ਪੁਗ੍ਗਲਪਞ੍ਞਤ੍ਤਿਪਕਰਣ-ਅਨੁਟੀਕਾ

੧. ਮਾਤਿਕਾਵਣ੍ਣਨਾ

੧. ‘‘ਧਾਤੁਕਥਂ ਦੇਸਯਿਤ੍ਵਾ ਅਨਨ੍ਤਰਂ ਤਸ੍ਸ ਆਹ ਪੁਗ੍ਗਲਪਞ੍ਞਤ੍ਤਿ’’ਨ੍ਤਿ ਵੁਤ੍ਤੇ ਤਤ੍ਥ ਕਾਰਣਂ ਸਮੁਦਾਗਮਤੋ ਪਟ੍ਠਾਯ ਵਿਭਾਵੇਨ੍ਤੋ ‘‘ਧਮ੍ਮਸਙ੍ਗਹੇ’’ਤਿਆਦਿਮਾਹ. ਤਤ੍ਥ ਯਦਿਪਿ ਧਮ੍ਮਸਙ੍ਗਹੇ ਫਸ੍ਸਾਦੀਨਂ ਪਥਵੀਆਦੀਨਞ੍ਚ ਧਮ੍ਮਾਨਂ ਨਾਨਾਨਯਵਿਚਿਤ੍ਤੋ ਅਨੁਪਦਵਿਭਾਗੋਪਿ ਕਤੋ, ਨ ਸਙ੍ਗਹੋ ਏਵ, ਸੋ ਪਨ ਤੇਸਂ ਕੁਸਲਤ੍ਤਿਕਾਦਿਹੇਤੁਦੁਕਾਦਿਤਿਕਦੁਕੇਹਿ ਸਙ੍ਗਹਸਨ੍ਦਸ੍ਸਨਤ੍ਥੋਤਿ ਵੁਤ੍ਤਂ ‘‘ਧਮ੍ਮਸਙ੍ਗਹੇ ਤਿਕਦੁਕਾਦਿਵਸੇਨ ਸਙ੍ਗਹਿਤਾਨਂ ਧਮ੍ਮਾਨ’’ਨ੍ਤਿ. ਤੇਨੇਵ ਹਿ ਤਂ ਪਕਰਣਂ ‘‘ਧਮ੍ਮਸਙ੍ਗਹੋ’’ਤਿ ਸਮਞ੍ਞਂ ਲਭਿ. ਕਾਮਞ੍ਚ ਧਮ੍ਮਸਙ੍ਗਹੇਪਿ ‘‘ਤਸ੍ਮਿਂ ਖੋ ਪਨ ਸਮਯੇ ਚਤ੍ਤਾਰੋ ਖਨ੍ਧਾ ਹੋਨ੍ਤੀ’’ਤਿਆਦਿਨਾ (ਧ. ਸ. ੫੮) ਖਨ੍ਧਾਦਿਵਿਭਾਗੋ ਦਸ੍ਸਿਤੋ, ਸੋ ਪਨ ਨ ਤਥਾ ਸਾਤਿਸਯੋ, ਯਥਾ ਵਿਭਙ੍ਗਪਕਰਣੇਤਿ ਸਾਤਿਸਯਂ ਤਂ ਗਹੇਤ੍ਵਾ ਆਹ ‘‘ਵਿਭਙ੍ਗੇ ਖਨ੍ਧਾਦਿਵਿਭਾਗਂ ਦਸ੍ਸੇਤ੍ਵਾ’’ਤਿ, ਯਤੋ ਤਂ ‘‘ਵਿਭਙ੍ਗੋ’’ਤ੍ਵੇਵ ਪਞ੍ਞਾਯਿਤ੍ਥ. ਧਾਤੁਕਥਾਯਾਤਿ ਆਧਾਰੇ ਭੁਮ੍ਮਂ, ਤਥਾ ‘‘ਧਮ੍ਮਸਙ੍ਗਹੇ ਵਿਭਙ੍ਗੇ’’ਤਿ ਏਤ੍ਥਾਪਿ. ਆਧਾਰੋ ਹਿ ਸਙ੍ਗਹਣਵਿਭਜਨਪ੍ਪਭੇਦਵਚਨਸਙ੍ਖਾਤਾਨਂ ਅਵਯਵਕਿਰਿਯਾਨਂ ਤਂਸਮੁਦਾਯਭੂਤਾਨਿ ਪਕਰਣਾਨਿ ਯਥਾ ‘‘ਰੁਕ੍ਖੇ ਸਾਖਾ’’ਤਿ. ਕਰਣਵਚਨਂ ਵਾ ਏਤਂ, ਧਾਤੁਕਥਾਯ ਕਰਣਭੂਤਾਯਾਤਿ ਅਤ੍ਥੋ.

ਏਤ੍ਥ ਚ ਅਭਿਞ੍ਞੇਯ੍ਯਧਮ੍ਮੇ ਦੇਸੇਨ੍ਤੋ ਦੇਸਨਾਕੁਸਲੋ ਭਗਵਾ ਤਿਕਦੁਕਵਸੇਨ ਤਾਵ ਨੇਸਂ ਸਙ੍ਗਹਂ ਦਸ੍ਸੇਨ੍ਤੋ ਧਮ੍ਮਸਙ੍ਗਣਿਂ ਦੇਸੇਤ੍ਵਾ ਸਙ੍ਗਹਪੁਬ੍ਬਕਤ੍ਤਾ ਵਿਭਾਗਸ੍ਸ ਤਦਨਨ੍ਤਰਂ ਖਨ੍ਧਾਦਿਵਸੇਨ ਵਿਭਾਗਂ ਦਸ੍ਸੇਨ੍ਤੋ ਵਿਭਙ੍ਗਂ ਦੇਸੇਸਿ. ਪੁਨ ਯਥਾਵੁਤ੍ਤਵਿਭਾਗਸਙ੍ਗਹਯੁਤ੍ਤੇ ਧਮ੍ਮੇ ਸਙ੍ਗਹਾਸਙ੍ਗਹਾਦਿਨਯਪ੍ਪਭੇਦਤੋ ਦਸ੍ਸੇਨ੍ਤੋ ਧਾਤੁਕਥਂ ਦੇਸੇਸਿ ਤਸ੍ਸਾ ਅਬ੍ਭਨ੍ਤਰਬਾਹਿਰਮਾਤਿਕਾਸਰੀਰਕਤ੍ਤਾ. ਨ ਹਿ ਸਕ੍ਕਾ ਖਨ੍ਧਾਦਿਕੇ ਕੁਸਲਾਦਿਕੇ ਚ ਵਿਨਾ ਸਙ੍ਗਹਾਸਙ੍ਗਹਾਦਿਨਯਂ ਨੇਤੁਨ੍ਤਿ. ਤੇਨਾਹ ‘‘ਤਥਾਸਙ੍ਗਹਿਤਵਿਭਤ੍ਤਾਨ’’ਨ੍ਤਿ. ਏਵਂ ਸਙ੍ਗਹਤੋ ਵਿਭਾਗਤੋ ਪਭੇਦਤੋ ਚ ਧਮ੍ਮਾਨਂ ਦੇਸਨਾ ਯਸ੍ਸਾ ਪਞ੍ਞਤ੍ਤਿਯਾ ਵਸੇਨ ਹੋਤਿ, ਯੋ ਚਾਯਂ ਯਥਾਵੁਤ੍ਤਧਮ੍ਮੁਪਾਦਾਨੋ ਪੁਗ੍ਗਲਵੋਹਾਰੋ, ਤਸ੍ਸ ਚ ਸਮਯਵਿਮੁਤ੍ਤਾਦਿਵਸੇਨ ਵਿਭਾਗੋ, ਤਂ ਸਬ੍ਬਂ ਵਿਭਾਵੇਤੁਂ ਪੁਗ੍ਗਲਪਞ੍ਞਤ੍ਤਿ ਦੇਸਿਤਾਤਿ ਇਦਮੇਤੇਸਂ ਚਤੁਨ੍ਨਂ ਪਕਰਣਾਨਂ ਦੇਸਨਾਨੁਕ੍ਕਮਕਾਰਣਂ ਦਟ੍ਠਬ੍ਬਂ.

ਤੇਸਨ੍ਤਿ ਧਮ੍ਮਾਨਂ. ਸਭਾਵਤੋਤਿ ‘‘ਫਸ੍ਸੋ ਵੇਦਨਾ’’ਤਿਆਦਿਸਭਾਵਤੋ. ਉਪਾਦਾਯਾਤਿ ‘‘ਪੁਗ੍ਗਲੋ ਸਤ੍ਤੋ ਪੋਸੋ’’ਤਿਆਦਿਨਾ ਖਨ੍ਧੇ ਉਪਾਦਾਯ. ਪਞ੍ਞਾਪਨਂ ਯਾਯ ਤਜ੍ਜਾਉਪਾਦਾਦਿਭੇਦਾਯ ਪਞ੍ਞਤ੍ਤਿਯਾ ਹੋਤਿ, ਤਂ ਪਞ੍ਞਤ੍ਤਿਂ. ਪਭੇਦਤੋਤਿ ਖਨ੍ਧਾਦਿਸਮਯਵਿਮੁਤ੍ਤਾਦਿਵਿਭਾਗਤੋ. ਯਾਯ ਪਞ੍ਞਤ੍ਤਿਯਾ ਸਭਾਵਤੋ ਉਪਾਦਾਯ ਚ ਪਞ੍ਞਾਪਨਨ੍ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਤਤ੍ਥ ਯੇ ਧਮ੍ਮੇ’’ਤਿਆਦਿਮਾਹ. ਤਤ੍ਥ ਅਸਭਾਵਪਞ੍ਞਤ੍ਤਿਯਾਪਿ ਮੂਲਭੂਤਂ ਉਪਾਦਾਨਂ ਸਭਾਵਧਮ੍ਮੋ ਏਵ, ਕੇਵਲਂ ਪਨ ਤੇਸਂ ਪਵਤ੍ਤਿਆਕਾਰਭੇਦਸਨ੍ਨਿਸ੍ਸਯਤੋ ਵਿਸੇਸੋਤਿ ਦਸ੍ਸੇਨ੍ਤੋ ‘‘ਯੇ ਧਮ੍ਮੇ…ਪੇ… ਹੋਤੀ’’ਤਿ ਆਹ. ਤਤ੍ਥ ਪੁਬ੍ਬਾਪਰਿਯਭਾਵੇਨ ਪਵਤ੍ਤਮਾਨੇਤਿ ਇਮਿਨਾ ਪਬਨ੍ਧਸਨ੍ਨਿਸ੍ਸਯਤਂ ਦਸ੍ਸੇਨ੍ਤੋ ਸਨ੍ਤਾਨਪਞ੍ਞਤ੍ਤਿਂ ਵਦਤਿ, ਅਸਭਾਵਸਮੂਹਵਸੇਨਾਤਿ ਇਮਿਨਾ ਸੇਸਪਞ੍ਞਤ੍ਤਿਂ. ਤਿਸ੍ਸੋ ਹਿ ਪਞ੍ਞਤ੍ਤਿਯੋ ਸਨ੍ਤਾਨਪਞ੍ਞਤ੍ਤਿ ਸਮੂਹਪਞ੍ਞਤ੍ਤਿ ਅਵਤ੍ਥਾਵਿਸੇਸਪਞ੍ਞਤ੍ਤੀਤਿ. ਤਤ੍ਥ ਪਬਨ੍ਧੋ ਸਨ੍ਤਾਨੋ. ਸਮੁਦਾਯੋ ਸਮੂਹੋ. ਉਪ੍ਪਾਦਾਦਿਕੋ ਦਹਰਭਾਵਾਦਿਕੋ ਚ ਅਵਤ੍ਥਾਵਿਸੇਸੋ. ਤੇਸੁ ਅਸਭਾਵਗ੍ਗਹਣੇਨ ਵਿਨਾ ਪਬਨ੍ਧਸਮੂਹਾਨਂ ਅਸਭਾਵਤ੍ਤੇ ਸਿਦ੍ਧੇ ਅਸਭਾਵਸਮੂਹਵਸੇਨਾਤਿ ਅਸਭਾਵਗ੍ਗਹਣਂ ਪਬਨ੍ਧਸਮੂਹਵਿਨਿਮੁਤ੍ਤਪਞ੍ਞਤ੍ਤਿਸਨ੍ਦਸ੍ਸਨਤ੍ਥਨ੍ਤਿ ਤੇਨ ਅਵਤ੍ਥਾਵਿਸੇਸਪਞ੍ਞਤ੍ਤਿਯਾ ਪਰਿਗ੍ਗਹੋ ਵੁਤ੍ਤੋਤਿ ਵੇਦਿਤਬ੍ਬੋ.

ਤੇਸਨ੍ਤਿ ਪੁਬ੍ਬੇ ਯਂ-ਸਦ੍ਦੇਨ ਪਰਾਮਟ੍ਠਾਨਂ ਇਨ੍ਦ੍ਰਿਯਬਦ੍ਧਧਮ੍ਮਾਨਂ. ਤੇਨੇਵਾਹ ‘‘ਅਞ੍ਞੇਸਞ੍ਚ ਬਾਹਿਰਰੂਪਨਿਬ੍ਬਾਨਾਨ’’ਨ੍ਤਿ. ਸਸਭਾਵਸਮੂਹਸਸਭਾਵਪ੍ਪਭੇਦਵਸੇਨਾਤਿ ਰੂਪਕ੍ਖਨ੍ਧਾਦਿਸਸਭਾਵਸਮੂਹਵਸੇਨ ਚਕ੍ਖਾਯਤਨਾਦਿਸਸਭਾਵਵਿਸੇਸਵਸੇਨ ਚ. ‘‘ਸਸਭਾਵਸਮੂਹਸਭਾਵਭੇਦਵਸੇਨਾ’’ਤਿ ਚ ਪਾਠੋ. ਤਤ੍ਥ ਸਮੂਹਸਭਾਵੋਤਿ ਸਭਾਵਸਨ੍ਤਾਨਂ ਅਵਤ੍ਥਾਵਿਸੇਸਵਿਧੁਰਂ ਸਮੂਹਵਸੇਨ ਲਕ੍ਖਣਮੇਵਾਹ. ਤਥਾ ਹਿ ਖਨ੍ਧਪਞ੍ਞਤ੍ਤਿਯਾਪਿ ਸਭਾਵਪਞ੍ਞਤ੍ਤਿਤਾ ਵੁਤ੍ਤਾ. ਤਾਯਾਤਿ ਆਯਤਨਪਞ੍ਞਤ੍ਤਿਆਦਿਪ੍ਪਭੇਦਾਯ ਸਭਾਵਪਞ੍ਞਤ੍ਤਿਯਾ. ਵਿਭਤ੍ਤਾ ਸਭਾਵਪਞ੍ਞਤ੍ਤੀਤਿ ‘‘ਫਸ੍ਸੋ ਫੁਸਨਾ’’ਤਿਆਦਿਨਾ (ਧ. ਸ. ੨) ਵਿਭਤ੍ਤਾ ਫਸ੍ਸਾਦਿਸਭਾਵਪਞ੍ਞਤ੍ਤਿ. ਸਬ੍ਬਾਪੀਤਿ ਪਿ-ਸਦ੍ਦੇਨ ਸਭਾਵਧਮ੍ਮੇਸੁ ਸਾਮਞ੍ਞਵਸੇਨ ਪਵਤ੍ਤਂ ਕੁਸਲਾਦਿਪਞ੍ਞਤ੍ਤਿਂ ਸਙ੍ਗਣ੍ਹਾਤਿ. ਰੂਪਾਦਿਧਮ੍ਮਾਨਂ ਸਮੂਹੋ ਸਨ੍ਤਾਨੇਨ ਪਵਤ੍ਤਮਾਨੋ ਅਵਤ੍ਥਾਵਿਸੇਸਸਹਿਤੋ ਏਕਤ੍ਤਗ੍ਗਹਣਨਿਬਨ੍ਧਨੋ ਸਤ੍ਤੋਤਿ ਵੋਹਰੀਯਤੀਤਿ ਸੋ ਸਭਾਵਧਮ੍ਮੋ ਨਾਮ ਪਨ ਨ ਹੋਤੀਤਿ ਆਹ ‘‘ਪੁਗ੍ਗਲਪਞ੍ਞਤ੍ਤਿ ਪਨ ਅਸਭਾਵਪਞ੍ਞਤ੍ਤੀ’’ਤਿ. ਤਾਯਾਤਿ ਪੁਗ੍ਗਲਪਞ੍ਞਤ੍ਤਿਯਾ. ਯਸ੍ਮਾ ਪਨ ਧਮ੍ਮਾਨਂ ਪਬਨ੍ਧੋ ਸਮੂਹੋ ਚ ਧਮ੍ਮਸਨ੍ਨਿਸ੍ਸਿਤੋਤਿ ਵਤ੍ਤਬ੍ਬਤਂ ਅਰਹਤਿ, ਤਸ੍ਮਾ ‘‘ਪਰਿਞ੍ਞੇਯ੍ਯਾਦਿਸਭਾਵਧਮ੍ਮੇ ਉਪਾਦਾਯ ਪਵਤ੍ਤਿਤੋ’’ਤਿ ਵੁਤ੍ਤਂ.

