧਾਯ ‘‘ਮਾਸਮਤ੍ਤੇ’’ਤਿ ਵੁਤ੍ਤਂ. ਮਤ੍ਤਸਦ੍ਦੇਨ ਪਨ ਤਸ੍ਸ ਕਾਲਸ੍ਸ ਕਿਞ੍ਚਿ ਅਸਮ੍ਪੁਣ੍ਣਤਂ ਜੋਤੇਤਿ. ਤੁਦਿਸਞ੍ਞਿਤੋ ਗਾਮੋ ਨਿਵਾਸੋ ਏਤਸ੍ਸਾਤਿ ਤੋਦੇਯ੍ਯੋ. ਤਂ ਪਨੇਸ ਯਸ੍ਮਾ ਸੋਣਦਣ੍ਡੋ (ਦੀ. ਨਿ. ੧.੩੦੦) ਵਿਯ ਚਮ੍ਪਂ, ਕੂਟਦਨ੍ਤੋ (ਦੀ. ਨਿ. ੧.੩੨੩) ਵਿਯ ਚ ਖਾਣੁਮਤਂ ਅਜ੍ਝਾਵਸਤਿ, ਤਸ੍ਮਾ ਵੁਤ੍ਤਂ ‘‘ਤਸ੍ਸ ਅਧਿਪਤਿਤ੍ਤਾ’’ਤਿ, ਇਸ੍ਸਰਭਾਵਤੋਤਿ ਅਤ੍ਥੋ. ਅਯਮ੍ਪਿ ਹਿ ਰਞ੍ਞੋ ਪਸੇਨਦਿਕੋਸਲਸ੍ਸ ਪੁਰੋਹਿਤਬ੍ਰਾਹ੍ਮਣੋ. ਪੁਤ੍ਤਮ੍ਪਿ ਆਹਾਤਿ ਸੁਭਂ ਮਾਣਵਮ੍ਪਿ ਓਵਦਨ੍ਤੋ ਆਹ.

ਅਞ੍ਜਨਾਨਨ੍ਤਿ ਅਕ੍ਖਿਅਞ੍ਜਨਤ੍ਥਾਯ ਘਂਸਿਤਅਞ੍ਜਨਾਨਂ. ਵਮ੍ਮਿਕਾਨਨ੍ਤਿ ਕਿਮਿਸਮਾਹਟਵਮ੍ਮਿਕਾਨਂ ਸਞ੍ਚਯਂ ਦਿਸ੍ਵਾਤਿ ਸਮ੍ਬਨ੍ਧੋ. ਮਧੂਨਨ੍ਤਿ ਮਕ੍ਖਿਕਮਧੂਨਂ. ਸਮਾਹਾਰਨ੍ਤਿ ਮਕਰਨ੍ਦਸਨ੍ਨਿਚਯਂ. ਪਣ੍ਡਿਤੋ ਘਰਮਾਵਸੇਤਿ ਯਸ੍ਮਾ ਅਪ੍ਪਤਰਪ੍ਪਤਰੇਪਿ ਗਯ੍ਹਮਾਨੇ ਭੋਗਾ ਖੀਯਨ੍ਤਿ, ਅਪ੍ਪਤਰਪ੍ਪਤਰੇਪਿ ਚ ਸਞ੍ਚਿਯਮਾਨੇ ਵਡ੍ਢਨ੍ਤਿ, ਤਸ੍ਮਾ ਯਥਾਵੁਤ੍ਤਮੁਪਮਤ੍ਤਯਂ ਪਞ੍ਞਾਯ ਦਿਸ੍ਵਾ ਵਿਞ੍ਞੁਜਾਤਿਕੋ ਕਿਞ੍ਚਿਪਿ ਵਯਮਕਤ੍ਵਾ ਆਯਮੇਵ ਉਪ੍ਪਾਦੇਨ੍ਤੋ ਘਰੇਵਸੇ ਘਰਾਵਾਸਮਨੁਤਿਟ੍ਠੇਯ੍ਯਾਤਿ ਲੋਭਾਦੇਸਿਤਪਟਿਪਤ੍ਤਿਂ ਉਪਦਿਸਤਿ.

ਅਦਾਨਮੇਵ ਸਿਕ੍ਖਾਪੇਤ੍ਵਾ ਸਿਕ੍ਖਾਪਨਹੇਤੁ ਲੋਭਾਭਿਭੂਤਤਾਯ ਤਸ੍ਮਿਂਯੇਵ ਘਰੇ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤਿ. ਲੋਭਵਸਿਕਸ੍ਸ ਹਿ ਦੁਗ੍ਗਤਿ ਪਾਟਿਕਙ੍ਖਾ, ‘‘ਜਨਵਸਭੋ ਨਾਮ ਯਕ੍ਖੋ ਹੁਤ੍ਵਾ ਨਿਬ੍ਬਤ੍ਤੀ’’ਤਿ (ਦੀ. ਨਿ. ਅਟ੍ਠ. ੧.੧੫੦) ਏਤ੍ਥ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ਪੁਬ੍ਬਪਰਿਚਯੇਨ ਅਤਿਵਿਯ ਪਿਯਾਯਤਿ. ਵੁਤ੍ਤਞ੍ਹਿ ‘‘ਪੁਬ੍ਬੇਵ ਸਨ੍ਨਿਵਾਸੇਨਾ’’ਤਿਆਦਿ (ਜਾ. ੧.੨.੧੭੪). ਨਿਕ੍ਖਨ੍ਤੇਤਿ ਕੇਨਚਿਦੇਵ ਕਰਣੀਯੇਨ ਬਹਿ ਨਿਗ੍ਗਤੇ. ਸੁਭਂ ਮਾਣਵਂ ਅਨੁਗ੍ਗਣ੍ਹਿਤੁਕਾਮੋ ਏਕਕੋਵ ਭਗਵਾ ਪਿਣ੍ਡਾਯ ਪਾਵਿਸਿ. ਭੁਕ੍ਕਾਰਨ੍ਤਿ ‘‘ਭੁ ਭੂ’’ਤਿ ਸੁਨਖਸਦ੍ਦਕਰਣਂ. ‘‘ਭੋ ਭੋ’’ਤਿ ਬ੍ਰਾਹ੍ਮਣਸਮੁਦਾਚਾਰੇਨ ਪਰਿਭਵਿਤ੍ਵਾ ਪਰਿਭਵਨਹੇਤੁ. ‘‘ਭੋਵਾਦਿ ਨਾਮ ਸੋ ਹੋਤਿ, ਸਚੇ ਹੋਤਿ ਸਕਿਞ੍ਚਨੋ’’ਤਿ (ਧ. ਪ. ੩੯੬; ਸੁ. ਨਿ. ੬੨੫) ਹਿ ਵੁਤ੍ਤਂ. ਨਨੁ ਚ ਹੇਟ੍ਠਾ ‘‘ਅਦਾਨਮੇਵ ਸਿਕ੍ਖਾਪੇਤ੍ਵਾ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਆਹ, ਕਸ੍ਮਾ ਪਨੇਤ੍ਥ ‘‘ਪੁਬ੍ਬੇਪਿ ਮਂ ‘ਭੋ ਭੋ’ਤਿ ਪਰਿਭਵਿਤ੍ਵਾ ਸੁਨਖੋ ਜਾਤੋ’’ਤਿ ਵਦਤੀਤਿ? ਤਥਾ ਨਿਬ੍ਬਤ੍ਤਿਯਾ ਤਦੁਭਯਸਾਧਾਰਣਫਲਤ੍ਤਾ. ਆਨਿਸਂਸਫਲਞ੍ਹਿ ਸਾਧਾਰਣਕਮ੍ਮੇਨਪਿ ਜਾਤਂ, ਨ ਵਿਪਾਕਫਲਂ ਵਿਯ ਏਕਕਮ੍ਮੇਨੇਵਾਤਿ ਦਟ੍ਠਬ੍ਬਂ. ਅਵੀਚਿਂ ਗਮਿਸ੍ਸਸਿ ਕਤੋਕਾਸਸ੍ਸ ਕਮ੍ਮਸ੍ਸ ਪਟਿਬਾਹਿਤੁਮਸਕ੍ਕੁਣੇਯ੍ਯਭਾਵਤੋ. ‘‘ਜਾਨਾਤਿ ਮਂ ਸਮਣੋ ਗੋਤਮੋ’’ਤਿ ਵਿਪ੍ਪਟਿਸਾਰੀ ਹੁਤ੍ਵਾ. ਉਦ੍ਧਨਨ੍ਤਰੇਤਿ ਚੁਲ੍ਲਿਕਨ੍ਤਰੇ. ਨਨ੍ਤਿ ਸੁਨਖਂ.

ਤਂ ਪਵਤ੍ਤਿਨ੍ਤਿ ਭਗਵਤਾ ਯਥਾਵੁਤ੍ਤਕਾਰਣਂ. ਬ੍ਰਾਹ੍ਮਣਚਾਰਿਤ੍ਤਸ੍ਸ ਅਪਰਿਹਾਪਿਤਤਂ ਸਨ੍ਧਾਯ, ਤਥਾ ਪਿਤਰਂ ਉਕ੍ਕਂਸੇਨ੍ਤੋ ‘‘ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ’’ਤਿ ਆਹ. ਮੁਖਾਰੁਲ਼੍ਹਨ੍ਤਿ ਸਯਂਪਟਿਭਾਨਵਸੇਨ ਮੁਖਮਾਰੁਲ਼੍ਹਂ. ਤਂ ਪਵਤ੍ਤਿਂ ਪੁਚ੍ਛੀਤਿ ‘‘ਸੁਤਮੇਤਂ ਭੋ ਗੋਤਮ ਮਯ੍ਹਂ ਪਿਤਾ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਤੁਮ੍ਹੇਹਿ ਵੁਤ੍ਤਂ, ‘‘ਕਿਮਿਦਂ ਸਚ੍ਚਂ ਵਾ ਅਸਚ੍ਚਂ ਵਾ’’ਤਿ ਪੁਚ੍ਛਿ. ਤਥੇਵ ਵਤ੍ਵਾਤਿ ਯਥਾ ਪੁਬ੍ਬੇ ਸੁਨਖਸ੍ਸ ਵੁਤ੍ਤਂ, ਤਥੇਵ ਵਤ੍ਵਾ. ਅਵਿਸਂਵਾਦਨਤ੍ਥਨ੍ਤਿ ਸਚ੍ਚਾਪਨਤ੍ਥਂ, ‘‘ਤੋਦੇਯ੍ਯਬ੍ਰਾਹ੍ਮਣੋ ਸੁਨਖੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਵਚਨਸ੍ਸ ਅਵਿਸਂਵਾਦਨੇਨ ਅਤ੍ਤਨੋ ਅਵਿਸਂਵਾਦਿਭਾਵਦਸ੍ਸਨਤ੍ਥਨ੍ਤਿ ਵੁਤ੍ਤਂ ਹੋਤਿ. ਅਪ੍ਪੋਦਕਨ੍ਤਿ ਅਪ੍ਪਕੇਨ ਉਦਕੇਨ ਸਮ੍ਪਾਦਿਤਂ. ਮਧੁਪਾਯਾਸਨ੍ਤਿ ਸਾਦੁਰਸਂ, ਮਧੁਯੋਜਿਤਂ ਵਾ ਪਾਯਾਸਂ. ਤਥਾ ਅਕਾਸਿ, ਯਥਾ ਭਗਵਤਾ ਵੁਤ੍ਤਂ. ‘‘ਸਬ੍ਬਂ ਦਸ੍ਸੇਸੀਤਿ ਬੁਦ੍ਧਾਨੁਭਾਵੇਨ ਸੋ ਸੁਨਖੋ ਤਂ ਸਬ੍ਬਂ ਨੇਤ੍ਵਾ ਦਸ੍ਸੇਸਿ, ਨ ਜਾਤਿਸ੍ਸਰਤਾਯ. ਭਗਵਨ੍ਤਂ ਦਿਸ੍ਵਾ ਭੁਕ੍ਕਰਣਂ ਪਨ ਪੁਰਿਮਜਾਤਿਸਿਦ੍ਧਵਾਸਨਾਵਸੇਨਾ’’ਤਿ (ਦੀ. ਨਿ. ਟੀ. ੧.੪੪੪) ਏਵਂ ਆਚਰਿਯੇਨ ਵੁਤ੍ਤਂ. ਉਪਰਿਪਣ੍ਣਾਸਕੇ ਪਨ ਚੂਲ਼ਕਮ੍ਮਵਿਭਙ੍ਗਸੁਤ੍ਤਟ੍ਠਕਥਾਯਂ ‘‘ਸੁਨਖੋ ‘ਞਾਤੋਮ੍ਹਿ ਇਮਿਨਾ’ਤਿ ਰੋਦਿਤ੍ਵਾ ‘ਹੁਂ ਹੁ’ਨ੍ਤਿ ਕਰੋਨ੍ਤੋ ਧਨਨਿਧਾਨਟ੍ਠਾਨਂ ਗਨ੍ਤ੍ਵਾ ਪਾਦੇਨ ਪਥਵਿਂ ਖਣਿਤ੍ਵਾ ਸਞ੍ਞਂ ਅਦਾਸੀ’’ਤਿ (ਮ. ਨਿ. ਅਟ੍ਠ. ੩.੨੮੯) ਜਾਤਿਸ੍ਸਰਾਕਾਰਮਾਹ, ਵੀਮਂਸਿਤ੍ਵਾ ਗਹੇਤਬ੍ਬਂ.

‘‘ਭਵਪਟਿਚ੍ਛਨ੍ਨਂ ਨਾਮ ਏਵਰੂਪਂ ਸੁਨਖਪਟਿਸਨ੍ਧਿਅਨ੍ਤਰਂ ਪਾਕਟਂ ਸਮਣਸ੍ਸ ਗੋਤਮਸ੍ਸ, ਅਦ੍ਧਾ ਏਸ ਸਬ੍ਬਞ੍ਞੂ’’ਤਿ ਭਗਵਤਿ ਪਸਨ੍ਨਚਿਤ੍ਤੋ. ਅਙ੍ਗਵਿਜ੍ਜਾਪਾਠਕੋ ਕਿਰੇਸ. ਤੇਨਸ੍ਸ ਏਤਦਹੋਸਿ ‘‘ਇਮਂ ਧਮ੍ਮਪਣ੍ਣਾਕਾਰਂ ਕਤ੍ਵਾ ਸਮਣਂ ਗੋਤਮਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ, ਤਤੋ ਸੋ ਚੁਦ੍ਦਸ ਪਞ੍ਹੇ ਅਭਿਸਙ੍ਖਰਿਤ੍ਵਾ ਭਗਵਨ੍ਤਂ ਪੁਚ੍ਛਿ. ਤੇਨ ਵੁਤ੍ਤਂ ‘‘ਚੁਦ੍ਦਸ ਪਞ੍ਹੇ ਪੁਚ੍ਛਿਤ੍ਵਾ’’ਤਿ. ਤਤ੍ਥ ਚੁਦ੍ਦਸ ਪਞ੍ਹੇਤਿ ‘‘ਦਿਸ੍ਸਨ੍ਤਿ ਹਿ ਭੋ ਗੋਤਮ ਮਨੁਸ੍ਸਾ ਅਪ੍ਪਾਯੁਕਾ, ਦਿਸ੍ਸਨ੍ਤਿ ਦੀਘਾਯੁਕਾ. ਦਿਸ੍ਸਨ੍ਤਿ ਬਵ੍ਹਾਬਾਧਾ, ਅਪ੍ਪਾਬਾਧਾ. ਦੁਬ੍ਬਣ੍ਣਾ, ਵਣ੍ਣਵਨ੍ਤੋ. ਅਪ੍ਪੇਸਕ੍ਖਾ, ਮਹੇਸਕ੍ਖਾ. ਅਪ੍ਪਭੋਗਾ, ਮਹਾਭੋਗਾ. ਨੀਚਕੁਲੀਨਾ, ਉਚ੍ਚਾਕੁਲੀਨਾ. ਦਿਸ੍ਸਨ੍ਤਿ ਦੁਪ੍ਪਞ੍ਞਾ, ਦਿਸ੍ਸਨ੍ਤਿ ਪਞ੍ਞਵਨ੍ਤੋ. ਕੋ ਨੁ ਖੋ ਭੋ ਗੋਤਮ ਹੇਤੁ ਕੋ ਪਚ੍ਚਯੋ, ਯੇਨ ਮਨੁਸ੍ਸਾਨਂਯੇਵ ਸਤਂ ਮਨੁਸ੍ਸਭੂਤਾਨਂ ਦਿਸ੍ਸਨ੍ਤਿ ਹੀਨਪਣੀਤਤਾ’’ਤਿ (ਮ. ਨਿ. ੩.੨੮੯) ਇਮੇ ਚੂਲ਼ਕਮ੍ਮਵਿਭਙ੍ਗਸੁਤ੍ਤੇ ਆਗਤੇ ਚੁਦ੍ਦਸ ਪਞ੍ਹੇ. ‘‘ਕਮ੍ਮਸ੍ਸਕਾ ਮਾਣਵ ਸਤ੍ਤਾ ਕਮ੍ਮਦਾਯਾਦਾ’’ਤਿਆਦਿਨਾ (ਮ. ਨਿ. ੩.੨੮੯) ਸਙ੍ਖੇਪਤੋ, ਵਿਤ੍ਥਾਰਤੋ ਚ ਵਿਸ੍ਸਜ੍ਜਨਪਰਿਯੋਸਾਨੇ ਭਗਵਨ੍ਤਂ ਸਰਣਂ ਗਤੋ. ਅਙ੍ਗਸੁਭਤਾਯ ‘‘ਸੁਭੋ’’ ਤਿਸ੍ਸ ਨਾਮਂ. ਮਾਣਵੋਤਿ ਪਨ ਮਹਲ੍ਲਕਕਾਲੇਪਿ ਤਰੁਣਵੋਹਾਰੇਨ ਨਂ ਵੋਹਰਤਿ. ਅਤ੍ਤਨੋ ਭੋਗਗਾਮਤੋਤਿ ਤੁਦਿਗਾਮਤੋ ਆਗਨ੍ਤ੍ਵਾ ਤਙ੍ਖਣਿਕਂ ਵਸਤਿ. ਤੇਨੇਵ ਪਾਲ਼ਿਯਂ ‘‘ਕੇਨਚਿਦੇਵ ਕਰਣੀਯੇਨਾ’’ਤਿ ਵੁਤ੍ਤਂ.

