੩. ਪਤ੍ਤਵਗ੍ਗੋ
੧. ਪਤ੍ਤਸਿਕ੍ਖਾਪਦਵਣ੍ਣਨਾ
੫੯੮-੬੦੨. ਪਤ੍ਤਵਗ੍ਗਸ੍ਸ ਪਠਮੇ ਭਣ੍ਡਨ੍ਤਿ ਵਿਕ੍ਕੇਤਬ੍ਬਭਣ੍ਡਂ. ਯਸ੍ਮਾ ਵਣ੍ਣਸਦ੍ਦੋ ਸਣ੍ਠਾਨਜਾਤਿਰੂਪਾਯਤਨਕਾਰਣਪਮਾਣਗੁਣਪਸਂਸਾਦੀਸੁ ਦਿਸ੍ਸਤਿ. ‘‘ਮਹਨ੍ਤਂ ਸਪ੍ਪਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ’’ਤਿਆਦੀਸੁ (ਸਂ. ਨਿ. ੧.੧੪੨) ਹਿ ਸਣ੍ਠਾਨਂ ਵੁਚ੍ਚਤਿ. ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ’’ਤਿਆਦੀਸੁ (ਮ. ਨਿ. ੨.੪੦੨) ਜਾਤਿ. ‘‘ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤੋ’’ਤਿਆਦੀਸੁ (ਦੀ. ਨਿ. ੧.੩੦੩) ਰੂਪਾਯਤਨਂ.
‘‘ਨ ਹਰਾਮਿ ਨ ਭਞ੍ਜਾਮਿ, ਆਰਾ ਸਿਙ੍ਘਾਮਿ ਵਾਰਿਜਂ;
ਅਥ ਕੇਨ ਨੁ ਵਣ੍ਣੇਨ, ਗਨ੍ਧਤ੍ਥੇਨੋਤਿ ਵੁਚ੍ਚਤੀ’’ਤਿ. (ਸਂ. ਨਿ. ੧.੨੩੪; ਜਾ. ੧.੬.੧੧੬) –
ਆਦੀਸੁ ਕਾਰਣਂ. ‘‘ਤਯੋ ਪਤ੍ਤਸ੍ਸ ਵਣ੍ਣਾ’’ਤਿਆਦੀਸੁ (ਪਾਰਾ. ੬੦੨) ਪਮਾਣਂ. ‘‘ਕਦਾ ਸਞ੍ਞੁਲ਼੍ਹਾ ਪਨ ਤੇ ਗਹਪਤਿ ਇਮੇ ਸਮਣਸ੍ਸ ਗੋਤਮਸ੍ਸ ਵਣ੍ਣਾ’’ਤਿਆਦੀਸੁ (ਮ. ਨਿ. ੨.੭੭) ਗੁਣੋ. ‘‘ਵਣ੍ਣਾਰਹਸ੍ਸ ਵਣ੍ਣਂ ਭਾਸਤੀ’’ਤਿਆਦੀਸੁ (ਅ. ਨਿ. ੪.੩) ਪਸਂਸਾ. ਤਸ੍ਮਾ ਵੁਤ੍ਤਂ ‘‘ਤਯੋ ਪਤ੍ਤਸ੍ਸ ਵਣ੍ਣਾਤਿ ਤੀਣਿ ਪਤ੍ਤਸ੍ਸ ਪਮਾਣਾਨੀ’’ਤਿ.
ਅਡ੍ਢਤੇਰਸਪਲਾ ਹੋਤੀਤਿ ਏਤ੍ਥ ‘‘ਮਾਸਾਨਂ ਅਡ੍ਢਤੇਰਸਪਲਾਨਿ ਗਣ੍ਹਾਤੀ’’ਤਿ ਵਦਨ੍ਤਿ. ‘‘ਮਗਧਨਾਲ਼ਿ ਨਾਮ ਛਪਸਤਾ ਨਾਲ਼ੀ’’ਤਿ ਕੇਚਿ. ‘‘ਅਟ੍ਠਪਸਤਾ’’ਤਿ ਅਪਰੇ. ਤਤ੍ਥ ਪੁਰਿਮਾਨਂ ਮਤੇਨ ਤਿਪਸਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਏਕਾ ਮਗਧਨਾਲ਼ਿ ਹੋਤਿ, ਪਚ੍ਛਿਮਾਨਂ ਚਤੁਪਸਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਏਕਾ ਮਗਧਨਾਲ਼ਿ. ਆਚਰਿਯਧਮ੍ਮਪਾਲਤ੍ਥੇਰੇਨ ਪਨ ‘‘ਪਕਤਿਯਾ ਚਤੁਮੁਟ੍ਠਿਕਂ ਕੁਡੁਵਂ, ਚਤੁਕੁਡੁਵਂ ਨਾਲ਼ਿਕਂ, ਤਾਯ ਨਾਲ਼ਿਯਾ ਸੋਲ਼ਸ ਨਾਲ਼ਿਯੋ ਦੋਣਂ, ਤਂ ਪਨ ਮਗਧਨਾਲ਼ਿਯਾ ਦ੍ਵਾਦਸ ਨਾਲ਼ਿਯੋ ਹੋਨ੍ਤੀ’’ਤਿ ਵੁਤ੍ਤਂ, ਤਸ੍ਮਾ ਤੇਨ ਨਯੇਨ ‘‘ਮਗਧਨਾਲ਼ਿ ਨਾਮ ਪਞ੍ਚ ਕੁਡੁਵਾਨਿ ਏਕਞ੍ਚ ਮੁਟ੍ਠਿਂ ਏਕਾਯ ਮੁਟ੍ਠਿਯਾ ਤਤਿਯਞ੍ਚ ਭਾਗਂ ਗਣ੍ਹਾਤੀ’’ਤਿ ਵੇਦਿਤਬ੍ਬਂ.
ਸਬ੍ਬਸਮ੍ਭਾਰਸਙ੍ਖਤੋਤਿ ਜੀਰਕਾਦਿਸਬ੍ਬਸਮ੍ਭਾਰੇਹਿ ਸਙ੍ਖਤੋ. ਆਲੋਪਸ੍ਸ ਆਲੋਪਸ੍ਸ ਅਨੁਰੂਪਨ੍ਤਿ ਏਤ੍ਥ ‘‘ਬ੍ਯਞ੍ਜਨਸ੍ਸ ਮਤ੍ਤਾ ਨਾਮ ਓਦਨਚਤੁਤ੍ਥੋ ਭਾਗੋ’’ਤਿ ਬ੍ਰਹ੍ਮਾਯੁਸੁਤ੍ਤਸ੍ਸ ਅਟ੍ਠਕਥਾਯਂ (ਮ. ਨਿ. ਅਟ੍ਠ. ੨.੩੮੭) ਵੁਤ੍ਤਤ੍ਤਾ ਆਲੋਪਸ੍ਸ ਚਤੁਤ੍ਥਭਾਗਪ੍ਪਮਾਣਂ ਬ੍ਯਞ੍ਜਨਂ ਆਲੋਪਸ੍ਸ ਅਨੁਰੂਪਨ੍ਤਿ ਗਹੇਤਬ੍ਬਂ. ਇਧ ਪਨ ਸੂਪਸ੍ਸੇਵ ਓਦਨਚਤੁਤ੍ਥਭਾਗਪ੍ਪਮਾਣਤਂ ਦਸ੍ਸੇਤ੍ਵਾ ਏਤਸ੍ਸ ਲਕ੍ਖਣੇ ਦਸ੍ਸਿਤੇ ਇਤਰਸ੍ਸਪਿ ਦਸ੍ਸਿਤਮੇਵ ਹੋਤੀਤਿ ਬ੍ਯਞ੍ਜਨਸ੍ਸ ਤਥਾ ਵਿਸੇਸੇਤ੍ਵਾ ਪਮਾਣਂ ਨ ਦਸ੍ਸਿਤਂ.
ਮਗਧਨਾਲ਼ਿਯਾ ਉਪਡ੍ਢਪ੍ਪਮਾਣੋ ਇਧ ਪਤ੍ਥੋਤਿ ਆਹ ‘‘ਪਤ੍ਥੋਦਨਨ੍ਤਿ ਮਗਧਨਾਲ਼ਿਯਾ ਉਪਡ੍ਢਨਾਲ਼ਿਕੋਦਨ’’ਨ੍ਤਿ. ਇਮਿਨਾ ਚ ‘‘ਪਤ੍ਥਦ੍ਵਯਂ ਮਗਧਨਾਲ਼ੀ’’ਤਿ ਦਸ੍ਸਿਤਂ ਹੋਤਿ. ਪਤ੍ਥੋ ਚ ‘‘ਚਤੁਪਲੋ ਕੁਡੁਵੋ, ਚਤੁਕੁਡੁਵੋ ਪਤ੍ਥੋ’’ਤਿ ਇਮਿਨਾ ਲੋਕਿਯਵੋਹਾਰੇਨ ਵੇਦਿਤਬ੍ਬੋ. ਭਾਜਨਪਰਿਭੋਗੇਨਾਤਿ ਉਦਕਾਹਰਣਾਦਿਨਾ ਭਾਜਨਪਰਿਭੋਗੇਨ.
੬੦੭. ਧੋਤੇਤਿ ਪਰਿਭੋਗਾਵਸਾਨਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਧੋਤੇਯੇਵ ਦੁਕ੍ਕਟਂ ਆਪਜ੍ਜਤਿ ਤਤੋ ਪੁਰੇਤਰਂ ਪਰਿਭੋਗਕਾਲੇਯੇਵ ਆਪਜ੍ਜਨਤੋ.
੬੦੮. ਪਞ੍ਚਹਿ ਦ੍ਵੀਹੀਤਿ ਇਦਂ ‘‘ਏਤ੍ਤਾਵਤਾ ਕਾਲ਼ਵਣ੍ਣਤਾ ਸਮ੍ਪਜ੍ਜਤੀ’’ਤਿ ਦਸ੍ਸਨਤ੍ਥਂ ਵੁਤ੍ਤਂ. ‘‘ਯਦਿ ਪਨ ਏਕੇਨਪਿ ਪਾਕੇਨ ਕਾਲ਼ਵਣ੍ਣੋ ਹੋਤਿ, ਅਧਿਟ੍ਠਾਨੁਪਗੋਯੇਵਾ’’ਤਿ ਵਦਨ੍ਤਿ. ਹਤ੍ਥਾਨਾਗਤਸ੍ਸਪਿ ਅਧਿਟ੍ਠਾਤਬ੍ਬਭਾਵਦਸ੍ਸਨਤ੍ਥਂ ‘‘ਯਦਿਹੀ’’ਤਿਆਦਿ ਵੁਤ੍ਤਂ. ਇਮਿਨਾ ਚ ਦੂਰੇ ਠਿਤਮ੍ਪਿ ਅਧਿਟ੍ਠਾਤੁਂ ਵਿਕਪ੍ਪੇਤੁਞ੍ਚ ਲਭਤਿ, ਠਪਿਤਟ੍ਠਾਨਸਲ੍ਲਕ੍ਖਣਞ੍ਚ ਨ ਪਮਾਣਨ੍ਤਿ ਵੇਦਿਤਬ੍ਬਂ. ਸੁਤ੍ਵਾ ਵਾਤਿ ਪਤ੍ਤਕਾਰਕੇਨ ਪੇਸਿਤਭਿਕ੍ਖੁਨਾ ਅਨਾਣਤ੍ਤੋ ਕੇਵਲਂ ਤਸ੍ਸ ਕਥੇਨ੍ਤਸ੍ਸ ਵਚਨਮਤ੍ਤਂ ਸੁਤ੍ਵਾ. ਨ ਪਮਾਣਨ੍ਤਿ ਤੇਨ ਅਪੇਸਿਤਤ੍ਤਾ. ਸਾਮਨ੍ਤਵਿਹਾਰੇਤਿ ਇਦਂ ਉਪਚਾਰਮਤ੍ਤਂ, ਤਤੋ ਦੂਰੇ ਠਿਤਮ੍ਪਿ ਅਧਿਟ੍ਠਾਤੁਂ ਵਟ੍ਟਤਿਯੇਵ. ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾਤਿ ਇਦਮ੍ਪਿ ਉਪਚਾਰਮਤ੍ਤਂ, ਪਤ੍ਤਸਲ੍ਲਕ੍ਖਣਮੇਵੇਤ੍ਥ ਪਮਾਣਂ. ਪਤ੍ਤੇ ਵਾ ਛਿਦ੍ਦਂ ਹੋਤੀਤਿ ਮੁਖਵਟ੍ਟਿਤੋ ਹੇਟ੍ਠਾ ਦ੍ਵਙ੍ਗੁਲਮਤ੍ਤੋਕਾਸਤੋ ਪਟ੍ਠਾਯ ਯਤ੍ਥ ਕਤ੍ਥਚਿ ਛਿਦ੍ਦਂ ਹੋਤਿ. ਸੇਸਮੇਤ੍ਥ ਪਠਮਕਥਿਨੇ ਵੁਤ੍ਤਨਯਮੇਵ.
ਪਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ
੬੧੦. ਦੁਤਿਯਸਿਕ੍ਖਾਪਦੇ ਹਤ੍ਥੇਸੁ ਪਿਣ੍ਡਾਯ ਚਰਤੀਤਿ ਪਾਲ਼ਿਪਦਸ੍ਸ ਹਤ੍ਥੇਸੁ ਲਭਿਤਬ੍ਬਪਿਣ੍ਡਤ੍ਥਾਯ ਚਰਤੀਤਿ ਅਤ੍ਥੋ ਵੇਦਿਤਬ੍ਬੋ.
੬੧੨-੬੧੩. ‘‘ਤਸ੍ਸ ਸੋ ਅਪਤ੍ਤੋਤਿ ਵਚਨਤੋ ਸੋ ਪਤ੍ਤੋ ਅਧਿਟ੍ਠਾਨਮ੍ਪਿ ਵਿਜਹਤਿ ਅਪਤ੍ਤਤ੍ਤਾ. ਅਪਤ੍ਤਭਾਵਤੋਯੇਵ ਹਿ ‘ਪਞ੍ਚਬਨ੍ਧਨਂ ਪਤ੍ਤਂ ਚੇਤਾਪੇਤੀ’ਤਿ ਪਾਲ਼ਿਯਂ ਨ ਵੁਤ੍ਤ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਅਪਤ੍ਤੋਤਿ ਇਦਂ ‘ਅਞ੍ਞਂ ਪਤ੍ਤਂ ਵਿਞ੍ਞਾਪੇਤੁਂ ਵਟ੍ਟਤੀ’ਤਿ ਦਸ੍ਸਨਤ੍ਥਂ ਵੁਤ੍ਤਂ, ਸੋ ਪਨ ਪਤ੍ਤੋ ਅਧਿਟ੍ਠਾਨਂ ਨ ਵਿਜਹਤੀ’’ਤਿ ਵਦਨ੍ਤਿ, ਤਂ ਯੁਤ੍ਤਂ ਵਿਯ ਦਿਸ੍ਸਤਿ ‘‘ਯਸ੍ਸ ਪਞ੍ਚ ਏਕਾਯੇਵ ਵਾ ਦਸਙ੍ਗੁਲਾ, ਸੋ ਬਦ੍ਧੋਪਿ ਅਬਦ੍ਧੋਪਿ ਅਪਤ੍ਤੋਯੇਵਾ’’ਤਿ ਵਕ੍ਖਮਾਨਤ੍ਤਾ. ਨ ਹਿ ਮੁਖਵਟ੍ਟਿਯਾ ਪਞ੍ਚਸੁ ਠਾਨੇਸੁ ਦ੍ਵਙ੍ਗੁਲਮਤ੍ਤਾਹਿ ਰਾਜੀਹਿ ਅਧਿਟ੍ਠਾਨਂ ਵਿਜਹਤੀਤਿ ਸਕ੍ਕਾ ਵਤ੍ਤੁਂ, ਏਕਾਯ ਪਨ ਰਾਜਿਯਾ ਦਸਙ੍ਗੁਲਾਯ ਸਚੇ ਤਤ੍ਥ ਵੁਤ੍ਤਪ੍ਪਮਾਣੋ ਛਿਦ੍ਦੋ ਪਞ੍ਞਾਯਤਿ, ਛਿਦ੍ਦੇਨੇਵ ਅਧਿਟ੍ਠਾਨਵਿਜਹਨਂ ਸਿਯਾਤਿ ਯੁਤ੍ਤਂ ਵਤ੍ਤੁਂ. ਬਨ੍ਧਨੋਕਾਸੇ ਸਤਿ ਅਸਤਿ ਵਾ ਬਨ੍ਧਨਵਿਰਹਿਤੋ ਪਤ੍ਤੋ ਅਬਨ੍ਧਨੋਤਿ ਵੁਤ੍ਤੋ, ਬਨ੍ਧਨੋਕਾਸਵਿਰਹਿਤੋਯੇਵ ਪਨ ਅਬਨ੍ਧਨੋਕਾਸੋਤਿ ਵੁਤ੍ਤੋ.
ਤਿਪੁਸੁਤ੍ਤਕੇਨ ਵਾ ਬਨ੍ਧਿਤ੍ਵਾਤਿ ਏਤ੍ਥ ‘‘ਬਨ੍ਧਿਤਬ੍ਬੋ’’ਤਿ ਪਾਠੋ ਗਹੇਤਬ੍ਬੋ. ਪੁਰਾਣਪੋਤ੍ਥਕੇਪਿ ਹਿ ਅਯਮੇਵ ਪਾਠੋ ਦਿਸ੍ਸਤਿ. ਸੁਦ੍ਧੇਹਿ…ਪੇ… ਨ ਵਟ੍ਟਤੀਤਿ ਇਦਂ ਉਣ੍ਹਭੋਜਨੇ ਪਕ੍ਖਿਤ੍ਤੇ ਵਿਲੀਯਮਾਨਤ੍ਤਾ ਵੁਤ੍ਤਂ. ਫਾਣਿਤਂ ਝਾਪੇਤ੍ਵਾ ਪਾਸਾਣਚੁਣ੍ਣੇਨ ਬਨ੍ਧਿਤੁਂ ਵਟ੍ਟਤੀਤਿ ਪਾਸਾਣਚੁਣ੍ਣੇਨ ਸਦ੍ਧਿਂ ਫਾਣਿਤਂ ਪਚਿਤ੍ਵਾ ਤਥਾਪਕ੍ਕੇਨ ਪਾਸਾਣਚੁਣ੍ਣੇਨ ਬਨ੍ਧਿਤੁਂ ਵਟ੍ਟਤਿ.
੬੧੫. ਅਨੁਕਮ੍ਪਾਯ ਨ ਗਣ੍ਹਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਤ੍ਤਾ ਯਸ੍ਸ ਸੋ ਪਤ੍ਤੋ ਨ ਰੁਚ੍ਚਤਿ, ਤਸ੍ਸਪਿ ਅਗਣ੍ਹਨ੍ਤਸ੍ਸ ਅਨਾਪਤ੍ਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਊਨਪਞ੍ਚਬਨ੍ਧਨਸੀਕ੍ਖਾਪਦਵਣ੍ਣਨਾ) ਵੁਤ੍ਤਂ ‘‘ਸਚੇ ਥੇਰਸ੍ਸ ਪਤ੍ਤੋ ਨ ਰੁਚ੍ਚਤਿ, ਅਪ੍ਪਿਚ੍ਛਤਾਯ ਵਾ ਨ ਗਣ੍ਹਾਤਿ, ਵਟ੍ਟਤੀ’’ਤਿ. ਪਤ੍ਤਪਰਿਯਨ੍ਤੋਤਿ ਪਰਿਯਨ੍ਤਪਤ੍ਤੋ, ਅਵਸਾਨਪਤ੍ਤੋਤਿ ਅਤ੍ਥੋ. ‘‘ਸਙ੍ਘਮਜ੍ਝੇ ਪਤ੍ਤਂ ਗਾਹਾਪੇਨ੍ਤੇਨ ਅਲਜ੍ਜਿਂ ਅਗਾਹਾਪੇਤੁਂ ਵਟ੍ਟਤੀ’’ਤਿ ਵਦਨ੍ਤਿ. ‘‘ਅਨੁਜਾਨਾਮਿ ਭਿਕ੍ਖਵੇ ਆਧਾਰਕਨ੍ਤਿ ਵੁਤ੍ਤਤ੍ਤਾ ਪੀਠਾਦੀਸੁ ਯਤ੍ਥ ਕਤ੍ਥਚਿ ਆਧਾਰਂ ਠਪੇਤ੍ਵਾ ਤਤ੍ਥ ਪਤ੍ਤਂ ਠਪੇਤੁਂ ਵਟ੍ਟਤਿ ਆਧਾਰਠਪਨੋਕਾਸਸ੍ਸ ਅਨਿਯਮਿਤਤ੍ਤਾ’’ਤਿ ਵਦਨ੍ਤਿ. ਅਪਰਿਭੋਗੇਨਾਤਿ ਅਯੁਤ੍ਤਪਰਿਭੋਗੇਨ.
