੧੪. ਚੁਦ੍ਦਸਮਨਯੋ ਵਿਪ੍ਪਯੁਤ੍ਤੇਨਸਙ੍ਗਹਿਤਾਸਙ੍ਗਹਿਤਪਦਵਣ੍ਣਨਾ

੪੫੬. ਧਮ੍ਮਸਭਾਵਮਤ੍ਤਤ੍ਤਾਤਿ ਸਭਾਵਧਮ੍ਮਾਨਂ ਧਮ੍ਮਮਤ੍ਤਤ੍ਤਾ ਅਵਤ੍ਥਾਵਿਸੇਸਮਤ੍ਤਤ੍ਤਾ.

ਸਮੁਚ੍ਛਿਜ੍ਜਤਿ ਏਤੇਨਾਤਿ ਸਮੁਚ੍ਛੇਦੋ. ਸਙ੍ਗਹਾਦਿਵਿਚਾਰਪਰਿਨਿਟ੍ਠਾਨਭੂਤੋ ਚੁਦ੍ਦਸਮਨਯੋ. ਤੇਨਾਹ ‘‘ਪਰਿਯੋਸਾਨੇ ਨਯੇ’’ਤਿ. ਵਿਸ੍ਸਜ੍ਜੇਤਬ੍ਬਧਮ੍ਮਵਿਵਿਤ੍ਤਾ ਪੁਚ੍ਛਾ ਮੋਘਪੁਚ੍ਛਾ, ਸਾ ਤਥਾਭੂਤਾਪਿ ਵਿਸ੍ਸਜ੍ਜੇਤਬ੍ਬਧਮ੍ਮਾਭਾਵਸ੍ਸ ਞਾਪਿਕਾ ਹੋਤੀਤਿ ਆਹ ‘‘ਤੇਸਂ ਪੁਚ੍ਛਾਯ ਮੋਘਤ੍ਤਾ ਤੇ ਨ ਲਬ੍ਭਨ੍ਤੀ’’ਤਿ. ਮੋਘਾ ਪੁਚ੍ਛਾ ਏਤਸ੍ਸਾਤਿ ਮੋਘਪੁਚ੍ਛਕੋ. ਅਟ੍ਠਮੋ ਨਯੋ ਤਤ੍ਥ ਸਬ੍ਬਪੁਚ੍ਛਾਨਂ ਮੋਘਤ੍ਤਾ. ਤੇਨ ਚ ਸਹਾਤਿ ਤੇਨ ਅਟ੍ਠਮਨਯੇਨ ਸਦ੍ਧਿਂ ਇਮਸ੍ਮਿਂ ਓਸਾਨਨਯੇ ਅਟ੍ਠਮਨਯੇ ਚ ਓਸਾਨਨਯੇ ਚ ਏਤੇ ਧਮ੍ਮਾਯਤਨਾਦਯੋ ਸਬ੍ਬਪ੍ਪਕਾਰੇਨ ਨ ਲਬ੍ਭਨ੍ਤਿ. ਵਿਪ੍ਪਯੋਗਸ੍ਸਪਿ ਅਭਾਵਾਤਿ ਤਤ੍ਥ ਕਾਰਣਮਾਹ.

ਚੁਦ੍ਦਸਮਨਯਵਿਪ੍ਪਯੁਤ੍ਤੇਨਸਙ੍ਗਹਿਤਾਸਙ੍ਗਹਿਤਪਦਵਣ੍ਣਨਾ ਨਿਟ੍ਠਿਤਾ.

ਧਾਤੁਕਥਾਪਕਰਣ-ਅਨੁਟੀਕਾ ਸਮਤ੍ਤਾ.