੪੪੫. ‘‘ਏਕਾ ਚ ਮੇ ਕਙ੍ਖਾ ਅਤ੍ਥੀ’’ਤਿ ਇਮਿਨਾ ਉਪਰਿ ਪੁਚ੍ਛਿਯਮਾਨਸ੍ਸ ਪਞ੍ਹਸ੍ਸ ਪਗੇਵ ਤੇਨ ਅਭਿਸਙ੍ਖਤਭਾਵਂ ਦਸ੍ਸੇਤਿ. ਮਾਣਵਕਨ੍ਤਿ ਖੁਦ੍ਦਕਮਾਣਵਂ ‘‘ਏਕਪੁਤ੍ਤਕੋ, (ਮ. ਨਿ. ੨.੨੯੬, ੩੫੩; ਪਾਰਾ. ੨੬) ਪਿਯਪੁਤ੍ਤਕੋ’’ਤਿਆਦੀਸੁ ਵਿਯ ਕ-ਸਦ੍ਦਸ੍ਸ ਖੁਦ੍ਦਕਤ੍ਥੇ ਪਵਤ੍ਤਨਤੋ. ਵਿਸਭਾਗਵੇਦਨਾਤਿ ਦੁਕ੍ਖਵੇਦਨਾ. ਸਾ ਹਿ ਕੁਸਲਕਮ੍ਮਨਿਬ੍ਬਤ੍ਤੇ ਅਤ੍ਤਭਾਵੇ ਉਪ੍ਪਜ੍ਜਨਕਸੁਖਵੇਦਨਾਪਟਿਪਕ੍ਖਭਾਵਤੋ ‘‘ਵਿਸਭਾਗਵੇਦਨਾ’’ਤਿ ਚ ਕਾਯਂ ਗਾਲ਼੍ਹਾ ਹੁਤ੍ਵਾ ਬਾਧਨਤੋ ਪੀਲ਼ਨਤੋ ‘‘ਆਬਾਧੋ’’ਤਿ ਚ ਵੁਚ੍ਚਤਿ. ਕੀਦਿਸਾ ਪਨ ਸਾਤਿ ਆਹ ‘‘ਯਾ ਏਕਦੇਸੇ’’ਤਿਆਦਿ. ਏਕਦੇਸੇ ਉਪ੍ਪਜ੍ਜਿਤ੍ਵਾਤਿ ਸਰੀਰੇਕਦੇਸੇ ਉਟ੍ਠਹਿਤ੍ਵਾਪਿ ਅਪਰਿਵਤ੍ਤਿਭਾਵਕਰਣਤੋ ਅਯਪਟ੍ਟੇਨ ਆਬਨ੍ਧਿਤ੍ਵਾ ਵਿਯ ਗਣ੍ਹਾਤਿ, ਇਮਿਨਾ ਬਲਵਰੋਗੋ ਆਬਾਧੋ ਨਾਮਾਤਿ ਦਸ੍ਸੇਤਿ. ਕਿਚ੍ਛਜੀਵਿਤਕਰੋਤਿ ਅਸੁਖਜੀਵਿਤਾਵਹੋ, ਇਮਿਨਾ ਦੁਬ੍ਬਲੋ ਅਪ੍ਪਮਤ੍ਤਕੋ ਰੋਗੋ ਆਤਙ੍ਕੋ ਨਾਮਾਤਿ ਦਸ੍ਸੇਤਿ. ਉਟ੍ਠਾਨਨ੍ਤਿ ਸਯਨਨਿਸਜ੍ਜਾਦਿਤੋ ਉਟ੍ਠਹਨਂ, ਤੇਨ ਯਥਾ ਤਥਾ ਅਪਰਾਪਰਂ ਸਰੀਰਸ੍ਸ ਪਰਿਵਤ੍ਤਨਂ ਵਦਤਿ. ਗਰੁਕਨ੍ਤਿ ਭਾਰਿਯਂ ਅਕਿਚ੍ਚਸਿਦ੍ਧਿਕਂ. ਗਿਲਾਨਸ੍ਸੇਵ ਕਾਯੇ ਬਲਂ ਨ ਹੋਤੀਤਿ ਸਮ੍ਬਨ੍ਧੋ. ਲਹੁਟ੍ਠਾਨੇਨ ਚੇਤ੍ਥ ਗੇਲਞ੍ਞਾਭਾਵੋ ਪੁਚ੍ਛਿਤੋ. ਹੇਟ੍ਠਾ ਚਤੂਹਿ ਪਦੇਹਿ ਅਫਾਸੁਵਿਹਾਰਾਭਾਵਂ ਪੁਚ੍ਛਿਤ੍ਵਾਪਿ ਇਦਾਨਿ ਪੁਨ ਫਾਸੁਵਿਹਾਰਭਾਵਂ ਪੁਚ੍ਛਤਿ, ਤੇਨ ਸਵਿਸੇਸੋ ਏਤ੍ਥ ਫਾਸੁਵਿਹਾਰੋ ਪੁਚ੍ਛਿਤੋਤਿ ਵਿਞ੍ਞਾਯਤਿ. ਅਸਤਿਪਿ ਹਿ ਅਤਿਸਯਤ੍ਥਜੋਤਨੇ ਸਦ੍ਦੇ ਅਤ੍ਥਾਪਤ੍ਤਿਤੋ ਅਤਿਸਯਤ੍ਥੋ ਲਬ੍ਭਤੇਵ ਯਥਾ ‘‘ਅਭਿਰੂਪਸ੍ਸ ਕਞ੍ਞਾ ਦਾਤਬ੍ਬਾ’’ਤਿ. ਤੇਨਾਹ ‘‘ਗਮਨਟ੍ਠਾਨਾ’’ਤਿਆਦਿ. ਪੁਰਿਮਂ ਆਣਾਪਨਵਚਨਂ, ਇਦਂ ਪਨ ਪੁਚ੍ਛਿਤਬ੍ਬਾਕਾਰਦਸ੍ਸਨਨ੍ਤਿ ਅਯਮਿਮੇਸਂ ਵਿਸੇਸੋਤਿ ਦਸ੍ਸੇਤਿ ‘‘ਅਥਸ੍ਸਾ’’ਤਿਆਦਿਨਾ.

