੧੦. ਵੋਹਾਰਕਥਾਵਣ੍ਣਨਾ

੩੪੭. ਵਿਸਯਵਿਸਯੀਸੂਤਿ ਰੂਪਚਕ੍ਖਾਦਿਕੇ ਸਨ੍ਧਾਯਾਹ. ਤੇ ਹਿ ਰੂਪਕ੍ਖਨ੍ਧਪਰਿਯਾਪਨ੍ਨਤ੍ਤਾ ਏਕਨ੍ਤੇਨ ਲੋਕਿਯਾ. ਵਿਸਯਸ੍ਸੇਵਾਤਿ ਸਦ੍ਦਸ੍ਸੇਵ. ਸੋ ਹਿ ਵੋਹਰਿਤਬ੍ਬਤੋ ਵੋਹਾਰਕਰਣਤਾਯ ਚ ‘‘ਵੋਹਾਰੋ’’ਤਿ ਪਾਲ਼ਿਯਂ ਵੁਤ੍ਤੋ. ਨਤ੍ਥੇਤ੍ਥ ਕਾਰਣਂ ਵਿਸਯੀਨਂ ਵਿਸਯਸ੍ਸਪਿ ਆਸਵਾਦਿਅਨਾਰਮ੍ਮਣਤਾਭਾਵਤੋ. ਅਸਿਦ੍ਧਲੋਕੁਤ੍ਤਰਭਾਵਸ੍ਸ ਏਕਨ੍ਤਸਾਸਵਤ੍ਤਾ ਤਸ੍ਸ ਸਦ੍ਦਾਯਤਨਸ੍ਸ ਯਥਾ ਲੋਕੁਤ੍ਤਰਤਾ ਤਵ ਮਤੇਨਾਤਿ ਅਧਿਪ੍ਪਾਯੋ.

ਪਟਿਹਞ੍ਞੇਯ੍ਯਾਤਿ ਇਦਂ ਪਰਿਕਪ੍ਪਵਚਨਂ. ਪਰਿਕਪ੍ਪਵਚਨਞ੍ਚ ਅਯਾਥਾਵਨ੍ਤਿ ਆਹ ‘‘ਨ ਹਿ…ਪੇ… ਅਤ੍ਥੀ’’ਤਿ. ਨ ਹਿ ਜਲਂ ਅਨਲਨ੍ਤਿ ਪਰਿਕਪ੍ਪਿਤਂ ਦਹਤਿ ਪਚਤਿ ਵਾ. ਕਿਂ ਲੋਕਿਯੇਨ ਞਾਣੇਨ ਜਾਨਿਤਬ੍ਬਤੋ ਲੋਕਿਯੋ ਰੂਪਾਯਤਨਾਦਿ ਵਿਯ, ਉਦਾਹੁ ਲੋਕੁਤ੍ਤਰੋ ਪਚ੍ਚਵੇਕ੍ਖਿਯਮਾਨਮਗ੍ਗਾਦਿ ਵਿਯਾਤਿ ਏਵਮੇਤ੍ਥ ਹੇਤੁਸ੍ਸ ਅਨੇਕਨ੍ਤਭਾਵੋ ਵੇਦਿਤਬ੍ਬੋ. ਤੇਨਾਹ ‘‘ਲੋਕਿਯੇ ਲੋਕੁਤ੍ਤਰੇ ਚ ਸਮ੍ਭਵਤੋ’’ਤਿ.

ਵੋਹਾਰਕਥਾਵਣ੍ਣਨਾ ਨਿਟ੍ਠਿਤਾ.