੨. ਪਵਤ੍ਤਿਵਾਰਵਣ੍ਣਨਾ

੫੦-੨੦੫. ਮਿਸ੍ਸਕਕਾਲਭੇਦੇਸੁ ਯਮਕੇਸੁ ਪਦਾਨਂ ਭਿਨ੍ਨਕਾਲਤ੍ਤਾ ਸਿਯਾ ਅਤ੍ਥਵਿਸੇਸੋਤਿ ਆਹ ‘‘ਅਮਿਸ੍ਸਕਕਾਲਭੇਦੇਸੁ ਵਾਰੇਸੁ ਅਤ੍ਥਵਿਸੇਸਾਭਾਵਤੋ’’ਤਿ. ਇਦਾਨਿ ਤਮੇਵਤ੍ਥਂ ‘‘ਪੁਰਿਮਸ੍ਸ ਹੀ’’ਤਿਆਦਿਨਾ ਵਿਵਰਤਿ. ਤੇਨਾਤਿ ਅਤ੍ਥਵਿਸੇਸਾਭਾਵੇਨ. ਏਤ੍ਥਾਤਿ ਏਤਸ੍ਮਿਂ ਪਵਤ੍ਤਿਵਾਰਪਾਠੇ, ਏਤਿਸ੍ਸਂ ਵਾ ਪਵਤ੍ਤਿਵਾਰਵਣ੍ਣਨਾਯਂ. ਛ ਏਵ ਵੁਤ੍ਤਾ, ਨ ਨਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਅਤੀਤੇਨਾ’’ਤਿਆਦਿ. ਏਤੇ ਪਨ ਤਯੋਤਿ ਅਤ੍ਤਨਾ ਵਿਸੁਂ ਅਨਨ੍ਤਰਂ ਦਸ੍ਸਿਤੇ ਸਨ੍ਧਾਯਾਹ. ਯਥਾਦਸ੍ਸਿਤਾਤਿ ਅਟ੍ਠਕਥਾਯਂ ਨਿਦ੍ਧਾਰੇਤ੍ਵਾ ਦਸ੍ਸਿਤਬ੍ਬਾਕਾਰਾ ਪਚ੍ਚੁਪ੍ਪਨ੍ਨੇਨਾਤੀਤਾਦਯੋ ਯੇ ਪਾਲ਼ਿਯਂ ਉਜੁਕਮੇਵ ਆਗਤਾ. ‘‘ਨ ਵਿਸੁਂ ਵਿਜ੍ਜਨ੍ਤੀ’’ਤਿ ਵੁਤ੍ਤਮੇਵਤ੍ਥਂ ‘‘ਤਤ੍ਥ ਤਤ੍ਥ ਹੀ’’ਤਿਆਦਿਨਾ ਪਾਕਟਤਰਂ ਕਰੋਤਿ. ਤਤ੍ਥ ਪਟਿਲੋਮਪੁਚ੍ਛਾਹੀਤਿ ‘‘ਯਸ੍ਸ ਵਾ ਪਨ ਵੇਦਨਾਕ੍ਖਨ੍ਧੋ ਉਪ੍ਪਜ੍ਜਿਤ੍ਥ, ਤਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤੀ’’ਤਿ ਏਵਮਾਦਿਕਾਹਿ ਪਠਮਪਦੇ ਵੁਤ੍ਤਸ੍ਸ ਪਟਿਲੋਮਵਸੇਨ ਪਵਤ੍ਤਾਹਿ. ਤੇਨੇਵਾਤਿ ਨਯਤੋ ਯੋਜੇਤੁਂ ਸਕ੍ਕੁਣੇਯ੍ਯਤ੍ਤਾ ਏਵ. ਮਿਸ੍ਸਕਕਾਲਭੇਦੇਸੁ ਚਾਤਿ ਨ ਕੇਵਲਂ ਅਮਿਸ੍ਸਕਕਾਲਭੇਦੇਸੁਯੇਵ, ਅਥ ਖੋ ਮਿਸ੍ਸਕਕਾਲਭੇਦੇਸੁ ਚਾਤਿ ਅਤ੍ਥੋ. ਨ ਯੋਜਨਾਸੁਕਰਤਾਯ ਏਵ ਪੁਰਿਮੇ ਅਯੋਜਨਾ, ਅਥ ਖੋ ਸੁਖਗ੍ਗਹਣਤ੍ਥਮ੍ਪੀਤਿ ਦਸ੍ਸੇਨ੍ਤੋ ਆਹ ‘‘ਅਮਿਸ੍ਸਕ…ਪੇ… ਵੁਤ੍ਤਾਨੀ’’ਤਿ.