੪੪੭. ਕਾਲੋ ਨਾਮ ਉਪਸਙ੍ਕਮਨਸ੍ਸ ਯੁਤ੍ਤਪਤ੍ਤਕਾਲੋ, ਸਮਯੋ ਨਾਮ ਤਸ੍ਸੇਵ ਪਚ੍ਚਯਸਾਮਗ੍ਗੀ, ਅਤ੍ਥਤੋ ਪਨੇਸ ਤਜ੍ਜਂ ਸਰੀਰਬਲਞ੍ਚੇਵ ਤਪ੍ਪਚ੍ਚਯਪਰਿਸ੍ਸਯਾਭਾਵੋ ਚ. ਉਪਾਦਾਨਂ ਨਾਮ ਞਾਣੇਨ ਤੇਸਂ ਗਹਣਂ ਸਲ੍ਲਕ੍ਖਣਨ੍ਤਿ ਆਹ ‘‘ਪਞ੍ਞਾਯਾ’’ਤਿਆਦਿ. ‘‘ਸ੍ਵੇ ਗਮਨਕਾਲੋ ਭਵਿਸ੍ਸਤੀ’’ਤਿ ਇਮਿਨਾ ਕਾਲਂ, ‘‘ਕਾਯੇ’’ਤਿਆਦਿਨਾ ਸਮਯਞ੍ਚ ਸਰੂਪਤੋ ਦਸ੍ਸੇਤਿ. ਫਰਿਸ੍ਸਤੀਤਿ ਫਰਣਵਸੇਨ ਠਸ੍ਸਤਿ.

੪੪੮. ਚੇਤਿਯਰਟ੍ਠੇਤਿ ਚੇਤਿਰਟ੍ਠੇ. ਯ-ਕਾਰੇਨ ਹਿ ਪਦਂ ਵਡ੍ਢੇਤ੍ਵਾ ਏਵਂ ਵੁਤ੍ਤਂ. ‘‘ਚੇਤਿਰਟ੍ਠਤੋ ਅਞ੍ਞਂ ਵਿਸੁਂਯੇਵੇਕਂ ਰਟ੍ਠ’’ਨ੍ਤਿਪਿ ਵਦਨ੍ਤਿ. ‘‘ਯਸ੍ਮਾ ਮਰਣਂ ਨਾਮ ਤਾਦਿਸਾਨਂ ਦਸਬਲਾਨਂ ਰੋਗਵਸੇਨੇਵ ਹੋਤਿ, ਤਸ੍ਮਾ ਯੇਨ ਰੋਗੇਨ ਤਂ ਜਾਤਂ, ਤਸ੍ਸ ਸਰੂਪਪੁਚ੍ਛਾ, ਕਾਰਣਪੁਚ੍ਛਾ, ਮਰਣਹੇਤੁਕਚਿਤ੍ਤਸਨ੍ਤਾਪਪੁਚ੍ਛਾ, ਤਸ੍ਸ ਚ ਸਨ੍ਤਾਪਸ੍ਸ ਸਬ੍ਬਲੋਕਸਾਧਾਰਣਤਾ, ਤਥਾ ਮਰਣਸ੍ਸ ਚ ਅਪ੍ਪਟਿਕਰਣਤਾ’’ਤਿ ਏਵਮਾਦਿਨਾ ਮਰਣਪਟਿਸਞ੍ਞੁਤ੍ਤਂ ਸਮ੍ਮੋਦਨੀਯਂ ਕਥਂ ਕਥੇਸੀਤਿ ਦਸ੍ਸੇਤੁਂ ‘‘ਭੋ ਆਨਨ੍ਦਾ’’ਤਿਆਦਿ ਵੁਤ੍ਤਂ. ‘‘ਕੋ ਨਾਮਾ’’ਤਿਆਦਿਨਾ ਹਿ ਰੋਗਂ ਪੁਚ੍ਛਤਿ, ‘‘ਕਿਂ ਭਗਵਾ ਪਰਿਭੁਞ੍ਜੀ’’ਤਿ ਇਮਿਨਾ ਕਾਰਣਂ, ‘‘ਅਪਿਚਾ’’ਤਿਆਦਿਨਾ ਚਿਤ੍ਤਸਨ੍ਤਾਪਂ, ‘‘ਸਤ੍ਥਾ ਨਾਮਾ’’ਤਿਆਦਿਨਾ ਤਸ੍ਸ ਸਬ੍ਬਲੋਕਸਾਧਾਰਣਤਂ, ‘‘ਏਕਾ ਦਾਨੀ’’ਤਿਆਦਿਨਾ ਮਰਣਸ੍ਸ ਅਪ੍ਪਟਿਕਰਣਤਂ ਦਸ੍ਸੇਤੀਤਿ ਦਟ੍ਠਬ੍ਬਂ. ਮਹਾਜਾਨੀਤਿ ਮਹਾਹਾਨਿ. ਯਤ੍ਰਾਤਿ ਯੇਨ ਕਾਰਣੇਨ ਪਰਿਨਿਬ੍ਬੁਤੋ, ਤੇਨ ਕੋ ਦਾਨਿ ਅਞ੍ਞੋ ਮਰਣਾ ਮੁਚ੍ਚਿਸ੍ਸਤੀਤਿਆਦਿਨਾ ਯੋਜੇਤਬ੍ਬਂ. ਇਦਾਨੀਤਿ ਚ ਅਤ੍ਤਨੋ ਮਨਸਿਕਾਰਂ ਪਤਿ ਵੋਹਾਰਮਤ੍ਤੇਨ ਵੁਤ੍ਤਂ. ਲਜ੍ਜਿਸ੍ਸਤੀਤਿ ਲਜ੍ਜਾ ਵਿਯ ਭਵਿਸ੍ਸਤਿ, ਵਿਜ੍ਜਿਸ੍ਸਤੀਤਿ ਅਤ੍ਥੋ. ਪੀਤਭੇਸਜ੍ਜਾਨੁਰੂਪਂ ਆਹਾਰਭੋਜਨਂ ਪੋਰਾਣਾਚਿਣ੍ਣਨ੍ਤਿ ਆਹ ‘‘ਪੀਤ…ਪੇ… ਦਤ੍ਵਾ’’ਤਿ.

