੩. ਪਞ੍ਚਵਿਞ੍ਞਾਣਸਮਙ੍ਗਿਸ੍ਸਮਗ੍ਗਕਥਾਵਣ੍ਣਨਾ

੫੭੬. ਲਕ੍ਖਣਨ੍ਤਿ ਪਞ੍ਚਵਿਞ੍ਞਾਣਾਨਂ ਉਪ੍ਪਨ੍ਨਾਰਮ੍ਮਣਤਾਦਿਅਵਿਤਥੇਕਪ੍ਪਕਾਰਤਾਲਕ੍ਖਣਂ. ਕਾਮਂ ਮਨੋਵਿਞ੍ਞਾਣਂ ਅਵਤ੍ਥੁਕਮ੍ਪਿ ਹੋਤਿ, ਸਵਤ੍ਥੁਕਤ੍ਤੇ ਪਨ ਤਮ੍ਪਿ ਉਪ੍ਪਨ੍ਨਵਤ੍ਥੁਕਮੇਵ. ਤਥਾ ਹਿ ਪਾਲ਼ਿਯਂ ਠਪਨਾਯਂ ‘‘ਹਞ੍ਚਿ ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਾਰਮ੍ਮਣਾ’’ਤ੍ਵੇਵ ਵੁਤ੍ਤਂ. ਮਨੋਵਿਞ੍ਞਾਣਸ੍ਸਪਿ ਉਪ੍ਪਨ੍ਨਵਤ੍ਥੁਕਤਾਪਰਿਯਾਯੋ ਅਤ੍ਥੀਤਿ ‘‘ਪਞ੍ਚ ਵਿਞ੍ਞਾਣਾ’’ਤਿ ਅਵਤ੍ਵਾ ‘‘ਛ ਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ’’ਤਿ ਵੁਤ੍ਤੇ ‘‘ਨੋ ਚ ਵਤ ਰੇ ਵਤ੍ਤਬ੍ਬੇ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾ’’ਤਿ ਵਤ੍ਤੁਂ ਨ ਸਕ੍ਕਾਤਿ ਦਸ੍ਸੇਨ੍ਤੋ ਆਹ ‘‘ਛ ਵਿਞ੍ਞਾਣਾ…ਪੇ… ਅਧਿਪ੍ਪੇਤ’’ਨ੍ਤਿ.

੫੭੭. ‘‘ਅਨਿਮਿਤ੍ਤਂ ਸੁਞ੍ਞਤਂ ਅਪ੍ਪਣਿਹਿਤ’’ਨ੍ਤਿ ਨਿਬ੍ਬਾਨਸ੍ਸ ਤੇ ਪਰਿਯਾਯਾ. ਚਕ੍ਖੁਵਿਞ੍ਞਾਣਸ੍ਸ ਅਨਿਮਿਤ੍ਤਗਾਹਿਭਾਵੇ ਸੁਞ੍ਞਤਾਰਮ੍ਮਣਤਾਪਿ ਸਿਯਾਤਿ ਵੁਤ੍ਤਂ ‘‘ਤਦੇਵ ਸੁਞ੍ਞਤਨ੍ਤਿ ਅਧਿਪ੍ਪਾਯੋ’’ਤਿ.

ਪਞ੍ਚਵਿਞ੍ਞਾਣਸਮਙ੍ਗਿਸ੍ਸਮਗ੍ਗਕਥਾਵਣ੍ਣਨਾ ਨਿਟ੍ਠਿਤਾ.