ਵਿਜ੍ਜਮਾਨਪਞ੍ਞਤ੍ਤਿ ਪਨ ‘‘ਸਭਾਵਪਞ੍ਞਤ੍ਤੀ’’ਤਿ ਵੁਤ੍ਤਾ, ਅਵਿਜ੍ਜਮਾਨਪਞ੍ਞਤ੍ਤਿ ‘‘ਅਸਭਾਵਪਞ੍ਞਤ੍ਤੀ’’ਤਿ ਵੁਤ੍ਤਾ. ਸਬ੍ਬਾ ਪਞ੍ਞਤ੍ਤਿਯੋਤਿ ਉਪਾਦਾਯਪਞ੍ਞਤ੍ਤਿਕਿਚ੍ਚਪਞ੍ਞਤ੍ਤਿਆਦਯੋ ਸਬ੍ਬਾ ਪਞ੍ਞਤ੍ਤਿਯੋ. ਯਦਿ ਸਬ੍ਬਾ ਪਞ੍ਞਤ੍ਤਿਯੋ ਇਧ ਦਸ੍ਸਿਤਾ ਹੋਨ੍ਤਿ, ਕਥਂ ‘‘ਪੁਗ੍ਗਲਪਞ੍ਞਤ੍ਤੀ’’ਤਿ ਨਾਮਂ ਜਾਤਨ੍ਤਿ ਆਹ ‘‘ਖਨ੍ਧਾਦਿਪਞ੍ਞਤ੍ਤੀਸੂ’’ਤਿਆਦਿ. ਅਞ੍ਞਤ੍ਥਾਤਿ ਧਮ੍ਮਸਙ੍ਗਹਾਦੀਸੁ. ਯੇ ਧਮ੍ਮੇਤਿ ਯੇ ਖਨ੍ਧਾਦਿਧਮ੍ਮੇ. ਪਞ੍ਞਤ੍ਤਿਯਾ ਵਤ੍ਥੁਭਾਵੇਨਾਤਿ ਪਞ੍ਞਾਪਨਸ੍ਸ ਅਧਿਟ੍ਠਾਨਭਾਵੇਨ. ਅਧਿਟ੍ਠਾਨਞ੍ਹਿ ਪਞ੍ਞਾਪੇਤਬ੍ਬਧਮ੍ਮਾ ਪਞ੍ਞਾਪਨਸ੍ਸ. ਏਵਞ੍ਚ ਕਤ੍ਵਾ ਖਨ੍ਧਾਦੀਹਿ ਸਦ੍ਧਿਂ ਪੁਗ੍ਗਲੋ ਗਹਿਤੋ. ਯੇ ਧਮ੍ਮੇਤਿ ਵਾ ਯੇ ਪਞ੍ਞਤ੍ਤਿਧਮ੍ਮੇ. ਪਞ੍ਞਾਪੇਤੁਕਾਮੋਤਿ ਨਿਕ੍ਖਿਪਿਤੁਕਾਮੋ ਵਤ੍ਥੁਭੇਦਤੋ ਅਸਙ੍ਕਰਤੋ ਠਪੇਤੁਕਾਮੋ. ਪਞ੍ਞਤ੍ਤਿਪਰਿਚ੍ਛੇਦਨ੍ਤਿ ਚ ਵਤ੍ਥੁਭੇਦਭਿਨ੍ਨਂ ਪਞ੍ਞਤ੍ਤਿਭੂਤਂ ਪਰਿਚ੍ਛੇਦਂ. ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਸਾਮਞ੍ਞਪ੍ਪਭੇਦਪਞ੍ਞਾਪਨਾਤਿ ਸਾਮਞ੍ਞਭੂਤਾਨਂ ਵਿਸੇਸਭੂਤਾਨਞ੍ਚ ਅਤ੍ਥਾਨਂ ਪਞ੍ਞਾਪਨਾ. ਤੇਸਨ੍ਤਿ ਅਤ੍ਥ-ਸਦ੍ਦਾਪੇਕ੍ਖਾਯ ਪੁਲ੍ਲਿਙ੍ਗਨਿਦ੍ਦੇਸੋ. ਤਤ੍ਥਾਤਿ ਪਞ੍ਞਾਪਨਾਯ ਅਤ੍ਥਦਸ੍ਸਨਭੂਤੇਸੁ ਦਸ੍ਸਨਾਦੀਸੁ. ਇਦਮੇਵਂਨਾਮਕਨ੍ਤਿ ਇਦਂ ਰੁਪ੍ਪਨਾਦਿਅਤ੍ਥਜਾਤਂ ਇਤ੍ਥਨ੍ਨਾਮਕਂ ਰੂਪਕ੍ਖਨ੍ਧਵੇਦਨਾਕ੍ਖਨ੍ਧਾਦਿਸਮਞ੍ਞਂ. ਤਂਤਂਕੋਟ੍ਠਾਸਿਕਕਰਣਨ੍ਤਿ ਰੂਪਵੇਦਨਾਦਿਤਂਤਂਅਤ੍ਥਵਿਭਾਗਪਰਿਯਾਪਨ੍ਨਤਾਪਾਦਨਂ. ਤਥਾ ਸਞ੍ਞੁਪ੍ਪਾਦਾਨਮੇਵਾਤਿ ਆਹ ‘‘ਬੋਧਨਮੇਵ ਨਿਕ੍ਖਿਪਨਾ’’ਤਿ. ਬੋਧਨਞ੍ਹਿ ਬੋਧਨੇਯ੍ਯਸਨ੍ਤਾਨੇ ਬੋਧੇਤਬ੍ਬਸ੍ਸ ਅਤ੍ਥਸ੍ਸ ਠਪਨਨ੍ਤਿ ਕਤ੍ਵਾ ‘‘ਨਿਕ੍ਖਿਪਨਾ’’ਤਿ ਵੁਤ੍ਤਂ. ‘‘ਪਞ੍ਞਾਪਨਾ’’ਤਿਆਦਿਨਾ ਭਾਵਸਾਧਨੇਨ ਵਤ੍ਵਾ ਸਾਧਨਨ੍ਤਰਾਮਸਨੇਨ ਅਤ੍ਥਨ੍ਤਰਪਰਿਕਪ੍ਪਾਸਙ੍ਕਾ ਸਿਯਾਤਿ ਤਂ ਨਿਵਾਰੇਤੁਂ ‘‘ਯੋ ਪਨਾਯਂ…ਪੇ… ਵੇਦਿਤਬ੍ਬੋ’’ਤਿ ਆਹ. ਤੇਸਂ ਤੇਸਂ ਧਮ੍ਮਾਨਨ੍ਤਿ ਤਂਤਂਪਞ੍ਞਾਪੇਤਬ੍ਬਧਮ੍ਮਾਨਂ. ਦਸ੍ਸਨਭੂਤਾਯ ਨਾਮਪਞ੍ਞਤ੍ਤਿਯਾ ਦਿਟ੍ਠਤਾਯ, ਠਪਨਭੂਤਾਯ ਠਪਿਤਤਾਯ. ਤਂਨਿਮਿਤ੍ਤਤਨ੍ਤਿ ਤਸ੍ਸ ਦਸ੍ਸਨਸ੍ਸ ਠਪਨਸ੍ਸ ਚ ਨਿਮਿਤ੍ਤਕਾਰਣਤਂ. ਨਿਮਿਤ੍ਤਞ੍ਹਿ ਕਤ੍ਤੁਭਾਵੇਨ ਵੋਹਰੀਯਤਿ ਯਥਾ ‘‘ਭਿਕ੍ਖਾ ਵਾਸੇਤੀ’’ਤਿ, ‘‘ਅਰਿਯਭਾਵਕਰਾਨਿ ਸਚ੍ਚਾਨਿ ਅਰਿਯਸਚ੍ਚਾਨੀ’’ਤਿ ਚ.

ਪਾਲ਼ਿਯਂ ਅਨਾਗਤਤਨ੍ਤਿ ਵਿਜ੍ਜਮਾਨਤਾਦਿਵਿਸੇਸਵਚਨੇਨ ਸਹ ਪਾਠਾਨਾਰੁਲ਼੍ਹਤਂ. ਵਿਜ੍ਜਮਾਨਸ੍ਸ ਸਤੋਤਿ ਵਿਜ੍ਜਮਾਨਸ੍ਸ ਸਮਾਨਸ੍ਸਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਵਿਜ੍ਜਮਾਨਭੂਤਸ੍ਸਾਤਿ ਅਤ੍ਥੋ’’ਤਿ ਆਹ. ਤਥਾਤਿ ਸਚ੍ਚਿਕਟ੍ਠਪਰਮਤ੍ਥਵਸੇਨ ਅਵਿਜ੍ਜਮਾਨਸ੍ਸ ਅਨੁਪਲਬ੍ਭਮਾਨਸ੍ਸ. ਤਂ ਪਨ ਅਨੁਪਲਬ੍ਭਮਾਨਤਂ ਤਥਾ-ਸਦ੍ਦੇਨ ਬ੍ਯਤਿਰੇਕਵਸੇਨ ਦੀਪਿਤਂ ਪਾਕਟਤਰਂ ਕਾਤੁਂ ‘‘ਯਥਾ ਕੁਸਲਾਦੀਨੀ’’ਤਿਆਦਿਮਾਹ. ਤਤ੍ਥ ਵਿਨਿਵਤ੍ਤਸਭਾਵਾਨੀਤਿ ਵਿਭਤ੍ਤਸਭਾਵਾਨਿ. ਉਪਲਦ੍ਧੀਤਿ ਗਹਣਂ. ਤੇਨਾਕਾਰੇਨਾਤਿ ਤੇਨ ਰੂਪਵੇਦਨਾਦਿਆਕਾਰੇਨ ਅਵਿਜ੍ਜਮਾਨਸ੍ਸ. ਅਞ੍ਞੇਨਾਕਾਰੇਨਾਤਿ ਤਤੋ ਰੂਪਵੇਦਨਾਦਿਤੋ ਅਞ੍ਞੇਨ ਤਬ੍ਬਿਨਿਮੁਤ੍ਤੇਨ ਪਞ੍ਞਾਪੇਤਬ੍ਬਪਞ੍ਞਾਪਨਾਕਾਰੇਨ ਵਿਜ੍ਜਮਾਨਸ੍ਸ. ਪਞ੍ਞਤ੍ਤਿਦੁਕੇ ਵੁਤ੍ਤਮੇਵ ‘‘ਅਯਞ੍ਚ ਵਾਦੋ ਸੇਵਤ੍ਥਿਕਥਾਯ ਪਟਿਸਿਦ੍ਧੋ’’ਤਿਆਦਿਨਾ. ਲੋਕਨਿਰੁਤ੍ਤਿਮਤ੍ਤਸਿਦ੍ਧਸ੍ਸਾਤਿ ਏਤ੍ਥ ਮਤ੍ਤਗ੍ਗਹਣਂ ਤਸ੍ਸ ਪਞ੍ਞਤ੍ਤਿਵਤ੍ਥੁਸ੍ਸ ਨ ਕੇਵਲਂ ਵਿਜ੍ਜਮਾਨਸਭਾਵਤਾਨਿਵਤ੍ਤਨਤ੍ਥਮੇਵ, ਅਥ ਖੋ ਵਿਪਰੀਤਗ੍ਗਾਹਨਿਵਤ੍ਤਨਤ੍ਥਮ੍ਪੀਤਿ ਦਸ੍ਸੇਨ੍ਤੋ ‘‘ਅਨਭਿਨਿਵੇਸੇਨ ਚਿਤ੍ਤੇਨਾ’’ਤਿ ਆਹ. ਚਤੁਸਚ੍ਚਪਞ੍ਚਕ੍ਖਨ੍ਧਾਦਿਵਿਨਿਮੁਤ੍ਤਂ ਸਚ੍ਚਨ੍ਤਰਖਨ੍ਧਨ੍ਤਰਾਦਿਕਂ ਪਞ੍ਚਮਸਚ੍ਚਾਦਿਕਂ. ਸਚੇ ਤਂ ਕੋਚਿ ਅਤ੍ਥੀਤਿ ਪਟਿਜਾਨੇਯ੍ਯ, ਅਯਾਥਾਵਗਹਿਤਸ੍ਸ ਤਂ ਵਾਚਾਵਤ੍ਥੁਮਤ੍ਤਮੇਵਸ੍ਸਾਤਿ ਦਸ੍ਸੇਨ੍ਤੋ ਆਹ ‘‘ਸਾਭਿਨਿਵੇਸੇਨ…ਪੇ… ਵੁਤ੍ਤ’’ਨ੍ਤਿ. ਉਦ੍ਦੇਸੇ ਨਿਦ੍ਦੇਸੇ ਚ ਸਤ੍ਤਵਨ੍ਤਂ ਪਧਾਨਭਾਵੇਨ ਆਗਮਨਂ ਸਨ੍ਧਾਯਾਹ ‘‘ਸਰੂਪਤੋ ਤਿਸ੍ਸਨ੍ਨਂ ਆਗਤਤ’’ਨ੍ਤਿ. ਗੁਣਭਾਵੇਨ ਪਨ ਉਦ੍ਧਂਸੋਤਪਞ੍ਞਾਵਿਮੁਤ੍ਤਪਾਸਾਣਲੇਖਾਦਿਗ੍ਗਹਣੇਸੁ ਇਤਰਾਪਿ ਤਿਸ੍ਸੋ ਪਞ੍ਞਤ੍ਤਿਯੋ ਇਮਸ੍ਮਿਂ ਪਕਰਣੇ ਆਗਤਾ ਏਵ.

ਯਥਾਵੁਤ੍ਤਸ੍ਸ…ਪੇ… ਅਵਿਰੋਧੇਨਾਤਿ ‘‘ਵਿਜ੍ਜਮਾਨਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਏਵਂ ਵੁਤ੍ਤਪ੍ਪਕਾਰਸ੍ਸ ਅਵਿਲੋਮਨੇਨ. ਆਚਰਿਯਵਾਦਾਤਿ ਚੇਤ੍ਥ ਅਤ੍ਤਨੋਮਤਿਯੋ ਵੇਦਿਤਬ੍ਬਾ, ਅਞ੍ਞਤ੍ਥ ਪਨ ਅਟ੍ਠਕਥਾ ਚ. ਯਥਾ ਚ ਅਵਿਰੋਧੋ ਹੋਤਿ, ਤਂ ਦਸ੍ਸੇਨ੍ਤੋ ‘‘ਤਸ੍ਮਾ’’ਤਿਆਦਿਮਾਹ. ਤਤ੍ਥ ਅਵਿਜ੍ਜਮਾਨਤ੍ਤਾ ਪਞ੍ਞਾਪੇਤਬ੍ਬਮਤ੍ਤਤ੍ਥੇਨ ਪਞ੍ਞਤ੍ਤੀਤਿ ਏਤੇਨ ‘‘ਅਵਿਜ੍ਜਮਾਨਾ ਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਇਮਂ ਸਮਾਸਵਿਕਪ੍ਪਮਾਹ. ਅਵਿਜ੍ਜਮਾਨਪਞ੍ਞਤ੍ਤੀਤਿ ਏਤ੍ਥ ਹਿ ਦ੍ਵੇ ਸਮਾਸਾ ਅਵਿਜ੍ਜਮਾਨਸ੍ਸ, ਅਵਿਜ੍ਜਮਾਨਾ ਵਾ ਪਞ੍ਞਤ੍ਤੀਤਿ ਅਵਿਜ੍ਜਮਾਨਪਞ੍ਞਤ੍ਤਿ. ਤੇਸੁ ਪੁਰਿਮੇਨ ਨਾਮਪਞ੍ਞਤ੍ਤਿ ਵੁਤ੍ਤਾ, ਦੁਤਿਯੇਨ ਉਪਾਦਾਪਞ੍ਞਤ੍ਤਿਆਦਿਭੇਦਾ ਇਤਰਾਪਿ. ਸਸਭਾਵਂ ਵੇਦਨਾਦਿਕਂ. ਤਜ੍ਜਪਰਮਤ੍ਥਨਾਮਲਾਭਤੋਤਿ ਤਜ੍ਜਸ੍ਸ ਤਦਨੁਰੂਪਸ੍ਸ ਪਰਮਤ੍ਥਸ੍ਸ ਅਨ੍ਵਤ੍ਥਸ੍ਸ ਨਾਮਸ੍ਸ ਲਭਨਤੋ, ਅਨੁਭਵਨਾਦਿਸਭਾਵਾਨਂ ਧਮ੍ਮਾਨਂ ਪਰਮਤ੍ਥਿਕਸ੍ਸ ਵੇਦਨਾਦਿਨਾਮਸ੍ਸ ਲਭਨਤ੍ਤਾਤਿ ਅਤ੍ਥੋ. ਏਤੇਨ ਵਿਸੇਸਨਿਵਤ੍ਤਿਅਤ੍ਥੋ ਮਤ੍ਤ-ਸਦ੍ਦੋ, ਤੇਨ ਚਾਯਂ ਵਿਸੇਸੋ ਨਿਵਤ੍ਤਿਤੋਤਿ ਦਸ੍ਸੇਤਿ. ਪਰਤੋ ਲਭਿਤਬ੍ਬਨ੍ਤਿ ਪਰਂ ਉਪਾਦਾਯ ਲਦ੍ਧਬ੍ਬਂ ਯਥਾ ਰੂਪਾਦਿਕੇ ਉਪਾਦਾਯ ਸਤ੍ਤੋਤਿ ਨਿਸ੍ਸਭਾਵਸਮੂਹਸਨ੍ਤਾਨਾਦਿ ਪਞ੍ਞਤ੍ਤਿਵਤ੍ਥੁ. ਏਕਤ੍ਤੇਨਾਤਿ ਅਨਞ੍ਞਤ੍ਤੇਨ. ਅਨੁਪਲਬ੍ਭਸਭਾਵਤਾ ਞਾਣੇਨ ਅਗ੍ਗਹੇਤਬ੍ਬਸਭਾਵਤਾ, ਯਤੋ ਤੇ ਨਵਤ੍ਤਬ੍ਬਾਤਿ ਵੁਚ੍ਚਨ੍ਤਿ.