ਹੁਤ੍ਵਾਤਿ ਪਾਠਸੇਸੋ ਸਨ੍ਤਿਕਾਵਚਰਭਾਵਸ੍ਸ ਵਿਸੇਸਨਤੋ. ਮਾਰੋ ਪਾਪਿਮਾ ਵਿਯ ਨ ਰਨ੍ਧਗਵੇਸੀ, ਉਤ੍ਤਰਮਾਣਵੋ ਵਿਯ ਚ ਨ ਵੀਮਂਸਨਾਧਿਪ੍ਪਾਯੋ, ਅਪਿ ਤੁ ਖਲੁ ਉਪਟ੍ਠਾਕੋ ਹੁਤ੍ਵਾ ਸਨ੍ਤਿਕਾਵਚਰੋਤਿ ਹਿ ਵਿਸੇਸੇਤਿ. ਨ ਰਨ੍ਧਗਵੇਸੀਤਿ ਨ ਛਿਦ੍ਦਗਵੇਸੀ. ਯੇਸੁ ਧਮ੍ਮੇਸੂਤਿ ਵਿਮੋਕ੍ਖੁਪਾਯੇਸੁ ਨਿਯ੍ਯਾਨਿਕਧਮ੍ਮੇਸੁ. ਧਰਨ੍ਤੀਤਿ ਅਧੁਨਾ ਤਿਟ੍ਠਨ੍ਤਿ, ਪਵਤ੍ਤਨ੍ਤੀਤਿ ਅਤ੍ਥੋ.

੪੪੯. ਅਤ੍ਥਤੋ ਪਯੁਤ੍ਤਤਾਯ ਸਦ੍ਦਪਯੋਗਸ੍ਸ ਸਦ੍ਦਪਬਨ੍ਧਲਕ੍ਖਣਾਨਿ ਤੀਣਿ ਪਿਟਕਾਨਿ ਤਦਤ੍ਥਭੂਤੇਹਿ ਸੀਲਾਦੀਹਿ ਤੀਹਿ ਧਮ੍ਮਕ੍ਖਨ੍ਧੇਹਿ ਸਙ੍ਗਯ੍ਹਨ੍ਤੀਤਿ ਵੁਤ੍ਤਂ ‘‘ਤੀਣਿ ਪਿਟਕਾਨਿ ਤੀਹਿ ਖਨ੍ਧੇਹਿ ਸਙ੍ਗਹੇਤ੍ਵਾ’’ਤਿ. ਸਙ੍ਖਿਤ੍ਤੇਨ ਕਥਿਤਨ੍ਤਿ ‘‘ਤਿਣ੍ਣਂ ਖੋ ਮਾਣਵ ਖਨ੍ਧਾਨ’’ਨ੍ਤਿ ਏਵਂ ਗਣਨਤੋ, ਸਾਮਞ੍ਞਤੋ ਚ ਸਙ੍ਖੇਪੇਨੇਵ ਕਥਿਤਂ. ‘‘ਕਤਮੇਸਂ ਤਿਣ੍ਣ’’ਨ੍ਤਿ ਅਯਂ ਅਦਿਟ੍ਠਜੋਤਨਾਪੁਚ੍ਛਾਯੇਵ, ਨ ਕਥੇਤੁਕਮ੍ਯਤਾਪੁਚ੍ਛਾ. ਮਾਣਵਸ੍ਸੇਵ ਹਿ ਅਯਂ ਪੁਚ੍ਛਾ, ਨ ਥੇਰਸ੍ਸਾਤਿ ਆਹ ‘‘ਮਾਣਵੋ’’ਤਿਆਦਿ. ਅਞ੍ਞਤ੍ਥ ਪਨ ਈਦਿਸੇਸੁ ਠਾਨੇਸੁ ਕਥੇਤੁਕਮ੍ਯਤਾਪੁਚ੍ਛਾਯੇਵ ਦਿਸ੍ਸਤਿ, ਨ ਅਦਿਟ੍ਠਜੋਤਨਾਪੁਚ੍ਛਾ. ਇਧ ਪਨ ਅਟ੍ਠਕਥਾਯਂ ਏਵਂ ਵੁਤ੍ਤਂ, ਤਦੇਤਂ ਅਟ੍ਠਕਥਾਪਮਾਣਤੋ ਪਚ੍ਚੇਤਬ੍ਬਂ. ਤਦਾ ਪਵਤ੍ਤਮਾਨਞ੍ਹਿ ਪਚ੍ਚਕ੍ਖਂ ਕਤ੍ਵਾ ਅਟ੍ਠਕਥਮ੍ਪਿ ਸਙ੍ਗਹਮਾਰੋਪਿਂਸੁ. ਕਥੇਤੁਕਮ੍ਯਤਾਪੁਚ੍ਛਾਭਾਵੇ ਪਨਸ੍ਸ ਥੇਰਸ੍ਸੇਵ ਵਚਨਤਾ ਸਿਯਾ.

