੨. ਕੋਸਿਯਵਗ੍ਗੋ
੧. ਕੋਸਿਯਸਿਕ੍ਖਾਪਦਵਣ੍ਣਨਾ
੫੪੨. ਪਾਲ਼ਿਯਂ ‘‘ਕੋਸਿਯਕਾਰਕੇ’’ਤਿ ਏਤ੍ਥ ਕੋਸਂ ਕਰੋਨ੍ਤੀਤਿ ਕੋਸਕਾਰਕਾਤਿ ਲਦ੍ਧਵੋਹਾਰਾਨਂ ਪਾਣਕਾਨਂ ਕੋਸਤੋ ਨਿਬ੍ਬਤ੍ਤਂ ਕੋਸਿਯਂ, ਤਂ ਕਰੋਨ੍ਤੀਤਿ ਕੋਸਿਯਕਾਰਕਾ, ਤਨ੍ਤਵਾਯਾ. ਸਂਹਨਨਂ ਸਙ੍ਘਾਤੋ, ਵਿਨਾਸੋਤਿ ਅਤ੍ਥੋ. ਕੋਸਿਯਮਿਸ੍ਸਕਨ੍ਤਿ ਕੋਸਿਯਤਨ੍ਤੁਨਾ ਮਿਸ੍ਸਂ. ‘‘ਅਵਾਯਿਮ’’ਨ੍ਤਿ ਵੁਤ੍ਤਤ੍ਤਾ ਵਾਯਿਤ੍ਵਾ ਚੇ ਕਰੋਨ੍ਤਿ, ਅਨਾਪਤ੍ਤਿ. ਅਨਾਪਤ੍ਤਿ ਵਿਤਾਨਂ ਵਾਤਿਆਦਿਨਾ ਵਿਤਾਨਾਦੀਨਂ ਅਤ੍ਥਾਯ ਕਰਣੇਪਿ ਤੇਨਾਕਾਰੇਨ ਪਰਿਭੋਗੇਪਿ ਅਨਾਪਤ੍ਤਿ ਵੁਤ੍ਤਾ.
ਏਵਮ੍ਪਿ ਮਿਸ੍ਸੇਤ੍ਵਾ ਕਤਮੇਵ ਹੋਤੀਤਿ ਇਮਿਨਾ ਵਾਤੇਨ ਆਹਰਿਤ੍ਵਾ ਪਾਤਿਤੇਪਿ ਅਚਿਤ੍ਤਕਤ੍ਤਾ ਆਪਤ੍ਤਿਯੇਵਾਤਿ ਦਸ੍ਸੇਤਿ. ਕੋਸਿਯਮਿਸ੍ਸਕਤਾ, ਅਤ੍ਤਨੋ ਅਤ੍ਥਾਯ ਸਨ੍ਥਤਸ੍ਸ ਕਰਣਂ ਕਾਰਾਪਨਂ, ਪਟਿਲਾਭੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫੪੭. ਸੁਦ੍ਧਕਾਲ਼ਕਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੩. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ
੫੫੨. ਦ੍ਵੇਭਾਗਸਿਕ੍ਖਾਪਦੇ ਪਨ ਦ੍ਵੇ ਭਾਗਾਤਿ ਉਕ੍ਕਟ੍ਠਪਰਿਚ੍ਛੇਦੋ ਕਾਲ਼ਕਾਨਂ ਅਧਿਕਗ੍ਗਹਣਸ੍ਸ ਪਟਿਕ੍ਖੇਪਵਸੇਨ ਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ. ਤਤਿਯਂ ਓਦਾਤਾਨਂ ਚਤੁਤ੍ਥਂ ਗੋਚਰਿਯਾਨਨ੍ਤਿ ਅਯਂ ਹੇਟ੍ਠਿਮਪਰਿਚ੍ਛੇਦੋ ਤੇਸਂ ਅਧਿਕਗ੍ਗਹਣੇ ਪਟਿਕ੍ਖੇਪਾਭਾਵਤੋ, ਤਸ੍ਮਾ ਕਾਲ਼ਕਾਨਂ ਭਾਗਦ੍ਵਯਤੋ ਅਧਿਕਂ ਨ ਵਟ੍ਟਤਿ, ਸੇਸਾਨਂ ਪਨ ਵੁਤ੍ਤਪ੍ਪਮਾਣਤੋ ਅਧਿਕਮ੍ਪਿ ਵਟ੍ਟਤਿ. ‘‘ਕਾਲ਼ਕਾਨਂਯੇਵ ਚ ਅਧਿਕਗ੍ਗਹਣਸ੍ਸ ਪਟਿਕ੍ਖਿਤ੍ਤਤ੍ਤਾ ਕਾਲ਼ਕਾਨਂ ਉਪਡ੍ਢਂ ਓਦਾਤਾਨਂ ਵਾ ਗੋਚਰਿਯਾਨਂ ਵਾ ਉਪਡ੍ਢਂ ਗਹੇਤ੍ਵਾਪਿ ਕਾਤੁਂ ਵਟ੍ਟਤੀ’’ਤਿ ਵਦਨ੍ਤਿ, ‘‘ਅਨਾਪਤ੍ਤਿ ਬਹੁਤਰਂ ਓਦਾਤਾਨਂ ਬਹੁਤਰਂ ਗੋਚਰਿਯਾਨਂ ਆਦਿਯਿਤ੍ਵਾ ਕਰੋਤਿ, ਸੁਦ੍ਧਂ ਓਦਾਤਾਨਂ ਸੁਦ੍ਧਂ ਗੋਚਰਿਯਾਨਂ ਆਦਿਯਿਤ੍ਵਾ ਕਰੋਤੀ’’ਤਿ ਇਮਿਨਾ ਤਂ ਸਮੇਤਿ. ‘‘ਕਾਲ਼ਕੇ ਓਦਾਤੇ ਚ ਠਪੇਤ੍ਵਾ ਸੇਸਾ ਗੋਚਰਿਯੇਸੁਯੇਵ ਸਙ੍ਗਹਂ ਗਚ੍ਛਨ੍ਤੀ’’ਤਿ ਵਦਨ੍ਤਿ. ਦ੍ਵੇ ਕੋਟ੍ਠਾਸਾ ਕਾਲ਼ਕਾਨਨ੍ਤਿ ਏਤ੍ਥ ਪਨ ‘‘ਏਕਸ੍ਸਪਿ ਕਾਲ਼ਕਲੋਮਸ੍ਸ ਅਤਿਰੇਕਭਾਵੇ ਨਿਸ੍ਸਗ੍ਗਿਯਂ ਹੋਤੀ’’ਤਿ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ) ਤ੍ਤਂ, ਤਂ ‘‘ਧਾਰਯਿਤ੍ਵਾ ਦ੍ਵੇ ਤੁਲਾ ਆਦਾਤਬ੍ਬਾ’’ਤਿ ਵਚਨਤੋ ਤੁਲਾਧਾਰਣਾਯ ਨ ਸਮੇਤਿ. ਨ ਹਿ ਲੋਮੇ ਗਣੇਤ੍ਵਾ ਤੁਲਾਧਾਰਣਾ ਕਰੀਯਤਿ, ਅਥ ਗਣੇਤ੍ਵਾਵ ਧਾਰਯਿਤਬ੍ਬਂ ਸਿਯਾ, ਕਿਂ ਤੁਲਾਧਾਰਣਾਯ, ਤਸ੍ਮਾ ਏਵਮੇਤ੍ਥ ਅਧਿਪ੍ਪਾਯੋ ਯੁਤ੍ਤੋ ਸਿਯਾ – ਅਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ ਪੁਬ੍ਬੇ ਤੁਲਾਯ ਧਾਰਯਿਤ੍ਵਾ ਠਪਿਤੇਸੁ ਏਕਮ੍ਪਿ ਲੋਮਂ ਤਤ੍ਥ ਪਤੇਯ੍ਯ, ਨਿਸ੍ਸਗ੍ਗਿਯਨ੍ਤਿ. ਅਞ੍ਞਥਾ ਦੁਬ੍ਬਿਞ੍ਞੇਯ੍ਯਭਾਵਤੋ ਦ੍ਵੇ ਤੁਲਾ ਨਾਦਾਤਬ੍ਬਾ, ਊਨਕਤਰਾਵ ਆਦਾਤਬ੍ਬਾ ਸਿਯੁਂ.
ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ
੫੫੭. ਛਬ੍ਬਸ੍ਸਸਿਕ੍ਖਾਪਦੇ ਪਨ ‘‘ਯੇਸਂ ਨੋ ਸਨ੍ਥਤੇ ਦਾਰਕਾ ਉਹਦਨ੍ਤਿਪਿ ਉਮ੍ਮਿਹਨ੍ਤਿਪਿ, ਯੇਸਂ ਨੋ ਸਨ੍ਥਤਾ ਉਨ੍ਦੂਰੇਹਿਪਿ ਖਜ੍ਜਨ੍ਤੀ’’ਤਿ ਏਵਂ ਪਾਲ਼ਿਪਦਾਨਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਹਦ ਕਰੀਸੋਸ੍ਸਗ੍ਗੇ, ਮਿਹ ਸੇਚਨੇਤਿ ਪਨਿਮਸ੍ਸਤ੍ਥਂ ਸਨ੍ਧਾਯਾਹ ‘‘ਵਚ੍ਚਮ੍ਪਿ ਪਸ੍ਸਾਵਮ੍ਪਿ ਕਰੋਨ੍ਤੀ’’ਤਿ. ਪਵਾਰਣਾਉਪੋਸਥਪਾਟਿਪਦਦਿਵਸੇਸੁ ਸਨ੍ਥਤਂ ਕਰਿਤ੍ਵਾ ਪੁਨ ਛਟ੍ਠੇ ਵਸ੍ਸੇ ਪਰਿਪੁਣ੍ਣੇ ਪਵਾਰਣਾਉਪੋਸਥਪਾਟਿਪਦਦਿਵਸੇਸੁ ਕਰੋਨ੍ਤੋ ‘‘ਛਬ੍ਬਸ੍ਸਾਨਿ ਕਰੋਤੀ’’ਤਿ ਵੁਚ੍ਚਤਿ. ਦੁਤਿਯਦਿਵਸਤੋ ਪਟ੍ਠਾਯ ਕਰੋਨ੍ਤੋ ਪਨ ਅਤਿਰੇਕਛਬ੍ਬਸ੍ਸਾਨਿ ਕਰੋਤਿ ਨਾਮ.
ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ
੫੬੫-੬. ਨਿਸੀਦਨਸਨ੍ਥਤਸਿਕ੍ਖਾਪਦੇ ਪਨ ਪਞ੍ਞਾਯਿਸ੍ਸਤੀਤਿ ਸਚੇ ਸਾ ਕਤਿਕਾ ਮਨਾਪਾ ਭਵਿਸ੍ਸਤਿ, ਮਨਾਪਤਾਯ ਭਿਕ੍ਖੁਸਙ੍ਘੋ ਸਨ੍ਦਿਸ੍ਸਿਸ੍ਸਤਿ. ਸਚੇ ਅਮਨਾਪਾ, ਅਮਨਾਪਤਾਯ ਸਨ੍ਦਿਸ੍ਸਿਸ੍ਸਤੀਤਿ ਅਧਿਪ੍ਪਾਯੋ, ਆਰਞ੍ਞਕਙ੍ਗਾਦੀਨਿ ਤੀਣਿ ਪਾਲ਼ਿਯਂ ਪਧਾਨਙ੍ਗਵਸੇਨ ਵੁਤ੍ਤਾਨਿ, ਸੇਸਾਨਿਪਿ ਤੇ ਸਮਾਦਿਯਿਂਸੁਯੇਵਾਤਿ ਵੇਦਿਤਬ੍ਬਂ. ਤੇਨੇਵਾਹ ‘‘ਸਨ੍ਥਤੇ ਚਤੁਤ੍ਥਚੀਵਰਸਞ੍ਞਿਤਾਯਾ’’ਤਿ. ਉਜ੍ਝਿਤ੍ਵਾਤਿ ਵਿਸ੍ਸਜ੍ਜੇਤ੍ਵਾ.
੫੬੭. ਨਿਸੀਦਨਸਨ੍ਥਤਤ੍ਤਾ ਨਿਵਾਸਨਪਾਰੁਪਨਕਿਚ੍ਚਂ ਨਤ੍ਥੀਤਿ ਆਹ ‘‘ਸਕਿਂ ਨਿਸਿਨ੍ਨਞ੍ਚੇਵ ਨਿਪਨ੍ਨਞ੍ਚਾ’’ਤਿ. ਵਿਦਤ੍ਥਿਮਤ੍ਤਨ੍ਤਿ ਸੁਗਤਵਿਦਤ੍ਥਿਂ ਸਨ੍ਧਾਯ ਵਦਤਿ. ਇਦਞ੍ਚ ਹੇਟ੍ਠਿਮਪਰਿਚ੍ਛੇਦਦਸ੍ਸਨਤ੍ਥਂ ਵੁਤ੍ਤਂ. ‘‘ਵਿਤਾਨਾਦੀਨਂਯੇਵ ਅਤ੍ਥਾਯ ਕਰਣੇ ਅਨਾਪਤ੍ਤਿਵਚਨਤੋ ਸਚੇ ਨਿਪਜ੍ਜਨਤ੍ਥਾਯ ਕਰੋਨ੍ਤਿ, ਆਪਤ੍ਤਿਯੇਵਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਅਕਪ੍ਪਿਯਤ੍ਤਾ ਪਨ ‘‘ਪਰਿਭੁਞ੍ਜਿਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ. ਇਦਞ੍ਚ ਨਿਸੀਦਨਸਨ੍ਥਤਂ ਨਾਮ ਨਿਸੀਦਨਚੀਵਰਮੇਵ, ਨਾਞ੍ਞਨ੍ਤਿ ਵਦਨ੍ਤਿ. ਨਿਸੀਦਨਸਿਕ੍ਖਾਪਦੇਪਿ ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀਤਿ ਚ ਅਟ੍ਠਕਥਾਯਞ੍ਚਸ੍ਸ ‘‘ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਯਾ ਵਿਦਤ੍ਥਿਮਤ੍ਤੇ ਪਦੇਸੇ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਤਿਸ੍ਸੋ ਦਸਾ ਕਰੀਯਨ੍ਤਿ, ਤਾਹਿ ਦਸਾਹਿ ਸਦਸਂ ਨਾਮ ਵੁਚ੍ਚਤੀ’’ਤਿ (ਪਾਚਿ. ਅਟ੍ਠ. ੫੩੧) ਵਚਨਤੋ ਇਧਾਪਿ ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਚ ‘‘ਸਨ੍ਥਤੇ ਚਤੁਤ੍ਥਚੀਵਰਸਞ੍ਞਿਤਾਯਾ’’ਤਿ ਚ ਵਚਨਤੋ ਤਂ ਯੁਤ੍ਤਂ ਵਿਯ ਦਿਸ੍ਸਤਿ. ਕੇਚਿ ਪਨ ‘‘ਨਿਸੀਦਨਸਨ੍ਥਤਂ ਏਲ਼ਕਲੋਮਾਨਿ ਸਨ੍ਥਰਿਤ੍ਵਾ ਸਨ੍ਥਤਂ ਵਿਯ ਕਰੋਨ੍ਤਿ, ਤਂ ਅਵਾਯਿਮਂ ਅਨਧਿਟ੍ਠਾਨੁਪਗਂ, ਨਿਸੀਦਨਚੀਵਰਂ ਪਨ ਛਨ੍ਨਂ ਚੀਵਰਾਨਂ ਅਞ੍ਞਤਰੇਨ ਕਰੋਤਿ ਅਧਿਟ੍ਠਾਨੁਪਗਂ, ਤਂ ਕਰੋਨ੍ਤਾ ਚ ਨਨ੍ਤਕਾਨਿ ਸਨ੍ਥਰਿਤ੍ਵਾ ਸਨ੍ਥਤਸਦਿਸਂ ਕਰੋਨ੍ਤੀ’’ਤਿ ਵਦਨ੍ਤਿ, ਵੀਮਂਸਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ.
ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ
੫੭੧. ਏਲ਼ਲੋਮਸਿਕ੍ਖਾਪਦੇ ਪਨ ਆਸੁਮ੍ਭੀਤਿ ਏਤ੍ਥ ‘‘ਅਸੁਮ੍ਭੀ’’ਤਿ ਪਠਨ੍ਤਿ. ਕਿਲਨ੍ਤਾਤਿ ਇਮਿਨਾ ਕਿਲਨ੍ਤਤਾਯ ਤੇ ਓਨਮਿਤ੍ਵਾ ਪਾਤੇਤੁਂ ਨ ਸਕ੍ਕੋਨ੍ਤੀਤਿ ਦਸ੍ਸੇਤਿ. ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾਤਿ ਇਦਂ ਵਤ੍ਥੁਮਤ੍ਤਦੀਪਨਵਸੇਨ ਪਾਲ਼ਿਯਂ ਵੁਤ੍ਤਂ. ਯਤ੍ਥ ਕਤ੍ਥਚਿ ਪਨ ਧਮ੍ਮੇਨ ਲਭਿਤ੍ਵਾ ਗਣ੍ਹਿਤੁਂ ਵਟ੍ਟਤਿਯੇਵ. ਤਿਯੋਜਨਪਰਮਨ੍ਤਿ ਚ ਗਹਿਤਟ੍ਠਾਨਤੋ ਤਿਯੋਜਨਪ੍ਪਮਾਣਂ ਦੇਸਨ੍ਤਿ ਏਵਮਤ੍ਥੋ ਗਹੇਤਬ੍ਬੋ.
੫੭੨. ਸਹਤ੍ਥਾਤਿ ਕਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਸਹਤ੍ਥੇਨਾ’’ਤਿ. ਅਸਨ੍ਤੇ ਹਾਰਕੇਤਿ ਪਾਲ਼ਿਯਂ ਭਿਕ੍ਖੁਨੋ ਅਨੁਰੂਪਤਾਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਹਾਰਕੇ ਵਿਜ੍ਜਮਾਨੇ ਤਿਯੋਜਨਬ੍ਭਨ੍ਤਰੇ ਸਹਤ੍ਥਾ ਹਰਨ੍ਤਸ੍ਸ ਆਪਤ੍ਤਿਦਸ੍ਸਨਤ੍ਥਂ. ਤਿਯੋਜਨਤੋ ਬਹਿ ਬਹਿਤਿਯੋਜਨਨ੍ਤਿ ਆਹ ‘‘ਤਿਯੋਜਨਤੋ ਬਹਿ ਪਾਤੇਤੀ’’ਤਿ. ਤੇਨ ਹਰਿਤੇਪਿ ਆਪਤ੍ਤਿਯੇਵਾਤਿ ਸਉਸ੍ਸਾਹਤ੍ਤਾ ਅਨਾਣਤ੍ਤਿਯਾ ਹਟਤ੍ਤਾ ਚ. ਸਤਿਪਿ ਹਿ ਸਉਸ੍ਸਾਹਭਾਵੇ ਆਣਤ੍ਤਿਯਾ ਚੇ ਹਰਤਿ, ਅਨਾਪਤ੍ਤਿ ‘‘ਅਞ੍ਞਂ ਹਰਾਪੇਤੀ’’ਤਿ ਵਚਨਤੋ. ਅਞ੍ਞੋ ਹਰਿਸ੍ਸਤੀਤਿ ਅਧਿਪ੍ਪਾਯਾਭਾਵਤੋ ‘‘ਸੁਦ੍ਧਚਿਤ੍ਤੇਨ ਠਪਿਤ’’ਨ੍ਤਿ ਵੁਤ੍ਤਂ. ਸਉਸ੍ਸਾਹਤ੍ਤਾਤਿ ਤਿਯੋਜਨਾਤਿਕ੍ਕਮਨੇ ਸਉਸ੍ਸਾਹਤ੍ਤਾ. ਇਦਞ੍ਚ ‘‘ਅਞ੍ਞੋ ਹਰਿਸ੍ਸਤੀ’’ਤਿ ਅਸੁਦ੍ਧਚਿਤ੍ਤੇਨ ਠਪਿਤਂ ਸਨ੍ਧਾਯ ਵੁਤ੍ਤਂ, ਅਚਿਤ੍ਤਕਤ੍ਤਾਤਿ ਇਦਂ ਪਨ ਸੁਦ੍ਧਚਿਤ੍ਤੇਨ ਠਪਿਤਂ ਸਨ੍ਧਾਯ. ਅਨਾਪਤ੍ਤਿ ਪਾਲ਼ਿਯਾ ਨ ਸਮੇਤੀਤਿ ‘‘ਤਿਯੋਜਨਂ ਹਰਤੀ’’ਤਿਆਦਿਪਾਲ਼ਿਯਾ, ਵਿਸੇਸਤੋ ‘‘ਅਞ੍ਞਂ ਹਰਾਪੇਤੀ’’ਤਿ ਪਾਲ਼ਿਯਾ ਚ ਨ ਸਮੇਤਿ.
ਸਚੇ ਸਾਮਿਕਂ ਜਾਨਾਪੇਤ੍ਵਾ ਠਪੇਤਿ, ਆਣਤ੍ਤਿਯਾ ਹਰਾਪੇਤਿ ਨਾਮਾਤਿ ਆਹ ‘‘ਸਾਮਿਕਸ੍ਸ ਅਜਾਨਨ੍ਤਸ੍ਸੇਵਾ’’ਤਿ. ਅਗਚ੍ਛਨ੍ਤੇਪੀਤਿ ਗਮਨਂ ਉਪਚ੍ਛਿਨ੍ਦਿਤ੍ਵਾ ਠਿਤਯਾਨੇਪਿ. ਹੇਟ੍ਠਾ ਵਾ ਗਚ੍ਛਨ੍ਤੋਤਿ ਭੂਮਿਯਂ ਗਚ੍ਛਨ੍ਤੋ. ਅਞ੍ਞਂ ਹਰਾਪੇਤੀਤਿ ਏਤ੍ਥ ਅਞ੍ਞ-ਗ੍ਗਹਣੇਨ ਸਾਮਞ੍ਞਤੋ ਤਿਰਚ੍ਛਾਨਗਤਾਪਿ ਸਙ੍ਗਹਿਤਾਤਿ ਆਹ – ‘‘ਅਞ੍ਞਂ ਹਰਾਪੇਤੀਤਿ ਵਚਨਤੋ ਅਨਾਪਤ੍ਤੀ’’ਤਿ. ਸੁਙ੍ਕਘਾਤੇ ਆਪਤ੍ਤਿ ਹੋਤੀਤਿ ਅਞ੍ਞਂ ਹਰਾਪੇਨ੍ਤਸ੍ਸ ਆਪਤ੍ਤਿ. ਤਤ੍ਥ ਅਨਾਪਤ੍ਤੀਤਿ ਅਞ੍ਞਵਿਹਿਤਸ੍ਸ ਥੇਯ੍ਯਚਿਤ੍ਤਾਭਾਵਤੋ ਅਨਾਪਤ੍ਤਿ.
੫੭੫. ‘‘ਤਂ ਹਰਨ੍ਤਸ੍ਸਾਤਿ ਪੁਨ ਤਿਯੋਜਨਂ ਹਰਨ੍ਤਸ੍ਸਾ’’ਤਿ ਮਹਾਗਣ੍ਠਿਪਦੇ ਵੁਤ੍ਤਂ. ਤਂ ਪਨ ਮਾਤਿਕਾਟ੍ਠਕਥਾਯਂ ਅਙ੍ਗੇਸੁ ‘‘ਪਠਮਪ੍ਪਟਿਲਾਭੋ ਸਤਿ ਇਮਿਨਾ ਵਚਨੇਨ ਨ ਸਮੇਤਿ. ‘‘ਪਠਮਪ੍ਪਟਿਲਾਭੋ’’ਤਿ ਹਿ ਇਦਂ ਦੁਤਿਯਪ੍ਪਟਿਲਾਭੋ ਆਪਤ੍ਤਿਯਾ ਅਙ੍ਗਂ ਨ ਹੋਤੀਤਿ ਦੀਪੇਤਿ, ਤਸ੍ਮਾ ਪਾਲ਼ਿਯਂ ਅਟ੍ਠਕਥਾਯਞ੍ਚ ਵਿਸੇਸਾਭਾਵਤੋ ਅਚ੍ਛਿਨ੍ਨਂ ਪਟਿਲਭਿਤ੍ਵਾ ਹਰਨ੍ਤਸ੍ਸ ਪੁਨ ਤਿਯੋਜਨਾਤਿਕ੍ਕਮੇਪਿ ਅਨਾਪਤ੍ਤਿ ਵੁਤ੍ਤਾਤਿ ਅਮ੍ਹਾਕਂ ਖਨ੍ਤਿ. ਅਞ੍ਞਥਾ ਅਚ੍ਛਿਨ੍ਨਂ ਪਟਿਲਭਿਤ੍ਵਾ ਪੁਨ ਤਿਯੋਜਨਂ ਹਰਤੀਤਿ ਵਦੇਯ੍ਯ. ਵੀਮਂਸਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ. ਅਨਾਪਤ੍ਤਿ ਕਤਭਣ੍ਡਨ੍ਤਿ ਏਤ੍ਥ ‘‘ਕਮ੍ਬਲਕੋਜਵਾਦਿਕਤਭਣ੍ਡਮ੍ਪਿ. ਪਕਤਿਚੀਵਰੇ ਲਗ੍ਗਲੋਮਾਨਿ ਆਪਤ੍ਤਿਂ ਜਨੇਨ੍ਤਿਯੇਵਾ’’ਤਿ ਵਦਨ੍ਤਿ. ਤਨੁਕਪਤ੍ਤਤ੍ਥਵਿਕਨ੍ਤਰੇ ਅਘਟ੍ਟਨਤ੍ਥਂ ਪਕ੍ਖਿਪਨ੍ਤਿ. ਪਕ੍ਖਿਤ੍ਤਨ੍ਤਿ ਕਣ੍ਣਚ੍ਛਿਦ੍ਦੇ ਪਕ੍ਖਿਤ੍ਤਂ. ਨਿਧਾਨਮੁਖਂ ਨਾਮਾਤਿ ਇਮਿਨਾ ਕਤਭਣ੍ਡਸਙ੍ਖ੍ਯਂ ਨ ਗਚ੍ਛਤੀਤਿ ਦਸ੍ਸੇਤਿ. ਏਲ਼ਕਲੋਮਾਨਂ ਅਕਤਭਣ੍ਡਤਾ, ਪਠਮਪ੍ਪਟਿਲਾਭੋ, ਅਤ੍ਤਨਾ ਆਦਾਯ ਵਾ ਅਞ੍ਞਸ੍ਸ ਅਜਾਨਨ੍ਤਸ੍ਸ ਯਾਨੇ ਪਕ੍ਖਿਪਿਤ੍ਵਾ ਵਾ ਤਿਯੋਜਨਾਤਿਕ੍ਕਮਨਂ, ਆਹਰਣਪਚ੍ਚਾਹਰਣਂ, ਅਵਾਸਾਧਿਪ੍ਪਾਯਤਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.
ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫੭੬. ਏਲ਼ਕਲੋਮਧੋਵਾਪਨਸਿਕ੍ਖਾਪਦਂ ਉਤ੍ਤਾਨਤ੍ਥਮੇਵ.
੮. ਰੂਪਿਯਸਿਕ੍ਖਾਪਦਵਣ੍ਣਨਾ
੫੮੩-੫੮੪. ਰੂਪਿਯਸਿਕ੍ਖਾਪਦੇ ਪਨ ਸਤ੍ਥੁਵਣ੍ਣੋਤਿ ਸਤ੍ਥੁਨਾ ਸਮਾਨਵਣ੍ਣੋ. ਸਤ੍ਥੁਨੋ ਵਣ੍ਣੋ ਸਤ੍ਥੁਵਣ੍ਣੋ, ਸਤ੍ਥੁਵਣ੍ਣੋ ਵਿਯ ਵਣ੍ਣੋ ਅਸ੍ਸਾਤਿ ਸਤ੍ਥੁਵਣ੍ਣੋਤਿ ਮਜ੍ਝਪਦਲੋਪੀਸਮਾਸੋ ਦਟ੍ਠਬ੍ਬੋ. ਪਾਕਤਿਕੋ ਨਾਮ ਏਤਰਹਿ ਪਕਤਿਕਹਾਪਣੋ. ਰੁਕ੍ਖਫਲਬੀਜਮਯੋਤਿ ਤਿਨ੍ਤਿਣਿਕਾਦਿਰੁਕ੍ਖਾਨਂ ਫਲਬੀਜੇਨ ਕਤੋ. ਇਚ੍ਚੇਤਂ ਸਬ੍ਬਮ੍ਪੀਤਿ ਯਥਾਵੁਤ੍ਤਭੇਦਂ ਸਬ੍ਬਮ੍ਪਿ ਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੁ ਹੋਤੀਤਿ ਸਮ੍ਬਨ੍ਧੋ. ਜਾਤਰੂਪਮਾਸਕੋਤਿ ਸੁਵਣ੍ਣਕਹਾਪਣੋ.
ਗਣ੍ਹੇਯ੍ਯਾਤਿ ਅਤ੍ਤਨੋ ਅਤ੍ਥਾਯ ਦੀਯਮਾਨਂ ਵਾ ਕਤ੍ਥਚਿ ਠਿਤਂ ਵਾ ਨਿਪ੍ਪਰਿਗ੍ਗਹਂ ਦਿਸ੍ਵਾ ਸਯਂ ਗਣ੍ਹੇਯ੍ਯ. ‘‘ਇਦਂ ਅਯ੍ਯਸ੍ਸ ਹੋਤੂ’’ਤਿ ਏਵਂ ਸਮ੍ਮੁਖਾ ਵਾ ‘‘ਅਸੁਕਸ੍ਮਿਂ ਨਾਮ ਠਾਨੇ ਮਮ ਹਿਰਞ੍ਞਸੁਵਣ੍ਣਂ ਅਤ੍ਥਿ, ਤਂ ਤੁਯ੍ਹਂ ਹੋਤੂ’’ਤਿ ਏਵਂ ਪਰਮ੍ਮੁਖਾ ਠਿਤਂ ਵਾ ਕੇਵਲਂ ਵਾਚਾਯ ਵਾ ਹਤ੍ਥਮੁਦ੍ਦਾਯ ਵਾ ‘‘ਤੁਯ੍ਹ’’ਨ੍ਤਿ ਵਤ੍ਵਾ ਪਰਿਚ੍ਚਤ੍ਤਸ੍ਸ ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਚਿਤ੍ਤੇਨ ਸਾਦਿਯਨਂ ਉਪਨਿਕ੍ਖਿਤ੍ਤਸਾਦਿਯਨਂ ਨਾਮ. ‘‘ਸਾਦਿਯਤੀ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਗਣ੍ਹਿਤੁਕਾਮੋ ਹੋਤੀ’’ਤਿ. ‘‘ਇਦਂ ਗੁਤ੍ਤਟ੍ਠਾਨ’’ਨ੍ਤਿ ਆਚਿਕ੍ਖਿਤਬ੍ਬਨ੍ਤਿ ਪਚ੍ਚਯਪਰਿਭੋਗਂਯੇਵ ਸਨ੍ਧਾਯ ਆਚਿਕ੍ਖਿਤਬ੍ਬਂ. ‘‘ਇਧ ਨਿਕ੍ਖਿਪਾਹੀ’’ਤਿ ਵੁਤ੍ਤੇ ‘‘ਉਗ੍ਗਣ੍ਹਾਪੇਯ੍ਯ ਵਾ’’ਤਿ ਵੁਤ੍ਤਲਕ੍ਖਣੇਨ ਨਿਸ੍ਸਗ੍ਗਿਯਂ ਹੋਤੀਤਿ ਆਹ – ‘‘ਇਧ ਨਿਕ੍ਖਿਪਾਹੀਤਿ ਨ ਵਤ੍ਤਬ੍ਬ’’ਨ੍ਤਿ. ਪਰਤੋ ‘‘ਇਮਂ ਗਣ੍ਹਾ’’ਤਿ ਨ ਵਤ੍ਤਬ੍ਬਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਮੇਵ ਹੋਤੀਤਿ ਯਸ੍ਮਾ ਤਤੋ ਉਪ੍ਪਨ੍ਨਪਚ੍ਚਯਪਰਿਭੋਗੋ ਕਪ੍ਪਤਿ, ਤਸ੍ਮਾ ਕਪ੍ਪਿਯਂ ਨਿਸ੍ਸਾਯ ਠਿਤਂ. ਯਸ੍ਮਾ ਪਨ ਦੁਬ੍ਬਿਚਾਰਣਾਯ ਤਤੋ ਉਪ੍ਪਨ੍ਨਪਚ੍ਚਯਪਰਿਭੋਗੋਪਿ ਨ ਕਪ੍ਪਤਿ, ਤਸ੍ਮਾ ਅਕਪ੍ਪਿਯਂ ਨਿਸ੍ਸਾਯ ਠਿਤਨ੍ਤਿ ਵੇਦਿਤਬ੍ਬਂ.
ਨ ਤੇਨ ਕਿਞ੍ਚਿ ਕਪ੍ਪਿਯਭਣ੍ਡਂ ਚੇਤਾਪਿਤਨ੍ਤਿ ਏਤ੍ਥ ਚੇਤਾਪਿਤਂ ਚੇ, ਨਤ੍ਥਿ ਪਰਿਭੋਗੁਪਾਯੋ, ਤਸ੍ਮਾ ਏਵਂ ਵੁਤ੍ਤਂ. ਅਕਪ੍ਪਿਯਞ੍ਹਿ ਨਿਸ੍ਸਗ੍ਗਿਯਂ ਵਤ੍ਥੁਂ ਉਗ੍ਗਣ੍ਹਿਤ੍ਵਾ ਤਂ ਅਨਿਸ੍ਸਜ੍ਜਿਤ੍ਵਾਵ ਚੇਤਾਪਿਤਂ ਕਪ੍ਪਿਯਭਣ੍ਡਂ ਸਙ੍ਘਸ੍ਸ ਨਿਸ੍ਸਟ੍ਠਮ੍ਪਿ ਸਬ੍ਬੇਸਂ ਨ ਕਪ੍ਪਤਿ. ਕੇਚਿ ਪਨ ‘‘ਯਸ੍ਮਾ ਨਿਸ੍ਸਗ੍ਗਿਯਂ ਵਤ੍ਥੁਂ ਪਟਿਗ੍ਗਹੇਤ੍ਵਾ ਚੇਤਾਪਿਤਂ ਕਪ੍ਪਿਯਭਣ੍ਡਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ ਨਿਸ੍ਸਟ੍ਠਂ ਵਿਨਾਵ ਉਪਾਯਂ ਪਰਿਭੁਞ੍ਜਿਤੁਂ ਵਟ੍ਟਤਿ, ਤਸ੍ਮਾ ‘ਨ ਤੇਨ ਕਿਞ੍ਚਿ ਕਪ੍ਪਿਯਭਣ੍ਡਂ ਚੇਤਾਪਿਤ’ਨ੍ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ‘‘ਆਰਾਮਿਕਾਨਂ ਵਾ ਪਤ੍ਤਭਾਗਨ੍ਤਿ ਇਦਂ ਗਿਹੀਨਂ ਹਤ੍ਥਗਤੋਪਿ ਸੋਯੇਵ ਭਾਗੋਤਿ ਕਤ੍ਵਾ ਵੁਤ੍ਤਂ. ਸਚੇ ਪਨ ਤੇਨ ਅਞ੍ਞਂ ਪਰਿਵਤ੍ਤੇਤ੍ਵਾ ਆਰਾਮਿਕਾ ਦੇਨ੍ਤਿ, ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਮਜ੍ਝਿਮਗਣ੍ਠਿਪਦੇ ਚੂਲ਼ਗਣ੍ਠਿਪਦੇ ਚ ਵੁਤ੍ਤਂ. ਤਤੋ ਹਰਿਤ੍ਵਾਤਿ ਅਞ੍ਞੇਸਂ ਪਤ੍ਤਭਾਗਤੋ ਹਰਿਤ੍ਵਾ. ਕਸਿਣਪਰਿਕਮ੍ਮਨ੍ਤਿ ਆਲੋਕਕਸਿਣਪਰਿਕਮ੍ਮਂ. ਮਞ੍ਚਪੀਠਾਦੀਨਿ ਵਾਤਿ ਏਤ੍ਥ ‘‘ਤਤੋ ਗਹਿਤਮਞ੍ਚਪੀਠਾਦੀਨਿ ਪਰਿਵਤ੍ਤੇਤ੍ਵਾ ਅਞ੍ਞਂ ਚੇ ਗਹਿਤਂ, ਵਟ੍ਟਤੀ’’ਤਿ ਵਦਨ੍ਤਿ. ਛਾਯਾਪੀਤਿ ਭੋਜਨਸਾਲਾਦੀਨਂ ਛਾਯਾਪਿ. ਪਰਿਚ੍ਛੇਦਾਤਿਕ੍ਕਨ੍ਤਾਤਿ ਗੇਹਪਰਿਚ੍ਛੇਦਂ ਅਤਿਕ੍ਕਨ੍ਤਾ, ਛਾਯਾਯ ਗਤਗਤਟ੍ਠਾਨਂ ਗੇਹਂ ਨਾਮ ਨ ਹੋਤੀਤਿ ਅਧਿਪ੍ਪਾਯੋ. ਮਗ੍ਗੇਨਪੀਤਿ ਏਤ੍ਥ ‘‘ਸਚੇ ਅਞ੍ਞੋ ਮਗ੍ਗੋ ਨਤ੍ਥਿ, ਮਗ੍ਗਂ ਅਧਿਟ੍ਠਹਿਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਕੀਤਾਯਾਤਿ ਤੇਨ ਵਤ੍ਥੁਨਾ ਕੀਤਾਯ. ਉਪਨਿਕ੍ਖੇਪਂ ਠਪੇਤ੍ਵਾ ਸਙ੍ਘੋ ਪਚ੍ਚਯੇ ਪਰਿਭੁਞ੍ਜਤੀਤਿ ਸਚੇ ਉਪਾਸਕੋ ‘‘ਅਤਿਬਹੁ ਏਤਂ ਹਿਰਞ੍ਞਂ, ਇਦਂ, ਭਨ੍ਤੇ, ਅਜ੍ਜੇਵ ਨ ਵਿਨਾਸੇਤਬ੍ਬ’’ਨ੍ਤਿ ਵਤ੍ਵਾ ਸਯਂ ਉਪਨਿਕ੍ਖੇਪਂ ਠਪੇਤਿ, ਅਞ੍ਞੇਨ ਵਾ ਠਪਾਪੇਤਿ, ਏਤਂ ਉਪਨਿਕ੍ਖੇਪਂ ਠਪੇਤ੍ਵਾ ਤਤੋ ਉਦਯਂ ਪਰਿਭੁਞ੍ਜਨ੍ਤੋ ਸਙ੍ਘੋ ਪਚ੍ਚਯੇ ਪਰਿਭੁਞ੍ਜਤਿ, ਤੇਨ ਵਤ੍ਥੁਨਾ ਗਹਿਤਤ੍ਤਾ ‘‘ਅਕਪ੍ਪਿਯ’’ਨ੍ਤਿ ਵੁਤ੍ਤਂ.