ਸਸੂਕਸਾਲਿਰਾਸਿਆਦਿਆਕਾਰੇਨ ਸਂਕੁਚਿਤਗ੍ਗੋ ਵਾਸਵਵਾਸੁਦੇਵਾਦੀਨਂ ਵਿਯ ਮੋਲਿਵਿਸੇਸੋ ਕਿਰੀਟਂ, ਸੋ ਪਨ ਮਕੁਟਵਿਸੇਸੋਪਿ ਹੋਤਿਯੇਵਾਤਿ ਆਹ ‘‘ਕਿਰੀਟਂ ਮਕੁਟ’’ਨ੍ਤਿ. ਸਬ੍ਬਸਮੋਰੋਧੋਤਿ ਸਬ੍ਬਾਸਂ ਵਿਜ੍ਜਮਾਨਪਞ੍ਞਤ੍ਤਿਆਦੀਨਂ ਛਨ੍ਨਂ ਪਞ੍ਞਤ੍ਤੀਨਂ ਅਨ੍ਤੋਕਰਣਂ. ਸਙ੍ਖਾਤਬ੍ਬਪ੍ਪਧਾਨਤ੍ਤਾਤਿ ਇਦਂ ਲਕ੍ਖਣਵਚਨਂ. ਨ ਹਿ ਸਬ੍ਬਾਪਿ ਉਪਨਿਧਾਪਞ੍ਞਤ੍ਤਿਸਙ੍ਖਾਵਸੇਨ ਪਵਤ੍ਤਾ, ਨਾਪਿ ਸਬ੍ਬਾ ਸਙ੍ਖਾਤਬ੍ਬਪ੍ਪਧਾਨਾ. ਦੁਤਿਯਂ ਤਤਿਯਨ੍ਤਿਆਦਿਕਂ ਪਨ ਉਪਨਿਧਾਪਞ੍ਞਤ੍ਤਿਯਾ, ਦ੍ਵੇ ਤੀਣੀਤਿਆਦਿਕਂ ਉਪਨਿਕ੍ਖਿਤ੍ਤਪਞ੍ਞਤ੍ਤਿਯਾ ਏਕਦੇਸਂ ਉਪਲਕ੍ਖਣਵਸੇਨ ਦਸ੍ਸੇਨ੍ਤੋ ਤਸ੍ਸ ਚ ਸਙ੍ਖ੍ਯੇਯ੍ਯਪ੍ਪਧਾਨਤਾਯਾਹ ‘‘ਸਙ੍ਖਾਤਬ੍ਬਪ੍ਪਧਾਨਤ੍ਤਾ’’ਤਿ. ਪੂਰਣਤ੍ਥੋ ਹਿ ਸਦ੍ਦੋ ਤਦਤ੍ਥਦੀਪਨਮੁਖੇਨ ਪੂਰੇਤਬ੍ਬਮਤ੍ਥਂ ਦੀਪੇਤਿ. ਸੋ ਚ ਸਙ੍ਖਾਵਿਸਯੋ ਪਧਾਨੋਵਾਤਿ ਦੁਤਿਯਾਦੀਨਂ ਪਞ੍ਞਤ੍ਤੀਨਂ ਸਙ੍ਖਾਤਬ੍ਬਪ੍ਪਧਾਨਤਾ ਵੁਤ੍ਤਾ. ਯਾਵ ਹਿ ਦਸਸਙ੍ਖਾ ਸਙ੍ਖ੍ਯੇਯ੍ਯਪ੍ਪਧਾਨਾਤਿ. ਤਥਾ ਦ੍ਵੇ ਤੀਣੀਤਿਆਦੀਨਮ੍ਪਿ ਪਞ੍ਞਤ੍ਤੀਨਂ. ਸਙ੍ਖਾਤਬ੍ਬੋ ਪਨ ਅਤ੍ਥੋ ਕੋਚਿ ਵਿਜ੍ਜਮਾਨੋ, ਕੋਚਿ ਅਵਿਜ੍ਜਮਾਨੋ, ਕੋਚਿ ਸਹ ਵਿਸੁਞ੍ਚ ਤਦੁਭਯਂ ਮਿਸ੍ਸੋਤਿ ਛਪਿ ਪਞ੍ਞਤ੍ਤਿਯੋ ਭਜਤੀਤਿ.

ਇਤਰਾਤਿ ਉਪਾਦਾਸਮੋਧਾਨਤਜ੍ਜਾਸਨ੍ਤਤਿਪਞ੍ਞਤ੍ਤਿਯੋ ਵੁਤ੍ਤਾਵਸੇਸਾ ਉਪਨਿਧਾਪਞ੍ਞਤ੍ਤਿਉਪਨਿਕ੍ਖਿਤ੍ਤਪਞ੍ਞਤ੍ਤਿਯੋ ਚ. ਸਤ੍ਤਰਥਾਦਿਭੇਦਾ ਉਪਾਦਾਪਞ੍ਞਤ੍ਤਿ, ਦੀਘਰਸ੍ਸਾਦਿਭੇਦਾ ਉਪਨਿਧਾਪਞ੍ਞਤ੍ਤਿ ਚ ਅਵਿਜ੍ਜਮਾਨਪਞ੍ਞਤ੍ਤਿ. ਹਤ੍ਥਗਤਾਦਿਵਿਸਿਟ੍ਠਾ ਉਪਨਿਧਾਪਞ੍ਞਤ੍ਤਿ, ਸਮੋਧਾਨਪਞ੍ਞਤ੍ਤਿ ਚ ਅਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿ. ਤਥੇਵ ‘‘ਸੁਵਣ੍ਣਵਣ੍ਣੋ ਬ੍ਰਹ੍ਮਸ੍ਸਰੋ’’ਤਿਆਦਿਕਾ ਵਿਜ੍ਜਮਾਨਗਬ੍ਭਾ ਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿਂ ਭਜਨ੍ਤੀਤਿ ਆਹ ‘‘ਯਥਾਯੋਗਂ ਤਂ ਤਂ ਪਞ੍ਞਤ੍ਤਿ’’ਨ੍ਤਿ. ਤੇਨ ਵੁਤ੍ਤਂ ‘‘ਦੁਤਿਯਂ ਤਤਿਯਂ…ਪੇ… ਭਜਨ੍ਤੀ’’ਤਿ. ਯਞ੍ਹੀਤਿਆਦਿ ਯਥਾਵੁਤ੍ਤਉਪਨਿਧਾਉਪਨਿਕ੍ਖਿਤ੍ਤਪਞ੍ਞਤ੍ਤੀਨਂ ਅਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿਭਾਵਸਮਤ੍ਥਨਂ. ਤਤ੍ਥ ਤਞ੍ਚ ਸਙ੍ਖਾਨਨ੍ਤਿ ਯਂ ‘‘ਪਠਮਂ ਏਕ’’ਨ੍ਤਿਆਦਿਕਂ ਸਙ੍ਖਾਨਂ, ਤਞ੍ਚ ਸਙ੍ਖਾਮੁਖੇਨ ਗਹੇਤਬ੍ਬਰੂਪਂ. ਚ-ਸਦ੍ਦੇਨ ਸਙ੍ਖ੍ਯੇਯ੍ਯਂ ਸਙ੍ਗਣ੍ਹਾਤਿ. ਤਮ੍ਪਿ ਹਿ ਪਞ੍ਞਾਪੇਤਬ੍ਬਂ ਪਞ੍ਞਤ੍ਤੀਤਿ. ਤਸ੍ਸਾ ਪਨ ਪਰਮਤ੍ਥਤੋ ਅਭਾਵੋ ਵੁਤ੍ਤੋਯੇਵ. ਕਿਞ੍ਚਿ ਨਤ੍ਥੀਤਿ ਪਰਮਤ੍ਥਤੋ ਕਿਞ੍ਚਿ ਨਤ੍ਥਿ. ਤਥਾਤਿ ਇਮਿਨਾ ਅਵਿਜ੍ਜਮਾਨੇਨਅਵਿਜ੍ਜਮਾਨਭਾਵਨ੍ਤਿ ਏਤਂ ਆਕਡ੍ਢਤਿ. ਤੇਨਾਹ ‘‘ਨ ਹਿ…ਪੇ… ਵਿਜ੍ਜਮਾਨੋ’’ਤਿ.

ਓਕਾਸੇਤਿ ਅਵੀਚਿਪਰਨਿਮ੍ਮਿਤਵਸਵਤ੍ਤੀਪਰਿਚ੍ਛਿਨ੍ਨੇ ਪਦੇਸੇ. ਸੋ ਹਿ ਕਾਮਾਧਿਟ੍ਠਾਨਤੋ ‘‘ਕਾਮੋ’’ਤਿ ਵੁਚ੍ਚਤਿ. ਕਮ੍ਮਨਿਬ੍ਬਤ੍ਤਕ੍ਖਨ੍ਧੇਸੂਤਿ ਇਮਿਨਾ ਉਤ੍ਤਰਪਦਲੋਪੇਨ ਕਾਮਭਵਂ ‘‘ਕਾਮੋ’’ਤਿ ਵਦਤਿ. ਭਣਨਂ ਸਦ੍ਦੋ ਚੇਤਨਾ ਵਾ, ਤਂਸਮਙ੍ਗਿਤਾਯ ਤਬ੍ਬਿਸਿਟ੍ਠੇ ਪੁਗ੍ਗਲੇ ਭਾਣਕੋਤਿ ਪਞ੍ਞਤ੍ਤੀਤਿ ਆਹ ‘‘ਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿਪਕ੍ਖਂ ਭਜਤੀ’’ਤਿ. ਯੇਭੁਯ੍ਯੇਨ ਰੂਪਾਯਤਨਗ੍ਗਹਣਮੁਖੇਨ ਰੂਪਸਙ੍ਖਾਤੇਨ ਸਣ੍ਠਾਨਂ ਗਯ੍ਹਤੀਤਿ ਤਸ੍ਸ ਤੇਨ ਅਭੇਦੋਪਚਾਰਂ ਕਤ੍ਵਾ ਵੁਤ੍ਤਂ ‘‘ਰੂਪਾਯਤਨਸਙ੍ਖਾਤੇਨ ਸਣ੍ਠਾਨੇਨਾ’’ਤਿ. ਯਂ ਅਭੇਦੋਪਚਾਰਂ ਭਿਨ੍ਦਿਤੁਂ ਅਜਾਨਨ੍ਤਾ ਨਿਕਾਯਨ੍ਤਰਿਯਾ ਰੂਪਾਯਤਨਂ ਸਣ੍ਠਾਨਸਭਾਵਂ ਪਟਿਜਾਨਨ੍ਤਿ. ‘‘ਕਿਸੋ ਪੁਗ੍ਗਲੋ, ਥੂਲੋ ਪੁਗ੍ਗਲੋ, ਕਿਸੋ ਦਣ੍ਡੋ, ਥੂਲੋ ਦਣ੍ਡੋ’’ਤਿਆਦਿਨਾ ਪੁਗ੍ਗਲਾਦੀਨਂ ਪਞ੍ਞਾਪਨਾ ਤਥਾਤਥਾਸਨ੍ਨਿਵਿਟ੍ਠੇ ਰੂਪਸਙ੍ਖਾਤੇ ਕਿਸਾਦਿਸਣ੍ਠਾਨਪਞ੍ਞਤ੍ਤਿ, ਨ ਰੂਪਾਯਤਨਮਤ੍ਤੇਤਿ ਆਹ ‘‘ਸਣ੍ਠਾਨਨ੍ਤਿ ਵਾ ਰੂਪਾਯਤਨੇ ਅਗ੍ਗਹਿਤੇ’’ਤਿ. ਪਚ੍ਚਤ੍ਤਧਮ੍ਮਨਾਮਵਸੇਨਾਤਿ ‘‘ਪਥਵੀ ਫਸ੍ਸੋ’’ਤਿਆਦਿਨਾ ਧਮ੍ਮਾਨਂ ਤਂਤਂਨਾਮਵਸੇਨ. ਕਿਚ੍ਚਪਞ੍ਞਤ੍ਤਿਆਦਿਵਿਭਾਗੇਨ ਪਵਤ੍ਤੋ ਅਯਮ੍ਪਿ ਆਚਰਿਯਵਾਦੋ ‘‘ਕਿਚ੍ਚਪਞ੍ਞਤ੍ਤਿ ਏਕਚ੍ਚਾ ਭੂਮਿਪਞ੍ਞਤ੍ਤਿ ਪਚ੍ਚਤ੍ਤਪਞ੍ਞਤ੍ਤਿ ਅਸਙ੍ਖਤਪਞ੍ਞਤ੍ਤਿ ਚ ਵਿਜ੍ਜਮਾਨਪਞ੍ਞਤ੍ਤਿ, ਲਿਙ੍ਗਪਞ੍ਞਤ੍ਤਿ ਏਕਚ੍ਚਾ ਪਚ੍ਚਤ੍ਤਪਞ੍ਞਤ੍ਤਿ ਚ ਅਵਿਜ੍ਜਮਾਨਪਞ੍ਞਤ੍ਤਿ, ਏਕਚ੍ਚਾ ਕਿਚ੍ਚਪਞ੍ਞਤ੍ਤਿ ਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿ, ਏਕਚ੍ਚਾ ਭੂਮਿਸਣ੍ਠਾਨਪਞ੍ਞਤ੍ਤਿ ਵਿਜ੍ਜਮਾਨੇਨ ਵਾ ਅਵਿਜ੍ਜਮਾਨੇਨ ਵਾ ਅਵਿਜ੍ਜਮਾਨਪਞ੍ਞਤ੍ਤੀ’’ਤਿ ਦਸ੍ਸਿਤਤ੍ਤਾ ‘‘ਧਮ੍ਮਕਥਾ ਇਤ੍ਥਿਲਿਙ੍ਗ’’ਨ੍ਤਿਆਦੀਨਂ ਵਿਜ੍ਜਮਾਨੇਨਵਿਜ੍ਜਮਾਨਪਞ੍ਞਤ੍ਤਿਭਾਵੋ, ਅਵਿਜ੍ਜਮਾਨੇਨਅਵਿਜ੍ਜਮਾਨਪਞ੍ਞਤ੍ਤਿਭਾਵੋ ਚ ਦਸ੍ਸਿਤਨਯੋਤਿ ਆਹ ‘‘ਸਬ੍ਬਸਙ੍ਗਾਹਕੋਤਿ ਦਟ੍ਠਬ੍ਬੋ’’ਤਿ. ਉਪਾਦਾਪਞ੍ਞਤ੍ਤਿਆਦਿਭਾਵੋ ਚੇਤ੍ਥ ਕਿਚ੍ਚਪਞ੍ਞਤ੍ਤਿਆਦੀਨਂ ਕਿਚ੍ਚਪਞ੍ਞਤ੍ਤਿਆਦਿਭਾਵੋ ਚ ਤਾਸਂ ਯਥਾਰਹਂ ਵਿਭਾਵੇਤਬ੍ਬੋ.

੨. ਸਙ੍ਖੇਪਪ੍ਪਭੇਦਵਸੇਨਾਤਿ ‘‘ਯਾਵਤਾ ਪਞ੍ਚਕ੍ਖਨ੍ਧਾ’’ਤਿ ਸਬ੍ਬੇਪਿ ਖਨ੍ਧੇ ਖਨ੍ਧਭਾਵਸਾਮਞ੍ਞੇਨ ਸਂਖਿਪਨਵਸੇਨ, ‘‘ਯਾਵਤਾ ਰੂਪਕ੍ਖਨ੍ਧੋ’’ਤਿਆਦਿਨਾ ਖਨ੍ਧਾਨਂ ਤਤੋ ਸਾਮਞ੍ਞਤੋ ਪਕਾਰੇਹਿ ਭਿਨ੍ਦਨਵਸੇਨ ਚ. ਅਯਂ ਅਤ੍ਥੋਤਿ ਅਯਂ ਪਞ੍ਞਤ੍ਤਿਸਙ੍ਖਾਤੋ ਅਤ੍ਥੋ. ਸਾਮਞ੍ਞਤੋ ਵਾ ਹਿ ਧਮ੍ਮਾਨਂ ਪਞ੍ਞਾਪਨਂ ਹੋਤਿ ਵਿਸੇਸਤੋ ਵਾ. ਵਿਸੇਸੋ ਚੇਤ੍ਥ ਅਤ੍ਤਨੋ ਸਾਮਞ੍ਞਾਪੇਕ੍ਖਾਯ ਵੇਦਿਤਬ੍ਬੋ, ਵਿਸੇਸਾਪੇਕ੍ਖਾਯ ਪਨ ਸੋਪਿ ਸਾਮਞ੍ਞਂ ਸਮ੍ਪਜ੍ਜਤੀਤਿ ‘‘ਕਿਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤੀ’’ਤਿ ਪੁਚ੍ਛਾਯ ਸਙ੍ਖੇਪਤੋ ਵਿਸ੍ਸਜ੍ਜਨਵਸੇਨ ‘‘ਯਾਵਤਾ ਪਞ੍ਚਕ੍ਖਨ੍ਧਾ’’ਤਿ ਵੁਤ੍ਤਨ੍ਤਿ ਤਤ੍ਥਾਪਿ ‘‘ਖਨ੍ਧਾਨਂ ਖਨ੍ਧਪਞ੍ਞਤ੍ਤੀ’’ਤਿ ਆਨੇਤ੍ਵਾ ਯੋਜੇਤਬ੍ਬਨ੍ਤਿ ਆਹ ‘‘ਯਾਵਤਾ…ਪੇ… ਪਞ੍ਞਤ੍ਤੀ’’ਤਿ. ‘‘ਯਾਵਤਾ ਪਞ੍ਚਕ੍ਖਨ੍ਧਾ, ਏਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤਿ. ਯਾਵਤਾ ਰੂਪਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋ, ਏਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤੀ’’ਤਿ ਏਵਮੇਤ੍ਥ ਪਾਲ਼ਿਯੋਜਨਾ ਕਾਤਬ੍ਬਾ. ਏਵਞ੍ਹਿ ਸਙ੍ਖੇਪਤੋ ਪਭੇਦਤੋ ਚ ਖਨ੍ਧਪਞ੍ਞਤ੍ਤਿ ਵਿਸ੍ਸਜ੍ਜਿਤਾ ਹੋਤਿ. ਤਥਾ ਹਿ ਇਮਸ੍ਸੇਵ ਅਤ੍ਥਸ੍ਸ ਅਟ੍ਠਕਥਾਯਂ ਵੁਤ੍ਤਭਾਵਂ ਦਸ੍ਸੇਨ੍ਤੋ ‘‘ਯਤ੍ਤਕੇਨ…ਪੇ… ਆਦਿਕੇਨਾ’’ਤਿ ਆਹ. ਤਤ੍ਥਾਤਿ ਤਸ੍ਮਿਂ ਵਿਸ੍ਸਜ੍ਜਨਸ੍ਸ ਅਤ੍ਥਵਚਨੇ, ਤਸ੍ਮਿਂ ਵਾ ਵਿਸ੍ਸਜ੍ਜਨਪਾਠੇ ਤਦਤ੍ਥਵਚਨੇ ਚ. ਪਭੇਦਨਿਦਸ੍ਸਨਮਤ੍ਤਨ੍ਤਿ ਪਭੇਦਸ੍ਸ ਉਦਾਹਰਣਮਤ੍ਤਂ. ਅਵੁਤ੍ਤੋਪਿ ਸਬ੍ਬੋ ਭੂਤੁਪਾਦਿਕੋ, ਸੁਖਾਦਿਕੋ ਚ ਪਭੇਦੋ. ਤਂ ਪਨ ਭੂਮਿਮੁਖੇਨ ਦਸ੍ਸੇਤੁਂ ‘‘ਰੂਪਕ੍ਖਨ੍ਧੋ ਕਾਮਾਵਚਰੋ’’ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਏਵਂ ਅਟ੍ਠਕਥਾਯਂ ਆਗਤਨਯੇਨ ਪਾਲ਼ਿਯਾ ਅਤ੍ਥਯੋਜਨਂ ਦਸ੍ਸੇਤ੍ਵਾ ਇਦਾਨਿ ਤਂ ਪਕਾਰਨ੍ਤਰੇਨ ਦਸ੍ਸੇਤੁਂ ‘‘ਅਯਂ ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਯਂ ਵਾਤਿ ਵੁਚ੍ਚਮਾਨਂ ਸਨ੍ਧਾਯਾਹ. ਏਤ੍ਥਾਤਿ ਏਤਸ੍ਮਿਂ ਖਨ੍ਧਪਞ੍ਞਤ੍ਤਿਵਿਸ੍ਸਜ੍ਜਨੇ. ਇਦਨ੍ਤਿ ਇਦਂ ਪਦਂ. ਯਤ੍ਤਕੋ…ਪੇ… ਖਨ੍ਧਪਞ੍ਞਤ੍ਤਿਯਾ ਪਭੇਦੋਤਿ ਇਮਿਨਾ ਸਙ੍ਖੇਪਤੋ ਵਿਤ੍ਥਾਰਤੋ ਚ ਖਨ੍ਧਾਨਂ ਪਭੇਦਂ ਪਤਿ ਪਞ੍ਞਤ੍ਤਿਵਿਭਾਗੋਤਿ ਦਸ੍ਸਿਤਂ ਹੋਤਿ. ਤੇਨਾਹ ‘‘ਵਤ੍ਥੁਭੇਦੇਨ…ਪੇ… ਦਸ੍ਸੇਤੀ’’ਤਿ. ਪਕਰਣਨ੍ਤਰੇਤਿ ਵਿਭਙ੍ਗਪਕਰਣੇ. ਤਤ੍ਥ ਹਿ ਸਾਤਿਸਯਂ ਖਨ੍ਧਾਨਂ ਵਿਭਾਗਪਞ੍ਞਤ੍ਤਿ ਵੁਤ੍ਤਾ. ਤੇਨਾਹ ਅਟ੍ਠਕਥਾਯਂ ‘‘ਸਮ੍ਮਾਸਮ੍ਬੁਦ੍ਧੇਨ ਹਿ…ਪੇ… ਕਥਿਤਾ’’ਤਿ. ਏਤ੍ਥ ਚ ਪਠਮਨਯੇ ਸਮੁਖੇਨ, ਦੁਤਿਯੇ ਵਤ੍ਥੁਮੁਖੇਨ ਪਞ੍ਞਤ੍ਤਿਯਾ ਵਿਭਾਗਾ ਦਸ੍ਸਿਤਾਤਿ ਅਯਮੇਤੇਸਂ ਵਿਸੇਸੋ.

