੨. ਪਵਤ੍ਤਿਵਾਰਵਣ੍ਣਨਾ

੧੮੬. ਅਞ੍ਞਧਮ੍ਮਨਿਸ੍ਸਯੇਨਾਤਿ ‘‘ਯੋ ਤੇਸਂ ਰੂਪੀਨਂ ਧਮ੍ਮਾਨਂ ਆਯੁ ਠਿਤੀ’’ਤਿਆਦਿਨਾ (ਧ. ਸ. ੬੩੪) ਅਞ੍ਞਧਮ੍ਮਨਿਸ੍ਸਯੇਨ ਗਹੇਤਬ੍ਬਂ. ਪਵਤ੍ਤਿਞ੍ਚ ਗਹੇਤ੍ਵਾ ਗਤੇਸੁ ਵਿਸ੍ਸਜ੍ਜਨੇਸੁ, ਚੁਤਿਪਟਿਸਨ੍ਧਿਯੋ ਗਹੇਤ੍ਵਾ ਗਤੇਸੁ ਯੋਜਨਾ ਨ ਲਬ੍ਭਤੀਤਿ ਅਧਿਪ੍ਪਾਯੋ. ਅਲਬ੍ਭਮਾਨਾ ਚ ਸੁਖਦੁਕ੍ਖਦੋਮਨਸ੍ਸਿਨ੍ਦ੍ਰਿਯੇਹੇਵ ਨ ਲਬ੍ਭਤਿ. ਤਂਮੂਲਕਾ ਚ ਨਯਾਤਿ ਸੁਖਿਨ੍ਦ੍ਰਿਯਾਦਿਮੂਲਕਾ ਚ ਨਯਾ. ਤੇਹੀਤਿ ਸੁਖਿਨ੍ਦ੍ਰਿਯਾਦੀਹਿ. ਯੋਜਨਾਤਿ ‘‘ਪਵਤ੍ਤੇ ਸੁਖਿਨ੍ਦ੍ਰਿਯਵਿਪ੍ਪਯੁਤ੍ਤਚਿਤ੍ਤਸ੍ਸ ਉਪ੍ਪਾਦਕ੍ਖਣੇ’’ਤਿਆਦਿਨਾ ਉਪ੍ਪਜ੍ਜਮਾਨੇਹਿ ਯੋਜਨਾ. ਤਂਮੂਲਕਾ ਚ ਤਥਾਯੋਜਨਾਮੂਲਭੂਤਾ ਚ ਨਯਾ ਜੀਵਿਤਿਨ੍ਦ੍ਰਿਯਾਦਿਮੂਲਕਾ ਚ ਨਯਾ. ਪਾਕਟਾਯੇਵਾਤਿ ਪਾਲ਼ਿਗਤਿਯਾ ਏਵ ਵਿਞ੍ਞਾਯਮਾਨਯੋਜਨਤ੍ਤਾ ਸੁਵਿਞ੍ਞੇਯ੍ਯਾ ਏਵ.

ਤਂ ਵਚਨਂ. ਸੋਮਨਸ੍ਸਵਿਰਹਿਤਸਚਕ੍ਖੁਕਪਟਿਸਨ੍ਧਿਨਿਦਸ੍ਸਨਵਸੇਨਾਤਿ ਸੋਮਨਸ੍ਸਵਿਰਹਿਤਸਚਕ੍ਖੁਕਪਟਿਸਨ੍ਧਿਯੇਵ ਨਿਦਸ੍ਸਨਨ੍ਤਿ ਯੋਜੇਤਬ੍ਬਂ. ਕਥਂ ਪਨੇਤਂ ਜਾਨਿਤਬ੍ਬਂ ‘‘ਨਿਦਸ੍ਸਨਮਤ੍ਤਮੇਤਂ, ਨ ਪਨ ਗਣਨਪਰਿਚ੍ਛਿਨ੍ਦਨ’’ਨ੍ਤਿ ਆਹ ‘‘ਨ ਹਿ ਚਤੁਨ੍ਨਂਯੇਵਾਤਿ ਨਿਯਮੋ ਕਤੋ’’ਤਿ. ਤਂਸਮਾਨਲਕ੍ਖਣਾਤਿ ਤਾਯ ਸਚਕ੍ਖੁਕਪਟਿਸਨ੍ਧਿਤਾਯ ਸਮਾਨਲਕ੍ਖਣਾਤਿ ਪਰਿਤ੍ਤਵਿਪਾਕਗ੍ਗਹਣਂ. ਤਤ੍ਥ ਸਸੋਮਨਸ੍ਸਪਟਿਸਨ੍ਧਿਯੋ ਸਨ੍ਧਾਯ ਉਪੇਕ੍ਖਾਪਟਿਸਨ੍ਧਿਯੋ ਨਿਦਸ੍ਸਨਭਾਵੇਨ ਵੁਤ੍ਤਾਤਿ ਕੇਚਿ. ਪਰਿਤ੍ਤਵਿਪਾਕਪਟਿਸਨ੍ਧਿ ਚ ਕੁਸਲਵਿਪਾਕਾਹੇਤੁਕਪਟਿਸਨ੍ਧਿ ਵੇਦਿਤਬ੍ਬਾ. ਸਾਪਿ ਹਿ ਸਚਕ੍ਖੁਕਾ ਸਿਯਾ. ਤਂਸਮਾਨਲਕ੍ਖਣਾਤਿ ਵਾ ਤਾਯ ਉਪੇਕ੍ਖਾਸਹਗਤਾਯ ਸਮਾਨਲਕ੍ਖਣਾ ਯਥਾਵੁਤ੍ਤਅਹੇਤੁਕਪਟਿਸਨ੍ਧਿ ਚ ਪਞ੍ਚਮਜ੍ਝਾਨਪਟਿਸਨ੍ਧਿ ਚ. ਯਦਿ ਏਵਂ ‘‘ਚਤੁਨ੍ਨ’’ਨ੍ਤਿ ਕਸ੍ਮਾ ਗਣਨਪਰਿਚ੍ਛੇਦੋਤਿ ਆਹ ‘‘ਕਾਮਾਵਚਰੇ…ਪੇ… ਨਿਦਸ੍ਸਨਂ ਕਤ’’ਨ੍ਤਿ. ਤੇਨਾਤਿ ਉਪੇਕ੍ਖਾਸਹਗਤਮਹਾਵਿਪਾਕਨਿਦਸ੍ਸਨੇਨ, ਯੇਹਿ ਸਮਾਨਤਾਯ ਇਮੇ ਨਿਦਸ੍ਸਨਭਾਵੇਨ ਵੁਤ੍ਤਾ, ਤੇ ਏਕਂਸੇਨ ਤਂਸਭਾਵਾ ਏਵਾਤਿ ਅਯਮੇਤ੍ਥ ਅਧਿਪ੍ਪਾਯੋ. ਤੇਨਾਹ ‘‘ਯਥਾ ਸਸੋਮਨਸ੍ਸ…ਪੇ… ਤੋ ਹੋਤੀ’’ਤਿ.

ਨਨੁ ਚ ਗਬ੍ਭਸੇਯ੍ਯਕੇਸੁ ਅਯਮਤ੍ਥੋ ਏਕਂਸਤੋ ਨ ਲਬ੍ਭਤੀਤਿ ਆਸਙ੍ਕਂ ਸਨ੍ਧਾਯਾਹ ‘‘ਗਬ੍ਭਸੇਯ੍ਯਕਾਨਞ੍ਚ…ਪੇ… ਦਸ੍ਸਿਤਾ ਹੋਤੀ’’ਤਿ. ਤੇਨਾਹ ‘‘ਸਚਕ੍ਖੁਕਾਨ’’ਨ੍ਤਿਆਦਿ. ਤਤ੍ਥ ਯਦਿ ਸਹੇਤੁਕਪਟਿਸਨ੍ਧਿਕਾਨਂ ਕਾਮਾਵਚਰਾਨਂ ਨਿਯਮਤੋ ਸਚਕ੍ਖੁਕਾਦਿਭਾਵਦਸ੍ਸਨਂ ਗਬ੍ਭਸੇਯ੍ਯਕਵਸੇਨ ਲਬ੍ਭੇਯ੍ਯ, ਯੁਤ੍ਤਮੇਤਂ ਸਿਯਾਤਿ ਚੋਦਨਂ ਸਨ੍ਧਾਯਾਹ ‘‘ਗਬ੍ਭਸੇਯ੍ਯਕੇਪਿ ਹੀ’’ਤਿਆਦਿ. ਤਥਾ ਆਯਤਨਯਮਕੇ ਦਸ੍ਸਿਤਨ੍ਤਿ ਇਦਂ ਆਯਤਨਯਮਕਵਣ੍ਣਨਾਯਂ ਅਤ੍ਤਨਾ ਵੁਤ੍ਤਂ ‘‘ਏਵਞ੍ਚ ਕਤ੍ਵਾ ਇਨ੍ਦ੍ਰਿਯਯਮਕੇ’’ਤਿਆਦਿਵਚਨਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਹਿ ਸੋਮਨਸ੍ਸਿਨ੍ਦ੍ਰਿਯੁਪ੍ਪਾਦਕਕਮ੍ਮਸ੍ਸ ਏਕਨ੍ਤੇਨ ਚਕ੍ਖੁਨ੍ਦ੍ਰਿਯੁਪ੍ਪਾਦਨਤੋ ਗਬ੍ਭੇਪਿ ਯਾਵ ਚਕ੍ਖੁਨ੍ਦ੍ਰਿਯੁਪ੍ਪਤ੍ਤਿ, ਤਾਵ ਉਪ੍ਪਜ੍ਜਮਾਨਤਾਯ ‘‘ਅਭਿਨਨ੍ਦਿਤਬ੍ਬਤ੍ਤਾ’’ਤਿ ਵੁਤ੍ਤਂ. ਸਨ੍ਨਿਟ੍ਠਾਨੇਨ ਸਙ੍ਗਹਿਤਾਨਨ੍ਤਿ ‘‘ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਤੀ’’ਤਿ ਏਤੇਨ ਸਨ੍ਨਿਟ੍ਠਾਨੇਨ ਸਙ੍ਗਹਿਤਾਨਂ. ਇਤ੍ਥੀਨਂ ਅਘਾਨਕਾਨਂ ਉਪਪਜ੍ਜਨ੍ਤੀਨਨ੍ਤਿ ਆਦੀਸੂਤਿ ਆਦਿ-ਸਦ੍ਦੇਨ ‘‘ਇਤ੍ਥੀਨਂ ਅਚਕ੍ਖੁਕਾਨਂ ਉਪਪਜ੍ਜਨ੍ਤੀਨ’’ਨ੍ਤਿਆਦਿਂ ਸਙ੍ਗਣ੍ਹਾਤਿ. ਤੇ ਏਵਾਤਿ ਗਬ੍ਭਸੇਯ੍ਯਕਾ ਏਵ.

ਤਂਸਮਾਨਲਕ੍ਖਣਨ੍ਤਿ ਸੋਪੇਕ੍ਖਅਚਕ੍ਖੁਕਪਟਿਸਨ੍ਧਿਭਾਵੇਨ ਸਮਾਨਲਕ੍ਖਣਂ. ਤਤ੍ਥਾਤਿ ਅਹੇਤੁਕਪਟਿਸਨ੍ਧਿਚਿਤ੍ਤੇ. ਸਮਾਧਿਲੇਸੋ ਦੁਬ੍ਬਲਸਮਾਧਿ ਯੋ ਚਿਤ੍ਤਟ੍ਠਿਤਿਮਤ੍ਤੋ. ਤਸ੍ਮਾਤਿ ਯਸ੍ਮਾ ਚਿਤ੍ਤਟ੍ਠਿਤਿ ਵਿਯ ਦੁਬ੍ਬਲਂ ਵੀਰਿਯਂ ਨਤ੍ਥਿ, ਯੋ ‘‘ਵੀਰਿਯਲੇਸੋ’’ਤਿ ਵਤ੍ਤਬ੍ਬੋ, ਤਸ੍ਮਾ, ਲੇਸਮਤ੍ਤਸ੍ਸਪਿ ਵੀਰਿਯਸ੍ਸ ਅਭਾਵਾਤਿ ਅਤ੍ਥੋ. ਅਞ੍ਞੇਸੂਤਿ ਅਹੇਤੁਕਪਟਿਸਨ੍ਧਿਚਿਤ੍ਤਤੋ ਅਞ੍ਞੇਸੁ. ਕੇਸੁਚੀਤਿ ਏਕਚ੍ਚੇਸੁ. ਉਭਯੇਨਪਿ ਮਨੋਦ੍ਵਾਰਾਵਜ੍ਜਨਹਸਿਤੁਪ੍ਪਾਦਚਿਤ੍ਤਂ ਵਦਤਿ. ਇਧਾਤਿ ਅਹੇਤੁਕਪਟਿਸਨ੍ਧਿਚਿਤ੍ਤੇ. ਸਮਾਧਿਵੀਰਿਯਾਨਿ ਇਨ੍ਦ੍ਰਿਯਪ੍ਪਤ੍ਤਾਨਿ ਚ ਨ ਹੋਨ੍ਤੀਤਿ ਸਮਾਧਿਕਿਚ੍ਚਂ ਪਟਿਕ੍ਖਿਪਤਿ, ਨ ਸਮਾਧਿਮਤ੍ਤਂ, ਨ ਵੀਰਿਯਲੇਸਸ੍ਸ ਸਬ੍ਭਾਵਤੋਤਿ ਯੋਜੇਤਬ੍ਬਂ. ਤੇਨੇਵਾਹ ‘‘ਵਿਸੇਸਨਞ੍ਹਿ ਵਿਸੇਸਿਤਬ੍ਬੇ ਪਵਤ੍ਤਤੀ’’ਤਿ. ਯਸ੍ਮਿਂ ਵੀਰਿਯੇ ਸਤਿ ਇਨ੍ਦ੍ਰਿਯੁਪ੍ਪਤ੍ਤਿ ਸਿਯਾ, ਤਦੇਵ ਤਤ੍ਥ ਨਤ੍ਥੀਤਿ ਅਤ੍ਥੋ.

ਅਪਾਯੇ ਓਪਪਾਤਿਕਵਸੇਨਾਤਿ ਇਦਂ ਸੁਗਤਿਯਂ ਓਪਪਾਤਿਕੋ ਵਿਕਲਿਨ੍ਦ੍ਰਿਯੋ ਨ ਹੋਤੀਤਿ ਕਤ੍ਵਾ ਵੁਤ੍ਤਂ, ‘‘ਲਬ੍ਭਨ੍ਤੇਵ ਞਾਣਵਿਪ੍ਪਯੁਤ੍ਤਾਨ’’ਨ੍ਤਿ ਪਨ ਵੁਤ੍ਤਤ੍ਤਾ ‘‘ਦੁਹੇਤੁਕਪਟਿਸਨ੍ਧਿਕਾਨਂ ਵਸੇਨਾ’’ਤਿ ਅਟ੍ਠਕਥਾਯਂ ਵੁਤ੍ਤਂ. ਤੇਸਨ੍ਤਿ ਇਤ੍ਥਿਪੁਰਿਸਿਨ੍ਦ੍ਰਿਯਸਨ੍ਤਾਨਾਨਂ. ਇਤ੍ਥਿਪੁਰਿਸਿਨ੍ਦ੍ਰਿਯਾਨਂ ਪਨ ਉਪ੍ਪਾਦਨਿਰੋਧਾ ਅਭਿਣ੍ਹਸੋਵ ਹੋਨ੍ਤੀਤਿ. ਪਠਮਕਪ੍ਪਿਕਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਗਹਿਤਾਨਂ ਪਰਿਵਤ੍ਤਮਾਨਲਿਙ੍ਗਾਨਂ ਵਸੇਨ ਉਪ੍ਪਾਦਨਿਰੋਧਗ੍ਗਹਣਂ ਵੇਦਿਤਬ੍ਬਂ. ਪਠਮਕਪ੍ਪਿਕਾਨਂ ਪਨ ਵਸੇਨ ਉਪ੍ਪਾਦੋ ਏਵ ਲਬ੍ਭਤਿ. ‘‘ਚੁਤਿਉਪਪਤ੍ਤਿਵਸੇਨੇਵ ਦੁਤਿਯਪੁਚ੍ਛਾਸੁਪਿ ਸਨ੍ਨਿਟ੍ਠਾਨੇਹਿ ਗਹਣਂ ਵੇਦਿਤਬ੍ਬ’’ਨ੍ਤਿ ਇਦਂ ਉਪਾਦਿਨ੍ਨਇਨ੍ਦ੍ਰਿਯੇਹਿ ਨਿਯਮਿਤਤ੍ਤਾ ਵੁਤ੍ਤਂ.

