੪. ਵਿਮੁਚ੍ਚਮਾਨਕਥਾਵਣ੍ਣਨਾ

੩੬੬. ਮਗ੍ਗਕ੍ਖਣੇ ਚਿਤ੍ਤਂ ਏਕਦੇਸੇਨ ਵਿਮੁਤ੍ਤਂ ਏਕਦੇਸੇਨ ਅਵਿਮੁਤ੍ਤਨ੍ਤਿ ਅਯਂ ‘‘ਵਿਮੁਤ੍ਤਂ ਵਿਮੁਚ੍ਚਮਾਨ’’ਨ੍ਤਿ ਲਦ੍ਧਿਯਾ ਦੋਸੋ. ਤਥਾ ਹਿ ਵੁਤ੍ਤਂ ‘‘ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤ’’ਨ੍ਤਿ. ਅਟ੍ਠਕਥਾਯਞ੍ਚ ‘‘ਤਞ੍ਹਿ ਤਦਾ ਸਮੁਚ੍ਛੇਦਵਿਮੁਤ੍ਤਿਯਾ ਵਿਮੁਤ੍ਤੇਕਦੇਸੇਨ ਵਿਮੁਚ੍ਚਮਾਨਨ੍ਤਿਸ੍ਸ ਲਦ੍ਧੀ’’ਤਿ ਦਸ੍ਸਿਤੋਵਾਯਮਤ੍ਥੋ. ਵਿਪ੍ਪਕਤਨਿਦ੍ਦੇਸੇਤਿ ਵਿਮੁਚ੍ਚਨਕਿਰਿਯਾਯ ਅਪਰਿਯੋਸਿਤਤਾਨਿਦ੍ਦੇਸੇ. ਯਂ ਸਨ੍ਧਾਯਾਹ ‘‘ਵਿਮੁਤ੍ਤਂ ਵਿਮੁਚ੍ਚਮਾਨਨ੍ਤਿ ਵਿਪ੍ਪਕਤਭਾਵੇਨ ਵੁਤ੍ਤਤ੍ਤਾ’’ਤਿ. ਤੇਨਾਤਿ ਪਰਵਾਦਿਨਾ. ਵਿਮੁਚ੍ਚ…ਪੇ… ਵੁਤ੍ਤਂ ਵਿਮੁਚ੍ਚਮਾਨਸ੍ਸ ਵਿਮੁਤ੍ਤਭਾਵਾਭਾਵਤੋ, ਵਿਮੁਤ੍ਤਭੇਦੇਨ ਪਨ ਤਥਾ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਸਤਿ ਚ ਦੋਸੇ ਵਿਪ੍ਪਕਤਨਿਦ੍ਦੇਸੇਤਿ ਆਨੇਤ੍ਵਾ ਯੋਜੇਤਬ੍ਬਂ. ਏਕਦੇਸੋ ਵਿਸੇਸਨਂ ਹੋਤਿ ਨਿਪ੍ਪਦੇਸਵਿਮੁਤ੍ਤਿਯਾ ਅਵਿਚ੍ਛਿਨ੍ਨਤੋ. ਫਲਚਿਤ੍ਤੇਨਾਤਿ ਪਠਮਫਲਚਿਤ੍ਤੇਨ ਉਪ੍ਪਨ੍ਨੇਨ.

ਵਿਮੁਚ੍ਚਮਾਨਕਥਾਵਣ੍ਣਨਾ ਨਿਟ੍ਠਿਤਾ.