੫੮੫. ਪਤਿਤੋਕਾਸਂ ਅਸਮਨ੍ਨਾਹਰਨ੍ਤੇਨ ਪਾਤੇਤਬ੍ਬਨ੍ਤਿ ਇਦਂ ਨਿਰਪੇਕ੍ਖਭਾਵਦਸ੍ਸਨਪਰਨ੍ਤਿ ਵੇਦਿਤਬ੍ਬਂ, ਤਸ੍ਮਾ ਪਤਿਤਟ੍ਠਾਨੇ ਞਾਤੇਪਿਸ੍ਸ ਗੂਥਂ ਛਡ੍ਡੇਨ੍ਤਸ੍ਸ ਵਿਯ ਨਿਰਪੇਕ੍ਖਭਾਵੋਯੇਵੇਤ੍ਥ ਪਮਾਣਨ੍ਤਿ ਵੇਦਿਤਬ੍ਬਂ. ਅਸਨ੍ਤਸਮ੍ਭਾਵਨਾਯਾਤਿ ਅਤ੍ਤਨਿ ਅਵਿਜ੍ਜਮਾਨਉਤ੍ਤਰਿਮਨੁਸ੍ਸਧਮ੍ਮਾਰੋਚਨਂ ਸਨ੍ਧਾਯ ਵੁਤ੍ਤਂ. ਥੇਯ੍ਯਪਰਿਭੋਗੋ ਨਾਮ ਅਨਰਹਸ੍ਸ ਪਰਿਭੋਗੋ. ਭਗਵਤਾ ਹਿ ਅਤ੍ਤਨੋ ਸਾਸਨੇ ਸੀਲਵਤੋ ਪਚ੍ਚਯਾ ਅਨੁਞ੍ਞਾਤਾ, ਨ ਦੁਸ੍ਸੀਲਸ੍ਸ. ਦਾਯਕਾਨਮ੍ਪਿ ਸੀਲਵਤੋ ਏਵ ਪਰਿਚ੍ਚਾਗੋ, ਨ ਦੁਸ੍ਸੀਲਸ੍ਸ ਅਤ੍ਤਨੋ ਕਾਰਾਨਂ ਮਹਪ੍ਫਲਭਾਵਸ੍ਸ ਪਚ੍ਚਾਸੀਸਨਤੋ. ਇਤਿ ਸਤ੍ਥਾਰਾ ਅਨਨੁਞ੍ਞਾਤਤ੍ਤਾ ਦਾਯਕੇਹਿ ਚ ਅਪਰਿਚ੍ਚਤ੍ਤਤ੍ਤਾ ਦੁਸ੍ਸੀਲਸ੍ਸ ਪਰਿਭੋਗੋ ਥੇਯ੍ਯਪਰਿਭੋਗੋ. ਇਣਵਸੇਨ ਪਰਿਭੋਗੋ ਇਣਪਰਿਭੋਗੋ, ਪਟਿਗ੍ਗਾਹਕਤੋ ਦਕ੍ਖਿਣਾਵਿਸੁਦ੍ਧਿਯਾ ਅਭਾਵਤੋ ਇਣਂ ਗਹੇਤ੍ਵਾ ਪਰਿਭੋਗੋ ਵਿਯਾਤਿ ਅਤ੍ਥੋ. ਤਸ੍ਮਾਤਿ ‘‘ਸੀਲਵਤੋ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਕਾਰਣਭਾਵੇਨ ਪਚ੍ਚਾਮਸਤਿ. ਚੀਵਰਂ ਪਰਿਭੋਗੇ ਪਰਿਭੋਗੇਤਿ ਕਾਯਤੋ ਮੋਚੇਤ੍ਵਾ ਮੋਚੇਤ੍ਵਾ ਪਰਿਭੋਗੇ. ਪੁਰੇਭਤ੍ਤ…ਪੇ… ਪਚ੍ਛਿਮਯਾਮੇਸੁ ਪਚ੍ਚਵੇਕ੍ਖਿਤਬ੍ਬਨ੍ਤਿ ਸਮ੍ਬਨ੍ਧੋ. ਤਥਾ ਅਸਕ੍ਕੋਨ੍ਤੇਨ ਯਥਾਵੁਤ੍ਤਕਾਲਵਿਸੇਸਵਸੇਨ ਏਕਸ੍ਮਿਂ ਦਿਵਸੇ ਚਤੁਕ੍ਖਤ੍ਤੁਂ ਤਿਕ੍ਖਤ੍ਤੁਂ ਦ੍ਵਿਕ੍ਖਤ੍ਤੁਂ ਸਕਿਂਯੇਵ ਵਾ ਪਚ੍ਚਵੇਕ੍ਖਿਤਬ੍ਬਂ.
ਸਚਸ੍ਸ ਅਪਚ੍ਚਵੇਕ੍ਖਤੋਵ ਅਰੁਣੋ ਉਗ੍ਗਚ੍ਛਤਿ, ਇਣਪਰਿਭੋਗਟ੍ਠਾਨੇ ਤਿਟ੍ਠਤੀਤਿ ਏਤ੍ਥ ‘‘ਹਿਯ੍ਯੋ ਯਂ ਮਯਾ ਚੀਵਰਂ ਪਰਿਭੁਤ੍ਤਂ, ਤਂ ਯਾਵਦੇਵ ਸੀਤਸ੍ਸ ਪਟਿਘਾਤਾਯ…ਪੇ… ਹਿਰਿਕੋਪੀਨਪ੍ਪਟਿਚ੍ਛਾਦਨਤ੍ਥਂ, ਹਿਯ੍ਯੋ ਯੋ ਮਯਾ ਪਿਣ੍ਡਪਾਤੋ ਪਰਿਭੁਤ੍ਤੋ, ਸੋ ਨੇਵ ਦਵਾਯਾਤਿਆਦਿਨਾ ਸਚੇ ਅਤੀਤਪਰਿਭੋਗਪਚ੍ਚਵੇਕ੍ਖਣਂ ਨ ਕਰੇਯ੍ਯ, ਇਣਪਰਿਭੋਗਟ੍ਠਾਨੇ ਤਿਟ੍ਠਤੀ’’ਤਿ ਵਦਨ੍ਤਿ, ਵੀਮਂਸਿਤਬ੍ਬਂ. ਸੇਨਾਸਨਮ੍ਪਿ ਪਰਿਭੋਗੇ ਪਰਿਭੋਗੇਤਿ ਪਵੇਸੇ ਪਵੇਸੇ. ਏਵਂ ਪਨ ਅਸਕ੍ਕੋਨ੍ਤੇਨ ਪੁਰੇਭਤ੍ਤਾਦੀਸੁ ਪਚ੍ਚਵੇਕ੍ਖਿਤਬ੍ਬਂ. ਤਂ ਹੇਟ੍ਠਾ ਵੁਤ੍ਤਨਯੇਨੇਵ ਸਕ੍ਕਾ ਵਿਞ੍ਞਾਤੁਨ੍ਤਿ ਇਧ ਵਿਸੁਂ ਨ ਵੁਤ੍ਤਂ. ਸਤਿਪਚ੍ਚਯਤਾਤਿ ਸਤਿਯਾ ਪਚ੍ਚਯਭਾਵੋ, ਪਟਿਗ੍ਗਹਣਸ੍ਸ ਪਰਿਭੋਗਸ੍ਸ ਚ ਪਚ੍ਚਵੇਕ੍ਖਣਸਤਿਯਾ ਪਚ੍ਚਯਭਾਵੋ ਯੁਜ੍ਜਤਿ, ਪਚ੍ਚਵੇਕ੍ਖਿਤ੍ਵਾਵ ਪਟਿਗ੍ਗਹੇਤਬ੍ਬਂ ਪਰਿਭੁਞ੍ਜਿਤਬ੍ਬਞ੍ਚਾਤਿ ਅਤ੍ਥੋ. ਤੇਨੇਵਾਹ ‘‘ਸਤਿਂ ਕਤ੍ਵਾ’’ਤਿਆਦਿ. ਏਵਂ ਸਨ੍ਤੇਪੀਤਿ ਯਦਿਪਿ ਦ੍ਵੀਸੁਪਿ ਠਾਨੇਸੁ ਪਚ੍ਚਵੇਕ੍ਖਣਾ ਯੁਤ੍ਤਾ, ਏਵਂ ਸਨ੍ਤੇਪਿ. ਅਪਰੇ ਪਨਾਹੁ ‘‘ਸਤਿਪਚ੍ਚਯਤਾਤਿ ਸਤਿਭੇਸਜ੍ਜਪਰਿਭੋਗਸ੍ਸ ਪਚ੍ਚਯਭਾਵੇ ਪਚ੍ਚਯੇਤਿ ਅਤ੍ਥੋ. ਏਵਂ ਸਨ੍ਤੇਪੀਤਿ ਪਚ੍ਚਯੇ ਸਤਿਪੀ’’ਤਿ, ਤਂ ਤੇਸਂ ਮਤਿਮਤ੍ਤਂ. ਤਥਾ ਹਿ ਪਚ੍ਚਯਸਨ੍ਨਿਸ੍ਸਿਤਸੀਲਂ ਪਚ੍ਚਵੇਕ੍ਖਣਾਯ ਵਿਸੁਜ੍ਝਤਿ, ਨ ਪਚ੍ਚਯਸਬ੍ਭਾਵਮਤ੍ਤੇਨ.
ਨਨੁ ਚ ‘‘ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤੀ’’ਤਿ ਇਮਿਨਾ ਪਾਤਿਮੋਕ੍ਖਸਂਵਰਸੀਲਂ ਵੁਤ੍ਤਂ, ਤਸ੍ਮਾ ਪਚ੍ਚਯਸਨ੍ਨਿਸ੍ਸਿਤਸੀਲਸ੍ਸ ਪਾਤਿਮੋਕ੍ਖਸਂਵਰਸੀਲਸ੍ਸ ਚ ਕੋ ਵਿਸੇਸੋਤਿ? ਵੁਚ੍ਚਤੇ – ਪੁਰਿਮੇਸੁ ਤਾਵ ਤੀਸੁ ਪਚ੍ਚਯੇਸੁ ਵਿਸੇਸੋ ਪਾਕਟੋਯੇਵ, ਗਿਲਾਨਪਚ੍ਚਯੇ ਪਨ ਯਥਾ ਵਤਿਂ ਕਤ੍ਵਾ ਰੁਕ੍ਖਮੂਲੇ ਗੋਪਿਤੇ ਤਸ੍ਸ ਫਲਾਨਿਪਿ ਰਕ੍ਖਿਤਾਨਿਯੇਵ ਹੋਨ੍ਤਿ, ਏਵਮੇਵ ਪਚ੍ਚਵੇਕ੍ਖਣਾਯ ਪਚ੍ਚਯਸਨ੍ਨਿਸ੍ਸਿਤਸੀਲੇ ਰਕ੍ਖਿਤੇ ਤਪ੍ਪਟਿਬਦ੍ਧਂ ਪਾਤਿਮੋਕ੍ਖਸਂਵਰਸੀਲਮ੍ਪਿ ਨਿਪ੍ਫਨ੍ਨਂ ਨਾਮ ਹੋਤਿ. ਗਿਲਾਨਪਚ੍ਚਯਂ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਸੀਲਂ ਭਿਜ੍ਜਮਾਨਂ ਪਾਤਿਮੋਕ੍ਖਸਂਵਰਸੀਲਮੇਵ ਭਿਜ੍ਜਤਿ, ਪਚ੍ਚਯਸਨ੍ਨਿਸ੍ਸਿਤਸੀਲਂ ਪਨ ਪਚ੍ਛਾਭਤ੍ਤਪੁਰਿਮਯਾਮਾਦੀਸੁ ਯਾਵ ਅਰੁਣੁਗ੍ਗਮਨਾ ਅਪਚ੍ਚਵੇਕ੍ਖਨ੍ਤਸ੍ਸੇਵ ਭਿਜ੍ਜਤਿ. ਪੁਰੇਭਤ੍ਤਞ੍ਹਿ ਅਪਚ੍ਚਵੇਕ੍ਖਿਤ੍ਵਾਪਿ ਗਿਲਾਨਪਚ੍ਚਯਂ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ, ਇਦਮੇਤੇਸਂ ਨਾਨਾਕਰਣਂ.
ਏਵਂ ਪਚ੍ਚਯਸਨ੍ਨਿਸ੍ਸਿਤਸੀਲਸ੍ਸ ਵਿਸੁਦ੍ਧਿਂ ਦਸ੍ਸੇਤ੍ਵਾ ਤੇਨੇਵ ਪਸਙ੍ਗੇਨ ਸਬ੍ਬਾਪਿ ਸੁਦ੍ਧਿਯੋ ਦਸ੍ਸੇਤੁਂ ‘‘ਚਤੁਬ੍ਬਿਧਾ ਹਿ ਸੁਦ੍ਧੀ’’ਤਿਆਦਿਮਾਹ. ਤਤ੍ਥ ਸੁਜ੍ਝਤਿ ਏਤਾਯਾਤਿ ਸੁਦ੍ਧਿ, ਯਥਾਧਮ੍ਮਂ ਦੇਸਨਾਵ ਸੁਦ੍ਧਿ ਦੇਸਨਾਸੁਦ੍ਧਿ. ਵੁਟ੍ਠਾਨਸ੍ਸਪਿ ਚੇਤ੍ਥ ਦੇਸਨਾਯ ਏਵ ਸਙ੍ਗਹੋ ਦਟ੍ਠਬ੍ਬੋ. ਛਿਨ੍ਨਮੂਲਾਪਤ੍ਤੀਨਂ ਪਨ ਅਭਿਕ੍ਖੁਤਾਪਟਿਞ੍ਞਾਵ ਦੇਸਨਾ. ਅਧਿਟ੍ਠਾਨਵਿਸਿਟ੍ਠੋ ਸਂਵਰੋਵ ਸੁਦ੍ਧਿ ਸਂਵਰਸੁਦ੍ਧਿ. ਧਮ੍ਮੇਨ ਸਮੇਨ ਪਚ੍ਚਯਾਨਂ ਪਰਿਯੇਟ੍ਠਿ ਏਵ ਸੁਦ੍ਧਿ ਪਰਿਯੇਟ੍ਠਿਸੁਦ੍ਧਿ. ਚਤੂਸੁ ਪਚ੍ਚਯੇਸੁ ਵੁਤ੍ਤਵਿਧਿਨਾ ਪਚ੍ਚਵੇਕ੍ਖਣਾਵ ਸੁਦ੍ਧਿ ਪਚ੍ਚਵੇਕ੍ਖਣਸੁਦ੍ਧਿ. ਏਸ ਤਾਵ ਸੁਦ੍ਧੀਸੁ ਸਮਾਸਨਯੋ. ਸੁਦ੍ਧਿਮਨ੍ਤੇਸੁ ਸੀਲੇਸੁ ਦੇਸਨਾ ਸੁਦ੍ਧਿ ਏਤਸ੍ਸਾਤਿ ਦੇਸਨਾਸੁਦ੍ਧਿ. ਸੇਸੇਸੁਪਿ ਏਸੇਵ ਨਯੋ. ਨ ਪੁਨ ਏਵਂ ਕਰਿਸ੍ਸਾਮੀਤਿ ਏਤ੍ਥ ਏਵਨ੍ਤਿ ਸਂਵਰਭੇਦਂ ਸਨ੍ਧਾਯਾਹ. ਪਹਾਯਾਤਿ ਵਜ੍ਜੇਤ੍ਵਾ, ਅਕਤ੍ਵਾਤਿ ਅਤ੍ਥੋ. ਦਾਤਬ੍ਬਟ੍ਠੇਨ ਦਾਯਂ, ਤਂ ਆਦਿਯਨ੍ਤੀਤਿ ਦਾਯਾਦਾ, ਅਨਨੁਞ੍ਞਾਤੇਸੁ ਸਬ੍ਬੇਨ ਸਬ੍ਬਂ ਪਰਿਭੋਗਾਭਾਵਤੋ ਅਨੁਞ੍ਞਾਤੇਸੁਯੇਵ ਚ ਪਰਿਭੋਗਸਬ੍ਭਾਵਭਾਵਤੋ ਭਿਕ੍ਖੂਹਿ ਪਰਿਭੁਞ੍ਜਿਤਬ੍ਬਪਚ੍ਚਯਾ ਭਗਵਤੋ ਸਨ੍ਤਕਾ. ਧਮ੍ਮਦਾਯਾਦਸੁਤ੍ਤਞ੍ਚੇਤ੍ਥ ਸਾਧਕਨ੍ਤਿ –
‘‘ਧਮ੍ਮਦਾਯਾਦਾ ਮੇ, ਭਿਕ੍ਖਵੇ, ਭਵਥ, ਮਾ ਆਮਿਸਦਾਯਾਦਾ. ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ, ‘ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾ’’’ਤਿ (ਮ. ਨਿ. ੧.੨੯) –
ਏਵਂ ਪਵਤ੍ਤਂ ਧਮ੍ਮਦਾਯਾਦਸੁਤ੍ਤਞ੍ਚ ਏਤ੍ਥ ਏਤਸ੍ਮਿਂ ਅਤ੍ਥੇ ਸਾਧਕਂ.
ਅਵੀਤਰਾਗਾਨਂ ਤਣ੍ਹਾਪਰਵਸਤਾਯ ਪਚ੍ਚਯਪਰਿਭੋਗੇ ਸਾਮਿਭਾਵੋ ਨਤ੍ਥਿ, ਤਦਭਾਵੇਨ ਵੀਤਰਾਗਾਨਂ ਤਤ੍ਥ ਸਾਮਿਭਾਵੋ ਯਥਾਰੁਚਿ ਪਰਿਭੋਗਸਬ੍ਭਾਵਤੋ. ਤਥਾ ਹਿ ਤੇ ਪਟਿਕੂਲਮ੍ਪਿ ਅਪ੍ਪਟਿਕੂਲਾਕਾਰੇਨ ਅਪ੍ਪਟਿਕੂਲਮ੍ਪਿ ਪਟਿਕੂਲਾਕਾਰੇਨ ਤਦੁਭਯਮ੍ਪਿ ਵਜ੍ਜੇਤ੍ਵਾ ਅਜ੍ਝੁਪੇਕ੍ਖਨਾਕਾਰੇਨ ਪਚ੍ਚਯੇ ਪਰਿਭੁਞ੍ਜਨ੍ਤਿ, ਦਾਯਕਾਨਞ੍ਚ ਮਨੋਰਥਂ ਪਰਿਪੂਰੇਨ੍ਤਿ. ਤੇਨਾਹ – ‘‘ਤੇ ਹਿ ਤਣ੍ਹਾਯ ਦਾਸਬ੍ਯਂ ਅਤੀਤਤ੍ਤਾ ਸਾਮਿਨੋ ਹੁਤ੍ਵਾ ਪਰਿਭੁਞ੍ਜਨ੍ਤੀ’’ਤਿ. ਯੋ ਪਨਾਯਂ ਸੀਲਵਤੋ ਪਚ੍ਚਵੇਕ੍ਖਿਤਪਰਿਭੋਗੋ, ਸੋ ਇਣਪਰਿਭੋਗਸ੍ਸ ਪਚ੍ਚਨੀਕਤ੍ਤਾ ਆਣਣ੍ਯਪਰਿਭੋਗੋ ਨਾਮ ਹੋਤਿ. ਯਥਾ ਹਿ ਇਣਾਯਿਕੋ ਅਤ੍ਤਨੋ ਰੁਚਿਯਾ ਇਚ੍ਛਿਤਦੇਸਂ ਗਨ੍ਤੁਂ ਨ ਲਭਤਿ, ਏਵਂ ਇਣਪਰਿਭੋਗਯੁਤ੍ਤੋ ਲੋਕਤੋ ਨਿਸ੍ਸਰਿਤੁਂ ਨ ਲਭਤੀਤਿ ਤਪ੍ਪਟਿਪਕ੍ਖਤ੍ਤਾ ਸੀਲਵਤੋ ਪਚ੍ਚਵੇਕ੍ਖਿਤਪਰਿਭੋਗੋ ਆਣਣ੍ਯਪਰਿਭੋਗੋਤਿ ਵੁਚ੍ਚਤਿ, ਤਸ੍ਮਾ ਨਿਪ੍ਪਰਿਯਾਯਤੋ ਚਤੁਪਰਿਭੋਗਵਿਨਿਮੁਤ੍ਤੋ ਵਿਸੁਂਯੇਵਾਯਂ ਪਰਿਭੋਗੋਤਿ ਵੇਦਿਤਬ੍ਬੋ. ਸੋ ਇਧ ਵਿਸੁਂ ਨ ਵੁਤ੍ਤੋ, ਦਾਯਜ੍ਜਪਰਿਭੋਗੇਯੇਵ ਵਾ ਸਙ੍ਗਹਂ ਗਚ੍ਛਤੀਤਿ. ਸੀਲਵਾਪਿ ਹਿ ਇਮਾਯ ਸਿਕ੍ਖਾਯ ਸਮਨ੍ਨਾਗਤਤ੍ਤਾ ਸੇਕ੍ਖੋਤ੍ਵੇਵ ਵੁਚ੍ਚਤਿ. ਸਬ੍ਬੇਸਨ੍ਤਿ ਅਰਿਯਾਨਂ ਪੁਥੁਜ੍ਜਨਾਨਞ੍ਚ.
ਕਥਂ ਪੁਥੁਜ੍ਜਨਾਨਂ ਇਮੇ ਪਰਿਭੋਗਾ ਸਮ੍ਭਵਨ੍ਤੀਤਿ? ਉਪਚਾਰਵਸੇਨ. ਯੋ ਹਿ ਪੁਥੁਜ੍ਜਨਸ੍ਸਪਿ ਸਲ੍ਲੇਖਪ੍ਪਟਿਪਤ੍ਤਿਯਂ ਠਿਤਸ੍ਸ ਪਚ੍ਚਯਗੇਧਂ ਪਹਾਯ ਤਤ੍ਥ ਅਨੁਪਲਿਤ੍ਤੇਨ ਚਿਤ੍ਤੇਨ ਪਰਿਭੋਗੋ, ਸੋ ਸਾਮਿਪਰਿਭੋਗੋ ਵਿਯ ਹੋਤਿ. ਸੀਲਵਤੋ ਪਨ ਪਚ੍ਚਵੇਕ੍ਖਿਤਪਰਿਭੋਗੋ ਦਾਯਜ੍ਜਪਰਿਭੋਗੋ ਵਿਯ ਹੋਤਿ ਦਾਯਕਾਨਂ ਮਨੋਰਥਸ੍ਸ ਅਵਿਰਾਧਨਤੋ. ਤੇਨੇਵ ਵੁਤ੍ਤਂ ‘‘ਦਾਯਜ੍ਜਪਰਿਭੋਗੇਯੇਵ ਵਾ ਸਙ੍ਗਹਂ ਗਚ੍ਛਤੀ’’ਤਿ. ਕਲ੍ਯਾਣਪੁਥੁਜ੍ਜਨਸ੍ਸ ਪਰਿਭੋਗੇ ਵਤ੍ਤਬ੍ਬਮੇਵ ਨਤ੍ਥਿ ਤਸ੍ਸ ਸੇਕ੍ਖਸਙ੍ਗਹਤੋ. ਸੇਕ੍ਖਸੁਤ੍ਤਞ੍ਹੇਤਸ੍ਸ ਅਤ੍ਥਸ੍ਸ ਸਾਧਕਂ.
ਲਜ੍ਜਿਨਾ ਸਦ੍ਧਿਂ ਪਰਿਭੋਗੋ ਨਾਮ ਲਜ੍ਜਿਸ੍ਸ ਸਨ੍ਤਕਂ ਗਹੇਤ੍ਵਾ ਪਰਿਭੋਗੋ. ਅਲਜ੍ਜਿਨਾ ਸਦ੍ਧਿਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਆਦਿਤੋ ਪਟ੍ਠਾਯ ਹਿ ਅਲਜ੍ਜੀ ਨਾਮ ਨਤ੍ਥੀਤਿ ਇਮਿਨਾ ਦਿਟ੍ਠਦਿਟ੍ਠੇਸੁਯੇਵ ਆਸਙ੍ਕਾ ਨ ਕਾਤਬ੍ਬਾਤਿ ਦਸ੍ਸੇਤਿ. ਅਤ੍ਤਨੋ ਭਾਰਭੂਤਾ ਸਦ੍ਧਿਵਿਹਾਰਿਕਾਦਯੋ. ਸੋਪਿ ਨਿਵਾਰੇਤਬ੍ਬੋਤਿ ਯੋ ਪਸ੍ਸਤਿ, ਤੇਨ ਨਿਵਾਰੇਤਬ੍ਬੋ. ਯਸ੍ਮਾ ਅਲਜ੍ਜੀਪਰਿਭੋਗੋ ਨਾਮ ਲਜ੍ਜਿਨੋ ਵੁਚ੍ਚਤਿ, ਤਸ੍ਮਾ ਆਪਤ੍ਤਿ ਨਾਮ ਨਤ੍ਥਿ ਉਭਿਨ੍ਨਮ੍ਪਿ ਅਲਜ੍ਜੀਭਾਵਤੋ, ‘‘ਅਲਜ੍ਜੀਪਰਿਭੋਗੋ’’ਤਿ ਇਦਂ ਨਾਮਮਤ੍ਤਮੇਵ ਨ ਲਬ੍ਭਤੀਤਿ ਵੁਤ੍ਤਂ ਹੋਤਿ. ‘‘ਆਪਤ੍ਤਿ ਪਨ ਅਤ੍ਥਿਯੇਵਾਤਿ ਵਦਨ੍ਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ.
ਅਧਮ੍ਮਿਯੋਤਿ ਅਨੇਸਨਾਦੀਹਿ ਉਪ੍ਪਨ੍ਨੋ. ਧਮ੍ਮਿਯੋਤਿ ਭਿਕ੍ਖਾਚਰਿਯਾਦੀਹਿ ਉਪ੍ਪਨ੍ਨੋ. ਸਙ੍ਘਸ੍ਸੇਵ ਦੇਤੀਤਿ ਭਤ੍ਤਂ ਅਗ੍ਗਹੇਤ੍ਵਾ ਅਤ੍ਤਨਾ ਲਦ੍ਧਸਲਾਕਂਯੇਵ ਦੇਤਿ. ਸਚੇ ਪਨ ਲਜ੍ਜੀ ਅਲਜ੍ਜਿਂ ਪਗ੍ਗਣ੍ਹਾਤਿ…ਪੇ… ਅਨ੍ਤਰਧਾਪੇਤੀਤਿ ਏਤ੍ਥ ਕੇਵਲਂ ਪਗ੍ਗਣ੍ਹਿਤੁਕਾਮਤਾਯ ਏਵਂ ਕਾਤੁਂ ਨ ਵਟ੍ਟਤਿ, ਧਮ੍ਮਸ੍ਸ ਪਨ ਸਾਸਨਸ੍ਸ ਸੋਤੂਨਞ੍ਚ ਅਨੁਗ੍ਗਹਤ੍ਥਾਯ ਵਟ੍ਟਤੀਤਿ ਵੇਦਿਤਬ੍ਬਂ. ਪੁਰਿਮਨਯੇਨ ‘‘ਸੋ ਆਪਤ੍ਤਿਯਾ ਕਾਰੇਤਬ੍ਬੋ’’ਤਿ ਵੁਤ੍ਤਤ੍ਤਾ ਇਮਸ੍ਸ ਆਪਤ੍ਤਿਯੇਵਾਤਿ ਵਦਨ੍ਤਿ. ਉਦ੍ਦੇਸਗ੍ਗਹਣਾਦਿਨਾ ਧਮ੍ਮਸ੍ਸ ਪਰਿਭੋਗੋ ਧਮ੍ਮਪਰਿਭੋਗੋ. ਧਮ੍ਮਾਨੁਗ੍ਗਹੇਨ ਗਣ੍ਹਨ੍ਤਸ੍ਸ ਆਪਤ੍ਤਿਯਾ ਅਭਾਵੇਪਿ ਥੇਰੋ ਤਸ੍ਸ ਅਲਜ੍ਜਿਭਾਵਂਯੇਵ ਸਨ੍ਧਾਯ ‘‘ਪਾਪੋ ਕਿਰਾਯ’’ਨ੍ਤਿਆਦਿਮਾਹ. ਤਸ੍ਸ ਪਨ ਸਨ੍ਤਿਕੇਤਿ ਮਹਾਰਕ੍ਖਿਤਤ੍ਥੇਰਸ੍ਸ ਸਨ੍ਤਿਕੇ.
