੭. ਅਚ੍ਚਨ੍ਤਨਿਯਾਮਕਥਾਵਣ੍ਣਨਾ

੮੪੭. ਯਂ ‘‘ਏਕਵਾਰਂ ਨਿਮੁਗ੍ਗੋ ਤਥਾ ਨਿਮੁਗ੍ਗੋਵ ਹੋਤਿ, ਏਤਸ੍ਸ ਪੁਨ ਭਵਤੋ ਵੁਟ੍ਠਾਨਂ ਨਾਮ ਨਤ੍ਥੀ’’ਤਿ ਅਟ੍ਠਕਥਾਯਂ ਆਗਤਂ, ਸੋ ਪਨ ਆਚਰਿਯਵਾਦੋ, ਨ ਅਟ੍ਠਕਥਾਨਯੋਤਿ ਦਸ੍ਸੇਨ੍ਤੋ ‘‘ਤਾਯ ਜਾਤਿਯਾ…ਪੇ… ਮਞ੍ਞਮਾਨੋ’’ਤਿ ਆਹ. ਤਤ੍ਥ ਤਾਯ ਜਾਤਿਯਾਤਿ ਯਸ੍ਸਂ ਜਾਤਿਯਂ ਪੁਗ੍ਗਲੋ ਕਮ੍ਮਾਵਰਣਾਦਿਆਵਰਣੇਹਿ ਸਮਨ੍ਨਾਗਤੋ ਹੋਤਿ, ਤਾਯ ਜਾਤਿਯਾ. ਸਂਸਾਰਖਾਣੁਕਭਾਵੋ ਵਸ੍ਸਭਞ੍ਞਾਦੀਨਂ ਵਿਯ ਮਕ੍ਖਲਿਆਦੀਨਂ ਵਿਯ ਚ ਦਟ੍ਠਬ੍ਬੋ. ਸੋ ਚ ਅਹੇਤੁਕਾਦਿਮਿਚ੍ਛਾਦਸ੍ਸਨਸ੍ਸ ਫਲਭਾਵੇਨੇਵ ਵੇਦਿਤਬ੍ਬੋ, ਨ ਅਚ੍ਚਨ੍ਤਨਿਯਾਮਸ੍ਸ ਨਾਮ ਕਸ੍ਸਚਿ ਅਤ੍ਥਿਭਾਵਤੋ. ਯਥਾ ਹਿ ਵਿਮੁਚ੍ਚਨ੍ਤਸ੍ਸ ਕੋਚਿ ਨਿਯਾਮੋ ਨਾਮ ਨਤ੍ਥਿ ਠਪੇਤ੍ਵਾ ਮਗ੍ਗੇਨ ਭਵਪਰਿਚ੍ਛੇਦਂ, ਏਵਂ ਅਵਿਮੁਚ੍ਚਨ੍ਤਸ੍ਸਪਿ ਕੋਚਿ ਸਂਸਾਰਨਿਯਾਮੋ ਨਾਮ ਨਤ੍ਥਿ. ਤਾਦਿਸਸ੍ਸ ਪਨ ਮਿਚ੍ਛਾਦਸ੍ਸਨਸ੍ਸ ਬਲਵਭਾਵੇ ਅਪਰਿਮਿਤਕਪ੍ਪਪਰਿਚ੍ਛੇਦੇ ਚਿਰਤਰਂ ਸਂਸਾਰਪ੍ਪਬਨ੍ਧੋ ਹੋਤਿ, ਅਪਾਯੂਪਪਤ੍ਤਿ ਚ ਯਤ੍ਥ ਸਂਸਾਰਖਾਣੁਸਮਞ੍ਞਾ.

ਯਂ ਪਨੇਕੇ ਵਦਨ੍ਤਿ ‘‘ਅਤ੍ਥੇਵ ਅਚ੍ਚਨ੍ਤਂ ਸਂਸਰਿਤਾ ਅਨਨ੍ਤਤ੍ਤਾ ਸਤ੍ਤਨਿਕਾਯਸ੍ਸਾ’’ਤਿ, ਤਮ੍ਪਿ ਅਪੁਞ੍ਞਬਹੁਲਂ ਸਤ੍ਤਸਨ੍ਤਾਨਂ ਸਨ੍ਧਾਯ ਵੁਤ੍ਤਂ ਸਿਯਾ. ਨ ਹਿ ਮਾਤੁਘਾਤਕਾਦੀਨਂ ਤੇਨਤ੍ਤਭਾਵੇਨ ਸਮ੍ਮਤ੍ਤਨਿਯਾਮੋਕ੍ਕਮਨਨ੍ਤਰਾਯਭੂਤੋ ਮਿਚ੍ਛਤ੍ਤਨਿਯਾਮੋ ਵਿਯ ਸਤ੍ਤਾਨਂ ਵਿਮੁਤ੍ਤਨ੍ਤਰਾਯਕਰੋ ਸਂਸਾਰਨਿਯਾਮੋ ਨਾਮ ਨਤ੍ਥਿ. ਯਾਵ ਪਨ ਨ ਮਗ੍ਗਫਲਸ੍ਸ ਉਪਨਿਸ੍ਸਯੋ ਉਪਲਬ੍ਭਤਿ, ਤਾਵ ਸਂਸਾਰੋ ਅਪਰਿਚ੍ਛਿਨ੍ਨੋ. ਯਦਾ ਚ ਸੋ ਉਪਲਦ੍ਧੋ, ਤਦਾ ਸੋ ਪਰਿਚ੍ਛਿਨ੍ਨੋ ਏਵਾਤਿ ਦਟ੍ਠਬ੍ਬਂ.