੧੯੦. ਸਨ੍ਤਾਨੁਪ੍ਪਤ੍ਤਿਨਿਰੋਧਦਸ੍ਸਨਤੋਤਿ ਸਨ੍ਤਾਨਵਸੇਨ ਉਪ੍ਪਾਦਨਿਰੋਧਾਨਂ ਦਿਸ੍ਸਮਾਨਤ੍ਤਾ. ਏਤੇਨ ਰੂਪਜੀਵਿਤਿਨ੍ਦ੍ਰਿਯਸ੍ਸ ਚਕ੍ਖੁਨ੍ਦ੍ਰਿਯਾਦਿਸਮਾਨਗਤਿਕਤਂ ਯੁਤ੍ਤਿਤੋ ਸਾਧੇਤਿ. ਆਗਮਤੋ ਪਨ ‘‘ਵਿਨਾ ਸੋਮਨਸ੍ਸੇਨਾ’’ਤਿਆਦਿਨਾ ਪਰਤੋ ਸਾਧੇਸ੍ਸਤਿ. ਛੇਦੋਤਿ ਨਾਮਂ ਦਟ੍ਠਬ੍ਬਂ ਸਰੂਪਦਸ੍ਸਨੇਨੇਵ ਸਂਸਯਛੇਦਨਤੋ.

ਤਸ੍ਸਾਤਿ ਰੂਪਜੀਵਿਤਿਨ੍ਦ੍ਰਿਯਸ੍ਸ. ਤੇ ਚ ਅਸਞ੍ਞਸਤ੍ਤਾ. ਨਨੁ ਚ ਉਪ੍ਪਾਦੋਵ ਜੀਵਿਤਿਨ੍ਦ੍ਰਿਯਸ੍ਸ ਚੁਤਿਉਪਪਤ੍ਤਿਵਸੇਨ ਵਤ੍ਤਬ੍ਬੋ, ਨ ਅਨੁਪ੍ਪਾਦੋਤਿ ਆਹ ‘‘ਅਨੁਪ੍ਪਾਦੋ…ਪੇ… ਨ ਪਵਤ੍ਤੇ’’ਤਿ. ਅਯਞ੍ਚ ਨਯੋ ਨ ਕੇਵਲਂ ਪੁਰਿਮਕੋਟ੍ਠਾਸੇ ਏਵ, ਅਥ ਖੋ ਇਤਰਕੋਟ੍ਠਾਸੇਪਿ ਗਹਿਤੋ ਏਵਾਤਿ ਦਸ੍ਸੇਨ੍ਤੋ ‘‘ਪਚ੍ਛਿਮਕੋਟ੍ਠਾਸੇਪੀ’’ਤਿਆਦਿਮਾਹ.