੫੮੬. ਰਾਜੋਰੋਧਾਦਯੋਤਿਆਦਿ ‘‘ਇਦਂ ਗਣ੍ਹਿਸ੍ਸਾਮੀ’’ਤਿ ਚੇਤਨਾਮਤ੍ਤਸਮ੍ਭਵਤੋ ਵੁਤ੍ਤਂ. ਅਸ੍ਸਤਿਯਾ ਦਿਨ੍ਨਨ੍ਤਿ ਏਤ੍ਥ ਅਸ੍ਸਤਿਯਾ ਦਿਨ੍ਨਂ ਨਾਮ ਅਪਰਿਚ੍ਚਤ੍ਤਂ ਹੋਤਿ, ਤਸ੍ਮਾ ਦਸਨ੍ਤੇ ਬਦ੍ਧਕਹਾਪਣਾਦਿ ਅਸ੍ਸਤਿਯਾ ਦਿਨ੍ਨਂ ਭਿਕ੍ਖੁਨਾ ਵਤ੍ਥਸਞ੍ਞਾਯ ਪਟਿਗ੍ਗਹਿਤਞ੍ਚ, ਤਤੋ ਨੇਵ ਰੂਪਿਯਂ ਦਿਨ੍ਨਂ, ਨਾਪਿ ਪਟਿਗ੍ਗਹਿਤਞ੍ਚ ਹੋਤੀਤਿ ਏਤ੍ਥ ਆਪਤ੍ਤਿਦੇਸਨਾਕਿਚ੍ਚਂ ਨਤ੍ਥਿ, ਤਂ ਪਨ ਦਾਯਕਾਨਮੇਵ ਪਟਿਦਾਤਬ੍ਬਂ. ਤੇਨ ਅਕਪ੍ਪਿਯਵਤ੍ਥੁਨਾ ਤੇ ਚੇ ਦਾਯਕਾ ਸਪ੍ਪਿਆਦੀਨਿ ਕਿਣਿਤ੍ਵਾਨ ਸਙ੍ਘਸ੍ਸ ਤਸ੍ਸ ਚ ਭਿਕ੍ਖੁਨੋ ਦੇਨ੍ਤਿ, ਸਬ੍ਬੇਸਂ ਕਪ੍ਪਤਿ ਦਾਯਕਾਨਂਯੇਵ ਸਨ੍ਤਕਤ੍ਤਾ. ਅਟ੍ਠਕਥਾਯਂ ਪਨ ਪੁਞ੍ਞਕਾਮੇਹਿ ਪਰਿਚ੍ਚਜਿਤ੍ਵਾ ਦਿਨ੍ਨਮੇਵ ਸਨ੍ਧਾਯ ‘‘ਪੁਞ੍ਞਕਾਮਾ…ਪੇ… ਰੂਪਿਯੇ ਅਰੂਪਿਯਸਞ੍ਞੀ ਰੂਪਿਯਂ ਪਟਿਗ੍ਗਣ੍ਹਾਤੀਤਿ ਵੇਦਿਤਬ੍ਬੋ’’ਤਿ ਵੁਤ੍ਤਂ, ਤਸ੍ਮਾ ਪਰਿਚ੍ਚਜਿਤ੍ਵਾ ਦਿਨ੍ਨਂ ਵਤ੍ਥਸਞ੍ਞਾਯ ਗਣ੍ਹਤੋਪਿ ਨਿਸ੍ਸਗ੍ਗਿਯਮੇਵ. ਤੇਨ ਯਦਿ ਤੇ ਦਾਯਕਾ ਨੋ ਆਗਨ੍ਤ੍ਵਾ ਗਣ੍ਹਨ੍ਤਿ, ਦਾਯਕੇ ਪੁਚ੍ਛਿਤ੍ਵਾ ਅਤ੍ਤਨੋ ਅਤ੍ਥਾਯ ਚੇ ਪਰਿਚ੍ਚਤ੍ਤਂ, ਸਙ੍ਘੇ ਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾ. ਤਵ ਚੋਲ਼ਕਂ ਪਸ੍ਸਾਹੀਹਿ ਇਮਿਨਾ ਗਿਹਿਸਨ੍ਤਕੇਪਿ ‘‘ਇਦਂ ਗਣ੍ਹਥਾ’’ਤਿਆਦਿਅਕਪ੍ਪਿਯਵੋਹਾਰੇਨ ਵਿਧਾਨਂ ਭਿਕ੍ਖੁਨੋ ਨ ਕਪ੍ਪਤੀਤਿ ਦੀਪੇਤਿ. ਏਕਪਰਿਚ੍ਛੇਦਾਨੀਤਿ ਕਿਰਿਯਾਕਿਰਿਯਭਾਵਤੋ ਏਕਪਰਿਚ੍ਛੇਦਾਨਿ. ਜਾਤਰੂਪਰਜਤਭਾਵੋ, ਅਤ੍ਤੁਦ੍ਦੇਸਿਕਤਾ, ਕਹਾਪਣਾਦੀਸੁ ਅਞ੍ਞਤਰਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਰੂਪਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ
੫੮੭. ਰੂਪਿਯਸਂਵੋਹਾਰਸਿਕ੍ਖਾਪਦੇ ਜਾਤਰੂਪਾਦਿਚਤੁਬ੍ਬਿਧਮ੍ਪਿ ਨਿਸ੍ਸਗ੍ਗਿਯਵਤ੍ਥੁ ਇਧ ਰੂਪਿਯਗ੍ਗਹਣੇਨੇਵ ਗਹਿਤਨ੍ਤਿ ਆਹ ‘‘ਜਾਤਰੂਪਰਜਤਪਰਿਵਤ੍ਤਨ’’ਨ੍ਤਿ. ਪਟਿਗ੍ਗਹਿਤਪਰਿਵਤ੍ਤਨੇਤਿ ਸਾਦਿਤਰੂਪਿਯਸ੍ਸ ਪਰਿਵਤ੍ਤਨੇ, ਅਸਾਦਿਯਿਤ੍ਵਾ ਵਾ ਕਪ੍ਪਿਯੇਨ ਗਾਹੇਨ ਪਟਿਗ੍ਗਹਿਤਰੂਪਿਯਪਰਿਵਤ੍ਤਨੇ.
੫੮੯. ਗ-ਕਾਰਸ੍ਸ ਕ-ਕਾਰਂ ਕਤ੍ਵਾ ‘‘ਸੀਸੂਪਕ’’ਨ੍ਤਿ ਲਿਖਿਤਂ, ਪਦਭਾਜਨੇ ਘਨਕਤਨ੍ਤਿ ਪਿਣ੍ਡਂ ਕਤਂ. ਸਤ੍ਥੁਵਣ੍ਣੋਤਿਆਦੀਸੁ ‘‘ਸਤ੍ਥੁਵਣ੍ਣੋ ਚ ਕਹਾਪਣੋ ਚ…ਪੇ… ਯੇ ਚ ਵੋਹਾਰਂ ਗਚ੍ਛਨ੍ਤੀ’’ਤਿ ਏਵਂ ਸਬ੍ਬਤ੍ਥ ਸਮੁਚ੍ਚਯੋ ਵੇਦਿਤਬ੍ਬੋ. ਰੂਪਿਯੇ ਰੂਪਿਯਸਞ੍ਞੀਤਿ ਸਕਸਨ੍ਤਕਂ ਵਦਤਿ. ਰੂਪਿਯਂ ਚੇਤਾਪੇਤੀਤਿ ਪਰਸਨ੍ਤਕਂ ਵਦਤਿ. ‘‘ਨਿਸ੍ਸਗ੍ਗਿਯਵਤ੍ਥੁਨਾ ਦੁਕ੍ਕਟਵਤ੍ਥੁਂ ਵਾ ਕਪ੍ਪਿਯਵਤ੍ਥੁਂ ਵਾ ਚੇਤਾਪੇਨ੍ਤਸ੍ਸਪਿ ਏਸੇਵ ਨਯੋ’’ਤਿ ਇਦਂ ਕਸ੍ਮਾ ਵੁਤ੍ਤਂ. ਨ ਹਿ ‘‘ਰੂਪਿਯੇ ਰੂਪਿਯਸਞ੍ਞੀ ਅਰੂਪਿਯਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿਆਦਿਤ੍ਤਿਕੋ ਪਾਲ਼ਿਯਂ ਵੁਤ੍ਤੋਤਿ ਆਹ ‘‘ਯੋ ਹੀ’’ਤਿਆਦਿ. ਤਸ੍ਸਾਨੁਲੋਮਤ੍ਤਾਤਿ ਏਤ੍ਥਾਯਮਧਿਪ੍ਪਾਯੋ – ਰੂਪਿਯਸਂਵੋਹਾਰੋ ਨਾਮ ਨ ਕੇਵਲਂ ਰੂਪਿਯੇਨ ਰੂਪਿਯਪਰਿਵਤ੍ਤਨਮੇਵ, ਅਥ ਖੋ ‘‘ਅਰੂਪਿਯੇ ਰੂਪਿਯਸਞ੍ਞੀ ਰੂਪਿਯਂ ਚੇਤਾਪੇਤੀ’’ਤਿ ਵੁਤ੍ਤਤ੍ਤਾ ਅਰੂਪਿਯੇਨ ਰੂਪਿਯਚੇਤਾਪਨਮ੍ਪਿ ਰੂਪਿਯਸਂਵੋਹਾਰੋ ਨਾਮ ਹੋਤੀਤਿ ਏਤਸ੍ਮਿਂ ਪਕ੍ਖੇਪਿ ਰੂਪਿਯੇ ਸਤਿ ਰੂਪਿਯਸਂਵੋਹਾਰੋਯੇਵ ਹੋਤੀਤਿ ਅਯਮਤ੍ਥੋ ਅਵੁਤ੍ਤੋਪਿ ਵਿਞ੍ਞਾਯਤੀਤਿ. ਅਰੂਪਿਯਂ ਨਾਮ ਦੁਕ੍ਕਟਵਤ੍ਥੁਕਪ੍ਪਿਯਵਤ੍ਥੂਨਿ. ਏਕਨ੍ਤੇਨ ਰੂਪਿਯਪਕ੍ਖੇਤਿ ਏਕੇਨ ਅਨ੍ਤੇਨ ਰੂਪਿਯਪਕ੍ਖੇਤਿ ਅਯਂ ਅਤ੍ਥੋ ਗਹੇਤਬ੍ਬੋ. ‘‘ਏਕਤੋ ਰੂਪਿਯਪਕ੍ਖੇ’’ਤਿ ਵਾ ਪਾਠੋ ਵੇਦਿਤਬ੍ਬੋ. ‘‘ਏਕਰੂਪਿਯਪਕ੍ਖੇ’’ਤਿਪਿ ਪਠਨ੍ਤਿ, ਤਤ੍ਥਾਪਿ ਏਕਤੋ ਰੂਪਿਯਪਕ੍ਖੇਤਿ ਅਯਮੇਵਤ੍ਥੋ ਗਹੇਤਬ੍ਬੋ.
ਕਪ੍ਪਿਯਵਤ੍ਥੁਨਾ ਕਪ੍ਪਿਯਵਤ੍ਥੁਨੋ ਕਯਵਿਕ੍ਕਯੇਪਿ ਤਾਵ ਨਿਸ੍ਸਗ੍ਗਿਯਂ ਹੋਤਿ, ਦੁਕ੍ਕਟਵਤ੍ਥੁਨਾ ਦੁਕ੍ਕਟਵਤ੍ਥੁਨੋ ਕਯਵਿਕ੍ਕਯੇ ਕਸ੍ਮਾ ਨ ਹੋਤੀਤਿ ਅਨ੍ਧਕਟ੍ਠਕਥਾਯ ਅਧਿਪ੍ਪਾਯੋ. ਇਦਂ ਸਿਕ੍ਖਾਪਦਂ…ਪੇ… ਅਰੂਪਿਯੇਨ ਚ ਰੂਪਿਯਚੇਤਾਪਨਂ ਸਨ੍ਧਾਯ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਇਧਾਤਿ ਇਮਸ੍ਮਿਂ ਰੂਪਿਯਸਂਵੋਹਾਰਸਿਕ੍ਖਾਪਦੇ. ਤਤ੍ਥਾਤਿ ਕਯਵਿਕ੍ਕਯਸਿਕ੍ਖਾਪਦੇ. ਤੇਨੇਵਾਤਿ ਕਪ੍ਪਿਯਵਤ੍ਥੁਨਾਯੇਵ.
ਪੁਨ ਕਪ੍ਪਿਯਭਾਵਂ ਨੇਤੁਂ ਅਸਕ੍ਕੁਣੇਯ੍ਯਤ੍ਤਾ ‘‘ਮਹਾਅਕਪ੍ਪਿਯੋ ਨਾਮਾ’’ਤਿ ਵੁਤ੍ਤਂ. ‘‘ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁਨ੍ਤਿ ਇਦਂ ਪਞ੍ਚਨ੍ਨਂਯੇਵ ਸਹਧਮ੍ਮਿਕਾਨਂ ਅਨ੍ਤਰੇ ਪਰਿਵਤ੍ਤਨਂ ਸਨ੍ਧਾਯ ਵੁਤ੍ਤਂ, ਗਿਹੀਹਿ ਪਨ ਗਹੇਤ੍ਵਾ ਅਤ੍ਤਨੋ ਸਨ੍ਤਕਂ ਕਤ੍ਵਾ ਦਿਨ੍ਨਂ ਸਬ੍ਬੇਸਂ ਕਪ੍ਪਤੀ’’ਤਿ ਵਦਨ੍ਤਿ. ‘‘ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁ’’ਨ੍ਤਿ ਪਨ ਇਮਿਨਾਵ ਪਟਿਗ੍ਗਹਿਤਰੂਪਿਯਂ ਅਨਿਸ੍ਸਜ੍ਜਿਤ੍ਵਾਵ ਤੇਨ ਚੇਤਾਪਿਤਂ ਕਪ੍ਪਿਯਭਣ੍ਡਮ੍ਪਿ ਸਙ੍ਘਸ੍ਸ ਨਿਸ੍ਸਟ੍ਠਂ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਸਿਦ੍ਧਂ.
ਯੇ ਪਨ ‘‘ਪਟਿਗ੍ਗਹਿਤਰੂਪਿਯਂ ਅਨਿਸ੍ਸਜ੍ਜਿਤ੍ਵਾਪਿ ਤੇਨ ਪਰਿਵਤ੍ਤਿਤਂ ਕਪ੍ਪਿਯਭਣ੍ਡਂ ਸਙ੍ਘਸ੍ਸ ਨਿਸ੍ਸਟ੍ਠਂ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤੇਸਂ ‘‘ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁ’’ਨ੍ਤਿ ਇਦਂ ਨ ਯੁਜ੍ਜਤਿ. ਤੇ ਪਨੇਤ੍ਥ ਏਵਂ ਵਦਨ੍ਤਿ ‘‘ਯਸ੍ਮਾ ਨਿਸ੍ਸਜ੍ਜਿਤਬ੍ਬਵਤ੍ਥੁਂ ਅਨਿਸ੍ਸਜ੍ਜਿਤ੍ਵਾਵ ਉਪਰੂਪਰਿ ਅਞ੍ਞਂ ਅਞ੍ਞਂਯੇਵ ਕਤਂ, ਤਸ੍ਮਾ ਪਰਿਚ੍ਛੇਦਾਭਾਵਤੋ ਇਧ ਨਿਸ੍ਸਜ੍ਜਿਤੁਂ ਅਵਤ੍ਵਾ ‘ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁ’ਨ੍ਤਿ ਵੁਤ੍ਤਂ, ਪਰਿਚ੍ਛੇਦਾਭਾਵਤੋਯੇਵ ‘ਮੂਲੇ ਮੂਲਸਾਮਿਕਾਨਂ, ਪਤ੍ਤੇ ਚ ਪਤ੍ਤਸਾਮਿਕਾਨਂ ਦਿਨ੍ਨੇ ਕਪ੍ਪਿਯੋ ਹੋਤੀ’ਤਿ ਚ ਨ ਵੁਤ੍ਤ’’ਨ੍ਤਿ. ਯਦਿ ਪਟਿਗ੍ਗਹਿਤਰੂਪਿਯਂ ਅਨਿਸ੍ਸਜ੍ਜਿਤ੍ਵਾ ਚੇਤਾਪਿਤਂ ਕਪ੍ਪਿਯਭਣ੍ਡਮ੍ਪਿ ਸਙ੍ਘਸ੍ਸ ਨਿਸ੍ਸਟ੍ਠਂ ਪਰਿਭੁਞ੍ਜਿਤੁਂ ਵਟ੍ਟਤਿ, ਏਵਂ ਸਨ੍ਤੇ ਇਧਾਪਿ ਅਵਸਾਨਵਤ੍ਥੁਂ ਗਹੇਤ੍ਵਾ ਸਙ੍ਘਸ੍ਸ ਨਿਸ੍ਸਟ੍ਠਂ ਕਸ੍ਮਾ ਨ ਵਟ੍ਟਤਿ, ‘‘ਯੋ ਪਨ ਰੂਪਿਯਂ ਉਗ੍ਗਣ੍ਹਿਤ੍ਵਾ…ਪੇ… ਪਤ੍ਤੇ ਚ ਪਤ੍ਤਸਾਮਿਕਾਨਂ ਦਿਨ੍ਨੇ ਕਪ੍ਪਿਯੋ ਹੋਤੀ’’ਤਿ ਇਮਿਨਾਪਿ ਪਟਿਗ੍ਗਹਿਤਰੂਪਿਯਂ ਅਨਿਸ੍ਸਜ੍ਜਿਤ੍ਵਾ ਚੇਤਾਪਿਤਂ ਕਪ੍ਪਿਯਭਣ੍ਡਮ੍ਪਿ ਸਙ੍ਘਸ੍ਸ ਨਿਸ੍ਸਟ੍ਠਂ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਸਿਦ੍ਧਂ. ਯਦਿ ਤਂ ਨਿਸ੍ਸਟ੍ਠਂ ਪਰਿਭੁਞ੍ਜਿਤੁਂ ਵਟ੍ਟੇਯ੍ਯ, ‘‘ਮੂਲੇ ਮੂਲਸਾਮਿਕਾਨਂ, ਪਤ੍ਤੇ ਚ ਪਤ੍ਤਸਾਮਿਕਾਨਂ ਦਿਨ੍ਨੇ ਕਪ੍ਪਿਯੋ ਹੋਤੀ’’ਤਿ ਨ ਵਦੇਯ੍ਯ. ਅਪਰੇ ਪਨੇਤ੍ਥ ਏਵਂ ਵਦਨ੍ਤਿ ‘‘ਯਦਿ ਸਙ੍ਘਸ੍ਸ ਨਿਸ੍ਸਟ੍ਠਂ ਹੋਤਿ, ਰੂਪਿਯਪਟਿਗ੍ਗਾਹਕਸ੍ਸ ਨ ਵਟ੍ਟਤਿ, ਤਸ੍ਮਾ ਤਸ੍ਸਪਿ ਯਥਾ ਵਟ੍ਟਤਿ, ਤਥਾ ਦਸ੍ਸਨਤ੍ਥਂ ‘ਮੂਲੇ ਮੂਲਸਾਮਿਕਾਨ’ਨ੍ਤਿਆਦਿ ਵੁਤ੍ਤ’’ਨ੍ਤਿ.
ਦੁਤਿਯਪਤ੍ਤਸਦਿਸੋਯੇਵਾਤਿ ਇਮਿਨਾ ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਕਪ੍ਪਤੀਤਿ ਦਸ੍ਸੇਤਿ. ਤਤ੍ਥ ਕਾਰਣਮਾਹ ‘‘ਮੂਲਸ੍ਸ ਸਮ੍ਪਟਿਚ੍ਛਿਤਤ੍ਤਾ’’ਤਿ. ਅਥ ਮੂਲਸ੍ਸ ਸਮ੍ਪਟਿਚ੍ਛਿਤਤ੍ਤਾ ਰੂਪਿਯਪਟਿਗ੍ਗਾਹਕਸ੍ਸ ਤਾਵ ਅਕਪ੍ਪਿਯੋ ਹੋਤੁ, ਸੇਸਾਨਂ ਪਨ ਕਸ੍ਮਾ ਨ ਕਪ੍ਪਤੀਤਿ ਮਞ੍ਞਮਾਨੋ ਪੁਚ੍ਛਤਿ ‘‘ਕਸ੍ਮਾ ਸੇਸਾਨਂ ਨ ਕਪ੍ਪਤੀ’’ਤਿ. ਕਾਰਣਮਾਹ ‘‘ਮੂਲਸ੍ਸ ਅਨਿਸ੍ਸਟ੍ਠਤ੍ਤਾ’’ਤਿ. ਪਤ੍ਤਸ੍ਸ ਕਪ੍ਪਿਯਭਾਵੇਪਿ ਸਮ੍ਪਟਿਚ੍ਛਿਤਮੂਲਸ੍ਸ ਨਿਸ੍ਸਜ੍ਜਿਤਬ੍ਬਸ੍ਸ ਅਨਿਸ੍ਸਟ੍ਠਤ੍ਤਾ ਤੇਨ ਗਹਿਤਪਤ੍ਤੋ ਸੇਸਾਨਮ੍ਪਿ ਨ ਕਪ੍ਪਤਿ. ਯਦਿ ਹਿ ਤੇਨ ਸਮ੍ਪਟਿਚ੍ਛਿਤਮੂਲਂ ਸਙ੍ਘਮਜ੍ਝੇ ਨਿਸ੍ਸਟ੍ਠਂ ਸਿਯਾ, ਤੇਨ ਕਪ੍ਪਿਯੇਨ ਕਮ੍ਮੇਨ ਆਰਾਮਿਕਾਦੀਹਿ ਗਹੇਤ੍ਵਾ ਦਿਨ੍ਨਪਤ੍ਤੋ ਰੂਪਿਯਪਟਿਗ੍ਗਾਹਕਂ ਠਪੇਤ੍ਵਾ ਸੇਸਾਨਂ ਵਟ੍ਟਤਿ. ਅਪਰੇ ਪਨ ‘‘ਮੂਲਂ ਸਮ੍ਪਟਿਚ੍ਛਿਤ੍ਵਾ ਗਹਿਤਪਤ੍ਤੋਪਿ ਯਦਿ ਸਙ੍ਘਸ੍ਸ ਨਿਸ੍ਸਟ੍ਠੋ, ਸੇਸਾਨਂ ਕਪ੍ਪਤੀ’’ਤਿ ਵਦਨ੍ਤਿ. ਏਵਂ ਸਨ੍ਤੇ ‘‘ਮੂਲਸ੍ਸ ਅਨਿਸ੍ਸਟ੍ਠਤ੍ਤਾ’’ਤਿ ਨ ਵਤ੍ਤਬ੍ਬਂ, ‘‘ਸਙ੍ਘਸ੍ਸ ਅਨਿਸ੍ਸਟ੍ਠਤ੍ਤਾ’’ਤਿ ਏਵਮੇਵ ਵਤ੍ਤਬ੍ਬਂ.
ਦੁਬ੍ਬਿਚਾਰਿਤਤ੍ਤਾਤਿ ਇਮਿਨਾ ਰੂਪਿਯਸਂਵੋਹਾਰੋ ਅਨੇਨ ਕਤੋਤਿ ਦਸ੍ਸੇਤਿ. ਅਞ੍ਞੇਸਂ ਪਨ ਵਟ੍ਟਤੀਤਿ ਯਸ੍ਮਾਨੇਨ ਰੂਪਿਯਸਂਵੋਹਾਰਮਤ੍ਤਮੇਵ ਕਤਂ, ਨ ਮੂਲਂ ਸਮ੍ਪਟਿਚ੍ਛਿਤਂ, ਤਸ੍ਮਾ ਵਿਨਯਕਮ੍ਮਵਸੇਨ ਸਙ੍ਘਸ੍ਸ ਨਿਸ੍ਸਟ੍ਠਕਾਲਤੋ ਪਟ੍ਠਾਯ ਅਞ੍ਞੇਸਂ ਵਟ੍ਟਤਿ. ਇਮਸ੍ਮਿਂਯੇਵ ਚ ਅਤ੍ਥੇ ਪਮਾਣਂ ਦਸ੍ਸੇਨ੍ਤੋ ‘‘ਮਹਾਸੁਮਤ੍ਥੇਰਸ੍ਸ ਕਿਰਾ’’ਤਿਆਦਿਮਾਹ. ਅਪਰੇ ਪਨ ‘‘ਦੁਬ੍ਬਿਚਾਰਿਤਤ੍ਤਾਤਿ ਇਮਿਨਾ ਕੇਵਲਂ ਗਿਹਿਸਨ੍ਤਕਭਾਵੇਨ ਠਿਤੇ ਦੁਬ੍ਬਿਚਾਰਿਤਮਤ੍ਤਂ ਵੁਤ੍ਤਂ, ਨ ਰੂਪਿਯਸਂਵੋਹਾਰਾਪਜ੍ਜਨਂ, ਤਸ੍ਮਾ ਰੂਪਿਯਸਂਵੋਹਾਰਾਭਾਵਤੋ ਸੋ ਪਤ੍ਤੋ ਨਿਸ੍ਸਜ੍ਜਿਤੁਂ ਨ ਸਕ੍ਕਾਤਿ ਤਸ੍ਸ ਨ ਕਪ੍ਪਤਿ, ਅਨਿਸ੍ਸਟ੍ਠੋਪਿ ਅਞ੍ਞੇਸਂ ਕਪ੍ਪਤਿ. ਅਨਿਸ੍ਸਟ੍ਠਸ੍ਸੇਵ ਚ ਅਞ੍ਞੇਸਂ ਕਪ੍ਪਿਯਭਾਵਦਸ੍ਸਨਤ੍ਥਂ ‘ਮਹਾਸੁਮਤ੍ਥੇਰਸ੍ਸ ਕਿਰਾ’ਤਿਆਦਿਵਤ੍ਥੂਨਿ ਉਦਾਹਟਾਨਿ. ਸਙ੍ਘਸ੍ਸ ਨਿਸ੍ਸਜ੍ਜੀਤਿ ਇਦਞ੍ਚ ਅਞ੍ਞੇਸਂ ਕਪ੍ਪਿਯਤ੍ਤਾ ਕੇਵਲਂ ਸਙ੍ਘਸ੍ਸ ਪਰਿਚ੍ਚਤ੍ਤਭਾਵਂ ਸਨ੍ਧਾਯ ਵੁਤ੍ਤਂ, ਨ ਪਨ ਵਿਨਯਕਮ੍ਮਵਸੇਨ ਸਙ੍ਘਸ੍ਸ ਨਿਸ੍ਸਟ੍ਠਭਾਵਂ. ਇਮਸ੍ਸ ਚ ਅਤ੍ਥਸ੍ਸ ਸਪ੍ਪਿਸ੍ਸ ਪੂਰੇਤ੍ਵਾਤਿ ਇਦਂ ਵਚਨਂ ਸਾਧਕ’’ਨ੍ਤਿ ਵਦਨ੍ਤਿ.