ਯੇਨ ਕਾਰਣੇਨਾਤਿ ਯੇਨ ਏਕਪਦਦ੍ਵਯਸਙ੍ਗਹਿਤਾਨਂ ਖਨ੍ਧਾਨਂ ਉਪ੍ਪਾਦਸ੍ਸ ਨਿਰੋਧਸ੍ਸ ਲਾਭਸਙ੍ਖਾਤੇਨ ਕਾਰਣੇਨ. ਯਥਾਕ੍ਕਮਂ ਪੁਰੇਪਞ੍ਹੋ ਪਚ੍ਛਾਪਞ੍ਹੋਤਿ ਚ ਨਾਮਂ ਵੁਤ੍ਤਂ. ਚ-ਸਦ੍ਦੇਨ ਪੁਰੇਪਚ੍ਛਾਪਞ੍ਹੋਤਿ ਚ ਨਾਮਂ ਵੁਤ੍ਤਨ੍ਤਿ ਨਿਦ੍ਧਾਰੇਤ੍ਵਾ ਯੋਜੇਤਬ੍ਬਂ. ਤਤ੍ਥ ਪਨ ‘‘ਏਕਪਦਦ੍ਵਯਸਙ੍ਗਹਿਤਾਨ’’ਨ੍ਤਿ ਇਦਂ ਏਕਜ੍ਝਂ ਕਤ੍ਵਾ ਗਹੇਤਬ੍ਬਂ. ਤਮੇਵਤ੍ਥਮ੍ਪਿ ਵਿਵਰਤਿ ‘‘ਯਸ੍ਸ ਹੀ’’ਤਿਆਦਿਨਾ. ਤਤ੍ਥ ਯਸ੍ਸਾਤਿ ਯਸ੍ਸ ਪਞ੍ਹਸ੍ਸ. ‘‘ਪਞ੍ਹੋ’’ਤਿ ਚੇਤ੍ਥ ਪੁਚ੍ਛਨਵਸੇਨ ਪਵਤ੍ਤਂ ਵਚਨਂ ਵੇਦਿਤਬ੍ਬਂ. ਤੇਨੇਵਾਹ ‘‘ਪਰਿਪੂਰੇਤ੍ਵਾ ਵਿਸ੍ਸਜ੍ਜੇਤਬ੍ਬਤ੍ਥਸਙ੍ਗਣ੍ਹਨਤੋ’’ਤਿ. ਤਂ ਸਰੂਪਦਸ੍ਸਨੇਨ ਵਿਸ੍ਸਜ੍ਜਨਂ ਤਂਵਿਸ੍ਸਜ੍ਜਨਂ, ਤਂ ਵਾ ਯਥਾਵੁਤ੍ਤਂ ਵਿਸ੍ਸਜ੍ਜਨਂ ਏਤਸ੍ਸਾਤਿ ਤਂਵਿਸ੍ਸਜ੍ਜਨੋ, ਤਸ੍ਸ ਤਂਵਿਸ੍ਸਜ੍ਜਨਸ੍ਸ. ਪੁਰਿਮਕੋਟ੍ਠਾਸੇਨਾਤਿ ਪੁਰਿਮੇਨ ਉਦ੍ਦੇਸਪਦੇਨ. ਤੇਨ ਹਿ ਵਿਸ੍ਸਜ੍ਜਨਪਦਸ੍ਸ ਸਮਾਨਤ੍ਥਤਾ ਇਧ ਸਦਿਸਤ੍ਥਤਾ. ਏਕੇਨ ਪਦੇਨਾਤਿ ਏਕੇਨ ਪਧਾਨਾਪ੍ਪਧਾਨੇਨ ਯਮਕਪਦੇਨ, ਨ ਪਠਮਪਦੇਨੇਵਾਤਿ ਅਤ੍ਥੋ. ਉਪ੍ਪਾਦਨਿਰੋਧਲਾਭਸਾਮਞ੍ਞਮਤ੍ਤੇਨਾਤਿ ਉਪ੍ਪਾਦਸ੍ਸ ਵਾ ਨਿਰੋਧਸ੍ਸ ਵਾ ਲਬ੍ਭਮਾਨਤਾਯ ਸਮਾਨਤਾਮਤ੍ਤੇਨ. ਸਨ੍ਨਿਟ੍ਠਾਨਪਦ…ਪੇ… ਯੁਤ੍ਤਨ੍ਤਿ ਇਦਂ ਅਟ੍ਠਕਥਾਯਂ ‘‘ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਤੀ’’ਤਿਆਦਿਨਾ ਪੁਰੇਪਞ੍ਹਸ੍ਸ ਦਸ੍ਸਿਤਤ੍ਤਾ ਵੁਤ੍ਤਂ. ਯਦਿਪਿ ਤਤ੍ਥ ‘‘ਉਪ੍ਪਜ੍ਜਤੀ’’ਤਿ ਵਿਸ੍ਸਜ੍ਜਿਤਤ੍ਤਾ ਵੇਦਨਾਕ੍ਖਨ੍ਧਸ੍ਸ ਉਪ੍ਪਾਦੋ ਲਬ੍ਭਤੀਤਿ ਵੁਤ੍ਤਂ, ਯੋ ਪਨ ਸਨ੍ਨਿਟ੍ਠਾਨਪਦਸਙ੍ਗਹਿਤੋ ਰੂਪਕ੍ਖਨ੍ਧਸ੍ਸ ਅਨੁਪ੍ਪਾਦੋ ਪਾਲ਼ਿਯਂ ਅਨੁਞ੍ਞਾਤਰੂਪੇਨ ਠਿਤੋ, ਤਸ੍ਸ ਵਸੇਨ ਪੁਰੇਪਞ੍ਹੋ ਯੁਤ੍ਤੋਤਿ ਅਧਿਪ੍ਪਾਯੋ. ਏਵਞ੍ਹਿ ਪੁਰਿਮਕੋਟ੍ਠਾਸੇਨ ਸਦਿਸਤ੍ਥਤਾ ਹੋਤਿ.

‘‘ਯਸ੍ਸ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾ’’ਤਿ ਏਤ੍ਥ ਰੂਪਕ੍ਖਨ੍ਧਸ੍ਸ ਅਨੁਪ੍ਪਨ੍ਨਪੁਬ੍ਬਤਾਪਟਿਕ੍ਖੇਪਮੁਖੇਨ ਇਤਰਸ੍ਸ ਪਟਿਕ੍ਖਿਪੀਯਤੀਤਿ ਰੂਪਕ੍ਖਨ੍ਧਸ੍ਸੇਵ ਯਥਾਵੁਤ੍ਤਪਟਿਕ੍ਖੇਪੋ ਪਧਾਨਭਾਵੇਨ ਵੁਤ੍ਤੋ. ਏਸੇਵ ਨਯੋ ਅਞ੍ਞੇਸੁਪਿ ਏਦਿਸੇਸੁ ਠਾਨੇਸੂਤਿ ਆਹ ‘‘ਸਨ੍ਨਿਟ੍ਠਾਨਤ੍ਥਸ੍ਸੇਵ ਪਟਿਕ੍ਖਿਪਨਂ ਪਟਿਕ੍ਖੇਪੋ’’ਤਿ. ‘‘ਯਸ੍ਸ ਰੂਪਕ੍ਖਨ੍ਧੋ ਉਪ੍ਪਜ੍ਜਤਿ, ਤਸ੍ਸ ਵੇਦਨਾਕ੍ਖਨ੍ਧੋ ਨਿਰੁਜ੍ਝਤੀ’’ਤਿ ਏਤ੍ਥ ਪਨ ਰੂਪਕ੍ਖਨ੍ਧਸ੍ਸ ਉਪ੍ਪਾਦਲਕ੍ਖਣਂ ਕਤ੍ਵਾ ਵੇਦਨਾਕ੍ਖਨ੍ਧਸ੍ਸ ਨਿਰੋਧੋ ਪੁਚ੍ਛੀਯਤੀਤਿ ਸੋ ਏਵ ‘‘ਨੋ’’ਤਿ ਪਟਿਸੇਧੀਯਤਿ. ਏਸ ਨਯੋ ਅਞ੍ਞੇਸੁਪਿ ਏਦਿਸੇਸੁ ਠਾਨੇਸੂਤਿ ਵੁਤ੍ਤਂ ‘‘ਸਂਸਯਤ੍ਥਨਿਵਾਰਣਂ ਪਟਿਸੇਧੋ’’ਤਿ. ‘‘ਨ-ਕਾਰਵਿਰਹਿਤ’’ਨ੍ਤਿ ਏਤੇਨ ਪਟਿਸੇਧਸ੍ਸ ਪਟਿਸੇਧਿਤਮਾਹ. ਯਦਿ ਏਵਂ ਪਾਲ਼ਿਗਤਿਪਟਿਸੇਧਵਿਸ੍ਸਜ੍ਜਨਾਨਂ ਕੋ ਵਿਸੇਸੋਤਿ ਆਹ ‘‘ਤਤ੍ਥ ਉਪ੍ਪਤ੍ਤੀ’’ਤਿਆਦਿ.

ਤਦੇਕਦੇਸਪਕ੍ਖੇਪਵਸੇਨਾਤਿ ਤੇਸਂ ਚਤੁਨ੍ਨਂ ਪਞ੍ਹਾਨਂ ਪਞ੍ਚਨ੍ਨਞ੍ਚ ਵਿਸ੍ਸਜ੍ਜਨਾਨਂ ਏਕਦੇਸਸ੍ਸ ਪਕ੍ਖਿਪਨਵਸੇਨ. ਤੇਨਾਹ ਅਟ੍ਠਕਥਾਯਂ ‘‘ਪਠਮੇ ਠਾਨੇ ਪਰਿਪੁਣ੍ਣਪਞ੍ਹਸ੍ਸ ਪੁਰਿਮਕੋਟ੍ਠਾਸੇ ਸਰੂਪਦਸ੍ਸਨੇਨਾ’’ਤਿਆਦਿ. ਯੋ ਪਨੇਤ੍ਥ ਪਞ੍ਹੇਸੁ ਵਿਸ੍ਸਜ੍ਜਨੇਸੁ ਚ ਸਤ੍ਤਵੀਸਤਿਯਾ ਠਾਨੇਸੁ ਪਕ੍ਖੇਪਂ ਲਭਤਿ, ਤਂ ਦਸ੍ਸੇਤੁਂ ‘‘ਪਰਿਪੁਣ੍ਣਪਞ੍ਹੋ ਏਵਾ’’ਤਿਆਦਿ ਵੁਤ੍ਤਂ. ਪਾਲ਼ਿਵਵਤ੍ਥਾਨਦਸ੍ਸਨਾਦਿਤੋਤਿ ਏਤ੍ਥ ਆਦਿ-ਸਦ੍ਦੇਨ ਪੁਚ੍ਛਾਵਿਭਙ੍ਗੋ ਵਿਸ੍ਸਜ੍ਜਨਾਠਾਨਾਨਿ ਏਕਸ੍ਮਿਂ ਪਞ੍ਹੇ ਯੋਜਨਾਨਯੋਤਿ ਇਮੇਸਂ ਸਙ੍ਗਹੋ ਦਟ੍ਠਬ੍ਬੋ.