‘‘ਉਪਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ’’ਤਿ ਕਸ੍ਮਾ ਵੁਤ੍ਤਨ੍ਤਿ ਯੇਨਾਧਿਪ੍ਪਾਯੇਨ ਚੋਦਨਾ ਕਤਾ, ਤਮਧਿਪ੍ਪਾਯਂ ਵਿਵਰਿਤੁਂ ‘‘ਨਨੁ ਸੁਦ੍ਧਾਵਾਸ’’ਨ੍ਤਿਆਦਿ ਵੁਤ੍ਤਂ. ਨ ਵਤ੍ਤਬ੍ਬਨ੍ਤਿ ‘‘ਉਪਪਜ੍ਜਨ੍ਤਾਨ’’ਨ੍ਤਿ ਨ ਵਤ੍ਤਬ੍ਬਂ, ‘‘ਉਪਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ’’ਇਚ੍ਚੇਵ ਵਤ੍ਤਬ੍ਬਨ੍ਤਿ ਅਤ੍ਥੋ. ਇਦਾਨਿ ਯਥਾ ‘‘ਉਪਪਜ੍ਜਨ੍ਤਾਨ’’ਨ੍ਤਿ ਨ ਵਤ੍ਤਬ੍ਬਂ, ਤਂ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਸੋਮਨਸ੍ਸਮਨਿਨ੍ਦ੍ਰਿਯਾਨਨ੍ਤਿ ਸੋਮਨਸ੍ਸਿਨ੍ਦ੍ਰਿਯਮਨਿਨ੍ਦ੍ਰਿਯਾਨਂ, ਅਯਮੇਵ ਵਾ ਪਾਠੋ. ਤਦਾਤਿ ਪਠਮਸ੍ਸ ਰੂਪਜੀਵਿਤਿਨ੍ਦ੍ਰਿਯਸ੍ਸ ਧਰਮਾਨਕਾਲੇ. ਤਸ੍ਮਾਤਿ ਯਸ੍ਮਾ ਰੂਪਾਰੂਪਜੀਵਿਤਿਨ੍ਦ੍ਰਿਯਾਨਂ ਅਤ੍ਥੇਵ ਕਾਲਭੇਦੋ, ਉਭਯਞ੍ਚੇਤ੍ਥ ਜੀਵਿਤਿਨ੍ਦ੍ਰਿਯਭਾਵਸਾਮਞ੍ਞੇਨ ਏਕਜ੍ਝਂ ਕਤ੍ਵਾ ਗਯ੍ਹਤਿ, ਤਸ੍ਮਾ. ਉਭਯਨ੍ਤਿ ਸੋਮਨਸ੍ਸਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਨ੍ਤਿ ਇਦਂ ਉਭਯਂ. ਉਪ੍ਪਾਦਕ੍ਖਣੇਨ ਨਿਦਸ੍ਸਿਤਨ੍ਤਿ ਏਤੇਨ ‘‘ਉਪਪਤ੍ਤਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ’’ਤਿ ਇਦਂ ਨਿਦਸ੍ਸਨਮਤ੍ਤਨ੍ਤਿ ਦਸ੍ਸੇਤਿ. ਇਦਾਨਿ ਤਮੇਵਤ੍ਥਂ ਉਦਾਹਰਣੇਨ ਪਾਕਟਤਰਂ ਕਾਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾ ਤਾਦਿਸਾਨਂ ਅਨੇਕੇਸਂ ਚਿਤ੍ਤਾਨਂ ਭਙ੍ਗਕ੍ਖਣੇ ਲਬ੍ਭਮਾਨਂ ਤਦੇਕਦੇਸੇਨ ਸਬ੍ਬਪਠਮਸ੍ਸ ਉਪਪਤ੍ਤਿਚਿਤ੍ਤਸ੍ਸ ਭਙ੍ਗਕ੍ਖਣੇਨ ਨਿਦਸ੍ਸਿਤਂ, ਏਵਮਿਧਾਪਿ ਖਣਦ੍ਵਯੇ ਲਬ੍ਭਮਾਨਂ ਤਦੇਕਦੇਸੇਨ ਉਪ੍ਪਾਦਕ੍ਖਣੇਨ ਨਿਦਸ੍ਸਿਤਨ੍ਤਿ ਏਵਂ ਨਿਦਸ੍ਸਨਤ੍ਥੋ ਵੇਦਿਤਬ੍ਬੋ.

ਤੇਸਨ੍ਤਿ ਜੀਵਿਤਿਨ੍ਦ੍ਰਿਯਾਦੀਨਂ. ਅਞ੍ਞਤ੍ਥਾਤਿ ਪਵਤ੍ਤੇ. ਇਧਾਤਿ ਅਨਾਗਤਕਾਲਭੇਦੇ. ਨ ਨ ਸਮ੍ਭਵਤਿ ਉਪਪਤ੍ਤਿਕ੍ਖਣਸ੍ਸ ਵਿਯ ਤਤੋ ਪਰਂ ਪਵਤ੍ਤਿਕ੍ਖਣਸ੍ਸਪਿ ਅਨਾਗਤਕਾਲਭਾਵਤੋ. ਤਸ੍ਮਾਤਿ ਉਪਪਤ੍ਤਿਤੋ ਅਞ੍ਞਤ੍ਥਾਪਿ ਯਥਾਧਿਪ੍ਪੇਤਉਪ੍ਪਾਦਸਮ੍ਭਵਤੋ. ਅਯਞ੍ਚ ਅਤ੍ਥੋ ਵਾਰਨ੍ਤਰੇਪਿ ਦਿਸ੍ਸਤੀਤਿ ਦਸ੍ਸੇਨ੍ਤੋ ਆਹ ‘‘ਏਵਞ੍ਚ ਕਤ੍ਵਾ’’ਤਿਆਦਿ. ਨ ਹੀਤਿਆਦਿਨਾ ਤਮੇਵਤ੍ਥਂ ਸਮਤ੍ਥੇਤਿ. ਤਤ੍ਥ ਅਪਿ ਪਚ੍ਛਿਮ…ਪੇ… ਸਨ੍ਧਿਕਸ੍ਸਾਤਿ ਅਪਿ-ਸਦ੍ਦੇਨ ‘‘ਕੋ ਪਨ ਵਾਦੋ ਅਪਚ੍ਛਿਮਭਵਿਕਸ੍ਸ ਸੋਮਨਸ੍ਸਸਹਗਤਪਟਿਸਨ੍ਧਿਕਸ੍ਸਾ’’ਤਿ ਦਸ੍ਸੇਤਿ. ਅਪਚ੍ਛਿਮਭਵਿਕਸ੍ਸ ਚੁਤਿਤੋ ਪਚ੍ਛਾ ‘‘ਸੋਮਨਸ੍ਸਿਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤੀ’’ਤਿ ਵਤ੍ਤਬ੍ਬਮੇਵ ਨਤ੍ਥੀਤਿ ਆਹ ‘‘ਚੁਤਿਤੋ ਪੁਬ੍ਬੇਵਾ’’ਤਿ. ਏਤ੍ਥ ਹਿ ਪਠਮਪੁਚ੍ਛਾਸੁ ਸਨ੍ਨਿਟ੍ਠਾਨਤ੍ਥੋਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਏਤ੍ਥ ‘‘ਯਸ੍ਸ ਚਕ੍ਖੁਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀ’’ਤਿ ਏਵਮਾਦੀਸੁ ਯਮਕੇਸੁ ਯਾ ਪਠਮਪੁਚ੍ਛਾ, ਤਾਸੁ ਸਨ੍ਨਿਟ੍ਠਾਨਪਦਸਙ੍ਗਹਿਤੋ ਅਤ੍ਥੋ. ਪੁਚ੍ਛਿਤਬ੍ਬਤ੍ਥਨਿਸ੍ਸਯੋਤਿ ‘‘ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀ’’ਤਿਆਦਿਕਸ੍ਸ ਪੁਚ੍ਛਿਤਬ੍ਬਸ੍ਸ ਅਤ੍ਥਸ੍ਸ ਨਿਸ੍ਸਯਭੂਤੋ ਮਾਦਿਸੋਵ ਮਯਾ ਸਦਿਸੋ ਏਵ ਅਤ੍ਥੋ ਉਪਪਤ੍ਤਿਉਪ੍ਪਾਦਿਨ੍ਦ੍ਰਿਯਵਾ ਉਪਪਤ੍ਤਿਕ੍ਖਣੇ ਉਪ੍ਪਾਦਾਵਤ੍ਥਇਨ੍ਦ੍ਰਿਯਸਹਿਤੋ, ਉਭਯੁਪ੍ਪਾਦਿਨ੍ਦ੍ਰਿਯਵਾ ਪਟਿਸਨ੍ਧਿਪਵਤ੍ਤੀਸੁ ਉਪ੍ਪਾਦਾਵਤ੍ਥਇਨ੍ਦ੍ਰਿਯਸਹਿਤੋ ਵਾ. ਪਟਿਨਿਵਤ੍ਤਿਤ੍ਵਾਪਿ ਪੁਚ੍ਛਿਤਬ੍ਬਤ੍ਥਸ੍ਸ ਨਿਸ੍ਸਯੋਤਿ ‘‘ਯਸ੍ਸ ਵਾ ਪਨਾ’’ਤਿਆਦਿਨਾ ਪਟਿਨਿਵਤ੍ਤਿਤ੍ਵਾ ਪੁਚ੍ਛਿਤਬ੍ਬਸ੍ਸਪਿ ਸਂਸਯਤ੍ਥਸ੍ਸ ਨਿਸ੍ਸਯੋਤਿ ਏਵਂ ਇਮਿਨਾ ਵਿਯ ਅਜ੍ਝਾਸਯੇਨ ‘‘ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀ’’ਤਿਆਦੀਸੁ ਦੁਤਿਯਪੁਚ੍ਛਾਸੁ ਸਨ੍ਨਿਟ੍ਠਾਨਤ੍ਥਮੇਵ ਸਨ੍ਨਿਟ੍ਠਾਨਪਦਸਙ੍ਗਹਿਤਮੇਵ ਅਤ੍ਥਂ ਨਿਯਮੇਤਿ. ਤਤ੍ਥੇਵ ਤਾਸੁ ਏਵ ਪੁਬ੍ਬੇ ਵੁਤ੍ਤਪਠਮਪੁਚ੍ਛਾਸੁ ਏਵ. ਪੁਚ੍ਛਿਤਬ੍ਬਂ ‘‘ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਉਪ੍ਪਜ੍ਜਿਸ੍ਸਤੀ’’ਤਿਆਦੀਸੁ ਅਨਾਗਤਭਾਵਮਤ੍ਤੇਨ ਸਰੂਪਤੋ ਗਹਿਤਂ ਉਪ੍ਪਾਦਂ ਉਪ੍ਪਾਦਸਙ੍ਖਾਤਂ, ‘‘ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤੀ’’ਤਿਆਦੀਸੁ ਅਨਾਗਤਭਾਵਮਤ੍ਤੇਨ ਸਰੂਪਤੋ ਗਹਿਤਂ ਨਿਰੋਧਂ ਵਾ ਨਿਰੋਧਸਙ੍ਖਾਤਂ ਵਾ ਸਂਸਯਤ੍ਥਂ ਨ ਨਿਯਮੇਤੀਤਿ. ਏਵਨ੍ਤਿ ਵੁਤ੍ਤਪ੍ਪਕਾਰੇਨ ਸਨ੍ਨਿਟ੍ਠਾਨਤ੍ਥਸ੍ਸ ਨਿਯਮੋ ਹੋਤਿ, ਨ ਸਂਸਯਤ੍ਥਸ੍ਸ, ਤਸ੍ਮਾ ‘‘ਯਸ੍ਸ ਵਾ ਪਨ…ਪੇ… ਆਮਨ੍ਤਾ’’ਤਿ ਵੁਤ੍ਤਂ. ਏਸ ਨਯੋਤਿ ਯ੍ਵਾਯਂ ਉਪ੍ਪਾਦਵਾਰੇ ਵਿਚਾਰੋ ਵੁਤ੍ਤੋ, ਨਿਰੋਧਵਾਰੇਪਿ ਏਸੇਵ ਨਯੋ. ਤਥਾ ਹਿ ‘‘ਯਸ੍ਸ ਵਾ ਪਨ ਸੋਮਨਸ੍ਸਿਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤਿ, ਤਸ੍ਸ ਚਕ੍ਖੁਨ੍ਦ੍ਰਿਯਂ ਨਿਰੁਜ੍ਝਿਸ੍ਸਤੀਤਿ? ਆਮਨ੍ਤਾ’’ਤਿ ਵੁਤ੍ਤਂ.

