੫. ਵਚੀਭੇਦਕਥਾਵਣ੍ਣਨਾ

੩੨੬. ਸੋਤਿ ਪਠਮਮਗ੍ਗਟ੍ਠੋ. ਤਸ੍ਮਾਤਿ ਯਸ੍ਮਾ ‘‘ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’’ਨ੍ਤਿ ਸੁਤ੍ਤਸ੍ਸ ਅਤ੍ਥਂ ਅਞ੍ਞਥਾ ਗਹੇਤ੍ਵਾ ਉਦਯਬ੍ਬਯਾਨੁਪਸ੍ਸਨਾਨਿਸ੍ਸਨ੍ਦੇਨ ਮਗ੍ਗਕ੍ਖਣੇਪਿ ਦੁਕ੍ਖਨ੍ਤਿ ਵਿਪਸ੍ਸਨਾ ਉਪਟ੍ਠਾਤਿ, ਤਸ੍ਮਾ ‘‘ਸੋ ਦੁਕ੍ਖਮਿਚ੍ਚੇਵ ਵਾਚਂ ਭਾਸਤੀ’’ਤਿ ਵਦਨ੍ਤਿ.

੩੨੮. ਇਚ੍ਛਿਤੇਤਿ ਪਰਵਾਦਿਨਾ ਸਮ੍ਪਟਿਚ੍ਛਿਤੇ. ਆਰੋਪਿਤੇਤਿ ਯੁਤ੍ਤਿਨਿਦ੍ਧਾਰਣੇਨ ਤਸ੍ਮਿਂ ਅਤ੍ਥੇ ਪਤਿਟ੍ਠਾਪਿਤੇ ਯੁਜ੍ਜਤਿ, ਵਚੀਸਮੁਟ੍ਠਾਪਨਕ੍ਖਣਤੋ ਪਨ ਪਚ੍ਛਾ ਤਂ ਸਦ੍ਦਂ ਸੁਣਾਤੀਤਿ ਇਚ੍ਛਿਤੇ ਨ ਯੁਜ੍ਜਤਿ ਸੋਤਵਿਞ੍ਞਾਣਸ੍ਸ ਪਚ੍ਚੁਪ੍ਪਨ੍ਨਾਰਮ੍ਮਣਤ੍ਤਾਤਿ ਅਧਿਪ੍ਪਾਯੋ. ਯਸ੍ਮਾ ਪਨ ਅਤ੍ਤਨਾ ਨਿਚ੍ਛਾਰਿਤਂ ਸਦ੍ਦਂ ਅਤ੍ਤਨਾਪਿ ਸੁਣਾਤਿ, ਤਸ੍ਮਾ ਸੋਤਵਿਞ੍ਞਾਣਂ ‘‘ਯੇਨ ਤਂ ਸਦ੍ਦਂ ਸੁਣਾਤੀ’’ਤਿ ਅਟ੍ਠਕਥਾਯਂ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੩੩੨. ਲੋਕੁਤ੍ਤਰਮਗ੍ਗਕ੍ਖਣੇਤਿ ਪਠਮਜ੍ਝਾਨਿਕਸ੍ਸ ਪਠਮਮਗ੍ਗਸ੍ਸ ਖਣੇ. ਅਭਿਭੂਸੁਤ੍ਤਾਹਰਣੇ ਅਧਿਪ੍ਪਾਯੋ ਵਤ੍ਤਬ੍ਬੋਤਿ ਏਤੇਨ ਤਦਾਹਰਣਸ੍ਸ ਅਸਮ੍ਬਨ੍ਧਤਂ ਦਸ੍ਸੇਤਿ. ਤੇਨਾਹ ‘‘ਤਸ੍ਮਾ ਅਸਾਧਕ’’ਨ੍ਤਿ.

ਵਚੀਭੇਦਕਥਾਵਣ੍ਣਨਾ ਨਿਟ੍ਠਿਤਾ.