ਏਸ ਨਯੋਤਿ ਇਮਿਨਾ ਖਨ੍ਧਪਞ੍ਞਤ੍ਤਿਯਾ ਵੁਤ੍ਤਮਤ੍ਥਂ ਆਯਤਨਪਞ੍ਞਤ੍ਤਿਯਾਦੀਸੁ ਅਤਿਦਿਸਤਿ. ਤਤ੍ਥ ‘‘ਯਾਵਤਾ ਪਞ੍ਚਕ੍ਖਨ੍ਧਾ’’ਤਿ, ‘‘ਖਨ੍ਧਾਨਂ ਖਨ੍ਧਪਞ੍ਞਤ੍ਤੀ’’ਤਿ ਇਦਂ ਪਞ੍ਞਤ੍ਤਿਨਿਦ੍ਦੇਸਪਾਲ਼ਿਯਾ ਆਦਿਪਰਿਯੋਸਾਨਗ੍ਗਹਣਮੁਖੇਨ ਦਸ੍ਸਨਂ. ‘‘ਯਾਵਤਾ ਦ੍ਵਾਦਸਾਯਤਨਾਨੀ’’ਤਿ, ‘‘ਆਯਤਨਾਨਂ ਆਯਤਨਪਞ੍ਞਤ੍ਤੀ’’ਤਿ ਇਮਸ੍ਸ ਅਤ੍ਥੋ ‘‘ਯਤ੍ਤਕੇਨ ਪਞ੍ਞਾਪਨੇਨ ਸਙ੍ਖੇਪਤੋ ਦ੍ਵਾਦਸਾਯਤਨਾਨੀ’’ਤਿ ਏਤੇਨ ਦਸ੍ਸਿਤੋ, ‘‘ਯਾਵਤਾ ਚਕ੍ਖਾਯਤਨ’’ਨ੍ਤਿਆਦਿਕਸ੍ਸ ਪਨ ‘‘ਪਭੇਦਤੋ ਚਕ੍ਖਾਯਤਨ’’ਨ੍ਤਿਆਦਿਕੇਨਾਤਿ. ਤਤ੍ਥ ‘‘ਚਕ੍ਖਾਯਤਨਂ…ਪੇ… ਧਮ੍ਮਾਯਤਨ’’ਨ੍ਤਿ ਪਭੇਦਨਿਦਸ੍ਸਨਮਤ੍ਤਮੇਤਂ. ਏਤੇਨ ਅਵੁਤ੍ਤੋਪਿ ਸਬ੍ਬੋ ਸਙ੍ਗਹਿਤੋ ਹੋਤੀਤਿ ‘‘ਤਤ੍ਰਾਪਿ ਦਸਾਯਤਨਾ ਕਾਮਾਵਚਰਾ’’ਤਿਆਦਿ ਵੁਤ੍ਤਂ. ਅਯਂ ਵਾ ਏਤ੍ਥ ਪਾਲ਼ਿਯਾ ਅਤ੍ਥਯੋਜਨਾ – ‘‘ਯਾਵਤਾ’’ਤਿ ਇਦਂ ਸਬ੍ਬੇਹਿ ਪਦੇਹਿ ਯੋਜੇਤ੍ਵਾ ‘‘ਯਤ੍ਤਕਾਨਿ ਦ੍ਵਾਦਸਾਯਤਨਾਨਿ…ਪੇ… ਯਤ੍ਤਕੋ ਦ੍ਵਾਦਸਨ੍ਨਂ ਆਯਤਨਾਨਂ, ਤਪ੍ਪਭੇਦਾਨਞ੍ਚ ਚਕ੍ਖਾਯਤਨਾਦੀਨਂ ਪਭੇਦੋ, ਤਤ੍ਤਕੋ ਆਯਤਨਾਨਂ ਆਯਤਨਪਞ੍ਞਤ੍ਤਿਯਾ ਪਭੇਦੋ’’ਤਿ ਪਕਰਣਨ੍ਤਰੇ ਵੁਤ੍ਤੇਨ ਵਤ੍ਥੁਪਭੇਦੇਨ ਆਯਤਨਪਞ੍ਞਤ੍ਤਿਯਾ ਪਭੇਦਂ ਦਸ੍ਸੇਤੀਤਿਆਦਿਨਾ ਇਤਰਪਞ੍ਞਤ੍ਤੀਸੁਪਿ ਨਯੋ ਯੋਜੇਤਬ੍ਬੋ.

੭. ‘‘ਛ ਪਞ੍ਞਤ੍ਤਿਯੋ…ਪੇ… ਪੁਗ੍ਗਲਪਞ੍ਞਤ੍ਤੀ’’ਤਿ ਇਮਂ ਅਪੇਕ੍ਖਿਤ੍ਵਾ ‘‘ਕਿਤ੍ਤਾਵਤਾ…ਪੇ… ਏਤ੍ਤਾਵਤਾ ਇਨ੍ਦ੍ਰਿਯਾਨਂ ਇਨ੍ਦ੍ਰਿਯਪਞ੍ਞਤ੍ਤੀ’’ਤਿ ਅਯਂ ਪਾਲ਼ਿਪਦੇਸੋ ਨਿਦ੍ਦੇਸੋਪਿ ਸਮਾਨੋ ਪਕਰਣਨ੍ਤਰੇ ਵਤ੍ਥੁਭੇਦੇਨ ਵੁਤ੍ਤਂ ਖਨ੍ਧਾਦਿਪਞ੍ਞਤ੍ਤਿਪ੍ਪਭੇਦਂ ਉਪਾਦਾਯ ਉਦ੍ਦੇਸੋਯੇਵ ਹੋਤੀਤਿ ਆਹ ‘‘ਉਦ੍ਦੇਸਮਤ੍ਤੇਨੇਵਾਤਿ ਅਤ੍ਥੋ’’ਤਿ.

ਮਾਤਿਕਾਵਣ੍ਣਨਾ ਨਿਟ੍ਠਿਤਾ.

੨. ਨਿਦ੍ਦੇਸਵਣ੍ਣਨਾ

੧. ਏਕਕਨਿਦ੍ਦੇਸਵਣ੍ਣਨਾ

੧. ਪਚ੍ਚਨੀਕਧਮ੍ਮਾਨਂ ਝਾਪਨਟ੍ਠੇਨ ਝਾਨਂ, ਤਤੋ ਸੁਟ੍ਠੁ ਵਿਮੁਚ੍ਚਨਟ੍ਠੇਨ ਵਿਮੋਕ੍ਖੋਤਿ ਨਿਪ੍ਪਰਿਯਾਯੇਨ ਝਾਨਙ੍ਗਾਨੇਵ ਵਿਮੋਕ੍ਖੋਤਿ ਅਟ੍ਠਕਥਾਅਧਿਪ੍ਪਾਯੋ. ਟੀਕਾਕਾਰੇਨ ਪਨ ‘‘ਅਭਿਭਾਯਤਨਂ ਵਿਯ ਸਸਮ੍ਪਯੁਤ੍ਤਂ ਝਾਨਂ ਵਿਮੋਕ੍ਖੋ’’ਤਿ ਮਞ੍ਞਮਾਨੇਨ ‘‘ਅਧਿਪ੍ਪਾਯੇਨਾਹਾ’’ਤਿ ਵੁਤ੍ਤਂ. ਝਾਨਧਮ੍ਮਾ ਹਿ ਸਮ੍ਪਯੁਤ੍ਤਧਮ੍ਮੇਹਿ ਸਦ੍ਧਿਂਯੇਵ ਪਟਿਪਕ੍ਖਤੋ ਵਿਮੁਚ੍ਚਨ੍ਤਿ, ਨ ਵਿਨਾ, ਤਥਾ ਅਭਿਰਤਿਵਸੇਨ ਆਰਮ੍ਮਣੇ ਨਿਰਾਸਙ੍ਕਪ੍ਪਵਤ੍ਤਿਪੀਤਿ ਅਧਿਪ੍ਪਾਯੋ. ਯਥਾ ਵਾ ਝਾਨਙ੍ਗਾਨਂ ਝਾਨਪਚ੍ਚਯੇਨ ਪਚ੍ਚਯਭਾਵਤੋ ਸਵਿਸੇਸੋ ਝਾਨਪਰਿਯਾਯੋ, ਏਵਂ ਵਿਮੋਕ੍ਖਕਿਚ੍ਚਯੋਗਤੋ ਤੇਸਂ ਸਵਿਸੇਸੋ ਵਿਮੋਕ੍ਖਪਰਿਯਾਯੋ, ਤਦੁਪਚਾਰੇਨ ਸਮ੍ਪਯੁਤ੍ਤਾਨਂ ਵੇਦਿਤਬ੍ਬੋ. ਪਠਮਂ ਸਮਙ੍ਗਿਭਾਵਤ੍ਥਨ੍ਤਿ ਪਟਿਲਾਭਂ ਸਨ੍ਧਾਯਾਹ. ‘‘ਫੁਸਿਤ੍ਵਾ ਵਿਹਰਤੀਤਿ ਪਟਿਲਭਿਤ੍ਵਾ ਇਰਿਯਤੀ’’ਤਿ ਹਿ ਵੁਤ੍ਤਂ. ਅਟ੍ਠਕਥਾਯਂ ‘‘ਯੇਨ ਹਿ ਸਦ੍ਧਿਂ…ਪੇ… ਪਟਿਲਦ੍ਧਾ ਨਾਮ ਹੋਨ੍ਤੀ’’ਤਿ ਤੇਹਿ ਸਾਧੇਤਬ੍ਬਸਹਜਾਤਾਦਿਪਚ੍ਚਯਲਾਭੋਯੇਵੇਤ੍ਥ ਪਟਿਲਾਭੋ ਦਟ੍ਠਬ੍ਬੋ. ਯਥਾ ਫਸ੍ਸੋ ਯਤ੍ਥ ਉਪ੍ਪਨ੍ਨੋ, ਤਂ ਆਰਮ੍ਮਣਂ ਫੁਸਤੀਤਿ ਵੁਚ੍ਚਤਿ, ਏਵਂ ਸਮ੍ਪਯੁਤ੍ਤਧਮ੍ਮੇਪਿ ਤਂਸਭਾਵਤ੍ਤਾਤਿ ਆਹ ‘‘ਸਮ੍ਫਸ੍ਸੇਨ ਫੁਸਨਤ੍ਥ’’ਨ੍ਤਿ. ਤਸ੍ਸ ‘‘ਵਿਵਰਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਇਤਰੇਹੀਤਿ ਉਪਚਾਰਮ੍ਪੀਤਿਆਦਿਨਾ ਉਪਚਾਰਪੁਰਿਮਪ੍ਪਨਾਪਰਪ੍ਪਨਾਨਂ ਪਟਿਲਾਭਕਾਰਣਨ੍ਤਿ ਵਚਨੇਹਿ. ਇਤਰੇ ਕਾਰਣਤ੍ਥੇਤਿ ‘‘ਉਪਚਾਰੇਨ…ਪੇ… ਫੁਸਤਿਯੇਵਾ’’ਤਿ ਵੁਤ੍ਤੇ ਕਾਰਣਤ੍ਥਦੀਪਕੇ ਅਤ੍ਥੇ. ਫੁਸਤਿ ਫਲਂ ਅਧਿਗਚ੍ਛਤਿ ਏਤਾਯਾਤਿ ਕਾਰਣਭਾਵਸ੍ਸ ਫੁਸਨਾਪਰਿਯਾਯੋ ਵੇਦਿਤਬ੍ਬੋ.

ਪਠਮਤ੍ਥਮੇਵਾਤਿ ਸਮਙ੍ਗਿਭਾਵਤ੍ਥਮੇਵ. ਤਾਨਿ ਅਙ੍ਗਾਨੀਤਿ ਇਮਿਨਾ ਝਾਨਕੋਟ੍ਠਾਸਭਾਵੇਨ ਵੁਤ੍ਤਧਮ੍ਮਾਯੇਵ ਗਹਿਤਾ, ਨ ਫਸ੍ਸਪਞ੍ਚਮਕਇਨ੍ਦ੍ਰਿਯਟ੍ਠਕਾਦਿਭਾਵੇਨਾਤਿ ਵੁਤ੍ਤਂ ‘‘ਸੇਸਾ…ਪੇ… ਸਙ੍ਗਹਿਤਾਨੀ’’ਤਿ. ਏਵਂ ਸਤੀਤਿ ਸੁਖਸਙ੍ਖਾਤਝਾਨਙ੍ਗਤੋ ਵੇਦਨਾਸੋਮਨਸ੍ਸਿਨ੍ਦ੍ਰਿਯਾਨਂ ਸੇਸਿਤਬ੍ਬਭਾਵੇ ਸਤਿ. ਏਵਞ੍ਹਿ ਨੇਸਂ ਫਸ੍ਸਕਤਾ ਇਤਰਸ੍ਸ ਫਸ੍ਸਿਤਬ੍ਬਤਾਵ ਸਿਯਾ. ਤੇਨਾਹ ‘‘ਸੁਖਸ੍ਸ ਫੁਸਿਤਬ੍ਬਤ੍ਤਾ’’ਤਿ. ਵੇਦਯਿਤਾਧਿਪਤੇਯ੍ਯਟ੍ਠੇਹੀਤਿ ਆਰਮ੍ਮਣਾਨੁਭਵਨਸਙ੍ਖਾਤੇਨ ਵੇਦਯਿਤਸਭਾਵੇਨ, ਤਸ੍ਸੇਵ ਸਾਤਵਿਸੇਸਸਙ੍ਖਾਤੇਨ ਸਮ੍ਪਯੁਤ੍ਤੇਹਿ ਅਨੁਵਤ੍ਤਨੀਯਭਾਵੇਨ ਚ. ਉਪਨਿਜ੍ਝਾਯਨਭਾਵੋਪਿ ਯਥਾਵੁਤ੍ਤਵੇਦਯਿਤਾਧਿਪਤੇਯ੍ਯਟ੍ਠਵਿਸਿਟ੍ਠੋ ਓਲ਼ਾਰਿਕਸ੍ਸ ਆਰਮ੍ਮਣਸ੍ਸ ਨਿਜ੍ਝਾਯਨਭਾਵੋ. ਅਭਿਨ੍ਨਸਭਾਵੋਪਿ ਹਿ ਧਮ੍ਮੋ ਪੁਰਿਮਵਿਸਿਟ੍ਠਪਚ੍ਚਯਵਿਸੇਸਸਮ੍ਭਵੇਨ ਵਿਸੇਸੇਨ ਭਿਨ੍ਨਾਕਾਰੋ ਹੁਤ੍ਵਾ ਵਿਸਿਟ੍ਠਫਲਭਾਵਂ ਆਪਜ੍ਜਤਿ. ਯਥੇਕਂਯੇਵ ਕਮ੍ਮਂ ਚਕ੍ਖਾਦਿਨਿਬ੍ਬਤ੍ਤਿਹੇਤੁਭੂਤਂ ਕਮ੍ਮਂ. ਤੇਨ ਵੁਤ੍ਤਂ ‘‘ਵੇਦਯਿਤਾ…ਪੇ… ਵੁਤ੍ਤਤ੍ਤਾ’’ਤਿ. ਅਙ੍ਗਾਨੀਤਿ ਨਾਯਂ ਤਪ੍ਪਰਭਾਵੇਨ ਬਹੁਵਚਨਨਿਦ੍ਦੇਸੋ ਅਨਨ੍ਤਭਾਵਤੋ, ਕੇਵਲਞ੍ਚ ਅਙ੍ਗਾਨਂ ਬਹੁਤ੍ਤਾ ਬਹੁਵਚਨਂ, ਤੇਨ ਕਿਂ ਸਿਦ੍ਧਂ? ਪਚ੍ਚੇਕਮ੍ਪਿ ਯੋਜਨਾ ਸਿਦ੍ਧਾ ਹੋਤਿ. ਤੇਨ ਵੁਤ੍ਤਂ ‘‘ਪਚ੍ਚੇਕਮ੍ਪਿ ਯੋਜਨਾ ਕਾਤਬ੍ਬਾ’’ਤਿ. ਯਦਿ ‘‘ਸੁਖਂ ਠਪੇਤ੍ਵਾ’’ਤਿ ਯੋਜਨਾਯਂ ਸੇਸਾ ਤਯੋ ਖਨ੍ਧਾ ਹੋਨ੍ਤਿ, ਸੇਸਾ ਤਯੋ, ਚਤ੍ਤਾਰੋ ਚ ਖਨ੍ਧਾ ਹੋਨ੍ਤੀਤਿ ਵਤ੍ਤਬ੍ਬਂ ਸਿਯਾਤਿ? ਨ, ਚਤੂਸੁ ਤਿਣ੍ਣਂ ਅਨ੍ਤੋਗਧਤ੍ਤਾ. ਤੇਨਾਹ ‘‘ਸਬ੍ਬਯੋਜਨਾ…ਪੇ… ਵੁਤ੍ਤ’’ਨ੍ਤਿ.

