੧. ਪਣ੍ਣਤ੍ਤਿਵਾਰੋ

ਉਦ੍ਦੇਸਵਾਰਵਣ੍ਣਨਾ

੨-੩. ਖਨ੍ਧਯਮਕੇ …ਪੇ… ਪਰਿਞ੍ਞਾ ਚ ਵਤ੍ਤਬ੍ਬਾਤਿ ਇਦਂ ਪਧਾਨਭਾਵੇਨ ਵਤ੍ਤਬ੍ਬਦਸ੍ਸਨਂ. ਅਭਿਞ੍ਞੇਯ੍ਯਕਥਾ ਹਿ ਅਭਿਧਮ੍ਮੋ, ਸਾ ਚ ਯਾਵਦੇਵ ਪਰਿਞ੍ਞਤ੍ਤਾਤਿ ਪਰਿਞ੍ਞਾਸੁ ਚ ਨ ਵਿਨਾ ਤੀਰਣਪਰਿਞ੍ਞਾਯ ਪਹਾਨਪਰਿਞ੍ਞਾ, ਤੀਰਣਞ੍ਚ ਸਮ੍ਪੁਣ੍ਣਪਰਾਨੁਗ੍ਗਹਸ੍ਸ ਅਧਿਪ੍ਪੇਤਤ੍ਤਾ ਕਾਲਪੁਗ੍ਗਲੋਕਾਸਵਿਭਾਗਮੁਖੇਨ ਖਨ੍ਧਾਨਂ ਵਿਸੁਂ ਸਹ ਚ ਉਪ੍ਪਾਦਨਿਰੋਧਲਕ੍ਖਣਪਰਿਗ੍ਗਹਵਸੇਨ ਸਾਤਿਸਯਂ ਸਮ੍ਭਵਤਿ, ਨਾਞ੍ਞਥਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਛਸੁ ਕਾਲਭੇਦੇਸੁ…ਪੇ… ਪਰਿਞ੍ਞਾ ਚ ਵਤ੍ਤਬ੍ਬਾ’’ਤਿ ਪਧਾਨਂ ਵਤ੍ਤਬ੍ਬਂ ਉਦ੍ਧਰਤਿ. ਤਤ੍ਥ ਪਨ ਯਥਾ ਨ ਤੀਰਣਪਰਿਞ੍ਞਾਯ ਵਿਨਾ ਪਹਾਨਪਰਿਞ੍ਞਾ, ਏਵਂ ਤੀਰਣਪਰਿਞ੍ਞਾ ਵਿਨਾ ਞਾਤਪਰਿਞ੍ਞਾਯ. ਸਾ ਚ ਸੁਤਮਯਞਾਣਮੂਲਿਕਾਤਿ ਦੇਸਨਾਕੁਸਲੋ ਸਤ੍ਥਾ ਅਨ੍ਵਯਤੋ ਬ੍ਯਤਿਰੇਕਤੋ ਚ ਸਮੁਦਾਯਾਵਯਵਪਦਤ੍ਥਾਦਿਵਿਭਾਗਦਸ੍ਸਨਮੁਖੇਨ ਖਨ੍ਧੇਸੁ ਪਰਿਞ੍ਞਾਪ੍ਪਭੇਦਂ ਪਕਾਸੇਤੁਕਾਮੋ ‘‘ਪਞ੍ਚਕ੍ਖਨ੍ਧਾ’’ਤਿਆਦਿਨਾ ਦੇਸਨਂ ਆਰਭੀਤਿ ਦਸ੍ਸੇਨ੍ਤੋ ‘‘ਤੇ ਪਨ ਖਨ੍ਧਾ’’ਤਿਆਦਿਮਾਹ. ਪਞ੍ਚਹਿ ਪਦੇਹੀਤਿ ਪਞ੍ਚਹਿ ਸਮੁਦਾਯਪਦੇਹਿ.