ਸੀਲਕ੍ਖਨ੍ਧਵਣ੍ਣਨਾ

੪੫੦-੪੫੩. ਸੀਲਕ੍ਖਨ੍ਧਸ੍ਸਾਤਿ ਏਤ੍ਥ ਪਦਤ੍ਥਵਿਪਲ੍ਲਾਸਕਾਰੀ ਇਤਿਸਦ੍ਦੋ ਲੁਤ੍ਤੋ, ਅਤ੍ਥਨਿਦ੍ਦੇਸੋ ਵਿਯ ਸਦ੍ਦਨਿਦ੍ਦੇਸੋ ਵਾ, ਯਥਾਰੁਤੋ ਚ ਇਤਿਸਦ੍ਦੋ ਆਦ੍ਯਤ੍ਥੋ, ਪਕਾਰਤ੍ਥੋ ਵਾ, ਤੇਨ ‘‘ਅਰਿਯਸ੍ਸ ਸਮਾਧਿਕ੍ਖਨ੍ਧਸ੍ਸ…ਪੇ… ਪਤਿਟ੍ਠਪੇਸੀ’’ਤਿ ਅਯਂ ਪਾਠੋ ਗਹਿਤੋਤਿ ਦਟ੍ਠਬ੍ਬਂ. ਤੇਨ ਵੁਤ੍ਤਂ ‘‘ਤੇਸੁ ਦਸ੍ਸਿਤੇਸੂ’’ਤਿ, ਤੇਸੁ ਤੀਸੁ ਖਨ੍ਧੇਸੁ ਉਦ੍ਦੇਸਵਸੇਨ ਦਸ੍ਸਿਤੇਸੂਤਿ ਅਤ੍ਥੋ. ਭਗਵਤਾ ਵੁਤ੍ਤਨਯੇਨੇਵਾਤਿ ਸਾਮਞ੍ਞਫਲਾਦੀਸੁ (ਦੀ. ਨਿ. ੧.੧੯੪) ਦੇਸਿਤਨਯੇਨੇਵ, ਤੇਨ ਇਮਸ੍ਸ ਸੁਤ੍ਤਸ੍ਸ ਬੁਦ੍ਧਭਾਸਿਤਭਾਵਂ ਦਸ੍ਸੇਤੀਤਿ ਵੇਦਿਤਬ੍ਬਂ. ਸਾਸਨੇ ਨ ਸੀਲਮੇਵ ਸਾਰੋਤਿ ਅਰਿਯਮਗ੍ਗਸਾਰੇ ਭਗਵਤੋ ਸਾਸਨੇ ਯਥਾਦਸ੍ਸਿਤਂ ਸੀਲਂ ਸਾਰੋ ਏਵ ਨ ਹੋਤਿ ਸਾਰਵਤੋ ਮਹਤੋ ਰੁਕ੍ਖਸ੍ਸ ਪਪਟਿਕਟ੍ਠਾਨਿਕਤ੍ਤਾ. ਅਟ੍ਠਾਨਪਯੁਤ੍ਤੋ ਹਿ ਏਵਸਦ੍ਦੋ ਯਥਾਠਾਨੇ ਨ ਯੋਜੇਤਬ੍ਬੋ. ਯਜ੍ਜੇਵਂ ਕਸ੍ਮਾ ਤਮਿਧ ਗਹਿਤਨ੍ਤਿ ਆਹ ‘‘ਕੇਵਲ’’ਨ੍ਤਿਆਦਿ. ਝਾਨਾਦਿਉਤ੍ਤਰਿਮਨੁਸ੍ਸਧਮ੍ਮੇ ਅਧਿਗਨ੍ਤੁਕਾਮਸ੍ਸ ਅਧਿਟ੍ਠਾਨਮਤ੍ਤਂ ਤਤ੍ਥ ਅਪ੍ਪਤਿਟ੍ਠਿਤਸ੍ਸ ਤੇਸਮਸਮ੍ਭਵਤੋ. ਵੁਤ੍ਤਞ੍ਹਿ ‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ’’ਤਿਆਦਿ (ਸਂ. ਨਿ. ੧.੨੩, ੧੯੨; ਪੇਟਕੋ. ੨੨) ਅਥ ਵਾ ਸਾਸਨੇ ਨ ਸੀਲਮੇਵ ਸਾਰੋਤਿ ਕਾਮਞ੍ਚੇਤ੍ਥ ਸਾਸਨੇ ਮਗ੍ਗਫਲਸੀਲਸਙ੍ਖਾਤਂ ਲੋਕੁਤ੍ਤਰਸੀਲਮ੍ਪਿ ਸਾਰਮੇਵ, ਤਥਾਪਿ ਨ ਸੀਲਕ੍ਖਨ੍ਧੋ ਏਵ ਸਾਰੋ ਹੋਤਿ, ਅਥ ਖੋ ਸਮਾਧਿਕ੍ਖਨ੍ਧੋਪਿ ਪਞ੍ਞਾਕ੍ਖਨ੍ਧੋਪਿ ਸਾਰੋ ਏਵਾਤਿ ਏਵਮ੍ਪੇਤ੍ਥ ਯਥਾਪਯੁਤ੍ਤੇਨ ਏਵਸਦ੍ਦੇਨ ਅਤ੍ਥੋ ਵੇਦਿਤਬ੍ਬੋ, ਪੁਰਿਮੋਯੇਵ ਪਨਤ੍ਥੋ ਯੁਤ੍ਤਤਰੋ. ਤਥਾ ਹਿ ਵੁਤ੍ਤਂ ‘‘ਇਤੋ ਉਤ੍ਤਰੀ’’ਤਿਆਦਿ. ਅਞ੍ਞਮ੍ਪਿ ਕਤ੍ਤਬ੍ਬਨ੍ਤਿ ਸੇਸਖਨ੍ਧਦ੍ਵਯਂ.

