੨. ਅਨ੍ਤਰਾਭਵਕਥਾਵਣ੍ਣਨਾ

੫੦੫. ਅਨ੍ਤਰਟ੍ਠਾਨਾਨੀਤਿ ਅਨ੍ਤਰਿਕਟ੍ਠਾਨਾਨਿ. ਨਿਵਾਰਕਟ੍ਠਾਨਾਨਿ ਭਿਨ੍ਦਿਤ੍ਵਾ ਚ ਆਕਾਸੇਨ ਚ ਗਮਨਤੋ. ਯਦਿ ਸੋ ਭਵਾਨਂ ਅਨ੍ਤਰਾ ਨ ਸਿਯਾਤਿ ਸੋ ਅਨ੍ਤਰਾਭਵੋ ਕਾਮਭਵਾਦੀਨਂ ਭਵਾਨਂ ਅਨ੍ਤਰੇ ਯਦਿ ਨ ਭਵੇਯ੍ਯ. ਨ ਨਾਮ ਅਨ੍ਤਰਾਭਵੋਤਿ ‘‘ਸਬ੍ਬੇਨ ਸਬ੍ਬਂ ਨਤ੍ਥਿ ਨਾਮ ਅਨ੍ਤਰਾਭਵੋ’’ਤਿ ਏਵਂ ਪਵਤ੍ਤਸ੍ਸ ਸਕਵਾਦਿਵਚਨਸ੍ਸ ਪਟਿਕ੍ਖੇਪੇ ਕਾਰਣਂ ਨਤ੍ਥਿ, ਤਸ੍ਸ ਪਟਿਕ੍ਖੇਪੇ ਕਾਰਣਂ ਹਦਯੇ ਠਪੇਤ੍ਵਾ ਨ ਪਟਿਕ੍ਖਿਪਤਿ, ਅਥ ਖੋ ਤਥਾ ਅਨਿਚ੍ਛਨ੍ਤੋ ਕੇਵਲਂ ਲਦ੍ਧਿਯਾ ਪਟਿਕ੍ਖਿਪਤੀਤਿ ਅਤ੍ਥੋ.

੫੦੬. ਜਾਤੀਤਿ ਨ ਇਚ੍ਛਤੀਤਿ ਸਮ੍ਬਨ੍ਧੋ.

੫੦੭. ਏਵਂ ਤਂ ਤਤ੍ਥ ਨ ਇਚ੍ਛਤੀਤਿ ਕਾਮਭਵਾਦੀਸੁ ਵਿਯ ਤਂ ਚੁਤਿਪਟਿਸਨ੍ਧਿਪਰਮ੍ਪਰਂ ਤਤ੍ਥ ਅਨ੍ਤਰਾਭਵਾਵਤ੍ਥਾਯ ਨ ਇਚ੍ਛਤਿ. ਸੋ ਹਿ ਤਸ੍ਸ ਭਾਵਿਭਵਨਿਬ੍ਬਤ੍ਤਕਕਮ੍ਮਤੋ ਏਵ ਪਵਤ੍ਤਿਂ ਇਚ੍ਛਤਿ, ਤਸ੍ਮਾ ਜਾਤਿਜਰਾਮਰਣਾਨਿ ਅਨਿਚ੍ਚਤੋ ਕੁਤੋ ਚੁਤਿਪਟਿਸਨ੍ਧਿਪਰਮ੍ਪਰਾ. ਅਯਞ੍ਚ ਵਾਦੋ ਅਨ੍ਤਰਾਭਵਵਾਦੀਨਂ ਏਕਚ੍ਚਾਨਂ ਵੁਤ੍ਤੋ. ਯੇ ‘‘ਅਪ੍ਪਕੇਨ ਕਾਲੇਨ ਸਤ੍ਤਾਹੇਨੇਵ ਵਾ ਪਟਿਸਨ੍ਧਿਂ ਪਾਪੁਣਾਤੀ’’ਤਿ ਵਦਨ੍ਤਿ, ਯੇ ਪਨ ‘‘ਤਤ੍ਥੇਵ ਚਵਿਤ੍ਵਾ ਆਯਾਤੀਤਿ ਸਤ੍ਤਸਤ੍ਤਾਹਾਨੀ’’ਤਿ ਵਦਨ੍ਤਿ, ਤੇਹਿ ਅਨੁਞ੍ਞਾਤਾਵ ਚੁਤਿਪਟਿਸਨ੍ਧਿਪਰਮ੍ਪਰਾਤਿ ਤੇ ਅਧੁਨਾਤਨਾ ਦਟ੍ਠਬ੍ਬਾ ਪਾਲ਼ਿਯਂ ‘‘ਅਨ੍ਤਰਾਭਵੇ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ’’ਤਿ ਆਗਤਤ੍ਤਾ. ਯਥਾ ਚੇਤਂ, ਏਵਂ ਨਿਰਯੂਪਗਾਦਿਭਾਵਮ੍ਪਿਸ੍ਸ ਅਧੁਨਾਤਨਾ ਪਟਿਜਾਨਨ੍ਤਿ. ਤਥਾ ਹਿ ਤੇ ਵਦਨ੍ਤਿ ‘‘ਉਦ੍ਧਂਪਾਦੋ ਤੁ ਨਾਰਕੋ’’ਤਿਆਦਿ. ਤਤ੍ਥ ਯਂ ਨਿਸ੍ਸਾਯ ਪਰਵਾਦੀ ਅਨ੍ਤਰਾਭਵਂ ਨਾਮ ਪਰਿਕਪ੍ਪੇਤਿ, ਤਂ ਦਸ੍ਸੇਤੁਂ ਅਟ੍ਠਕਥਾਯਂ ‘‘ਅਨ੍ਤਰਾਪਰਿਨਿਬ੍ਬਾਯੀਤਿ ਸੁਤ੍ਤਪਦਂ ਅਯੋਨਿਸੋ ਗਹੇਤ੍ਵਾ’’ਤਿ ਵੁਤ੍ਤਂ. ਇਮਸ੍ਸ ਹਿ ‘‘ਅਵਿਹਾਦੀਸੁ ਤਤ੍ਥ ਤਤ੍ਥ ਆਯੁਵੇਮਜ੍ਝਂ ਅਨਤਿਕ੍ਕਮਿਤ੍ਵਾ ਅਨ੍ਤਰਾ ਅਗ੍ਗਮਗ੍ਗਾਧਿਗਮੇਨ ਅਨਵਸੇਸਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ, ਅਨ੍ਤਰਾਪਰਿਨਿਬ੍ਬਾਯੀ’’ਤਿ ਸੁਤ੍ਤਪਦਸ੍ਸ ਅਯਮਤ੍ਥੋ, ਨ ਅਨ੍ਤਰਾਭਵਭੂਤੋਤਿ. ਤਸ੍ਮਾ ਵੁਤ੍ਤਂ ‘‘ਅਨ੍ਤਰਾਪਰਿਨਿਬ੍ਬਾਯੀਤਿ ਸੁਤ੍ਤਪਦਂ ਅਯੋਨਿਸੋ ਗਹੇਤ੍ਵਾ’’ਤਿ.