ਤਤ੍ਥਾਤਿ ਤੇਸੁ ਸਮੁਦਾਯਾਵਯਵਪਦੇਸੁ. ਧਮ੍ਮੋਤਿ ਰੁਪ੍ਪਨਾਦਿਕੋ ਞੇਯ੍ਯਧਮ੍ਮੋ. ਸਮੁਦਾਯਪਦਸ੍ਸਾਤਿ ਰੂਪਕ੍ਖਨ੍ਧਾਦਿਸਮੁਦਾਯਪਦਸ੍ਸ. ਯਦਿਪਿ ਅਵਯਵਵਿਨਿਮੁਤ੍ਤੋ ਪਰਮਤ੍ਥਤੋ ਸਮੁਦਾਯੋ ਨਾਮ ਨਤ੍ਥਿ, ਯਥਾ ਪਨ ਅਵਯਵੋ ਸਮੁਦਾਯੋ ਨ ਹੋਤਿ, ਏਵਂ ਨ ਸਮੁਦਾਯੋਪਿ ਅਵਯਵੋਤਿ ਸਤਿਪਿ ਸਮੁਦਾਯਾਵਯਵਾਨਂ ਭੇਦੇ ਦ੍ਵਿਨ੍ਨਂ ਪਦਾਨਂ ਸਮਾਨਾਧਿਕਰਣਭਾਵਤੋ ਅਤ੍ਥੇਵਾਭੇਦੋਤਿ ਪਦਦ੍ਵਯਸ੍ਸ ਸਮਾਨਤ੍ਥਤਾਯ ਸਿਯਾ ਆਸਙ੍ਕਾਤਿ ਆਹ ‘‘ਏਤਸ੍ਮਿਂ ਸਂਸਯਟ੍ਠਾਨੇ’’ਤਿ. ‘‘ਚਕ੍ਖਾਯਤਨਂ ਰੂਪਕ੍ਖਨ੍ਧਗਣਨਂ ਗਚ੍ਛਤਿ, ਵਿਞ੍ਞਾਣਕ੍ਖਨ੍ਧੋ ਤਜ੍ਜਾ ਮਨੋਵਿਞ੍ਞਾਣਧਾਤੂ’’ਤਿਆਦੀਸੁ ਏਕਦੇਸੋ ਸਮੁਦਾਯਪਦਤ੍ਥੋ ਵੁਤ੍ਤੋ, ‘‘ਯਂ ਕਿਞ੍ਚਿ ਰੂਪਂ…ਪੇ… ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ’’ਤਿਆਦੀਸੁ (ਵਿਭ. ੨) ਪਨ ਸਕਲੋਤਿ ਆਹ ‘‘ਰੂਪਾਦਿ…ਪੇ… ਅਤ੍ਥੋ’’ਤਿ. ਅਵਯਵਪਦਾਨਞ੍ਚੇਤ੍ਥ ਵਿਸੇਸਨਵਿਸੇਸਿਤਬ੍ਬਵਿਸਯਾਨਂ ਸਮਾਨਾਧਿਕਰਣਤਾਯ ਸਮੁਦਾਯਪਦਤ੍ਥਤਾ ਵੁਤ੍ਤਾ, ਤਤੋ ਏਵ ਸਮੁਦਾਯਪਦਾਨਮ੍ਪਿ ਅਵਯਵਪਦਤ੍ਥਤਾ. ਨ ਹਿ ਵਿਸੇਸਨਵਿਸੇਸਿਤਬ੍ਬਾਨਂ ਅਤ੍ਥਾਨਂ ਅਚ੍ਚਨ੍ਤਂ ਭੇਦੋ ਅਭੇਦੋ ਵਾ ਇਚ੍ਛਿਤੋ, ਅਥ ਖੋ ਭੇਦਾਭੇਦੋ, ਤਸ੍ਮਾ ਅਭੇਦਦਸ੍ਸਨਵਸੇਨ ਪਠਮਨਯੋ ਵੁਤ੍ਤੋ, ਭੇਦਦਸ੍ਸਨਵਸੇਨ ਦੁਤਿਯਨਯੋ. ਯੋ ਹਿ ਰੁਪ੍ਪਨਾਦਿਸਙ੍ਖਾਤੋ ਰਾਸਟ੍ਠੋ ਅਵਯਵਪਦੇਹਿ ਰੂਪਾਦਿਸਦ੍ਦੇਹਿ ਚ ਖਨ੍ਧਸਦ੍ਦੇਨ ਚ ਵਿਸੇਸਨਵਿਸੇਸਿਤਬ੍ਬਭਾਵੇਨ ਭਿਨ੍ਦਿਤ੍ਵਾ ਵੁਤ੍ਤੋ, ਸ੍ਵਾਯਂ ਅਤ੍ਥਤੋ ਰਾਸਿਭਾਵੇਨ ਅਪੇਕ੍ਖਿਤੋ ਰੁਪ੍ਪਨਾਦਿਅਤ੍ਥੋ ਏਵਾਤਿ.