੬੧੬. ਪਾਲ਼ਿਯਂ ‘‘ਅਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ. ਏਕਬਨ੍ਧਨਂ ਪਤ੍ਤਂ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ… ਚਤੁਬਨ੍ਧਨਂ… ਅਬਨ੍ਧਨੋਕਾਸਂ… ਏਕ… ਦ੍ਵਿ… ਤਿ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤੀ’’ਤਿ ਏਵਂ ਏਕੇਕੇਨ ਪਤ੍ਤੇਨ ਦਸਧਾ ਦਸਵਿਧਂ ਪਤ੍ਤਂ ਚੇਤਾਪਨਵਸੇਨ ਏਕਨਿਸ੍ਸਗ੍ਗਿਯਪਾਚਿਤ੍ਤਿਯਸਤਂ ਵੁਤ੍ਤਂ. ਇਮਸ੍ਮਿਂ ਸਿਕ੍ਖਾਪਦੇ ਪਮਾਣਯੁਤ੍ਤਂ ਅਗ੍ਗਹਿਤਕਾਲ਼ਵਣ੍ਣਮ੍ਪਿ ਪਤ੍ਤਂ ਵਿਞ੍ਞਾਪੇਨ੍ਤਸ੍ਸ ਆਪਤ੍ਤਿਯੇਵਾਤਿ ਦਟ੍ਠਬ੍ਬਂ. ਅਧਿਟ੍ਠਾਨੁਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਅਕਤਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਭੇਸਜ੍ਜਸਿਕ੍ਖਾਪਦਵਣ੍ਣਨਾ
੬੨੨. ਤਤਿਯਸਿਕ੍ਖਾਪਦੇ ਯੇਸਂ ਮਂਸਂ ਕਪ੍ਪਤੀਤਿ ਇਦਂ ਨਿਸ੍ਸਗ੍ਗਿਯਵਤ੍ਥੁਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਯੇਸਂ ਮਂਸਂ ਨ ਕਪ੍ਪਤਿ, ਤੇਸਂ ਸਪ੍ਪਿਆਦੀਨਿ ਨ ਕਪ੍ਪਨ੍ਤੀਤਿ ਦਸ੍ਸਨਤ੍ਥਂ. ਮਨੁਸ੍ਸਖੀਰਾਦੀਨਿਪਿ ਹਿ ਨੋ ਨ ਕਪ੍ਪਨ੍ਤਿ, ਕੁਤੋ ਸਸਸ੍ਸ ਸਪ੍ਪੀਤਿ ਆਹ ‘‘ਯੇਸਞ੍ਹਿ ਖੀਰਂ ਅਤ੍ਥਿ, ਸਪ੍ਪਿਪਿ ਤੇਸਂ ਅਤ੍ਥਿਯੇਵਾ’’ਤਿ. ‘‘ਇਦਞ੍ਚ ਯੇਭੁਯ੍ਯੇਨ ਵੁਤ੍ਤ’’ਨ੍ਤਿ ਵਦਨ੍ਤਿ. ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਨ੍ਤਿ ਅਪ੍ਪਟਿਗ੍ਗਹਿਤਂ ਸਯਮੇਵ ਗਹੇਤ੍ਵਾ ਨਿਕ੍ਖਿਤ੍ਤਂ. ਸਯਂਕਤਂ ਨਿਰਾਮਿਸਮੇਵ ਵਟ੍ਟਤੀਤਿ ਤਦਹੁਪੁਰੇਭਤ੍ਤਮੇਵ ਸਨ੍ਧਾਯ ਵੁਤ੍ਤਂ. ਅਥ ਸਯਂਕਤਂ ਨਿਰਾਮਿਸਂ ਭੁਞ੍ਜਨ੍ਤਸ੍ਸ ਕਸ੍ਮਾ ਸਾਮਂਪਾਕੋ ਨ ਹੋਤੀਤਿ ਆਹ – ‘‘ਨਵਨੀਤਂ ਤਾਪੇਨ੍ਤਸ੍ਸ ਹਿ ਸਾਮਂਪਾਕੋ ਨ ਹੋਤੀ’’ਤਿ. ਸਵਤ੍ਥੁਕਪਟਿਗ੍ਗਹਿਤਸ੍ਸ ਵਤ੍ਥੁਗਤਿਕਤ੍ਤਾ ਆਹ – ‘‘ਸਵਤ੍ਥੁਕਸ੍ਸ ਪਟਿਗ੍ਗਹਿਤਤ੍ਤਾ’’ਤਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤੇਹੀਤਿ ਪਚ੍ਛਾਭਤ੍ਤਂ ਪਟਿਗ੍ਗਹਿਤਖੀਰਦਧੀਹਿ. ਪੁਰੇਭਤ੍ਤਮ੍ਪਿ ਚ ਉਗ੍ਗਹਿਤਕੇਹਿ ਕਤਂ ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਨ੍ਤਿ ਸਮ੍ਬਨ੍ਧੋ. ਉਭਯੇਸਮ੍ਪੀਤਿ ਪਚ੍ਛਾਭਤ੍ਤਂ ਪਟਿਗ੍ਗਹਿਤਖੀਰਦਧੀਹਿ ਚ ਪੁਰੇਭਤ੍ਤਂ ਉਗ੍ਗਹਿਤਕੇਹਿ ਚ ਕਤਾਨਂ. ਏਸੇਵ ਨਯੋਤਿ ਨਿਸ੍ਸਗ੍ਗਿਯਂ ਹੋਤੀਤਿ ਅਤ੍ਥੋ. ਅਕਪ੍ਪਿਯਮਂਸਸਪ੍ਪਿਮ੍ਹੀਤਿ ਅਕਪ੍ਪਿਯਮਂਸਸਤ੍ਤਾਨਂ ਸਪ੍ਪਿਮ੍ਹਿ. ਕਾਰਣਪਤਿਰੂਪਕਂ ਵਤ੍ਵਾਤਿ ਸਜਾਤਿਯਾਨਂ ਸਪ੍ਪਿਭਾਵਤੋਤਿ ਕਾਰਣਪਤਿਰੂਪਕਂ ਵਤ੍ਵਾ.
ਸਪ੍ਪਿਨਯੇਨੇਵ ਵੇਦਿਤਬ੍ਬਨ੍ਤਿ ਨਿਰਾਮਿਸਮੇਵ ਸਤ੍ਤਾਹਂ ਵਟ੍ਟਤੀਤਿ ਅਤ੍ਥੋ. ਏਤ੍ਥਾਤਿ ਨਵਨੀਤੇ. ਧੋਤਂ ਵਟ੍ਟਤੀਤਿ ਅਧੋਤਂ ਚੇ, ਸਵਤ੍ਥੁਕਪਟਿਗ੍ਗਹਿਤਂ ਹੋਤਿ, ਤਸ੍ਮਾ ਧੋਤਂ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਨਿਕ੍ਖਿਪਿਤੁਂ ਵਟ੍ਟਤੀਤਿ ਥੇਰਾਨਂ ਅਧਿਪ੍ਪਾਯੋ. ਤਕ੍ਕਤੋ ਉਦ੍ਧਟਮਤ੍ਤਮੇਵ ਖਾਦਿਂਸੂਤਿ ਏਤ੍ਥ ਤਕ੍ਕਤੋ ਉਦ੍ਧਟਮਤ੍ਤਂ ਅਧੋਤਮ੍ਪਿ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਨ੍ਤਾ ਧੋਵਿਤ੍ਵਾ ਪਚਿਤ੍ਵਾ ਵਾ ਪਰਿਭੁਞ੍ਜਿਂਸੂਤਿ ਏਵਮਤ੍ਥੋ ਗਹੇਤਬ੍ਬੋ. ਥੇਰਸ੍ਸ ਹਿ ਦਧਿਗੁਲ਼ਿਕਾਦਿਸਹਿਤਮ੍ਪਿ ਪਟਿਗ੍ਗਹਿਤਂ ਪਚ੍ਛਾ ਧੋਵਿਤ੍ਵਾ ਪਚਿਤ੍ਵਾ ਵਾ ਪਰਿਭੁਞ੍ਜਨ੍ਤਸ੍ਸ ਸਵਤ੍ਥੁਕਪਟਿਗ੍ਗਹਣੇ ਦੋਸੋ ਨਤ੍ਥੀਤਿ ਅਧਿਪ੍ਪਾਯੋ, ਤੇਨੇਵ ਥੇਰਸ੍ਸ ਅਧਿਪ੍ਪਾਯਂ ਦਸ੍ਸੇਨ੍ਤੇਨ ‘‘ਤਸ੍ਮਾ ਨਵਨੀਤਂ ਪਰਿਭੁਞ੍ਜਨ੍ਤੇਨ…ਪੇ… ਅਯਮੇਤ੍ਥ ਅਧਿਪ੍ਪਾਯੋ’’ਤਿ ਵੁਤ੍ਤਂ. ਕੇਚਿ ਪਨ ‘‘ਤਕ੍ਕਤੋ ਉਦ੍ਧਟਮਤ੍ਤਮੇਵ ਖਾਦਿਂਸੂ’’ਤਿ ਵਚਨਸ੍ਸ ਅਧਿਪ੍ਪਾਯਂ ਅਜਾਨਨ੍ਤਾ ‘‘ਤਕ੍ਕਤੋ ਉਦ੍ਧਟਮਤ੍ਤਂ ਅਧੋਤਮ੍ਪਿ ਦਧਿਗੁਲ਼ਿਕਾਦਿਸਹਿਤਂ ਵਿਕਾਲੇਪਿ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਨ ਹਿ ਦਧਿਗੁਲ਼ਿਕਾਦਿਆਮਿਸੇਨ ਸਂਸਟ੍ਠਰਸਂ ਨਵਨੀਤਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਸਕ੍ਕਾ ਵਤ੍ਤੁਂ. ਨਵਨੀਤਂ ਪਰਿਭੁਞ੍ਜਨ੍ਤੇਨਾਤਿ ਅਧੋਵਿਤ੍ਵਾ ਪਟਿਗ੍ਗਹਿਤਨਵਨੀਤਂ ਪਰਿਭੁਞ੍ਜਨ੍ਤੇਨ. ਦਧਿ ਏਵ ਦਧਿਗਤਂ ਯਥਾ ‘‘ਗੂਥਗਤਂ ਮੁਤ੍ਤਗਤ’’ਨ੍ਤਿ (ਮ. ਨਿ. ੨.੧੧੯). ਖਯਂ ਗਮਿਸ੍ਸਤੀਤਿ ਵਚਨਤੋ ਖੀਰਂ ਪਕ੍ਖਿਪਿਤ੍ਵਾ ਪਕ੍ਕਸਪ੍ਪਿਆਦਿਪਿ ਵਿਕਾਲੇ ਕਪ੍ਪਤੀਤਿ ਵੇਦਿਤਬ੍ਬਂ. ਕੁਕ੍ਕੁਚ੍ਚਾਯਨ੍ਤਿ ਕੁਕ੍ਕੁਚ੍ਚਕਾਤਿ ਇਮਿਨਾ ਅਤ੍ਤਨਾਪਿ ਤਤ੍ਥ ਕੁਕ੍ਕੁਚ੍ਚਸਬ੍ਭਾਵਂ ਦੀਪੇਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਭੇਸਜ੍ਜਸਿਕ੍ਖਾਪਦਵਣ੍ਣਨਾ) ‘‘ਨਿਬ੍ਬਟ੍ਟਿਤਸਪ੍ਪਿ ਵਾ ਨਵਨੀਤਂ ਵਾ ਪਚਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਤਾਨਿ ਪਟਿਗ੍ਗਹੇਤ੍ਵਾਤਿ ਤਾਨਿ ਖੀਰਦਧੀਨਿ ਪਟਿਗ੍ਗਹੇਤ੍ਵਾ.
ਪਟਿਗ੍ਗਹੇਤ੍ਵਾ ਠਪਿਤਭੇਸਜ੍ਜੇਹੀਤਿ ਪਟਿਗ੍ਗਹੇਤ੍ਵਾ ਠਪਿਤਯਾਵਜੀਵਿਕਭੇਸਜ੍ਜੇਹਿ. ਵੁਤ੍ਤਨਯੇਨ ਯਥਾ ਤਣ੍ਡੁਲਾਦੀਨਿ ਨ ਪਚ੍ਚਨ੍ਤਿ, ਤਥਾ ਲਜ੍ਜੀਯੇਵ ਸਮ੍ਪਾਦੇਤ੍ਵਾ ਦੇਤੀਤਿ ਲਜ੍ਜੀਸਾਮਣੇਰਗ੍ਗਹਣਂ, ਅਪਿਚ ਅਲਜ੍ਜਿਨਾ ਅਜ੍ਝੋਹਰਿਤਬ੍ਬਂ ਯਂ ਕਿਞ੍ਚਿ ਅਭਿਸਙ੍ਖਰਾਪੇਤੁਂ ਨ ਵਟ੍ਟਤਿ, ਤਸ੍ਮਾਪਿ ਏਵਮਾਹ. ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਨ੍ਤਿ ਅਤ੍ਤਨਾ ਭਜ੍ਜਨਾਦੀਨਿ ਅਕਤ੍ਵਾ ਗਹਿਤਤੇਲਂ. ਤੇਨੇਵ ‘‘ਸਾਮਿਸਮ੍ਪਿ ਵਟ੍ਟਤੀ’’ਤਿ ਵੁਤ੍ਤਂ. ਨਿਬ੍ਬਟ੍ਟਿਤਤ੍ਤਾਤਿ ਯਾਵਕਾਲਿਕਵਤ੍ਥੁਤੋ ਵਿਵੇਚਿਤਤ੍ਤਾ. ਉਭਯਮ੍ਪੀਤਿ ਅਤ੍ਤਨਾ ਚ ਪਰੇਨ ਚ ਕਤਂ. ਯਾਵ ਅਰੁਣਸ੍ਸ ਉਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਨ੍ਤਿ ਸਤ੍ਤਮਦਿਵਸੇ ਕਤਤੇਲਂ ਸਚੇ ਯਾਵ ਅਰੁਣੁਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਂ.
੬੨੩. ਅਚ੍ਛਵਸਨ੍ਤਿ ਦੁਕ੍ਕਟਵਤ੍ਥੁਨੋ ਵਸਾਯ ਅਨੁਞ੍ਞਾਤਤ੍ਤਾ ਤਂਸਦਿਸਾਨਂ ਦੁਕ੍ਕਟਵਤ੍ਥੂਨਂਯੇਵ ਅਕਪ੍ਪਿਯਮਂਸਸਤ੍ਤਾਨਂ ਵਸਾ ਅਨੁਞ੍ਞਾਤਾ, ਨ ਥੁਲ੍ਲਚ੍ਚਯਵਤ੍ਥੂਨਂ ਮਨੁਸ੍ਸਾਨਂ ਵਸਾਤਿ ਆਹ ‘‘ਠਪੇਤ੍ਵਾ ਮਨੁਸ੍ਸਵਸ’’ਨ੍ਤਿ. ਸਂਸਟ੍ਠਨ੍ਤਿ ਪਰਿਸ੍ਸਾਵਿਤਂ. ‘‘ਕਾਲੇ ਪਟਿਗ੍ਗਹਿਤਂ ਵਿਕਾਲੇ ਅਨੁਪਸਮ੍ਪਨ੍ਨੇਨਪਿ ਨਿਪ੍ਪਕ੍ਕਂ ਸਂਸਟ੍ਠਞ੍ਚ ਪਰਿਭੁਞ੍ਜਨ੍ਤਸ੍ਸ ਦ੍ਵੇਪਿ ਦੁਕ੍ਕਟਾਨਿ ਹੋਨ੍ਤਿਯੇਵਾ’’ਤਿ ਵਦਨ੍ਤਿ. ਯਸ੍ਮਾ ਖੀਰਦਧਿਆਦੀਨਿ ਪਕ੍ਖਿਪਿਤ੍ਵਾ ਤੇਲਂ ਪਚਨ੍ਤਿ, ਤਸ੍ਮਾ ਕਸਟਂ ਨ ਵਟ੍ਟਤਿ, ਤੇਲਮੇਵ ਵਟ੍ਟਤਿ. ਤੇਨ ਵੁਤ੍ਤਂ ‘‘ਪਕ੍ਕਤੇਲਕਸਟੇ ਵਿਯ ਕੁਕ੍ਕੁਚ੍ਚਾਯਤੀ’’ਤਿ. ‘‘ਸਚੇ ਵਸਾਯ ਸਦ੍ਧਿਂ ਪਕ੍ਕਤ੍ਤਾ ਨ ਵਟ੍ਟਤਿ, ਇਦਂ ਕਸ੍ਮਾ ਵਟ੍ਟਤੀ’’ਤਿ ਪੁਚ੍ਛਨ੍ਤਾ ‘‘ਭਨ੍ਤੇ’’ਤਿਆਦਿਮਾਹਂਸੁ. ਏਤਂ ਵਟ੍ਟਤੀਤਿ ਨਨੁ ਏਤਂ ਦਧਿਗੁਲ਼ਿਕਾਦੀਹਿ ਪਕ੍ਕਂ ਨਵਨੀਤਂ ਵਟ੍ਟਤੀਤਿ ਅਤ੍ਥੋ.
‘‘ਮਧੁਕਰੀਹਿ ਨਾਮ ਮਧੁਮਕ੍ਖਿਕਾਹੀਤਿ ਅਯਂ ਖੁਦ੍ਦਕਮਕ੍ਖਿਕਾਨਂ ਭਮਰਮਕ੍ਖਿਕਾਨਞ੍ਚ ਸਾਮਞ੍ਞਨਿਦ੍ਦੇਸੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਦਣ੍ਡਕੇਸੁ ਮਧੁਕਰਾ ਮਧੁਕਰੀ ਮਕ੍ਖਿਕਾ ਨਾਮਾ’’ਤਿ ਵਤ੍ਵਾ ‘‘ਤਾਹਿ ਮਧੁਕਰੀਆਦੀਹਿ ਤੀਹਿ ਮਕ੍ਖਿਕਾਹਿ ਕਤਂ ਮਧੁ ਨਾਮਾ’’ਤਿ ਵਦਨ੍ਤਿ. ਭਮਰਮਕ੍ਖਿਕਾਹੀਤਿ ਮਹਾਭਮਰਮਕ੍ਖਿਕਾਹਿ. ਸਿਲੇਸਸਦਿਸਨ੍ਤਿ ਘਨਪਕ੍ਕਂ ਵੁਤ੍ਤਂ. ਇਤਰਨ੍ਤਿ ਤਨੁਕਮਧੁ. ਮਧੁਪਟਲਨ੍ਤਿ ਮਧੁਰਹਿਤਂ ਕੇਵਲਂ ਮਧੁਪਟਲਂ. ‘‘ਸਚੇ ਮਧੁਸਹਿਤਂ ਪਟਲਂ ਪਟਿਗ੍ਗਹੇਤ੍ਵਾ ਨਿਕ੍ਖਿਪਨ੍ਤਿ, ਪਟਲਸ੍ਸ ਭਾਜਨਟ੍ਠਾਨਿਯਤ੍ਤਾ ਮਧੁਨੋ ਵਸੇਨ ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ ਹੋਤੀ’’ਤਿ ਵਦਨ੍ਤਿ, ‘‘ਮਧੁਮਕ੍ਖਿਤਂ ਪਨ ਮਧੁਗਤਿਕਮੇਵਾ’’ਤਿ ਇਮਿਨਾ ਤਂ ਨ ਸਮੇਤਿ.
‘‘ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤ’’ਨ੍ਤਿ ਪਾਲ਼ਿਯਂ ਅਵਿਸੇਸੇਨ ਵੁਤ੍ਤਤ੍ਤਾ ਅਟ੍ਠਕਥਾਯਞ੍ਚ ‘‘ਉਚ੍ਛੁਰਸਂ ਉਪਾਦਾਯ…ਪੇ… ਅਵਤ੍ਥੁਕਾ ਉਚ੍ਛੁਵਿਕਤਿ ‘ਫਾਣਿਤ’ਨ੍ਤਿ ਵੇਦਿਤਬ੍ਬਾ’’ਤਿ ਵਚਨਤੋ ਉਚ੍ਛੁਰਸੋਪਿ ਨਿਕ੍ਕਸਟੋ ਸਤ੍ਤਾਹਕਾਲਿਕੋਤਿ ਵੇਦਿਤਬ੍ਬੋ. ਕੇਨਚਿ ਪਨ ‘‘ਮਧੁਮ੍ਹਿ ਚਤ੍ਤਾਰੋ ਕਾਲਿਕਾ ਯਥਾਸਮ੍ਭਵਂ ਯੋਜੇਤਬ੍ਬਾ, ਉਚ੍ਛੁਮ੍ਹਿ ਚਾ’’ਤਿ ਵਤ੍ਵਾ ‘‘ਸਮਕ੍ਖਿਕਣ੍ਡਸੇਲ਼ਕਂ ਯਾਵਕਾਲਿਕਂ, ਅਨੇਲ਼ਕਂ ਉਦਕਸਮ੍ਭਿਨ੍ਨਂ ਯਾਮਕਾਲਿਕਂ, ਅਸਮ੍ਭਿਨ੍ਨਂ ਸਤ੍ਤਾਹਕਾਲਿਕਂ, ਮਧੁਸਿਤ੍ਥਂ ਪਰਿਸੁਦ੍ਧਂ ਯਾਵਜੀਵਿਕਂ, ਤਥਾ ਉਚ੍ਛੁ ਵਾ ਰਸੋ ਵਾ ਸਕਸਟੋ ਯਾਵਕਾਲਿਕੋ, ਨਿਕ੍ਕਸਟੋ ਉਦਕਸਮ੍ਭਿਨ੍ਨੋ ਯਾਮਕਾਲਿਕੋ, ਅਸਮ੍ਭਿਨ੍ਨੋ ਸਤ੍ਤਾਹਕਾਲਿਕੋ, ਸੁਦ੍ਧਕਸਟਂ ਯਾਵਜੀਵਿਕ’’ਨ੍ਤਿ ਚ ਵਤ੍ਵਾ ਉਤ੍ਤਰਿਪਿ ਬਹੁਧਾ ਪਪਞ੍ਚਿਤਂ. ਤਤ੍ਥ ‘‘ਉਦਕਸਮ੍ਭਿਨ੍ਨਂ ਮਧੁ ਵਾ ਉਚ੍ਛੁਰਸੋ ਵਾ ਉਦਕਸਮ੍ਭਿਨ੍ਨੋ ਯਾਮਕਾਲਿਕੋ’’ਤਿ ਇਦਂ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਦਿਸ੍ਸਤਿ. ‘‘ਯਾਵਕਾਲਿਕਂ ਸਮਾਨਂ ਗਰੁਤਰਮ੍ਪਿ ਮੁਦ੍ਦਿਕਾਜਾਤਿਰਸਂ ਅਤ੍ਤਨਾ ਸਂਸਟ੍ਠਂ ਲਹੁਕਂ ਯਾਮਕਾਲਿਕਭਾਵਂ ਉਪਨੇਨ੍ਤਂ ਉਦਕਂ ਲਹੁਤਰਂ ਸਤ੍ਤਾਹਕਾਲਿਕਂ ਅਤ੍ਤਨਾ ਸਂਸਟ੍ਠਂ ਗਰੁਤਰਂ ਯਾਮਕਾਲਿਕਭਾਵਂ ਉਪਨੇਤੀ’’ਤਿ ਏਤ੍ਥ ਕਾਰਣਂ ਸੋਯੇਵ ਪੁਚ੍ਛਿਤਬ੍ਬੋ, ਸਬ੍ਬਤ੍ਥ ਪਾਲ਼ਿਯਂ ਅਟ੍ਠਕਥਾਯਞ੍ਚ ਉਦਕਸਮ੍ਭੇਦੇਨ ਗਰੁਤਰਸ੍ਸਪਿ ਲਹੁਭਾਵੋਪਗਮਨਂਯੇਵ ਦਸ੍ਸਿਤਂ. ਪਾਲ਼ਿਯਮ੍ਪਿ ਹਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਗੁਲ਼ਂ, ਅਗਿਲਾਨਸ੍ਸ ਗੁਲ਼ੋਦਕ’’ਨ੍ਤਿ (ਮਹਾਵ. ੨੮੪) ਵਦਨ੍ਤੇਨ ਅਗਿਲਾਨੇਨ ਪਰਿਭੁਞ੍ਜਿਤੁਂ ਅਯੁਤ੍ਤੋਪਿ ਗੁਲ਼ੋ ਉਦਕਸਮ੍ਭਿਨ੍ਨੋ ਅਗਿਲਾਨਸ੍ਸਪਿ ਵਟ੍ਟਤੀਤਿ ਅਨੁਞ੍ਞਾਤੋ.
ਯਮ੍ਪਿ ਚ ‘‘ਉਚ੍ਛੁ ਚੇ ਯਾਵਕਾਲਿਕੋ, ਉਚ੍ਛੁਰਸੋ ਚੇ ਯਾਮਕਾਲਿਕੋ, ਫਾਣਿਤਂ ਚੇ ਸਤ੍ਤਾਹਕਾਲਿਕਂ, ਤਚੋ ਚੇ ਯਾਵਜੀਵਿਕੋ’’ਤਿ ਅਟ੍ਠਕਥਾਵਚਨਂ ਦਸ੍ਸੇਤ੍ਵਾ ‘‘ਉਚ੍ਛੁਰਸੋ ਉਦਕਸਮ੍ਭਿਨ੍ਨੋ ਯਾਮਕਾਲਿਕੋ’’ਤਿ ਅਞ੍ਞੇਨ ਕੇਨਚਿ ਵੁਤ੍ਤਂ, ਤਮ੍ਪਿ ਤਥਾਵਿਧਸ੍ਸ ਅਟ੍ਠਕਥਾਵਚਨਸ੍ਸ ਇਮਿਸ੍ਸਾ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਅਭਾਵਤੋ ਨ ਸਾਰਤੋ ਪਚ੍ਚੇਤਬ੍ਬਂ. ਤਤੋਯੇਵ ਚ ‘‘ਉਚ੍ਛੁਰਸੋ ਉਦਕੇਨ ਸਮ੍ਭਿਨ੍ਨੋਪਿ ਅਸਮ੍ਭਿਨ੍ਨੋਪਿ ਸਤ੍ਤਾਹਕਾਲਿਕੋਯੇਵਾ’’ਤਿ ਕੇਚਿ ਆਚਰਿਯਾ ਵਦਨ੍ਤਿ. ਭੇਸਜ੍ਜਕ੍ਖਨ੍ਧਕੇ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਛੁਰਸ’’ਨ੍ਤਿ (ਮਹਾਵ. ੩੦੦) ਏਤ੍ਥ ਤੀਸੁਪਿ ਗਣ੍ਠਿਪਦੇਸੁ ਅਵਿਸੇਸੇਨ ਵੁਤ੍ਤਂ ‘‘ਉਚ੍ਛੁਰਸੋ ਸਤ੍ਤਾਹਕਾਲਿਕੋ’’ਤਿ.
ਸਯਂਕਤਂ ਨਿਰਾਮਿਸਮੇਵ ਵਟ੍ਟਤੀਤਿ ਏਤ੍ਥ ਅਪਰਿਸ੍ਸਾਵਿਤਂ ਪਟਿਗ੍ਗਹਿਤਮ੍ਪਿ ਕਰਣਸਮਯੇ ਪਰਿਸ੍ਸਾਵੇਤ੍ਵਾ ਕਸਟਂ ਅਪਨੇਤ੍ਵਾਵ ਅਤ੍ਤਨਾ ਕਤਨ੍ਤਿ ਗਹੇਤਬ੍ਬਂ. ਝਾਮਉਚ੍ਛੁਫਾਣਿਤਨ੍ਤਿ ਅਗ੍ਗਿਨਾ ਦਡ੍ਢੇ ਉਚ੍ਛੁਖੇਤ੍ਤੇ ਝਾਮਉਚ੍ਛੁਨਾ ਕਤਫਾਣਿਤਂ. ਕੋਟ੍ਟਿਤਉਚ੍ਛੁਫਾਣਿਤਨ੍ਤਿ ਖੁਦ੍ਦਾਨੁਖੁਦ੍ਦਕਂ ਛਿਨ੍ਦਿਤ੍ਵਾ ਕੋਟ੍ਟੇਤ੍ਵਾ ਨਿਪ੍ਪੀਲ਼ੇਤ੍ਵਾ ਪਕ੍ਕਂ ਯੇਭੁਯ੍ਯੇਨ ਚ ਸਕਸਟਂ ਫਾਣਿਤਂ. ਤਾਦਿਸਸ੍ਸ ਚ ਕਸਟਸ੍ਸ ਅਬ੍ਬੋਹਾਰਿਕਤ੍ਤਾ ‘‘ਤਂ ਯੁਤ੍ਤ’’ਨ੍ਤਿ ਵੁਤ੍ਤਂ. ਸੀਤੁਦਕੇਨ ਕਤਨ੍ਤਿ ਮਧੁਕਪੁਪ੍ਫਾਨਿ ਸੀਤੋਦਕੇ ਪਕ੍ਖਿਪਿਤ੍ਵਾ ਮਦ੍ਦਿਤ੍ਵਾ ਪੁਪ੍ਫਰਸੇ ਉਦਕਗਤੇ ਸਤਿ ਤਂ ਉਦਕਂ ਗਹੇਤ੍ਵਾ ਪਚਿਤ੍ਵਾ ਕਤਫਾਣਿਤਂ. ਖੀਰਂ ਪਕ੍ਖਿਪਿਤ੍ਵਾ ਕਤਂ ਮਧੁਕਫਾਣਿਤਂ ਯਾਵਕਾਲਿਕਨ੍ਤਿ ਏਤ੍ਥ ਖੀਰਂ ਪਕ੍ਖਿਪਿਤ੍ਵਾ ਪਕ੍ਕਤੇਲਂ ਕਸ੍ਮਾ ਵਿਕਾਲੇ ਵਟ੍ਟਤੀਤਿ ਚੇ? ਤੇਲੇ ਪਕ੍ਖਿਤ੍ਤਖੀਰਂ ਤੇਲਮੇਵ ਹੋਤਿ, ਅਞ੍ਞਂ ਪਨ ਖੀਰਂ ਪਕ੍ਖਿਪਿਤ੍ਵਾ ਕਤਂ ਖੀਰਭਾਵਂ ਗਣ੍ਹਾਤੀਤਿ ਇਦਮੇਤ੍ਥ ਕਾਰਣਂ. ਯਦਿ ਏਵਂ ਖਣ੍ਡਸਕ੍ਖਰਮ੍ਪਿ ਖੀਰਂ ਪਕ੍ਖਿਪਿਤ੍ਵਾ ਕਰੋਨ੍ਤਿ, ਤਂ ਕਸ੍ਮਾ ਵਟ੍ਟਤੀਤਿ ਆਹ ‘‘ਖਣ੍ਡਸਕ੍ਖਰਂ ਪਨਾ’’ਤਿਆਦਿ. ਤਤ੍ਥ ਖੀਰਜਲ੍ਲਿਕਨ੍ਤਿ ਖੀਰਫੇਣਂ.
ਭੇਸਜ੍ਜੋਦਿਸ੍ਸਂ ਦਸ੍ਸੇਨ੍ਤੇਨ ‘‘ਸਤ੍ਤਵਿਧਞ੍ਹਿ ਓਦਿਸ੍ਸਂ ਨਾਮਾ’’ਤਿਆਦਿਨਾ ਇਤਰਾਨਿਪਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾਨਿ. ਵਿਕਟਾਨੀਤਿ ਅਪਕਤਿਭੇਸਜ੍ਜਤ੍ਤਾ ਵਿਕਟਾਨਿ, ਵਿਰੂਪਾਨੀਤਿ ਅਤ੍ਥੋ. ਦੁਕ੍ਕਟਵਤ੍ਥੂਨਮ੍ਪਿ ਅਕਪ੍ਪਿਯਮਂਸਾਨਂ ਵਸਾਯ ਅਨੁਞ੍ਞਾਤਤ੍ਤਾ ‘‘ਵਸੋਦਿਸ੍ਸ’’ਨ੍ਤਿ ਵੁਤ੍ਤਂ. ਓਲ਼ਾਰਿਕਾਨਮ੍ਪਿ ਆਹਾਰਤ੍ਥਂ ਫਰਿਤੁਂ ਸਮਤ੍ਥਾਨਂ ਸਪ੍ਪਿਆਦੀਨਂ ਭੇਸਜ੍ਜਨਾਮੇਨ ਅਨੁਞ੍ਞਾਤਤ੍ਤਾ ‘‘ਭੇਸਜ੍ਜੋਦਿਸ੍ਸ’’ਨ੍ਤਿ ਵੁਤ੍ਤਂ. ‘‘ਪਚ੍ਛਾਭਤ੍ਤਤੋ ਪਟ੍ਠਾਯ ਸਤਿ ਪਚ੍ਚਯੇਤਿ ਵੁਤ੍ਤਤ੍ਤਾ ਪਟਿਗ੍ਗਹਿਤਭੇਸਜ੍ਜਾਨਿ ਦੁਤਿਯਦਿਵਸਤੋ ਪਟ੍ਠਾਯ ਪੁਰੇਭਤ੍ਤਮ੍ਪਿ ਸਤਿ ਪਚ੍ਚਯੇ ਪਰਿਭੁਞ੍ਜਿਤਬ੍ਬਾਨਿ, ਨ ਆਹਾਰਤ੍ਥਂ ਭੇਸਜ੍ਜਤ੍ਥਾਯ ਪਟਿਗ੍ਗਹਿਤਤ੍ਤਾ’’ਤਿ ਵਦਨ੍ਤਿ.
੬੨੪. ਦ੍ਵਾਰਵਾਤਪਾਨਕਵਾਟੇਸੂਤਿ ਮਹਾਦ੍ਵਾਰਸ੍ਸ ਵਾਤਪਾਨਾਨਞ੍ਚ ਕਵਾਟਫਲਕੇਸੁ. ਕਸਾਵੇ ਪਕ੍ਖਿਤ੍ਤਾਨਿ ਤਾਨਿ ਅਤ੍ਤਨੋ ਸਭਾਵਂ ਪਰਿਚ੍ਚਜਨ੍ਤਿ, ਤਸ੍ਮਾ ‘‘ਮਕ੍ਖੇਤਬ੍ਬਾਨੀ’’ਤਿ ਵੁਤ੍ਤਂ, ਘੁਣਪਾਣਕਾਦਿਪਰਿਹਾਰਤ੍ਥਂ ਮਕ੍ਖੇਤਬ੍ਬਾਨੀਤਿ ਅਤ੍ਥੋ. ਅਧਿਟ੍ਠੇਤੀਤਿ ‘‘ਇਦਾਨਿ ਮਯ੍ਹਂ ਅਜ੍ਝੋਹਰਣੀਯਂ ਨ ਭਵਿਸ੍ਸਤਿ, ਬਾਹਿਰਪਰਿਭੋਗਤ੍ਥਾਯ ਗਮਿਸ੍ਸਤੀ’’ਤਿ ਚਿਤ੍ਤਂ ਉਪ੍ਪਾਦੇਤੀਤਿ ਅਤ੍ਥੋ. ਤੇਨੇਵਾਹ – ‘‘ਸਪ੍ਪਿਞ੍ਚ ਤੇਲਞ੍ਚ ਵਸਞ੍ਚ ਮੁਦ੍ਧਨਿ ਤੇਲਂ ਵਾ ਅਬ੍ਭਞ੍ਜਨਂ ਵਾ’’ਤਿਆਦਿ. ‘‘ਏਵਂ ਅਧਿਟ੍ਠਿਤਞ੍ਚ ਪਟਿਗ੍ਗਹਣਂ ਵਿਜਹਤੀ’’ਤਿ ਵਦਨ੍ਤਿ.
੬੨੫. ਸਚੇ ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਅਵਿਭਤ੍ਤਂ ਹੋਤਿ, ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀਤਿ ਏਤ੍ਥ ਮਜ੍ਝੇ ਪਾਠੋ ਪਰਿਹੀਨੋ, ਏਵਂ ਪਨੇਤ੍ਥ ਪਾਠੋ ਵੇਦਿਤਬ੍ਬੋ ‘‘ਸਚੇ ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਅਵਿਭਤ੍ਤਂ ਹੋਤਿ, ਸਤ੍ਤਾਹਾਤਿਕ੍ਕਮੇ ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ, ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀ’’ਤਿ. ਅਞ੍ਞਥਾ ਪਨ ਸਦ੍ਦਪ੍ਪਯੋਗੋਪਿ ਨ ਸਙ੍ਗਚ੍ਛਤਿ. ਗਣ੍ਠਿਪਦੇਪਿ ਚ ਅਯਮੇਵ ਪਾਠੋ ਦਸ੍ਸਿਤੋ. ਤਤ੍ਥ ਦ੍ਵਿਨ੍ਨਮ੍ਪਿ ਅਨਾਪਤ੍ਤੀਤਿ ਯਥਾ ਅਞ੍ਞਸ੍ਸ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਸਤ੍ਤਾਹਾਤਿਕ੍ਕਮੇਨ ਨਿਸ੍ਸਗ੍ਗਿਯਂ ਨ ਹੋਤਿ ਪਰਸਨ੍ਤਕਭਾਵਤੋ, ਏਵਮਿਦਮ੍ਪਿ ਅਵਿਭਤ੍ਤਤ੍ਤਾ ਉਭਯਸਾਧਾਰਣਮ੍ਪਿ ਅਵਿਨਿਬ੍ਭੋਗਭਾਵਤੋ ਨਿਸ੍ਸਗ੍ਗਿਯਂ ਨ ਹੋਤੀਤਿ ਅਧਿਪ੍ਪਾਯੋ. ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀਤਿ ਭਿਕ੍ਖੁਨਾ ਪਟਿਗ੍ਗਹਿਤਤ੍ਤਾ ਸਤ੍ਤਾਹਾਤਿਕ੍ਕਮੇ ਯਸ੍ਸ ਕਸ੍ਸਚਿ ਭਿਕ੍ਖੁਨੋ ਪਰਿਭੁਞ੍ਜਿਤੁਂ ਨ ਵਟ੍ਟਤਿ ਪਟਿਗ੍ਗਹਿਤਸਪ੍ਪਿਆਦੀਨਂ ਪਰਿਭੋਗਸ੍ਸ ਸਤ੍ਤਾਹੇਨੇਵ ਪਰਿਚ੍ਛਿਨ੍ਨਤ੍ਤਾ. ‘‘ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀ’’ਤਿ ਹਿ ਵੁਤ੍ਤਂ. ਗਣ੍ਠਿਪਦੇਸੁ ਪਨ ਤੀਸੁਪਿ ਇਧ ਪਾਠਸ੍ਸ ਪਰਿਹੀਨਭਾਵਂ ਅਸਲ੍ਲਕ੍ਖੇਤ੍ਵਾ ‘‘ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀਤਿ ਇਦਂ ਅਨ੍ਤੋਸਤ੍ਤਾਹੇ ਪਰਿਭੋਗਂ ਸਨ੍ਧਾਯ ਵੁਤ੍ਤਨ੍ਤਿ ਸਞ੍ਞਾਯ ਵਿਸ੍ਸਾਸਗ੍ਗਾਹਾਭਾਵਤੋ ਪਰਿਭੁਞ੍ਜਿਤੁਂ ਨ ਵਟ੍ਟਤੀ’’ਤਿ ਏਵਮਤ੍ਥੋ ਵੁਤ੍ਤੋ, ਸੋ ਨ ਗਹੇਤਬ੍ਬੋ.