੨. ਅਸਮਯਵਿਮੋਕ੍ਖੇਨਾਤਿ ਹੇਟ੍ਠਾਮਗ੍ਗਵਿਮੋਕ੍ਖੇਨ. ਸੋ ਹਿ ਲੋਕਿਯਵਿਮੋਕ੍ਖੋ ਵਿਯ ਅਧਿਗਮਵਲ਼ਞ੍ਜਨਤ੍ਥਂ ਪਕਪ੍ਪੇਤਬ੍ਬਸਮਯਵਿਸੇਸਾਭਾਵਤੋ ਏਵਂ ਵੁਤ੍ਤੋ. ਅਗ੍ਗਮਗ੍ਗਵਿਮੋਕ੍ਖੋ ਪਨ ਏਕਚ੍ਚਾਸਵਵਿਮੁਤ੍ਤਿਵਚਨਤੋ ਇਧ ਨਾਧਿਪ੍ਪੇਤੋ. ਤੇਨਾਹ ‘‘ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤੀ’’ਤਿ. ਏਕਚ੍ਚੇਹਿ ਆਸਵੇਹਿ ਵਿਮੁਤ੍ਤੋਤਿ ਦਿਟ੍ਠਾਸਵਾਦੀਹਿ ਸਮੁਚ੍ਛੇਦਵਿਮੁਤ੍ਤਿਯਾ ਵਿਮੁਤ੍ਤੋ. ਅਸਮਯ…ਪੇ… ਲਾਭੇਨਾਤਿ ਯਥਾਵੁਤ੍ਤਅਸਮਯਵਿਮੋਕ੍ਖਸ੍ਸ ਉਪਨਿਸ੍ਸਯਭੂਤਸ੍ਸ ਅਧਿਗਮੇਨ. ਤਤੋ ਏਵ ਸਾਤਿਸਯੇਨ, ਏਕਚ੍ਚੇਹਿ ਕਾਮਾਸਵੇਹਿ ਵਿਮੁਤ੍ਤੋ ਵਿਕ੍ਖਮ੍ਭਨਵਸੇਨਾਤਿ ਅਤ੍ਥੋ. ਸੋ ਏਵ ਏਕਚ੍ਚਸਮਯਵਿਮੋਕ੍ਖਲਾਭੀ ਯਥਾਵੁਤ੍ਤੋ ਸਮਯਵਿਮੁਤ੍ਤੋ ਅਸਮਯਵਿਮੋਕ੍ਖਵਿਸੇਸਸ੍ਸ ਵਸੇਨ ਸਮਯਵਿਮੋਕ੍ਖਪਞ੍ਞਤ੍ਤਿਯਾ ਅਧਿਪ੍ਪੇਤਤ੍ਤਾ. ਸੋਤਿ ਅਸਮਯਵਿਮੋਕ੍ਖੂਪਨਿਸ੍ਸਯਸਮਯਵਿਮੋਕ੍ਖਲਾਭੀ. ਤੇਨ ਸਾਤਿਸਯੇਨ ਸਮਯਵਿਮੋਕ੍ਖੇਨ. ਤਥਾਵਿਮੁਤ੍ਤੋਵ ਹੋਤੀਤਿ ਏਤ੍ਥ ਇਤਿ-ਸਦ੍ਦੋ ਹੇਤੁਅਤ੍ਥੋ. ਯਸ੍ਮਾ ਤਥਾਵਿਮੁਤ੍ਤੋ ਹੋਤਿ, ਤਸ੍ਮਾ ਸਮਯਵਿਮੁਤ੍ਤਪਞ੍ਞਤ੍ਤਿਂ ਲਦ੍ਧੁਂ ਅਰਹਤੀਤਿ ਪਰਿਞ੍ਞਾਤਤ੍ਥਂ ਹੇਤੁਨਾ ਪਤਿਟ੍ਠਾਪੇਤਿ. ਬ੍ਯਤਿਰੇਕਮੁਖੇਨਪਿ ਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਪੁਥੁਜ੍ਜਨੋ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਮੁਦਾਚਾਰਭਾਵਤੋਤਿ ਸਮੁਦਾਚਾਰਸ੍ਸ ਸਮ੍ਭਵਤੋ. ਸੋਤਿ ਝਾਨਲਾਭੀ ਪੁਥੁਜ੍ਜਨੋ.

ਯਦਿ ਪੁਨਰਾਵਤ੍ਤਕਧਮ੍ਮਤਾਯ ਪੁਥੁਜ੍ਜਨੋ ਸਮਯਵਿਮੁਤ੍ਤੋਤਿ ਨ ਵੁਤ੍ਤੋ, ਤਦਭਾਵਤੋ ਕਸ੍ਮਾ ਅਰਹਾ ਤਥਾ ਨ ਵੁਤ੍ਤੋਤਿ ਆਹ ‘‘ਅਰਹਤੋ ਪਨਾ’’ਤਿਆਦਿ. ਤਦਕਾਰਣਭਾਵਨ੍ਤਿ ਤੇਸਂ ਵਿਮੋਕ੍ਖਾਨਂ, ਤਸ੍ਸ ਵਾ ਸਮਯਵਿਮੁਤ੍ਤਿਭਾਵਸ੍ਸ ਅਕਾਰਣਭਾਵਂ. ਸਬ੍ਬੋਤਿ ਸੁਕ੍ਖਵਿਪਸ੍ਸਕੋਪਿ ਸਮਥਯਾਨਿਕੋਪਿ ਅਟ੍ਠਵਿਮੋਕ੍ਖਲਾਭੀਪਿ. ਬਹਿਅਬ੍ਭਨ੍ਤਰਭਾਵਾ ਅਪੇਕ੍ਖਾਸਿਦ੍ਧਾ, ਵਤ੍ਤੁ ਅਧਿਪ੍ਪਾਯਵਸੇਨ ਗਹੇਤਬ੍ਬਰੂਪਾ ਚਾਤਿ ਆਹ ‘‘ਬਾਹਿਰਾਨਨ੍ਤਿ ਲੋਕੁਤ੍ਤਰਤੋ ਬਹਿਭੂਤਾਨ’’ਨ੍ਤਿ.

੩. ਰੂਪਤੋ ਅਞ੍ਞਂ ਨ ਰੂਪਨ੍ਤਿ ਤਤ੍ਥ ਰੂਪਪਟਿਭਾਗਂ ਕਸਿਣਰੂਪਾਦਿ ਰੂਪ-ਸਦ੍ਦੇਨ ਗਹਿਤਨ੍ਤਿ ਤਦਞ੍ਞਂ ਪਠਮਤਤਿਯਾਰੁਪ੍ਪਵਿਸਯਮਤ੍ਤਂ ਅਰੂਪਕ੍ਖਨ੍ਧਨਿਬ੍ਬਾਨਵਿਨਿਮੁਤ੍ਤਂ ਅਰੂਪ-ਸਦ੍ਦੇਨ ਗਹਿਤਂ ਦਟ੍ਠਬ੍ਬਂ. ਪਟਿਪਕ੍ਖਭੂਤੇਹਿ ਕਿਲੇਸਚੋਰੇਹਿ ਅਮੂਸਿਤਬ੍ਬਂ ਝਾਨਮੇਵ ਚਿਤ੍ਤਮਞ੍ਜੂਸਂ. ਸਮਾਧਿਨ੍ਤਿ ਵਾ ਸਮਾਧਿਸੀਸੇਨ ਝਾਨਮੇਵ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੪. ਅਤ੍ਤਨੋ ਅਨੁਰੂਪੇਨ ਪਮਾਦੇਨਾਤਿ ਏਤ੍ਥ ਅਨਾਗਾਮਿਨੋ ਅਧਿਕੁਸਲੇਸੁ ਧਮ੍ਮੇਸੁ ਅਸਕ੍ਕਚ੍ਚਅਸਾਤਚ੍ਚਕਿਰਿਯਾਦਿਨਾ. ਖੀਣਾਸਵਸ੍ਸ ਪਨ ਤਾਦਿਸੇਨ ਪਮਾਦਪਤਿਰੂਪਕੇਨ, ਤਾਦਿਸਾਯ ਵਾ ਅਸਕ੍ਕਚ੍ਚਕਿਰਿਯਾਯ. ਸਾ ਚਸ੍ਸ ਉਸ੍ਸੁਕ੍ਕਾਭਾਵਤੋ ਵੇਦਿਤਬ੍ਬਾ. ਪਟਿਪ੍ਪਸ੍ਸਦ੍ਧਸਬ੍ਬੁਸ੍ਸੁਕ੍ਕਾ ਹਿ ਤੇ ਉਤ੍ਤਮਪੁਰਿਸਾ. ਸਮਯੇਨ ਸਮਯਨ੍ਤਿ ਸਮਯੇ ਸਮਯੇ. ਭੁਮ੍ਮਤ੍ਥੇ ਹਿ ਏਤਂ ਕਰਣਵਚਨਂ ਉਪਯੋਗਵਚਨਞ੍ਚ. ਅਨਿਪ੍ਫਤ੍ਤਿਤੋਤਿ ਸਮਾਪਜ੍ਜਿਤੁਂ ਅਸਕ੍ਕੁਣੇਯ੍ਯਤੋ. ਅਸ੍ਸਾਤਿ ‘‘ਤੇਸਞ੍ਹੀ’’ਤਿਆਦਿਨਾ ਵੁਤ੍ਤਸ੍ਸ ਇਮਸ੍ਸ ਅਟ੍ਠਕਥਾਵਚਨਸ੍ਸ. ਤੇਨਾਤਿ ਯਥਾਭਤੇਨ ਸੁਤ੍ਤੇਨ.

੫. ਯੇਨਾਧਿਪ੍ਪਾਯੇਨ ‘‘ਧਮ੍ਮੇਹੀ’’ਤਿ ਵਤ੍ਤਬ੍ਬਨ੍ਤਿ ਵੁਤ੍ਤਂ, ਤਂ ਵਿਵਰਨ੍ਤੋ ‘‘ਇਧਾ’’ਤਿਆਦਿਮਾਹ. ਤਤ੍ਥ ਇਧਾਤਿ ‘‘ਪਰਿਹਾਨਧਮ੍ਮੋ ਅਪਰਿਹਾਨਧਮ੍ਮੋ’’ਤਿ ਏਤਸ੍ਮਿਂ ਪਦਦ੍ਵਯੇ. ਤਤ੍ਥਾਤਿ ‘‘ਕੁਪ੍ਪਧਮ੍ਮੋ ਅਕੁਪ੍ਪਧਮ੍ਮੋ’’ਤਿ ਪਦਦ੍ਵਯੇ. ਸਤਿ ਵਚਨਨਾਨਤ੍ਤੇ ਅਤ੍ਥੇਵ ਵਚਨਤ੍ਥਨਾਨਤ੍ਤਨ੍ਤਿ ਆਹ ‘‘ਵਚਨਤ੍ਥਨਾਨਤ੍ਤਮਤ੍ਤੇਨ ਵਾ’’ਤਿ. ਵਚਨਤ੍ਥਗ੍ਗਹਣਮੁਖੇਨ ਗਹੇਤਬ੍ਬਸ੍ਸ ਪਨ ਵਿਭਾਵਨਤ੍ਥਸ੍ਸ ਨਤ੍ਥੇਤ੍ਥ ਨਾਨਤ੍ਤਂ, ਯਤੋ ਤੇਸਂ ਪਰਿਯਾਯਨ੍ਤਰਤਾਸਿਦ੍ਧਿ.

੭-੮. ਸਮਾਪਤ੍ਤਿਚੇਤਨਾਤਿ ਯਾਯ ਚੇਤਨਾਯ ਸਮਾਪਤ੍ਤਿਂ ਨਿਬ੍ਬਤ੍ਤੇਤਿ ਸਮਾਪਜ੍ਜਤਿ ਚ. ਤੇਨਾਹ ‘‘ਤਦਾਯੂਹਨਾ’’ਤਿ. ਆਰਕ੍ਖਪਚ੍ਚੁਪਟ੍ਠਾਨਾ ਸਤੀਤਿ ਕਤ੍ਵਾ ਆਹ ‘‘ਅਨੁਰਕ੍ਖਣਾ…ਪੇ… ਸਤੀ’’ਤਿ. ਤੇਨਾਹ ‘‘ਏਕਾਰਕ੍ਖੋ ਸਤਾਰਕ੍ਖੇਨ ਚੇਤਸਾ ਵਿਹਰਤੀ’’ਤਿ. ਤਥਾ ਹਿ ਸਾ ‘‘ਕੁਸਲਾਕੁਸਲਾਨਂ ਧਮ੍ਮਾਨਂ ਗਤਿਯੋ ਸਮਨ੍ਨੇਸਤੀ’’ਤਿ ਵੁਤ੍ਤਾ.

੧੧. ਅਗ੍ਗਮਗ੍ਗਟ੍ਠੋਪਿ ਇਤਰਮਗ੍ਗਟ੍ਠਾ ਵਿਯ ਅਨੁਪਚ੍ਛਿਨ੍ਨਭਯਤ੍ਤਾ ਭਯੂਪਰਤਵੋਹਾਰਂ ਲਭਤੀਤਿ ਆਹ ‘‘ਅਰਹਤ੍ਤਮਗ੍ਗਟ੍ਠੋ ਚ…ਪੇ… ਭਯੂਪਰਤੋ’’ਤਿ.

੧੨. ਕੇਚੀਤਿ ਤਿਹੇਤੁਕਪਟਿਸਨ੍ਧਿਕੇ ਮਨ੍ਦਬੁਦ੍ਧਿਕੇ ਸਨ੍ਧਾਯਾਹ. ਤੇਨ ਵੁਤ੍ਤਂ ‘‘ਦੁਪ੍ਪਞ੍ਞਾਤਿ ਇਮਿਨਾ ਗਯ੍ਹਨ੍ਤੀ’’ਤਿ. ਦੁਬ੍ਬਲਾ ਪਞ੍ਞਾ ਯੇਸਂ ਤੇ ਦੁਪ੍ਪਞ੍ਞਾਤਿ.

੧੪. ਅਨਿਯਤਧਮ੍ਮਸਮਨ੍ਨਾਗਤਸ੍ਸੇਵ ਪਚ੍ਚਯਵਿਸੇਸੇਨ ਨਿਯਤਧਮ੍ਮਪਟਿਲਾਭੋਤਿ ਆਹ ‘‘ਯਤ੍ਥ…ਪੇ… ਹੋਨ੍ਤੀ’’ਤਿ. ਤਦਭਾਵਾਤਿ ਨਿਯਤਾਨਿਯਤਵੋਮਿਸ੍ਸਾਯ ਪਵਤ੍ਤਿਯਾ ਅਭਾਵਾ.

੧੬. ਪਰਿਯਾਦਿਯਿਤਬ੍ਬਾਨੀਤਿ ਪਰਿਯਾਦਕੇਨ ਮਗ੍ਗੇਨ ਖੇਪੇਤਬ੍ਬਾਨਿ. ਤਣ੍ਹਾਦੀਨਂ ਪਲਿਬੁਧਨਾਦਿਕਿਰਿਯਾਯ ਮਤ੍ਥਕਪ੍ਪਤ੍ਤਿਯਾ ਸੀਸਭਾਵੋ ਵੇਦਿਤਬ੍ਬੋ, ਨਿਬ੍ਬਾਨਸ੍ਸ ਪਨ ਵਿਸਙ੍ਖਾਰਭਾਵਤੋ ਸਙ੍ਖਾਰਸੀਸਤਾ. ਤੇਨਾਹ ‘‘ਸਙ੍ਖਾਰਵਿਵੇਕਭੂਤੋ ਨਿਰੋਧੋ’’ਤਿ. ਕੇਚਿ ਪਨ ‘‘ਸਙ੍ਖਾਰਸੀਸਂ ਨਿਰੋਧਸਮਾਪਤ੍ਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ ਪਞ੍ਞਤ੍ਤਿਮਤ੍ਤਸ੍ਸ ਸੀਸਭਾਵਾਨੁਪਪਤ੍ਤਿਤੋ ਤਦੁਦ੍ਧਞ੍ਚ ਸਙ੍ਖਾਰਪ੍ਪਵਤ੍ਤਿਸਬ੍ਭਾਵਤੋ. ਸਹ ਵਿਯਾਤਿ ਏਕਜ੍ਝਂ ਵਿਯ. ਏਤੇਨ ਸਮ-ਸਦ੍ਦਸ੍ਸ ਅਤ੍ਥਮਾਹ. ਸਹਤ੍ਥੋ ਹੇਸ ਸਮ-ਸਦ੍ਦੋ. ਸਂਸਿਦ੍ਧਿਦਸ੍ਸਨੇਨਾਤਿ ਸਂਸਿਦ੍ਧਿਯਾ ਨਿਟ੍ਠਾਨਸ੍ਸ ਉਪਰਮਸ੍ਸ ਦਸ੍ਸਨੇਨ.

ਇਧਾਤਿ ਇਮਿਸ੍ਸਾ ਪੁਗ੍ਗਲਪਞ੍ਞਤ੍ਤਿਪਾਲ਼ਿਯਾ, ਇਮਿਸ੍ਸਾ ਵਾ ਤਦਟ੍ਠਕਥਾਯ. ਕਿਲੇਸਪਵਤ੍ਤਸੀਸਾਨਨ੍ਤਿ ਕਿਲੇਸਸੀਸਪਵਤ੍ਤਸੀਸਾਨਂ. ਤੇਸੁ ਹਿ ਗਹਿਤੇਸੁ ਇਤਰਮ੍ਪਿ ਪਰਿਯਾਦਿਯਿਤਬ੍ਬਂ ਕਿਲੇਸਭਾਵੇਨ ਪਰਿਯਾਦਿਯਿਤਬ੍ਬਤਾਸਾਮਞ੍ਞੇਨ ਚ ਗਹਿਤਮੇਵ ਹੋਤੀਤਿ ਕਿਲੇਸਵਟ੍ਟਪਰਿਯਾਦਾਨੇਨ ਮਗ੍ਗਸ੍ਸ ਇਤਰਵਟ੍ਟਾਨਮ੍ਪਿ ਪਰਿਯਾਦਿਯਨਂ. ਵਟ੍ਟੁਪਚ੍ਛੇਦਕੇਨ ਮਗ੍ਗੇਨੇਵ ਹਿ ਜੀਵਿਤਿਨ੍ਦ੍ਰਿਯਮ੍ਪਿ ਅਨਵਸੇਸਤੋ ਨਿਰੁਜ੍ਝਤੀਤਿ. ਕਸ੍ਮਾ ਪਨੇਤ੍ਥ ਪਵਤ੍ਤਸੀਸਂ ਵਿਸੁਂ ਗਹਿਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਪਵਤ੍ਤਸੀਸਮ੍ਪੀ’’ਤਿਆਦਿ. ਓਧਿਸੋ ਚ ਅਨੋਧਿਸੋ ਚ ਕਿਲੇਸਪਰਿਯਾਦਾਨੇ ਸਤਿ ਸਿਜ੍ਝਮਾਨਾ ਪਚ੍ਚਵੇਕ੍ਖਣਵਾਰਾ ਤੇਨ ਨਿਪ੍ਫਾਦੇਤਬ੍ਬਾਤਿ ਵੁਤ੍ਤਾ. ਤੇਨੇਵਾਹ ‘‘ਕਿਲੇਸਪਰਿਯਾਦਾਨਸ੍ਸੇਵ ਵਾਰਾ’’ਤਿ. ਇਦਾਨਿ ਤਮਤ੍ਥਂ ਆਗਮੇਨ ਸਾਧੇਨ੍ਤੋ ‘‘ਵਿਮੁਤ੍ਤਸ੍ਮਿ’’ਨ੍ਤਿਆਦਿਮਾਹ. ਚੁਤਿਚਿਤ੍ਤੇਨ ਹੋਤੀਤਿ ਇਦਂ ਯਥਾਵੁਤ੍ਤਸ੍ਸ ਕਿਲੇਸਪਰਿਯਾਦਾਨਸਮਾਪਨਭੂਤਸ੍ਸ ਪਚ੍ਚਵੇਕ੍ਖਣਵਾਰਸ੍ਸ ਚੁਤਿਚਿਤ੍ਤੇਨ ਪਰਿਚ੍ਛਿਨ੍ਨਤ੍ਤਾ ਵੁਤ੍ਤਂ, ਤਸ੍ਮਾ ਚੁਤਿਚਿਤ੍ਤੇਨ ਪਰਿਚ੍ਛੇਦਕੇਨ ਪਰਿਚ੍ਛਿਨ੍ਨਂ ਹੋਤੀਤਿ ਅਤ੍ਥੋ.

੧੭. ਤਿਟ੍ਠੇਯ੍ਯਾਤਿ ਨ ਉਪਗਚ੍ਛੇਯ੍ਯ. ਠਾਨਞ੍ਹਿ ਗਤਿਨਿਵਤ੍ਤਿ. ਤੇਨ ਵੁਤ੍ਤਂ ‘‘ਨਪ੍ਪਵਤ੍ਤੇਯ੍ਯਾ’’ਤਿ.

੧੮. ਪਯਿਰੁਪਾਸਨਾਯ ਬਹੂਪਕਾਰਤ੍ਤਾ ਪਯਿਰੁਪਾਸਿਤਬ੍ਬਤ੍ਤਾ.

੨੦. ਅਗ੍ਗਵਿਜ੍ਜਾ ਯਸ੍ਸ ਅਨਧਿਗਤਵਿਜ੍ਜਾਦ੍ਵਯਸ੍ਸ ਹੋਤਿ, ਸੋ ਚੇ ਪਚ੍ਛਾ ਵਿਜ੍ਜਾਦ੍ਵਯਂ ਅਧਿਗਚ੍ਛਤਿ, ਤਸ੍ਸ ਪਠਮਂ ਅਧਿਗਤਵਿਜ੍ਜਾਦ੍ਵਯਸ੍ਸ ਵਿਯ ਅਤੇਵਿਜ੍ਜਤਾਭਾਵਾ ਯਦਿਪਿ ਨਿਪ੍ਪਰਿਯਾਯਤਾ ਤੇਵਿਜ੍ਜਤਾ, ਪਠਮਂ ਅਧਿਗਤਵਿਜ੍ਜਾਦ੍ਵਯਸ੍ਸ ਪਨ ਸਾ ਸਵਿਸੇਸਾਤਿ ਦਸ੍ਸੇਨ੍ਤੋ ‘‘ਯਾਯ ਕਤਕਿਚ੍ਚਤਾ’’ਤਿਆਦਿਮਾਹ. ਤਤ੍ਥ ਅਗ੍ਗਵਿਜ੍ਜਾਤਿ ਆਸਵਕ੍ਖਯਞਾਣਂ, ਅਗ੍ਗਮਗ੍ਗਞਾਣਮੇਵ ਵਾ ਵੇਦਿਤਬ੍ਬਂ. ਸਾ ਚ ਤੇਵਿਜ੍ਜਤਾਤਿ ਯੋਜਨਾ.

੨੨. ਤਤ੍ਥੇਵਾਤਿ ਸਚ੍ਚਾਭਿਸਮ੍ਬੋਧੇ ਏਵ.

੨੪. ਤਨ੍ਤਿ ਨਿਰੋਧਸਮਾਪਤ੍ਤਿਲਾਭਿਨੋ ਉਭਤੋਭਾਗਵਿਮੁਤ੍ਤਤਾਵਚਨਂ. ਵੁਤ੍ਤਲਕ੍ਖਣੂਪਪਤ੍ਤਿਕੋਤਿ ਦ੍ਵੀਹਿ ਭਾਗੇਹਿ ਦ੍ਵੇ ਵਾਰੇ ਵਿਮੁਤ੍ਤੋਤਿ ਏਵਂ ਵੁਤ੍ਤਲਕ੍ਖਣੇਨ ਉਪਪਤ੍ਤਿਤੋ ਯੁਤ੍ਤਿਤੋ ਸਮਨ੍ਨਾਗਤੋ. ਏਸੇਵ ਨਯੋਤਿ ਯਥਾ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਨਿਰੋਧਤੋ ਚ ਵੁਟ੍ਠਾਯ ਅਰਹਤ੍ਤਂ ਪਤ੍ਤਾਨਂ ਵਸੇਨ ਪਞ੍ਚ ਉਭਤੋਭਾਗਵਿਮੁਤ੍ਤਾ ਵੁਤ੍ਤਾ, ਤਥਾ ਸੇਕ੍ਖਭਾਵਂ ਪਤ੍ਤਾਨਂ ਵਸੇਨ ਪਞ੍ਚ ਕਾਯਸਕ੍ਖਿਨੋ ਹੋਨ੍ਤੀਤਿ ਕਤ੍ਵਾ ਵੁਤ੍ਤਂ.

ਦਸ੍ਸਨਕਾਰਣਾਤਿ ਇਮਿਨਾ ‘‘ਦਿਸ੍ਵਾ’’ਤਿ ਏਤ੍ਥ ਤ੍ਵਾ-ਸਦ੍ਦੋ ਹੇਤੁਅਤ੍ਥੋਤਿ ਦਸ੍ਸੇਤਿ ਯਥਾ ‘‘ਸੀਹਂ ਦਿਸ੍ਵਾ ਭਯਂ ਹੋਤੀ’’ਤਿਆਦੀਸੁ. ਦਸ੍ਸਨੇ ਸਤਿ ਪਰਿਕ੍ਖਯੋ, ਨਾਸਤੀਤਿ ਆਹ ‘‘ਦਸ੍ਸਨਾਯਤ੍ਤਪਰਿਕ੍ਖਯਤ੍ਤਾ’’ਤਿ. ਪੁਰਿਮਕਿਰਿਯਾਤਿ ਆਸਵਾਨਂ ਖਯਕਿਰਿਯਾਯ ਪੁਰਿਮਕਿਰਿਯਾ. ਸਮਾਨਕਾਲਤ੍ਤੇਪਿ ਹਿ ਕਾਰਣਕਿਰਿਯਾ ਫਲਕਿਰਿਯਾਯ ਪੁਰਿਮਸਿਦ੍ਧਾ ਵਿਯ ਵੋਹਰੀਯਤਿ. ਤਤੋ ਨਾਮਕਾਯਤੋ ਮੁਚ੍ਚਨਤੋ. ਯਤੋ ਹਿ ਯੇਨ ਮੁਚ੍ਚਿਤਬ੍ਬਂ, ਤਂ ਨਿਸ੍ਸਿਤੋ ਹੋਤੀਤਿ ਵੁਤ੍ਤਂ ‘‘ਨਾਮਨਿਸ੍ਸਿਤਕੋ’’ਤਿ. ਤਸ੍ਸਾਤਿ ਕਾਯਦ੍ਵਯਵਿਮੁਤ੍ਤਿਯਾ ਉਭਤੋਭਾਗਵਿਮੁਤ੍ਤਭਾਵਸ੍ਸ. ਅਰੂਪਲੋਕੇ ਹਿ ਠਿਤਾਰਹਨ੍ਤਵਸੇਨਾਯਮਤ੍ਥੋ ਵੁਤ੍ਤੋ. ਤੇਨਾਹ ‘‘ਸੁਤ੍ਤੇ ਹੀ’’ਤਿਆਦਿ.

ਦ੍ਵੀਹਿ ਭਾਗੇਹੀਤਿ ਵਿਕ੍ਖਮ੍ਭਨਸਮੁਚ੍ਛੇਦਭਾਗੇਹਿ. ਦ੍ਵੇ ਵਾਰੇਤਿ ਕਿਲੇਸਾਨਂ ਵਿਕ੍ਖਮ੍ਭਨਸਮੁਚ੍ਛਿਨ੍ਦਨਵਸੇਨ ਦ੍ਵਿਕ੍ਖਤ੍ਤੁਂ. ਕਿਲੇਸੇਹਿ ਵਿਮੁਤ੍ਤੋਤਿ ਇਦਂ ਪਠਮਤਤਿਯਵਾਦਾਨਂ ਵਸੇਨ ਵੁਤ੍ਤਂ, ਇਤਰਂ ਦੁਤਿਯਵਾਦਸ੍ਸ. ਅਰੂਪਜ੍ਝਾਨਂ ਯਦਿਪਿ ਰੂਪਸਞ੍ਞਾਦੀਹਿ ਵਿਮੁਤ੍ਤਂ ਤਂਸਮਤਿਕ੍ਕਮਾਦਿਨਾ ਪਤ੍ਤਬ੍ਬਤ੍ਤਾ, ਪਵਤ੍ਤਿਨਿਵਾਰਕੇਹਿ ਪਨ ਕਾਮਚ੍ਛਨ੍ਦਾਦੀਹਿਯੇਵਸ੍ਸ ਵਿਮੁਤ੍ਤਿ ਸਾਤਿਸਯਾਤਿ ਦਸ੍ਸੇਨ੍ਤੋ ‘‘ਨੀਵਰਣਸਙ੍ਖਾਤਨਾਮਕਾਯਤੋ ਵਿਮੁਤ੍ਤ’’ਨ੍ਤਿ ਆਹ. ਯਞ੍ਚਾਪਿ ਅਰੂਪਜ੍ਝਾਨਂ ਰੂਪਲੋਕੇ ਵਿਵੇਕਟ੍ਠਤਾਵਸੇਨਪਿ ਰੂਪਕਾਯਤੋ ਵਿਮੁਤ੍ਤਂ, ਤਂ ਪਨ ਰੂਪਪਟਿਬਨ੍ਧਛਨ੍ਦਰਾਗਵਿਕ੍ਖਮ੍ਭਨੇਨੇਵ ਹੋਤੀਤਿ ਵਿਕ੍ਖਮ੍ਭਨਮੇਵ ਪਧਾਨਨ੍ਤਿ ਵੁਤ੍ਤਂ ‘‘ਰੂਪਤਣ੍ਹਾਵਿਕ੍ਖਮ੍ਭਨੇਨ ਰੂਪਕਾਯਤੋ ਚ ਵਿਮੁਤ੍ਤਤ੍ਤਾ’’ਤਿ. ਏਕਦੇਸੇਨ ਉਭਤੋਭਾਗਵਿਮੁਤ੍ਤਂ ਨਾਮ ਹੋਤਿ ਸਮੁਚ੍ਛੇਦਵਿਮੁਤ੍ਤਿਯਾ ਅਭਾਵਾ.

੨੫. ‘‘ਸਤ੍ਤਿਸਯੋ’’ਤਿ ਵਿਯ ਸਮੁਦਾਯੇ ਪਵਤ੍ਤੋ ਵੋਹਾਰੋ ਅਵਯਵੇਪਿ ਦਿਸ੍ਸਤੀਤਿ ਦਸ੍ਸੇਨ੍ਤੋ ਆਹ ‘‘ਅਟ੍ਠਵਿਮੋਕ੍ਖੇਕਦੇਸੇਨ…ਪੇ… ਵੁਚ੍ਚਤੀ’’ਤਿ.

੨੬. ਫੁਟ੍ਠਾਨਨ੍ਤਿ ਫਸ੍ਸਿਤਾਨਂ, ਅਧਿਗਤਾਨਨ੍ਤਿ ਅਤ੍ਥੋ. ਅਨ੍ਤੋਤਿ ਅਨ੍ਤਸਦਿਸੋ ਫਸ੍ਸਨਾਯ ਪਰਕਾਲੋ. ਤਦਨਨ੍ਤਰੋ ਹਿ ਤਪ੍ਪਰਿਯੋਸਾਨੋ ਵਿਯ ਹੋਤੀਤਿ. ਕਾਲਵਿਸਯੋ ਚਾਯਂ ਅਨ੍ਤ-ਸਦ੍ਦੋ, ਨ ਪਨ ਕਾਲਤ੍ਥੋ. ਤੇਨਾਹ ‘‘ਅਧਿਪ੍ਪਾਯੋ’’ਤਿ. ਨਾਮਕਾਯੇਕਦੇਸਤੋਤਿ ਨੀਵਰਣਸਙ੍ਖਾਤਨਾਮਕਾਯੇਕਦੇਸਤੋ. ਆਲੋਚਿਤੋ ਪਕਾਸਿਤੋ ਵਿਯ ਹੋਤਿ ਵਿਬਨ੍ਧਵਿਕ੍ਖਮ੍ਭਨੇਨ ਆਲੋਚਨੇ ਪਕਾਸਨੇ ਸਮਤ੍ਥਸ੍ਸ ਞਾਣਚਕ੍ਖੁਨੋ ਅਧਿਟ੍ਠਾਨਸਮੁਪ੍ਪਾਦਨਤੋ. ਨ ਤੁ ਵਿਮੁਤ੍ਤੋਤਿ ਵਿਮੁਤ੍ਤੋਤਿ ਨ ਵੁਚ੍ਚਤੇਵ.

੨੮. ਇਮਂ ਪਨ ਨਯਨ੍ਤਿ ‘‘ਅਪਿਚ ਤੇਸ’’ਨ੍ਤਿਆਦਿਨਾ ਆਗਤਵਿਧਿਂ. ਯੇਨ ਵਿਸੇਸੇਨਾਤਿ ਯੇਨ ਕਾਰਣਵਿਸੇਸੇਨ. ਸੋਤਿ ਦਿਟ੍ਠਿਪ੍ਪਤ੍ਤਸਦ੍ਧਾਵਿਮੁਤ੍ਤਾਨਂ ਯਥਾਵੁਤ੍ਤੋ ਪਞ੍ਞਾਯ ਵਿਸੇਸੋ. ਪਟਿਕ੍ਖੇਪੋ ਕਤੋ ਕਾਰਣਸ੍ਸ ਅਵਿਭਾਵਿਤਤ੍ਤਾ. ਉਭਤੋਭਾਗਵਿਮੁਤ੍ਤੋ ਵਿਯ, ਪਞ੍ਞਾਵਿਮੁਤ੍ਤੋ ਵਿਯ ਵਾ ਸਬ੍ਬਥਾ ਅਵਿਮੁਤ੍ਤਸ੍ਸ ਸਾਵਸੇਸਵਿਮੁਤ੍ਤਿਯਮ੍ਪਿ ਦਿਟ੍ਠਿਪ੍ਪਤ੍ਤਸ੍ਸ ਵਿਯ ਪਞ੍ਞਾਯ ਸਾਤਿਸਯਾਯ ਅਭਾਵਤੋ ਸਦ੍ਧਾਮਤ੍ਤੇਨ ਵਿਮੁਤ੍ਤਭਾਵੋ ਦਟ੍ਠਬ੍ਬੋ. ਸਦ੍ਧਾਯ ਅਧਿਮੁਤ੍ਤੋਤਿ ਇਦਂ ਆਗਮਨਵਸੇਨ ਸਦ੍ਧਾਯ ਅਧਿਕਭਾਵਂ ਸਨ੍ਧਾਯ ਵੁਤ੍ਤਂ, ਮਗ੍ਗਾਧਿਗਮਤੋ ਪਨਸ੍ਸ ਪਚ੍ਚਕ੍ਖਮੇਵ ਞਾਣਦਸ੍ਸਨਂ.

੩੧. ‘‘ਸੋਤੋਤਿ ਅਰਿਯਮਗ੍ਗਸ੍ਸ ਨਾਮ’’ਨ੍ਤਿ ਨਿਪ੍ਪਰਿਯਾਯੇਨ ਤਂਸਮਙ੍ਗੀ ਸੋਤਾਪਨ੍ਨੋਤਿ ਅਧਿਪ੍ਪਾਯੇਨ ਚੋਦਕੋ ‘‘ਅਪਿ-ਸਦ੍ਦੋ ਕਸ੍ਮਾ ਵੁਤ੍ਤੋ’’ਤਿ ਚੋਦਨਂ ਉਟ੍ਠਾਪੇਤ੍ਵਾ ‘‘ਨਨੂ’’ਤਿਆਦਿਨਾ ਅਤ੍ਤਨੋ ਅਧਿਪ੍ਪਾਯਂ ਵਿਵਰਤਿ. ਇਤਰੋ ‘‘ਨਾਪਨ੍ਨ’’ਨ੍ਤਿਆਦਿਨਾ ਪਰਿਹਰਤਿ. ਸਮਨ੍ਨਾਗਤੋ ਏਵ ਨਾਮ ਲੋਕੁਤ੍ਤਰਧਮ੍ਮਾਨਂ ਅਕੁਪ੍ਪਸਭਾਵਤ੍ਤਾ. ਇਤਰੇਹੀਤਿ ਦੁਤਿਯਮਗ੍ਗਟ੍ਠਾਦੀਹਿ. ਸੋ ਏਵਾਤਿ ਪਠਮਫਲਟ੍ਠੋ ਏਵ. ਇਧਾਤਿ ਇਮਸ੍ਮਿਂ ਸਤ੍ਤਕ੍ਖਤ੍ਤੁਪਰਮਨਿਦ੍ਦੇਸੇ. ਸੋਤਂ ਵਾ ਅਰਿਯਮਗ੍ਗਂ ਆਦਿਤੋ ਪਨ੍ਨੋ ਅਧਿਗਤੋਤਿ ਸੋਤਾਪਨ੍ਨੋਤਿ ਵੁਚ੍ਚਮਾਨੇ ਦੁਤਿਯਮਗ੍ਗਟ੍ਠਾਦੀਨਂ ਨਤ੍ਥੇਵ ਸੋਤਾਪਨ੍ਨਭਾਵਾਪਤ੍ਤਿ. ਸੁਤ੍ਤੇ ਪਨ ਸੋਤਂ ਅਰਿਯਮਗ੍ਗਂ ਆਦਿਤੋ ਮਰਿਯਾਦਂ ਅਮੁਞ੍ਚਿਤ੍ਵਾਵ ਪਨ੍ਨੋ ਪਟਿਪਜ੍ਜਤੀਤਿ ਕਤ੍ਵਾ ਮਗ੍ਗਸਮਙ੍ਗੀ ‘‘ਸੋਤਾਪਨ੍ਨੋ’’ਤਿ ਵੁਤ੍ਤੋ. ਪਰਿਯਾਯੇਨ ਇਤਰੋਪਿ ਤਸ੍ਸ ਅਪਰਿਹਾਨਧਮ੍ਮਤ੍ਤਾ ਸੋਤਾਪਨ੍ਨੋਤਿ ਵੇਦਿਤਬ੍ਬਂ. ਪਹੀਨਾਵਸਿਟ੍ਠਕਿਲੇਸਪਚ੍ਚਵੇਕ੍ਖਣਾਯ ਸਮੁਦਯਸਚ੍ਚਂ ਵਿਯ ਦੁਕ੍ਖਸਚ੍ਚਮ੍ਪਿ ਪਚ੍ਚਵੇਕ੍ਖਿਤਂ ਹੋਤਿ ਸਚ੍ਚਦ੍ਵਯਪਰਿਯਾਪਨ੍ਨਤ੍ਤਾ ਕਿਲੇਸਾਨਨ੍ਤਿ ਆਹ ‘‘ਚਤੁਸਚ੍ਚਪਚ੍ਚਵੇਕ੍ਖਣਾਦੀਨ’’ਨ੍ਤਿ. ਆਦਿ-ਸਦ੍ਦੇਨ ਫਲਪਚ੍ਚਵੇਕ੍ਖਣਉਪਰਿਮਗ੍ਗਫਲਧਮ੍ਮੇ ਚ ਸਙ੍ਗਣ੍ਹਾਤਿ.

੩੨. ਮਹਾਕੁਲਮੇਵਾਤਿ ਉਲ਼ਾਰਕੁਲਮੇਵ ਵੁਚ੍ਚਤਿ ‘‘ਕੁਲੀਨੋ ਕੁਲਪੁਤ੍ਤੋ’’ਤਿਆਦੀਸੁ ਵਿਯ.

੩੩. ਸਜ੍ਝਾਨਕੋ ਅਪਰਿਹੀਨਜ੍ਝਾਨੋ ਕਾਲਕਤੋ ਬ੍ਰਹ੍ਮਲੋਕੂਪਗੋ ਹੁਤ੍ਵਾ ਵਟ੍ਟਜ੍ਝਾਸਯੋ ਚੇ, ਉਪਰੂਪਰਿ ਨਿਬ੍ਬਤ੍ਤਿਤ੍ਵਾ ਨਿਬ੍ਬਾਯਤੀਤਿ ਆਹ ‘‘ਅਨਾਗਾਮਿਸਭਾਗੋ’’ਤਿ. ਯਤੋ ਸੋ ਝਾਨਾਨਾਗਾਮੀਤਿ ਵੁਚ੍ਚਤਿ. ਤੇਨਾਹ ‘‘ਅਨਾਵਤ੍ਤਿਧਮ੍ਮੋ’’ਤਿ.

੩੬. ਪਰਯੋਗੇ ਤ੍ਵਾ-ਸਦ੍ਦੋ ਤਦਨ੍ਤੋ ਹੁਤ੍ਵਾ ‘‘ਪਰਸਦ੍ਦਯੋਗੇ’’ਤਿ ਵੁਤ੍ਤੋ, ਅਪ੍ਪਤ੍ਵਾਤਿ ਵੁਤ੍ਤਂ ਹੋਤੀਤਿ ‘‘ਅਪ੍ਪਤ੍ਤਂ ਹੁਤ੍ਵਾ’’ਤਿ ਇਮਿਨਾ ਵੁਚ੍ਚਤਿ.

੩੭. ਤੇਨਾਤਿ ‘‘ਉਪਹਚ੍ਚਾ’’ਤਿ ਪਦੇਨ. ਨਨੁ ਚ ਵੇਮਜ੍ਝਾਤਿਕ੍ਕਮੋ ‘‘ਅਤਿਕ੍ਕਮਿਤ੍ਵਾ ਵੇਮਜ੍ਝ’’ਨ੍ਤਿ ਇਮਿਨਾ ਪਕਾਸਿਤੋ ਹੋਤੀਤਿ ਅਧਿਪ੍ਪਾਯੋ.

੪੦. ਤਣ੍ਹਾਵਟ੍ਟਸੋਤਾ ਤਣ੍ਹਾਵਟ੍ਟਬਨ੍ਧਾ. ਤਸ੍ਸਾਤਿ ਸੋਤਸ੍ਸ. ਸਮ੍ਬਨ੍ਧੇ ਚੇਤਂ ਸਾਮਿਵਚਨਂ. ਉਦ੍ਧਂਸੋਤਸ੍ਸ ਉਪਰਿਭਵੂਪਗਤਾ ਏਕਂਸਿਕਾਤਿ ਆਹ ‘‘ਯਤ੍ਥ ਵਾ ਤਤ੍ਥ ਵਾ ਗਨ੍ਤ੍ਵਾ’’ਤਿ. ਤਸ੍ਸਾਤਿ ਉਦ੍ਧਂਸੋਤਸ੍ਸ. ਤਤ੍ਥਾਤਿ ਅਵਿਹੇਸੁ. ਲਹੁਸਾਲਹੁਸਗਤਿਕਾਤਿ ਲਹੁਕਾਲਹੁਕਾਯੁਗਤਿਕਾ, ਲਹੁਕਾਲਹੁਕਞਾਣਗਤਿਕਾ ਵਾ. ਉਪ੍ਪਜ੍ਜਿਤ੍ਵਾਵ ਨਿਬ੍ਬਾਯਨਕਾਦੀਹੀਤਿ ਆਦਿ-ਸਦ੍ਦੇਨ ‘‘ਆਕਾਸਂ ਲਙ੍ਘਿਤ੍ਵਾ ਨਿਬ੍ਬਾਯਤੀ’’ਤਿਆਦਿਨਾ ਵੁਤ੍ਤਾ ਤਿਸ੍ਸੋ ਉਪਮਾ ਸਙ੍ਗਣ੍ਹਾਤਿ. ਅਨ੍ਤਰਾਉਪਹਚ੍ਚਪਰਿਨਿਬ੍ਬਾਯੀਹਿ ਅਧਿਮਤ੍ਤਤਾ, ਉਦ੍ਧਂਸੋਤਤੋ ਅਨਧਿਮਤ੍ਤਤਾ ਚ ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯੀਨਂ ਨ ਵੇਦਿਤਬ੍ਬਾਤਿ ਯੋਜਨਾ. ਤੇ ਏਵਾਤਿ ਅਨ੍ਤਰਾਉਪਹਚ੍ਚਪਰਿਨਿਬ੍ਬਾਯਿਉਦ੍ਧਂਸੋਤਾ ਏਵ. ਯਦਿ ਏਵਂ ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯੀਨਂ ਉਪਮਾਵਚਨੇਨ ਤਤੋ ਮਹਨ੍ਤਤਰੇਹਿ ਕਸ੍ਮਾ ਵੁਤ੍ਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਤਤੋ ਮਹਨ੍ਤ…ਪੇ… ਦਸ੍ਸਨਤ੍ਥ’’ਨ੍ਤਿ.

ਤੇਨਾਤਿ ‘‘ਨੋ ਚਸ੍ਸ, ਨੋ ਚ ਮੇ ਸਿਯਾ’’ਤਿ ਵਚਨੇਨ. ਤੇਨਾਤਿ ਵਾ ਯਥਾਵੁਤ੍ਤੇਨ ਤਸ੍ਸ ਅਤ੍ਥਵਚਨੇਨ. ਇਮਸ੍ਸ ਦੁਕ੍ਖਸ੍ਸਾਤਿ ਇਮਸ੍ਸ ਸਮ੍ਪਤਿ ਵਤ੍ਤਮਾਨਸ੍ਸ ਵਿਞ੍ਞਾਣਾਦਿਦੁਕ੍ਖਸ੍ਸ. ਉਦਯਦਸ੍ਸਨਂ ਞਾਣਂ. ਚਤੂਹਿਪੀਤਿ ‘‘ਨੋ ਚਸ੍ਸਾ’’ਤਿ ਚਤੂਹਿ ਪਦੇਹਿ. ਯਂ ਅਤ੍ਥੀਤਿ ਯਂ ਪਰਮਤ੍ਥਤੋ ਵਿਜ੍ਜਤਿ. ਤੇਨਾਹ ‘‘ਭੂਤਨ੍ਤਿ ਸਸਭਾਵ’’ਨ੍ਤਿ, ਭੂਤਨ੍ਤਿ ਖਨ੍ਧਪਞ੍ਚਕਨ੍ਤਿ ਅਤ੍ਥੋ. ਯਥਾਹ ‘‘ਭੂਤਮਿਦਨ੍ਤਿ, ਭਿਕ੍ਖਵੇ, ਸਮਨੁਪਸ੍ਸਥਾ’’ਤਿ. ਵਿਵਟ੍ਟਮਾਨਸੋ ਵਿਵਿਚ੍ਚਮਾਨਹਦਯੋ ਤਣ੍ਹਾਦਿਸੋਤਤੋ ਨਿਵਤ੍ਤਜ੍ਝਾਸਯੋ. ਉਪੇਕ੍ਖਕੋ ਹੋਤੀਤਿ ਚਤ੍ਤਭਰਿਯੋ ਵਿਯ ਪੁਰਿਸੋ ਭਯਂ ਨਨ੍ਦਿਞ੍ਚ ਪਹਾਯ ਉਦਾਸਿਨੋ ਹੋਤਿ.

ਅਵਿਸਿਟ੍ਠੇਤਿ ਹੀਨੇ. ਵਿਸਿਟ੍ਠੇਤਿ ਉਤ੍ਤਮੇ. ‘‘ਭਵੇ’’ਤਿ ਵਤ੍ਵਾ ‘‘ਸਮ੍ਭਵੇ’’ਤਿ ਵੁਚ੍ਚਮਾਨਂ ਅਵੁਤ੍ਤਵਾਚਕਂ ਹੋਤੀਤਿ ਦਸ੍ਸੇਨ੍ਤੋ ‘‘ਪਚ੍ਚੁਪ੍ਪਨ੍ਨੋ’’ਤਿਆਦਿਮਾਹ. ਭੂਤਮੇਵ ਵੁਚ੍ਚਤੀਤਿ ਯਂ ਭੂਤਨ੍ਤਿ ਵੁਚ੍ਚਤਿ, ਤਦੇਵ ਭਵੋਤਿ ਚ ਵੁਚ੍ਚਤਿ, ਭਵਤਿ ਅਹੋਸੀਤਿ ਵਾ. ਸਮ੍ਭਵਤਿ ਏਤਸ੍ਮਾਤਿ ਸਮ੍ਭਵੋ. ਤਦਾਹਾਰੋ ਤਸ੍ਸ ਭਵਸ੍ਸ ਪਚ੍ਚਯੋ. ਅਨੁਕ੍ਕਮੇਨ ਮਗ੍ਗਪਞ੍ਞਾਯਾਤਿ ਵਿਪਸ੍ਸਨਾਨੁਕ੍ਕਮੇਨ ਲਦ੍ਧਾਯ ਅਰਿਯਮਗ੍ਗਪਞ੍ਞਾਯ. ਤੇਨਾਤਿ ਸੇਕ੍ਖੇਨ.

ਏਕਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੨. ਦੁਕਨਿਦ੍ਦੇਸਵਣ੍ਣਨਾ

੬੩. ਕਸ੍ਸਚੀਤਿ ਕਸ੍ਸਚਿਪਿ. ਕਥਞ੍ਚੀਤਿ ਕੇਨਚਿ ਪਕਾਰੇਨ, ਵਿਕ੍ਖਮ੍ਭਨਮਤ੍ਤੇਨਾਪੀਤਿ ਵੁਤ੍ਤਂ ਹੋਤਿ. ਅਜ੍ਝਤ੍ਤਗ੍ਗਹਣਸ੍ਸਾਤਿ ਅਤ੍ਤਾਨਂ ਅਧਿਕਿਚ੍ਚ ਉਦ੍ਦਿਸ੍ਸ ਪਵਤ੍ਤਗ੍ਗਾਹਸ੍ਸ.

੮੩. ਪੁਰਿਮਗ੍ਗਹਿਤਨ੍ਤਿ ‘‘ਕਰਿਸ੍ਸਤਿ ਮੇ’’ਤਿਆਦਿਨਾ ਚਿਤ੍ਤੇਨ ਪਠਮਂ ਗਹਿਤਂ. ਤਂ ਕਤਨ੍ਤਿ ਤਂ ਤਾਦਿਸਂ ਉਪਕਾਰਂ. ਪੁਞ੍ਞਫਲਂ ਉਪਜੀਵਨ੍ਤੋ ਕਤਞ੍ਞੁਪਕ੍ਖੇ ਤਿਟ੍ਠਤੀਤਿ ਵੁਤ੍ਤਂ ‘‘ਪੁਞ੍ਞਫਲਂ ਅਨੁਪਜੀਵਨ੍ਤੋ’’ਤਿ.

੯੦. ਗੁਣਪਾਰਿਪੂਰਿਯਾ ਪਰਿਪੁਣ੍ਣੋ ਯਾਵਦਤ੍ਥੋ ਇਧ ਤਿਤ੍ਤੋਤਿ ਆਹ ‘‘ਨਿਟ੍ਠਿਤਕਿਚ੍ਚਤਾਯ ਨਿਰੁਸ੍ਸੁਕ੍ਕੋ’’ਤਿ.

ਦੁਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੩. ਤਿਕਨਿਦ੍ਦੇਸਵਣ੍ਣਨਾ

੯੧. ਸੇਸਸਂਵਰਭੇਦੇਨਾਤਿ ਕਾਯਿਕਵਾਚਸਿਕਵੀਤਿਕ੍ਕਮਤੋ ਸੇਸੇਨ ਸਂਵਰਵਿਨਾਸੇਨ. ਸੋ ਪਨ ਦ੍ਵਾਰਵਸੇਨ ਵੁਚ੍ਚਮਾਨੋ ਮਨੋਦ੍ਵਾਰਿਕੋ ਹੋਤੀਤਿ ਆਹ ‘‘ਮਨੋਸਂਵਰਭੇਦੇਨਾ’’ਤਿ. ਇਦਾਨਿ ਤਂ ਪਕਾਰਭੇਦੇਨ ਦਸ੍ਸੇਨ੍ਤੋ ‘‘ਸਤਿਸਂਵਰਾਦਿਭੇਦੇਨ ਵਾ’’ਤਿ ਆਹ, ਮੁਟ੍ਠਸਚ੍ਚਾਦਿਪ੍ਪਵਤ੍ਤਿਯਾਤਿ ਅਤ੍ਥੋ. ਯਂ ਕਿਞ੍ਚਿ ਸਭਾਵਭੂਤਂ ਚਰਿਤਮ੍ਪਿ ‘‘ਸੀਲ’’ਨ੍ਤਿ ਵੁਚ੍ਚਤੀਤਿ ਅਕੁਸਲਸ੍ਸਪਿ ਸੀਲਪਰਿਯਾਯੋ ਵੁਤ੍ਤੋ.

੯੪. ਸਮਾਨਵਿਸਯਾਨਨ੍ਤਿ ਪਠਮਫਲਾਦਿਕੋ ਸਮਾਨੋ ਏਵਰੂਪੋ ਵਿਸਯੋ ਏਤੇਸਨ੍ਤਿ ਸਮਾਨਵਿਸਯਾ, ਤੇਸਂ.

੧੦੭. ਤਦਤ੍ਥੋ ਤਪ੍ਪਯੋਜਨੋ ਲੋਕੁਤ੍ਤਰਸਾਧਕੋਤਿ ਅਤ੍ਥੋ. ਤਸ੍ਸ ਪਰਮਤ੍ਥਸਾਸਨਸ੍ਸ. ਮੂਲੇਕਦੇਸਤ੍ਤਾਤਿ ਮੂਲਭਾਵੇਨ ਏਕਦੇਸਤ੍ਤਾ.

੧੧੮. ਉਨ੍ਨਲ਼ੋ ਉਗ੍ਗਤਤੁਚ੍ਛਮਾਨੋ.

੧੨੩. ਸੀਲਸ੍ਸ ਅਨੁਗ੍ਗਣ੍ਹਨਂ ਅਪਰਿਸੁਦ੍ਧਿਯਂ ਸੋਧਨਂ ਅਪਾਰਿਪੂਰਿਯਂ ਪੂਰਣਞ੍ਚਾਤਿ ਆਹ ‘‘ਸੋਧੇਤਬ੍ਬੇ ਚ ਵਡ੍ਢੇਤਬ੍ਬੇ ਚਾ’’ਤਿ. ਅਧਿਸੀਲਂ ਨਿਸ੍ਸਾਯਾਤਿ ਅਧਿਸੀਲਂ ਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਪਞ੍ਞਾਯ.

੧੨੪. ਗੂਥਸਦਿਸਤ੍ਤਮੇਵ ਦਸ੍ਸੇਤਿ, ਨ ਗੂਥਕੂਪਸਦਿਸਤ੍ਤਨ੍ਤਿ ਅਧਿਪ੍ਪਾਯੋ. ਗੂਥਵਸੇਨੇਵ ਹਿ ਕੂਪਸ੍ਸਪਿ ਜਿਗੁਚ੍ਛਨੀਯਤਾਤਿ. ਅਯਞ੍ਚ ਅਤ੍ਥੋ ਗੂਥਰਾਸਿਯੇਵ ਗੂਥਕੂਪੋਤਿ ਇਮਸ੍ਮਿਂ ਪਕ੍ਖੇ ਨਵਤ੍ਤਬ੍ਬੋ ਸਿਯਾ.