ਸੁਦ੍ਧਾਵਾਸਾਨਨ੍ਤਿਆਦਿ ਪਾਲ਼ਿਯਾ ਪਦਂ ਉਦ੍ਧਰਿਤ੍ਵਾ ਅਤ੍ਥਦਸ੍ਸਨਤ੍ਥਂ ਆਰਦ੍ਧਂ. ‘‘ਯਸ੍ਸ ਯਤ੍ਥ ਰੂਪਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥ, ਤਸ੍ਸ ਤਤ੍ਥ ਵੇਦਨਾਕ੍ਖਨ੍ਧੋ ਨੁਪ੍ਪਜ੍ਜਿਤ੍ਥਾ’’ਤਿ ਇਮਸ੍ਸ ਵਿਸ੍ਸਜ੍ਜਨਂ ਹੋਤਿ ‘‘ਸੁਦ੍ਧਾਵਾਸਾਨਂ ਤੇਸਂ ਤਤ੍ਥਾ’’ਤਿ. ਤਤ੍ਥ ਏਕਭੂਮਿਯਂ ਦੁਤਿਯਾ ਉਪਪਤ੍ਤਿ ਨਤ੍ਥੀਤਿ ਏਕਿਸ੍ਸਾ ਭੂਮਿਯਾ ਏਕਸ੍ਸ ਅਰਿਯਪੁਗ੍ਗਲਸ੍ਸ ਦੁਤਿਯਵਾਰਂ ਪਟਿਸਨ੍ਧਿਗ੍ਗਹਣਂ ਨਤ੍ਥੀਤਿ ਅਤ੍ਥੋ. ਤਤਿਯਵਾਰਾਦੀਸੁ ਵਤ੍ਤਬ੍ਬਮੇਵ ਨਤ੍ਥਿ. ਸ੍ਵਾਯਮਤ੍ਥੋ ਯਥਾ ਞਾਪਿਤੋ ਹੋਤਿ, ਤਂ ਦਸ੍ਸੇਤੁਂ ‘‘ਪਟਿਸਨ੍ਧਿਤੋ ਪਭੁਤਿ ਹਿ…ਪੇ… ਪਵਤ੍ਤਾ’’ਤਿ ਵੁਤ੍ਤਂ. ਤੇਨ ਅਦ੍ਧਾਪਚ੍ਚੁਪ੍ਪਨ੍ਨਵਸੇਨਾਯਂ ਦੇਸਨਾ ਪਵਤ੍ਤਾਤਿ ਦਸ੍ਸੇਤਿ. ਆਦਾਨਨਿਕ੍ਖੇਪਪਰਿਚ੍ਛਿਨ੍ਨਂ ਕਮ੍ਮਜਸਨ੍ਤਾਨਂ ਏਕਤ੍ਤੇਨ ਗਹੇਤ੍ਵਾ ਤਸ੍ਸ ਵਸੇਨ ਉਪ੍ਪਾਦਨਿਰੋਧੇਸੁ ਵੁਚ੍ਚਮਾਨੇਸੁ ਅਕਮ੍ਮਜੇਸੁ ਕੁਸਲਾਦੀਸੁ ਕਥਨ੍ਤਿ ਚੋਦਨਾਯਂ ਤੇਪਿ ਇਧ ਤਂਨਿਸ੍ਸਿਤਾ ਏਵ ਕਤਾਤਿ ਦਸ੍ਸੇਨ੍ਤੋ ਆਹ ‘‘ਤਸ੍ਮਿਞ੍ਹਿ…ਪੇ… ਦਸ੍ਸਿਤਾ’’ਤਿ. ਤੇਨੇਵਾਤਿ ਕਮ੍ਮਜਸਨ੍ਤਾਨੇਨੇਵ. ਤਸ੍ਮਾਤਿ ਏਕਕਮ੍ਮਨਿਬ੍ਬਤ੍ਤਸ੍ਸ ਵਿਪਾਕਸਨ੍ਤਾਨਸ੍ਸ ਏਕਤ੍ਤੇਨ ਗਹਿਤਤ੍ਤਾ. ਤਸ੍ਸਾਤਿ ਕਮ੍ਮਜਸਨ੍ਤਾਨਸ੍ਸ. ਪਞ੍ਚਸੁ ਸੁਦ੍ਧਾਵਾਸੇਸੁ ਯਥਾ ਪਚ੍ਚੇਕਂ ‘‘ਏਕਿਸ੍ਸਾ ਭੂਮਿਯਾ ਦੁਤਿਯਾ ਉਪਪਤ੍ਤਿ ਨਤ੍ਥੀ’’ਤਿ ਯਥਾਵੁਤ੍ਤਪਾਲ਼ਿਯਾ ਵਿਞ੍ਞਾਯਤਿ, ਏਵਂ ‘‘ਸੁਦ੍ਧਾਵਾਸਾਨ’’ਨ੍ਤਿ ਅਵਿਸੇਸਵਚਨਤੋ ਸਕਲੇਪਿ ਸੁਦ੍ਧਾਵਾਸੇ ਸਾ ਨਤ੍ਥੀਤਿ ਤਾਯ ਕਸ੍ਮਾ ਨ ਵਿਞ੍ਞਾਯਤੀਤਿ ਚੋਦਨਂ ਸਮੁਟ੍ਠਾਪੇਤ੍ਵਾ ਸਯਮੇਵ ਪਰਿਹਰਿਤੁਂ ‘‘ਕਸ੍ਮਾ ਪਨਾ’’ਤਿਆਦਿਮਾਹ. ਤਤ੍ਥ ਸੁਦ੍ਧਾਵਾਸੇਸੁ ਹੇਟ੍ਠਾਭੂਮਿਕਸ੍ਸ ਅਸਤਿ ਇਨ੍ਦ੍ਰਿਯਪਰਿਪਾਕੇ ਉਪਰਿਭੂਮਿਸਮੁਪ੍ਪਤ੍ਤਿ ਨ ਸਕ੍ਕਾ ਪਟਿਸੇਧੇਤੁਂ ਉਦ੍ਧਂਸੋਤਵਚਨਤੋ. ਉਦ੍ਧਮਸ੍ਸ ਤਣ੍ਹਾਸੋਤਂ ਵਟ੍ਟਸੋਤਞ੍ਚਾਤਿ ਹਿ ਉਦ੍ਧਂਸੋਤੋ. ਤੇਨਾਹ ‘‘ਉਦ੍ਧਂਸੋਤਪਾਲ਼ਿਸਬ੍ਭਾਵਾ’’ਤਿ. ਸਂਸਨ੍ਦੇਤਬ੍ਬਾਤਿ ਯਥਾ ਨ ਵਿਰੁਜ੍ਝਨ੍ਤਿ, ਏਵਂ ਨੇਤਬ੍ਬਾ. ਤਥਾ ਚੇਵ ਸਂਵਣ੍ਣਿਤਂ.

ਏਤੇਨ ਸਨ੍ਨਿਟ੍ਠਾਨੇਨਾਤਿ ਅਙ੍ਕਿਤੋਕਾਸਭਾਵਿਰੂਪੁਪ੍ਪਾਦਸਨ੍ਨਿਸ੍ਸਯੇਨ ਨਿਚ੍ਛਯੇਨ. ਵਿਸੇਸਿਤਾ ਤਥਾਭਾਵਿਰੂਪਭਾਵਿਨੋ. ਅਸਞ੍ਞਸਤ੍ਤਾਪੀਤਿ ਨ ਕੇਵਲਂ ਪਞ੍ਚਵੋਕਾਰਾ ਏਵ, ਅਥ ਖੋ ਅਸਞ੍ਞਸਤ੍ਤਾਪਿ. ਤੇ ਏਵ ਅਸਞ੍ਞਸਤ੍ਤੇ ਏਵ ਗਹੇਤ੍ਵਾ ਪੁਰਿਮਕੋਟ੍ਠਾਸੇਤਿ ਅਧਿਪ੍ਪਾਯੋ. ਤੇਨ ਯੇ ਸਨ੍ਨਿਟ੍ਠਾਨੇਨ ਵਜ੍ਜਿਤਾਤਿ ਤੇਨ ਯਥਾਵੁਤ੍ਤਸਨ੍ਨਿਟ੍ਠਾਨੇਨ ਯੇ ਵਿਰਹਿਤਾ, ਤੇ ਤਥਾ ਨ ਵਤ੍ਤਬ੍ਬਾਤਿ ਅਤ੍ਥੋ. ਇਦਾਨਿ ‘‘ਤੇ ਤਤੋ’’ਤਿਆਦਿਨਾ ਦਸ੍ਸੇਤਿ. ਤਤੋਤਿ ਅਸਞ੍ਞਾਭਵਤੋ. ਪਚ੍ਛਿਮਭਵਿਕਾਨਨ੍ਤਿ ਏਤ੍ਥ ਪਚ੍ਛਿਮਭਵਂ ਸਰੂਪਤੋ ਦਸ੍ਸੇਤੁਂ ‘‘ਕਿਂ ਪਞ੍ਚਵੋਕਾਰਾਦੀ’’ਤਿਆਦਿ ਵੁਤ੍ਤਂ. ਅਪਚ੍ਛਿਮਭਵਿਕਾਨਮ੍ਪਿ ਅਰੂਪਾਨਂ ਅਰੂਪਭਵੇ ਯਥਾ ਰੂਪਕ੍ਖਨ੍ਧੋ ਨੁਪ੍ਪਾਦਿ, ਏਵਂ ਤਤ੍ਥ ਪਚ੍ਛਿਮਭਵਿਕਾਨਂ ਵੇਦਨਾਕ੍ਖਨ੍ਧੋਪੀਤਿ ਆਹ ‘‘ਏਤੇਨ ਸਨ੍ਨਿਟ੍ਠਾਨੇਨ ਸਙ੍ਗਹਿਤਤ੍ਤਾ’’ਤਿ. ਤੇਨਾਹ ‘‘ਤੇਸਂ…ਪੇ… ਆਹਾ’’ਤਿ. ਤਤ੍ਥ ਤੇਸਨ੍ਤਿ ਪਚ੍ਛਿਮਭਵਿਕਾਨਂ. ਤਤ੍ਥਾਤਿ ਅਰੂਪਭਵੇ. ਇਤਰਾਨੁਪ੍ਪਤ੍ਤਿਭਾਵਞ੍ਚਾਤਿ ਇਤਰਸ੍ਸ ਵੇਦਨਾਕ੍ਖਨ੍ਧਸ੍ਸ ਅਨੁਪ੍ਪਜ੍ਜਨਸਬ੍ਭਾਵਮ੍ਪਿ. ਸਪ੍ਪਟਿਸਨ੍ਧਿਕਾਨਮ੍ਪਿ ਸੁਦ੍ਧਾਵਾਸਾਨਂ ਖਨ੍ਧਭੇਦਸ੍ਸ ਪਰਿਨਿਬ੍ਬਾਨਪਰਿਯਾਯੋ ਓਲ਼ਾਰਿਕਦੋਸਪ੍ਪਹਾਨਤੋ ਕਿਲੇਸੂਪਸਮਸਾਮਞ੍ਞੇਨ ਵੁਤ੍ਤੋਤਿ ਵੇਦਿਤਬ੍ਬਂ.

ਸਬ੍ਬੇਸਞ੍ਹਿ ਤੇਸਨ੍ਤਿ ਤਂਤਂਭੂਮਿਯਂ ਠਿਤਾਨਂ ਸਬ੍ਬੇਸਂ ਸੁਦ੍ਧਾਵਾਸਾਨਂ. ਯਥਾ ਪਨਾਤਿਆਦਿਨਾ ਵੁਤ੍ਤਮੇਵਤ੍ਥਂ ਪਾਕਟਤਰਂ ਕਰੋਤਿ. ਅਨਨ੍ਤਾ ਲੋਕਧਾਤੁਯੋਤਿ ਇਦਂ ਓਕਾਸਸ੍ਸ ਪਰਿਚ੍ਛੇਦਾਭਾਵਂਯੇਵ ਦਸ੍ਸੇਤੁਂ ਵੁਤ੍ਤਂ. ਪੁਗ੍ਗਲਵਸੇਨ ਸਮਾਨਾਧਾਰਤਾਯ ਸਮਾਨਕਾਲਤ੍ਤੇਨ ਅਸਮ੍ਭਵਨ੍ਤੋ ਓਕਾਸਵਸੇਨ ਪਨ ਸਮ੍ਭਵਨ੍ਤੋ ਸਂਕਿਣ੍ਣਾ ਵਿਯ ਹੋਨ੍ਤੀਤਿ ਆਹ ‘‘ਸਂਕਿਣ੍ਣਤਾ ਹੋਤੀ’’ਤਿ.

ਪਵਤ੍ਤਿਵਾਰਵਣ੍ਣਨਾ ਨਿਟ੍ਠਿਤਾ.