ਆਵੁਸੋ, ਇਮਂ ਤੇਲਂ ਸਤ੍ਤਾਹਮਤ੍ਤਂ ਪਰਿਭੁਞ੍ਜ ਤ੍ਵਨ੍ਤਿ ਇਮਿਨਾ ਯੇਨ ਪਟਿਗ੍ਗਹਿਤਂ, ਤੇਨ ਅਨ੍ਤੋਸਤ੍ਤਾਹੇਯੇਵ ਪਰਸ੍ਸ ਵਿਸ੍ਸਜ੍ਜਿਤਭਾਵਂ ਦਸ੍ਸੇਤਿ. ਕਸ੍ਸ ਆਪਤ੍ਤੀਤਿ ਪਠਮਂ ਤਾਵ ਉਭਿਨ੍ਨਂ ਸਾਧਾਰਣਤ੍ਤਾ ਅਨਾਪਤ੍ਤਿ ਵੁਤ੍ਤਾ. ਇਦਾਨਿ ਪਨ ਏਕੇਨ ਇਤਰਸ੍ਸ ਵਿਸ੍ਸਟ੍ਠਭਾਵਤੋ ਉਭਯਸਾਧਾਰਣਤਾ ਨਤ੍ਥੀਤਿ ਵਿਭਤ੍ਤਸਦਿਸਂ ਹੁਤ੍ਵਾ ਠਿਤਂ, ਤਸ੍ਮਾ ਏਤ੍ਥ ਪਟਿਗ੍ਗਹਿਤਸ੍ਸ ਸਤ੍ਤਾਹਾਤਿਕ੍ਕਮੇ ਏਕਸ੍ਸ ਆਪਤ੍ਤਿਯਾ ਭਵਿਤਬ੍ਬਨ੍ਤਿ ਮਞ੍ਞਮਾਨੋ ‘‘ਕਿਂ ਪਟਿਗ੍ਗਹਣਪਚ੍ਚਯਾ ਪਟਿਗ੍ਗਾਹਕਸ੍ਸ ਆਪਤ੍ਤਿ, ਉਦਾਹੁ ਯਸ੍ਸ ਸਨ੍ਤਕਂ ਜਾਤਂ, ਤਸ੍ਸਾ’’ਤਿ ਪੁਚ੍ਛਤਿ. ਨਿਸ੍ਸਟ੍ਠਭਾਵਤੋਯੇਵ ਚ ਇਧ ‘‘ਅਵਿਭਤ੍ਤਭਾਵਤੋ’’ਤਿ ਕਾਰਣਂ ਅਵਤ੍ਵਾ ‘‘ਯੇਨ ਪਟਿਗ੍ਗਹਿਤਂ, ਤੇਨ ਵਿਸ੍ਸਜ੍ਜਿਤਤ੍ਤਾ’’ਤਿ ਵੁਤ੍ਤਂ. ਇਦਞ੍ਚ ਵਿਸ੍ਸਟ੍ਠਭਾਵਤੋ ਉਭਯਸਾਧਾਰਣਤਂ ਪਹਾਯ ਏਕਸ੍ਸ ਸਨ੍ਤਕਂ ਹੋਨ੍ਤਮ੍ਪਿ ਯੇਨ ਪਟਿਗ੍ਗਹਿਤਂ, ਤਤੋ ਅਞ੍ਞਸ੍ਸ ਸਨ੍ਤਕਂ ਜਾਤਂ, ਤਸ੍ਮਾ ਪਰਸਨ੍ਤਕਪਟਿਗ੍ਗਹਣੇ ਵਿਯ ਪਟਿਗ੍ਗਾਹਕਸ੍ਸ ਪਟਿਗ੍ਗਹਣਪਚ੍ਚਯਾ ਨਤ੍ਥਿ ਆਪਤ੍ਤੀਤਿ ਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ‘‘ਯੇਨ ਪਟਿਗ੍ਗਹਿਤਂ, ਤੇਨ ਵਿਸ੍ਸਜ੍ਜਿਤਤ੍ਤਾ’’ਤਿ ਵਚਨਤੋ ਅਵਿਸ੍ਸਜ੍ਜਿਤੇ ਸਤਿ ਅਵਿਭਤ੍ਤੇਪਿ ਸਤ੍ਤਾਹਾਤਿਕ੍ਕਮੇ ਆਪਤ੍ਤੀਤਿ ਦਸ੍ਸਨਤ੍ਥਂ ਅਵਿਸ੍ਸਜ੍ਜਿਤੇ ਅਵਿਭਤ੍ਤਭਾਵਤੋਯੇਵ ਅਨਾਪਤ੍ਤਿਯਾ ਸਿਦ੍ਧਤ੍ਤਾ. ਸਚੇ ਪਨ ਇਤਰੋ ਯੇਨ ਪਟਿਗ੍ਗਹਿਤਂ, ਤਸ੍ਸੇਵ ਅਨ੍ਤੋਸਤ੍ਤਾਹੇ ਅਤ੍ਤਨੋ ਭਾਗਮ੍ਪਿ ਵਿਸ੍ਸਜ੍ਜੇਤਿ, ਸਤ੍ਤਾਹਾਤਿਕ੍ਕਮੇ ਸਿਯਾ ਆਪਤ੍ਤਿ ਯੇਨ ਪਟਿਗ੍ਗਹਿਤਂ, ਤਸ੍ਸੇਵ ਸਨ੍ਤਕਭਾਵਮਾਪਨ੍ਨਤ੍ਤਾ ਇਤਰਸ੍ਸ ਅਪ੍ਪਟਿਗ੍ਗਹਿਤਤ੍ਤਾ. ਇਮਿਨਾ ਤਸ੍ਸ ਸਨ੍ਤਕਭਾਵੇਪਿ ਅਞ੍ਞੇਨ ਪਟਿਗ੍ਗਹਿਤਸਕਸਨ੍ਤਕੇ ਵਿਯ ਤੇਨ ਅਪ੍ਪਟਿਗ੍ਗਹਿਤਭਾਵਤੋ ਅਨਾਪਤ੍ਤੀਤਿ ਦੀਪੇਤਿ. ਇਦਂ ਪਨ ਅਧਿਪ੍ਪਾਯਂ ਅਜਾਨਿਤ੍ਵਾ ਇਤੋ ਅਞ੍ਞਥਾ ਗਣ੍ਠਿਪਦਕਾਰਾਦੀਹਿ ਪਪਞ੍ਚਿਤਂ, ਨ ਤਂ ਸਾਰਤੋ ਪਚ੍ਚੇਤਬ੍ਬਂ.
ਅਪਰਿਭੋਗਂ ਹੋਤੀਤਿ ਕਸ੍ਸਚਿ ਅਮਨੁਞ੍ਞਸ੍ਸ ਪਤਿਤਤ੍ਤਾ ਪਰਿਭੋਗਾਰਹਂ ਨ ਹੋਤਿ. ਯੇਨ ਚਿਤ੍ਤੇਨਾਤਿ ਯੇਨ ਪਰਿਚ੍ਚਜਿਤੁਕਾਮਤਾਚਿਤ੍ਤੇਨ. ‘‘ਅਨ੍ਤੋਸਤ੍ਤਾਹੇ’’ਤਿ ਅਧਿਕਾਰਤ੍ਤਾ ‘‘ਅਨ੍ਤੋਸਤ੍ਤਾਹੇ ਅਨਪੇਕ੍ਖੋ ਦਤ੍ਵਾ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿ ਇਮਂ ਸਮ੍ਬਨ੍ਧਂ ਸਨ੍ਧਾਯ ਮਹਾਸੁਮਤ੍ਥੇਰੇਨ ‘‘ਏਵਂ ਅਨ੍ਤੋਸਤ੍ਤਾਹੇ ਦਤ੍ਵਾ’’ਤਿਆਦਿ ਵੁਤ੍ਤਂ. ਮਹਾਪਦੁਮਤ੍ਥੇਰੋ ਪਨ ਯਦਿ ਏਵਂ ‘‘ਵਿਸ੍ਸਜ੍ਜੇਤੀ’’ਤਿ ਇਮਿਨਾਵ ਤਂ ਸਿਦ੍ਧਂ, ਸਤ੍ਤਾਹਾਤਿਕ੍ਕਨ੍ਤਂ ਪਨ ਨਿਸ੍ਸਟ੍ਠਂ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਤਸ੍ਮਾ ਤਸ੍ਸ ਪਰਿਭੋਗਮੁਖਦਸ੍ਸਨਮਿਦਨ੍ਤਿ ਆਹ – ‘‘ਨਯਿਦਂ ਯਾਚਿਤਬ੍ਬ’’ਨ੍ਤਿਆਦਿ. ਅਞ੍ਞੇਨ ਭਿਕ੍ਖੁਨਾਤਿ ਏਤ੍ਥ ਸੁਦ੍ਧਚਿਤ੍ਤੇਨ ਦਿਨ੍ਨਤ੍ਤਾ ਸਯਮ੍ਪਿ ਆਹਰਾਪੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿਯੇਵ. ਸਪ੍ਪਿਆਦੀਨਂ ਪਟਿਗ੍ਗਹਿਤਭਾਵੋ, ਅਤ੍ਤਨੋ ਸਨ੍ਤਕਤਾ, ਸਤ੍ਤਾਹਾਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਭੇਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ
੬੨੭. ਚਤੁਤ੍ਥੇ ਸਿਬ੍ਬਨਰਜਨਕਪ੍ਪਪਰਿਯੋਸਾਨੇਨ ਨਿਟ੍ਠਾਪੇਤ੍ਵਾਤਿ ਸੂਚਿਕਮ੍ਮਨਿਟ੍ਠਾਨੇਨ ਸਕਿਮ੍ਪਿ ਵਣ੍ਣਭੇਦਮਤ੍ਤਰਜਨੇਨ ਕਪ੍ਪਬਿਨ੍ਦੁਕਰਣੇਨ ਚ ਨਿਟ੍ਠਾਪੇਤ੍ਵਾ. ਸਮਯੇਤਿ ਵਸ੍ਸਾਨਸਮਯੇ.
੬੨੮. ਕੁਚ੍ਛਿਸਮਯੋਤਿ ਅਨ੍ਤੋਸਮਯੋ. ‘‘ਅਯਮੇਕੋ ਅਡ੍ਢਮਾਸੋ ਪਰਿਯੇਸਨਕ੍ਖੇਤ੍ਤਞ੍ਚੇਵ ਕਰਣਕ੍ਖੇਤ੍ਤਞ੍ਚ. ਏਤਸ੍ਮਿਞ੍ਹਿ ਅਨ੍ਤਰੇ ਵਸ੍ਸਿਕਸਾਟਿਕਂ ਅਲਦ੍ਧਂ ਪਰਿਯੇਸਿਤੁਂ ਲਦ੍ਧਂ ਕਾਤੁਞ੍ਚ ਵਟ੍ਟਤਿ, ਨਿਵਾਸੇਤੁਂ ਅਧਿਟ੍ਠਾਤੁਞ੍ਚ ਨ ਵਟ੍ਟਤੀ’’ਤਿ ਪੋਤ੍ਥਕੇਸੁ ਪਾਠੋ ਦਿਸ੍ਸਤਿ, ਸੋ ਅਪਾਠੋ. ਏਵਂ ਪਨੇਤ੍ਥ ਪਾਠੇਨ ਭਵਿਤਬ੍ਬਂ ‘‘ਅਯਮੇਕੋ ਅਡ੍ਢਮਾਸੋ ਪਰਿਯੇਸਨਕ੍ਖੇਤ੍ਤਂ. ਏਤਸ੍ਮਿਞ੍ਹਿ ਅਨ੍ਤਰੇ ਵਸ੍ਸਿਕਸਾਟਿਕਂ ਅਲਦ੍ਧਂ ਪਰਿਯੇਸਿਤੁਂ ਵਟ੍ਟਤਿ, ਲਦ੍ਧਂ ਕਾਤੁਂ ਨਿਵਾਸੇਤੁਂ ਅਧਿਟ੍ਠਾਤੁਞ੍ਚ ਨ ਵਟ੍ਟਤੀ’’ਤਿ. ਨ ਹਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਪਠਮੋ ਅਡ੍ਢਮਾਸੋ ਕਰਣਕ੍ਖੇਤ੍ਤਂ ਹੋਤਿ. ‘‘ਅਡ੍ਢਮਾਸੋ ਸੇਸੋ ਗਿਮ੍ਹਾਨਨ੍ਤਿ ਕਤ੍ਵਾ ਨਿਵਾਸੇਤਬ੍ਬ’’ਨ੍ਤਿ ਵਚਨਤੋ ਪਨ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਪਚ੍ਛਿਮੋ ਅਡ੍ਢਮਾਸੋ ਕਰਣਕ੍ਖੇਤ੍ਤਞ੍ਚੇਵ ਨਿਵਾਸਨਕ੍ਖੇਤ੍ਤਞ੍ਚ ਹੋਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਵਹਿਸਕਸਾਟਿਕਸਿਕ੍ਖਾਪਦਵਣ੍ਣਨਾ) ‘‘ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਪਰਿਯੇਸਨਕ੍ਖੇਤ੍ਤਂ, ਪਚ੍ਛਿਮੋ ਅਡ੍ਢਮਾਸੋ ਕਰਣਨਿਵਾਸਨਕ੍ਖੇਤ੍ਤਮ੍ਪੀ’’ਤਿ ਵੁਤ੍ਤਂ. ਤਸ੍ਮਾ ਪਾਲ਼ਿਯਾ ਮਾਤਿਕਾਟ੍ਠਕਥਾਯ ਚ ਅਵਿਰੋਧਂ ਇਚ੍ਛਨ੍ਤੇਨ ਵੁਤ੍ਤਨਯੇਨੇਵ ਪਾਠੋ ਗਹੇਤਬ੍ਬੋ.
‘‘ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਅਨਾਪਤ੍ਤੀ’’ਤਿ ਵਦਨ੍ਤੇਨ ‘‘ਪਿਟ੍ਠਿਸਮਯਤ੍ਤਾ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤੀ’’ਤਿ ਦੀਪਿਤਾ ਹੋਤਿ. ਨ ਹਿ ਞਾਤਕਪਵਾਰਿਤਟ੍ਠਾਨਤੋ ਪਿਟ੍ਠਿਸਮਯੇ ਸਤੁਪ੍ਪਾਦਕਰਣਮਤ੍ਤੇਨਪਿ ਸਮ੍ਭਵਨ੍ਤੀ ਆਪਤ੍ਤਿ ਤਤੋ ਗਰੁਕਤਰਾਯ ਵਿਞ੍ਞਤ੍ਤਿਯਾ ਨ ਹੋਤੀਤਿ ਸਕ੍ਕਾ ਵਤ੍ਤੁਂ. ਤੇਨੇਵ ਭਦਨ੍ਤਬੁਦ੍ਧਦਤ੍ਤਾਚਰਿਯੇਨ ਵੁਤ੍ਤਂ –
‘‘ਕਤ੍ਵਾ ਪਨ ਸਤੁਪ੍ਪਾਦਂ, ਵਸ੍ਸਿਕਸਾਟਿਚੀਵਰਂ;
ਨਿਪ੍ਫਾਦੇਨ੍ਤਸ੍ਸ ਭਿਕ੍ਖੁਸ੍ਸ, ਸਮਯੇ ਪਿਟ੍ਠਿਸਮ੍ਮਤੇ.
‘‘ਹੋਤਿ ਨਿਸ੍ਸਗ੍ਗਿਯਾਪਤ੍ਤਿ, ਞਾਤਕਾਞਾਤਕਾਦਿਨੋ;
ਤੇਸੁਯੇਵ ਚ ਵਿਞ੍ਞਤ੍ਤਿਂ, ਕਤ੍ਵਾ ਨਿਪ੍ਫਾਦਨੇ ਤਥਾ’’ਤਿ.
ਕੇਨਸ੍ਸ ਹੋਤਿ ਆਪਤ੍ਤੀਤਿ ਅਸ੍ਸ ਮਾਤਰਂ ਚੀਵਰਂ ਯਾਚਨ੍ਤਸ੍ਸ ਕੇਨ ਸਿਕ੍ਖਾਪਦੇਨ ਆਪਤ੍ਤੀਤਿ ਪੁਚ੍ਛਤਿ. ‘‘ਪਰਿਣਤਂ ਵਿਞ੍ਞਾਪੇਨ੍ਤਸ੍ਸ ਪਰਿਣਾਮਨਸਿਕ੍ਖਾਪਦੇਨ ਆਪਤ੍ਤੀ’’ਤਿ ਚੋਦਨਾਭਾਵਂ ਦਸ੍ਸੇਤਿ ਨੋ ਚ ਸਙ੍ਘੇ ਪਰਿਣਤਨ੍ਤਿ. ਅਥ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨਾਤਿ ਚੇ, ਏਤਮ੍ਪਿ ਨਤ੍ਥੀਤਿ ਆਹ ‘‘ਅਨਾਪਤ੍ਤਿ ਚ ਞਾਤਕੇ’’ਤਿ. ‘‘ਞਾਤਕੇ ਵਿਞ੍ਞਾਪੇਨ੍ਤਸ੍ਸਾ’’ਤਿ ਪਾਠਸੇਸੋ. ਇਮਮਤ੍ਥਂ ਸਨ੍ਧਾਯਾਤਿ ਪਿਟ੍ਠਿਸਮਯੇ ਵਸ੍ਸਿਕਸਾਟਿਕਤ੍ਥਂ ਞਾਤਕਪਵਾਰਿਤਟ੍ਠਾਨੇ ਸਤੁਪ੍ਪਾਦਕਰਣੇਨ ਆਪਤ੍ਤਿਂ, ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਅਨਾਪਤ੍ਤਿਞ੍ਚ ਸਨ੍ਧਾਯ.
ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ…ਪੇ… ਦੁਕ੍ਕਟਨ੍ਤਿ ਇਦਂ ਵਸ੍ਸਿਕਸਾਟਿਕਂ ਅਦਿਨ੍ਨਪੁਬ੍ਬੇ ਸਨ੍ਧਾਯ ਵੁਤ੍ਤਂ. ਤੇਨੇਵੇਤ੍ਥ ਵਤ੍ਤਭੇਦੇ ਦੁਕ੍ਕਟਂ ਵੁਤ੍ਤਂ, ਦਿਨ੍ਨਪੁਬ੍ਬੇਸੁ ਪਨ ਵਤ੍ਤਭੇਦੋ ਨਤ੍ਥਿ. ਤੇਨੇਵਾਹ – ‘‘ਯੇ ਮਨੁਸ੍ਸਾ…ਪੇ… ਵਤ੍ਤਭੇਦੋ ਨਤ੍ਥੀ’’ਤਿ. ਇਦਨ੍ਤਿ ਯਥਾਵੁਤ੍ਤਨਿਸ੍ਸਗ੍ਗਿਯਪਾਚਿਤ੍ਤਿਯਂ. ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸਾਤਿ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਵਿਞ੍ਞਤ੍ਤਿਂ ਕਤ੍ਵਾ ਨਿਪ੍ਫਾਦੇਨ੍ਤਸ੍ਸ. ਪਕਤਿਯਾ ਵਸ੍ਸਿਕਸਾਟਿਕਦਾਯਕਾ ਨਾਮ ਸਙ੍ਘਵਸੇਨ ਵਾ ਪੁਗ੍ਗਲਵਸੇਨ ਵਾ ਅਪਵਾਰੇਤ੍ਵਾ ਅਨੁਸਂਵਚ੍ਛਰਂ ਵਸ੍ਸਿਕਸਾਟਿਕਾਨਂ ਦਾਯਕਾ. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਅਨਾਪਤ੍ਤੀਤਿ ਏਤ੍ਥ ਇਮਿਨਾਪਿ ਸਿਕ੍ਖਾਪਦੇਨ ਅਨਾਪਤ੍ਤੀਤਿ ਵੇਦਿਤਬ੍ਬਂ. ਕੁਚ੍ਛਿਸਮਯੇ ਹਿ ਅਤ੍ਤਨੋ ਞਾਤਕਪਵਾਰਿਤਟ੍ਠਾਨਤੋ ‘‘ਦੇਥ ਮੇ ਵਸ੍ਸਿਕਸਾਟਿਕ’’ਨ੍ਤਿਆਦਿਨਾ ਵਿਞ੍ਞਾਪੇਨ੍ਤਸ੍ਸਪਿ ਅਨਾਪਤ੍ਤਿ. ਤੇਨੇਵਾਹ – ‘‘ਨ ਵਤ੍ਤਬ੍ਬਾ ਦੇਥ ਮੇਤਿ ਇਦਞ੍ਹਿ ਪਰਿਯੇਸਨਕਾਲੇ ਅਞ੍ਞਾਤਕਅਪ੍ਪਵਾਰਿਤੇ ਏਵ ਸਨ੍ਧਾਯ ਵੁਤ੍ਤ’’ਨ੍ਤਿ. ਮਾਤਿਕਾਟ੍ਠਕਥਾਯਞ੍ਹਿ (ਕਙ੍ਖਾ. ਅਟ੍ਠ. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ ‘‘ਅਤ੍ਤਨੋ ਞਾਤਕਪਵਾਰਿਤਟ੍ਠਾਨਤੋ ਪਨ ‘ਦੇਥ ਮੇ ਵਸ੍ਸਿਕਸਾਟਿਕਚੀਵਰ’ਨ੍ਤਿਆਦਿਕਾਯ ਵਿਞ੍ਞਤ੍ਤਿਯਾਪਿ ਪਰਿਯੇਸਿਤਬ੍ਬ’’ਨ੍ਤਿ.
੬੨੯. ‘‘ਆਕਾਸਤੋ ਪਤਿਤਉਦਕੇਨੇਵਾਤਿ ਵਚਨਤੋ ਛਦਨਕੋਟਿਯਾ ਪਤਿਤਉਦਕੇਨ ਨਹਾਯਨ੍ਤਸ੍ਸ ਅਨਾਪਤ੍ਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ.
੬੩੦. ਛ ਮਾਸੇ ਪਰਿਹਾਰਂ ਲਭਤੀਤਿ ਏਤੇਨ ਅਨ੍ਤੋਵਸ੍ਸੇਪਿ ਯਾਵ ਵਸ੍ਸਾਨਸ੍ਸ ਪਚ੍ਛਿਮਦਿਵਸਾ ਅਕਤਾ ਪਰਿਹਾਰਂ ਲਭਤੀਤਿ ਦੀਪਿਤਂ ਹੋਤਿ. ਯਸ੍ਮਾ ਮੂਲਚੀਵਰਂ ਕਰੋਨ੍ਤੇਨ ਹੇਮਨ੍ਤਸ੍ਸ ਪਚ੍ਛਿਮੁਪੋਸਥਦਿਵਸੇਯੇਵ ਕਾਤਬ੍ਬਂ, ਤਸ੍ਮਾ ਗਿਮ੍ਹਾਨਤੋ ਏਕੂਨਤਿਂਸਦਿਵਸੇ ਪਰਿਹਾਰਂ ਲਭਤਿ, ਏਵਂ ਸਨ੍ਤੇਪਿ ਅਪ੍ਪਕਂ ਊਨਮਧਿਕਂ ਵਾ ਗਣਨੂਪਗਂ ਨ ਹੋਤੀਤਿ ਕਤ੍ਵਾ ‘‘ਤਤੋ ਪਰਮ੍ਪਿ…ਪੇ… ਏਕਮਾਸ’’ਨ੍ਤਿ ਵੁਤ੍ਤਂ. ਏਕਾਹਦ੍ਵੀਹਾਦਿਵਸੇਨ…ਪੇ… ਲਦ੍ਧਾ ਚੇਵ ਨਿਟ੍ਠਿਤਾ ਚਾਤਿ ਇਮਿਨਾ ਏਕਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚ, ਦ੍ਵੀਹਾਨਾਗਤਾਯ…ਪੇ… ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚ, ਅਨ੍ਤੋਵਸ੍ਸੇ ਵਾ ਲਦ੍ਧਾ ਚੇਵ ਨਿਟ੍ਠਿਤਾ ਚਾਤਿ ਅਯਮਤ੍ਥੋ ਦਸ੍ਸਿਤੋ. ਤਤ੍ਥ ਆਸਾਲ਼੍ਹਿਮਾਸਸ੍ਸ ਜੁਣ੍ਹਪਕ੍ਖਪੁਣ੍ਣਮਿਯਂ ਲਦ੍ਧਾ ਚੇਵ ਨਿਟ੍ਠਿਤਾ ਚ ਵਸ੍ਸਿਕਸਾਟਿਕਾ ‘‘ਏਕਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਏਤੇਨੇਵ ਨਯੇਨ ਜੁਣ੍ਹਪਕ੍ਖਸ੍ਸ ਛਟ੍ਠਿਯਂ ਲਦ੍ਧਾ ਚੇਵ ਨਿਟ੍ਠਿਤਾ ਚ ‘‘ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਯਾਵ ਪਠਮਕਤ੍ਤਿਕਤੇਮਾਸਪੁਣ੍ਣਮੀ, ਤਾਵ ਅਨ੍ਤੋਤੇਮਾਸੇ ਲਦ੍ਧਾ ਚੇਵ ਨਿਟ੍ਠਿਤਾ ਚ ‘‘ਅਨ੍ਤੋਵਸ੍ਸੇ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਪਠਮਕਤ੍ਤਿਕਤੇਮਾਸਪੁਣ੍ਣਮਿਤੋ ਪਰਞ੍ਹਿ ਲਦ੍ਧਾ ਚੇਵ ਨਿਟ੍ਠਿਤਾ ਚ ਯਾਵ ਚੀਵਰਕਾਲੋ ਨਾਤਿਕ੍ਕਮਤਿ, ਤਾਵ ਅਨਧਿਟ੍ਠਹਿਤ੍ਵਾ ਠਪੇਤੁਂ ਵਟ੍ਟਤੀਤਿ ਨ ਤਤ੍ਰਾਯਂ ਵਿਚਾਰਣਾ ਸਮ੍ਭਵਤਿ.
ਤਸ੍ਮਿਂਯੇਵ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾਤਿ ਅਵਿਸੇਸੇਨ ਵੁਤ੍ਤੇਪਿ ਵਸ੍ਸਾਨਤੋ ਪੁਬ੍ਬੇ ਏਕਾਹਦ੍ਵੀਹਾਦਿਵਸੇਨ ਅਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਤੇਹਿ ਦਿਵਸੇਹਿ ਸਦ੍ਧਿਂ ਦਸਾਹਂ ਅਨਤਿਕ੍ਕਮਨ੍ਤੇਨ ਵਸ੍ਸੂਪਨਾਯਿਕਦਿਵਸਤੋ ਪਟ੍ਠਾਯ ਅਧਿਟ੍ਠਾਨਕ੍ਖੇਤ੍ਤਂ ਸਮ੍ਪਤ੍ਤਾਯੇਵ ਅਧਿਟ੍ਠਾਤਬ੍ਬਾ, ਨ ਤਤੋ ਪੁਬ੍ਬੇ ਅਧਿਟ੍ਠਾਨਸ੍ਸ ਅਖੇਤ੍ਤਤ੍ਤਾ. ਅਨ੍ਤੋਵਸ੍ਸੇ ਪਨ ਲਦ੍ਧਾ ਤਸ੍ਮਿਂਯੇਵ ਅਨ੍ਤੋਵਸ੍ਸੇ ਲਦ੍ਧਦਿਵਸਤੋ ਪਟ੍ਠਾਯ ਦਸਾਹਂ ਅਨਤਿਕ੍ਕਾਮੇਤ੍ਵਾ ਅਧਿਟ੍ਠਾਤਬ੍ਬਾ.
ਨਨੁ ਚ ਵਸ੍ਸਾਨਤੋ ਪੁਬ੍ਬੇ ਅਨਧਿਟ੍ਠਹਿਤ੍ਵਾ ਦਸਾਹਂ ਅਤਿਕ੍ਕਾਮੇਤੁਂ ਵਟ੍ਟਤਿਯੇਵ, ਤਸ੍ਮਾ ਅਧਿਟ੍ਠਾਨਸ੍ਸ ਅਖੇਤ੍ਤਭੂਤੇਪਿ ਦਿਵਸੇ ਗਹੇਤ੍ਵਾ ‘‘ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬ’’ਨ੍ਤਿ ਕਸ੍ਮਾ ਵੁਤ੍ਤਂ? ਯਥਾ ‘‘ਅਨ੍ਤੋਵਸ੍ਸੇ ਲਦ੍ਧਾਪਿ ਯਾਵ ਨ ਨਿਟ੍ਠਾਤਿ, ਤਾਵ ਅਨਧਿਟ੍ਠਹਿਤ੍ਵਾ ਦਸਾਹਂ ਅਤਿਕ੍ਕਾਮੇਤੁਂ ਵਟ੍ਟਤੀ’’ਤਿ ਅਕਤਾਯ ਅਨਧਿਟ੍ਠਾਨਕ੍ਖੇਤ੍ਤਸਦਿਸਾਪਿ ਅਤਿਕ੍ਕਨ੍ਤਦਿਵਸਾ ਦਸਾਹਂ ਅਤਿਕ੍ਕਾਮੇਤ੍ਵਾ ਨਿਟ੍ਠਿਤਾਯ ਗਣਨੂਪਗਾ ਹੋਨ੍ਤੀਤਿ ਨਿਟ੍ਠਿਤਦਿਵਸੇਯੇਵ ਅਧਿਟ੍ਠਾਤਬ੍ਬਾ, ਏਵਮਿਧਾਪਿ ਵਸ੍ਸਾਨਤੋ ਪੁਬ੍ਬੇ ਅਨਧਿਟ੍ਠਾਨਕ੍ਖੇਤ੍ਤਭੂਤਾਪਿ ਦਿਵਸਾ ਲਦ੍ਧਦਿਵਸਤੋ ਪਟ੍ਠਾਯ ਗਣਨੂਪਗਾ ਹੋਨ੍ਤੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਯਦਿ ਏਵਂ ‘‘ਤਸ੍ਮਿਂਯੇਵ ਅਨ੍ਤੋਦਸਾਹੇ’’ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਛਟ੍ਠਿਯਂ ਲਦ੍ਧਾ ਪੁਣ੍ਣਮਿਯਂ ਅਧਿਟ੍ਠਾਤਬ੍ਬਾਤਿ ਆਪਜ੍ਜਤੀਤਿ? ਨਾਪਜ੍ਜਤਿ ‘‘ਚਾਤੁਮਾਸਂ ਅਧਿਟ੍ਠਾਤੁ’’ਨ੍ਤਿ ਵਚਨੇਨੇਵ ਪਟਿਕ੍ਖਿਤ੍ਤਤ੍ਤਾ. ਏਵਂ ਸਨ੍ਤੇ ‘‘ਦਸਾਹਾਨਾਗਤਾਯਾ’’ਤਿ ਇਮਿਨਾ ਕਿਂ ਪਯੋਜਨਨ੍ਤਿ ਚੇ? ਵਸ੍ਸਾਨਤੋ ਪੁਬ੍ਬੇਯੇਵ ਦਸਾਹੇ ਅਤਿਕ੍ਕਨ੍ਤੇ ਵਸ੍ਸੂਪਨਾਯਿਕਦਿਵਸੇ ਨਿਟ੍ਠਿਤਾ ਤਦਹੇਵ ਅਧਿਟ੍ਠਾਤਬ੍ਬਾਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ ਇਦਮੇਤ੍ਥ ਪਯੋਜਨਂ. ਤੇਨੇਵਾਹ – ‘‘ਦਸਾਹਾਤਿਕ੍ਕਮੇ ਨਿਟ੍ਠਿਤਾ ਤਦਹੇਵ ਅਧਿਟ੍ਠਾਤਬ੍ਬਾ’’ਤਿ.
ਦਸਾਹੇ ਅਪ੍ਪਹੋਨ੍ਤੇ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾਤਿ ਤੇਮਾਸਬ੍ਭਨ੍ਤਰੇ ਦਸਾਹੇ ਅਪ੍ਪਹੋਨ੍ਤੇ ਲਦ੍ਧਾ ਚੇਵ ਨਿਟ੍ਠਿਤਾ ਚ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ ‘‘ਪਠਮਕਤ੍ਤਿਕਤੇਮਾਸਪੁਣ੍ਣਮਿਤੋ ਪੁਬ੍ਬੇ ਸਤ੍ਤਮਿਤੋ ਪਟ੍ਠਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚ ਵਸ੍ਸਿਕਸਾਟਿਕਾ ਦਸਾਹੇ ਅਨਤਿਕ੍ਕਨ੍ਤੇਯੇਵ ਚੀਵਰਕਾਲਂ ਓਤਿਣ੍ਣਤ੍ਤਾ ਤਤ੍ਥ ਅਨਧਿਟ੍ਠਹਿਤ੍ਵਾਪਿ ਠਪੇਤੁਂ ਵਟ੍ਟਤੀ’’ਤਿ. ਇਮਿਨਾ ਚ ਇਮਂ ਦੀਪੇਤਿ – ਅਕਤਾ ਚੇ ਵਸ੍ਸਿਕਸਾਟਿਕਾ, ਵਸ੍ਸਾਨਂ ਚਾਤੁਮਾਸਂ ਅਕਤਤ੍ਤਾਯੇਵ ਪਰਿਹਾਰਂ ਲਭਤਿ, ਕਤਾਯ ਪਨ ਦਸਾਹਪਰਮਸਿਕ੍ਖਾਪਦਂ ਅਵਿਕੋਪੇਤ੍ਵਾ ਪਰਿਹਾਰੋ ਵਤ੍ਤਬ੍ਬੋਤਿ.
ਯਦਾ ਵਾ ਤਦਾ ਵਾ ਅਧਿਟ੍ਠਾਤੁਂ ਵਟ੍ਟਤੀਤਿ ਚਾਤੁਮਾਸਬ੍ਭਨ੍ਤਰੇ ਦਸਾਹੇ ਅਤਿਕ੍ਕਨ੍ਤੇਪਿ ਨਤ੍ਥਿ ਦੋਸੋਤਿ ਅਧਿਪ੍ਪਾਯੋ. ‘‘ਕਦਾ ਅਧਿਟ੍ਠਾਤਬ੍ਬਾ…ਪੇ… ਯਦਿ ਨਪ੍ਪਹੋਤਿ, ਯਾਵ ਕਤ੍ਤਿਕਪੁਣ੍ਣਮਾ ਪਰਿਹਾਰਂ ਲਭਤੀ’’ਤਿ ਇਮਿਨਾਪਿ ਕੁਰੁਨ੍ਦਿਵਚਨੇਨ ਅਕਤਾਯ ਵਸ੍ਸਿਕਸਾਟਿਕਾਯ ਚਾਤੁਮਾਸਂ ਪਰਿਹਾਰੋ, ਕਤਾਯ ਦਸਾਹਮੇਵ ਪਰਿਹਾਰੋਤਿ ਅਯਮਤ੍ਥੋ ਦੀਪਿਤੋਯੇਵਾਤਿ ਆਹ ‘‘ਅਪਿਚਾ’’ਤਿਆਦਿ.
ਪਾਲ਼ਿਯਂ ਅਚ੍ਛਿਨ੍ਨਚੀਵਰਸ੍ਸ ਨਟ੍ਠਚੀਵਰਸ੍ਸਾਤਿਆਦਿਨਾ ਨਿਸ੍ਸਗ੍ਗਿਯੇਨ ਅਨਾਪਤ੍ਤਿ ਵੁਤ੍ਤਾ, ਉਦਾਹੁ ਨਗ੍ਗਸ੍ਸ ਨਹਾਯਤੋ ਦੁਕ੍ਕਟੇਨ ਅਨਾਪਤ੍ਤਿ ਵੁਤ੍ਤਾਤਿ? ਕਿਮੇਤ੍ਥ ਪੁਚ੍ਛਿਤਬ੍ਬਂ. ਸਬ੍ਬਸਿਕ੍ਖਾਪਦੇਸੁ ਹਿ ਯਤ੍ਥ ਯਤ੍ਥ ਮੂਲਸਿਕ੍ਖਾਪਦੇਨ ਆਪਤ੍ਤਿਪ੍ਪਸਙ੍ਗੋ, ਤਤ੍ਥ ਤਤ੍ਥ ਅਨਾਪਤ੍ਤਿਦਸ੍ਸਨਤ੍ਥਂ ਅਨਾਪਤ੍ਤਿਵਾਰੋ ਆਰਭੀਯਤੀਤਿ ਇਧਾਪਿ ਨਿਸ੍ਸਗ੍ਗਿਯੇਨ ਅਨਾਪਤ੍ਤਿਦਸ੍ਸਨਤ੍ਥਨ੍ਤਿ ਯੁਤ੍ਤਂ ਵਤ੍ਤੁਂ. ਨ ਹਿ ਮੂਲਾਪਤ੍ਤਿਯਾ ਅਨਾਪਤ੍ਤਿਂ ਅਦਸ੍ਸੇਤ੍ਵਾ ਅਨ੍ਤਰਾ ਵੁਤ੍ਤਾਯ ਏਵ ਆਪਤ੍ਤਿਯਾ ਅਨਾਪਤ੍ਤਿਦਸ੍ਸਨਤ੍ਥਂ ਅਨਾਪਤ੍ਤਿਵਾਰੋ ਆਰਭੀਯਤੀਤਿ. ਤੇਨੇਵ ਤੀਸੁਪਿ ਗਣ੍ਠਿਪਦੇਸੁ ਇਦਂ ਵੁਤ੍ਤਂ ‘‘ਅਚ੍ਛਿਨ੍ਨਚੀਵਰਸ੍ਸ ਨਟ੍ਠਚੀਵਰਸ੍ਸ ਚਾਤਿ ਏਤ੍ਥ ਅਚ੍ਛਿਨ੍ਨਸੇਸਚੀਵਰਸ੍ਸ ਨਟ੍ਠਸੇਸਚੀਵਰਸ੍ਸ ਚ ਅਸਮਯੇ ਨਿਵਾਸੇਨ੍ਤਸ੍ਸ ਪਰਿਯੇਸਨ੍ਤਸ੍ਸ ਚ ਅਨਾਪਤ੍ਤਿ. ਆਪਦਾਸੂਤਿ ਏਤ੍ਥ ਅਨਿਵਤ੍ਥਂ ਚੋਰਾ ਹਰਨ੍ਤੀਤਿ ਅਸਮਯੇ ਨਿਵਾਸੇਨ੍ਤਸ੍ਸ ਅਨਾਪਤ੍ਤੀ’’ਤਿ. ਮਾਤਿਕਾਟ੍ਠਕਥਾਯਮ੍ਪਿ (ਕਙ੍ਖਾ. ਅਟ੍ਠ. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ ‘‘ਅਚ੍ਛਿਨ੍ਨਚੀਵਰਸ੍ਸ ਵਾ ਨਟ੍ਠਚੀਵਰਸ੍ਸ ਵਾ ਅਨਿਵਤ੍ਥਂ ਚੋਰਾ ਹਰਨ੍ਤੀਤਿ ਏਵਂ ਆਪਦਾਸੁ ਵਾ ਨਿਵਾਸਯਤੋ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤੀ’’ਤਿ. ਅਟ੍ਠਕਥਾਯਂ ਪਨ ਨਗ੍ਗਸ੍ਸ ਨਹਾਯਤੋ ਦੁਕ੍ਕਟੇਨੇਵ ਅਨਾਪਤ੍ਤਿਂ ਸਨ੍ਧਾਯ ‘‘ਅਚ੍ਛਿਨ੍ਨਚੀਵਰਸ੍ਸਾਤਿ ਏਤਂ ਵਸ੍ਸਿਕਸਾਟਿਕਮੇਵ ਸਨ੍ਧਾਯ ਵੁਤ੍ਤਂ. ਤੇਸਞ੍ਹਿ ਨਗ੍ਗਾਨਂ ਕਾਯੋਵਸ੍ਸਾਪਨੇ ਅਨਾਪਤ੍ਤਿ. ਏਤ੍ਥ ਚ ਮਹਗ੍ਘਵਸ੍ਸਿਕਸਾਟਿਕਂ ਨਿਵਾਸੇਤ੍ਵਾ ਨਹਾਯਨ੍ਤਸ੍ਸ ਚੋਰੁਪਦ੍ਦਵੋ ਆਪਦਾ ਨਾਮਾ’’ਤਿ ਯਂ ਵੁਤ੍ਤਂ, ਤਤ੍ਥ ਕਾਰਣਂ ਪਰਿਯੇਸਿਤਬ੍ਬਂ.
ਅਥ ਉਭਯੇਨਪਿ ਅਨਾਪਤ੍ਤਿਦਸ੍ਸਨਤ੍ਥਂ ‘‘ਅਚ੍ਛਿਨ੍ਨਚੀਵਰਸ੍ਸਾ’’ਤਿਆਦਿ ਆਰਦ੍ਧਨ੍ਤਿ ਏਵਮਧਿਪ੍ਪਾਯੋ ਸਿਯਾ, ਏਵਮ੍ਪਿ ‘‘ਅਚ੍ਛਿਨ੍ਨਚੀਵਰਸ੍ਸਾਤਿ ਏਤਂ ਵਸ੍ਸਿਕਸਾਟਿਕਮੇਵ ਸਨ੍ਧਾਯ ਵੁਤ੍ਤ’’ਨ੍ਤਿਆਦਿਨਾ ਵਿਸੇਸੇਤ੍ਵਾ ਨ ਵਤ੍ਤਬ੍ਬਂ. ਏਵਞ੍ਹਿ ਵਤ੍ਤਬ੍ਬਂ ਸਿਯਾ ‘‘ਅਚ੍ਛਿਨ੍ਨਸੇਸਚੀਵਰਸ੍ਸ ਨਟ੍ਠਸੇਸਚੀਵਰਸ੍ਸ ਵਾ ਅਸਮਯੇ ਨਿਵਾਸੇਨ੍ਤਸ੍ਸ ਪਰਿਯੇਸਨ੍ਤਸ੍ਸ ਚ ਨਿਸ੍ਸਗ੍ਗਿਯੇਨ ਅਨਾਪਤ੍ਤਿ, ਅਚ੍ਛਿਨ੍ਨਵਸ੍ਸਿਕਸਾਟਿਕਸ੍ਸ ਨਟ੍ਠਵਸ੍ਸਿਕਸਾਟਿਕਸ੍ਸ ਵਾ ਨਗ੍ਗਸ੍ਸ ਨਹਾਯਤੋ ਦੁਕ੍ਕਟੇਨ ਅਨਾਪਤ੍ਤਿ, ਆਪਦਾਸੁ ਅਨਿਵਤ੍ਥਂ ਚੋਰਾ ਹਰਨ੍ਤੀਤਿ ਅਸਮਯੇ ਨਿਵਾਸਯਤੋ ਨਿਸ੍ਸਗ੍ਗਿਯੇਨ ਅਨਾਪਤ੍ਤਿ, ਮਹਗ੍ਘਵਸ੍ਸਿਕਸਾਟਿਕਂ ਨਿਵਾਸੇਤ੍ਵਾ ਨਹਾਯਨ੍ਤਸ੍ਸ ਚੋਰਾ ਹਰਨ੍ਤਿ, ਨਗ੍ਗਸ੍ਸ ਨਹਾਯਤੋ ਦੁਕ੍ਕਟੇਨ ਅਨਾਪਤ੍ਤੀ’’ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਅਙ੍ਗੇਸੁ ਪਨ ਵਸ੍ਸਿਕਸਾਟਿਕਾਯ ਅਤ੍ਤੁਦ੍ਦੇਸਿਕਤਾ, ਅਸਮਯੇ ਪਰਿਯੇਸਨਤਾ, ਤਾਯ ਚ ਪਟਿਲਾਭੋਤਿ ਇਮਾਨਿ ਤਾਵ ਪਰਿਯੇਸਨਾਪਤ੍ਤਿਯਾ ਤੀਣਿ ਅਙ੍ਗਾਨਿ. ਸਚੀਵਰਤਾ, ਆਪਦਾਭਾਵੋ, ਵਸ੍ਸਿਕਸਾਟਿਕਾਯ ਸਕਭਾਵੋ, ਅਸਮਯੇ ਨਿਵਾਸਨਨ੍ਤਿ ਇਮਾਨਿ ਨਿਵਾਸਨਾਪਤ੍ਤਿਯਾ ਚਤ੍ਤਾਰਿ ਅਙ੍ਗਾਨਿ.
ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ
੬੩੧. ਪਞ੍ਚਮੇ ਯਮ੍ਪਿ ਤ੍ਯਾਹਨ੍ਤਿ ਏਤ੍ਥ ਯਨ੍ਤਿ ਕਾਰਣਵਚਨਂ, ਤਸ੍ਮਾ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ – ਮਯਾ ਸਦ੍ਧਿਂ ਜਨਪਦਚਾਰਿਕਂ ਪਕ੍ਕਮਿਸ੍ਸਤੀਤਿ ਯਂ ਕਾਰਣਂ ਨਿਸ੍ਸਾਯ ਅਹਂ ਤੇ, ਆਵੁਸੋ, ਚੀਵਰਂ ਅਦਾਸਿਂ, ਤਂ ਨ ਕਰੋਸੀਤਿ ਕੁਪਿਤੋ ਅਨਤ੍ਤਮਨੋ ਅਚ੍ਛਿਨ੍ਦੀਤਿ. ਯਨ੍ਤਿ ਵਾ ਚੀਵਰਂ ਪਰਾਮਸਤਿ, ਤਤ੍ਥ ‘‘ਮਯਾ ਸਦ੍ਧਿਂ ਜਨਪਦਚਾਰਿਕਂ ਪਕ੍ਕਮਿਸ੍ਸਤੀਤਿ ਯਮ੍ਪਿ ਤੇ ਅਹਂ ਚੀਵਰਂ ਅਦਾਸਿਂ, ਤਂ ਚੀਵਰਂ ਗਣ੍ਹਿਸ੍ਸਾਮੀਤਿ ਕੁਪਿਤੋ ਅਨਤ੍ਤਮਨੋ ਅਚ੍ਛਿਨ੍ਦੀ’’ਤਿ ਸਮ੍ਬਨ੍ਧਿਤਬ੍ਬਂ.
੬੩੩. ਆਣਤ੍ਤੋ ਬਹੂਨਿ ਗਣ੍ਹਾਤਿ, ਏਕਂ ਪਾਚਿਤ੍ਤਿਯਨ੍ਤਿ ‘‘ਚੀਵਰਂ ਗਣ੍ਹਾ’’ਤਿ ਆਣਤ੍ਤਿਯਾ ਏਕਚੀਵਰਵਿਸਯਤ੍ਤਾ ਏਕਮੇਵ ਪਾਚਿਤ੍ਤਿਯਂ. ਵਾਚਾਯ ਵਾਚਾਯ ਦੁਕ੍ਕਟਨ੍ਤਿ ਏਤ੍ਥ ਅਚ੍ਛਿਨ੍ਨੇਸੁ ਵਤ੍ਥੁਗਣਨਾਯ ਪਾਚਿਤ੍ਤਿਯਾਨਿ. ਏਕਵਾਚਾਯ ਸਮ੍ਬਹੁਲਾ ਆਪਤ੍ਤਿਯੋਤਿ ਇਦਂ ਅਚ੍ਛਿਨ੍ਨੇਸੁ ਵਤ੍ਥੁਗਣਨਾਯ ਆਪਜ੍ਜਿਤਬ੍ਬਂ ਪਾਚਿਤ੍ਤਿਯਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਆਣਤ੍ਤਿਯਾ ਆਪਜ੍ਜਿਤਬ੍ਬਂ ਪਨ ਦੁਕ੍ਕਟਂ ਏਕਮੇਵ.
੬੩੪. ਏਵਨ੍ਤਿ ਇਮਿਨਾ ‘‘ਵਤ੍ਥੁਗਣਨਾਯ ਦੁਕ੍ਕਟਾਨੀ’’ਤਿ ਇਦਂ ਪਰਾਮਸਤਿ. ਏਸੇਵ ਨਯੋਤਿ ਸਿਥਿਲਂ ਗਾਲ਼੍ਹਞ੍ਚ ਪਕ੍ਖਿਤ੍ਤਾਸੁ ਆਪਤ੍ਤਿਯਾ ਬਹੁਤ੍ਤਂ ਏਕਤ੍ਤਞ੍ਚ ਅਤਿਦਿਸ੍ਸਤਿ.
੬੩੫. ਆਵੁਸੋ, ਮਯਨ੍ਤਿਆਦੀਸੁ ਗਣ੍ਹਿਤੁਕਾਮਤਾਯ ਏਵਂ ਵੁਤ੍ਤੇਪਿ ਤੇਨੇਵ ਦਿਨ੍ਨਤ੍ਤਾ ਅਨਾਪਤ੍ਤਿ. ਅਮ੍ਹਾਕਂ ਸਨ੍ਤਿਕੇ ਉਪਜ੍ਝਂ ਗਣ੍ਹਿਸ੍ਸਤੀਤਿ ਇਦਂ ਸਾਮਣੇਰਸ੍ਸਪਿ ਦਾਨਂ ਦੀਪੇਤਿ. ਤਸ੍ਮਾ ਕਿਞ੍ਚਾਪਿ ਪਾਲ਼ਿਯਂ ‘‘ਭਿਕ੍ਖੁਸ੍ਸ ਸਾਮਂ ਚੀਵਰਂ ਦਤ੍ਵਾ’’ਤਿ ਵੁਤ੍ਤਂ, ਤਥਾਪਿ ਅਨੁਪਸਮ੍ਪਨ੍ਨਕਾਲੇ ਦਤ੍ਵਾਪਿ ਉਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਨ੍ਤਸ੍ਸ ਪਾਚਿਤ੍ਤਿਯਮੇਵਾਤਿ ਵੇਦਿਤਬ੍ਬਂ. ਅਚ੍ਛਿਨ੍ਦਨਸਮਯੇ ਉਪਸਮ੍ਪਨ੍ਨਭਾਵੋਯੇਵ ਹੇਤ੍ਥ ਪਮਾਣਂ. ਦੇਤੀਤਿ ਤੁਟ੍ਠੋ ਵਾ ਕੁਪਿਤੋ ਵਾ ਦੇਤਿ. ਰੁਨ੍ਧਥਾਤਿ ਨਿਵਾਰੇਥ. ਏਵਂ ਪਨ ਦਾਤੁਂ ਨ ਵਟ੍ਟਤੀਤਿ ਏਤ੍ਥ ਏਵਂ ਦਿਨ੍ਨਂ ਨ ਤਾਵ ਤਸ੍ਸ ਸਨ੍ਤਕਨ੍ਤਿ ਅਨਧਿਟ੍ਠਹਿਤ੍ਵਾਵ ਪਰਿਭੁਞ੍ਜਿਤਬ੍ਬਨ੍ਤਿ ਵੇਦਿਤਬ੍ਬਂ. ਆਹਰਾਪੇਤੁਂ ਪਨ ਵਟ੍ਟਤੀਤਿ ਏਵਂ ਦਿਨ੍ਨਂ ਭਤਿਸਦਿਸਤ੍ਤਾ ਆਹਰਾਪੇਤੁਂ ਵਟ੍ਟਤਿ. ਚਜਿਤ੍ਵਾ ਦਿਨ੍ਨਨ੍ਤਿ ਵੁਤ੍ਤਨਯੇਨ ਅਦਤ੍ਵਾ ਅਨਪੇਕ੍ਖੇਨ ਹੁਤ੍ਵਾ ਤਸ੍ਸੇਵ ਦਿਨ੍ਨਂ. ਭਣ੍ਡਗ੍ਘੇਨ ਕਾਰੇਤਬ੍ਬੋਤਿ ਸਕਸਞ੍ਞਾਯ ਵਿਨਾ ਗਣ੍ਹਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਆਪਤ੍ਤਿਯਾ ਕਾਰੇਤਬ੍ਬੋ. ਵਿਕਪ੍ਪਨੁਪਗਪਚ੍ਛਿਮਚੀਵਰਤਾ, ਸਾਮਂ ਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧਵਸੇਨ ਅਚ੍ਛਿਨ੍ਦਨਂ ਅਚ੍ਛਿਨ੍ਦਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.
ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ
੬੩੬. ਛਟ੍ਠੇ ਪਾਲ਼ਿਯਂ ਚੀਵਰਕਾਰਸਮਯੇਤਿ ਇਮਿਨਾ ਵਸ੍ਸਂਵੁਤ੍ਥਭਿਕ੍ਖੂਨਂ ਚੀਵਰਕਮ੍ਮਸਮਯਤ੍ਤਾ ਚੀਵਰਮਾਸੋ ਵੁਤ੍ਤੋ, ਅਥਞ੍ਞੋਪਿ ਪਨ ਚੀਵਰਕਮ੍ਮਕਾਲੋ ਚੀਵਰਕਾਰਸਮਯੋਤਿ ਵਤ੍ਤੁਂ ਵਟ੍ਟਤਿ.
੬੩੮. ਪਞ੍ਚਹਿਪਿ ਮਿਸ੍ਸੇਤ੍ਵਾਤਿ ਖੋਮਾਦੀਹਿ ਪਞ੍ਚਹਿ ਮਿਸ੍ਸੇਤ੍ਵਾ. ਵੀਤਵੀਤਟ੍ਠਾਨਂ ਯਤ੍ਥ ਸਂਹਰਿਤ੍ਵਾ ਠਪੇਨ੍ਤਿ, ਤਸ੍ਸ ਤੁਰੀਤਿ ਅਧਿਵਚਨਂ. ਸੁਤ੍ਤਂ ਪਵੇਸੇਤ੍ਵਾ ਯੇਨ ਆਕੋਟੇਨ੍ਤਾ ਘਨਭਾਵਂ ਸਮ੍ਪਾਦੇਨ੍ਤਿ, ਤਂ ਵੇਮਨ੍ਤਿ ਵੁਚ੍ਚਤਿ. ਯਂ ਯਨ੍ਤਿ ਯਂ ਯਂ ਪਯੋਗਂ. ਤਨ੍ਤੂਨਂ ਅਤ੍ਤਨੋ ਸਨ੍ਤਕਤ੍ਤਾ ਵੀਤਵੀਤਟ੍ਠਾਨਂ ਪਟਿਲਦ੍ਧਮੇਵ ਹੋਤੀਤਿ ਆਹ ‘‘ਦੀਘਤੋ…ਪੇ… ਵੀਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ. ਪਾਲ਼ਿਯਮ੍ਪਿ ਹਿ ਇਮਿਨਾਵ ਅਧਿਪ੍ਪਾਯੇਨ ‘‘ਪਟਿਲਾਭੇਨ ਨਿਸ੍ਸਗ੍ਗਿਯ’’ਨ੍ਤਿ ਵੁਤ੍ਤਂ, ਤਸ੍ਮਾ ਯਾਵ ਚੀਵਰਂ ਵਡ੍ਢਤਿ, ਤਾਵ ਇਮਿਨਾ ਪਮਾਣੇਨ ਆਪਤ੍ਤਿਯੋ ਵਡ੍ਢਨ੍ਤਿ.
ਸੇਸੋ ਕਪ੍ਪਿਯੋਤਿ ਏਤ੍ਥ ਹਤ੍ਥਕਮ੍ਮਯਾਚਨਵਸੇਨ. ਪੁਬ੍ਬੇ ਵੁਤ੍ਤਨਯੇਨ ਨਿਸ੍ਸਗ੍ਗਿਯਨ੍ਤਿ ਦੀਘਸੋ ਵਿਦਤ੍ਥਿਮਤ੍ਤੇ ਤਿਰਿਯਂ ਹਤ੍ਥਮਤ੍ਤੇ ਚ ਵੀਤੇ ਨਿਸ੍ਸਗ੍ਗਿਯਂ. ਤੇਨੇਵਾਤਿ ਅਕਪ੍ਪਿਯਤਨ੍ਤਵਾਯੇਨ. ਤਥੇਵ ਦੁਕ੍ਕਟਨ੍ਤਿ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ. ਕੇਦਾਰਬਦ੍ਧਾਦੀਹੀਤਿ ਆਦਿ-ਸਦ੍ਦੇਨ ਅਚ੍ਛਿਮਣ੍ਡਲਬਦ੍ਧਾਦਿ ਗਹਿਤਂ. ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਨ੍ਤਿ ਏਤ੍ਥ ‘‘ਪਚ੍ਛਾ ਵੀਤਟ੍ਠਾਨਂ ਅਧਿਟ੍ਠਿਤਗਤਿਕਮੇਵ ਹੋਤਿ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਸਚੇ ਪਨ ਪਰਿਚ੍ਛੇਦਂ ਦਸ੍ਸੇਤ੍ਵਾ ਅਨ੍ਤਰਨ੍ਤਰਾ ਅਵੀਤਂ ਹੋਤਿ, ਪੁਨ ਅਧਿਟ੍ਠਾਤਬ੍ਬ’’ਨ੍ਤਿ ਵਦਨ੍ਤਿ. ਏਸੇਵ ਨਯੋਤਿ ਵਿਕਪ੍ਪਨੁਪਗਪ੍ਪਮਾਣਮਤ੍ਤੇ ਵੀਤੇ ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਨ੍ਤਿ ਅਤ੍ਥੋ. ਚੀਵਰਤ੍ਥਾਯ ਵਿਞ੍ਞਾਪਿਤਸੁਤ੍ਤਂ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤਵਾਯੇਨ ਵਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ) ਪਨ ਵਾਯਾਪੇਯ੍ਯਾਤਿ ਏਤ੍ਥ ‘‘ਚੀਵਰਂ ਮੇ, ਆਵੁਸੋ, ਵਾਯਥਾਤਿ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪੇਯ੍ਯਾ’’ਤਿ ਅਤ੍ਥਂ ਵਤ੍ਵਾ ਅਙ੍ਗੇਸੁਪਿ ‘‘ਅਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪਨ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਂ, ਤਥਾਵਿਧਂ ਪਨ ਵਿਸੇਸਵਚਨਂ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਉਪਲਬ੍ਭਤਿ. ਪਾਲ਼ਿਯਮ੍ਪਿ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਏਤ੍ਤਕਮੇਵ ਅਨਾਪਤ੍ਤਿਵਾਰੇ ਵੁਤ੍ਤਂ, ਅਟ੍ਠਕਥਾਯਞ੍ਚ ਸੁਤ੍ਤਤਨ੍ਤਵਾਯਾਨਮੇਵ ਕਪ੍ਪਿਯਾਕਪ੍ਪਿਯਭਾਵੇਨ ਬਹੁਧਾ ਨਯੋ ਦਸ੍ਸਿਤੋ, ਨ ਕਪ੍ਪਿਯਾਕਪ੍ਪਿਯਵਿਞ੍ਞਤ੍ਤਿਵਸੇਨਾਤਿ. ‘‘ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪੇਯ੍ਯਾ’’ਤਿ ਚ ਵਿਸੇਸੇਤ੍ਵਾ ਵਦਨ੍ਤੇਨ ਅਯਂ ਨਾਮ ਕਪ੍ਪਿਯਵਿਞ੍ਞਤ੍ਤੀਤਿ ਵਿਸੁਂ ਨ ਦਸ੍ਸਿਤਂ, ਤਸ੍ਮਾ ਵੀਮਂਸਿਤ੍ਵਾ ਗਹੇਤਬ੍ਬਂ.
ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ
੬੪੨. ਸਤ੍ਤਮੇ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾਤਿ ਇਦਂ ਤਸ੍ਸ ਕਤ੍ਤਬ੍ਬਾਕਾਰਮਤ੍ਤਦਸ੍ਸਨਂ, ਦਾਨਂ ਪਨੇਤ੍ਥ ਅਙ੍ਗਂ ਨ ਹੋਤਿ ਸੁਤ੍ਤਵਡ੍ਢਨਵਸੇਨੇਵ ਆਪਜ੍ਜਿਤਬ੍ਬਤ੍ਤਾ. ਤੇਨੇਵ ਪਦਭਾਜਨੇਪਿ ‘‘ਤਸ੍ਸ ਵਚਨੇਨ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਕਰੋਤਿ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯ’’ਨ੍ਤਿ ਸੁਤ੍ਤਵਡ੍ਢਨਾਕਾਰਮੇਵ ਦਸ੍ਸੇਤ੍ਵਾ ਆਪਤ੍ਤਿ ਵੁਤ੍ਤਾ. ਮਾਤਿਕਾਟ੍ਠਕਥਾਯਮ੍ਪਿ (ਕਙ੍ਖਾ. ਅਟ੍ਠ. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ ‘‘ਨ ਭਿਕ੍ਖੁਨੋ ਪਿਣ੍ਡਪਾਤਦਾਨਮਤ੍ਤੇਨ ਤਂ ਨਿਸ੍ਸਗ੍ਗਿਯਂ ਹੋਤਿ. ਸਚੇ ਪਨ ਤੇ ਤਸ੍ਸ ਵਚਨੇਨ ਚੀਵਰਸਾਮਿਕਾਨਂ ਹਤ੍ਥਤੋ ਸੁਤ੍ਤਂ ਗਹੇਤ੍ਵਾ ਈਸਕਮ੍ਪਿ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਕਰੋਨ੍ਤਿ, ਅਥ ਤੇਸਂ ਪਯੋਗੇ ਭਿਕ੍ਖੁਨੋ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤੀ’’ਤਿ. ਆਯਤਾਦੀਸੁ ਸਤ੍ਤਸੁ ਆਕਾਰੇਸੁ ਆਦਿਮ੍ਹਿ ਤਯੋ ਆਕਾਰੇ ਸੁਤ੍ਤਵਡ੍ਢਨੇਨ ਵਿਨਾ ਨ ਸਕ੍ਕਾ ਕਾਤੁਨ੍ਤਿ ਆਹ ‘‘ਸੁਤ੍ਤਵਡ੍ਢਨਆਕਾਰਮੇਵ ਦਸ੍ਸੇਤੀ’’ਤਿ. ਸੁਵੀਤਾਦਯੋ ਹਿ ਆਕਾਰੇ ਵਿਨਾਪਿ ਸੁਤ੍ਤਵਡ੍ਢਨੇਨ ਸਕ੍ਕਾ ਕਾਤੁਂ. ਸੇਸਮੇਤ੍ਥ ਉਤ੍ਤਾਨਮੇਵ. ਅਞ੍ਞਾਤਕਅਪ੍ਪਵਾਰਿਤਾਨਂ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਵਿਕਪ੍ਪਮਾਪਜ੍ਜਨਤਾ, ਚੀਵਰਸ੍ਸ ਅਤ੍ਤੁਦ੍ਦੇਸਿਕਤਾ, ਤਸ੍ਸ ਵਚਨੇਨ ਸੁਤ੍ਤਵਡ੍ਢਨਂ, ਚੀਵਰਸ੍ਸ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ
੬੪੬. ਅਟ੍ਠਮੇ ਅਸਮ੍ਮੋਹਤ੍ਥਨ੍ਤਿ ਦਸਾਹਾਨਾਗਤਪਦੇ ਅਸਮ੍ਮੋਹਤ੍ਥਂ. ਪਠਮਪਦਸ੍ਸਾਤਿ ਦਸਾਹਾਨਾਗਤਪਦਸ੍ਸ. ਤਾਨਿ ਦਿਵਸਾਨੀਤਿ ਤੇਸੁ ਦਿਵਸੇਸੁ. ਉਪ੍ਪਜ੍ਜੇਯ੍ਯਾਤਿ ਸਙ੍ਘਤੋ ਵਾ ਗਣਤੋ ਵਾ ਉਜੁਕਂ ਅਤ੍ਤਨੋਯੇਵ ਵਾ ਉਪ੍ਪਜ੍ਜੇਯ੍ਯ. ਪਞ੍ਚਮਿਤੋਤਿ ਏਤ੍ਥ ਵਸ੍ਸਂ ਵਸਨ੍ਤਸ੍ਸ ਸਙ੍ਘਸ੍ਸ ਪਞ੍ਚਮਿਤੋ ਪੁਬ੍ਬੇ ਉਪ੍ਪਨ੍ਨਂ ਅਚ੍ਚੇਕਚੀਵਰਂ ਪਞ੍ਚਮਿਯਂ ਵਿਭਜਿਤ੍ਵਾ ਗਹਿਤਂ ਅਚ੍ਚੇਕਚੀਵਰਪਰਿਹਾਰਮੇਵ ਲਭਤਿ. ਉਜੁਕਂ ਅਤ੍ਤਨੋਯੇਵ ਉਪ੍ਪਨ੍ਨਂ ਚੇ, ਪਞ੍ਚਮਿਯਂ ਉਪ੍ਪਨ੍ਨਮੇਵ ਅਚ੍ਚੇਕਚੀਵਰਪਰਿਹਾਰਂ ਲਭਤਿ, ਨ ਤਤੋ ਪੁਬ੍ਬੇਤਿ ਦਟ੍ਠਬ੍ਬਂ.
ਸਦ੍ਧਾਮਤ੍ਤਕਨ੍ਤਿ ਧਮ੍ਮਸ੍ਸਵਨਾਦੀਹਿ ਤਙ੍ਖਣੁਪ੍ਪਨ੍ਨਂ ਸਦ੍ਧਾਮਤ੍ਤਕਂ. ਆਰੋਚਿਤਂ ਚੀਵਰਨ੍ਤਿ ਆਰੋਚੇਤ੍ਵਾ ਦਿਨ੍ਨਚੀਵਰਂ. ਛਟ੍ਠਿਯਂ ਉਪ੍ਪਨ੍ਨਚੀਵਰਸ੍ਸ ਏਕਾਦਸਮੋ ਅਰੁਣੋ ਚੀਵਰਕਾਲੇ ਉਟ੍ਠਾਤੀਤਿ ਆਹ ‘‘ਛਟ੍ਠਿਤੋ ਪਟ੍ਠਾਯਾ’’ਤਿਆਦਿ. ਠਪਿਤਚੀਵਰਮ੍ਪੀਤਿ ਪਧਾਨਚੀਵਰਦਸ੍ਸਨਮੁਖੇਨ ਸਬ੍ਬਮ੍ਪਿ ਅਤਿਰੇਕਚੀਵਰਂ ਵੁਤ੍ਤਂ. ਅਥ ‘‘ਚੀਵਰਮਾਸੇਪਿ ਅਤਿਰੇਕਚੀਵਰਂ ਨਿਕ੍ਖਿਪਿਤੁਂ ਵਟ੍ਟਤੀ’’ਤਿ ਇਦਂ ਕੁਤੋ ਲਦ੍ਧਨ੍ਤਿ ਚੇ? ‘‘ਵਿਸੁਂ ਅਨਨੁਞ੍ਞਾਤੇਪਿ ਇਮਸ੍ਮਿਂ ਸਿਕ੍ਖਾਪਦੇ ‘ਚੀਵਰਕਾਲਸਮਯੋ ਨਾਮ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚ ਮਾਸਾ’ਤਿ ਵਦਨ੍ਤੇਨ ਤਤਿਯਕਥਿਨਸਿਕ੍ਖਾਪਦੇ ‘ਅਕਾਲਚੀਵਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨ’ਨ੍ਤਿ ਵਦਨ੍ਤੇਨ ਚ ਅਨੁਞ੍ਞਾਤਮੇਵ ਹੋਤੀ’’ਤਿ ਵਦਨ੍ਤਿ. ‘‘ਅਟ੍ਠਕਥਾਵਚਨਪ੍ਪਮਾਣੇਨ ਗਹੇਤਬ੍ਬ’’ਨ੍ਤਿ ਚ ਕੇਚਿ.
੬੫੦. ਇਦਾਨਿ ਪਠਮਕਥਿਨਾਦਿਸਿਕ੍ਖਾਪਦੇਹਿ ਤਸ੍ਸ ਤਸ੍ਸ ਚੀਵਰਸ੍ਸ ਲਬ੍ਭਮਾਨਂ ਪਰਿਹਾਰਂ ਇਧੇਵ ਉਪਸਂਹਰਿਤ੍ਵਾ ਦਸ੍ਸੇਨ੍ਤੋ ‘‘ਇਤਿ ਅਤਿਰੇਕਚੀਵਰਸ੍ਸ ਦਸਾਹਂ ਪਰਿਹਾਰੋ’’ਤਿਆਦਿਮਾਹ. ‘‘ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚ ਮਾਸਾ’’ਤਿ ਅਯਮੇਵ ਪਾਠੋ ਗਹੇਤਬ੍ਬੋ. ਕੇਚਿ ਪਨੇਤ੍ਥ ‘‘ਕਾਮਞ੍ਚੇਸ ‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’ਨ੍ਤਿ ਇਮਿਨਾਵ ਸਿਦ੍ਧੋ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤ’’ਨ੍ਤਿ ਪਾਠਂ ਵਤ੍ਵਾ ‘‘ਦਸਦਿਵਸਾਧਿਕੋ ਮਾਸੋ, ਦਸਦਿਵਸਾਧਿਕਾ ਪਞ੍ਚ ਮਾਸਾਤਿ ਪਾਠੇਨ ਭਵਿਤਬ੍ਬ’’ਨ੍ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ਤਸ੍ਸ ਪਮਾਦਪਾਠਤ੍ਤਾ. ਨ ਹਿ ਦਸਾਹੇਨ ਅਸਮ੍ਪਤ੍ਤਾਯ ਕਤ੍ਤਿਕਤੇਮਾਸਿਕਪੁਣ੍ਣਮਾਯ ਚੀਵਰਕਾਲਤੋ ਪੁਬ੍ਬੇ ਦਸ ਦਿਵਸਾ ਅਧਿਕਾ ਹੋਨ੍ਤਿ. ਏਵਞ੍ਹਿ ਸਤਿ ‘‘ਨਵਾਹਾਨਾਗਤਂ ਕਤ੍ਤਿਕਤੇਮਾਸਿਕਪੁਣ੍ਣਮ’’ਨ੍ਤਿ ਵਤ੍ਤਬ੍ਬਂ.
ਮਾਤਿਕਾਟ੍ਠਕਥਾਯਮ੍ਪਿ (ਕਙ੍ਖਾ. ਅਟ੍ਠ. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ) ‘‘ਪਵਾਰਣਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤੀ’’ਤਿ ਵਤ੍ਵਾ ‘‘ਕਾਮਞ੍ਚੇਸ ‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’ਨ੍ਤਿ ਇਮਿਨਾਵ ਸਿਦ੍ਧੋ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤ’’ਨ੍ਤਿ ਪਾਠੋ ਦਸ੍ਸਿਤੋ, ਸੋਪਿ ਪਮਾਦਪਾਠੋਯੇਵ. ‘‘ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯਾ’’ਤਿ ਚ ਵੁਤ੍ਤਤ੍ਤਾ ਤਤ੍ਥੇਵ ਪੁਬ੍ਬਾਪਰਵਿਰੋਧੋਪਿ ਸਿਯਾ, ਛਟ੍ਠਿਤੋ ਪਟ੍ਠਾਯਾਤਿ ਵਤ੍ਤਬ੍ਬਂ. ਏਵਞ੍ਹਿ ਸਤਿ ‘‘ਦਸਾਹਪਰਮਸਿਕ੍ਖਾਪਦੇਨੇਵ ਸਿਦ੍ਧ’’ਨ੍ਤਿ ਸਕ੍ਕਾ ਵਤ੍ਤੁਂ. ਇਮਮੇਵ ਚ ਪਮਾਦਪਾਠਂ ਗਹੇਤ੍ਵਾ ਭਦਨ੍ਤਬੁਦ੍ਧਦਤ੍ਤਾਚਰਿਯੇਨ ਚ –
‘‘ਤਸ੍ਸਾਚ੍ਚਾਯਿਕਵਤ੍ਥਸ੍ਸ, ਕਥਿਨੇ ਤੁ ਅਨਤ੍ਥਤੇ;
ਪਰਿਹਾਰੇਕਮਾਸੋਵ, ਦਸਾਹਪਰਮੋ ਮਤੋ.
‘‘ਅਤ੍ਥਤੇ ਕਥਿਨੇ ਤਸ੍ਸ, ਪਞ੍ਚ ਮਾਸਾ ਪਕਾਸਿਤਾ;
ਪਰਿਹਾਰੋ ਮੁਨਿਨ੍ਦੇਨ, ਦਸਾਹਪਰਮਾ ਪਨਾ’’ਤਿ. –
ਵੁਤ੍ਤਂ.
ਅਚ੍ਚੇਕਚੀਵਰਕਾਲੇ ਉਪ੍ਪਨ੍ਨਤ੍ਤਾ ‘‘ਅਚ੍ਚੇਕਚੀਵਰਸਦਿਸੇ’’ਤਿ ਵੁਤ੍ਤਂ. ‘‘ਪਞ੍ਚਮਿਯਂ ਉਪ੍ਪਨ੍ਨਂ ਅਨਚ੍ਚੇਕਚੀਵਰਂ ਦਸਾਹਂ ਅਤਿਕ੍ਕਾਮਯਤੋ ਚੀਵਰਕਾਲਤੋ ਪੁਬ੍ਬੇਯੇਵ ਆਪਤ੍ਤਿ ਹੋਤਿ, ਨ ਚੀਵਰਕਾਲਾਤਿਕ੍ਕਮੇ, ਤਸ੍ਮਾ ਚੀਵਰਕਾਲਾਤਿਕ੍ਕਮੇ ਪੁਨ ਆਪਜ੍ਜਿਤਬ੍ਬਾਯ ਆਪਤ੍ਤਿਯਾ ਅਭਾਵਂ ਸਨ੍ਧਾਯ ‘ਅਨਚ੍ਚੇਕਚੀਵਰੇ ਅਨਚ੍ਚੇਕਚੀਵਰਸਞ੍ਞੀ ਅਨਾਪਤ੍ਤੀ’ਤਿ ਵੁਤ੍ਤ’’ਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਵਿਕਪ੍ਪਨੁਪਗਪਚ੍ਛਿਮਪ੍ਪਮਾਣਸ੍ਸ ਅਚ੍ਚੇਕਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਦਸਾਹਾਨਾਗਤਾਯ ਕਤ੍ਤਿਕਤੇਮਾਸਿਕਪੁਣ੍ਣਮਾਯ ਉਪ੍ਪਨ੍ਨਭਾਵੋ, ਅਨਧਿਟ੍ਠਿਤਅਵਿਕਪ੍ਪਿਤਤਾ, ਚੀਵਰਕਾਲਾਤਿਕ੍ਕਮੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਸਾਸਙ੍ਕਸਿਕ੍ਖਾਪਦਵਣ੍ਣਨਾ
੬੫੨. ਨਵਮੇ ਅਨ੍ਤਰਘਰੇਤਿ ਅਨ੍ਤਰੇ ਘਰਾਨਿ ਏਤ੍ਥ, ਏਤਸ੍ਸਾਤਿ ਵਾ ਅਨ੍ਤਰਘਰਨ੍ਤਿ ਲਦ੍ਧਵੋਹਾਰੇ ਗੋਚਰਗਾਮੇ. ਤੇਨਾਹ ‘‘ਅਨ੍ਤੋਗਾਮੇ’’ਤਿ. ਪਾਲ਼ਿਯਂ ਵਿਪ੍ਪਵਸਨ੍ਤੀਤਿ ਇਦਂ ਯਸ੍ਮਿਂ ਵਿਹਾਰੇ ਵਸਨ੍ਤਾ ਅਨ੍ਤਰਘਰੇ ਚੀਵਰਂ ਨਿਕ੍ਖਿਪਿਂਸੁ, ਤਤੋ ਅਞ੍ਞਤ੍ਥ ਵਸਨ੍ਤੇ ਸਨ੍ਧਾਯ ਵੁਤ੍ਤਂ. ਤਸ੍ਮਿਞ੍ਹਿ ਵਿਹਾਰੇ ਅਨ੍ਤਰਘਰੇ ਚੀਵਰਂ ਨਿਕ੍ਖਿਪਿਤ੍ਵਾ ਵਸਿਤੁਂ ਅਨੁਞ੍ਞਾਤਤ੍ਤਾ ਤਤ੍ਥ ਵਾਸੋ ਵਿਪ੍ਪਵਾਸੋ ਨਾਮ ਨ ਹੋਤਿ. ਦੁਬ੍ਬਲਚੋਲ਼ਾ ਦੁਚ੍ਚੋਲ਼ਾ ਵਿਰੂਪਚੋਲ਼ਾ ਵਾ, ਦੁਚ੍ਚੋਲ਼ਤ੍ਤਾ ਏਵ ਲੂਖਚੀਵਰਾ.
੬੫੩. ‘‘ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ ਇਮਸ੍ਸ ਵਿਭਙ੍ਗੇ ‘‘ਉਪਸਮ੍ਪਜ੍ਜਾ’’ਤਿ ਉਦ੍ਧਰਿਤਬ੍ਬੇ ‘‘ਉਪਸਮ੍ਪਜ੍ਜ’’ਨ੍ਤਿ ਉਦ੍ਧਰਿਤ੍ਵਾ ‘‘ਯੋ ਪਠਮਸ੍ਸ ਝਾਨਸ੍ਸ ਲਾਭੋ ਪਟਿਲਾਭੋ’’ਤਿਆਦਿ ਵੁਤ੍ਤਂ, ਤਂ ਸਨ੍ਧਾਯਾਹ ‘‘ਉਪਸਮ੍ਪਜ੍ਜਨ੍ਤਿਆਦੀਸੁ ਵਿਯਾ’’ਤਿ. ਆਦਿ-ਸਦ੍ਦੇਨ ‘‘ਅਨਾਪੁਚ੍ਛਂ ਵਾ ਪਕ੍ਕਮੇਯ੍ਯਾ’’ਤਿਆਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਉਪਗਨ੍ਤ੍ਵਾਤਿ ਉਪ-ਸਦ੍ਦਸ੍ਸ ਅਤ੍ਥਮਾਹ. ਵਸਿਤ੍ਵਾਤਿ ਅਖਣ੍ਡਂ ਵਸਿਤ੍ਵਾ. ‘‘ਯੇਨ ਯਸ੍ਸ ਹਿ ਸਮ੍ਬਨ੍ਧੋ, ਦੂਰਟ੍ਠਮ੍ਪਿ ਚ ਤਸ੍ਸ ਤ’’ਨ੍ਤਿ ਵਚਨਤੋ ‘‘ਇਮਸ੍ਸ…ਪੇ… ਇਮਿਨਾ ਸਮ੍ਬਨ੍ਧੋ’’ਤਿ ਵੁਤ੍ਤਂ. ਤਤ੍ਥ ਇਮਸ੍ਸਾਤਿ ‘‘ਉਪਵਸ੍ਸ’’ਨ੍ਤਿ ਪਦਸ੍ਸ. ਨਿਕ੍ਖਿਪੇਯ੍ਯਾਤਿ ਠਪੇਯ੍ਯ.