੫੯੧. ਰੂਪਿਯਪਟਿਗ੍ਗਹਣਰੂਪਿਯਸਂਵੋਹਾਰੇਸੁ ਯੇਨ ਏਕੇਕਮੇਵ ਕਤਂ, ਤੇਨ ਤਤ੍ਥ ਤਤ੍ਥ ਵੁਤ੍ਤਨਯੇਨੇਵ ਨਿਸ੍ਸਜ੍ਜਿਤਬ੍ਬਂ. ਯੇਨ ਪਨ ਪਟਿਗ੍ਗਹਿਤਰੂਪਿਯੇਨੇਵ ਸਂਵੋਹਾਰੋ ਕਤੋ, ਤੇਨ ਕਥਂ ਨਿਸ੍ਸਜ੍ਜਿਤਬ੍ਬਨ੍ਤਿ? ਨਯਿਦਂ ਦੁਕ੍ਕਰਂ, ‘‘ਅਹਂ, ਭਨ੍ਤੇ, ਨਾਨਪ੍ਪਕਾਰਕਂ ਰੂਪਿਯਸਂਵੋਹਾਰਂ ਸਮਾਪਜ੍ਜਿ’’ਨ੍ਤਿ ਏਵਮੇਵ ਨਿਸ੍ਸਜ੍ਜਿਤਬ੍ਬਂ. ‘‘ਇਮਸ੍ਮਿਂ ਸਿਕ੍ਖਾਪਦੇਪਿ ‘ਅਰੂਪਿਯੇ ਰੂਪਿਯਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿਆਦਿਤ੍ਤਿਕਸ੍ਸ ਅਵਸਾਨਪਦੇ ਅਨਾਪਤ੍ਤਿਯਾ ਵੁਤ੍ਤਤ੍ਤਾ ਕਪ੍ਪਿਯਵਤ੍ਥੁਵਸੇਨੇਵ ਇਦਂ ਤਿਕਂ ਵੁਤ੍ਤ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਅਰੂਪਿਯਗ੍ਗਹਣੇਨ ਕਪ੍ਪਿਯਵਤ੍ਥੁਦੁਕ੍ਕਟਵਤ੍ਥੂਨਂ ਸਙ੍ਗਹੋਤਿ ਪੁਰਿਮਪਦਦ੍ਵਯਂ ਕਪ੍ਪਿਯਵਤ੍ਥੁਦੁਕ੍ਕਟਵਤ੍ਥੂਨਂ ਵਸੇਨ ਵੁਤ੍ਤਂ, ਅਵਸਾਨਪਦਮੇਵ ਕਪ੍ਪਿਯਵਤ੍ਥੁਵਸੇਨ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਨ ਯੁਜ੍ਜਤਿ ਅਨਾਪਤ੍ਤਿਮਿਸ੍ਸਿਤੇ ਅਵਸਾਨਤ੍ਤਿਕੇ ਸਞ੍ਞਾਨਾਨਤ੍ਤਂ ਠਪੇਤ੍ਵਾ ਵਤ੍ਥੁਨਾਨਤ੍ਤਸ੍ਸ ਅਭਾਵਤੋ. ਦੁਕ੍ਕਟਵਤ੍ਥੁਨਾ ਪਨ ਦੁਕ੍ਕਟਵਤ੍ਥੁਨੋ ਚੇਤਾਪਨਂ ਨੇਵ ਇਧ, ਨ ਤਤ੍ਥ ਪਾਲ਼ਿਯਂ ਵੁਤ੍ਤਨ੍ਤਿ ਵਚਨਮੇਤ੍ਥ ਸਾਧਕਂ. ਯਂ ਅਤ੍ਤਨੋ ਧਨੇਨ ਪਰਿਵਤ੍ਤਤਿ, ਤਸ੍ਸ ਵਾ ਧਨਸ੍ਸ ਵਾ ਰੂਪਿਯਭਾਵੋ ਚੇਵ, ਪਰਿਵਤ੍ਤਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.
ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ
੫੯੩. ਕਯਵਿਕ੍ਕਯਸਿਕ੍ਖਾਪਦੇ ਪਾਲ਼ਿਯਂ ਜਾਨਾਹੀਤਿ ਏਤ੍ਥ ਉਪਧਾਰੇਹੀਤਿ ਅਤ੍ਥੋ, ਸੁਟ੍ਠੁ ਉਪਧਾਰੇਤ੍ਵਾ ਗਣ੍ਹ, ਇਦਂ ਨ ਮਨਾਪਨ੍ਤਿ ਪੁਨ ਦਾਤੁਂ ਨ ਸਕ੍ਖਿਸ੍ਸਸੀਤਿ ਅਧਿਪ੍ਪਾਯੋ.
੫੯੪-੫੯੫. ਕਯਨ੍ਤਿ ਪਰਭਣ੍ਡਸ੍ਸ ਗਹਣਂ. ਵਿਕ੍ਕਯਨ੍ਤਿ ਅਤ੍ਤਨੋ ਭਣ੍ਡਸ੍ਸ ਦਾਨਂ. ਤੇਨਾਹ ‘‘ਇਮਿਨਾ ਇਮਂ ਦੇਹੀ’’ਤਿਆਦਿ. ਯਸ੍ਮਾ ਕਯਿਤਂ ਨਾਮ ਪਰਸ੍ਸ ਹਤ੍ਥਤੋ ਗਹਿਤਂ ਵੁਚ੍ਚਤਿ, ਵਿਕ੍ਕੀਤਞ੍ਚ ਪਰਸ੍ਸ ਹਤ੍ਥੇ ਦਿਨ੍ਨਂ, ਤਸ੍ਮਾ ‘‘ਕਯਿਤਞ੍ਚ ਹੋਤਿ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤਂ ਕਰੋਨ੍ਤੇਨ, ਵਿਕ੍ਕੀਤਞ੍ਚ ਅਤ੍ਤਨੋ ਭਣ੍ਡਂ ਪਰਹਤ੍ਥਗਤਂ ਕਰੋਨ੍ਤੇਨਾ’’ਤਿ ਵੁਤ੍ਤਂ. ਯਦਿ ਏਵਂ ਪਾਲ਼ਿਯਂ ਪਰਤੋ ‘‘ਕਯਿਤਞ੍ਚ ਹੋਤਿ ਵਿਕ੍ਕਯਿਤਞ੍ਚਾ’’ਤਿ ਵਤ੍ਵਾ ‘‘ਅਤ੍ਤਨੋ ਭਣ੍ਡਂ ਪਰਹਤ੍ਥਗਤਂ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤ’’ਨ੍ਤਿ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਇਮਿਨਾ ਇਮਨ੍ਤਿਆਦਿਵਚਨਾਨੁਰੂਪਤੋ ਪਨਾ’’ਤਿਆਦਿ. ਇਮਿਨਾਤਿ ਹਿ ਸਕਸਨ੍ਤਕਂ ਵੁਤ੍ਤਂ. ਤਦਨੁਰੂਪਤੋ ਪਾਲ਼ਿਯਂ ਪਠਮਂ ਅਤ੍ਤਨੋ ਭਣ੍ਡਂ ਦਸ੍ਸਿਤਂ, ਨ ਕਯਵਿਕ੍ਕਯਪਦਾਨੁਰੂਪਤੋ. ਤਞ੍ਹਿ ਵਿਪਰੀਤਤੋ ਪਰਸਨ੍ਤਕਗ੍ਗਹਣਂ ਪੁਰਕ੍ਖਤ੍ਵਾ ਠਿਤਂ.
ਕਾਮਂ ਸੇਸਞਾਤਕੇਪਿ ‘‘ਇਮਂ ਦੇਹੀ’’ਤਿ ਵਦਤੋ ਵਿਞ੍ਞਤ੍ਤਿ ਨ ਹੋਤਿ, ਸਦ੍ਧਾਦੇਯ੍ਯਵਿਨਿਪਾਤਨਸ੍ਸਪਿ ਪਨ ਅਭਾਵਂ ਦਸ੍ਸੇਤੁਕਾਮੋ ‘‘ਮਾਤਰਂ ਪਨ ਪਿਤਰਂ ਵਾ’’ਤਿ ਆਹ. ਵਿਞ੍ਞਤ੍ਤਿ ਨ ਹੋਤੀਤਿ ਇਦਂ ਵਿਸੁਂ ਵਿਞ੍ਞਾਪਨਂ ਸਨ੍ਧਾਯ ਵੁਤ੍ਤਂ. ਅਞ੍ਞਂ ਕਿਞ੍ਚਿ ਅਵਤ੍ਵਾ ਏਵਂ ਵਦਨ੍ਤੋ ਅਞ੍ਞਾਤਕਂ ਵਿਞ੍ਞਾਪੇਤਿ ਨਾਮਾਤਿ ਆਹ – ‘‘ਅਞ੍ਞਾਤਕਂ ‘ਇਮਂ ਦੇਹੀ’ਤਿ ਵਦਤੋ ਵਿਞ੍ਞਤ੍ਤੀ’’ਤਿ. ਅਞ੍ਞਂ ਕਿਞ੍ਚਿ ਅਵਤ੍ਵਾ ‘‘ਇਮਂ ਗਣ੍ਹਾਹੀ’’ਤਿ ਦਿਨ੍ਨਂ ਅਞ੍ਞਾਤਕਸ੍ਸ ਦਿਨ੍ਨਂ ਨਾਮ ਹੋਤੀਤਿ ਵੁਤ੍ਤਂ ‘‘ਸਦ੍ਧਾਦੇਯ੍ਯਵਿਨਿਪਾਤਨ’’ਨ੍ਤਿ. ਤਿਸ੍ਸੋ ਆਪਤ੍ਤਿਯੋਤਿ ਅਞ੍ਞਾਤਕਵਿਞ੍ਞਤ੍ਤਿਸਦ੍ਧਾਦੇਯ੍ਯਵਿਨਿਪਾਤਨਕਯਵਿਕ੍ਕਯਾਪਤ੍ਤਿਸਙ੍ਖਾਤਾ ਤਿਸ੍ਸੋ ਆਪਤ੍ਤਿਯੋ.
ਇਮਂ ਨਾਮ ਕਰੋਹੀਤਿ ਵਦਤਿ, ਵਟ੍ਟਤੀਤਿ ਏਤ੍ਥ ਭੁਤ੍ਤੋਸਿ, ਇਦਾਨਿ ਕਸ੍ਮਾ ਨ ਕਰੋਸੀਤਿ ਵਤ੍ਥੁਮ੍ਪਿ ਵਟ੍ਟਤਿ. ‘‘ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ ਕਿਞ੍ਚਾਪਿ ਸਤਿਯੇਵ ਨਿਸ੍ਸਗ੍ਗਿਯਵਤ੍ਥੁਮ੍ਹਿ ਪਾਚਿਤ੍ਤਿਯਂ ਵੁਤ੍ਤਂ, ਅਸਤਿਪਿ ਪਨ ਤਸ੍ਮਿਂ ਪਾਚਿਤ੍ਤਿਯਨ੍ਤਿ ਇਦਂ ਅਟ੍ਠਕਥਾਪਮਾਣੇਨ ਗਹੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਕਿਞ੍ਚਾਪੀ’’ਤਿਆਦਿ ਵੁਤ੍ਤਂ. ਪਰਿਭੁਤ੍ਤੇਤਿ ਸਪ੍ਪਿਆਦਿਂ ਸਨ੍ਧਾਯ ਵੁਤ੍ਤਂ. ਯਂ ਅਤ੍ਤਨੋ ਧਨੇਨ ਪਰਿਵਤ੍ਤੇਤਿ, ਯੇਨ ਚ ਪਰਿਵਤ੍ਤੇਤਿ, ਤੇਸਂ ਕਪ੍ਪਿਯਵਤ੍ਥੁਤਾ, ਅਸਹਧਮ੍ਮਿਕਤਾ, ਕਯਵਿਕ੍ਕਯਾਪਜ੍ਜਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਕੋਸਿਯਵਗ੍ਗੋ ਦੁਤਿਯੋ.