ਯੇ ਪਨ ‘‘ਸਮ੍ਭਵੇਸੀਤਿ ਵਚਨਤੋ ਅਤ੍ਥੇਵ ਅਨ੍ਤਰਾਭਵੋ. ਸੋ ਹਿ ਸਮ੍ਭਵਂ ਉਪਪਤ੍ਤਿਂ ਏਸਤੀਤਿ ਸਮ੍ਭਵੇਸੀ’’ਤਿ ਵਦਨ੍ਤਿ, ਤੇਪਿ ਯੇ ਭੂਤਾਵ ਨ ਪੁਨ ਭਵਿਸ੍ਸਨ੍ਤਿ, ਤੇ ਖੀਣਾਸਵਾ ‘‘ਭੂਤਾਨਂ ਵਾ ਸਤ੍ਤਾਨਂ ਠਿਤਿਯਾ’’ਤਿ ਏਤ੍ਥ ‘‘ਭੂਤਾ’’ਤਿ ਵੁਤ੍ਤਾ. ਤਬ੍ਬਿਧੁਰਤਾਯ ਸਮ੍ਭਵਮੇਸਨ੍ਤੀਤਿ ਸਮ੍ਭਵੇਸਿਨੋ, ਅਪ੍ਪਹੀਨਭਵਸਂਯੋਜਨਤ੍ਤਾ ਸੇਕ੍ਖਾ ਪੁਥੁਜ੍ਜਨਾ. ਚਤੂਸੁ ਵਾ ਯੋਨੀਸੁ ਅਣ੍ਡਜਜਲਾਬੁਜਾ ਸਤ੍ਤਾ ਯਾਵ ਅਣ੍ਡਕੋਸਂ ਵਤ੍ਥਿਕੋਸਞ੍ਚ ਨ ਭਿਨ੍ਦਨ੍ਤਿ, ਤਾਵ ਸਮ੍ਭਵੇਸੀ ਨਾਮ, ਅਣ੍ਡਕੋਸਤੋ ਵਤ੍ਥਿਕੋਸਤੋ ਚ ਨਿਕ੍ਖਨ੍ਤਾ ਭੂਤਾ ਨਾਮ. ਸਂਸੇਦਜਓਪਪਾਤਿਕਾ ਚ ਪਠਮਚਿਤ੍ਤਕ੍ਖਣੇ ਸਮ੍ਭਵੇਸੀ ਨਾਮ, ਦੁਤਿਯਚਿਤ੍ਤਕ੍ਖਣਤੋ ਪਟ੍ਠਾਯ ਭੂਤਾ ਨਾਮ. ਯੇਨ ਵਾ ਇਰਿਯਾਪਥੇਨ ਜਾਯਨ੍ਤਿ, ਯਾਵ ਤਤੋ ਅਞ੍ਞਂ ਨ ਪਾਪੁਣਨ੍ਤਿ, ਤਾਵ ਸਮ੍ਭਵੇਸੀ ਨਾਮ, ਤਤੋ ਪਰਂ ਭੂਤਾ ਨਾਮਾਤਿ ਏਵਂ ਉਜੁਕੇ ਪਾਲ਼ਿਅਨੁਗਤੇ ਅਤ੍ਥੇ ਸਤਿ ਕਿਂ ਅਨਿਦ੍ਧਾਰਿਤਸ੍ਸ ਪਤ੍ਥਿਯੇਨ ਅਨ੍ਤਰਾਭਵੇਨ ਅਤ੍ਤਭਾਵੇਨ ਪਰਿਕਪ੍ਪਿਤੇਨ ਪਯੋਜਨਨ੍ਤਿ ਪਟਿਕ੍ਖਿਪਿਤਬ੍ਬਾ.

ਯਂ ਪਨੇਕੇ ‘‘ਸਨ੍ਤਾਨਵਸੇਨ ਪਵਤ੍ਤਮਾਨਾਨਂ ਧਮ੍ਮਾਨਂ ਅਵਿਚ੍ਛੇਦੇਨ ਦੇਸਨ੍ਤਰੇਸੁ ਪਾਤੁਭਾਵੋ ਦਿਟ੍ਠੋ. ਯਥਾ ਤਂ ਵੀਹਿਆਦਿਅਵਿਞ੍ਞਾਣਕਸਨ੍ਤਾਨੇ, ਏਵਂ ਸਵਿਞ੍ਞਾਣਕਸਨ੍ਤਾਨੇਪਿ ਅਵਿਚ੍ਛੇਦੇਨ ਦੇਸਨ੍ਤਰੇ ਪਾਤੁਭਾਵੇਨ ਭਵਿਤਬ੍ਬਂ. ਅਯਞ੍ਚ ਨਯੋ ਸਤਿ ਅਨ੍ਤਰਾਭਵੇ ਯੁਜ੍ਜਤਿ, ਨਾਞ੍ਞਥਾ’’ਤਿ ਯੁਤ੍ਤਿਂ ਵਦਨ੍ਤਿ, ਤੇਹਿ ਇਦ੍ਧਿਮਤੋ ਚੇਤੋਵਸਿਪ੍ਪਤ੍ਤਸ੍ਸ ਚਿਤ੍ਤਾਨੁਗਤਿਕਂ ਕਾਯਂ ਅਧਿਟ੍ਠਹਨ੍ਤਸ੍ਸ ਖਣੇਨ ਬ੍ਰਹ੍ਮਲੋਕਤੋ ਇਧੂਪਸਙ੍ਕਮਨੇ ਇਤੋ ਵਾ ਬ੍ਰਹ੍ਮਲੋਕੂਪਗਮਨੇ ਯੁਤ੍ਤਿ ਵਤ੍ਤਬ੍ਬਾ. ਯਦਿ ਸਬ੍ਬਤ੍ਥੇਵ ਵਿਚ੍ਛਿਨ੍ਨਦੇਸੇ ਧਮ੍ਮਾਨਂ ਪਵਤ੍ਤਿ ਨ ਇਚ੍ਛਿਤਾ, ਯਦਿਪਿ ਸਿਯਾ ‘‘ਇਦ੍ਧਿਮਨ੍ਤਾਨਂ ਇਦ੍ਧਿਵਿਸਯੋ ਅਚਿਨ੍ਤੇਯ੍ਯੋ’’ਤਿ, ਤਂ ਇਧਾਪਿ ਸਮਾਨਂ ‘‘ਕਮ੍ਮਵਿਪਾਕੋ ਅਚਿਨ੍ਤੇਯ੍ਯੋ’’ਤਿ ਵਚਨਤੋ, ਤਸ੍ਮਾ ਤਂ ਤੇਸਂ ਮਤਿਮਤ੍ਤਮੇਵ. ਅਚਿਨ੍ਤੇਯ੍ਯਸਭਾਵਾ ਹਿ ਸਭਾਵਧਮ੍ਮਾ, ਤੇ ਕਤ੍ਥਚਿ ਪਚ੍ਚਯਵਸੇਨ ਵਿਚ੍ਛਿਨ੍ਨਦੇਸੇ ਪਾਤੁਭਵਨ੍ਤਿ, ਕਤ੍ਥਚਿ ਅਵਿਚ੍ਛਿਨ੍ਨਦੇਸੇ ਚ. ਤਥਾ ਹਿ ਮੁਖਘੋਸਾਦੀਹਿ ਪਚ੍ਚਯੇਹਿ ਅਞ੍ਞਸ੍ਮਿਂ ਦੇਸੇ ਆਦਾਸਪਬ੍ਬਤਪਦੇਸਾਦਿਕੇ ਪਟਿਬਿਮ੍ਬਪਟਿਘੋਸਾਦਿਕਂ ਨਿਬ੍ਬਤ੍ਤਮਾਨਂ ਦਿਟ੍ਠਨ੍ਤਿ.

ਏਤ੍ਥਾਹ – ਪਟਿਬਿਮ੍ਬਂ ਤਾਵ ਅਸਿਦ੍ਧਤ੍ਤਾ ਅਸਦਿਸਤ੍ਤਾ ਚ ਨ ਨਿਦਸ੍ਸਨਂ. ਪਟਿਬਿਮ੍ਬਞ੍ਹਿ ਨਾਮ ਅਞ੍ਞਦੇਵ ਰੂਪਨ੍ਤਰਂ ਉਪ੍ਪਜ੍ਜਤੀਤਿ ਅਸਿਦ੍ਧਮੇਤਂ. ਸਿਦ੍ਧਿਯਮ੍ਪਿ ਅਸਦਿਸਤ੍ਤਾ ਨ ਨਿਦਸ੍ਸਨਂ ਸਿਯਾ ਏਕਸ੍ਮਿਂ ਠਾਨੇ ਦ੍ਵਿਨ੍ਨਂ ਸਹਠਾਨਾਭਾਵਤੋ. ਯਤ੍ਥੇਵ ਹਿ ਆਦਾਸਰੂਪਂ ਪਟਿਬਿਮ੍ਬਰੂਪਞ੍ਚ ਦਿਸ੍ਸਤਿ, ਨ ਚ ਏਕਸ੍ਮਿਂ ਦੇਸੇ ਰੂਪਦ੍ਵਯਸ੍ਸ ਸਹਭਾਵੋ ਯੁਤ੍ਤੋ ਨਿਸ੍ਸਯਭੂਤਦੇਸਤੋ, ਅਸਦਿਸਞ੍ਚੇਤਂ ਸਨ੍ਧਾਨਤੋ. ਨ ਹਿ ਮੁਖਸ੍ਸ ਪਟਿਬਿਮ੍ਬਸਨ੍ਧਾਨਭੂਤਂ ਆਦਾਸਸਨ੍ਧਾਨਸਮ੍ਬਨ੍ਧਤ੍ਤਾ ਸਨ੍ਧਾਨਂ ਉਦ੍ਦਿਸ੍ਸ ਅਵਿਚ੍ਛੇਦੇਨ ਦੇਸਨ੍ਤਰੇ ਪਾਤੁਭਾਵੋ ਵੁਚ੍ਚਤਿ, ਨ ਅਸਨ੍ਤਾਨਨ੍ਤਿ ਅਸਮਾਨਮੇਵ ਤਨ੍ਤਿ.