ਯਥਾ ਅਵਯਵਪਦੇਹਿ ਵੁਚ੍ਚਮਾਨੋਪਿ ਸਮੁਦਾਯਪਦਸ੍ਸ ਅਤ੍ਥੋ ਹੋਤਿ, ਏਵਂ ਸਮੁਦਾਯਪਦੇਹਿ ਵੁਚ੍ਚਮਾਨੋਪਿ ਅਵਯਵਪਦਸ੍ਸ ਅਤ੍ਥੋਤਿ ‘‘ਰੂਪਕ੍ਖਨ੍ਧੋ ਰੂਪਞ੍ਚੇਵ ਰੂਪਕ੍ਖਨ੍ਧੋ ਚ, ਰੂਪਕ੍ਖਨ੍ਧੋ ਰੂਪਨ੍ਤਿ? ਆਮਨ੍ਤਾ’’ਤਿਆਦਿਨਾ ਪਦਸੋਧਨਾ ਕਤਾਤਿ ਦਸ੍ਸੇਨ੍ਤੋ ਆਹ ‘‘ਰੂਪਾਦਿਅਵਯਵਪਦੇਹਿ…ਪੇ… ਪਦਸੋਧਨਵਾਰੋ ਵੁਤ੍ਤੋ’’ਤਿ. ਤਤ੍ਥ ਏਕਚ੍ਚਸ੍ਸ ਅਵਯਵਪਦਸ੍ਸ ਅਞ੍ਞਤ੍ਥ ਵੁਤ੍ਤਿਯਾ ਅਵਯਵਪਦਤ੍ਥਸ੍ਸ ਸਮੁਦਾਯਪਦਤ੍ਥਤਾਯ ਸਿਯਾ ਅਨੇਕਨ੍ਤਿਕਤਾ, ਸਮੁਦਾਯਪਦਸ੍ਸ ਪਨ ਤਂ ਨਤ੍ਥੀਤਿ ਸਮੁਦਾਯਪਦਤ੍ਥਸ੍ਸ ਅਵਯਵਪਦਤ੍ਥਤਾਯ ਬ੍ਯਭਿਚਾਰਾਭਾਵੋ ‘‘ਰੂਪਕ੍ਖਨ੍ਧੋ ਰੂਪਨ੍ਤਿ? ਆਮਨ੍ਤਾ’’ਤਿ ਪਾਲ਼ਿਯਾ ਪਕਾਸਿਤੋਤਿ ਵੁਤ੍ਤਂ ‘‘ਰੂਪਾਦਿ…ਪੇ… ਦਸ੍ਸੇਤੁ’’ਨ੍ਤਿ.

‘‘ਰੂਪਕ੍ਖਨ੍ਧੋ’’ਤਿਆਦੀਸੁ ਖਨ੍ਧਤ੍ਥਸ੍ਸ ਵਿਸੇਸਿਤਬ੍ਬਤ੍ਤਾ ਵੁਤ੍ਤਂ ‘‘ਪਧਾਨਭੂਤਸ੍ਸ ਖਨ੍ਧਪਦਸ੍ਸਾ’’ਤਿ. ਵੇਦਨਾਦਿਉਪਪਦਤ੍ਥਸ੍ਸ ਚ ਸਮ੍ਭਵਤੋ ‘‘ਵੇਦਨਾਕ੍ਖਨ੍ਧੋ’’ਤਿਆਦੀਸੁ. ਰੂਪਾਵਯਵਪਦੇਨ ਵੁਤ੍ਤਸ੍ਸਾਤਿ ਰੂਪਸਙ੍ਖਾਤੇਨ ਅਵਯਵਪਦੇਨ ਵਿਸੇਸਨਭਾਵੇਨ ਵੁਤ੍ਤਸ੍ਸ ਖਨ੍ਧਤ੍ਥਸ੍ਸ ਰੂਪਕ੍ਖਨ੍ਧਭਾਵੋ ਹੋਤਿ. ਤੇਨ ਵੁਤ੍ਤਂ ‘‘ਰੂਪਕ੍ਖਨ੍ਧੋ ਰੂਪਨ੍ਤਿ? ਆਮਨ੍ਤਾ’’ਤਿ. ਤਤ੍ਥਾਤਿ ਤਸ੍ਮਿਂ ਰੂਪਕ੍ਖਨ੍ਧਪਦੇ. ਪਧਾਨਭੂਤੇਨ ਵਿਸੇਸਿਤਬ੍ਬਤ੍ਤਾ ਖਨ੍ਧਾਵਯਵਪਦੇਨ ਵੁਤ੍ਤਸ੍ਸ ਰੁਪ੍ਪਨਟ੍ਠਸ੍ਸ ਕਿਂ ਵੇਦਨਾਕ੍ਖਨ੍ਧਾਦਿਭਾਵੋ ਹੋਤੀਤਿ ਯੋਜਨਾ. ਸਮਾਨੇ ਅਵਯਵਪਦਾਭਿਧੇਯ੍ਯਭਾਵੇ ਅਪ੍ਪਧਾਨੇਨ ਪਦੇਨ ਯੋ ਅਤ੍ਥੋ ਵਿਞ੍ਞਾਯਤਿ, ਸੋ ਕਸ੍ਮਾ ਪਧਾਨੇਨ ਨ ਵਿਞ੍ਞਾਯਤੀਤਿ ਅਧਿਪ੍ਪਾਯੋ. ਖਨ੍ਧਾਵਯਵਪਦੇਨ ਵੁਤ੍ਤੋ ਧਮ੍ਮੋਤਿ ਰਾਸਟ੍ਠਮਾਹ. ਤਤ੍ਥ ਕੋਚੀਤਿ ਰੁਪ੍ਪਨਟ੍ਠੋ. ਕੇਨਚਿ ਸਮੁਦਾਯਪਦੇਨਾਤਿ ਰੂਪਕ੍ਖਨ੍ਧਪਦੇਨ, ਨ ਵੇਦਨਾਕ੍ਖਨ੍ਧਾਦਿਪਦੇਨ. ਤੇਨਾਹ ‘‘ਨ ਸਬ੍ਬੋ ਸਬ੍ਬੇਨਾ’’ਤਿ. ਏਸ ਨਯੋ ਵੇਦਨਾਕ੍ਖਨ੍ਧਾਦੀਸੁ. ਰੂਪਰੂਪਕ੍ਖਨ੍ਧਾਦਿਅਵਯਵਸਮੁਦਾਯਪਦਸੋਧਨਮੁਖੇਨ ਤਤ੍ਥ ਚ ਚਤੁਕ੍ਖਨ੍ਧਵਸੇਨ ਪਵਤ੍ਤਾ ਪਾਲ਼ਿਗਤਿ ਪਦਸੋਧਨਮੂਲਚਕ੍ਕਵਾਰੋ. ਏਵਞ੍ਚ ਦਸ੍ਸੇਨ੍ਤੇਨਾਤਿ ਇਮਿਨਾ ਯ੍ਵਾਯਂ ਰੂਪਾਦਿਅਵਯਵਪਦੇਹਿ ਰੂਪਕ੍ਖਨ੍ਧਾਦਿਸਮੁਦਾਯਪਦੇਹਿ ਚ ਦਸ੍ਸਿਤਾਕਾਰੋ ਅਤ੍ਥਵਿਸੇਸੋ, ਤਂ ਪਚ੍ਚਾਮਸਤਿ. ਵਿਸੇਸਨਭਾਵੋ ਭੇਦਕਤਾਯ ਸਾਮਞ੍ਞਤੋ ਅਵਚ੍ਛੇਦਕਤ੍ਤਾ, ਵਿਸੇਸਿਤਬ੍ਬਭਾਵੋ ਅਭੇਦਯੋਗੇਨ ਭੇਦਨ੍ਤਰਤੋ ਅਵਿਚ੍ਛਿਨ੍ਦਿਤਬ੍ਬਤ੍ਤਾ, ਸਮਾਨਾਧਿਕਰਣਭਾਵੋ ਤੇਸਂ ਭੇਦਾਭੇਦਾਨਂ ਏਕਵਤ੍ਥੁਸਨ੍ਨਿਸ੍ਸਯਤ੍ਤਾ.

ਤੇਨਾਤਿ ਯਥਾਵੁਤ੍ਤੇਨ ਵਿਸੇਸਨਵਿਸੇਸਿਤਬ੍ਬਭਾਵੇਨ. ਏਤ੍ਥਾਤਿ ਏਤਸ੍ਮਿਂ ਸਮਾਨਾਧਿਕਰਣੇ. ਤੇਨਾਤਿ ਵਾ ਸਮਾਨਾਧਿਕਰਣਭਾਵੇਨ. ਏਤ੍ਥਾਤਿ ਰੂਪਕ੍ਖਨ੍ਧਪਦੇ. ਯਥਾ ਨੀਲੁਪ੍ਪਲਪਦੇ ਉਪ੍ਪਲਵਿਸੇਸਨਭੂਤਂ ਨੀਲਂ ਵਿਸਿਟ੍ਠਮੇਵ ਹੋਤਿ, ਨ ਯਂ ਕਿਞ੍ਚਿ, ਏਵਮਿਧਾਪਿ ਖਨ੍ਧਵਿਸੇਸਨਭੂਤਂ ਰੂਪਮ੍ਪਿ ਵਿਸਿਟ੍ਠਮੇਵ ਸਿਯਾਤਿ ਦਸ੍ਸੇਨ੍ਤੋ ‘‘ਕਿਂ ਖਨ੍ਧਤੋ…ਪੇ… ਹੋਤੀ’’ਤਿ ਆਹ. ਤਥਾ ‘‘ਰੂਪਞ੍ਚ ਤਂ ਖਨ੍ਧੋ ਚਾ’’ਤਿ ਸਮਾਨਾਧਿਕਰਣਭਾਵੇਨੇਵ ਯਂ ਰੂਪਂ, ਸੋ ਖਨ੍ਧੋ. ਯੋ ਖਨ੍ਧੋ, ਤਂ ਰੂਪਨ੍ਤਿ ਅਯਮ੍ਪਿ ਆਪਨ੍ਨੋ ਏਵਾਤਿ ਆਹ ‘‘ਸਬ੍ਬੇਵ…ਪੇ… ਵਿਸੇਸਿਤਬ੍ਬਾ’’ਤਿ. ਵਿਸੇਸਨੇਨ ਚ ਨਾਮ ਨਿਦ੍ਧਾਰਿਤਰੂਪੇਨ ਭਵਿਤਬ੍ਬਂ ਅਵਚ੍ਛੇਦਕਤ੍ਤਾ, ਨ ਅਨਿਦ੍ਧਾਰਿਤਰੂਪੇਨਾਤਿ ਆਹ ‘‘ਕਿਂ ਪਨ ਤ’’ਨ੍ਤਿਆਦਿ, ਤਸ੍ਸੇਵ ਗਹਿਤਤ੍ਤਾ ਨ ਪਿਯਰੂਪਸਾਤਰੂਪਸ੍ਸਾਤਿ ਅਧਿਪ੍ਪਾਯੋ. ਨ ਹਿ ਤਂ ਖਨ੍ਧਵਿਸੇਸਨਭਾਵੇਨ ਗਹਿਤਂ, ਵਿਸ੍ਸਜ੍ਜਨਂ ਕਤਂ ਤਸ੍ਸੇਵਾਤਿ ਯੋਜਨਾ. ਨ ਖਨ੍ਧਤੋ ਅਞ੍ਞਂ ਰੂਪਂ ਅਤ੍ਥੀਤਿ ਇਦਂ ਰੁਪ੍ਪਨਟ੍ਠੋ ਰੂਪਨ੍ਤਿ ਕਤ੍ਵਾ ਵੁਤ੍ਤਂ, ਨ ਹਿ ਸੋ ਖਨ੍ਧਵਿਨਿਮੁਤ੍ਤੋ ਅਤ੍ਥਿ. ਤੇਨੇਵਾਤਿ ਯਥਾਵੁਤ੍ਤਰੂਪਸ੍ਸ ਖਨ੍ਧਵਿਨਿਮੁਤ੍ਤਸ੍ਸ ਅਭਾਵੇਨੇਵ. ‘‘ਪਿਯਰੂਪਂ ਸਾਤਰੂਪਂ, ਦਸ੍ਸੇਨ੍ਤੇਨਪ੍ਪਕ’’ਨ੍ਤਿ ਚ ਆਦੀਸੁ ਅਤਦਤ੍ਥਸ੍ਸ ਰੂਪਸਦ੍ਦਸ੍ਸ ਲਬ੍ਭਮਾਨਤ੍ਤਾ ‘‘ਤੇਨ ਰੂਪਸਦ੍ਦੇਨਾ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਵੁਚ੍ਚਮਾਨਂ ਭੂਤੁਪਾਦਾਯਮ੍ਪਿ ਭੇਦਂ ਧਮ੍ਮਜਾਤਂ. ਸੁਦ੍ਧੇਨਾਤਿ ਕੇਵਲੇਨ, ਰੂਪਸਦ੍ਦੇਨ ਵਿਨਾਪੀਤਿ ਅਤ੍ਥੋ. ਤਯਿਦਂ ਪਕਰਣਾਦਿਅਵਚ੍ਛਿਨ੍ਨਤਂ ਸਨ੍ਧਾਯ ਵੁਤ੍ਤਂ, ਸਮਾਨਾਧਿਕਰਣਤਂ ਵਾ. ਯੋ ਹਿ ਰੂਪਸਦ੍ਦੇਨ ਸਮਾਨਾਧਿਕਰਣੋ ਖਨ੍ਧਸਦ੍ਦੋ, ਤੇਨ ਯਥਾਵੁਤ੍ਤਰੂਪਸਦ੍ਦੇਨ ਵਿਯ ਤਦਤ੍ਥੋ ਵੁਚ੍ਚਤੇਵ. ਤੇਨਾਹ ‘‘ਖਨ੍ਧਾ ਰੂਪਕ੍ਖਨ੍ਧੋ’’ਤਿ. ਯਦਿਪਿ ਯਥਾਵੁਤ੍ਤਂ ਰੂਪਂ ਖਨ੍ਧੋ ਏਵ ਚ, ਖਨ੍ਧੋ ਪਨ ਨ ਰੂਪਮੇਵਾਤਿ ਆਹ ‘‘ਨ ਚ ਸਬ੍ਬੇ…ਪੇ… ਵਿਸੇਸਿਤਬ੍ਬਾ’’ਤਿ. ਤੇਨੇਵਾਤਿ ਅਰੂਪਸਭਾਵਸ੍ਸ ਖਨ੍ਧਸ੍ਸ ਅਤ੍ਥਿਭਾਵੇਨੇਵ. ਤੇਤਿ ਖਨ੍ਧਾ. ਵਿਭਜਿਤਬ੍ਬਾਤਿ ‘‘ਖਨ੍ਧਾ ਰੂਪਕ੍ਖਨ੍ਧੋ’’ਤਿ ਪਦਂ ਉਦ੍ਧਰਿਤ੍ਵਾ ‘‘ਰੂਪਕ੍ਖਨ੍ਧੋ ਖਨ੍ਧੋ ਚੇਵ ਰੂਪਕ੍ਖਨ੍ਧੋ ਚ, ਅਵਸੇਸਾ ਖਨ੍ਧਾ ਨ ਰੂਪਕ੍ਖਨ੍ਧੋ’’ਤਿਆਦਿਨਾ ਵਿਭਾਗੇਨ ਦਸ੍ਸੇਤਬ੍ਬਾ.