੧੩੦. ਸਰਭਙ੍ਗਸਤ੍ਥਾਰਾਦਯੋ ਰੂਪਭਵਾਦਿਕਾਮਾਦਿਪਰਿਞ੍ਞਂ ਕਤ੍ਵਾ ਪਞ੍ਞਪੇਨ੍ਤੋ ਲੋਕਿਯਂ ਪਰਿਞ੍ਞਂ ਸਮ੍ਮਦੇਵ ਪਞ੍ਞਪੇਨ੍ਤੀਤਿ ਆਹ ‘‘ਯੇਭੁਯ੍ਯੇਨ ਨ ਸਕ੍ਕੋਨ੍ਤੀ’’ਤਿ. ਅਸਮਤ੍ਥਭਾਵਂ ਵਾ ਸਨ੍ਧਾਯ ਨੋ ਚ ਪਞ੍ਞਾਪੇਤੁਂ ਸਕ੍ਕੋਨ੍ਤੀਤਿ ਵੁਤ੍ਤਨ੍ਤਿ ਯੋਜਨਾ.

ਤਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪. ਚਤੁਕ੍ਕਨਿਦ੍ਦੇਸਵਣ੍ਣਨਾ

੧੩੩. ਪਰੇਨਾਤਿ ਅਞ੍ਞੇਨ, ਆਣਤ੍ਤੇਨਾਤਿ ਅਤ੍ਥੋ. ਆਣਤ੍ਤਿਯਾ ਅਤ੍ਤਨਾ ਚਾਤਿ ਆਣਾਪਕਸ੍ਸ ਆਣਤ੍ਤਿਯਾ, ਅਤ੍ਤਨਾ ਚ ਆਣਤ੍ਤੇਨ ਕਤਂ ਤਞ੍ਚ ਤਸ੍ਸ ਆਣਾਪਕਸ੍ਸ ਯਂ ਵਚੀਪਯੋਗੇਨ ਕਤਨ੍ਤਿ ਯੋਜਨਾ. ਆਣਤ੍ਤਿਯਾ ਪਾਪਸ੍ਸਾਤਿ ਆਣਾਪਨਵਸੇਨ ਪਸੁਤਪਾਪਸ੍ਸ.

੧੪੮. ਦੇਸਨਾਯ ਕਰਣਭੂਤਾਯ. ਧਮ੍ਮਾਨਨ੍ਤਿ ਦੇਸਨਾਯ ਯਥਾਬੋਧੇਤਬ੍ਬਾਨਂ ਸੀਲਾਦਿਧਮ੍ਮਾਨਂ.

੧੫੨. ਅਨਨ੍ਤਰਨ੍ਤਿ ਞਾਣਸ੍ਸ ਉਪਟ੍ਠਿਤਨ੍ਤਿ ਅਨਨ੍ਤਰਂ ਵੁਤ੍ਤਂ. ਕਿਂ ਪਨ ਤਨ੍ਤਿ ਆਹ ‘‘ਵਚਨ’’ਨ੍ਤਿ. ਲੁਜ੍ਜਤੀਤਿ ਇਦਂ ਯੇਨ ਕਾਰਣੇਨ ਲੋਕ-ਸਦ੍ਦੋ ਤਦਤ੍ਥੇ ਪਵਤ੍ਤੋ, ਤਂ ਦਸ੍ਸੇਤੀਤਿ ਆਹ ‘‘ਕਾਰਣਯੁਤ੍ਤ’’ਨ੍ਤਿ.

੧੫੬. ਸਹਿਤਾਸਹਿਤਸ੍ਸਾਤਿ ਕੁਸਲਸਦ੍ਦਯੋਗੇਨ ਸਾਮਿਵਚਨਂ ਭੁਮ੍ਮਤ੍ਥੇਤਿ ਦਸ੍ਸੇਨ੍ਤੋ ਆਹ ‘‘ਸਹਿਤਾਸਹਿਤੇਤਿ ਅਤ੍ਥੋ’’ਤਿ. ਸਹਿਤਭਾਸਨੇਨ ਦੇਸਕਸਮ੍ਪਤ੍ਤਿ, ਸਹਿਤਾਸਹਿਤਕੋਸਲ੍ਲੇਨ ਸਾਵਕਸਮ੍ਪਤ੍ਤਿ ਵੇਦਿਤਬ੍ਬਾ. ਪਰਿਸਸਮ੍ਪਤ੍ਤਿਪਿ ਞਾਣਸਮ੍ਪਨ੍ਨਸ੍ਸ ਧਮ੍ਮਕਥਿਕਸ੍ਸ ਪਟਿਭਾਨਸਮ੍ਪਦਾਯ ਕਾਰਣਂ ਹੋਤੀਤਿ ਆਹ ‘‘ਸਾਵਕਸਮ੍ਪਤ੍ਤਿਯਾ ਬੋਧੇਤੁਂ ਸਮਤ੍ਥਤਾਯਾ’’ਤਿ.

੧੫੭. ਕੁਸਲਧਮ੍ਮੇਹੀਤਿ ਸਮਥਵਿਪਸ੍ਸਨਾਧਮ੍ਮੇਹਿ. ਚਤੁਤ੍ਥੋ ਵੁਤ੍ਤੋ, ਯੋ ਨੇਵ ਸਙ੍ਘਂ ਨਿਮਨ੍ਤੇਤਿ, ਨ ਦਾਨਂ ਦੇਤਿ.

੧੬੬. ਯਮਿਦਂ ‘‘ਕਾਲੇਨਾ’’ਤਿ ਵੁਤ੍ਤਨ੍ਤਿ ‘‘ਯੋ ਤਤ੍ਥ ਅਵਣ੍ਣੋ, ਤਮ੍ਪਿ ਭਣਤਿ ਕਾਲੇਨ. ਯੋਪਿ ਤਤ੍ਥ ਵਣ੍ਣੋ, ਤਮ੍ਪਿ ਭਣਤਿ ਕਾਲੇਨਾ’’ਤਿ ਯਂ ਇਦਂ ਪਾਲ਼ਿਯਂ ਵੁਤ੍ਤਂ, ਤਤ੍ਰ ਤਸ੍ਮਿਂ ਵਚਨੇ ਵਾਕ੍ਯੇ ਯੋ ਪੁਗ੍ਗਲੋ ‘‘ਕਾਲੇਨ ਭਣਤੀ’’ਤਿ ਵੁਤ੍ਤੋ, ਸੋ ਕੀਦਿਸੋਤਿ ਵਿਚਾਰਣਾਯ ਤਸ੍ਸ ਦਸ੍ਸਨਤ੍ਥਂ ‘‘ਕਾਲਞ੍ਞੂ ਹੋਤੀ’’ਤਿਆਦਿ ਪਾਲ਼ਿਯਂ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਸਙ੍ਗਹੇ ਆਹਾਤਿ ਯੋਜਨਾ.

੧੬੮. ਪੁਬ੍ਬੁਪ੍ਪਨ੍ਨਪਚ੍ਚਯਵਿਪਤ੍ਤੀਤਿ ਤਸ੍ਮਿਂ ਅਤ੍ਤਭਾਵੇ ਪਠਮੁਪ੍ਪਨ੍ਨਪਚ੍ਚਯਵਿਪਤ੍ਤਿ. ਤੇਸਂ ਵਿਪਤ੍ਤਿ ਪਵਤ੍ਤਪ੍ਪਚ੍ਚਯਵਿਪਤ੍ਤੀਤਿ ਯੋਜਨਾ.

੧੭੩. ਤੇਸਨ੍ਤਿ ਪਹੀਨਾਵਸਿਟ੍ਠਕਿਲੇਸਾਨਂ. ਵਿਮੁਤ੍ਤਿਦਸ੍ਸਨਮੇਵ ਹੋਤਿ ਵਿਮੁਤ੍ਤਿਅਤ੍ਥਤ੍ਤਾ ਤਂਦਸ੍ਸਨਸ੍ਸ.

੧੭੪. ਤਨ੍ਤਾਵੁਤਾਨਂ ਵਤ੍ਥਾਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ.

੧੭੮. ਨਾਮਕਾਯੋਤਿ ਨਾਮਸਮੂਹੋ. ਇਦਮੇਵ ਚ ਦ੍ਵਯਨ੍ਤਿ ਸੀਲਸਂਵਰਪੂਰਣਂ, ਸਾਜੀਵਾਵੀਤਿਕ੍ਕਮਨਞ੍ਚਾਤਿ ਇਦਮੇਵ ਦ੍ਵਯਂ. ਤਤੋਤਿ ਸਾਜੀਵਾਵੀਤਿਕ੍ਕਮਨਤੋ. ਕਥਾਯ ਹਲਿਦ੍ਦਰਾਗਾਦਿਸਦਿਸਤਾਤਿ ਯੋਜਨਾ. ਤੇਨਾਹ ‘‘ਨ ਪੁਗ੍ਗਲਸ੍ਸਾ’’ਤਿ.

੧੭੯. ਇਤਿ-ਸਦ੍ਦੇਨਾਤਿ ‘‘ਦਾਰੁਮਾਸਕੋ’’ਤਿ ਏਤ੍ਥ ਵੁਤ੍ਤਇਤਿ-ਸਦ੍ਦੇਨ. ਏਵਂਪਕਾਰੇਤਿ ਇਮਿਨਾਪਿ ਸਲਾਕਾਦਿਕੇ ਸਙ੍ਗਣ੍ਹਾਤਿ.

੧੮੧. ਅਵਿਸਟਸੁਖਨ੍ਤਿ ਅਵਿਕ੍ਖੇਪਸੁਖਂ.

੧੮੭. ਖਨ੍ਧਧਮ੍ਮੇਸੂਤਿ ਸਙ੍ਖਤਧਮ੍ਮੇਸੁ. ਤਦਲਾਭੇਨਾਤਿ ਮਗ੍ਗਫਲਾਲਾਭੇਨ. ਅਤ੍ਥੇਨਾਤਿ ਸੀਲਾਦਿਅਤ੍ਥੇਨ.

ਚਤੁਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੫. ਪਞ੍ਚਕਨਿਦ੍ਦੇਸਵਣ੍ਣਨਾ

੧੯੧. ਯਥਾ ਤੇਸੁ ਪਟਿਪਜ੍ਜਿਤਬ੍ਬਨ੍ਤਿ ਤੇਸੁ ਪਞ੍ਚਸੁ ਪੁਗ੍ਗਲੇਸੁ ਯਥਾਰਹਂ ਉਪਮੇਯ੍ਯੋਪਮਾਦਸ੍ਸਨਮੁਖੇਨ ਹਿਤੂਪਦੇਸਪਟਿਪਤ੍ਤਿਯਾ ਯਥਾ ਅਞ੍ਞੇਹਿ ਪਟਿਪਜ੍ਜਿਤਬ੍ਬਨ੍ਤਿ ਅਤ੍ਥੋ. ਕਿਰਿਯਾਵਾਚੀ ਆਰਮ੍ਭ-ਸਦ੍ਦੋ ਅਧਿਪ੍ਪੇਤੋ, ਨ ‘‘ਆਰਮ੍ਭਕਤ੍ਤੁਸ੍ਸ ਕਸਾਵਪੁਚ੍ਛਾ’’ਤਿਆਦੀਸੁ ਵਿਯ ਧਮ੍ਮਵਾਚੀਤਿ ਆਹ ‘‘ਆਰਮ੍ਭਕਿਰਿਯਾਵਾਚਕੋ ਸਦ੍ਦੋ’’ਤਿ. ‘‘ਨਿਰੁਜ੍ਝਨ੍ਤੀ’’ਤਿ ਵੁਤ੍ਤਤ੍ਤਾ ‘‘ਮਗ੍ਗਕਿਚ੍ਚਵਸੇਨਾ’’ਤਿ ਵੁਤ੍ਤਂ.

੧੯੨. ਗਹਣਂ ‘‘ਏਵਮੇਤ’’ਨ੍ਤਿ ਸਮ੍ਪਟਿਚ੍ਛਨਂ.

੧੯੯. ਨ ਏਵਂ ਸਮ੍ਬਨ੍ਧੋ ਅਸਮਾਨਜਾਤਿਕਤ੍ਤਾ.

ਪਞ੍ਚਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੬. ਛਕ੍ਕਨਿਦ੍ਦੇਸਵਣ੍ਣਨਾ

੨੦੨. ਇਦਂ ਸਚ੍ਚਾਭਿਸਮ੍ਬੋਧਾਦਿਕਂ ਸਙ੍ਗਹਿਤਂ ਹੋਤਿ ਫਲਸ੍ਸ ਹੇਤੁਨਾ ਅਵਿਨਾਭਾਵਤੋ. ਤੇਨਾਹ ‘‘ਸਾਮ’’ਨ੍ਤਿਆਦਿ. ਅਨਾਚਰਿਯਕੇਨ ਅਤ੍ਤਨਾ ਉਪ੍ਪਾਦਿਤੇਨਾਤਿ ਇਦਂ ਸਬ੍ਬਞ੍ਞੁਤਞ੍ਞਾਣੇ ਵਿਜ੍ਜਮਾਨਗੁਣਕਥਨਂ, ਨ ਤਬ੍ਬਿਧੁਰਧਮ੍ਮਨ੍ਤਰਨਿਵਤ੍ਤਨਂ ਤਥਾਰੂਪਸ੍ਸ ਅਞ੍ਞਸ੍ਸ ਅਭਾਵਤੋ. ਤੇਨਸ੍ਸ ਸਾਚਰਿਯਕਤਾ, ਪਰਤੋ ਚ ਉਪ੍ਪਤ੍ਤਿ ਪਟਿਕ੍ਖਿਤ੍ਤਾਤਿ ਇਮਮਤ੍ਥਮਾਹ ‘‘ਤਤ੍ਥਾ’’ਤਿਆਦਿਨਾ. ਤਤ੍ਥ ਸਾਚਰਿਯਕਤ੍ਤਂ ਪਰੂਪਦੇਸਹੇਤੁਕਤਾ, ਪਰਤੋ ਉਪ੍ਪਤ੍ਤਿ ਉਪਦੇਸੇਨ ਵਿਨਾਪਿ ਸਨ੍ਨਿਸ੍ਸਾਯ ਨਿਬ੍ਬਤ੍ਤੀਤਿ ਅਯਮੇਤੇਸਂ ਵਿਸੇਸੋ.

ਛਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੭. ਸਤ੍ਤਕਨਿਦ੍ਦੇਸਵਣ੍ਣਨਾ

੨੦੩. ਕੁਸਲੇਸੁ ਧਮ੍ਮੇਸੂਤਿ ਆਧਾਰੇ ਭੁਮ੍ਮਂ, ਨ ਵਿਸਯੇਤਿ ਦਸ੍ਸੇਨ੍ਤੋ ‘‘ਕੁਸਲੇਸੁ ਧਮ੍ਮੇਸੁ ਅਨ੍ਤੋਗਧਾ’’ਤਿ ਆਹ. ਇਦਾਨਿ ਵਿਸਯਲਕ੍ਖਣਂ ਏਤਂ ਭੁਮ੍ਮਨ੍ਤਿ ਦਸ੍ਸੇਨ੍ਤੋ ‘‘ਬੋਧਿਪਕ੍ਖਿਯਧਮ੍ਮੇਸੁ ਵਾ’’ਤਿਆਦਿਮਾਹ. ‘‘ਤਦੁਪਕਾਰਤਾਯਾ’’ਤਿ ਇਦਂ ਕੁਸਲੇਸੁ ਧਮ੍ਮੇਸੁ ਸਾਧੇਤਬ੍ਬੇਸੂਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤਂ. ਉਮ੍ਮੁਜ੍ਜਨਪਞ੍ਞਾਯਾਤਿ ਉਮ੍ਮੁਜ੍ਜਾਪਨਪਞ੍ਞਾਯ, ਉਮ੍ਮੁਜ੍ਜਨਾਕਾਰੇਨ ਵਾ ਪਵਤ੍ਤਪਞ੍ਞਾਯ. ਤੇਨੇਵਾਤਿ ਉਮ੍ਮੁਜ੍ਜਨਮਤ੍ਤਤ੍ਤਾ ਏਵ. ਯਥਾ ਹਿ ਞਾਣੁਪ੍ਪਾਦੋ ਸਂਕਿਲੇਸਪਕ੍ਖਤੋ ਉਮ੍ਮੁਜ੍ਜਨਂ, ਏਵਂ ਸਦ੍ਧੁਪ੍ਪਾਦੋਪੀਤਿ ਆਹ ‘‘ਸਦ੍ਧਾਸਙ੍ਖਾਤਮੇਵ ਉਮ੍ਮੁਜ੍ਜਨ’’ਨ੍ਤਿ. ਚਿਤ੍ਤਵਾਰੋਤਿ ਚਿਤ੍ਤਪ੍ਪਬਨ੍ਧਵਾਰੋ. ਪਚ੍ਚੇਕਂ ਠਾਨਵਿਪਸ੍ਸਨਾਪਤਰਣਪਤਿਗਾਧਪ੍ਪਤ੍ਤਿਨਿਟ੍ਠਤ੍ਤਾ ਤੇਸਂ ਪੁਗ੍ਗਲਾਨਂ ‘‘ਅਨੇਕੇ ਪੁਗ੍ਗਲਾ’’ਤਿ ਵੁਤ੍ਤਂ. ਕਸ੍ਮਾ? ਤੇਨਤ੍ਤਭਾਵੇਨ ਅਰਹਤ੍ਤਸ੍ਸ ਅਗ੍ਗਹਣਤੋ. ਤਤਿਯਪੁਗ੍ਗਲਾਦਿਭਾਵਨ੍ਤਿ ਉਮ੍ਮੁਜ੍ਜਿਤ੍ਵਾ ਠਿਤਪੁਗ੍ਗਲਾਦਿਭਾਵਂ.

ਸਤ੍ਤਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੧੦. ਦਸਕਨਿਦ੍ਦੇਸਵਣ੍ਣਨਾ

੨੦੯. ਸੋਤਾਪਨ੍ਨਾਦਯੋਤਿ ਵੁਤ੍ਤਵਿਸੇਸਯੁਤ੍ਤਾ ਸੋਤਾਪਨ੍ਨਸਕਦਾਗਾਮਿਝਾਨਾਨਾਗਾਮਿਨੋ. ਅਸਾ…ਪੇ… ਪਨਾਤਿ ਏਤ੍ਥ ਪਨ-ਸਦ੍ਦੋ ਵਿਸੇਸਤ੍ਥਦੀਪਨੋ. ਤੇਨ ‘‘ਅਜ੍ਝਤ੍ਤਸਂਯੋਜਨਾਨਂ ਸਮੁਚ੍ਛਿਨ੍ਨਤ੍ਤਾ’’ਤਿ ਇਦਂ ਵਿਸੇਸਂ ਦੀਪੇਤੀਤਿ ਵੇਦਿਤਬ੍ਬਂ.

ਦਸਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਪੁਗ੍ਗਲਪਞ੍ਞਤ੍ਤਿਪਕਰਣ-ਅਨੁਟੀਕਾ ਸਮਤ੍ਤਾ.