ਤਤ੍ਥ ਯਂ ਵੁਤ੍ਤਂ ‘‘ਪਟਿਬਿਮ੍ਬਂ ਨਾਮ ਅਞ੍ਞਦੇਵ ਰੂਪਨ੍ਤਰਂ ਉਪ੍ਪਜ੍ਜਤੀਤਿ ਅਸਿਦ੍ਧਂ ਏਕਸ੍ਮਿਂ ਠਾਨੇ ਦ੍ਵਿਨ੍ਨਂ ਸਹਠਾਨਭਾਵਤੋ’’ਤਿ, ਤਯਿਦਂ ਅਸਨ੍ਤਾਨਮੇਵ ਸਹਠਾਨਂ ਚੋਦਿਤਂ ਭਿਨ੍ਨਨਿਸ੍ਸਯਤ੍ਤਾ. ਨ ਹਿ ਭਿਨ੍ਨਨਿਸ੍ਸਯਾਨਂ ਸਹਠਾਨਂ ਅਤ੍ਥਿ. ਯਥਾ ਅਨੇਕੇਸਂ ਮਣਿਦੀਪਾਦੀਨਂ ਪਭਾਰੂਪਂ ਏਕਸ੍ਮਿਂ ਪਦੇਸੇ ਪਵਤ੍ਤਮਾਨਂ ਅਚ੍ਛਿਤਮਾਨਤਾਯ ਨਿਰਨ੍ਤਰਤਾਯ ਚ ਅਭਿਨ੍ਨਟ੍ਠਾਨਂ ਵਿਯ ਪਞ੍ਞਾਯਤਿ, ਭਿਨ੍ਨਨਿਸ੍ਸਯਤ੍ਤਾ ਪਨ ਭਿਨ੍ਨਟ੍ਠਾਨਮੇਵ ਤਂ, ਗਹਣਵਿਸੇਸੇਨ ਤਥਾਅਭਿਨ੍ਨਟ੍ਠਾਨਮਤ੍ਤਂ, ਏਵਂ ਆਦਾਸਰੂਪਪਟਿਬਿਮ੍ਬਰੂਪੇਸੁਪਿ ਦਟ੍ਠਬ੍ਬਂ. ਤਾਦਿਸਪਚ੍ਚਯਸਮਵਾਯੇਨ ਹਿ ਤਤ੍ਥ ਤਂ ਉਪ੍ਪਜ੍ਜਤਿ ਚੇਵ ਵਿਗਚ੍ਛਤਿ ਚ, ਏਵਞ੍ਚੇਤਂ ਸਮ੍ਪਟਿਚ੍ਛਿਤਬ੍ਬਂ ਚਕ੍ਖੁਵਿਞ੍ਞਾਣਸ੍ਸ ਗੋਚਰਭਾਵੂਪਗਮਨਤੋ. ਅਞ੍ਞਥਾ ਆਲੋਕੇਨ ਵਿਨਾਪਿ ਪਞ੍ਞਾਯੇਯ੍ਯ, ਚਕ੍ਖੁਵਿਞ੍ਞਾਣਸ੍ਸ ਵਾ ਨ ਗੋਚਰੋ ਵਿਯ ਸਿਯਾ. ਤਸ੍ਸ ਪਨ ਸਾਮਗ੍ਗਿਯਾ ਸੋ ਆਨੁਭਾਵੋ, ਯਂ ਤਥਾ ਦਸ੍ਸਨਂ ਹੋਤੀਤਿ. ਅਚਿਨ੍ਤੇਯ੍ਯੋ ਹਿ ਧਮ੍ਮਾਨਂ ਸਾਮਤ੍ਥਿਯਭੇਦੋਤਿ ਵਦਨ੍ਤੇਨਪਿ ਅਯਮੇਵਤ੍ਥੋ ਸਾਧਿਤੋ ਭਿਨ੍ਨਨਿਸ੍ਸਯਸ੍ਸਪਿ ਅਭਿਨ੍ਨਟ੍ਠਾਨਸ੍ਸ ਵਿਯ ਉਪਟ੍ਠਾਨਤੋ. ਏਤੇਨੇਵ ਉਦਕਾਦੀਸੁ ਪਟਿਬਿਮ੍ਬਰੂਪਾਭਾਵਚੋਦਨਾ ਪਟਿਕ੍ਖਿਤ੍ਤਾ ਵੇਦਿਤਬ੍ਬਾ.

ਸਿਦ੍ਧੇ ਚ ਪਟਿਬਿਮ੍ਬਰੂਪੇ ਤਸ੍ਸ ਨਿਦਸ੍ਸਨਭਾਵੋ ਸਿਦ੍ਧੋਯੇਵ ਹੋਤਿ ਹੇਤੁਫਲਾਨਂ ਵਿਚ੍ਛਿਨ੍ਨਦੇਸਤਾਵਿਭਾਵਨਤੋ. ਯਂ ਪਨ ਵੁਤ੍ਤਂ ‘‘ਅਸਦਿਸਤ੍ਤਾ ਨ ਨਿਦਸ੍ਸਨ’’ਨ੍ਤਿ, ਤਦਯੁਤ੍ਤਂ. ਕਸ੍ਮਾ? ਨ ਹਿ ਨਿਦਸ੍ਸਨਂ ਨਾਮ ਨਿਦਸ੍ਸਿਤਬ੍ਬੇਨ ਸਬ੍ਬਦਾ ਸਦਿਸਮੇਵ ਹੋਤਿ. ਚੁਤਿਕ੍ਖਨ੍ਧਾਧਾਨਤੋ ਵਿਚ੍ਛਿਨ੍ਨਦੇਸੇ ਉਪਪਤ੍ਤਿਕ੍ਖਨ੍ਧਾ ਪਾਤੁਭਵਨ੍ਤੀਤਿ ਏਤਸ੍ਸ ਅਤ੍ਥਸ੍ਸ ਸਾਧਨਤ੍ਥਂ ਮੁਖਰੂਪਤੋ ਵਿਚ੍ਛਿਨ੍ਨੇ ਠਾਨੇ ਤਸ੍ਸ ਫਲਭੂਤਂ ਪਟਿਬਿਮ੍ਬਰੂਪਂ ਨਿਬ੍ਬਤ੍ਤਤੀਤਿ ਏਤ੍ਥ ਤਸ੍ਸ ਨਿਦਸ੍ਸਨਤ੍ਥਸ੍ਸ ਅਧਿਪ੍ਪੇਤਤ੍ਤਾ. ਏਤੇਨ ਅਸਨ੍ਤਾਨਚੋਦਨਾ ਪਟਿਕ੍ਖਿਤ੍ਤਾ ਵੇਦਿਤਬ੍ਬਾ.