ਖਨ੍ਧਾਨਂ ਰੂਪਵਿਸੇਸਨ…ਪੇ… ਸਂਸਯੋ ਹੋਤੀਤਿ ਏਤ੍ਥ ਕਿਂ ਖਨ੍ਧਤੋ ਅਞ੍ਞਾਪਿ ਵੇਦਨਾ ਅਤ੍ਥਿ, ਯਤੋ ਵਿਨਿਵਤ੍ਤਾ ਵੇਦਨਾ ਖਨ੍ਧਵਿਸੇਸਨਂ ਹੋਤਿ, ਸਬ੍ਬੇ ਚ ਖਨ੍ਧਾ ਕਿਂ ਖਨ੍ਧਵਿਸੇਸਨਭੂਤਾਯ ਵੇਦਨਾਯ ਵਿਸੇਸਿਤਬ੍ਬਾਤਿ ਏਵਂ ਯੋਜਨਾ ਵੇਦਿਤਬ੍ਬਾ. ਕੇਚੀਤਿ ਅਨੁਭਵਨਾਦਿਪ੍ਪਕਾਰਾ. ਕੇਨਚਿ ਵਿਸੇਸਨੇਨਾਤਿ ਵੇਦਨਾਦਿਨਾ ਵਿਸੇਸਨੇਨ.

ਏਤ੍ਥ ਚ ਰੂਪਾਦਿਪਣ੍ਣਤ੍ਤਿ ਖਨ੍ਧਪਣ੍ਣਤ੍ਤਿ ਚ ‘‘ਰੂਪਂ ਖਨ੍ਧੋ, ਖਨ੍ਧਾ ਰੂਪਕ੍ਖਨ੍ਧੋ’’ਤਿਆਦਿਨਾ ਵਿਸੁਂ ਸਹ ਚ ਰੁਪ੍ਪਨਾਦਿਕੇ ਅਤ੍ਥੇ ਪਵਤ੍ਤਮਾਨਾ ਕਦਾਚਿ ਅਵਯਵਭੂਤੇ ਪਵਤ੍ਤਤਿ, ਕਦਾਚਿ ਸਮੁਦਾਯਭੂਤੇ, ਤਸ੍ਸਾ ਪਨ ਤਥਾ ਪਵਤ੍ਤਨਾਕਾਰੇ ਨਿਦ੍ਧਾਰਿਤੇ ਯਸ੍ਮਾ ਰੂਪਾਦਿਕ੍ਖਨ੍ਧਾ ਪਦਤੋ ਅਤ੍ਥਤੋ ਚ ਵਿਸੋਧਿਤਾ ਨਾਮ ਹੋਨ੍ਤਿ ਤਬ੍ਬਿਸਯਕਙ੍ਖਾਪਨੋਦਨਤੋ, ਤਸ੍ਮਾ ‘‘ਰੂਪਕ੍ਖਨ੍ਧੋ ਰੂਪਞ੍ਚੇਵ ਰੂਪਕ੍ਖਨ੍ਧੋ ਚ, ਰੂਪਕ੍ਖਨ੍ਧੋ ਰੂਪਨ੍ਤਿ? ਆਮਨ੍ਤਾ’’ਤਿਆਦਿਨਯਪ੍ਪਵਤ੍ਤੇਨ ਪਠਮਵਾਰੇਨ ਰੂਪਾਦਿਅਵਯਵਪਦੇਹਿ ਅਵਯਵਤ੍ਥੋ ਵਿਯ ਸਮੁਦਾਯਤ੍ਥੋਪਿ ਵੁਚ੍ਚਤਿ, ਤਥਾ ਸਮੁਦਾਯਪਦੇਹਿਪੀਤਿ ਅਯਮਤ੍ਥੋ ਦਸ੍ਸਿਤੋ. ‘‘ਰੂਪਂ ਰੂਪਕ੍ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’’ਤਿਆਦਿਨਯਪ੍ਪਵਤ੍ਤੇਨ ਪਨ ਦੁਤਿਯਵਾਰੇਨ ਵਿਸੇਸਵਾਚੀ ਵਿਯ ਰੂਪਾਦਿਅਵਯਵਪਦੇਹਿ ਸਾਮਞ੍ਞਭੂਤੇਨਪਿ ਤਂਤਂਵਿਸਿਟ੍ਠੇਨ ਖਨ੍ਧਾਵਯਵਪਦੇਨ ਸੋ ਸੋ ਏਵ ਸਮੁਦਾਯਤ੍ਥੋ ਵੁਚ੍ਚਤਿ, ਨ ਸਬ੍ਬੋਤਿ ਅਯਮਤ੍ਥੋ ਦਸ੍ਸਿਤੋ. ਖਨ੍ਧਵਿਨਿਮੁਤ੍ਤਸ੍ਸ ਯਥਾਧਿਪ੍ਪੇਤਸ੍ਸ ਅਭਾਵਾ ਯਦਿਪਿ ਖਨ੍ਧੋਯੇਵ ਰੂਪਂ, ਸੋ ਪਨ ਨ ਸਬ੍ਬੋ ਰੂਪਂ, ਅਥ ਖੋ ਤਦੇਕਦੇਸੋ, ਤਥਾ ਵੇਦਨਾਦਯੋਪੀਤਿ ਅਯਮਤ੍ਥੋ ‘‘ਰੂਪਂ ਖਨ੍ਧੋ, ਖਨ੍ਧਾ ਰੂਪ’’ਨ੍ਤਿਆਦਿਨਯਪ੍ਪਵਤ੍ਤੇਨ ਤਤਿਯਵਾਰੇਨ ਦਸ੍ਸਿਤੋ. ‘‘ਰੂਪਂ ਖਨ੍ਧੋ, ਖਨ੍ਧਾ ਵੇਦਨਾਕ੍ਖਨ੍ਧੋ’’ਤਿਆਦਿਨਯਪ੍ਪਵਤ੍ਤੇਨ ਪਨ ਚਤੁਤ੍ਥਵਾਰੇਨ ‘‘ਰੂਪਂ ਖਨ੍ਧੋ’’ਤਿ ਰੂਪਸ੍ਸ ਖਨ੍ਧਭਾਵੇ ਨਿਚ੍ਛਿਤੇ ਖਨ੍ਧੋ ਨਾਮਾਯਂ ਨ ਕੇਵਲਂ ਰੂਪਮੇਵ, ਅਥ ਖੋ ਵੇਦਨਾਦਿ ਚਾਤਿ ਵੇਦਨਾਦੀਨਮ੍ਪਿ ਖਨ੍ਧਭਾਵਪ੍ਪਕਾਸਨੇ ਨ ਸਬ੍ਬੇ ਖਨ੍ਧਾ ਵੇਦਨਾਦਿਵਿਸੇਸਵਨ੍ਤੋ, ਕੇਚਿਦੇਵ ਪਨ ਤੇਨ ਤੇਨ ਵਿਸੇਸੇਨ ਤਥਾ ਵੁਚ੍ਚਨ੍ਤੀਤਿ ਅਯਮਤ੍ਥੋ ਦਸ੍ਸਿਤੋ. ਏਵਂ ਦਸ੍ਸੇਨ੍ਤੀ ਚੇਸਾ ਪਾਲ਼ਿ ਖਨ੍ਧਾਨਂ ਯਥਾਵੁਤ੍ਤਪਣ੍ਣਤ੍ਤਿਸੋਧਨਮੁਖੇਨ ਸਰੂਪਾਵਧਾਰਣਾਯ ਸਂਵਤ੍ਤਤਿ, ਤਞ੍ਚ ਤੇਸਂ ਯਾਵਦੇਵ ਉਪ੍ਪਾਦਾਦਿਨਿਚ੍ਛਯਤ੍ਥਨ੍ਤਿ ਦਸ੍ਸੇਨ੍ਤੋ ‘‘ਏਵਂ ਯੇਸਂ…ਪੇ… ਵੇਦਿਤਬ੍ਬੋ’’ਤਿ ਆਹ.