ਏਤ੍ਤਾਵਤਾ ਚ ਪੁਰਿਮਿਕਾਯ ਉਪਗਨ੍ਤ੍ਵਾ ਅਖਣ੍ਡਂ ਕਤ੍ਵਾ ਵੁਤ੍ਥਵਸ੍ਸੇਨ ਆਰਞ੍ਞਕੇਸੁ ਸੇਨਾਸਨੇਸੁ ਵਿਹਰਨ੍ਤੇਨ ਸਕਲਂ ਕਤ੍ਤਿਕਮਾਸਂ ਤਿਚੀਵਰੇਨ ਵਿਪ੍ਪਵਸਿਤੁਂ ਅਨੁਞ੍ਞਾਤਂ ਹੋਤਿ. ਅਨਤ੍ਥਤਕਥਿਨਸ੍ਸ ਹਿ ਚੀਵਰਮਾਸੇ ਵਿਪ੍ਪਵਾਸੋ ਨ ਵਟ੍ਟਤਿ ਅਤ੍ਥਤਕਥਿਨਾਨਂਯੇਵ ਅਸਮਾਦਾਨਚਾਰਸ੍ਸ ਅਨੁਞ੍ਞਾਤਤ੍ਤਾ. ਕੇਚਿ ਪਨ ‘‘ਅਨਤ੍ਥਤਕਥਿਨਾਨਂ ਚੀਵਰਮਾਸੇਪਿ ਅਸਮਾਦਾਨਚਾਰੋ ਲਬ੍ਭਤੀ’’ਤਿ ਵਤ੍ਵਾ ਬਹੁਧਾ ਪਪਞ੍ਚੇਨ੍ਤਿ, ਤਂ ਨ ਗਹੇਤਬ੍ਬਂ. ਬ੍ਯਞ੍ਜਨਵਿਚਾਰਣਨ੍ਤਿ ‘‘ਉਪਵਸ੍ਸ ਉਪਵਸ੍ਸਿਤ੍ਵਾ’’ਤਿਆਦਿਵਿਚਾਰਣਂ. ਤਸ੍ਸਪੀਤਿ ‘‘ਵੁਤ੍ਥਵਸ੍ਸਾਨ’’ਨ੍ਤਿ ਵਿਭਙ੍ਗਪਦਸ੍ਸ. ਵੁਤ੍ਥਵਸ੍ਸਾਨਨ੍ਤਿ ਚ ਨਿਦ੍ਧਾਰਣੇ ਸਾਮਿਵਚਨਂ. ਤੇਨਾਹ – ‘‘ਏਵਰੂਪਾਨਂ ਭਿਕ੍ਖੂਨਂ ਅਬ੍ਭਨ੍ਤਰੇ’’ਤਿ. ਸੇਨਾਸਨੇਸੂਤਿ ਏਤ੍ਥ ਤਥਾਰੂਪੇਸੂਤਿ ਸਮ੍ਬਨ੍ਧਿਤਬ੍ਬਂ.
ਪਰਿਕ੍ਖੇਪਾਰਹਟ੍ਠਾਨਤੋਤਿ ਏਤ੍ਥ ‘‘ਪਰਿਕ੍ਖੇਪਾਰਹਟ੍ਠਾਨਂ ਨਾਮ ਦ੍ਵੇ ਲੇਡ੍ਡੁਪਾਤਾ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਅਪਰਿਕ੍ਖਿਤ੍ਤਸ੍ਸ ਪਨ ਗਾਮਸ੍ਸ ਪਰਿਯਨ੍ਤੇ ਠਿਤਘਰੂਪਚਾਰਤੋ ਪਟ੍ਠਾਯ ਏਕੋ ਲੇਡ੍ਡੁਪਾਤੋ ਪਰਿਕ੍ਖੇਪਾਰਹਟ੍ਠਾਨਨ੍ਤਿ ਇਦਮੇਤ੍ਥ ਸਨ੍ਨਿਟ੍ਠਾਨਂ. ਤੇਨੇਵ ਵਿਸੁਦ੍ਧਿਮਗ੍ਗੇਪਿ (ਵਿਸੁਦ੍ਧਿ. ੧.੩੧) ਵੁਤ੍ਤਂ ‘‘ਅਪਰਿਕ੍ਖਿਤ੍ਤਸ੍ਸ ਪਠਮਲੇਡ੍ਡੁਪਾਤਤੋ ਪਟ੍ਠਾਯਾ’’ਤਿ. ਸਬ੍ਬਪਠਮਨ੍ਤਿ ਗਾਮਾਭਿਮੁਖਦਿਸਾਭਾਗਤੋ ਸਬ੍ਬਪਠਮਂ. ਤਂ ਪਰਿਚ੍ਛੇਦਂ ਕਤ੍ਵਾਤਿ ਤਂ ਪਠਮਸੇਨਾਸਨਾਦਿਂ ਪਰਿਚ੍ਛੇਦਂ ਕਤ੍ਵਾ. ਇਦਞ੍ਚ ਵਿਨਯਧਰਾਨਂ ਮਤੇਨ ਵੁਤ੍ਤਂ, ਮਜ੍ਝਿਮਭਾਣਕਾਨਂ ਮਤੇਨ ਪਨ ‘‘ਸੇਨਾਸਨਾਦੀਨਂ ਉਪਚਾਰੇ ਠਿਤਸ੍ਸ ਏਕਲੇਡ੍ਡੁਪਾਤਂ ਮੁਞ੍ਚਿਤ੍ਵਾ ਮਿਨਿਤਬ੍ਬ’’ਨ੍ਤਿ ਮਜ੍ਝਿਮਭਾਣਕਾ ਵਦਨ੍ਤਿ. ਤੇਨੇਵ ਮਜ੍ਝਿਮਨਿਕਾਯਟ੍ਠਕਥਾਯਂ ‘‘ਵਿਹਾਰਸ੍ਸਪਿ ਗਾਮਸ੍ਸੇਵ ਉਪਚਾਰਂ ਨੀਹਰਿਤ੍ਵਾ ਉਭਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰਾ ਮਿਨਿਤਬ੍ਬ’’ਨ੍ਤਿ ਵੁਤ੍ਤਂ. ਪਞ੍ਚਧਨੁਸਤਿਕਨ੍ਤਿ ਆਰੋਪਿਤੇਨ ਆਚਰਿਯਧਨੁਨਾ ਪਞ੍ਚਧਨੁਸਤਪ੍ਪਮਾਣਂ. ਤਤੋ ਤਤੋ ਮਗ੍ਗਂ ਪਿਦਹਤੀਤਿ ਤਤ੍ਥ ਤਤ੍ਥ ਖੁਦ੍ਦਕਮਗ੍ਗਂ ਪਿਦਹਤਿ. ਧੁਤਙ੍ਗਚੋਰੋਤਿ ਇਮਿਨਾ ਇਮਸ੍ਸਪਿ ਸਿਕ੍ਖਾਪਦਸ੍ਸ ਅਙ੍ਗਸਮ੍ਪਤ੍ਤਿਯਾ ਅਭਾਵਂ ਦੀਪੇਤਿ.
‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨੀਤਿ ਚੋਰਾਨਂ ਨਿਵਿਟ੍ਠੋਕਾਸਾਦਿਦਸ੍ਸਨੇਨ ‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨਿ. ਸਨ੍ਨਿਹਿਤਬਲਵਭਯਾਨੀਤਿ ਚੋਰੇਹਿ ਮਨੁਸ੍ਸਾਨਂ ਹਤਵਿਲੁਤ੍ਤਾਕੋਟਿਤਭਾਵਦਸ੍ਸਨਤੋ ਸਨ੍ਨਿਹਿਤਬਲਵਭਯਾਨੀਤਿ ਅਤ੍ਥੋ. ਸਚੇ ਪਚ੍ਛਿਮਿਕਾਯਾਤਿਆਦਿਨਾ ਵੁਤ੍ਤਮੇਵਤ੍ਥਂ ਬ੍ਯਤਿਰੇਕਮੁਖੇਨ ਵਿਭਾਵੇਤਿ. ਯਤ੍ਰ ਹਿ ਪਿਣ੍ਡਾਯਾਤਿਆਦਿਨਾ ਵੁਤ੍ਤਪ੍ਪਮਾਣਮੇਵ ਵਿਸੇਸੇਤ੍ਵਾ ਦਸ੍ਸੇਤਿ. ਸਾਸਙ੍ਕਸਪ੍ਪਟਿਭਯਮੇਵਾਤਿ ਏਤ੍ਥ ਸਾਸਙ੍ਕਂ ਵਾ ਸਪ੍ਪਟਿਭਯਂ ਵਾ ਹੋਤੁ, ਵਟ੍ਟਤਿਯੇਵ.
ਪਾਲ਼ਿਯਂ ‘‘ਸਿਯਾ ਚ ਤਸ੍ਸ ਭਿਕ੍ਖੁਨੋ ਕੋਚਿਦੇਵ ਪਚ੍ਚਯੋ ਤੇਨ ਚੀਵਰੇਨ ਵਿਪ੍ਪਵਾਸਾਯ, ਛਾਰਤ੍ਤਪਰਮਂ ਤੇਨ ਭਿਕ੍ਖੁਨਾ ਤੇਨ ਚੀਵਰੇਨ ਵਿਪ੍ਪਵਸਿਤਬ੍ਬ’’ਨ੍ਤਿ ਇਮਿਨਾ ਅਨ੍ਤਰਘਰੇ ਚੀਵਰਂ ਨਿਕ੍ਖਿਪਿਤ੍ਵਾ ਤਸ੍ਮਿਂ ਵਿਹਾਰੇ ਵਸਨ੍ਤਸ੍ਸ ਅਞ੍ਞਤ੍ਥ ਗਮਨਕਿਚ੍ਚੇ ਸਤਿ ਵਿਹਾਰਤੋ ਬਹਿ ਛਾਰਤ੍ਤਂ ਵਿਪ੍ਪਵਾਸੋ ਅਨੁਞ੍ਞਾਤੋ. ਵਸਨਟ੍ਠਾਨਤੋ ਹਿ ਅਞ੍ਞਤ੍ਥ ਛਾਰਤ੍ਤਂ ਵਿਪ੍ਪਵਾਸੋ ਵੁਤ੍ਤੋ, ਨ ਤਸ੍ਮਿਂ ਵਿਹਾਰੇ ਵਸਨ੍ਤਸ੍ਸ. ਤੇਨ ਚ ‘‘ਪੁਨ ਗਾਮਸੀਮਂ ਓਕ੍ਕਮਿਤ੍ਵਾਤਿ ਏਤ੍ਥ ਸਚੇ ਗੋਚਰਗਾਮਤੋ ਪੁਰਤ੍ਥਿਮਾਯ ਦਿਸਾਯ ਸੇਨਾਸਨਂ, ਅਯਞ੍ਚ ਪਚ੍ਛਿਮਦਿਸਂ ਗਤੋ ਹੋਤੀ’’ਤਿਆਦਿ ਵੁਤ੍ਤਂ. ਤਤੋਯੇਵ ਚ ਮਾਤਿਕਾਟ੍ਠਕਥਾਯਮ੍ਪਿ (ਕਙ੍ਖਾ. ਅਟ੍ਠ. ਸਾਸਙ੍ਕਸਿਕ੍ਖਾਪਦਵਣ੍ਣਨਾ) ‘‘ਤਤੋ ਚੇ ਉਤ੍ਤਰਿ ਵਿਪ੍ਪਵਸੇਯ੍ਯਾ’’ਤਿ ਏਤ੍ਥ ‘‘ਛਾਰਤ੍ਤਤੋ ਉਤ੍ਤਰਿ ਤਸ੍ਮਿਂ ਸੇਨਾਸਨੇ ਸਤ੍ਤਮਂ ਅਰੁਣਂ ਉਟ੍ਠਾਪੇਯ੍ਯਾ’’ਤਿ ਅਤ੍ਥੋ ਵੁਤ੍ਤੋ. ਭਦਨ੍ਤਬੁਦ੍ਧਦਤ੍ਤਾਚਰਿਯੇਨ ਪਨ ਪਾਕਟਤਰਂ ਕਤ੍ਵਾ ਅਯਮੇਵਤ੍ਥੋ ਵੁਤ੍ਤੋ. ਵੁਤ੍ਤਞ੍ਹਿ ਤੇਨ –
‘‘ਯਂ ਗਾਮਂ ਗੋਚਰਂ ਕਤ੍ਵਾ, ਭਿਕ੍ਖੁ ਆਰਞ੍ਞਕੇ ਵਸੇ;
ਤਸ੍ਮਿਂ ਗਾਮੇ ਠਪੇਤੁਂ ਤਂ, ਮਾਸਮੇਕਨ੍ਤੁ ਵਟ੍ਟਤਿ.
‘‘ਅਞ੍ਞਤ੍ਥੇਵ ਵਸਨ੍ਤਸ੍ਸ, ਛਾਰਤ੍ਤਪਰਮਂ ਮਤਂ;
ਅਯਮਸ੍ਸ ਅਧਿਪ੍ਪਾਯੋ, ਪਟਿਚ੍ਛਨ੍ਨੋ ਪਕਾਸਿਤੋ’’ਤਿ.
‘‘ਕੋਸਮ੍ਬਿਯਂ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤੀ’’ਤਿ ਆਗਤਤ੍ਤਾ ‘‘ਕੋਸਮ੍ਬਕਸਮ੍ਮੁਤਿ ਅਨੁਞ੍ਞਾਤਾ’’ਤਿ ਵੁਤ੍ਤਂ. ਕੋਸਮ੍ਬਕਸ੍ਸ ਭਿਕ੍ਖੁਨੋ ਸਮ੍ਮੁਤਿ ਕੋਸਮ੍ਬਕਸਮ੍ਮੁਤਿ. ਸੇਨਾਸਨਂ ਆਗਨ੍ਤ੍ਵਾਤਿ ਵੁਸਿਤਵਿਹਾਰਸ੍ਸੇਵ ਸਨ੍ਧਾਯ ਵੁਤ੍ਤਤ੍ਤਾ ਤਸ੍ਮਿਂ ਗਾਮੂਪਚਾਰੇਪਿ ਅਞ੍ਞਸ੍ਮਿਂ ਵਿਹਾਰੇ ਅਰੁਣਂ ਉਟ੍ਠਾਪੇਤੁਂ ਨ ਵਟ੍ਟਤਿ. ਵਸਿਤ੍ਵਾਤਿ ਅਰੁਣਂ ਉਟ੍ਠਾਪੇਤ੍ਵਾ. ਗਤਟ੍ਠਾਨਸ੍ਸ ਅਤਿਦੂਰਤ੍ਤਾ ‘‘ਏਵਂ ਅਸਕ੍ਕੋਨ੍ਤੇਨਾ’’ਤਿ ਵੁਤ੍ਤਂ. ਤਤ੍ਥੇਵਾਤਿ ਤਸ੍ਮਿਂਯੇਵ ਗਤਟ੍ਠਾਨੇ.
ਸਾਸਙ੍ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਪਰਿਣਤਸਿਕ੍ਖਾਪਦਵਣ੍ਣਨਾ
੬੫੭-੬੫੯. ਦਸਮੇ ਉਦ੍ਦਿਸ੍ਸ ਠਪਿਤਭਾਗੇਤਿ ਅਤ੍ਤਨੋ ਘਰੇਪਿ ਉਦ੍ਦਿਸਿਤ੍ਵਾ ਵਿਸੁਂ ਠਪਿਤਕੋਟ੍ਠਾਸੇ. ‘‘ਏਕਂ ਮਯ੍ਹਂ, ਏਕਂ ਇਮਸ੍ਸ ਦੇਹੀ’’ਤਿ ਏਵਂ ਏਕਵਾਚਾਯ ਆਪਜ੍ਜਿਤਬ੍ਬਤ੍ਤਾ ‘‘ਆਪਜ੍ਜੇਯ੍ਯ ਏਕਤੋ’’ਤਿ ਵੁਤ੍ਤਂ. ਤੁਮ੍ਹਾਕਂ ਸਪ੍ਪਿਆਦੀਨਿ ਆਭਤਾਨੀਤਿ ਤੁਮ੍ਹਾਕਂ ਅਤ੍ਥਾਯ ਆਭਤਾਨਿ ਸਪ੍ਪਿਆਦੀਨਿ. ਪਰਿਣਤਭਾਵਂ ਜਾਨਿਤ੍ਵਾਪਿ ਵੁਤ੍ਤਵਿਧਿਨਾ ਵਿਞ੍ਞਾਪੇਨ੍ਤੇਨ ਤੇਸਂ ਸਨ੍ਤਕਮੇਵ ਵਿਞ੍ਞਾਪਿਤਂ ਨਾਮ ਹੋਤੀਤਿ ਆਹ – ‘‘ਮਯ੍ਹਮ੍ਪਿ ਦੇਥਾਤਿ ਵਦਤਿ, ਵਟ੍ਟਤੀ’’ਤਿ.
੬੬੦. ਪੁਪ੍ਫਮ੍ਪਿ ਆਰੋਪੇਤੁਂ ਨ ਵਟ੍ਟਤੀਤਿ ਇਦਂ ਪਰਿਣਤਂ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਏਕਸ੍ਮਿਂ ਚੇਤਿਯੇ ਪੂਜਿਤਂ ਪੁਪ੍ਫਂ ਗਹੇਤ੍ਵਾ ਅਞ੍ਞਸ੍ਮਿਂ ਚੇਤਿਯੇ ਪੂਜੇਤਿ, ਵਟ੍ਟਤਿ. ਠਿਤਂ ਦਿਸ੍ਵਾਤਿ ਸੇਸਕਂ ਗਹੇਤ੍ਵਾ ਠਿਤਂ ਦਿਸ੍ਵਾ. ਇਮਸ੍ਸ ਸੁਨਖਸ੍ਸ ਮਾ ਦੇਹਿ, ਏਤਸ੍ਸ ਦੇਹੀਤਿ ਇਦਂ ਪਰਿਣਤੇਯੇਵ. ਤਿਰਚ੍ਛਾਨਗਤਸ੍ਸ ਪਰਿਚ੍ਚਜਿਤ੍ਵਾ ਦਿਨ੍ਨੇ ਪਨ ਤਂ ਪਲਾਪੇਤ੍ਵਾ ਅਞ੍ਞਂ ਭੁਞ੍ਜਾਪੇਤੁਂ ਵਟ੍ਟਤਿ. ‘‘ਕਤ੍ਥ ਦੇਮਾਤਿਆਦਿਨਾ ਏਕੇਨਾਕਾਰੇਨ ਪਾਲ਼ਿਯਂ ਅਨਾਪਤ੍ਤਿ ਦਸ੍ਸਿਤਾ, ਏਵਂ ਪਨ ਅਪੁਚ੍ਛਿਤੇਪਿ ਅਪਰਿਣਤਂ ਇਦਨ੍ਤਿ ਜਾਨਨ੍ਤੇਨ ਅਤ੍ਤਨੋ ਰੁਚਿਯਾ ਯਤ੍ਥ ਇਚ੍ਛਤਿ, ਤਤ੍ਥ ਦਾਪੇਤੁਂ ਵਟ੍ਟਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਯਤ੍ਥ ਇਚ੍ਛਥ, ਤਤ੍ਥ ਦੇਥਾਤਿ ਏਤ੍ਥਾਪਿ ‘‘ਤੁਮ੍ਹਾਕਂ ਰੁਚਿਯਾ’’ਤਿ ਵੁਤ੍ਤਤ੍ਤਾ ਯਤ੍ਥ ਇਚ੍ਛਤਿ, ਤਤ੍ਥ ਦਾਪੇਤੁਂ ਲਭਤਿ. ਪਾਲ਼ਿਯਂ ਆਗਤਨਯੇਨੇਵਾਤਿ ‘‘ਯਤ੍ਥ ਤੁਮ੍ਹਾਕਂ ਦੇਯ੍ਯਧਮ੍ਮੋ’’ਤਿਆਦਿਨਾ ਨਯੇਨ. ਸਙ੍ਘਪਰਿਣਤਭਾਵੋ, ਤਂ ਞਤ੍ਵਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਪਰਿਣਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਪਤ੍ਤਵਗ੍ਗੋ ਤਤਿਯੋ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਸਾਰਤ੍ਥਦੀਪਨਿਯਂ
ਨਿਸ੍ਸਗ੍ਗਿਯਵਣ੍ਣਨਾ ਨਿਟ੍ਠਿਤਾ.
ਦੁਤਿਯੋ ਭਾਗੋ ਨਿਟ੍ਠਿਤੋ.