ਯਸ੍ਮਾ ਵਾ ਮੁਖਪਟਿਬਿਮ੍ਬਰੂਪਾਨਂ ਹੇਤੁਫਲਭਾਵੋ ਸਿਦ੍ਧੋ, ਤਸ੍ਮਾਪਿ ਸਾ ਪਟਿਕ੍ਖਿਤ੍ਤਾਵ ਹੋਤਿ. ਹੇਤੁਫਲਭਾਵਸਮ੍ਬਨ੍ਧੇਸੁ ਹਿ ਸਨ੍ਤਾਨਵੋਹਾਰੋ. ਯਥਾਵੁਤ੍ਤਦ੍ਵੀਹਿਕਾਰਣੇਹਿ ਪਟਿਬਿਮ੍ਬਂ ਉਪ੍ਪਜ੍ਜਤਿ ਬਿਮ੍ਬਤੋ ਆਦਾਸਤੋ ਚ, ਨ ਚੇਵਂ ਉਪਪਤ੍ਤਿਕ੍ਖਨ੍ਧਾਨਂ ਵਿਚ੍ਛਿਨ੍ਨਦੇਸੁਪ੍ਪਤ੍ਤਿ. ਯਥਾ ਚੇਤ੍ਥ ਪਟਿਬਿਮ੍ਬਰੂਪਂ ਨਿਦਸ੍ਸਿਤਂ, ਏਵਂ ਪਟਿਘੋਸਦੀਪਮੁਦ੍ਦਾਦਯੋਪਿ ਨਿਦਸ੍ਸਿਤਬ੍ਬਾ. ਯਥਾ ਹਿ ਪਟਿਘੋਸਦੀਪਮੁਦ੍ਦਾਦਯੋ ਸਦ੍ਦਾਦਿਹੇਤੁਕਾ ਹੋਨ੍ਤਿ, ਅਞ੍ਞਤ੍ਰ ਅਗਨ੍ਤ੍ਵਾ ਹੋਨ੍ਤਿ, ਏਵਮੇਵ ਇਦਂ ਚਿਤ੍ਤਨ੍ਤਿ.

ਅਪਿਚਾਯਂ ਅਨ੍ਤਰਾਭਵਵਾਦੀ ਏਵਂ ਪੁਚ੍ਛਿਤਬ੍ਬੋ – ਯਦਿ ‘‘ਧਮ੍ਮਾਨਂ ਵਿਚ੍ਛਿਨ੍ਨਦੇਸੁਪ੍ਪਤ੍ਤਿ ਨ ਯੁਤ੍ਤਾ’’ਤਿ ਅਨ੍ਤਰਾਭਵੋ ਪਰਿਕਪ੍ਪਿਤੋ, ਰਾਹੁਆਦੀਨਂ ਸਰੀਰੇ ਕਥਮਨੇਕਯੋਜਨਸਹਸ੍ਸਨ੍ਤਰਿਕੇਸੁ ਪਾਦਟ੍ਠਾਨਹਦਯਟ੍ਠਾਨੇਸੁ ਕਾਯਵਿਞ੍ਞਾਣਮਨੋਵਿਞ੍ਞਾਣੁਪ੍ਪਤ੍ਤਿ ਵਿਚ੍ਛਿਨ੍ਨਦੇਸੇ ਯੁਤ੍ਤਾ. ਯਦਿ ਏਕਸਨ੍ਤਾਨਭਾਵਤੋ, ਇਧਾਪਿ ਤਂਸਮਾਨਂ. ਨ ਚੇਤ੍ਥ ਅਰੂਪਧਮ੍ਮਭਾਵਤੋ ਅਲਂ ਪਰਿਹਾਰਾਯ ਪਞ੍ਚਵੋਕਾਰੇ ਰੂਪਾਰੂਪਧਮ੍ਮਾਨਂ ਅਞ੍ਞਮਞ੍ਞਂ ਸਮ੍ਬਨ੍ਧਤ੍ਤਾ. ਵਤ੍ਤਮਾਨੇਹਿ ਤਾਵ ਪਚ੍ਚਯੇਹਿ ਵਿਚ੍ਛਿਨ੍ਨਦੇਸੇ ਫਲਸ੍ਸ ਉਪ੍ਪਤ੍ਤਿ ਸਿਦ੍ਧਾ, ਕਿਮਙ੍ਗਂ ਪਨ ਅਤੀਤੇਹਿ ਪਞ੍ਚਵੋਕਾਰਭਵੇਹਿ. ਯਤ੍ਥ ਵਿਪਾਕਵਿਞ੍ਞਾਣਸ੍ਸ ਪਚ੍ਚਯੋ, ਤਤ੍ਥਸ੍ਸ ਨਿਸ੍ਸਯਭੂਤਸ੍ਸ ਵਤ੍ਥੁਸ੍ਸ ਸਹਭਾਵੀਨਞ੍ਚ ਖਨ੍ਧਾਨਂ ਸਮ੍ਭਵੋਤਿ ਲਦ੍ਧੋਕਾਸੇਨ ਕਮ੍ਮੁਨਾ ਨਿਬ੍ਬਤ੍ਤਿਯਮਾਨਸ੍ਸ ਅਵਸੇਸਪਚ੍ਚਯਨ੍ਤਰਸਹਿਤਸ੍ਸ ਵਿਪਾਕਵਿਞ੍ਞਾਣਸ੍ਸ ਉਪ੍ਪਤ੍ਤਿਯਂ ਨਾਲਂ ਵਿਚ੍ਛਿਨ੍ਨਦੇਸਤਾ ਵਿਬਨ੍ਧਾਯ. ਯਥਾ ਚ ਅਨੇਕਕਪ੍ਪਸਹਸ੍ਸਨ੍ਤਰਿਕਾਪਿ ਚੁਤਿਕ੍ਖਨ੍ਧਾ ਉਪਪਤ੍ਤਿਕ੍ਖਨ੍ਧਾਨਂ ਅਨਨ੍ਤਰਪਚ੍ਚਯੋਤਿ ਨ ਕਾਲਦੂਰਤਾ, ਏਵਂ ਅਨੇਕਯੋਜਨਸਹਸ੍ਸਨ੍ਤਰਿਕਾਪਿ ਤੇ ਤੇਸਂ ਅਨਨ੍ਤਰਪਚ੍ਚਯੋ ਹੋਨ੍ਤੀਤਿ ਨ ਦੇਸਦੂਰਤਾ. ਏਵਂ ਚੁਤਿਕ੍ਖਨ੍ਧਨਿਰੋਧਾਨਨ੍ਤਰਂ ਉਪਪਤ੍ਤਿਟ੍ਠਾਨੇ ਪਚ੍ਚਯਨ੍ਤਰਸਮਵਾਯੇਨ ਪਟਿਸਨ੍ਧਿਕ੍ਖਨ੍ਧਾ ਪਾਤੁਭਵਨ੍ਤੀਤਿ ਨਤ੍ਥੇਵ ਅਨ੍ਤਰਾਭਵੋ. ਅਸਤਿ ਚ ਤਸ੍ਮਿਂ ਯਂ ਤਸ੍ਸ ਕੇਚਿ ‘‘ਭਾਵਿਭਵਨਿਬ੍ਬਤ੍ਤਕਕਮ੍ਮੁਨੋ ਤਤੋ ਏਵ ਭਾਵਿਪੁਰਿਮਕਾਲਭਵਾਕਾਰੋ ਸਜਾਤਿਸੁਦ੍ਧਦਿਬ੍ਬਚਕ੍ਖੁਗੋਚਰੋ ਅਹੀਨਿਨ੍ਦ੍ਰਿਯੋ ਕੇਨਚਿ ਅਪ੍ਪਟਿਹਤਗਮਨੋ ਗਨ੍ਧਾਹਾਰੋ’’ਤਿ ਏਵਮਾਦਿਕਾਰਣਾਕਾਰਾਦਿਂ ਵਣ੍ਣੇਨ੍ਤਿ, ਤਂ ਵਞ੍ਝਾਤਨਯਸ੍ਸ ਰਸ੍ਸਦੀਘਸਾਮਤਾਦਿਵਿਵਾਦਸਦਿਸਨ੍ਤਿ ਵੇਦਿਤਬ੍ਬਂ.

ਅਨ੍ਤਰਾਭਵਕਥਾਵਣ੍ਣਨਾ ਨਿਟ੍ਠਿਤਾ.