੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ

੫੫੭. ਛਬ੍ਬਸ੍ਸਸਿਕ੍ਖਾਪਦੇ ਪਨ ‘‘ਯੇਸਂ ਨੋ ਸਨ੍ਥਤੇ ਦਾਰਕਾ ਉਹਦਨ੍ਤਿਪਿ ਉਮ੍ਮਿਹਨ੍ਤਿਪਿ, ਯੇਸਂ ਨੋ ਸਨ੍ਥਤਾ ਉਨ੍ਦੂਰੇਹਿਪਿ ਖਜ੍ਜਨ੍ਤੀ’’ਤਿ ਏਵਂ ਪਾਲ਼ਿਪਦਾਨਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਹਦ ਕਰੀਸੋਸ੍ਸਗ੍ਗੇ, ਮਿਹ ਸੇਚਨੇਤਿ ਪਨਿਮਸ੍ਸਤ੍ਥਂ ਸਨ੍ਧਾਯਾਹ ‘‘ਵਚ੍ਚਮ੍ਪਿ ਪਸ੍ਸਾਵਮ੍ਪਿ ਕਰੋਨ੍ਤੀ’’ਤਿ. ਪਵਾਰਣਾਉਪੋਸਥਪਾਟਿਪਦਦਿਵਸੇਸੁ ਸਨ੍ਥਤਂ ਕਰਿਤ੍ਵਾ ਪੁਨ ਛਟ੍ਠੇ ਵਸ੍ਸੇ ਪਰਿਪੁਣ੍ਣੇ ਪਵਾਰਣਾਉਪੋਸਥਪਾਟਿਪਦਦਿਵਸੇਸੁ ਕਰੋਨ੍ਤੋ ‘‘ਛਬ੍ਬਸ੍ਸਾਨਿ ਕਰੋਤੀ’’ਤਿ ਵੁਚ੍ਚਤਿ. ਦੁਤਿਯਦਿਵਸਤੋ ਪਟ੍ਠਾਯ ਕਰੋਨ੍ਤੋ ਪਨ ਅਤਿਰੇਕਛਬ੍ਬਸ੍ਸਾਨਿ ਕਰੋਤਿ ਨਾਮ.

ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.