ਸਮਾਧਿਕ੍ਖਨ੍ਧਵਣ੍ਣਨਾ

੪੫੪. ਕਸ੍ਮਾ ਪਨੇਤ੍ਥ ਥੇਰੋ ਸਮਾਧਿਕ੍ਖਨ੍ਧਂ ਪੁਟ੍ਠੋਪਿ ਇਨ੍ਦ੍ਰਿਯਸਂਵਰਾਦਿਕੇ ਵਿਸ੍ਸਜ੍ਜੇਸਿ, ਨਨੁ ਏਵਂ ਸਨ੍ਤੇ ਅਞ੍ਞਂ ਪੁਟ੍ਠੋ ਅਞ੍ਞਂ ਬ੍ਯਾਕਰੋਨ੍ਤੋ ਅਮ੍ਬਂ ਪੁਟ੍ਠੋ ਲਬੁਜਂ ਬ੍ਯਾਕਰੋਨ੍ਤੋ ਵਿਯ ਹੋਤੀਤਿ ਈਦਿਸੀ ਚੋਦਨਾ ਇਧ ਅਨੋਕਾਸਾਤਿ ਦਸ੍ਸੇਨ੍ਤੋ ‘‘ਕਥਞ੍ਚ…ਪੇ… ਆਰਭੀ’’ਤਿ ਆਹ, ਤੇਨੇਤ੍ਥ ਇਨ੍ਦ੍ਰਿਯਸਂਵਰਾਦਯੋਪਿ ਸਮਾਧਿਉਪਕਾਰਕਤਂ ਉਪਾਦਾਯ ਸਮਾਧਿਕ੍ਖਨ੍ਧਪਕ੍ਖਿਕਭਾਵੇਨ ਉਦ੍ਦਿਟ੍ਠਾਤਿ ਦਸ੍ਸੇਤਿ. ਯੇ ਤੇ ਇਨ੍ਦ੍ਰਿਯਸਂਵਰਾਦਯੋਤਿ ਸਮ੍ਬਨ੍ਧੋ. ਰੂਪਾਵਚਰਚਤੁਤ੍ਥਜ੍ਝਾਨਦੇਸਨਾਨਨ੍ਤਰਂ ਅਭਿਞ੍ਞਾਦੇਸਨਾਯ ਅਵਸਰੋਤਿ ਕਤ੍ਵਾ ਰੂਪਜ੍ਝਾਨਾਨੇਵ ਆਗਤਾਨਿ,ਨ ਅਰੂਪਜ੍ਝਾਨਾਨਿ. ਰੂਪਾਵਚਰਚਤੁਤ੍ਥਜ੍ਝਾਨਪਾਦਿਕਾ ਹਿ ਸਪਰਿਭਣ੍ਡਾ ਛਪਿ ਅਭਿਞ੍ਞਾਯੋ. ਯਸ੍ਮਾ ਪਨ ਲੋਕਿਯਾਭਿਞ੍ਞਾਯੋ ਇਜ੍ਝਮਾਨਾ ਅਟ੍ਠਸੁ ਸਮਾਪਤ੍ਤੀਸੁ ਚੁਦ੍ਦਸਵਿਧੇਨ ਚਿਤ੍ਤਪਰਿਦਮਨੇਨ ਵਿਨਾ ਨ ਇਜ੍ਝਨ੍ਤਿ, ਤਸ੍ਮਾ ਅਭਿਞ੍ਞਾਸੁ ਦੇਸਿਯਮਾਨਾਸੁ ਅਰੂਪਜ੍ਝਾਨਾਨਿਪਿ ਦੇਸਿਤਾਨੇਵ ਹੋਨ੍ਤਿ ਨਾਨਨ੍ਤਰਿਕਭਾਵਤੋ. ਤੇਨਾਹ ‘‘ਆਨੇਤ੍ਵਾ ਪਨ ਦੀਪੇਤਬ੍ਬਾਨੀ’’ਤਿ, ਵੁਤ੍ਤਨਯੇਨ ਦੇਸਿਤਾਨੇਵ ਕਤ੍ਵਾ ਸਂਵਣ੍ਣਕੇਹਿ ਪਕਾਸੇਤਬ੍ਬਾਨੀਤਿ ਅਤ੍ਥੋ. ਅਟ੍ਠਕਥਾਯਂ ਪਨ ‘‘ਚਤੁਤ੍ਥਜ੍ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ ਇਮਿਨਾਵ ਅਰੂਪਜ੍ਝਾਨਮ੍ਪਿ ਸਙ੍ਗਹਿਤਨ੍ਤਿ ਦਸ੍ਸੇਤੁਂ ‘‘ਚਤੁਤ੍ਥਜ੍ਝਾਨੇਨ ਹੀ’’ਤਿਆਦਿ ਵੁਤ੍ਤਂ. ਚਤੁਤ੍ਥਜ੍ਝਾਨਮੇਵ ਹਿ ਰੂਪਵਿਰਾਗਭਾਵਨਾਵਸੇਨ ਪਵਤ੍ਤਂ ‘‘ਅਰੂਪਜ੍ਝਾਨ’’ਨ੍ਤਿ ਵੁਚ੍ਚਤਿ.

੪੭੧-੪੮੦. ਨ ਚਿਤ੍ਤੇਕਗ੍ਗਤਾਮਤ੍ਤਕੇਨੇਵਾਤਿ ਏਤ੍ਥ ਹੇਟ੍ਠਾ ਵੁਤ੍ਤਨਯਾਨੁਸਾਰੇਨ ਠਾਨਾਠਾਨਪਯੁਤ੍ਤਸ੍ਸ ਏਵਸਦ੍ਦਸ੍ਸਾਨੁਰੂਪਮਤ੍ਥੋ ਵੇਦਿਤਬ੍ਬੋ. ਲੋਕਿਯਸਮਾਧਿਕ੍ਖਨ੍ਧਸ੍ਸ ਪਨ ਅਧਿਪ੍ਪੇਤਤ੍ਤਾ ‘‘ਨ ਚਿਤ੍ਤੇਕਗ੍ਗਤਾ…ਪੇ… ਅਤ੍ਥੀ’’ਤਿ ਵੁਤ੍ਤਂ. ਅਰਿਯੋ ਸਮਾਧਿਕ੍ਖਨ੍ਧੋਤਿ ਏਤ੍ਥ ਹਿ ਅਰਿਯਸਦ੍ਦੋ ਸੁਦ੍ਧਮਤ੍ਤਪਰਿਯਾਯੋਵ, ਨ ਲੋਕੁਤ੍ਤਰਪਰਿਯਾਯੋ. ਯਥਾ ਚੇਤ੍ਥ, ਤਥਾ ਅਰਿਯੋ ਸੀਲਕ੍ਖਨ੍ਧੋਤਿ ਏਤ੍ਥਾਪਿ. ਇਤੋਤਿ ਪਞ੍ਞਾਕ੍ਖਨ੍ਧਤੋ, ਸੋ ਚ ਉਕ੍ਕਟ੍ਠਤੋ ਅਰਹਤ੍ਤਫਲਪਰਿਯਾਪਨ੍ਨੋ ਏਵਾਤਿ ਆਹ ‘‘ਅਰਹਤ੍ਤਪਰਿਯੋਸਾਨ’’ਨ੍ਤਿਆਦਿ. ਲੋਕਿਯਾਭਿਞ੍ਞਾਪਟਿਸਮ੍ਭਿਦਾਹਿ ਵਿਨਾਪਿ ਹਿ ਅਰਹਤ੍ਤੇ ਅਧਿਗਤੇ ‘‘ਨਤ੍ਥੇਵ ਉਤ੍ਤਰਿਕਰਣੀਯ’’ਨ੍ਤਿ ਸਕ੍ਕਾ ਵਤ੍ਤੁਂ ਯਦਤ੍ਥਂ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤਿ, ਤਸ੍ਸ ਸਿਦ੍ਧਤ੍ਤਾ. ਇਧ ਪਨ ਲੋਕਿਯਾਭਿਞ੍ਞਾਯੋਪਿ ਆਗਤਾਯੇਵ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਪਰਮਸੁਖੁਮਗਮ੍ਭੀਰਦੁਰਨੁਬੋਧਤ੍ਥਪਰਿਦੀਪਨਾਯ ਸੁਵਿਮਲਵਿਪੁਲਪਞ੍ਞਾਵੇਯ੍ਯਤ੍ਤਿਯਜਨਨਾਯ ਸਾਧੁਵਿਲਾਸਿਨਿਯਾ ਨਾਮ ਲੀਨਤ੍ਥਪਕਾਸਨਿਯਾ ਸੁਭਸੁਤ੍ਤਵਣ੍ਣਨਾਯ ਲੀਨਤ੍ਥਪਕਾਸਨਾ.

ਸੁਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.