ਏਕਦੇਸੇਪਿ ਸਮੁਦਾਯਵੋਹਾਰੋ ਦਿਸ੍ਸਤਿ ਯਥਾ ਪਟੋ ਦਡ੍ਢੋ, ਸਮੁਦ੍ਦੋ ਦਿਟ੍ਠੋਤਿ ਆਹ ‘‘ਚਕ੍ਕਾਵਯਵਭਾਵਤੋ ਚਕ੍ਕਾਨੀਤਿ ਯਮਕਾਨਿ ਵੁਤ੍ਤਾਨੀ’’ਤਿ. ਬਨ੍ਧਿਤ੍ਵਾਤਿ ਯਮਕਭਾਵੇਨ ਬਨ੍ਧਿਤ੍ਵਾ, ਯਮਕਮੂਲਭਾਵੇਨੇਵ ਵਾ. ਮੂਲਭਾਵੇਨ ਗਹਣਂ ਸਮ੍ਬਨ੍ਧਭਾਵੋ, ਤਂਸਮ੍ਬਨ੍ਧਤਾ ਚ ਮੂਲਪਦਾਦੀਨਂ ਨਾਭਿਆਦਿਸਦਿਸਤਾ ਦਟ੍ਠਬ੍ਬਾ. ਅਪੁਬ੍ਬਸ੍ਸ ਵਤ੍ਤਬ੍ਬਸ੍ਸ ਅਭਾਵਤੋ ਨਯਿਧ ਦੇਸਨਾ ਮਣ੍ਡਲਭਾਵੇਨੇਵ ਸਮ੍ਬਜ੍ਝਤੀਤਿ ਆਹ ‘‘ਨ ਮਣ੍ਡਲਭਾਵੇਨ ਸਮ੍ਬਜ੍ਝਨਤੋ’’ਤਿ. ਯਦਿਪਿ ਰੂਪਕ੍ਖਨ੍ਧਮੂਲਕੇ ਅਪੁਬ੍ਬਂ ਨਤ੍ਥਿ, ਵੇਦਨਾਕ੍ਖਨ੍ਧਾਦਿਮੂਲਕੇਸੁ ਪਨ ਸਞ੍ਞਾਦਿਮੁਖੇਨ ਦੇਸਨਪ੍ਪਵਤ੍ਤਿਯਂ ਅਪੁਬ੍ਬਵਸੇਨੇਵ ਗਤੋ ਸਿਯਾ ਮਣ੍ਡਲਭਾਵੇਨ ਸਮ੍ਬਨ੍ਧੋ, ਨ ਤਥਾ ਪਾਠੋ ਪਵਤ੍ਤੋਤਿ ਆਹ ‘‘ਵੇਦਨਾਕ੍ਖਨ੍ਧ…ਪੇ… ਸਮ੍ਬਨ੍ਧੇਨਾ’’ਤਿ. ਪਚ੍ਛਿਮਸ੍ਸ ਪੁਰਿਮੇਨ ਅਸਮ੍ਬਜ੍ਝਨਮੇਵ ਹਿ ਹੇਟ੍ਠਿਮਸੋਧਨਂ. ਸੁਦ੍ਧਕ੍ਖਨ੍ਧਲਾਭਮਤ੍ਤਮੇਵ ਗਹੇਤ੍ਵਾਤਿ ‘‘ਖਨ੍ਧਾ ਰੂਪ’’ਨ੍ਤਿ ਏਤ੍ਥ ਖਨ੍ਧਾਤਿ ਖਨ੍ਧਸਦ੍ਦੇਨ ਲਬ੍ਭਮਾਨਂ ਰੂਪਾਦੀਹਿ ਅਸਮ੍ਮਿਸ੍ਸਂ ਖਨ੍ਧਟ੍ਠਮਤ੍ਤਮੇਵ ਉਦ੍ਦੇਸਵਸੇਨ ਗਹੇਤ੍ਵਾ. ਯਦਿਪਿ ਉਦ੍ਦੇਸੇ ਖਨ੍ਧਵਿਸੇਸਨਂ ਰੂਪਾਦਿ ‘‘ਖਨ੍ਧਾ ਰੂਪ’’ਨ੍ਤਿ ਸੁਦ੍ਧਰੂਪਾਦਿਮਤ੍ਤਮੇਵ ਗਹਿਤਂ, ਤਥਾਪਿ ਵਿਸੇਸਰਹਿਤਸ੍ਸ ਸਾਮਞ੍ਞਸ੍ਸ ਅਭਾਵਤੋ ਤਤ੍ਥ ਸੁਦ੍ਧਰੂਪਾਦਿਮਤ੍ਤਤਾਯ ਅਟ੍ਠਤ੍ਵਾ. ਖਨ੍ਧਵਿਸੇਸਨਭਾਵਸਙ੍ਖਾਤਨ੍ਤਿ ਯਥਾਧਿਗਤਂ ਖਨ੍ਧਾਨਂ ਵਿਸੇਸਨਭਾਵੇਨ ਕਥਿਤਂ ਰੁਪ੍ਪਨਾਦਿਕਂ ਵਿਸੇਸਨਤ੍ਥਂ ਦਸ੍ਸੇਤੁਂ. ਕੇਵਲਮੇਵ ਤਂ ਅਗ੍ਗਣ੍ਹਨ੍ਤੋ ਖਨ੍ਧਸਦ੍ਦੇਨ ਸਹ ਯੋਜੇਤ੍ਵਾ…ਪੇ… ਵਿਭਤ੍ਤਤ੍ਤਾ ਸੁਦ੍ਧਕ੍ਖਨ੍ਧਵਾਰੋਤਿ ਵੁਤ੍ਤੋਤਿ ਯੋਜਨਾ.

ਉਦ੍ਦੇਸਵਾਰਵਣ੍ਣਨਾ ਨਿਟ੍ਠਿਤਾ.