ਏਵਂ ਅਵੁਤ੍ਤਤ੍ਤਾਤਿ ਉਪ੍ਪਾਦਨਿਰੋਧਾਨਂ ਅਨਾਗਤਾਨਂ ਸਰੂਪੇਨ ਅਵੁਤ੍ਤਤ੍ਤਾ. ਨ ਹਿ ਤਤ੍ਥ ਤੇ ਸਰੂਪੇਨ ਵੁਤ੍ਤਾ, ਅਥ ਖੋ ‘‘ਨੁਪ੍ਪਜ੍ਜਿਸ੍ਸਤੀ’’ਤਿ ਪਟਿਕ੍ਖੇਪਮੁਖੇਨ ਵੁਤ੍ਤਾ. ਤਤ੍ਥਾਤਿ ਅਨੁਲੋਮੇ. ਨ ਏਵਂ ਯੋਜੇਤਬ੍ਬਾ ਪਟਿਲੋਮੇ. ਤਮੇਵ ਅਯੋਜੇਤਬ੍ਬਤਂ ‘‘ਯਥਾ ਹੀ’’ਤਿਆਦਿਨਾ ਵਿਵਰਤਿ. ਉਪ੍ਪਾਦਨਿਰੋਧੇ ਅਤਿਕ੍ਕਮਿਤ੍ਵਾ ਉਪ੍ਪਾਦਨਿਰੋਧਾ ਸਮ੍ਭਵਨ੍ਤਿ ਯੋਜੇਤੁਂ, ਤਥਾ ਉਪ੍ਪਾਦਨਿਰੋਧੇ ਅਪ੍ਪਤ੍ਵਾ ਉਪ੍ਪਾਦਨਿਰੋਧਾ ਸਮ੍ਭਵਨ੍ਤਿ ਯੋਜੇਤੁਨ੍ਤਿ ਯੋਜਨਾ. ਇਦਞ੍ਚ ਦ੍ਵਯਂ ਯਥਾਨੁਲੋਮੇ ਸਮ੍ਭਵਤਿ, ਨ ਏਵਂ ਪਟਿਲੋਮੇ. ਤੇਨਾਹ ‘‘ਨ ਏਵਂ…ਪੇ… ਸਮ੍ਭਵਨ੍ਤੀ’’ਤਿ. ਤਤ੍ਥ ਕਾਰਣਮਾਹ ‘‘ਅਭੂਤਾਭਾਵਸ੍ਸ…ਪੇ… ਸਮ੍ਭਵਾਨੁਪਪਤ੍ਤਿਤੋ’’ਤਿ. ਅਭੂਤਾਭਾਵਸ੍ਸਾਤਿ ਅਭੂਤਸ੍ਸ ਅਭਾਵਸ੍ਸ, ਅਭੂਤਸ੍ਸ ਉਪ੍ਪਾਦਸ੍ਸ ਨਿਰੋਧਸ੍ਸ ਚ ਅਭਾਵਸ੍ਸਾਤਿ ਅਧਿਪ੍ਪਾਯੋ. ਤੇਨਾਹ ‘‘ਅਭੂਤੁਪ੍ਪਾਦਨਿਰੋਧਾਭਾਵੋ ਚ ਪਟਿਲੋਮੇ ਪੁਚ੍ਛਿਤੋ’’ਤਿ, ਤਸ੍ਮਾ ‘‘ਆਮਨ੍ਤਾ’’ਤਿ ਚ ਵੁਤ੍ਤਂ, ਨ ਵੁਤ੍ਤਂ ਵਿਸ੍ਸਜ੍ਜਨਨ੍ਤਿ ਸਮ੍ਬਨ੍ਧੋ. ਅਸ੍ਸ ਵਿਸੇਸਰਹਿਤਸ੍ਸ ਅਭੂਤਾਭਾਵਸ੍ਸਾਤਿ ਇਮਸ੍ਸ ਯਥਾਵੁਤ੍ਤਸ੍ਸ ਯਥਾ ਰੂਪਾਭਾਵੋ ਵੇਦਨਾਭਾਵੋਤਿ ਕੋਚਿ ਅਭਾਵੋਪਿ ਵਿਸੇਸਸਹਿਤੋ, ਨ ਏਵਮਯਨ੍ਤਿ ਵਿਸੇਸਰਹਿਤਸ੍ਸ ਅਭੂਤਾਭਾਵਸ੍ਸ.

