੭. ਸੀਲਂਅਚੇਤਸਿਕਨ੍ਤਿਕਥਾਵਣ੍ਣਨਾ

੫੯੦-੫੯੪. ਠਿਤੇਨ ਅਵਿਨਟ੍ਠੇਨ. ਉਪਚਯੇਨਾਤਿ ਸੀਲਭੂਤੇਨ ਕਮ੍ਮੂਪਚਯੇਨ. ‘‘ਦਾਨਂ ਅਚੇਤਸਿਕ’’ਨ੍ਤਿ ਕਥਾਯਂ ਵੁਤ੍ਤਨਯੇਨਾਤਿ ਯਥਾ ‘‘ਨ ਵਤ੍ਤਬ੍ਬਂ ਚੇਤਸਿਕੋ ਧਮ੍ਮੋ ਦਾਨਨ੍ਤਿ? ਆਮਨ੍ਤਾ. ਦਾਨਂ ਅਨਿਟ੍ਠਫਲਨ੍ਤਿ…ਪੇ… ਤੇਨ ਹਿ ਚੇਤਸਿਕੋ ਧਮ੍ਮੋ ਦਾਨ’’ਨ੍ਤਿ ਪਾਲ਼ਿ ਪਵਤ੍ਤਾ, ਏਵਂ ਤਦਨੁਸਾਰੇਨ ‘‘ਨ ਵਤ੍ਤਬ੍ਬਂ ਚੇਤਸਿਕਂ ਸੀਲਨ੍ਤਿ? ਆਮਨ੍ਤਾ. ਸੀਲਂ ਅਨਿਟ੍ਠਫਲ’’ਨ੍ਤਿਆਦਿਨਾ ਸੀਲਸ੍ਸ ਚੇਤਸਿਕਭਾਵਸਾਧਕਾਨਿ ਸੁਤ੍ਤਪਦਾਨਿ ਚ ਆਨੇਤ੍ਵਾ ਤਦਤ੍ਥਦਸ੍ਸਨਵਸੇਨ ਅਚੇਤਸਿਕੋ ਰੂਪਾਦਿਧਮ੍ਮੋ ਆਯਤਿਂ ਵਿਪਾਕਂ ਦੇਤਿ. ਯਦਿ ਸੋ ਸੀਲਂ ਭਵੇਯ੍ਯ, ਵਿਨਾ ਸਂਵਰਸਮਾਦਾਨੇਨ ਵਿਨਾ ਵਿਰਤਿਯਾ ਸੀਲਵਾ ਨਾਮ ਸਿਯਾ. ਯਸ੍ਮਾ ਪਨ ਸਮਾਦਾਨਚੇਤਨਾ ਵਿਰਤਿ ਸਂਵਰੋ ਸੀਲਂ, ਤਸ੍ਮਾ ‘‘ਸੀਲਂ ਇਟ੍ਠਫਲਂ ਕਨ੍ਤਫਲ’’ਨ੍ਤਿਆਦਿਨਾ ਯੋਜਨਾ ਕਾਤਬ੍ਬਾਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਵੁਤ੍ਤਨਯੇਨਾ’’ਤਿ, ਵੁਤ੍ਤਨਯਾਨੁਸਾਰੇਨਾਤਿ ਅਤ੍ਥੋ. ਯਸ੍ਮਾ ਪਨ ਪਾਲ਼ਿਯਂ ਯਥਾ ‘‘ਸੀਲਂ ਅਚੇਤਸਿਕ’’ਨ੍ਤਿ ਕਥਾ ਆਗਤਾ, ਤਥਾ ‘‘ਦਾਨਂ ਅਚੇਤਸਿਕ’’ਨ੍ਤਿ ਵਿਸੁਂ ਆਗਤਾ ਕਥਾ ਨਤ੍ਥਿ, ਤਸ੍ਮਾ ‘‘ਸਾ ਪਨ ਕਥਾ ਮਗ੍ਗਿਤਬ੍ਬਾ’’ਤਿ ਵੁਤ੍ਤਂ.

ਸੀਲਂਅਚੇਤਸਿਕਨ੍ਤਿਕਥਾਵਣ੍ਣਨਾ ਨਿਟ੍ਠਿਤਾ.