ਯਥਾ ਨਿਯਤਸਮ੍ਮਾਦਸ੍ਸਨਂ, ਏਵਂ ਨਿਯਤਮਿਚ੍ਛਾਦਸ੍ਸਨੇਨਪਿ ਸਵਿਸਯੇ ਏਕਂਸਗਾਹਵਸੇਨ ਉਕ੍ਕਂਸਗਤੇਨ ਭਵਿਤਬ੍ਬਨ੍ਤਿ ਤੇਨ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਸਤਿ ਅਚ੍ਚਨ੍ਤਨਿਯਾਮੇ ਕਥਂ ਤਸ੍ਮਿਂ ਅਭਿਨਿਵੇਸਵਿਸਯੇ ਅਨੇਕਂਸਗਾਹੋ ਉਪ੍ਪਜ੍ਜੇਯ੍ਯ, ਅਭਿਨਿਵੇਸਨ੍ਤਰਂ ਵਾ ਵਿਰੁਦ੍ਧਂ ਯਦਿ ਉਪ੍ਪਜ੍ਜੇਯ੍ਯ, ਅਚ੍ਚਨ੍ਤਨਿਯਾਮੋ ਏਵ ਨ ਸਿਯਾਤਿ ਪਾਲ਼ਿਯਂ ਵਿਚਿਕਿਚ੍ਛੁਪ੍ਪਤ੍ਤਿਨਿਯਾਮਨ੍ਤਰੁਪ੍ਪਤ੍ਤਿਚੋਦਨਾ ਕਤਾ. ਨ ਹਿ ਵਿਚਿਕਿਚ੍ਛਾ ਵਿਯ ਸਮ੍ਮਤ੍ਤਨਿਯਤਪੁਗ੍ਗਲਾਨਂ ਯਥਾਕ੍ਕਮਂ ਮਿਚ੍ਛਤ੍ਤਸਮ੍ਮਤ੍ਤਨਿਯਤਪੁਗ੍ਗਲਾਨਂ ਸਮ੍ਮਤ੍ਤਮਿਚ੍ਛਤ੍ਤਨਿਯਤਾ ਧਮ੍ਮਾ ਕਦਾਚਿਪਿ ਉਪ੍ਪਜ੍ਜਨ੍ਤਿ, ਅਵਿਰੁਦ੍ਧਂ ਪਨ ਨਿਯਾਮਨ੍ਤਰਮੇਵ ਹੋਤੀਤਿ ਆਨਨ੍ਤਰਿਕਨ੍ਤਰਂ ਵਿਯ ਮਿਚ੍ਛਾਦਸ੍ਸਨਨ੍ਤਰਂ ਸਮਾਨਜਾਤਿਕਂ ਨ ਨਿਵਤ੍ਤੇਤੀਤਿ ਵਿਰੁਦ੍ਧਂਯੇਵ ਦਸ੍ਸੇਤੁਂ ਪਾਲ਼ਿਯਂ ਵਿਚਿਕਿਚ੍ਛਾ ਵਿਯ ਸਸ੍ਸਤੁਚ੍ਛੇਦਦਿਟ੍ਠਿਯੋ ਏਵ ਉਦ੍ਧਟਾ. ਏਵਮੇਤ੍ਥ ਵਿਚਿਕਿਚ੍ਛੁਪ੍ਪਤ੍ਤਿਨਿਯਾਮਨ੍ਤਰੁਪ੍ਪਤ੍ਤੀਨਂ ਨਿਯਾਮਨ੍ਤਰੁਪ੍ਪਤ੍ਤਿਨਿਵਤ੍ਤਕਭਾਵੋ ਵੇਦਿਤਬ੍ਬੋ, ਅਚ੍ਚਨ੍ਤਨਿਯਾਮੋ ਚ ਨਿਵਤ੍ਤਿਸ੍ਸਤੀਤਿ ਚ ਵਿਰੁਦ੍ਧਮੇਤਨ੍ਤਿ ਪਨ ‘‘ਵਿਚਾਰੇਤ੍ਵਾਵ ਗਹੇਤਬ੍ਬਾ’’ਤਿ ਵੁਤ੍ਤਂ ਸਿਯਾ.

ਅਚ੍ਚਨ੍ਤਨਿਯਾਮਕਥਾਵਣ੍ਣਨਾ ਨਿਟ੍ਠਿਤਾ.