ਕਾਲਨ੍ਤਰਯੋਗਾਭਾਵਤੋਤਿ ਕਾਲਵਿਸੇਸਯੋਗਾਭਾਵਤੋ. ਯਾਦਿਸਾਨਨ੍ਤਿ ਯਾਨਿ ਭੂਤਾਨਿ ਨ ਵਤ੍ਤਮਾਨਾਨਿ ਸਤਿ ਪਚ੍ਚਯੇ ਉਪ੍ਪਜ੍ਜਨਾਰਹਾਨਿ, ਤੇਸਂ ਅਨਾਗਤਾਨਨ੍ਤਿ ਅਤ੍ਥੋ. ਉਪ੍ਪਾਦਨਿਰੋਧਾਭਾਵੇਨ ਪੁਚ੍ਛਿਤਬ੍ਬਸ੍ਸਾਤਿ ‘‘ਨੁਪ੍ਪਜ੍ਜਿਸ੍ਸਤਿ ਨ ਨਿਰੁਜ੍ਝਿਸ੍ਸਤੀ’’ਤਿ ਏਵਂ ਉਪ੍ਪਾਦਸ੍ਸ ਨਿਰੋਧਸ੍ਸ ਚ ਅਭਾਵੇਨ ਪੁਚ੍ਛਿਤਬ੍ਬਸ੍ਸ ਅਤ੍ਥਸ੍ਸ. ਸਨ੍ਨਿਸ੍ਸਯੋ ਨਿਸ੍ਸਯਭੂਤੋ ਸਨ੍ਨਿਟ੍ਠਾਨੇਨ ਸਨ੍ਨਿਚ੍ਛਿਤੋ ਸਨ੍ਨਿਟ੍ਠਾਨਪਦਸਙ੍ਗਹਿਤੋ. ਸੋ ਯਥਾਵੁਤ੍ਤੋ ਅਤ੍ਥੋ ਨਿਸ੍ਸਯੋ ਏਤੇਸਨ੍ਤਿ ਤਨ੍ਨਿਸ੍ਸਯਾ. ਤਾਦਿਸਾਨਂਯੇਵ ਅਨਾਗਤਾਨਂਯੇਵ ਉਪਪਤ੍ਤਿਚੁਤਿਉਪ੍ਪਾਦਨਿਰੋਧਾਨਂ ਉਪਪਤ੍ਤਿਚੁਤਿਸਙ੍ਖਾਤਉਪ੍ਪਾਦਨਿਰੋਧਾਨਂ ਅਨੁਪ੍ਪਾਦਾਨਿਰੋਧਾਨਂ ਪਟਿਕ੍ਖੇਪਵਸੇਨ. ਜੀਵਿਤਾਦੀਨਮ੍ਪਿ ਜੀਵਿਤਮਨਿਨ੍ਦ੍ਰਿਯਾਦੀਨਮ੍ਪਿ. ਅਨੁਪ੍ਪਾਦਾਨਿਰੋਧਾ ਸਂਸਯਪਦੇਨ ਪੁਚ੍ਛਿਤਾ ਹੋਨ੍ਤਿ ‘‘ਯਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨੁਪ੍ਪਜ੍ਜਿਸ੍ਸਤਿ, ਤਸ੍ਸ ਸੋਮਨਸ੍ਸਿਨ੍ਦ੍ਰਿਯਂ ਨ ਨਿਰੁਜ੍ਝਿਸ੍ਸਤੀ’’ਤਿ. ‘‘ਆਮਨ੍ਤਾ’’ਤਿ ਵੁਤ੍ਤਂ ਵਿਭਜਿਤ੍ਵਾ ਵਤ੍ਤਬ੍ਬਸ੍ਸ ਅਭਾਵਤੋ. ਤੇਨਾਹ ‘‘ਨ ਵੁਤ੍ਤਂ…ਪੇ… ਵਿਸ੍ਸਜ੍ਜਨ’’ਨ੍ਤਿ.

ਯੇ ਸੋਪੇਕ੍ਖਪਟਿਸਨ੍ਧਿਕਾ ਭਵਿਸ੍ਸਨ੍ਤਿ ਰੂਪਲੋਕੇ, ਤੇ ਸਙ੍ਗਹਿਤਾਤਿ ਯੋਜਨਾ. ਤਂਸਮਾਨਲਕ੍ਖਣਤਾਯਾਤਿ ਤੇਨ ਸੋਪੇਕ੍ਖਪਟਿਸਨ੍ਧਿਕਭਾਵੇਨ ਸਮਾਨਲਕ੍ਖਣਤਾਯ. ਤਂ ਪਮਾਦਲਿਖਿਤਂ ਧਮ੍ਮਯਮਕੇ ਤਾਦਿਸਸ੍ਸੇਵ ਵਚਨਸ੍ਸ ਅਭਾਵਤੋ. ਤਤ੍ਥਪਿ ਯਂ ਵਤ੍ਤਬ੍ਬਂ, ਤਂ ਚਿਤ੍ਤਯਮਕੇ ਵੁਤ੍ਤਂ ‘‘ਨ ਹਿ ਖਣਪਚ੍ਚੁਪ੍ਪਨ੍ਨੇ ਉਪ੍ਪਜ੍ਜਿਤ੍ਥਾਤਿ ਅਤੀਤਵੋਹਾਰੋ ਅਤ੍ਥੀ’’ਤਿਆਦਿਨਾ.

ਪਵਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.