੭. ਪਥਵੀਕਮ੍ਮਵਿਪਾਕੋਤਿਕਥਾਵਣ੍ਣਨਾ

੪੯੨. ਅਤ੍ਤਵਜ੍ਜੇਹੀਤਿ ਫਸ੍ਸਵਜ੍ਜੇਹਿ. ਨ ਹਿ ਸੋ ਏਵ ਤੇਨ ਸਮ੍ਪਯੁਤ੍ਤੋ ਹੋਤਿ. ਸੋਤਿ ਫਸ੍ਸਮੇਵ ਪਚ੍ਚਾਮਸਤਿ. ਸਾਵਜ੍ਜਨੇਤਿ ਆਵਜ੍ਜਨਸਹਿਤੇ, ਆਵਜ੍ਜਨਂ ਪੁਰੇਚਾਰਿਕਂ ਕਤ੍ਵਾ ਏਵ ਪਵਤ੍ਤਨਕੇਤਿ ਅਤ੍ਥੋ. ਕਮ੍ਮੂਪਨਿਸ੍ਸਯਭੂਤਮੇਵਾਤਿ ਯੇਨ ਕਮ੍ਮੁਨਾ ਯਥਾਵੁਤ੍ਤਾ ਫਸ੍ਸਾਦਯੋ ਨਿਬ੍ਬਤ੍ਤਿਤਾ, ਤਸ੍ਸ ਕਮ੍ਮਸ੍ਸ ਉਪਨਿਸ੍ਸਯਭੂਤਮੇਵ. ਦੁਕ੍ਖਸ੍ਸਾਤਿ ਆਯਤਿਂ ਉਪ੍ਪਜ੍ਜਨਕਦੁਕ੍ਖਸ੍ਸ. ‘‘ਮੂਲਤਣ੍ਹਾ’’ਤਿ ਦਸ੍ਸੇਤੀਤਿ ਯੋਜਨਾ, ਤਥਾ ‘‘ਉਪਨਿਸ੍ਸਯਭੂਤ’’ਨ੍ਤਿ ਏਤ੍ਥਾਪਿ. ਕਮ੍ਮਾਯੂਹਨਸ੍ਸ ਕਾਰਣਭੂਤਾ ਪੁਰਿਮਸਿਦ੍ਧਾ ਤਣ੍ਹਾ ਕਮ੍ਮਸ੍ਸ ਉਪਨਿਸ੍ਸਯੋ, ਕਤੂਪਚਿਤੇ ਕਮ੍ਮੇ ਭਵਾਦੀਸੁ ਨਮਨਵਸੇਨ ਪਵਤ੍ਤਾ ਹਿ ਵਿਪਾਕਸ੍ਸ ਉਪਨਿਸ੍ਸਯੋ.

੪੯੩. ਓਕਾਸਕਤੁਪ੍ਪਨ੍ਨਂ ਅਖੇਪੇਤ੍ਵਾ ਪਰਿਨਿਬ੍ਬਾਨਭਾਵੋ ਸਕਸਮਯਵਸੇਨ ਚੋਦਨਾਯ ਯੁਜ੍ਜਮਾਨਤਾ.

੪੯੪. ਕਮ੍ਮੇ ਸਤੀਤਿ ਇਮਿਨਾ ਕਮ੍ਮਸ੍ਸ ਪਥਵੀਆਦੀਨਂ ਪਚ੍ਚਯਤਾਮਤ੍ਤਮਾਹ, ਨ ਜਨਕਤ੍ਤਂ. ਤੇਨਾਹ ‘‘ਤਂਸਂਵਤ੍ਤਨਿਕਂ ਨਾਮ ਹੋਤੀ’’ਤਿ.

ਪਥਵੀਕਮ੍ਮਵਿਪਾਕੋਤਿਕਥਾਵਣ੍ਣਨਾ ਨਿਟ੍ਠਿਤਾ.